السلام عليكم

شخباركن بنات ؟؟

بصراحه انا عندي مشكله وزهقت منها ومو عارفه كيف اتصرف
أنا عمري 21سنه وزوجي عمره 28
زوجي مايقرب لي نهائياً زواجنا كان عن طريق زوجة أخوي لأن زوجي يصير ولد خاله طبعاً حتى زوجة أخوي ماتقرب لنا بس خاله اللي هو عمي ابو زوجي صديق ابوي بالشغل
بتكلم لكم من البدايه وانتم احكموا وقولو لي رايكم
انا كثير كنت ارفض رجال يتقدموا لي وكانوا فعلاً نعم الرجال وتشهد لهم المجالس بالشي هذا كنت ارفض بسبب وبدون سبب وحتى الأسباب اللي ارفضهم فيها ماله اي معنى يعني مو مقنعه بس كانوا اهلي يسكتون انه لسى العمر قدامي لين وصلوا عددهم 10 خطاب بالنهايه تزوج اخوي وبعده تقدم لخطبتي زوجي امم ترددت كثير وكان ياصلني كلام انه يحب و الخ كنت اقول لأمي اي شي يوصلني بخصوص اللي تقدم لي من اللي اسمعه كانت تقول لاتصدقين اي كلام يجيك طبعا تأخروا بأخذ الرد عن غير المعقول شهر كامل بعده دقت ام الولد تاخذ الرد وكنت موافقه بعد ضغوط من الأهل وخصوصاً ابوي انه الى متى والكل بداء يسأل شفيها بنتكم ترفض اللي يتقدموا لها فضغطوا علي اهلي انه الى متى بترفضين بعد مافحصنا وانا مازال يجيني كلام انه يحب وحده ومادري شنو اللي كانت تقوله لي زوجة اخوي بصراحه كذبته لأنه هي كذوب يعني اي سالفه تجيبه تكذب وزياده على كذا لأن امه قبل طالبه زوجي يتزوج بنته قبل مايخطبه اخوي ورفض فتوقعت عشان كذا حابه تنتقم او شي بعد ماطلعت نتايج الفحص بشهر ملكنا كانوا يتأخرون بالمواضيع هاذي وانا كنت ازعل لأني ماتعودت ان احد يرفضن كشخصي تعودت انا ارفض ممكن تقولو مغروره بس صعب على الأنثى انه تنرفض المهم ملكنا وحددوا الزواج وماكانت بيننا اي مكالمات انا وخطيبي وانا كنت فرحانه بالشي هذا انا بطبعي خجوله وصريحه بنفس الوقت فكنت عارفه انه اذا كلمن بجلس اجامله وانا مابي الشي هذا ابد المهم بيوم الزواج ويوم صرنا بالفندق عادي جداً كان وكل شوي الجوال بيده ماكان يكلم كان يرسل سألني قال جوالك وينه قلت مقفلته ضحك قال يعني اقفل جوالي سكت مارديت عليه بعد مرور شهرين على زواجي وهو كانت علاقتنا عاديه جداً جداً وانا نسيت السوالف اللي كانت تجين يوم الخطبه عنه طبعا انا ساكنه بمدينه غير مدينة اهلي واهله المهم تعب عمي ابو زوجي وجا يراجع عندنا بعده بيومين جو اهل زوجي كلهم استقبلتهم احسن استقبال وهم عائله كثيره وانا شقتي صغيره وصارت زحمه على الأخر وجت ام زوجة اخوي وعياله عندنا بالشقه صارت الدنيا حوسه والله العظيم صارت اغراضهم من شناط وحوسه بغرفة النوم تبعي طبعا كنت اشتغل ليل ونهار 24 ساعه طبخ ونفخ وحوسه اشيل هذا واكنس هذا وارتب هذا كنت اقول فتره وتعدي وان شاء الله جلسوا شهرين عندي حمولتي وعمة زوجي اللي هي ام زوجة اخوي تروح فتره وترجع لأن حتى هي ساكنه برا المدينه اللي انا ساكنه فيها زوجي صار عصبي بصوره مو طبيعيه والأطفال تعرفن ازعاجهم كان يطلع