|
رد: لحظات غريبة بين اثنين ...خلقت الحب في قلبين "
الساعة 2.30
رن جوال الدانه نطت .. وبسرعه ردت قبل لايصحى ضاحي , ـ لو .. وهي تهمس .. حمد ـ آلو هلا بدانه . طلعت دانه بره الغرفه وصكت الباب بشويش علشان مايصحى ضاحي .. ـ هلا بحمد ها بشرني شلون عملية خالد ؟ حمد ـ الحمدالله استأصلوا الورم .. كان صوته صج تعبان .. دانه ـصج ؟؟ الله يبشرك بالخير .. نجحت العملية ؟؟ تغرقت عيون الدانه بدموع .. حمد ـ اييه الحمدالله دخلوا من سبع ساعات والحين الحمدالله طلعوا .. دانه ـ الحمداله الحمدالله .. كلمته شفته ؟؟ حمد ـ ممنوع لين بكره .. دانه ـ زين وبعدين ؟ حمد ـ انشاء لله يتحسن مع العلاج .. دانه ـ كيماوي؟ حمد ـ لا .. هو ورم موب خلايا سرطانية .. بس كان حاله وايد متأخره ..الحمدالله انهم لحقوا عليه .. دانه ـ وليلى ؟؟ حمد ـ موجوده بس بعيد هالحين في الكافتيريا .. دانه ـ الحمدالله .. اههم شي سلامته .. حمد ـ الحمدلله .. كانت عمليه خطره وايد . دانه ـ الحمدالله .. متى بترجعون ؟؟ حمد ـ بعد تقريبا اسبوعين اذا تحسنت حاله .. دانه ـ انشاء الله .. يا عمري يا خالد يا عمري .. الحمدالله .. والله اشتقت له مووت .. حمد ـ قولي لمي وبوي ما قلت لهم .. دانه ـ انشاء الله .. زين يالخايس ليش ماتتصل تاركني في نار ؟؟ يلست على لاكرسي .. حمد ـ أخاف تسندريني ببنت اخوج . دانه ـ اايييييه .. القمر.. حمد ـ قصدج القهر .. ابتسمت دانه ماتذكر وين اسمعت اللقب عن قمر من قبل.دانه ـ ليش انشاء الله . انت بس ترجع يسون حفلتين .. حفلة رجوع خالد والحفلة الثانية خطوبتكم ... حمد ـ خلاص ماني براجع .. دانه ــ ارجع بس ارجع .. حمد ـ وأتزوج هالمايعه؟؟ لاء .. دانه ـ نشوف بعدين . حمد ـ ما بيخلوني اتزوج هالخام مستحيل . دانه ـ زين ما يحتاي نقاش في هالموضوع لانا انتهينا منه يلا مع السلامه بتصل في بوك .. حمد ـ ما انتهى سمعتي لما ارجع نتفاهم.. اتصلت دانه في ناصر موب هامها الوقت وقالت له الخبر وحست بفرحته ودموعه مع انها بس تسمع صوته .... صكت التلفون وهي معصبه .. ـ شفيج؟؟ ـ سمعت خبر من امي .. ما ترتاح يا حبها للتقليد في كل شي .. خالد ـ بدور؟؟ شفيج تحرطمين؟؟ بدور ـ قمر الشيخة ما هدا لها بال الا تنخطب .. ما ترتاح الا لما تآخذ كل الاهتمام .. تضايق خالد.. وانزعج لهالخبر .. ـ انخطت ؟؟ لمن؟؟ بدور ـ هالمتعوس المنحوس المعقد حمود . خالد ـ من؟ بدور ـ حمود ولد عمي ..حمد نسيته؟؟ خالد ـ لحمد؟؟ بدور ـ اييه .. هالكريهه ما ارتاحت الا تتزوج عقبي علشان تطير ني اللقب . خالد ـ.................. بدور ـ بتصير هي العروس اليديده أنا أراويها هالعفنة .. كان خالد مصدوم .. حس بخنقه .. قمر بتآخذ حمد ؟؟ انصدم بقوة .. قمر بتآخذ حمد ؟؟ بس قمر له ,,,له .. ****************** ظلت دانه مستغربه شلون ضاحي يطلع من غير ما يسلم عليها ؟؟ نطرته طول العصر .. ما يا .. وهذا يعني انه سافر .. اتصلت فيه ما يرد .. ماتعرف ليش .. مرتها قمر هي ومريم .. قمر ـ شفيج ؟؟ دانه ـ ضاحي سافر من دون ما يكلمني .. قمر ـ متزاعلين؟؟ دانه ـ بالعكس .. أنا وهو سمن على عسل .. ما ادري ليش طس جي واختفى . مريم ـ تلاقينه مالحق هو بين شخصيات سياسية الحماية عندهم اوفر يمكن مالقى وقت يتصل .. دانه ـ يمكن .. ضيفتهم وتموا يسولفون لين المغرب .. مريم ـ اووه رمضان غير يالدانه .. غير لازمتيين البيت مبجر وتجهزين سفرتج . دانه ـ ادري .. أمي مع اني كنت صغيرة الله يرحمها علمتني كل شي .. قمر ـ هالسبب هو الي خلا امي بتسافر لبدور .. أن بدور ماتعرف شي وبيكوون صايمين .. دانه ـ يمكن .. مريم ـ أنا بيب لج أغراض رمضان .. أدري مع دراستج ما بتفضين .. دانه ـ والله ما ادري شقول .. مشكورة يا مريم ما أطلع من يزاج .. مريم ـ هالحين بروح لهناء أتحمد لها بسلامة ولدها تيين يا قمر ؟؟ قمر ـ مع الدانه ايي في الليل .. عندي كم واجب .. طلعت مريم بعد ما سلمت على الدانه .. الدانه ـ يسلم عليج . قمر ـ من؟؟ الدانه ـ حمد .. قمر ـ مرياااااااااااااااام انطريني يايه معاج .. الدانه ـ وين رايحه ؟ قمر ـ دام بتفتحين هالسيرة ما بيلس هنا . دانه ـ خلاص .. روحي لعمتج ام خطيبج وتحمدي لها بسلامة حماج .. عصبت قمر ـ والله انج حمارة .. دانه ـ مريم ؟؟؟ قمر ـ ما برووح .. دانه ـ شوفي الجانب الايجابي .. وأنتي وليلى بتظلون قريبين من بعض .. ومني .. قمر ـ بس ما ابي حمد .. تعرفين من الي في بالي .. دانه ـ رجعنا !!!! خلاص نظفي مخج من الصدا .. تراج خرفتي قبل عمرج . قمر ـ اتطنزي انتي موب حاسه في هالنار اللي داخلي .. دانه ـ يالخبله ياتج فرصه من ذهب تعيشين حياة ثانية يالخبله حمد أحسن من هالسخيف اللي ابتلت فيه اختج .. قمر ـ لاتقولين عنه سخيف .. هو الي ابتلى فيها موب هي اللي ابتلت فيه .. دانه ـ ياربي .. انا ما بقول شي .. بس بكره بتقولين وين حمد وين هالزفت خالد .. تعالي نروح لغرفتي أدرس . قمر ـ زين ليش انتي وخالي تنامون في غرف منفصله؟؟ دانه ـ لا .. غرف وايد في اتلبيت .ز أنا جامعه .. وهو وظيفته .. كل منا يبي له مساحته الخاصه .. بعدين أنا ارجع في اوقات يكون هو نايم فيها ما ازعجه وارتاح في غرفتي .. To be continue طبعا ,, السؤال هل اقتربت القصة من النهاية ؟؟ يمكن اي ويمكن لاء .. |
رد: لحظات غريبة بين اثنين ...خلقت الحب في قلبين "
((دانه ـ خلاص .. روحي لعمتج ام خطيبج وتحمدي لها بسلامة حماج ..
