ازياء - فساتين سهرة و مكياج و طبخ

بصوا ياقمرات انا بعمل البسبوسة بطريقتين احلى من بعض بس مختلفين تماما عن بعض وبيبقوا مختلفين شوية فى الطعم بس الاتنين تحفة

دى طريقتى الاولى :
سهلة اوى اوى ونخلى بالنا ان كل المكونات هتعاير بعلبة القشطة اللى هنستخدمها -- علبة قشطة ( اللى هى الصفيح زى نستله ) + علبة زبادى كبيرة + ملو علبة القشطة سمنة بلدى ( لو مفيش منصحكيش تعملى بسبوسة بالطريقة العادية ) + 2 سيمولينا او سميد البسبوسة + 1 جوز هند + 1 سكر + 3 ملاعق كبار عسل ابيض + معلقة صغيرة بيكنج بودر
-- كله يتقلب مع بعضه بالويسك بدون مانسيح السمنة ولا اى حاجة ( مهم ان الخليط يكون لين ميكونش جامد ولا يكون سايب بس لما تهزيه فى الوعاء يتهز معاكى زى المهلبية ياريت تكونوا فهمتونى لان نجاح البسبوسة يعتمد على قوام عجينتها قبل السواء
-- ندهن الصينية طحينة ودى طبعا اهم تكة بتدى طعم محمص وجميل للبسوة وكمان مابتلزقش خالص وطبعا التكة دى واخداها من شيف اسامة من زمان اصل البسبوسة دى اول حلويات انا عملتها :)
-- نفضى خليط البسبوسة فى صينية تقريبا مقاس 30 على المقادير بتاعتى دى ونساوى الوش بايدينا مبلولة مية
-- ندخلها فرن مسخن على 180 يعنى متوسط الحرارة لمدة ربع ساعة لحد ماهنلاقي الجوانب بدأت تنشف والوش جمد شوية هنطلعها ونرص عليها المكسرات المحمصة وانا استخدمت لوز وسودانى ( ودى تكة تانية من شيف اسامة لان كده نكهة المكسرات بتبان اكتر ) وبعدين نرجعها الفرن تانى تقريبا كمان 20 دقيقة بنلاقى الجوانب احمرت تماما والوش بدأ يحمر ,, نختبرها بعود الشوى ولو طلع نضيف يبقى استوت بس نطفى الفرن ونولع الشواية ونزل الصينية على ارضية الفرن تستوى من فوق كويس ويحمر وشها

** الشربات :
نعمله اول ماندخل الصينية الفرن عشان يكون سخن لما تطلع الصينية من الفرن 1كوب سكر + 1 كوب ماء على النار حتى الغليان وبعدين نعصر نص ليمونة ونوطى النار ونسيبه لحد مايعقد ,, ونعرف انه عقد باننا ناخد بالمعلقة نقطة منه ونزلها على الرخامة نلاقيها كورة متماسكة مش بتفرش اول ماتنزل على الرخامة ,, قبل مانطفى النار نضيف معلقة سمنة بلدى ومعلقة عسل ونقط ماء زهر ,, ونقلب ونطفى على طول ..
-- طلعت الصينية من الفرن على طول نصب عليها الشربات السخن نوزعه على الوش كله ولما يشربه وطبعا هيشربه فى ثوانى لو البسبوسة ناجحة ,, نوزع اللى باقى من الشربات ونغطى عليها شوية ,, ولما تهدا نقطعها وبالهناء والشفاء ..