ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
قصص و روايات قصة أرملة مع ذكرى وفاة زوجها يوجد هنا قصة أرملة مع ذكرى وفاة زوجها روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية

فساتين العيد


 
قديم   #1

مغروره وبكيفي

:: كاتبة مميزة ::

الملف الشخصي
رقم العضوية: 131922
تاريخ التسجيـل: Aug 2010
مجموع المشاركات: 1,126 
رصيد النقاط : 0

قصة أرملة مع ذكرى وفاة زوجها


قصة أرملة مع ذكرى وفاة زوجها

--------------------------------------------------------------------------------

السلام عليكم ورحمة الله

هذي القصة حقيقية من صديقة لنا في منتدى ثاني روتها وكتبتها لنا
حبيت انقلها لكم حرفيا
وتدعون لزوجها بالرحمة والمغفرة
ترتيب الموضوع كان غير شوي لانها كتبته على جزئين وانا جمعته في موضوع واحد
أرجو منها السموحة
طبعا أنا وعدتكم أحكي لكم قصة وفاة زوجي والأحداث الي قبلها
أسويها وأنا مدري زوجي الله يرحمه كان مجنون بنتي جنايشتري لها ألعاب وينشدلها من راسه وكنت أنا على طول أصوره مع جنا فيديو ومرة قال لي يوه انت كل مامسكت جنا جبتي جوالك وتصوير كنت أقوله إيه خلي جنا تعرف أبوها وش سوى لها يوم كانت صغيرة عشان تبرك لاكبرت
وكنت أسجل أي أنشودة ينشدها لجنا
المهم زارتنا أخته وكان مع ولدها عربيه وكان حبيبي يركب جنا وينزل ولدها واحنا نضحك المهم ماتحمل وعلى طول رحنا السوق وشرينا لجنا عربيه وملابس وأشياء كثيرة واحنا طالعين يضحك ويقول هالنتفه الصغيرة تكلفنا الف وهي توها أجل لاكبرت وش بتسوي ونضحك انا وياه عليها لأنها عصبيه وماتعطي وجه الا بالموت واحنا بالطريق كان ينشد ويقول على لسان جنا
ياحظي ياحظي بابا شرالي عربيه
ياحظي ياحظي حلوة والله ورديه
ألعب فيها زي ما بي وأنط على كيفي
العب فيها لحالي محدينزلني منها
وانا ميتة من الضحك طبعا أخته ياقلبي كانت معنا
ومقاطع غيرها كثيرة
وصورته مع جنا وهو يأكلها سيرلاك وهي تدفه ماتعرف تاكل وهويغصبها وسخت ملابسه
وصورت الأغراض الي شراها لها أول مرة جاب لها سيرلاك وعضاضه ومصاصه وصحن بس همه يجيب لها وبس
سبحان الله وكنت إذا ابيه يصحى للصلاة بس أجيب لهاطبعا أبي أقولكم على شغلات كنت جنا ويقوم ومرة صورته وهو نايم وحاطة جنا جنبه وهي تجر شعره تلعب
هو مات فجر الثلاثاء الخميس الي قبله رحنا البحر وصورتهم مع بعض
يوه الصور وش أقول وش أخلي كل موقف صورته
وماكان واحد في الميه بالي اني اجمع هالصور والمقاطع عشان تتذكره جنا وهوميت موحي سبحا ان الله كيف الإنسان مايجي على باله الموت خصوصا ان زوجي في الثلاثينات يعني في عز شبابه
المهم قبل مايتوفى بإسبوع كان يشتكي من ألم في بطنه يجي ويروح
وكان اذا جاه الوجع بس يتشهد وانا استغرب هالشي المهم اخر ثلاث ايام مرة صار يتعب من بطنه وكنت أنا أجيب له مويه زمزم وأقرأفيها قران وأعطيه وكان يقول أنا أرتاح اذا شربت المويه المهم راح المستشفى قالوا له قولون وعطوه حبوب ومر اليوم الأول
اليوم الثاني غاب عن المدرسه وماقدر يروح وصحي من النوم واستغربت انه غايب لأنه ماشاء الله عليه مايغيب أبدا ألا لضرورة وهالضرورة ماجات بسم الله عليه
وجا اليل اليوم الثاني وكان بيروح ينام بس ماقدر وكان يرجع لي انا وجنا ويقول ماقدرت أنام وقعدمعنا للساعة الفجر 3
أقنعته ياخذ دش وفعلا تسبح وطلع بخرت له الغرفه وعطرتها وشغلت له القران في الغرفه وطلعت إلا شوي ورجع سألته وش تحس ياقلبي قال أحس بألم في بطني يطلع لصدري ويرجع طبعا انسدح في الغرفة الي قاعدين فيها ونام غطيته وطلعت عنه
اليوم الثالث :
صحا من النوم الساعة 10الصبح وقال لي سوي لي فطور وفعلا سويت له فطور وكنت انا صايمة وقعديمد فطوري طبعا سويت له فول وقبل فترة سويت له فول ومدحه قلت بذمتك موأحسن من فول مطاعم أبو زيد (طبعا من أشهر المطاعم بجدة )شوفوا الثقة
قال لي لاعاد موأحسن عاد انت لاتقارنين نفسك في مطعم متخصص بالفول وانا زعلت من زين العقل المهم هاليوم مدح الفول وقال والله العظيم ان هذا أحسن من أبو زيد وضحكت أنا وانبسطت
