ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة صفحة ألم.... رواية حزينة مؤثرة مشوقة رائعة كاملة يوجد هنا صفحة ألم.... رواية حزينة مؤثرة مشوقة رائعة كاملة هنا تنقل الروايات المكتملة فقط

فساتين العيد


 
قديم   #71

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

في الوقت ياللي سعيد يكلم امه كانت ساره جالسه بين السرير وبين البلكونه .. وكانت الغرفه مظلمه .. بس انوار المدينه تدخل في الغرفه ومسويه مربعات ضوئيه ذات اناره زرقاء خافته على ارضيه الغرفه ياللي جسد ساره كان يلقط الانوار لانه كان في النص .. كانت ساره جالسه وهيه حاطه يدينها حول رجولها وحاطه راسها على ركبها وناثره شعرها الاسود الطويل على الارض حيث انه خصل شعرها بدت ترتضف حولها من طول شعرها ....كان وجه ساره يناظر لبعيد برا .. كانت تناظر للانوار وهيه تهل تدموعها بصمت وهيه تسرح وتسترجع كل شي استوى بينها وبين سعيد ...


في الوقت ياللي بدت الدمعات تنزل وصوت سعيد مسوي رنين في ذهن ساره كانت طرقات الباب تعلى وصوت روضه يعلى اكثر .. بس ساره كانت قافله الباب ...ولا فتحت لاي احد .. التزمت الصمت .. وفتحت الدمع من قلبها انه يطلع .. وهيه تحاول انها تنسى .. بس كيف تنسى ياللي استوى بهذي الليله وهيه ليله انختمت على صفحه ذكرياتها بانها صفحه الم .. كيف تنسى طلب سعيد انها تنساه وهو لو طلب عمرها اهدته اياه .... وبعد كل هالحب ينسحب منها بكل هدوء ويقول لها "انسيني او تخيلي العالم بدوني" .. كيف يتقبل قلبها وعقلها هالكلام ..

وبرا عرفه ساره كانت روضه تحاول انها تلفت انتباه ساره انها تنتظرها برا الغرف على شان تبطل الباب .. بس روضه ما تدري انه ساره رحلت لعالم غير عالم الحقيقه .. رحلت لعالم فيه دمعه وحزن وقلب مجروح ويحتظر .. ولا بكف ميثا يلامس كتف روضه وهيه لين هذيج الساعه تدق الباب .. اول ما التفت روضه ولا بميثا وراها ..

روضه ..وهيه تحاول انها تطمن بنتها على ساره ..: مسيكينه ساره .. تعبانه ورقدت ..فديتها ..

وهني ابتسمت ميثا وهيه تناظر امها بكل حنان وهيه تقول ..: امي .. لا تحاولين انج تخبين علي .. انا دريت بكل شي .. وخلاص .. ما فيه داعي نخبي على بعض ..

روضه وهيه تحاول انها تتهرب لانه ميثا يكفيها مشاكل سفره مطر وخليفه ما بالك بمشكله ساره ..: شنو !! .. نخبي .. !! .. ميثا .. انا ما اخبي عنج شي ..

وهني تقاطعها ميثا وهيه قريب لا تصيح ..: امي .. !! .. انا موب ياهل ولا طفله على شان الكل يخبي علي .. انا ام وربه بيت .. وكل ياللي في بيتي يستوي ادري فيه ..

وهني تلتفت روضه بنظره حزينه صوب ميثا وهيه متوقعه انه ميثا ما كانت تدري .. بس الظاهر انها تدري ..

وهني تكمل ميثا كلامها ...: ادري بحب ساره لسعيد من اول ما التقت به .. وادري بكل ياللي في خاطرها .. وادري انه قبل شوي قال لها كلمه جرحتها .. وهم قال لها كلام عن الفراق وهيه ما تحملت ..

وهني تقاطها روضه بصوت خافت بس فيه حنان ..: ميثا !!!

بس ميثا كملت وهيه تدمع ..: امي ... انا موب ياهله .. وانا يوم سويت كل الشي وسكتت كله على شان خاطر ساره .. لانها يوم بتشوفنا نحاتيها ما راح تتحمل وراح تبكي .. وانا ما ابا بنتي تكون ضعيفه .. وهيه يوم كتمت علينا خبر حبها لسعيد او صمتها باللي استوى انا سكتت لانه الانسان يوم يحس انه ما فيه احد يدري عن اسراره يكابر وتحمل ويصبر .. وانا ابا ساره انها تتعلم الصبر .. موب مدلعه وتنتظر العالم تحل مشاكلها ..

روضه ..وهيه قلبها على ساره وبدت تلتفت صوب غرفه ساره ..: بس يا ميثا .. ساره ياهل .. وصغيره ..

ميثا وهيه تمسح دموعها .وتحاول ميثا انها تكون متحزمه بس بطبيعه الام تهل دمعتها وهيه تقول بصوت مرعوش الخايف على ضناه ...: عيل يوم ياهل وصغير خلها تبتعد عن درب المحبه .. ودربه موب لليهال .. وهيه الحين تختار .. يا اما تتم ياهل وتنتظر الكل يلبي طلبها ولا تطلب الشي وتتعب فيه .. موب كل شي يجي بالسهل يا امي ..


روضه وهيه نظرتها بدت تنكسر حزنٍ على ساره ..: بس يا ميثا ...

وهني تقاطعها ميثا وهيه تقول ..: لا يا امي .. ساره بوب ياهل .. وهيه لازم تتعلم انه الدنيا موب سهله ..

روضه وبستغراب ..: ميثا .. انتي كنتي تدرين ولا قلتي شي لين الحين !!!

ميثا وهيه تحاول تمسح اخر دمعات نزلت ..: لاني يا امي ابا اعلم ساره اول شي .. وثاني شي ما ابا شوق تدري باللي يستوي .. وما اباها تحس انه ساره تحب ولدها .. وخاصه انه شوق يا امي حساسه .. واخاف تطلع من عندنا بسبب ساره ..

وهني حاولت روضه تقاطع ميثا .. بس ميثا بدت تكمل ..: وانا ما ابي شوق تحس بتأنيب الضمير .. وخاصه انه سعيد موب مهتم بساره .. واصلا عيب حتى لو انه يحبها انه يعطيها اي اهتمام قدامنا .. وهذا العشم في سعيد .. واسعيد ينرفع فيه الراس .. بس وجود سعيد الحين راح يخلي ساره تتعذب اكثر .. وانا ما ابها تتعذب .. ولا ابا شوق تطلع عنا ..

وهني تقاطع روضه بنتها ميثا وتلتف ورا ميثا بنظراتها وهيه تقول بصوت مستعجل ..: اهه يا شوق .. خلص العشا ...

وهني تلتفت ميثا ولا بشوق موجوده وراهم وسمعت كل شي .. بس ميثا ما قدرت تقول شي .. غير انها تلتزم الصمت .. وتنزل راسها وهيه متفشله انه شوق سمعت كل شي ...

وهني تبتسم شوق وهيه تقول ..: لا يا خالتي العشا ما خلص .. بس حبيت اقول لكم يا خالتي انا انشاء الله انا وولدي سعيد بنطلع منكم قريب .. وعذاب ساره ما راح يكون دايم ...

وهني انسحبت ميثا من الكل وهيه تهل دموعها لغرفتها وصكرت الباب ..

في اللحظه هذي التفتت روضه في شوق وهيه تقول لها بارتباك ..: اقول شوق .. تراه والله ما تقصد ميثا شي يا بنتي .. وانتي ....