ويهاوشن انا قدام الأطفال طيب انا وش ذنبي هم المزعجين مو انا والأطفال على طول الخبر يكون عند امهاتهم بعده تطور الوضع وصار يهاوشن ويصارخ علي قدام الكل ماكان يدافع عني الا عمي ابو زوجي والا الباقين سكوت او يوزعن ابتسامات ومره كان كذا يهاوشن قالت عمته ايه مشكله هالحريم اللي مايعرفن يسكتن البزارين عن رجالهن قال زوجي ايه عاد هي ابد جاهل ماتعرف شي ابد وانا جالسه اتفرج على الكلام قلت والله العيال عيالك وعيال خواته يعني كل وحده تسكت ولده وبيخف الازعاج عنه انا عجزت لا اسكتهم قال عمي هي صادقه وانتن وش حضرتكن ماتسكتن عيالكن زوجي عصب وقال تعالي للغرفه وبصراخ كان يقوله راح للغرفه ورحت وراه بصراحه لو ماتعب نفسه وراح للغرفه اصرف كان بصارخ يتكلم انتي طويلة لسان تردين على عمتي عمتي تاج على راسك وخواتي يسونك ويسون عشره من امثالك انتي حتى نص ولد ماجبتي لي انا هنا جلست اضحك غصبن علي قلت نص ولد اولاً لسى متزوجين عشان تحكم علي اذا اقدر اجيب اطفال او لا ثانيها اوك عمتك وخواتك على العين والراس بس وش تبين اسوي بعيالهن ماقدر عليهم انت تكلم معهن خل يمسكن عيالهن عنك وعن الازعاج المهم جلس يصارخ علي ولما فتح الباب بيطلع الا عمته وخواته واقفات عند باب غرفة النوم يتسمعن الهم مرت الايام كريهه وكل ليله انام وانا ابكي من القهر والطفش اللي انا فيه بعده قروا ينقلون للمدينه اللي انا فيها اهله نقلنا لبيت لكنه دور واحد وصرنا كلنا مع بعض وزادت المشاكل زياده خواته متزوجات لكن 24 ساعه مطيحات عندنا زين اذا مر يومين وماجن عمته توفى رجله وانقلت وصارت ساكنه عندنا هي وعياله وبناته صرنا حوسه وبنات عمته لبسن مره عاري قصير عاري بناطيل ضيقه وهن كبار وتغطن عنه بصراحه احس بنار شابه بصدري وانا اشوفهن يعني حتى تغطيهن خرابيط الوحده طرحه سودا وتمشي واليدين والرجلين طالعه انا وانا متزوجه استحي البس قصير وبناطيل ضيقه قدامهم المهم مره وحنا نسولف وطبعاً ماتخلو من النغزات لي كنا نتكلم عن القصير والخ قلت والله حرام انا بصراحه استحي اطلع كذا عند خوالي وعمامي وسكتنا لما شرف زوجي المصون قالت وحده من خواته فلان شفت زوجتك وش تقول لبنات عمتي تقول انتن ياتسترن بوسط هالبيت او اطلعن منه انا عيوني طارت وصراخ زوجي الكل يسمعه والله لو ماجا عمي وصار بيني وبينه كان ضاربني هن ساترات والا تبينهن مثل يالمتخلفه حتى اللبس ماتلبسين عندي والله اني اكشخ واللبس عنده بالغرفه وحتى برا اللبس واكون بقمة كشختي لكن الفرق اني مالبس مره عاري ولالبس قصير والبناطيل ماتكون ضيقه حيل علي يعني البيت مو بس انا وياه اهله وعمي واخوانه وعيال عمته يعني احراج صعبه البس كذا المهم انه من تزوجت ماشفت اهلي لابعيد الفطر ولا الأضحى صارلي 5 شهور لحضتها ماشفتهم ابد بعد السالفه بالليل وقت النوم دخلت قبله غرفة النوم وبعده بساعه دخل هو كنت مقره يكون نقاش بيننا بس