 |
  |
|
|
|
08-08-2011, 05:56 AM
|
#1 |
|
عضوة شرفية |
 رمضان شهر الولائم والعزومات والأصناف الدسمة والحلويات والعصاير؛ وده بيكون السبب في إن ناس كتير وزنها بيزيد أوي بعد الشهر الكريم، واللي بيكون طبعا حاجة مقلقة جدا، وخصوصا لو كانوا متّبعين نظام غذائي كويس قبل رمضان، ونزلوا بالفعل عدد من الكيلوات، فمش بيكونوا مستعدين يخسروا المجهود اللي عملوه والنتيجة اللي وصلوا لها، وكمان العرايس اللي بيكون فرحهم على العيد أو بعد العيد؛ وبيكونوا عايزين ينزّلوا وزنهم قبل الفرح. علشان كده وإحنا بنستقبل الشهر الكريم، قابلنا د. إيمان كامل -استشاري التغذية العلاجية وصحة الأسرة والطفل والباحث بالمركز القومي للبحوث- واللي قدّمت لنا نظام غذائي صحي متوازن ممكن نمشي عليه طول الشهر الكريم؛ علشان نحافظ به على وزننا ونخسر كمان من 2 : 4 كيلو خلال الشهر، وكمان قدّمت لنا نظام غذائي قاسي شوية للعرايس اللي عايزين ينزلوا من 5 : 8 كيلو خلال الشهر. لكن في بداية الحوار د. إيمان أكّدت إن فيه أنواع مختلفة للريجيمات، ودي بتتحدد على حسب الهدف والوزن اللي عايزين نوصل له وفي خلال فترة أد إيه؟ وكمان على حسب السن، ولو فيه أي أمراض مصاحبة؛ زي: الأنيميا، أو خلل في الغدد، أو السكر أو أي مرض ممكن يؤثّر على الريجيم، علشان كده لازم نعمل بعض التحاليل والفحوصات في البداية علشان الدكتور يقدر يحدد النظام الغذائي المناسب للحالة بتاعتك. ودلوقتي تعالوا نشوف مع بعض النظام الغذائي المتوازن اللي د. إيمان كامل قدّمته لنا لكل اللي عايزين ينزّلوا من وزنهم في رمضان. ريجيم متوازن وجبة الفطار هتتقسّم إلى: 1- المشروب؛ ودي الخيارات المتاحة: كوب عصير غير محلّى كوب لبن منزوع الدسم + 3 تمرات كوب كركديه لغير مَرضى الضغط الواطي كوب عرقسوس لغير مَرضى الضغط العالي كوب خشاف ويكون عبارة عن (ثمرة تين + 2 ثمرة مشمش + 2 ثمرة قراصيا) لكن من غير بلح. 2- طبق الشوربة تكون منزوعة الدسم؛ يعني ممكن نحطّها في التلاجة شوية ونشيل طبقة الدسم اللي هتتجمد على الوش. 3- طبق سلطة نكتّر فيها الخيار والبقدونس والشبت والخضرة بشكل عام. 4- طبق اللحوم؛ ودي الخيارات المتاحة: صدر فرخة مشوية أو مسلوقة أو في الفرن 1/ 8 بطة مسلوقة حمامة واحدة سمك مشوي أو في الفرن 5- طبق النشويات؛ ودي الخيارات المتاحة: 4 ملاعق أرز أو مكرونة قطعة رقاق أو جلاش بحجم كف الإيد 4 محشيات 6- طبق الحلويات؛ ودي الخيارات المتاحة: 2 قطعة قطايف كبيرة 4 قطعة قطايف صغيرة 2 بلح الشام قطعة كنافة أو بسبوسة بحجم كف الإيد أما بقى وجبة السحور، فممكن ناخد أحد الخيارات التالية: خيار كتير + كوب زبادي منزوع الدسم + فاكهة 1/ 2 رغيف + قطعة جبنة قريش + بيضة 1/ 2 رغيف + طبق فول + سلطة ريجيم قاسي للمناسبات ريجيم المناسبات، وده بيكون قاسي شوية، لكن ده ممكن نتّبعه للضرورة القصوى؛ وهي إننا يبقى عندنا مناسبة أو فرح بعد رمضان، وهنكون محتاجين إننا ننقّص وزننا بأسرع وقت ممكن، نقدر نمشي على الريجيم ده طول شهر رمضان، ولو مشينا عليه مظبوط ممكن ننزل من 5 : 8 كيلو خلال الشهر. وجبة الفطار: 2 ثمرة فاكهة + ميه + عصير غير محلى + طبق سلطة + صدر فرخة أو قطعة لحمة. الحلو: فاكهة من المسموح بها؛ زي: البرتقال، أو الكانتلوب، أو الكمثرى، أو الكيوي، أو التفاح. وجبة السحور؛ ممكن ناخد أحد الخيارات التالية: خيار كتير + كوب زبادي منزوع الدسم + فاكهة 1/ 2 رغيف + قطعة جبنة قريش + بيضة 1/ 2 رغيف + طبق فول + طبق سلطة ودي بعض النصايح اللي قالتها لنا د. إيمان، علشان نقدر نحقّق أكبر استفادة من نظامنا الغذائي في رمضان.. 1- لازم نكسر صيامنا بالتمر أو العصير، وبعد كده ناخد ملعقتين شوربة ونروح نصلي المغرب، وبعد الصلاة نكمّل فطارنا علشان تكون العصارة الهضمية اشتغلت كويس. 2- ناخد طبق الحلويات الساعة 10 بالليل. 3- بالنسبة للريجيم العادي اللي قلنا عليه، نعمل تبادل بين الحلويات والنشويات، يعني مثلا ناخد صنف من النشويات 3 مرات في الأسبوع وليكن الأحد والثلاثاء والخميس، وناخد صنف من الحلويات في الأيام التانية يعني هناخده أيام السبت والإثنين والأربعاء. 4- نكتّر من تناول القرفة بالزنجبيل والشاي الأخضر، علشان تقلل من امتصاص الدهون، وممكن ناخد المشروبات دي باردة في الجو الحار اللي إحنا فيه. 5- علشان نحافظ على جسمنا من الجفاف، لازم نكتّر من تناول الميه، من بعد الفطار ولغاية السحور. مواضيع ذات صلة |
|
08-10-2011, 01:34 AM
|
#2 |
|
|
رد: لو عروسة وفرحك ع العيد.. تابعي معانا ريجيم رمضان
 |
|
08-10-2011, 10:26 AM
|
#3 |
|
|
رد: لو عروسة وفرحك ع العيد.. تابعي معانا ريجيم رمضان
تسلم يدكـــ
استفدت من طرحكــ الراآقـــي |
لو عروسة وفرحك ع العيد.. تابعي معانا ريجيم رمضان