أسمهان وعبدالرحمن قصة أسرية هادفة بكل اجزاءها متتابعة روآية سعودية

جاء أبو رانية وأخوانها من برة ودخلوا المجلس عند ناصر فانسحبت رانية وراحت المطبخ تجيب القهوة للرِجال..وبيدها كيس الهدية!
أم رانية:ايش هالكيس اللي بإيدك؟عريسك جايب لك هدية؟؟
رانية:لاتسأليني يايمه!من زينها؟؟
أم رانية:تحمدي ربك..بنت عمتك سميرة خطيبها عمره مادخل عليها بـ كيس طماط حتى!!!هاتي هاتي أشوف!
رانية:وش تشوفين؟جايب لي ابقرة ولد الأجاويد!!ومعاها 6علب فاضية مدري وش القصد يبيني أحلبها له وأملى له العلب!!
أم رانية:هههههههه..الله يقطع ابليسه فيه من صرقعة أبوك..تتذكرين يوم سافرت الشغالة وحلف أبوك مايستقدم غيرها قمت أشكي له من جفاف يديني وسوادها من الغسيل والتنظيف وأنا قاصدة ألمح له اني أحتاج شغالة..فحسيت خاطره مكسور..وخرج من البيت وأنا فرحانة وأمني النفس بأنه راح يقدم على شغالة لكنه فاجأني بهدية جايبها معه يوم فتحت الكيس لقيت كرتون قفازات من الصيدلية!!!!!
رانية:زين لايفوتك الخاتم اللي جايبه!
أم رانية:ياسلام..حلو..ذهب عيار24....
رانية:حتى انتي انغشيتي مثلي يمه؟؟؟تراه شاريه من تكرونية بالشارع!!
أم رانية:والله انتي اللي صدق تكرونية!!هذا ذهب..واسألي مجرب ولاتسألين طبيب..حتى شوفي الختم اللي عليه..هالختم مايجي إلا في الذهب..
رانية:مستحيل!هو لو قايل لي انه خاتم ألماس كان شكيت بالموضوع وانه كذاب!لكن بيروح يخسِر نفسه خاتم ذهب وآخرتها يكذب ويقول فالصو؟؟مو معقول!اش بيستفيد!
أم رانية:صدقيني انه ذهب وقيمته ماتقِل عن 270 ريال...
رانية:ماأصدق!!
وقاموا رانية وأمها وشالوا القهوة والحلى وباقي الأغراض وحطوها بالمجلس..
ويوم طاحت عين ناصر على أم رانية قام يرحب..
ناصر:هلا هلا خالتي موضي..
أسفرت وأنورت واستهلت وأمطرت مثل مايقولون..وش هالزين كله؟من شافك قال إن رانية أمك!!
أم رانية:ههههه تسلم يالغالي..
رانية(بداخل نفسها):حسبي الله عليك يانويصر!حطيتني أكبر من أمي؟!!!!!!
وجلسوا العائلة يدردشون..وبعد شوي قامت أم رانية ودخلت داخل.. أما رانية قعدت تتابع المسرحية اللي قدامها!!أبوها ينكت ومشاري يقط نكتة ويرد عليهم ناصر بنكتة ثانية ويشاركهم مشعل!!
زهقت وقامت بتطلع من المجلس!
ناداها أبوها:رانية؟وين رايحة يابوك؟؟
مشاري:بوك؟ولا كرافت؟؟؟؟
الجميع:ههههههه
رانية(بغيظ):رايحة أدرِس!!
أبو رانية:بس يابنتي اليوم اجازة ومافي مدارس بالليل!!!!ههههههه
رانية:ايه ..بس السيرك القومي أشوفه مفتوح..لاانتهى التهريج علموني!!!!
مشاري:ياحبك ياذي البنت للنكد!
ناصر:لا بالعكس رانية بشوشة وتحب الفرفشة..بس يظهر ماتعجبها سوالف الرجال!!
مشعل:أجل خل نقلب القعدة سوالف حريم!يمكن تروق لها!!
حط مشاري يده على فمه وقال(وهو يقلد سواليف النسوان)
:أقول ماشفتوا ياحلوات فستاني بعرس خلود؟أحمر فسفوري ضارب ببنفسجي..وحطيت معاه ذاك المكياج الأخضر اللي ألهب بشرتي وماعرفت أرقص!!!!
مشعل:فديت قلبك ياأم عباس!إنتي حلوة إن رقصتي وإن رقدتي!
رانية:هيييييييه..أبوشنبات انت وياه ماتستحون على وجيهكم؟؟هذي سوالف تنقال بالله؟؟ماتحشمون اللحية البيضاء اللي قاعدة وياكم؟
أبورانية:الله يسامحك يابنتي!أنا لحيتي بيضاء؟
ناصر:لاياعمي..قلبك هو اللي أبيض!!
ورجعوا الجماعة يكملون الجلسة بسواليف عن المواقف الساخرة المضحكة اللي مرت فيهم قبل ويضحكون!!أما رانية قاعدة في مكانها بتململ!!!
ويوم انتهت زيارة ناصر لهم ودعهم جميعاً وراحت رانية توصله للباب الخارجي..
ناصر:رنونتي الحلوة؟وشفيك زعلانة؟كأن الجلسة ماجازت لك؟؟
رانية:ايه ماجازت لي الصراحة!أحب الضحك والوناسة..بس لازاد الشي عن حده انقلب لضده!!!
ناصر:ياحبيبتي تحمليها هالفترة..النكد جاي لك قدام بس انتي لاتستعجلين!!
رانية:ايـــــــــش؟يعني ياتطخه يا تكسر مخه؟ماعندك حل وسط؟
ناصر:بعدك ماتعرفيني..أنا أتمسكن لين أتمكن!!!هههههههه مع السلامة..
رانية:مع السلامة..
وثاني يوم بالمدرسة لبست رانية خاتمها تبي تكشخ به قدام صديقاتها!!وهي بداخلها متيقنة انه فالصو!!!
وكانوا الشلة مجتمعين ويسولفون بمواضيع مختلفة..وفجأة طاحت عين اسمهان عليه وقالت:رانية؟آثاري أذواقنا متشابهة؟؟نفس خاتمك هذا شريت مثله لأختي أسماء يوم ولدت..
رانية:وبكم شريتيه؟
اسمهان:شريته ب300 ريال..
فرحت رانية انه ماطلع فالصو مثل ماضحك عليها ناصر!!وقالت:هذا هدية من خطيبي...!!
================
مرت الأيام دون جديد يذكر والشلة مجتهدين بمذاكرتهم حتى رانية اللي كان مستواها متوسط بالدراسة اجتهدت مرة وارتفع المستوى!!
نجلاء:غريبة!!من متى كل هالاجتهاد؟أخبرك ماتهلكين نفسك في الدراسة مثلنا!!!
رانية:اش أسوي؟أخاف أجيب نسبة مو زينة ويقعد ناصر يعايرني!
==============
أما عزة فكانت مجتهدة باتصالاتها على اسمهان..واسمهان تحاول تسحب نفسها منها..لكن عزة لاتكل ولاتمل..تعاود الكَرَّة مرة بعد مرة!!
وولدت زوجة سلمان صاحب أزواجهم وفكرت اسمهان تروح لها تزورها...وكان اسمها ليلى..
ولما كانت اسمهان عند ليلى بالبيت وكانت ليلى والدة لها أسبوعين...وجايبة ولد..
ليلى:هالحين كم صار لك من تزوجتي يااسمهان؟؟
اسمهان:تقريباً كملت سنة..
ليلى:ومافي شي بالطريق؟؟
اسمهان:لا لسه!
ليلى:بيني وبينك أفضل لك..شدي حيلك بالدراسة وتخرجي..الأطفال ياخذون وقت الواحد..وصعب على الوحدة توفق بينهم وبين دراستها
وكانت ليلى جالسة بسريرها تتكلم مع اسمهان..
قعدت اسمهان تراقب حركات الطفل وهو بسريره يتمغط وحنَّت عليه وفكرت تشيله..وانثنت ناحيته وحطت يدها تحته تبي تشيله..
ليلى:لحظة يااسمهان!....آنتي آنتي تعالي شيلي رَيَّان!!
وفعلاً أقبلت الشغالة آنتي وشالت النونو الصغير ودخلت داخل واسمهان متفاجئة من حركة ليلى!
جلست اسمهان بصمت والعبرة خانقتها وليلى تسولف ومندمجة بالسوالف..لكن اسمهان بس تفكر ليش ليلى خلت الشغالة تسحب الولد من اسمهان وتاخذه!!
لاحظت ليلى انه اسمهان مخنوقة وودها تبكي ومو مركزة معاها وقالت:اسمهان؟عسى ماشر؟لايكون متهاوشة مع زوجك؟
ووقتها انفجرت دموع اسمهان وصاحت في ليلى:ليلى؟انتي تشكين فيني اني حسودة وعيَّانة؟
ليلى:لا أبد والعياذ بالله!ليش تسأليني هالسؤال؟
اسمهان:أجل وش معناها حركتك يوم جيت أشيله خليتي الشغالة تاخذه مني؟؟على بالك يوم إن ماعندي أطفال بأحسد غيري؟حرام عليك أنا أحب الأطفال
ليلى:ههههههه أما صحيح ماعندك سالفة..آثاريك ظنانة سوء؟؟ترى ماانتبهت لولدي انه مستفرغ الحليب من فمه على ملابسه إلا يوم جيتي تشيلينه..وانحرجت منك لاتشمين ريحته وتشوفينه بهالمنظر وقمت أنادي الشغالة تشيله!!بس هذي كل السالفة!
قامت اسمهان تمسح دموعها وتبتسم يوم اتضح لها الأمر..
ليلى:آنتي...آنتي..
أقبلت الشغالة وهي شايلة الولد
ليلى:خلاص؟غيرتي ملابسه؟
آنتي:ايوه مدام..
ليلى:زين..حطيه بحضن مدام اسمهان..وعهدٍ علي يااسمهان ماأشيله من فوقك لين ما تمِلِين منه!!بس لاتاخذك الظنون فيني!!
وبعد السواليف المختلفة..
اسمهان:أحد بيجيك غيري؟؟
ليلى:ايه ثنتين من صديقاتي..بس مدري اشفيهم تأخروا!
اسمهان:عزة زوجة يوسف وحدة منهم؟؟؟
ليلى:لاياشيخة..الله يستر علينا وعليها من زمان قطعنا العلاقات ببعض!!ليش؟انتي تتواصلين معاها؟؟
اسمهان:يمكن تقابلنا 3مرات بس !لكن بيننا مكالمات..
ليلى:شوفي يااسمهان خذيها نصيحة من أخت أكبر منك..أنا ماأحب أذِم الناس وأتكلم فيهم بس خلك حذرة زين من عزة..ترى صاحباتي هذيل اللي بيجون بعد شوي صارت بيني وبينهم مشاكل والسِبة عزة!!لكن الحمدلله رجعنا لبعض!حتى زوجي صارت بيننا مواقف وكانت عزة تنقل كلام عند زوجها لدرجة اني في مرحلة من المراحل بغيت أتطلق بسببها!!لكن الله ستر..
اسمهان:أعوذ بالله..وأنا اللي أحِن عليها بسبب المشاكل اللي هي فيها..
ليلى:صدقيني هي لو تكف لسانها وآذاها عن الناس تعيش بسلام..لكن ماأقول غير الله يهديها ويغفر لها..
وأقبلوا صاحبات ليلى وكانوا قمة بالذوق والأخلاق..
ويشتغلون اداريات بمدرسة تحفيظ وقاموا يقنعون ليلى واسمهان يسجلن بمدرسة التحفيظ بالعصر
اسمهان:ياليت..لكن الصراحة أنا أدرس وماعندي وقت!!
ليلى:أما أنا بإذن واحد أحد بس أطلع من الأربعين..بأسجل على طول..
نادية(وحدة من صاحبات ليلى):لو مانجاهد أنفسنا كان ماحفظنا شي!!لكن يااسمهان حتى لو ماسجلتي بالتحفيظ احفظي كل يوم آيتين من القرآن مافي أسهل من كذا وعشان يكون حفظك صحيح بالتجويد والترتيل اسمعي كاسيت للقراء الثقات اللي أشرطتهم متوفرة حتى على النت
الضيفة الثانية(نعيمة):أنا عشان تثبت الآيات في ذهني اشتريت مسجل صغير بسماعات وصرت أحط السماعات بإذني وأنا أشتغل بالمطبخ..لين ماصارت أغلب آيات القرآن مألوفة عندي وتيسر علي حفظها..
وبدأوا يتكلمون عن أفكار لتنسهيل حفظ القرآن وعن اجتماعهم مع بعضهم باستمرار وتسميعهم للآيات مع بعض وتحمست اسمهان..
لما انتهت الزيارة وركبت اسمهان السيارة مع زوجها بدأت تفكر انه عزة فعلاً انسانة مو مريحة كانت ظالمة ليلى ومشوهه سمعتها عند اسمهان..وانه ليلى انسانة عاقلة وتحب الخير....قطع عبدالرحمن حبل أفكار اسمهان وقال:سمهونة؟اشفيك ساكتة؟؟
اسمهان:أبداً..
عبدالرحمن:اش أخبار الزيارة؟
استانستي؟؟
اسمهان:جداً...زوجة سلمان وصاحباتها مثل العسل..تونست معاهم..
عبدالرحمن:الحمدلله..
اسمهان:عبدالرحمن ؟؟ودي أطرح عليك موضوع وتشجعني عليه!
عبدالرحمن:تفضلي..
اسمهان:اش رايك نتنافس أنا وإنت يومياً على حفظ آيتين من القرآن؟؟ونسمِّع لبعض؟وخلال شهر واحد نكون حفظنا 60 آية..يعني بمعدل مجموعة سور من جزء عمَّ!!
عبدالرحمن:جزاك الله خير ..هذا الكلام الحلو اللي أحب أسمعه..خلاص واش رايك نبدأ التنفيذ بكرة؟؟
اسمهان:ان شاء الله..
بيوم من الأيام اجتمعوا هند وسماح عند أمهم(أم تركي).......
هند:الله يسعد تركي ريحنا مرة في تأثيث شقته..كل أثاثه لسه جديد من أيام زواجه بعبير..اللهم إننا أضفنا بعض الأشياء..
أم تركي:لأنه يابنتي مااستخدم الأثاث من أيام الطلاق جاب العفش كله وغطاه وحطه فوق بالملحق...
سماح:ماعليكم من تركي ..رجَّال ويسبِّع نفسه...عليكم من نويصر هذا إلا مايدري عن راسه من رجليه..بالله يمه مابقى على الزواج غير أقل من شهر!وماسمعت انه غير شي ببيته!!!
هند:تركي يقول انه ضرب البيت بوية(دهان أو صبغة) جديدة..وغير دورات المياه...
أم تركي:واشترى غرفة نوم بعد..
سماح:بس؟؟هذا اللي قدر عليه؟ يمه بيتهم صاير شعبي وقديم ويفشل! كل البيوت اللي حولهم ترممت وتغيرت من الداخل والخارج إلا بيتهم باقي على حاله..اشفيه ناصر نايم ومو مهتم؟على الأقل يغير العفش اللي صار له أكثر من 12 سنة!!!!!!
هند:ولاتنسين انه كله جلسات عربي(مساند ومتاكي)..والمطبخ حالته تجيب المرض!!
أم تركي:وش تبوني أسوي له؟كل ماقلت له ياولدي غيِر بدِل قال:ماأقدر هالعفش من ريحة المرحومة(بإذن الله)!!!!
سماح:وهو مايقدر يتذكر أمه الله يرحمها إلا بريحة العفش؟اللي أكل عليه الزمن وشرب؟؟خل يتذكرها بدعوة صالحة أو صدقة أبرك له..
هند:وبعدين يايمه لاتنسين إن رانية خطيبته بنت رابية على العز والدلال..أكيد أهلها بينصدمون لاشافوا البيت..نسيتوا اننا بنستقبلهم فيه لاحضروا يرتبون أغراض بنتهم؟؟؟
سماح:تدرين يمه؟مالي غير تركي هو اللي يقنعه!!وأنا مستعدة أنزل السوق وأختار له أثاث..
هند:وأنا راتبي توي استلمته ماعندي أي مانع أدعم ناصر مادياً إذا هو رافض يدفع!!
سماح:مايحق له يرفض يدفع!وظيفته زينة وراتبه أزين..والبيت هذا مِلك له مو أجار..ووارث من أبوه أرض لو يبيعها تجيب له ذهب! ولاتنسون ان بيته دورين منفصلة يعني بإمكانه يأجر واحد من الأدوار!أجل وش حقه هالشح اللي عايش فيه؟؟أخاف إنه بخيل يمه؟؟
أم تركي:لا بالعكس لابخيل ولاشي..إلا قروشه ضايعة هنا وهناك ومايعرف يرتب نفسه..
هند:أجل نكلم تركي يقنعه يغير أثاث البيت وإحنا مابنقصر معاه بشي..
وفعلاً اتصلت سماح بتركي وقالت له يقنع ناصر بتغيير الأثاث وهم بيساعدونه في الاختيار وهو عليه يدفع...
وتقابل تركي وناصر بأحد المطاعم وقاموا يسولفون عن ترتيبات يوم الزواج والعشا ونواقص القصر...
تركي:شوف أي نواقص خاصة بيوم الزواج والقاعة أنا بأتكفل بها وإنت حط جهدك هاليومين بتأثيث بيتك..
ناصر:ليش؟اشفيه بيتي؟يهبل وشاري فيه غرفة نوم جديدة!!
تركي:وإنت دايم قنوع؟لايمكن تتحسن شوي للأفضل؟؟أثاث بيتكم قد عفا عليه الزمن..
وماأتصور فيه بنت بهالزمن ممكن ترضى بهالمستوى!!حتى خواتي معترضات عليه!!!!!!
ناصر:وش علي من خواتك؟بيجون يسكنون معنا؟؟
تركي:لا..بس لاتنسى إنه ماعندك خوات يفزعون لك ويوقفون بجنبك..وخواتي ماراح يقصرون معك لو تبي..إنت بس توكل على الله....
ناصر:لاتكبرون السالفة!خطيبتي ميتة علي..لو أسكِّنها بـ جحر ضب بترضى!!بس انتم ارتاحوا..
تركي:أصلاً بيتكم أول شي لازم يتغير فيه الريحة!!!
ناصر:وش تقصد؟؟
تركي:ياخي البيارات اللي حولكم مخلية البيت مرتع للحشرات والفيران..أسألك باللي خلقك؟إنتي رشيت البيت قريب؟؟
ناصر:لا..في خاطري أرشه قبل الزواج بيومين!!!
تركي:لاياشيخ؟؟بعد ماأهل عروستك يجون يرتبون عفشها؟؟ اسمعني زين من بكرة الصبح لازم أنا وإنت نجيب فريق رش ينفضون لك البيت!
ناصر:تم!!
===============
ثاني يوم جاء فريق الرش وشالوا كل العفش من مكانه..وتفاجأ تركي من قذارة البيت اللي عايش فيه ناصر!!خاصة وإنه أول مرة يدخل لين داخل... العادة إنه يقعد معاه بمجلس الرجال!!!!
كان البيت كله موكيت وقدييييم جداً والبقع عليه من كل مكان.. والجلسات العربي مهترأة من كثر الاستخدام وطول العمر!!!
ناصر:اش رايك ببيتي؟مو حرام أغير هالأثاث اللي لو تلف الدنيا كلها مابتلقى مثله!!!
تركي:طبعاً لايمكن ألقى مثله إلا بمتحف فتح الرياض وتأسيس المملكة!!وش ذا القرف وش ذا المكان اللي لايمت للحضارة بصلة؟ماتستحي على وجهك إنت يوم تخلي أرحامك يشوفون هالمكان؟؟؟؟
ناصر:يعني هذا رأيك؟؟
تركي:لاااا؟ إنت باقي تشاوِر وتحاور؟؟ماتشوف العثة شلون ماكلة حشوة المساند؟؟وبعدين اش هالوساخة اللي تارسة البيت؟
ناصر:تدري فيني أنا عزوبي ومالي بالتنظيف وشغلات النسوان!!
تركي:ياخي جيب لك واحد من هالهنود أو الأفغان اللي عايشين حولك يساعدك بتنظيف البيت!!!
=================
وبنفس اليوم أخذ تركي أمه وخواته ووداهم يشوفون بيت ناصر
وفتح لهم ناصر الباب وقعد بالمجلس....
سماح:وعععععع..من صدقه هذا يخلي بنت الناس تعيش بهالخرابة؟
هند:لو نحط كم قطعة أثاث هنا ونعلق براويز..ويقلب الأرض سيراميك..يطلع البيت مقبول!!
أم تركي:المطبخ هو المصيبة الكبيرة بهالبيت!!أم ناصر الله يرحمها كانت سنين مشلولة لاتقوم ولاتتحرك واعتمادها على الشغالة..والشغالة شغلها مو ذاك الزود...الدواليب شاربة موية ومتفقعة!!
وراح تركي وقال لناصر:خواتي يشوفون من اللازم يتغير مطبخك!
ناصر:ياخي مابقى شي على العرس..وإنتم تفكرون بتفصيل مطبخ؟؟متى بيخلص؟؟
رجع تركي لخواته وقال لهم كلام ناصر.....
سماح:ياخي فيه اختراع اسمه مطابخ جاهزة مثل اللي بإيكيا..نجيبه بيوم واحد ونركبه مابياخذ وقت!
المهم رسموا أخوات تركي تصور لكل النواقص اللي بالبيت وحطوا ميزانية معقولة وبدأوا بالتسوق..
==============
ببيت اسمهان كان الجو يسوده فتور..عبدالرحمن مشغول أغلب الوقت!
اسمهان:دحوم؟إنت مو ملاحظ إنه في شي غير طبيعي؟؟
عبدالرحمن:لا..خير وشهو هالشي؟
اسمهان:صار لك مدة يا مقابل المدونة على النت..يا فوق الأوراق تكتب بهالمقالات..يا تتابع رسايل القراء... يالاهي بشغلك وسمهونتك مالها فيك نصيب!!!
عبدالرحمن:أدري إني مقصر..بس هذي مشاغل الدنيا وش أسوي؟
اسمهان:ومعقول مشاغل الدنيا هذي بتكون أهم من زوجتك؟؟
عبدالرحمن:أكيد مافي شي أهم منك عندي..س غصب عني لازم هالمشاغل تاخذ مني جهد ووقت!
اسمهان:بس هذا مو حال!إنت داري كلها اسبوعين وبتجي الاختبارات النهائية..يعني بأنشغل بالمذاكرة طول الوقت!وعقبها يكون زواج أخوانك وارتباطات عائلية..على الأقل خل نغتنم الفرصة الحين ونجلس مع بعض!
عبدالرحمن:طيب..وين تبينا نروح بهالليل؟الساعة صايرة وحدة بعد منتصف الليل..!!!
اسمهان:أنا ماقلت نطلع..قلت نقعد مع بعض..
وبعد هنيهات من التفكير..
عبدالرحمن:زين..اش رايك نطلع الحوش نتسابق؟؟
اسمهان(بسعادة):ايه ياليت!!
عبدالرحمن:خلني أتصل بأمي أول..أخاف أحد من اخواني برة بالحوش..
اتصل عبدالرحمن بأمه..
أم عبدالرحمن:هلا ياولدي..غريبة متصل هالحزة فيه شي؟؟؟
عبدالرحمن:لا..إنتي بعدك صاحية؟
أم عبدالرحمن:لا كنت نايمة بس صحيت أصلي الوتر..وبأرجع أنام..
عبدالرحمن:ووينهم أخواني؟؟
أم عبدالرحمن:نايمين هم بعد..لأننا بكرة من الصباح بننزل السوق ونكمل لوازم مطابخهم..ومواعينهم
عبدالرحمن:بغيت أنزل الحوش أنا واسمهان نشم هوا شوي..قلت أتأكد إن كان فيه أحد..
أم عبدالرحمن:يالله مساء خير؟؟انزلوا ماحد حولكم.....
ونزلوا الزوجين..وقاموا يتسابقون بالركض..وكان عبدالرحمن يتعمد إنه يتأخر بالجري عشان تفوز اسمهان وتحس بلذة الفوز!!!!
وكانت أم عبدالرحمن تسمع أصواتهم وضحكهم بآخر الليل..وقامت تطالعهم من ورا الشباك وتقول:يامثبت العقل والدين!!ثبِت عليهم عقولهم!!!!!!
بعد ماحسوا بالتعب جلسوا على مرجيحة على شكل أريكة وقاموا يسترجعون ذكريات الماضي والخطوبة..ويضحكون..
اقترح عبدالرحمن على اسمهان انهم يلعبون ألغاز!!
اسمهان:بس بشرط !اللي مايعرف الاجابة ياخذ دورة حول الحوش بالدراجة!
عبدالرحمن:تعرفين تسوقين الدراجة زين؟؟
اسمهان:طبعاً..!!
سألها عبدالرحمن:كان العرب يقولون(تركنا الديار بلاتع صلاقع)اش يعني؟؟
اسمهان:أقول؟بأركب الدراجة!ماعرفت!!
عبدالرحمن:يعني خالية من أهلها!
وقامت اسمهان تاخذ لفة بالدراجة وعبدالرحمن يطاردها!!
ورجعوا جلسوا على المرجيحة..
اسمهان:جاوبني؟وشهو الطير اللي إن أخذت عينه نام؟؟؟
عبدالرحمن:نعام!
اسمهان:شاطر..عرفتها..طيب خذ هاللغز اللي بعده..
أخرس مايتكلم وبليد مايفهم وبين الناس بالعدل يحكم؟؟؟؟
عبدالرحمن:الميزان...
اسمهان:يوووه شكله ماحد بيسوق الدراجة هالليل غيري!!زين حل هاللغز(له جلد بس مو حيوان، وله ورق بس ماهو نبات، وله لسان لكنه مو إنسان؟؟؟اشهو؟؟
عبدالرحمن:الكتاب!
اسمهان:صح..أف منك..كل شي تعرفه؟؟
عبدالرحمن:طيب اش أسوي فيك أسئلتك قديمة أعرفها من يوم أنا بزر! زين اسمعي لغزي:خبريني عن شي أوسع مافيه فمه..وابنه في بيته يلكمه وإن صاح مالقي من يرحمه؟؟
اسمهان:مستحيل أعرفه!قول إنت
عبدالرحمن:الهاوند..اللي تستخدمونه بالمطبخ!!
اسمهان:ماكنت بأعرف الاجابة لو بعد مليون سنة!!يلا بأقوم أنفذ العقاب وأدور بالدراجة!
وراحت اسمهان تاخذ لفة بالدراجة حول الحوش الكبير..وقعد عبدالرحمن على المرجيحة... ينتظرها...لكنها مارجعت!!! وطال انتظاره واسمهان لاحس ولاخبر!!
وراح يدوِر عليها بالحوش اللي أنواره مطفية..لقاها متخبية ورا جدار وتبكي!!
تعتقدون ليش؟؟؟؟؟؟
0000

0000000

000000000

000000000000
شافها عبدالرحمن وقال(بزعل):اش تسوين هنا؟؟؟
أشرت له اسمهان بيدها عشان يسكت وأشرت بإصبعها لجهة سياراتهم الواقفة بالكراج..
التفت عبدالرحمن ولقي واحد واقف بوسط الظلام ومعاه كشاف وفاتح باب السيارة ويفتش بداخلها!! راح عبدالرحمن يركض له وسحبه وضربه بأقوى ماعنده على وجهه..وصاح الرجال!!
عرفه عبدالرحمن من صوته وسلَّط الكشاف على وجهه..تتوقعون مين طلع؟؟؟
___
-----

