ياكثر ماتطري الفرقى على لسانك
خلاص فارق لاعاد تذلني فيها
مشكلتي إني رفعتك وإرتفع شانك
وألحين ودك على نفسي توطيها
إلا الكرامه ياعين أمك وخلانك
لاتقرب لصوبها ولاتجيب طاريها
أعيش فيها ومنها موعلى شانك
عشان من دونها أموت و احيها

ورحتي ليه ؟
وخليتي السؤال المُر لعيوني
عشان أروي فضول الناس
او يعني عشان اطلع على الذكرى و أغني لك
أنا رديت لعيونك
أنا ..
أنا رديت

رحلتي و لاقدرت أخذ تفاصيلك
وضحك النور ب إيدينك
حنانك
رحمتك
طيبك
تناهيدك
ودمعة فرحتي بعينك
أقول إلا أنتي ...... وشلونك ؟

عيب عليك
بكل بساطه وفي وضوح الشمس تدخل
تدخل ضلوعي
وتاخذ شوق قلبي في
إيديك ..!

كُون الجمر وأنا مثل عود البخور
نحتاج دايم للعطر
جمر الوعد منك ومن عندي أنا عُود الوفا
نحتاج دايم نجتمع
إثنين ونكمل بعض
إثنين و نكمل عطر