وهني تقاطعها شوق وهيه تقول لها بابتسامه حزينه ..: لا يا خالتي .. لا تتعذرين لاختي .. انا ادري باللي في بالها .. واعرف ميثا .. وهيه ما قالت غير الصح .. المفروض انه ولدي يعرف كل شي .. وانه ما يستمر في طريق ساره .. وساره الكل يحبها ويعزها .. وهيه ما تستاهل ياللي يستوي فيها .. وانا من زمان ادري انه ساره تتعذب من سعيد .. بس توقعت يا خالتي انها في غياب سعيد عنها في لندن انها راح تنساه او انها ما تتعلق فيه كثير .. بس الظاهر طلع العكس .. تعلقت فيه اكثر واكثر......


التزمت روضه الصمت لانها ما تعرف وش تقول .. وشوق سمعت كل شي .. وميثا ما قدرت تقول اي شي قدام شوق .. كل ياللي سوته انها انسحبت بكل هدوء لغرفتها مثل بنتها ...

هني ابتسمت شوق لروضه وهيه تقول لها ..: عن اذنج يا خالتي .. بسير اشوف ميثا واتكلم معاها ..

روضه وهيه الحزن خيم على وجهها ..: اذنج معاج يا بنتي ..

 
قديم   #72

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

طلعت شوق لغرفه ميثا ودقت عليها الباب ودخلت ..ولا بميثا تجلس على السرير بعد ما كانت راميه نفسها عليه ... قامت ميثا وبدت تحاول انها تمسح دموعها وتحاول انها تقوي من عزيمتها قدام شوق.. بس ما قدرت .. خانتها العبره وبدت تبكي ..

شوق وهيه تبتسم وتتقرب من ميثا لين وصلت عندها وجلست جنبها وهيه تقول لها ..: افا يا ميثا .. ما توقعتج تبكين على كلامج ياللي كان كله حق وكله صدق ..

وهني بدت ميثا تبكي وهيه تقول لها وهيه نظراتها على شوق ..: لا والله يا شوق .. انا ما ابكي على كلامي .. لاني ادري انج راح تتركيني في يوم .. بس انا ياللي يبكني خوفي من هاليوم .. اليوم ياللي اخسر فيه اختي لا اشوفها الا قليل بعد ما عشنا عمرنا كله مع بعض .. على الحلوه والمره نفترق بسبب شي تافه مثل هذا !!!!!

وهني تخنق العبره شوق وهيه تسمع كلام ميثا .. بس شوق حطت يدينها على كتوف ميثا وضمتها بحنان لصدرها وهيه تقول لها ..: لا يا ميثا .. موب شي تافه .. وامور عيالنا عمرها ما كنت تافهه .. واي ابو او اي ام راح يسوون ياللي نحن بنسويه واكثر .. وعلى فكره .. انا ما بنتقل دوله ثانيه .. بسكن في بيتنا القديم .. قبل لا عريس الغفله يخطفج مني .. *وهني بدت شوق تضحك بحزن مثل ياللي يكتم عبرته *

وهني بدت ميثا تضحك وتبكي في نفس الوقت ..وهيه تحاول تمسح دموعها .. : هاها ها.. بعدج تتذكرين يا شوق كلامي .. وخاصه عريس الغفله ..

وهني بدت شوق تضحك وهيه الثانيه عيونها تدمع ..: وليش ما اتذكر .. تراه اهوه اختطفج مني .. وانا ما خليته على هواه .. هاهاهاها.. تميت وراكم مثل العديله .. هاهاهاها.. اخرب عليكم كل شي .. من شهر عسل .. لين نقلتكم في بيتكم .. هاهاهاها

وهني بدت ميثا تضحك وفجأه انفجرت تبكي ..: لا والله .. لا والله .. ما خرتبي شي .. بالعكس حليتي ايامي .. وبنيتي فيها احلى اركان .. ركن الصبر .. ركن الايمان .. ركن العزيمه .. ربيتي عيالي .. وساعتيني في اموري .. واخر شي تقولين خربتي .. انتي يا بنت سعيد تعمرين ما تهدمين .. ووجود اي وحده شارتج في بيت اي انسان يعتبر شرف وفخر له طول عمره .. بس .. بس ..

وهني تنفجر ميثا تبكي وهيه تحضن شوق ياللي هيه الثانيه ما مسكت عمرها وحضنت اختها لانها حتى شوق كانت خايفه من هاليوم .. بدت شوق تبكي وهيه تحضن ميثا ياللي ما قدرت تمسك عمرها من البكي ..

في اللحظه هذي كانت روضه فاتحه الباب وتتصنت على ميثا وشوق .. وهني صكرت روضه الباب بكل هدوء وبدت هيه الثانيه تبكي وتمسح دموعها وهيه تقول ..: الله لا بكيتنا على غالي .. اشوفه اليوم بتمطر .. احسن شي اسير اتصل بحسون واقوله يجيب مظلتي قبل لا تمطر عليه في الطابق الارضي ..

في الوقت هذا وفي ابوظبي

كانت حصه قد رجعت من السفر مع شلتها ... رجعت وهيه على اخر مزاج وفرحه .. رجعت وهيه على بالها الدنيا لعب ومرح وضحك مثل ما تتوقعه .. جلست حصه في الصاله .. بس حست حصه انه الجو ضيج ولا فيه اي شي يقدر اي واحد يسويه غير انه يطلع التلفزيون ..شغلت حصه التلفزيون ويلست تتطلع فيه وتقلب بين القنوات .. مرت على حصه فتره كلها ضيج ... ولا لقت شي تسويه .. ولا فجأه يصيح تلفون البيت قربها ..

ترررررررررررن .. ترررررررررررررن

وتشل حصه التلفون بنوع من الكسل وهيه تقلب في التلفزيون ..: الوو ..

ام حسين ..على الخط الثاني ..: هلا والله واغلى... كيف الحال يا ام عبدالله ..

حصه وهيه تاشر بيدها على السماعه مثل ياللي يقول "مالت" ..: حيالله ام حسين .. كيفج حبيبتي ..

ام حسين وهيه شايفه نفسها .: والله يسرج الحال .. والحمدلله على السلامه .. قولي انج بتجين اليوم .. والله ما عندي خبر لين سالت عنج .. وقالوا ليه انج اليوم بتوصلين..

حصه وهيه تطلع ضروسها من الضيجه ...بس كاتمه عما في خاطرها ..: لا والله.. كنت بدق عليج تلفون .. بس الظاهر تعب السفر خلاني انسى ..

ام حسين ..: عيل اقول ..

حصه وهيه بلا نفس ..: قولي يا ام حسين .. قولي ..

ام حسين ..: شنو عندج الحين ..

حصه ..وهيه تعرف انه ام حسين بتجي ..: والله بطلع الخياط بعد تقريبا ساعه .. خير يا ام حسين ..رب ما شر

ام حسين وهيه تبتسم ..: زين عيل .. بمر عليج بعد ربع ساعه وبسلم عليج ومناك بمر على قاريبيني ..

حصه ..وهيه تتهرب ..: لا ما فيه داعي .. خليها لبكره .. لاني والله ضروري ابا اطلع .. وبكره انشاء الله راح اشوفج على خير ..

ام حسين تمت مثل اللزقه ..: لا .. ما يصير .. ما يستوي .. بمر عليج وبسلم وانشاء الله بكره بشوفج عند الشله ..

حصه وهيه تلعن الساعه ياللي شلت فيها التلفون ..: تمام .. يا حياج يا ام حسين..

ام حسين .. وهيه تبتسم ..: تمام ... يالله يا الغاليه .. اشوفج بعد ربع ساعه ..

حصه .: يالله في امان الله ..

