ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة صفحة ألم.... رواية حزينة مؤثرة مشوقة رائعة كاملة يوجد هنا صفحة ألم.... رواية حزينة مؤثرة مشوقة رائعة كاملة هنا تنقل الروايات المكتملة فقط

فساتين العيد


 
قديم   #61

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

وهني اول ما تدخل هند ولا بعبدالله قدامها .. وكان عبدالله يطالع التلفزيون ومعاه سلوم بعد ما طلعها من الغرفه ومجلسها جنبه ..

هند وهيه تعق عباتلها ونقابها ..: السلام عليكم ..

عبدالله وهو يبتسم ..: حيالله هند ..كيفج ..

وهني تكرر سلوم كلام اخوها ..: حيالله حند .. كيفج ..

وهني تبتسم هند وهيه تتقرب من سلوم وتبوسها ..: والله انا بخير ما دام سلومي بخير ..

وهني تبتستم هند وهيه تتطلع في اخوها عبدالله .: اهه عبود...كيف كان الدوام ..

عبدالله وهو يفكر ..: والله ماادري .. اصلا ما داومت .. بس انشاء الله بكره بروح وبعوض ..

هند ..وهيه مستغربه ..:خير انشاء الله .. عسى ما شر ..

عبدالله ..: لا والله .. بس كنت افكر انا نسافر هالسنه للندن ..

هند وهيه مستغربه ..: لندن !! .. وععععععع .. ام الضباب ولا مدينه الضباب مثل ما يسمونها !! .. ليش !! .. خلنا سير مكان ثاني .. والله نفسي اسير اثينا .. ما ادري ليش عاجبني الاسم .. اكيد منطقه حلوه ....

عبدالله .. وهو يبتسم ..: فالج طيب .. بس انا افكر اننا نسير بريطانيا اول شي مشان نفحص سلوم .. ومناك اتطمن على واحد من الشباب ونطلع وين تبون بعدين .. شنو رايج ..

هني استغربت هند ..: واحد من الشباب ..*وفجاه تذكرت .* .. ااااه .. انته تقصد خويك خليفه وسعيد .. صح !!!

عبدالله وهو يبتسم ..: عليج نور يا ام حبتور ..هاهاهاهاها.. شنو رايج ..

هني حست هند انها فرصتها على شان تنتقم من سعيد .. وانها تسير له في لندن ما دام سعيد مطول ... فتبدا هيه خطتها في انها تنتقم منه على شان خاطر محبه ..

عبدالله وهو يقاطع تفكير هند ..: هند .!! .. شنو رايج .. اشوفج سرحتي ...

هند ..وهيه تبتسم .: لا .. ما سرحت.. بس كان ودي اني اسافر منطقه او دوله ثانيه ..*هند قالت هالكلام وهيه ودها تسير للندن .. بس على شان عبدالله ما يشك في اي شي ..*

عبدالله .. : ما عليه .. خلينا نفصح سلوم .. ومناك نسير وين ما تريدين...

هند وهيه بطير من الفرحه ..: اللــــــــــــــــــــــــه .. وخيرا بنطلع اناوانته وسلوم .. *وهني تتذكر هند ..* .. لحظه .. وابويه وامي !! ..ما يبون يطلعون معانا !!

عبدالله وهو يأشر بكتوفه مثل ياللي ما يدري ..: لا والله ما ادري .. بس ابوي يمكن يسير على شان يخلص كمن شغله ..

هند وهيه تنزل راسها ..: يا خساره .. والله كان ودي انا نسير كلنا ولو مره وحده كعايله .. موب كل سنه كل واحد في مكان .. والله مليت من الطلعه من دون اي احد ..

عبدالله ..وهو يبتسم ..: لا تخافين .. هالمره انا مرتب لرحله عمرج ما راح تنسينها .. بس خلينا نفحص سلوم وبعدها نطلع ..

وهني تقاطعه سلوم وهيه تقول ..: عبدالله .. عبدالله .. ودندن ..*اونه لندن * .. فيها حلاوه !!

وهني يلتفت عبدالله في هند ويضحكون على سلوم ياللي كل همها حالوه ولعب ..

عبدالله وهو يمسك سلوم ويبوس فيها وهيه تضحك ببرائه وهيه طايحه تحت عبدالله وهو يقول لها ..: فيها الحلاوه لانج بتزورينها .. هاهاها..

وهني تستأذن هند من عبدالله على شان تسير تغير ملابسها ..



في الوقت هذا وفي بيت مطر ..

كانت ميثا ما يغضي لها جفن ولا يرتاح لها بال .. وكله الا تمشي بين الغرف والصاله ومطبخ .. وشوق تشوف انه ميثا مربتكه .. وخاصه انه اليوم بتكون عمليه خليفه .. وهني تلتفت شوق في ميثا وهيه تقول لها

شوق ..وهيه موب مستريحه من خوف ميثا وقلقها الزايد ..: ميثا .. ذكري الله .. من امس وانتي على هالحاله ..شنوفيج

وهني تلتفت ميثا في شوق وهيه تقول لها ..: والله ما ادري .. قلبي ناغزني يا شوق .. لا ساره بخير .. ولا خليفه بخير .. وساره الحين طافن عليها يومين ما نزلت من غرفتها .. وكله الا تبكي ولا طاعت تخبرنا ياللي في بالها .. وانا بروحي يالله يالله اشل عمري ..

شوق : يا ميثا ذكري الله .. تراه ياللي تسوينه في نفسج موب زين ..

ميثا ..: والله موب بيدي يا شوق .. والله انه قلبي ناغزني على وليدي ..

وهني يدق التلفون على شان يقطع الشك باليقين ..

وتربع ميثا وهيه مش حاسه بنفسها صوب التلفون وتشله وهيه كله جسمها ينتفظ من خوفها من الصدمه ..

ميثا وهيه تتكلم وصوتها مرعوش ..: هلا ..

وهني تلتفت شوف في ميثا ياللي بدت نظراتها تختلف ودموعها تنزل .. وهني بدت ميثا تصرخ وتبكي ..وكانت تتمتم بكلام ما ينفهم وهيه تنزل بعد ما كانت واقفه وترمي بالتلفون على الارض .. شوق ما عرفت وش ياللي مطر قاله لميثا.. بس اكيد انه شي موب زين .. هني بدت ميثا تبكي وتبكي وهيه تستند على الزاويه .. في هاي اللحظه تدخل روضه وهيه تربع من برا البيت لانها اصلا ما كانت عند ميثا ولا شوق .....

روضه وهيه بروحها تبكي ..: خير خير .. شنو فيه ..!!!! ....

