كيكة يوسفي
 

هقولكم المقادير والطريقة مع بعض (
1 كوب سكر + 1 كوب عصير يوسفى فريش طبعا لو مفيش يبقى عصير برتقال لو مفيش يبقى لبن + 2 ملعقة كبيرة لبن بودرة + 2 ملعقة كبيرة قشطة + فانيلا -----------> كل ده يضرب جيدا فى الخلاط
ثم يضاف 4ملاعق كبيرة بشر يوسفى (( وده بقى بيتعمل بانك تجيبى قشر اليوسفى وتكحتى القشرة البيضاء الداخلية اللى عليه وتضربيه فى الكبة فرم خشن وانا بشيل منه فى الفريزر كميات واطلع منها على الاستعمال زى ده ,, لو مش متوفر عندك مشيها بشر برتقال بقى بس اليوسفى نكهته اقوى واحلى بكتير من البرتقال بيفرق اوى ))

وتضربى تانى فى الخلاط
وبعدين وانتى مشغلة الخلاط انزلى ب 3/4 كوب زيت ذرة من فتحة الغطاء خيط رفيع لحد ماتخلصى كمية الزيت كلها

افتحى الخلاط وخدى كوب كامل من الخليط ده وشيليه فى التلاجة

اللى باقى من الخليط فى الخلاط ضيفى عليه 3 بيضات متتاليات ونقط خل عشان الزفارة احتياطى واضربى كويس اوى

فى طبق عميق انخلى كوب وربع دقيق مع معلقة كبيرة بيكنج بودر وانزلى عليهم بالخليط اللى فى الخلاط وقلبى برفق بمضرب سلك فى اتجاه واحد او ملعقة خشب من تحت لفوق لحد ماخليط الكيك يكون جاهز

بطنى صينية مقاس 26 بالسمنة والدقيق وصبى فيها خليط الكيك ودخليه فرن مسخن على حرارة 180 لمدة 45 دقيقة تقريبا ,, بعد اول نص ساعة افتحى على الكيك وتابعى سواه لحد ماتتاكدى انه استوى تماما

اول مالكيك يطلع من الفرن اقلبيه فى طبق التقديم وهاتى كوب الصوص اللى حجزناه فى الثلاجة من زمان ده وصبيه على الكيك وهو سخن ورشى المكسرات المفرومة لو حابة بس طعمها حلو اوى

وبس كده ماقولكوش على اليوسفى وريحته وطعمه ,,
وعلى فكرة ممكن تستبدلوا اليوسفى بالموز وطبعا كوب العصير اللى فى الاول بتعمليه بانك تضربى موزاية كبيرة مع شوية لبن وتكملى باقى الخطوات عادى
وممكن كمان بالفراولة وبرده تضربى كمية من الفراولة مع اللبن فى الاول وتكملى باقى الخطوات

بس الاتنين دول من غير قشطة لان عصايرهم تقيلة اصلا مش محتاجة دسامة

رد: كيكة يوسفي
 

مشكوره غلاتي

رد: كيكة يوسفي
 

شكرا لك
ابداع متواصل
تقبلي مروري وردي