ازياء - فساتين سهرة و مكياج و طبخ

اولا الفتة مش شوية رز على شوية عيش وخلاص لا ,, لازم تكون كل الحاجات واخدة من طعم بعض عشان النكهة اللى بنحبها تكون قوية وباينة

** كلنا عارفين المقادير بس هقولها للى ميعرفش : والمقادير تملا قالب بيركس نفس الحجم اللى انا عملاه ده

-- الصلصة :
4 فصوص توم مهروسين او مدقوقين ومفرومين يشوحوا فى معلقتين زيت واول ماريحتهم تطلع نزل عليهم بمعلقة كبيرة خل وبعدين عصير طماطم حوالى 4 طماطمات ومعلقة صلصة عشان القوام ومعلقة صغيرة سكر وبابريكا وفلفل اسود وملح وكمون وكسبرة ناشف مطحونة ونديها غلوة وبعدين نوطى ونغطى عليها لحد ماتسبك بس مش اوى يعنى تكون صوص تقيل ..

-- الارز :
فى معلقة سمنة بلدى نشوح فصين حبهان وحبة فلفل اسود حب صغيرين ودول بيدوا طعم تحفة ولما ريحتهم تطلع نزل بكوبايتين رز مغسولين ومنقوعين لو الرز بتاعك بيحتاج نقع ,, ونقلب كويس اوى الرز بالسمنة والمنكهات اللى حطيناها لحد مايتشرب طعمهم كويس وبعدين نضيف الشوربة وليس مية وطبعا شوربتنا مركزة وجميلة ولو هيحتاج ملح نضيف بس نخلى بالنا من حدق الشوربة اللى حطيناها ونسيب الرز يستوى بالطريقة المعتادة ..

-- العيش :
بجيب العيش الشامى واقصه بالمقص عشان بيكون اسهل من التقطيع وكمان بيكون متساوى فى الحجم وانا متعودة على كده ,, واوزعه فى صينية زى مافى الصور واعمل خلصطة عبارة عن (( فصين توم كبار مفرومين ناعم او على حسب كمية العيش ده نص رغيف لبنانى من الكبير + معلقة كمون + معلقة كسبرة ناشفة مطحونة + معلقة بابريكا + 3 ملاعق كبار زيت ذرة )) وتقلب الخلطة كلها كويس وترش على العيش زى مافى الصور وتقلب فيه بالمعلقة كويس عشان العيش كله يتشربها وندخل صينية العيش فرن مسخن على حرارة متوسطة ونتابعه كل شوية بالتقليب لحد مايحمر وهتلاقى ريحته وطعمه رهيب ,, عارفين انا جوزى دخل وانا لسه مطلعة العيش من الفرن قالى الريحة عاملة زى الدوريتوس او البيك رولز :)

-- رص الفتة :
نص كمية الارز فى قاع البيركس وبعدين العيش كله عليها ونسقيه ب (( شوربة مضاف اليها معلقتين من صلصة الخل والتوم الحمراء اللى عملناها فى الاول )) ويراعى حاجتين بقى عشان دول بيفرقوا جدا :
** نسقى العيش وقت التقديم مش نغرقه من قبلها بكتير ويبقى بايش وعامل سورى زى اكل الفراخ ناس كتير مابتحبش الفتة بسبب الموضوع ده ,, لكن لما هتشقيه وقت التقديم وهتحطى الرز عليه من فوق هيطرى وهيشرب الشوربة جدا بس من غير مايبوش ارجوكم :)

** تانى حاجة نراعيها اننا نسقى العيش واحنا حاطينه فوق طبق الرز اللى فى القاع لان الشوربة بينزل شوية منها على الرز ده وبتخليه طعم اوى وبتخلى لونه محمر وجميل يعنى بيكون فى تجانس بين مكونات الفتة مش مجرد رز وعيش ملهمش دعوة بعض

نرجع لرص الطبق : فوق طبقة العيش بعد ماسقيناها بالشوربة اللى عليها الصلصة هنحط كمية الرز اللى باقية وهنساوى كويس ونضغط بايدينا ونقوم قالبينها فى طبق التقديم ونوزع الصلصة بالشكل اللى نحبه ونرش رشة خفيفة فلفل اسود ..

وبالهنا والشفا