ازياء - فساتين سهرة و مكياج و طبخ - الحب لاحل وسط القلب مفعوله

الحب لاحل وسط القلب مفعوله= اقوى من الكيمياء ومن محاليله

ياخذ مع الدم في الشريان كم جوله = ويصعب على القلب تغييره وتبديله

وتصبح شرايين قلبي عنه مسؤله= وترعاه حتى تجي حزة محاصيله

الحب ماينعطى للناس بسهوله= ولاكل واحد يدور حب نعطي له

لابارك الله بحب إجتمع حوله= كذب وخيانه ودمعات (ن) وتضليله

إمغير(ن)ظاهره بعلوم معسوله= وفي داخله سم يبرى الحال ويزيله

وتذوق منه العذاب المر بأصوله= وتبرك لحمل الهموم وتعجز تشيله

شربت كاس الخداع وذقت محلوله= غصب(ن)عليه شربته مامعي حيله

وإنهار قلبي منه والنفس مذهوله= عزي لنفسي وقلبي منه عزي له

وبطلت أحب وقفلت القلب بقفوله= وحلفت درب الهوى والحب ما اجي له

وأخلفت وعدي بعد ماشفت أموله= ورجعت للحب من أوسع مداخيله

نعم أحبك وأعيد الهرج وأقوله= من لاعشق مثل أمل ياناس عزي له