ازياء - فساتين سهرة و مكياج و طبخ - بيف ستراجانوف مع المكرونة بالصوص الابيض والكسبرة الخضرا

**المقادير :
شرائح لحم فيليه (( من عرق الفلتو بتاع البفتيك )) حوالى نصف كيلو او حسب رغبتك
مدقوقة ومترقرقة ومقطعة شرائح مدورة متوسطة ومتبلة بفلفل اسود وملح خفيف
بصلة كبيرة مفرومة بالسكينة
3 فصوص ثوم مفرومين
فلفل رومى اخضر والوان شرائح طولية
مشروم حوالى نصف كوب
كريمة لبانى (( كريمة خفق )) حوالى نصف العلبة الصغيرة
كوب زبادى كبير زى المراعى ال 170 جرام مضاف اليه (( ملعقتين مستردة + فلفل ابيض وبهارات لحمة وجنزبيل وريحان وكسبرة ناشفة مطحونة )) ومتقلبين كويس كلهم فى الزبادى
ملعقة دقيق مذابة فى نصف كوب ماء
كوبين ماء
** الطريقة :
-- فى طاسة تيفال كبيرة او فى صينية تيفال اللى تحبيه المهم يكون تيفال وكبير
نشوح البصلة فى 3 ملاعق سمنة على زيت او حسب رغبتك برضه زيت بس او سمنة بس ونشوحها تشويح خفيف تدبل بس عشان لسه هتقعد على النار كتير مش عايزينها تغمق وطعمها يمرر
-- نزل على البصل بالثوم المفروم ونشوح تشويحة خفيفة برضه
-- نزل عليهم باللحمة ونراعى اننا مانحطش شرايح كتير مع بعض مرة واحدة والا اللحمة هتنزل ميتها وتعمل زفارة وكمان هتنشف (( لو الشرايح عددهم كتير اقسميهم على مرتين زى منا بعمل يعنى شوحى نصهم على البصل والتوم وبعدين انشليهم على مناديل وشوحى النص التانى من اللحمة وبعدين رجعى اللحمة كلها فى الطاسة وكملى الخطوات))
-- بعد اللحمة كلها متشوحت نزل عليها بالفلفل الاخضر والالوان ونقلب كويس

-- نزل عليها بخليط الزبادى والمستردة والبهارات ونقلب كويس اوى بحيث ان اللحمة كلها تتشرب من الخلطة ونسيبها دقيقتين على النار مع التقليب

-- نضيف معلقة الدقيق المذابة فى نصف كوب ماء ونقلب وبعدين نضيف كوبين مية ونسيبها تغلى غلوة وبعدين نوطى عليها النار ونغطى عليها ونسيبها حوالى 20 دقيقة وكل شوية نبص عليها هتلاقى الصوص بيتقل عشان الدقيق

-- بعد التلت ساعة هنختبر سوا اللحمة طلعى حتة فى طبق وشوفيها استوت وبتقطع بسهولة ولا لسه ,, ممكن تسيبيها شوية على النار الواطية مع تغطية الطاسة لحد ماتستوى تماما ولو احتجتى تضيفى شوية مية اوك بس مش هتاخد منك اكتر من نص ساعة ابدا لان دى لحمة فلتو يعنى ناعمة جدا وبتستوى بسرعة

-- بعد ماتستوى اللحمة ,, ضيفى المشروم والكريمة اللبانى وقلبى دقيقتين
وبس خلاص اطفى النار وبقى عندك احلى طبق بيف واعملى معاه المكرونة بالصوص الابيض على طريقتى انا وبتطويرى وتجاربى

** المكرونة بالصوص الابيض :

-- اسلقى المكرونة ويفضل اسباجيتى عادى مع شوية ملح وزيت وصفيها واغسليها بماء بارد وسيبيها على جنب

-- فى الحلة شوحى 3 فصوص ثوم مفرومين فى ملعقة سمنة واول ماريحتهم تطلع انزلى عليهم بمعلقة دقيق مذابة فى ربع كوب حليب وقلبى بسرعة بمضرب سلك عشان مايتكتلش

-- ضيفى الملح والفلفل وبهاراتك (( انا بضيف كسبرة ناشفة مطحونة ورشة زعتر وبهارات فراخ وجنزبيل بودر )) وبعدين انزلى بمكعب ماجى مذاب فى نصف كوب ماء مغلى وقلبى كويس

-- اخيرا ضيفى نصف كوب كريمة لبانى ومعلقة جبنة سائلة زى بريزيدون كوباية بالقشطة او مربعين كيرى وقلبى كويس وقبل ماتطفى ضيفى بقدونس او كسبرة خضراء مفرومة وضيفى المكرونة وسيبيها على نار هادية 5 دقايق وقلبى وبس خلاص..