|
08-12-2011, 12:02 AM | #1 |
:: كاتبة جديدة :: |
بنات ادخلوا هنا الله يخليكم وعطوني رايكم
السلآم عليكم بصرآحه هذي أول مشآركة لي و أعذروني مضآيقة وأبي أفضفض ولآ أدري وين أروح المهم مآبطوول عليكم أنآ عمري 28 سنه وإلى الأن مآتزوجت .. أدري وش بتقولون .. أنآ دعيت وأستغفرت وبذلت بألأسبآب واملي بالله كبيييييييير فوق مآ تتصورون بس سبحآن الله له حكمه في كل شي والحمدالله على كل حآل بس بصرآحه أبي أتزوج لأني كآرهه حيآتي في بيت أهلي كل يوم مشآكل واللي يبط الكبد أن مشآكلنآ تآفه جدآ بس خلآص مليت هذآ غير أن أخوآني الله يهديهم مقصرين معآنآ لآ يطلعون ولآ يودون إلآ بطلعة الرووح يعني بالعربي كآرهين تحمل المسؤلية والله مآحس أني عآيششه مثل البنآت .. حيآتي كلهآ بالمطبخ .. نآدر مآ أهتم بشكلي وأنآقتي .. ترى مآنيب لحجيه بسس الشكل أخر همي وأحس عمري فووق الـ 30 خآطري اسمع كلمة حلوه خآطري أحب وأنحب خآطري احس أنه في شخص بهالدنيآ يعشقني ويموت علي وخآطري وخآطري وخآطري مآ أنزل من غرفتي إلآ اسمع هآه وش بتسوين غدآ ؟ طيب وش رآيك تسوين فطآير مآفي أحد يقول وش رآيك تغيرين من شكلك ... وش رآيك تزورين وحده من صديقآتك حتى صديقآت مآعندي !!!! كلهم ألتهوآ بحيآتهم الله يوفقهم لآ تقولون مسكينه مأثره عليهآ المسلسلآت والأفلآم !! بالعكس كل بنت تحلم أنهآ تآخذ اللي يسعدهآ ويهنيهآ الحيآه مو كلهآ هم وغم واللي تقول الزوج هم وعذآب أقولهآ الله لآ يهينك أطلبي الطلآق وآرجعي بيت أهلك عشآن تعرفين وين الهم صدق ... مستحيل أني أبشوف تجآرب الحريم وأقيسهآ على نفسي أكيد فيه السعيده وفيه اللي حيآتهآ مثل الموج أمي بعد بدت تحسسني بشغلآت توجع القلب بس الشكوى لله أمي وش اسوي ؟ مرآت تحسسني أني اشين وحده بالعآلم مع أني مملوحه بس هي مو مقتنعه فيني ... حتى لمآ ترجع من عرس أمزح معآهآ أقول هآه في أحد سألك عني قآلت كلن يبي مثل أختك بيآض وجسم وجمآل لآ تحآتون أنآ مآأزعل منهآ لآني تعودت على مثل هالردود ... بس أستغرب منهآ يمكن لآن الرد جآ من امي !! تصدقون >> إذآ انخطبت وحده من بنآت العآئلة تجي تبشرني حتى لو أني بعيده تجي لييييين عندي وتبشرني وأنآ والله أفرح لهم بسس مدري ليه تسوي كذآ حتى أختي لآحظت هالشي !! يعني على الأقل تمثل قدآمي إنهآ تخآف على نفسيتي محسستني إني لوح مآعندي مشآعر ابد تخيلوآ قبل كم سنه كآنوآ يتصلون نآس يسألون عني وأمي توصفني بووصف الله لآ يوريكم تقول ترى بنتي مثل العبآيه >> يعني سودآ !!!! أقولهآ ليش تقولين كذآ تقول عشآن مآيجون ويقولون خدعتينآ ومره قآلت لوحده بنتي دووبه لو قآلت مربربه ارحم يعني وش أقولكم تبشعني تخلي اللي يبي يشوف يعووف الشووف أدري بتقولون آجلسي معهآ وكلميهآ .. جلست معهآ وفهمتهآ وقلت لهآ بنآتك مثل البضآعه ومآفي أحد يسب بضآعته ولآ مآكآن حد شرآ منهآ > تقول لآلآ هذآ نصيب لآ تضحكون علي بسس أنآ أحسس مرآت الكلآم اللي يطلع من الأهل يخرب على البنت وحتى بالمنآسبآت تتركني انآ وأختي بطآوله وتروح تقعد بطآوله ثآنية فهمتهآ وقلت لهآ وشلون النآس يعرفون انه حنآ بنآتك ؟ المصيبه أنه اختي الثآنية صغيرة يعني اللي مآ يعرف أنهآ أختي يقول أنهآ بنتي تقول لآلآلآ النصيب يجي مآله دخل أمك جلست معآك ولآ مآجلست وأخر منآسبه حضرتهآ اقنعتهآ أنه وجود الأم مهم عند بنآتهآ عشآن يعرفونهم النآس وفعلآ جلست معآنآ والله يمكن حرمتين او ثلآث جوآ يسألونهآ هذولي بنآتك ؟!!! وتبون الجد أقتنعت شوي بس أنآ مآلومهآ .. كبيرة بالسسسن ومآتبي أحد يقول فلآنه تعرض بنآتهآ وربي أغلب بنآت جمآعتي رآحوآ بالعرض وأنآ اللي أكلت هوى بالأخيير عشآن وشو ؟ عشآن النآس مآتقوول فلآنه تعرض نفسهآ .. خلي العآلم تقول اللي تقووله أهم شي أعرس زبدة الموضوع >> جت على بآلي الخطآبة وش رآيكم فيهآ .. في وحده فيكم تزوجت عن طريق خطآبه أو تعرف أحد تزوج عن طريقهآ ؟ أنآ أحسس مآفي فرق بينهآ وبين النآس اللي يدلون على بعض ولآ تنسون حنآ بزمن كلن صآر يهف النآر على خبزه الله المستعآن المهم كلمت أمي بخصوص الخطآبة وأرفضت رفض تآآآآآم قآلت انه اللي تكلم الخطآبة وتتزوج عن طريقهآ ترخص نفسهآ ويقعد ولد النآس يعآيرهآ ومن هالكلآم أنآ اشوف اللي يجي من الخطآبه حآله حآل اللي يجي بالطريقة التقليدية يعني الأثنين ينسأل عنهم وعن أهلهم وين المشكلة ؟ بصرآحه محتآره أفيدوني الله يجزآكم خيييييييييير وعندي طلب صغيييير لآ تنسوني بدعوه بظهر الغيب في هذآ الشهر الفضيل انه الله يرزقني بالزوج اللي يسعدني ويرضيني ويخآف الله فيني عآجلآ غير آجل مواضيع ذات صلة |