وتصكر حصه التلفون وهيه تقول لنفسها .. ..: الله ياخذ هالبقره .. ما تفهم .. اقول لها لا تجين . وهيه تقول لا . .لازم اجي ..بس كل هذا موب من شوقٍ لي .. اكيد تبا شي من الهدايا ..*وبصوت حقير تقول حصه ..* .. بس والله ما تشوف شي .. بش شنو راح اعطيها وانا ما جبت لها شي من برا !!!!؟؟؟؟؟.. اخاف تقول للشله مريت على ام عبدالله ولا اعطتني شي ..هممم

وهني بدت حصه تفكر وتفكر ... وفجأه ..تقول ..: اخ .. كيف ما جت على بالي .. اكيد فيه اغراض لهند ما تبيهن في المخزن ..
وهني تطلع حصه للمحزن وهيه مستعجله و تقول : عسى الاقي شي بس لهالبقره ام حسينوه....

وتطلع حصه للمخزن وهيه ما تدري انه في دليل بيكون في يوم اثبات لحق سعيد .. نزلت وهيه تتقرب من الاكياس ياللي فيهم كل الحقايق ..


في الوقت ياللي حصه بدت تتقرب من الاكياس وخاصه من الملف الاصفر كانت ساره لين هذيج الساعه على ما هيه عليه .. تحاول انها تتقوى وتتصلب .. بس من وين الصبر بعد ما انهدم اخر امل لها انه سعيد يحبها .. وصلت قسوه قلبه انها يطلب منها بنفسه انها تنساه .. اه ما اصعبها من كلمه .. ما اصعبها من لحظه يوم يتلقى العاشق نفور وصد من حبيبه .. بدت ساره تغيب احلامها في وسط الانوار الخافيه .. في الوقت ياللي سعيد كان طالع لمحمد ... كان سعيد يعيد شريط كلامه مع ساره .. هل هوه ياللي سواه صح ولا غلط!!!! .. هل كلامه لها بانها تنساه وتعيش حياتها كان حكمه منه ولا غلطه!!! .. وفجأه ضاق صدر سعيد وهو يفكر .. ففكر انه يشغل نفسه وتفكيره بشي لين بكره ويشوف حاله ساره هل ما زالت منصدمه ولا تصبرت وحاولت تنساه مثل ما طلب منها ..

بدى سعيد يدور بين الاشرطه وما عرف وش يشغل .. فقرر انه يشغل قناه امارات اف ام ... وبدت القناه تبث برامج ويخلطها اغاني .. في الوقت هذا كان سعيد سرحان ولا يدري وين وصلت به افكاره كانت ساره في نفس الحاله منصدمه وتبكي بحراره بس بصمت قريب لا يفجر صمام قلبها منه.. وهني حاولت حتى ساره انها تنسى هذي الليله .. بس كيف .. فقررت انها تشغل المسجل .. بس كل ياللي عندها من اشرطه قد حفظت كلماتها .. وهني تمسك ساره المسجل وتضغط على قناتها المفضله امارات اف ام .. نفس القناه ياللي سعيد كان يسمع لها .. بس سعيد كان شبه شارد .. كان منظر ساره ما فارق خياله ولا للحظه .. كانت نظراتها المتحظمه مسويه وشام في مقله عيونه وهو يلتقط رده فعلها .. كانت كلمات ساره له مثل الكوي داخل الاذن وهو يسمع قصيدتها وياللي ردت عليه بعد ما طلب منها انها تنساه .. ولا فجأه ترتسم صوره ساره في ذهن سعيد وهو يتسبب في هل دمعتها .. وهني ينتبه سعيد على شفاه صوره ساره في خياله بدت تتحرك وتقول كلام .. بس سعيد من تلخبطت افكاره صار ما يقدر يميز هل هوه سراب ولا واقع .. بدت صوره دموع ساره ترسم وشوم في قلبه ..هني هلت دمعه سعيد وهو يكلم عمره ويكلم صوره ساره ياللي ارتسمت في خاطره وبصوره حزينه يملاها الدمع .. بدى سعيد يقول للصوره ..

سعيد وهو يسوق وابدى يسرح ..: ليش يا ساره .. ليش انا بذات .. ليش اشتكيتي وليش بكيتي .. لو كنت ما ادري كان بيكون كل شي تمام .. بس الظهر انه الحقيقه لازم تطلع في يوم لنا نحن الاثنين ..

وهني بدى صدى صوت ساره ينادي من بعيد وهيه تسمعه كلمات جريحه بعد ما ارتسمت صورتها له في كل مكان وهيه تبكي .... بدت تنادي عليه وهيه تقوله ..

روحي تحبك غصب عني تحبك .. والمشكله حبك في روحي جرحني
واذا شكيت اتقول اش كان ذنبك .. ذنبي هويتك يوم حبك ذبحني

"وفي الطرف الاخر من مدينه العين كانت ساره تنادي وهيه تردد نفس كلمات القصيده .. وبالصدفه تسمع لنفس القناه .. كانت ساره على وضعيتها .. تبكي وهيه تسمع الكلمات لانها تعبر عن شعورها .. بل شيء قليل من شعورها .. وهني بدت ساره تون وهيه تقول ...وتردد القصيده على شفاهها .."

ونيت من قلبي في لوعه تعذبك...سلبتني قلبي وجرحك سرقني

" وهني ترتسم لكل من سعيد وساره نفس اللحظه ياللي كل واحد فيهم انصدم من نظره الثاني .. النظره ياللي انصدم فيها سعيد من حزن ساره وعدم تقبلها للحقيقه .. وانصدام ساره من طلب سعيد لها بالنسيان .. وهني بدت ساره تبكي وهيه تقول بعد ما تذكرت الموقف "

اقول قلبي اتقول وش عاد قلبك .. وان جيت ابي اخفي الحب جرحك فضحني

"وهني ترتسم دمعه ساره لسعيد وهو يسوق وهي تبكي وتطلب منه القرب .. بس هوه صدها بعد ما طلب منها انها تنساه .. تذكر صده لها وطلبه لها انها تنساه ..بس هيه ما توقعت هذا الشي .. انكرته بنظره عيونها .. بدمعه جفونها ..انكرته وهني ردتت شفاه صوره ساره على سعيد كلمات سوت رنين في قلبه وتسببت بنزيف في عينه ..وهيه تقوله "

اجيك انا عاني ادور لقربك .. تبعد كأن القلب ما قد عرفني ..
وان رحت عنك تموج والريح دربك .. واتقول شفت اليوم قلبك تركني

 
قديم   #73

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

وفي طرف المدينه وعلى بلكونه الاحزان كانت ساره تكمل سماع الاغنيه وصوره سعيد ما فرقت بالها وهيه تقول له ...." تخيل .. تخيل" .. وترجع وتتذكر كلمتها له يوم تقوله (تخيل لو جرحتك يوم ...وجرحك بالهوى ما طاب)..وهني تقاطعها كلمات الاغنيه وهيه تجاوب على سعيد ياللي في نفس الوقت تذكر نفس الاشياء ياللي ساره بدت تتذكرها في لقائها به وهيه في البرنده "

يا قوتك ترضى اجاريك العباب .. ترضى اهد الحب لو كنت تدني

"وفجأه بكت ساره وهيه تحس انه عمر هالكلمات ما راح توفي ياللي في خاطرها لانه ياللي في قلبها اكبر من انه ينقال او انه يترجم لبضع كلمات على ورق .. وانه ياللي في الخاطر اكبر... بس ساره بدت تحاول ترجع لسعيد حتى ولو في الخيال لانه كل ياللي بقي من سعيد في حياتها هوه خيال .. وهني ترتسم صوره سعيد لساره .. بدت ترتسملها وهني مدت ساره يدها مثل ياللي غرقان ويطلب النجاه من واحد طايف على الماي .. بدت تمد يدها وهيه اخر امل لها هذي الكلمات عسى بس يرجع لها سعيد .. بدت تقول ساره وهيه تردد مع الاغنيه هذي الكلمات ...: "

ان كنت تهواني فأنا اليوم جنبك .. سلمت لك امري وحبك سكني
(20)

بس سعيد التزم الصمت هذي المره .. التزم الصمت وهو يشوف طيف ساره يبيع نفسه على شان قربته .. بس قطع الخيال بالواقع كلام المذيعه وهيه تقول ..

