ازياء - فساتين سهرة و مكياج و طبخ - بسألك لارحت منهو الخسران؟

ترحل وتحسبني لارحلت اقدر على النسيان..
وانا الي لاطرا طاري رحيلك ضعت بشتاتي
دخيلك ،،بسألك لارحت منهو مننا الخسران..
أنا والاّ انت ؟،،جاوب قبل ماتكتب بي آهاتي
أنا الي من عرفتك والسما قوس وغلاك الوان..
وأرضي تعزف اهزوجة فرح لاجتْك خطواتي
وصوتك غيمة ٍ أحيت جفافي ، والوصل هتّان..
وحزن عمري يموت بضحكتك ياكل بسماتي
تعرف انك غلاي وراحتي ، وان التعب لابان..
يموت ان جيتلك يالي هواك اجمل حكاياتي
وتعرف اني على بساط انتظاري أجمع الأحزان..
واكبّلها اذا وصلك اخذني من متاهاتي
انا من قبل اعرفك مالقيت لهالعمر عنوان..
سوى : حزن وأمل ضايع ،ويأسي هو مداراتي
أنا من قبل اعرفك كنت اقول ان الغلا حقران..
واقول ان الهوى كذبه ،،قناعاتي كما الآتي
قليل الي صدق ،،والي يخون بهالزمن كسبان..
كثير الي يمرون ،،وقِناعاتي قناعاتي
وجيت وعرفت اني بحكمي كنت انا الغلطان..
وصرت انت القناعات ،،وحنيني وإتجاهاتي
دخيلك ،،مابقى فيني شعور ٍ يحتمل خذلان..
دخيلك لاتخليني أسير ليأس راياتي