ازياء - فساتين سهرة و مكياج و طبخ

بسم الله .... دى يا حلوين اكله جميله جدا وان شاء الله تعجبكم
المقادير : لفه جلاش ، اتنين باكيت من السلمون المدخن وده هتلاقيه فى السوبرماركت وباكيت سبانخ وفلفل الوان وكريمه مخفوقه للطهى
الطريقه : اولا نشوى الفلفل ثانيا السبانخ نجيب طاسه ونحط فيها الأتى معلقة زيت زيتون وفصين توم مفرومين ناعم وبصله صغنونه اوى مفرومه ونشوحهم وبعدين نحط السبانخ معاهم ونقلبها بسرعه علشان مش تنزل ميه كتير وبعدين لما تحسى ان السبانخ دبلت تضيفى ملح بسيط وفلفل والخطوه الجايه دى مهمه رشة دقيق يعنى تقريبا معلقة شاى وتقلبى السبانخ لحد ماتحسى انها تقلت وبعدين تضيفى معلقه اكل كريمه وتقلبى على النار شويه تقريبا 5 دقايق وتطفى عليها وتعصرى 2 ليمونه يبقى كده جهزت السبانخ
طبعا دلوقتى جه دور الفلفل بعد مايبرد تقطعيه بالطول وترشى عليه فلفل اسود ومعلقة شاى زيت زيتون وعصير ليمونه وتقليبهم
كده جهزت الحشوه ومش قادره اقول اد ايه ريحتها والله حلوه جدا
نجيب صينيه وندهنها بازبده ونرص الجلاش ونسيب جزء منه بره الصينيه هتبان فى الصوره اللى بعد كده وهكذا لحد مايخلص الجلاش وطبعا بين كل ورقتين ندهن شوية زبده وبعدين نجيب السلمون بعد مانرش عليه عصير ليمونه كبيره ونرصه الأول وبعدين السبانخ وبعدين الفلفل وده موضح فى الصور وبعد كده نقفل الورق على بعضه وبردو ندهن زبده بس مش تكتروا وندهن الوش الأخير وندخلها الفرن لحد الوش مايبقى لونه دهبى نطلعها ونسقيها بيضه صغيره وشوية لبن مخفف بشوية ميه طبعا هتقولوا ليه الميه علشان مش عوزاها دسمه وهيه اصلا فيها كريمه وطبعا تحطى على البيضه شوية فلفل اسود وترجعيها تانى الفرن علشان تشد وطلعيها وبالهنا والشفا ومش قادره اقولك على الألوان لما بتقطع بتبقى تحفه ..... خلى بالك من الملح لأن السلمون بيبقى حادق شويه وكمان احنا حاطين ليمون .... وبالهنا والشفا