-------
أخوه عبدالمجيد!!!!
عبدالرحمن:عبدالمجيد؟؟سامحني..
اش قاعد تسوي بوسط الظلام؟؟
وقام عبدالمجيد يأشر له انه نسي جواله قبل لاينام بالسيارة وقاعد يدور عليه!!!
خلى عبدالرحمن أنوار الحوش مطفية مثل ماهي وقال لاسمهان:قومي خل نطلع بيتنا!
اسمهان(وهي تبكي):مو قادرة أقوم!!!
عبدالرحمن:يابنت الحلال هذا مو حرامي..طلع اخوي عبدالمجيد..ورجع للبيت خلاص..
اسمهان:أقول لك مو قادرة أقوم..طحت من فوق الدراجة قبل شوي!!
عبدالرحمن:لاحول ولاقوة إلا بالله
وشالها وطلعوا بيتهم فوق..
ولما دخلوا البيت في النور كانت قَدم اسمهان وارمة وتنزف دم!!
ساعدها عبدالرحمن وقام يجفف الدم ويعقم قدمها وهي تبكي مو قادرة تحركها..
عبدالرحمن:المشكلة وين أروح فيك بهالليل؟؟اسمعي خل ننام ولاطلع الصبح نروح المستشفى ونشوف اش سالفة قدمك؟؟
اسمهان:ايه..أنا النوم كابس علي بعد التعب والركض وودي أرتاح وبعدين نروح المسشفى.
عبدالرحمن:زين.. مادام كان فينا حيل نركض ونلعب فالأولى إننا نصلي ركعتين في هالليل..
اسمهان:مو قادرة أوقف على رجلي..
عبدالرحمن:بس أتوقع إنك تقدرين تقرأين القرآن..صح؟؟؟
اسمهان:صح!
ناولها عبدالرحمن كتاب تفسير القرآن وقعدت تراجع الآيات اللي حفظتهم قبل..
وأما عبدالرحمن قعد يصلي وعقب الصلاة قام يدعي دعوات كثرة منها..اللهم ارزقنا بالذرية الصالحة
سمعته اسمهان وانطلقت الدموع من عينها مثل الشلال!!
شافها عبدالرحمن وتوقع انه السبب من ألم رجلها...
عبدالرحمن:مايخالف تحملي الكم ساعة الجايين وبالصبح نروح للمستشفى..
وشالها وحطها بالسرير ونام جنبها
وفي الصباح صلوا الفجر وانتظروا الشروق وراحوا للمستشفى اللي اكتشفوا وجود كسر بسيط بالقدم وجبسوا قدم اسمهان وعطوها عكازات تساعدها على الوقوف!!!!!!!
وهم راجعين للبيت كانت أم عبدالرحمن قاعدة تفطر مع عبدالمجيد وعبدالرحيم استعداداً للروحة للسوق عقب الفطور وكانت الساعة 10 الصبح..
انتبهت أم عبدالرحمن لوجود كدمة بوجه عبدالمجيد وسألته عن السبب!
شرح لها عبدالمجيد الوضع وإنه عبدالرحمن ضربه في الليل!!
أم عبدالرحمن مافهمت الموضوع زين وتوقعت انه سبب ضرب عبدالرحمن لعبدالمجيد هو إنه شاف اسمهان..وضربه عبدالرحمن من باب الغيرة!!!!!!!!
واتصلت على عبدالرحمن وكان راجع من المستشفى فقال لاسمهان:أمي تبيني اش رايك تدخلين عندها تحت بدل ماتطلعين فوق وقدمك تعبانة..؟
وافقت اسمهان,,وطقوا الباب وفتحت أم عبدالرحمن ووجهها مقلوب من الزعل!!!
ويوم شافت اسمهان قالت:خير اشفيها؟؟؟؟؟
عبدالرحمن:طاحت أمس بالليل وانكسر قدمها!!
أم عبدالرحمن:طبعاً!!!هذي آخرة اللعب بأنصاص الليالي!تقدر تفسر لي..بأي حق تمد يدك على أخوك؟
شرح لها عبدالرحمن الوضع بإنه اعتقده حرامي وطب عليهم يسرق شي من السيارة!!
سألت أم عبدالرحمن ولدها عبدالمجيد:ليش مافتحت أنوار الحوش بدل ماتستخدم الكشاف؟؟؟
عبدالمجيد(بلغة الاشارة):لأني حسيت بوجود وحركة اسمهان وعبدالرحمن بالحوش وماحبيت يتضايقون من وجودي ويحسبوني أتلصص عليهم!!
أم عبدالرحمن:بالله لابغيتوا تلعبون اختاروا وقت مناسب..أو العبوا بالمكعبات أحسن!!!!!وبعدين السطح عندكم فوق ليش ماتلعبون فيه؟؟؟؟
عبدالرحيم:ههههههههههههه
وأنا اللي أحسبك رزة يادحوم!آثاريك تلعب مثل البزران؟؟هههههه علمني بالله اش تلعبون؟؟؟
عبدالرحمن:لايكثر هرجك!نشوفك ان شاء الله عقب الزواج!!إن ماعلقت زوجتك على ظهرك وقمت تجري بها فوق السطوح!!!!ماأكون عبدالرحمن!!!!
عبدالرحيم (وهو فاطس من الضحك):هههههههههههه أخاف هذا اللي سويته البارح عشان كذا انكسرت رجل زوجتك!!!!
اتصلت أسماء على اسمهان يوم الخميس يوم السقوط التاريخي لسمهونة بالحوش!!!في الظهر
أسماء:السلام عليكم ورحمة الله وبركاته..
اسمهان:وعليكم السلام!!
أسماء:ياعالم ياهووه إذا حييتم بتحية فحيوا بأحسن منها أو ردوها!
اسمهان:مافيني حيل!!
أسماء:ياساتر يارب!ليش؟ لفيتي البيت ونفضتيه شبر شبر؟؟
اسمهان:إلا لفيت الحوش وتكسرت شبر شبر!!
أسماء:مجتهدة والله..خل شغالة أم عبدالرحمن تغسله..ليش تغسلينه انتي؟؟؟
اسمهان:ماغسلته ولايطراني..إلا انغسل شراعي بذا الحوش!!
أسماء:المهم..ماعندي وقت أضيعه..بالمختصر المفيد كلمت أهلي تجتمعون عندي اليوم..فتفضلي معاهم عقب المغرب نسهر ونستانس ونتعشى مع بعض...
اسمهان:أنا أنزار ماأزور!!
أسماء:ليش؟نفاس؟ولا بـ حِداد؟؟
اسمهان:فال الله ولافالك يالظالمة!أي حداد؟ الله يحفظ لي دحومتي..بس قدمي منكسرة ومو قادرة أمشي عليها..تعالوني انتوا..
أسماء:سلامات سلامات..ياعسى الكسر بـرِجل العدو ان شاء الله..بس شلون انكسرت؟أخاف تنطين فوق السرير مثل العادة؟؟
اسمهان:لا ماأنط..هذاك زمان أول ياأسوم!هالحين عقلت!
أسماء:هههه عقلتي؟؟أشك في ذلك يابنية!زين علميني شلون انكسرت رجلك؟؟
اسمهان(بلهجة حزينة وهي تطالع بقدمها):كنت ألعب بالسيكل قبل الفجر بالحوش..وصدمت بالسيكل في الجدار وطِحت...
أسماء:هههههههه وتقولين عقلتي يامال الخيبة؟زين اقعدي ببيتك لاتجين معذورة..أهلي يكفون!أخاف تجين عندي وتركبين بـمشاية لينة بعد!!!عاد انتي مايندرى عنك!!!هههههه
وقفلت اسمهان السماعة بعد نهاية المكالمة..إلا التليفون يرن..
اسمهان:آلو ياهلا..
أم عبدالرحمن:هلا فيك يابنتي..هاه؟بشري شلونها رِجلك الحين؟؟؟
اسمهان:مرة تآلمني مو قادرة أوقف عليها..
أم عبدالرحمن:طبيعي..هذا كسر يابنتي موب حاجة هينة..عموماً أنا قلت أكيد مابتقدرين تطبخين وأرسلت لك غدا مع الشغالة افتحي لها الباب...
اسمهان:ان شاء الله..
أم عبدالرحمن:ايه وبعد بغيت أقول لك..اليوم الأولاد يبون يسوون العشاء شوي دجاج وشيش طاووق بالحوش فكلمت جوهرة وأحلام وأم منصور جارتنا يجون يسمرون ويتعشون معانا..انزلي لنا عقب المغرب..
اسمهان:هذي ثاني دعوة تجيني اليوم ياخالتي..أسماء أختي تبي تجمعني أنا وسماح وأمي عندها بس اعتذرت عشان رِجلي..
أم عبدالرحمن:والله فكرة!اش رايك أنا أنادي أمك وأختك وزوجة أخوك يتعشون معانا الليلة؟؟
اسمهان:ياليت!بس مانبي نكلف عليك خالتي..
أم عبدالرحمن:ولا كلفة ولاشي..أم منصور الغريبة بتجينا وتسمر معانا..فما بالك بأهلك؟كلنا أهل ومابيننا رسميات..بأروح الحين أتصل بأمك..
وشوي إلا والشغالة مقبلة بالغداء..فتحت لها اسمهان الباب..
وأما عبدالرحمن كالعادة قاعد بالمكتب يسطر إحدى المقالات..
تغدوا مع بعض,,
وشوي وعائلة اسمهان كلهم دروا عن رِجل اسمهان المكسورة وقاموا يتصلون...وقالت لها أمها قبلنا دعوة خالتك للعشا..عشان نتطمن عليك بالمرة..وبطلنا من الروحة لأسماء وبتجي معانا..
============
في بيت مرام..كانت استعدادتها للزواج على قدم وساق ماتصدق بإجازة نهاية الأسبوع تجي عشان تنزل السوق وتجهز نفسها..
ماجدة:كنت متوقعة تحضيراتك ليوم الزواج بتكون أقوى من كذا..وخاصةً إنه في عروس ثانية معاك بنفس الليلة..لكن أشوفك متطمنة والموضوع عادي عندك!!!
مرام:طبعاً!هذي العروس لو إنها وحدة ثانية غير مشاعل كان شلت هم!لكن مشاعل جداً عادية ومالها بالحركات ولاالتقليعات!!في جميع الأحوال بأكون أنا المميزة!!!
==================
أما أفنان وصلت ممرضة فليبينية خاصة لأختها سندس وكانت مُدربة بشكل ممتاز للتعامل مع مثل هالحالات..وارتاحت أفنان لوضع أختها يوم شافت الممرضة ممتازة!
وبدأت تفكر بشكل جدي بنفسها وتستعد قبل الامتحانات..بتجهيز لوازم الملكة والعرس..
==============
أما نجلاء كانت هايمة بكل قصة تسمعها عن ولد خالتها(ماجد)..اللي يشتغل بمجال الطيران..وكان ساكن بالرياض..وكانت تعد الأيام عد خاصة انه وعدهم يتقدم رسمي ويشوفها بعد 3 شهور من اجازة الصيف....
===============
أما رانية كل مالقت نفسها فاضية راحت تشتري لنفسها أغراض من السوق..
وكل مااتصل ناصر على جوالها قالت له:أنا بالسوق!
وبمرة من المرات,,,,
ناصر:وش سالفتك؟كل مااتصلت عليك قلتي أنا بالسوق؟؟
رانية:طبيعي يالحبيب..وراي زواج لابد من التجهيزات...
ناصر:وش تجهزين له؟السوق وجنبنا موب طاير..وأنا قابلك مثل ماإنتي..
رانية:عيوني..أنا عروس ..
عرروووووس!!تفهم اش يعني؟؟يعني لازم أكون متجددة وكاشخة..
ناصر:مساكين حِنا الرِجال!!يشقى الواحد سنين عشان يجمع المهر ...ويعطيكم اياه تصرفونه بلحظة!!وعلى ايش؟على شوية همول وأصباغ تلطخها الوحدة على خشتها..على بالها بتتحول من حصيصة لـ جويل!!!!
رانية:مو حرام ولاعيب..كل بنية من حقها تاخذ المهر تضيعه بيوم ،تضيعه بشهر ،تقطه بالبحر!!هي حرة!طالما خرجت القروش من جيبك..فعلى الدنيا السلام!!
ناصر:آآآآه..ياحسرة قليبك ياناصر!
حمدت ربي ماعندي خوات..وطلعوا لي خوات تركي من تحت الأرض..كل يوم يشترون ويخلوني أدفع!!
رانية:وخوات تركي اش دخلك فيهم تصرف عليهم؟؟ماعندهم أزواج؟؟؟؟؟
ناصر:هم اللي قاعدين يأثثون بيتنا..وأعطيهم فلوس عشان يكملون التأثيث..
رانية:ياعسى ربي يجزاهم خير..في أسوأ الأحوال بيكون ذوقهم أفضل من ذوقك!!
ناصر:أفا يارنون!!مايعجبك ذوق خطيبك؟؟؟
رانية:خطيبي؟؟خطيبي اللي بيفتح لي زريبة حيوانات بالبيت؟؟مرة أهديتني بقرة قطن!ومرة أهديتني عصفورين بقفص أبلشونا بأكلهم وشربهم وأصواتهم ووسخوا لنا البيت!ومرة مهديني سلحفاة!!ومرة قطعة قماش عليها رسومات طيور النورس!!!خيييير؟؟
تشتغل طبيب بيطري إنت؟؟؟
ناصر:إنتي لو جيتي البيت بتشوفين مخلوقات ثانية من نوع آخر!!!!!!!
رانية:لا لا تكفى أنا أتحسس من الحيوانات..لايكون البيت بعد متروس طيور؟
ناصر:لا فيه بساس وقطاوى!!
رانية:وعععع ليش؟؟
ناصر:عشان تاكل الفيران اللي بالمطبخ!!!!!
التقت اسمهان بأهلها يوم الخميس في بيت أم عبدالرحمن على عزيمة العشاء وكانت شوي تفننوا فيه الرِجال بالحوش.....
وقاموا يسألون اسمهان عن طيحتها وراحت تحكي لهم...
أم اسمهان:زين اللي مرت على كذا يابنتي..والمفروض إنك ماتركبين دراجة..افرضي إنك حامل..كان رحتي فيها!!
أم عبدالرحمن:ماألومها..أنا ألوم اللي مشجعها ومآخذها بنص الليل بوسط الظلام!!الناس نايمة أو ساهرة تتعبد ربها وهذول يدورون عن الوناسة واللعب!!
أحلام:أنا كسر خاطري عبدالمجيد..أخذ علقة وهو مظلوم!!
جوهرة:وحتى اسمهان انقلبت الوناسة نكد!!
أسماء(تهمس بإذن اسمهان):الله يقطع إبليسك فعايلك تفشل!!حتى الرَجَّال هبلتي فيه؟؟
سماح(بصوت منخفض):ههههههه ماشاء الله مابقى أحد مادرى عنكم ياسمهونة!إذا بليتم فاستتروا..
اسمهان(بانفعال):واشفيكم سويتوا من الحبة قبة؟
أنا وزوجي نحب نلعب مع بعض دايماً..هالمرة حبينا نسوي تغيير فطلعنا الحوش..
أم عبد الرحمن:بس مرة ثانية اختاروا وقت مناسب يابنتي...
اسمهان:اش أسوي لولدك اللي مشغول طول اليوم؟؟ومايفضى لي إلا بهالوقت؟؟
أم اسمهان صارت تغمز لبنتها عشان تسكت!!
أم عبدالرحمن:معليش يابنتي..بس حتى انتي مشغولة عنه باقي الأيام بدروسك ومدرستك!!كلها 3 أسابيع وبتجلسين مقابلته 3شهور بالاجازة لين ماتملون من بعض!!!
أسماء(تهمس بإذن اسمهان):تحمدي ربك على أم زوجك الذوق هذي!هالكلام لو قالته أختك ابتسام لأم زوجها كان حذفتها بالنعال!!!!!
ودارت الجلسة عن سوالف ثانية مختلفة وكانت جلسة لطيفة..
أم عبدالرحمن:سماح؟انتم زواج أخوك وولد عمك بيكون نهاية الشهر اللي بيتزوجون فيه أولادي صح؟؟؟
سماح:كان هذا اللي بيصير...لكن تفاجئنا انه ولد أخو ناصر اللي تملك بالشرقية قبل فترة بيتزوج بنفس اليوم!!وعلى كذا الكل بيحضر زواجه وماحد بيحضر زواج ناصر من اخوانه وقرايبه..فأجلنا موعد الزواج وصار بالأسبوع اللي بعده!!
أم عبدالرحمن:الله يتمم لكم على خير..ومايحتاج أعزمكم انتي وأهلك على زواج أولادي العرس عرسكم...والله يحييكم...
سماح:الله يحفظكم..ويوفقهم يارب..
واستمرت السهرة والعشا,,وكل واحد رجع بيته
===================
ثاني يوم وكان الجمعة..اتصلت اسمهان برانية..وبعد ماثرثروا شوي..
اسمهان:آثاري زواجكم تأجل؟ولاعلمتيني يارنونة؟
رانية:احلفي؟وش هالخراط؟؟
اسمهان:ماهو خراط!هذا الخبر اللي وصلني أمس من سماح..
رانية:وليش يأجلونه؟أحد مات؟
اسمهان:لا فاولي خير..بس زواج ولد أخو ناصر بيكون بنفس اليوم وعلى كذا ماحد بيحضر من اخوان ناصر اللي بنفس الوقت يصيرون أولاد عم تركي..وماشاء الله عددهم كبير هم وأولادهم يعني غيابهم يأثر..
رانية:غريبة ماعلمني نصور!وش هالنذالة اللي فيه؟وموعدي عند الكوافيرة؟قد حجزت من أول!والمصورة؟وملابسي اللي بتصغر علي؟كل يوم وأنا أشوف الأكل وودي أحشيه ببطني ومو قادرة..ماسكة عمري عشان لايزيد وزني وأتوهق بالملابس اللي شاريتهم..لو تشوفين وش كثرها تحسبيني بأفتح بها محل!!
اسمهان:الله أكبر..كل هالأشياء فكرتي فيها؟؟ترى الزواج تأجل أسبوع واحد بس!
رانية:أشوى!الحمد لله..على بالي أسبوع ويوم!!
===================
ويوم السبت راحت اسمهان المدرسة بالعكازات!
وتفاجئوا الشلة ..وكل وحدة قامت تسألها عن السبب..
رانية:اشفيك؟سلامات؟
اسمهان:هذي طيحة من يوم الأربعاء..
رانية:وأمس يوم كلمتيني ماجبتي لي طاري!
نجلاء:طيحة؟؟لايكون عبدالرحمن دفِك من الدرج؟
أفنان:أو كنتي تتزلجين على بلاط المطبخ وصار اللي صار برِجلك؟؟؟
مرام:لاتتعبون نفسكم بالتخمينات..كانت تلعب هي وزوجها بالحوش وطاحت من فوق السيكل!ههههه
اسمهان:وانتي اش درَّاك؟؟
مرام:رحومتي قال لي يوم الخميس..وفطست ضحك!!وش هالرجة اللي فيكم تطلعون بأنصاص الليالي مثل الحرامية عشان تلعبون؟اثقلوا شوي كبرتوا على هالكلام!!!
رانية(ترد على مرام):تكفين ياالرزة!!زوجها وهي حرة فيه.. تغسله أو تكويه!أو تلعب معاه بالليل أو النهار..كيفها إنتي وش حارق رزك؟؟؟
اسمهان:أنا أدري؟؟كل من درى بالسالفة قام يتشمت من صوب!خلوها قضية الموسم وهي ماتسوى!خل رجلي تنكسر أنا راضية!أهم شي إني تونست مع زوجي!!!
أفنان:جزاه الله خير إنه يلعب معاك ويونسك..نادراً ماأسمع عن رِجال يحب يلاعب زوجته مع إنها سنة عن المصطفى..
نجلاء:شلون سنة؟أول مرة أسمع!!
أفنان:ارجعي لسيرة الرسول وانتي تعرفين..الرسول صلى الله عليه وسلم كان يسابق السيدة عائشة..ويخليها تتفرج معاه على الأنصار وهم يلعبون بالحرابة..وله قصص كثيرة في ملاطفته لزوجاته وادخاله للسرور على قلوبهم..هذا وهو مشغول بأمور الأمة والرسالة
مرام:أنا من الحين..شفت وحدة من التاجرات عارضة ألعاب زوجية في المنتدى وطلبت منها طلبية..عشان عقب الزواج ألعب مع رحومتي!
رانية:عاد أنا نويصر..أتوقع إني مايحتاج أطلب منه يلعب معي..لأن كل حياته لعب بلعب وسبهللة!
نجلاء:هههههه ليش؟؟
وقامت رانية تسرد لهم بعض المواقف الطريفة اللي صارت لها مع ناصر وهم يسمعون بحماس ويضحكون!!!
أفنان:ياحليله..خفيف ظِل بقوة..بس ياحظك ماشاء الله..يكون فرفوش ولايكون نكدي وعصبي!
نجلاء:اللي مثل خطيبك يارانية يظل قلبه شباب ومايشيب لأنه مآخذ الدنيا ببساطة ومايشيل هم شي...
اسمهان:صراحة لما يحكي لي عبدالرحمن عن بعض مواقفهم بالعزوبية يحوشني ضحك مو طبيعي..
مرام:وشفيكم حاسدينها عليه؟؟بصراحة ماأقول غير الله يعينك يارانية..شكله مرجوج حيل!بالله هذي سواليف رجال محترم؟؟أنا رحومتي عسى الله لايخليني منه خفيف دم بس بطريقة عقلانية مو كذا!!!!
رانية:رحومتك عقلاني..لأنه باقي ماجرب عِشرتك! لو درى بـ دلعك ومصاختك بينغث قلبه ويوريك السنع!!
مرام:أشوف كأنك غيرانة؟؟
رانية:وأنا أشوف كأنك ملسونة شوي؟؟
نجلاء:وأنا أشوف لو تسكتون انتوا الثنتين يكون أحسن!!!
===========
وكان ناصر كل يوم يتصل برانية ولايجيب لها طاري عن تأجيل موعد الزواج!وهي بعد محترة تبي الخبر يجي منه هو ولكن ماخبرها..لين يوم من الأيام دزت له مسج تقول فيه:
(سمعت إنه موعد زواجنا تأجل!لو هالخبر صحيح بلغني..لأنه عندي نية أحْضُرْ!!!!)
اتصل ناصر:كاااااااااااااااااااك..تص دقين كنت بأعزمك على عرسنا بس كرت الدعوة باقي ماانطبع؟؟؟!!!ههههههههههه
رانية:ضحكتني وأنا ماأبغى أضحك!!!بالله هذا شي يشرفك؟أسمع الأخبار من الناس وخطيبي مايبلغني؟؟
ناصر:نسيت يالغلا نسيت
ومانويــــــــت ولاقويت
وإن حكيت أو شكيــــت
غصب ألقى نفسي بكيت
إنتــــــــي نامبـــــر ون
وغيرك نمبر ايت!!!
رانية:أقول حق من رشك إنت وفيرانك بـ فليت!
ناصر:لايالغلا..مانسيت أقول لك ولاشي بس كنت مخطط أزورك قبل لاتبدأ الامتحانات وأجيب لك هدية راهية وأعلمك بخبر تأجيل الزواج!وبعدين وش عليه انتي مستعجلة؟باقي على الزواج شهر و3 أسابيع!!!
======================
وبالفعل زار ناصر رانية قبل الاختبارات..ورانية تتسائل بينها وبين نفسها ياترى وش بتكون هديته؟؟؟ الله يستر منك ياهالناصر!!!ماأستبعد يجيب لي حمار مع علف وحشيش!!!!
لكن ناصر حضر ومعاه سله كبيرة مغلفة بطريقة أنيقة!!
رانية:لا لا ماأصدق أكيد إنت موب ناصر!وش هالكشخة كلها؟؟أخاف أفتحها وألقى حشرات أو حيوانات!!
ناصر:ههههههههه لا افتحيها الدرب أمان..
فتحتها رانية ولقيت علبة بداخلها طقم(عطر+شاور جِل+لوشن)حلوة وغالية....
رانية: واي تهبل!!مو معقول لاتكون مدتها منتهية بس؟؟!!!
ناصر:أفا يارنون!الصراحة إنك محقرتني بزيادة!أنا هداياي السابقة لك مختلفة لأني أبي أيام خطوبتنا تعيش بذاكرتك بمواقفها الغير مألوفة!!
رانية(بخجل):ومين قال إني بأنساها؟؟أظل أتذكرها على طول...
ناصر(وهو يناظرها بنظرات ذات مغزى!!):أول مرة أشوف القمر بخدودٍ لونها وردي!!
وذابت من الخجل إلا وأخوها مشاري داخل عليهم المجلس!!
انحرج ناصر وقام غير لهجته وقال:ياخي شيل أختك هالنشبة من قدامي !!من تشوفني تأذيني بلسانها!!!
قامت رانية تطالعه باستغراب!!!
مشاري:أجل وش تقول عننا وإحنا عايشين معاها 24 ساعة باليوم؟؟تزوجها ولك الجنة ان شاء الله!!!
رانية(بداخلها):صدق إنك يانويصر مطفوق!ولايمكن تكمل جميلك!!!!!!!
==================
ومرت أسابيع الاختبارات سريعة كلها قلق ومذاكرة وضغط وكل وحدة من الشلة مجتهدة وتبي تجيب نسبة عالية عشان تنقبل في الكلية أو الجامعة..
وبعد ماانتهت الاختبارات وظهرت النتايج كانت كالتالي:
اسمهان=96%
نجلاء=94%
مرام=93ونص%
أفنان=90%
رانية=88%

في الرياض كانت عبير فرحانة بنتيجة تخرجها من الثانوي بنسبة 93%...
واتصلت تبشر أبوها بالنجاح.....
أبوعبير:مبروك..مبروك..عقبال التخرج من الجامعة يابنتي...
عبير:ان شاء الله...
أبوعبير:ترى أنا حجزت لكم إنتي واخوانك تذاكر من الرياض إلى جدة بعد 3 أيام..وتقعدون معاي بجدة كم يوم تسلمون على أعمامكم وناخذ عمتك منيرة ومن جدة للبنان..وبعد مدة نروح من لبنان لمصر...بس انتم مستعدين ولا بعدكم؟؟
عبير:أكيد مستعدين ونعد الأيام عد..
أبوعبير:على بركة الله...وبانتظاركم ان شاء الله.
أنهت عبير مكالمتها..ولقيت أمها واقفة وراها..
أم عبير:منهو هذا اللي تقولين له مستعدين ونعد الأيام عد؟؟؟؟؟
عبير:أبوي..
أم عبير:حدد لك موعد السفر؟؟
عبير:ايه..بعد 3 أيام بأسافر له أنا واخواني جدة..ونقعد كم يوم وعقبها نروح لبنان..
أم عبير:وليش تقعدون بـ جدة كم يوم؟؟ليه ماتروحون لبنان على طول؟؟؟؟
عبير:أبوي يبينا نجلس بجدة كم يوم عشان نسلم على أعمامنا وبعدين ناخذ عمتي منيرة معانا..
أم عبير:ياسلام!!عشان يستفردون فيكم ويغسلون أمخاخكم!!
عبير:واشفيها لااستفردوا فينا؟ وش بيسوون لنا يعني؟؟هذول أهل أبوي وعِزوتنا..
أم عبير:وانتي اش دراك عنهم يالسوسة؟؟هذول أنذال ومايتمنون لنا الخير!!
عبير:الأنذال اللي ساكنين حولنا بس مايسألون عننا!!
أم عبير:تقصدين أهلي ياقليلة الحيا؟؟
عبير:السموحة منك يمه..بس انتي شايفة بعينك! ماحد يتشمت فينا كثرهم ومن يوم ماطبينا الرياض ماحد عرض خدماته علينا إلا خالي عثمان اللي ساكن فوق ويحبون يتفشخرون علينا بقروشهم..لكن أهل أبوي مايمر أسبوعين إلا ويتصلون فينا ويسألون عننا...
أم عبير:مهما سويت لك ياذي البنت بتظلين جاحدة ومافيك خير...وبعدين أهلي مو مكلفين يسألون عنك انتي واخوانك..
عبير:يمه خلك صريحة مع نفسك مرة!أهلك مايتواصلون معانا زين مو لأننا فينا شي!!بس من طريقتك في التعامل معاهم والمشاكل اللي تسوينها مع زوجات أخوالي..حتى خالاتي وهم خواتك صاروا مايستحملون بعض تصرفاتك!
أم عبير:والله يابنت أبوسعد!طالت وتشمخت وصار لك لسان تردين فيه علي!!هذا وانتي ببيتي تقولين هالحكي..أجل وشلون لارحتي لبيوت أعمامك؟أكيد بيقلبونك علي انتي واخوانك!!مالت عليكم كلكم مافيكم خير لأمكم!!فكرتوا تاخذون عمتكم الكريهة تتمشى وياكم وخليتوا أمكم اللي تعبت في تربيتكم!!
عبير:يمه انتي ليش كذا؟نسيتي انك مطلقة؟وأبوي صار غريب عنك؟شلون تبينه ياخذك معانا بالسفر؟نسيتي كل المشاكل اللي جرت له بحياته من وراك؟؟المفروض يمه تقدرين عمتي منيرة اللي موافقة ترافقني وتوقف بجنبي عقب العملية
وطلعت عبير من الغرفة وهي متضايقة..
أم عبير:حسبي الله عليك وعلى أهل أبوك ياعبير..عساكم ماتتوفقون بهاالسفرية!!!!!!!!!!!
=============
أما أم عبدالرحمن كانت تجهز ببيوت أولادها وترتب فيها استعداداً لاستقبال أهل العرايس اللي بيجون يرتبون أغراض بناتهم قبل الزواج..
وقبل الزواج بيومين حضروا أهل مرام(ماجدة أختها الكبيرة+زوجات أخوانها الاثنين+أمها+خالتها وبنت خالتها)بجهاز مرام واستقبلتهم أم عبدالرحمن ببيتها في الأول..وكانت مواعدة أهل مشاعل يحضرون بعد بنفس اليوم عشان يرتبون أغراض بنتهم بـ شقتها..وحضر(أم مشاعل+أختها أم أفنان+2 من خوات مشاعل+2 من زوجات أخوانها)..
واستقبلوهم(أم عبدالرحمن+اسمهان+أحلام+جوهرة) وبعد ماشربوا القهوة..طلعوا أهل مرام لشقة بنتهم يرتبون عفشها..وأهل مشاعل لشقة بنتهم يرتبون بعد........
أم عبدالرحمن:بعد ماتنتهون ان شاء الله..انزلوا عندي أنتظركم على العشاء...
الجميع:ان شاء الله..الله يكثر خيركم..
وكل وحدة من العرايس أهلها رتبوا عفشها على طريقتهم الخاصة...ومرت الساعات وبعد ماانتهوا الجميع نزلوا وتعشوا عند أم عبدالرحمن.....
أم مرام:تفضلوا معانا نفرجكم على جهاز بنتنا..
وطلعوا الجميع وكان أغلب الأشياء مشرَّعة بتشريعات فخمة بالتل والساتان والورد والفصوص.. وجايبين معاهم كماليات لبيت بنتهم من أطقم للمطبخ وتُحف وأبجورات ومفارش..وواضح من ملابس مرام إنها بنت جريئة في اختيارها للموديلات والألوان..
أما مشاعل كان ذوقها هادي وناعم وبسيط وملابسها كلها محتشمة ومرتبة وشارية من كل شي بلا افراط ولاتفريط..مع بعض اللمسات للبيت
فانحرجت أم مشاعل وقالت:الحقيقة ماندري إن طبعكم تتفرجون على عفش العروس قبل ماتجي هي وتشوفه...عشان كذا رتبنا غرفتها وصكيناها بالمفاتيح.. عقب زواجها هي تفرجكم على أغراضها بنفسها!!
أم عبدالرحمن:كل ناس ولهم طريقتهم ياأم مشاعل وحِنا ماندقق بهاالأشياء أهم شي انه العرايس يكونون راضيين ومستعدين...
============================== ==
رجعوا أهل مرام للبيت...
مرام(بانفعال):وينكم؟؟مابغيتوا ترجعون؟؟
أم مرام:أهل العريس مِسكونا على العشاء واضطرينا نتأخر...
مرام:رتبتوا الأغراض مثل ماوصيتكم؟؟؟
ماجدة:ايه..تطمني يامدام مرام..حتى السرير سوينا عليه حركة قلب بالعقد اللولو وملينا داخله ورد وحبات كريستال ملونة...والغرفة بعد ماحطينا لمساتنا وديكوراتنا فيها انقلبت 180 درجة!!!
مرام:وكيف أثاث البيت؟؟
زوجة أخوها:رووووووعة..أهل خطيبك شكلهم مرة ذوق..
مرام:وش أحلى؟بيتي ولا بيت مشاعل؟ولا ماشفتوا بيتها؟؟
أم مرام:الا شفناه..بس كلن وله ذوقه..بيتك حلو
ماجدة:بس يمه متفننين في بيت مشاعل بالرسم على الجدران مدري ليه ماسووا نفس هالحركات ببيت مرام؟؟؟
مرام:هذا لأنه اللي رسم على الجدران ولدهم الأخرس..فطبيعي انه بيزين شقته وش عليه منَّا؟!
=========
في بيت مشاعل..استقبلتهم مشاعل بالترحاب..
مشاعل:جزاكم الله خير جميعاً ..عساكم ماتعبتوا وانتم ترتبون أغراضي؟؟؟؟
أم أفنان:الله يرضى عليك ماتعبتينا ولاشي..جهازك كان عقلاني وعدد أغراضك معقول..ماحد تعب صحيح إلا أهل العروس الثانية حتى شغالاتهم جايبينهم معهم يساعدونهم..
مشاعل:الله يبارك لي ولها في هالزواج وييسر أمورنا...
==================
رجعت اسمهان لبيتها بعد ماراحوا الضيوف وقابلت زوجها.....
اسمهان:تصدِق؟؟بعد ماشفت بيوت أخوانك صرت أحس بيتي قديـــــــــــــــــم!!!!
عبدالرحمن:بدينا؟؟بحركات النسوان والغيرة؟؟
اسمهان:لا حرام.ماأغير..بس فعلاً أحس كل شي ببيتنا صار قديم..
عبدالرحمن:بس للعلم ماراح أغير شي..تو الأثاث له سنة وكم شهر بس!!
اسمهان:لاماأبيك تغير شي..بس اش رايك نبدل بين أثاث الغرف؟؟يعني اللي بمجلس الرجال ننقله لمجلس الحريم واللي بمجلس الحريم ننقله لمجلس الرجال..ونغير أماكن الطاولات والمرايات والزرع..
عبدالرحمن:بكرة يحلها حلاَّل..تبين نبدِّل أماكن الأثاث نبدل بس أهم شي نفوسنا تظل مثل ماهي وماتتبدل!!تصبحين على خير ..
وعطاها ظهره ونام..
أما اسمهان ظلت جالسة على السرير تفكر بكلام عبدالرحمن..وقالت بنفسها:معاك حق ياعبدالرحمن كأني ابتديت أغار من بعض أشياء وأتمنى ترجع أيامي مثل قبل!!!!!!!!ا
في ليلة الزفاف بدأت استعدادات العرسان(عبدالمجيد وعبدالرحيم) بالذهاب إلى صالون الرِجال..وترتيب أمورهم...
ولما رجعوا للبيت...بعدهم بدقايق وصل عبدالرحمن ودخل عليهم..وسلَّم..
عبدالرحمن:سيارة مين هذي..اللي واقفة برة؟؟
عبدالرحيم:سيارتي!!
عبدالرحمن:مين وين جايبها؟؟
عبدالرحيم:استأجرتها مخصوص ليوم الزواج..
عبدالرحمن:ليش؟؟سيارتك أكشخ منها بمية مرة!!
عبدالرحيم:مو يالحبيب أنا ناوي أوديها بعد شوي لمحل تزيين السيارات..وقلت بنفسي بدل ماآخذ سيارتي وأزينها وتنعدم..خل أستأجر سيارة وأزينها..أفضل..
عبدالرحمن:وإنت ياعبدالمجيد؟؟
جاوبه عبدالمجيد بلغة الاشارة:لا..أنا راضي بسيارتي وبأروح معاه أزينها..
وراحوا يزينون سياراتهم وبعد ساعات كانت جاهزة بأبهى حُلة!!