عصبت قمر ـ والله انج حمارة .. دانه ـ مريم ؟؟؟ قمر ـ ما برووح .. دانه ـ شوفي الجانب الايجابي .. وأنتي وليلى بتظلون قريبين من بعض .. ومني .. قمر ـ بس ما ابي حمد .. تعرفين من الي في بالي .. دانه ـ رجعنا !!!! خلاص نظفي مخج من الصدا .. تراج خرفتي قبل عمرج . قمر ـ اتطنزي انتي موب حاسه في هالنار اللي داخلي .. دانه ـ يالخبله ياتج فرصه من ذهب تعيشين حياة ثانية يالخبله حمد أحسن من هالسخيف اللي ابتلت فيه اختج .. قمر ـ لاتقولين عنه سخيف .. هو الي ابتلى فيها موب هي اللي ابتلت فيه .. دانه ـ ياربي .. انا ما بقول شي .. بس بكره بتقولين وين حمد وين هالزفت خالد .. تعالي نروح لغرفتي أدرس . قمر ـ زين ليش انتي وخالي تنامون في غرف منفصله؟؟ دانه ـ لا .. غرف وايد في البيت . أنا جامعه .. وهو وظيفته .. كل منا يبي له مساحته الخاصه .. بعدين أنا ارجع في اوقات يكون هو نايم فيها ما ازعجه وارتاح في غرفتي .. ************ البيت فاضي .. قمر ما قدرت تبات معاها ..لان منيرة عصبت عليها . حست أخيرا براحه خالد قام بالسلامه .. دخلت الغرفة .. وهي مستغربة من ضاحي .. شلون ما يتصل فيها ؟؟ حاست دفاترها بحجة الدراسه لكنها تعبت .. قلبت قنوات التلفزيون .. مافي شي سنع .. قامت تتمشى في البيت وهي ملانه .. الساعة 1 في الليل .. ..حتى الخدم نايمين . في الصالة كان الاستيريو وجنبه سيديات وايد .. لقت السيديات .. لقت ام كلثوم وعبدالحليم ومحمد عبدالوهاب .. الجيل القديم كله .. حتى عيسى الاحسائي ...وفرج عبدالكريم .. حطت عبادي الجوهر ... كلمة ولو جبر خاطر ...ولا سلام من بعيد .. ولا رسالة يا هاجر ..بيد ساعي البريد ... أنا في انتظارك تقابلني وتسمع قصتي حتى النهاية .. وأنت اختيارك تسامحني اذا حبيت أو تنسى هوايا .. حرام كسر الخواطر .. كثر الجفا مايفيد .. حرام مادمت فاكر تهجر وتبعد بعيد .. كلمة ولوجبر خاطر .. ولاسلام من بعيد .. ولا رسالة ياهاجر بيد ساعي البريد .. ان كنت ناوي تعذبني أنا راضي بتعذيبك واحبك .. من مثل أنت يقنعني ومن يقدر يخليني أسيبك .. حرام كسر الخواطر كثر الجفا مايفيد .. حرام ما دمت فاكر تهجر وتبعد بعيد ..... ايه من ذنب عندي استاهل عليه هجرك والعناد .. ياللي خنت عهدي بعد الود ليه ؟؟ من بعد الوداد من بعد الوداد .. )) ـ أرق؟؟ التفت دانه للصوت . وماقدرت ما تبتسم .. كان ضاحي واقف وهو مبتسم..وبين يديه بنت صغيره .. قامت له وسلمت عليه وخذت منه هالبنت الصغرة . كانت البنت ملاك صغيير .. ـ شلون تسافر جي بدون ماتكلمني ؟ ضاحي ـ تكنسلت المهمة اللي كنا بنروح لها .. فسافرت تركيا ويبت البنت من عند يدتها .. اللي طولت يلا استوعبت .. ـ في يوم واحد؟؟ تسافر تركيا وترجع؟؟ ضاحي ـ لاتنسين أنا مين؟؟ وبعدين أنا سافرت الصبح الساعه سبع .. وعلى ريولي من الصبح .. دانه ــ حمدلله على سلامتك .. يعطيك العافيه .. ارتاح ايلس .. حطت دانه البنت ودخلت تيب لريلها شي يروي منه ... *********************** تخللت أصابعه في شعرها .. وطالع لها بنظرات حنونه .. ـ اشتقت لج .. نزلت عيونها .. اللي في ثواني ذرفت دمعه .. ـ ليش الدموع ؟؟ ـ اليوم حسيت بالغربة لما سافرت .. بعد ما حسيت بالامان أخيرا وراحه البال .. طالع لها بنظرات غريبه .. ـ أمان ؟؟ ـ أكيد ,, كنت ضايعه نفسيا ومعنويا في الفترة اللي راحت .. كنت خايفه .. بس الحالله بع صبر طويل .. الحمدالله الله انعم علي بزوج حنون . ـ بس حنون ؟ ابتسمت .. كل الماعر في قلبها لضاحي مالها نهاية .. كأنها ينبوع تفجر في صحرا مشاعرها .. خلاها تتلون بألوان هالمشاعر وترتوي منها .. ـ تبيني أمدحك ؟؟ بدري .. ـ ليش بدري ؟ دانه ـ ........ ضاحي ــ تستحين ؟؟ عالعموم أنا ما كنت أبي مدح بس كنت أبي أشوف شلون يكون ردج .. ــ خلاص ..أبي ردك .. التفت ضاحي في هاللحظة يمسح على راس بنته مايا .. وكانت هي جالسه جنبه .. بينهم شبر ... ــ أوكي ردي عن نفسي ؟؟ ابتسمت ـ لاء طبعا .. ردك عني ؟؟ ـ ليش تطولينها وهي قصيرة ؟؟ قولي امدحني .. ضحكت .. انتبهت لنظراته وهي تضحك .. دانه ـ ليش تطالعني جي ؟ ضاحي ـ أحبج لما تضحكين .. ارتاحت دانه .. وحست بشعور غريب .. ضاحي ـ أحسج .. تنورين بهالضحكه .. دخلت الخدامة وهي شايله بيدها صينية العشا .. نزلت دانه راسها ... وقام ضاحي . ـ بروح أغسل يديني وجههي .. دانه ـ ثانك يو روزيتا .. روزيتا ـ اني ثنج ايلس ؟؟ دانه ـ نو ثانكس باك تو سليب . روزيتا ـ قود نايت .. قامت دانه لقرب مايا ... كانت نايمه مثل الملاك .. ما تشبه ضاحي ..كل الشبه لأمها اللي شافتها دانه في الصور .. رجع ضاحي .. ــ وين راحت الخدامه ؟ ـ راحت تنام .. ليش تبي شي ؟؟ ضاحي ـ كنت أبي جاي .. دانه ـ رايحه أسوي جاي .. ضاحي ـ لا .. أخاف ما تعرفين .. دانه ـ لا صدقني .. أعرف .. ما تدلعت لهالدرجة .. **************** ضغط على أسنانه بقوه بس علشان يكتم غيضه .. ـ وبعدين ؟ عصبت بدور قامت وخذت مجلاتها ودخلت الغرفة وهي معصبه .. مسك كتاب كان يقرا فيه .. و ومسك قلم .. فرغ غضبه بهالقلم وكسره بقوة .. وحذف الكتاب على الأرض بعصبيه .. (( متى بتفهم هالحمارة ؟؟؟ )) تعب خالد من نكد بدور ودلعها .. وعدم احترامها لانشغاله في الامتحانات والواجبات ورغباتها الدايمه في الطلعات والسوق والمولات .. لو أنهم في الدوحه كان أمان تطلع بروحها ما يخاف عليها .. لكنهم في أمريكا .. أم الجرايم والمصايب .. ماتقدر تطلع بروحها .. ولا مع أي بنات بعيد عن نظره .. بين كل ثلاثه تشوفهم في الطريق في واحد مجرم .. عصب أنها تتجاهل حاجته للدراسه وبذل جهده .. وماهمها إلا وناستها .. بس في نفس الوقت ما يلومها ... ما يقدر .. صار لها أشهر بين هالجدران .. وبروحها .. خصوصا أن ماريا ماتجي إلا علشان شغل البيت .. فكر .. عرس عبير بعد العيد .. بيسافر ولا لاء ؟؟ طبعا بيصادف الكريسماس هنا .. فتكون أجازه قصيره .. يترك بدور في بيت عايلتها ويرجع يكمل .. وجوده بروحه ينهي كل دراسته .. ويرتاح .. خذ جاكيته وطلع برا البيت يتمشى .. كان الجو بارد وايد .. والناس وايد .. نيويورك في الليل أحلى منها في النهار .. كان مكتئب من سمع زواج قمر .. حاول يكتم غيظه لكنه ما قدر .. بدور لاحظت عليه شروده وبروده .. ولاحظت الضيقه اللي هو فيها ..وسألته ان في شي يعكر مزاجه لكنه برر لها أنها الدراسه .. ما يقدر ينسى قمر .. صج يشبهون بعض وايد .. لكنه .. يلس مع قمر ساعتين . وأعجبته وايد تمكنت من قلبه في ثواني .. وبدور ما كان لها أي محل من الاعراب في حياته قبل ما يغلط ويتزوجها بالغلط .. بدور موب شينه حيل . لكن قمر لها .. لها شي في قلبه .. دخل محل قهوة .. كان يبي يدفي عظامه شوي .. -hi .. كانت كاثرين الي معاه في المستشفى . -hi - can I ….. أشر لها خالد على الكرسي .. - be my gest.. - thanks… are you wating for someone? -no … - do you finish your search? - no -I can help you with it.. استانس خالد...أخيرا حد يساعده في هالبحث الملعون .. - realy?? Do you know about the referance?? -yeh ..meet me tomorrow herer I will bring some books.. انتبه خالد انها تطالع رفيجتها اللي واقفه عند المدخل .. - we will go to drink a beer if you want to came?? - thanks..i don’t drink.. كانت نظراتها واضحه .. نظرات اعجاب . شرب خالد قهوته وطلع يتمشى . بعد نص ساعه رجع البيت وهو مشتري معاه كم مجله أجنبية طبيه .. دخل لمكتبه وما مر بدور .. موب كل مرة يراضيها تعب .. قلب في هالمجلات..وبعدين حط راسه ونام على الكنبه اللي في مكتبه .. ************** بانت هالحين فايده ثانية للعيش ببيوت أخوانها طول هالسنتين الي راحو ... انها تقدر تتواصل مع اليهال .. مايا ـ بدك تآكلي؟؟ مايا رغم عمرها الصغير فيها عقل كبير أكبر من عمرها .. دانه ـ اييه .. أبي آكل .. وأنتي؟؟ مايا ـ ما بدي .. دانه ـ ليش؟؟ مايا ـ ما بدي .. دانه ـ بدك تيته؟؟ هزت مايا راسها بدلع .. الظاهر البنت متولعه في يدتها ... ـ بس بابا موجود .. مايا ـموجود؟.؟؟ نادت دنه ضاحي اللي كان في مكتبه يتصل في ربعه .. ـ نعم؟؟ دانه ـ مايا .باب موجود بدك تآكلي؟؟ هزت مايا راسها باي .. ضاحي ـ من ناداني؟؟ قامت دانه لين عنده عند الباب وهمست .. ـ مستوحده .. شكلها خايفه ..ماتبي تتريق الا لما سمعت صوتك وشافتك .شكلها تبي يدتها .. ضاحي ـ هي متعلقه وايد في يدتها .. حاولي تعودينها عليج .. ـ انشاء الله تعال تريق معانا .. ما بتتعود لين تشوفك معاي .. ضاحي ـ عندج جامعه؟ دانه ـ اييه .. بس مابروح .. ضاحي ـ ليش؟ دانه ـ هالايام ما بروح .. ماعندي شي |
رد: لحظات غريبة بين اثنين ...خلقت الحب في قلبين "
الحلقة التاسعة عشرة..
