ازياء - فساتين سهرة و مكياج و طبخ

ازياء - فساتين سهرة و مكياج و طبخ (https://fashion.azyya.com/index.php)
-   مكياج makeup (https://fashion.azyya.com/34)
-   -   الماكياج والصيف مهم جدا (https://fashion.azyya.com/7748.html)

shosho.ahmed 05-07-2008 05:57 PM

الماكياج والصيف مهم جدا
 
السلام عليكم ورحمة الله وبركاته ورحمة الله وبركاته
جايبلكم موضوع هايل عن المكياج والصيف وده مشكله خطيره بتقابل البنات كلهم
وانا باذن الله جايبلكم الحل

مثلا يعني


جالك ميعاد مهم جدا الساعة 1 الظهر في يوم صيفي درجة الحرارة فيه واصلة لـ 43 درجة...

لاقيتِ نفسك مضطرة تخرجي ومضطرة تحطي ماكياج لأن المعياد ده مهم وعايزة تكوني فيه على سنجة عشرة...

وفعلا قمتِ بدري وبدأتِ تظبطي نفسك ولبستي الحتة اللي على الحبل وخرجتِ ولكن بعد شوية وقبل ما توصلي لقيتِ الماكياج بدأ يسيح أو يختفي تماما وكأنك ماحطتيش حاجة.....

أكيد مافيش بنت بتحط ماكياج ماتعرضتش لموقف زي ده صح؟

طيب إيه رأيك لما نشوف شوية نصائح؛ لو عملتيها يبقى إن شاء الله مافيش مشكلة...

نشوف مع بعض

النصيحة الأولى
اختيار أدوات الماكياج

http://photos.azyya.com/store/up1/080507145731aoeN.jpg

فيه حاجة لازم تكوني عارفاها ومتأكدة منها كويس قوي وهي إن سر نجاح أي ماكياج هو المواد المستعملة فيه...

علشان كده ياريت تبعدي عن الأدوات الرخيصة مجهولة المصدر واختاري أدوات ماكياجك من محل أدوات ماكياج معروف وتأكدي بنفسك من تاريخ الصلاحية بتاعة الماكياج وده هتلاقيه مكتوب على علبة الماكياج من بره..

كمان خدي بالك إنه من الأحسن تحتفظي بالكريمات المرطبة للبشرة في التلاجة.. وده لأن وضع الكريمات في التلاجة مفيد في الحفاظ عليها من التلف بسبب الحرارة الزيادة في الجو.. وكمان لما تطلعي الكريم وهو بارد وتحطيه على وشك ده هيسبب لك انتعاش للبشرة ويساعد على إغلاق المسام الواسعة اللي ممكن تكون فيها وهتنشط الدورة الدموية اللي في الوجه وبالتالي هتحصلي على بشرة نضرة.

وبكده تبقي ضربتِ أكتر من عصفور بحجر واحد؛ حافظتِ على نضارة بشرتك وعلى جمالها وحافظتِ على الكريم بتاعك من التلف.

كمان ممكن إنك تحطي قلم الروج وقلم الكحل في التلاجة لمدة ربع ساعة قبل ما تستخدميه.


النصيحة التانية
اعرفي نوع بشرتك
http://photos.azyya.com/store/up1/0805071457328Nk2.jpg

فيه حاجة كمان لازم تكوني عارفاها وهي نوع بشرتك علشان تقدري تتعاملي معاها بالطريقة الصحيحة وتستخدمي لها أدوات الماكياج المناسبة ليها، ودي الطريقة اللي من خلالها هتقدري تعرفي نوع بشرتك:

1- اغسلي وشك بمنظف للوجه واشطفيه كويس بالمية وجففيه كويس باستخدام فوطة ناعمة.

2- اقعدي شوية لمدة ساعة وبعد كده هاتي منديل ورق وحطيه على وشك مع الضغط باليدين على المناطق دي (الجبهة والخدين والأنف والذقن).

