ازياء - فساتين سهرة و مكياج و طبخ - متزوجة وتبين تكشخين ومالج خلق تعالي؟؟؟؟

عجبني مره الموضوع قلت انقله لحبيباتي ان شاء الله يستفيدون واستفيد معاهم

بنات الحل هو ............. (( بالتعود ))

تعودي

تعودي تتسبحين كل يوم وتعطرين من هالروايح الحلوه اللي على فاكهه واللي على زهور والاشياء اللي تعجبك وتعجب زوج

تعودي تغيرين من شكل شعرج مره خليه كيرلي ومره استشوريه بالبيت ومره لميه كله ومره رفعي نصه وتعودي تلبسين اكسسوارات حلوه وبسيطه حق البيت

تعودي اهم شي هالنقطه تعودي يكون جسمك نظيف وشيلي الشعر دايما ولا تخلين الشعر ينمو في الاماكن الغير مرغوبه ولو يحصلج روحي سوي ليزر

تعودي وهذي ثاني اهم نقطه انك كل يوم تحطين كريم للجسم قبل النوم ترى نعومة الجسم اهي اللي يدورونها الرياجيل دواره ولو كنتي كاشخه من راسك حتى اخمص قدميك بس جسمك ناشف وخشن صدقيني الرجال بينفر منج

تعودي بين فتره والثانيه تحطين مكياج حلو وناعم حق البيت واهتمي بشرتج وشربي ماي واجد تعودي على شرب الماي حتى تروي بشرتج وتعودي تحطين كريمات مرطبه

تعودي تستميلين زوج بالروايح المحبه مثل دهن العود والطيب والبخور وبخري الغرفه والصاله وحطي باقة ورد بين فتره والثانيه في غرفة النوم تعطي انطباع وتغيير كبير ومؤثر جدا جدا

لا تعودين
لا تعودين نفسك تقعدين قدام زوج بدراعه حتى لو الدراعه عجبت امج ولا خالتج .... لان بكل بساطه هذا زوج مو خالتج ولا امج

لا تعودين نفسك تقعدين قدام زوج وريحتج طباخ او شمس (وهي الريحه اللي تلزق فيك لمن تطلعين بالشمس بعز القايله؟) لان حتى لو زوج ما يقولج صدقيني اهو متضايق من هالريحه

لا تعودين نفسك على تسريحه وحده بالبيت على اساس انها مريحتج وتخلين زوج يشوفج كل يوم بنفس الكبه وبنفس الشباصه وبنفس صفة الماشات على القذله

لا تعودين نفسك (حتى لو بعد فترة زواج طويله) انك تخلين زوج يتعود على منظرج وانتي لافه راسج بالحنه ولا بحمام زيت ولا بملابس مو حلوه (خلاقين) على اساس قاعده تنظفين ولا رايحه الصالون ا ...

لا تعودين نفسك على ترك الشعر ينمو في الاماكن الغير مرغوبه وخاصة الوجه يجب ان تعودين زوج يشوف وجهج دايم حلو ونظيف ياشين المره لي صارت اهي وزوجها سيم سيم ماكو فرق

والله بنات صدقوني الكلام سهل بس الفعل اهو اللي نستصعبه .. ابدي من هالفتره من اليوم من الحين

ابدي بشي سهل وبسيط مثل التدهن كل يوم بالليل او تبخير الدار لمن تتعودين عليه وتصير عاده حلوه ما تقدرين تستغنين عنها ابدي بشي ثاني وهكذا

الغرض

انج تخلين زوج يشتاقلج ويشتاق حق بيته وماتعطينه اي فرصه انه يقولج غيرج احلى ولا اسنع منج وراح تعودينه اهو بعد ما يطالع مني ولا مناك ولا يفكر يقارنج بغيرج

نقطه مهمه
عودي
نفسك على النظافه والسناعه والترتيب ترى الكشخه مو بالمكياج ولا التشخلع ولا اللمعات ولا قمصان النوم الفنتق ... واذا انتي عودتي نفسك على هالاشياء راح تصير عندك شي عادي روتين يومي عادات محبه لزوجك والاهم محبه لنفسك ماتقدرين تستغنين عنها وشوي شوي راح تحبين نفسك على نمط الحياة البسيط الجديد هذا .. وحتى لو زوجك مسافر ولا مو موجود صدقيني بتحبين انتي ..... تكشخين .... حق نفسج