المهم مراليوم عادي وجا وقت الغدا سويت الغدا وتغدا طبعا جنا كانت ميتة من الصياح تخيلوا هالموقف كل ما أذكره أتعب شال السفرة وحط لي الأكل في حافظه قال عشان في المغرب تفطرين عليه ياقلبي ياحبيبي الله يرحمك تخيلوا لقيت الأكل بعديده ياعمري عليه
المهم في العصر سبحان الله طلع برا وقال لي سوي لنا شاهي بتقهوى مع الجيران وفعلا جلس مع الجيران في الديوانيه
بعدالعشا دق الباب طلع جارنا طبعا
دخل وسويت قهوة المهم الي بوصله سبحان الله اخريوم له وصل كل جيرانه كأنه حاس
دخل وكان في برنامج اسمه 99كان بعنوان أخطاء طبية وكان يحزن وكنت أنا أبكي بحررقة وهو ساكت بس متأثر مرة خلص البرنامج قال تبين شي من برا وعاد انا هليت الطلبات وراح جابها طبعا قال لي انا مقدر خلاص اكل شي في طماط وموالح حطي بس نواشف وبكرا سوي الغدا رز ابيض بس قلت له طيب وانا اضحك راح جاب خبز وتعشينا طبعا في شي كنت ملاحظته بس سكت اخر ثلاث ايام مايمسك جنا نهائيا بس يناظرها من بعيد ويكلمها وانا اتكلم بلسان جنا واقول تيب يابابا والله لوريك والله ماعاد اعطيك وجه وانا ظرفيه وهويبتسم بس موكعادته المهم واحنا نتعشا قعديأكل جنا قشطة ولاأكلت قام حط لقمتها واخذتها على طول واكلتها قام ناظرني كني بزر ويقول من سمحلك تاكلينها وضحكت انا طبعا شلت العشاورحت المطبخ نظفته ورجعت لقيته قاعديستغفرعلى اصابعه طول وانا جالسه على عالم حوا كالعادة بعدين قال يوه الساعة 11بروح أنام قلت له نوم العوافي يارب وراح الا وأسمع صرخته وجيت أركض الا وأشوفه قاعدبالصاله على الأرض ويتألم ويقول جيبي مويه واجيب يمكن طلبها 4مرات بعدين طلب مني سلة مهملات وجبتها وانا ابكي وهو طول ماهو يتألم يقول أشهدأن لاإله إلا الله وأن محمدا رسول الله
1. بعدشوي قال لي جيبي جوالي بدق على اخوي وانا قلت له ندق على الجيران رفض وقال نايمين ودق على اخوه وانا دقيت على ولد اختي وترجيته اروح معه بس رفض
وطلب ثوبه وفسخت له ثوبه ولبسته ثوبه الثاني ومشى على رجوله طلع من عندي وهو يمشي طلب مفاتيحه قلت ماراح تحتاجها انا مستحيل انام الا إذا جيت وكنت ابكي اذاسمعته يتشهدواقول انا وجنا بدونك مانسوى شي لاتخلينا أقسم بالله العظيم اني مدري وش خلاني اقولههابعدهادخلت المنتدى اسولف مع وحدة من صديقاتي وعلى بالي انه بيرجع وكنت اقول لها اني متضايقه من زوجي وهي كانت تقول انا طفشت من حياتي ابي انتحر ومدري ايش طبعا كنت كل شوي ادق على ولدأختي اتطمن وكان يقول كل شي تمام خلاص عطوه مغذي وبيرتاح شوي انا هنا ارتحت ودخلت المنتدى عادي الافجأة دق وقال ياخاله ادعي لفواز انا استغربت وقلت ليش اش فيه قال لابس تعبان شوي هنا جن جنوني وبديت اشك بس ماجا على بالي الموت ابدابدابدعلى بالي تنويم وبس شوي دق وقال ياخاله ادعي له قاعدين يسون انعاش لقلبه هنا ماحسيت بنفسي طبعا جنا وقتها كانت ميتة من البكا الله يهديها وتخيلوا شعوري وقتها اخذتها وركض على جارتي ادق عليها وفتح لي زوجها قلت وين فلانة طبعا كانت مسويه عمليه في ظهرها ماتقدر تقوم دخلت عندها وانا ابكي وبدون شعور كنت اقول لها فواز مابيموت صح فواز بيرجع صح وهي مستغربه وتقول ادعي له طيب طبعا انا رايحة جايه والارض موشايلتني وبردانة وخايفة وجنا تبكي وموقادرة امسكها وجارتي بعد ماتقدر تمسكها يالله موقف رهيب وكنت اقول لجارتي بروح بيتي اخاف فواز يهاوشني اني جيت عندك اخراليل وهي تقول لاخليك عادي انا بكلمه لاجا طبعا دق ولد اختي قال لي وينك ياخاله ادق البيت ماتفتحين يوه طاح قلبي الحين فواز بيعرف اني رحت لجارتي على بالي انه معه وطلعت شفته لحاله وشايله جنا قلت وين فواز متنوم قال طيب فكي الباب واخذ جنا وفتحت وسألته وين فواز طبعا ولد اختي عمره عشرين يعني هو يبي له من يصبره انهارمن البكا قلت شفيك وين فواز قال ياخاله وظمني سألته وين فواز قال انت مؤمنة بالله ياخاله قلت له مات انهار من البكا
موقفي بلاشعور
