طريقة عمل بيتزا حلوه جدا
 

السلام عليكم ورحمه الله وبركاته
وحشتوووووووونى يا قمراااااات اوووووووووووووى
النهارده بقا عملت البيتزا وصورتها وقلت لو طلعت حلوة هنزلها لو مش حلوة خلاص
بس والله عملتها وكنت هااااااكل صوابعى وراها من حلاوتها
مش هطووووول وهدخل فى الموضوع على طوووووووووووووول
مقادير العجينه : 3 كوب دقيق - 3 ملعقه كبيره زيت زيتون ولو مش موجود ممكن زيت دره - ملعقه سكر صغيره - نص ملعقه ملح صغيره - 2 ملعقه خميره صغيره - نص كوب لبن دافى " زى دمع العين " - بيضه
طريقه عمل البيتزا والمينى بيتزا بالصور وبالتفصيل الملل
اول خطوه هنعملها اننا نحط ملعقه السكر وملعقتين الخميرة على نص كوب اللبن الدافى ونقلبهم ونسيبهم على جمب يخمرو
وفى الوقت ده هنروح للدقيق ونحط عليه نص ملعقه الملح و 3 ملاعق زيت الزيتون والبيضه
ونروح حاطيين نص كوب اللبن اللى عليه الخميرة والسكر عليهم ونعجن بقا
هنلاقى العجينه محتاجه لميه نبقا ساعتها نكمل بميه دافيه ونعجن لحد ما نلاقى العجينه بقت متماسكه وسابت من ايدينا
نمسح ايدينا بشويه زيت زيتون ونمشيها ع العجينه ونغطيها بفوطه ونسيبها فى مكان دافى تخمر لمده ساعه
ممكن لو حابيين اننا نستخدمها فى وقت تانى نحفظها فى كيس ونشيلها فى التلاجه او فى الفريزر لو هتقعد اكتر من يوم
ولو هنستخدمها على طول هنقسم العجينه نصين لان الكميه دى تعمل 2 بيتزا كبيرة
نيجى بقا لفرد العجينه اول حاجه هنعملها اننا ندهن الصينيه بشوية زيت صغيرين
ونحط العجينه ونفردها بسمك واحد سنتيمتر
ونسيبها تخمر نص ساعه نكون جهزنا الحاجات اللى هنحطها ع الوش
الحشو : صلصه بيتزا - فلفل اخضر مكبب - زيتون - بصله - سجق او ممكن تونه او لحمه او لانشون او ممكن نسغنى عن كل ده ونكتفى بالخضار والجنبه لو حابيين انها تكون مارجريتا - جبنه موزاريلا او جبنه تركى
اول حاجه هنعملها للعجينه اللى فردناها اننا هنحط الصلصه الاول
طريقه عمل البيتزا والمينى بيتزا بالتفصيل الملل
وبعدين نحط الفلفل المكبب
وبعد كده البصل
وبعدين الزيتون
والسجق او الحاجه اللى هنحبها وتكون عندنا
وندخلها الفرن وفى نص السوا بتاعها نطلعها ونحط الجبنه الموزاريلا والتركى
ونسيبها لحد ما تكمل سوا والجبنه تسيح وده شكلها لما طلعتها
وبنص العجينه التانيه فردتها بالمشابه وجبت كوبايه وعملت بيها دواير وبنفس الخطوات اللى فاتت عملتها
وده شكلها لما طلعت
وياااا رب تجربوها وتعجبكم ان شاء الله وبالهنا والشفا
ومتنسوش تدعولى بقاااا وتدعو لمصر وكل المصريين بالخير:e01::e020:

رد: طريقة عمل بيتزا حلوه جدا
 

الله يخليكي يا سما انا جربتها وطلعت حلوه جدا والعيال كل شويه يقوللي اعملي بيتزا ياماما لاتحرمينا من اكلاتك ومن وجودك في المنتدي ويارب احفظ مصر وربنا يباركلك والاولاد كل شويه يقولوا عايزين طنط سما تيجي عندنا وسلملي علي اولادك

رد: طريقة عمل بيتزا حلوه جدا
 

شكرا حبيبتي انشالله نجربها بس وين الصور؟؟؟ صار عندي فضول اشوف شكلها النهائي

رد: طريقة عمل بيتزا حلوه جدا
 

من عيوني يا حبيبتي معلش والله انا اسفة جدا ده بعد ما اتعملت file:///C:/Users/MY/Downloads/13421263272370.jpg دي البيتزا الكبيرة
file:///C:/Users/MY/Downloads/13421264318864.jpg ودي البيتزا الميني
وانشاء الله عتجبك والله جربيها مش هتخسري حاجة

رد: طريقة عمل بيتزا حلوه جدا
 

ممتازة بس فين الصور ياقمر