أكبر قهر لاجيت تعشقلك انسان
والي تحبه ساهي ٍ ما درى بك


وأكبر قهر تحلم وتحلم لك ازمان
ويطيح حلمك ميت ٍ عند بابك


وأكبر قهر تبني من سنين بنيان
وتشوف بنٌيك ما تعدى ترابك


وأكبر قهر تسقي من الورد بستان
وتموت بين يديك زهرة شبابك


وأكبر قهر تارد على البير ضميان
وتشوف بعض الطين حايس شرابك


وأكبر قهر لاحطوا الناس نيشان
كل ٍ يزٌهب وانت ضايع زهابك



وأكبر قهر ترهي على حصان خسران
يوم السبق لا طحت كل ٍ حكى بك


وأكبر قهر لاصرت ضايع وعطشان
ونفس الطريق الي يوديك جابك


وأكبر قهر صاحبك لا جاك خوٌان
لابحت له بالسر راح وشى بك


وأكبر قهر تعطي وتعطي علشان
تاخذ عقب كل العطايا حسابك


كل ما سبق ذكره على الشوف ما كان
حفنة حروف ٍ مع بعضها تشابك


ماهوب هرج ٍ يِعجَنْ بفم ولسان
ولاهوب عود ٍ يكسره حد نابك


إن كنت فيما قلت تحتاج برهان
ناظر وتلقى في قصيدي جوابك


وإن كنت فيما قلت مخطي وغلطان
أترك خطانا وأنت عطنا صوابك