ازياء - فساتين سهرة و مكياج و طبخ

https://images.google.com.eg/url?sour...du3a4WBTHzUF8A

مصر يـمّه يابهيه
يا ام طرحة و جلابية
يسبق كلامنا سلامنا
يطوف ع السامعين
معنا عصفور محندق
يزقزق كلام موزون
و له معنى عن أرض سمره
و قمره ضفه
و نهر و مراكب
و رفاق مسيره عسيره
و صورة حشد
و مواكب ف عيون صبيه
بهيه عليها الكلمه و المعنى
**
مصر يامه يا بهيه
يا ام طرحه و جلابيه
الزمن شاب وانتي شابه
هو رايح و انتي جايه جايه
فوق الصعب ماشيه فات
عليكي ليل و ميه
و احتمالك هو ّ هو ّ
و ابتسامتك هيّ هيّ
تضحكي للصبح يصبح
بعد ليله و مغربيه
تطلع الشمس تلاقيكي
معجبانيه و صبيه يا بهيه
**
الليل جزاير جزاير
يمد البحر يفنيها
و الفجر شعله ح تعلا
و عمر الموج ما يطويها
و الشط باين مداين
عليها الشمس طوافه
إيدك في إيدنا ساعدنا
دي مهمة الموجه تتعافى
بالعزم ساعه جماعه
و بالإصرار نخطيها
**
مصر يامه يا سفينه
مهما كان البحر عاتي
فلاحينك ملاحينك يزعقوا
للريح يواتى
اللي ع الدفه صنايعي
و اللي ع المجداف زناتي
و اللي فوق الصاري كاشف
كل ماضي و كل آتي
عقدتين و التالته تابته
تركبي الموجه العفيه
توصلي بر السلامه
معجبانه و صبيه ..
يا بهيه و يعود كلامنا بسلامنا
يطوف ع الصحبه حلواني
عصفور محني يغني
على الافراح ومن تاني
يرمي الغناوي تقاوي
تبوس الارض تتحنى
تفرح و تطرح و تسرح
و ترجع تاني تتغنى
اللي بنى مصر
كان في الأصل حلواني!!

احمد فؤاد نجم