رد: رواية انا حر ما انهان والحر ما يرجع لشخص يهينه
 

السياره جان ما نزل الدريشه ...بس عقب شويها نزل الدريشه ... تفاجأت بالشيبه .. الي قاعد ورا سكان السياره ولابس نظاره شمسيه ولااا و بعد صابغ اللحيه ..

طالعني ... و تميت اطالعه ..عرفت اني ما قد جفت هالانسان ...
سالني: خير ؟؟
قلته : انته الي خير .. كل يوم واقف عدال البيت خير شو عندك ؟

طالع البيت ابرود و عقب رد يطالعني : لا ابد مافي شي ..

بروده قهرني كان ودي اعطيه بكس ع خشممه ..بس يودت اعصابي و قلته : كيف يعني ابد مافي شي ..و انت كل يوم واقف هني .. بغيت شي ؟

ابتعدت عنه يوم جفته ببطل باب السياره و نزل فاجأني يوم قال : انته اكيد بو غيث ..
بطلت اعيوني و طالعته مستغرب
مد ايده: شحالك مطر ؟
سلمت عليه: بخير بس انت منو انا ما اعرفك ..؟

ابتسمت الشيبه : انا بو علي .. اعرف الوالد الله يرحمه ..
طالعته بنظرات شك لو يعرفه امايه بتعرفه بس هو حس بنظراتي فقال : معرفه سطحيه ..

قلته: اها .. زين .

كمل: ولا شي .. بس انا عايبني بيتكم "طالع البيت ورد طالعني " .. و احسه عود و يكفي عايلتي .. و سالت عن البيت و اصحابه .. و عرفت ان اعرف صاحب هالبيت ..
تطنزت عليه : و نحن وين نسكن فديتك ... بالشارع .

ضحك: ههههههههههههه ..مثل ما قالولي عنك عصبي ووايد تتمصخر وو احم اسمحلي ع هالكلمه و جايف نفسك شويه .

فسخت نظارتي الشمسيه و تجربت منه و قلته : ها ابد مش موضوعنا .. قلت لي تبا تشتري البيت و انا اقولك ما نبيع ..

بو علي : الي اعرفه عندك عزبه و شقه .. وراااااااااااتبك ما شاء الله

قاطعته لان معرفته عن حياتنا شي قهرني قلته انفعال : عندي الي عندي ..ها الامور انت مالك دخل فيها و بيتنا مب للبيع و اذا ثاني مره جفتك واقف عدال باب البيت بحرقك انت و سيارتك مفهوم ..

طالعني بنظرات كره و عتب ركب سيارته و رجع ريوس لان سيارتي كانت واقفه بطريج سيارته ..و تميت واقف اطالعه باستهزاء و يديني بوسط خاصرتي الين ما اختفت سيارتي ..

ع فكره سالفه انه يبا يشتري بيتنا ما دشت مخي ابد .. بس ما عليه جان جفته مره ثانيه .. بخليه يرمس غصبن عنه ..

دشيت البيت ..رحت صوب حجرتي بس التفت لباب الصاله فرحت صوب الصاله ..ابتسمت يوم سمعت حس يدوه زين امايه نقذت وعدها ...فتحت الباب و دشيت ..
يدوه : عزوووووووووووووووه و يهد ..
دشيت : يهد العدو ..

التفت صوبي ابسرعه و اشرت لي بغيض: انت انت كل منك انته السبب ..؟؟
وقفت ابمكاني: بسم الله شو سويت انا

يدوه : كنت مرتاحه افبيت امنيره "وعلت صوتها بانفعال" حق شو مطرش امك اتراضيني هاه ..
ضحكت و رحت صوبها : هههههههههههههه "بستها عراسها ويلست عدالها " فديتج و الله والبيت من دونج ولاشي

صدت عني : هيي قص عليه ..
رفعت راسي يوم سمعت حس امايه ظاهره من حجرتها : هااااااااااا يبتها البيت و راضيتها ..شوف حشرتها وين واصله لاا بعد مب عايبنها ...انها ردت .."ويلست بعيد عنا "

يدوه : شو يعني تعايريني ..انج رديتيني بيت ولدي الوحيد ..
زخيت يدوه اتمصخر عليها : هدي اعصابج يا العيوز

دزتني بعصبيه: قوم عني

ضحكت: ههههههههههههههههههههههه "كنت احس بالوناسه لانها ردت البيت "

وقفت امايه : يا ليتني ما يبتكم ولا تزوجت ولدها جان الله رحمني من الحنه و الرنه
قلتها : استغفر الله

يدوه : كافره لانج ..اتقولين هاي الرمسه مب عايبنج نصيبج كافره
امايه : اوووووووووووووووووه ...هاي بتخبل فيني هالمخرفه "طالعتني و قالت بغيض " تبا ريوق انته و لا بتروح تنخمد ..

عقدت حياتي : شو فيكم انتوا اليوم استغفر وا ربكم شو كافره و شو مخرفه ..

يدوه : قول امك ...حط لي قناة فنون اجوف بيطلع احسينوه

امايه: بس احسينوه و قحطه و عتيج ماشي شغله غيرها بس مجابله هالتلفزيون من صباح الله خيير ..

حسيت ان الوضع بيزيد و خاصه امايه مستويه ما تتحمل أي كلمه : خلااص امايه هدي ابا ريوق زين ..
يدوه تدور العصا : وينها عصايتي وينها ..

امايه متغصصه : اوووووووووه "و ظهرت من الصاله "

زخيتها : ها ها ها هدي اعصابج
دزتني شرات قبل: خوز عني انت سبب المصايب

يتني ضحكه مرات احس يدوه شرات الياهل قلتها : لحظه .. " و يلست اجلب المحطات و حطيت لها قناة فنون و التفت لها " هذووه ها احسينوووه ..

