مسا البارِح على ذِكراك يا المجحود
خذاني لوين ما ادري بس يا الشاقـي
تمايل بي على ردون الورق عنقـود
وقمت أهش حبري واخنق اوراقـي
أدوِّرْني على وجهِـك وأنـا مفقـود
والاقيِنـي هِنـا باقـي بَـلا باقـي
تِذكرنـي بسيـف الله و الأخُــدود
ليا مِن ضاق صـدر الحـق بآفاقـي
وبِياضك من ورى عِبْس الليال السُّود
يِصِب النـور فـي عتمـة احداقـي
وتراتيلك على صهلة هبـوب النـود
تِدِك الخوف لا نفنف على اعماقـي
وسماحة وجهِك الطاهِر لنا يا عـود
يبشِّرني بطِيب الوقـت لـو ضاقـي
أشوفك طود , لكِن من يشوفك طود..
يموت بقيد ..أنت انسـان ارهاقـي!
أسد.. ليه الزّئير وما معك أسـود ؟!
تْضيْغم بأيش وانت بكف أنفاقـي ؟!
تِمْخلا بك زئيـرِك والزمـان قيـود
وتِغشْـواك السـواد ولاح بـرَّاقـي
يِسرّيني نحيبِِـك لاصـرخ مضهـود
من أصحابي وسيّد زمـرة اعراقـي
وثِرْت بـلا إلـه إلا هـو المعبـود
وثار مـن الغضـب ثلثيـن خفّاقـي
على دِهْم المهـار ونفحـة البـارود
اسوق الموت فيني ما انثنـى ساقـي
تِعِبْت أغمض عيوني ثـلاث عقـود
وانا ماعادت اخلاقي هي أخلاقـي !
يعود العِز .. ولا يا عسى ما يعـود
مادامـه يامِيَـةْ مِلْيـون مـا فاقـي
نبيع من الكرامـه الف..والمـردود
وِجَع خمسين,واعراقي وش أعراقي
أجل ما عاد بَهْ شـيٍّ لنـا يـا كـود
نسُوق الموت والباقي على الباقـي!!
كلمات الشاعر : محمد بن ساقان القحطاني
واتمنى ان يعجبكم موضوعي