000000000000
أما العرايس فكلكم أدرى بالتوتر وكثرة التفكير...
في بيت مشاعل...
أم مشاعل مافارقت عينها الدموع!!
مشاعل:يمه الله يهديك..أنا حية مامت! ليش هالحزن كله؟؟هذا بدال ماتفرحين لفرحتي؟؟؟
أم مشاعل:والله يابنتي..أنا خايفة لاتندمين عقب هالزواج على نصيبك!!على بالك الحياة مع واحد أصم وأخرس..سهلة؟؟؟؟؟؟؟؟؟
مشاعل:يمه لاتكبرين الموضوع..غيري تزوجت انسان مُقعد ومشلول عن كل حركة وعاشت أسعد حياة..الخرس والصمم يهون كثير عن الاعاقات الثانية..وعبدالمجيد انسان خلوق وطيب..وعندي احساس كبير بأننا راح نتوفق مع بعض...
أم مشاعل:يارب تتوفقين يامشاعل ويكون هالانسان نعمة لك مو نقمة عليك!!
مشاعل:زين..كفكفي دموعك ووريني ضحكتك..وأنا متأكدة لو أبوي عايش كان بيفرح لي ويأيدني في اختياري.....
--------------------
في بيت مرام...
مرام:ماجدة؟؟أبي سُهير تحط لي بكرة ماكياج لبناني والتسريحة غادة تسويها لي ماأبي سوسن!!
ماجدة:لاإله إلا الله...هذي المرة الخامسة اللي تعيدين فيها هالكلام!!خلاص فهمت..صدقيني فهمت!
مرام:ويمه..تكفون حريم أخواني وبنات خالاتي أبيهم يروحون قبلنا للقاعة عشان يرتبون للزفة ويتدربون عليها!!!!
أم مرام:يابنتي وشفيك؟موب صاحية؟؟زفتك بتكون بآخر الليل..يعني بيقعدون يتدربون عليها 4 ساعات؟؟؟؟
مرام:ياربي..مرة خايفة تكون زفة مشاعل أحسن من زفتي!!لاتنسون إنها بتنزف قبلي بحكم إن زوجها هو الأكبر...!!
ماجدة:وإذا طلعت زفتها أحسن؟؟بينقص منك إيد ولارِجل؟؟مرام بتظل مرام طلعت ولا نزلت!!!!
مرام:وش أسوي ؟قلقانة!انتم تعرفون الناس وشلون يحبون المقارنات..هذي أحلى..وذيك أكشخ..وهذي أطول..وذيك أكبر!!ودي أحشي إذني بقطن وماأسمع أي كلمة!!!
أم مرام:تطمني,,,ماحد بيتكلم ويقول رأيه في وجهك!الكل بيحكي من وراك!ماغير روحي نامي وارتاحي..
----------------
أما أم عبدالرحمن كانت قاعدة ليلة الزواج مع عيالها توصيهم الوصايا العشر..
عبدالمجيد يقرأ لغة الشفايف ويفهم كلامها ..
أما عبدالرحيم يسمع النصايح ويتطنز!!!!!
ومن ضِمن كلامها.......
أم عبدالرحمن:الله الله بالصلاة..ابدأوا حياتكم بطاعة وصلوا ركعتين لله في أول ليلة تجمعكم ببعض
ولاتنسون إن الأنثى تحب اللي يلاطفها ويهدي خوفها بهاالليلة!
عبدالرحيم:وش منه تخاف يمه؟؟هي بتقعد مع عفريت؟؟
أم عبدالرحمن:تخاف من الشخص الغريب اللي لأول مرة يختلي فيها يافطين!تخاف من أسلوبه وتعامله معاها!!لاأوصيكم بالملاينة والكلام الزين اللي يشرح القلب!
عبدالرحيم:ماعليك يمه ..لاتشيلين هم من هالناحية أنا صرت حافظ دواوين الشعر كلها وبأسمِّعها لعروستي بكرة. وعلى شوية غمزات وهمسات..البنت بتذوب كأنها سكر في شاي مغلي!!!
أم عبدالرحمن:أدري بكم ياعيال هالزمن..تعرفون الكُفت!! رِجال أول كانوا مغمضين وحريمهم مغمضات أكثر منهم!!المهم ماودي أسمع عنكم إلا كل خير..ماأبي أحد يجي بيوم من الأيام ويقول لي ماعرفتي تربين عيالك ياأم عبدالرحمن..وعيالك يغلطون على بناتنا!!
عبدالمجيد(بلغة الإشارة):أنا بقلبي كلام كثير بأعبر به لعروستي...وكتبت لها أبيات جديدة أكيد بتعجبها
أم عبدالرحمن:الله يهنيك ويرزقك على قد نيتك..وخلكم مثاليين بالتعامل..والعصبية ارموها وراكم..بالتفاهم والكلمة الطيبة تنحل أعقد الأمور..
عبدالرحيم:وياترى كل هالوصايا قلتيها لعبدالرحمن قبل زواجه؟؟؟؟
أم عبدالرحمن:الله يرضى على عبدالرحمن ياولدي..عاقل وفاهم ومايحتاج وصية..الخوف منك إنت وش بتطلع!!
عبدالرحيم:لاتخافين يمه أنا رهيب وبأعجبك!بأخلي زوجتي تمشي على البيض وماتكسره!كلِش ولا الدلع الزايد الماصخ!!
أم عبدالرحمن:الله يعطينا خيرك!
عبدالمجيد(بلغة الاشارة):يمه إدعي لي أتوفق مع زوجتي وأكون عند حسن ظنها..
دمعت عين أم عبدالرحمن غصب عنها وقالت:إنت طيب وتستحق كل طيب ياعسى الله لايحرمك السعادة والهنا بعمرك كله ويجعل مشاعل تسعدك وتكون فرحة لقلبك..
عبدالرحيم:وأنا؟؟كل الدعاوي الزينة من نصيب وِرعك ذا؟؟وأنا؟ولد البطة السوداء؟؟؟
أم عبدالرحمن:لاسوداء ولا بيضاء..الله يوفقك ان شاء الله..
====================
وفي ساعة متأخرة من الليل راح الجميع ينامون..أما اسمهان كانت الفرحة غامرتها وهي تقول لنفسها:أخيراً يااسمهان بيصير عندك سلايف يونسونك ويآنسون وحدتك؟؟؟
................

(مسكينة يااسمهان ماتدرين وش مخبى لك؟؟؟؟؟؟؟؟؟!!!!!!!!!!!)
جاء اليوم المنشود يوم الزفاف وبدأوا الجميع في استعداداتهم...راحوا(أم عبدالرحمن+اسمهان+الخالة جوهرة+أحلام) لصالون التجميل من بدري عشان يخلصون بدري ويروحون يشرفون على ترتيبات القصر...
والعرايس كل وحدة بـ حالة..
ولما أقبل وقت مابعد المغرب راحت أم عبدالرحمن وبنتها وأختها واسمهان للقصر وبدأوا يشرفون على ضيافة الطاولات والتقديم والمباشرات و الخ....

وكانوا أحلام واسمهان نجوم الحفل على قول سماح..يستقبلون الزوار ويرحبون بالحضور... وبنات العائلة (بنات أخوال وأعمام عبدالرحمن يشاركون بالرقص)..
وأما المعازيم فتختلف النيات في الحضور!
اللي يحضر عشان العرس مستواه راقي بينما لو كان الزواج بمكان متواضع نلاقي عدد الزوار تقلص!!
وناس تحضر عشان الطقاقة الفلانية بتحيي هالليلة على حد تعبيرهم!!!
واللي تحضر تتصيد الصبايا لأولادها!!
والي تحضر للبحث عن آخر مااستجد في الساحة من موديلات وتسريحات وميك آب!!
واللي تحضر بحثاً عن سواليف جديدة تعبي بها المجالس في الأيام المُقبلة!!
واللي تحضر تلبية للدعوة!
واللي تحضر و نيتها كسب الأجر والثواب بالأمر بالمعروف أو النهي عن منكر..
واللي تحضر عشان تتونس بالهز والرقص!!
والي تحضر عشان تقابل ناس ماشافتهم من زمان!!
المهم مالكم بالطويلة...
حضرت أفنان بما إنه العروس مشاعل تصير خالتها..ونجلاء
..اللي الكل كانوا متوقعين عدم حضورها بسبب إنه عبدالمجيد خطبها من قبل ورفضته!!
لكن أم عبدالرحمن في الأيام السابقة للعرس اتصلت على أم نجلاء ووجهت لها دعوة خاصة وأصرَّت على حضورها..بناءً على طلب اسمهان اللي كانت تبغى كل شلتها يكونون حولها في هذا اليوم السعيد...
ورانية اللي من يوم مادخلت القاعة وهي مفرفشة..وجلست مع أفنان واسمهان ونجلاء على نفس الطاولة ..
رانية:هاه..بشروا؟؟نقدر نسلم على مراموه بغرفتها؟ ولا بتسوي فينا نفس حركتها بيوم الملكة؟؟؟؟
اسمهان:مدري!بأروح أسأل أختها ماجدة..حتى أنا لهذي اللحظة ماشفتها
وبالفعل لما سألوا ماجدة قالت لهم:تفضلوا ماعندها مانع تشوفكم!
ودخلوا كلهم وسلموا عليها وباركوا لها
مرام:ماقلتوا؟اش رايكم فيني؟
الشلة:قـــــــــــمر!
مرام:يعني أحلى من مشاعل؟؟
أفنان:وش عليك بـ خالتي؟؟
رانية:مشاعل مافي مثلها تهبل وتخبل وتجنن!!وماكياجها وتسريحتها شي خطيييييير!!!!!!!
التفتوا الشلة لرانية باستغراب!!
وكملوا دردشتهم مع مرام وطلعوا من الغرفة..
أفنان:الله أكبر عليك يارانية الخرَّاطة!وش دراك إن خالتي مشاعل تهبل وتخبل وهي أساساً ماوصلت للقاعة لين الحين؟؟؟؟؟؟؟؟
رانية:مدري عن مشاعل ولاشي...بس بغيت أغيظ مراموه المغرورة!!!!
نجلاء:هههه أف من سواد قلبك يارنو!مرام تسأل عشان تتطمن بس!
أفنان:بس الصراحة أنا استغربت من سؤالها!وش بيصير يعني لو طلعت خالتي مشاعل أحلى؟؟عادي كل انسان وله جماله الخاص فيه..
اسمهان:ماعليكم من مرام..يعني ماتعرفونها؟؟هي تحب تهتم بالشكليات والمظهر...
وراحوا الشلة يشاركون بالرقص..
أما اسمهان راحت وقعدت مع أهلها على نفس الطاولة..
أم اسمهان:تحصنتي يابنتي؟ترى العين حق!
أسماء(تبي تغيظ اسمهان):أقول القرد بـ عين أمه غزال!!!
ابتسام:أي قرد؟ياويلك من الله ياأسوم..
سمهونة اليوم ملكة الحفل مو بس نجمة..بـ حلاتها وبشاشتها..
سماح:عاد مين قدك اليوم ياسوسو؟..مسوية فيها زوجة الولد الكبيرومتحملة مسئولية!
اسمهان:تصدقون؟حلو هالاحساس!
أسماء:بالنسبة لي مو حلو..بما إن زوجي هو أكبر أخوانه تلاقون كل عزيمة أو مناسبة يحطوني فيها العيلة بوجه المدفع!!
اسمهان:بالعكس أنا كنت مستمتعة في النزول للأسواق مع خالتي واختيار بعض الأغراض في ملكة العرايس.. أو ترتيبات الزواج حسيت إنه رأيي وذوقي مهم عند خالتي...
أم اسمهان:الله يهنيك يابنتي ولايغير عليك..
وظلت اسمهان تسولف شوي مع أهلها وبعدين استأذنت منهم عشان ترحب بالضيوف الجايين وكانوا مجموعة ومن ضمنهم أهل سماح..
اللي نادوا أفنان بما إنها خطيبة تركي ورانية بما إنها خطيبة ناصر وخلوهم يجلسون معاهم بنفس الطاولة..
واسمهان ونجلاء يراقبونهم من بعيد..
اسمهان:ههههه يازينها رانية لاكانت خجلانة..يصير شكلها تحفة!
نجلاء:أقول مايليق عليها النعومة والتصنع تعودنا على عربجتها وعفاشتها!
اسمهان:ههههه ياحبي لها..أساساً أكثر شي عجب أهل تركي فيها حركاتها وخفة دمها..والأحلى من كذا إن خطيبها من نفس العيِّنة!!
نجلاء:صدَق من قال (الطيور على أشكالها تقع)!!
وبعد شوي بدأ الاستعداد لزفة مشاعل..

بدأ الاستعداد لزفة مشاعل...
فاستأذنوا رانية وأفنان من أهل سماح ورجعوا على طاولة نجلاء واسمهان...
أفنان:تتذكرين يارنو لما دعيتي علي وقلتي عساك تتزوجين بزواج جماعي من اللي تسويها الجمعيات الخيرية ويكون معاك 777 عروس بليلة وحدة؟؟؟؟
رانية:ايه أتذكر..بس أنا ليش قلت لك هالكلام؟؟
أفنان:هالكلام قلتيه لي يوم كنت مؤيدة زواج اسمهان وعبير بنفس الليلة..وانتي رافضة مبدأ الشراكة في العرس..
رانية:ايييييه تذكرت!!ومين يصدق انه الدنيا بتدور ويصير زواجي وزواجك بنفس الليلة؟!!صدقيني لو كانت وحدة ثانية من الشلة بتتزوج معاي بليلتي ماكنت بأوافق لكن انتي غير!!
أفنان:وليش أنا غير؟!
رانية:يعني... ضعيِّفة ومكسورة جناح...وماعندك حركات نص كم مثل باقي أفراد الشلة المحترمين!!
أفنان:حرام عليك..يعني سمهونة من هالنوعية؟؟
رانية:لا ماقصدتها..بس كنت بأرفض زواجي معاها بنفس الليلة لأنها بتصك علي بـ حلاتها!!!
أفنان:مالت عليك..يعني أنا بعينك شينة؟؟؟
رانية:ماعليك انتي وش تكونين بعيني..أهم شي وش بتكونين بـ عين تركي!!!
أما اسمهان ونجلاء كانوا يتكلمون مع بعضهم بصوت منخفض..
اسمهان:وش أخبار عريسك؟؟
نجلاء:في نهاية الاجازة الصيفية بياخذ اجازته ويجي يخطبني رسمي..
اسمهان:ان شاء الله نفرح فيك مثل باقي الشلة يانجلاء..
نجلاء:آمين..
=========
بدأت زفة مشاعل بمشهد تمثيلي مثلوه بنتين من بنات أخوانها..
وحدة لابسة لبس يدل على إنها أم كبيرة في السن..والثانية تؤدي دور البنت..وواقفين قدام بعض..
الأم:مبروك يابنتي..بارك الله لكما وعليكما وجمع بينكما في خير..
البنت:الله يبارك فيك ياأمي..
الأم:من حقي عليك يابنتي إني أنصحك وأقدم لك وصايا قبل عرسك مثل ماكانوا يسوون أمهاتنا
البنت:تفضلي ياأمي..كلي سمع
الأم:الزواج شراكة بين اثنين..
ويومن زين ويومن شين
والحب يجمع فيه بين قلبين
والمودة والرحمة وقرة العين
وزوجك ترى هو جنتك ونارك
تعلمي المسئولية واتخاذ قرارك
وبالحكمة والتفاهم زيني دارك
وكل مايدور بينكم خليه سر من أســــــــــــــــــــــــــرا رك
ووصيتي لك اتقي الله بليلك وبنــــــــــــــــــــــهارك
البنت:وصاياك هذي بأحطها حلق بإذني وعهدن علي لأعلمها كل بنت مقبلة على الزواج..
وحضنوا الأم والبنت بعضهم وأخذوا سلتين ونزلت الأم من يمين المنصة بين الحضور وتوزع عليهم من سلتها كتيبات دعوية وأشرطة عن(حقوق الزوج والزوجة)والبنت نزلت من يسار المنصة ووزعت على الحضور نفس التوزيعات..
وتسلطت الأضواء على بوابة القاعة..ودخلت وحدة معاها مايكرفون وتنشد بصوت ندي ..موال ..وطلعت على المنصة وسارت تمشي وخلفها 6 أطفال لابسين على ظهورهم فراشات وبيد كل وحدة وردة كبيرة ويرقصون رقص متناسق والحرمة اللي تنشد كانت صاحبة مشاعل بالمعهد تنشد قدامهم وتمشي على المسيرة والأطفال يمشون وراها..ومن خلفهم كانت مشاعل تمشي... والابتسامة مرسومة على شفايفها وأمها تراقبها من بعيد ودموعها على خدها!
ووراء مشاعل صاحباتها بالمعهد شايلين الطيران ويطقون عليها ويغطرفون..وبنات من أقاربها بيدهم مباخر ومرشات كادي يمشون وراها..
وصاروا كلهم يمشون بترتيب لين وصلوا للكوشة..وكانت مشاعل مبتسمة والفرحة غامرتها بمشاركة الجميع لها...وبعد ماانتهى ****د صاحبة مشاعل..مسكت الطقاقة المايكرفون وقالت:هالأغنية اللي راح أغنيها لكم من كلمات العريس عبدالمجيد ويهديها اهداء خاص لعروسته مشاعل!!
وتعالت القاعة بأصوات الهِتاف واللي يصفر واللي يغطرف..واللي تقول:شوفوا الرِجال بس!مو أزواجنا اللي الواحد يستخسر يقول كلمة حلوة بيني وبينه وماحد يسمعها!!!!!
وحدة من الحضور:يازينها هالعروس بشوشة وفرحانة ماكأنها بتاخذ واحد أطرم!!
الثانية:يمكن ماحد خطبها قبله عشان كذا رِضت فيه!!!
الأولى:ماأتوقع إنها ماانخطبت قبله!!هذي هي حلوة وموب ناقصها شي!!!
وقامت الطقاقة تغني على طق الطيران(بدون موسيقى)كلمات عبدالمجيد لمشاعل..
من عقب ليلة لقانا
القمر ضوى سمانا
والطير غرد وغنى
والأهل فرحوا معانا
..يامشاعل..
غادةٍ بين العذارى
حِسنك الطاغي أمر
وخلى كل الغِيد غيارى
غار منك حتى القمر
لك غلا ماينوصف
وأوعدك ثم أعترف
قربك أحلى حلم لي بالعمر
الخالة جوهرة:ياحليله عبدالمجيد يكتب شعر بعد؟؟
أم عبدالرحمن:خليه يكتب ويشعِر..أهم شي يعبر عن مشاعره ومايكتم شي بقلبه..والله إن مشاعل تستاهل!!
وانبسطت مشاعل من الأبيات المتواضعة بالمرة....
بعض بنات أقاربها..قالوا:معقول هالأبكم عنده مشاعر أحسن من الطبيعين؟؟؟؟؟
وحدة ثانية:المشاعر بالقلب موب باللسان!!
وحدة ثالثة:الصاحيين مايسوونها!!
وحدة رابعة:أصلاً حركة مالها داعي فيها لفت أنظار!!وش قصده يعني؟أنا أحب زوجتي؟؟؟؟؟
وحدة خامسة:يمكن قصده يرد على الناس اللي دوم يتشمتون بمشاعل إنها رِضت فيه ويوريهم انه خذاها عن حُب!!!
(عاد انتم أخبر بمجتمعات الأفراح!!أتوقع يتسجل فيها أعلى نسبة احصائية من فنون الغيبة والنميمة والحش والحسد!هههه الله لايبتلينا!!)
وطلعوا الأهل والأقارب يسلمون على مشاعل ويباركون لها..
وطلعوا شلة الصاعقة ورقصوا قدامها وقوموها ترقص معاهم ووقفت بينهم وهي خجلانة..
تشاركهم بس..
وجلست على المنصة وقت معين ثم دخلت لعريسها اللي أخذها على طول بعد توديع أمه وأمها وراحوا الفندق..
وبدأ الاستعداد لزفة مرام ..
بدأت مؤثرات صوتية في القاعة وانطفت أنوار القاعة..وبعد وقت انفتحت الاضاءات..
وكان على المنصة ديكور بالمخدات يشبه ديكوات القصص الأسطورية بألف ليلة وليلة وصندوق كبير مفتوح وخارج منه عقود كبيرة من الأحجار وصحن فاكهة كبير..
ووسادتين وحدة جالس عليها ولد أخو مرام وعمره مايتجاوز9سنوات ولابس لبس مثل ملابس السلاطين..والوسادة الكبيرة الثانية جالسة عليها بنت ماجدة أخت مرام ولابسة مثل لبس شهرزاد..
وفتحوا مسجل.. فيه حوار بين شهريار وشهرزاد والطفل والطفلة يحركون شفايفهم ويمثلون...
شهريار:
حدثيني كما عهدتك ياشهرزاد
عن قصصٍ تسلب اللُب والفؤاد
شهرزاد:
بلغني أيها الملك شهريار
قصة دارت في وضحِ النهار
عن أميرة حسناء شابة
جميلة وضــــــاءة جذابة
قد خطب الجميع ودها
وصدت عنهم في ردها
إلى أن حـــلَّ ذات يوم
وقد فارق عينـها النوم
وسمعت صوت حادٍ يحدو
بعذب القصيـــــــــد يشدو
وكان أميراً يدعى عبدالرحيم
جواد وشهـــم همامٌ كريـــم
بهي الطلعة وضيءٌ وسيم
ظل الطريق به في وسط الظلام
إلى أن وقف أمام قصرالأميرة مرام
فوقعت عيناه عليهاوهام حباًوغرام

وعلى شاشة العرض السينمائي اللي وراهم كانت مرام مسجلة مقطع تمثيلي مثل الفيديو كليب ولابسة فستان أسطوري مثل فساتين الأميرات
وتمشي في حديقة...وتمثل لوحدها ومؤثرات صوتية....
شهريار:
وماذا بعد ياأميرتي؟

لاتتركيني في حيرتي

شهرزاد:

تقدم لوالدها وخطبها

ووافقت بعد أن أعجبها
ونادى المنادي:

ودخل ولد صغير من أولاد أخوانها
ولابس لبس عربي قديم وبيده مثل الدف وعصا وصار يضرب عليها ويمشي على المسيرة ويقول:
هلموا هلموا...وياعرب التموا
زفاف الأميرة مرام قد حل
على الأمير عبـــــدالرحيم
بصحبة الأحبـــــاء والأهل
في يومٍ مهيـــــب عظيم