شوق وهيه تدمع عيونها وهيه تحاول انها تلقى جواب من ميثا لانه حتى شوق كانت خايفه من انها تشل السماعه ويصيبها مثل ما صاب ميثا ..:: والله ما ادري يا خالتي .. اشوف ميثا تبكي وكله كلامها مش مفهوم بعد ما تكلمت في التلفون

روضه ..وهيه تحاول تمسك نفسها..: اعوذ بالله .... شنوف فيها هالبنت .. اقول .. انا توني نازله من سياره الدريول ولا بصوت ميثا شاق الارض .. شنو فيها !!!

شوق ..: والله ما ادري ..بس اكيد هذا خط من لندن ..

روضه وهيه منصدمه ..: من لندن وطول الوقت رامين السماعه !! .. عطيني السماعه ..عطيني السماعه ..

وتاخذ روضه التلفون وهيه تتكلم .. : الوو

مطر وهو يضحك ..: هلا والله ..خالتي !! ..

روضه وهيه تحتشر .. : تخلخلن حلوج العدو .. وش عندك من علوم .. تراه حرمتك قتلتنا .. خير .. وش من علوم عندك يا مطر .

مطر وهو بيطير من الفرحه ..: ابشري يا خالتي .. ابشري .. عمليه خليفه نجحت .. والدكتور يقول انها ان شاء الله من العمليات الناجحه ..

وهني بدت روضه تكبر ..: الله واكبر .. الله واكبر .. *ومن فرحتها ما قدرت تمسك عمرها ..وعلى طول زغرطت ..* .. كلو لو لو لولولولولووووووووووووووووووووو وووووووووووووووووووو
ووش ..

هني نزلت شوق على الارض مثل ياللي انطفت ناره وهيه الثانيه تبكي .. موب مصدقه انه خليفه نجحت عمليته ..

وهني بتلتف روضه والا الكل يبكي .. وهني ما درت بروضه غير بضرب قوي على السلالم ولا بساره نازله من فوق مسرعه بعد ما سمعت صراخ امها .. واول ما نزلت ولا بجدتها روضه تبشرها

روضه وهيه تدمع عيونها من الفرحه ..: مبروك يا ساره .. مبروك .. عمليه اخوج نجحت ..

 
قديم   #62

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

وهني بدت ساره تبكي وهيه ترتمي في حضن يدتها روضه ..

مطر وهو موب شالتنه الفرحه ..: اقول .. وش فيكم تبكون الخبر تراه يفرح ... ما يبكي ..

روضه ... وهيه تمسح دموعها وساره لين هذيج الساعه في حضنها ..: والله يا مطر وش اقولك .. نحن لا من جتنا صدمه بكينا .. ولا من جانا فرح بيكينا .. وحرمتك ما قصرت .. زيغتنا .. اثاريها تبكي فرح ....هاهاهاهاها

وهني بدى مطر يضحك من الخاطر .. بدى الكل يكلم مطر ويكلم سعيد ياللي كان جنبه ...لين جا الدور عند ساره .. وصل الدور عند ساره واول ما رفعت السماعه ولا بصوت يدخل حنايا قلبها وذيب الصبر ياللي كان مقومها من غرفتها ..ارتسمت حروف كلمات سعيد في اذن ساره وهيه تتذكر كلامه على انه ما يحبها .. بدت ساره تسرح وهيه تسمع صوت الانسان ياللي هجر قلبها لقلب ثاني .. بدى سعيد ينادي وهو يقول ..

سعيد ..وهو تدمع عيونه من الفرحه ..: مبروك عليج يا ساره نجاح عمليه خليفه ..

ومطر كان رايح يتوضا على شان يصلي ركعتين شكر لله ..

كان سعيد ينادي .. بس ساره تسمرت مكانها .. ما قدرت اي كلمه تطلع منها .. حتى ولو مجامله لسعيد ياللي كان يبارك لها .. هني هلت دمعه من عيون ساره قدام الكل وهيه ما ترد ..

هني مسكت ساره التلفون وصكرته من غير لا تحس ..

روضه وهيه مستغربه تصرف ساره ياللي تغير 180 درجه ...: ساره .. شنو فيج صكرتي التلفون ..


ساره وهيه تسير صوب السلالم ..وهيه سرحانه والدمعه في عيونها ..: اه .. شو .. لا ما فيه شي .. بس انقطع الخط ..

ميثا وهيه مستغربه ..وهيه تمسح دموعها بدع ما كانت تبكي من الفرحه ياللي شلت كل حركه في جسمها ..: صكر الخط ..!! .. مواحا ما انقطع !!..

وفي الطرف الثاني في لندن ..

سعيد استغرب انقطاع الخط .. في هاي اللحظه جاه مطر وهو يقول له ..

مطر وهو مستغرب لانه سعيد لين هذيج الساعه كان ماسك السماعه ..: سلم على الكل وقول لهم يتصلون فينا باكر

سعيد وهو يلتفت في مطر ..: اظنه الخط انقطع ..

مطر وهو ما كنه مستغرب هالشي ..: اي والله .. نحن في الطابق الارضي في المستشفى .. فطبيعي انه ينقطع الخط ....

هني حس سعيد بانه ساره تعمدت انها تصكر لانه صوت بكى الكل وشكرهم لربهم كان ينسمع .. يعني ليش ما انقطع الخط الا يوم وصل التلفون عند ساره ...

وهني تطلع ساره لغرفتها وهيه ما تدري ليش تشللت كل حواسها منها .. وتقوم ورمي بنفسها في الفراش وبدت تبكي .. بدت تبكي وهيه ماتدري ليش تحاول انها كره سعيد .. او انها تمسحه من بالها .. بس كبر سعيد وغلاته في قلبها تزيد ثانيه بثانيه .. وخاصه انها من سمعت صوته نست كل شي .. وبدى الجرح ينزف في قلبها من اول وجديد ..

وفي الطابق الارضي بدت روضه تحاتي على ساره ..

روضه ..وهيه مستغربه ..: اقول .. شنو فيها ساره.. لا يكون احد مزعلها فيكم ..

شوق ..: لا والله .. يا خالتي .. بس ساره من يوم ما سافر مطر والباقين الله يعودهم وهيه على هذي الحاله .. ما ادري شنو فيها ..

روضه ..وهيه مستغربه ..: بل .. من هذاك اليوم وهيه مش على بعضها !!!.. والله ما الومها .. اخوها وابوها مسافرين ..

وهني حست شوق انه ساره سمعت كلامها هيه وسعيد .. بس ما حبت انها تطري اي شي .. لانه الوقت ما يسمح ..

وهني تقوم روضه صوب غرفه ساره ..

ميثا وهيه تمسح دموعها بعد ما بكت فرح وحزن طول اليوم ..: وين يا امي سايره ..!!

روضه .. وهيه تبتسم ..: انا سايره صوب ساره اطيب خاطرها بكلمتين ..

