ازاي تستعدي في رمضان
 

السلام عليكم


https://photos.azyya.com/store/up2/0808310007289k5h.jpg

كل سنة وأنتم طيبين كلها كام يوم ورمضان يهل علينا ومعاه الخير كله، وأكيد كل البيوت دلوقتي أعلنت حالة الطوارئ استعدادا لقدوم الشهر الكريم...
وطبعا ممكن ما تكونيش عارفة تعملي إيه؟
وتشتري إيه؟
وإيه الحاجات اللي بيتك محتاج لها!!
وإيه اللي مش محتاج لها!!!
وإزاي تحتفظي بالخضروات والفاكهة واللحوم عندك لأطول فترة ممكنة؟

لأن زي ما أنت عارفة إن رمضان وقته ضيق جدًّا ومحتاج إنك تكوني منظمة نفسك ومرتبة كل حاجة كويس قوي قبل ما ييجي...

علشان كل الأسباب دي قررنا النهارده إننا نكون معاكي في العدد الخاص جدا جدا ده علشان نساعدك بأفكارنا ومقترحاتنا ونقولك إزاي تستقبلي الشهر الكريم وإنت أعصابك هادية جدا جدا جدا

تعالوا نشوف هنعمل ايه في رمضان

رد: ازاي تستعدي في رمضان
 

رد: ازاي تستعدي في رمضان
 

https://photos.azyya.com/store/up2/080831001658Jw7x.jpg

بعد ما جهزتي نفسك وكتبتي كل حاجة أنت عايزاها بالضبط دلوقتي ياللا بينا نروح على السوق ونشوف هتشتري ازاي؟

لو هتشتري طيور

https://photos.azyya.com/store/up2/080831001658eotG.jpg

لو هتشتريها صابحة من عند الفرارجي يبقى خدي بالك إن جلدها يكون متماسك وكله لون واحد ومفيش عليه أي آثار للكدمات زي مثلا إن لونه يكون مزرقّ.

لكن لو هتشتري الطيور دي من عند السوبر ماركت أكيد طبعا هتكون مجمدة في الحالة دي تاخدي بالك أن مايكونش فيها أي آثار للماء أو بلورات الثلج يعني تكون متجمدة كويس وتاخديها وتروحي على البيت على طوول وتحطيها في الفريزر علشان ما تديش فرصة إن التلج بتاعها يفكّ.

بس نصيحة بيني وبينك كده الطيور الطازجة أحسن مية مرة من الطيور المجمدة.

لو هتشتري لحمة

https://photos.azyya.com/store/up2/080831001659UYFM.jpg

لازم تكون من عند جزار إنت واثقة منه علشان تتأكدي إن اللحمة دي كويسة.
وخدي بالك إن لون اللحمة يكون وردي قاتم وابعدي نهائيا عن اللحمة اللي لونها مائل إلى الرمادي أو المبللة لأن دي بتبقى لحمة فاسدة.لو هتشتري سمك

https://photos.azyya.com/store/up2/080831001659m9GG.jpg

السمك سواء اللي بيعيش في الميه المالحة أو العذبة لازم يكون عيونه لامعة ممتلئة ورطبة وخياشيم السمكة نظيفة ولونها أحمر وما يكونش عليها أي أثر لمادة لزجة وجلد السمكة يكون بيلمع وألوانه واضحة ومفيش فيه أي خدوش.

لكن لو كنتي هتشتري سمك فيليه يبقى خليكي شاطرة واشتري السمكة كاملة وبعد كده خلي اللي بيبيع يقطعها لك.
لو هتشتري خضروات أو فاكهة

https://photos.azyya.com/store/up2/080831001700Ew3L.jpg

يبقى يا ريت برضه تشتري الخضروات والفاكهة الطازجة ودي هتعرفيها من لونها بإنه يكون زاهي.
لو هتشتري حاجات معلبة أو مجففة

https://photos.azyya.com/store/up2/080831001700Zilm.jpg

لو هتشتري حاجات معلبة أو مجففة زي "التين المجفف أو المشمش المجفف" يبقى يا ريت تشوفي تاريخ الصلاحية والانتهاء اللي بيكون مكتوب على العلبة وكمان خدي بالك إن العلبة تكون مقفولة وسليمة.

وعلى فكرة فيه أكتر من سوبر ماركت بينزلوا تخفيضات كويسة وأسعار كويسة بمناسبة رمضان ممكن تعرفي الأماكن بتاعتها وتروحي تشتري منها وأهو منها توفري فلوسك ومنها تضمني حاجة كويسة وتشتري كل طلباتك من مكان واحد موثوق فيه..

وبكده يبقى إحنا اشترينا كل حاجة وتعالي دلوقتي نروح البيت ونشوف هنعمل إيه؟!