*********** ـ كل عام وأنتي بخير .. ومبارك عليج الشهر .. كان خالد يكلم منيرة ببرود شديدوهو منصدم من هالتغييرات اللي فيها .. صايره أصغر من بدور .. منيرة ـ مريت فرنسا مع رفيجتي.. وبعدين ييت هنا . .. بدور ـ يمه اشتقت لج وايد .. خالد ـ وايد محلوة عمتي .. منيرة ـ لاتناديني عمتي .. تبين أني كبيرة .. نادني بمنيرة عادي .. بدور ـ واو منور .. شكلج فله .. مسوية ريلوك؟؟ منيرة ـ شفت أنا مزوجتك بنتي الذكيه ؟؟ بدور ـ بنتم واقفين هنا في المطار ؟؟ يلا خالد منيرة ـ اييه .. أكيد ريلج صايم .. ما نبيه يتعب .. طالع خالد الشنط اللي يابتها منيرة معاها واستغرب . اهتمامها بعدم تعبه وو بيشيل هالبلاوي .. منيرة ـ يبت سيلينا معاي ترتب أغراضي لي .. طالع خالد سيلينا اللي كانت مبتسمه له وهي شايله شنطة المدام الصغيرة ,, وقال في قلبه (( لو أني منها كان انحشت من زمان )) طلعت بدور مع منيرة وتم خالد مع سييلينا يحاولون يتدبرون الشنط ..وقال لها وهو يمزح ـ اهربي سيلينا .. في لجنه حقوق الانسان هنا .. جلدي اركضي .. هذي أمريكا .. الحيوان له حقوق هنا .. هاف رايتس .. ـ عاد تفهمك ولا لاء؟؟ التفت خالد للشخص اللي كلمه . وكانت مفاجأة !!!!!!!!!! خالد ـ فارس ؟؟ فارس ـ اييه .. سلم عليه ..ـ شتسوي هنا يا أخوي؟؟ فارس ـ في مؤتمر طبي ودعوني له .. ييت أنا وكم دكتور من الخليج .. خالد ـ أهلا .. فارس ـ ما بزعجك .. الظاهر مستقبل ناس من هلك .. خالد ــ أم المدام ..وين بتنزل؟؟ فارس ـ في فندق .. ما أدري والله بالضبط وين .. خالد ـ خذ هذا رقمي اول ما تستقر .. اتصل فيني .. فارس ـ انشاء الله .. وليش تبي تتنحش الخدامة ؟؟ خبل انت؟؟ تبي الاهل يطرشونك تدور عليها ؟؟ خالد ـ شسوي .. الايثار وما يسوي . ــ الشقة وايد صغيرة ؟ وين بنام أنا ؟؟ خالد ـ هذا المتوفر .. منيرة ـ سيلينا وين تنام ؟؟ ايش هاذا ؟؟ زأنتي متحمله ؟ ماتصلتي فيني وقلت لي ؟؟ خالد ـ شفيج يا عمتي ؟؟ هذا اللي لقيته .. بدور ـ يمه عادي .. تعودت .. منيرة ـ خالد .. من بكره تدور لك شقة أكبر ولا تدور لك فيلا تسكن فيها بدور .. خالد ـ أنا موب عيزان عن فيلا كبيرة ولا شقة أكبر .. بس هذا اللي لقيته .. قريب من المستشفى وقريب من الجامعه . وهذي المنطقه فيها عرب بس .. منيرة ـ لا يا خالد ما اسكت عن هالشقة .. شلون كنت عايشه فيها يا بنتي ؟؟ خالد ـ عالعموم بدور بترجع معاج يا عمتي .. بدور ـ ايش؟ خالد ـ خلاص بدور .. ارجع مع امج .. بدور ـ بس انت ما قلت لي ؟؟ خالد ـ كنت أفكر في هالشي .. وصراحه ..وجودج يقلق بالي ويشوشني لاني أتركج بروحج طوال اليوم .. بدور ـ لا يا خالد ما اقدر أصبر بعيد عنك .. خالد ـ لمصلحة الكل .. أفضل تسافرين .. منيرة ـ أي .. ارجعي معاي بعد اسبوعين .. احسن لج . بدور ـ شسوي ؟؟ خالد ـ داومي في الوظيفة اللي قلتي لي عنها .. ***************** قمر ـ ههههههه .. شوفي هالسبال يطقها ههه. قامت دانه وشالت فهد الهمجي عن مايا اللي قامت تصيح .ز دانه ـ اخوج من علمه يشد الشعر ؟؟ توه صغيير .. قمر ـ حيوان .. ما عليج منه .. آآه يوعانه .. دانه ـ ادرسي .. وانسي الأكل .. قمر ـ متى بيرجع ... دانه ـ حمد بكره بيي .. قمر ـ ما كنت أسأل عن ال.. كنت أسأل عن ضاحي خالي ؟ دانه ـ بيرجع اليوم في الليل .. قمر ـ بيتم يسافر جي دايم ؟؟ دانه ـ اييه .. لين يترقى .. يصير يسافر كل يوم .. قمر ـ وأنتي راضيه ؟ دانه ـ قلت لج من قبل .. لي حياتي اللي انشغل فيها وله حياته .. والحمدالله متفاهمين على هالمنطق .. قمر ـ ما تشتاقين له ؟؟ دانه ـ اشتاق له وايد .. قمر ـ وهو ؟؟ دانه ـ أعتقد نفس الشي .. استحت دانه من قمر اللي تستجوبها .. دانه ـ ادرسي يالحمارة .. امتحانج بكره مهم .. قمر ـ اييه مهم .. شلون تناديج مايا ؟؟ دانه ـ لليوم ما تناديني باسم محدد .. ما ادري ليش .. قمر ـ عيل شلون تناديج ؟؟ دانه ـ ما تنادين تأشر لي .. وبعض المرات اذا كنت بعيد عن نظرها تنادي ضاحي .... قمر ـ واذا خالي موب موجود ؟؟ دانه ـ تم تصيح وتبجي بدون سبب لين أيي .. قمر ـ علميها تناديج بسمج . دانه ـ اسمي صعب .. قمر ـ سوي نفس نوال الزغبي وبسطي لها .. دنا دنا دنا . وهزت قمر كتوفها ترقص .. دانه ـ لاتجرحين صيامج بتقليد هالاشكال .. قمر ـ اييه نسيت .. دانه ـ تونا في الاسبوع الاول من رمضان شاللي معذبج جي ؟؟ قمر ـ ااييه .. عمتي أنا موب مخروعه على الأكل .. بس متعوده أشرب نسكافيه كل يوم الصبح .. وفي رمضان يلازم صداع غريب .. وأجوع زياده عن الايام العادية .. دانه ـ مدمنه ؟؟ مدمنه يا قمر ؟؟ قمر ـ مدمنه ؟؟ شتخرفين ؟؟ دانه ـ مدمنه كافيين ؟؟ قمر ـ اييه خرعتيني .. ايه مدمنه .. دانه ـ ما باقي شي على الاذان .. ساعتين بس .. قمر ـ شسويتي فطور ؟؟ دانه ـ ما ادري بس بما ان نايف ما بيجي .. وضاحي بيي في الليل .. قلت لها تسوي شي بسيط .. قمر ـ حرام عليج .. أنا يوعاااانه مووت .. دانه ـ اوكي .. أنا بروح الحين المطبخ أشوف شسوت هال..هي خدامتكم شسمها ؟ قمر ـ سيدرا .. دانه ـ طباخه محترفه ؟؟ ـ بتعجبج .. طلعت دانه بعد دقايق .. ـ لقيتها مسوية بيتزا ومعكرونه بس .. قمر ـ والحلويات شسوت ؟؟ دانه ـ ما أدري كأنها مسويه كيك .. ما انتبهت .. بس بتفطرين على بيتزا ومعكرونه ؟؟ قمر ـ اييه .. عادي .. هزت دانه كتوفها كأن ما بيدها حيله .. ـ ما أدري ما يكفي .. قمر ـ ليش ما يكفي ؟ دانه ـ ماسوت شي من يدامنا اللي نعرفه .. ماسوت لاهريس ولا دياي ولا لحم .. المعكرونه بصلصه ولحم مفروم .. ولا عيش ولا ثريد . حتى شوربه ما سوت .. قمر ـ عادي من يآكل هالاصناف هالحين ؟؟ دانه ـ أنا العام أفطرت عندكم كانت موجوده .. قمر ـ لأبوي بس . أنا وأمي وبدور ما نآكل .. دانه ـ ضاحي لما يي في الليل أكيد بيكون جوعان .. قمر ـ عادي أي شي يقزر الحال .. وبعدين هو مسافر يعني ماعليه صيام , دانه ـ بس هو يصوم لان شغله كله سفر .. والحمدالله اليوم غير أول .. الرحله ماتآخذ ساعه ماله داعي يفطر .. قمر ـ وبعدين ؟؟ دانه ـ لما أرجع البيت بسوي له شي .. سريع .. قمر ـ يا عيني على الحب .. دانه ـ ادرسي بس .. حاولت دانه تتظاهر جدام قمر أنها تدرس .. بس الحقيقة ان قلبها كان مسافر بعيد .. كان عند ضاحي .. كانت تفكر شلون هي مشتاقه له لنانه لابتسامته .. ماتدري .. بس شكلها بدت تحب هالضاحي .. تحبه وبجنون .. لان هالشعور ماقد مرة غزا قلبها واجتاحه .. طالعتهالأوراق اللي بين يدينها .. وكتبت ((حلم ولا حقيقة ؟؟ واقع ولا محال ؟؟ أنا اليوم سعيده ..ولاني مشغول البال .. بس .... شالثمن ؟؟ )) ************* كان ياي لكافيه اتفق مع كاثرين انها تيب له المراجع فيه ..لكنه مر فارس وخذه معاه .. فارس ـ تشرب شي ؟؟ خالد ـ لا .. بتمرني زميله لي تعطيني بعض المراجع .. فارس ـ شفيك متغير ؟؟ كأن الحيوية اللي كانت فيك انطفت ؟؟ خالد ـ شالتعبير العجيب ؟؟ فارس ـ أنا من جد أتكلم .. خالد ـ أبد ما في شي .. فارس ـ من كان يظن أني ألاقيك صدفة تحاول تنحش الخدامة ههههههه.. خالد ـ كانت صدفة غريبه .. فارس ـ بترجع متى ؟؟ خالد ـ نهاية يونيو .. فارس ـ ترجع للمستشفى ؟؟ خالد ـ اييه .. دوام تاريخ 12 يوليو .. فارس ـ هذي رفيجتك ؟؟ خالد ـ زميلتي قصدك . اييه كاثرين .. تبيني أناديها كايت بس أنا مطنش .. فارس ـ وايد حلوة هالزميله ؟؟ طالع له خالد بطرف عينه ـ أي حلاة ؟؟ باهته وايد وعيونها صغار شالحلاة اللي تتكلم عنها ؟؟ فارس ـ روح لها روح .. تطالع بنظرات الله يستر .. خالد ـ فارس الله يستر عليك أنا متزوج .. فارس ـ وأنا بعد .. هههههههه.. خالد ـ شقصدك ؟ فارس رفع يدينه ـ ولاشي .. خالد ـ زين بكره عازمك على الفطور . فارس ـ ما عزمتني اليوم ؟؟ خليتني أفطر على كاكاو .. خالد ـ الحين شفتك .. الصبح كنت في المستشفى . .. أنا نفسي فطرت على سندويش تونا .. طالع خالد الساعه كانت ثمان ونص .. خالد ـ فيه مطعم قريب عجيب .. فارس ـ وين ؟؟ خالد ـ قريب .. يلا .. تجي معاي ؟؟ فارس ـ والشيخه ؟؟ خالد ـ المدام مع أمها . .. فارس ـ قصدت الشيخه الثانية .. خالد ـ تخسي تكون هذي شيخه علي .. بروح دقيقتين آخذ منها الراجع .. وأرجع الحين .. خلك هنا .. ـ hi kate -hi if you busy can… - I just meet afriend … أشر على فارس كانت شايله بين يدينها كتب كثيرة ...انحرجت وقالت .. - I see.look ..take this..then maybe later we will talk about it.. - thanks a lot for helping me.. - just try to help….you..see you later.. راحت بسرعه وهي نرتبكه .. وشال خالد بين يدنه مراجع كبيرة .. فارس ـ كل هالكتب وين بتحطها ؟؟ خالد ـ في السيارة نروح نتعشى وبعدين أرجع البيت آخذها .. فارس ـ بس شكلها تعنت فيهم يلا يابتهم .. خالد ـ لاتخاف ... برد لهاهالمعروف.. *************** ـ بدوور .. بدور ـ وين كنت تأخرت وايد ؟؟ خالد ـ شفت دكتور فارس .. تعشينا مع بعض .. بدور ـ ما بتخسر شي اذا اتصلت .. خالد ـ شفيج معصبه اكيد كنت مشغوله مع امج .. منيرة ـ رجعت ؟؟ خالد ـ شلونج يا ام فهد ؟ منيرة ـ بخير .. وين كنت من الصبح لين الحين ؟؟ (حلو .. صاروا اثنين يحققون معاي بدل الوحده )) ـ التقيت رفيجي وتعشينا مع بعض .. منيرة ـ ماعرفت تتصل ؟؟ خالد ـ نسيت أتصل توقعت أنكم مشغولين مع بع بعض وبعدين توها الساعه عشر . بدور بدت تصيح .. خالد بنفاذ صبر ـ شفيج ؟؟؟ ـ اتصلنا في المشتسفى قالوا انك طلعت من الساعه ست .. اتصلنا في كل ربعك اللي كتبت رقمهم في الدفتر يقولون ماشافوك .. خفنا يكون صار لك شي .. حضنها خالد وهداها .. ـ خلاص ما بعيدها ..خلاص بلا صياح .. منيرة ـ ليش يوماتصلنا بيوسف ردت علينا بنت ؟؟ خالد ـ اكيدحد من هله .. منيرة ـ بس يوم طلبنا يوسف قالت لنا مافي حد بهالاسم وان الشقة لها وماعندها حتى شريك في الغرفة .. خالد ـ ما ادري هو اعطاني هالرقم بس ما استعملته .. بس الحقيقة غير .. الحقيقة ان هالرقم لكاثرين . اللي رغم أنها تعرف بزواج خالد بس كان عندها أمل فيه .. وخالد متخوف من شكوك بدور اللي صادها مرة تشيك على ملابسه العطر والشعر ..فحط اسم كاترين بسم يوسف .. خالد ـ بروح أصلي هالحين ,, |
رد: لحظات غريبة بين اثنين ...خلقت الحب في قلبين "
خلصت صينية دياي بالبطاطس ..طلعت دانه من المطبخ .. ربع ساعه ويي ضاحي .. ركضت تحممت ومشطت شعرها . وحطت شوي مكياج .. ولما رشت العطر دخل ضاحي .. ابتسمت وقامت له .