يدوه : زين وخر خلني اجوف ..
رحت ويلست عدالها : شو اتريقتي ..

يدوه: الحينه جنه راحت اتخبر الشغاله تحط لنا ريوق ..

قلتها بهدوء: يدوه ليش تعاملين امايه جي ..

يدوه: انت وينك ..قبل كنت اضربها بالخيزرانه يوم تطول لسانها علي و الله ولدي ما يبطل حلجه
بطلت اعيوني : و ل

يدوه بانفعال: هي شو اتحرا بس الحينه جايفتني كبرت ما اروم اسوي شي ..قامت تتمادى
قلت بصوت واطي: زين متحملتنج لا وتهتم بغداج و ريوقج بعد ..

يدوه : شوووووو قلت ..

ابتسمت : لا فديتج ماشي ..جوفي حسينووه ..

صخت يدوه اتابع المسلسل و انسدحت انا ع الكنبه ..ما حسيت ابروحي الا و انا راقد ...بطلت اعيوني و انا متضايج استغربت المكان عقب تذكرت اني راقد في الصاله .

.رجعت و غمضت اعيوني ما اعرف كم الوقت ... بس رجعت و حسيت حد يضايجني و يدغدني من اريولي ..رفست بريولي ... مدري تهيأ لي او صج هاي ضحكة عايشه ..

رفعت راسي ...اطالع بالغصب جفت عايشه يالسه و تحاول اتضايج بي ..
رديت حطيت راسي : عواشي ..

تدلل يا حبيبي تدلل..ما دامك في قلبي الأول..سكنت بحياتي وروحي
وصرت بعيوني الاجمل..تدلل يا حبيبي يا حبيبي

نشت من مكانها و يت يلست ع الارض و يها جريب من ويهي ..و يلست تلعب بشعري بطلت اعيوني و طالعتها جفتها جريبه مني ابتسمت لها : انتي شو اتسوين ..

يلست تلعب بشعري: جفتك راقد شرات الملاك ..حبيت اضايج بك ..
زخيت ايدها و بستها : شريره ..
عايشه : شو يايبنك هني

سالتها : ما تخافين حد يجوفنا
هزت راسها بمعنى لا ..و قالت : محد موجود طارق في الدوام و منيره مرت ع امك و يدووه لحقتهم .."سالتني" و انت ؟

قلتها: كنت بتريق مع يدوه بس ما حسيت بالوقت رقدت ..و انتي الحينه ازعجتني مب راقد من البارحه كم الساعه

لصقت فيني : 11 الضحى .. همست باذوني " احبك "
رديت لها بنفس النبره : اموت فيج ..

عايشه : وافقوا عليك
قلتها : لا تهتمين كنت احاتيج في بيت منيره ..

عايشه : انت وعدتني انك ما بتاخذها و هاي الخطبه علشاني فليش ازعل

زخيت ايدها و قلت : اخاف اكدرج ما اتحمل اجوفج مهموم
عايشه : شسوي الحينه لازم انكد ع امك علشان اتطلقني من طارق ...فرصه صح حياتي ..

هزيت راسي : شدي حيلج ..
نقزت عايشه و ابتعدت عني يوم سمعنا حس سعود يزقر : امااااااااااايه ..

ربعت عايشه صوب حجرتها و انا يلست ابمكاني .. شويه و ظهر سعود يوم جافني قاعد وقف ابمكانه ..
قلته : امك برع البيت

طالعني بنظرات و اختفى صوب حجرته لبسته مالي بارض ارمسه عقب الي صار نشيت من مكاني ورحت صوب حجرتي اكمل رقادي ...

فتحت اعيوني ع صوت الاذان مب عارف أي وقت نحن الحينه تجلبت ع الفراش ...نشيت متعايز جفت الوقت الساعه 8 و ربع ..يعني حزه العشى ...رحت الحمام اسبح عقب ما لبست و خلصت شيكت ع موبايلي جفت مكالمه من فهد .. و من منيره .

.شو شكل فهد حن و اشتاق عاد لو يموت ما بسامحه ..خله يتأدب .. اتصلت بـ منيره ..
منيره: حبيبي وينك ..
قلتها: شو مستي اجوفج متصله اكثر عن مره ..

منيره: عبدالرحمن كان يدورك ..
قلتها : كنت راقد شو مستوي ..

حسبت شي سالفه تتعلق بـ فهد لانه متصل فيني ..بس طلع تفكيري غلط يوم قالت
منيره : اخو ميثه ..متصل بـ عبدالرحمن يبااك باجر اتروح له عيمان تتفج معاه ع المهر و سوالف العرس ..

قلتها : اوووه خل يروح ابروحه ..

منيره: مطر شو انت تتكلم جد شو يروح بروحه انت المعرس يبا يجوفك ..

قلتها : خلااص خلااص ..باجر بنروح بس خلي عبدالرحمن يرمسني قبل ...
منيره : خلااص مب مشكله ..يصير خير .. بس مطر لا تفضحنا
قلتها بانفعال :: ع شو افضحج يلا باي ..

وصكرت ابويها انا اصلا مقتنع بهاي الخطبه علشان اروح احدد المهر و غيره اففففففففففف للحظه حسيت اني بليت عمري.. حسيت باليوع ...طلعت من حجرتي ..

كنت بروح صوب المطبخ بس سمعت كلاام لفتني من صوب الصاله ...فرحت كنت بفتح الباب بس وقفت يوم سمعت صوت امايه ..و عايشه ..بطلت اعيوني .. عايشه وايد تتمادى ع امايه ..

امايه: انتي ما تستحين ع ويهج و ما خبلتي ولا طولتي لسانج الا يوم عرفتي وولدي العود باجر بعرس ..
عايشه : و انتي ما تستحين ولا تخيلين اتقولين عني هاي الرمسه و انا حرمة ولدج
كنت بضحك بصوت عالي ايوه عايشه خخخخخخخخخخخخخخ ضاربي امايه خليها تطلقج من هالخديه و نرتاح من هاي السالفه ..