يكون بهدؤ خصوصاً اني لاحظت عليه انه هادي عند اهله لما دخل كان ساكت وانا ساكته بعده بفتره تكلمت معه صار الغلط كله علي كل مابداء يصرخ طلبت يهدي ويتكلم وانه انا جالسه اتناقش معه بهدؤ عشان نحل هالمشاكل مو عشان نتهاوش حطني اني طويلة لسان واني اكبر غلطه بحياته كان يقول لو فيك خير كان طلبتي تروحي لأهلك مو 5 شهور شكل اهلك مو ذاك الزود ولقيتي النعمه هنا وماتبين الرجعه رفع ضغطي بكلمته هاذي قلت لما ماطلبت اهلك كانوا هنا مو بنات فلان اللي يتركن بيتهن وهن بوه ضيوف وبعده نقلو اهلك هنا وصارت هالمشاكل والحوسه عشان كذا وبعدين من لي شهر وانا اطلبك اروح هناك وانت رافض سكت قال طفي النور بنام المهم علاقته هي هي كل يوم مشاكل معه ومع اهله هو من جو اهله وعمته بالبيت وهو منقلب معهم يضحك ويسولف واذا جيت بداء يتصد عني وهم كذلك او يقومون ويتركون الغرفه كله وابقى انا لوحدي بعده تعبت وكنت مقره انه خلاص لازم القى حل للموضع هذا ومتفقين انه بعد اسبوع اروح لأهلي طبعاً تعبت ورحت عملت تحليل وطلعت حامل وبعد هالخبر هذا مادري افرح او ابكي او شنو اسوي كثير حلمت اكون ام بس مو بالضروف هاذي للمعوله انا يوم شفت المشاكل طلبت منه نأجل سالفة الاطفال بس هو رفض قلت لأمي باكل حبوب منع الحمل ورفضت امي وحلفت علي اني ماكلهن وماكلتهن كانت تقول مايصلح خصوصاً انك ماحملتي عشان تروحي وتاكلينهن راح يضرنك المهم حتى هو احس منصدم من الخبر الوحيد اللي حسيت بفرحته بالخبر هذا عمي ابو زوجي ام زوجي برضوا فرحت بس بالنهايه قالت لو تطلع الام مو هاذي كان الفرحه تكون غير ماقدرت اجلس عندهماكثر رحت لغرفتي وجلست ابكي لحد مانمت بعده رحت لأهلي البعض يقولو يطلقك غصبن عليه والبعض يقول لا عشان اللي بطنك صديقاتي زي اهلي مختلفات بالراي انا وياه كنا متفقين اسبوع عند اهلي بس اجلس والحين صارلي 3 أسابيع والله من جيت اهلي ماكلم الا 3 مرات وانا 8 مرات كلمته وبعده صرت اتركه بس كل بعد يوم ارسله رساله الا من لي اسبوع طنشته لارسايل ولامكالمات وهو كذلك بصراحه تعبانه مو عارفه شنو اسوي اتطلق واربي اللي بطني لحالي ويعيش ماهو بيت فيه امه وابوه او ارجع اعيش بالحاله ذي خصوصا اني ماطلبت بعقد النكاح يكون لي بيت لحالي لأنه ماتوقعنا ان اهله ينقلون عنده لأن له 8 سنوات بمدينه لحاله لكن بعد الزواج نقلوا
وللمعلوميه انا بطبعي مارد كثير عليهم يعني كثير يضايقون واسكت عشانه وهو اذا بداء يهاوشن اتكلم معه بهدوء بس هو حاطني اني طويلة لسان والله اني ابذل كل جهدي عشان ارفع راسه بين الناس واسعده بس هو مادري وش فيه حتى امه بعد الزواج قلبت علي والا اول فازه فيني حيل وحتى بداية زواجي كانت اشوا بس من له شهر وهي قالبه علي ليش مادري مع ان اعامله احسن معامله والله اني مادعيه الا غير يمه معتبرته مثل امي

شورن علي بنات وش اسوي وكيف اتصرف بجد تعبانه تعبانه ومحتاجه مساعدتكن