وكان خلفه مجموعة أطفال لابسين لبس عربي أسطوري..وبدأ دق الدفوف وصاروا البنات اللي ورا الولد هذا يرقصون كأنهم جواري..
وتسلطت الاضاءة على البوابة ودخلت مرام..وصارت تمشي بهدوء وهي في قمة التوتر والارتباك والعصبية خصوصاً انه وصلها انه زفة مشاعل كانت حلوة!!!
وحدة من الحضور:ياحظ أم عبدالرحمن بـ حريم عيالها كل وحدة أحلى من الثانية!
ردت عليها وحدة:ماعليك من الجمال أهم شي أخلاقهم..
الثالثة:العروس اللي قبلها كانت بشوشة ومبتسمة..أما هذي كأنها شايفة نفسها شوي!!
ووصلت للكوشة وجلست وانتهت الزفة وتوجهوا الأهل والأحباب للكوشة يسلمون على مرام
...والطقاقة تطق لها والناس يشاركونها الفرحة..وقاموا الشلة عندها يرقِّصونها معاهم..
وبعد مرور وقت نادوا الناس لصالة العشاء..وراحت مرام لزوجها عبدالرحيم اللي كان طاير عقله من الفرحة فيها..وودع أهله وأخذ عروسته في السيارة وانطلق باتجاه الفندق..
وظل يسولف مع مرام...
عبدالرحيم:أخيراً بيجمعنا مكان واحد بروحنا؟؟
مرام(بخجل):ليش لا؟؟مافي شي مستحيل!!
وفي هذا الوقت المتأخر من الليل كان فيه شلة شباب راكبين سيارة وكانوا سهرانين على البحر وراجعين لبيوتهم..
الشاب اللي يسوق السيارة منهم انتبه لسيارة عبدالرحيم اللي كانت مزينة بالورد والزجاج مغطى ببخاخ ومعجون ومو باين منه إلا أجزاء بسيطة
وقال:الحقوا ياشباب!!لايفوتكم!هذي سيارة معاريس..وش رايكم نغلس عليهم..؟
رد صاحبه اللي بالمقعدة الخلفية:ايه تكفى..خل نتونس عليهم شوي!!
الزميل الثالث:ودي تخرعهم لين تطيح قلوبهم برجولهم!
الشباب:هههههههههههه
وصاروا يلاحقون مرام وعبدالرحيم بالسيارة والشوارع شبه فاضيه لأن الوقت كان متأخر بالليل.
وصار عبدالرحيم يسرع بأقوى ماعنده بالسيارة!
ومرام تصيح فيه:عبدالرحيـــــــــم على هونك!
عبدالرحيم:اشفيك انتي؟ ماتشوفين شلة الحوَنْش اللي ورانا شلون يبون يآذونا؟
صارت مرام تبكي وخايفة مرة..والشباب كل اللي براسهم يخربون على المعاريس فرحتهم ثم يرجعون بيوتهم!!!
حاولوا يسدون على عبدالرحيم الطريق لين ماهرب بسيارته لشارع فرعي وصدم بمقدمة السيارة في الرصيف!!!
أما الشباب اللي كانوا ميتين من الضحك داخل السيارة اخترعوا!!
قال واحد منهم:الشردة الشردة ياعيال..المعاريس صار لهم حادث..خل نهرب بسرعة قبل لايصيدنا أحد ونتوهق!!!!!!
الزميل الرابع:لايكون ماتوا؟؟
الثاني:وش تنتظر يالأثول سوق السيارة واهرب فينا لأبعد مكان قبل لايكتشفنا أحد!!!
وبالفعل شردوا الشباب بسيارتهم بسرعة شديدة ولاحظوا دوريات المرور انهم يسوقون بسرعة جنونية وقبضوا عليهم وقطوهم بالتوقيف!!!وخاصة انهم تطاولوا على شرطة الرور بألفاظ بذيئة!
أما العروسين عبدالرحيم ومرام كانت حالتهم بالسيارة صعبة..لما السيارة ارتطمت بقوة بالرصيف..عبدالرحيم ضرب كتفه بشباك السيارة اللي جنبه بس ماتأذى لأنه رابط حزام الأمان وصابته رضة خفيفة وداخ شوي..لكن مرام ضربت بجبهتها في شباك السيارة وانجرحت وأغمى عليها!!لمدة من الوقت!
صار عبدالرحيم يحاول يصحيها لكنها ماترد عليه!!
وصابه الرعب ودعس بالسيارة وصار يدور بالشوارع بأسرع ماعنده ومسكوه دورية المرور وخلوه ينزل من السيارة غصب عنه وصار يصيح فيهم وحكى لهم الموقف بسرعة وهو منهار!!
الشرطي الأول يكلم زميله:لايكون انه يقصد شلة الشباب اللي مسكناهم قبل شوي؟؟؟
الشرطي الثاني:تعرف كم عددهم؟؟
عدالرحيم:أظنهم أربعة وكانوا راكبين كامري أسود!
الشرطي الأول:بس!هم نفس الشباب اللي قبضنا عليهم قبل شوي..ودك تقدم فيهم شكوى؟؟
عبدالرحيم وهو بقمة عصبيته:انتم مافي قلوبكم رحمة؟؟؟زوجتي بين الحياة والموت بالسيارة وانتوا تسولفون معي؟؟لازم أنقلها المستشفى حالاً!
الشرطي الثاني:كان الله بعونك..زين لِف يسار بسيارتك بتلقى مستوصف ود زوجتك له...
وبالفعل راح عبدالرحيم بسرعة للمستوصف ونزل من السيارة وشال مرام ودخل المستوصف..وكان موظفين الريسبشن والممرضات مستغربين المنظر!!عروس بفستانها وتسريحتها وبكامل زينتها والعباية فوقها ومغمى عليها والعريس لابس البشت وشايلها!!كان منظر لايحسدون عليه
وكان فيه ممرضتين فليبينيتين يتكلمون بلهجتهم:
الترجمة
الأولى:هذا العريس شكله مجرم..ماأعطى العروس فرصة وعلى طول نكَّد عليها؟؟
الثانية:حتى ملابسها ماغيرتها هو اش سوَّى بالضبط؟؟؟؟؟تعالي نشوف!
ودخَّلوا مرام الطواريء وف***ا الطبيب وبدأت تسترد وعيها وكانت سليمة إلا جرح بجبهتها ينزف وكدمة حوله من قوة الخبطة..أعطوها ابرة
وخيطوا لها الجرح..وهي تتألم
الطبيب:ضروري أعمِل ليكو تحويل على مستشفى عشان المدام تتنوم وتعمل فحوصات شاملة وأشعة مقطعية للدماغ..يمكن الصدمة أثرت عليها ولا حاجة!!
لكن مرام رفضت بشدة وأصرَت تروح للفندق!
أخذها عبدالرحيم على جنب حاول يقنعها بالتنويم بأي مستشفى..
مرام:إنت اشفيك؟معقول عروس بيوم زواجها تنام بالمستشفى بدل الفندق؟؟
عبدالرحيم:وشفيها؟أهم شي نتطمن على صحتك
مرام:أنا بخير..بس عندي صداع خفيف..حبتين بنادول وأصير بأحسن حال!
ولما شافها عبدالرحيم معنِدة خلى الدكتور يكتب لها مسكنات ومعقم للجرح اللي بجبهتها وطلعوا من المستوصف..
وهم بالسيارة..
عبدالرحيم:أنا أشوف ماله داعي نروح للفندق..اش رايك نروح لبيتنا أحسن؟؟؟
مرام:ليش؟
عبدالرحيم:هناك أمي بتهتم فيك وبصحتك وشغالتها مابتقصر..أخاف يغمى عليك أو يصير فيك شي عقب هالخبطة الجامدة..والفندق ملحوق عليه.نروح له بأي وقت
مرام:براحتك..سوي اللي تبيه..
==========
قام عبدالرحيم واتصل بأمه...
عبدالرحيم:السلام عليكم..يمه؟رجعتوا البيت؟؟
أم عبدالرحمن:ايه صار لنا نص ساعة تقريباً..ليش؟؟؟؟؟؟
عبدالرحيم:زين يمه جهزوا شقتي..وشيكوا عليها أنا ومرام تونا طالعين من المستوصف وجايين في الطريق!
أم عبدالرحمن:اييييييييييش؟؟يوووه ياحسرتي!وش سويت ببنت الناس؟؟هذا وأنا أوصيك بالملاينة والفعال السنعة؟؟
عبدالرحيم:يمه أنا ماسويت فيها شي..هذول شلة الشباب لابارك الله فيهم!!!
أم عبدالرحمن:أعوذ بالله..أحــــــلام الحقي علي بكاس ماي...تقول شلة شباب؟؟؟اش سووا بالبنت فهمني..وااا ويل حالي ويلاه,,,ياحسرة قلبك ياأم عبدالرحمن!!!
عبدالرحيم:يمه لايروح فكرك بعيد!هذيل شباب طاردونا بالسيارة لين سوينا حادث وشردوا ومسكوهم المرور!!
أم عبدالرحمن:حادث؟؟؟ لا لا هذي عين وصابتكم تعالوا بسرعة أنا بانتظاركم..
وقامت أم عبدالرحمن تهل دموعها..
أحلام واسمهان:اش اللي صار؟؟؟؟
شرحت لهم أم عبدالرحمن الموضوع بسرعة وقالت:خذوا من الأكل اللي جبناه من بوفيه الزواج ورتبوه بصحون خل نطلعه لشقة عبدالرحيم يمديهم مساكين ماذاقوا لقمة..وخلو الشغالة تعصر لهم كاستين برتقال وحطوها بالصحن..وأنا بأطلع أشوف الشقة وأولع الأنوار وأبخرها..
طبعاً عبدالرحمن من يوم وصل للبيت طلع شقته ودخل يرتاح بعد يوم مرهق في هالزواج..ومايدري عن شي......
أما اسمهان وأحلام جهزوا الأكل والعصير وودوه فوق وكانت أم عبدالرحمن قد بخرت الشقة..وجلسوا بانتظار العرسان..
لما وصل عبدالرحيم شقته حط المفاتيح بالباب من غير مايدق جرس..على باله ان الشقة فاضية ولما انتبهت اسمهان انه بيفتح الباب شردت تتخبى عشان لايشوفها عبدالرحيم بما انه غير محرم لها ولايجوز لها تكشف عليه..وكانت أقرب غرفة للصالة غرفة النوم..دخلتها اسمهان وتخبت فيها..
قامت أم عبدالرحمن ترحب بالعروسين وحضنت مرام وقالت:سلامات يابنتي...لاباس عليك
مرام(بدلع):شوي شوي علي ياخالتي..عظامي توجعني!!
عبدالرحيم:حاولت أقنعها تتنوم بالمستشفى لكن رفضت الله يهديها..
مرام:عن إذنكم..أنا بأدخل أغير هدومي..
ودخلت غرفة النوم وطاحت عينها على اسمهان
مرام:اسمهان؟؟؟؟؟؟؟؟
اسمهان:الحمدلله على سلامتكم...اش اللي صار عليكم؟؟؟
مرام:لاتطلعين برة الموضوع!وش اللي جابك بغرفتي؟؟
اسمهان:أبد..شفت عبدالرحيم وهو يفتح باب الشقة وجيت انحاش وغرفتك كانت أقرب غرفة فدخلت فيها!
مرام:يعني ماكنتي تفتشين بأغراضي؟؟
اسمهان:ليش أعوذ بالله؟أنا وش أبي بأغراضك؟ولو أبي أفتشها كان فتشتها اليومين اللي راحوا..يعني ليش بأفتشهم اليوم؟؟؟
مرام:حصل خير..عموماً أنا تعبانة وودي أبدِّل هدومي وارتاح!
اسمهان:تصبحين على خير..بس شوفي لي الطريق أبي أرجع لبيتي...
راحت مرام وقالت لعبدالرحيم يدخل غرفة ثانية لين ماتخرج اسمهان.
ورجعت اسمهان لبيتها ولقيت عبدالرحمن منسدح على السرير مانام وكان ينتظرها..
عبدالرحمن:وينك؟؟ليش كل هالتأخير؟ماشبعتوا من السوالف؟؟؟
راحت اسمهان تحكي له بالتفصيل كل اللي صار وحتى موقفها مع مرام واستغرابها من فضاضة أسلوبها!!
عبدالرحمن:كل هالبلاوي صارت وأنا مدري؟؟وبعدين لاتاخذين على خاطرك من مرام هذي مهما كان صديقة عمرك!ويحق لها تتضايق من وجود أحد بغرفتها..انتي الله يهديك مالقيتي إلا غرفتهم تتخبين فيها؟؟
اسمهان:وين كنت بأروح يعني؟هذي أقرب غرفة كانت قدامي...
عبدالرحمن:أنا لازم أتطمن على أخوي الحين..
وطلع عبدالرحمن فوق ودق الجرس على أخوه عبدالرحيم لكنه مافتح له الباب...وراح عبدالرحمن ونزل تحت لبيت أمه..وكانت أحلام قاعدة تلبس عباتها لأن زوجها ينتظرها برة..
عبدالرحمن:يمه؟طلعت لعبدالرحيم أتطمن عليه بس مافتح لي الباب..
أم عبدالرحمن:لاتنسى ياولدي انهم تعبانين..وصلاة الفجر مابقى عليها شي..بكرة بأناديهم على الغداء وشوف أخوك وتطمن عليه..
====

قررت أم عبدالرحمن انها تعزم أولادها وزوجاتهم ببيتها على الغداء..وأحلام وزوجها.....وأعطت خبر لعبدالرحيم من قبل ماتطلع من شقته..
اليوم الثاني...صحيت مرام على رنين الجوال قبل الظهر وكان عبدالرحيم بـدورة المياه..
مرام:آلو..
أم مرام:آلو..شلونك يامرمر؟وحشتيني ياحبيبتي...البيت من غيرك مايسوى!
مرام:مايوحشك غالي يمه..حتى أنا ولهانة عليكم حيل...
أم مرام:طمنيني عن أخبارك..كيفك عقب ليلة أمس؟؟؟
مرام:الله لايعيدها من ليلة!!
أم مرام:أعوذ بالله..وش هالهرج يابنتي؟عسى العريس مأذيك؟؟
مرام:لا يمه..ماشفت منه إلا كل خير..بس صار لي حادث...
أم مرام:حااااااادث؟؟يالطيف يارب!احكي لي بسرعة وش صار معك!!
قامت مرام تحكي بالتفصيل أحداث الليلة السابقة..
أم مرام:كل هذا يجرى وإحنا ماندري؟؟وبعدين الله يهديك يابنتي ليش ماسمعتي كلام زوجك وتنومتي يوم واحد بالمستشفى؟؟على الأقل كنتي تسوين شوية فحوصات وأشعة وتتطمنين فيها على عمرك..أخاف يكون عندك ارتجاج من الصدمة وانتي موب دارية!!!!
مرام:وش يقولون عني الناس يمه؟؟نحيسه؟؟من أول ليلة نامت بالمستشفى؟؟؟
أم مرام:وش عليك من الناس؟أهم شي صحتك..الناس مو نافعينك بـ شي
المهم بعد كل هالأحداث اللي صارت أنا لازم أشوفك وأتطمن عليك بنفسي..كلها دقايق وأجيك أنا وأبوك نسلم عليك!!
مرام:يمه خلوها وقت ثاني!!أم عبدالرحمن عازمتنا عندها على الغداء..ويبي لي كم ساعة أتجهز وأضبط نفسي!!!!
أم مرام:خلاص بأشوف لي وقت ثاني اليوم أزورك فيه..
انتهت المكالمة وراحت أم مرام تحكي لأبو مرام عن اللي صار...
أبومرام:ايش؟؟كل هذا صار لـ مرمر وماحد علمني؟؟؟هالحين الحين لازم نروح نتطمن على بنتنا!!
أم مرام:هي ماتبينا نزورها الحين تقول خلوها بوقت ثاني!
أبومرام:موب على كيفها..ضروري أشوفها الحين...لايكون صاير عليها شي ومخبية علينا!!
وبالفعل راحوا أبوها وأمها وطبوا عليها فجأة!!استقبلهم عبدالرحيم..وبعد دقايق دخلت عليهم وسلمت..
أبومرام:خطاكم السوء..لاباس عليكم ان شاء الله..
عبدالرحيم:الشر مايجيك ياعمي..
أم مرام:وتقولين مافيك شي؟هذي جبهتك مغطاة بالشاش..ليش؟
مرام:لأنه في جرح خيطوه لي البارح..
أبومرام:يعني السالفة فيها غُرز وخياطة؟؟لا لا الحادث شكله ماكان هين!مالكم حق ياعبدالرحيم تسكتون ماتعلمونا..
عبدالرحيم:مابغينا نقلقكم ياعمي..الحمدلله هذا انت شايفنا نمشي ومافينا الا العافية..
أبومرام:لا لا أنا مايقنعني هالكلام..أنا أبي آخذ بنتي..وأوديها المستشفى تسوي أشعة..أخاف جاها شي خطير براسها وهي موب حاسة..انت ماتشوف شلون راسها وارِم؟؟؟؟
إلا دق الجرس..وراح عبدالرحيم يفتح..وكان الحاضر أخوه عبدالرحمن..استقبله عبدالرحيم بمجلس الرِجال وجاء لأبو مرام وقال له:ياعمي هذا أخوي الكبير جاء وقاعد بالمجلس ويبي يسلم عليك..
وقام أبومرام وراح لمجلس الرجال يسلم على عبدالرحمن ويسولف معاه..
واستفردت أم مرام ببنتها..
أم مرام:اسمعي يابنتي..هاليومين أهم شي تفكرين فيه صحتك..ارتاحي ببيتك وكلي زين..وبعدها سافري وتمشي مثل ماتبين..
مرام:يمه صدقيني أنا زينة..انتم مكبرين السالفة شوي..
وبمجلس الرجال كان عبدالرحمن جالس يعزِم أبومرام على الغداء..وأبومرام رافض وعبدالرحمن مُصِّر عليه..لين ماوافق بالنهاية..
راحوا لصلاة الظهر وعقب الصلاة..اجتمع الجميع ببيت أم عبدالرحمن..
حضرت مشاعل واسمهان وأحلام ومرام وأمها..
وبعد التحية والسلام..
أم عبدالرحمن:سلامات على مرام ماتشوف شر ان شاء الله..
أم مرام:الله يسلمك..هذي عين وصابتها! حسبي الله على كل من شافك ولا ذكر الله يامرمر!!!!!
أم عبدالرحمن:ما يصيب الانسان الا اللي مكتوب له ياأم مرام..
أم مرام:صحيح..لكن عيون الناس ماترحم..من يشوفون وحدة حلوة يستكثرون عليها!!!
أم عبدالرحمن:ليش؟انت ماحصنتي نفسك يامرام؟؟
مرام:إلا حصنت نفسي..مية مرة!!!!
أم عبدالرحمن:خلاص إذن مافي مشكلة.. الإنسان يتوكل على الله وياخذ بالأسباب..من تحصين وخلافه..حتى لما البلاء يصيبه ينزل عليه مخفف..مين يدري؟يمكن اللي كان بيصير لكم حادث شنيع بس رحمة الله ثم تحصنكم بالأذكار خلت المصيبة عليكم أخف..وماتضررتوا منها!!!!
أم مرام:بغيت أنجن يوم قالت لي مرام باللي صار..عتبي عليك ياأم عبدالرحمن!كان علمتينا أمس!
أم عبدالرحمن:وش كنتوا بتسوون لها قبل الفجر يابنت الحلال؟؟اللي صار صار وهذا هي مافيها إلا الخير..
وقامت اسمهان تسولف مع مشاعل ومرام على جنب..
اسمهان:كيفك يامشاعل عقب ليلة أمس؟ان شاء الله مستانسة؟؟
مشاعل:الحمدلله..أمورنا تمام وأكيد استانست..أحلى ليلة بعمر البنت ليلة عرسها...
اسمهان:الله يسعدكم يارب..طيب وانتي يامرام؟؟عاد مايحتاج أسألك..شفتك بعيني!هههههه
مرام(باشمئزاز):اش تقصدين؟؟ماحد انبسط إلا انتوا؟؟عبدالرحيم يتمنى يرضيني بكل وسيلة في الدنيا..وراح يعوضني ونسافر وننبسط..بس هو خايف على صحتي هاليومين!!!!!!
استغربت اسمهان من الحِدة في الرد وحطت لسانها بحلقها وانطمَّت!!!!
مرت الأيام وحل عبدالرحيم مشكلة السيارة والشباب وتطمن على صحة مرام بعد اجراء بعض الفحوصات... وبعدها سافروا..
ومشاعل وعبدالمجيد بعد سافروا
وبقيت اسمهان في بيتها وعبدالرحمن مداوم..وحست بملل فظيع..
وبيوم من الأيام نزلت اسمهان وكان الزهق قد بلغ منها مبلغ..وقعدت مع أم عبدالرحمن..
أم عبدالرحمن:اش رايك نطلع نشرب القهوة في الحوش؟؟
اسمهان:ماعندي مانع..
ولاحظت أم عبدالرحمن انه اسمهان متضايقة وسألتها عن السبب..
اسمهان:ياخالتي دوام عبدالرحمن مثل مانتي شايفة من الظهر لين الساعة 11 بالليل ومرات يتغير الشِفت..يعني محكوم علي بالجلسة في البيت 5 أيام بالأسبوع..ودي أطلع ودي أروح أي مكان!!
أم عبدالرحمن:أجل وش أقول أنا يابنتي؟؟عيالي ومسافرين مع زوجاتهم بشهر العسل..وبكرة بس يرجعون ماحد منهم بيفضى لي كل واحد بيقابل زوجته ويتفرغ لها..وأقعد أنا بروحي..
اسمهان:أفا ياخالتي وإحنا وين رحنا؟؟
أم عبدالرحمن:مالها داعي المجاملات يااسمهان بكرة انتي ومرام تسجلون بالجامعة وتنشغلون..ومشاعل بتكون لاهية بدوامها وببيتها..وأنا يابنتي ماأحب أفرِض نفسي على أحد..وودي أزور رفيقاتي وأقاربي..ولي فترة وأنا أفكر بالموضوع..وان شاء الله أفاتح عبدالرحمن بأقرب فرصة انه يستقدم لي سواق!!
اسمهان:ياسلاااام ياليت..على الأقل لما يكون عبدالرحمن مداوم وأنا بخاطري أزور أهلي يوديني السواق لهم..ولو اني حاسة انه عبدالرحمن لايمكن يخليني أركب مع السايق لحالي!!
أم عبدالرحمن:ومين قال انك بتركبين لحالك؟؟أنا لو بأستقدم سايق ماراح أجيب إلا زوج شغالتي.. وهي بتكون معاه في السيارة لااحتجنا مشوار ..ماشاء الله عليها صار لها سنين عندي وأثق فيها وأكيد زوجها مابيتخير عنها..بلاك ماتدرين عن هالقصص اللي نسمعها هاليومين عن الخدم والسواقين..جارتنا لطيفة السنة اللي طافت سواقها وشغالتها عطتهم 3ألاف ريال يدفعونها لمحل الأثاث عشان قد اختارت كنب لصالونها وراحوا يجيبونه للبيت لكنهم أنذال خذوا الفلوس وانحاشوا ولالقيت لهم أثر ليومك هذا!!يمديهم يشتغلون الحين ببيوت الثانية..لا والسايق اقامته معه بعد!!!!
اسمهان:ذكرتيني بشغالة عبير وسواقهم والبلاوي اللي كانوا بيسوونها بتركي..وشغالتي النذلة اللي بغت تهرب بـ ذهبي!!الله يغنينا عنهم بس..
واستمروا في سواليف مختلفة..
أم عبدالرحمن:فديت قلبه عبدالرحيم اليوم كلمني وأرسل لي صور على جوالي من نيوزلندة طبيعتهم تهبل..ويقول انهم بيرجعون قبل زواج تركي وناصر وده يحضر عرسهم هو ومرام..
اسمهان:وعبدالمجيد ماكلمك ياخالتي؟؟
أم عبدالرحمن:شلون بيكلمني؟مشاعل هي اللي اتصلت فيني وطمنتني على أخبارهم أما هو بس يدز لي مسجات الله يسعده يارب ويوفقه مع زوجته..باين عليها بنت حلال و تِنْحب....
=========لما رجع عبدالرحمن من العمل كانت اسمهان في البيت قبله محضرة له العشا وتنتظره...
وبعد التحية والسلام وتبديله لهدومه قعد معاها على طاولة العشا..يتبادلون السواليف المختلفة...
وحكت له اسمهان عن رغبة أمه باستقدام سواق..
عبدالرحمن:ياحليلها الوالدة..بدت تحس ان الكل لاهي عنها وماودها تثقل عليهم..
اسمهان:صحيح..ومو بس هي اللي تحس انه الكل لاهي عنها..في وحدة ثانية تحس ان زوجها لاهي عنها!!!
عبدالرحمن:أكيد اسمها يبدأ بحرف الألف وينتهي بالنون..صح؟؟
اسمهان:ايه صح!!اشفيها لو خذيت لك يومين ورحنا فيها أي مكان شاليه مثلاً نغير جو!!!
عبدالرحمن:لا واللي يرحم والديك إبعدينا عن سيرة الشاليهات..أنا حرمت أطبها!!
اسمهان:زين نروح أي مكان..أو نسافر.. المهم نغير هالأجواء الكئيبة!
عبدالرحمن:أي أجواء كئيبة؟ تونا قبل أسبوع كنا بعرس وطقطقة ومناسبة حلوة..وبعدين اش اللي جاب طاري السفر براسك؟؟غِرتي من العرايس؟؟
اسمهان:لا تطمن!أنا مو غيورة!أنا مليت من الروتين..ودي استانس وأطلع..
عبدالرحمن:يابنت الحلال لاتستعجلين..الخير جاي قِدام..أخواني مابيطولون في السفر..كلها اسبوعين بالكثير ويرجعون..وتستانسين مع زوجاتهم..
اسمهان:مالي شغل!بكرة من الظهر وإنت رايح عملك نزلني ببيت أهلي!!
عبدالرحمن:صار..!مبسوطة؟!!!
اسمهان:ايه!
=============
اليوم الثاني راحت اسمهان لبيت أهلها من الظهر.. وبهذي المناسبة الحلوة قال أبوها:كلموا اسماء ومحمد وزوجته يجون يتغدون معانا..
وكانت ابتسام موجودة ببيت أهلها وقعدت اسمهان تلعب مع ولد ابتسام الصغير وهي مبسوطة فيه..ودق جوالها طلعت المتصلة رانية..
اسمهان:رنو اتصلي على تلفون أهلي الثابت تراني عندهم..
واتصلت رانية وبدأت الثرثرة..
رانية:الله أكبر يالقاطعة!من يوم صار عندك سلايف مارفعتي علي سماعة!!كل هذا حب في مرام؟؟
اسمهان:ياحليلك..خُبرك عتيق!مرام قد سافرت..أصلاً..وأنا ماحولي أحد..من الزهق جيت لأهلي من الظهر..
رانية:أما أنا قلبي يخبط يرقع..تصدقين توي أحس ان سالفة الزواج صدق موب لعبة؟؟
اسمهان:هههههه صح النوم ياعسل!!
رانية:من جِد أحاكيك..بالأول ماخذتها تسلية ووناسة..بس هالحين خايفة من المستقبل ماني متخيلة شلون بأشيل مسئولية البيت لحالي..وخايفة تخيب توقعاتي بناصر ويطلع شخص ثاني..وخايفة الزواج يلهيني عن الدراسة..ومو عارفة شلون أفكِر!!
اسمهان:بكرة تكبرين وتنسين..كنت مثلك.. لكن كل شي مع الأيام يهون..انتي بس تفائلي خير..وبعدين تعالي انتي اش قررتي تتخصصين؟؟
رانية:بإذن الله بأدخل كلية التربية قسم تاريخ..
اسمهان:مو معقول!!أنا بعد مخططة اني أسجل بكلية التربية بس بقسم اللغة العربية..
رانية:وليش عاد ياآنسة قواعد؟؟ادخلي معاي قسم التاريخ!!
اسمهان:وش أسوي بعبدالرحمن؟هو اللي مصمم اني أدخل قسم العربي عشان أثري لغتي وقريحتي في الكتابة!!
رانية:مايخالف..أهم شي إننا بكلية وحدة..وعلى فكرة نجلاء بتكون معانا..
اسمهان:واااااااي الله يبشرك بالخير..وأفنان قالت لي مشاعل إنها بتنتسب للجامعة وتشتغل معلمة برياض أطفال ودها تجمع بين الدراسة والوظيفة..
رانية:من زين رواتب الروضات عاد؟؟
اسمهان:هي مافكرت في الراتب..هي فكرت انها تاخذ شهادة الخبرة عشان لاتخرجت من الجامعة تلقى وظيفة بسهولة..ومثل ماتعرفين رياض الأطفال الأهلية توظف بشهادة الثانوي...
رانية:ومرام؟؟
اسمهان:مرام تقول إنها راح تدخل الجامعة..ومرات تقول لا بأفكر بمشروع خاص!!والله يعلم..
رانية:أخاف بتحضر الماجستير قبل لاتدخل الجامعة!!مدري ليه مرام تحب تسوي غموض وماتصارحنا بسهولة عن أي شي بتسويه..
اسمهان:حبيبتي لاتنسين انه مرام فيها وسوسة شوي مع خوف من العين..مع قليل من الشك..لذلك أتحاشى أتدخل في أي تفاصيل خاصة فيها..
رانية:أقول اسمهان هذا جوالي يرن..أكيد انه ناصر!!سلمي على أهلك ومع السلامة..
اسمهان:مع السلامة...
===============
قعدت اسمهان مع أهلها واجتمعوا أخوها واخواتها وظلت اسمهان تحكي لهم عن بعض مواقف أم عبدالرحمن..
أم اسمهان:الحقيقة يابنتي.أم عبدالرحمن هذي عملة نادرة..نادراً تلقين أم زوج متفاهمة وذوق مثلها..قبل كم يوم كنت عند أم غسَّان وقعدت تحكي لي عن مواقف أم أزواج بناتها الثنتين معاهم ..الله لايبتلينا ياهي مفترية فيهم افتراء...وتتدخل بأدق خصوصياتهم..وكل يوم وبنات أم غسان زعلانات وقاعدات ببيت أمهم..
ابتسام:كأنك تتكلمين عن أم زوجي يمه!
أم اسمهان:الله يحلل أم زوجك عنها..أقول لك هذي تطق حريم عيالها طق!!أم غسان تحكي لي وتبكي..تقول كم مرة ترجع لها وحدة من بناتها بنص الليل وهي مضروبة من أم زوجها!!استغفر الله مدري اش هالعقلية؟؟ماقد طقيت بناتي أروح أطق بنات الناس؟؟أعوذ بالله..
سماح:وأنا أشهد ياخالتي انتي مافي مثلك..وأنا أحبك مثل أمي..
أسماء:أنا جارتي كاسرة خاطري حيل..تصدقون أم زوجها مانعتها تتوظف!!قال إيش؟تخاف يصير مع زوجة ولدها قروش وتستقوي على زوجها!!!إمحق من تفكير!
أم اسمهان:بس المفروض الوحدة تداري الكبار في السن..وتتقي الله في معاملتهم..مين يدري؟يمكن الكلمة الطيبة تلين الحجر!وإن ماحصل فهذا ابتلاء والوحدة مالها إلا الصبر..
ابتسام:صدقتي يمه الوحدة مالها إلا الصبر..لين القبر!!
بنهاية الأسبوع وكان يوم الأربعاء صحيت اسمهان تطبخ الغداء لعبدالرحمن قبل مايروح للعمل...لكنها حست بصداع ودوخة!!
عبدالرحمن:مادام إنك تعبانة خلاص..لاتطبخين..سوي لنا ساندويتشات وحطي فواكه..نعمة من الله..وخذي لك حبة بنادول..
وبالفعل جهزت اسمهان الأكل وأكلوا وراح عبدالرحمن للعمل..
ومر اليوم من غير جديد يُذكر..
ثاني يوم كان الخميس صحي عبدالرحمن من بدري وخرج يكمل بعض أشغاله..
وقعدت اسمهان ترتب البيت بانتظاره لكنه اتصل فيها وقال:اسمهان تغدي انتي أنا معزوم للغداء برة..
لكن اسمهان تكاسلت تطبخ لنفسها وقعدت تشتغل بالبيت ورجعت لها الدوخة والصداع!!وتمددت على الكنبة بالصالة بانتظار عبدالرحمن...
لما رجع دخل وسلَّم وقال:اشفيك سمهونة؟لسه ماشبعتي نوم؟والعصر اقترب؟
اسمهان:لا أنا مو نايمة..بس عندي صداع ودوخة..
عبدالرحمن:سلامات..اش سالفتك مع الصداع والدوخة؟خذيتي بنادول؟؟
اسمهان:لا ماخذيت..شلون أبلع بنادول على معدة فاضية؟!!
عبدالرحمن:الله يهديك..ليش ماأكلتي شي لين الحين؟
اسمهان:ما جالي نفس آكل بغيابك!!
عبدالرحمن:وافرضي اني غِبت اليوم كله!كنتي بتصومين يعني؟؟يلا قومي كلي لك لقمة وخلينا نطلع نتمشى..
وقامت اسمهان باتجاه المطبخ ولكن الدوخة رجعت لها وراحت للصالة وجلست..
عبدالرحمن:اشفيك؟
اسمهان:أقول لك دايخة..
عبدالرحمن:زين..البسي عباتك خل نشوف وش قصة الدوخة معك؟؟
قامت اسمهان وابتسمت وقالت:إنت تفكر باللي أفكر فيه؟
عبدالرحمن:تقصدين ان سِر الدوخة سببه الحمل؟؟
اسمهان:ايه..ممكن..
عبدالرحمن:ياليت يااسمهان ياليت..البيت كبير علينا ودي يكسر الصمت فيه صوت طِفل..يضحك ويبكي ويغاغي..
وفرحت اسمهان بكلامه وراحت بسرعة تلبس عباتها وتتجهز..
وركبوا السيارة والفرحة غامرتهم وكل الكلام يدور عن أحلامهم وآمالهم بالمولود الجديد...
اسمهان:لو جاني بنت أحس إني بأصير أسعد انسانة بالعالم بأدلعها وأكشخها وأنفذ لها كل طلباتها!!
عبدالرحمن:ياسلام...ولو كان ولد بتصيرين أتعس انسانة؟
اسمهان:لا بالعكس..الولد عِزوة..بس أحب البنات أكثر حتى لما أنزل السوق تلفت انتباهي ملابسهم وألوانها..
وظلوا يتكلمون عن الأطفال وهم بطريقهم إلى المستشفى لين ماوصلوا إلى سالفة الأسماء..
عبدالرحمن:أنا نفسي لو كان عندي ولد أسميه(فِراس)!
اسمهان:إشمعنى؟
عبدالرحمن:فِراس هذا كان أعز أصحابي على قلبي..من يوم وحِنا صغار..وولد خالي بنفس الوقت..وكان الله يرحمه ويغفر له انسان مقصر حاله حال كثير من الشباب الله يهديهم..وبيوم من الأيام وهو قاعد على البحر مع مجموعة من الأقارب كان فيه مخيم قريب مستضيفين فيه واحد من مشايخنا المعروفين..كفعالية من فعاليات الصيف..وقرروا الرِجال اللي معه يدخلون يسمعون المحاضرة فدخل معاهم من باب المجاملة مو أكثر وكانت المحاضرة عن التذكير بالموت...لكنه خرج منها إنسان ثاني..تأثر حيل بالكلام اللي كان يسمعه لأول مرة بحياته!!وانقلبت حياته لهداية وصلاح..بدرجة ملحوظة..
والحقيقة الكل فرح بتوبته والتزامه وكان له تأثير على شباب العيلة بما إنه صاحبهم لين جاء يوم من الأيام وقرر فِراس فيه انه يروح مكة يآخذ عمرة وكلمني أرافقه وبالفعل كنت بأروح معاه لولا إن أبوي الله يرحمه كان تعبان بالمستشفى وقررت أرافقه وأتطمن على صحته واعتذرت لفِراس عن الروحه معه للعمرة...
اسمهان:وبعدين؟؟
عبدالرحمن:وبعدين راح لحاله..وهو بمدخل مكة ولابس ملابس الإحرام..فاجئته سيارة من الخلف واصطدمت فيه اصطدام قوي لدرجة انه طار من السيارة وطاح على الطريق.ولين ماتم البلاغ عن الحادث ووصلوا الاسعاف يشيلونه كانت روحه قد فارقت جسده!!والغريب انهم لقيوا بأغراضه اللي حاطها بالحزام ورقة مكتوب فيها(بعد وفاتي..أعضائي هبة لمن يحتاجها)!!!!!!!!!!
قامت اسمهان تبكي وعبدالرحمن دمعت عينه..
اسمهان:يعني كان حاس انه بيموت؟
عبدالرحمن:أهله يقولون قبل وفاته بأسبوع شاف رؤيا وفسرها مفسر له بإنه وفاته قريبة وإن شاء الله تكون خاتمة حسنة..وحاول يجتهد في عبادته أكثر وأكثر وعسى الله يرحم جميع موتى المسلمين ويحسن خاتمتنا.
وصلوا للمستشفى..ودخلوا على دكتورة النساء والولادة بعد طول انتظار..وحكت لها اسمهان عن الدوخة والصداع اللي يتكرر معاها..
الدكتورة:هنعمل لك دلوقتي تحليل دم للحمل ولفقر الدم والسكر ونشوف النتيجة ايه..
عبدالرحمن:ومتى تطلع نتيجة التحليل يادكتورة؟
الدكتورة:بكرة ان شاء الله..
عبدالرحمن:مافينا صبر لبكرة..أرجوك حاولوا تخلصونه اليوم..
وبعد محاولات وافقت الدكتورة انها تكلم المختبر يستعجلون في النتيجة!!
وبالفعل وعدتهم انه النتيجة راح تظهر خلال ساعات..
خرجوا من المستشفى والفرحة غامرتهم..
عبدالرحمن:بما إنك على لحم بطنك..فأنا عازمك على الغداء بأي مكان تختارينه..
اسمهان:بأختار مطعم(آبل بيز)!!مطعمي المفضل!!ههههه
وراحوا وطلبوا أكل وخذتهم السوالف وطلبوا تحلية عقب الأكل وجلسوا يتكلمون عن خططهم المستقبلية..وانهم بيسوون الغرفة اللي قدامهم للأطفال ويضبطونها..ومن أي محلات يقضون أغراض المولود..
وبعد ساعات اتصل عبدالرحمن على المستشفى..وقالوا له نتيجة الحمل وفقر الدم طلعت بس تحليل السكر بكرة..
وأخذ اسمهان وطيران على المستشفى...دخلوا على الدكتورة..
الدكتورة:بصي يامدام اسمهان..ضروري تهتمي بالتغذية الصحية..وتبعدي عن الأكل اللي بيكسر الحديد..والشاي بأنواعه..
عبدالرحمن:زين يادكتورة ياليت تعطينا جدول تغذية نموذجي يناسب المرأة الحامل ومايضر الجنين.
الدكتورة:ليه؟هو مين اللي آئال انها حامل؟؟
طالعوا اسمهان وعبدالرحمن ببعض والدهشة على وجوههم..
الدكتورة:كل المسألة انه المدام عندها أنيميا ونسبة الدم نازلة شوية وضروري جداً تهتم بالأغزية المفيدة اللي مابتكسرش الحديد..وضروري يامدام بعد كل حبة حديد تاخديها تشربي عصير بردقان طازة عشان يمتص الحديد في الدم بشكل مِسَالي,,وتبعدي عن الشاي والقهوة خالص وإزا فكرتي تشربيهم يبئى بعد ماتاخدي الحبة بساعتين اتفئنا؟!!!!
حست اسمهان انه الصدمة ربطت لسانها..
الدكتورة:وآدي روشتة الحبوب اللي كتبتهالك اصرفيها من الصيدلية وبالشفا ان شاء الله..
خرجوا الاثنين والجمود على ملامحهم..وبس دخلت اسمهان السيارة انفجرت تبكي..وعبدالرحمن يحاول يهدِيها..لكن دون جدوى!!!!
بعد مارجعت اسمهان استمرت في حزنها وحاول عبدالرحمن يهدي الوضع لكن اسمهان كانت شبه منهارة وماتبي تسمع شي!!
ثاني يوم وكان الجمعة فكر عبدالرحمن يكلم صاحبه سلمان زوج ليلى..ويعرض عليه زيارتهم لعل وعسى إن اسمهان تهدأ نفسيتها وتنشغل بالضيوف..
عبدالرحمن:إذا منت مرتبط اليوم..فإش رايك تجيب الأهل ونسمر مع بعض؟؟
سلمان:الصراحة إحنا مخططين اليوم نطلع البحر في العصر..اش رايكم ترافقونا ننبسط ونتقهوى ونشرب الشاهي سوى؟؟
عبدالرحمن:ماودنا نضايقكم!
سلمان:ولاتضايقونا ولاشي..إلا أبركها من ساعة حتى زوجتي لو تدري بطلعتكم معانا بتستانس مرة..
عبدالرحمن:خلاص..تم
وقال لاسمهان لكنها مارحبت بالموضوع!!
عبدالرحمن:يااسمهان مايصير يابنت الحلال هاللي قاعدة تسوينه بنفسك!ماصار لك إلا سنة وكم شهر وذبحتي عمرك كيف لو إن لك سنين ماحملتي..بتتسخطين على نصيبك؟؟؟
وبعد محاولات وافقت اسمهان تطلع البحر مع الناس..
وراحت تجهز ترمس شاي وتعبي مكسرات وغيرها..وخرجوا,,
وقابلتها ليلى بالترحاب..وخذتهم السوالف..
لكن كان واضح على اسمهان علامات الحزن..
ليلى:مو عاجبتني يااسمهان..انتي زعلانة من شي؟؟
قامت اسمهان تبكي..
ليلى:فضفضي وأنا إختك فضفضي..وسرك في بير
وقامت اسمهان تحكي لها عن أحلامها وآمالها عن الأطفال...وعن اللي صار البارح
ليلى:بس؟؟هي هذي المشكلة؟؟خرعتيني!حسبت صاير عليك شي؟؟
اسمهان:وانتي شايفة تأخري بالحمل مو مشكلة؟
ليلى:حبيبتي..بعدك على أول الدرب..غيرك عاش سنوات وسنوات لين تحقق حلمه..وبعدين الاعتراض على القدر..ذنب..والصبر غنيمة..وصدقيني بدري عليك.إنتي اللي مستعجلة شوي..أهم شي راحتك النفسية وحياتك مع زوجك ..بطريقتك هذي راح تكرهينه فيك وتشغلين باله بهالموضوع زيادة..بالعكس اضحكي وستانسي وخلي الهم بعيد..ولاتشغلين نفسك بالتفكير..وكل شي مكتوب بيصير في وقته عمر الدموع ماتفيدك بشي ولاتحقق لك شي مفقود!!
اسمهان: المشكلة..مو قادرة أنسى!
ليلى:نصيحتي لك تقرأين كتاب (لاتحزن) للشيخ عايض القرني..صراحة كان مثل البلسم لي في كثير من الأمور اللي صابتني في حياتي..وبعدين ماعلمتيني.. هل مازلتي مستمرة بالحفظ مع عبدالرحمن؟؟
اسمهان:ايه..إلى الآن حفظنا جزء عمَّ ماعدا سورة وحدة..لما شفت فيني نشاط صرت أحفظ أكثر من آيتين باليوم..
ليلى:الله يسعدكم ان شاء الله..طالما تحاولون تبنون حياتكم على الخير فبإذن واحد أحد ربي يرضيكم..ويحقق أمانيكم..
اسمهان:آمين
ليلى:اش رايك نقوم نمشي على البحر؟
اسمهان:يلا..
وقاموا يمشون لين وصلوا مكان ماحد يشوفهم فيه وقالت ليلى:اش رايك نتسابق؟ماأتوقع إنك بتغلبيني!!!
اسمهان:لاياحبيبتي..أنا قدها وقدود!!!
وقاموا يتسابقون ويضحكون..وقعدوا على الشاطيء وكل وحدة راحت تبني بيت من الطين وتزينه بالأصداف..وكان يوم ممتع بالنسبة لاسمهان وكلام ليلى خفَّف عنها كثير..بعد كذا صلَّى الجميع صلاة المغرب ثم ودعوا بعض..
اسمهان:تصدقين ياليلى؟استانست معاكِ اليوم بالمرة ياليت مثل هالطلعات تتكرر..
ليلى:ياليت..ليش لا؟بإذن الله كل فترة نتفق ونطلع سوى..أبوي عنده مزرعة حلوة ومرات نآخذ المفتاح منه أنا وسلمان ونروح مع ربعنا نتغدى ونستمتع بالأجواء.. إن رِحنا قريب أكيد أول ناس أفكر أناديهم انتوا..
اسمهان:ان شاء الله..
وراحت اسمهان للسيارة وقعدت تحكي لعبدالرحمن عن مشاعرها خلال هذي الطلعة..
عبدالرحمن:الحمدلله..يعني انبسطتي؟؟
اسمهان:أكيد..
عبدالرحمن:زين اش رايك نروح البيت وناخذ أمي ونروح لأحلام؟؟
اسمهان:خليني آخذ دش الأول ملابسي كلها طين وتراب.
وبالفعل طلعت اسمهان تتحمم وعبدالرحمن مر على أمه وسلَّم عليها وقال:اش رايك نزور أحلام؟؟
أم عبدالرحمن:ياليت..أصلاً وانتوا برة حسيت نفسي زهقانة وكلمتها تجيني لكنها اعتذرت وقالت انه أم زوجها عندها..وتعالي انتي يمه..بس ماقدرت لأنه مافي أحد يوديني!!
عبدالرحمن:زين..يعني اخترت توقيت مناسب..
أم عبدالرحمن:شوف ياولدي..أنا صرت بحاجة سايق..وزوج الشغالة مستعد يجي يشتغل عندنا..
عبدالرحمن:أفا يمه وحِنا وين رحنا؟؟
أم عبدالرحمن:انتم الخير والبركة..لكن الحق حق..مو معقول كل وقت والثاني وأنا بأعطلكم عن أشغالكم بسبب طلعاتي..مرات أبي أروح زيارات ومرات مناسبات ومرات أحتاج المستشفى أو السوبرماركت..وانتم يالله الواحد بنفسه وبيته..
عبدالرحمن:خير ان شاء الله..نشوف هالموضوع بوقت ثاني..هالحين استعدي عشان نطلع بعد شوي..
وبالفعل استعد الجميع وراحوا لأحلام اللي فرحت يوم شافتهم....