امايه محرجه : صج انج مسودة ويه و مالقيتي حد يربييج ..
عايشه: هذي تربية اختج .. اذا مب عايبنج ...

امايه : حمدي ربج لقيتي حد يعطف عليج ويربييج و جان زين يطلع بعيونج ..

عايشه: اووووووووووووووه و الله انا ما انلام يوم اقول طارق نطلع من هالبيت و نرتاح
حسيت امايه تتخبلت : اتخسين الا انتي تودين ولدي بعيد عني .. و الله ما عشتي ..ولا عاش الا يبعد ولدي عني ..

عايشه: يا الغاليه ولدج خاتم في صبعي .. و الله الي ابا يسويه ..

سمعت حس يدوه : شو عندكم ..انتوا كل تضاربون يا حلاته بيت منيره ماشي حشره ..

يدووه بوادي و عايشه و امايه بوادي ثاني .. كنت ابا ادش بس اخاف تكبر اسلالفه خاصه يوم امايه جنها كانت ادقدق حق طارق: طارق تعال البيت الحينه .............................. .......... اقولك تعال ............اذا ما ييت لا انا امك ولا اعرفك مفهوم ............................ يلا ابسرعه ..

اتصدقون اول مره يغمضني ...طارق صدق عايش بنارين بس السالفه وناسه خخخخخخخخخخخخ ..تميت واقف استمتع ... بالموقف حسيت ابروحي شرير ...

يدوه: و انتي ما تخلين حد بحاله ...كلهم تضاربين وياهم ... الله امبر عليج من شو ولي مات و هو بعز شبابه يبتي له الغم و الهم ..

امايه : الله يسامحج عموه و الله اني متحملتنج علشان عيالي ..

يدوه : فقيره هاي يتيمه شو تبين تضاربين معاها ..شو تبينها ..
اامايه: ليش انتي نسيتي شو سويتي فيني ..اول ماخذت ولدج كنت يتيمه محد لي ..نسيتي كيف كنتي تعامليني ..

يدوه : ولدي ريالللللللللللل ..هب شرات ولدج مسوتنه ديايه يلاحقج كل مكان ..

كنت اسمع اامايه و يدوه يتعاتبون .. الظاهر ان عايشه راحت حجرتها .. قمت انا و رحت المطبخ .. اكل شي اسد يوعي ..

دشيت المطبخ ..كنت اتمنى اتهمنى بلقمتي ... بس البيت مولع داخل الصاله ...و ما ابا يفوتني شي الظاهر اليوم طارق يا انه يختار امايه او عايشه ...

فتت الثلاجه ما جفت شي ينوكل .. احسن لي اروح اكل برع من المطعم ...شربت لي ماي .. و ظهرت .. من المطبخ هاي الفلبينيه مدري وين ملتقعه ...
جفت طارق يدش الصاله ووراه عزوه .. لحقتهم ... ع طول انهدت امايه من
جافت طارق : الحيـنه ..اتطلق حرمتك ...؟؟

طارق : شو مستوي ؟؟
امايه: حرمتك يالسه تتحداني و اتطول لسانها علي ...

يدوه: امك جذابه

رد: رواية انا حر ما انهان والحر ما يرجع لشخص يهينه
 

يدوه: امك جذابه

امايه: محرجه ع يدوه: انتي صخي لا تدخلين و الله افرج عند درام الزباله هالمره مب بيت منيره ..

يدوه: حسبي الله و نعم الوكيل ..
بلعت ريجي شييييييييييييت امايه محرجه بالقوو شو سوت عايشه ...
عزوه : يدوه تعالي انروح داخل الحجره .

يدوه: ليش تبين تضربيني بعد ..
عزوه: فديتج تعالي ...تنكسر ايدي جان مديتها عليج ..

طارق : امايه الله يهداج لا تعصبين جي ..

امايه : ماشي اول شي تطلقها ... و الحينه ..
طارق يزاعج: عالشه عايشه ..

عايشه بصوت هادي : هلا طارق ..

طارق : شو مستوي ؟؟ شو السالفه ..

خاطري ادش و اتطمش بس يمكن طارق يعق اللوم عليه ..
عايشه بهدوء : ما صار شي امك مستويه عصبيه ما قلتها شي ..

امايه محرجه: طارق ها البنيه ما اباها تبيت اليوم هني .. طلقها الحينه ..
طارق: امايه الله يهداج ..كيف اطلقها هاي حرمتي ما ضرتني بشي

امايه: امبلى ضرة امك ...انت ما سمعتها كيف كانت ترمسني .. و اتصارخ علي .. و لا اتقول انت خاتم بصبعها ..
عايشه : عموووه

امايه: شو بتجذبيني ..؟؟؟

طارق: حياتي اامايه اهدي ..
امايه معانده : ماشي تفاهم ... يا انك تطلقها الحينه يا انك تظهر من البيت انت و هي يلا اختار الحينه انا ولا هي ..

ابصراحه طارق ابموقف موليه ما ينحسد عليه ... غمضني وايد .. ما تحملت اتريا برع اكثر فبطلت باب الصاله و دشيت

احسيت الجو مشحوووووووووووون و الكل طالعني طارق و امايه و عايشه و كل واحد له نظرات خاصه من صوبي ..
ارتبكت فقلت : السلام عليكم ..


https://fashion.azyya.com/images/smil...aaam (228).gif

رد: رواية انا حر ما انهان والحر ما يرجع لشخص يهينه
 

الفصل الخامس عشـر

سامحيني .. لوقسا قلبي عليك ..لو جرحتك ما ملا عيني سواك
عشت كل الحب والآمال فيك ..لو هجرتك متعة الدنيا لقاك

ما سمعت حد رد علي السلام فاستهبلت اطالع طارق و امايه و مطنش عايشه : شو السالفه شو بلاكم ؟

طارق رد ابسرعه : ماشي ماشي .."راح صوب عايشه اييرها من ذراعها " يلا انروح الحجره ..
امايه اعترضت طريجهم : نعم اتروح الحجره و كلامي اتعقه بحر ..