شوق ..وهيه نفسها انه ساره ترجع الاوليه ..: اي والله .. حاولنا انا وميثا فيها .. بس شكل ساره ما تريد تخبر احد ..

روضه ..: زين والله .. ما عليكم .. انا بخليها تكلمني ..

 
قديم   #63

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

وتطلع روضه صوب غرفه ساره وتطرق الباب ..بس ساره كانت مثل العاده في فراشها .. وهني تدخل روضه لغرفه ساره ياللي صارت بارده ومظلمه في نفس الوقت ..

وهني تتقرب روضه من فارش بنتها وتجلس جنبها وبكل حنان وطيبه تحط روضه يدينها على فراش ساره وهيه تقول لها .. : ساره .. غناتي .. شنو فيج .. وش ياللي يعورج ..

ما ردت ساره .. كل ياللي بدى منها انها بدت تبكي بصمت وبعبره ..

هني ابتسمت روضه بكل طيبه وحنان وهيه تقول ...: ساره .. كلميني ..ليش تبكين .. احد مزعلج ..

وهني ما درت روضه غير بانه ساره ترمي بالغطى وترتمي في حضنها .. بدت ساره تبكي وهيه تحاول انها تمسك عمرها بس ما قدرت ..

روضه وهيه تمسح على راس ساره وتلعب باصبيعها ياللي طعن العمر فيهن بخصال شعر ساره الطويل ...: ليش .. كل هذي الدموع على شان خاطر سعيد يا ساره !!!

وهني تلتفت ساره بعيونها المندهشه في يدتها وهيه تسأل ..: اه .. سعيد .. *وهني بدت ساره تبكي ..والتزمت الصمت التام *

وهني ابتسمت روضه بحنان وهيه تقول لها ..: لا تستغربين يا بنتي .. تراني حرمه كبيره في الدنيا .. والعمر يا بنتي يعلم الواحد امور كثيره .. ولا تقولين اني يوم اضحك واسولف عند سعيد اني ما احس بنظرات الغيره ياللي في عيونج اشوفها يوم اقول انه سعيد خطيبي .. وانا يوم اقول هالكلام لاني ابا اتأكد من كل ياللي حاسه فيه .. انتي يا ساره فيج عيب ..

وهني تلتف ساره في عيون يدتها وهيه مستغربه كلامها ..ياللي طول هذيج الفتره كانت داريه وملتزمه الصمت ..

وهني تكمل روضه كلامها : والعيب ياللي فيج يا ساره انه ياللي في قلبج مطبوع في وجهج .. ملامح الغيره .. ياللي ترتسم في وجهج وانتي تسمعين الكلام في سعيد .. او الكلام ياللي لسعيد .. نبض قلبج يا ساره اقدر اسمعه لانه قلوب العشاق وصل نبض قلبهم للارض لتفتح لهم ابواب الاشواق .. انتي يا ساره تنور الدنيا في عينج لا من سمعتي طاري سعيد .... وش بالج لما تشوفينه .. بس الظاهر انج سمعتي شي عن سعيد كدر خاطرج ... ومشان جيه انتي تبكين .. صح ولا انا غلطانه ..

وهني بدى صدى العبرات يطلع من قلب ساره بعد ما حطم الحزن والدمع جدران قلب ساره .. بدت ساره تبكي وهيه تقول لجدتها ...: صدق يا يدوه .. صدق .. انا اعترف لج .. احبه .. والله احبه .. بس موب بيدي .. يا يدوه انا حاولت امنع عيوني ما تشوفه .. حاولت اني امنع قلبي انه ما ينبض بحبه .. بس شنو اسوي .. قلبي جبرني .. وانا له اسيره .. *وهني بدت ساره تبكي .. وحتارت شنو بتقول اكثر ..*

روضه وهيه تلعب بشعر ساره وهيه تقول لها ..: يا بنتي .. الحب موب بعيب .. بس بحدود الشرع وبحدود كرامتج .. يا ساره ما فيه احد في هالبيت ما يدري بحبج لسعيد .. الكل يدري .. وانا صدقيني ما استغرب انه سعيد نفسه يدري .. بس سعيد يا بنتي كرامته طيبته ما تسمح له انه يقول هالكلام .. وخاصه انه انسان كبير بطبعه .. وانسان ما يبيع قلوب البنات بكلمه منه .. والا كان شفتيه من زمان لاعب بقلوب النبات .. يا ساره الحب ما فيه شي .. بس بحدود الشرع وبحدود حفظ الكرامه وخاصه انه البنت ما تبيع نفسها للكلام الناس ولا تعرض نفسها للبيع لاي سبب .. حتى ولو كانت عواطفها تغلب عليها ....وانا ياللي اعرفه انه ياللي يحب يخاف على محبوبه وعلى سمعته .. بس الظاهر انج في الفتره الاخيره اكتشفتي شي .. صح يا ساره .. ولا ما كان حاولتي تنسينه وخاصه في هاي الفتره ..صح ولا جدتج غلطانه ..!!!؟

وهني بدت ساره تبكي وهيه تقول ..: ايه يا ايدوه .. سمعتهم يتكلمون.. سمعت كل كلمه قالوها لبعض .. سمعت كل كلمه نطقها سعيد وهو يقول لخالتي شوق انه ما يبيني .. وانه حتى ما يفكر فيني .. وخاصه انه خليفه اهوه ياللي موصيه حبه لي ..

وهني بدت نظرات الاستغراب تطلع في عيون روضه وهيه تشوف وتسمع كلام ساره .. كان منظر ساره متحطم .. كانت تشوف فيه ملاك ينزف وهو يطلع العون والمساعده من ناس ما في قلبها رحمه .. حست روضه بانه قلبها بينخلع وهيه تشوف دموع ساره تنزل مثل الدرر على خدها ..

وهني بدت ساره تكمل وهيه تقول ..: يدوه .. ابا انساه .. ابا اقتل سعيد في قلبي . بس كل زجاجه تنكسر فيها صوره سعيد في قلبي تزرع صور ثانيه .. وتكبر في قلبي .. يا يدوه انا حاولت .. بس الظاهر اني اسيره لقلبه .. اسيره له .. وش اسوي .. وش ياللي اقدر اني اسويه ولا سويته ..حاولت اكرهه .. حاوت ابعد صورته عن بالي .. بس جيشه غلب وكسح كل القوات في قلبي .. وحتل كل شي .. صرت رهينه له..

وهني حاولت روضه انها تكتم حزنها .. بس كلام ساره كان ثقيل بشكل ... وخلى حتى روضه تحزن من قوه حزن ساره .. خلت روضه بروحها تفكر .. وتحس بكثر وش هيه متعذبه .. وهني حالوت روضه تطيب خاطر ساره .. بس مهما تقول روضه من كلام يرفع المعنويات .. قلب ساره غرق في بحر الهوا .. ولا هو بسعيد الحظ ياللي يغرق في بحر الهوا.. بحر الهوا بحر عميق .. ما يقطعه غير المحظوظ وياللي الله يكتب له القسمه .. وياما غرقت مراكب للعشاق في هالبحر ولا ينجو من عواصفه غير من يكتب له الله السعد عند عشيره ....


مرت يومين .. تخلل هذيلا اليومين تحسن صحه محبه .. وخاصه انها بدت ترتفع معنوياتها بوجود صديقات مثل هند وعايشه ومنال ..ونوره والعنود .. وياللي كانت ما تقدر تزورها كانت ما تقطعها من الاتصالات .. في خلال اليومين هذيلا بدت صحه خليفه تتحسن .. بس ساره استمرت على حالها .. لا نوم ليل .. ولا حياه في النهار.. انسانه شبه مشلوله .. بس الشي المهم ياللي حصل هوه انه تم ترتيب بيت حمد .. وتم ترتيب الاغراض ياللي فيه ..


وفي بيت هلال او بيت حصه بالاصح ..

يدخل عز الدين *سواق حصه * ومعاه كمن صندوق ..

حصه وهيه في الصاله ..: اقول .. يا عز الدين ..حطها في المستودع ياللي برا .. تراه ريحه الصناديق خايسه .. اخيييييييييييييييييييييييييه ...


عز الدين ..: حاظر يا مدام ..

وفي هاي اللحظه تنزل هند ولا بعز الدين توه مطلع بعض الصناديق ..

هند وهيه مستغربه ..: بل .. شو هالريحه ..

حصه وهيه تلتفت في بنتها هند ..: هذيلا اغراض خالتج مريم .. جبناهن من البيت القديم .. وبشوف الشي ياللي اباه وباخذه .. الشي يالي ما اباه راح اقطه في الزباله ..

هند وهيه متلهفه ..: امي .. اقدر احتفظ بالشي ياللي ما تبينه .!!

حصه وهيه مستغربه .: وليش يا حسره .. !! .. من قل الاغراض ياللي تبينها ..

هند وهيه تبتسم ..: لا ياامي .. ابهن لشي خاص ..

حصه وهيه تحط يدينها على بعض وتلعب بحيانها ..: عشتو ... هنود صارت لها خصوصيات .. هاه .. من متى !!!

وهني حست هند انها راح ينغسل شراعها لو تقول عما في خاطرها مشان جيه غيرت الموضوع...... بس عبدالله كان من فوق كان يسمع كلام هند ويا امها .. وحس انه صار لازم يعرف وين تسير هند وتختفي ..وخاصه انها تختفي يوم الجمعه في وقت واحد من كل اسبوع .. فقرر انه يتبع هند ويشوف وش ياللي تسويه ..



مر الوقت .. ودخل يوم الجمعه .. والوضع مثل ما هوه.. ما فيه شي تغير .. غير انه عبدالله قرر انه يكشف سر طلعات هند في يوم الجمعه وخاصه انها ما ترد غير بالليل .. سار عبدالله من الصبح للدوام وطلب من ابوه انه يتسلف سياره الشركه لانه ما يبي هند تكشفه فوق اي سياره .. وخاصه انها تعرف سيارات البيت كلهن .. وابوه ما قصر ..على طول اعطاه السياره ...

دخل الوقت .. مثل العاده طلعت هند من البيت وهيه مش على بالها انه عبدالله من بيعد يتبعها .. وقفت هند عند وحده من كبار السوبر ماركت وطلعت باغراض كثيره .. منها حلويات .. ومنها العاب .. وماشياء ما تنعد ..حتى انه سياره هند بالكاد تشل هالاغراض ..

وبدت هند تسوق السياره وهيه تدخل بين بيوت وحارات .. وعبدالله وراها بسياره الشركه على شان هند ما تحس بوجوده .. بدت هند تدخل لين وصلت لمبنى كبير .. كان المبنا ضخم وحوله يوجد جدار سميك وعالي .. وفوق الجدار كان فيه اسلاك كنه مسكن للطلبه .. ويتوجد لافته فيه .. بس عبدالله ما انتبه لها ..ولا بحارس البوابه يفتح الباب وهو يضحك ..هني لمح عبدالله ابتسامه اخته من بعيد .. واول ما دخل ولا بمجموعه بنات والاولاد في عمر الزهور ما بين الخمسه والعشر سنين ... يربعون صوب سياره هند ..كان منظر غريب بالنسبه لعبدالله وخاصه انهم بدو يمسكون يدين هند ويجرونها داخل المبنى .. وكلهم لهفه وضحكات بريئه .. .. ماعرف سر وجود اخته في مدرسه داخليه .. وهني تقرب عبدالله من البوابه ولا بالحارس ينادي عليه ..

الحارس وهو ينادي بخشونه .: حوه .. أنته .. شنو تدور !!!

عبدالله وهو ينزل الدريشه ..: اقول اخوي .. وين هذا المكان ..

الحارس وبخشونه ..: ما عندك عيون تقرا الافته ..!!!

وهني ينبته عبدالله للافته ..كان مكتوب عليها .."مركز ودار الايتام " ...هني خنقت العبره عبدالله يوم كان يسأل نفسه وين تيسر هند .. طلعت هند تسير كل جمعه لهذا المكان على شان تزور اليتاما .. وهني يوقف عبدالله السياره بيعد ويسير صوب الحارس ياللي كان يناظر عبدالله بنظرات كلها غرابه ..

وهني تقرب عبدالله وهو يقول ..: اقول اخوي .. هذي البنت ياللي توها دخلت ... هل دوم تجي هني !!

الحارس وهو معصب ..: سود الله هالويه .. استح على وجهك ... انته ترضاها لخواتك انه احد يسأل عليهم ..

وهني ابتسم عبدالله وهو يقول ..: لا .. لا تفهمني غلط .. انا اخو هالبنت .. بس حبيت اتطمن عليها .. بس هذي كل السالفه ..

الحارس ..وهو يضحك باستعباط ..: هاها ..تضحك انته على من . لو اختك ما كان تلحقها مثل الحارمي .. استح على وجهك .. اقولك يا ولد الناس .. غيب عن وجهي قبل لا اتصل بالشرطه ..

وهني يقاطعهم من بيعد صوت المديره ياللي كانت تدير الميتم ..: يا فاروق .. منو عند الباب ..

الحارس ..: هذا واحد يقول انه اخته موجوده هني ..

وهني على طول تجي المديره بعد ما كانت في الساحه ...

المديره وهيه تسلم ..: السلام عليكم .

عبدالله وهو محرج ..: وعليكم السلام ..

المديره .. : خير يا الطيب .. اشوفك هني .. ومنو اختك!!

عبدالله وهو محرج لانه هذا الشي راح يحرج حتى هند معاه .. : اختي يا حضره المديره هيه صاحبه السياره ياللي توها دخلت ..

وهني ابتسمت المديره ..: زين ما دام هيه اختك .. ممكن تقولي اي معلومات عنها .. وانا بشوف مقدار صدقك ..

عبدالله وهو يبتسم ..: اسمها هند .. وتجيكم كل يوم جمعه في مثل هالوقت .. وخاصه انها بس من مده غيرت جدولها .. لانها اكثر الاوقت كانت تطلع يوم الاربعاء والخميس ..

هني ابتسمت المديره وهيه تقول ..: يا حيالله باخو الكريمه ..

عبدالله ..وهو مستغرب ..: الكريمه !! .. انتوا مسينها كريمه !!

المديره ..: لا .. بس الاطفال سموها الكريمه .. لانها كريمه معاهم .. ولا ترد طلب لهم .. حياك يا اخوي .. خلني اشوفك نشاطاتنا.. حسى بس تكون مثل اختك ..

عبدالله .. وهو يبتسم ..: انا ما اقرد على ياللي اختي تسويه .. اختي احسن عني ..

المديره وهيه تبتسم .: كلكم بركه .. والله ارسلها لهذيلا اليتاما ..

وهني تلف المديره بعبدالله في كل الاقسام وتشوفه النشاطات ياللي يقومون ابها لليتاما ...

وهني وصل عبدالله لوحده من الغرف كان عليها لوح زجاج كبير مثل ياللي يسمح للواحد انه يشوف شنو داخل الغرفه ....كان المبنى من داخل لونه ابيض على الطروف .. وازرق سماوي على الجدران .. كانت في هذيج الغرفه هند ومعاها شله من الاطفال .. الكل كان ينط على ظهر هند وهيه جالسه تلعب مع البنات ياللي كانن في مثل عمر سلوم او اكبر .. حس عبدالله بالعبره تخنقه وهو يشوف الابتسامه في وجه هند ياللي كان كله حزن في الايام ياللي كان ما يعرف اخته زين ... شاف انه فيه نور يشع من عيون اخته ياللي كان الكل حولها يضحك ويلعب معاها .. وهني صاح واحد من الاطفال ..

الطفل ..: المديره موجوده ومعاها رجال .. ومعاها رجال ..

وهني استحت هند ولتفتت ولا بعبدالله يبتسم لها .. وهني قالت هند وهيه ما تدري بعمرها .. عبدالله !!!!!

وحده من الطفلات الفضوليات قلت سألت هند ..: منو عبدالله .. !! ..

ابتسمت هند وهيه تقول لها ..: هذا اخوي العود ..

وهني الكل بدى يصيح وينادي .. .. هيييي .. اخو الكريمه وصل .. اخو الكريمه جاب لنا العاب ..

وهني يطلع شله من الاطفال ويمسكون يد عبدالله ياللي وقف مستغرب ومستحي من اخته ياللي كان تبعها وحس بالخزي يوم انه بتع اخته .. بس كان كله هذا لمصلحتها .. وهني يجرون الاطفال عبدالله بيدينه لداخل الغرفه ..

وهني تبتسم هند وهيه تقول ...: هاه عبدالله ..عرفت الحين اختك وين تختفي الايام ياللي كنت تسألني عليهن ..

عبدالله وهو يبتسم .. ووجه صاير احمر من الفشله ..: ايوه .. عرفت .. وصرت افتخر اكثر باختي ..

وهني ابتسمت المديره وخلت عبدالله ويا هند يلعبون ويا الصغاريه ..


مرت حدود الخمس ساعات وعبدالله وهند يلعبون عند اليتاما .. لين جا وقت النوم .. وهني طلع عبدالله وهند بعد ما وعدوا الاطفال بزياره جديده ومعاها هدايا كثيره ..

طلع عبدالله واخته هند من المبنى وهني التفت عبدالله في اخته وهو يقول لها ..

عبدالله وهو مستحي ..: هند ... ممكن نسير في سياره وحده ..

هند ..وهيه تبتسم ..: زين .. بس بشرط..

عبدالله .. : انتي تامرين ..

هند وهيه تبتسم ..: نسير للشاطئ .. ابا اشوف البحر بالليل بدون قمر ..

عبدالله .. وهو يبتسم .: انتي تامرين امر ..

وطلعون عبدالله واخته هند للشاطئ وينزلون ..كان البحر مظلم .. بس نور النجوم كان وايد روعه .. كانت النجوم تتزايد .. وصوت الموج وهو يضرب ساحل الشاطئ في قمه الروعه .. وهني جلست هند على الرمال وهيه تلبع بشط الموج والرمال ..

وهني يجي عبدالله ويوقف قوق انته .. وهني قاطعه سؤال هند ..

هند وهيه تلعب بالموجه ..: عبدالله .. ليش انته لحقتني ..

عبدالله وهو عيونه لبعيد ..: لاني يا هند خايف عليج.. وربي اني كنت خايف عليج ..

هند ..وهيه تتعمق اكثر ..: عبدالله .. نشدتك الله.. هل كنت تشك فيني بشك موب زين ..

عبدالله ..وهو ينزل نظره في هند ياللي كانت حاطها راسها على ركبها وهيه تلعب بالموج ..: لا والله وانتي حلفتيني بالله .. ليش هالسؤال يا هند ..

هند وهيه قريب لا تصيح ..: لاني احس انه اهلي معطيني الحريه الكامله . واي بنت في مثل حالتي مليون في الميه راح تضيع وتضيع مستبقلها .. وخاصه انه الحريه لها حدود ... وانا اشوف كل ربيعاتي اهلهن متشددين عليهن غيري انا .. ولا مخلوق يقول لي وين تبين .. ولا ليش طالعه .. احس اني يتيمه .. حتى وانا وسط اهلي ..

عبدالله ..وهو يبتسم .. ويجلس جنب اخته ..: هند .. انتي على شان جيه كنتي تسيرين للمركز!!.. لانج تحسين باللي يحسونه ..

هند وهيه تهل دمعتها ..: تبا الصدق ..

وهني يلتفت عبدالله في هند ياللي بدت تهل عبراتها ..: اي نعم ..

هند ..وهيه تدمع وتحفر في الرمال ..: من الله خلقني وانا يتيمه .. عمري ما حسيت انه عندي اهل .. كنت مثل هذيلا اليتاما ياللي شفتهم .. رغم انه اهلي معاي .. بس شعوري باليتم ما عمره فارقني . احس عمري وحيده .. تايهه ... حتى ولو كنت وسط اهلي

عبدالله وهو يحاول انه يدافع عن اهله ..: بس انتي وسط اهلج يا هند .. وهم بدون اهل ..

