ازياء - فساتين سهرة و مكياج و طبخ - اكلات لذيذة وغير مكلفة تضحكى بيها على طفلك علشان ياكل الاصناف اللى مش بيحبها

فراخ- لحمة - بيض - لبن - سبانخ او خضروات
ولادنا بيعذبونا علشان ياكلو الاصناف دى صح ؟؟؟؟
مع انها اكتر اصناف مهمة لنموهم ؟ بس انابقا جبتلكو الحل الاكيد للمشكلة دى واللى هايخلى اولادكم ياكلو كل الاصناف دى وهم اللى يطلبوها منك كمان
ابتكرت شوية طرق كدة وجربتها كلها على اسرتى علشان اتاكد من فاعليتها... ونتيجتها طلعت اكيدة 100%
مش بس كدة دى كمان ماخدتش منى اكتر من 7 ج تكلفة ووربع ساعة فى التحضير وكلها من تلاجة بيتى .
تابعونى كل يوم علشان تشوفو طريقة جديدة ومبتكرة لاكلة ولادك هايحبوها جدا وصحية ومتجربة قبل ما اجيبهالكو يا قمرات بس بليز لو حد فيكو جربها ونفعت معاه مش ينسانى بالدعاء
اول وصفة من الوصفات السحرية اللى هاتعجب اطفالك :
الفطيرة المجنونة لوكا لوكا انا اخترعتلها الاسم ده :):)
المكونات :
1- صدر فرخة مسلوق ومخلى من العضم ومفروم - او قطعة لحمة كبيرة مسلوقة ومفرومة - او قطعة سمك كبيرة مسلوقة ومفرومة ( اكيد هاتبقى طابخة اى اكل فى اليوم ده فيه اى نوع بروتين اختارى النوع اللى هاتبقى طابخاه فى اليوم ده ) .
2- نص حزمة بقدونس متقطعة ( الاوراق فقط بدون العروش )
3- حبة طماطم مقطعة شرايح رفيعة بدون البذر .
4-بيضتين
.
5- ثلاث معالق دقيق كبار
تلت كوباية لبن
ملح - فلفل اسود
3 معالق سمن او زبدة حسب نوع الدهون اللى بتستخدميه.
طريقة التحضير :
بتخلطى الدقيق واللبن والبيض مع بعض لحد ما يمتزجو تماما وبعدين بتضيفى البروتين بتاعك ( فراخ او لحمة او سمك ) وبعدين بتحطى باقى المكونات ماعدا الزبدة لان دى اللى هانحمر فيها الفطيرة وتخلطى المزيج لحد ما تحسى انه بقا متماسك وممتزج تماما وبعدين بتضيفيله الملح والفلفل حسب مانت شايفاه مناسب لطفلك
بتجيبى طاسة وبتحطى فيها السمن وتقدحيه وبعدين بتنزلى الخليط فيه بحيث يكون على شكل قرص مفرود مش سميك اوى علشان يستوى ومش رفيع اوى علشان مش ينشف يعنى يكون وسط وبعد تقريبا 20 ثانية تقللى النار على الاخر زى ما بتعملى الرز كدة .
لما تحمر من تحت اقلبيها واعملى نفس الموضوع لحد ما تتحمر بردو
وبعدين حطيها فى طبق وقطعيها زى ما بتقطعى البيتزا او التورتة وقدميها مع بطاطس محمرة لطفلك حمرى واحدة بطاطس واحدة كفاية لانه مش هاياكل اكتر من كدة
انتو عارفين الوصفة دى هاتكلفكو كام ؟
بالظبط 7 ج
بالذمة فيه ارخص ولا اسهل من كدة
انت كدة جمعتى فى طبخة احدة البروتين والدهون والكربوهايدرات والفيتامينات والحديد اللى طفلك محتاجهم والاكلة طعمها لذيذ جدا ومش مكلفة فى الوقت ولا الجهد جربوها ولالهنا على قلب حبايبى الصغننين ولو نفعت ماتنسونيش بالدعاء
نورشاد