ورد زفافك على ذوقك حصريا

**shosho.ahmed** · 10-11-2008, 06:23 PM

عروسة على وش جواز ونفسِك تعرفي ازاي تختاري ورد زفافك بنفسك لأنك بتحبي تختاري كل حاجة بنفسك وخلاص اختارتي كل حاجة وفاضل ورد القاعة وبوكيه الورد..

بس للأسف معندكيش أي معلومات عن الزهور اللي ممكن تستخدم في مناسبة زي دي...

ولا يهمك من أي حاجة طول ما إنا موجوده
لأني قرة النهارده إننا ندخل عالم الزهور
ونعرف مع بعض
ازاي ممكن تختاري ورد زفافك على ذوقك..

الموضوع مهم جدا ارجو التثبيت للافاده

تعال معايه نعرف ازاي تختاري الورد المناسب

**shosho.ahmed** · 10-11-2008, 06:31 PM

شوفي يا عروسة بما إنك قرتي إنك تختاري ورد زفافك بنفسك يبقى لازم تاخدي بالك من شوية الحاجات دي...

-1-

استايل بوكيه الورد اللي هتمسكيه في إيديك يكون هو نفسه استايل الورد المستخدم في تزيين القاعة وده علشان يكون فيه تناغم بين شكل بوكيه الورد اللي في إيدك وبين باقي الورد الموجود في القاعة.

-2-

حاولي وإنت بتختاري الورد إنك تختاري أنواع من الزهور الموجودة في الموسم اللي هتتجوزي فيه وبلاش تدوري على ورد معين في غير أوانه؛ لأنه هياخد منك وقت كبير في البحث ولو لقيتيه هتلاقيه محتاج فلوس كتيرة علشان كده اختاري الورد المتاح قدامك.

-3-

حاولي تختاري ألوان الورد وأنواعه اللي تتلاءم مع شخصيتك ومع جو الفرح... أكيد بتسألي نفسك وتقولي: يعني إيه الكلام ده؟ ماتخافيش حالا هاقولك....
يعني مثلا

العروسة الرومانسية

لو كنت بنت رومانسية وناوية الفرح يكون فيه مثلا أغاني بتدل على الرومانسية في الحالة دي لازم تختاري نوع معين وألوان معينة من الورد بتدل على الكلام ده..

يعني مثلا ممكن تختاري بوكيه ورد يكون عبارة عن باقة من الزهور الطبيعية المنظمة بشكل تدريجي وياريت كمان تلفيها بشريط ستان صغير.

وبالنسبة لورد القاعة فممكن تجملي المكان بأقواس من الورود مع وضع بعض الأزهار في فازات لونها دهبي وفيه حاجة حلوة قوي ممكن تعمليها علشان تدي شكل لطيف للقاعة هي إنك تنشري أوراق الورد على الترابيزات.

وعلى فكرة أكتر أنواع الزهور اللي بتناسب البنت الرومانسية هي الأنواع دي..

ويا ريت ألوان الورود المستخدمة في البوكيه أو في القاعة تكون "حمراء أو روز أو بيضاء.

العروسة الكلاسيكية

فيه عرائس كتير بيحبوا إنهم يعملوا فرحهم بشكل كلاسيكي تقليدي وده بيميز أكتر الناس اللي بتحب الهدوء وفي الوقت ده يا ريت بوكيه الورد يكون عبارة عن مجموعة من الزهور المرتبة بشكل دائري متناسق مربوطة بإتقان وسيقان الزهور تكون ملفوفة بقماش من الحرير ويا سلام بقى لو شبكتي بوكيه الورد بدبوس من اللؤلؤ هتلاقي الشكل بقى أحلى وأحلى.

وبالنسبة لورد القاعة هتلاقي أنسب حاجة إنك تحطي فازات كبيرة في منتصف كل ترابيزة بها زهور صغيرة تكون ألوانها هادئة جدا.

وأكتر أنواع الزهور المناسبة هي الأنواع دي

ولو عايزة تخلي القاعة فيها نسبة النباتات الخضراء كبيرة يبقى ممكن تضيفي نبات "اللبلاب" في الأركان أو بين الترابيزات..

وبما إن احنا بنتكلم عن الشكل الكلاسيكي فهتلاقي إن أنسب ألوان ممكن تختاريها هي الأبيض والكريمي الهادئ والروز الفاتح جدا.

العروسة الروشة "المودرن"

لو كنتي بنت روشة ونفسك تعملي حاجة جديدة تشد الانتباه والكل يقعد يحكي ويتحاكى عنها لفترة طويلة يبقى يا قمر لازم تختاري زهور ذات ألوان مليئة بالحيوية.

فبالنسبة لبوكيه الورد اختاري فيه مجموعة ألوان كثيرة بس خدي بالك إن لونها يكون متناسق مع بعضه وممكن تزينيها بمشبك أو بروش أو بالأحجار الكريمة أو الريش.

بالنسبة للقاعة هتلاقي إن أحسن حاجة إنك تحطي فيها الفازات على مستوى عال في منتصف كل ترابيزة وممكن تستخدمي الشمع الملون لتزيين القاعة مع الورد.

أكتر أنواع الزهور المناسبة هي

وبالنسبة إلى الألوان بما إنك عروسة روشة يبقى هتلاقي الألوان المناسبة ليكي هي البنفسجي بدرجاته والبني (لون الشيكولاتة) والفضي والأصفر الشاحب.