وهني تقاطعه هند .وصوتها خلطته عبره ..: وشنو الفرق .. نفس الشعور .. على الاقل هم عندهم امل انه اهلم ماتوا وهم يحبونهم .. بس انا اشوف اهلي عايشين ويذوقوني الموت في كل ساعه وحين.. يا عبدالله اشوف امٍ هجرت عيالها للخدامات .. وابو كل همه يمزر جيوبه فلوس .. واخ هايم على وجهه وما يناظر للي وراه .. واخت كله تبكي وتتشكى . ولا تعرف وشي ياللي يرضيها .. وياللي مايرضيها .. مشاعري يا عبدالله صارت مضربه هذيج الايام ..

وهني قبل لا تبكي هند يقاطها عبدالله وهو يبتسم ويقول ..: والحين ..

 
قديم   #64

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

وهني بدت هند تبكي وهيه تغطي على وجهها ..: والحين رجعت ليه بقايا روح.... رجع ليه الانسان ياللي كان يسير ولا يلتفت خلفه .. رجع ليه بعد ما شده صوت الصراخ والبكي .. رجع ليه اخوي .. واختي الصغيره بديت افهمها لانها تعيش الحاله ياللي انا عشتها وانا صغيره .. بس امنيتي يا عبدالله امنيتي قبل ما اموت اني اشوف امي وابوي وكلنا نعيش في بقيت واحد اساسه الحب وجدرانه الحنان .. ونوره الرحمه ياللي بينا .. واكلنا حبٍ يترعرع في والجدان ..

وهني بتسم عبدالله والدمعه على خده بعد ما سمع كلام هند ياللي ضرب في صميم وقال لها ..: شفتي يا هند . لو ما طريت الموت انتي بتطرينه .. يعني لازم فينا واحد يبكي الثاني ..

هني ضحكت هند وهيه تقول له ..:: هاهاهأ.. المرء على دين خليله .. وانا كم صار ليه اسمع كلامك يا عبدالله .. والحين علمتني .. وانا ياحبي للتقليد .. وهني بدت هند تمسح دموعها وهيه تبتسم ..

هني ابتسم عبدالله بنذاله ياللي هند ما عرفت سبب هذيج الابتسامه الصفراء .. وهني بدت هند تتطلع على عبدالله ولا بيد عبدالله على موج البحر وهو لاقط منه ماي ..

وهني تقوم هند وهيه تقول : عبدالله .. لا .. عبدالله تراه بتخيس عباتي .

وهني بدى عبدالله يرش هند بماي البحر وهند تصرخ ويخلطها ضحك .. وهني بدت هند تشرد من عبدالله ياللي رمى بشماعه في البحر ولقط فيه ماي وبدى يروغ هند ويرشها بالماي .. وهند تضحك من اخاطر .. ومر الوقت على عبدالله وعلى هند وهم يضحكون ويتذكرون ايام لما كانوا مش يد وحده .... في هاي اللحظه بدت هند تجمع المحار وتاخذ من الشاطي حفنه تراب ..

عبدالله ..وهو مستغرب ..: هند .. ليش تشيلينه .. ترانا في ابوظبي .. لا البحر ولا الشاطي راح يتحرك من مكانه ..

هند ..وهي تبتسم ..: لا يا عبدالله .. احب اجمع الاشياء هذي للذكرى .. بس ..

عبدالله ..وهو يبتسم ..: لا والله .. ما كني اخوج وبكون معاج دوم .. هاهاهاها

وهني ابتسمت هند وهيه تحاول انها تحفظ رمال الشاطئ في طرف عباتها ..

وهني يلتفت عبدالله في الساعه ولا الساعه داشه 12:30 بالليل ..

عبدالله .. وهو فاج عيونه ..: ول .. دخلت الساعه وحده .. صار لازم نسير ..

هند .. ايوالله خلنا نسير .. ابا اتسبح وابدل .. الا اقول عبدالله

عبدالله .. : نعم

هند ..: متى سفرنا ..

عبدالله ..: انشاء الله بعد يومين .. ليش ..

هند ..: لا ما فيه شي .. بس على شان ارتب اغراضي ..

عبدالله ...: انشاء الله بنسافر يوم الاثنين ..

هند ..: زين والله.. بودع ربيعاتي لانه بكره اخر يوم دوام ..

عبدالله ..: تمام .. وانا بعد صار لازم اسير اجيب بعض الاغراض من العين ..

هند .. : تمام..

وهني تسير هند وتقط عبدالله عند سياره الشركه وتسير للبيت وهيه حامله في خاطرها احلى ذكرى يوم انه عبدالله اخوها صار اقرب صديق لها ..

دخل يوم السبت ..

كان يوم السبت يوم حار .. لهايب الصيف تلعب بغصون الشجر في كل مكان .. بس الشجر محارب حراره جو الامارات .. في هاي اللحظه اتصل عبدالله بمحمد لانه سعيد طلع منه بعض الاوراق والاغراض من العين ..

وهني يسير عبدالله صوب العين .. وتلاقوا هوه ومحمد في دوار التوام ..في حدود الساعه 1 الظهر .. ... وكان مع محمد اخوه سالم ..

محمد ..: مرحبا والله بوحميد .

عبدالله وهو يبتسم .. : والمرحب لا هان ..كيف الحال يا مخاوي شما ..

سالم ..:. ربي يجمل حالك ..كيفك يا عبدالله ... وكيف الاهل .!!

عبدالله ..: والله يسرك الحال .. ما يشتكون باس .. وانتو كيف الاحوال .. انشاء الله اتمام .!!

محمد ..: والله يسرك الحال .. عايشين مثل اول .. هاهاهاها

عبدالله .. وهو يضحك ..: هاهاها.. زين .. فيه ناس ما عاشوا..هاهاها

محمد وهو يسأل ..: انته مسافر قريب يا بوحميد ..

عبدالله .. : انشاء الله .. مسافر ..يوم الاثنين .. وسعيد موصيني على كمن شغله ..

محمد ..: اي والله .. ولحظه خلني اجيب لك الاعراض ..

وهني يسير محمد ويجيب بعض الاوارق ..

محمد وهو يعطي عبدالله الاوراق ..: اقول يا ابو حميد .. هذيلا الاوراق للفحص ياللي سعيد مسويهن لاهله في دبي .. وطلب مني لو سرت لدبي اجيبهن له .. وانا حطيتهن في ظرف .. لو يسألونك اهل المطار ولا شي .. قول لهم هذيلا اوراق فحص .. لا غير ..

عبدالله ..وهو ياخذ الاوراق .: ولا يهمك .. ان شاء الله راح احفظن... بس اهوه قالي انه فيه كمن غرض يباني ايبهن من بيتهم.. وانا ما ادل وين يسكنون .

سالم ..: افا عليك .. اتبعنا ونحن بنوديك لبيتهم ..

وهني يطلع طلع سالم ومعاه اخوه محمد .. ويتبعهم عبدالله بسياره ..