عايشه: عموه الله يهداج

امايه : محرجه : انتي اص ولا كلمه حسج ما ابا اسمعه في هالبيت
حسيت ان عايشه انحرجت يوم طالعتني ..بس شكيت انها تمثل ..عواشي قويه

طارق : امايه مب الحينه "وطالعني "

سبيته من خاطري حركاته تنرفزني وايد ... يستاهل الي اييه ..

امايه معانده : الا الحينه و بها اللحظه و جدام اخوك يشهد ..

طالعني طارق فاستهبلت : شو مستوي ؟؟شو فيكم ...انا مالي شغل ..ترا ..

امايه: هي انت مالك شغل فديتك ..

طارق بعده زاخ ذراع عايشه : امايه الله يخليج ..
امايه واقفه بويهه : ماشي يا انك تطلقها ولا ما تعتب باب حجرتك تنجلع انت و هي برع بيتي ...

حسيت طارق بين ناريين ...و مب عارف شو يسوي .. لمحت شبه ابتسامه مرسومه ع شفايف عايشه ..

اوني حبيت الطف الجو فقلت : الغاليه مب لها الدرجه توصل ..

امايه: الا توصل و نص .. عيل انا هذي تشتمني و تطول لسانها علي ..

طارق حسيت بنبرة صوته غبنه : امااااااااااااايه ..دخيلج ..

صدت عنه امايه و ردت لورا .. خيببببببببببه امايه قويه لها الدرجه ... حسيت ان مكاني غلطت بس خاطري اتم لي اخر شي ..
بس اضطريت اقول : انا ساير تفاهموا اروااحكم ..

طارق : لا مطر كيف تهدني بها الموقف ..تعال اقنع امايه ..

امايه : انت ما تستحي ع ويهك اقولك حرمتك غلطت علي و بدال ما تصفعها جدامي قاعد اتقول حق اخوك تعال اقنع امايه ..مب هاي الي كنت شاك فيها انها تربع ورا اخوك .

طالعت عايشه يوم سمعت جمله امايه فابتسمت لي فقلت ابسرعه : امايه الله يهداج .. انا الحينه خاطب ولا ترمسين جي عن توصل الرمسه حق خطيبتي عقب ما تباني ..
طالعتني عايشه بنظرات حاده هاي الثور ما فهمت اني ابا اغير راييهم ها الموضوع ...

طارق: مطر الحينه خاطب و هالكلام انتهى و ماله حايه ..
امايه : اسمعني لا تطولها و هي قصيره ..

طارق: أي قصيره و انتي تبين تخربييين حياتي ..

شهقت اامايه : انا الحينه بخرب حياتك .."اشرت حق الباب " يلاا رروح انزين حق شو تتريا شو واقف شو تبا ني اخرب حياتك انا ..

تفاجات يوم جفت طارق يزخ ايد امايه و يبوسها و ما بيخيب ظني لو قلت انه بصيح : الله يخليج لا اتسوي جني حرام عليج ..

امايه اتيير ايدها بقوه : انت الي حطيت روحك بها الموقف ..

سالت نفسي الف مره ليش امايه جي سوت بطارق ليش خلته جي متعلق فيها ....ليش ..؟؟؟!!

عايشه وطت ع الارض تزخ ذراع طارق و توقفه : قوووم طارق خلااص انا بريحك و بريح امك .. اانا الي بطلع من البيييت بس انت لا اتسوي بروحك جي ...

و طالعتني حسيت انها تبا اتغايضني تظن اني ابا اغايضها ..من ساعه غبيه عويش بس صج حسيت بقهر ..

وقف طارق متضايج يمسح دموعه و نظراته ع امه ..ما ابا اساعدك ولا شياته احسن طلق عايشه انا اباااها ,,هاي قلبي ..و روحي وكل حياتي ...

اختفت عايشه رايحه حجرتها ...

طارق : امايه فديتج و الله اني احبج ..

يلست امايه ع الكنبه : انت ما تحب الا نفسك ..
رحت و يلست عدال امايه و قلتها : اهدي لا اتعصبين ..

صخت امايه حسيت انهاا مقهوره ..

طارق : مطر قولها اشكثر انا غليها فهمها انها غير و عايشه غير ..

طالعت طارق و هزيت راسي بمعنى لا ..قصدي اني ما اقدر ارمسها ...و اشرت ع امايه ...
ظهرت عايشه من حجرتها و شايله شنطه صغيره و كانت لابسه عبايتها شكلها خلااص بتظهر من البيت ...

وقفت يوم جفتها ما صدقت روحي عايشه خلااص بتنتهي من حياه طارق استانست بداخلي طارق مستحيل يودر امايه مستحيل ..

امايه : يلا الحقها شو اتريا ..

نزلت دموع طارق ..و حسيت انه حاير مب عارف شو يسوي ...طارق بموقف ما ينحسد عليه ..طالعتني عايشه بنظرات جديه و بادلتها النظرات كملي طريجج و الخطه الي انتي ما شيه عليها ..طارق ما بيهد امايه و بيربع وراج و بطلقج اخيرا ..

ربع طارق صوب امايه و نزل ع ارض و دفن راسه بحضن امايه يصييح ..حسيته ياهل .. كان يقولها و يترجاها بكلام بس مش مفهوم ...

لوت عليه امايه و جنها شفقت بحاله .اشرت لعايشه انها تظهر برع الصاله ...

عايشه : الله يسامحك طارق ..