رد: ازاي تستعدي في رمضان
 

https://photos.azyya.com/store/up2/080831003055s70d.jpg

بعد ما رجعتي البيت دخّلي الحاجات اللي جبيتها المطبخ وغيّري هدومك وهاتي مجموعة من الأكياس البلاستيك النايلون بس خدي بالك إن الأكياس دي تكون ناشفة ونظيفة جدا وكمان هاتي ورقة وقلم وسلوتيب وده علشان تكتبي على كل كيس اسم اللي موجود جواه وتلزقيه بالسلوتيب.

ودلوقتي جه الوقت اللي هنشوف فيه إزاي نخزن كل حاجة من الحاجات اللي أنت جبتيها دي... لأن كل حاجة ليها طريقة معينة في التخزين...
نشوف مع بعض
بالنسبة للطيور

https://photos.azyya.com/store/up2/080831003056dOuC.jpg

شيليها من الكيس بسرعة وابدئي في تنظيفها وده بأنك تغسيلها من جوه ومن بره وتشيلي أي آثار للريش أو أي دم موجود عليها وبعد كده تحطيها في طبق كبير وتدعكيها كويس بالملح من جوه ومن بره وتعصري عليها نص ليمونة وتسبيها لمدة نص ساعة وبعد كده تغسليها كويس تاني بالميه من الملح والليمون وتحطيها في مصفاة علشان تصفي الميه كويس وبعد كده هاتي كيس بلاستيك ناشف وحطيها فيه وفرغي منه الهواء واقفليه كويس وحطيه على طول في الفريزر.
بالنسبة للحمة

https://photos.azyya.com/store/up2/080831003056FgfN.jpg

طلعيها من الكيس البلاستيك وبعد كده حطيها في حلة وحطيها في التلاجة على الرف اللي تحت الفريزر لمدة أربع ساعات وبعد كده هاتي كيس بلاستيك ناشف وحطيها فيه وفرغي أي هواء في الكيس واقفليه كويس وشيليه في الفريزر.. نفس الشيء ده هتعمليه مع اللحمة المفرومة.بالنسبة للسمك

https://photos.azyya.com/store/up2/080831003057bbxV.jpg

بعد ما تروحي البيت على طوول طلعي السمك من الكيس بتاعه وابدئي في تنظيفه كويس.

ودي طريقة تنظيف السمك:
1. امسكي وسط السمكة وقشري جلدها باتجاه الرأس بسكين أو بحافة سكين غير حادة.

2. قصي الزعانف بواسطة مقص حاد. شقي جانب السمكة بسكين حادة كبيرة من أسفل رأسها حتى بداية ذيلها وتأكدي من أنها قد شقت جيداً من الداخل شيلي الأمعاء ونظفي بطن السمكة كويس.

3. بعد كده ابدئي في تنظيف السمك بالميه الباردة وبأكد بالميه الباردة وبعد كده حطيه في مصفاة وسيبيه علشان يصفي ميته وحطيه في كيس بلاستيك ناشف وشيليه في الفريزر.بالنسبة للخضروات والفاكهة

الخضروات الورقية زي "النعناع والبقدونس والشبت والكزبرة والجرجير"

https://photos.azyya.com/store/up2/080831003057cDHi.jpg

أحسن طريقة لحفظ الخضروات الورقية في الثلاجة طازجة لأطول فترة ممكنة هي إنك تلفيها في فوطة نظيفة وبعد كده تحطيها في كيس بلاستيك وتحطيها في التلاجة.الطماطم

https://photos.azyya.com/store/up2/080831003057f9rm.jpg

لو كانت الطماطم طرية يبقى اغسليها كويس وبعد كده قطعيها واضربيها في الخلاط لغاية ما تبقى عصير بعد كده صفيها وحطيها في أكياس نايلون ناشفة وحطيها في الفريزر لحين الاستخدام.

لكن لو كانت الطماطم جامدة يبقى حطيها في مصفاه وحطيها في التلاجة زي ما هي.الفلفل والقرنبيط والجزر

https://photos.azyya.com/store/up2/080831003058TaIU.jpg

ممكن تشيلي الفلفل الرومي بالتجميد عن طريق إنك تغسليه وتقطعيه شرائح طويلة أو مكعبات، وتحطيه في أكياس نايلون وبعد كده تحطيها في الفريزر، ونفس الشيء ده هتعمليه مع القرنبيط والجزر.

البامية


https://photos.azyya.com/store/up2/080831003058uWXi.jpg

هاتي البامية اللي إنتي عايزة تجمديها واغلسيها كويس وبعد كده حطيها في مصفاه علشان تتخلص من أي ميه فيها....

بعد كده هاتي السكينة وابدئي في تقميع البامية بإنك تشيلي الجزء العلوي منها بشكل هرمي واوعي تقطعيها من النص أو من الطرف لأن ده ممكن يخليها تنزل العصارة اللي فيها.

