ازياء - فساتين سهرة و مكياج و طبخ - اوزي باللحمة المفرومة

الاوزي اكله سوريه و بتتعمل بالرز المصري و باللحمه مقطعه و يفضل تبقي لحم موزات بس انا عملاها
المرة دي باللحمه المفرومه و ممكن تتعمل بالفراخ و في ناس بتعملها نباتي بالخضار المشكل مع الرز بس هي اصلها باللحمه والاكلة دي حلوة و شيك اوي في العزومات

المقادير :
1 1\2 كوب رز مصري
نص لفه جلاش و ممكن تتعمل بالباف باستري او السبرينج رولز
1\4 كيلو لحمه مفرومه معصجه او لحمه مقطعه مسلوقه او فراخ مسلوقه ومقطعه
بسله
بهارات مشكله
قرفه معلقه صغيرة قوي
جوزة الطيب
لوز محمص او صنوبر
ملح و فلفل

ننقع الرز علي الاقل ربع ساعه و نحمره في معلقه سمنه شويه( و دي دايما طريقتي في الرز عشان يبقي مفلفل لازم اشوحه في السمنه شويه ) و بعدين بضيف بهارات المشكله و القرفه و بشر جوزة الطيب و الملح و اضيف الميه و اسيبه يستوي
اعصج اللحمه مع البسله و احمص اللوز او الصنوبر
اجيب الجلاش و ادهن واحدة واحدة بالزبدة من الناحيتين و افردهم في قالب عميق طبق او اي حاجة عميقه الحجم الي انتي عاوزاه كام واحدة فوق بعض بس عكس بعض يعني يعملو حرف اكس مثلا عشان يشيل الحشو كويس و يقفل عليه من فوق كويس و بعدين نقلب الرز مع اللحمه و البسله و اللوز او الصنوبر و نحط الحشوة في الجلاش الي في الطبق و نقفله بالجلاش و نقلب الطبق في صينيه للفرن و ندخله الفرن 10 دقايق و ننزله تحت و نفتح الشوايه يتحمر من فوق و بالهنا و الشفا لذيذ جداااا