ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
قصص و روايات هذا ما جنتة نفسى {الجزء الخامس} يوجد هنا هذا ما جنتة نفسى {الجزء الخامس} روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية

فساتين العيد


 
قديم   #1

@صمت المشاعر@

عضوة شرفية

الملف الشخصي
رقم العضوية: 14107
تاريخ التسجيـل: Apr 2008
مجموع المشاركات: 45,653 
رصيد النقاط : 0

صورة قلبين هذا ما جنتة نفسى {الجزء الخامس}


هذا ما جنتة نفسى {الجزء الخامس}



العصر في بيت قوم بو احمد الكل كان قاعد في الصاله ما عدا عفراء الي كانت في حجرتها وترمس موزه بالتلفون ..
احمد: انا اليوم سرت يبت اغراضنا من البيت ولقيت لي مؤجر بعد

ام احمد: هي زين سويت يا ولدي
شيماء: تعال ليش ما سرت اتيب بدرو فديته والله مشتاقتله
ام احمد: هي صدقها بنتي ليش ما سرت اتيبه

احمد: هههه ماطاع يطلع من عندهم سرتله وهناك ماشاءالله بيت اهل اسماء عندهم وايد يهال فأصر انه يقعد معاهم وعمتي بعد قالت خل يقعد اليوم

اسماء: ههه هي قالتلي امي خل يقعد مستانس هناك
احمد: عيل عفراء وين؟؟
ام احمد: هي فوق ماادريبها شو تسوي
بو احمد: ماادري شو فيها هالبنت ما قامت تقعد ويانا هالايام وايد سيري شوفيها يا مريم اخاف فيها شي
ام احمد: لا مافيها شي لا تخاف هي بس دلوعه هالبنت
وهم قاعدين يرمسون يسمعون صوت الجرس .. واتسير البشكاره عشان تفتح الباب
شيماء: منو بيينا الحين
ام احمد: والله ماادري يا بنتي سيري شوفي
شيماء: ان شاء الله امي
وتسير شيماء تشوف منو عالباب
..
شيماء: هلا .. هلا والله ميثه

ميثه: اهليين شيوم شحالج؟؟
شيماء: بخير الحمدالله اخبارج انتي
ميثه: والله انا بخير شو عفراء اهني
شيماء: هي اهني موجوده تعالي اوديج عندها
وتاخذ شيماء ميثه وتوديها داخل في الصاله
..
ميثه((مستحيه)): سلام عليكم

الكل: ووعليكم السلام
وتوديها شيماء فوق عند عفراء الي كانت قاعده تتكلم في التلفون فتسمع صوت دقات الباب
عفراء: اقولج موزه لحظه شوي
موزه: اوكي
عفراء: امنووووووووو
شيماء: فتحي الباب

عفراء: شو تبيييييييييين

شيماء: ربيعتج ميثه يايه عندج فتحي الباب فضحتينا
عفراء (تاخذ تلفونها)): اقولج موزه بدقلج بعدين
موزه: اوكي باي
عفراء: باي
وتنش عفراء تفتح الباب عليهم وتنزل شيماء تحت
عفراء: هلا اشحالج
ميثه: تمااام يالدبه انتي اشحالج
عفراء: هههه اشفيج علي انا بخير حياج دخلي
تصك عفراء باب الحجره وتقعد ويا ميثه

ميثه: انتي الي اشفيج علي متغيره

عفراء: انا ؟؟؟ انا مب متغيره ولا شي
ميثه: متغيره ونص قبل تتصليين عالاقل الحين لا كله انا اتصل وياليت تردين انا ابغي اعرف في اليوم كم مس كول تحصلين مني اكيد ماينعدون وهذا غير المسجات
عفراء: شو اسوي انتي ماتتصلين الا لما اكون مشغوله
ميثه: انزين عاد اتصلي يوم تفضين موول مسويتلنا طاف

عفراء: هههه اونج عاد حركات انتي بعد ميثووه

ميثه: يالله ما عليه يالدبه بطوفها لج هالمره المهم قوليلي شخبارج
عفراء: انا بخير الحمدالله غريبه من وين طالعه الشمس يايه بيتنا اليوم العاده كله انا ايي
ميثه: شفتي عاد من الوله ييتج ماقدرت اتحمل
عفراء: احم احم وجان استحي
ميثه: هههههههه والله مب لايق عليج الحيا
عفراء: هههه جب انزين

.............................. ............