ـ حمدالله على السلامة .. ـ الله يسلمج .شالعطر . دانه ـ اشتريته أمس لما كنت مع قمر في الستي .. ضاحي ـ ليش ؟؟ دانه ـ شاللي ليش ؟؟ ضاحي ـ ماسمعتي عبادي شيقول لج ؟؟ دانه ـ أنا ؟؟ يقول لي أنا ؟؟ ومن عبادي ؟؟ ضاحي ـ ايي ..يقول لك انتي .. دانه ــ شيقول ؟ ضاحي ـ يقول .. هو فيه مثلك ؟؟ ياللي الحسن ظلك؟؟ ليه العطر ؟؟ وأنتي أنفاسك دخون .. وليه الكحل وأنتي ما غيرك عيون ؟؟ ليه ؟؟ تفكيرك يكون ؟؟ أنك تكوني دايم أجمل أنتي أجمل أنتي أجمل من جماللك من دلالك .. من خيالك .. ياللي كل أفراح قلبي والحزن في المسافه بين فرقاك ووصالك ؟؟ طالعت له دانه متفاجئه .. وفي نفس الوقت ضحكت .. ـ وأنا على بالي أن العطر ما عجبك .. بس ابتسمت .. وهو باس راسها .. ـ ريلج يوعان .بيروح يبوس بنته .. دانه ـ خسى اليوع .. هالحين أنجب لك الاكل . *************** لما شاف الورقه انصدم .. ( I cant stop thinking about you ……I cant .. I realy like you.. in simple words.. I love you Love From first sight K )) ((حب من النظرة الأولى ؟؟ والحين ؟ وبعدين ؟؟ المصيه انها تعرف اني متزوج ..بآخذ أسماء هالكتب وأرجعها لها بكره وأعتذر . آخر شي أبيه هو غيرة بدور ) لكن خالد ما كان يدري باللي متخبي له .. ****** رجوع خالد فرحه ما بعدها فرحه .. عمامه سووا له مآدب افطار عوده .. وكل الدوحه حضرتها وحمدالله على سلامته .. كانت فرحة هناء فرحتين . رجوع ولدها .. وسلامته ونجاح العمليه .. الوحيده اللي ماكانت فرحانه كانت ...........قمر .. قمر فرحانه بسلامة خالد لكنها موب فرحانه بردة حمد .. عصبت دانه ان ضاحي اضطر يروح الاردن لمدة اسبوع .. وماحضر هالفرحة العوده . المفاجأة كانت حمل ليلى . .. اللي كان مبين عليها أنها كانت في أزمة نفسيه . هناء ـ كلي يا ليلى .. ليه ويهج أصفر ؟؟ ليلى ـ أنا آكل عمتي .. وين أمج يا قمر ؟؟ قمر ـ سافرت لبدور ..بترجع بعد أسبوع ..أو اثنين.. ليلى ـ وانتي يالدانه ؟؟ متى يبتي عيال؟؟ ضحكت دانه فعلقت هناء ـ هذي بنت ضاحي ..شسمها؟؟ م؟؟ دانه ـ مايا.. هناء ـ الي هو .. الريال كان متزوج ومرته ماتت عنه من سنين .. وخلت له هالبنت .. دانه ـ الله يرحمها .. ليلى اندهشت .. وابتسمت لما شافت ابتسامة دانه .. مريم ـ ماتآكلين يالدانه ؟؟ هالبزر فاطره وطول اليوم تآكل .. كلي انتي .. دانه ـ أنا عادي ..آكل مافيني شي .. هناء ـ كلي وخلي البزر عنج .. دانه ـ لاتقولون لها بزر .. قولو مايا .. هناء ـ مويا؟؟ دانه ـ خلاص يا هناء ناديها بزر ,, ليلى ـ صج قمر قال لي حمد أنكم انخطبتوا مبروك .. هناء ـ اييه خطبها ناصر لحمد .. انشاء الله لارجعنا من مكه نسوي حفله .. الكل = مكه؟؟ هناء ـ أنا وناصر بنآخذ ليلى وخالد ونسوي عمره .. دانه ـ ودي أيي معاكم ,, هناء ـ تعالي . دانه ـ ما اقدر وين أخلي الجامعه ومايا .. مريم ـ وضاحي ههههههه.. دانه ابتسمت .,,, عبيرـ عاد عرسي بعد العيد لاتنسون .. ام خالد ـ محد بينسى .. انشاء الله .. ********** ليلى ـ شصار ؟؟ ومن مايا؟؟ دانه ـ الحمدالله .. الحمدالله يا ليلى .. الامور بينا تصلحت .. ومايا بنته كانت من زوجه تركيه بس ماتت .. ليلى ـ قولي لي كل شي .. قالت لها الدانه ...من سفره الين بنته . دانه ـ ليلى .. ماتصدقين شقد أحبه...أحبه .. انسان قلبي استسلم له .. ماينطق الا بسمه .. غير غير .. ليلى ـ الحمدالله يعني وداعا لكل المشاكل بينكم ؟؟ دانه ـ انشاء الله .. هو .. أحس أنه يحبني .. بس سفره الدايم يسبب لي قلق .. ليلى ـ قلق؟ دانه ـ موب عدم ثقة .. بس عدم استقرار ..دايم موب موجود .. ما أحس أني أشوفه وايد .. انا في الجامعه وهو في شغله .. وبعدين يسافر أيام .. مانيلس ويا بعض وايد .. ليلى ـ دانه .. شوفي كنتي وين وصرت وين .. الدانه ـ أي والله الحمدالله .. وأنتي وخالد؟؟ ليلى ـ نموت في بعض .. بس شي واحدج مايعجبني فيه .. دانه ـ ؟؟؟؟؟ ليلى ـ يحب كرة القدم أكثر مني .. ضحكوا مع بعض .. ليلى ـ ترى صج سألته وجاوبني بهالاجابه .. *** رجع البيت بعد يوم مهلك .. كان البدورلا ناطرته في الصاله بدموع قهر .. انتبه انها لابسه وكاشخه .. ـ السلام . بدور انتفضت ـ شالحقارة ؟؟ ليش ؟؟ ليش ؟؟ أنا شسويت لك ؟؟ خالد ـ خير اللهم اجعله خير ,, شفيج بعد ؟؟ من اسبوع من يات منيرة والبدور كل يوم مسويه لها موال .. بدور ـ هذي آخرتها ؟؟ عيل ليش تزوجتني .؟ انا براويك .ز أنا بتصرف معاك بعدين .. حذفت في ويه خالد شي .. انصدم خالد لما شاف الاوراق اللي تناثرت على الأرض .. طلعت بدور وسيلينا شايله الشنط .. ومنيرة لحقتهم .. خالد ـ وين رايحين ؟؟؟؟؟؟؟؟؟ منيرة ـ رايحين نعلمها الادب وزالاصول .. طلعوا من الباب .. وخالد في صدمة .. رجع للأوراق اللي تناثرت على الأرض .. هالخط الحلو .. جمعها وحطها في ملف .. ملف أسود .. مثل لون يومه .ويومها..... |