وفي مصر كانت مشاعل وعبدالمجيد مبسوطين بالأجواء هناك...وبيوم من الأيام راحوا لخان الخليلي واشتروا مجموعة هدايا يوزعونها لارجعوا..
وبواحد من المحلات لفت انتباه مشاعل صندوق مجوهرات صغير ومعاه مفتاح.وتذكرت انه أمها من زمان تبغى صندوق بمفاتيح ويكون مزخرف..فراحت واشترته ودفعت الفلوس من عندها..لأنها مابغت تكلِّف على عبدالمجيد وتضايقه..
انتبه لها عبدالمجيد وهي تحاسب الرجال وسألها(بلغة الاشارة):ايش اشتريتي؟؟
مشاعل(بلغة الاشارة):اشتريت هدية لأمي..
عبدالمجيد(بلغة الاشارة):وليش انتي اللي تدفعين؟خذي فلوسك وأنا اللي أدفع..
مشاعل(بلغة الاشارة):ماأبي أكلف عليك..
عبدالمجيد(بلغة الاشارة):مافيها كلفة..
والبياع بس يتابع حركاتهم..وشال عبدالمجيد الكيس وحاسب الرجال وجاء ماشي..فالتفت البياع(وكان كبير في السن) لمشاعل وقال لها:مُش حرام يابنتي..وحدة صُغيَرة زيك تضيَّع حياتها مع واحد لامؤاخزة مابيتكلمشي؟؟؟
مشاعل:الله يسامحك ياعم!!!
وراحت ورا عبدالمجيد..وواصلوا تسوقهم..وكان المعرض والفعاليات الخاصة بالصم والبكم لها تأثير كبير على نفس مشاعل وعبدالمجيد..صارت مشاعل تتفرج على أعمال الصم والبكم الفنية ولوحاتهم وابداعاتهم..وتقول بلغة الاشارة لعبدالمجيد:لاحظ انه مستوى موهبتك في الرسم يتفوق عليهم وأنا متأكدة لو تعرض أعمالك راح تلاقي اقبال كبير..
عبدالمجيد(بلغة الاشارة):هذا لأنك زوجتي تبين ترفعين معنوياتي..
مشاعل:لا صدقني..إنت فنَّان بس مستقِل نفسك..موهبتك لازم يشوفونها الناس ويدعمونك..
==============
أما مرام فكانت مستمتعة بالأجواء الخيالية والطبيعة الخلابة بنيوزلندة..وبيوم من الأيام..
مرام:اش شعورك ياعبدالرحيم وإنت بهالأجواء؟؟
عبدالرحيم:أنا ندمان!!!
مرام(بدلع):إخس عليك!هذا كلام تقوله لي؟؟
عبدالرحيم:بـ جد أنا ندمان على كل لحظة مرت بحياتي من دونك!!
مرام:ههههههه حسبت!!
وكانت مرام معلقة برقبتها كاميرا كل منظر يعجبها تصوره..
عبدالرحيم:بسِك عاد!كل ماشفتي شي صورتيه..تذكريني بالخواجات لاجوا بلدنا معاهم كاميرا وكل ماشافوا شي لقطوا له صورة!!مدري اش يعجبهم عندنا مع ان بلادهم أحلى؟!!
مرام:كل إنسان تعجبه النعمة اللي بإيد غيره أكثر!

بعد مرور أيام رجعوا مشاعل وعبدالمجيد من السفر..وكانوا الأهل في استقبالهم...
وبعد التحية والسلام ...
اسمهان:شلون كانت رحلتكم يامشاعل؟؟
مشاعل:مرة حلوة الحمدلله..في بلادنا العربية الواحد مايحس بغربة..
أم عبدالرحمن:وحشتونا مرة..الحمدلله على رجعتكم بالسلامة..
وبعد أخذ وعطا عن أخبار رحلتهم..
فتحت مشاعل شنطتها وقالت:كنتم على بالي كلكم مانسيتكم..وجبت لكم هدايا تذكارية من أسواق خان الخليلي..ان شاء الله تعجبكم..
ووزعت عليهم تحف..
أم عبدالرحمن:جزاك الله خير..تعبتوا أنفسكم يابنتي..ماله داعي هالكلفة...

مشاعل: مابين الأهل كلفة ياخالتي..هذي أشياء رمزية بس..حتى انتي ياخالة جوهرة مانسيتك..جبت لك مفرش منسوج تستخدمينه لاولدتي..
جوهرة:مشكورة حبيبتي..
مشاعل:وهذي هديتك يااسمهان..
اسمهان:الله يعطيك العافية..
مشاعل:وهدية مرام بأخليها معاي لين ترجع بالسلامة..أحلام وينها؟؟
أم عبدالرحمن:أحلام مرتبطة اليوم بأهل زوجها كلهم طلعوا المخطط..
اسمهان:ماشاء الله رجعتوا بدري توقعتكم بتطولون..
مشاعل:لا مانقدر نطول..نسيتي؟بكرة ملكة أفنان بنت أختي..
اسمهان:أدري..بس توقعت إنكم بترجعون على الزواج..والملكة مابتهتمون لها..
مشاعل:عاد إلا أفنان..ياحبي لها هالبنت..طول عمرها وهي مسيكينة وحالها بشانها..
جوهرة:بس من يوم انضمت لشلة الصاعقة خربوها شوي!!!
الجميع:هههههه
اسمهان:يوه ياخالة جوهرة..مو خلاص حِنا تبرينا من هالاسم ومشينالك صح هالسنة!
جوهرة:مو سواليف الخطبة والزواج عقلتكم كثير ليتكم مخطوبين من زمان!أما رانية ونجلاء كانوا موية من تحت تبن واسمهان تخطط من تحت لتحت وفي الظاهر البراءة تشع من عيونها!!تتذكرين ياحلوة؟؟
اسمهان:ههههه..أقسمت عليك ماتعلمين عبدالرحمن بشي..أنا معطيته فكرة إنه ماكان أحد في هدوئي وأدبي!!
جوهرة:الله يرحم!ماأنساها نظراتك يوم أصيح فيكم.. ماحد يخاف منكم إلا انتي وأفنان!!أما رانية ونجلاء مستجلدات كل وحدة تطالعني بنص عين..ومرام هي الوحيدة اللي كانت أختها ماجدة بعد كل سالفة تتصل وتعاتبني ليش إني صحت أو عاقبت أختها المدللة!!!
اسمهان:عجيييييييب!!عمرها ماقالت لنا!
==========
وبالمجلس كان عبدالمجيد قاعد مع عبدالرحمن وأهداه طقم جلدي مكتبي..كهدية تذكارية من مصر..
ودخلت أم عبدالرحمن وجوهرة وسلموا على عبدالمجيد..وقعدوا معاه وقعد يحكي لهم عن رحلته لمصر..وعبدالرحمن وأمه يترجمون للخالة جوهرة كلامه اللي كان كله بلغة الاشارة..
===============
اليوم الثاني بدأت الاستعدادات لملكة أفنان..وكانت ملكة مختصرة بالبيت..الأعمام والأخوال..والشلة(اسمهان+نجلاء+ رانية)ومرام مسافرة ومخططة ترجع قبل الزواج اللي بما إنه تأجل أسبوع فراح يكون بعد عشرة أيام..
جابت أفنان كوافيرة تضبطها بالبيت..ودي جي اسلامي..وسوت كوشة بسيطة..بس كانت هالبساطة لها مذاق خاص..وكل الشلة كانوا قاعدين معاها من أول الملكة لين جاء عريسها وخرج الكل للعشا في الحوش وخلوها معاه..

والكل استانس ببساطة هالمناسبة..والضيافة عبارة عن سبتات فيها حلويات ومعجنات...والشلة تولوا المباشرة على المعازيم
وهم قاعدين مع أفنان..
أفنان:حسافة..ودي لو كانت مرام معانا..
رانية:وش تبين فيها؟خلها بديرة البقر والخرفان تلحس زبدة وتاكل جبن!!
نجلاء:أفنان صادقة..الشلة من غير مرام ناقصة
اسمهان:مشاعل فيها البركة تسد هالنقص..
رانية:أنا أشهد ماحد يقدر يسد غياب مرام!!تقدرين يامشاعل تقلبين عيونك وتشمقين مثلها؟تقدرين تمطين شفايفك وتمشين مثل مرام؟
الشلة:ههههههههه
نجلاء:بس هالحركات حلوة من مرام بس!يعني لو تقلدينها يارانية رحتي وطي!!
رانية:أقول وخروا عني وخل الدلع بعيد بس!..يازين الوحدة تتصرف بطبيعتها..مدري وش تحس فيه الوحدة..وهي ترفع حواجبها وماحد عاجبها!!
اسمهان:عاد أشوفك مصختيها!هذي سلفتنا ومانرضى فيها!صح يامشاعل؟؟
مشاعل:أكيد..
رانية:لي نظرة في الناس ماتخيب!وبكرة تقولون رانية قالت..!مرام اختلفت هالسنة مدري ليه؟!!
نجلاء:بليز..غيروا الموضوع..ودعوا الخلق للخالق!
وشارك الجميع أفنان في فرحتها..بالرقص والغطاريف..وكانت زفتها تقليدية...وبسيطة..
ولما جاء وقت العشاء...
اسمهان:مشاعل؟وين سندس؟ودي أشوفها..
مشاعل:ماقد شفتيها قبل؟؟
اسمهان:لا..
مشاعل:زين..تعالي معاي..
ودخلوا الثنتين غرفة..وكانت سندس مسدوحة على سرير..وعمرها حول 14 سنة بنت طويلة القامة لكن مشلولة ومعاقة عقلياً وخرساء وعمياء....والممرضة الخاصة فيها جالسة على كرسي جنبها..
راحت اسمهان عندها وصارت تتأمل فيها بحزن..وقعدت على طرف السرير..حست سندس بشخص غريب جنبها وكانت تحرك أياديها بس بضعف..ومسكت وجه اسمهان وصارت تتلمسه..
مشاعل:هذي طريقتها الوحيدةعشان تميز الأشخاص الأغراب من أهلها..
قامت اسمهان صارت تبكي بانهيار!!
مشاعل:ياحبيبتي يااسمهان..لو أدري إن قلبك رهيف هاللون ماجبتك هنا..!!قومي قومي معاي واغسلي وجهك..
اسمهان:ماأبي أحد يشوفني وأنا كذا..خليني أجلس شوي..
وصارت اسمهان تتأمل بسندس وتدعي لها..
====
أما تركي لما شاف أفنان كان بــــــ عالم ثاني!!
سماح:إحم إحم!ياعريس ماودك تلبِّس عروستك الشبكة؟؟
تركي:هاه؟؟
هند:شكله مو ناوي..عطوني عطوني الشبكة بآخذها ألبَسها لزوجي!!
أم تركي:خذ ياولدي..وبالمبارك عليكم عسى التوفيق دربكم وممشاكم..
وبعد ماوقفوا جنبه وطقطقوا له شوي وسلمت عليه أم أفنان ودعت لهم بالبركة..انسحب الجميع وخلوا العرسان لحالهم..
وكانت أفنان خجلانة لأبعد مدى وحاطة عينها على الأرض..
طبعاً بعد ماأفنان كان الحيا ذابحها وتناظر الأرض..حاول تركي يخرجها من صمتها وبادرها بالكلام...
تركي: عبير؟؟
ناظرت فيه أفنان باستغراب وقالت:اسمي أفنان لو سمحت!!!
تركي:طيب وأنا اش قِلت؟
أفنان:قِلت لي عبير!
انتبه تركي انه غلط وقال:السموحة منك..أنا آسف..
أفنان:وش عليه تتأسف؟أصلاً أنا عارفة إني مهما سويت ماراح أكون بجمال عبير!!!!!!!
تركي:وش فايدة الجمال الخارجي..إن كان القلب أسود؟؟أنا مافكرت أتزوج للمرة الثانية..إلا عشان أنسى البلاوي اللي صارت لي من تحت راسها!
وماتمالكت أفنان نفسها وقامت تقطر دموعها!!
مسكها تركي بحنان ولف وجهها باتجاهه وقال:ومين قال إن عبير أحلى منك؟؟إنتي بعيني أجمل امرأة قلباً وقالباً وخجلك هو اللي مزينك وزايدك حلا!!
صار وجه مرام بلون الطماط والبندورة والكاتشاب!!
واتخذ الحوار مجرى آخر عن الآمال والأحلام والطموحات..
بعد ماانتهت رانية من العشا قامت تتلفت وتفتش عن اسمهان وتسألهم عنها..
كانت اسمهان بهالوقت مع مشاعل بغرفة سندس..وقامت تمسح دموعها وتعدل ماكياجها..
وطلعت من الغرفة باتجاه الحوش وشافتها رانية..
رانية:وين كنتي يابنت؟لي ساعة وأنا أدور عليك! لايكون إنك كنتي قاعدة مع المعاريس؟؟
اسمهان:لا ياشيخة؟وأنا شلون بأقعد معاهم؟لاتركي محرم لي ولاشي..أنا كنت مع مشاعل..
رانية:زين تكفين تكفين أبي أقِز هاللي اسمه تركي من بعيد!!!!ودي أشوف مشفوح مثل ولد عمه ولا لا؟؟؟؟؟؟؟
اسمهان:أف منك!استحي استحي يالخفيفة زواجك عقب عشر أيام..
رانية:هههههههه أمزح عليك..بس إن كانت شخصيته مثل نويصر فالله يخلف على أفنان!!
اسمهان:لا لا تركي رزين..ونويصرك ذا ماله شبيه!!
====================
مرت الأيام واقترب الزواج(زواج رانية وأفنان)..وقبل الزواج بكم يوم وصلوا مرام وعبدالرحيم من السفر..بالنهار
راحت مرام لشقتها رأساً..أما عبدالرحيم مر على أمه يسلم عليها..
ويوم فتحت له أمه الباب..قامت ترحب فيه..
أم عبدالرحمن:الله يسامحك ياولدي..ليش ماعلمتني إنكم جايين اليوم؟؟
عبدالرحيم:وليش أقلقك؟
أم عبدالرحمن:لاقلق ولاشي..على الأقل عشان نطبخ لكم لقمة حارة ونرتب بيتكم ونبخره..وبعدين وين هي عروستك؟؟
عبدالرحيم:طلعت فوق لبيتها تبي تاخذ دش وترتاح شوي..خبرك يمه السفر طويل ومتعب..
أم عبدالرحمن:أجل قدامكم ساعات لين الليل ترتاحون فيها..وأنا بأنادي خالتك جوهرة وأحلام واسمهان وأم مشاعل وأم مرام وأم اسمهان على العشاء عندنا..وعبدالرحمن يعزم الرجال..
عبدالرحيم:يمه وليه التكاليف هذي؟مالها داعي..
أم عبدالرحمن:أقول ياما أشينكم عيال هالوقت!ماتحبون الجَمعات واللمَّات..ياولدي جنة من غير ناس ماتنداس!يازين الفرح بوجود الأهل والأحباب وحتى حريمكم بينبسطون بشوفة أهاليهم..
وقام عبدالرحيم يسولف مع أمه وياخذ ويعطي..
وبعد السوالف...
أم عبدالرحمن: وش جبتوا لنا معاكم من السفر؟
عبدالرحيم:يكفي إننا جبنا أنفسنا لكم و جينا!!!
أم عبدالرحمن:ههههه أكيد ياولدي رَجْعتكم لنا بالسلامة أحلى هدية..بس ظنيت إننا ببالكم مثل عبدالمجيد وزوجته..ماقصروا تذكرونا وجابوا لنا هدايا!!!
عبدالرحيم:أووووهووو !بدينا بالمقارنات ياأم عبدالرحمن؟؟على العموم حِنا مانسيناكم..مرام جابت لك خوش هدية!
وبعدها تبادلوا بعض المواضيع وطلع عبدالرحيم لمرام وقال لها بالسالفة!
مرام:يووووه يالفشيلة عاد أنا ماجبت لأحد منهم شي!
عبدالرحيم:وكل هذيك المشتريات اللي خذيتيها وينها؟
مرام:هذيك شريتها لنفسي ولأهلي ياحبيبي..الصراحة أهلك ماخطروا ببالي...
عبدالرحيم:لاااااا انتي كذا بتحرجينا..طلعي أي شي من مشترياتك واهديه لأمي على الأقل..
مرام:أمك بس!البقية مالي شغل فيهم..
========
وبالليل تقابل الجميع على العشا وتحمدوا لمرام رجعتها بالسلامة...وكانوا باقي الضيوف لسه ماحضروا..مافي إلا اسمهان وأحلام ومشاعل ومرام..
اسمهان:وحشتينا يامرام ملكة أفنان ماكان ناقصها إلا وجودك..
مرام:اسكتي بس.. ماكان ودي أرجع!صراحة الأجواء خيالية هناك..
أحلام:يقول عبدالرحيم إنكم صورتوا المناظرالطبيعية اللي شفتوها..؟
مرام:ايه ذكرتيني!جبت معاي الألبوم عشان أوريكم اياه..
وفتحت مرام شنطتها وطلَّعت لهم ألبوم صغير فيه صور الرحلة....
لاحظت مشاعل انه كل الصور اللي مرام متصورة فيها كانت كاشفة وجهها ولابسة طرحة على راسها بس وبناطيل وبلايز !!
اسمهان:مرام؟إنتي فسختي عباتك يوم رحتي هناك؟ولا بس في الصور؟؟
مرام:ايه فسختها..ليش؟انتم لاسافرتوا برة تتغطون؟؟
أحلام:الحمدلله عشت سنين بأمريكا وأنا محافظة على حجابي الشرعي الكامل..وماضرني شي..
مشاعل:أنا أول مرة أسافر لبرة يوم رحت لمصر..والحمدلله ماخلعت عباتي..
مرام:وليش؟إنتي عروس وتبين تنبسطين!!
اسمهان:والانبساط مايجي إلا بخلع الحجاب؟ترى يامرمر الحجاب عبادة مو عادة!!
مشاعل:وترى الله واحد..ويحاسبك ببلدك أو ببلد غيرك!
مرام:وبالله من جدكم انتوا أروح لبلاد الغرب وأنا متغطية..
أحلام:واش فيها ياقلبي؟الحجاب ماعاد صار غريب عنهم..وغير كذا إذا ماتحبين تلفتين انتباههم للون الأسود كنتي تقدرين تلبسين أي لون ثاني..
مشاعل:من غير زعل يامرام..بالنسبة لي السفر اللي يخليني أفرط بشي من ديني..الله يغنيني عنه!!!
كتمت مرام غيظها وسكتت ولما جوا أهلها..قعدت تفرِج أختها ماجدة على صورها..
ماجدة:واااو الصور تحفة..
مرام(بصوت هامس):تصدقين هالمهابيل ماعجبهم لبسي؟حشا تقولين كفرت؟؟
ماجدة:وش عليك منهم؟كل ناس لهم نظرة!ومادام زوجك راضي فماعليك من أحد!!!!!!
مرام:ياحبيبتي..أنا دارية انه المسألة مو دين ولاشي..إلا الغيرة بتاكل قلوبهم..وخصوصاً انه زوجي مدلعني ومخليني على كيفي!!!!!!!!!!
===========
ملحوظة للفائدة:
رضا الله وطاعته مقدم على رضا وطاعة الزوج!!
ولاطاعة لمخلوق في معصية الخالق..فكم من النساء تنمص وتوصل لارضاء زوجها!!ضاربة بـ رضا الرحمن عرض الحائط!!!
اتصلت رانية على أفنان قبل الزواج بكم يوم..
وبعد التحية والسلام والسؤال عن الأحوال...
رانية:بشري ياعروس؟خططتي للزفة شلون بتكون؟
أفنان:الصراحة؟.....لا!!
رانية:يابرودك!!مابقي إلا كم يوم بس!!
أفنان:عارفة..بس أحس إني ماتهمني هالشغلات كثير!أهم شي يمر يوم الزواج على خير..
رانية:أفا!!يعني ليش إنه هالزواج الثاني..مابتهتمين؟؟
أفنان:بسم الله علي!أي زواج ثاني؟؟هذا زواجي الأول!
رانية:يالخبلة أقصد بالنسبة لتركي!
أفنان:عاد لاتذكريني تكفين!يكفي إنه يغلط فيني ويناديني عبير!!!
رانية:هههههههههه..عاد لاأوصيك..تكفين انفشي كعشتك مثل عبير بتطلعين تحفة!! وهو شلونه معك؟يكلمك؟؟
أفنان:كلمني مرتين على تلفون البيت لأنه ماعندي جوال!
رانية:بيني وبينك أحسن لك!أنا ونصُور مااستفدنا من المكالمات غير عوار القلب والراس!كل دقيقة نتناقر ونتهاوش!!!!
أفنان:يوه!مسرعكم..وش خليتوا للمستقبل؟!
رانية:لا ياحبيبتي...ليش إني باقي في بيت أهلي قاعدة أفوت له كثير شغلات!!لكن لاصرت ببيته بأروضه على مزاجي الخاص!!المهم..تراني متصلة عشان أتفق معاك على حركة نسويها في الزفة!!
أفنان:الله يستر من أفكارك!!هاتي ماعندك!
وبدأت رانية تقول لأفنان فكرتها..
=====================
في بيت أم عبدالرحمن..كانت الأحداث روتينية..
مرام كل دقيقة والثانية وهي طالعة تتمشى مع عبدالرحيم..
واسمهان يامشغولة بأي شي في بيتها..ياتروح زيارات للبعض إذا فضي لها عبدالرحمن!
أما مشاعل كانت كل مافكرت تطلع مكان تمر على أم عبدالرحمن تسلم عليها وتقعد معاها شوي..
أم عبدالرحمن:الله يعطيك العافية يابنتي ماتنسيني أبد..بس لاتحسبيني أنقِد عليكم لو مامريتوني..ترى أنا أحب أخلي كل واحد براحته في هالبيت أهم شي يكون الكل مبسوط وراضي..
مشاعل:والله من غلاتك ياخالتي أحب أزورك وأتطمن عليك..إنتي بمعزة أمي الله يحفظها..
وودعوا مشاعل وعبدالمجيد أم عبدالرحمن وخرجوا بمشوار...
أم عبدالرحمن(بينها وبين نفسها):الحمدلله ..ربي عوض صبرك خير ياعبدالمجيد..وعطاك بنت الحلال اللي تستاهلك..
=================
والليلة السابقة للزواج كانت أم أفنان قاعدة مع بنتها..
أم أفنان:ليش ياأفنان قلقانة ومتوترة وماكأنك عروس؟في شي مضايقك؟؟
أفنان:يمه..مدري شلون بأفارقكم؟قلبي متعلق فيكم!
وراحت تقطر عيونها دموع!!!!!!
أم أفنان:ههههه ياحبيبتي هذي سنة الحياة..وبعدين انتي وين بتروحين عننا يعني؟؟بتسكنين في نفس الديرة..وترى هذي نعمة ماحصلها غيرك...كثير من البنات يتزوجون ويبعدون عن أهاليهم ويتغربون..وهذا هم عايشين ومبسوطين..
أفنان:بس يمه سندس تعلقت فيها حيل.. ماأتخيل شلون بأبعد عنها..دقيقة!
أم أفنان:انتي لاتفكرين إلا بنفسك..أختك وعندها من يداريها وأنا بعد مابأقصر عليها..ولا يعني بتحبين بنتي أكثر مني؟؟؟وبعدين تركي وأهله ناس طيبين ومانسمع عنهم إلا كل خير..بإذن الله تتوفقين معاه..
أفنان:مدري...أحس أوقات إنه ماراح يحبني أو يهتم فيني..لأنه سبق له الزواج بغيري..وهالشي يقهرني!
أم أفنان:وهو الزواج السابق له تسمينه زواج؟؟؟انتي أدرى بالقصة يابنتي..ماعاش مع بنت الناس إلا كم يوم وعافها..ولو كان قلبه معلق فيها ماكان طلقها..المهم انتي لاتشغلين بالك وتفكرين كثير..
وبعدين طول عمرك كنتي بنت عاقلة ومطيعة..وهذا اللي أتمنى تمشين عليه مع زوجك..ودايماً خلي لسانك حلو معاه...صدقيني الكلمة الطيبة تسحر وتملك القلوب..وخذيها مني نصيحة طاعة ربك ورضاه أهم شي بهالدنيا..ولاتفرطين بدينك عشان الدنيا..خليك بعين زوجك الانسانة الصالحة الطاهرة صدقيني بتكبرين في عينه..الرَجَّال حتى لو كان من أفسق الناس يهمه إن زوجته تكون انسانة تخاف الله..
واستمرت الوصايا والنصايح...لين ماغلب أفنان النوم
=============
ببيت رانية...كانت رانية حاطة ماسك(قناع)كريمي على وجهها وقاعدة تمشي بالبيت...
شافها أخوها مشاري وقال:بسم الله علينا!شوف وجه العنز وإحلب لبن!!!!
رانية:من زينك ياالدب؟اش فهمك انت بهاالأشياء؟
مشاري:بكرة الفكة بكرة!!أنا أدري إنك بتعيشين بكرة حياة تتمنين معها لو ترجعين بيت أبوك وتصطبحين بوجهي!!!
رانية:بلا يبلاك..فاول خير..
أم رانية:تعالي يارانية..
وأقبلت رانية:خير يمه..
أم رانية:صكي الباب ماأبي مشاري يسمع!
رانية:يوووه..أكيد السالفة خطيرة؟!!!!
أم رانية بارتباك:شوفي... أنا موب عارفة من وين أبدأ..بس مثل ماتعرفين يابنتي..بكرة بتكون أول ليلة لك مع عريسك..
رانية:وعساها ماتكون الأخيرة..اللي بعده اللي بعده!
أم رانية:وفيه شي اسمه ليلة الدخلة...و...و
رانية:يمه وفري على نفسك هالمعلومات..الله يخلي المنتديات الزوجية بالنت..علمت الواحد أحسن من المدارس!!إلا انتي لو مو فاهمة شي بهاالأمور لاتستحين ..اسأليني وأنا أجاوبك!!!!!!!!
أم رانية:قطيعة تقطعك ياهالبنت!!مافي شي إلا وتعرفينه؟وأنا اللي حزنانة عليك وأقول قطوة مغمضة!!!!!ضفي ضفي وجهك عني هالساعة واطلعي برة!!
فتحت رانية الباب وطلعت..ولقيت أخوها مشاري واقف عند الباب يتسمع!!!
مشاري:حسبي الله على إبليسك!!ليه ماخليتي أمي تتكلم؟كان استفدنا لنا معلومتين على الطاير!!!
رانية:قاعد تتصنت علينا؟؟؟هيا إنطم لاتسمع كلامك وتطَّير راسك من على رقبتك!!!!