في بيت قوم بو سيف .. في الصاله سيف مب عارف شو يسوي يدور حوالين الصاله ويقعد ويدور ويقعد وكل دقيقه يطالع ساعته
..
سيف: اففففففففف يالله امييي اتأخرتوا عالجماعه اخاف يطلعون عاد انتوا حتى ماخبرتوهم انكم سايرين لهم

ام سيف: بلاك يا ولدي محتشر علينا خلاص انا خلصت وبعدين مب لازم انخبرهم المفروض ايعرفون نحن بأي وقت نزورهم تراها البنت موافقه وانت كلمت ابوها
سيف: هي بس اخاف يطلعون
ام سيف: لا ما بيطلعون الحين سايرين
سيف: وهذيج وينها
عايشه: انا يييت اشفيك اخوي البنت قعدت كل هالسنين ما بطير في لحظه ريلاكس ماي بروزر ريلااااكس
ام سيف: ياامي شو اتقولين انتي لا ترمسين عن اخوج جي
عايشه: ههههه امي انا ماسبيته انا اقوله ((اهدأ يا اخي)) بالانجليزي
\
ام سيف: ويييي ماعندج سالفه

سيف: اووووووووووه امي اشقد اتسولفوون يالله روحوا
ام سيف: ان شاءالله امي سايرين سايرين
ويسيرون عايشه وام سيف بيت قوم بو احمد عشان يخطبون عفراء رسمي
...

.............................. ....................

في بيت قوم بوخليفه كانت يالسه ام خليفه في الصاله وهي اتحاتي ولدها الي طلع من البيت وهو زعلان عليها .. تدش عليها عبير وهي ميوده بيدها صينية عليها دلة الجاي وتقعد ويا امها

عبير: امي اصبلج جاي؟؟؟
ام خليفه: اذا في شكر لا تصبين لكن اذا مافيه صبي
عبير: لا امي ماحطيت في شكر عشانج بس
ام خليفه: انزين امي صبيلي شوي
عبير: ان شاء الله
ام خليفه: اخوج لين الحين ما ياا عبير وانا قلبي محروق عليه اتصلي فيه شوفيه وييين؟؟
عبير: ان شاء الله امي
وتنش عبير تاخذ تلفون البيت وتتصل فيي اخوها
...
خليفه: الوو

عبير: هلا خليفه انت ويييييين
خليفه: انا في السياره راد البيت الحين
عبير: اوكي خلااص
خليفه: باي
عبير: باي
ام خليفه: هااا امي شو يقول
عبير: الحين راد البيت بس انتي لا تحاتيين
تطلع موزه من حجرتها واتي تقعد في الصاله عند عبيرو ام خليفه وشكلها هالقعده ما بتعدي على خير .. وعلى طول اتسير تصب حق عمرها جاهي
..
موزه((وهي تصارخ عليهم)): واااااااع شو هاااا مافييه شكر انتي اييييه عبيرووو مره ثانيه لوما حطيتي شكر في الجاي بتشوفين

عبير: لا والله شو شايفتني اشتغل عندج دشي انتي المطبخ وسوي وبعدين انا هالجاي مسويه حق امايه مب حقج
موزه: مااااالت عليها انا ابغي اعرف يوم انه فيج السكر والضغط ليش لين الحين عايشه ليش ماتموتيييين واتفكينا كل العيايز الي بسنج في قبورهم الحين
عبير((وهي اتصارخ عليها)): انتي جب مايخصج في امي ان شاء الله يومج قبل يومها يالصايعه ياام الطلعات
اول ما خلصت عايشه كلامها يدش خليفه الصاله
..
خليفه: انتوا اشفيكم صوتكم واصل للشارع

موزه اتسوي عمرها اتصيح وتدش الحجره عاد خليفه على طول يروح وراها حتى ما عبر امه الي من الصبح وهي قاعده اتحاتيه
خليفه: اشفييج حبيبتي شو استوى ليش قاعده تصيحين
موزه: قوم قوم عني لا ترمسني
خليفه: قوليلي شو فيج فديتج شو سووا فيج وانا بلعن خيرهم
موزه: سيييير اسأل اختك وامك اي شي احاول اتقرب منهم ما يبووون انا ماسويت شي سرت يلست عندهم في الصاله قلت ياعايشه يا حبيبتي ليش ماحطيتي سكر في الجاي تراه مافي طعم نشت وصارخت علي وتمت اتسبني واتسبك انا ماادري ليش جي يسوون فيني

خليفه: انا براويهم

ويسييير خليفه وهو مفول على عايشه بييودها من شعرها وبيفرها عاليدار ويتم يضربها بريوله على بطنها وام خليفه حليلها مب عارفه شو تسوي تنش بصعوبه وتحاول تير خليفه بس من دون فايده
...
طبعا موزه كانت واقفه تطالع وابتسماة انتصار على ويهها

خليفه((وهو يصارخ)): خليني اادبها الي ماتستحي على ويهاا مره ثانيه لو سمعت وحده فيكم قالت شي حق مرتي ماتلومون الا نفسكم ... ويشووت عايشه آخر شوته ويطلع من البيت وهو معصب ويبند الباب بقوه
عبير((تصييح من الالم وايدها على بطنها)): آآآآآآآآآآآآآآي اميييييي آآآآآآآآآي لحقي علي مب قادره اتحمل آآآآآآآآآآآآه
ام خليفه((وهي تصيح معاها)): نشي امي نشي اوديج حجرتج ترتاحين حسبي الله عليج ياموزوه حسبي الله عليج
موزه: هههههههههههه ... تدش حجرتها ولا جنه الي صار كله بسببها
..

.............................. ........