كان محمد هوه ياللي يسوق .. واخوه سالم جالس جنبه ..

سالم وهو يعونه في المرايه لعبدالله ..

سالم ..: مشاء الله على عبدالله .. مخاوي شما ولا فيه حيله ..

محمد ..وهو يبتسم ..: اي والله .. مشاء الله على سعيد بعد .. يعرف يختار خويان.. ما قد شفته خاوى غير الريايل ..

سالم ..: والنعم فيهم كلهم .. بس عبدالله وسعيد مشاء الله عليهم ... شباب عقال ..

وهني يتلتف محمد في سالم وهو يقول له ..: زين .. وبعدين .. انته شي في خاطرك يا بو غنيم .. لا ما قلت هالكلام ..

سالم .. وهو يضحك ..:هاهاها.. ما فيه احد يفهم ياللي في بالي غيرك ....

محمد ..: ليش ما افهمك .. مش اخوي ..!!!قولي وش ياللي في بالك .!!

سالم ..: والله يا محمد .. لو ادري انه عند عبدالله خوات لا اسير واخطب وانا مغمض ..

محمد وهو مستغرب ..: بل .. بتخطب وانته ما تعرف كيف الحرمه ياللي بتاخذها !!!

سالم..: والله يا عبدالله ياللي يشوف طبع عبدالله يعرف انه خوال عياله ريايل .. مشاء الله عليهم.. عبدالله مخاوي شما .. ويكفي انه طيبه واخلاق ومعاني .. انته مشاء الله عليه شوفه .. ما غرته وسامته ولا خلته لعاب مثل باقي الشباب .. وياللي يشوفه مليون في الميه بياخذ اخواته على وسامته ..

محمد وهو مستغرب ..: بل بل بل .. انته قلت نفس الكلام على سعيد .. تتذكر يوم لقيته في المسكن يوم اشل غراضي !!.. يلست تمدح فيه واتقول انك بتناسبه ..شكلك انته تخطب لعمرك ولا احد يدري فيك ..مشان جيه انته ما تزوجت ..

سالم وهو يضحك ..: هاهاهاها.. غربالله عدوك ... نعم .. اخطب واطلق بعد .. بس ثنينه نسابتهم ولا تركتهم .هاهاها.. ناسبت سعيد .. رغم انه ما عنده اخوات .. وناسبت عبدالله .. والله انهم مخاوي شما .. ولا ابهم قصور .

محمد وهو يرد على اخوه ..: سالم .!!! .. ما اظنك ترضى بهاي الرمسه على اخواتك .. وانه احد يتكلم فيهم ويقول هالكلام عليهم ..

سالم ..: لا حشى .. والله ما ارضاها ..

محمد ..: عيل لا ترضاها لبنات الناس .. انته يا سالم طيب وقلبك ابيض ... لو سمعك غيري راح يحس بانك انسان تفكيره عاطل ..ولو اني موب اخوك واعرفك زين كان قلت هالكلام عليك .. بس انا اخوك .. انصحك ..

سالم .. وهو يبتسم ..: مشاء الله عليك يا محمد .. رغم انك اصغر عني الا انك افهم عني .. وجزاك الله خير على النصيحه .. بس لا تعملي فيها حكيم زمانك ..

محمد وهو يضحك ..: هاهاهاهأ.. لا لا تخاف .. ما راح اسوي فيها شي ..

وهني يلمح محمد فله خليفه .. ويوقف على طرف الطريق .....وجي عبدالله ويوقف على طرف محمد ..

محمد وهو يأشر ..: هذيك الفيلا *الفلانيه * فلت خليفه .. تقدر تدلها ولا ادخلك عليها !!

عبدالله وهو يبتسم ..: لا والله ما تقصر .. خلاص .. دليتها .. ما قصرتوا يا مخاوي شما ..وخلونا نشوفكم

سالم ..: ان شاء الله يا ابو حميد .. وتسافرون وتردون بالسلامه ..

عبدالله ...: الله يسلمك يا اخوي .. ما تامرون بشي من برا البلاد ..

محمد ..: ذخر يا اخوي . ما تقصر .. يالله ودعناك واحد ما خان امانته ..

 
قديم   #65

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

عبدالله ..: ومن يقول وداعه .. حياك الله ..وانشوفكم على خير ..

وهني يقوم عبدالله ويطلع بسيارته صوب فلت مطر ....

في هذي اللحظه كان ساره تتمشى في الحديقه ياللي كنت توها مزروعه .. في هاي اللحظه وقف عبدالله بسيارته برا الفيلا .. ونزل منها .. اول ما شافته ساره حطت الشيله على وجهها .. تغشت وهيه تسأل نفسها ..

ساره .: ما لقي هذا المخلوق ويجي الا الحين ..

وهني اول ما دخل عبدالله ما ت من الفضيحه يوم شاف ساره قدامه .. بس التزم الصمت ونزل راسه ..

هني ارتسمت صوره سعيد في عبدالله يوم نزل راسه .. لانها كان بنفس الحركه وبنفس الطريقه .. حست ساره بعبره تخنقها .. بس مسكت عمرها ..وقاطها صوت عبدالله وهو يسلم ..

عبدالله ..: السلام عليج يا حرمه

ساره بعد ما مسكت عمرها ..: وعليك السلام .. حيالله بمخاوي شما ..

عبدالله وهو ميت من الفشله ..: الله يهليبج .. اقول يا اختي... حد ريايل في لبيت !!

ساره : نعم ..فيه ريايل .. بس انت اقلط ..

وهني مشى عبدالله قام ساره وساره تمشي وراه .. لين دخلته المجلس ..

وهني تسير ساره تنداي الخدامات تجبن قهوه وفواله حق عبدالله ياللي ما تعرفه ولا تعرف حتى اسمه غير انها قد شافته في المستشفى على ايام خليفه ..

وهني تسير ساره وتخبر حميد عن وجود رجال في المجلس ..

ويقوم حميد ويدخل ويلسم على عبدالله ..

في هاي الفتره جت ميثا وسألت ساله ياللي كانت تصعد للسلالم ..

ميثا .: اقول ساره .. منو ياللي جانا !!

ساره : واحد ما اعرفه .. بس قد شفته في المستشفى ..

ميثا : كيف شكله .. !!

ساره ..وهيه بلا نفس .. : والله ياامي ما انتبهت لشكله .. لانه كان موطي راسه ..

هني من وصف ساره لعبدالله شكت ميثا انه اهوه .. وخاصه انها كانت تراقب حركاته من بعيد لبعيد ..

وني تسير ساره لغرفتها في الوقت ياللي روضه طلعت من المطبخ الداخلي ..

روضه وهيه مستغربه ..: وش فيها ساره ..!!