رد: لحظات غريبة بين اثنين ...خلقت الحب في قلبين "
الدانه ـ وين راجو ؟؟
قمر ـ شفيج مستعيله ؟؟ الدانه ـ الساعه وحده .. متى ألحق وأجهز الفطور . قمر ـ بيمرني خالي فيصل . وقف شعر جسم الدانه من سمعت هالاسم .. قمر ـ شفيج ؟؟ دانه ـ ما أبي أروح معاه .. قمر ـ ليش ؟ دانه ـ أعتبره ويه نحس علي .. كل ما أشوفه تصير لي مشكله عوده.. قمر ـ شالكلام الماصخ .. يلا .. دامج مستعيله .. دانه ـ لاء .. قمر ـ كيفج .. هذي سيارته برا .. تروحين هالحين ولا ؟؟ دانه ـ أصلا ما استأذنت من ضاحي . قمر ـ خالي ما بيرفض .. تعالي .. سحبت الدانه من يدها .. ودانه استسلمت .. ـ السلام . فيصل ـ وعليكم السلام .. قمر ـ هاذي عمتي دانه .. فيصل ـ شلونج يالدانه . دانه ـ بخير .. الله يسلمك وأنت؟ فيصل ـ الحمدالله .. حست الدانه أن فيصل متغير .. متغير .. ما شافت كشخته اللي متعودها .. وحسته من دخلت مرتبك .. ما تدري ليش .. طول الطريق وقمر تتكلم معاه عن الجامعه .. ودانه اكتفت بالسكوت .. فكرت . يمكن السبب انه رمضان وانه صايم .. حتى عطره .. ماكان حاطه .. وصل قمر لبيتهم .. .. وحرك لبيت الدانه .. اللي يبعد عن بيت قمر ربع ساعه .. فيصل ـ شلونج يالدانه ؟؟ الدانه ـ الحمدالله .. فيصل ـ ماشفتج من زمان .. دانه ـ اييه .. ما مريت البيت العود من زمان .. فيصل ـ لكم وحشه .. استهجنت دانه هالجمله ,,, ـ شنو ؟؟ فيصل ـ (كان متردد .. )ــ البيت فاضي من دونكم .. الدانه ـ ما اعتقد هالشي .. ام فيصل والبنات . وحتى تركي . موجودين .. شخبار تركي ؟؟ فيصل ــ ماسألتي عن أخباري .. الدانه ـ .............................. ........... فيصل ـ دانه لا تعذبيني زياده .. من طلعتي من البيت وأنا في عذاب .. غمضت دانه عيونها وهي كارهه عمرها لانها طاعت قمر .. الدانه ــ............... فيصل ـ ليش ساكته ؟؟ دانه . دانه ـ فيصل .. يا أخوي تراك تنسى وايد أني مرت أخوك ...وهالكلام اللي تقوله ما يجوز .. فيصل ـ شتحبين في هالشين ؟؟ هالغوريلا؟؟ عصبت دانه لانه غلط على ضاحي .. ـ أنا ما أسمح لك تقول عن ضاحي جي .. فيصل ـ صرتي تدافعين عنه ؟؟ دانه ـ لانه أنبل أنسان شفته ... فيصل ـ أنبل ؟؟ قد مرة قال لج ضاحي أنه يحبج ؟؟ دانه ـ ...................... فيصل ـ طبعا لاء .. لان قلبه مشغول بوحده أجنبية .. تزوجها ويابت له بنت .. دانه ـ قصدك منار ؟؟ فيصل ـ اييه .. دانه ـ منار ماتت من سنين .. والبنت في بيتي الحين أربيها مثل بنتي .. فيصل ـ أنا أحبج .. أحبج .. من يوم غبتي عن عيني وأنا انقلب حالي .. دانه ـ بس .. لاتكمل .. الظاهر يا فيصل أن كلامي معاك ماله فايده .. أنا زوجة أخوك .. ولابعمري بخونه ولا طالع لغيره .. وقلبي ملك له وحده .. له .. فيصل ـ بس .. دانه ـ لا يا فيصل .. الأمور زادت عن حدها.. أنت نسيت حدودك ..تجاوزت المعقول .. هالأوهام شيلها من راسك لانها مستحيله ..بعتبر نفسي ما سمعت هالكلام .. ماسمعته .. سكت فيصل .. لان لهجة الدانة كانت قوية وصلبه .. مرت الدقايق محملة بكره وغضب الدانه سريعه .. وصلت البيت وقالت باقتضاب ـ شكرا.. نزلت من السيارة وصكت الباب بهدوء ..ودخلت لبيتها .. لكن صج اللي صدمها انه فيصل تم واقف لمدة خمس دقايق.. لبست عباتها وشيلتها وطلعت له .. ـ في شي فيصل ؟؟ صدمها أنه كان سرحان .. اللي صدمها أكثر كانت دموعه .. يبجي ؟؟ ـ في شي فيصل ؟؟ نزل فيصل الشباك .. ـ ما أقدر .. دانه ـ شنو ؟؟ فيصل ـ ما أقدر أنسى .. هالشي متغلغل فيني .. دانه باستغراب ـ شاللي متغلغل فيك ؟؟ فيصل ـ أنت ... حرك سيارته وطلع من بيتها .. تركها في دوامه .. (يا فيصل ..حافظ كلام الحب وتبي تطبقه علي ؟؟ بس أنا ما أحبك .. للأسف مافي شي فيك يحرك شعره فيني.. صج أنك جميل ..وجذاب وهالخرابيط .. بس عمره الجمال والجاذبية ماكانت ميزة للرجال .. للأسف أنت من داخل فاضي ..فاضي للأسف.. وقلبي.. استحقه وبجداره شخص واحد .. شخص اغرقني بحنانه ومشاعره رغم انه ماصارحني بحبه لي ..بس أنا أحبه .. أحبه .. وأموت فيه ( دخلت البيت ... ورمت العباية والشيلة ودخلت المطبخ كانت دونا تغدي مايا .. دانه ـ وين راجو؟ دونا ـ قو اوت .. دانه ـ الله يرجك يا راجو ..على هاللي سويته .. ***** طالعت دانه الساعه .. كانت خمس ودقيقة ..أذن .. وضاحي ما يا .. ومقفل جواله وتلفون المكتب محد يرد.. لايكون رجع وسافر .. افطرت وهي مشغولة البال .. خذت مايا لغرفتها .. نامت البنت بعد ماكانت تعبانه .. صلت المغرب ولبست تنورة بيجيه طويله مع بلوزة بيضا .. مشطت شعرها القصير . واللي بدى يطول شوي .. بس اللوك حلو عليها .. البست عباتها وخذت شيلتها وقرآنها ..