في بيت قوم بو احمد وفي الصاله قاعدين ام احمد وشيماء وام سيف عايشه .. طبعا ام سيف بعدها ما رمست في السالفه الي يايه علشانها خذتها السوالف هي وام احمد .. ونفس الشي عايشه واسماء وشيماء خذوا على بعض وايد وكانوا قاعدين يسولفون
..
شيماء: ههههه والله عواش ماكنت ادري انج سوالف

اسماء: ههههه استحي على ويهج شو عواش اصغر عيالج هي
عايشه: هههه خليها اسمووو اشفيج انتي
شيماء: ههههههههه وييييييييييو قالولها اسموووو
اسماء: هههه لاا عاد انا مووول مب لايق علي اسموووو وحده متزوجه لا وعندي ياهل بعد يا حرمه
عايشه: ههههه اتصدقين اسماء الي يشوفج ما يقول انتي متزوجه
شيماء: ماعليج منها عواش هاي مسويه عملية تجميل
اسماء: ههههه ويييي حشا علي جمالي طبيعي والا ماتخبل فيني اخوج
شيماء: ههه هي ترى يحليييله شو عرفه هوو بعمليات التجميل وغيره شافج وقال حلوه مايدري قبل كيف كنتي
اسماء: هههههه هي بسوي ليش هاي الي مااعرف شو اسمها احسن عني
شيماء: ههههههه قصدها نانسي

عايشه: ويييييييييي عاد هاي اتلوع الجبد ماادانيها

اسماء: هي والله ولا انا ماصخه
ام سيف: وييي يا ام احمد خذتنا السوالف ونسيت اقولج السالفه الي يايه علشانها
ام احمد: اتعرفين بعد يا ام سيف انا يالله يالله اشوفج وكل السوالف تطلع في هالوقت .. آمري فديتج شو بغيتي
ام سيف: والله نحن بغينا عفراء حق ولدنا سيف
ام احمد: والله نحن مابنلقى احسن من ولدكم سيف حق بنتنا

ام سيف: هي بس يا ام احمد وينها هييه مايت تيلس عندنا عاد انا ماارتاح الا اسمع رايها بنفسي

ام احمد: خلااص ولا يهمج الغاليه انا بسير ازقرها الحين

شيماء: لا قعدي امي انا بسير
وتسير شيماء فوق وتدق على عفراء الباب ..بتبطل لها عفراء
عفراء: شو تبين
شيماء: تعالي برع ابيج شوي

عفراء: اترييني ميثوو بييج ..تبند الباب وراها

عفراء: نعم شو تبين

شيماء: ويا ويهج نزلي تحت خالوو ام سيف يايه تخطبج حق ولدها وانتي فوق قاعده والحين تبا تسمع رايج
عفراء: ان شااااااااء الله الحين بنزل
وتسير عنها شيماء وهي تسير داخل عند ميثه
ميثه: شو تبا شيوووم
عفراء: ههههه لو اقولج ما بتصدقين
ميثه: شوووووووووووو
عفراء: في ناس خاطبيني هههههه
ميثه: والله؟؟؟؟؟؟؟؟؟؟؟
..
عفراء: هههههه هي والله والحين تحت يبون راييي

ميثه: يالخايسه ليش ماخبرتيني
عفراء: هههه ماحصلت وقت اقولج يالله يالله خلنا انسير تحت
ميثه: لا فشله انا بيي بترياج اهني انتي سيري
عفراء: تعااااالي يا بنت الحلال
ميثه: شورج وهداية الله يالله خلنا انسير
وينزلووون عفراء وميثه تحت عند الجماعه... طبعا ميثه الي رمست اول شي وعفراء ما نطقت ولا كلمه
..
ميثه: سلام عليكم

الكل: وعليكم السلام
..
ميثه: هلا خالووه مريم اشحالج

ام سيف: اووو ميثه تماام امي انتي اشحالج واشحال امج
ميثه: تماام الحمدالله .. عايشه اشحالج
عايشه: هلا ميثه انا بخير انتوا وينكم اختفيتوا مره وحده
ميثه: والله نحن موجودين
ام احمد: شو ماشاءالله اتعرفون بعض
ام سيف: هي يا ام احمد انعرفهم يستوولنا من بعييد

ام احمد: هي زين ماشاءالله .. قعدوا بنيات اشفيكم واقفيين

وقعدوا عفراء وميثه
..
ام سيف: عفراء امي اشحالج

عفراء: تمااام

اسماء وشيماء خايفيين واايد من اسلوب عفراء
...
ام سيف: نحن فديتج نبغيج حق ولدنا سيف شو قلتي؟؟

عايشه: هييه يا عفراء واذا عندج اي طلبات ترانا حاضريين

عفراء بتوقف ... وشكلها تبا تقول شي


بس شو الي تبا تقوله ؟؟؟


هذا الي بنعرفه في الجزءالسادس^__^


 
قديم   #2

lola lola


Thumbs up رد: هذا ما جنتة نفسى {الجزء الخامس}


هذا ما جنتة نفسى {الجزء الخامس}

مشكورة على القصة

 

أدوات الموضوع



الساعة الآن توقيت السعودية الرياض و الدمام و القصيم و جدة 02:33 AM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0