تورتة الجلي
 

سهلة وطعمها مميز اوى واحلى واخف من التورت العادية
** المقادير :
كيك اسفنجى (( انا بستخدم خليط بيتى كروكر الجاهز واعمله زى مامكتوب على العلبة بيطلع هش جدا وخفيف وطعمه حلو ,, او اعملى كيك اسفنجى انتى بطريقتك ))
مكسرات محمصة وفواكه اما عنب او موز او فراولة وممكن الاناناس المعلب عشان دول اللى بيمشوا مع الجيلى (( المكسرات المحمصة مع الفواكه بتعمل كونتراست جااااااااامد فى الطعم ))
باكو جيلى النوع اللى حبيه بس الاحمر بيبقى شكله جميل ومميز تعمليه بنصف مقدار الماء اللى مكتوب على العلبة
كريم شانتي مخفوق بلبن ساقع وفانيليا وسكر حسب الرغبة ومحطوط فى الثلاجة (( للحشو والتزيين ))
مكسرات مفرومة فرم خشن لتزيين وتغطية جوانب التورتة
** الطريقة :
نعمل الكيك الاسفنجى بتاعنا ,, ولما يبرد تماما نقسمه بالعرض الى ديسكين او تلاتة زى مانحب وقبل مانقسمها طبعا نعلمها بعلامة فى المكان اللى هنبدأ نقسمها منه عشان لما نيجى نحط الطبقات على بعضها تانى نحطها مضبوطة وماتكونش معووجة ,, ونسقيها عصير تفاح جاهز او سفن اب بس على خفيف بالمعلقة عشان ماتبوشش وتتهرى
وبعدين نفرد طبقة من الكريم شانتى وعليها المكسرات المحمصة والفاكهة ,, وبعدين نقفل طبقات التورتة كويس على بعضها
فى نفس الصينية اللى عملنا فيها الكيك الاسفنجى هنحضر الجيلى بنصف مقدار المية المكتوب على العلبة وبعدين نرص فيه قطع او شرايح الفاكهة اللى نحبها وبعدين ندخله الفريزر يجمد ويتماسك بس مش اوى عشان عايزينه يلزق فى الكيك لما نحطه عليه يعنى اول مايتماسك وياخد قوامه المعروف نطلعه من الفريزر ونحط فوقيه الكيك الاسفنجى بتاعنا بالراحة خالص بس طبعا هنحط الكيك بالمقلوب عشان هنقلب كل ده تانى ,, وندخلهم الفريزر تانى بقى ونسيبهم فترة كويسة ممكن من بالليل احسن ,,
هنيجى بقى نطلعهم من الفريزر ,, هنكون مجهزين صينية كبيرة اكبر من الصينية اللى عاملين فيها الكيك وحاطين فيها مية سخنة واول مانطلع صينية التورتة من الفريزر ننزلها فى المية السخنة يادوب خمس ثوانى فقط مش اكتر والا الجيلى هيسيح وهتبقى مشكلة ونروح قالبينها على طوووووووول هتنزل معاكى ان شاء الله سليمة وحلوة ,,
بعد كده هنزوقها من فوق بالكريم شانتى بالشكل اللى نحبه ومن الجوانب هندهنها كلها كريم شانتى كويس اوى ونملسها كويس وبعدين نغطيها بالمكسرات المفرومة ناعم ونرجعها التلاجة شوية تتماسك كويس من تانى ,, وبس خلاص نطلعها بعد كده على التقديم
وبالهنا والشفا :))

رد: تورتة الجلي
 

مشكورة حبيبتى على الوصفة