يمكن حاسين فيه على طول بدون شعور سجدت وقلت اللهم لك الحمدكما ينبغي لجلال وجهك وعظيم سلطانك وبعدها الصراحه بديت الخبط كنت امشي في البيت واقول فواز مات لالامامات وامسك الجدران ودخلت غرفة النوم اشوف مكانه مسكت ثوبه الي كان لابسه وظميته وبكيت واشم ريحته ودخلت المطبخ وشفت الأغراض الي جابها مومصدقه قاعدة أقول يمكن أنا بحلم يمكن أنا أتخيل يمكن ولدأختي غلطان
وطول ما أنا أفكر كان ولد أختي يقول تبين أوديك تشوفينه تبين أوديك تشوفينه فجأة انتبهت لكلامه وقلت يالله وديني وغيرت ملابسي بسرعه والله والله والله مدري وش لبست كان لبسي ملخبط مومرتب قال لي ولد اختي ياخاله وش هذا قلت يالله بس امش ورحت معه وطول الطريق اقول معقولةانا عمري ماطلعت مع أحد غير زوجي والله ماكان يرضى ابد اروح مع احد بس الحين لا انا رحت مع ولداختي هو وينه هو مات خلاص المهم وصلت مستشفى الملك فهد ودخلت أما إحساسي هذا موضوع ثاني رجلي موشايلتني وجنا ولله الحمد كانت ساكتة تتفرج ياقلبي مودارية ولاعن شي وقتها كنت اشوف البنات وهم يمشون في المستشفى سبحان الله مريضات والعباية مزخرفة ولثام والي حاطه خواتم وكلن في فلك يسبحون وانا قاعدة امشي بطئ وأقول لوهالبنات يدرون اني رايحة اشوف حبيبي ميت حبيبي الي قبل شوي متعشي معي بروح اشوفه كيف بيكون موقفي مدري مدري وكنت اشوف الشباب يمشون وأقول يوه هذول مايدرون عن قلبي وش يحس وجنا تناظر ماتدري شسالفة المهم مشيت بسيب طويل وانا افكر وكنت متخيلة فواز منسدح على السرير عادي كأنه في قسم الطوارئ بس لا فواز مومع الأحياء لافواز بمكان ثاني غير المكان الي فيه المرضى سأل ولد أختي الاستقبال وين المريض الي اسمه فواز وكان الرد الصاعقة فواز دخلوه الثلاجة
أيش ثلاجة يعني فواز فعلا مات
المهم مشيت معه قال ولد أختي نبي نشوفه قال طيب روح لذاك الرجال رحنا له قال بأي صفة قال هذي زوجته ناظر العسكري مومصدق قال تبي تشوفه قال ايه قال طيب روحو من هذاك السيب الثلاجة
واخرشي انقطعوا الناس وصار المكان فاضي كنت بإتجاه قسم الوفيات شفت الوحة ماصدقت وامشي وكنت خايفة على جنا واشوف الأرض اقول معقوله فواز مر من هنا بس وهوميت المهم وصلت اشوف لوحة زرقا الظاهر ومكتوب ثلاجة الموتى وشفت سيارة نقل الجثث هنا كني بديت أصدق طبعا مافي ولا مخلوق فتح ولد أختي الباب مقفل يوه معقوله بيني وبين حبيبي باب وهو متعشي معي لا مومصدقة
المهم قال ولد أختي خاله فيك حيل ترجعين معي ولا تنتظرين خفت وقلت له لا بروح معك ورجعت من نفس الطريق الطويل ولقينا الشرطي كلمه ولد أختي وقال ضروري زوجته تبي ترتاح المهم دق على مدير الوفيات وجا ومعه عسكري واحد دكتور واقفين قال انت بعقلك ولا لا
قلت ايه بعقلي الحمدلله هذي امانة وربي اخذها وانا ابي اشوفه عشان ارتاح المهم قال ممنوع خطرعليك هوالحين في ثلاجة والثلاجة البرودة الي فيها تضرك قلت خلها بكيفها والله والله والله والله والله العظيم وقتها جتني غصة يالله ثلاجة ايش الي ماكانت على بالي وعلى عمري فكرت فيها
واي برودة الي فواز بيحس فيها وانا ما أحس لاخليني ابي احس بالي يحسه وهيهات
المهم العسكري جر المدير ومدري وش قاله وبعدين قال لي سألتك بالله ماتهورين قلت اعوذ بالله كلنا لها كنت أحاول ابين اني قوية قدامه عشان يوافق ورجعت مع نفس الطريق المتعب
وصلت قام دق على باب قدام الثلاجة طلع فيه البواب المسؤول عن الثلاجة وكان شكله طويل وعريض قلت في نفسي يالله كيف يهنا له ينام هنا قبال الثلاجة المهم فتح الباب ودخل وقال تفضلي انا صراحة جاني خوف قلت لولد أختي تكفا شوفه انت اول لأني كنت خايفة اول مرة اشوف ميت ومين حبيبي كنت دايم اسمع اشرطة دينية وعن شكل الانسان اذا مات اما يرى ملائكة العذاب اوالرحمة ياربي طيب حبيبي اكيد شاف بس شاف مين قلت ادخل انت وتشوف دخل ثواني وجرني بيدي قال ادخلي ادخلي وقفني العسكري قال لحظة هاتي البنت انا خفت جنا تبكي من أي وجه غريب مستحيل بتسكت معه وبنفس الوقت