=======================

أقبل يوم عرس (رانية وأفنان)..وتجهز الجميع وازدحمت القاعة بالحضور..بأهل تركي وأقاربه وأهل ناصر كلهم أخوانه وعيالهم وعيال عيالهم وأصحاب تركي وناصر وزوجاتهم..
ووصلوا العروستين وأهاليهم...وكل وحدة منهم بغرفة
وراحت رانية لغرفة أفنان تسلم عليها...
رانية:مبروك يافنونة..طالعة قمر بسم الله عليك..
أفنان:الله يبارك فيك..حتى إنتي ماشاء الله تجننين..
رانية:بالله اش مشاعرك؟أنا ريقي بدأ ينشف من القلق!
أفنان:وأنا قلبي ينبض بقوة حاسة بخوف مو طبيعي..ياربي مدري شلون بأقابل تركي وأنا بهالحالة
في بيت أم عبدالرحمن...اقترح عبدالرحمن على أمه واسمهان يجون مع عبدالرحيم بسيارته لأنه بيروح بدري ويوقف مع تركي وناصر...
أما مشاعل وعبدالمجيد راحوا قبل الجميع لأن مشاعل تبي توقف مع أختها أم أفنان..
وبالفعل استعدوا أم عبدالرحمن واسمهان للركوب مع عبدالرحيم ونزلت مرام من فوق وسلمت عليهم..وكانت لابسة عباتها عباية سوداء وفيها رسمة كبيــــــــــــــرة من الخلف على شكل طاووس أزرق ومطرزبالخيوط الملونة والفصوص البرَّاقة!!والطرحة نفس الشي...
استغربت أم عبدالرحمن من هالتبرج الواضح وخاصة إن شروط الحجاب الشرعي ماتخفى على أحد!!
وحبَّت توضح لمرام هالشي من غير ماتضايقها..وقالت:ماشاء الله يامرام عباتك هذي تحتاج لعباة ثانية فوقها!!!
مرام:ليش؟أنا رايحة عرس..من الطبيعي تكون عباتي مزركشة!!
أم عبدالرحمن:بس يابنتي العرس نلبس فيه فساتين عرس,,وبعدين نفسخ العباة بداخل القصر..يعني الناس ماعليهم من عباتك وماحد بيشوفك فيها..مابيشوفك فيها إلا الرجال اللي واقفين برة قدام القاعة!
كتمت مرام غيظها وماردت..ووصلوا لباب السيارة وقامت مرام فتحت الباب الأمامي وجلست جنب زوجها..!!من غير ماتحترم الشخص الأكبر سناً اللي هي أم عبدالرحمن وتِعرض عليها هي الجلوس قدام!
طبعاً اسمهان كانت حاضرة الموقف واستغربت من تصرفات مرام وسكتت!
ركبت اسمهان وأم عبدالرحمن ورا,,,
عبدالرحيم:شلونك يمه؟؟
أم عبدالرحمن:بخير الحمدلله..
عبدالرحيم:كيف الحال يازوجة أخوي؟
اسمهان:الحمدلله..
عبدالرحيم:يمه؟خالتي جوهرة معزومة على العرس؟
أم عبدالرحمن:ايه معزومة..حتى أختك أحلام..بس بيجون مع أزواجهم..
وقام عبدالرحيم ينكِت ويمزح في السيارة مع زوجته ولاكأنه في ناس راكبين معاهم!!
وصلوا القصر ونزلوا راح عبدالرحيم لقاعة الرجال والحريم راحوا لقاعة النساء..
وقفوا اسمهان ومرام قدام المراية في المدخل يتضبطون....وأم عبدالرحمن دخلت قبلهم لداخل..وكانت مرام كاشخة ومتضبطة بصالون أختها تسريحة وماكياج..
مرام:هذي أم عبدالرحمن اللي تقولين طيبة يااسمهان؟شفتي شلون بغت تاكلني بعيونها يوم شافت عباتي؟؟؟
اسمهان:من غير زعل؟معاها حق!عباتك ملفتة للنظر مرة كأنها فستان سهرة..مدري شلون شريتيها!
مرام:أشوف صفيتي ضدي؟زين لو شاطرة..روحي اشتري مثلها!!تراها مكلفتني الشي الفلاني!!
اسمهان:بصراحة ماعندي جراءة أبداً ألبس مثلها وأنا أدري انه حرام!وبعدين لي عتب عليك..شلون تركبين قدام بسرعة من غير ماتعرضين على أم عبدالرحمن تركب هي الأول؟؟؟
مرام:ليييييييييه؟حتى في هذي بأشاورها؟أما أمركم عجيب!
اسمهان:مافيها شي.. من باب الاحترام والتوقير للكبير إنك تعرضين عليه يركب قدام ولاتنسين انها أمه..مع إني أعرف خالتي كثير مرات ماترضى تركب قدام لاطلعنا أنا وهي مع عبدالرحمن..
مرام:الصراحة..المثاليات الزايدة مالها داعي..أنا أشوف أحق وحدة المفروض تركب جنب زوجها هي الزوجة!!أما الأم خلاص..شبعت في ولدها طول السنين الماضية!!!
وتوجهوا مرام واسمهان لباب القاعة الداخلي وكانوا أهل تركي وناصر واقفين يستقبلون الزوار ويرحبون بالبخور والغطاريف...
لما دخلت اسمهان القاعة كانوا أمها وأخواتها مجتمعين على طاولة..سلمت عليهم اسمهان وكانت معاها مرام..وانتبهت اسمهان إنه سمهونة الصغيرة بنت محمد وسماح في العربية جنبهم وشالتها بشوق وقامت تسلم عليها..
اسمهان:شوفي يامرام هذي بنت أخوي وسميَّتي...
مرام:ماشاء الله تهبل..الله يرزقني ويرزقك بنات حلوات مثلها..
اسمهان:آمين يامرام آمين..ماتتصورين وش كثر أنا ملهوفة على طفل أضمه..
مرام:أما أنا أفكر أحمل بعد سنة..
وقعدوا مرام واسمهان على نفس طاولة أهلها يسولفون ويضحكون..
وآثاري نجلاء وصلت وماانتبهت لهم فراحت رأساً على غرفة رانية تبارك لها..
وكانت رانية واقفة قدام المصورة تتصور..وكل ماجات المصورة تلقط صورة ..
صاحت فيها رانية:هيييه اصبري..أبي أسوي حركات على كيفي!!ايه صوريني كذا وأنا عيوني فوق!!لا لا صوريني وأنا أناظر تحت نظرات رومانسية!!
المصورة:لاحول ولاقوة إلا بالله أصورك فوق ولا تحت؟!
رانية:وإنتي اشفيك زعلانة؟هو زواجي ولا زواجك؟؟
المصورة:وهي عدستي ولا عدستك؟؟
رانية:والفلوس اللي بأدفعهم لك..فلوسي ولا فلوسك؟؟
ودخلت نجلاء..وهم يتهاوشون..
المصورة:كمان بالمرة منتي معقولة يامدام رانية لكي ساعة وإنتي كل شوية تقولي أبغى دا وماأبغى دا..أنا عارفة شغلي كويس ماأحتاج أحد يشرح لي...
رانية:خلاص..مادام تعرفين شغلك..فأكيد بعد تعرفين مكان الباب..افتحيه واطلعي منه..!!
وزعلت المصورة ولمت أغراضها وخرجت..
نجلاء:ليش كذا يارنون؟الحين شلون بتتصورين؟؟
رانية:ماعليك..بأسحب مصورة أفنان وأجيبها تصورني!
نجلاء:أنا توي جاية من غرفة أفنان لاجابت مصورة ولايحزنون!!!
رانية:إيه صح!!ياذي الفشلة!!لحظة لحظة نجول!!
وفتحت رانية الباب وقامت تلحق ورا المصورة..
رانية:مدام دينا مدام دينا..صبر ياشيخة صبر...وين بتروحين؟ ترى تصويرك يهبل!!
المصورة:شوفي إزا تبغيني أصورك فـ بليز من غير تدخلات..ماأحب أحد يلخبط شغلي
رانية:خلاص ماأبي أتدخل..بس تكفين أبي أطلع حلوة وبيضاء وألِق مثل النجفة!!
المصورة:لاتشيلي هم ياقلبي..الله يخلي لنا الفوتوشوب!
ورجعوا للغرفة وقامت المصورة ترتب أغراضها من جديد..ورانية ونجلاء يسولفون..
وفجأة قامت نجلاء تحضن رانية ودموعها أربع أربع!!
رانية:وشفيك؟وش بلاك؟تبكين بعرسي ياللي ماتستحين؟؟
نجلاء:ماني متخيلة كيف كلكم تزوجتوا وبنبعد عن بعض وبأصير وحيدة!!
رانية:وجع!قولي ماشاء الله..لاتطقينا بعين..عاد نويصر على طريف.. ينتظر شي يصير عشان يقطني ورا ظهره!!!وبعدين وش الجديد؟مو انتي دارية من زمان إننا مخطوبات وبنتزوج؟
نجلاء:أدري..بس بجد راح ننحرم من أيام المدرسة وذكرياتنا الحلوة..دليني وين كنا نقدر نتقابل يومياً بمكان غير المدرسة؟؟
رانية:صدقتي..بس هذا حال الدنيا..لكن ماعليك بنتقابل بالكلية ان شاء الله..
ودخلوا بهاللحظة مرام واسمهان..
وقاموا يسلمون على بعض...
وقامت رانية تحضنهم بقوة..
ويوم وصلت لمرام..
مرام:لا لا مكياجي بيخرب!!
رانية:تكفين يالناعمة هذا أنا عروس ماخفت على مكياجي..تكفون نادوا أفنان خلونا نفرح بهاللحظات الحلوة..
راحت اسمهان تناديها من الغرفة المقابلة وجات هي ومشاعل..
وسلموا على بعض..وتبادلوا التعليقات على مناظرهم وأشكالهم...
وبعدين نزلوا مرام واسمهان ومشاعل ونجلاء..وقعدوا على طاولة وحدة...
وكانت الطقطقة تعم الأجواء..
والحريم يتنافسون على منصة الرقص..تقولون حَلَبة سباق!!
ومرت أجواء العرس في كلام وسلام..وكل أقارب العروستين والعريسين مجتمعين..
=====
بقاعة الرِجال...كان تركي وعبدالرحمن واقفين يسولفون مع بعض..
تركي:تكفى ياعبدالرحمن اشغل ناصر شوي لين ماأنتهي من مهمتي!!
عبدالرحمن:أي مهمة؟
تركي:جبت معاي بودرة يسمونها بودرة العفريت من محل ألعاب مقالب وودي أرش على ناصر شوي منها من غير مايلاحظ!!
عبدالرحمن:وأنا اللي أقول عليك عاقل؟طلعت أمصخ منه؟
تركي:ومين قال لك إني أحب هالحركات؟ بس ناصر ولد عمي وأعرفه..وماأستبعد يوم بأطلع من هنا وأروح مع عروستي ألقاه مفسفس لي الكفرات!ولا مسوي لي حركات من إياها!لذا فالاحتياط واجب!عاد لاتصعبها علي!
عبدالرحمن:معليش..أنا أقول ماانتم بصغار على هالحركات وآسف مابأساعدك..
تركي:الصراحة أنا ناوي على الشر ناوي..
وراح تركي نادى واحد من عيال اخوان ناصر واتفق معاه يلعبون على ناصر ويقنعونه ان ثيابه فيها شي!!
وجاء هاالشاب وسحب ناصر على جنب..وقال:عمي ناصر عمي ناصر..فشلتنا يابن الحلال في شي يتحرك بداخل ثوبك وانت ماتدري!!
ناصر:أعوذ بالله وشهو؟
تركي:إنت اخلع البشت وبيبان وشهو..
خلع ناصر البشت وقاموا ينفضون ثوبه وخلوه يفتح الياقة اللي حول الرقبة كأنهم يفتشون عن حشرة وتركي يرش من البودرة وناصر ولاهو حاس بشي..وتركي يرش بين جلد ناصر وفلينته الداخليه وناصر ولاهو داري عن اللي صاير..!!!!!!
تركي:هيا احمد ربك طلعت من ملابسك زهيوي(صرصار) هالكبر!قاعد يتمشى ويصيف بين ثيابك!
وعقب ثواني قام ناصر يتحكك ويهرش جسمه بطريقة تفشل لين اضطر يروح الحمام مخصوص ويهرش براحته مخافة نظرات الناس!!
===============
وحانت لحظة الزفة..
دخلوا 3 أولاد صغار لابسين ثياب وأشمغة ودقلة ومعاهم سيوف..و3 بنات صغار لابسات ثياب خليجية وفاردات شعورهم...وقفوا الأولاد الثلاثة جنب بعض في طرف المسيرة ومقابلهم ال3 بنات وطقت لهم الطقاقة وقاموا البنات يرقصون بشعورهم والأولاد يؤدون العرضة السعودية بالسيوف..
وانطفأت الأضواء وتوجهت الإضاءة للسقف..وتوقف الطق والرقص وبدأ صوت مؤثرات بشرية حالمة ورياح..ونزل من السقف مرجيحة واقف عليها العروستين(أفنان ورانية)وهم يلوحون للمعازيم وسط الهتافات اللي تعالت...وبدأ مرش الورد والفقاعات من حولهم وأبيات شعر في شريط تنقال بأسماء العروستين...
لين نزلوا الأرض وهم ماسكين أيادي بعض وماهم شايلين باقات ورد ولاشي..وبدأوا يمشون بهدوء على المنصة..وبدأ الطق والأطفال يرقصون..
شافتهم وحدة من المعازيم وقالت:يازينهم..بناتي الثنتين تزوجوا بليلة وحدة وتعالوا شوفوا الغيرة بينهم!بس هذول ماشاء الله مايقربون لبعض ورضوا ينزفون سوى!عالم عجيب!!!!!!
طبعاً الزفة كانت مفاجئة للجميع لأنه ماحد توقع إن العروستين بينزفون مع بعضهم..
اسمهان:يارب يسعدهم يهبلون وهم يمشون مع بعض..
مشاعل:الله يسعدهم على هالفكرة فاتتنا يامرام ليتنا سويناها بزواجنا..
مرام:ولا فاتتنا ولاشي..أكيد هذي أفكار رانية!طول عمرها راعية خرابيط..بالله اش بتستفيد من هالحركة؟مابتكسب من الناس إلا المقارنات بينها وبين أفنان!!لا وبعد مسوية اختراع ومو شايلة بيدها شي..
التفتوا اسمهان ومشاعل وطالعوا في مرام باستغراب..
مرام:وشفيها الصراحة؟ صايرة تِزَّعل هاليومين؟؟
ورانية وأفنان يمشون بوسط المسيرة..قاموا العاملات بالقصر جابوا لهم تورتة كبيرة..قطعوها رانية وأفنان وأعطوا كل طفل قطعة بفمه ونزلوا الأطفال من المسيرة بالترتيب..
وحول التورتة فيه حلويات مغلفة قاموا العروستين ينثرونها على الحضور..وماقصروا بزورة الناس يلقطون الحلاوة تقولون عيد!!!!
و****لت التورتة من قدامهم وكملوا المشي إلى أن وصلوا للكوشة..وتوافدوا عليهم الأهل والأحباب يسلمون ويباركون..
ومرت أحداث الزواج بشكل اعتيادي..ولما جاء موعد العشا..كل وحدة من العروستين ودعت أهلها وراحت لعريسها..
ركبت أفنان مع تركي..وراحوا للفندق..
أما رانية ركبت مع ناصر وأخذها في طريق غريب شوي!!
رانية(بقلق):على وين بتاخذني؟
ناصر:بمكان بعيد ياحلوة أنا وإنتي بس والشيطان مو ثالثنا!!!
رانية:لا بجد أسألك..اللي أعرفه إنه مافي فنادق حول هالمنطقة..لايكون بتوديني شقة مفروشة؟؟ترى أتقرف!!
ناصر:وليش نروح لفندق ونضَيِق على أنفسنا والله موسعها علينا؟عندنا بيت يسرح فيه الخيل وانتي تقولين فندق؟؟
رانية:اييييييييش؟تبي توديني البيت من أول ليلة؟؟
ناصر:ايه..اش المشكلة؟غيرك ماعنده ربع بيت..وانتي متكبرة لاتروحين بيتك؟
رانية:مالي شغل..أبي أروح فندق! ومعاي شنطتي مجهزة فيها أغراض الفندق..والبيت وملحوق عليه وبنعيش فيه على طول لين مانمل منه.
ناصر:خلاص أجل..مادام مصرة على روحة الفندق..بأوديك فندق وأنا بأرجع لبيتنا أنام فيه..!!!!
رانية:يامصاختك..زين اليوم بأمشيها لك ونروح البيت بس بكرة لازم نروح لفندق فاهم؟؟
ناصر:كله منك ياحلوة..حرمتيني من المكالمات أسبوع قبل الزواج قال إيش عشان تظل على شوق.وآثاريك تخططين ولاتعلميني ياأم شوق!!!
رانية:وش دراني عنك؟أحسِب إنك تفهم في الاتيكيت شوي وبتحجز لي في أي فندق..
ورجع لناصر الهرش من جديد وصار ماسك نفسه وهو يسوق وكل شوي يتهزز بالمقعدة يمين وشمال..
ورانية تفكر بنفسها وتقول:شكله هالرجال مو طبيعي!يا حشران وماسك نفسه..يا مختل عقلياً!!
الله يعينك يارانية!!!
=====
وبس دخلوا للحي اللي يسكنون فيه..
قالت رانية:هو هذا بيتنا؟؟
ناصر:ايه..بس ماعليك من شكله من برة..تراه حلو من الداخل..
رانية(بداخلها):الله يسامحك يايمه..ليش ماعلمتيني يوم جيتي ترتبين عفشي إني ساكنة بـ عِشة؟!!!
ودخلت رانية تتفرج في البيت بدهشة وتدخل للغرف...
ناصر:وشفيك تناظرين البيت كذا؟كأنك سايح أوروبي ببلد عربي؟؟
رانية:معقول هذا بيتنا؟؟
ناصر:ايه..ليش مو عاجبك؟قولي الصراحة اش رايك فيه؟؟
رانية:الصراحة الصراحة..خسارة هالأثاث الحلو في هالبيت القديم!!
قام ناصر يتحكك ويحك رقبته وظهره..ورانية تراقبه..وناصر مو قادر يسيطر على نفسه..
رانية(تصرخ):وشفيك يامجنون؟
ناصر:مدري أحس إني مو طبيعي وجلدي يحكني..
رانية:إنت يا جربان!!يا مدمن وحدة من الثنتين!اعترف أحسن لك؟!!!
ناصر:وش هالكلام يابنت الناس؟اتقي ربك..
رانية(وهي تبكي):وخر عني!لو لمست فيني شعرة بأسوي لك فضيحة وأجمع الناس عليك..
ودخلت غرفة وقفلت الباب على نفسها...وصارت مو عارفة كيف تتصرف..
خافت تتصل على أهلها وتسير مشكلة كبيرة..وأول من خطر على بالها اسمهان!!
اتصلت فيها وهي تبكي..وكانت اسمهان قد رجعت بيتها وتوها تدخل وعباتها لسه فوقها وعبدالرحمن واقف جنبها..
اسمهان:رانية؟؟اشفيك حبيبتي؟ليش تبكين؟اش اللي حصل؟
رانية:الحقي علي يااسمهان ناصر النذل طلع مدمن!!
اسمهان:ايش؟ناصر مدمن؟مو معقول..
رانية:أقول لك طايح قدامي تحكك وهرش وجسمه أحمر تقولين منقوع بشطة!!مدري مدري كيف أسوي انقذيني قربت أتجنن!
اسمهان:لحظة لحظة..خل أقول لزوجي..
وقامت اسمهان تقول السالفة لعبدالرحمن اللي تشقق من الضحك!!!!
حطت اسمهان يدها على السماعة وقالت:حرام عليك البنت منهارة وانت تضحك؟؟
عبدالرحمن:طمنيها طمنيها السالفة ومافيها إن تركي رش على ناصر بودرة عفريت!
وقامت اسمهان وحكت لها السالفة..
رانية:انتم تستهبلون؟ولا من جدكم؟
اسمهان:يابنت الحلال أكيد لو خلع ملابسه بتلاحظين آثار البودرة عليها!!
تطمنت رانية وبغت تتأكد..وفتحت الباب..وناصر منسدح بالصالة يتحكك..
رانية:قوم اخلع ملابسك!!!!!
فتح ناصر فمه وقال:هاه؟؟
رانية:قِلت قوم اخلع ملابسك..إيش ماتفهم عربي؟؟
ناصر:لا فهمت..بس هل إنتي طبيعية؟؟؟؟؟
رانية:لاااا سلامات..عاد إنت اللي طبيعي وإنت كأنك صرصور مرشوش فليت!!قوم اخلع ملابسك خلني أتطمن!!!!!!
ناصر(باستغراب شديد):على ايش تتطمنين؟أقسم بالله إني رجَّال من ظهر رجَّال!!!!
رانية:أدري إنك رجال وشلون أخذتك أجل؟؟أبي أتأكد ملابسك فيها بودرة ولا لا؟؟؟
ناصر:صدق إنك ماتخافين الله!أي بودرة؟وأي خرابيط؟على بالك أنا مدمن؟
رانية:لا ياحبيبي..يقول المثل (من استخف بالناس استخفوا به)!ومن البلاوي اللي تسويها بتركي رد لك الصاع صاعين ورش عليك بودرة العفريت حقت التحكك والهرش!!
قام ناصر يسترجع الأحداث..وقال:شوفوا النذل؟يمين ماأعديها له!!!
رانية:عاد كفاية مقالب عاد..مدري وش هالموضة اللي مطلعينها الشباب هاليومين؟حتى عبدالرحمن زوج صديقتي يوم تزوج صاحبه اللي مايستحي سوى فيه مقلب وخلى الحلاق يحلق شنبه!!من جد صديق مايستحي الله لايوفقه!!
عرف ناصر نفسه إنه راعي مقلب عبدالرحمن وقام يتنحنح ويقول:لاتدعين على عيال الناس!
رانية:روح خذ لك دش تكفى!منظرك جاب لي العصبي وصار ودي أهرُش!!!
ناصر:المشكلة البودرة كلها بظهري..شلون بأدعكه لحالي؟!!!!
رانية(بسخرية):لاااااا قطعت قلبي ياعين أمك..من اللي كان يدعك ظهرك وإنت عزوبي؟
ناصر:ماحد..كنت أتحكك بالجدار لين ينظف!!
زهقت رانية من كلامه ودخلت غرفتها تبدل هدومها!!
وبعد دقايق وناصر يتحمم..اتصلت اسمهان على رانية..
اسمهان:رنون؟طمنيني اش صار معك؟
رانية:الحمدلله ماشية الأمور...الباشا طلع براءة!
اسمهان:أشوى..ترى من لهفتي عليك دقيت..ولا عبدالرحمن مو موافقني على الاتصال يقول عيب الوقت متأخر..عموماً تصبحين على خير..
رانية:وإنتي من أهل الخير..
طلع ناصر من الحمام وهو منتعش..
وراح لرانية اللي قاعدة تنتظره بغرفة النوم..
ناصر:أنا ميت جوع ياترى إنتي مثلي؟؟
رانية:أنا من الظهر عند الكوافيرة وماذقت شي!
ناصر:مدري اشفيه ياسر تأخر علي..وأنا موصيه يلحقني بالعشا..
رانية:بس الوقت متأخر مافي مطاعم مفتوحة هالحزة!!
ناصر:لا أنا وصيته يلَقِط لنا من عشا البوفيه اللي عند النسوان..بس شكل القاعة باقي فيها نسوان وماعرف يتصرف!!!
رانية:ناصر؟تبيني آكل من فضلة المعازيم؟ليش؟مافي عشا خاص بالعرسان؟
ناصر:ليش؟تحسبين نفسك قاعدة بفندق؟
وفي الفندق كانوا تركي وأفنان في قمة سعادتهم وتركي يحكي لها عن نفسه وذكرياته وهي تسمعه بشغف..
تركي: هاليومين أهلي بيسوون عزيمة لنا وبعد 3 أيام رحلتنا..
أفنان:رحلتنا على وين؟
تركي:خليها مفاجأة!!
وقام تركي يسولف لها عن مقالب ناصر فيه...وذكر لها موقف البودرة..
أفنان:هههههه حرام عليك..شلون بيكون شكله قدام زوجته؟
تركي:خليه يقعد يتحكك قدامها كأنه شمبانزي لين يتوب!!
============
اليوم الثاني..أهل تركي وأهل ناصر حجزوا استراحة وعزموا فيها العرسان وبعض الأصدقاء على العشا..
وعزموا أهل عبدالرحمن..وكانوا كلهم مجتمعين ببيت أم عبدالرحمن على الغداء..
أم عبدالرحمن:روحوا انتم.. أنا وجوهرة متواعدين نزور بنت خالتي اليوم..
مشاعل:عاد أنا لازم أروح ودي أقابل أفنان وأشوف اش علومها وأكيد أهلي كلهم جايين..
اسمهان:وأنا بعد نفسي أقابل رانية وأشوف اش صار عليها عقب سالفة أمس...وأقابل أفنان..
مرام:أنا ماأبي أروح! خاطري أطلع أتمشى..إلا واشفيها رانية؟؟
قامت اسمهان حكت لهم عن اللي صار..وهم يضحكون...
مشاعل:لا لا مو معقول..ماتوقعت إن تركي راعي حركات..الله يعين أفنان..
اسمهان:لاهو راعي حركات ولاشي..بس من زود ماجاه من ناصر..لين الحين عبدالرحمن قد حكالي أكثر من عشرين موقف من مواقفهم ومقالب ناصر فيه!!
مرام:هههههه بيني وبينكم رانية تستاهل..هي هبلة وجاها اللي أهبل منها!!!
اسمهان(بغيظ):مو كانت هبالتها تعجبك زمان وماتسمينها هبالة تسمينها خفة دم؟!!
انحرجت مرام وسكتت..
=============
وبالليل تقابلوا العرايس مع اسمهان وقعدوا على جنب..
مشاعل:شلونك فنونة؟كيف ليلتك أمس؟؟
أفنان:حلوة الحمدلله..
رانية:اسألوني أنا عن ليلتي!!راحت أفنان تستانس مع زوجها وخلوني بحسرتي مع المهروش ناصر!!
أفنان:هههههههههههه واي عليكم حكى لي تركي عن المقلب بس ياترى اش اللي صار معاكم؟
رانية:ماشيين بالسيارة في أمان الله..إلا وأخينا في الله يتقلب على المقعدة ويهتز كأنه يرقص وعاد أنا خمنت انه حشران!بس يوم وصلنا البيت لقيته مامسك نفسه ورمى عمره بوسط الصالة وقام يتلوى ويتحكك وصار جلده أحمر...وقتها انهبلت وقلت هذا يا خِرِيج شِهار بالطايف..يا خريج مستشفى الأمل!!!
الجميع:ههههههههه
رانية:لولا إني دقيت على اسمهان وطمنتني ..مدري اش كان بيصير فيني!!
0000000
وعاد بنات أخوان ناصرجلسوا مع رانية وتعرفوا عليها عن قرب وسمعوا سواليفها واستانسوا عليها..
وبعد السوالف والطقطقة اللي بالاستراحة كترحيب بالعرايس قاموا أهل العريسين ومسكوا رانية وأفنان من أياديهم ورقصوهم معاهم.. وبعدها جاء موعد العشا..
ومرت الليلة لى خير....
=========
ثاني يوم من الصباح صحت رانية وقالت:نصور وين وعدك لي؟؟
ناصر:هذا أنا وفيت بوعدي!وعدتك أتزوجِك وتزوجتك!!
رانية:لاااا ياشيخ؟أنا قصدت الروحة للفندق!
ناصر: وش تبين بالفندق؟ بيتنا ماشاء الله ماأحسنه وأكبره!
رانية:ياخي نغير جو..وبعدين المطعم تحت طلبنا بالفندق مو مثل قعدة البيت نضطر نشتري أكل من برة ونستخدم المطبخ..الصراحة ماكأني عروس!
ناصر:وأي فندق يعجبك ياست الحسن والدلال؟؟
رانية:أي فندق خمسة نجوم يؤدي الغرض!
ناصر:ابشري!
وعبوا أغراضهم وراحوا يدورون فندق مناسب يقضون فيه يومين..
============
وبعد قضاء يومين بالفندق فكر ناصر يطلع..
ناصر:يالطيف يارب لو شفتي الفاتورة كان جاك سكتة!!الله أكبر عليهم كلها يومين اللي قعدناها هنا وطالبين مبلغ بذيك الحسبة!!
رانية:طبيعي..هذا فندق فايف ستارز ماهو بيت شعبي بـ حارة قديمة!!!
ناصر:لا لا مالنا قعدة هنا قومي رتبي أغراضك خل نمشي لبيتنا..
رانية:ماني طالعة لين توعدني بشي!
ناصر:آمري..
رانية:نســــــــــافر للخارج!!!!
ناصر:ليش؟بعثة ولا علاج؟؟
رانية:لاتستخف دمك عاد!سياحة..واستجمام!
ناصر:سياحة واستجمام؟ولا تطيير حمام؟المثل يقول ياحلوة اللي معاه قرش ومحيَره يشتري حمام ويطيره!!!
رانية:وشفيها لاسافرنا؟هذا هم عيال أم عبدالرحمن أقرب ناس تعرفهم سافروا بزوجاتهم في شهر العسل!!
ناصر:وش يعني عيال أم عبدالرحمن؟اخواني هم وأنا مدري؟وبعدين لاتقارنيني فيهم هذول عيال عِز من يومهم يعني ماتهمهم الفلوس!!
رانية:ياخي أنا ماطلبتك تحجزلي طيارة خاصة ولا تشتري لي يخت رحلات..كل اللي أبيه رحلة بسيطة على قدنا!
ناصر:الحين أنا ودي أعرف منهو هالمصرقع اللي اخترع شي اسمه السفر للخارج عقب الزواج هَمْ أروح وأسطره على أفكاره السودا!!واشفيها بلدنا؟ يازينها...يعني ماتضبط الأمور إلا ببلاد الخمور؟!!!
رانية:يابن الحلال لاتحبِكها!!في شي اسمه شهر العسل لازم لازم نسافر فيه وننبسط..
ناصر:لازم؟احلفي!هالحين بأعطيك مصحف واقرأيه من أوله لآخره إن لقيتي آيه تحث على وجوب قضاء شهر العسل بالخارج بأعطيك 10 آلاف بل لو لقيتي كلمة شهر العسل بالقرآن لك مني مليون ريال ياشيخة!!
رانية(وهي تدمع):إنت ليش غير الناس؟؟
ناصر:وانتي ليش مثل النسوان الفارغات؟
بدل ماتقولين معك ياحبيبي أحس بالفرحة بأي مكان..وأهم شي إني أكون معاك!!ألقاك مصرة إن المحبة ما بتتم إلا بالسفر!
رانية:وإن قعدنا بـ جدة واش بنسوي؟
ناصر:بنسوي مثل مايسوون الناس نتمشى وننبسط..