و راحت صوب باب الصاله .....حسيت ع اعصابي ... اترييت امايه ترمس و تطلب من طارق يطلقها ...
امايه تحضن ويه طارق بيدها : طلقها و انا ادور الاحسن و اشرف منها ...هاي موليه ما متربيه..

طارق يشاهق التفت لصوب باب الصاله يوم صكرته عايشه .. رجع و طالع امايه ...

امايه : خلها اتولي ..شو تباها ..

تفاجات يوم طارق وقف و قال : ممممممممقدر اهدها اانا احيها امايه سامحيني ..

وقفت ابسرعه مب مصصصصصصصدق الي صار موليه ما توقعت ان طارق بيلحق عايشه ..تيبست ابمكاني شو يعني .. عايشه ما بتتطلق من هالتعبان ما بتفتك منه ..

لحقته امايه : طارق تعال يمه طارق ...

بس طارق صكر باب الصاله و لحق عايشه .. التفتت لي امايه و صرخت علي بهستيريه : الحق اخوك خذته مني .. الحقه ..

تميت واقف ابمكاني مصدوم مب مصدق حسيت اني بالفعل خسرت عايشه خلااص .. عمري ما توقعت ان طارق بدوس ع قلبه و بلحق عايشه ..
انتبهت لعمري يوم يت صوبي و دزتني : روووووووووووح الحق اخوك خذته مني .. خذته ..

سمعت صوت عزوه : شو مستوي ..
طاحت امايه مغمي عليها زخيتها حسيت برجفه من الموقف .. يلستها ع الكنبه ...
يلست اضربها ع ويها : امايه امايه ..

ذكرني موقفها يوم قالنا الدكتور ان طارق فيه مرض ... نفس الموقف قاعد يمر علي ..
التفت ادور حد معاي جفت عزوه واقفه و ضايعه بافكاارها

امرتها : يبييي ماي من الثلاجه ابسرعه ..

اختفت عزوه من جدامي ..يلست اهز امايه ع الخفيف : حياتي قومي ... امايه ..
عطتني عزوه دبه الماي يلست ارشها ..ع الخفيف و كانت تشاااهق ..فتحت اعيونها
عفدت لها عزوه : ماماتيه ..

امايه ردت اتصيح : طااااااااارق راح عني ولددددددددددي رااح حبيبي ..."وردت طاحت "

صرخت عزوه : امايه امايه ..

قلتها : عزوه ازقري سعود بسرعه .. و روحي ييبي بطاقه امايه ..

موقف موليه ما توقعته يستوي امايه القويه .. الي كلمتها اتمشي كل الي في البيت اصغير و كبير بس لان طارق كسر بكلمتها جي صار فيها لا حول لها ولا قوه ..

حسيت انها صارت ثجيله وايد شليتها ...ييااااه سعود يربع و ساعدني ... حطينها بالسياره ..
عزوه اتصيح : بيي معاكم ..

قلتها ابسرعه : تمي عند يدوه واتصلي بـ منيره ...خليها تلحقنا ..

ركبت السياره وركب سعود ورا مع امايه ...

سعود : ترتجف ..
قلته اطمنه: ما عليك .. بتصير زينه ..

دقايق و كنا في المستشفى .. وديتها صوب الطواري ... بعدني مب مستوعب الي قاعد يصير كيف جي ..؟؟ شو استوا اصلا ؟؟ كيف طارق سوا جي ..؟؟ كيف لها الدرجه يحب عايشه ..!؟ دقني سعود يوم انتبهت

الممرض يسالني : وين البطاقه ..

عطيته البطاقه .. كنت بندش معاها الغرفه بس ما خلونا و صكروا الستاير .. و يلسنا انا و سعود نتريا برع ..

رن موبايلي و كان المتصل عبدالرحمن .. رديت : الو ..؟؟
منيره : شو بلاها امايه ..شو فيها ..

قلتها : مدري عندها الدكتور طاحت علينا ..

منيره اتصيح : فيها شي ..

قلتها : لا ان شاء الله ما فيها شي بس انتي تعالي اخاف يرقدونها اباج تمين وياها

منيره: انا ياايه بالطريج ..

ظهرت الممرضه من عندها سالتها : شو ..

الممرضه : ما عليها شر بس تحتاج شويه اوكسجين .. تطمنوا بخير ..

طالعت اسعود جفت علامات الراحه بملامح ويهه .. اما انا حسيت ابروحي مخنوق ... فطلعت برع الممر و رحت صوب الانتظار .. اخذ نفس ..و ابا ابعد كل افكاري الحينه .. ما ابا افكر بشي بس امايه تظهر بالسلامه .. ..

رفعت راسي لمحت وحده تربع لابسه عبايتها ع بالي منيره بس وقفت يوم جفت سلمى ووياها حرمه كبيره شويه ..

مدري ليش سبقني فضولي و لحقتها ...جفتها تدش قسم القلب ..وقفت من ابعيد اراقب الموقف جفت ام اعيون واقفه منهاره و صاحت بصوت عالي يوم حضنتها سلمى ..!! الظاهر ان ابوها بعد تعبان ... دشت الحرمه العوده الغرفه و تمت سلمى مع ام اعيون اكيد ابوها تعبان .. و الله تمنيت للحظه اكون معاها بها الوقت .. خاطري اكون بدال سلمى اخفف عنها .. ما تحملت رحت صوبهم .. سمعت سلمى اتهديها و يلستها ع الكرسي ..عقب اختفت ..ما صدقت ربعت صوبها و يلست عدالها ...

غربتنا غربة ليل يبحث عن نجومة دمعتنا ترى الليل وتبدد همومه
وتبقي الدموع لينا تطفي الأمل فينا ..ماشيين في سكة الاحباب ... ماشين وف كل خطوة عذاب

كانت موطيه راسها اتصيح و تدعي غمضتني حيل .. يارب اشفي ابوي ياارب
رتبت على جتوفها باصابعي ع الخفيف ...ابصراحه ما كانت حاسه فيني ...