مابيها تدخل وتشوف ابوها عطيت العسكري جنا ودخلت لقيت جدار كبير كلله ادراج ودرج واحد مفتوح فيه حبيبي جيت اركض لقيته مكفن زوجي حبيبي مكفن المنظر غريب زوجي الي يلبس أكشخ شي زوجي الي مو أي شي يعجبه زوجي الي مايرضى يجلس بمكان بدون فرشة جيت ولمست وجهه ثلج بارد مسحت على راسه وسلمت عليه وكلمته شفته والله يابنات هوماغيره حبيبي الي اجي اصحيه من النوم ماشاء الله عليه كأنه نايم وجهه عادي وجه واحد نايم بس الفرق انه بارد دعيت له واستودعته الله الذي لاتضيع ودائعه وطلعت وعطيته اخر نظرة واول ماطلعت شفت جنا مسكتها وظميتها ومشيت وانا مصدومة بس الله وقتها نزل علي الصبر الدنيا بوسعها كللها ضيقه علي قلت يالله ياهمومنا ركبت السيارة وانا اتخيل صورة حبيبي
تعبت والله من الكتابه لكن راح اكمل لكم لا تزعلون راح اكمل اليلة بس والله تعبت لأن الباقي اعظم
الي بقوله ان زوجي مات وهو رافع اصبع السبابه
قال للمرضة العلاج موعندك عندالله
زوجي مدخن يوم ركب السيارة قال لأخوه انا اشهدالله اني تبت من الدخان توبة نصوح سبحان الله
طبعا رجعت البيت وطبعا أهلي ثانية دقيت على أبوي وكلمته وحاولت أبين اني عادي قلت يابوي بقولك شي ترى انا الحمدلله بخير وبصحة وعافيه لكن فواز زوجي الله يرحمه وأبيكم تجوني
طبعا ابوي قال لاحول ولاقوة الابالله العلي العظيم وامي كانت جنبه قالت اش فيه والله يهديه على طول قالها زوج 0000مات امي انهارت من الصياح وماكلمتني وانا كمل الناقص عندي طبعا جاتني مرة اخوه الله يجزاها خير يارب وماكانت تدري إني أدري دخلت ولقيتني ساكته وعندي جارتي وانا لاشعوريا قلت انا شفت حبيبي ياقلبي عليه كأنه نايم وهنا انصدمت وقالت انا كنت شايله هم كيف أقولك بعدين جات أخته ونفس الشي ماتدري شسالفه تخيلوا شعوري ولاأحدمن أهله يدري أنا وخوه ولد أختي وبس الي ندري باقي أمه 00خواته 00اهله كيف راح يدرون
وهم ثانيه كنت شايله هم أمه كثير لأنها حنونة مرة وطيبة كيف راح يكون موقفها مين بيعلمها يوه أتعبني كثير هالشي كثير تعبني
طبعا اخته شكت بس ماجا على بالها واحد بالمية انه حبيبي مات وجات تسألني بس ماقدرت اردعليها وجاتني طبعا أكثر من وحدة من أقاربه ومرة عمه كانت ذوق خذتها بغرفة وعلمتها وانهارت طبعا
طبعا وصلني كلام من أخوانه إنهم لماغسلوه في المغسله كان وجهه أبيض مرة وريحته حلوة سبحان الله
باقي الحين حبيبي وين بيدفنونه وين بيصلون عليه
طبعا كلمت مرة عمه وقلت لها كلميهم يصلون عليه في مكة وطبعا أخوانه كانوا أكثر حرص مني إنهم يصلون عليه في الحرم
قدرالله ان إجراءات الوفاة تتأخر والفائدة الي صارت انه صلوا عليه صلاة العشاء والي كان رائع في الموضوع إنه في أول الأيام البيض
وكان الحرم زحممة ماشاء الله وسبحان الله دقوا علي بعض صديقاتي قالوا شفنا جنازة زوجك وكانت سريعة ماشاء الله يركضون وراها ركض الحمدلله وبعدماصلوا عليه راحوا يدفنونه في مقبرة الشرائع والعجيب سبحان الله انه تبع جنازته عددكبير أخوانه يقولون كان معنا ناس مانعرفهم غير طلابه الي شيعوا جنازته سبحان الله مع انه كان نوعا ماشديدعليهم بس من حبه وخوفه عليهم وكان دايم يشتكي لي عن خوفه عليهم وكيف انهم يضيعون أنفسهم
المهم جات الحظة الصعبة (إني أفارق البيت الي صرت ما أشوف فيه إلا ذكرى زوجي )
طبعا دعيت الله إنه يهون علي هذي الحظة وطلعت وأخذت بعض أغراض جنا المهمة وانا رميت كل ملابسي لأنها تذكرني فيه وطلعت لقيت أخواني حاطين سياراتهم مغطين فيها سيارة حبيبي
بس مستحيل إني كنت ماراح أودع سيارته ولفيت من عندسياراتهم ورحت لسيارة حبيبي اه ياقلبي قمت أشوف مكانه ومقعده ومقعدي الي كانت اخر مرة ركبته يوم الخميس يوم رحنا تمشينا وما أكذب عليكم بكيت ومسحت مكان المفتاح وركبت سيارة أخوي ومشيت الله يافواز يجمعني فيك بيت في الجنة وأملي عيوني بشوفتك يالغالي وأحكي لك وأسولف لك وأتخيل كيف بيكون شكلك يارب اطوي عني طول السنين يارب
كلام من در لزوجة المغفور له بإذن الله

