رد: لحظات غريبة بين اثنين ...خلقت الحب في قلبين "
لحظات غريبة بين اثنين ...خلقت الحب في قلبين "
قمر ـ لازم تواجهين خالي . لازم ..
دانه ـ أواجهه ؟
قمر ـ اييه .. اذا كنت بريئة لازم تواجهينه ..
دانه ـ .............................. ....
قمر ـ صدقيني يا عمتي .. صدقيني ...
دانه ـ تبيني أروح له البيت ؟؟
قمر ـ اييه.. بحجة أنج بتآخذين أغراضج.. بس لازم تعرفين شاللي خلاه يشك فيج.. وأنا متأكده أنج أكبر من شكوكه ..
((المصيبه يا قمر اللي ماتعرفينه أن هذي ثاني مرة .. موب الأولى .. يعني ضاحي من الاساس ماعنده ثقة فيني ((
دانه ـ انشاءالله ..
قمر ـ ماتصدقين من شفت اليوم..
دانه ـ من ؟
قمر ـ خالد ..
طالعت دانه قمر .. هذ قمر نفسها اللي تتكلم عن خالد.؟؟؟ وين اللهفة والعيون المسبلة والتنهيدات ؟؟
دانه ـ خالد؟؟
قمر ـ اييه .. يالي لبدور بعد ما صار فيها انهيار عصبي .. لاتخافين .. حالها احسن من حالج ..
دانه ـ قلت لج لاتقولين لها ..
قمر ـ ما احس بالذنب .. ما ادري ليش ..
دانه ـ ...........أفهم أنج ارتحتي ؟؟
قمر ـ اييه .. ارتحت ان حاجز بيني وبين اختي انهدم . صج نبنى عشرة غيرة . بس المهم . انها عرفت احساسي ..والحقيقة ..
دانه ـ اشم ريحة أنانية ..
قمر ـ بالعكس .. كأن كان جبل ياثم على صدري .. وانزاح ..
دانه ـ .............................. ..................
قمر ـ هذي غرفته؟؟
دانه ، من ؟؟
قمر ـ زوج المستقبل ..
دانه ـ اييه..
بدت تدور فيها وتقلب بين أشياءه .. وعطورته ..
قمر ـ عطورته تلوع الجبد مير خايسه .
دانه ـ كلها بوس وهوغو وشانيل ..
قمر ـ موب عاجبيني.. مكتبتها كلها كتب شعر ..
دانه ـ ماتحبين الشعر ؟؟
قمر ـ بالعكس .. أحب الشعر ,..بس شوفي . كله صحراء وبدو .. مافي شي بسيط ينفهم .
دانه ـ مم .. في طلال الرشيد .. وفي خالد الفيصل ..
قمر ـ اييه .. يمكن .
حست دانه أن قمر مهتمة في حمد .. تقلب بين اغراضه باهتمام ..
دانه ـ شفيج عفستي اغراض الريال ؟؟
قمر ــ ما ادري .. ما اجذب عليج لو قلت لج أني محتاجه لفته من حمد ولا ابتسامه علشان أبني آمال على هالزواج .. حمد المتعقد اكرهه ويكرهني .. على الاقل في شي مشترك بينا .
ابتسمت دانه .
ـ بيأذن بعد شوي .
قمر ـ أدري .. طبعا آخر شي أبيه أفطر هنا .
دانه ـ ليش ؟؟
قمر ـ عمي ناصر سوى هالحركه فيني خلاني ايلس بين الشباب هه .. طبعا لما كنت ياهل شوي ..بروح الحين ..
شالت شنطتها والبست شيلتها .. كانت قمر لاول مرة بدون ربع طن من المكياج على ويهها .. كانت مكتفية بكحل بسيط .
قمر ـ بروح الحين .. لاتنسين .. المواجهه ..
دانه ـ بروح اليوم .. بعد صلاة التراويح ..
***********
ماكان له أي رغبه يروح بيت أبوه .. حجز له في فندق .. وحبس نفسه طول اليوم .. بكره من الصبح يخلص اجراءات طلاق البدور ويرجع يسافر .. مايدري ليش انه موب نادم على الطلاق .. ماينكر أنه في قلبه شعور لبدور .. ماينكر أنه توهم ماصار لهم كم شهر متزوجين .. بس لسبب مجهول طابت نفسه منها .. يمكن لقوتها وكبرياءها ؟ أنها ماذرفت دمعه وهي تطلب الطلاق ؟؟ بدور ما ينخاف عليها .. تعرف تآخذ حقها ..
