ارجو التثبيت
أكيد طبعا أي واحدة وهي في فترة الحمل بتبقى متضايقة جدا وعلى طول متوترة وده نتيجة التغيرات الفسيولوجية والجسمانية اللي بتحصل لها في الوقت ده واللي بتكون السبب في إصابتها بنوع من "الاكتئاب"...
يعني بتحس إن مفيش حاجة لايقة عليها ،
ومالهاش مزاج تلبس.. مش عارفة تلبس إيه، أو تجيب إيه.. كل اللبس عندها حاجة واحدة والسلام لدرجة إن فيه ناس كتير جدا طول فترة الحمل مش بتجيب غير طقم واحد فقط وتفضل تلبس فيه لغاية ما تتم عملية الولادة ودي طبعا حاجة مش صح، لأن المفروض إنك تدلعي نفسك على الآخر في الأيام دي وتلبسي كويس وتهتمي بشياكتك حتى وأنت حامل لأن ده هيأثر على نفسيتك جدا..
علشان كده هقولك دلوقت على
شوية نصائح مفيدة تساعدك على اختيار الملابس المناسبة ليك في الفترة دي..
تعالي نشوف مع بعض
النصيحة الأولى
امتى تبدئي تشتري
شوفي يا قمر فيه حاجة مهمة جدا لازم تكوني عارفاها وهي إنك مش هتبدئي تحتاجي لهدوم جديدة خاصة بالحمل إلا بعد الشهر الرابع وده لأن بعد الشهر الرابع حجم البطن فعلا بيكبر وبالتالي هتحتاجي لملابس جديدة لكن قبل كده ممكن تلبسي لبسك العادي بس يكون فيه شوية وسع وبلاش الضيق..
النصيحة الثانية
دوري على الملابس اللي شكلها شيك
بما إنك ممكن تحسي بملل وزهق في أيام الحمل لأنك مش واخدة على جسمك في الوضع ده علشان كده عايزاك تبقي ذكية وتكسري الملل ده بأنك تختاري الملابس اللي شكلها شيك والألوان المبهجة زي "الأحمر أو البرتقالي أو الروز أو النبيتي أو التركواز وغيرها من الألوان اللي تخليكِ تحسي بالسعادة"..
وياريت تحاولي على قد ما تقدري إنك تبعدي عن الألوان الغامقة اللي زي "الأسود والكحلي الغامق" لأن الألوان دي كلها هتخليكِ تحسي بالزهق أكثر وأكثر ..
النصيحة الثالثة
اختاري الملابس الواسعة
طبعا اللي هتشوف الكلمة دي هتقول إيه ده ما أكيد أي حامل بتختار ملابس واسعة وهو فيه حد بيلبس ملابس ضيقة...
آه طبعا فيه ناس كثير بتحب الملابس الضيقة حتى وهي حامل بتجيب هدوم حمل بس بتكون ضيقة علشان كده ياريت تيجي على نفسك الفترة دي وتجيبي ملابس الحمل واسعة وياريت كمان تجيبي مقاس أكبر نمرة أو نمرتين عن المقاس اللي المفروض تلبسيه وده لأن جسمك في الفترة بيزيد كل يوم عن اليوم اللي قبله.
النصيحة الرابعة
اختاري الملابس القطنية
فيه معلومة ناس كثيرة مش عارفاها وهي إن الحامل بتعرق كتير علشان كده يا ريت تختاري الملابس القطنية أو على الأقل يكون القطن بيدخل فيها بنسبة كبيرة وده علشان تمتص العرق لو مش هتلاقي ده يبقى على الأقل خلي الملابس الداخلية بتاعتك تكون قطن ميه في الميه... وياريت دايما تعتمدي في اختيارك على الاقمشة الناعمة
النصيحة الخامسة
استغني عن الكعب العالي
ياريت طول فترة الحمل ترفعي شعار لا للكعب العالي نهائيا..
النصيحة السادسة
اختاري التصميمات المناسبة
ياريت تبعدي في اختيارك عن الأقمشة اللي بتكون فيها نقوش كثيرة لأنها مش مناسبة ليك واختاري الأقمشة السادة أو اللي بتكون فيها نقوش صغيرة علشان ماتظهرش بطنك بحجم أكبر من الحجم الطبيعي.
كمان ياريت تختاري التصميمات اللي تحسي إنها مناسبة لجسمك ولطبيعة عملك.
_ _ _ _ _ _ _ _ _ _ _ _ _ _ _ _
ودي مجموعة من التصميمات
اللي هتساعدك على الاختيار
قميص خاص بالحوامل.. مناسب جدا للمرأة العاملة ممكن تلبسيه على جوب أو بنطلون
بلوفر حمل يحميكِ من برودة الشتاء
جاكيت مع بنطلون جينز مناسب جدا للحامل ومعاه هتحسي أنك في منتهى الشياكة
ده كمان شكل جديد مناسب للحامل اللي في الشهور الأخيرة
ده شكل الجاكيت القطيفة اللي ممكن تلبسيه وأنت حامل
وكمان ممكن تلبسي فستان الحمل
يتبع
الحامل تدلع نفسها مع ازياء حصريا