أخواتي الله يجزاكم كل خير يارب أدعولي إن الله ينبت جنا نباتا حسنا ويجعلها داعيه إلى الله وأن يطوي السنين بسرعه على قلبي
أخواتي والله العظيم إني كنت إنسانة عادية مثلي مثلكم أدخل قسم الطبخ وقسم الجمال والأناقة وأستثقل الدخول إلى قسم الفتاة المسلمة مولإني عاصية ولا كارهة للذكر ولكن والله انه ضيق ما أدري ليش يجيني علما بإني ألوم نفسي وأتضايق
ليش أنا كذا موقته إني أتكلم عن نفسي لكن انا كنت مقصرة في العبادة والله يرحمنا وقتي كان أغلبه سوالف ولعب لكن الحدث الي صار لي خلاني أغير نظرتي 0 درجة يالله كثر ماكان قلبي معلق بالميك أب والملابس كثر ما الان نفسي عافت كل شي موبس كذا لا
أنا وقتها حسيت بخوف حسيت انه فعلا فيهجنة ونار (لاتفهموني غلط أنا مؤمنة بهالشي )بس انا عمري مابحثت ودورت عن الميت وايش يحس وهل يدري عن اهله لقيت نفسي ماأعرف ولاشي وكنت لما أفتح عالم حواء أدور شي يبردعلى قلبي الاقي كلن بهمه وانا بهمي الي محد بيعيشه وقتها إلا أنا والله يابنات والله كنت أدخل تجمع الأرامل بين فترة وفترة عشان أواسي خواتي وكنت أقول يالله ما أتخيل ياحياتي كيف صابرات هالأخوات وأقعدأهنيهم بالأجر وأنا مابيني وبينهم الافترة بسيطة وصرت وحدة منهم الحمدلله أنا راضية بس ماكان على بالي تعرفون يعني ايش ماكان على بالي
طيب باقي زوجي الغالي وش كان عليه قبل مايموت ؟؟؟؟؟؟؟؟
زوجي كان حريص على صلاة الفجرفي المسجد
زوجي كان فيه ميزة انه لايمكن يسمع بعزا الايروح حتى لو اخرالدنيا (وربي أكرمه )
زوجي كان إنسان عادي لكن كان يحترم اني ماأسمع أغاني ومايسمع
زوجي كان حريص وبقوة على أذكار النوم بالذات بالذات أكثر من أي شي
زوجي كان أول مايصحى من النوم يقول أشهدأن لاإله إلا الله محمد رسول الله والله لو بس يقوم كذا يتقلب يقولها
زوجي كان بار بأمه
زوجي كان يحب عمله ويخلص فيه لأبعدالحدود
زوجي كان له كتابات رائعة للشبا ولبنات وراح أحطها بإذن الله
هذي أبرزالأشياء الي كانت في زوجي الله يرحمه
الي أبي أقوله ترى الله رحيم بعباده فوق ماتخيلون ترى ربي غني عن عبادتنا ربي يبي منا إخلاص 00تأنيب ضمير في حاله ارتكاب ذنب 00ربي يبي نية صادقه
الأخوات الي أرسلوا يستفسرون عن إسم زوجي ايه هو الي الإسم الي أرسلتوه وأرجوا الدعاء له بالرحمة
فديت كل من واستني ودعت لي أولجنا أو لحبيبي والله يجعل ذلك في ميزان حسناتك يالغلا
وأنصح كل متزوجة إنها تعامل زوجها بالحسني لأن مثل ماقلت لك كل هذا من الشيطان والشيطان الخبيث راح يورثك الحسرة لوفقدتي زوجك ويعددلك محاسنه ومحي عيوبه بعكس لوكان حي يالغالية واصبري واصبري واصبري وابشري بالجنة
اخرشي بقوله وأعتذرعلى عدم التفصيل في الموضوع ياليت تحصنون بيوتكم بالذكر والقرآن واحفظوا أسرار أزواجكم وخلوها شي خاص وجميل بينك انت وزوجك وبس
خليك غامضة وراح تزيد هيبتك لأنك لو تكلمتي عن حياتك الشخصية ماراح تسلمين من العين
هذا أولا وثانيا لايجوز لإمرأة أن تفشي مايدوربينها وبين زوجها و طبعها الحياء لكن الي يصير هالأيام إنك ماتجلسين بمكان إلا محور الحديث عن الرجل والأشياء الي تجذب الرجل وكل وحدة تقعد تحكي كل موقف بالتفصيل ولأسف الوازع الديني أصبح ضعيف في أغلب البيوت وعشان كذا الإنسان عرضة للحسد0العين 00السحر والعياذ بالله وكثرة المشاكل كل هذا والله من المعاصي ولوكنت على غير معصيه إعلمي أخية إن هذا إبتلاء من الله العلي القدير