-4-

لو كان الفرح في البيت فإنت لازم تراعي حاجات معينة في الزهور اللي هتزيني بيها البيت فتكون

زهور ألوانها تناسب لون المكان والفرش وممكن تجيبي مجموعة من الفازات وتحطي في كل واحدة منهم وردة واحدة وأحسن أنواع الزهور المناسبة هي زهرة اللؤلؤ الأبيض براعم الليلك (lilac)، سيقان التوليب (tulip) والأوركيـدا (orchid).

وبالنسبة للبوكيه لازم يكون بسيط ومربوط بطريقة سهلة وغير معقدة وممكن تزينيه ببعض عقود اللولي ويا ريت تختاري للبوكيه بعض الزهور الصغيرة وبراعم الزهور وبالنسبة إلى الألوان هتكون الأخضر والأزرق والأبيض أو الكريمي.

-5-

وبالنسبة للشكل اللي المفروض يكون عليه البوكيه فالشكل التقليدي للبوكيه اللي كان بياخد شكل منسدل أو الطويل مابقاش موضة والموضة دلوقتي هو الشكل المستدير.

بس يا ستي دي كانت شوية حاجات بسيطة علشان تعرفي ازاي تختاري بوكيه الورد وتعالي نعرف مع بعض ازاي تربطي البوكيه؟ وازاي تمسكيه في الفرح؟

يتبع

**shosho.ahmed** · 10-11-2008, 06:36 PM

بعد ما عرفتي ازاي هتختاري ورد البوكيه باقي حاجة مهمة جدا وهي ازاي تجمعي الورد ده وتربطيه مع بعضه بشكل شيك ودي حاجة بسيطة قوي...

كل اللي هتحتاجيه:

• ورد طبيعي.
• شريط لاصق.
• قطاعة.
• مقص.
• حبل أو سلك.
• متر تول أو ستان.

الطريقة:

1. قسمي الأزهار في مجموعات بالشكل اللي إنت عايزاه.

2. امسكي بالساق الرئيسي لكل مجموعة من الزهور (يجب أن يكون طول كل ساق حوالي 14- 18سم).

3. أحكمي كل مجموعة بالسلك وبعد كده اربطيها بالشريط اللاصق.

4. اجمعي كل المجموعات مع بعضها بالتصميم اللي إنت عايزاه ثم اربطيهم بالسلك ثم الشريط.

5. أضيفي بعض الأوراق الخضراء لقاعدة الورد ثم أحكمي ربطهم بالشريط.

6. بعد ما تتأكدي إنك ربطيهم كويس لفي الورد بالتول من قاعدة الورد واربطيه كويس وعلى فكرة ممكن تستخدمي شرائط ملونة للتزيين.

ازاي تمسكيه؟!

دلوقتي مش فاضل غير أهم حاجة لازم نتكلم عنها وهي ازاي تمسكي البوكيه وده لأن مش كل أنواع البوكيهات بتتمسك بنفس الطريقة..

فهتلاقي مثلا

البوكيه المدور أو على شكل قلب أو مدرج

بيتمسك بالشكل التقليدي ومن الأمام ولازم يكون منخفض عشان يبان الجزء الأمامي من فستانك وتمسكيه بإيدك الاثنين كما لو كان ذراعك مسنود على وسطك واوعي إن البوكية ييجي ناحية الوسط أو الصدر عشان مايغطيش تفاصيل فستانك.

لو كان البوكيه صغير أو فيه عدد زهور قليلة

ممكن تمسكيه بإيد واحدة وعلى جنب بس بمستوى منخفض برضه.

وخدي بالك إنك تمسكيه بطريقة مناسبة وطبيعية عشان يديكي شكل فخم وصورتك كمان وإنتي ماسكة البوكية تطلع حلوة وطبيعية من غير ما تغطي رقبتك وجهك أو تفاصيل فستانك.

وبكده يكون خلص كلامنا النهارده
بس قبل ما نقول سلام
بقول لكل البنات اللي على وش جواز ألف مبروك وربنا يتمم بخير وعقبال باقي البنات
وكمان أي بنت عندها أي استفسار أو سؤال يا ريت تبعت لي وانا هرد عليها على طول

**shosho.ahmed** · 10-11-2008, 06:37 PM

يارب الموضوع ده يعجبكم موستنيا تعليقاتكم الحلوه

**سيدة الموضة** · 10-11-2008, 07:06 PM

**سيدة الموضة** · 10-11-2008, 07:08 PM

موضوع رائع جدا جدا جدا

ومعك حق لازم يتثبت

**blackberry** · 10-11-2008, 08:18 PM

يسلمو يا عسل ع الموضوع التحفه

**shosho.ahmed** · 10-13-2008, 02:32 AM

مرسيه جدا علي ردودكم انا كنت عارفه انه هيعجبكم وفرحانه جدا انه عجبكم

**mshmshaia_87** · 10-16-2008, 06:01 PM

ميرسي يا قمر على ذوقك الراقي ياريت لو تساعديني في اختيار البوكيه بتاعي من حيث الالوان لان فستاني لونه فيروزي ومش عارفة اختار الالوان المناسبة معه ياريت لو تفيديني وشكرا

**shosho.ahmed** · 10-17-2008, 05:17 PM

تسلمي حبيبتي لمرورك العسل

ممكن تمسكي بوكيه متعدد الالوان مثل