|
أعذروني يالخليجيات وخاصة السعوديه
أعذروني يالخليجيات
وصدق كلامه وحبيت انقله لكم ياليت تقرونه مرا بطل اليكم الموضوع بلسان الكاتب : السلام عليكم ورحمة الله وبركاته.. فيه موضوع مهم صراحه.. ودي من زمان اني اتكلم فيه.. لكم الموضوع.. كان يا ما كان قبل 10 سنوات او حولها كنا لما نمشي في ديرتنا ونشوف اجنبيه فاتشه تطير عيوننا .. نقول وش هذي .. يا ساتر .. كان يا ما كان قبل ثلاثة ايام افتح ايميلي واشوف رساله من قروب مشهور... صور لبنات ويتفاخرون انهم خليجيات الخليجي فخر بس للأسف ما يستاهلون يرفعون هذا المسمى على الصور الي كانوا طالعين فيها مثال .. صورتين ل 6او 7 بنات..صافين..عالجدار وملقينا ظهورهم..ومرفعين يدينهم (كأنهم معاقبات).. ومنزلين البنطلون..ونص ؟؟؟ طالعه.. قله الحيا هذي مهيب مقبوله 10 سنوات فتره موب قليله .. كيف وصلنا لهذي الدرجه من فراغ الاخلاق . ؟؟ قبل كم سنه.. للأسف غلطنا ورحنا لدوله عربيه وبدون ذكر اسماء .. مع الحرص الشديد الحمد لله للابتعاد عن اماكن الفساد .. لأن يوجد فيها فساد اكثر من الدول الغير عربيه صراحه وماكنا متوقعين ابد هالشي منها ويلومننا ليه نكره الدول العربيه رحنا لمطعم سقيم..طلع فيه واحد عالستيج.. ومسك المايك وقال ((احلى تحيه لشعب السعوديه)) وتصفيق.. لحقونا بعد شوي الشعب الاماراتي والكويتي.. بس السعوديه عادها يمكن 6 مرات.. جلست افكر.. ليه يعني حنا اكثر؟؟ فكرو فيها شوي.. لين يخلص الموضوع بعدين جاوبو.. ...... ارجع الحين لصلب الموضوع ليش صرنا نشوف صور كثيره.. وعناوين الصور ((سعوديات..سعوديات..سعوديات)) لو نتفرج عالصور.. نلقى رجول.. نلقى جزم نلقى اساور خضرا والفيس بوك عاد..والهاي فايف.. انواع الصور اللي مدري وش اقول عنها شفايف.. عيون.. ونادر ما تلقى وحده حاطه وجهها.. على فكره.. اللي تحط صوره وجهها,, محترمه اكثر من اللي ترزز اشياء ثانيه يعني عشانكم تتغطون.ترح تصورون ذا الصور.. تمنيت اني اطيح على بروفايل احد..والقاه حاط اسم كتاب حلو نقراه..خاطره حلوه من كتابته.. موقف مضحك مر فيه..موقف مؤثر.. او اذا كانت او كان يعشق التصوير ليه يصور هالاشياء السخيفه..؟؟ اللي ما تدل الا على سخافه تفكيره ؟؟ اذا يحب التصوير ليه ما يحترف ويصور صور فوتغرافيه احترافيه وراح يبدع فيها ! ليه كل اللي اشوفه اشياء بالجسم وحكي واحيانا قله حيا لا صراحه موب احيانا غالبا.. وش هالفضاوه في العقل لدرجه انكم تصورون يدينكم رجلينكم.. ((شنطكم الماركه)).. يمكن الفضاوه اقدر اتقبلها او ابلعها لأن احيانا نسويها حنا انفسنا من كثر الفراغ اللي حنا فيه او يمكن شكل الصوره حلو.. بس ان الوحده تجي تصور مفاتنها هي وخوياتها وكاشخه بالجي سترينق والمنتديات والقروبات السعوديه تتسابق لنشرها .. الدال عالخير كفاعله.. والشر بعد.. بعدين انتي ياللي مصوره انتي وخوياتك.. يعني انتي همك الوحيد ما يشوفون وجهك عشان محد يعرفك.. بس مفاتنك وشفايفك.. وغيرها عادي يشوفونه لأن المهم عندك الناس موب الله؟؟ طيب صورتك قدام نفسك طيب ؟؟ ما تهتز انك سويتي شي حقير وضيع مثل هالشي؟؟ اصلاً كيف صورتو صوره زي كذ يعني ما استحيتو من بعض يا بنات؟؟ عيب يعني يعني عشانكم بنات مع بعض عادي تورون بعض يعني؟؟ ولا اقولكم انا نسيت انكم ناشرين الصور للعيال فما يهمكم البنات.. يعني صدق شي يضيق الصدر بنات سعوديات مسلمات في مجتمع مثل مجتمعنا يسون زي كذا.. ودي اعرف امك وابوك وش بينظرون لك بعد ذي الصور؟؟ يعني حرام اهلكم ربوكم احسن تربيه.. بس انتم للأسف ما ربيتو انفسكم.. فيه شي اسمه تربيه النفس بس انتم تتبعون اهوائكم او خليني اقول مخكم الفاضي ولا قروب ثاني سعودي برضو والصور اللي ناشرينها ذوليك عاد متبرقعات وبعابياتهم متكحلات ومسوين حركات غبيه ومصورين.. طيب ؟ وبعدين ؟؟ ابي افهم وش الهدف ؟؟ مره وناسه ؟؟ مره يضحك ؟؟ مرره كول انتم صراحه طبعن ترا الكلام موب موجه للبنات فقط ! لأن يوجد عندنا وبكثره رجال عقول فاضيه ايضاً اللي همهم نوم واكل.. وفلوس ياخذها من ابوه ولا امه تطورو شوي ارتقو شوي اطلعو بصوره احلى من كذا.. انتم عارفين ان النت اكبر وسيله انتشار.. قبل فتره في ام بي سي فور تدرون ان في برنامج من برامجها عارض بروفايلات لبنات سعوديات.. باسماءهم طبعاً موب اسماء حقيقه.. بس شوفو الصور انتم شفايف وخرابيط ومدري وشو علقو على هالشي باننا متكمكمين بعبايتنا عشان كذا نروح عن انفسنا بذا الطريقه.. انشرو شي حلو حاولو تطلعون بشخصياتكم الحقيقيه موب تصيرون مثل الامعه اللي يسوي شي عشان يقلد الفنان الفلاني ولا البنت الفلانيه.. ليه بس تنشرون الشي الشين؟ انواع المقاطع الشينه تنتشر انواع الصور الشينه.. ليه؟ وش استفدت ؟؟ غير الذنب والاثم انك خليت احد يشوفها وانك نشرت شي مو كويس عن المسلمين اقولكم شي؟ شفتو كتاب (بنات الرياض) قريته صراحه كل اللي فيه واقع اشياء فعلا تصير عندنا طبعاً لفئه معينه من الناس.. مع اني من المحاربين للكتاب بس تدرون ان الكتب تترجم لاكثر من 22 لغه؟؟ تدرون انهم برا يدرسون الكتاب فيه دوله من الدول يدرسونه ..! تخيلو ..! يعني الحين اللي برا يدرسون الكتاب كنص سعودي ادبي يمثل حياة السعودين كله سلبيات في سلبيات مثلا احنا الحين ندرس روبنسون كروزو في الجامعه على اساس انه نص انجليزي يمثل الحياه الدينيه والسياسيه الاجتماعيه في هذيك الفتره.. هم يدرسون (بنات الرياض) لتمثيل المجتمع السعودي شلون الواحد يصلح مجتمعه ؟؟ بأنه يكمكم على اغلاطه ولا يحكيها عشان ما ينفضح قدام الاجانب والناس بس عادي يدشرون ويخربون وكل شي بس ما ينتشر عنهم شي غلط كل دوله بالعالم فيها الصالح والطالح.. البيت الواحد فيه الصالح والطالح.. ما تحبون احد يحكي فيكم ابد بالرغم من كل الاغلاط بحياتكم.. قبل فتره سمعت انهم رحلو هشوم الرياض.. الى ديرته الحقيقه (سوريا) وانه لا يمت للشعب السعودي بصله كأن ما عندنا سعودين من هالجنس وربي اشوفهم وبكثره في التحليه وفي غيرها والي مو متآكد من صحه كلامي يروح لمقاهي الي بالثمامه بالرياض الدروازه وغيرها ويشوف الاشكال الي فيها ! ليه ما تصلحون ايميلات تعود لكم بالفايده ..! وتحسن سمعتكم وتظهر الجانب الحلو في كل سعودي وسعوديه؟ بقولكم مثال لوحده اعرفها شخصيا قبل ما ينتهي رمضان ارسلت مسج لكل اللي تعرفهم وقالت انهم بيجمعون فلوس هي وبنات خالاتها وبيروحون يشترون العاب وحلويات ويرسلونها لجمعيه الايتام وفعلا جمعو وصل المبلغ لين 22الف كله من بنات عشرينيات في العمر كلهم تحمسو لهالشي كلهم اشتغلو وشرو العاب وحلويات شرو ميك اب وشرو اشياء ثانويه الجمعيات ما توفرها للمحتاجين والايتام.. يعني البنات فكرو بتفكير مرره حلو فكرو بالاشياء اللي يحتاجونها الفقرا ويفرحون فيها بس ما توفرها لهم الجمعيات لانها مهيب ضروريه مثل الاكل والبيت والملابس يعني هالمثال صراحه اوقف واصفق له بحراره هذولي هم السعوديات اللي نعرفهم شله شباب اعرفهم هم نجدين طالعين لجده في رحله بحريه وصادو كميه لا بأس بها من السمك.. تدرون لو بيبيعون هالسمك كم يبيجب لهم ؟ تقريبا 4 الاف.. بس هم كانت نواياهم اهم من الفلوس.. اخذو هالسمك ودوه لمنطقه فيها ناس فقرا وتصدقو.. برضو حمله تبرعات الراجحي.. ترا اكثر من تبرع فيها شباب.. ((المواقف مذكوره عشان ابين انو فيه ناس كويسه يعني ابين الجانب الايجابيه)) يعني فيه ناس تشتغل.. فيه ناس عندها اهداف.. موب بس بالنت.. حتى برا النت,, سواء بنات او شباب.. نبغى جيلنا السعودي الجديد ينتشر عنه كل شي حلو.. انا ما اقول انكم ما تنبسطون ما تسون هبال بس برضو بحدود..! موب عشانكم ورا الشاشات يعني عادي؟؟ (هياط ورا الشاشه = مرض) الصور اللي من النوعيه اللي ذكرتها في البدايه بطلو تنزلونها النت بطلو تحطونها بالبروفايل حقكم.. ترا صدق يعني هالشي ما يبين الا فضاوه عقولكم لأن هالبروفايل يبين شخصيتك.. اي احد يشوف هالصو ولا يجيه ايميل من هالنوعيه يبطل ينشرها لأنها يساعد على انتشار هالظاهره لأن التقليد عندنا اعمى وابي اتطرق لموضوع بيخش فجأه بس لازم اعلق عليه(( فضيحه بنت .. الخ)) هالنوعيه من الصور والفيدوهات ترا عليكم اثم لو نشرتوها.. اولاً نشرت شي حرام ثاني شي ما سترت على بنت او ولد الناس.. ما تخاف ربي يفضحك بشي بعد سنه او 2 او 100 قال الرسول صلى الله عليه وسلم (من ستر على مؤمن بالدنيا,,ستر الله عليه بالاخره) اتمنى ان موضوعي هذا ينتشر بنفس الطريقه اللي انتشرت فيها هالصور.. يهمني الموضوع ينتشر في المنتديات السعوديه اكثر من المنتديات العربيه.. لأننا نحاول نناقش قضيه سعوديه داخليه ومافيه مجتمع ما يخلو من الاخطاء.. ابغى اذا احد قال((احلى تحيه لشعب السعوديه)) وعادها 6 او 10 مرات.. اعرف ليه قالها.. واقول معه حق.. تناقض المجتمع وتناقض الافكار ينتقل بصوره عجيبه بنهايه موضوعي احبت ان اقول اني لاعمم في كلامي على جميع السعودين او الخليجين وايضا لا ننسى انه يوجد بنات محترمات ومثقفات ومتعلمات وقبل هذا كله محتشمات كل مكان في الصالح وفيه الطالح وانا اغلب موضوعي خصصت في المجتمع السعودي لانه مجتمعي ويهمني ان اناقش قضاياه اهم من المجتمعات الثانيه وان يصل الموضوع لاكبر عدد ممكن منقول |
رد: أعذروني يالخليجيات وخاصة السعوديه
|
رد: أعذروني يالخليجيات وخاصة السعوديه
الله يعطيك العافيه ع الموضوع ويجعله في ميزان حسنات
اللهم لاتؤاخذنا بما فعل السفهاء منا وماقول الا الله يهدي الجميع ويبطلون الناس هذي السخافات الي مهي من دينا ولا عاداتنا |
رد: أعذروني يالخليجيات وخاصة السعوديه
كل بلد و كل منطقة فيها الصآلح و الطالح
الله يهدي الكل |
رد: أعذروني يالخليجيات وخاصة السعوديه
ما ادري بصراحه ايش اقولك
بس يعني ودي اقول ان بنات السعودية يصورون جزء منهم ((شفايف __ رجولها)) في ناس تطلع كل اللي عندها وما همها والله يهدي الجميع ياآآآرب |
| الساعة الآن توقيت السعودية الرياض و الدمام و القصيم و جدة 11:10 AM. |
Powered by vBulletin® Copyright ©2000 - 2024,
vBulletin Optimisation provided by
vB Optimise (Pro) -
vBulletin Mods & Addons Copyright © 2024 DragonByte Technologies Ltd.