المذيعه ..: لقد كنتم مع اغنيه " روحي تحبك " للفنان عبدالمجيد عبدالله ...

وبدت المذيعه تزيد في كلامها في اللحظه ياللي سعيد انتبه انها كانت مجرد اغنيه .. حس انها كانت من الواقع .. حس انها كانت كلمات ساره .. ما كان يدري انه ساره كانت تسمع نفس القناه وتسترجع نفس الشياء ياللي كان سعيد يسترجعها .. بس سعيد كان يلوم وهيه كانت تتعذب .. ووصل سعيد للمقهى ياللي فيه محمد ..

نزل سعيد .. نزل بس نزل جثه بدون روح ... كانت صوره دمعه ساره في باله ما انمسحت .. وصل وحاول انه يمثل على انه بخير ولا فيه اي شي .. بس محمد لقط نظره سعيد ياللي كانت فيها شي من السرحان .. فحس انه لازم يغير الجو .. فقرر انه يقول شي من القصايد ياللي قد كتبهن ...

وهني يبتسم محمد وهو يقول .. : كيف لندن معاك يا سعيد .. عسى بس تمام

سعيد وهو يبتسم بتمثيل ..: والله روعه يا شيخ .. ما توقعتها بتكون جيه .. واحلى ما فيها انه خليفه قام بالسلامه ..

الشباب كلهم ..: يستاهل السلامه .. وما يشوف شر ...

سعيد ..: الله يسلمكم ..والشر ما يجيكم ..

محمد وهو يبتسم ..: سعيد ..

سعيد وهو بتسم .: لبيك...امر يا بوجاسم ..

محمد ..: ابو عسكور .. نعرف انك شاعر .. ياللي يتغرب يشتاق للدار .. وانته ماشاء الله عليك ..شاعر والكل يشهدلك ....

وهني يقول خالد ..: نعم اشهد انك شاعر .. سمعنا شي يا سعيد

سعيد وهو يتهرب ما له نفس انه يقول شي ..: والله فالكم طيب .. بس والله ما يحظرني شي من القصيد ...

محمد وهو يبتسم ..: افا عليك .. الا لازم تعد .. وانته مشاء الله عليك .. معروف بروعه قصيدك .. عليك بالله تعد ..

وهني يبتسم سعيد لانه عرف انه محمد كان يبي يغير جوه ...: ان شاء الله .. بس خلني اتذكر شي ...

محمد ... وهو يبتسم ويلتفت في الشباب ..: عيل انا بعد قبل وبعدها انته عد .. شنو رايك ..

سعيد .. وهو يبتسم اكثر لانه عرف انه محمد حس بضيق صدره غير عن باقي الشباب .: وانحن ننتظر شاعرنا ..

وهني يبتسم محمد وهو يقول ..:



عن كل نجمٍ ... ظهر بسدل اجفاني *** لاعل ما عيش حزني ... لحظه غروبه
وعن كل ثوبٍ جديد ... بلبس اجفاني *** من اجل لاحمل ... كثير الهم في جيوبه
وعن كل خلٍ .. حزين الصمت كفاني *** الصاحب ... ياللي قليل الهرج عذروبه
يا من عذابه يشققني ... ويرفاني *** فراقاك غصب على ..بالحيل مكتوبه
ليتني عليلٍ ومنك الصبر ...ما شافاني *** وليتي معافي وعرف القلب واذنوبه
خبرت نصفٍ حيا ... مع نصفه الثاني *** بعضي رمادٍ .. وبعضي نار مشبوبه
راعي الوعد .. ان صدق مره ووافاني *** يختار بين الجسد ... او قلب محبوبه
وانا الجفا .. ليه اخاف الناس تجفاني *** وانا الحبيبي الذي.. من.يعشق عيوبه

(21)

وهني واحد من الشباب يقول ..: الله لا شلك يا بوجسيم ..اشهد انك شاعر ..

وهني يبتسم خالد وهو يقول .. : اقول .. اقعد مكانك وش فيك قمت .. تراه سعيد لين الحين ما قال شي لين تشهد ولا ما تشهد .. انته اسمع كلام سعيد وبعدها احكم ..

وهني يلتفت خالد في محمد وهو يكمل ..: تراه يا محمد ما هو بقصورٍ فيك والله .. بس انته شاعر ومعروف بين الشباب .. ونحن نبي ياللي ما سمع سعيد انه يسمع ويحكم لانه الحكم قبل لا يسمع من الطرفين موب عدل ...

محمد وهو يبتسم ويعرف شنو خالد كان يقصد ..: نعم وانا معاك .. انتوا سمعوا لسعيد وبعدها حكموا ..

وهني يحمر وجه سعيد ..: لاااااااااااااا.. وين انا ووين ابو جاسم .. ابو جاسم شاعر ولا فيه احد يقدر عليه ..

محمد وهو يبتسم ..: يالله عاااااااااااااد ..خل عنك ..اونه متواضع .. عن اللواته يا سعيد ..

وهني يضحك الكل ومنضمنهم سعيد ..

سعيد وهو يبتسم ..: الله يسامحك يا محمد .. وين انا ووين اللواته ..

خالد ... وهو يبتسم ..: بل .. سعيد طلع لوتي .. ما اصدق .. ما اصدق ..

محمد ..وهو عيونه في خالد ..: اقول خالد .. تراك بديت تطلع قرونك ..( اونه مثل الشيطان ياللي يلعب من تحت لتحت ) ...

خالد .. وهو يضحك ..: هاهاهاها.. ول .. صار كل شي الحين باين هالايام ..حتى القرون ما صرنا نقدر نخبيها ..هاهاهاها

ويضحك الكل .. بس سعيد بدى يسعر وهو يتطلع في الساعه ياللي كانت هديه من ساره يوم كانوا في دبي .. كانت الساعه من النوع ياللي تضيئ في الليل .. ونور المقهى كان شويه خافت .. ونور الساعه كان باين .. خاصه انه سعيد كان يتذكر يوم انه خليفه كشف سالفه الساعه وغير الموضوع .. لين طلع سعيد من عندهم هوه وساره .. وما درى وش خليفه قال لاخته ..

هني حس محمد انه سعيد بدى يسرح .. وتفكيره بعيد سار ... فقاطعه محمد وهو يقول ..

محمد وهو يقطع حبل افكار سعيد ..: سعيد .. !! .. وش فيك ..

سعيد وهو ينتبه ..بعد ما كنت عيونه على الساعه ..: لا .. ما فيني شي .. بس كنت مواعد واحد من الشباب ....

محمد درا انه سعيد موب مواعد ولا شي .. بس سعيد يخبي شي في خاطره .. مشان جيه قال انه مواعد .. واصلا لو مواعد ما كان اتصل بمحمد وقال يبي يلاقيه ...

محمد ...: لاااااااااااا.. وينك .. انا ما ارضا انك تسير .. لليله ليلتنا .. ولا بتسير ولا بنرخصك ..وخل عنك .. والريال انا بدق عليه وبتعذرله ... بس انته تجلس معانا يا سعيد ...

سعيد وهو يبتسم بتمثيل ..: تمام .. ما عليه .. بس من يتصل فيني لازم اسير ...