لازم يسافر بكره .. كل شي ولا دراسته ..
****************************** ***
طلعت من المسيد للسيارة ..
ـ راجو .. بيت ضاحي ..
شغل السيارة واتجه لبيت ضاحي ... اللي بعيد وايد عن بيت ناصر .. طول الطريق وهي محتارة شتقول له ؟؟ طول الطريق وهي تعد نفسها لمواجهته .. دموعها ماقصرت .. مع كل فكره كانت تنزل ..
اوصلت للبيت .. وتمت عشر دقايق تنتظر في السيارة ..
خذت نفس وانزلت . فتحت الباب بمفاتيحها ..
انصدمت ,,,
ـ بدور شتسوين هنا ؟؟
تعرف انه بدور من شامة صغيرة تحت حاجبها موب عند قمر ..
نايف ـ شلونج يالدانه ؟؟
دانه ـ هلا أخوي ..
نايف ـ مابتسلمين علي ؟؟
سلمت على نايف ..
التفت لبدور .. اللي بحركه مفاجئة حضنتها ..
استغربت دانه ..آخر مرة شافت البدور تفاجأت بكف على ويهها.. واليوم تآخذها بالاحضان ؟؟
نايف ـ بدور بسبقج وأروح السيارة ..
بدور ـ زين يبه ..
تفاجأت دانه ببدور .. كانت .. غير .. حتى نظراتها كانت غير .. كانت كله توطي راسها ..
بدور ـ عمتي , أنا آسفة ..
سكتت دانه ..
بدور ـ عمتي سامحيني ..أنا دمرت حياتج .. اليوم اييت أوضح لضاحي أن اللي ..اللي تبين له موب صحيح .. وأبوي يا معاي ..
ما علقت الدانه ..
بدور ـ عمتي .. والله اني ندمانه أني .. مديت يدي عليج .. أنا آسفة ..
دموع البدور كانت الكرت الأخير اللي رضت فيه الدانه .. حضنتها .. ومسحت على راسها ..
لان الذنب موب كله عليها .. ضاحي نفسه كانت عنده شكوك .. هو نفسه ماصدق خبر وصدق اللي انقال ..
بدور ـ بروح .. طولت على أبوي .
مسحت دموعها .. وطلعت بسرعه ..
طالعت الدانه الدري .. هذي خطوة صعبه ,, المهم ...ان الحقيقة تبان ..
خذت نفس قبل لاتركب الدري .. وطلعت ...
في الصالة اللي فوق .. كان حاط راسه بين ركبتيه .. وهو ينفخ ..
جرت نفسها غصب.. انقبض قلبها بقوة لما شافته . ماتصورت انها تحبه هالكثر ..
ـ ضاحي ..
رفع راسه بسرعه ..
وقف على حيله أسرع ..
دانه ـ ييت أخذ أغراضي وأسألكم كم سؤال ..
ضاحي ـ دانه ..
دانه ـ بس سؤالين .. متى سمعتني أكلم خالد ؟؟
سكت ضاحي ..
دانه ـ متى ؟؟
ضاحي ـ دانه أنتي كنتي تحلمين فيه دايم .. وفي ليله كلمتيه .. أنا متأكد .
دانه ـ أحلم فيه؟؟ ضاحي أنا كنت أرفضه من كان عمري عشر سنوات .. أمي ماتت وهي غاضبه علي لاني ماتزوجته!
ضاحي ـ الا دانه .. نسيتي ؟؟ لما حلمتي أنه مات ؟؟ نسيتي ..
شهقت فجأة .. فجأة اتضح لها كل شي ..
ـ هذا هذا .. كاااان .. كان ..
ضاحي ـ تنكرين ؟؟
صرخت دانه ـ كان خالد ولد أخوي .. ولد أخوي .. كان في لندن علشان يستأصلون ورم في راسه .. وكنت أحاتيه .. أحاتيه.. هو اللي كلمته .. وقلت له أني اشتقت له لاني ماسمعت صوته من أسابيع ,,
انهارت دانه بالدموع وضاحي انصدم ..
وعلى أقرب كرسي جلس ..
قامت الدانه للغرفة .. وطلعت الشنط اللي يات فيهم .. وبدت تحط فيها أغراضها .. وهي تصيح . ..
دخل ضاحي الغرفة ..
ـ دانه .. أنا آسف .. آسف ..
دانه ـ آسف ؟؟ هذي المرة الثانية ضاحي المرة الثانية ..
ضاحي ـ والله أنا نادم ..