ميثا ..وهيه عيونها علىساره ..: ها فيها شي .. غير كل خير .. بس تعبانه

روضه ..: الله يعطيها العافيه ..

ميثا ..وهيه تسأل ..: امي .. هذاك اليوم يوم سرتي لساره .. ساره قالت لج شي عن سبب حزنها !!!!!؟؟؟؟؟

روضه ..وهيه تلعب بحيانها ..: ليش !!.. انا امها ولاا انتي امها !!

ميثا ...: لا انا امها .. بس هيه صافتج اكثر عني ..

روضه..وهيه تبتسم وتلعب بحانها ..: عيل سيري وسأليها .. وخليها تصافيج ..كانج تحبين تعرفين سيري واسأليها بنفسج ..

وهني يدش حميد عليهم


حميد ..: اقول .. وين شوق ..

ميثا ..: فوق .. ليش !!

حميد ..: خليها تجي .. تراه فيه واحد يقول انه مسافر للندن وهو خوي سعيد .. ويقول كان شوق بتي تطرش شي !!

ميثا ..: اي والله ذكرتني الله يكذرك بالخير .. عندي كمن غرض اباهن لخليفه .. ثياب وعطور ..

روضه ..وهيه تبتسم ..: والله ياللي يسمعج يقول انه يلبس خليفه بيتعطر .. ما كنه في الفراش الحين ..

هني ارتسمت نظره حزينه .. بس خلطها ابتسامه بتمثيل في وجه ميثا وهيه تقول ..: انشاء الله بيقوم ويلبسهن ..

هني حست روضه انها اخطت في كلامها ..: انشاء الله .. وانا ما قصدت شي يا ميثا ..

ميثا ..وهيه تحاول تغير الموضوع ..: واناادري ... خلوني اسير اكلم شوق ..

وهني تنزل شوق ومعاها شنطه صغيره ..

شوق وهيه تبتسم ..: وانا نازله ...ما شاء الله .. صوتكم ينسمع عند الجيران ..

وهني تبتسم ميثا وهيه تقول .. : اقول شوق .. عندج مكان في الشنطه ..

شوق ..: لا والله .. بس عندي شنطه اكبر عنها .. بسير ابيبها وبنحط الاغراض فيها .. شنو رايج ..

ميثا ..: زين . انا بسير ايجب اغراضي وين انتي حاطه الشنطه ..

شوق .. : فوق الكبت .. على زاويه الدار ..

ميثا ..: زين .. ما علينا .. بسير وبجيبه ...

وهني تسير ميثا وتجيب الشنطه وتحط الثايب والارغراض مع بعض ..

وهني تحاول شوق انها تطلع .. بس ميثا مسكت يدها ..

ميثا .. وهيه تحاول انها تهرب شوق على شان ما تشوف عبدالله وتعرفه ..: اقول شوق... انا حاطه الجدر على انار ..سيري شوفيه ..اخاف يحترق !!

شوق وهيه تبتسم..: لا يا شيخه .. الساعه داشه على الثنتين .. ولين الحين صار وقت عشأ ..بس لا يكون مخبيه شي عليه .. تراني اعرفج ..

ميثا ..وهيه تدري انه شوق عنيده ..: لا ما فيه شيه ..خلاص .. بخلي الخدامات يسرن يربنه ..

وهني تقوم شوق وتطلع بعد ما لبست عباتها وحطت الغشوه ..هيه وميثا وروضه ..

وهني اول ما دخلن الحريم ويتقدمهن حميد ..:قام عبدالله من مكانه احتراما لهن

ومن بعيد حست شوق انه هالانسان موب غريب عليها .. في هاي اللحظه لقطت ميثا نظرات شوق ياللي كانت تناظر عبدالله بنظرات غريبه ..

روضه ..: السلام عليك يا مخاوي شما ..

عبدالله ..وهو عيونه على الارض ..: وعليكم السلام والرحمه .. كيفج يا خالتي ..

روضه...وهيه تعض على فمها ..: خلخل الله جيوش العدو .. انا ليش يقولون ليه خالتي ..


هني تسمع ميثا همس امها ياللي كان قريب لا يرفتع وتجاوب بدال امها..: سرك الحال يا وليدي .. كيفك انته وانشاء الله تمام ..

عبدالله وهو ميت من المستحى ..: والله الحمد لله يا خالتي .. بخير وسهاله ..

وهني طلع سؤال شوق ياللي كانت ميثا خايفه منه ..

شوق وهيه تسأل ..: وداعه الله يا وليدي .. انته مسافر بكره !!

عبدالله .. : انشاء الله يا خالتي .. بكره مسافرين للندن ..

شوق ..وهيه ماتبي عبدالله يحس باي شي ..: عسى ما شر يا وليدي .. ليش مسافرين !!!؟

عبدالله ..: الشر ما يجيج يا خاله .. بس عندي اختي الصغيره مريضه .. وبنفسرها ..

شوق وهيه تبي الحين تضرب الشك باليقين ..: ما تشوف شر يا ربي .. ما قلت لي يا ولدي .. انته من منو !!!

عبدالله ..: انا يا خالتي عبدالله بن هلال *الفلاني * ..

هذي الكلامات بدت تشعل البوم الذكريات في قلب شوق .. بدت صفحات الالم ترجع لها .. حست انه حصه رجعت لها في صوره شخص ثاني.. انه حصه رجعت لها في صوره عبدالله .. بس مسكت شوق نفسها.. غيرت الموضوع ..

شوق .: والنعم والله.. والنعم بقومٍ طلعت انته منهم ..

هني عبدالله ما حس باي شي .. بس رجع وابتسم .: والنعم بحالج يا خالتي ..

انا ما بطول عليكم.. بسترخص الحين منكم .. صار لازم مشي ..

حميد ..: لا عاد .. ما بتسير اليوم لين تتغدا عندنا ..

عبدالله .. : العذر والسموحه منك يا بو عبدالله .. بس وراي خط ابوظبي .. وانته تعرف ياللي بيسافر قريب يكون مشتط .. ومشغول ..

حميد ..: اي والله .. بس والله العظيم يا كرامتك يا تستوي يوم ترجع ..وانه يكون غداك عندنا .. بس انته اختار الزمان ونحن لنا الشرف يا عبدالله انا نشوفك بينا مره ثانيه ..

عبدالله ..: الله يسلمك .. وشيفتك من الكرامه كلها ..

وهني يسترخص عبدالله ويطلع ..


في هاي اللحظه بدت كوابيس حصه ترجع لشوق .. بدت تشوف انه حصه بدت ترجع لها بصوره عبدالله .. وموب غريبه عبدالله في يوم على حسب تفكير شوق انه بيطلع مثل امه ..

 

أدوات الموضوع



الساعة الآن توقيت السعودية الرياض و الدمام و القصيم و جدة 05:15 AM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0