خالد ..وهو يقاطع محمد وسعيد ..: اقول سعيد .. انته شكلك تتهرب ما تبا تعد علينا شي من قصيدك ...

سعيد وهو يبتسم لخالد ..: لا والله حشا .. ما قصدت شي ..بس ..

وهني يقاطلع محمد وهو يقوله .. : اقول سعيد .. عن اللفه والدروه .. عد علينا القصيده ولا ترنا بنسوي اضراب عن الكلام اليوم كله .. هاهاهاها

سعيد وهو يضحك ..: هاهاها.. بل بل بل ..كله هذا على شان قصيده وحده !!!.. بس على فكره اليوم ما بقا منه شي .. ترانا الحين في نص الليالي ..هاهاهاهاها

محمد وهو يضحك ..: بقا ولا ما بقا .. الحين تعد يعني تعد ..

خالد .. وهو يقرب كرسيه من سعيد ومحمد بعد ما كان شويه بعيد عنهم ..: يالله .. خل عنك .. الحين تعد علينا وحده من قصايدك يا بوعسكور ...

سعيد ..: تمام بعد ...

محمد ..وهو يبتسم ..: وش يقول الشاعر سعيد ..

سعيد وهو يبتسم ..وينتقل بنظراته بين الشباب ..

البارحه هاجت عليّ التفاكير *** ليلى قضيتها بين هوجاس وافكار
ولا لقيت لما وطا النفس تفسير *** وأصحبت كني راعي النار والغار
حزنٍ بقلبي كسّر القلب تكسير *** لولا ضلوعي تردع القلب قد طار
وعلى الذي له داخل القلب تقدير *** الصاحب اللي بيني وبينه اسرار
دار الزمان وصار بالعهد تغيير *** مدري غدر بي مدري الوقت غدار
قبل الموادع قلت تذكرني بخير *** ابعد وانا ابعد وافرض الحب ما صار
حنا نوينا وعاكستنا المقادير *** وهلّت دموعه يوم فكّر بالاقدار
قلت النهايه جعل دربك مسافير *** حاول تناسا اللي مضا وصير صبار
قال الله اقوى ما طلبته بيصير *** غصبٍ عليه قال ما كنت مختار
ياللي جرحت القلب ليه المعاذير *** جرحتني ولا تترك الجرح تذكار
وشلون ابصبر كان شفتك مع الغير *** وانا الذي عليك من نفسي اغار

(22)

هني الكل انبهر من قوه معنا قصيده سعيد .. كانت طريقه عد سعيد قمه في الروعه .. ونظراته المكسوره كانت توحي وانه القصه ياللي في القصيده حيقيقه وتنعرض قدامهم .. حتى لدرجه انه بعض الشباب من الطاولات المجوره التزموا الصمت وهم يشوفون سعيد يعد بطريقه في غايه الروعه والاتقان .. وبعد ما خلص سعيد من عد القصيده .. بدت همسات فين الشباب في الطاولات المجاوره عن مدى روعه شعر سعيد .. فيه منهم ياللي يقول انه منقول .. وفيه منهم من يقول انه يعد قصيده لشاعر كبير .. بس الشباب ياللي في طاول سعيد ومحمد وخالد انبهروا بشعر سعيد .. وكانت القصيده قمه في الروعه .. الكل كان توقعها قصيده عاديه وبس .. بس محمد كانت نظرته ابعد منهم كلهم .. عرف محمد انه سعيد فيه شي .. والقصيده ما قلها بس على شان يعد على الشباب .. القصيده كان لها مغزا .. ومغزا قوي بعد ...

الشباب ..: الله لا شلك يا سعيد ..

خالد ..وهو يبتسم بابتسامه النصر ..: قلت لكم . .سعيد شاعر ..

واحد ما ياللي جالسين على الطوله ..: سعيد طلبناك بقصيده ثانيه ..

محمد وهو يبتسم ..: اشوف الكل نساني .. احم احم .. نحنو هنا .. ترانا بعدنا ما طلعنا من الطاوله .. هاهاهاهاها

وهني الكل يضحك ...

سعيد ..: حشى يا بوجسيم .. لا عاش من ينساك ..

محمد وهويبتسم ..: بدينا في اللواته مره ثانيه يا سعيد .. خل عنك اونك متواضع ..هاهاها

سعيد يضحك ..: لاحول الله ..هاهاها.. والله ماقصدت شي ...

محمد .. : خل عنك .. الحين طاروا كل الجماهير .. صرت شاعر بلا جمهور .. من وين اجيب جماهير ثانيه ..

خالد ..وهو يضحك ..: هاهاهاها.. يعني تعترف انه سعيد احسن عنك !!

محمد ..: من زمان سعيد احسن عني .. وخاصه من ايام القصايد ياللي عدها ايام ما عدول النذر صورنا ..

وهني بدى الكل يطلع في بعض .. لانه بعض الشباب ما كانوا يعرفون عن قصه عادل ..

وهني حب سعيد انه يغير الموضوع لانه ما يحب يسمع طاري عادل وحركاته ..

 
قديم   #74

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

في الوقت ياللي سعيد بدى يغير الموضوع وتطرف في مواضيع ثانيه


كانت حصه في المخزن الداخلي في البيت في الطابق الارضي .. كان المخزن وسيع وكبير .. بس كان بارد وايد ..كان مظلم .. كانت انابيب الماي ياللي توصل الماي لكل البيت موجوده وبارزه برا الجدار .. ودجود الماي داخل الظلام خلى المخزن شبه جليد ..كانت الاغراض القديمه الصناديق في كل مكان في المخزن ..كان المخزن اشبه بغار من برودته وظلامه .. بدت حصه تدور على مفتاح الليتات على شان تشغل نور المخزن .. بس الانوار كانت ما تشتغل لانه صار لها مده طويله ما احد استخدمها ولا بدلها .. وخاصه انه المخزن مايدخلونه غير الخدم اكثر الشي على شان بس يرمون الشياء القديمه فيه .. ولا يهتمون بوجود النور او عدمه...


دورت حصه على مفتاح الانوار ولا لقت شي .. فبدت حصه تصيح ..

حصه وهو مستعجله قبل لا تجي ام حسين ..: زهره .. يا زهره ..

بس زهره ما جاوبت .. وهني بدت حصه تعصب ..: زهره وياراسج ..

وهني بدى صوت من بعيد ينسمع ..: نعم ماما ....

حصه ..: تعالي ويا راسج ...

وهني يطلع لها شخص من باب المخزن بس بسبب الظلام كان مش واضح منهو .. خاصه انه وجهها كان في الظلام وظهرها في النور .. وهني تجاوب ميري ...: نعم ماما

حصه وهيه تتطلع صوب الباب..: والعافيه .. هذي انتي ياميري !!!

ميري ..وهيه تدور في الظلام عن حصه ..: نعم ماما .. شو يريد ..

حصه وهيه تعرف انه ميري عصبيه مثلها ..: لا رد الله النسم في بطنج .. وش فيج تتكلمين بنفسيه وسخه ..

ميري ..وهيه خايفه من حصه لانها تعرفها زين ..: ما فيه شي ماما .. يريد شي ..

حصه ..وهيه ما عندها وقت ..: ايوه .. سيري خبري محيي الدين يجيب مصباح وليتات من السوبر ماركت ..

ميري ...: ماما .. انتي يريد مصباح !! ..

حصه وهيه تصيح على ميري ..: هيه .. ابا مصباح يا انسه ميري .. سيري يبي لي المصباح قبل لا الطمج بهذي الكراتين على راسج ..

ميري وهيه بتموت من الخوف ..: جين جين ماما .. بس فيه مصباح في غرفه مال انا.. أنتي يريد الحين !!