ام اعيون اتصيح : ما اقدر اتحمل اكثر .. تعبانه يا ربي ساعدني ..

ما تحملت فلصقت فيها اكثر ...كنت بلصق راسي براسهااا اواسيها حسيت بشعور فيه لذه ما بغيت انش منه ابد ..قربها غير ها

ام اعيون : يارب ساعد ابوي يا رب اشفيه انا محتاجتنه يا رب ..
عذبتني نبرات صوتها فقلتهاا بصوت هادي : لا اتصيييحين جي عورتي قلبي ..

شهقت ام اعيون و جنها توها بس انتبهت اني موجود و جريب منها مدري منو كانت تتحسبني لان من شافتني نقزت من مكانها و جنه حد صب عليها ماي بارد

ابتسمت لها منحرج من حركتها و حسيت اني متطفل عليها ..و خاصه يوم قامت تمسح مكان ما كنت اربت

رد: رواية انا حر ما انهان والحر ما يرجع لشخص يهينه
 

ابتسمت لها منحرج من حركتها و حسيت اني متطفل عليها ..و خاصه يوم قامت تمسح مكان ما كنت اربت

عليها ..قلتها و اول مره بحياتي احس منحرج من بنيه : حتى انا مضايج و قلت اخفف عني و عنج ..

قالتلي بغيض و حسيت نيران بصدرها : انت شوووووووووو تبا مني ..انت ما تسحتي ع ويهك ..

كانت كلماتها قاسيه بس دموعها ابد ما وقفت ...
اول مره انطم و استحي ع ويهي و الله ..

قلتها و الله ما اعرف ليش انربط لسانها بغيت اطلعه و اقصه : انا انا ع بالي "كنت بقولها ع بالي انتي اختي بس طلعتي وحده تشبهينها .بس حسيت ابروحي غبي جدامها . " بس نظراتها لي خلتني اصخ ..

ام اعيون بصوت ضعيف و نظراتها ع الارض : عيب عليك

شويه و كنت بقولها انا خطيبج ترا احترمي نفسج يوم بترمسيني بس يودت عمري و صخيت عنها ..

مرت الممرضه طنشتني و ربعت صوبها تبا تسالها بس الممرضه : لحظه ميثه "ودشت الحجره "

ردت ميثه اتصيح و حسيت انها نست وجودي فرحت صوبها اول مره احس بعمري لزقه و ابوي هالبنيه تعطيني مشاعر اول مره احسها صج اني فضيحه بس ما تحملت صياحها ,,,,

بلعت ريجي دموعها اسرتني ما عرفت اتنطق بشي بس تمت اطالعها غرقان في بحر دموعها .. من دون شعور مديت ايدي كنت بمسح دموعها بس وقفت ابعيد عني ..

و طالعتني بخوف وردت لورا حسستني اني شرير او وحش ..

همست : بس لا اتصيحين جي .."بطلت حلجي كنت بقول حبيبي بس مدري ليش ما قدرت انطقها فسكت"

عطتني ظهرها و ردت اتغطي ويها بيدها و اتصيح بعذاب و ألم ...تذكرت اول ما قابلتها يوم كنا انا و زيود نلحق الي ضرب وليد ولد اخوها .. تذكرت كيف حضنتها و كيف نظرات الخوف الي اتجوفني فيها ..تجدمت منها كنت بحضنها نسيت عمري ..ادري لو تسويها عادي تجتلني و تلم علي العالم ...

خطوات كعب سلمى وقفني بمكاني و صديت عنها عن تجوف ملامح ويهي و تذكرني ... ما خليتها تجوفني ..كملت دربي ..سمعتها اتقول : هاه شربي ماي ..؟؟
ميثه بصوت ضعيف : ماابى

سلمى : اتصلي باخوج يعني مو معقوله جي ..

كان ودي اسمع و اعرف شو السالفه .. بس ..للاسف رن موبايلي

رديت ع طول : ها سعود
سعود : تعال الدكتور ظهر من عند امايه

صكرت لاني وصلت صوب حجرة امايه دخلنا انا و سعود جفنا الدكتور يكتب بالفايل ..
سالته : شو حالها
الدكتور : الحمدلله زي الفل بس عاوزه ابره مهدئه ..

طالعت امايه جفت الاوكسجين عليها غمضتني ...رحت صوبها كان سعود زاخ ايدها .. نزلت و بست راسها ..

الدكتور : نخليها الليله تنام عندنا نتطمن على حالتها ..

امايه تحاول تيلس : بسير البيت .. انا احسن ..

حاولنا نرقدها انا و سعود ...امايه : ما بتم هني ..
قلتها : زين بنوديج البيت بس لا اتسوين جي ..ابروحج
ظهر الدكتور

و لحقته قلته : دكتور ..
الدكتور : تطمن ما فيش حاجه تخوف هي وصلها خبر وحش ولا ايه

قلته: هي مثل الصدمه ..
الدكتور : ايوه نحن عطيناه جرعة اوكسجين بسيطه و ابره مهدئه و كل حاجه اتكون بخير ..

قلته : ان شاء الله يعني عادي نظهرها

الدكتور: مفيش مشكله اذا هي عايزه ..

زختني منيره و كانت معاها خالوه : مطر

قلتها : امايه بخير داخل هاي الحجره ..
ربعت داخل الحجره .. عبدالرحمن : شو السالفه

قلته: طاحت علينا

عبدالرحمن : من شو ما احيد فيها سكري ولا ضغطت بسم الله عليها

خذت نفس و قلته : تضايجت لان طارق ظهر من البيت ..ويا حرمته ..

