ازياء - فساتين سهرة و مكياج و طبخ

ازياء - فساتين سهرة و مكياج و طبخ (https://fashion.azyya.com/index.php)
-   ادب و خواطر (https://fashion.azyya.com/40)
-   -   الحلم (https://fashion.azyya.com/506697.html)

طبعي وفي 09-05-2015 12:40 AM

الحلم
 
قصيدة الحلم للشاعر حامد زيد:


بوقت من البطا و بليل تتراقص شياطينه

بعد شفت الضيا ينزع من ثياب المسا ثلثين


تحايلت المنام اللي مثل بيتك تمرينه

و انا اللي من تفارقنا و أنا ما غمضت لي عين


غريبة كل حلم يمر برقادي تزورينه

و الأغرب كيف أحلم الحلم و ارجع و احلمه بعدين؟


قبل يومين شفتك بالمنام .. و قمت من حينه !

ونمت أمس ، ورجع نفس المنام اللي قبل يومين


أنا اللي قبل اسافر شلت قلبي من شرايينه

تركته في يدك مثل الأمانه ، و احفظيها زين


ترى حفظ الأمانه دين .. مجبورة تردينه

أجل ، ما فيه أحد قد قال لك ( حفظ الأمانة دين )؟!


مرد المقفي بيلفي ..و يستوفي ، و توفينه

بعد ليله ، ثلاثه ، أربعه ، عشره ، شهر ، شهرين


إذا انتي ، ما انتي بقد الكلام اللي تقولينه

حرام .. استامنك حاجة ، و إذا جيت اطلبك تنسين


تخونين ، و تبين أرضى .! و أحد يرضى تخونينه !

أنا لاجيت أخونك ، مع حبيبة ثانيه ، ترضين .؟


من أول ما رجعت من السفر ماشفت لك بينه ؟

وأنا اللي كنت أحسبك قبل ادوس ارض المطار ..تجين


تكونين أنتي أول شخص عيني تحتضن عينه

و كنت أتخيلك من زود فرحة رجعتي ..تبكين

وأشوف بدمعتك حكي .. وأعرفه قبل تحكينه

واجيب أحلى من اللي بتحكينه ، و أتركك تحكين


تقولين :الوطن نور .. وأقول بنور مضوينه

تقولي لي : غديت أحلى ، و أقول : عيونك الحلوين


كلام نام بشفاهك ..و خفتي لا تصحينه

ذخرتيه لغرام اللي ينام ..و يتركك تصحين


تغانمتي غيابي .. لين رجحتي موازينه

تعلم من يدك لمس الكفوف و علمك تجفين


و ليتك لاقية به شي .. فيني ما تلاقينه !

مهو بغرور ..لكن خابرك ما لك أمل تلقين


تغافلك بغلا ..و الإ الحلا مهو بمن زينه !!

تزينه الصور ..بس الصحيح ابن الحلال زوين


و أنا ماني بناقص عنه يوم أنك تبدينه

نصيبي ..هو نصيبي لو يسددها من الصوبين


قنوع بمظهري ، والسم ما يذبح ثعابينه

على قول المثل (ماني حلو..ولكن ماني شين )


إذا أهداك الزهر مره ، فأنا اهديتك بساتينه

وإذا ألهاك بفرح ليله، فانا تهت لبكاك سنين


و إذا استضعفتك أملاكه ... و شتتك ملايينه

أنا حتى فتات الخبزة أقسمها معك نصين


طموحي ، بس أجي و أظفر بشي تستحقينه

تدينته ..تسلفته ..سرقته ..مو مهم منين


كأني من كثر ما ارضى بكل اللي تمنينه

لو انك تطلبين الله ..يعنيني ،بقول آمين


أنا ما العب على الحبلين ، وقت الطيش و سنينه

تبين الحين يوم اني كبرت العب على الحبلين؟

فخآإمهہ جيزآإنيهہ 09-06-2015 11:51 PM

رد: الحلم
 
كلمآت رآآئعهه والله


الساعة الآن توقيت السعودية الرياض و الدمام و القصيم و جدة 05:31 PM.

Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.


Search Engine Optimization by vBSEO 3.6.0