خجلا انة منكم وحدة وحدة انا كتبت الموضوع ودخلت اليوم لقيت الصفحات تعدت 60صفحة واستحي يت ياربي كيف بردعلى خواتي وحدة وحدة وانا اعرف اني لو اقول للوحدة صفحة كامله ماوفيتها حقها من الشكر لكن والله العظيم اني دعيت لكل وحدة ردت علي وحدة وحدة والي قرت قصتي وبكيت اقسم بالله اني وقتها تمنيت اني قدامك وامسحك دموعك بيديني وأقولك صحيح ربي ابتلاني لكن ربي رحي يم ربي أنزل البلاء لكنه بنفس الوقت نزل الصبر أنا ماأقولك اني حزينه لاوالله الابموت بالثانية الف مرة لكن الله ممتن علي بالصبرقاعدة أحمدالله اني شفته كأنه نايم ماشفته وهو مقطع يارب لك الحمد أحمدالله إنه مات متشهد مامات وهو قدام تلفزيون ولا على معصية أحمدالله إنه مامات محترق وهنا قلبي راح يحترق مليون مرة الحمدلله كماينبغي لجلال وجهه وعظيم سلطانه أحمدالله إنه مات واحنا مومتزاعلين ويكفيني إني قريت تفسير الأية (إنما يوفى الصابرون أجرهم بغير حساب ) المعني ان الله لايعطي الأجربمكيال بل يغرف لهم غرف يالله هالكلام يريحني وشي ثاني بعد الله ما إختارلي هالشي الا لخير الله يعلمه (وعسى أن تكرهواشيئا وهو خير لكم )
وقريت كلام بنات كثي يروكان مثل العسل على قلبي مثل الي قالت ان المحنة ظاهرها منحة
الي واسوني بأيات قرآنيه فعلا قريتها وارتحت
الي استدلوا بأحاديث على إن المبطون شهيد وأسال الله العلي العظيم أن يكون حبيبي شهيد
الله يجزاكم بالجنة يارب الله يطرح لكم البركة في أزواجكم وذريتكم والله ماراح يضيع أجر كل وحدة كتبت لي رد كان فيه مواساة لي وعساني أذكركم بس في الأفراح إن شاء الله