هز راسه عبدالرحمن بمعنى لا حول ولا قوة الا بالله ..
تطمنا ان امايه بخير ..و غير انها اصرت تظهر من المستشفى و ما اتبات فيه ... طلعناها و نحن راكبين السياره

ساسرت منيره : اقولج جفت ام اعيون ..
منيره : ام اعيون ؟؟؟
قلتها : اقصد ميثه ..اسمها ميثه هيه خطيبتي ؟؟

عاتبتني منيره : مطر شو حد في الدنيا ينسى اسم خطيبته ..

مطر: المهم جفتها داخل المستشفى قاعده اتصيح منهاره يمكن ابوها تعبان وايد روحي تطمني عليها ..عن يموت علينا و يخب سالفه زواجنا انا اباها اليوم اكثر عن باجر ..

طالعتني منيره مستغربه قلتها : شو ارمس جد

منيره : احس مرات انك خبله

اتمصخرت عليها : شهاده اعتز فيها

منيره مبتسمه :زين بجوف عبدالرحمن .. انت وصل امايه البيت و انا بمر عليكم و خبروني شو استتو بالضبط

قلتها : زين روحي انتي ...
ركبت السياره ... و ركب سعود و يلس ورا و امايه جدامي و خالوه بعد ركبت ويانا ...

خالوه : بسم الله عليج اختيه بسم الله عليج ..
امايه تون: هدني يا حليمه وربع ورا حرمته .. السانها هاطول عليه ..

خالوه: انتي بتخخبريني عنها انا مربتنها و اعرفها ..

امايه: يوم اقولهم ما يصدقوني ... آآآآآآآآآآآآآي يا راسي ...لكن انا ادري ان باجر بيرجع لي اعرفه طارق ما يصبر عني ..

ابصراحه تمنيت ..ان طارق يرجع حق امايه علشان عايشه اتم معايه ..
خالوه : كم مره نصحتها كم مره قلتها ما تسمع الرمسه ..شسوي فيها ..

امايه: ما فيها خير انتي ربيتها و تعبتي وياها و عقب ما كبرت لحقت بيت خالتها الي ما تستحي اااخ يا ناري ...
قلت : امايه اهدي ولا اتسوين جي .. انا بتصل بـ طارق و بجوفه وينه
امايه : لا تتصل ..مالك شغل فيه محد يرمسه ولا حد يكلمه .. تسمع يمه سعود ..

سعود: انزين ..

خالوه: الله يهدي الجميع ..
سالت : خالوه اوصلج بيتكم ..
خالوه: هي اذا ما عليك اماره ..بسالك مطر فهد ما تجوفه و الله مقطع قلبي هالولد ..

قلتها ابسرعه: لا صار لي كم يوم ما جفته ..
خالوه: و الله هالعيال همهم هم

وصلتها البيت فنزلت و قالت : يالله اختي باجر بمر عليج .. تصبحين ع خير ..

امايه : و انتي من اهل الخير ..

خالوه : يمه مطر جان جفت فهد خبره يمر يسلم عليه ومتولهه عليه احاتيه ليل و نهار ياكل ولا يشرب
قلتها : ان شاء الله ما يهمج ..

حركت بسيارتي حتى انا ما اعرف دروبه ولا شو اخباره بس تذكرت انه متصل بي بس يولي .. افضل انساه هالفتره ... وصلنا بيتنا .. و انا نازل اساعد امايه .. رن موبايلي جفت المتصل طارق ..

رد: رواية انا حر ما انهان والحر ما يرجع لشخص يهينه
 

وصلنا بيتنا .. و انا نازل اساعد امايه .. رن موبايلي جفت المتصل طارق ..

حولته ع السايلنت و نزلت ..وصلنا انا و سعود امايه داخل الصاله .. نقزت عزوووه من جافتنا و كان وياها بدر ولد منيره ..

شليت عنها بدر و يلست ابوسه و الاعبه اول مره اجوف هالولد يضحك ..

عزوه : ماماتيه انتي ابخير ..؟؟
امايه: هي وديني حجرتي .. برتاح شويه ..يدتج وينها ؟؟

عزوه: بحجرتها الشغاله عشتها ..

عطيت بدر حق سعود .. و ساعدت عزوه و دخلنا امايه بحجرتها .. و ساعدنها انسدحت ع الشبريه ..
سالتها : بخير انتي الحينه ؟؟

امايه: الحمدلله احسن ..جان اخوك ياه رووغوه من البيت "وصاحت" طارق رااااااااااح مني ..
زخيت ايدها : هدي امايه هدي ..باجر كل شي بيصير احسن ما عليج ..

طالعت عزوه: داري عليها و انا بروح ايب لكم عشى ..
غمضتني اامايه يوم قالت: تعبتك معايه ..يمه

قلتها : تعبج راحه .المهم سلامتج

وظهرت من عندها اول مره اجوف سعود يضحك و يلعب بدر دوم ويهه كل عبوس ..

قلته: جوف امايه ولا تظهر من البيت ... و ع سالفه البارحه بعدني ما حسبتك عليها ..

تم اسعود يطالع بدر منحرج مني .. لبسته وظهرت من الصاله جفت منيره داخله يايه تاخذ ولدها ..

قلتها : هااا جفتي ام اعيون
منيره: مطر شو ام اعيون قول ميثه احفظ اسمها عن تفشلنا باجر جدام اخوها ..اونه ام اعيون
قلتها: زييييييييييييييين قولي شو اخبارها ..

منيره: شو اقولك حالتها حالها الحمدلله يوم عندها خالتها و بنت خالتها ..و لا الله يعلم شو بتسوي بروحها ؟؟
قلتها : عادي انا بروح لها عادي خطيبها الحينه ..؟؟الا بسالج ابوها وايد تعبان ؟

منيره: هي يالسه اتصيح متعذبه ع حاله ..