بعد أيام من الزواج استعد تركي وأفنان للسفر..ومرت أفنان تودع أم تركي..
تركي:دعواتك لنا يمه..
أم تركي:الله يردكم لنا سالمين غانمين..
وجلسوا شوية معاها وبعدين راحت أفنان لأهلها تودعهم..
شافها أبوها وهي قاعدة تسولف وتضحك مع أمها..
وقال:ماشاء الله ماشاء الله..عروستنا شكلها مبسوطة..
أفنان:ايه الحمدلله...
وراح الأب يقعد مع تركي بالمجلس
وأما أفنان قعدت مع أمها بالصالة.
أم أفنان:عاد يابنتي مايحتاج أوصيك..الله الله بحجابك..ومواطن الشبهات ابعدوا عنها..خلوا سفركم هذا لأسباب دينية ودينيوية ماتأثر على دينكم..
أفنان:لاتشيلين هم يمه..تركي إنسان عاقل ويدري شلون يحافظ علي...
دخلت أفنان لغرفة سندس وضمتها لصدرها..وقالت:ياليتك تعرفين تنطقين..كان سألتك وش تبين أجيب لك هدية!
أم أفنان:هديتها إنك ترجعين سالمة وتزورينها وتتطمنين عليها مو تخلين الزواج يلهيك عننا..
وراحوا للمجلس وشاركوا الأب وتركي سوالفهم..ثم توادعوا
..الأم والأب:استودعناكم الله..ولاتنسون تتصلون فينا وتطمنونا عن علومكم..
تركي وأفنان:ان شاء الله..
وخرجوا..وقامت أم أفنان تدمع عيونها..
أبوأفنان:خير خير..وشفيك تدمعين؟
أم أفنان:هذي أول مرة بتبعد أفنان عن بيتنا!!
أبوأفنان:ولا كانت أول مرة؟..وين المشكلة؟أبعدتي عن أهلك قبلها وماصار شي..صح؟يلا امسحي دموعك وخلنا ناكل لقمة..
============
واتجه تركي وأفنان للمطار وركبوا الطيارة باتجاه* لبنـــــــــــــــان*!!!!
ومرت الأيام وهم مبسوطين بالطبيعة هناك والمتاحف.وبيوم من الأيام راحوا لمطعم من المطاعم يتعشون فيه..وكانت المفاجأة!!!
عبيروأبوها وعمتها واخوانها قاعدين بنفس المطعم!!
ومر تركي من جنبهم من غير ماينتبه لهم وقعد على طاولة بعيدة عنهم شوي وعطاهم ظهره
وأول من شافه عبير وكانت تاكل وحست بـ غصة في حلقها!
سعد أخوها(بصوت عالي):يبه يبه..هذاك الرجال ماكأنه تركي؟!!!
التفت أبوه..وقال:ماأشوف إلا قفاه..يمكن هذا واحد يشبه له..يعني هو وش بيجيبه لبنان؟
وكانت عبير في هذي الفترة اللي فاتت قد أجرت عملية بسيطة وكان اليوم التالي مقرر لها عملية تجميليةبالليل ألا وهي زراعة للصدر!!!
دمعت عيونها..وتحسرت على وجود حرمة معه وخمنَّت من ضحكاته وطريقته في الكلام معاها إنها زوجته..بس كان نفسها تعرف من هذي اللي قدرت تفوز بقلب تركي وتتزوجه؟!وماعرفت لأن أفنان متحشمة ومغطية وجهها..
وظلت عبير تتساءل بداخلها:لو تدري وش كثر حبيتك ياتركي؟..مافرطت فيني!!!
لو تدري اش السبب اللي خلاني أجي لبنان كان رِحمتني!!
وظل الموضوع شاغل بالها لين رجعت الشقة اللي قاعدين فيها بلبنان..واتصلت على أمها اللي توقعت عبير إنه يكون عندها علم بزواج تركي بحكم إنه أم عبير من جماعة أم تركي..
وبعد السلام والكلام..
عبير:ماراح تصدقين يمه أنا مين شفت اليوم؟؟
أم عبير:مين؟نانسي العقرب؟ولا هيفاء العلَّة؟؟
عبير:ولاوحدة فيهم..الله يقطعهم كلهم!يمه...أنا شفت تركي!!
أم عبير:مالت!!وش جابه لبنان؟
عبير:مدري..بس كان معاه وحدة شكلها زوجته..
أم عبير:ايه صحيح..أنا نسيت انه تزوج قريب ماصار له كم يوم..قالولي الجماعة..
عبير:ومين هي عروسته يمه؟؟من أقاربه؟؟
أم عبير:وانتي ليش مهتمة؟لايكون باقي تحبينه؟؟
عبير:لا..بس حاشني فضول أعرف
وبعد سوالف أنهت عبير المكالمة..
وفكرت تتصل على صاحبتها السابقة (هالة) في جدة..
ولما ردت عليها..
هالة:هلا..عاش من سمع هالصوت..وينك من يوم نقلتي ماسمعنا لك حس ولاخبر؟؟
عبير:مايحتاج أقول لك..أكيد سامعة بأخباري؟
هالة:الصراحة إيه..مافي شي ينخش بهالديرة!
عبير:أنا سمعت إنه طليقي تزوج..ماجاك خبر من هنا أو من هنا منهي زوجته؟؟
هالة:معقول ماتدرين؟هذي وحدة من شلة الصاعقة!!
عبير:ايشششش؟لايكون اسمهان؟
هالة:بسم الله عليك..وشفيك؟اسمهان متزوجة!!
عبير:مو مافي شي غريب بهالدنيا!قلت يمكن تكون تطلقت وتزوجت تركي !!!طيب لاتكون رانية الغثيثة؟؟
هالة:لا ..تطمني..هي أفنان..وأبشرك كل الشلة تزوجوا ماعدا نجلاء وحتى هي سمعت إنها بتلحقهم بعد سنة أو سنتين!
عبير:يووووه ياليتني مااتصلت..قهرتيني بهالسوالف!
هالة:سبحان الله ..تظلين انتي عبير ماتتغيرين!!أنا ونادية رجعنا هالسنة وتصادقنا معاهم ولاكأن بيننا شي..الصراحة هم طيبات حيل..وانتي ظالمتهم!
قفلت عبير الخط بوجه هالة!!!

خلصت ولا بااقي؟! تحمست حدهـ رووعهـ

آسفة بنآت طولت عليكم بآلتكملـة..وعد مني آنزلهآ اليوم..