نفسيتي تعبت أتخيل الحظة الي اشوف فيها حبيبي يا اه ما أروعها من لحظة أشوف جنا وأحمدالله إن ربي عطاني ذريه وانا ابي العوض في الاخرة وطول الوقت أتخيل كيف راح يكون لقائي في حبيبي الله يجمعني انا وياه في مستقر رحمته
الي قالت لي إنها غيرت علاقتها مع زوجها يا ارب تؤلف بينهم وتبعدعنهم كل شيطان يارب
كلامك فرحني كثير فعلا ياقلبي ترى الزوج هو تذكرتك للجنة والله انك ماتضمنين كم بتقعدين يالغاليه ولا كم يقعد ولومات وهو زعلان وقتها بتعضين اصابعك من القهر تدرين ليش ؟؟؟
لأن الشيطان الله يلعنه وينتقم منه هدفه التفرقة بين الزوجين هذا اولا
ثانيا ادخال الحزن لقلبك وراح يدخله لك لو الله اخذ أمانته في انه يخليك تعاتبين نفسك وتلومينها على تقصيرك مع زوجك وياليتني سويت له كذا وليتني ماقلت له كذا طيب بعد ايش هالعتاب وش فايدته غير ادخال الهم والحزن لقلبك
أشكر كل وحدة كتبت لي لوكلمة وحدة سواء على العام أو الخاص وأتمنى تعذروني لأني تأخرت والله العظيم انه ماردني عنكم الا الشديدالقوي وبإذن الله بس انتظر اطلع من الازمة النفسية هذي وأشكر كل وحدة كتبت لي ردها الي كان مثل الثلج على قلبي ونصيحتي ياحريم التفتوا لأزواجكم وراجعوا أنفسكم زين زي ن و
نصيحة مني أعطي زوجك بدون حدود خليك معه كريمة في اخلاقك وقابلي الإساءة بالإحسان تحملي وتحملي وتحملي ولومافيه مقابل انت تبين الأجر من الله ولامن زوجك وصدقيني صدقيني صدقيني احساسك بإنه لك بيت انت مديرته وتتحكمين في كل ركن فيه واطفال حولك وزوج على الأقل يوفر لك الأكل والشرب وان كان مقصر في جوانب أخرى هذي نعم عظي يمة مارح تحسين فيها الاإذا فقدتيها أحمدي ربك على نعمة الأمن
على فكرة ترى من أكبر الأسباب الي ربطت على قلبي اني كنت أيام أحداث غزة تعبانة نفسيا ومحترقه وتعبت حتى زوجي الله يرحمه وكنت أقول له خلنا نشوف عشان نحس في غيرنا ونعرف نعم الله علينا لأنه كان يتضايق من كثر ما جننته ابيه يشوف معي ويشاركني احداث غزة وشفت مواقف كثيرة لهم وقتها كنت أقول والله لويموت أي أحد من هلي راح أحمدالله انه مات على الأقل مو بغدر من أعدائنا كنت أقول على الأقل يموت معزز و مو جثة مرميه ويطلقون رصاص للأسعاف عشان مايشيلونه والحمدلله زوجي مات لكن الحمدلله بدون حرق دم وأعصاب الحمدلله عندنا قبور يندفن فيها الميت بعدمايصلى عليه الحمدلله الحمدلله الحمدلله كل ماذكرت أحداث غزة أقول انا وين وهم وين
لو احنا نسينا جروحهم تراهم للحين جروحهم تنزفون كل واحد مافقد واحد وبس لافقد اغلب أوبعض أهله ان ماكان كلهم
الحمدلله ربي أخذمني حبيبي بس خلى لي شي من ريحته
بنتي جنا الي بإذن الله ربي بيبلغني فيها بفضله ثم بفضل دعواتكم الي والله والله والله اني مدينة لكم العمر كله لكن الأجر تلقونه من رب العالمين الي يعطي الأجور بغير حساب سبحانه اشكركم وحدة وحدة وأحب راسكم وحدة وحدة بيض الله وجيهكن الله يسخر لكن أزواجكن يارب
ملاحظة :لكل عضوة قالت انا صرت أخاف على زوجي وما أتخيل افقده أبقولها كلام يريحها
أولا الله كاتب له من يوم هوفي بطن أمه كم بيعيش وكيف بيموت
ثانيا:لاتضيقين خلقك وتشيلين هم شي ممكن يصيروممكن مايصيروقولي هذا الدعاء دائما
(اللهم إني أسألك إيمانا يباشرقلبي ويقينا صادقا حتى أعلم أنه لن يصيبني إلا ماكتبته علي والرضا بماقسمته لي ياذا الجلال والإكرام )
ودائ ما بعدماتصلين الفجر قولي (اللهم إني أستودعك زوجي اللههم احفظه بحفظك يامن لاتضيع ودائعه )
اللهم حصن فرجه وغض بصره وسمعه واكفيه بنات الحرام اللهم احفظه بحفظك
أنا من يوم تزوجته ادعي بهذي الأدعيه بعدالفجر لكن قدر الله في اليوم الي غاب فيه اني ما استودعته الله لأني تعودت الصبح اول مايطلع ألحقه وأقول الدعاء بعدماأقفل الباب جربوها الحركة تريح مرة



