ازياء - فساتين سهرة و مكياج و طبخ - الستات فى عصر الفضائيات..

الستات انوااااااااااع
الواحد مستغرب جدا من ال بيشوفوا كل يوم ويسمعه
وباحس كتير انى مش تبعهم وان ساعات باتكسف من عمايلهم
قررت اكتب عن مجموعه الستات ال قابلونى فى حياتى
ودول بقى ستات اخر زمن

ال مش مهتمه غير بفلانه وعلانه ودى عملت ودى سوت
ولا مالهاش غير الحديث عن الموضه والفساتين والهدوم والجزم ..
وال رايحه جايه على دكتور الريجيم والكوافير والجيم وخلافه
وال قاعده فى البيت همها الاول والاخير الطبيخ وبس..زغط زغط فى العيال والراجل ...
وال التليفيزيون محور حياتها وابطال المسلسلات كانهم اهلها واصحابها... عايشه المسلسل بكل كيانها ..
المهم نبدأ بقى وعلى بركه الله
يا اما الناس تقرا وتسمع وتفهم
يا اما ............؟؟
ودى بقى ماعرفش ساعتها انا هايكون وضعى ايه!!
ربنا يستر

الحلقه الاولى
هابى نفتالين داى !!
على الصبح كده لا قيت واحده جارتى
(( من الجيران القلائل ال ممكن يخلوك تفكر تعزل وتطفش من بيتكم ))
جيالى بمجله فى ايديها انا قولت الست محتاجه حاجه مهمه ولاقيتها بتورينى صفحه فيها مقال كده عن عيد الحب وكيف تسعدى زوجك فى يوم الفلانتين..
وعماله تحكيلى وتقولى
شوفتى انا عملت ايه؟؟؟
قولتلها قولى يا جوليت القرن

(( ياختى العلم نور ، والحمد لله انتهى عصر الجهل ال عشت فيه زمان وانتورت واتقدمت لازم اعمل حاجه..... دانا كنت فى جهل بقى بعيد عنك....كنت عيله صغيره ومفعوصه ولا عندى ادنى معرفه بالامور المتجدده دى ...

لازم الواحد يبقى "ورش طحن" على رأى الواد حماده ابنى ..

قولت لازم اعمل حاجه وافيدك بالتجربه عشان انتى شكلك كده مقفله ومالكيش فى التجديد!!

انا نويت انى اعمل حاجه تدل على حبى للاستاذ بتاعى ..البشمهندس جوزى
آه لا يقول عليا متخلفه ومن ايام الديناصورات ولا حاجه...

و قولت لابد اظبط هديه ماحصلتش ....هديه مبهره مجنونه مش اى كلام لا يقول انى باستخسر فيه لا سمح الله يعنى....
وطبعا انا هاديها طقم احمر مدندش...ماهو لازم كده زى العيال ال باشوفهم فى التليفزيون
و شويه ورد أحمر من الجنينه ال جنب البيت............ بس هابعت حد من العيال يقطفه بدل ماالجناينى يمسكنى ولا حاجه ويبقى شكلى مش حلو..
وقومت يوميها وقولت
يلا استعنا على الشقى بالله....... هو مفيش حد يعنى يعرف يعمل النظام ده غير العيال المفاعيص بتوع اليومين دول ولا ايه يعنى؟؟؟

لا داحنا حلوين اوى ورومانسيين طحن والحب عندنا من القلب اوى اوى ...بس لولاش مش عايزه أعقد حد ولا اتنش عين!!!

المهم جبت الورد صحيح مش كله احمر وكان فيه شويه حشائش على نباتات متسلقه بس ماشى حاله..
والهديه كانت بيجاما وطبعا لونها معروف "أحمر" بحكم المناسبه طبعا ولا ايه؟؟؟

واللفه ماكنتش عارفه اجيب منين ورق مدندش والاسعار بينى وبينك جنان قومت اخدت من الجلاد بتاع كراريس العيال الاحمر .......ومالوا يعنى هو حد هاياخد باله!!
رشه بارفان من بتاعى ال يدوخ اجدعها واحد فش فش فش فش ...............كح كح كح الظاهر طلع زياده حبتين بس مش مشكله !!!

وزوقت البيت ولا اجدعها كوفى شوب ........قلوب قلوب على كل الحيطان...
وزينه حمرا من السقف وبلالين و نظام ماحصلش ...
ودخل جوزى من الشغل ..
وقف شويه على الباب ويبص فى مفتاحه ويبص على الحيطه بتاعت الشقه وشويه على رقم الشقه وبعدين اتأكد انه مش غلطان ولا حاجه وان البيت بيته فعلا فادخل وهو بيقدم رجل وياخر رجل.......
"مش عارفه الراجل خايف من ايه؟؟؟ "
انا بقى فاجأته........ وزغروته بقى من النوع الشديد لولولولولولولولوىىىىىىىىىىىىى
كل سنه وانت طيب يا حبيبى هابى "نفتالين داى " يا جوزى..
الحقيقه المفاجأه كانت شديده اوى عليه راح قاعد على اقرب كرسى قدامه وماسك قلبه وبان عليه التأثر اوى اوى قلبه بيدق يا خونا من الحب ..
اديته الهديه على طول كده فى حموتها عشان ما ياخدش فرصه انه يقولى حاجه..

فضل يبصلى ويبص للهديه والله شكله هايعيط !! مش مصدق نفسه طبعا عملتله مفاجأه وافتكرته وظبطته بهديه وعاملاله نظام روشنه من بتاع الفيديو كليب ....

هو طبعا ما اتكلمش خاااااااااالص يعنى بياخد وقته وبيفكر هايقولى ايه؟؟؟
ويدارى كسوفه منى فين اكمنى انا جبتله هديه وهو ولا افتكر اساسا ....... بس عادى يعنى انا مش معقده ...
مفيش كلام!!!حاله من الهدوء الغريب !!والانبهار طبعا !!
دخل الاوضه وهو بيتسند على الحيطان ومنكسر اوى من كسفته منى اكيد ..
ولا قالى فين الغدا ولا حاجه زى كل يوم ...شبع ياخونا لما شافنى طبعاً.
حلو اوى فكره عيد الحب دى ،بجد مش عارفه كانت تايهه عن الواحد فين بس؟؟؟؟؟
ها انتى بقى عملتى ايه؟؟؟
الحقيقه ماكانش عندى اى تعليق غير (( الله يخيبهم ...))
منقول