بعد كده اغلي ميه وحطي عليها نصف ليمونة ومعلقة ملح بعد كده حطي فيها البامية لمدة خمس دقائق وبعد كده شيليها من الميه المغلية، وحطيها في مصفاة وافتحي عليها الحنفية بميه باردة بعد كده سيبيها شوية علشان تصفي الميه اللي فيها...
بعد ما تتأكدي إنها مبقاش فيها ميه نهائي هاتي كيس نايلون وحطي فيه البامية بس خدي بالك وإنتي بتحطيها إنك تفرغي الكيس من أي هواء بعد كده اقفلي الكيس كويس وحطيه في الفريزر..


البسلة والفاصولياء

https://photos.azyya.com/store/up2/080831003059xGBW.jpg

هاتي البسلة وفصصيها واغسليها كويس وحطيها في المصفاة.

بعد كده هاتي حلة كبيرة فيها ميه وضيفي ليها معلقة كبيرة ملح وسيبي الميه تغلي على النار بعد ما تغلي ضيفي إليها البسلة وسيبيها لمدة 5 دقائق بعد كده حطيها في المصفاة واغسليها على طول بميه باردة من الحنفية وده علشان تحافظي على لونها الأخضر وعلى القيمة الغذائية اللي فيها.

بعد كده سيبيها شوية علشان تصفي الميه اللي فيها...

بعد ما تتأكدي إن مابقاش فيها ميه نهائي هاتي كيس نايلون وحطي فيه البسلة بس خدي بالك وإنتي بتحطيها إنك تفرغي الكيس من أي هواء، بعد كده اقفلي الكيس كويس وحطيه في الفريزر... ونفس الشيء مع الفاصولياء..
ورق العنب

https://photos.azyya.com/store/up2/080831003059GwEj.jpg

هاتي ورق العنب واغسليه كويس وبعد كده حطيه في ميه مغلية لمدة 3 دقائق وشيليه منها وحطيه في مصفاة يصفي ميته ويبرد بعد كده لفيه في فوطة ناشفة وحطيه في أكياس نايلون بس برضه اتأكدي إن الكيس مفيهوش أي أثر للهواء وبعد كده حطيه في الفريرز.

الملوخية

https://photos.azyya.com/store/up2/0808310030599GJ1.jpg

هاتي الملوخية وقطفيها واغسليها كويس وحطيها في مصفاة علشان تصفي ميتها كويس وبعد كده خرّطيها وحطّيها في أكياس نايلون ناشفة وحطيها في الفريزر.

البصل والثوم والبطاطس

https://photos.azyya.com/store/up2/080831003100Q9FJ.jpg

دول مش محتاجين إنك تحطيهم في التلاجة لأنك ممكن تحطيهم في مصفاة وتحطيهم في أي زاوية من زوايا المطبخ..

الفاكهة

https://photos.azyya.com/store/up2/080831003100SRqT.jpg

من الممكن إنك تغسليها وتنشفيها كويس وبعد كده تحطيها في كيس بلاستيك ناشف وتحطيها في الثلاجة أو الفريزر..
أو ممكن تعمليها عصير وتحطيها في الفريزر.

بالنسبة للبهارات والتوابل

https://photos.azyya.com/store/up2/080831003101YytN.jpg


يا ريت تحتفظي بالبهارات في مكان جاف؛ لأن الحرارة أو الرطوبة الزايدة بتخلي الأعشاب والبهارات الجافة تفقد نكهتها بسرعة.

علشان كده يا ريت ما تخزنيش الأعشاب والبهارات الجافة بالقرب من أفران الغاز أو المايكروويف أو أي مصدر للحرارة أو الرطوبة زي أجهزة غسل الصحون وغلايات الماء.

وخليكي دايما عارفة إن الأعشاب والبهارات دي لو خزنتيها بشكل صح فده ممكن يخليها تحتفظ بنكهتها لمدة عام أو اتنين.

وبالنسية للحبوب زي الفول والعدس

https://photos.azyya.com/store/up2/080831003101408M.jpg

ممكن تحطيها في أكياس بلاستيك وتقفليها كويس ودخليها التلاجة..

بالنسبة لياميش رمضان والمكسرات

https://photos.azyya.com/store/up2/080831003102uEhg.jpg

بالنسبة لياميش المشمشية والتين المجفف والمكسرات ممكن تحيطهم في أكياس وتحطيهم في التلاجة.

بالنسبة للجبنة القريش

https://photos.azyya.com/store/up2/080831003102ifM6.jpg

ودي أكيد كلنا بنحبها في رمضان وأحسن طريقة علشان تحافظي على الجبنة القريش في التلاجة أكبر فترة هي إنك تحطيها في لبن بارد ومعاها قرن فلفل أخضر حامي.

أو إنك تغلي كوباية ميه وبعد كده تسيبيها لغاية ما تبرد وبعد كده تضيفي إليها شوية ملح وتحطي فيها الجبنة وقرن شطة أخضر حامي.

وبكده تبقي إنت جهزتي كل حاجة عندك في البيت

وتستقبلي رمضان وأنت أعصابك مستريحة

وكل عام وأنتم بخير

رد: ازاي تستعدي في رمضان
 

يارب الموضوع يعجبكم وينال اعجبكم

ورمضان كريم علينا وعليكم