حصه ..وهيه تخف موجه الغضب منها ....: زين .. سيري يبي المصباح .. خبري محيي الدين يجيب لمبات للمخزن ... ترانا موب ناقصين ظلام ...

ميري ..: جين ماما ..

وتسير ميري تجيت المصباح في الوقت يالل حصه بدت تحاول انها تشوف شي في الظلام .. بس ما قدرت شوف شي .. تقربت حصه اكثر من الاغراض لين فجأه لطمت رجلها اليسار في كررتونه وسوا الكرتون صوت مثل ياللي فيه اوراق ...

وهني لا اردايا مدت حصه يدها على الكرتوته تبي تشوف ياللي داخل الكرتونه شنو هوه .. بدت تدخل يدها في الكرتونه وهيه تتحسس شنو فيه ... وفجأء حست باوراق في داخل الصندوق .. كانت ريحه الصندوق خايسه .. وهني تذكرت حصه انه هذا الصندوق هوه نفس الصندوق ياللي في بيت اختها مريم .. بدت حصه تتلمس لين فجأه دخل المخزن نور المصباح ياللي ميري جابته لحصه ..

حصه وهيه تقول لميري ...: ميري .. مسكي المصباح شويه .!!! ..

وبدت حصه تفتش وتحاول انها تقرا الاوراق ياللي في الصندوق !! .بس ما قدرت لانها مش متعوده على الظلام .. ولا فجأه تطلع لحصه صوره لحمد ومريم .. بس الصوره كانت شبه مأكوله من الفيران .. وهني تقول حصه لميري

حصه وهيه ودها تعرف كان فيه شي ذو قيمه في الصندوق على شان تعطيه ام حسين وتفتك من لسانها ..: ميري ..شلي هذا الصندوق في الممر على شان اشوف وش فيه ..

ميري .. : جين ماما ..

وهني بطبيعه الانثى تحس ميري انه الصندوق ثقيل عليها .. وانها ما تقدر تشله بروحها .. بس حصه على عادتها ما تهتم بقدره الانسان وضفه سواء كان انثى او غيره ..

وهني تطلع ميري الصندوق بعد ما طلعت روها ويهيه تشله وتطيحه ...

حصه ..: ميري .. اذا جت ام حسين قولي لها تنتظرني في الصاله .. وانا بجيها .. زين !!

ميري وهيه بتموت من القهر على حصه ..: جين ماما .. جين ..

وتطلع ميري من عند حصه وكنه الشياطين على راسها من طلبات حصه ياللي ماتوقف ....

هني حست حصه بغضب ميري .. ورفعت صوتها علي ميري على شان تقهر ميري اكثر ..: يا علج النفاد يا ميري .. انقلعي ويا هالراس كنه بروش يدتي !!

وهني بدت حصه تطلع في الصور ياللي كانت مرمايه في الصندوق او الكرتونه ..بدت تشوف صوره اختها .. صوره حمد .. وبدت تفتش في الاغراض ... ياللي في الصندوق .. ولا فجأه تشوف حصه ورقه مأكوله طروفها .. كانت على شكل رساله .. بدت حصه تقراها على بالها انها رساله حب من مريم لحمد او العكس ... من حمد لمريم لانه تعرف انهم يتبادلون الرسايل من فتره لفتره .. حتى ولو هم قريب من بعض لدرجه حبهم وتولعم ببعض ..

وهني بدت حصه تقرا الرساله وهيه تفتح عيونها مثل ياللي مش مصدق ياللي يشوفه .. كانت نفس الرساله ياللي قراها حمد قبل يوم وفاته .. كانت نفس الرساله ياللي بينت حقيقه مريم له .. كانت نفس الرساله ياللي بعدها شاف طيف شوق .. هيه نفس الرساله ياللي بينت له خيانه مريم للامنه .. بدت حصه تقرا الرساله وهيه ترتجف وخايفه انه حمد عرف انه حصه كانت ورا كل شي .. بدت تقراها لين فجأه انتهى اخر سطر من الرساله ...وهني بدت حصه تعرق .. بدت تعرق وهيه ما تعرف وش حصل لها .. بدت اعصابها تنهار .. وهني بدت حصه تدخل في وسط الصندوق وهيه تدور على اشياء ثانيه ..يمكن حمد خلفها او مريم خلفتها من الدله .. وهني بدت حصه تفتش مثل الجنونه .. بدت ترمي بالاوراق في كل مكان .. وبدت تفتش ... ولجأه تشوف الملف الصفر .. بدت تشوفه .. وهيه مش مصدقه .. بدت تفتحه على شان تشوف نتائج التحاليل .. كان الملف الاصلي لمريم .. كان الملف الاصفر ياللي يحمل حق سعيد فيه .. حق شوق فيه .. كان الملف الاصفر ياللي راح يهدم العز ياللي عايشه فيه حصه .. وهني بدت حصه تفتش لين فجأه دخلت عليها ميري ..

ميري وهيه تفك عيونها من الصدمه على انه حصه بدت ترمي الاوراق من الصندوق في كل مكان .. بدت ميري تنصدم من منظر حصه ياللي صارت مثل المجنونه وهيه تفتش وتلهث مثل ياللي قطع مسافه طويله بدون اي توقف .. كان في صوت حصه خليط من لهيث وجنون وهيه تدور في الصندوق وترمي بالوراق في كل مكان ..

من خوف ميري من منظر حصه ما قدرت تقول شي .. كان منظرها وهيه تسوي هذي الاشياء يخوف .. كان منظرها يخوف ياللي ما يخاف ..كانت شبه مجنونه .. ترمي الاوراق لي اخر ورقه في الصندوق .. وفجأه ارتمت حصه على الجدار على شان تسند ظهرها لانها ارتاحت انه ما فيه شي ثاني لقته يدل على انه مريم خلفته .. بدت حصه تمسك الملف الاصفر وتحضنه وهيه تقول ..

حصه وهيه بصوت يزيغ ..: تعال هني يا من ناوي تهدم حياتي .. يا من ناوي تهدم غزتي وشموخي .. لا .. لا .. موب انته ياللي راح تخلي كل هالعز يروح .. انا بعت اختي على شان كل هالعز .. ولا راح اتنازل عنه .. انا بعت الدنيا كلها على شان اتم فوق .. انا تعست على الخلق على شان يغرقون وانا اعيش من طوفان الحياه .. موب انته تجي وتهدم كل هالعز بوجودك من هذي الدنيا ..

وهني تنتبه حصه على وجود ميري فوقها وهيه ترتجف .. وخايفه من ياللي شافته ..

حصه ..وهيه تبحلق في ميري ..وترفع صوتها .على ميري ..: حوه .. انتي !! .. شنو تسوين طول هالوقت هني !!!

ميري ..وهيه ترتجف وتنتفض ..: م .. م .. مم... ماما.. .ماما هم هسين *اونه ام حسين * .. برا .. في صاله ..

حصه وهيه تصرخ على ميري ..: وليش ما قلتي لي من الصبح ..

وهني ما قدرت ميري تجاوب .. لانها شافت اغرب وارعب منظر شافته من دخلت هذا البيت .. كان صراخ ورفع صوت حصه عليها اهون مليون مره من ياللي شافته .. كانت تشوف منظر اشبه بمنظر وحش يقطع انسان قدامها .. بدت ميري ترتجف ولا قدرت تقول شي ..

وهني تلتفت حصه في ميري ياللي بدت تتبلع ...: يالله .. سيري .. سيري سوي شاي ...

ميري ..: جين ماما جين ..

