ازياء - فساتين سهرة و مكياج و طبخ - الصمت حكمه واحكي افلاس

الصمت حكمه والحكي إفلاس
ولقيت في صمتي يزيد احترامي
الصمت له معنى وله ذوق وإحساس
مركب نجاتك في بحور الظلامي
ترى الرجل صوره من الراس للسا
ثم يتبين جوهره بالكلامي
إما نطق في كلمة ترفع الرأس
تضفي على شكله جديد الاسامي
وإلا يعود معدنه معدن نحاس
يرميه سهمه بعد ماكان رامي
لا صار عندك من ثمينات الألماس
خله بصدرك لين وقت التمامي
أخاف يطلعلك من الناس بلاس
وإلا سفيه ما يرد السلامي
الله خلق خلقه على عدة أجناس
وكلن يسوقه مذهبه للأماي
والله خلق بالطير قمري وقرناس
وقت الهدد ما ينغزي بالحمامي
لا جال في صدرك من الهم هوجاس
وعينك يحاربها لذيذ المنامي
ونفسك عليله والفكر صارمحتاس
اترك طمان القاع وارق السنامي
عليك بالعالي ليا هب نسناس
يبري الجروح الخافيه والعظامي
وخلك لربعك دايم الدوم نبراس
وخص القريب وخص ولد العمامي
خلك لهم في داجي اليل مقباس
ولصاحب أصدق من حقوق الغمامي
ربعك ذراك ليا لحق راسك الباس
قدم لهم شربك ولو كنت ضامي
وخلك لثوب الطيب والعز لباس
واترك دروبٍ تنتهي بالحرامي
وفعل الجميل واجب الضيف نوماس
ومن لا نفع بالضيق نفعه عدامي
بيت الكريم أبوابه بدون حراس
وبيت البخيل يعد مثل الهدامي