دانه ـ وهالندم من أي بنك أصرفه ..
ضاحي ـ دانه .. أرجوج .. أنا محتاج لج ..
دانه ـ ما أقدر ياضاحي .. ما أقدر .. هالشي أقوى مني .. كرامتي أكبر من احتياجك .. للحظات ظنيت أني خلاص.. انتهيت من حالة الضيااع اللي كنت فيه .. للحظات . . وللأسف .. كانت ظنوني كلها غلط .
ضاحي ـ دانه .. ماتصدقين شكبر فرحتي اليوم .. أنه اللي كنت أشك فيه طلع غلط.. واحساس الندم الفظيع أني أسأت لج ..
دانه ـ ضاحي .. أرجوك .. جرحك كبير في قلبي .. كبير .. ماينسى في لحظة .. اتهامك.. كان .. الجرح الثاني لي ..
حذفت ملابسها وطلعت من الغرفة ..
طلع ضاحي وراها ..
ـ دانه ..
وقفت .. بس مالفت ويهها له ..
ضاحي ـ شالسؤال الثاني ..
دانه ـ أي سؤال ..
ضاحي ـ كنت تبين تسأليني سؤالين ..
دانه ـ .............................. .....
تحركت لين افتحت الباب ..
ـ كنت بسألك اذا تحبني ولا لاء ..
طلعت قبل لا تسمع الجواب .. كانت تبي تسأله هالسؤال من واجهها فيصل .. لكنه حست انه ماله معنى ..
************
ـ ما بتحضر عرسي ؟؟
خالد ـ لا يا عبير .. عندي امتحانات ..
عبير ـ بس انت قلت لي أنه اجازة الكريسماس .. صح ولا لاء ؟؟
خالد ـ الطيران كله محجوز.. وبعدين امتحاناتي صعبه وطول الاجازة بحبس نفسي .. ماعندي وقت أبد .
عبير ـ خالد .. شفت بدور أمس ..
خالد ـ وين ؟
عبير ـ في بيت ناصر ولد عمتي .. كان عندهم عشا لرجوعهم من العمرة ..
خالد ـ شلونها ؟؟
عبير ـ غير .. اللي محيرني انها سلمت على امي عادي ولا كأنها طليقتك ..
خالد ـ .......................... والدانه شلونها ؟؟
عبير ـ ما ادري يا خوي .. من تطلقت تغيرت حالتها .
خالد ـ مارجعت لريلها ؟؟
عبير ـ لا ....
خالد ـ وقمر ؟؟
عبير ـ خالد .. أنت من صجك تسأل ؟؟
خالد ـ ايه ..
عبير ـ حفلة ملجتهم ثاني أيام العيد .. يعني بعد بكره ..
خالد ـ كلميها عبير
عبير ـ no way أنت مينون ؟؟؟؟؟؟؟؟؟؟؟
خالد ـ بس جسي النبض ..
عبير ـ ما ادري .. تكلمت وايد عنك جدامها .. ولا مهتمة ..بس اسألتني مرة وحد اذا حمد من النوع اللي يلين راسه مع الحنه والرنه ..
صك التلفون خالد في ويهه عبير .. ما عجبه كلامها .. طبعا بعد شقة العائلات العربية انتقل لسكن شباب .. للاسف ما يعجبه ولا واحد فيهم .. كان فيه واحد اسمه دين(أمريكي ) وواحد اسمه خورشيد (باكستاني ) ,, وواحد اسمه دونالد .(أمريكي .. (
كلهم طلاب في نفس الجامعه اللي هو فيها .. ولقى اعلان مطلوب رووم ميد . لان اللي كان في الغرفة اللي هو فيها ارتحل .. (انتحر) ..
رن تلفون ..
ـ يس ..
ـ اتس مي كايت .. أم آوت ..
ـ جست أمينت ..
كانت علاقته بكاثرين قوية .. طول اليوم معاها .. ويتجولون ويدرسون مع بعض ... ويرجع في الليل معاه أكل يتفطر مع خورشيد بدون ماينطقون كلمة .
كاثرين ـ آر يو ستل فاست ؟؟
اسألته عن الصيام ..
ـ يس .. تودي از ذا لاست داي .. توومورو وي ويل سيليبريت ..
كاثرين ـ سيلبريت ؟؟ واي ؟؟
شرح لها خالد عيد الفطر . وكان مزعوج وايد لان امه ما رضت تكلمه .. ولا ابوه .. بعد ماعرفوا انه يا الدووحه وما مرهم ..
|