وهني ترجع تستند حصه على الجدار وهيه تمسك الملف الاصفر وهيه تلتفت يمين وشمال .. كانت خايفه انه فيه احد يشوف الملف ...غيرها .. كانت خايفه انه ميري شافت شي .. بدت حصه تشل الملف وتخبيه في شيلتها .. خذت حصه الملف في شيلتها وفجأه حصت انه وجود الملف في شيلتها راح يخلي الشكوك تدور في بال ام حسين ياللي دخلت البيت وهيه ما تدري وش الطبخه ياللي مستويه فيه ..

قامت حصه من جلستها ياللي كانت مثل ياللي بيموت وهيه تستند على الجدار .. قامت وبدت تستند على الجدار كنه الملف الاصفر وزنه طن .. موب ملف من اوراق .. بدت تستند حصه على الملف وتقوم شوي شوي وعيونها حوليها وتلتفت مثل الجنونه حتى انها كانت تلتفت ورها رغم انها كانت عرفه انه ورها بس الجدار .. بس من خوفها من انه احد يشوف هالملف غيرها خلها شكه بكل شي في البيت ..كانت حصه تلتفت في كل زاويه .. تلتفت وهيه تحضن الملف وتعرق اكثر كنه فيه عيون في الجدران تراقب تركاتها .. وهني من خوف حصه انه فيه احد بيشوف هالملف مسكته ودخلته في وسط ثيابها على شان ما يشوفه احد .. دخلته في وسط ثيابها وحضنته بيدينها .. وهني نست حصه انه ام حسين في الصاله تنتظرها .. وبدت حصه تتوجه للصاله وهيه ناسيه انه ام حسين في الصاله بعد ما انصدمت من وجود الملف ياللي يثبت لهلال كل شي .. على انه سعيد وشوق لهم الحق كله ..

بدت حصه تمشي للغرفته وهيه تلتفت يمين وشمال .. مثل ياللي ينتظر الموت يخطفه في اي لحظه .. ولا فجأه تسمع حصه صوت يناديها ..

ام حسين ..: حصه .. يا حصه .. وش فيج بسم الله عليج !!

حصه وهيه تصرخ ..: اااااااااااااااااااااااااااااا اااااااااااااااااااا
ااااااااااااااااااا

وهني فكت ام حسين عيونها وهيه تشوف حصه بهذاك المنظر .... : اعوذ بالله من الشيطان الرجيم ..!!.. شنو فيج تصرخين .. هذي انا ام حسين ..

وهني تتنهذ حصه وهيه تشوف ام حسين من بيعد في الصاله ..: اههههههه .. زيغتيني يا ام حسينوه ..

ام حسين ..: شنو فيج وجهج شاحب وتعرقين .كنج شايفه جني !!!

حصه ..: ما فيني شي .. ما فيني شي ..

وهني تتقدم حصه لسلالم على شان تسير غرفتها ..ولا فجأه تناديها ام حسين ..

ام حسين وهيه مستربه من منظر حصه ياللي شيلتها على كتوفها يمين وشمال وماسكه على بطنها وضمه يدينها على بدنها مثل ياللي فيه مغص .. : حصه .. وين سايره ..وشنو فيج ماسكه على بطنج .!! .. فيج مغص ولا شي !!

حصه وهيه تلتفت صوب ام حسين وهيه تعرق وتزر على بطنها اكثر وتأشر براسها مثل ياللي يقول نعم ..

ام حسين ..: عيل يا حصه خليني اوديج الدختر ...

وهني تتقرب ام حسين من حصه .. بس حصه صرخت على ام حسين ..

حصه وهيه ترتجف مثل البردان وتعرق ..: لا .. لا .. لا تتقربين مني يا ام حسين .. لا تتقربين ..

وهني تقوقف ام حسين فجأه ولا منظر حصه كان غايه في الغرابه ..وهني تسألها ام حسين ..

ام حسين ..: اعوذ بالله .. شنو فيج انتي اليوم ..

حصه وهيه ترتجف وتحضن الملف اكثر اكثر كانه ام حسين بتشله منها وبتنشره ..: لا .. ما فيني شي .. ما فيني شي اقولج .. بس تعبانه .. تعبانه .. وابا ارقد .. وابا ارقد ..

وهني بدت ام حسين تكلم عمرها ....: بسم الله الرحمن الرحين .. احيد ياللي يسير كشته يرد فرحان ومستانس .. بس شكل حصه عكس خلق الله .. ترد مجنونه ومتخبله ..

وهني تمشي حصه صوب غرفتها وهيه ترتجف وتنتفض .....

هني رفعت ام حسين كتوفها مثل ياللي يتسأل .. وهيه تقول ..: والله ما تسوى عليه الجيه في نص الليالي .. على بالي بحصل هديه ولا شي .. طلعت حصه ما يايبه شي ليه .. وتتعذر انه عندها مغص .. عيل بكره بسير لام وليد وباخذ منها هديتي ..

وتطلع ام حسين من بيت حصه وتمشي في الحديقه متوجهه للبوابه الكبيره ....في هذا الوقت ومن ورا الستراه وفي الغرفه المظلمه كانت حصه تراقب ام حسين من فوق البيت .. كانت تراقبها على شان تتأكد انه ام حسين طلعت من البيت ..

اول ما طلعت ام حسين من البوابه الكبيره وتأكدت حصه انه ما فيه احد بدت تطلع الملف وتفتش فيه .. حتى انها بدت تشوف عدد الصفحات ياللي فيه .. هل هيه كامله ولا ناقصه .. هل طاحت منه ورقه ولا شي .. بدت حصه تحط الملف في الخزانه الكبيره ياللي في غرفتها .. وفجأه بدت حصه تكلم عمرها مثل المجنونه ..

حصه وهيه تكلم عمرها وسط الظلام ياللي في الغرفه : لا يكون طاح شي من الاوراق وانا جايه الغرفه !! .. لا .. اكيد طاح شي .. خلني اتأكد ..

وهني مثل الخبلا تطلع حصه من الغرفه صوب الممر على شان تتأكد انه ما طاح شي وراها وهيه جايه للغرفه .. وهني اول ما طلعت من الغرفه وقفت فجأه ولتفتت في باب غرفتها ياللي من سرعته وعجلتها تركته امبطل .. التفتت حصه ورها ولا بالباب امبطل .. وهني بدت حصه تشك اكثر انه احد يمكن يدخل ويشل الملف .. بس الخزانه كانت مقفله .. والمفتاح عند حصه .. بس من خوف حصه كانت تتوقع انه فيه احد راح يجي يصرق الخزانه حتى وهيه مقفله .. وهني بدت حصه تعرق اكثر وترتجف .. وتربع صوب غرفتها وتدور على مفتاح الغرفه .. اول ما لقته على طول تربع وتقل الباب ورها وهيه تربع صوب الممرات على شان تتأكد انه الاوراق ما تطحت مني ولا مناك ..

وهني تسير حصه صوب ممر المخزن بدت تتأكد انه ما فيه شي ورقه طايحه ....او انه ورقه تسربت من الملف وطاحت بين الاوراق وهيه مش منتبه ..

وهني استندت حصه على الجدار بعد ما تأكدت انه ما فيه شي من الاوراق ياللي كانت راميتها عند الصندوق يوم ميري جتها .. وهني بدت حصه تحس بانه احد يمشي فوق .. بدت حصه تسمع خطوات في الطابع العلوي تمشي صوب غرفتها .. وهني بدت حصه مثل المجنونه تربع لغرفتها وهيه تتأكد انه الملف في امان ..كانت خايفه انه فيه حرامي راح يصرق الملف .. بدت حصه تربع وتلتفت يمين وشمال .. وراها وقدامها مثل المجنونه وهيه تعرق اكثر واكثر .. كان منظرها يخوف لدرجه انه ميري وزهره يوم شافوا منظرها ياللي كان يخوف دخلوا غرفتهم وقلفوا الباب على انفسهم ....

