ازياء - فساتين سهرة و مكياج و طبخ - حبيبي لا تنام اصحى..انا بطلع وارد الباب

ترى حظ الزمان اللي معي قفا ورد الباب
دخيلك ماوقف لحظه معي حتى يتناساني

وانا ماقول غير الناس لكني من الاغراب
ودور شف وش اللي غير الدنيا وخلاني؟

انا ماخنت حبي لا .. ولا فكرت يوم ارتاب
وانا ماقول خنتيني!!ولكن الزمن جاني

وقف ضدي..وقف ضدك.. وضعنا والهوى غلاب
وجف الورد بيديني وكسرني وسواني

مدامك صنتي العشره معي كذاب انا كذاب
اذا قلت:انك تخونين حبي خلف جدراني

وانا ادري انك نسيتيني وفا للحب ستر احباب
وانا بدعي لك التوفيق من قلبي على لساني

حبيبي روح والله يسترك حاضر وستر غياب
عسى الله مايعيشك الزمان اللي تبلاني

انا هين تعودت الجروح اللي بدون اسباب
تعودت الطريق اللي يوصلني لجثماني

ولكن كل خوفي من زمان ً فيه ناب وناب
اذا تسلم من الاول اكيد يضرك الثاني

حبيبي احرص على نفسك وخل الداب للحطاب
واذا فكرت تنساني امانه لا تناساني

واذا كنت اتمناني تراني لك وفا واعجاب
قبل لا تنطق اسمي.. جيت كلي لا تمناني

وابشتاقك على كثر الغلا يوم الغلا ماجاب
وابتذكر سواليفك وعطرً ماتعداني

وصوتك يوم قابلتك خلط ترحاب في ترحاب
وعينك كنها قبراً دفني فيه حرماني

احبك ليه ماحبك؟ مدام ان القلوب قراب
اشوفك ليه ماشوفك؟ مدامك عين ترعاني

اضمك ليه ماضمك؟ وكلك منظرً خلاب
انا وشلون اصد وصوتك ان صديت ناداني

حشا لله مايحجبك عني لو لبست حجاب
اشوفك داخلي تمشي وكنك دم شرياني

ولا يمديني ابعد عنك دام ان خاطري ماطاب
وابيك انت تذكر لهفتي لو طاب وامداني

وابي منك تحفظني مثل ورده في غلاف كتاب
تفت..ماتفتت.. كل ماتفتح بتلقاني

وانا ماتوب عن حبك ولوصار العظام تراب
اموت ومايموت الحب!! ياحبً تحداني

وقولي صار مجنون وكلامه ماله اي اعراب
انا راضي جنون الحب يامرني وينهاني

انا مجنون ؟؟ لا تحسب على عقل الجنون حساب
انا مرفوع عني كل شي الا انت ياداني

اكيد اضماك في قلبي مدام القلب بي ماذاب
واذا حسيت في قلبك اكيد انك بتضماني

وانا مدري وش اللي صار؟ بس الظن بك ماخاب
احس انك بترجع لي اذا حسيت وش جاني

كذا سوى الزمن خلا حياة العالمين احزاب
كذا سوى الزمن فيني..كذا خلاك تنساني

حبيبي لا تنام اصحى..انا بطلع وارد الباب
ولكن هاك قلبي..مارضى يترك وحداني