من خامس يوم في الزواج قال ناصر:اطبخي لنا اليوم كبسة!
رانية:خير؟ ماأقدر أطبخ!
ناصر:ليش؟مع إني لما كنت أزوركم أيام الخطوبة كنتي تتفنين في الأكلات...
رانية:لاحظ إني ماقلت ماأعرف أطبخ..بس قلت ماأقدر أطبخ!!
ناصر:ليش؟على يدك نقش الحِنة؟؟
رانية:لا..بس أنا عروس!
ناصر:وإن كنتي عروس..تحسبين نفسك باقي منتصة على الكوشة؟؟
رانية:أقول ياشين السماجة!أبي أتدلع شوي..مو لازم أطبخ هالفترة!
ناصر:ويعني بتتدلعين على حساب بطوننا؟؟يابنت الحلال أكل البيت أرخص وأنظف!!
رانية:هههه هالكلام قوله لأحد غيري..طول عمرك عزوبي وتاكل من برة..هالحين بيجي التوفير؟!
ناصر:استعنا على الشقاء... بالله!!
----------
اليوم الثاني صحت رانية وطلعت الحوش وكان فيه برندة(جلسة تشبه البلكونة)..قدام المطبخ والجو حلو ففكرت انهم يفطرون فيها..
وجاها ناصر:الله الله اش هالحركات الحلوة؟بنفطر هنا؟
رانية:ايه..
ناصر:زين وين الفطور؟؟
رانية:أنا سويت الشاي بس!والفطور روح جيبه من برة!
ناصر:حتى الفطور بنقعد نشتريه من برة؟أجل ليتنا ماصحينا!عشان نصحى الظهر نتغدى مرة وحدة!!!
رانية:أعوذ بالله!وإنت ماتسمع بشي فيه طاري فلوس إلا ويجيك حساسية؟؟روح وجيب فطور واستح ترى أنا عروستك!!
ناصر:ايه عروستي!تصدقين كنت ناسي وذكرتيني؟؟
وراح يبدل ملابسه ويشتري فطور..ورانية جوعانة وتمني النفس بما لذ وطاب!!
وكلها ثلث ساعة وناصر مقبل والأكياس بإيده ورانية تنتظره بشوق في البرندة!
ويوم فتحت الأكياس صابتها صدمة!!علبة بلاستيك فيها فول!!+تميس+مقلقل كلاوي وكرش+شوربة كوارع!!!!!!
رانية:وعععععع وش هالريحة اللي تلوع الكبد؟؟
ناصر(وهو مبتسم):هذي شوربة كوارع تشربينها ترد فيك الروح!أحلى شوربة لأحلى عروس!!
رانية:لا إحنا على هالفطور..ناقصنا صحن كشري ورز بلبن ونصوِر فيلم سينمائي مصري!!!
ناصر:أقول تحمدي ربك على النعمة.. تصدقين قعدت واقف سرى عشان أقدر أشتري لك هالفطور؟ من كثر الزحمة عنده لاإله إلا الله!!!
رانية:أوهووو آثاري اللي يحبون الكشخة مثلك كثير!!!!
وقامت رانية...
ناصر:على وين؟على وين؟
رانية:بأروح أدور لي شي أفطر عليه..يمكن ألقى علبة جبن..حبة زيتون..أي سم هاري بالثلاجة!!!!
وأول مادخلت المطبخ وينفلت عليها ذاك الفار من صوب البلاعة!!
رانية:وااااااااااااااااااااااا اااااااااااااااااي الحقونـــــــــي!!!!!!!!!!!آهآ هآآآآآآآآآ
وراح ناصر يجري ويصيح:اشفيه اشفيه؟؟
ويدور بالمطبخ!!
رانية:فار فار!
ناصر:الحين كل هالصياح عشان فار؟أجل لو طاب عليك هندي وش بتسوين؟؟
رانية:أقول لك فار..وعععع شكله يقرف بلد..اذبحه تكفى اذبحه!!
قام ناصر وشال الفار من ذيله والفار يفرفر بين يديه!!ويقول:بالله تخافين من هالمسكين؟؟هو أصلاً مخترع منك!!
رانية:وعع الله يسامحك..شلون تمسكه بإيدك؟؟
ناصر:بآخذه وأرميه بالحوش خلي البساس تشبع!
ورماه بالحوش وغسل يده ورجع يفطر!!!!!
وقعدت رانية معاه بالبرندة...
رانية:الله يلوع كبد إبليس..شوربة كوارع وريحة كرش ومنظر فار..وش هالمصايب بس؟؟؟
ناصر:أجل اش ودك تفطرين ياهيلاري كلينتون؟
رانية:أنا على بالي عندك سالفة..بتروح تجيب لي كلوب ساندويتش مع أورينج جوس وبان كيك أو سينبون أي شي..إلا فطورك ذا ماتوقعته!!
ناصر:قولي الحمدلله على النعمة..بكرة هالفطور بأخليك تسوين مثله هنا بالبيت!!!
رانية(بينها وبين نفسها):ياشين العجلة يارانية!وش شفحك تتعجلين على العرس؟!!
================
أما مرام يوم انتهى شهر العسل صارت كل يوم تداوم بمشغل أختها ماجدة...ومرت الأيام...
وبيوم من الأيام اتصلت على اسمهان في العصر..وبعد السلام والأسئلة الروتينية..
اسمهان:ماشاء الله..غريبة اليوم قاعدة بالبيت؟مانتي رايحة الصالون؟؟
مرام:لا مو رايحة..بس بيجيني بنات تعرفت عليهم في الصالون..وأول مرة يزوروني..فحبيت تجين انتي بعد..
اسمهان:ماعندي مانع..كأنك تدرين إني مرة زهقانة وعبدالرحمن في العمل مابيرجع إلا بالليل..
مرام:خلاص أنتظرك بعد المغرب..
اسمهان:كلمتي مشاعل وخالتي يجون؟
مرام:لا..ليش أكلمهم؟خالتي وهالبنات اللي بيجون مو من سنها..ومشاعل أتوقع مابيعجبونها!
اسمهان:زين..تحتاجين أي مساعدة؟
مرام:لا مشكورة تسلمين..عبدالرحيم ماقصر اشترالي حلى ومعجنات..
وبالفعل بعد المغرب استعدت اسمهان وراحت لمرام..
وبعد دقايق من وصولها حضروا صاحبات مرام وكانوا ثلاثة..وحدة متزوجة واثنين منهم بنات بالجامعة!
مرام:أعرِّفكم..هذي اسمهان سلفتي..
وهذول يااسمهان زبايننا في الصالون..تعرفت عليهم قريب..ميساء ونهله و رنا..
اسمهان:ياهلا فيكم..
الضيوف: هلا..تشرفنا..
وبدأت السوالف..وحست اسمهان إن الجلسة معاهم تخنق! لاحشمة ولاحيا والكلام بعضه كان شبه فاضح بألفاظ منحطة من الغريب جداً إنها تصدر من بنات مثلهم!والضيفة المتزوجة ماهي أحسن منهم حالاً كان كلامها أجرأ وأوقح منهم وكل الجلسة ضحك ماصخ..
كان نفسها اسمهان تنسحب بس حست إنه الانسحاب المفاجيء بيضايق مرام فلجمت لسانها وسكتت!!
نهلة:وي..اشبِك ساكتة؟ماعجبك كلامنا؟؟
ميساء:لاتكوني بس دقة قديمة؟
رنا:يمكن عشان ماأخدتي علينا لسه..صح؟؟
اسمهان:ايه..صح!
وبعد لحظات كانت مرام بالمطبخ..واسمهان مع الضيوف وتفاجئت انه وحدة منهم فتحت شنطتها وطلعت منه بكَت سجاير وقامت تباشر عليهم!!!!!!!!!!!
هنا اسمهان ماقدرت تستحمل الوضع!!وقالت:لو سمحتوا لاأحد يدخن هنا!!
ميساء:ليه؟ممنوع التدخين؟هههههه
رنا:فينها اللوحة ماني شايفاها؟؟ههههه
نهلة:انتي عندك ربو؟؟
اسمهان:لا بس هذا البيت له احترامه!
وخرجت من الغرفة بزعل! وراحت للمطبخ..
اسمهان:انتي دارية عن المسخرة اللي قاعدة تسير ببيتك؟
مرام(باستغراب):أي مسخرة؟
اسمهان:روحي شوفي بعينك!!!
راحت مرام لقيت البنات يطفون سجايرهم!
مرام:تقصدين انهم يدخنون؟؟
اسمهان:إيه..
مرام:براحتهم..إنتي اش عليك منهم؟؟
اسمهان:معقول يامرام هالكلام يطلع منك؟؟انتي شلون تسمحين لهم يسوون كذا ببيتك؟؟فيه حرمة صاحية في الدنيا تشرب البلا اللي اسمه سجاير وهي تدري انه حرام؟ لاومنظر الوحدة وهي ماسكة السيجارة جداً مقزز!
تتشرفين تكونين مثلهم؟؟
مرام:لا طبعاً..بس لازم تعرفين إن طبايعهم غير طبايعنا!
اسمهان:ومادام طبايعهم غير طبايعك اش اللي محببك فيهم؟؟وبعدين هل زوجك يرضاها ببيته انه حريم يدخنون بكل وقاحة؟؟
مرام:اسمهان رجاءً..احترمي ألفاظك!!وبعدين اش قصدك تهدديني إنك تنشرين هالكلام؟؟الشرهة علي اللي عزمتك أصلاً!!!!!!!
ماتحملت اسمهان ودخلت على الضيوف وسحبت شنطتها وقالت:مع السلامة!!!
الضيوف:مع السلامة..
ميساء:الله يعينك يامرام..سلفتك دي شكلها معقدة مرة!
وكملت مرام الجلسة مع ضيوفها وهي متضايقة!
بيوم من الأيام وأفنان مازالت بلبنان وبعدها مارجعت من السفر...
كان الوقت صباح وأهل أفنان نايمين..وتفاجئوا بممرضة سندس تدق عليهم الباب دق عنيف!!!
صحيت أم أفنان مفزوعة وقالت:خير..اشفيك ياماري؟
ماري:مدام ....سندس تئبان واجد!!
وصحي أبوأفنان وراحوا يركضون على غرفة سندس اللي كان وجهها أزرق وتغرغر..أخذوها بسرعة وراحوا المستشفى..وبالمستشفى لفظت أنفاسها الأخيرة..على إثر انقباض رئوي حاد!!!
وحاولت أم أفنان تتماسك وبس تردد:إنا لله وإنا إليه راجعون اللهم أجرني في مصيبتي واخلف لي خيراً منها
وأبوأفنان بس يستغفر..وكانت حالتهم صعبة..
أبوأفنان:اسمعي..بنتك أفنان ماأبي يوصلها شي عن وفاة أختها..مفهوم؟؟إنتي أدرى بمحبتها لها وتعلقها فيها مانبي ننكد عليها الله يرضى عليك!!
أم أفنان:ابشر..ابشر..
وبالفعل مر على وفاة سندس 10 أيام وأفنان ماتدري عن شي!!وكل مااتصلت على أهلها يطمنونها إن أوضاعهم بخير..حتى أم تركي يوم جات تعزيهم وصتها أم أفنان إنها ماتبلغ تركي بـ شي ولارجعوا مصيرهم يعرفون!
وبما إنه أفنان ماعندها جوال ماكانت على اتصال بأي أحد غير أمها وأبوها ومن جوال تركي..
عرف الجميع بالوفاة وأقبل يعزي وأولهم مشاعل وأهل زوجها كلهم ورانية بعد......
وبعد مارجعت أفنان من السفر مروا يسلمون على أم تركي بالأول وبعدين يطلعون فوق لبيتهم..
وسلموا وشربوا القهوة...واستأذنت أفنان في الطلوع فوق لشقتها..أما تركي جلس مع أمه..
مسكته أمه وقالت:ياولدي.. فيه موضوع لازم تقول لزوجتك عليه..قبل لاتعرف به من الناس!!
تركي:خير يمه؟لهجتك ماتطمن!!
أم تركي:سندس إخت زوجتك..الله يرحمها ويغفر لها ان شاء الله..
تركي(بفزع):لااااا..مصيبة لو تدري أفنان..أغلب كلامها عن إختها دايماً... حتى بالسفر مانستها وجابت لها أغراض طبية تفيدها..شلون بأعلمها؟شلون؟
أم تركي:إنت زوجها وأدرى بها أنا قلبي مايطاوعني..ماودي أكسر خاطر البنية..
وطلع تركي لأفنان وهو مو داري شلون يعلمها..وتوكل على الله..وكلمها..
تركي:أفنان؟؟
أفنان:يـــــاهلا..
تركي:تعالي اجلسي جنبي شوي..
جلست أفنان..
تركي:ياترى مين اللي رضاه مقدم عندك على أي مخلوق؟؟
أفنان:ربي سبحانه..
تركي:ولو ربك أراد إنه ياخذ منك شي بتوافقين؟؟
أفنان:طبعاً شلون بأرفض؟هذا ربي وخالقي..إنت تقصد أتصدق بمالي؟؟؟
تركي:لا ..ربي وهبنا هِبات واستأمنَّا عليها ولو أراد يسترجعها مننا نرضى؟؟
أفنان:طبعاً نرضى..شلون مانرضى؟؟أرواحنا وهي أرواحنا هبة من الله ومتى أراد أخذها منَّا..
تركي:إذن احتسبي إختك سندس عند الله..وادعي لها بالرحمة...!!
أفنان:لاااا لااا تقول!!!!!!
وقامت تبكي بكاء مريـــــــــر
حضنها تركي بحنان وقال:انت انسانة مؤمنة ومافي انسان تدوم له نعمة..ماأبي أسمع منك إلا كلمة إنا لله وإنا إليه راجعون اللهم أجرني في مصيبتي واخلف لي خيراً منها..
وظلت أفنان ترددها..وشربت كاس موية..
تركي:هالحين الواجب نروح لأهلك ونعزيهم..
وانطلقوا للعزاء وكان الكل مجتمعين...أهل وأقارب أفنان..
لما كانت أفنان بوسط العزاء..
انسحبت بهدوء ودخلت غرفة أختها المتوفاة سندس..وفتحت دولاب الملابس وظلَّت تتأمل ملابسها وأغراضها وتذرف دموعها..
وجات عينها على الكرسي المتحرك اللي كانت تستخدمه سندس وانهارت من البكاء..وظلَّت تتذكر أحلى أيامهم مع بعض..وراحت لسرير سندس وحطت راسها عليه وانخرطت في البكاء..
افتقدتها أمها وتوقعت وجودها بغرفة سندس..ودخلت عليها..
أم أفنان:أفنان؟؟اش تسوين هنا؟
رفعت أفنان راسهاوهي تبكي وقالت:ليش يمه تخبون علي وفاتها ليش؟؟ليش ماعلمتوني من وقتها؟؟
أم أفنان:ولو كنا علمناك يابنتي واش كان بإيدك تسوين؟تردين لها الحياة من جديد؟؟
أفنان:لا..بس على الأقل كان ودعتها بآخر لحظات من حياتها..
وقامت أفنان تنتحب ودموعها تهل بغزارة...
أم أفنان:يابنتي عسى من جمعكم بالدنيا يجمعكم بالآخرة قولي آمين..
أفنان:آمين يايمه آمين..
ودخلت عليهم مشاعل في هذي اللحظة..وكانت أم أفنان دموعها على خدها انسحبت وراحت تغسل وجهها وتكمل مقابلة ضيوفها..
وبقيت مشاعل مع أفنان..ومسكت أياديها..
أفنان:ماني قادرة أصبر ياخالتي ماني قادرة أصبر!!
ورجعت تبكي...
مشاعل:مقدرة مشاعرك ياحبيبتي..بس هذا حال الدنيا معانا تاخذ وتعطي..وربي له حكمة بكل شي...ومافي أحد بيزيد عُمر أو ينقص..لكن إحنا ناس مؤمنين المفروض مانخلي المصايب تهزنا ونثبت..ولاتنسين إنما الصبر عند الصدمة الأولى..
ماكان عندي بالدنيا أغلى من أبوي الله يرحمه..
أفنان:ايه جدي الله يرحمه ماكان فيه أحد بطيبته..
مشاعل:بس كنت أستبدل حزني عليه بالدعاء له..وكل ماجاء ذكره ببالي أحاول أشغل نفسي بقراءة القرآن..أحس إنه يربط على قلبي كثير..
أفنان:الله يرحمك ياسندس ويجمعني فيك يالغالية..
============
أما ناصر ورانية كانوا كل يوم وهم ناقر ونقير..كل شي يختلفون فيه!
ومرت الأيام واتصلت اسمهان على رانية وبعد السلام..
اسمهان:وش ذا ماكأنك عروس؟
ليش حزينة؟متوفي لك أحد؟؟
رانية:فيني احباط..إحباط من العيار الثقيل..والهم يحط فيني ويشيل..ولانهاري نهار ولا ليلي ليل!!!!
اسمهان:ياحركات!!رجع لك الالهام؟وشفيك يابنت حزينة موب عوايدك؟؟
رانية:نويصر ياسوسو نويصر..ودي أمسكه وأكفخه لين يحس على دمه شوي ويهتم فيني!!!!
اسمهان:ههههه ياحليلك يارنو مامداكم على التكفخ!!
رانية:وش أسوي؟من حر مافيني أقول لك كذا..هذا مدري وين كان عايش؟بارد برود يفقع المرارة تقولين عصير مثلج!ومستهتر ومآخذ الحياة ببساطة شديدة!وجده هزل وهزله هزل...مايندرى عن صدقه من كذبه..وكل شي أطلبه منه يشوفه دلع وتشرط!!
اسمهان:طبيعي يارانية!
رانية:وش اللي طبيعي؟أقول لك هذا مهبول..عليه عقلية يخلف الله بس!!
اسمهان:يابنت الحلال..من غير اختلاف كيف توصلون لإتفاق؟؟
رانية:ايه غثيني بكلام من اللي يقطه عليك عبدالرحمن!
اسمهان:لا أنا صادقة..ناصر انسان عاش يتيم ووحيد أمه.. وأخوانه من أبوه بعيدين عنه..وأمه الله يرحمها انسانة مقعدة..ومعتمدة على شغالتها بكل شي..وناصر ماله دور بالبيت..إلا يعالجها أو يقضي لها أكلها وشربها..لاعنده خوات حتى يعرف يتعامل مع الإناث ولاعنده أحد يعلمه وينصحه..وصدقيني مثل ماأسمع عنه من عبدالرحمن ماقد سمعت إلا كل خير..قلبه طيب بس انتي ماعرفتي له!!!
رانية:ايه يختي..إقعدي عيرني مثل الآنسة نجلاء..تقول تستاهلين ماتعرفين تتنعمين له ولاتدلعينه!!
اسمهان:وليش لا؟يمكنها صادقة!بصراحة الكلام الحلو يلين الحديد وهو حديد...وإنتي يارانية من غير زعل كلنا نعرف أسلوبك صريحة وعصبية وتحذفين الكلام حذف!!صاحبتنا وتمونين..بس ولد الناس جديد عليه هالأسلوب..مو بسهولة ممكن يتأقلم!!وحطي في بالك إنه عاش في ظروف وبيئة مختلفة عنك مرة..فمو معقول بيجي على مزاجك بين يوم وليلة!!!
رانية:صحيح كلامك أنا ماأنكر..بس في أشياء بديهية المفروض يعرفها من حاله..مثلاً الفندق والسفر والطلعات الحلوة..كل مازهقت خذاني البر ولا البحر..ولاقلت له ودني مولات..يقول ليش؟ناقصك أغراض؟!!!!!!!!!!!!
اسمهان:ههههههه العيب في العزوبية..ترى حسب مافهمت من عبدالرحمن انه ناصر كان مُضرب عن الزواج زمان..فتلقين من جهالته مايسأل أصحابه المتزوجين عن هالأشياء ولايثقف نفسه فيها..ولايبحث عن الأشياء اللي تحبها الأنثى..والصراحة هنا يجي دورك..باللسان الحلو والتغنج والدلال يطيح عندك ولد الحلال!!!!
رانية:ومنكم نستفيد..بس ياويلك أجرب نصايحك وماتفيد!!يمين لأجيك أسطِرك بـ نعالي!!
إلا وناصر واقف ورا رانية!!
رانية(بارتباك):يلا سوسو أكلمك بعدين زوجي جاء..
وقفلت السماعة..
ناصر:ياحليلها..من هي هالضعيفة اللي بتسطرينها بنعالك؟؟
رانية:صاحبتي..ونمون على بعض!
ناصر:الله لايجعل اليوم اللي بتمونين علي فيه يجي!!!!
رانية:إلا إنت وين طسيت؟؟
ناصر:طلعت فوق أتطمن على الشقة..
رانية:ايه ذكرتني..لي كم يوم أبي أشوفها وأسألك عنها..هي شقة كبيرة كبر الدور اللي إحنا فيه؟؟؟
ناصر:لابيتنا أكبر..هي تقريباً ثلاث أرباع بيتنا والباقي سطوح..
رانية:أبي أشوفها..
ناصر:زين تعالي معاي..
وطلعوا سوى وكانت شقة كبيرة..
رانية:طيب إنت ليش تاركها فاضية؟
ناصر:وش تبيني أسوي فيها؟مخليها لأخواني لو جوا من الشرقية ويبونها يقعدون فيها..
رانية:هذا هم أخوانك مجتمعين بجدة من أيام زواجنا وماشفت أحد منهم جاء يقعد فيها..وبعدين هذي ورثك من أبوك يعني ماأتوقع أحد بيتجرأ يقول لك بأقعد فيها..
ناصر:وش القصد؟
رانية:قصدي..حرام تقعد فاضية..مابنستفيد منها إلا تجميع الغبار والحشرات..ومو بعيدة تنسكن بالجن!!!
ناصر:بعدي مافهمتك؟؟
رانية:ليه ماتأجرها؟بيجيك منها دخل إضافي وإنت مرتاح...
ناصر:لا لا الإيجار شغلانة ولابد أعرضها بمكتب عقار وبيأذوني الناس بالاتصالات والزيارات لأجل يشوفونها..ومايندرى شلون بيطلعون هالمستأجرين اللي بياخذونها بندخل في قضية مالها أول من تالي..خلينا مرتاحين أحسن!
رانية:زين واش رايك ترتاح من هاللفة الطويلة العريضة وتترك تأجيرها علي؟؟
ناصر:ههههه ضحكتيني وأنا جوعان!!وش فهمك بالتأجير.؟وشلون ومتى؟؟؟
رانية:الله يخلي المنتديات بأكتب هذاك الإعلان المرتب..لا ومابأختار أي وحدة تسكن بأختار ناس على مزاجي!!!
ناصر:خلاص..سويها وخل نشوف وش يطلع منك!!
===========
أما اسمهان حاولت توضح لعبدالرحمن بطريقة معينة إنه ناصر عنده جهل بأمور الطلعات والروحات مع عروسته...
عبدالرحمن:والمطلوب؟؟تبين أعطيه دروس خصوصية؟؟
اسمهان:أكيد لا..بس تكفى دحوم إقنعه بطريقة غير مباشرة إنه يطلعها اليوم أي مكان حلو..الصراحة صوتها ماكان عاجبني أبد!!تكفى تكفى!
قام عبدالرحمن يقلِبها في راسه..وقال:عندي فكرة وان شاء الله تضبط!!
واتصل على ناصر...وبعد السلام والسؤال عن الأحوال..
عبدالرحمن:تراني أول مافكرت فيك إنت..تصدق قبل أيام جاني هدية من الجريدة اللي أكتِب فيها دعوة شخصية لشخصين للعشاء بـ يخت في مرسى الأحلام بأبحر بالمطعم العايم..والمشكلة إنه لازم يكون اليوم وإلا بتروح علي..وأنا مشغول حيل اليوم..وقلت بدال ماتضيع بلاش..فكرت فيكم يالعرسان بتكون طلعة حلوة لكم...وش قلت؟
ناصر:والله يالحبيب..أنا عندي إجازة وفاضي..ومابأقدر أشوف عرض مغري مثل هذا وأخليه فما أقدر أقول لك غير تم..
عبدالرحمن:أجل توكل على الله وروح لهم بالليل ولاتنسى تقول لهم أنا حاجز جلسة بالمطعم العايم بإسم عبدالرحمن بن فلان!وترى الجلسة حلوة ومعاكم أشخاص ثانيين بنفس المطعم..
وبعد ماانتهت السوالف ثم المكالمة قال ناصر لرانية:اليوم يوم سعدك ياعروس...في الليل بنروح أنا وإنتي نتعشى بمكان مايخطر لك على بال!!!
رانية:بالله لاتخرعني..مفاجآتك صارت تجيب لي مغص!!لايكون بتوديني المطعم الشعبي اللي جلساته بالأرض وتعشيني فيه جريش وحنيذ؟؟؟لا والتحلية مهلبية خايسة جدتي تعرف تسوي أحلى منها!!!
ناصر:لا..صدقيني..هالمكان بيروق لك كثير..
===========
كانت حياة مشاعل مع عبدالمجيد مستقرة وهادية..وسبورة الفلوماستر تلعب فيها دور كبير!!حاطها عبدالمجيد بالصالة ويكتب لمشاعل كل مشاعره الدافية فيها وهي ترد عليه بالمثل!
وكانوا يقضون بعض أوقاتهم في ألعاب الذكاء والمسابقات..وغالب ومغلوب..
وكانت أم عبدالرحمن فرحانة حيل بعبدالمجيد اللي كل ماكانت تقابله تلقى السعادة مرسومة على وجهه..
وبيوم من الأيام كان عبدالمجيد ومشاعل نازلين من فوق ورايحين يشترون أغراض ومر على أمه يسلمون عليها وكانوا اسمهان ومرام عندها يتقهوون...وبعد مارحوا عبدالمجيد وزوجته..رجعت أم عبدالرحمن لمرام واسمهان وقالت:الله يرضى على عبدالمجيد كل ماشفته حسيت براحة نفسية..الحق ينقال مشاعل هذي هدية جاتنا من السما...
مرام:وش دعوى خالتي؟؟يعني أنا اللي قمامة خارجة من الأرض؟؟؟
أم عبدالرحمن:كلكم خير وبركة يابنتي..وانتي واسمهان عينين بـ راس..
كانت روحة رانية للمطعم العايم(يعني مطعم متحرك بوسط البحر)
على ظهر سفينة...من الخرجات الجميلة اللي فاجئها ناصر فيها والأدهى من ذلك إنهم وهم قاعدين في المطعم على ظهر السفينة والهواء يرفرف حولهم والإضاءات وكل شي ينطق بالجمال..
رانية:واااااي المنظر يهبل والقعدة رومانسية حيل..فديت قلبك ياناصر
ناصر(البكاش):وش هالزين والكلام الحلو؟؟عاد لو تدرين يارانية من متى وأنا أخطط لهاالقعدة ماتصدقين!!!!!طول الأسبوع وأنا شغَّال اتصالات أبحث عن مكان يليق فيك!
رانية:تصدق؟ كان قلبي حاسس..إنك لايمكن تكون بالتبلد اللي أنا شايفتك فيه..وإنه بيجيك يوم وتتعدل وتصير مثل الأوادم!!والحمدلله تحقق مناي!عساها تكون فاتحة خير وكل يوم والثاني يزيد ذوقك حلا!!
ناصر:عشان تعرفين إن نصور ماهو شوي..
دق جوال رانية وردت وكانت المتصلة اسمهان!!!
اسمهان:هلا رنو!بشريني؟عساك مبسوطة في المرسى؟؟
رانية:بسم الله وإنتي اش دراك؟لايكون إنتوا بعد هنا؟؟؟
اسمهان:لا إحنا ببيتنا..بس عندي علم بطلعتكم من عبدالرحمن..بصراحة قطعتي قلبي اليوم وخليته يهديكم هالطلعة عساها تكون عند حسن ظنك؟!!
رانية(بغيظ شديد من ناصر البكاش):آآآآآآه يعني السالفة كذا؟زين الله يعطيكم العافية وماله داعي هالتكاليف!
وحاولت تنهي المكالمة..
والتفتت لناصر وقالت:أقول؟يازينها الطلعات المجانية..صح؟؟تخرج تتمشى وتتعشى على قفا غيرك من غير ماتخسر هللة..جميلة الحياة بصحبتك الصراحة!!
ناصر(وهو يبلع ريقه):هذي اللي اتصلت زوجة عبدالرحمن؟؟
رانية:ايه عبدالرحمن صاحب التخطيط الله يحفظه!!
ناصر:ياحبي له..ماينسى أحد!!هو كريم وحِنا نستاهل!!
===========
ومرت الأيام تلو الأيام وانتهى شهر العسل عند رانية..واندمجوا مشاعل ومرام في حياتهم العامة.
وكانت اسمهان مشغولة بزياراتها مابين بيت أهلها أو بيت أسماء أو سماح أو عند سلايفها أو أم زوجها وعبدالرحمن بما إنه صار كبير العائلة تولى الجمعات مرة طلعات شوي في البر أو المخطط أو عصريات عند البحر هو وأخوانه وزوجاتهم وأحلام وزوجها أو خالته جوهرة..
وبإحدى الطلعات..
أم عبدالرحمن:كم بقي على ولادتك ياجوهرة؟؟
جوهرة:يعني تقدرين تقولين بنهاية أول شهر من الدراسة..
=======
وبيوم من الأيام حست اسمهان بالملل وزوجها مداوم.. واتصلت بأم عبدالرحمن لكن الشغالة ردت عليها وقالت لها إن أم عبدالرحمن مو موجودة..ودقت على مشاعل وقالت لها مشاعل:أنا رايحة لأهلي..واتصلت بمرام كـ حل أخير
وبعد السلام والكلام..
اسمهان:لاتصدين نفسي يامرمر وتقولين إنك طالعة بعد؟؟
مرام:لا أنا قاعدة بالبيت..
اسمهان:الله يبشرك بالخير..عاد أنا طقيت من الزهق ونفسي ألقى أحد فاضي يجي يتقهوى معي..وش رايك تجيني؟؟
مرام:لا..سوري أنا ماأقدر أزورك بس لو حبيتي إنتي تجين تعالي!
اسمهان:لا تعالي إنتي أحسن..صار لك مدة مادخلتي بيتي..
مرام:قلت لك ماأقدر لأنه صاحبتي بتجيني اليوم..خلاص تعالي انتي.
وفعلاً ماصدقت اسمهان أحد يعطيها وجه تجهزت وتزبرقت وراحت تزور مرام..بس لما دخلت انصدمت من ضيفة مرام!
كانت بنت متعرفة عليها مرام في مشغل أختها أيضاً..بس هيئتها مسترجلة!!!!!
قاصة شعرها قصة رجالية!!ولابسة بنطلون جينز ضيق جداً مع جاكيت أسود وبادي أبيض وساعة جلد سوداء عرييييضة!ووجهها خالي من أي مساحيق تجميل وماعليها أي اكسسوارات أو زينة تبين إنها أنثى!!!!والأدهى من ذلك إن حركاتها وطريقتها بالكلام مثل طريقة الرجال بالتمام!!
انصدمت اسمهان من هالمنظر!!
مرام:هذي زبونة تعرفت عليها في المشغل اسمها ندى فديت قلبها كل يوم تتصل فيني وتتطمن على أخباري.وتوثقت علاقتنا وهذي أول مرة تشرفني بزيارتها!
اسمهان(بينها وبين نفسها):وليتها ماشرفتك بزيارتها!
مرام:شوفي ياندى هذي سلفتي وصديقتي من أيام المتوسط..
ندى(تغمز وتتكلم بلهجة رجولية):
اش اسم الحلوة؟؟؟
اسمهان(بتردد):اسمهان..
وقامت مرام للمطبخ تجيب القهوة ولوازمها..
ندى المسترجلة(تكلم مرام):وإنت راجع ياحلو..جيب لي في طريقك موية!!!!
مرام:من عيوني..
ندى:تسلم لي عيونك ياقمر!!!
اسمهان(بفضول):إنتي متزوجة؟؟
ندى:أسكتي ياشيخة..أعوذ بالله!
اسمهان(باستغراب):ليش أعوذ بالله؟؟فيه أحسن من الزواج؟؟
ندى:ماأداني الرجال ولاأطيق ريحتهم!ميولي مو لهم أصلاً!!!!!!
ودخلت مرام وحطت القهوة والحلى..وندى تطالعها بنظرات شينة!!
حست اسمهان بقلبها بينط من صدرها وصارت تتساءل بينها وبين نفسها(ياترى معقول هالفئات موجودة بيننا؟؟ماقد شفناهم إلا بالمسلسلات والبرامج المنحطة!
معقول هالبنت متصاحبة مع مرام وعندها نوايا خبيثة؟؟!!يارب عافيها ولاتبتلي مسلم)
وكانت اسمهان نافرة من القعدة مع هالبنت..بس بنفس الوقت فكرت إنها تجلس معاهم لآخر لحظة لأنها ماودها إن هالبنت تستفرد بمرام!!
وقامت ندى تتكلم عن نفسها وحياتها:أمي ولدتني أنا وبعدي أخوي ولما صرنا بالابتدائي.تركتنا وتطلقت..وأبوي على طول مشغول..جاب لنا مربية فليبينية علمتنا بلاوي ماكنا نعرفها!!
وكانت ندى بتكمل سالفتها بس اسمهان قاطعتها لأن ودها تغير الموضوع:انتي مكملة دراستك؟
ندى:كنت بالثانوي..بس انفصلت كذا مرة..لين ماتركت المدرسة وقعدت بالبيت!
مرام:وليش انفصلتي؟؟
ندى:ياشيخة.. البنات ماعندهم سالفة كل يوم مشتكيني للإدارة!مدري اشفيهم كل ماشافوا وحدة كوول قالوا عنها كلام مو زين!!!
اسمهان(بينها وبين نفسها):وأنا أشهد إنهم صادقين!
ولما جاء وقت الشاي قامت اسمهان تساعد مرام وتصب الشاي..
مسكت ندى شعر اسمهان الطويـــــل..
ندى:فديت القمر أبوشعر حرير!!
سحبت اسمهان يد ندى بقوة و دَفتها!!
وطالعت مرام في اسمهان باستغراب..!!!!!
وبعد دقايق استأذنت ندى وراحت بيتها وودعت مرام ببوسة على خدها!!وقالت:بيننا التيليفون ان شاء الله..
مرام:ان شاء الله...
وبس راحت..انفجرت اسمهان في مرام!
اسمهان:أسألك بالله؟هل هذي انسانة تتشرفين بدخولها لبيتك؟؟
مرام:قصدك عشان طريقتها في اللبس؟؟حرااام حتى أختي ماجدة موب طايقتها!أنا مدري ليش ظالمينها؟؟
اسمهان:وهي المسألة في طريقتها باللبس بس؟؟انتي مالاحظتي نظراتها لك شلون صايرة؟؟
مرام:عاد زودتيها يااسمهان..
وسكت لك كثير!!انتي كل ماشفتي ضيوف زايريني حطيتي فيهم عذاريب؟!!!مدري غيرة هذي ولا اش يسمونها!!!
اسمهان:أي غيرة وأي كلام؟
معقول عبدالرحيم هذاك اليوم شم ريحة الدخان وماعلَّق؟!!
مرام:أساساً بعد ماراحوا الضيوف هذاك اليوم بخرت البيت زين وفتحت مراوح الشفط!!
اسمهان:الحمدلله..وليش تصرفتي هذا التصرف؟لأنك خايفة لا زوجك يدري ويسويها لك قصة!لأنه مافي انسان محترم يرضى على نفسه أو زوجته تتصاحب مع ناس بهالمستوى!!
مرام:اسمهان؟,,انتي صايرة ماتنطاقين أبد!!أنا اللي غلطانة إني أناديك لاجاني ضيوف..المفروض إني أشغِّل مخي وأحافظ على خصوصياتي!
اسمهان:يامرام اصحي اصحي..أنا مدري اش اللي صاير لك..بعمرك ماكنتي كذا!! اش تبين فيهم هاللي تسمينهم صاحباتك؟؟
ألفاظهم بذيئة وكلامهم وسخ..وأفعالهم أردى!!وبالذات هاللي اسمها ندى احذري منها أشد الحذر..ولاتعطينها وجه..أنا من حبي فيك مارضيت أرجع بيتي وأخليكم بروحكم..هذي وحدة تصرفاتها شاذة ونظراتها مريبة..انتي شلون ماتلاحظين؟؟
مرام(بصوت عالي):لأن قلبي أبيض مو مثل قلبك!!انتي تحاولين تشكين بكل الناس على بالك ذكاء وفطانة!!لكن بكرة بتتأدبين يوم تلقين كل الناس ينفرون منك!!!
ماقدرت اسمهان تنطق من القهر ولبست عباتها ورجعت بيتها..ودموعها على خدودها..وكان عبدالرحمن قد رجع قبلها من عمله الليلي وبدل هدومه وتمدد في الصالة ينتظرها!!
ويوم دخلت شقتها وصفقت الباب
قام عبدالرحمن وقال لها:وعليكم السلام؟؟؟؟
بس لما لاحظ دموعها ووجهها اللي صار أحمر..قال:اسمهان؟؟اشفيك؟
عسى ماشر؟؟
اسمهان(وهي تحاول تداري دموعها):مافيني شي..
وقف قدامها عبدالرحمن وقال:ماني تاركك لين تعلميني بسبب دموعك!
اسمهان:أبد..وحدة كنت أعرفها توفَّت وبلغتني مرام وماقدرت أمسك دموعي!!!!!!!!!!
عبدالرحمن:أكيد؟؟هذي هي كل السالفة؟؟
اسمهان:ايه..
ودخلت تغير ملابسها وهي معزمة ماتكلم عبدالرحمن عن مرام لأن مرام مهما كان صديقتها وماودها تسبب لها مشاكل..
ومن يوم خرجت اسمهان من عند مرام ومرام تفكر براسها وتتساءل(وش يضمن لي ان اسمهان ماتروح تنشر أسرار ضيوفي عند أهل زوجي وتكرههم فيني؟؟وش يضمن لي إنها ماتروح تفتح فمها عند زوجها ويجي يعلم عبدالرحيم؟؟ياويلي لو وصلت الأمور إن عبدالرحيم يمنعني من وظيفتي بإدارة المشغل!!!
هين يااسمهان..تشوفين إن ماقلبتها عليك؟!!!!!!
وراحت تخطط شلون تتغدى باسمهان قبل ماتتعشى بها!!!
يوم رجع عبدالرحيم من برة..
راحت مرام تجري عنده بدلع..
مرام:عبدالرحيم؟؟
عبدالرحيم:عيوني أنا!!
مرام:بغيت أحكي لك عن سالفة مكدرة خاطري..وإنت أحسن واحد يفهمني..
عبدالرحيم:قولي اللي تبينه..
مرام:اسمهان ياعبدالرحيم مدري اشفيها تغار مني..حتى ضيوفي لاحظوا هالشي كذا مرة..تصور ياعبدالرحيم إنها تتلفظ عليهم بألفاظ شينة وتحقرهم ماكأنهم ببيتي!!بل إنها تتهمهم في شرفهم لاطلعوا من عندي!!يرضيك هالشي؟؟يرضيك؟؟يعني معقول أنا مرام أتصاحب مع ناس مايشرفوني ويرفعون راسي؟؟؟
عبدالرحيم:غريبة!!هذا وإنتم صاحبات عُمر..
مرام:لا هي الله يهديها مقهورة مني ومن مشاعل يوم إننا عرايس ومدلعات عند أزواجنا..أما هي أخوك لاهي عنها أغلب الوقت..تصور ياعبدالرحيم وهي طالعة من عندي قامت تهددني وتقول والله لأقول لخالتي إنك تستقبلين نسوان ماهم زينات وفاسدات؟!!!
وقامت مرام تمثل على عبدالرحيم دموع التماسيح وتتبكبك قدامه!!
عبدالرحيم(بزعل):ماعاش من يخليك تذرفين دمعك يالغالية..
وزوجة عبدالرحمن هذي حسابها عندي!!!
وطلع عبدالرحيم من البيت ونزل لبيت عبدالرحمن وطق الباب..
فتح له عبدالرحمن الباب وقال:هلا وغلا..تفضل تفضل..
ودخلوا مجلس الرجال وقعدوا..
عبدالرحمن:غريبة منك هالزيارة..بهالحزة.؟؟ وش وراك؟؟
عبدالرحيم(بلهجة حادة):ضِف زوجتك عننا ياعبدالرحمن..تراها تقذف الناس اللي يدخلون بيتي في أعراضهم وهذا شي مايشرفني!زوجتي بنت حسب ونسب ومو أي أحد ممكن تخليه يدخل بيتنا..بأي حق زوجتك تتسلط علينا بلسانها؟؟
عبدالرحمن:روِق روِق..ترى كل كلامك ماعندي فيه علم ولاأدري اش قصدك فيه؟؟
عبدالرحيم:زوجتك تهدد زوجتي إنها بتعلِّم أمي بالكذب إن ضيوفها ناس سمعتهم موب زينة وكل المسألة غيرة نسوان..ياخي خذ زوجتك وطلِعها من البيت ومشيها خلها تترك الحقد على نسواننا!!!!!!!
عبدالرحمن(بانفعال):رجاءً ياعبدالرحيم..هذا مو أسلوب تسولف فيه مع أخوك الكبير..ومشاكل النسوان خلها بينهم...إحنا مالنا فيها خُص!!!
ونزل عبدالرحيم وهو زعلان من بيت أخوه...
وجاء لاسمهان اللي كانت قاعدة على السرير تفكر في أحداث اليوم
اسمهان:تبون تشربون شي؟أسوي لكم عصير برتقال؟؟
عبدالرحمن:اسمهان؟أخوي طلع من بيتي زعلان!!ممكن تعلميني اش السالفة؟؟
اسمهان:وأنا اش اللي يعرفني بهالسالفة؟؟إنت اللي كنت قاعد معه!
عبدالرحمن:انتي اش قلتي لزوجته بالضبط؟؟
اسمهان:بخصوص إيش؟؟
عبدالرحمن:أنا ماأحب اللف والدوران..زعلتي زوجته اليوم في إيش؟؟؟
اسمهان(بخوف):الصراحة ياعبدالرحمن أنا بغيت أستر عليها بس مادام هي تبي تفضح نفسها فراح أقول لك..ضيوفها ناس سمعتهم ماتشرِف!!!
عبدالرحمن:وليه ماتشرِف ان شاء الله؟؟؟
اسمهان:تدخين وبذاءة لسان وشذوذ والعياذ بالله!!!!!!
عبدالرحمن(وهو مو مصدق):الله أكبر يااسمهان كل هذا لاحظتيه من خلال كم زيارة؟؟وش هالكلام الفاضي؟ليش حِنا وين قاعدين؟إنتي يظهر تتابعين برامج وتتخيلينها بالواقع!!قومي اطلعي الحين فوق لزوجة عبدالرحيم واعتذري لها قومي!!
اسمهان(بانفعال):أعتذر وأنا ماأخطيت؟؟ماني رايحة!!!
عبدالرحمن:اخزي الشيطان واطلعي للبنت استسمحيها..هذا اللي ناقص؟أخسر أخواني بسببكم يالحريم؟!!!
وبعد أخذ وعطا وكان عبدالرحمن واصل حده اضطرت اسمهان تطلع لمرام وتقول لها:أنا آسفة!!!
وحست مرام بلذة الانتصار!!
أما اسمهان رجعت لبيتها وهي مذلولة مخذولة وقلبها من القهر وده ينفطر نصين!!
========
أما رانية اجتهدت الأيام الماضية في البحث عن مستأجرين للشقة اللي فوقهم عن طريق نشر مواضيع بالمنتديات عن مواصفات الشقة...وانهالت عليها الرسائل لكن رانية أخذت معلومات عن كل عضوة وكانت تدور عن وحدة تكون عروس مثلها وسنها قريب منها!!!!
لكن للأسف مالقيت بين الراغبات بالاستئجار وحدة عروس!!لكن لقيت وحدة أكبر منها بثلاث سنوات وعندها طفل واحد..ورحبت فيها وكلمتها وعطتها العنوان!!

	#38
محبة الخير نوني	رد: أسمهان وعبدالرحمن قصة أسرية هادفة بكل اجزاءها متتابعة روآية سعودية أسمهان وعبدالرحمن قصة أسرية هادفة بكل اجزاءها متتابعة روآية سعودية خلصت ولا بااقي؟! تحمست حدهـ رووعهـ

	#39
بــنــ الوآآدي ــت	رد: أسمهان وعبدالرحمن قصة أسرية هادفة بكل اجزاءها متتابعة روآية سعودية أسمهان وعبدالرحمن قصة أسرية هادفة بكل اجزاءها متتابعة روآية سعودية آسفة بنآت طولت عليكم بآلتكملـة..وعد مني آنزلهآ اليوم..