3- شيلي المنديل من على وشك وبصي فيه على أثر المناطق اللي ضغطتِ عليها بإيدك ولو لقيتِ:

• آثار للدهون في كل المناطق يبقى إنت بشرتك دهنية..
• وجود آثار الدهون في بعض المناطق يبقى إنت بشرتك مركبة.
• لا يوجد أي آثار للدهون على المنديل يبقى إنت بشرتك عادية.
• لا يوجد أي آثار للدهون بس فيه آثار قشور للبشرة على المنديل يبقى إنت بشرتك جافة.

وبكده هتقدري تعرفي نوع بشرتك وبالتالي تقدري تحددي إيه الماكياج المناسب ليها.

النصيحة التالتة
استخدام الماكياج المناسب للصيف
http://photos.azyya.com/store/up1/080507145732FRRX.jpg

لازم تاخدي بالك من المعلومة دي كويس قوي وهي إن ماكياج الصيف بيختلف تماما عن ماكياج الشتاء..

ودي أفضل الطرق لاستخدام الماكياج في الصيف:

1- من الأفضل عدم استخدام كريم الأساس "الكونسيلر" في الصيف وتستخدمي بدلا منه البودرة المائية بس لو مضطرة تستخدميه يبقى ياريت تستخدمي كريم أساس خالي من الزيوت...

2- بعد ما تحطي كريم الأساس اضغطي بمنديل لتتأكدي من أن البشرة امتصته جيداً.

3- بالنسبة لقلم إخفاء العيوب ياريت تتجنبيه نهائي في الصيف خاصة إذا كانت بشرتك دهنية وده لأنه يحتوي على زيوت تذوب مع الحر والعرق وتسيح على الوش.

4- بعد كده هات فرشاة وحطيها في علبة البلاشر وبعدين وزعي البلاشر على وشك بحركات دائرية..

5- هات علبة الآي شادو ومن الأحسن تستخدمي الآي شادو البودرة وتبعدي نهائي عن الآي شادو الكريمي لأنه بيسيح مع الحر بالإضافة إلى أن ألوان الآي شادو الكريمي مزعجة جدا في الصيف.

6- لو مضطرة لاستخدام الماسكرا يبقى ياريت تستخدمي الماسكرا المضادة للماء بدلا من الماسكرا العادية وده لأن استخدام الماسكرا العادية مع الصيف والحر والعرق هيؤثر على جمال عينك وهيخلي الماسكرا تهبب...

7- وعلشان تضمني إن الروج يثبت معاكِ طول النهار يبقى ياريت تحطي شوية بودرة على شفايفك قبل ما تحطي الروج، وبعد ما تحطي الروج تحطي ملمع شفايف.


بس كده..
دي كانت أفضل الطرق للحفاظ على الماكياج في الصيف..
تعالي نشوف موضة الماكياج صيف 2008

يتبع

shosho.ahmed 05-07-2008 06:03 PM

رد: الماكياج والصيف مهم جدا
 
http://photos.azyya.com/store/up1/080507150351RtTo.jpg

وعلشان احنا عارفين إن فصل الصيف فصل غير عادي فبالتالي كمان ماكياج الصيف بيكون غير عادي...

فهتلاقيه ماكياج يتميز بالبساطة في الاستخدام والجراءة في اختيار الألوان...

أنا عارفة إنك دلوقتي بتقولي بينك وبين نفسك ازاي جراءة وبساطة في نفس الوقت؛ دي معادلة صعبة قوي..

عايزة تعرفي ازاي تحققي المعادلة الصعبة دي..

تعالي وأنا أقول لك..

شوفي يا ستي البساطة هي إنك ماتحطيش ماكياج كتير زيادة عن اللزوم وتكتفي على قد ما تقدري بالحاجات الأساسية اللي تبرز جمالك زي الروج والكحل..

والجراءة تعني استخدام الألوان الجديدة الفاتحة زي الألوان الزاهية والبرونزية والوردية والفوشيا والبنفسجي الفاتح والبعد نهائيا عن الألوان التقليدية الغامقة لأنها غير مناسبة للصيف...

وعلشان ألوان ماكياج الصيف بتعتمد على الألوان الفاتحة فهتلاقيها مناسبة لكل أنواع البشرة، يعني مافيش فرق بين البنت اللي بشرتها غامقة والبنت اللي بشرتها فاتحة في اختيار ألوان ماكياج لـ2008...

http://photos.azyya.com/store/up1/080507150351PeAL.jpg

ولو عايزة تكوني جذابة في الصيف..
يبقى اوعي تستغني عن الحاجات دي
****

البلاشر أو أحمر الخدود
http://photos.azyya.com/store/up1/080507150351oyLy.jpg

خاصة ألوان البيج الغامق البرونزي وخدي بالك إنك تحطي لمسات خفيفة على منطقة الخدود والذقن وبلاش تكتري..

قلم كحل
http://photos.azyya.com/store/up1/0805071503514LGH.jpg

خليكِ بنت غير تقليدية في صيف 2007 واستبدلي قلم الكحل الأسود بأي لون من الألوان دي "الأزرق أو الأخضر" وده لأن الألوان دي بتساعد على زيادة بريق العين....

الآي شادو
http://photos.azyya.com/store/up1/080507150352sCWd.jpg

بالنسبة للآي شادو هتلاقي إن الصيف بيحب ألوان الآي شادو دي الفوشيا والتركواز والأخضر الزرعي لأن دي كلها ألوان براقة وبتناسب أي وقت وأي مكان.

قلم تحديد الشفايف
http://photos.azyya.com/store/up1/080507150352hasd.jpg

استغني عنه نهائيا في الصيف وده علشان شفايفك تبان أكتر طبيعية.

الروج

http://photos.azyya.com/store/up1/080507150352quNQ.jpg

لو بتحطي الروج يبقى ارفعي شعار أهلا بالألوان الفاتحة اللي فيها لمعة خفيفة زي الزهري أو البرونز الفاتح جدا، والنحاسي والخوخي والروز وابعدي نهائيا عن الألوان الغامقة.

ملمع الشفايف
http://photos.azyya.com/store/up1/080507150352ASLe.jpg

أكيد ملمع الشفايف ده موجود في شنطة أي بنت وياريت تستعيني بيه لتثبيت الروج... ويا سلام بقى لو جربتِ ألوان زي الفوشيا والبرتقالي كملمع فقط بدون أحمر شفاه وهتشوفي الفرق بنفسك.

الماسكرا
http://photos.azyya.com/store/up1/080507150353KPGh.jpg

كنوع من التغيير ياريت تجربي الماسكرا البني وصدقيني لو جربتيها مرة مش هتستغني عنها تاني طول الصيف.


ولغاية هنا وخلص كلامنا عن المكياج والصيف

وكمان لو عندكم أي مشكلة وعايزين إننا نتكلم عنها برضه ابعتوا وقولوا
لأننا تحت أمركم في أي حاجة وفي أي وقت..


مستنيا ردودكم

{}{عذب الكلام}{} 05-07-2008 07:37 PM

رد: الماكياج والصيف مهم جدا
 
واااااااااااو موضووووع مفيد وراااااائع ..

مشكووووووورة ع المجهود والف شكر على مواضيعك اللي تنور قسمي العزيز ...

سندوســهــ 05-07-2008 09:30 PM

رد: الماكياج والصيف مهم جدا
 
مشكووورة ياا الغالية على المووضووع المميز

shosho.ahmed 05-09-2008 03:47 PM

رد: الماكياج والصيف مهم جدا
 
اقتباس:

المشاركة الأصلية كتبت بواسطة عذب الكلام (المشاركة 100169)
واااااااااااو موضووووع مفيد وراااااائع ..

مشكووووووورة ع المجهود والف شكر على مواضيعك اللي تنور قسمي العزيز ...

تسلميلي حبيبتي علي المرور


الساعة الآن توقيت السعودية الرياض و الدمام و القصيم و جدة 01:57 AM.

Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.


Search Engine Optimization by vBSEO 3.6.0