و الله تمنييت يوم منيره اتقول لي هالكلام اكون معاها اخفف عنها تذكرت ادموعها ..تذكرت يوم عصبت علي .. حسيت ابروحي دفش و ما عندي اسلوب ..بس غصبن عنك تخليك تحترمها ...

قلتها : وين اخوهااا هاي ؟؟
منيره : زين باجر بيي اتصلت به ميثه قال باجر بيي بيمر ع ابوه وب المره بقابلك انت و عبدالرحمن في بيتنا
بطلت اعيون مندهش: شو في بيتكم ها ما يستحي ع ويهه ..؟؟

منيره: خلها ع الله زين يوم فكر ايي اصلا بعد
سمعنا صوت بدر
منيره: يمه ولدي يصيح ..

ضحكت: ههههههههههه لحق عليه عند سعو د ..

ربعت منيره: و الله لاجتل عزوه و انا جي مأمنتها عليه .

ضحكتني: ههههههههههههههه " قلتها " تمي ابمكانج بروح ايييب عشى زين ..
منيره: الله يحفظك ..زين خليت عبدالرحمن يروح عيل ..

ودشت الصاله ..طلعت برع ..شليت موبايلي ..جفت طارق متصل بي اكثر عن مره انا ابروحي مقهور منه .. فريت موبايلي و قلت ما بتصل به خله ينجلع بجوف كيف بدبر اموره ابروحه ..

رحت صوب المطعم و طلبت .. مشاوي .. حسيت صج بطني بتتقطع من اليوع ..رد اتصل بي طارق ..
رديت : نعم ..
طارق: مطر اتصل بك اكثر عن الف مره وينك

قلته: كناا بالمستشفى امايه طاحت علينا تعبانه ..
طارق متروع: احلف وايد تعبانه

اتطنزت عليه: يهمك وايد ..
صخ طارق .............................. .....

قلته: شو تبا ..؟؟بغيت شي ؟
طارق حسيته شويه بيصيح: محتاجنك .. مب عارف شو اسوي ..

قلته: عقب ما اتصرفت ابروحك .. ياي اتقول لي هاي الرمسه ..و بعدين امايه خلااص قالت جان رديت البيت بتروغك .. ما تبا اتجوف
طارق .............................. ............."ماشي رد "

حطيت العشى بالسياره و حركت صوب البيت ...

قلته : انت متصل علشان تسكت ؟؟؟ وين انته الحينه وين بتبات ؟؟
طارق: حجزنا ابفندق ..بس ما اعرف وين اسير ..

قلته: انت مقتنع بالي سويته
طارق : لا ما هانت عليه امايه ..
قلته: عيل شو بتسوي الحينه ؟؟

طارق: ما اعرف ... مطر ..حاول تقنع امايه ترضى عني .انا باجر بيي ازورها ..

موليه ما بغيت الامور توصل لها الدرجه ان طارق يطلع من البيت مع عايشه و عقب امايه ترضى عنه يعني ما سوينا شي ... كل هالتعب و ما استفدنا شي ... يا انه يرد البيت مع عايشه او يطلقها ما اتحمل فراقها .. حسيت بألم بصدري ...خفت لا يكون خسرت عايشه ..
مطر: بجوفها يلا انا وصلت البيت ..

طارق: طمني عليها زين دخيلك

حسيته ما يبا يصكر فقلته : زين زين "وصكرت الخط بويههه "

نزلت من السياره و العشى معايه .. دشيت البيت .. دخلت الصاله جفت سعوود و عزوه و منيره يالسين في الصاله ..
سألتهم: شخبار امايه ؟
منيره : رقدت مع اني قلتها اترري اتعشي ما رضت ..

يلست ع الكنبه وقلت : عزوه خبري الشغاله تحط لنا عشى تراني ميت يوع ..
عزوه تنش : زييييييييين ..

منيره: مطور لا تسهر اليوم ارقد من وقت

قلتها : ليش شومستوي ؟؟

منيره: شو لا تنسى باجر بتجابل اخو ميثه ع الغداء يعني انت ما شاء الله عليك من ترقد ما تنش شرات الاوادم ..
تساندت ع الكنبه : توني ناش من الرقاد ع اذان العشى ..
منيره : عدل رقااد ...وينها يدوه سعود ؟

سعود يالس و شكله بعالم ثاني يمكن متأثر بموقف امايه : راقده بحجرتها ..
طالعته بحده و سالته : انت بعد طلعت اليوم

ارتبك وقال : لا
منيره: بسكم فايح انت و محمد شو ها

سعود جنه مب عايبنه الكلا م ...فقلت : شو مب عايبتنك الرمسه ..
دشت عزوه : الحينه بتحط العشى ..
عزوه: ها بفضحنا شرات طارق

سعود يهاجم عزوه: انتي جب من زينج ..
عزوه: احسن عنك ..

منيره: بس عاد طارق ما غلط\ يوم راح ورا حرمته ما فيها شي ..

قلتها: انتي عرفتي السالفه..
منيره: خبرتني عزه ...

سعود : ايخسي انا اربع ورا حرمه و اودر اهلي
قلته: انطب انته .. انطب جان اتخاف ع اهلك ما دخلت مرااكز الشرطه كل يوم بمشكله ..
عزوه: ههههههههههههه ويويويويوي لقط ويهك

سعود : و الله بقوم اضربها ..

منيره : بس عااد ما صدقت بدر يرقد لا اتسون له حشره ...
مدري ليش استانست يمكن هاي اول مره ايلس مع اخوانيي و انسولف ويا بعض ..استمتعت و انا اسمع ضرابه عزوه و سعود ...

عزوه : لوفيك خيير اتضارب مع حمود ولد خالتوه مب معاي تستقوى ع ابنيه ..

سعود ميت من عزوه كنت بضحك ع شكل ويهه ضربته عزوه ع الجرح ..
سعود يسوي عمره بنش من مكانه فهددته: سعووووووود ..