أخواتي أنا كتبت لكم غيض من فيض والله ما أبي زيادة صفحات كثر ما أبي كل وحدة تراجع علاقتها مع زوجها وتشوف هي صح ولاغلط
جزاكن الله كل خير ياأخوات لم تلدهن أمي
على وقفتكن الإنسانية معي والله لايضيع أجر المحسنين

منقول

مواضيع ذات صلة
ردوا بسرعه والله احس باحراج!!!!!!!!!!
ذبحتني قدام ربعك وانا اغليك..
قصة وفاة الرسول صلي الله عليه وسلم
قصة عن المسن تبكي الي مايبكي
قصة واحد يحب المقالب ادخل و شـــــوف
....اللحظات الآخيرة لوفاة الرسول...اقشعر بدنى وادمعت عيناى عند قرائتها
قصة : كانت يومياً تصنع رغيف الخبز
زوجه عندما قرأت دفتر ذكريات زوجها لم ترفع بصرها لثلاثه اشهر .!



 
قديم   #2

جميلة المصرى


رد: قصة أرملة مع ذكرى وفاة زوجها


قصة أرملة مع ذكرى وفاة زوجها

يشرفنى انى اكون اول واحده تردعلى موضوعك جزاك الله خيراً

 
قديم   #3

مغروره وبكيفي


رد: قصة أرملة مع ذكرى وفاة زوجها


قصة أرملة مع ذكرى وفاة زوجها

يسلمو ياحبيبتي
نورتي صفحتي بمرورك

 
قديم   #4

مصممة أزياء إسلامية


رد: قصة أرملة مع ذكرى وفاة زوجها


قصة أرملة مع ذكرى وفاة زوجها

جزاك الله خيرا

 
قديم   #5

مغروره وبكيفي


رد: قصة أرملة مع ذكرى وفاة زوجها


قصة أرملة مع ذكرى وفاة زوجها

يسلمو ياقمر ع المرور

 

أدوات الموضوع



الساعة الآن توقيت السعودية الرياض و الدمام و القصيم و جدة 10:01 AM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0