ازياء - فساتين سهرة و مكياج و طبخ - كيكة التفاح المقلوبة بالكراميل البسيط

مقادير الكيكة :
اول خطوة بتجيبي 5 حبات تفاح بتقشريهم وبتشرحيهم دوائر مفرغة من الوسط كيف يا ترى بدك تشرحيهم]:انا بحكيلك في منقرة الكوسا الي بتحفري فيها الكوسا بتشيلي بس البزر مشات لما تعمليها دوائر تكون مفرغة من البزر زي شكل حلقات الاناناس يعني .
المهم بتغليهم 2دقيقة في مي وسكر ليش ؟مشان ازا ما غليتيها مع سكر بتصير كتير حامض التفاح وبتخربي طعم الكيكة .بتنشليه وبتحطيه على جنب وبتبلشي بالكراميل.
الكراميل انا الصراحة ما بحبو كتير على الكيك يكون حلو لاني انا ما بحب السكر كتير فبكتفي بفنجان قهوة حلوة واحد من السكر بحرقو بصينية الكيك لحد ما يصير دهبي بس بدون ما ينحرق لانو بيمرمر وبخليه يكون طبقة خفيفة ولا تخافي ازا بقي اماكن بالصينية ما وصلها الكراميل لانو بيسيح بالفرن وبيغطيها كلها بس ما يكون كتير قليل على صينيتك حسب حجمها انا بعمل بصينية وسط بس ازا بتحبي الكيك يكون حلو كتير ف قوي قلبك بالسكر وزيدي الكمية لحد كاسة كبيرة انت وزوقك بالحلو .
شعدين بترتبي التفاح ع الوجه وخليه يكون بشكل حلو لانها رح تكون ع الوجه عند التقديم.
تاني شغلة ولعي الفرن وبلشي بتحضير الكيكة .
في شاف البراون مالتي كويك ايدي اليمين في المطبخ انا هيك بسميها .
بتحطي 4 بيض وكاسة كبيرة سكر و3\4 كاسة كبيرة زيت قلي و3 ملاعق كبار حليب و بتخلطي منيح مع عصير نص ليمونة .
بعدين بتحطي كاسة المي ومعلقة الفانيلا ورشة الملح و4 فناجين قهوة حلوة فيهم طحين زيرو تبع الحلويات او تستعملي تبع المعجنات ديري بالك ؛
المهمبتخلطيهم لحد ما يتجانس شوي وبترجعي بتحطي كمان 3 فناجين طحين وبتخلطي لحد ما يختفي الطحين بس لا تخلطي اكتر لانو بنشف معك الكيك وبصير زي الخبز .
صبي الكيك على التفاح ودخليها الفرن لمدة ساعة الا ربع ولما تستوي اقلبها بسرعة حتى ينزل معك الكراميل وما يرجع يجمد وتلزق معك الكيكة في الصينية .
بتقدري تعملي نفس الكيكة لكن بشرلئح الاناناس لكن بدون سلق الاناناس اكيد.
وصحتين وعافية.

م/ن