ازياء - فساتين سهرة و مكياج و طبخ - صينية السمك الهامور فالفرن

بسم الله..... الاول اى نوع سمك يا جماعة تحبوه يتعمل بنفس الطريقة... بس يكون حجم السمكة كبير عشان تعرفو تفتحوه وتحشوه نغسل السمك طبعا بالليمون ونفتح السمكة بسكين حامى من البطن كأنك بتفتحى عيش فينو ودلوقتى نحضر الخلطة السحرية وعبارة عن
(( توم + بقدونس+ ملح +كمون+ فلفل اسمر.....نفرمهم كويس سوا وبعدين نحط عليعم عصير ليمونة +واحدة طماطم قطع صغيرة+ واحدة بصلة تقطع صغير + قرن فلفل شطة قطع بردة + حوالى معلقتين زيت ذرة وبعدين نقلبهم كويس مع بعض ونحشى بيها السمك ونسيبها مفتوحة ....... تحضير الصينية___ الفرشة اللى هانحط عليها السمك عبارة عن شرائح طماطم وبصل وبطاطس وكوسة وعليهم رشة ملح وفلفل اسمر و4 ملاعق زيت ذرة ودول نقلبهم سوا ونفرشهم فى الصينية ... ونحط السمك عليهم.مع رشة زيت بسيطة فوق الكل..... وتدخل الفرن اول خمس دقايق نار عالية وبعدين متوسطة لحد ما يستوى ___مش هاكلكم على طعم السمك ده ولا طعم الفرشة اللى تحته اللى هى البطاطس والكوسة .... ياااااااااااااه طبعا هاتقدميه فى طبق وترصى البطاطس والكوسة حواليه .... وبالهنا والشفا