 
قديم   #75

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

في الوقت ياللي حصه كانت تسمع اوهام وخيال .. كانت ساره على مهيه عليه .. تنزف الدم من قلبها وتهل دموعها .. حست انه الدنيا ما لها طعم .. انه الدنيا ما لها اي قيمه من سمعت هذيج الكلمات .. بدت ساره تهل دموعها وهيه تناظر النجوم في السما في ليله الكل بدى يقدم لها التعازي .. بدى قلبها يعزي عيونها .. بس العيون بدت تسكب الدمع على خلٍ تركها وراح .. والقلب يشكي جروحه .. والروح تبكي روحها ياللي تركتها وراحت .. بدت ساره تنادي في خاطرها عن سباب ترك سعيد لها .. بدت تسأل عن السباب .. هل هوه انه ما يبيها ولا لانه فيه شخص ثاني في حياتها .. بدت ساره تيأس .. وهني قامت ساره صوب المرايه .. اول ما تطلعت ساره ولا تشوف وجهها ينعكس في المرايه .. بدت سارت تناظر في نفسها وهيه تقول ..

ساره وهيه تدمع وتكلم نفسها في المرايه ..: ليش تركتني يا سعيد ... انا شنو فيني .. انا شنو ناقصني ..

وهني تتقرب ساره من المرايه اكثر وهيه تتمنظر اكثر واكثر لين فجأه حطت يدها اليمين على صورتها المنعكسه على المرايه وهيه تقول ..: الله ما فيه شي ناقصني .. اشوف عمري حلوه .. هل انا شينه لهاي الدرجه !! .. هل لهاي الدرجه انا اخرع .. ..

وهني بدت ساره تبكي وهيه تنزل من المرايه ياللي كانت تطلع فيها وهيه تقول ..: هل لهاي الدرجه انا اخوف .. ليش انا احب انسان ما يقدر قيمتي في حياته .. ليش انا ياللي ابيع الدنيا واشتريه وهو يبيعني برخص التراب .. ليش انا ياللي اسوم الروح له واهو يبيعها لغيري .... ليش اعطيه قلبي وهو يطعنه ويخلص عليه ..

بدت ساره هني تناظر عمرها في المرايه وهيه تحط يدينها على خدودها وهيه تقول ..: هل للجمال الخارجي له قيمه يا سعيد اكثر من الجمال الداخلي !!!!..

وهني ترتسم صوره سعيد في المرايه بعد ما انورت الغرفه فجأه ورجعت للظلام بس نور طيف سعيد كان منور الغرفه ... .. ارتسمت وساره كانت تناظر في المرايه في وسط الظلام .. اول ما ارتسمت صوره سعيد في المرايه لساره تطلعت ساره ورها ولا بطيف سعيد قدامها .. اول ما ارتسمت .. هلت دمعه ساره .. هلت وهيه ترتجف شفاهها قدام طيف سعيد ..

وهني بدى الطيف يتقرب .. تقرب ونسايم بارده بدت تلعب بشعر ساره وتحركه مثل موج البحر .. بدى شعرى ساره يتحرك مثل الامواج ياللي ترتطم بالشاطئ .. هني تقرب الطيف .. تقرب من ساره وساره تهل دموعه ببطئ على خدها ياللي بدى يتشبع بالدمع .. اول ما تقرب الطيف ولا بشفاه تتنطق بحروف من صميم القلب .. الو ما تقرب الطيف ولا بساره تنجاوب الطيف بكلام قبل لا يزيد في تقربه منها ..

وهني هلت دموع ساره وهيه تسأل طيف سعيد ياللي ما فرقها حتى بعد ما حطم قلبها وتركها في عالم احزانها .. بدت ساره تناديه وهيه تقول ...

يا وش بقى .... باعطيك مني ولا جاك *** ما باقي الا روحي ... احيا بها لك

(هني ابتسم طيف سعيد لساره .. ابتسم وهو يتقرب منها ... هني انسحرت ساره بابتسامه سعيد ياللي كانت بالنسبه لها نور من الشمس في دنيا المحبين .. ارتسمت الابتسامه وساره تهل دمعتها ببطء وتنزل راسها للارض وهيه تقول )

اوصف جمالك .... كل ما نشدت واهواك *** وازين ايامي بجلسه خيالك

(ولا باحساس غريب تحسه ساره وهيه تشوف الطيف ... كان احساس من الوحده .. اساس بالحزن على غياب سعيد .. غيابه رغم انه دايما موجود معاها .. حست بانه خلاص .. مستحيل الوصول لقلبه .. من المستحيل انه يرجع لها سعيد الاولي ياللي حبته وتعلقت فيه .. وهني بدت ساره تكلم الطيف وهيه تلتفت فيه بنظره مكسوره ) ..

يا الغايب الحاظر ... بقلبي ولا القاك *** اقرب من عيوني ... وصعبن منالك
شالك زماني ... عن عيوني .. ووراك *** لا شك وثّق في ظلوعي ... حبالك

( وهني حست انه سعيد تركها للابد .. تركها في ظلام الحزن .. تركها رغم انها ما تخيرت احد بداله .. تركها في ظلام الاحزان .. تركها واخذ منها شمس الامل على شان تعيش ابنورها بعد ما قال لها انها تنساه)

يا صاحبي .. شمسٍ ورا ليل جفواك *** ما بالعهد بك قاس .. في دلالك
وش غيرك .. يا منوه القلب واطفاك *** على حبيب ... ما تخير بدالك
دنياي ما تصلح بلا شمس .. دنياك *** والليل يوحش ... لو تغيّب هلالك

(وهني تقرب الطيف من ساره وهو نظرته انكسرت من كسور نظره ساره .. تقرب منها وبيديه الحنونه الناعمه البارده مسح دمعه ساره وهو يطالع فيها .. مسحها .. وهو يقول لها ..: يا ساره الدنيا حلوه .. وفيها كل شي زين .. الدنيا يا ساره حلوه .. بس انتي تنظرين لها بنظره حزينه ...

بس ساره رجعت تجاوب الطيف وهيه تكلمه وتتعمق اكثر في حزنها وهيه تقوله ..)

ولا تشوف العين زينٍ بلياك *** ولا يطرب سمعي الا مجالك
ولا انتفض قلبي من الحب لولاك *** ولولاك ما يبدي على ...ما بدالك

.. غمضت ساره عيونها بعد ما شافت انه الطيف تقرب منها بيحضنها ويضمها له .. يضمها لقلبه .. يضمها بين يدينه ..غمضت ساره عيونها ولا فجأه هبت نسايم بارده قويه ولا بستاير غرفه ساره تتمايل في الهوا .. بدت تتمايل وتطير في الهوا لدرجه انه النسايم بدت تضرب وجه ساره في اللحظه ياللي الطيف تقرب منها .. هني غمضت ساره عيونها ... غمضت ساره عيونها ولا فجأه خفت الهبايب البارده ياللي هبت عليها في نص فصل الصيف .. خفت وفتحت ساره عيونها ولا بانها قدام المرايه .. كانت على نفس الوضعيه ياللي كانت عليها قبل ما تشوف سعيد .. كانت حاطه يدينها على خدودها مثل ما كنت مسويه .. الظاهر انه احلام اليضقه بدت تلعب بعوطف ساره .. هني سارت ساره لسريرها وتغطت وبدت تبكي ..

 

أدوات الموضوع



الساعة الآن توقيت السعودية الرياض و الدمام و القصيم و جدة 06:38 AM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0