نزلت تحت .. من كانت صغيرة .. كل ليلة تروح لصلاة التراويح ..في المسيد ..هالشي جزء من رمضان كانت هي وأمها كل سنه يروحون ولما توفت كانت تروح بروحها .. وضاحي أذن لها بعد الزواج أنها تروح للمسيد .. اللي كان قريب من بيتهم الجديد .. كان بينهم بس عشرين متر .. دانه تروح على ريولها كل ليلة .. نطرت شوي .. الساعة ست ونص الين .. بعد ربع ساعه .. بالأخير قامت وراحت .. طبعا مافي ليالي آمنه مثل ليالي رمضان .. دخلت المسيد مال الحريم .. وسلمت على بعض الحريم الكبار اللي تعرفت عليهم في الايام الي راحت .. ام محمد ـ شلون ريلج معاج ؟؟ دانه ـ الحمدالله .. ماقلتي لي شلون زوج بنتج للحينه في المستشفى ؟ أم محمد ـ أي والله وا عليه المسكينه شايله همه .. مرض قلبه زاد عليه .. ام سيف ـ ادعي لها الله يفرج كربتها ويسلم لها ريلها .. تمت أم محمد تدعي لبنتها .. وفي ثواني الكل مسكوا قرآينهم قروا شوي وبعدين بدت صلاة التراويح . طالعت انه الساعة . ثمان ونص .. ما يابت جوالها معاها علشان الحريم كلهم كبار وينزعجون لا رن عليهم .. ارجعت البيت الساعة تسع وربع .. سيارة ضاحي موب موجوده .. وحتى راجو موب موجود .. وين راح ؟ دخلت البيت .. حطت عبايتها وقرآنها في الصالة .. ودخلت لقت دونا وروزيتا يالسات ياكلون .. دانه ـ بابا يا ؟؟ روزيتا هزت راسها بلا .. داانه ـ حد اتصل ؟؟ هزت دونا راسها بلا .. دانه ـ البيبي صحت؟ دونا ـ نو .. طلعت دانه من المطبخ.. ـ شكلهم مايدرون عن شي .. شيكت كاشف الارقام .. ولقت رقم قمر موجود .. صعدت لغرفة مايا مرتها كانت نايمة.. طلعت ومرت غرفتها .. وطالعت جوالها .. في خمس مس كوول من قمر .. ـ شفيها قمر ؟؟ دخل ضاحي الغرفة بهدوء .. قامت له وهي تبتسم . ـ وين كنت ؟؟ وليش مقفل جوالك .. انتبهت دانه أن ضاحي ويهه موب طبيعي .. ويتحاشى يطالع لها .. ـ ضاحي شفيك ؟ أعطاها ضاحي أوراق بيدها ـ اقري .. دانه ـ شالسالفة ؟؟ وقرت ـ صرت جزء من أيامي وروحي .. صرت حب سقيم صعب أتخلص منه .. خذت قلبي دموعي وكل جروحي ... احترت ياللي معاك الحب نار و جنه .. ارتجف كل جزء في الدانه .. هذا خطها .. ما تجرأت ورفعت راسها .. تنفست ببطء .. ضاحي ـ كملي .. دانه ـ ............... ضاحي ـ اقري .. اقري .. دانه نزلت الورق .. سحبه ضاحي من يدها وقرأ ـ خالد .. أعلنت اليوم رضوخي للمشاعر اللي غزت قلبي تجاهك .. خالد . أنا متأكده أني أحبك .. ولسبب ما أعرفه متشككه في الوقت نفسه .. دانه ـ بس ضاحي .. ضاحي ـ لا .. هذا الجزء الأحلى .. خالد . شفتك اليوم .. كابرت على كل مشاعري .. وما.. اسحبت دانه الاوراق من يد ضاحي وقطعتها وهي تصيح .. ضاحي ـ هالـ.. سكت ضاحي .. وهذا اللي قهر الدانه .. انه سكت..طالعت له كانت الخيبه على ويهها .. كأنه حد مات بالنسبة له .. كل قسمات ويهه تنطق بهالشي .. ارتجفت أكثر . لا يكون .. دانه ـ ضاحي . أرجوك .. أنت مافهمت . طالعها بنظرة مافيها أيي تعبير .. دانه ـ لا .. لاتظن أن في شي بيني وبينه . لا .. والله هذا مجرد كلام .. والله .. ضاحي حرام عليك . .. أمي كانت تحن على راسي سنين علشان أتزوجه وما تزوجته .. ضاحي ـ .......................... ازدادت دموع دانه .. كانت في موقف من رهبته ماقدرت توصف شي .. ـ هذا كله ماضي .. ماضي مافيه رجعه والله العظيم والله .. ضاحي لايروح ظنك بعيد .. هذا كلام يهال.. ضاحي ـ اذا التاريخ من كم شهر كلام قديم؟؟ دانه ـ والله قديم .. قبل الزواج .. أيام المدرسه والله .. ضاحي ـ أنا ما كنت بلومج لو أنه ماضي .. أنا لي ماضيي .. أنت مع من رجعتي اليوم . ارتبكت دانه زياده ـ مع قمر وفيصل .. ..بس ما يجوز تحكم علي من ظنون .. ضاحي ـ قلت لج لو في الورق ماضي .. والله ما حاسبتج عليه .. دانه ـ وهو ماضي .. ماضي .. كلام تافهه .. ضاحي ـ للأسف .. تكذبين على من ؟ .. أنا سمعتج تكلمين خالد .. وترددين له كلام الشوق والغزل .. سمعتج يالدانه.. سمعتج .. كان صراخه قوي عليها .. انصدمت .. دانه ـ مممتتتى؟ ضاحي ـ هذيك الليلة .. كنت مفتكر أني أحلم .. لكن .. ....دانه ..أنتي طالــــــــــــــــــــ ـــــــــــــــــــــــــــــق .. حست دانه أن الدنيا اسودت في ويهها .. أنها فقدت حاسه السمع والبصر لانه في هذيك اللحظة ماشافت غير ظلام وماسمعت غير صوت نفسها المعدوم .. |
| الساعة الآن توقيت السعودية الرياض و الدمام و القصيم و جدة 11:01 AM. |
Powered by vBulletin® Copyright ©2000 - 2024,
vBulletin Optimisation provided by
vB Optimise (Pro) -
vBulletin Mods & Addons Copyright © 2024 DragonByte Technologies Ltd.