ازياء - فساتين سهرة و مكياج و طبخ

مرحبا صبايا امبارح كنت رايحة عند خالتي وكانت عاملة اكلة رهيبة رهيبة عنجد
لما ذوقتها انهبلت فيها وما استنيت بسرعة ركض عالبيت وطبقتها وطلعت مش طبيعية
ولاني بحبكم حبيت اعطيكم الوصفة الي رح تعجبكم متل ما عجبتني

طيب صبايا خلينا نجي للمقادير

* معلقتين زيت قلي
* لحم ستيك ولازم تكوني عاملتيه شرائح رفيعة يعني تقريبا
* بصل صغير وقشريه واعمليه انصاف تقريبا حبة او تنين
* 2 فص ثوم مدقوقات
* فطر بس فارمينه ارباع
* كوب ماء
* نص كوب حليب مركز
* ربع م ص فلفل اسود مطحون
* م ص زعتر يابس
* م ص ريحان يابس
* مكعبين ماجي
* معلقتين نشأ
* 3 حبات بندورة مقشرة ومفرومة
وبس شايفين ما اسهلهم

هلأ بنحط الزيت بقلاية على النار وبعدين بنحط الستيك بس بنخلي النار متوسطة عشان ما ينحرق
وبس يصير لون الستيك ذهبي بنحط البصل والثوم والفطر وبنحركهم شوي تقريبا 4 دقايق
بعدين بنخلط الماء مع الحليب والفلفل الاسود والزعتر والريحان ومكعبات الماجي وشوي ملح
ونشأ بصحن تاني وبعد ما نخلطهم بنحطهم فوق القلاية الي فيها الفطر والستيك
بس لازم نحرك منيح منيح وبعدين بنحط فوقيهم البندورة لحتى تغلي بنخليهم على نار هادية شي
6 دقايق وبس يا حلوين
وبنقدمه مع معكرونة مسلوقة يعني بنحطه فوق المعكرونة المسلوقة ولي ما اطيبه