مربات بفواكه الموسم حصريا

**shosho.ahmed** · 10-11-2008, 06:56 PM

السلام عليكم

الموضوع ده مهم جدا لربات البيت لاننا دخلنا دلوقتي علي موسم المدارس وطبعا الام بتحتار في سندوتشات الاولاد ولازم تنزل قبها تجيب كل احتياجاتها لحشو السندوتشات من جبن و مخللات ولحوم مدخنه وكمان المربه

والنهارده انا هساعد الام في تحضير المربي في البيت لتقليل التكلفه شويه علي ست البيت

وبطريقه سهله جدا وبسيطه

مربى التين أحلى أنواع المربات

المقادير:

• كيلو تين.
• ‏ كيلو سكر سنترفيش.
• عصير ليمونة.
• ربع معلقة صغيرة مسحوق قرنفل.

الطريقة‏:‏

1. هنجيب التين ونغسله كويس وبعد كده نقطعه إلى قطع صغيرة ونحطه في طبق صيني على هيئة طبقات وبين كل طبقة وطبقة هنحط سكر.

2. هنسيبه بالشكل ده لفترة تتراوح من 2 إلى 3 ساعات لغاية ما يخرج كل كمية المياه اللي موجودة فيه.

3. بعد كده نحطه على نار هادئة مع التقليب لغاية ما نلاقي السكر اللي فيه ذاب خالص.

4. بعد كده نضيف إليه عصير الليمون ونسيبه على النار لغاية ما يتعقد مع إضافة القرنفل المطحون إليه... ولازم ناخد بالنا إننا نشيل الريم اللي هيطلع على الوش أولا بأول.

5. لما نلاقي المربى استوت نشيلها من على النار ونسيبها لغاية ما تبرد وبعد كده نعبيها في برطمانات نظيفة ومفيهاش أي آثار للميه ونقفلها كويس وندخلها التلاجة.

مربى الجوافة ألذ أنواع المربات

المقادير:

• كيلو جوافة.
• كيلو سكر سنترفيش.
• نص كوب مياه.
• 2 معلقة كبيرة عصير ليمون.

الطريقة:

1. هنغسل الجوافة ونقطعها شرائح ونشيل قلبها علشان نتخلص من البذور الموجودة.

2. بعد كده نحطها مع شوية ميه على نار هادئة لغاية ما نلاقي إنها بدأت تلين، نشيلها من على النار ونسيبها لغاية ما تبرد.

3. هنضيف السكر إلى ماء السلق والجوافة ونحطهم على نار هادئة مع التقليب المستمر لغاية ما السكر يذوب.

4. هنضيف إليهم عصير الليمون مع استمرار التقليب لمدة 5 دقائق ونزع الريم اللي بيتكون أولا بأول.

5. لما نلاقي المربى استوت هنشيلها من على النار ونسيبها لغاية ما تبرد وبعد كده نعبيها في برطمانات نظيفة ومفيهاش أي آثار للميه ونقفلها كويس وندخلها التلاجة.

‏مربى "البلح السماني" حلوة قوي في السندويشات

المقادير:

• كيلو بلح سماني.
• كيلو سكر سنترفيش.
• عصير ليمونة كبيرة.
• قرنفل ولوز مقشر للحشو "اختياري"

الطريقة:

1. هنسلق البلح ونقشره ونشيل منه النوى.

2. هنحشي كل حبة بلح بنصف لوزة مقشرة أو حبة قرنفل.

3. هنضيف السكر إلى مياه السلق ونسيبه شوية على النار مع التقليب لغاية ما السكر يذوب وبعد كده نضيف إليها عصير الليمونة... مع التقليب المستمر وإزالة الريم اللي بيظهر أولا بأول.

4. عندما يبدأ المحلول السكري السابق في الغليان نحط البلح.

5. بعد كده نسيب المربى تغلي على النار ويتحول لون المحلول السكري إلى لون أحمر غامق ويبقى سميك القوام بس ناخد بالنا إننا نشيل الريم أولا بأول.

6. لما نلاقي المربى استوت نشيلها من على النار ونسيبها لغاية ما تبرد وبعد كده نعبيها في برطمانات نظيفة ومفيهاش أي آثار للميه ونقفلها كويس وندخلها التلاجة.

مربى العنب حلوة للي بيحبها

المقادير:

• كيلو عنب أحمر أو بناتي.
• 3/4 سكر سنترفيش.
• 2 معلقة كبيرة عصير ليمون.
• معلقة صغيرة قرفة او عود قرفة "اختياري"
• تفاحة.

الطريقة:

1. هنغسل العنب كويس ونحطه في مصفاة علشان يصفي المية اللي موجودة فيه.

2. هنقطع كل حبة عنب إلى جزئين ونشيل منه البذر.

3. هنغسل التفاحة ونسيبها لغاية ما تنشف وبعد كده نقطعها قطعا صغيرة ونشيل منها البذر ونضيف إليها معلقة عصير ليمون ونضيفها إلى العنب.

4. هنحط العنب والتفاح في طبق بلاستيك ونضيف إليهم السكر ونقلبهم كلهم مع بعض.. ونسيبهم لمدة من 3 إلى 4 ساعات لغاية ما العنب يخرج كل كمية المياه اللي موجودة فيه.

5. بعد كده نحطه على نار هادئة مع التقليب المستمر لغاية ما نلاقي السكر اللي فيه ذاب خالص.

6. بعد كده نضيف إليه عصير الليمون ونسيبه على النار لغاية ما يتعقد مع إضافة القرفة إليه... ولازم ناخد بالنا إننا نشيل الريم اللي هيطلع على الوش أولا بأول.

7. لما نلاقي المربى استوت نشيلها من على النار ونسيبها لغاية ما تبرد وبعد كده نعبيها في برطمانات نظيفة ومفيهاش أي آثار للميه ونقفلها كويس وندخلها التلاجة.

مربى الكريز مفيش أبسط منها

المقادير:

• كيلو كريز.
• 5 أكواب سكر ناعم.
• 1 كوب ماء.
• معلقة عصير ليمون.

الطريقة:

1. هنغسل الكريز كويس ونشيل منه النواه..

2. هنجيب حلة وهنحط فيها السكر والميه ونسيبهم على النار لغاية ما يغلوا كويس وبعد كده نضيف إليهم حبات الكريز وعصير الليمون ونسيبها على النار لمدة عشرين دقيقة‏‏ مع التقليب المستمر من وقت لآخر وإزالة الريم أولا بأول.

3. لما نلاقي المربى استوت نشيلها من على النار ونسيبها لغاية ما تبرد وبعد كده نعبيها في برطمانات نظيفة ومفيهاش أي آثار للميه ونقفلها كويس وندخلها التلاجة.

ملحوظة
لو عايزين نعرف إذا كانت المربى استوت ولا لأ؟ يبقى ممكن إننا ناخد معلقة من المربى وهي على النار ونحطها في طبق جاف ونسيبها شوية لغاية ما تبرد. وبعد كده نشوف إذا كانت سميكة ولا لأ؟!

مستنيا ردودكم علي الموضوع
يارب يعجبكم