ازياء - فساتين سهرة و مكياج و طبخ - عسى لايعيدها سفره..ولوهي كانت دراسه

أبد لاتسألين بغربتي عن آخر الأخبار
عمت عين السفر دامي أذوق المر من كاسه..!!
~~~
أنا الي بسألك قولي.. جواب بكلمتين صغار
بلد من دونك (اش) يسوى بعيني؟ يابعد ناسه
~~~
بدونك.. ما أطيق البعد لو هو بينا أمتار..!!
ولكن هالفراق أقوى ولاينفع به سياسه
~~~
ترى لولا اتصالاتك.. برغم الي يدق.. كثار
حشى مافيه أحد غيرك يرد لصدري أنفاسه
~~~
ألا ياشوق خفاق ٍ ضويتي ظلمته أنوار
وصار اليوم ينبض لك مشاعر حيل حساسه
~~~
تبي تدرين بفراقك معي يا الغاليه وش صار ؟؟
تبي تعرفين مجنونك وش الي قالب ٍ راسه ؟؟
~~~
لك الله عايش بحالي/ لحالي.. شاعر ٍ منهار
وأنا كل ما طريتي لي صرخ شعري بقرطاسه..!!
~~~
يمر يومي.. ولابه غير همي و الحزن زوار
عسى الله يرحمه حال ٍ غدا هالثنين جلاسه
~~~
شحن جوالي أنهيته..!! أقفّل .. وافتحه أمرار..!!
قسم لولا رسايلنا .. حبيبك قاتله ياسه..!!
~~~
فقدتك والدمع لامن ذكرتك يفضح الأسرار
ولا أشره على وقت ٍ به الأيام دساسه
~~~
أسلي نفسي بكثر الأماني.. واليدين قصار
وأنام وربي العالم وش الي خاطري حاسه..!!
~~~
كأني من ملك أسهم يبي تضحك له الأقدار
وقدّم كل ماعنده.. وفجأه أعلن إفلاسه..!!
~~~
كأني طالب بغربه.. تذكّر عيلته والدار
وهو كل ماذكر أمه.!! ملا هالدمع كراسه
~~~
أعاني كثر ماتملك ومالك بالحشى تذكار
و(أحبك) والبلا حبك أبد ما أملك قياسه
~~~
جعل في داخلي عرق ٍ سمع بك يا الغلا ماثار..!!
يموت.. و وش لي بعرق فوصالك ميت إحساسه
~~~
حياتي تسأليني عن جديدي بالشعر وأحتار
وش أكتب لك شعر وانتي غديتي اليوم نبراسه..!!
~~~
ولكن أوعدك شعر ٍ لاقوله يتعب الشعار
متى ماشفتك وموعد لقانا دقت أجراسه
~~~
لأن مافيني أتحمّل بعادك في سفر وانهار
عسى لايعيدها سفره.. ولو هي كانت دراسه

مماراق لي
لمبدع..عبدالله الظفيري..
:11_1_207[1]::11_1_207[1]::11_1_207[1]: