|
أسمهان وعبدالرحمن قصة أسرية هادفة بكل اجزاءها متتابعة روآية سعودية
مسآء\صبآح الخير.. آنآ اليوم جبت لكم روآية رؤؤؤؤؤؤؤؤعـة بكل مآتحمله الكلمة من معنى..وهي روآية كآملة.. زرآح آنزلهآ لكم كلهآ إن شآء الله اليوم..ومآرآح آسوي حركآت((النذآلـــة)) اللي في بعض البنآت..زي اللي تقول مآرآح آنزل بآرت جديد إلآ لمآ آشوف ردود البنآت:a6:..طيب آفرضي آن فيه متآبعآت لك لكن مو مسجلين بآلمنتدى..وش يسؤؤن؟؟ المهم مآرآح آطيل عليكم بآلكلآم ملآحظـة: آتمنى من المشرفآت عدم حذف الروآية ونقلهآ للقسم المنآسب لآني مآقدر آنزل موضوع بقسم روآيآت مكتملة.. *أسمهان وعبدالرحمن* للكآتبـةرماح ردينية.. مثل العادة جيت بقصة جديدة من أعماق أفكاري! عل وعسى أحد يبتسم منكم وأكسب أجره!! عاد ياشين النكد واللي يصنعونه ويتفننون فيه! لذا قلت لنفسي في هذه الظروف السيئة اللي نعيشها خل ننافس شركة الاتصالات اللي فتحوا لنا شهررسايل(نصية+وسائط)بالمجان! وأوزع أنا عليكم بعد ضحكات بالمجان!! المهم كان وياما كان....والحياة مليانة سكان وبشرمن مختلف الألوان وأبطالنا اليوم اسمهــــــــان وزوجها اسمه عبدالرحمن! كل واحد بطبع مختلف...لما جاء عبدالرحمن يخطب قبل كم سنة كان شرطه الأساسي لأمه إنه يبغى وحدة صغيرة والسبب إنه يبغى يشكلها على كيفه!!(على باله عجينة فطايربدقيق كويتي!! اصحى يابابا بنات هالوقت يعجنونك ويخبزونك بتنور!!) بالرغم انه عمره مو صغير30 سنة!! وعاد أمه لبست عباتها وصارت تدوج من عرس لعرس تصيد البنات اللي بالطعشات(الترجمة اللي أعمارهم شي وعشر)! لين لقت له حبيبة القلب اسمهان وعمرها 17 سنة طالبة بثاني ثانوي..خفـــــــــيفة بس تتثيقل!مايخالف الثقل صنعة!!ونوعاً ما راعية مقالب!(نوعاً ما؟؟ ولا نوعاً شاي؟؟)هههههه المهم لما اتصلت أمه تخطبها بغت اسمهان تتشقق نصين من الفرحة!!قالت يالله فكة من ثالث ثانوي بلا دراسة بلا هم!!! ومسكتها أختها الكبيرة اللي متزوجة من سنين وقعدت توصيها الوصايا العشر!(وعاد هم صدق أخوات بس ياحبهم في المناقر24 ساعة على الطبيعة وفي التلفون وفي المسجات وبكل مكان !!!)وكان اسمها(أسماء) وقالت: اسمعي يااسمهان بكرة جاية تخطبك حرمة لولدها لاأوصيك الله الله بالعقل والثقل وأول شي لازم تسوينه تحسنين مشيتك!وانتي من شافك يحسبك فنانة رقص شرقي!ياكافي من تمشين يهتز كل شي فيك!!! اسمهان:لو شاطرة قلديني! أسماء:لا شكراً.. من رقص نقص!!! أمهم:أهم شي يااسمهان الله يستر عليك حفلة الألوان اللي تحبين تسوينها بوجهك قبل كل طلعة مانبيها!!!!الحرمة جاية تخطب مو جاية تاخذ دورة تجميل!!! اسمهان:المكياج ضروري لإبراز جمال الوجه! أسماء:مو لما يكون فيه جمال من الأساس!!!! اسمهان:استغفرالله ...صدقيني كل ماناظرت وجهك حسيت اني قاعدة مع جدتي الله يرحمها ماينشاف عليها إلا كحل أبوحجر! أمهم:أقول أص الله يصلحكم بس! ماأخس من المربوط إلا المفتلت!! أسماء:لاتضيعين الموضوع ياست اسمهان! صدق ماله داعي تحطين ماكياج يعطيك عمر أكبر ويعطي اللي قدامك احساس بإنك طايرة على الزواج!!! اسمهان:واشفيها لاظنوا الناس اني طايرة على الزواج؟!!هاه؟الزواج عيب ولا حرام..؟! أتحدى انه في بنت ماودها تتزوج!!! أمهم:استحي استحي الله لايفضحنا!!وش هالكلام يابنت؟!! اسمهان:الحق حق ياجماعة!مافيه ناس جايين يخطبون الا وودهم توافق العروس...وأنا موافقة! التفتت أسماء لأمها وقالت: ماقلت لك يايمه هالبنت مامنها رجا؟!!طقاقة ويخب عليها بعد!! اسمهان:هههههههههههههها والله مرة تفشلون صدقتوني قاعدة أتغشمر!!اللي بعده اللي بعده يامدام أسماء! أسماء:واللبس لاأوصيك لازم يكون ساتر! اسمهان:أكيد وعازل للضوء والصوت صح؟!! أسماء: ياخفة دمك!!شوفي بعد أهم نقطة لاتقعدين طول الوقت مع أمي ان جت الحرمة بس ادخلي اقعدي شوي عشان تتمقل فيك المرة زين ثم اخرجي....وارجعي صبي القهوة واطلعي شوي وارجعي باشري من الحلى على المرة وهكذا دواليك!!!!! اسمهان:لا والله!!!احلفي بتشغليني مخدمة قصور؟؟!! أمهم:صادقة أختك لاتعاندين! اسمهان: مادام الدعوة كذا أجل ليش جاية المرة تخطبني لولدها تروح تخطب له أقرب فليبينية تراهم شاطرين في المباشرة!!!! ...... ردت عليها أسماء وقالت:فكرة تهبل !!ليش يايمة ماندله على (كاتيا) شغالتنا...يمكن نكسب فيها أجر وتعلن اسلامها على إيده!!!!! اسمهان:لعن الله ابليسك!!إلا قولي ليش ماندل زوجك انتي على كاتيا..ونكسب فيه أجر مسيكين!!! على الأقل كاتيا بشوشة ومرحة مو لسانها برة 24 ساعة مثل بعض ناس تقولون حية!! عاد الأم قامت تضحك...وقالت:الله لايحرمني من هبالكم يابناتي!! أسماء:يمة مدري شلون مستحملتها هالسوسة؟! أنا أقترح تعجلون زواجها بأسرع وقت خل نفتك من هذرتها!! اسمهان:آميــــــــــــــن!! ايه يمة تكفين اسمعي كلامها!أول مرة في حياتها تقول شي صحيح!! الأم:يااسمهان عيب عليك يابنتي اركدي شوي!! اسماء:ماتنلام يمة تخاف إن طار مايجي غيره!! الأم: اش دعوى؟! أصلا بعدها صغيرة..ماله داعي نستعجل عليها...لكن مواصفات العريس شجعتني أقابل أمه...ومو شرط يصير شي هالحين يمكن بعد كم سنة!! اسماء:إلا غريبة على طفاقتك ياست اسمهان ماسألتي عن اي شي؟يعني لاقلتي مين دلهم علينا؟ ولا من أي قبيلة؟ولاعن وظيفة العريس ولاعمره؟ولا اسمه حتى!!! اسمهان: وإش لي باللقافة يختي!أهم شي جاني عريــــــــــــــــــــــس!إلا صدق يمة اش اسمه؟! الأم:خمني!! اسمهان:طيب ساعديني يبدأ بأي حرف؟! الأم: حرف العين! اسمهان:عباس؟!! الأم: لا! اسمهان:عادل؟! الأم: لا! اسمهان:عدنان؟! اسماء قالت: لااا اسمه عبسي ياست اسمهان!! وقامت الأم تضحك!!!وقالت:لا! اسمهان:يمة لاتقولين اسمه عيد!!ماأحبه هالااسم! الأم: لا تطمني مو عيد! اسماء:بس عاد تراكم زودتوها!!الأم وبنتها يلعبون فوازير رمضان!!ابسطي ياست اسمهان اسمه لايق على اسمك...اسمه عبدالرحمــــــــــن! اسمهان: حسافة!!كنت أتمنى لو كان اسمه رائد أو ياسر أحسه أكشخ!!! اسماء: ايه ولو بعد كدش والبنطلون طيحني بيطلع أزين!!! اسمهان: أعوذ بالله!!لاتفاولين...هالأشكال ممكن نشوفهم بالأسواق ونضحك من باب الترفيه لأن شعورهم وبناطيلهم مثل مهرجين السيرك إتز أوكيه!! أما نتزوج من نفس هالطقة نو ويــه!! الأم: شوفي يااسمهان ترى ام المعرس شايفتك قبل.. في زواج بنت خالك لأنها من جماعة زوج بنت خالك.. وسألت عنا وكونت فكرة بعدين اتصلت وعطتني معلومات عن ولدها! اسمهان (بشغف):اش قالت يمة؟! الأم:قالت ان ولدها موظف في احدى الشركات وراتبه زين....و ....... ..........تدرون اكمل بعدين!!!!! ........ياحلوات تشجع القصة أكملها ولا لا؟؟؟؟ بكل الحب جيت أكمل.... المهم الآنسة اسمهان قاعدة تسمع من أمها بشغف وعقلها يسافر لبعـــــــــــــيد في دنيا الأحلام....تحلم بالعريس اللي يجي يخطفها بشبح أسود ويفلسع بها لأقرب ديرة أوروبية!!! الأم:اللي عجبني في هاالولد يااسمهان اني سألت عنه بنت خالك وسألت أهل زوجها عنه والكل مدح فيه وفي أخلاقه...كون نفسه بنفسه وساكن بحلال أبوه الله يرحمه,,وأمه ساكنة بدور مستقل ووظيفته وأحواله المادية مستقرة..يعني إلى الان الأوضاع مطمئنة... اسمهان(وبتفكير طفولي ساذج)قالت:ياترى في أي حي بنسكن؟ ولأي بلد بنسافر؟وبأي مكان بيسير زواجنا!!!!!!!!!!! أسماء:هيييييييييييييييييه انتي!! ستوب!!على طول رسمتي على الرجَّال وصممتي مشاريع؟!! ترى السالفة لسه فيها أخذ وعطا!! يمكن ماتعجبينه!ويمكن يستخف بسنك ويشوفك بزرة..خاصةً إنه صك الثلاثين!!! اسمهان:والله محد مستخف فيني إلا انتي!! وبعدين اش اللي عمره 30 سنة؟ يعني كبر أخوي محمد؟!وكبر زوجك ياأسماء؟؟ الأم:ايه كبر محمد واشفيها ؟هذا محمد ماشاء الله عليه تزوج قبله من 4سنين!وأحمد زوج أسماء نفس الشي. اسمهان:أنا توقعت بتقولون عمره22 او 23 سنة بس! اسماء:الحمدلله والشكر!أي 22 و23 سنة زواج بزارين هذا! اسمهان:طبيعي أستغرب ياست اسماء الفرق بينك وبين أحمد زوجك5 سنين بس!لكن أنا وذا العريس بيننا 13 سنة!!!لو مزوجينه أهله بالمتوسط كان خَلَّف بنت بعمري!!! الأم:يااسمهان يابنتي الرجال مايوصل الثلاثين الا ونضج عقله..وصار قادر يتحمل المسئولية..أحسن من شباب العشرينات اللي باقي مخفة!!!! ........واستمر الحوار والنقار لين ماطلع عليهم النهارسمعت ياشهريار؟! أمزح!!هههه المهم ثاني يوم بدأت الاستعدادات بإعداد المأكولات وضيافة القهوة والشاي وكانت الزيارة الأولى بحضور الأم بس!كنوع من التعارف عن قرب بالعروسة وأهلها... وطبعا اسمهان ماحطت يدها بشي قاعدة من صباح الله خير تسوي ماسكات لوجهها وخلطات لشعرها وتضبط أظافيرها وحالتها حالة!!! وكانت اسماء جاية من بدري تساعد أمها في المطبخ! ولما شافت أختها تتمخطر طول النهار بخلطات ووصفات صاحت فيها:اسمهـــــــــــــــــــــ ـــــ ان! وش له تتزينين؟! الحرمة وحافظة شكلك أكيد من يوم ماشافتك تطامرين من أول زواج بنت خالك لآخره!!يعني عاجبتها! ولو اني متأكدة إنها لو شافتك وانتي لابسة روب قديم وحاطة حنة بشعرك والحنة تقوطر فوق خدودك واذانيك كان بيكون لها رأي ثاني!!!!! اسمهان:وش حار كبدك ياخالتي قماشة؟!! أنا أحب التزين والتكشخ..طبعي كذا!! اسماء:لايجي المغرب الا وانتي جاهزة..الحرمة بتجي بعد المغرب مباشرة! وراحت اسمهان تتروش ولما خلصت احتاست بشعرها اللي كان مرة طويل وش تسوي فيه! وقالت:ياأسماء وش رايك أدهن شعري كله جِل وأسويه نقرو مو أحلى؟!! اسماء:لا ياشيخة؟الحرمة هذي جايه تتمقل فيك زين عشان تسوي بث حصري لولدها وأهلها بمواصفاتك..وانتي تبغين تفشلينا بالعشة اللي بتنصبينها على راسك؟!!!!! اسمهان:والله مافيني اسشوره..شعري طويــــــــل وغزيـــــــر ويديني مرهقة!!تسشورين لي؟! اسماء: ولا يطراني...أنا عجزانة أرفع ولدي أرضعه! وتبيني اسشور لك؟!! اسمهان:إذن بأكلم نوف بنت عمي تجي تسشور لي سشوارها يهبل! اسماء:إصحِك(إصحك بالمصري يعني إوعي!!!)المفروض الأمور هذي تسير في الكتمان...مو تروحين تنشرين الخبروالله يعلم يكون فيه نصيب او لا! ..... بصراحة تعبت أكمل في وقت آخر!!الله الله بالردود ******** طبعا بعد ماالآنسة اسمهان ذات الشعرالكستنائي الطويل(حشا صارت روبينزل هذي!!هههه)كانت متعيجزة تفرد شعرها بالسشوار...أسرعت لتستنجد بحمَّالة الأسية(كاتيا)شغالتهم!!! وقالت:كاتيا بلييز..اتركي مافــــــ ـيدك وضبطي لي ماي هير!! كاتيا:واي مس اسمهان؟!ار يو قوتو ذا اوت سايد؟!!!! اسمهان:لا وانتي الصادقة اللي ساكنين اوت سايد جايين عندنا!!! وانطلقت اسمهان مع كاتيا اللي سشورت شعرها وقعدت تمنكر لها أظافرها... ودخلت أم اسمهان وشافتها على هالحال وقالت: يابنتي وشفيك ترى العرس مو اليوم!!! وجت من وراها اسماء بعصبيتها المعتادة وقالت: خليها في خيبتها يمة..مسكينة أول مرة تنخطب!! اسمهان:بسم الله علينا وأنا اش سويت؟! حرام أتهندم؟! ولا انتوا ودكم بوحدة تفشلكم تطلع قدام الناس بشوشتها؟!! الأم:لا..لا..بس لاتبالغين بزينتك خلك على طبيعتك أفضل.. اسماء:وعجلي.. بقي دقايق على صلاة المغرب . ****وخرجوا من الغرفة..لكن اسمهان راحت تركض وراهم وقالت:تعالوا تعالوا مااخترتوا لي اش ألبس؟! أسماء: وش رايك يايمة؟أنا أقول تلبس بيجامة! الأم:لا مريول المدرسة أكشخ!! اسمهان بسخرية:لا بأِلف منشفة حول خصري وأطلع!!! الأم:يابنتي ياشين اسئلتك!البسي أي شي اعتبري نفسك طالعة من البيت والبسي من ملابس الطلعات اللي عندك ..ماشاء الله دولابك متروس! اسمهان:أدري بس محتارة اش ألبس! اسماء:يختي عليك!!مو لو تقتصدين في الملابس مااحترتي! لكن بلاك كل مانزلتي السوق قشيتي الشين والزين..عندك همول تفتح لك محل! وراحت اسمهان طلعت بنطلون جنزوبلوزة قطن وقالت:هاه..وش رايكم؟ الأم:بالله من جدك؟يايمة شكلك بعدك مو مستوعبة انه بيجينا زوار..مو طالعين للبحر!! وقامت اسمهان وطلعت فستان ماركة حلو بس مكشف من فوق و قصيــــــــــــــــرمن تحت!وقالت:طيب هذا؟! اسماء:لاعز الله بنـتـفشل!!استحي بتخرجين كراعينك قدام أم المعرس؟!!لا وسيقانك مو منتوفة!! الأم:أحذرك يااسمهان تلبسين قدام الحرمة كذا.. احنا ماندري عن طبعهم كيف..الحين تاخذ فكرة إننا مو محافظين ونحب التعري...وانتي أصلا مو مقصرة كل عرس وانتي مفشلتنا بفساتينك شي شفاف وشي كاسي عاري..الله يصلحك. اسماء:طبعاً...! اخرة الدلع...قلة الاحترام! اسمهان:خلاااااااااااااص تراني انغثيت!!اش ودكم ألبس فستان حمل ولاعبايتي؟!! هذا الدولاب قدامكم اختاروا وريحوني.. الأم قامت تفتش في الدولاب عن تنورة طويلة لين لقيت أخيراً وبعد جهدٍ جهيد تنورة ماشي حالها بس ماهي ذاك الطول .. وقالت:اش هذا يااسمهان دولابك يبي له اعادة نظر..مافي شي ساتر؟! الله يعين عليك!!خلاص البسي هالتنورة وشوفي لها بلوزة تناسبها!!! اسمهان:بس يمة ماهي حلوة علي!! اسماء: أجل ليش رازتها بدولابك؟! أمهم:تستاهلين ...قاعدة ساعة أحوس بدولابك وفي النهاية مالقيت إلا فساتين قصيرة وبلايز مشخلعة وبناطيل ضيقة!!! أبي أفهم قد مانروح أسواق ماقدرتي تشترين لنفسك ملابس حشمة وأنيقة؟؟؟؟؟؟؟؟ اسماء:أنا أدري عنها يمة؟؟ كاتيا الكافرة هذي ملابسها أحشم بمية مرة من بنتك!!! كاتيا:وت إز إت مين (كافرة) مدام أسماء؟!!! اسماء(طاح وجهها وقالت وش هالنشبة؟!!!هههه): إت إز مين فيري بيوتيفل!!(يعني مرة حلوة!!) كاتيا:أوووه ثانك يو مدام!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
أكمل لكم الجزء الرابع## خرجوا أسماء وأمها من الغرفةبعد مااختاروا لآسمهان ملابس.. وصلوا المغرب وجلسوا ينتظرون الضيوف وبالفعل في الوقت المحدد..وصلوا ودق الجرس ودق قلب اسمهان معاه!! وفتحت اسماء وأمها الباب ورحبوا بالضيوف وكانوا حرمتين(طبعا بما انها الزيارة الأولى وكانت للتعارف كانت حريم بس!مافيه رجال!) دخلوا الضيفتين للمجلس مع الأم وطلعت أسماء فوق لأختها اسمهان وقالت:ترى الضيوف وصلوا..خلصتي؟ ولا بعد؟؟ اسمهان:أخيرا انتهيت.. هاه وش رايك؟!! أسماء: ! اسمهان: بشري كيف شكل أم العريس؟!أتخيلها وحدة كبيرة بالسن بالستينات ولابسة فستان زم وشيلة!! اسماء:لا..مو مثل ماتخيلتي بالعكس الحرمة مملوحة وشابة وأتوقع ان عمرها بنفس عمر أمي 46 سنة مو أكثر! بس الحرمة اللي معها شكلها بالثلاثينات وأنيقة ماشاء الله.. اسمهان: معاها حرمة ثانية؟لايكون بنتها؟! اسماء:عبقريـــــــــة انتي لاشغلتي مخك!!!أقول لك الأم بالأربعينات والحرمة اللي معاها بالثلاثينات ..تقولين بنتها؟!! متى مداها تخلفها؟!! انزلي انزلي بس! وبالفعل نزلت اسماء ووراها اسمهان وراحوا المطبخ وصبت اسماء العصير بكاسات ورتبتهم بالصينيةوأعطتها أختها وقالت:أنا بأسبقك وأدخل المجلس وأقعد وانتي الحقيني بكاسات العصير وسلمي أول ماتدخلين وباشري بالكاسات... وفعلاً صار اللي قالته اسماء ودخلت اسمهان وقالت:السلام عليكم ووزعت عليهم العصير...ووقفوا الحرمتين يسلمون ولما مدت اسمهان يدها تصافح الحرمة الأولى كان وجه هذه الحرمة كذا.......! واسمهان بس شافتها صـــــــاحت بصوت عالي:أبلة جوهــــــــــــرة؟! أبلة جوهرة:معقولــــــــة اسمهان؟! أم العريس:ماشاء الله اثاريكم تعرفون بعض؟! أبلة جوهرة:فيه أحد بالدنيا مايعرف رئيسة شلة الصاعقة بثانوية جدة؟!! قامت اسمهان تلقط وجهها وقالت بسذاجة: لايكون انتي أم المعرس؟! أبلة جوهرة:حرام عليك وشلون أكون أمه وأنا أكبر منه بأربع سنوات؟!!أنا خالته أخت أمه... وردت أم المعرس اللي واقفة تبي تسلم على اسمهان لها ساعة!!: أنا أم المعرس حبيبتي! عاد بهااللحظة اقتربت اسماء من أمها وهمست بإذنها: رئيسة شلة الصاعقة؟إلا رحنا وطي! وجلس الجميع وقامت أبلة جوهرة توضح الموضوع للجالسين وقالت: أنا أشتغل مراقبة بالثانوية اللي تدرس فيها اسمهان..بس الصراحة ماتوقعت انها هي العروس!! أم اسمهان:رب صدفة خير من ألف ميعاد.. عساها بس ماهي مشاغبة؟! أبلة جوهرة:خلي المستور مستور!!بس الحقيقة انها من المتفوقات بمدرستنا! اسمهان طبعا صار وجهها كذا! وقام الكل يضحك.... وقالت أم العريس: ماشاء الله من يوم ماطاحت عيني عليها بزواج ال عبدالله وأنا عزمت ماأخطب غيرها لولدي! عاد اسمهان هااللحظة صارت تطالع بأم العريس وتقول في نفسها:يسلم فمك ياشيخة! أم العريس:بس الله يحفظها يوم شفتها بالعرس توقعت انها بالجامعة ماتخيلت أبد إنها طالبة بالثانوي!!! اسمهان قالت في نفسها:ياشينك ياذي الحرمة عساك بتبطلين؟!! الأم:عاد تدرين ببنات هالوقت لابد من روحة للكوافيرة بكل عرس!!وماكياج الكوافيرات ثقيل وتسريحاتهم مبالغ فيها نشوف البنات بالأعراس أكبر من العادة بسنين!!! وبدأت عاد سوالف الحريم عن كل شي بالدنيا(عاد خبركم الحريم لااجتمعوا ماخلوا أخضر ولايابس ولا حي او ميت الا وجابوا سيرته!!!).. واسماء كل شوي تناظر اسمهان ودها لو تقوم ولكن اسمهان مستانسة على الجلسة ولابدة!! وناظرت فيها بنظرة حادة.. وفهمت اخيرا اسمهان المغزى وخرجت من الغرفة! لحقتها اسماء وقالت:اثقلي مو كل الوقت تقعدين معانا..وبعدين وين القهوة ماجبتيها؟! وراحت اسمهان تجيب ترمس القهوة ومن الفلاحة اللي فيها صارت ماسكته باليمين وتصب القهوة بالفنجال اللي باليسار وتناول الناس باليسار!!! فقامت اسماء وأخذت الترمس من يدها اليمين ونقلته ليدها اليسار وقالت: كذا ياحلوة كذا!!! المهم أم العريس مااكترثت للموضوع وقعدت تحكي عن ولدها وإنه هو الكبير وبعده ولدين و بنت متزوجة وعايشة بأمريكا مع زوجها اللي يدرس.. أم اسمهان:ماشاء الله شكلك تزوجتي بدري؟! أم العريس:ايه والله تزوجت وعمري 16 سنة ومرت السنين وجبت عيال أكبرهم عبدالرحمن بعدين عبدالمجيد وعبدالرحيم والصغيرة أحلام.. أم اسمهان:وزوجك الله يرحمه بحسب ماعرفت انه توفى صح؟! ام العريس:ايه قبل 3سنوات بعد زواج بنتي أحلام ..صارت له جلطة وجلس فترة بالمستشفى لين ماساءت حالته وتوفى...الله يرحمه ويغمد روحه الجنة.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
الجزء الخامس المهم!! بعد اجتماع أم العريس وخالته بأهل اسمهان انتهت الجلسة..وكان خلاصتها انه أم اسمهان حققت معاهم لين ماعرفت مكان عمل عريس الغفلة(عبدالرحمن)..وبعض المعلومات اللي تساعدهم في رحلة السؤال عن ولد الناس لمعرفة إن كان يصلح لاسمهان هانم ولا لا!!! وراحت ام اسمهان توصلهم لين الباب وكانوا يلبسون عباياتهم وقالت:بإذن الله نحدد لكم بوقت قريب موعد عشان ولدكم يقابل أبونا...ويتعرف عليه.. أم عبدالرحمن:ان شاء الله بس لاتطولون علينا الله يعافيكم... وتوادعوا وراحوا أهل المعرس للسيارة اللي يسوقها عبدالرحمن!! وجرى الحديث الاتي: الأم والخالة:السلام عليكم ورحمة الله وبركاته! عبدالرحمن:وعليكم السلام..هلا وغلا مابغيتوا تطلعون!! أبلة جوهرة(خالة عبدالرحمن):عاد تعرف أمك ماطلعت لين ماشبعت تمقل ببنت الناس! عبدالرحمن:ها ياخالة وش رايك بس في ذوق أمي؟! خالته جوهرة:حلو!بس للعلم البنت هذي أنا شبعانة منها ومن مقابلها!كل يوم وهي مسنترة عندنا بالإدارة!! عبدالرحمن:أف!! لاتقولين انها ادارية بثانويتكم؟! وش هالخيانة يمة؟!أنا قايل لك للمرة المليون أبي وحدة صغيـــــــــــــــرة!! عاد أم عبدالرحمن تبغى ترفع ضغطه فقالت:وش لك بالبنات الصغار..خذ لك وحدة كبيرة وعاقلة!! عاد عبدالرحمن مايحتاج!!بسرعة يزعل وبسرعة يرضى وقال: أنا قايل لك من قبل!!أبي وحدة صغيرة أشكلها على مزاجي!! أم عبدالرحمن:ياحليلك ياولدي من صغرك وانت تحب تلعب بالصلصال!!! خالته جوهرة:اسكت واللي يعافيك لايطق لك عرق!! أبشرك هي طالبة بثانويتنا..لااا وتدرس بثانية ثانوي! عبدالرحمن:آآآآآآه ياقلبي!!توها رجعت فيني الروح! بس تعالي ياخالة شلون تقولين كل يوم وهي مسنترة بالإدارة؟!! خالته جوهرة:والله ياحبيبي بنات الحين متأثرين بأفلام المافيا مسوية لنفسها بشكة وينقال هي رئيستهم..وكل يوم مسووين مغامرات!! عبدالرحمن:هاهاهاها..فديت روحها شكلها خفيفة ظل!! أم عبدالرحمن: والله إني حبيتها!!صح حركاتها فيها خفة وسذاجة! بس مايخالف مع الوقت بتركد! عبدالرحمن:بس ياخالة إذا إن البنت فيها شي غلط ولا انتي متضايقة منها في شي علمينا ترى احنا باقي على البر!! خالته جوهرة:لا الحمدلله..المسألة كلها حركة مراهقات لاثبات الشخصية ولفت الأنظار!! ودخلوا بعدها في وصف كل ماشاهدوه واش الاتفاق اللي تم بينهم وبين أم اسمهان.. ... ******* ننتقل بعدها للحوار اللي دار بين الجميع في بيت اسمهان..بعد ماراحوا الناس! .. أم اسمهان:هاه يابنتي وش رايك فيهم؟! اسمهان:الحمدلله...بس ودي لو أبلة جوهرة ماهي خالته!!! أسماء: أكيد!! ماتنلامين! طلعت فضايحك!! شلة الصاعقة؟!لعنبو ابليسك فشلتينا!مسوية عصابة؟! لاااا وانتي رئيستهم بعد؟!!! اسمهان:ياربي!! وتهقين بيبطلون يخطبوني!!! أسماء:وهذا كل اللي هامِّك؟!موب عيب بنت من عائلة لها مستواها مثل عيلتنا تسوي فرقة خالف تعرف حقتك؟!!! لا وشوف الاسم (الصاعقة!!)تصعقون بكهرب والا بألسنتكم؟؟؟؟ اسمهان:يمة ليش ناديتيها؟!طالما هي حاشرة خشمها بالسالفة فاعرفي ان الزواجة هذي مابتتم!!! الأم:يايمة اسماء..لسانك دايم مفلوت علينا وعلى زوجك وعلى من عرفتي ومن لم تعرفي؟!! اسماء:أفا!!! يمة..هذا رأيك فيني؟!! إلا دخل أبو اسمهان عليهم وكان راجع من برة وبعد السلام قال:بشروني وش صار معكم؟!! وحكت له ام اسمهان كل مادار وصار والاتفاق اللي تم بينهم.. الجزء السادس.... ماقصروا الأب والأم وقعدوا يتتريقون على بنتهم اسمهان...وأنواع التعليقات...وأسماء لابد ماتحشر خشمها معهم!! وماأنقذها من الموقف إلا صوت جرس التليفون!! راحت بسرعة البرق ترد:آلو المتصلة:أهلين!! سمهونة شلونك قلبي والله زمان عن هالصوت!! اسمهان:هلاااااااا ابتسام حبيبتي وينك؟؟ وحشتيني.....أبشرك تراني انخطبت!!... ولا جت أم اسمهان وسحبت السماعة من يد اسمهان بسرعة ولقيت ابتسام تقول: إيـــــــــــــــــــش؟؟! انخبطتي؟! سلامتك حبيبتي! ومن اللي خبطك؟ أكيد أسماء! عقرب وتلدغ!! أمهم:هلا ابتسام بنتي..عاش من سمع صوتك..شلون زوجك وبناتك؟! ابتسام(وهي الأخت الوسطى مابين اسماء واسمهان متزوجة وساكنة ببلد ثاني وعندها بنتين توأم سارة وهيفاء): الحمدلله يمة...بس سلامتها اسمهان مين خبطها؟ أمهم:ههههه..أختك المطفوقة ماينبل بفمها لقمة توه جانا ناس يخطبونها!!! مو يخبطونها!! ابتسام:مبـــــــــــــــــــــ ـــــــروك...الله يوفقها..بس علميني بكل التفاصيل من طقطق لسلام عليكم!! الأم:بعدين..المهم انتي اش اخبارك والله لك اسبوعين يالقاطعة مارفعتي علينا سماعة حتى أبوك بس يسأل عنك..وشفيك؟؟ ابتسام:يايمة ..مسرعك نسيتي؟! أنا آخر مرة كلمتك فيها قلت لك أم زوجي بتجينا تقعد عندنا..والله وكيلك لبدت عندنا اسبوعين وكأنها قاعدة على قلبي...ماصدقت سافرت وجيت ركض أكلمكم!!!!!!!! الأم:مالك حق تقولين هالكلام يابنتي!! هذا بيت ولدها لو قعدت شهور عندكم مافيها شي! ابتسام:ياحليلك يمة! وانتي تحسبين كل أمهات الأزواج بطيبتك؟! هذي نسرة اسأليني عنها بس! كل شي تتدخل فيه..لا..وفوق هذا كريهة لاتبي الناس يزورونا ولا نروح لهم!!! تصدقين أسبوعين كاملة ماشفنا فيها الشارع؟!!! الأم:الله يعينكم..بس أهم شي يابنتي إنك قمتي بضيافتها على أكمل وجه...وقدرتيها..لاتنسين إنها أم زوجك..وقيامك بحقوق أمه يحببه فيك أكثر.. ابتسام:لاتوصين حريص!..والله إني من صباح الله خير وأنا أعجن وأخبز عشان أفطرها..خبرك فيها..عندها سكر وماتاكل من أكلنا!وليته يثمر! إلا طايحة فيني نقد ومعاير...ومدح بحريم أولادها الثانيين!! الأم:لما تسوين شي لأحد سويه لوجه الله...لاتنتظرين كلمة شكر من أحد!! إلا يابنتي ماودك تجينا؟!! ابتسام:كيف؟؟ إلا بأجي ونص!! عاد زوجي يوم شافني انغثيت بجميع أنواع الغثا والحبسة من يوم ماأمه جتنا...وعدني أول ماسافرت إنه بيعوضني ويجيبني عندكم نهاية الأسبوع الجاي! الأم:الله يبشرك بالخير......ويحييكم ان شاء الله.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
نكمل الجزء السابع.... طبعا استمرت المحادثة التليفونية بين ابتسام أخت اسمهان واسماء مع أمها اللي سردت لها الأحداث بشكل سريع ومن بعدها الأب كلم بنته ابتسام وراح لغرفة المكتب الخاصة فيه لإنجاز بعض الأعمال.. بقيت اسماء(وكانت حامل..وعندها ولد عمره سنتين إلا كم شهر) مع أمها واسمهان ودار بينهم هالحوار.. الأم: أبشركم أختكم ابتسام بتجينا نهاية الأسبوع الجاي! اسمهان:هيييييييه!! الحمدلله! أسماء:خبر حلو..بس عسى زوجها الغثيث بيرافقها بذي الجية مثل العادة؟!! الأم: وانتي اش حارق رزك؟! بتستضيفينه في بيتك؟! اسمهان:والله في هذي اسماء معها حق!!زوجها غثيث بالحيل! أنا شخصياً فقاعتي مرمورة منه!!!!! أسماء:وش هاللهجة السريالية اللي اخترعتيها؟!! اسمهان:يوووووووه قصدت أقول(مرارتي مفقوعة منه!) الأم: وانتم بإيش تأذيتوا منه؟! أسماء: يايمة نسيتي؟ كل ماجاء لازم يقعد معاها ببيتنا ويجننها بكثرة طلباته مافي سالفة كاملة نقدر نكملها معها لازم كل دقيقة والثانية عبدالعزيز أفندي يناديها!!حشا شغالة!! اسمهان:زيدي عليها انه مثل أشعب يحب يحشي كرشه بس ماعنده استعداد يحط قرش بالبيت!يعني مافي مرة يغلط ويجيب غدا او عشا على حسابه! حتى لما جتنا وهي نفاس جاء معها وقعد عندنا شهر يتشرط وش ياكل بالغدا والعشا علينا لأن زوجته نفاس لاحيا ولامستحى! لا وكل مادخل او خرج رجع وبيده ضيف من أقاربه او اصحابه وإحنا شغالين ضيافة طول الوقت! وش هالغثاثة؟ ياربي! الأم: عيب عليكم ومالكم شغل..أهم شي انه زين مع أختكم ولاقد غلط عليها وتبقى مسألة الخفة والثقل مسألة شخصية خاصة فيه! اسماء: ولا بناتها!! يوووه منهم! عالم ثاني من الشقاوة ولااجتمعوا على ولدي جننوه!! اسمهان:وإذا اجتمعوا مع أولاد أخوي محمد أعوذ بالله خلوا الدنيا دمار!! الأم:وش رايكم اتصل عليها أحسن وأقول لها هوني عن الجية ولاتجين؟!!! اسماء: وشفيك زعلتي؟! احنا بس ننتقد!! الأم: ومادام نقدكم ماله فايدة احتفظوا به لأنفسكم! ...... وبعدها جهزوا العشا ومرت الأحداث اعتيادية لين اليوم الثاني..وكان يوم الجمعة والعائلة الكريمة كلها تجتمع فيه للغداء..أسماء تجي تتغدى عند أهلها وزوجها يروح لأهله! ومحمد الابن الأكبر للعائلة يجي هو وزوجته(سماح)وعندهم ولدين(سعيد ووليد)4+5 سنوات.. والكل فرحان ومستانس وغالبا يكون الغداء سمك.. وسماح زوجة محمد كانت حبوبة والكل يحبها كأنها ابنة لهم بس لاتخلو الجلسة من المزح ذو العيار الثقيل بين البنات وبينها وبين أخوهم!!! فقالت اسمهان:ماوصلتكم آخرأخباري ياسماح؟ سماح:لا والله.. خير؟ فصلوك من الثانوية؟! اسمهان:أعوذ بالله! ان شاء الله عدوي واللي يكرهني!...لا بس ابشرك جاني عريس! سماح:لا..لا..احلفي! ضحكت اسمهان بخجل وقالت:ورب البيت.. سماح: وش اسمه؟! اسمهان بدلع: عبدالرحمن! سماح:الله يقطعك! عساك وافقتي؟ اسمهان: وليش لا؟! سماح: يالهبلة!!أخوي تركي أحسن منه..بس قاعد ينتظرك تتخرجين من الثانوي!! اسمهان:اللي سبق يفوز!! سماح:إلا اللي يصبر ينال مراده! إلا الأب استغل الجمعة الحلوة هذي وخبر ولده محمد عن عريس الغفلة عبدالرحمن!! فقام محمد يبي ينكت على اسمهان وقال:انخطبتي؟؟ ومنهو هالضعيف اللي أمه داعية عليه بـــــ طيحة الحظ؟! اسمهان: إلا قول حظه طاير بالسما يوم فكر ياخذ وحدة مثلي!! هو أنا شوية؟؟ التفت محمد لأبوه وقال:يبه..ماكأنكم استعجلتوا عليها شوي؟! الأب: لسه ياولدي ماصار شي لاقابلناه وناسبنا ساعتها يحلها ألف حلاَّل!! اسمهان:أي بدري؟!وإنت يوم خذيت زوجتك كانت بزرة ماتعرف تمشط شعرها!! وقام الكل يضحك!! الأم:يالله لاتبتلينا!! بحياتي كلها ماشفت أحد بطفاقتك..استحي استحي لو تمثيل!! سماح:أنا بزرة؟! ياويلك من الله كنت بأولى جامعة يوم خذاني أخوك..وإن كنت باقي ماأعرف أمشط شعري مثل ماتقولين!!فأنا أعتبرك باقي ترضعين!! وقامت اسمهان تعصب وتتمازح بمناقرة مع سماح والكل مبسوطين على الهوشة.. وأسماء تقول:واش ذا كله؟ حشا قاعدين ببيت قطاوى! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
الجزء الثامن.. طبعا يوم الجمعة كان حافل جدا بالأحداث والنقاشات والتعليقات في عائلة أهل اسمهان..ومر اليوم اللي في نهايته بدأت اسمهان تستعد لليوم اللي بعده ألا وهو يوم السبت..لأنها مثل ماعرفتوا سابقاً إنها طالبة بالصف الثاني ثانوي! بدأ يوم السبت وتهللت أسارير اسمهان اللي كانت مو مصدقة نفسها!! طبعاً مين قدها؟ عندها أخبار جديدة بتزفها لشلة الصاعقة!!!!! وبالفعل راحت للمدرسة والابتسامة شاقة الوجه! والشلة كلها كانوا بانتظارها..وبس شافوا قائدتهم اسمهان خانوم...أقبلوا يركضون عليها.. وشافتهم وقالت:هــــــــــــــــــــاي شلة!(قولوا السلام والله مافي أحلى من تحية الاسلام..)!!!! ردوا عليها:هـــــــــــــــــــــاي سوسو.. وقالت صاحبتها رانية:ياشينك يالقاطعة ماهي عوايدك يعني!! ربوع وخميس وجمعة لااتصال ولا سؤال؟! نجلاء:أكيد في شي مهم أشغلك عنا! أفنان: ولا تكونون سافرتوا مكان ولاعلمتينا؟! اسمهان:لو فيكم خير كان اتصلتوا علي وسألتوا! مرام:ليش خير؟! إحنا شفناك مااتصلتي على أحد قلنا أكيد مو فاضية لهذرتنا! اسمهان:بصراحة صار لي حدث مهم! رانية:لايكون أختك المقرودة أسماء تطلقت وجت تقعد فوق رووسكم؟!!!!!!! اسمهان:لا...يووووه الله لايقدر! نجلاء:شالسالفة؟ تراك رفعتي ضغطي! اسمهان:جاني عريــــــــــــــــــــــــــس !! نجلاء: عادي واشفيها لاجاك....!واشـــــــــــــــــ هو؟؟ جاك عريس يالنذلة ولاتقولين؟!!! اسمهان:هذا أنا قلتلكم..واش بتسوون يعني؟!! أفنان:ياالله يعني بتتزوجين وتتركينا؟! اسمهان: وش دعوى؟ أنا مالي غنات عنكم! مرام:إلا بتتزوج وتشوف نفسها علينا وهذا وجهي إن ماقالت:أنا ماأجلس مع بنات!!!!!!!! ..........إلا بهاللحظة مرت أبلة جوهرة من جنب شلة الصاعقة وابتسمت ابتسامة ذات مغزى وقالت:صباح الخير شلونك سمهونة؟!! اسمهان ناظرتها بخجل وردت بحياء غير معهود:الحمدلله بخير! والشلة يطالعون باسمهان بفضول غريب!! قامت رانية تغمز لاسمهان وتقول:خير؟اش القصة؟ صباح الخير..وياسوسو..وانتي تردين وتتبسمين..وشوي بتذوبين مثل الشوكليت!!!! قالت نجلاء:غـــــــــــــريبة مو هذي أبلة جوهرة اللي ماتطيقينها؟! واشفيها الميانة طايحة بينكم؟؟ وبعدين تركت شلتنا كلها عشان تسلم عليك لوحدك يااسمهان؟.........لاااااااااا أنا أشهد إنه في شي مو طبيعي!!!!!!! اسمهان:بالعكس الأمر جداً طبيعي!!أنا قائدة الشلة فأكيد مابتسلم إلا علي وحدي واش تبي فيكم مالت عليكم!!!!!!!! مرام:يلا يلا...الطوابير بدت وإحنا ماخلصنا هذرة نكمل بعدين....... وطبعا في هذي اللحظات أبلة جوهرة نشرت خبر خطبتهم في الإدارة ووحدة من الإداريات ملقوفة حبتين لها أخت بفصل اسمهان قالت لها الخبر والبنت علمت صاحباتها وصاحباتها خبروا صاحبات اسمهان...واسمهان ياحظي آخر من يعلم إن الكل يعلم!!! ماجاء وقت الفسحة إلا والثانوية بكبرها داريين!! وكل شوي تنهال التعليقات من كل حدب وصوب واسمهان ياغافلين لكم الله!! أفنان: في بطن أمي ولد..تدرون اش بنسميه؟؟ ردوا الشلة بصوت واحد:عبد الرحمن!! واسمهان تطالع ومو فاهمة! نجلاء:يعني ماحكيتي لنا ياسوسو..اشلون تمت الخطبة واش صار ودار؟! اسمهان:أسرار شخصية وهذا مو وقتها!! نجلاء:الله أكبر!!بدينا بالخشخشة والدسدسة؟!! مرام:خليها... من اليوم ورايح شكلها بتتنصل من ثوبها وتستقل عنا!!!! اسمهان:ياغــــــــجر!! اش اللي أتنصل منكم وأنا اللي لميتكم وضميتكم في شلتي؟!! أنا بس ماودي أحكي لكم عن شي وينتشر الخبر.وهو لسة ماصار شي!!! رانية:ياحليلك!! شفتي هالمدرسة بطولها وعرضها؟؟ يدرون بسالفتك!! حتى أم سالم الفراشة جت تبارك قبل شوي!!! الأحد:اسمهان سارحة بحصة النصوص وهي مجتهدة ترسم قلب كبير بالمرسمة وكاتبة داخله(عبدالرحمن)!!! سحبت نجلاء الكتاب منها ومسحت اسم عبدالرحمن وكتبت بخط كبـــــــير(الصاعقة!!!) وسط ضحكات باقي الشلة!!! الاثنين:كل ماطلبوا صاحبات اسمهان طلب معنوي او مادي ورفضت قالوا: والله لانقول لأبلة جوهرة واش حصل!! (بقصص ومواقف صارت بينهم ومشاكل سووها قبل!!)وترجع اسمهان تلبي طلباتهم!!! كلش عاد ولا الفشلة قدام خالة المعرس!!!! الثلاثاء:كانوا الشلة متفقين يسوون مقلب باسمهان واشتروا باقة ورد وحطوامعاها كرت مكتوب فيه(يسلم بيد رانية بنت خالد) اللي هي صاحبة اسمهان وحطوه على مكتب أبلة جوهرة وراحوا!!! وبالفعل أبلة جوهرة يوم شافت باقة الورد راحت لشلة الصاعقة اللي كانوا واقفين مع اسمهان اللي مثل الأطرش بالزفة!!!! ونادت رانية وراحت رانية ركض.. وقالت لها أبلة جوهرة هالباقة لك !!الله يعلم مين أرسلها !!وطبعا اسمهان تراقب الوضع من بعيد ومو دارية اش الطبخة!!! وكانوا مجهزين كرت ثاني كاتبين فيه(إلى أحلى بنت بالثانوية اسمهان....التوقيع عبدالرحمن!!!) ودخلوه في الباقة بسرعة وجات رانية للشلة.. وقالت اسمهان بفضول:وش تبي منك أبلة جوهرة يارانية؟؟؟؟؟ رانية:مدري عنها مافهمتها!أعطتني باقة الورد بيدي وقالت عطيها اسمهان!!!!! اسمهان:هاتي أشوف!!! وفتحت الكرت وطار قلبها وشمت الورد وسلهمت بالعيون النواجل!!! والبنات حولها يستهبلون ويسحبون الكرت وهي عايشة بعالم آخر بمبي بمبي!!!!هههههههه والسالفة طبعا كل أبوها مقلب!! وهي ياساتر معتفسة فوق تحت وصارت ماشية بباقتها في المدرسة والبنات يزفونها ووصل الخبر للبنت اللي بفصل اسمهان وقالت لأختها الإدارية والإدارية قالت لأبلة جوهرة اللي كتمت غيظها وظنت السالفة صدق وإن عبدالرحمن بالفعل هو اللي أرسل الباقة للمدرسة واستخدم اسم رانية للتمويه!!!!! وهذا كله واسمهان تتفشخر وتتباهى بحب المعرس واتكيته قدام البنات وشلتها يقولون:ياحظك !! وهم بداخلهم بينفجرون من الضحك!! وطبعا أبلة جوهرة حست نفسها في موقف لايحسد عليه لأن الخبر وصل للمدرسات وصاروا يسألونها: مو هذا ولد أختك اللي تمدحين أخلاقه؟؟أجل كيف يرسل باقة ورد لوحدة ممكن ماتكون من نصيبه؟؟؟؟ أو لايكون هالبنت تعرفه من أول وكاتمة الموضوع؟؟؟ ولايكون يكلمها من ورا أهلها؟؟بس كيف جاب الرقم؟و......و.......و (وتدرون كلام الناس مايخلص!) بس طلعت أبلة جوهرة من المدرسة نهاية الدوام وهي في قمة الزعل!!! واتصلت بأم عبدالرحمن وقالت:مادريتي؟؟؟أنا وانتي انضحك علينا!!! الفالح ولدك متعرف على بنت الناس من أول!!!!!! أم عبدالرحمن:استهدي بالله الأول وقولي لي اش السالفة؟؟ أبلة جوهرة:ولدك مستغفلنا يعرف اسمهان من أول وناوي يفشلنا...تصدقين إنه داز لها باقة ورد لين المدرسة!!!اش هالمصاخة وأنا اللي أقول رجال ناضج فاهم واثاريه طلع خردة؟!!!!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
الجزء العاشر..... طال الشد والجذب بين أم عبدالرحمن وأختها أبلة جوهرة حول موضوع الورد!!وكان من ضمن كلامهم:: أم عبدالرحمن: لاتكثرين حكي ياجوهرة..انتي تقولين الكرت اللي قرأتيه مكتوب فيه..يسلم بيد رانية!!صح؟! جوهرة:صح! أم عبدالرحمن: زين..يعني قصدك بعد تقولين إن عبدالرحمن متعرف على رانية؟! جوهرة:لا بس استخدم اسمها عشان يضللنا!! أم عبدالرحمن:أنا واثقة بولدي وواثقة ببنت الناس...وانتي تقولين إنك ماسألتي البنات عن السالفة إذن بأي وجه قمتي ترمين تُهم؟!! جوهرة: ومين قال لك إني بأعديها لهم؟! بكرة من الصبح بأستلمهم تحقيق!! أم عبدالرحمن:أهم شي بنت الناس لايوصلها علم عن هرجك ذا!! أنا ماصدقت ألقى لولدي عروس!! وبعد الأخذ والعطا انتهت المكالمة.. طبعاً في الجانب الآخر اسمهان كانت راجعة لبيتها والفرحة غامرتها وعايشة بعالم وردي وشايلة باقتها وبينها وبين نفسها تقول:يسلم لي ذوقه! إذا كان يسوي كذا من أولها أجل كيف بتاليها!!!!! شافتها أمها وقالت:ماشاء الله اش هالورد كله؟!! اسمهان تلعثمت وفكرت تكذب وقالت:أبد صاحباتي يوم عرفوا بسالفة الخطبة من أول الأسبوع ..جابوا لي اليوم الورد هدية! الأم: وانتي على طول نشرتي الخبر ماقضبتي لسانك؟!! اسمهان (قامت تبكش!!!):لا أنا ماقلت لأحد شي أبلة جوهرة قالت لصاحباتها وانتشر الخبر بكل المدرسة وسألوني صاحباتي فأكدت لهم الخبر.. الأم: تنشر الخبر؟؟والله واثقين من ولدهم هالناس!! على العموم إحنا مازلنا نسأل عنه..والله يكتب اللي فيه الخير وعدى الثلاثاء.....وجاء بعده يوم الأربعاء.. وقبل جية اسمهان على المدرسة سحبت أبلة جوهرة شلة الصاعقة واشتغلت تحقيقات!!! أبلة جوهرة:بأبدأ فيك يامرام بما إنك أهداهم!! اش سالفة الورد؟؟؟؟ مرام:أي ورد؟؟ أبلة جوهرة:لاتعابطين! الورد اللي عطيته رانية أمس! مرام: هذا انتي قلتيها بنفسك مادامك عطيتيه رانية إذن اسألي رانية عنه! أبلة جوهرة: تفضلي ياآنسة رانية اشرحي لي القصة! رانية:أبد.. ورد وجاني هدية..أخطيت؟؟! أبلة جوهرة: لا سلامتك! أنا اللي أخطيت وجيت أعطيتك إياه...مع إنه من الواجب علي إني ماأسلمك إياه!! رانية: ليش؟؟ ماعندك أمانة؟؟ أبلة جوهرة: احترمي نفسك!! وخلك واقفة على جنب ماودي أسمع صوتك!....تعالي يانجلاء.. وتقدمت نجلاء خطوتين....وسألتها أبلة جوهرة: وش تعرفين عن سالفة الورد؟؟ نجلاء(باستهبال): نفس اللي تعرفينه انتي بالضبط!! ورد ووصل وسلم واستلم!! أبلة جوهرة:يعني متفقة مع صاحباتك ماتتكلمين؟ زين تعالي ياأفنان وأفيديني بشي! أفنان: مدري عن شي شفتك تعطينه رانية وبس! أبلة جوهرة: واش جاب الورد بيد اسمهان مادامه لرانية؟؟؟؟؟ نجلاء:عجبتها ريحته وشالته..عادي يعني!! أبلة جوهرة:عموما إنتم كالعادة محد ياخذ منكم حق ولاباطل..بس أنا بأروح للحارس وأسأله عن اللي عطاه الورد وبأحقق مع كل اللي بالادارة اشلون وصل هالورد على مكتبي؟؟؟؟؟؟ رانية: وليش هاللفة العريضة؟؟ انسي السالفة أحسن! أبلة جوهرة: انتي بالذات انطمي!! ماأستبعد إن هالورد جاك من معجب!! لذا بس استدعاء خاص لأمك اليوم ونشوف اش سالفتك!! تدخلت مرام بالموضوع وقالت: مدام السالفة فيها أمها وسمعتها ومعجب إحنا بنقول لك القصة من أولها!!!! وبالفعل حكوا لها كل شي عن مقلبهم السخيف فقالت: وبعدين اش استفدتوا من هالمقلب؟؟؟؟؟ رانية: أبد..ضحكنا على اسمهان.. أبلة جوهرة: أنا اللي المدرسة كلها ضحكت علي بسببكم! عموما لاتقولون لاسمهان شي!! ولاتجيبون لها طاري خليها عايشة بجوها وأحلامها!! أما إنتم لو تكرر منكم بلوة عقب اليوم فاعرفوا إن عقابكم عسير!! وانصرفت الشلة من الغرفة...وتنفست أبلة جوهرة الصعداء لأن اسمهان وعبدالرحمن طلعوا براءة!!هههه ومشى اليوم طبيعي ومحد قال لاسمهان أي شيء.. ودارت دردشة بينهم: أفنان: الله ماني مصدقة اليوم ربوع يعني بأطقها نومة لين ماأشبع!! نجلاء:وليش النوم؟؟ إلا قولي بأهج من البيت وأطيح تفرفر بهالمولات! مرام:أنا عن نفسي رايحة لبيت خالتي..يعني اليوم بأقضيه فلة ووناسة..كل بنات العيلة بيجون.. رانية: أنا أحسنكم كل أبوكم!! رايحة لعرس ومو أي عرس بفندق يجنن..من هالحين شامة رايحة الطرب والدجة!! أفنان: مدري ليه ماتستهويني الأعراس؟؟ رانية:أكيد لأنك ماتنعزمين إلا بأعراس أبو فقسة!! مال استراحات وقرنبع!! وجه فقر أعرفك!! أفنان:لاياحبيبتي! تحسبيني مثلك أروح أطامر بالأعراس كأن فيني زار...عبالك الناس بيعجبون بــ رجتك!! رانية:اسكتي واللي يسلم عمرك! أنا أشوف روحتي للأعراس فيها فوائد ثقافية عظيمة!! نجلاء:ههههه...وش هي ياحسرة؟؟؟؟ رانية: أتثقف في موضة الملابس+الماكياج+التسريحات+روا يح العطور+ديكورات القصر+الضيافة+الطقاقة!!+الكوشة !!!! يعني كل شي كل شي! اسمهان(بصوت عالي):بـــــــــــــــــــــــ ــــــــــس تكفون تكفون طاري العرس لاتطرونه!! رانية: عساك هونتي؟! ماتبينه دزيه لي!! نجلاء: انتي عاد بالذات أبلة جوهرة ماتواطنك ولاتداني ريحتك كل بلوة بالمدرسة انتي سببها! وكل فضيحة إلا مايكون لك يد فيها!!لكن أنا غير! اسمهان: الله يقلعكم تتعازمون على خطيبي قدامي؟! ماهونت ولاشي...بس بإذن الله لو الله كتب أتزوج.. راح تكونون أول ناس بأحطهم في القائمة السوداء وأمنعهم من حضور عرسي!!!!!! رانية: انتي الخسرانة!! محد بيجمل عليك ويرقص من أول الزواج لآخره إلا أنا!! اسمهان: إلا قصدك محد بيجي عشان يبقق عيونه ويتشمت بالزواج من أوله لآخره إلا انتي!! وضحكت الشلة على رانية الخفيفة وكملوا دردشتهم وانقضى اليوم الدراسي وكلن رجع بيته... وصلت اسمهان بيتها..ودخلت على أمها وسلمت.. إلا وأمها تقول:روحي يابنتي خذي لك راحة ساعتين أختك ابتسام جاية اليوم من السفر وأبوك بيسوي عشا وبيعزم أخوك محمد وزوجته وأختك أسماء وزوجها.. وراحت اسمهان تطق النومة... الجزء الحادي عشر... قامت تشخر بعالي الصوت طلعت أمها تصحيها العصر ماصحت...أرسلت كاتيا الشغاله تصحيها هم بعد ماصحت ووصلوا الضيوف كلهم(أخوها وأخواتها) وهي ماصحت! راحت ابتسام جمعت كل البزارين وقالت:هجووووووم على خالتكم لاتنزلون إلا وهي معكم!! وبالفعل طلعوا بزورة محمد(سعيد ووليد)وناقزوا فوق سريرها!!وهي نايمة تشخر وولد ابتسام يحوس بالغرفة..(وهيفاء وسارة)بنات ابتسام يلعبون على التسريحة! واسمهان طاقة النومة!!! راحوا هيفاء وسارة وأخذوا اصبع روج ورسموا بوجه خالتهم اسمهان وهي موب دارية عن الدنيا تهشهم مثل هش الذبان!! وهم مسويين حفلة تنكرية بوجهها!! وفككوا البكلات من شعرها وسعيد ماقصر كب بودرة على شعرها!! لما زهقوا البزران ان خالتهم ماتصحى كمل وليد الناقص وحذفها بقزازة عطر على جبهتها خلتها تنقز نقزة وتزأر زئير فاخترعوا البزران ونزلوا بالصالة عند أمهاتهم!!! واسمهان وراهم تهدد وتتوعد!!وهي نازلة من الدرج قامت ابتسام ترحب:ياهلا بعروستنا وياغلا! وأسماء وسماح زوجة أخوهم يبحلقون في منظر اسمهان باستغراب شديد الشوشة منفووووشة وعليها كيلو بودرة!! ووجهها من أوله لآخره مشخبط بروج لونه أحمر!!وجبهتها وارمة من أثر قزازة العطر!!!!! قالت أسماء:أي عروس ياابتسام؟سألتك بالله هذا منظر عروس؟ هذه مومياء خارجة من تابوت!!!! وسماح تقهقه وتقول: ياحليل العيال راسمين بوجهك خرايط!!ناقصك وشاح على راسك ونكتب عليه(مصاصة الدماء!!!)... أسماء:تكفين تكفين ضفي وجهك عني أنا حامل وماأبي أتوحم على هالشيفة!! اسمهان:لابارك الله فيكم ولافي عيالكم المجانين..قوموا نظفوا غرفتي اللي تقولون ضاربها إعصار!! ....إلا بهاللحظة دخل الأب وقال: الله يحي هالوجوه الطيبة..وأحب أقول لكم إني طول هالأسبوع وأنا أسأل عن ولد الناس ..وماسمعت عنه إلا كل خير..وبكرة بإذن الله بأناديه أتعرف عليه! وش قلتي ياأم محمد؟!! الأم: أبركها من ساعة... سماح: ولو تخلون اليوم اللي بعده الشوفة يكون أحلى!! اسمهان: وشهو؟؟ على كيفكم والله!! يبي يجي بكرة بكيفه أما شوفة.. انسوا الموضوع!! انتي بالذات ياسماحوه مالك وجه تتكلمين! بعد ماولدك فقشني براسي تبين تكملين الناقص وتخلين شوفتي بعد بكرة؟!!! قام أبوها انتبه ذيك الساعة لشكلها وفز ثم قال:يالله تسكنهم مساكنهم!! ياحليلك !عفستي وجهك هاللون عشان تضحكين البزران؟!! اسمهان:إلا هم اللي ضحكوا علي ولعبوا في حسبتي!!! الأب:عموما...مثل ماقلت لكم بأكلمه يجي بكرة نتعرف عليه أنا ومحمد وأزواج البنات..وبعدين نحدد يوم الشوفة..... الأم:على خير... وقرصت الأم اسمهان من أذنها وقالت:بالله استحي وروحي سنعي نفسك..هذا وجه تقابلين فيه خواتك وزوجة أخوك؟!! وطلعت اسمهان تتهندم ويوم شافت شكلها بالمراية اخترعت!!!!!!!!وبعد كم ساعة الورم اللي بجبهتها زاد!! ومرت السهرة على خير.... وكان مما دار فيها:ابتسام:أخيرا تقابلنا!! مابغينا! أسماء: إحنا دوم مجتمعين انتي الوحيدة اللي ساكنة بديرة ثانية..وفوق ذا كله زياراتك قليلة.. ابتسام: وهي عجوز النار..تخلي أحد يتنفس؟!! تتنقل من بيتنا لبيت ولدها الثاني ولبيوت بناتها ثم ترجع لنا وياويل تسمع إنا سافرنا تجينا بعد مانرجع وتلبد مدة وقدرها!!! أسماء: الحمدلله أم زوجي متوفية وإلا كان شاب راسي منها!!! الأم:والله ربي رحمها ماتشوفك!! ولا انتي تشيبين راس قبيلة ولاشبتي!! سماح:والله لو ألف الكون كله ماألقى أحسن من خالتي! الله يحفظك لنا ياأم محمد... ابتسام:معلوم الطيب يسحر الناس بطيبه..وأمي ماتغلط على أحد حتى يغلط عليها...بس بلاكم ماشفتوا أم أربع وأربعين كيف تحرش أولادها على نسوانهم وتفاتن بينهم!!بس عزاي إن زوجي يسمع من إذن ويطلع من الثانية!!!!!! الأم: يابنتي عيب عليك تتكلمين عن مره كبيره بهالشكل ولو سوت معك ماسوت!! اسماء: خلها تفك عن صدرها شوي يايمة! لاتكونين انتي والزمن عليها! ابتسام:إيه صدقتي..أحس اني مخنوقة..عجوزنا هذي كم بغوا عيالها فيها يشرون لها بيت أو شقة تسكن فيها وحنا اللي نزورها بدل ماهي تتنقل كل يوم..بس حالفة يمين ماتحقق مرادهم...عاجبتها حياة التنقل كأنها من البدو الرحل!!!!! الأم:يابنتي الله لايبلاك وتسيرين بيوم من الأيام مثلها يمكن مسيكينة تخاف لاسكنت ببيت بروحها محد يتذكرها ويزورها وكلن بينشغل عنها!! اسمهان: الحمدلله أنا أم زوجي ساكنة معي بنفس العمارة هي بدور وأنا بدور..يعني ماتحتاج تقعد عندي بالأسابيع والشهور!! اسماء:طالعوا هذي وشتقول!! صار اسمه زوجك خلاص؟ربطتيه يالعقرب وبعده ماشافك؟!! سماح قامت تضحك هي وابتسام.... واسمهان تقول:اطلعي منها وهي تعمر!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
الجزء الثاني عشر....... ومرت سهرة الأربعاء....وجاء يوم الخميس وجاء العريس..اللي مافات اسمهان انها تطلع تشوفه من الشباك العلوي شافت هيئته العامة لكن ملامح وجهه مابينت معها!! وكانوا أمها وخواتها وسماح زوجة أخوها مجتمعين.....ينتظرون على أحر من الجمر انطباع الرجال عنه! ودخل محمد ياخذ القهوة فاجتمعوا كلهم عليه يسألونه..وقال:والله ماشاء الله عليه وسيم وخلوق وباين إنه مثقف.. اسماء(قالت بقصد تستفز اسمهان!): خسارة هالصفات الزينة بهالمرجوجة اسمهان! اسمهان:يالطيف على الحسد! ابتسام:ماعليك منها ودها تغيظك..الله يتمم لك حبيبتي على خير..طيبة وتستاهلين!! اسماء:أي طيبة؟؟ماشفتيها لاكشرت عن أنيابها! سماح:والله سمهونة قد ماتسوي حركتات بس قلبها أبيض بالحيل.. الأم:أنا عندي احساس بأن هالموضوع بيتم بإذن الله وإن عبدالرحمن بيطلع ولد حلال.. اسمهان:الله لايخيب ظنك يايمة!! أسماء:أذبحك ياهالبنت؟؟؟وش عليه مستعجلة ياحظي؟؟..تحسبين الزواج سعادة وأنس؟؟إلا بالعكس هم ماينلم!!اسأليني عن الرجال بس! الأم:الله وأكبر عليك يامكفرة العشير...هذا وزوجك من أحسن الرجال! سماح:ماعرفتي له..ولا كان ضبطت أمورك ياأسماء!! اسماء:اسكتي واللي يرحم والديك!عاد اللي يسمعك يقول انتي عرفتي لمحمد!!خذيتيه طيب جاهز وتحسبين لك دور بنجاح حياتك الزوجية!!!!! الأم:انتي مايعيبك الا لسانك!! ولا كان توفقتي بكل شي وجتك الدنيا على هواك! ابتسام:صادقة أمي..الله قال(ولئن شكرتم لأزيدنكم) لو شاكرة ربك كان حسيتي بالرضا دايم بدل هالتذمر!! اسماء:عشتوا!!نسيتي نفسك يامدام شكاوي؟؟ورا ماشكرتي انتي ربك؟؟؟ اسمهان(وهي رافعة يدها للسماء):يالله تعجل بفرجي وتفكني من هالغثا!!! الجزء الثالث عشر...... طبعاً عبدالرحمن كان جالس بالمجلس مع أبو اسمهان وأخوها محمد وأزواج أخواتها ابتسام واسماء...وكلمهم عن نفسه..ووظيفته وإنه موظف بشركة للمواد البترولية..دخله ممتاز..وساكن بدور مستقل في بيت أبوه.. لكن أبو اسمهان فاجأه بسؤال:طيب ياولدي مادام ربي فاتحها عليك وأوضاعك ممتازة اش اللي خلاك تتأخر بزواجك للحين؟!!!! عبدالرحمن:الحقيقة كنت ناوي ماأتزوج إلا لما أبني نفسي من غير اعتماد كلي على الوالد...وقبل 3 سنوات نويت الزواج فعلا لكن الوالد تعب فجأة واكتشفنا إنه عنده جلطة واضطريت أرافقه باستمرار في رحلته العلاجية وفي كل مستشفى ومر وقت لين مادخل بغيبوبة..ساعتها حسيت إنه كل مسئولية عائلتي بيدي ففضلت إني أؤجل موضوع الزواج شوي..وبعدها توفى الوالد وبقيت بجنب أمي بصفتي الولد الكبير..لأن أخواني الاثنين كل واحد متوظف بديرة مختلفة وبعيدين عنا وأمي مالها أحد غيري..فشفت إن راحتها بوجودي جنبها..بس حاليا نقل واحد من اخواني هنا..وقالت الوالدة جاء الوقت اللي تشوف نفسك فيه...والحمدلله ربي هداني أخطب عند ناس طيبين شرواكم... أبواسمهان:بارك الله فيك.... ودخلوا الرجال بعدها بسواليف كثيرة..وأهم شي إنهم حددوا موعد الشوفة!!! وبعد ماراح عبدالرحمن بيته دخل أبوها وأخوها عند الحريم... إلا أم اسمهان قالت:هاه..بشروا واش انطباعاتكم؟؟ أبواسمهان:الحق ينقال..الرجال عقل وثقل..ومابنلقى أحسن منه... أم اسمهان:الحمدلله...يعني واش اتفقتوا عليه؟؟ الأب:حددنا الشوفة الأسبوع الجاي يوم الخميس! اسمهان:ليـــــــــــــــــــــ ــــــش؟؟؟؟ الفقشة اللي بجبهتي مابتروح شلون أطلع قدامه كذا؟!!!! اسماء:يختي على الكشخة!! في اختراع اسمه لصق جروح!أو نزلي قصتك على جبهتك وريحي نفسك!! ابتسام:وياترى ياأبوي كيف شكل المعرس؟؟ الأب: ماشاء الله وسيم ورزة...لكنه طويـــــــــــــل! اسمهان:أطول مني؟؟؟؟؟؟؟ الأب: بكثيــــــــــر!!!! اسمهان:أفففففففففففف! ...............وراحوا الرجال يكملون قعدتهم مع ازواج البنات.. وقالت اسمهان:شوفي يمة دامكم حددتوا شوفتي الخميس الجاي فأنا عندي شروط!! اسماء: بدينا؟؟؟خير ان شاء الله تبينه يبني لك فيلا عالبحر؟؟؟؟؟؟ اسمهان:لا!! بس الشوفة مو بتكون الخميس؟؟ إذن الأربعاء لازم أروح السوق!!! الأم:ليه؟؟ اسمهان:ودي أشتري لبس أكشخ فيه! اسماء:الله يقطع ابليسك! دولابك يصيح من الزحمة اللي فيه...وباقي لك نفس تحشينه بخروق ثانية؟؟؟ وش هالفقعة؟؟؟؟؟ الأم:في هذي معاها حق!! نسيتي يوم فتشنا بدولابها يوم جت أم المعرس مالقينا شي يستر ويحشم..ودك يعني تفشلنا قدام ولد الناس؟؟؟ خلاص يااسمهان ولايهمك ننزل السوق يوم الأربعاء الجاي.. اسمهان:وبعد عندي شرط! ابتسام:بعد؟؟؟؟ اسمهان:إيه ..مادام إن العريس طويل بالحيل ..فالصراحة فشلة إني أطلع قدامه بكعب قصيرأبي أشري صندل كعبه طويـــــــل!!! اسماء:وأحد قال لك بنزفه جنبك؟؟؟ حبيبتي ترى هذي شوفة كلها دقيقتين تدخلين قدامه يبقق عيونه فيك وتعطينه مقفاك وتمشين!!!!! اسمهان:ولو! أحب أكون مميزة بكل شي!! وأفكر بعد اللبس اللي أشريه يكون لونه أحمر!!!! أسماء: ليه ياحلوة؟؟بتتزوجين ثور؟؟؟ اسمهان:أجل أسود! اسماء: ليه رايحة عزاء؟؟؟؟ سماح:الصراحة أنا أقترح عليك يااسمهان تلبسين لون بنَّاتي ناعم..وردي مثلاً! اسماء:صادقة سماح,,ولو تفرقين شعرك بالنص وتلبسين شباصتين وتاخذين معك حلوة مصاص تطلعين كشخة!!! اسمهان:استغفر الله!! تراني تخرجت من الروضة من زمــــــــان! ابتسام:طيب اش رايك بالتركواز؟؟ اسمهان:وعععع...بيسمرني مرة! الأم:اقتراحاتكم كلها فاشلة! ومابأستفيد منها غير وجع القلب!اسمهان ماقد نزلت معها سوق إلا وأحلف ماعد أعيدها!!!!وبعدين أول مرة أشوف أحد يختار اللون وهو باقي ماشاف الموديلات! اللي يسمعكم يقول بنروح نفصل!!إحنا رايحين ندور على اللبس المناسب وعقبه نطالع للون!! سماح:كلام أم محمد صح...ومو ضروري اللبس كله لون واحد..البلوزة لون والتنورة لون ثاني.. **الجزء الرابع عشر** طبعاً بعد ما يوم الخميس انقضى جاء عقبه الجمعة...مامن جديد إلا إنه الآنسة اسمهان شاغلتها الفقشة اللي براسها وهي متوصية شوي تحط عليها ثلج ..وشوي كمادة حارة! جاء يوم السبت وراحت اسمهان كعادتها للمدرسة واستقبلتها شلة الأنس.. مرام:سلامــــــــات وشفيها جبهتك وارمة؟؟ جاك طقة؟؟ أفنان:يمكن أهلها رفضوا المعرس وراحت تطق براسها ودها تنتحر وصار اللي صار!! نجلاء:إلا يمكن وهي ماشية بالشارع كانت تفكر في عبدالرحمن لين ماخبطت بعمود!! حليله العمود رحمته!! اسمهان:موب صاحيين!! هذي يالحبايب طريقة عيال خواتي وأخوي في التعبير عن مشاعرهم تجاهي!!!وحكت لهم القصة...وقالت: شوروا علي بوصفة تخفف من شكلها شوي.. رانية:أحيانا يكون الدواء بنفس طريقة حدوث الداء!!! اسمهان: وشلون يعني مافهمت! رانية:يعني اخبطي براسك بقوة في جدار والورم اللي طالع لبرة بيرد يدخل لجوة!!!! اسمهان:ماشاء الله على الحل! متأثرة بحركات توم وجيري!!تراني أكلمكم بجد..شوفتي الخميس الجاي! نجلاء:بسيطة ..طلعيني بدالك قدام المعرس!! اسمهان: يامابك!! رانية:وش بتلبسين؟؟ اسمهان:لسة مو عارفة.. رانية:لاأوصيك! خلك كشخة على الآخر..لو حصل نصيب بيظل يتذكر كشختك طول عمره!...وإن ماحصل نصيب بيبقى يتذكركشختك ويقول حصل لي كذا وكذا أيام بنت فلان الكشخة!!! اسمهان:يوم الأربعاء بأنزل السوق وأجرب حظي.. نجلاء:خلك اتكيت وناظريه بثقة....لاتسوين نفسك مستحية بعدين يقول هالهبلة ميتة علي!!! أفنان:وإذا سألك أي سؤال جاوبيه إجابات مبهمة وغير مفهومة..عشان يقول هالبنت مثقفة!! مرام:وأكيد يوم الشوفة بيجيب معاه هدية طقم أو إسورة أو أي شي ذهب..لاأعطاكي إياها خذيها منه وارمي بها على أقرب كنبة بقلة اهتمام! عشان يعرف إنك بنت عز ومو ميتة على الهدايا!!!!! نجلاء: وانتبهي لاتسوين مثل أختي ندى أصرت تدخل على خاطبها وهي شايلة بيدها شي..وأخذت عصير ومن الارتباك كبته فوق ولد الناس!!والأدهى إنه ماحصل بينهم نصيب!!!...يمديه إلى الآن يذكر هالموقف!!! أفنان:واحمدي ربك عندك أهل يرضون بمبدأ الشوفة ويعطونك خبر تتسنعين!! حنا بعيلتنا يخلون الشوفة تصير على غفلة والعروس موب دارية...وذوقي من الفشايل!! اللي شافها عريسها وهي تناقز بالحوش تقولون فيها مس!! واللي شافها خطيبها وهي ببيجامة مهرية ومبلحة من كثر الغسيل وبنطلون البيجامة موب طقم مع البلوزة!!!واللي كانت تصلي العشا بشرشف صلاتها وخلوا العريس يشوفها من عند الباب!! اسمهان:ياحليلهم..وبالذات هذي اللي قاعدة تصلي ..واش شاف منها وهي لابسة شرشف صالة ماينشاف منه شي؟!!!!! أفنان: لا هو الصراحة ماشافها زين...لكن أعجبته صلاتها وتزوجها!!! رانية:وإش هالتخلف بعيلتكم ياأفنانوه؟؟؟ الرسول حث الصحابة على الشوفة الشرعية..والمفروض تكون برضا بين الطرفين..مثل ماهو له نفس يشوفها هي بعد لها نفس تشوفه!!!!!وبعدها يسير الارتياح! أفنان:مو الله يسلمك باعتقادهم انهم لاعطونا خبر بنتزين ونطلع بشكل مخالف للواقع!! ........إلا دق الجرس وبدأت الطوابير |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزءالخامس العشر** ومر اليوم الدراسي....ولما جاء وقت الفسحة خرجوا الشلة من فصلهم يتفسحون.....وماشيين يناظرون بالرايح والجاي وكان في وحدة من الطالبات بينها وبين الشلة عداوات قديمة فحصل هذا الحوار: رانية:يوووووووه...شفتوا عبير هالكريهة ياناس ماأدانيها..طالعوا التسريحة بس! يارب لك الحمد على نعمة العقل! اسمهان:كريهة وبس؟! أتعب أقول إن هالبنت غثيثة وماتنطاق.....غـــــــرور فظيـــــــع على وشهو ياحسرة مانيب دارية!!! نجلاء:تحسب إن فلوس أبوها التاجر بتحبب الناس فيها! بعد مافحطت يمين ويسار عشان تسوي صداقات يالله لقت لها اثنين يتنازلون يتصاحبون معها!! أفنان:يانا طاقتن كبدي منها ومن تسريحتها تقولون هضبة نجد وحولها عرفج؟!!!! مرام:بالله تجنبوها..كل مرة نتهاوش فيها توصل هواشتنا الادارة...ومحد يفك لسانه علينا إلا أبلة جوهرة!!! اسمهان:صادقة مرام ياجماعة...لاتنسون أنا وضعي حرِج الآن وماأبي أحتك بأبلة جوهرة!! رانية:تكفين يالكشخة!! خايفة المعرس يروح من يدينك؟؟ مالت عليه وعلى خالته!إش رايك إن العفاريت تلعب براسي وودي أنكد على هالعبير؟؟؟!! اسمهان:وجع! صدق إنك حقود مادام ماغلطت علينا..ليش حنا نغلط؟؟ رانية:انظروا ياجماعة الخير..الآنسة اسمهان قامت ترفرف في عالم المثاليات!! شوفي حبيبتي صح ماسوت لي شي اليوم بس ماأنساها لها الأسبوع اللي فات يوم إني ماشية بالساحة لقيتها ماشية وراي وتقلد مشيتي على الصامت والبنات يضحكون!!ويوم انتبهت قامت تقط علي حكي.... اسمهان:قلعتك...إحنا بنقعد في الكافتيريا نفطر.. عاد رانية راعية شَكَل تحب المهاوش والأكشن وقامت تدور حول عبير وصاحباتها...إلا عبير طالعت فيها باستحقار وقالت:خير؟؟ طردوك شلتك؟؟ رانية:لا تطمني! هذا المستحيل بعينه! بس أنا قلت بمناسبة فوز فريق(..؟..) اللي أشجعه حبيت أعزمكم وكل المشاريب هذي على حسابي..وقدمت لعبير وصاحباتها الثنتين 3 علب بيبسي مخضوضة خض موب صاحي...وأخذوها حطوها قدامهم...بس رانية أصرت على عبير تشرب وقالت:عبير الكل عارف الحزازيات اللي بيني وبينك...وأنا ودي نتصالح..وننسى كل مامضى! عبير:أنا ماعندي مشكلة...بس انتي اللي تحبين تبدين بالمشاكل دايما. رانية:زين طلبتك عشان أعرف إنك راضية علي اشربي البيبسي! فكت عبير البيبسي بحماس وطرطش على شعرها ووجهها... وراحت رانية المستهترة تضحك وتقول:ماعليه حبيبتي تعيشين وتاكلين غيرها..وعلى فكرة أول الغيث قطرة! لو غلطتي علي بنظرة..بأحوسك حوس!! ورجعت رانية لشلتها...مرام:الله لايسامحك شوفي شلون عدمتي شعرها دبق!! رانية:أحسن خلي تسريحتها الرائعة تنحاس!!ههههه نجلاء:ياتفاهتك! كان خليتي هالطاقة على شي يستاهل! ومامر لحظات إلا والادارة ينادون شلة الصاعقة! اسمهان:يلا..استلموا..هذا وأنا موصيتك ياست رانية !!لابد من الفشايل لابد!! وتوجهوا الشلة للإدارة... ومسكتهم أبلة جوهرة وقالت:للمرة الألف أقول لكم ماأبي أشوف رقعة وجيهكم بالإدارة!! وش جابكم علموني؟؟ رانية:مدري انتم استدعيتونا! جوهرة:العبي غيرها..استحوا على وجيهكم قدر ايش اعماركم ومازلتوا تلعبون بالأكل والشرب وتقطونه على صاحباتكم؟؟؟ اسمهان وهي ترتجف من الخوف:أبلة جوهرة...تراني ماكنت معاهم!!!!!! وماشفت شي! التفتوا كل الشلة لها باستغراب.... أبلة جوهرة:كان قلبي حاس..إن وحدة بأخلاقك ماتتنزل لهالمستوى السخيف!! ارجعي فصلك يااسمهان!!! وانتم كلكم بتكتبون تعهد وتعتذرون لصاحبتكم اللي عدمتوا شعرها وملابسها!!! رانية:تخسي إلا هي!!! أبلة جوهرة:وبعد تطولين لسانك؟!! وبعد شد وجذب تنازلوا يعتذرون لعبير.. ورجعوا لفصلهم وهم يلومون رانية... أفنان:شوفي سخافتك وين ودتنا!آخر شي كنت أتوقعه إني أعتذر عن شي ماسويته!! ولمين لعبير؟؟؟ مرام:وكل بلوة تسوينها يارانية لازم تجرينا كلنا معك! ترى لسة حارقتني بقلبي الحركة اللي سويتيها قبل مدة وتعاقبنا كلنا بسببك! رانية:أي حركة؟؟ نجلاء:يحق لك ماتتذكرين! من كثر ماتسوين يالعاقلة!!أكيد يامرام تقصدين يوم كذبت على أم سالم الفراشة وسحبت منها المبخرة يوم جية الموجهات وقالت هاتي المبخرة ياأم سالم أبلة حصة تبيها وخذتها وحطتها تحت جهاز إنذار الحرايق..وأطلق الجهاز إنذار كاذب وصفرت الصفارة وكل المدرسة خرجوا يركضون في الساحة...يومها سويتي لنا رعب وكتبنا كلنا تعهد بسببك...لو هلي دروا كان ذبحوني!!! أفنان:لا وكله كوم ويوم جابت طراطيع وطرطعتها داخل الفصل واحترق الموكيت!! وفجأة التفتوا لاسمهان اللي كاتمة الضحكة..وقالت أفنان:ماتلاحظون الواسطات شغالة هاليومين؟!! نجلاء:إلا ملاحظين وبقوة...وحطي معاها الكذب بعد..قال إيش(وتقلد اسمهان!) أنا ماكنت معاهم وماشفت شي!! رانية:هذا اتفاقنا يارئيسة الشلة؟؟؟ اللي يجري علي يجري عليكم؟؟؟ اسمهان:دا كان زمان ياحبايبي!! من اليوم ورايح أنا حرة نفسي ومو مسئولة عن أحد! رانية: عجيب أمرك!! بتبيعينا عشان بريستجك قدام جوهرة؟؟؟زين يالكشخة اسمعي هذي مني!! ترى الورد اللي كنتي فرحانة فيه من مخططاتي ومحد افتكرك وجوهرة هزأتنا يوم درت إنه مقلب وقالت لاتعلمون اسمهان!!! اسمهان(وهي متفاجئة):شلون؟؟ صاروا الشلة يغمزون لرانية يبونها تسكت لكن أبد قاعدة تحكي بالتفصيل!!! **الجزء السادس عشر** طبعاً بعد ما الأخت رانية قالت لاسمهان عن مقلب الورد وكانت لهجتها جافة...... اسمهان انصدمت وزعلت جداً لأن موقفها صار بايخ جداً قدام جوهرة..والشلة اللي لعبوا بمشاعرها...ودمعت دمعتين.. وقالت نجلاء:اسمهان ترى مانقصد.. لكن اسمهان أشرت بيدها لنجلاء بعدم رغبتها بالكلام وشوي ودخلت معلمة التاريخ وبدأت الحصة.. وطول الحصة واسمهان متضايقة وتفكر بنفسها:ليش هالنذالة من شلتي؟؟؟ يعني أنا اللي جمعتهم وضميتهم لي من أيام المتوسط وتاليتها ينقلب السحر على الساحر؟؟؟؟؟؟؟ بعد ماكنا نسوي مقالب بالبنات..رجعوا هم يسوون مقالبهم فيني؟؟ هين!! أوريكم أنا الزعل على أصوله! بس ياربي أنا تعودت عليهم وماأمشي مع أحد غيرهم..أروح لمين؟؟؟؟ .....ومرت حصة ورا الثانية وبنهاية الدوام حاول الكل يكلمها ورفضت ورجعت للبيت.. ومر يوم السبت.واتصلوا صاحباتها لكن بكل مرة كانت اسمهان تطلب من ابتسام تصرفهم!!! وثاني يوم اللي هو الأحد راحت اسمهان من بدري للمدرسة وتوجهت إلى عبير غريمة الشلة!!! وقامت تتودد لها وكل همها تكيد الشلة!! ولا مو من حبها في عبير!! بس عبير قالت:خير ان شاء الله مقلب جديد من شلة حسب الله؟؟؟!!! اسمهان: لاتفهميني غلط..أنا مالي ذنب باللي حصل أمس!! شفتيني معاهم؟؟ لاوقعت تعهد ولااعتذرت لك أمس لأنه مالي علاقة بالموضوع......لا وأبشرك تركتهم بعد مشكلة أمس..حسيت إنهم سخيفات وحركاتهم صبيانية!!!! عبير: هذا من زمان رأيي فيهم! اسمهان: ترى قمة قهرهم يشوفوني معك!! عشان كذا بالطقاق عليهم مايهموني أبد!! ودي أكون معك ومع صاحباتك نادية وهالة...انتم أهدى وأذوق!!!! عبير:ولو اكتشفت إنك تلعبين علي....؟؟؟؟؟ اسمهان:أي لعب وأي خرابيط؟أنا عصاك اللي ماتعصاك!!!(والحقيقة ان اسمهان قاعدة تقول بقلبها الله ياخذك ياعبيروه! كريهة عن قرب وعن بعد!!!!) ومشت معاها بالصبح ووقفت معاها بالطابور ونقلت جنبها بالصف.....ونظرات الشلة ماتفارقها!! في الحصة الأولى...جلسوا الشلة يتهامسون رانية: هالحين خلصوا البنات يوم تفارقنا وتروح لعبير؟؟؟؟؟؟ نجلاء: يمكن كلام عبير عندها أحسن من كلامك اللي ينقط سم!!! أفنان:ويمكن عبير شافتنا يوم تخاصمنا واستغلت الموقف لصالحها وسحبت اسمهان لناحيتها!! مرام:أقدر أحلف إنها مو مندمجة معاها بس ودها تغيظنا!! رانية:حريمتها هالعبير تسرق مننا اسمهان والله لأسحبها من شوشتها وأمسح بها مكتب المديرة!! نجلاء: تكفين ياسوبر مان!! كلها يومين ومردها تزهق منها وترجع لنا!! *** الجزء السابع عشر** جاء يوم الاثنين والحال على ماهو عليه اسمهان مطيحة عند عبير وصاحباتها نادية وهالة! ولما جاء وقت الفسحة قالت رانية: ودي أتحرش فيهم وأنكد عليهم!! نجلاء: تكفين انثبري! على بالك ماحد يحب اسمهان غيرك؟! كلنا نحبها..بس بنخليها على راحتها ها الكم يوم! رانية: ماأقدر فيني غيظ..موب قادرة أستحمل! أفنان: صادقة....الشلة ماتسوى من غيرها! مرام: ليش مانكتب لها رسالة؟! رانية: لا رومانسية حضرتك!! ليش مانهديها باقة ورد أحسن؟؟؟؟ اسمعوا بأروح جنبهم وهم ياكلون على الطاولة! نجلاء:ليـــــــــــــــــش؟؟؟ معاك بيبسي وودك تصرفينه؟؟؟؟؟؟؟ رانية: لا بأروح أغني لها! نجلاء: من زين صوتك يا العرة!! مرام:وش بتغنين؟؟ والله لأوريك شي مابعد شفته؟؟؟؟؟؟؟؟ أفنان: مو ناقصين مسخرة واللي يعافيك تعالي واقعدي... رانية:بأروح يعني بأروح وماني مآذية أحد!! بأغني بس! نجلاء: مو أكبر أذية بالدنيا إنك تجبرين الناس يسمعون صوتك العذب...لأنه بيكون أشد عليهم من مية طراق!!!! الشلة:هههههههههههههههههه وراحت رانية الهبلة جنب طاولة اسمهان اللي كان قاعد معاها عبير وهالة ونادية وقامت تغني: حســــــــافة هالصداقة يابايـــــــــعة الرفـــاقة والسبب وردٍ ببـاقة!!! ناظرتها اسمهان بسخرية وأعطتها تشميقة قوية! قالت عبير بهمس:ردي على هالخبلة!! وقامت اسمهان ترد: ياشين هالطفــــــــــــاقة تفاهة ومـــــــــــــــلاقة بفرقاكم رواقـــــــــــــــة! رانية: مردود كلامك يالزينة ومنقود تبدلينا حنا بشلة كلها قرود؟؟ قامت عبير بوجه رانية وقالت: احترمي نفسك!! أشرت اسمهان لعبير بالسكوت وقالت لرانية: صحبة هالشلة تنشرى عندي بنقود والقردة انتي! وشلتك كلها قرود!!! صاحت رانية وقالت:لاااااااااا مصختيها عاد! وش سوت لك هالجنية أخاف دنبشتك؟؟؟؟ اسمهان: رانية حبيبتي..شفتي ذاك الجدار اللي جنب باب المقصف؟؟ رانية ( بفرحة مو مصدقة ان اسمهان تكلمها):إيه شايفته حبيبتي! اسمهان: كلمة وحدة تقولينها...وبقدرة قادر بتلاقين نفسك منسدحة جنبه!! فهمتي؟؟؟ يلا توكلي !شلة المقاريد بانتظارك!! وراحوا شلة عبير يضحكون..ورجعت رانية مكسورة الخاطر!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزء الثامن عشر** طبعا رجعت رانية للشلة اللي كانوا يراقبونها من بعيد وسألوها اش صار؟؟ رانية:أبشركم اسمهان شكرتني على أغنيتي وقالت إن كلماتها معبرة وبترجع لنا بأقرب وقت!!!!!! وقامت نجلاء تناظر رانية بنص عين وقالت:علينا؟؟؟ هالحين اسمهان قالت لك هالكلام؟؟؟ رانية:إيه ليش منتو مصدقين؟؟؟ أفنان: لأني كنت وراك وسمعت كل هرجك ياروح أمك!! مرام:صااااااااادوه!!!هههههه رانية: ايه ماأخبي عليكم زفتني بكم كلمة!!بس براحتها هي اللي خسرانة!! الوجيه اللي مثل هالعبيروه ماتثمر فيهم العِشرة! بكرة تبيع اسمهان بنص ريال!! ......وعدى الاثنين وعقبه الثلاثاء ومكايدات الشلتين تزيد...وكانوا واقفين بالسيب قريب من بعض وكل شلة تقط على الثانية حكي على نظام(إياك أعني واسمعي ياجارة!!)...وفجأة مرت أبلة جوهرة ولاحظت الموقف وقالت لاسمهان: هلا حبيبتي أخيراً تركتي شلة المافيا هذي؟الصراحة زين ماسويتي!! مبروك!! اسمهان: الله يبارك فيك!!! عاد رانية طرطعت وبغت ترتكب جريمة!!! دمها حامي هالبنت!! وراحت ابلة جوهرة وقامت اسمهان تناظر لشلتها السابقة وترقص لهم حواجبها! وعطتهم مقفاها ودخلت الفصل!!! ومر اليوم بــ روتينه ...وعقبه جاء الأربعاء!! عاد من الصباح واسمهان منتعشة بتروح السوق في الليل وتشتري ملابس الشوفة لأن بكرة الخميس!!! وقالت لعبير سر انبساطها! بس عبير ردت بكل برود: غريبة أهلك موافقين على الخطبة!!لسة بدري عليك! ولا ودهم يفتكون منك؟؟؟ ردت اسمهان بغيظ:نصيبي وجاني! ليش أرده؟؟وفيه ميزات حلوة...ممكن ماتنلقى بغيره!! عبير:بس أنا سمعت انه كبير وعمره30 سنة....لا وأمه ساكنة معه بنفس العمارة!!أي ميزات فيه بس؟؟؟ اسمهان: يعني ماودك تغلطين وتقولين مبروك؟؟ عبير:ياحليلك مرة خفيفة! ماصدقتي يجيك عريس؟؟ بصراحة هذي بيعة مو زواجة محترمة!!!!!! اسمهان:صدق إنك ماتستحين!! حسد هذا ولاغرور؟! عبير:أنا أحسدك انتي يالغثيثة؟؟؟ وعلى ايش ياحسرة؟ تراني ضميتك لشلتي حزناً عليك مو محبة فيك!!! اسمهان والدمع بعينها قالت:أما صحيح وقحة وقليلة أدب! ومين قال لك إني طايحة عندك...كل سواليفك سخيفة وتدور عنك وعن جمالك اللي ماحد شايفه إلا انتي يا الشينة!!!!! عبير:صحيح إن ذيل الكلب عمره مايتعدل!!! وقامت اسمهان من زود مازعلت وانقهرت وهي أساساً من البداية ماتواطن عبير...صفقت عبير كف على وجهها!!!!!!! وكانوا شلة الصاعقة قريبين وشافوا الموقف لأنه حصل بالطوابير قبل ماتبدأ!!! صاحت رانية بصوت عالي:أحلــــــــــــــــــــى يابنت ياسمهونة!! تسلم لي إيدك ليتني صكيتها بكف بدالك! هذي عين جوهرة وصابتكم!!!ههههههههه واسمهان كانت تبكي وراحت تجري على الحمام دخلت ولحقتها نجلاء وضمتها لصدرها بقوة! نجلاء:لايضيق صدرك! عبير وحدة ماتستاهل إن أحد يزعل نفسه علشانها!! اسمهان:بس كلامها مثل الخنجر بصدري!!بدل ماتفرح لفرحتي قاعدة تستهزأ فيني؟؟؟؟ نجلاء:وليش يااسمهان؟؟تحسبين كل الشلل مثل شلتنا؟؟؟ من أيام ماكنا بالمتوسط وحنا قلب واحد نحب بعض ونواسي بعض ونشارك بعض بالأفراح والأعياد والمناسبات!!ولا نسيتي؟؟ اسمهان:لا مانسيت!يلا عطلتك عن الطابور روحي وأنا بأقعد هنا لين ماتبدأ الحصة الأولى!!!! نجلاء:معقول؟؟؟ ماأروح عنك إلا ويدي بيدك والبسمة على شفاهك!! اسمهان:مالي نفس أضحك ولا أبتسم!! نجلاء:طيب اش رايك أذكرك بموقف كنا دايما لما نتذكره نضحك عليه؟؟ تتذكرين لما حضرنا زمان زواج أخت أفنان وكان اسلامي والمنشدة ماتبي أحد يرقص رقص مايع وشلون كانت رانية ترقص؟؟ونزلتها المنشدة من المسرح لأن فستانها مكشوف؟ اسمهان:ههه أذكر.. نجلاء: ومن كثر مابراسها رجة نزلت من المنصة ولبست عباتها وطلعت ترقص وطردتها المنشدة عشان رقصها المتمايل؟؟ورجعت نزلت وغطت وجهها وطلعت ترقص مرة ثانية!! وشوي إلا الفرقة ال****دية هددوها بالميكرفون إنها لو مانزلت من المنصة بيوقفون أناشيدهم!!! ومدت رانية لسانها وهي نازلة من المسرح زلت قدمها وتقلبت في الدرج مثل الكورة!!! اسمهان:هههههههه كأن الموقف كان أمس!!رانية من الشخصيات اللي ماتيأس! تذكرين عقب طيحتها يوم شلناها أصرت إن سبب الطيحة عين من المنشدة!!ماكأن الطيحة بسبب سمنتها وكعب أمها اللي لابسته!!!ههه نجلاء:ههههههههههههه وآثاري أبلة جوهرة واقفة تسمعهم من أول عند باب الحمام!!!!!لأنها كانت تسوي جولة تفتيشية لجمع البنات كلهم بالطابور!!! وقالت:الله لايحرمكم من بعض!!!يلا على الطوابير قبل ماأسحبكم على الادارة.. **الجزء التاسع عشر** بعد الجزء اللي فات والموقف اللي سار بين اسمهان وعبير ثم الحوار اللي دار بين اسمهان ونجلاء بالحمام... راحوا البنتين للطوابير وكانت قد بدأت ووقفوا نجلاء واسمهان آخر الطابور وضحكوا الثنتين لما لقوا عبير مازالت ماسكة خدها عقب الكف!!!(مسوية فيها حركات مسلسلات!!!) ورجعوا الفصل وسط فرحة باقي الشلة وبدأت الحصة تليها الحصة إلى أن جاء وقت الفسحة.. إلا وأفنان تقول:فيه ناس ياحظهم بيسير لهم أحداث جديدة بكرة! اسمهان:خلي الأحداث حقت اليوم تتم وعقبها يحلها ألف حلاَّل! مرام:وش هالألغاز؟؟؟ مافهمنا شي! رانية:واشفيكم نسيتوا؟ بيجي بكرة ولد أخت المطفوقة جوهرة عشان يقز اسمهان!! نجلاء: لاااا وصف دقيق! أي قزقزة يالخبلة؟؟بكرة النظرة الشرعية لاسمهان...عساك تتوفقين ياسوسو قولي آمين.. اسمهان:آآآآآآآآآآآآآآآآآآمين! مرام:طيب ماقلتي لنا وش بتلبسين ياترى؟ اسمهان:مو هو هذا الحدث اللي بيسير اليوم..بأروح السوق وأختار اللبس المناسب.. رانية:الله الله بالزبرقة والتكشخ.. أفنان:وخلك غامضة في حركاتك تزدادين جاذبية! مرام:ولاتنسين! سر الجمال يكمن خلف النظرات! نجلاء:الله يقطع أباليسكم! هذي نصايح ولا عناوين قاريينها من أغلفة المجلات!! اسمهان:خلهم يقولون اللي يبونه..هذا وجهي إن كان طبقوا شي منها لاانخطبوا!! بس الحبايب ماخذيني فار تجارب عندهم!!! ولا أنا بأنسى نصايحكم السابقة؟؟ واندمجوا الشلة بسوالف كثيرة ومر اليوم الدراسي اللي بنهايته توادعوا الشلة ووصوا اسمهان تتصل تخبرهم بكل جديد!!! رجعت اسمهان للبيت وقابلت أمها وابتسام أختها اللي مازالت جالسة عندهم... فقالت الأم:اسمهان الله يرضى عليك يابنتي لاتطولين النومة..ترى نبي نروح السوق عقب المغرب مباشرة..لأني أعرفك تمرضين القلب لانزلتي السوق وليلك طويل!! فبنروح بعد المغرب عشان يكون عندنا متسع كبير من الوقت. اسمهان:إن شاء الله......وراحت تنام ولما جاء المغرب جات سماح زوجة أخوهم محمد واسماء وقالت الأم:أنا واسمهان رايحين السوق مين منكم مستعدة تخاوينا؟؟؟ اسماء:لو تحلفون علي حلفان مانزلت معكم!!اسمهان مثل البزران لانزلت السوق كل شي تبيه وياويل من يطاوعها ونهايتها مايملا عينها غير التراب!!!!!! اسمهان:مشكورة من القلب على كلامك السكر اللي كان ممكن تختصرينه بكلمتين(ماني رايحة!) اسماء:وتدرون الحمل متعبني ومافيني أمشي وولدي بيجنني لذا بأجلس مع سماح هنا بالبيت. ابتسام:إذن خلاص أنا رايحة معاكم يايمة..وبناتي بأخليهم بالبيت مع اسماء وسماح.. وراحوا السوق.. ;**الجزء العشرين** وراحت اسمهان وأمها وأختها ابتسام إلى السوق ومحمد أخو اسمهان هو اللي وداهم...ولما وصلوا للمول الكبير نزلوا كلهم فقالت أم اسمهان:محمد؟؟ إنت ناوي تنزل معانا؟ محمد:إيه ليش؟؟ الأم:بلاك ماتدري عن أختك الفالحة لانزلت السوق مشت على مقولة ياليـــــــــل ماأطولك!!! محمد: كلها لبس واحد بتشرونه وترجعون..يبي لها هذي اختراع صاروخ؟؟؟ الأم:مع أختك كل شي بيسير مو بس بنخترع صاروخ إلا بنصنع مركبة فضائية!الله يعينني بس! محمد: أجل الله يرضى على سماح!!تدرون؟؟أنا راجع البيت متى ماانتهيتوا اتصلوا فيني.. وبالفعل نزلوا النسوان الثلاث وأول محل دخلوه راحت ابتسام تجري على بلوزة شيفون وقالت: شوفي يااسمهان مرة ألوانها حلوة بس يبغالنا نطقم معاها تنورة! اسمهان:خبلة انتي؟ ولا شكلك كذا؟؟ في حرمة صاحية بالدنيا من أول محل تدخله تروح تشتري على طول؟؟ ياماما التسوق هذا ثقافة!طالما بيدي أبحث وأبحث لين ماألقى أميز شي فليش العجلة؟! الأم:طبعا ياست اسمهان لاقية من يدلعك..ولا المفروض نخليك تاخذين الشي غصبن عنك ونريح رووسنا! ابتسام: بكيفك!بس صراحة أنا أشوف هالبلوزة جدا أنيقة وألوانها رايقة.. أعطتهم اسمهان مقفاها وطلعت من المحل وراحت اللي بجنبه ودخلوا وراها وتفرجوا على البضاعة وقالت ابتسام: شوفي اسمهان هالتنورة خامتها مرة حلوة لو تاخذين لك بعد فرة بالمحل أكيد بتلاقين بلوزة حلوة تناسبها.. اسمهان:رجاءً ياابتسام..لاتفرضين علي ذوقك!أنا لي نظرة خاصة وذوق معين باللبس! ابتسام:ماشاء الله..وأنا عاد اللي جاية من مضارب بني عبس وماأفهم شي!! الأم: قلت لكم من قبل.. أختكم متعبة بالتسوق ماتصدقوني!!الله يعين بس إن ربي كتب لها نصيب بهالزواجة كيف بتسوي فينا في تجهيزها! ابتسام:وان شاء الله يايمة بتتعبين عمرك عشانها أنا أقترح ماتنزلين معها أبد وكلي أمرها لأبوي عاد هو عصبي ويحب العجلة بكل شي ويعرف شلون يعلمها فن التسوق اللي تقول عليه!!! اسمهان:وانتم اش قاهركم كله لبس واحد بأشتريه المفروض يكون ماله مثيل ومميز جداً! ابتسام:كل بضايع المحلات متشابهة ماأظن فيه محل بيصنع لك لبس خاص فيك..فلاتقعدين تسوي لنا اختراعات وتاليتها مثل ماقالت أسماء بتلفين وتلفين وآخرتها مابيملى عينك إلا تراب!! اسمهان(بعصبية):قطيعة تقطعك إنتي واسماء كلكم حسودات..أشوفكم أخذتوا راحتكم بشوفاتكم وأنا مدري ليش نفسكم تخربونها علي!! الأم: لا تكاعشوا انتوا الثنتين أحسن!!! وفرجوا علينا خليقة الله وخلوا اللي مايشتري يتفرج!! اسمهان:خـــــــلاص خلوني بحالي.. ابتسام:أعوذ بالله أنا اش جابني؟لو انثبرت بالبيت كان أبرك! وراحت اسمهان قدامهم وسبقتهم تدخل من محل وتخرج من محل وعلى هالحال من بعد صلاة المغرب... ابتسام:ياربي!!! متى بنخلص من هالشقا؟؟؟ الأم:ياحليلك ياابتسام! باقي ماشفتي شي!! اسمهان بنتي وأعرفها زين..مابترتاح لين ماتدخل أغلب المحلات!!!!!! ابتسام:ايــــــــــــــــــــش ؟؟ بس هالمول فيه أكثر من 150 محل متى بيمدينا ندخلها كلها؟؟؟؟ الأم:الشكوى لله...وش اسوي لها لو أتضارب معها واخاصمها الحين بتصغر عقلها مثل العادة وتبطل تشتري شي!! وإحنا ماعندنا فرصة إلا اليوم...ولد الناس بكرة جاي! طبعا اسمهان ماقصرت دخلت أكثر من 50 محل وكل مرة تخرج خالية اليدين...لين ماأمها ارتفع ضغطها وصاحت بوجهها وهزأتها: تراك زهقتينا!لاتخليني أغضب عليك وأحرمك من السوق على طول!وأسير أسوي مثل أهالينا زمان يروحون السوق بروحهم ولاياخذونا معاهم ويجينا الشي لين حدنا وناخذه ونرضى!! اسمهان:وش اسوي لكم يعني؟؟ماعجبني شي! الأم:والزبدة؟؟ اسمهان:خلاص اعتذروا للآدمي عن الشوفة بكرة وخلوها الأسبوع الجاي!!!! الأم: أذبحها هالبنت؟ ولا اش أسوي فيها؟؟؟ ابتسام:صدق إنك هبلة! اش رايك نقول لولد الناس تكفى لاتجينا بكرة بنتنا ماعندها ملابس!عريانة ونايمة بالشارع؟؟!!!!!! اسمهان:طيب انتم شايفين الوضع..يعني لقيت شي زين وقلت لا؟؟؟؟ الأم:امشي قدامي وخل ليلتك ذي تعدي على خير! لأنك لو ماشريتي من هالمول شي فلاتحلمين نوديك غيره!!! وقامت اسمهان تمشي بزعل وضيق أمها كل مادخلت محل تخيرها....لييييييييييين مالقوا في الأخير تايير شيك جداً لونه غريب مموج رُماني على أرجواني على ليلكي!!! ونطت اسمهان من الفرح وقالت:الحمدلله هو هذا اللبس اللي أبيه بالضبط! الأم:والله أنا اللي نفسي أنط مثل نطتك هذي عشر مرات..أخيرا بنخلص وحنا لنا 3ساعات نفتر بالمجمع!!! ابتسام:أنا اللي من جد قرفانة من نفسي وودي أرجع البيت آخذ دش! واشتروا التاييروخرجوا من المحل وقامت الأم تتصل بمحمد... اسمهان:يمة اشفيك تدقين عليه؟؟لسة ماخلصنا! الأم:ليش؟؟وش بقى؟ اسمهان:ودي أشتري صندل واكسسوار يناسبون التايير!! الأم:يابنت إنتي ناوية تجيبن لي جلطة؟؟؟عندك صنادل بالبيت كثر مال قارون...والاكسسوارات اللهم ياكافي مافي صندوق يشيلها وبعد تبين تعذبينا باللف والدوران بهالمول؟؟؟ اسمهان:طيب الصندل ومحلول أمره بس اللبس لونه غريب ويبي له اكسسوار مناسب!! الأم:انطمي ولاكلمة!!ماني متحركة من مكاني لين يجي محمد! وقعدت الأم وبنتها ابتسام على كرسي..ولمايئست اسمهان جلست جنبهم..وجاء محمد وأخذهم للبيت! وهم بالسيارة قال محمد:ياساتر يارب 3ساعات عشان لبس واحد؟؟ليش؟؟ الأم:تعاتبني؟؟قول هالكلام لأختك!!اللي مااستحت على وجهها ولافكرت فيني إنه وراي رِجال ونسوان بالبيت ولازم أطبخ لهم عشا..ورجولي ماعاد تشيلني من كثر التفرفر!! محمد:ماعليك يمة ..لاتشيلين هم العشا نمر هالحين للمطعم وناخذ عشا... |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزء الواحد والعشرون++ رجعوا الجماعة من السوق للبيت وأول مادخلوا قالت أسماء: الله أكبر عليكم 3ساعات ونص يامفتريين والحصيلة كيس واحد بس؟؟؟؟؟؟ الأم:مايبيلها سؤال!انتي نزلتي معانا السوق كثير وتدرين بطبع أختك.. سماح:أهم شي لقيتوا شي مناسب؟؟ ابتسام:أكيد! ماأحلانا بعد كل هالتفرفر نرجع وايادينا فاضية!عن إذنكم أنا ميتة من الحر وعرقانة بآخذ لي دش وأجيكم.. الأم:اش رايكم نتعشى هالحين؟؟وعقبها نشوف اللبس؟ الكل قالوا:طيب,,,,,,,وجهزوا عشاهم وأكلوا.. وبعد العشا لبست اسمهان اللبس ونال استحسان الجميع وطقمت صندل من صنادلها عليه بس كلهم قالوا مايناسب!! اسمهان:كله من أمي..رفضت تخليني أشتري! اسماء:ياشيخة اسكتي واللي يرحم والديك الرجاَّل جاي يشوف وجهك موب رجلينك! سماح:طيب اش رايك ياسمهونة بصندلي هذا لونه قريب من لبسك شوي صح؟؟؟ طالعت اسمهان في رجل سماح بفرح وقالت:جبتيها!!فعلا مناسب للبس..وش رايك أستلفه؟؟؟ سماح:عليك بالعافية أهم شي لاتطلعيني اليوم من بيتكم حافيه!!! اسمهان:والاكسسوار يايمة؟كنت أتمنى أجيب اكسسوار مطابق لاتقولين لي البسي ذهبي او فضي أبي نفس لونه!! الأم:احمدي ربك إنها تيسرت وشرينا التايير..هذا أهم شي!! وفجأة واسمهان واقفة تطالع في القاعدين إلا طاحت عينها على سلسلة ابتسام اللي كانت عقب الدش متلبسة لبس مرتب وعليه قلادة طويلة دورين ناعمة وفيها أحجار صغيرة ارجوانية.. إلا اسمهان صارت تصارخ وتأشر على ابتسام مو مصدقة انها لقت شي مناسب للبسها وتقول:شوفوا شوفوا... اخترعت ابتسام ونطت من مكانها وقالت:لااااااااااااااا لاتقولين على كتفي صرصار!! اسمهان:أي صرصار؟سلسلتك عجبتني!! اسماء:حسبي الله على عدوك طيرتي عقل البنت عشان سلسلة؟؟؟ ابتسام:واذا أعجبتك..بتصادرينها؟؟ اسمهان:بس بكرة!!تكفييييييين! ابتسام:تفضليها.. سماح موب أحسن مني عطتك نعالها! اسماء:أحرجتوني ياجماعة!مابقى إلا أنا ماعطيتها شي..الود ودي أعطيك طراق لين ماتقولين الله حق!! طبعاً الأشقياء بنات ابتسام التوأمتين(سارة وهيفاء)قالوا:ليش ياماما تعطين سلسلتك لخالة اسمهان مو حقتها!!! ابتسام:عشان ماعندها!بعدين ترجعها.. التوأمتين:ياويلك ياخالة ماترجعينها ماما شرتها بفلوس بابا ماهي حقتك!! اسمهان:ماشاء الله طول اللسان وراثة من خالتكم اسماء! اسماء:خلهم يطلعون قويات..يامال الضعفة! قالت الأم:ترى كلمت أم العريس على الشوفة بس حسيت انها تبي تطلع في الشوفة مع ولدها يعني ماتبي رِجال! بس أبوك ماوافق أصر إنه انتي اللي تدخلين عليهم المجلس!!يقول ليش بس الأم وولدها عشان يتمقل على كيفه؟؟؟لايمكن! اسمهان:ومحمد بيكون فيه؟؟ الأم:أكيد! اسمهان:شرطي انه مايكون موجود يكفي وجود أبوي! سماح:وليش ماتبين زوجي قاعد على راسك؟؟عطيني عطيني نعالي ماتستاهلينه!! اسمهان:استحي من محمد!!تعليقاته كثيرة!يكفي أبوي والعريس وبس! الأم:مو مشكلة...على هواك. وعدى الليل.. وكلن راح بيته واسمهان مانامت بس ذابحها التفكير طبعاً أهلها كلموا المعرس وأمه وقالوا بيجون هم الاثنين وطلع النهار وهي مانامت زين ومن صباح الله وهي طايحة خلطات وكريمات وماسكات لا ومنادية أختها ابتسام تنتف لها سيقانها!!! شافتها أمها وقالت:هيييييه هيييييييه يابنت ترى الدخلة ماهي الليلة!!!!!!!! اسمهان:الاحتياط واجب!! الأم:أي احتياط ؟عيب عليك ملابسك ساترة مايحتاج هاللي تسوينه! ابتسام:يمة خلها على راحتها.. ومر اليوم وكل ماقربت الساعة يخفق قلب اسمهان وتدور براسها أسئلة:ياترى كيف شكله؟هل بيعجبني؟هل بأعجبه؟كيف بتجيني جراءة؟اش بيسألني؟اش أرد عليه؟ وكيف بأدخل؟وكيف بتكون مشيتي؟؟ وتلفون البيت كل شوي يرن!شلتها بس يتطمنون هل الوضع مستتب ولا لا؟؟ واتصلت رانية تسولف ومن ضمن كلامها:سوسو إذا محتاجة أي فزعة ترانا موجودين! اسمهان:مشكورة يابعد عمري ماتقصرين! رانية:ترى أكلمك بجد لو الفشلة قاتلتك والحيا ذابحك ترى ماعندي مانع أطلع بدالك قدام المعرس!! اسمهان:صكي السماعة ولا بأقفل بوجهك!! وأصدرت اسمهان قراراتها لأهلها إنهم يصرفون صاحباتها اللي كل شوي يتصلون ومسووين قلق!!! وجات الساعة الموعودة واجتمعوا اسماء وابتسام و سماح وأم المعرس أما أزواج اسماء وابتسام أخذهم محمد يعشيهم برة... وكان شرط العريس وأمه إنها تكون شوفة خفيفة مافيها تكلف او عشا.. وطبعاً دخلت اسمهان وكانت قمة في الروعة كل شي فيها حلو بس الكعب طويــــــــــــل ...إلى مجلس الحريم واخواتها وأمها وزوجة أخوها قاعدين وبس شافتها أم المعرس فزت تسلم وصارت تقول:ماشاء الله كل مرة أشوفك فيها ألقاك أحلى من اللي قبلها!! وقعدت اسمهان جنبها بخجل..وصارت اسماء تناظرها بحركات فيها سخرية واستهبال تبي ترفع ضغطها!!! وبعد الأخذ والعطا بين النسوان إلا الأب نادى أم اسمهان وقال:بأروح المجلس وخلي اسمهان تجي بعد ثواني ومعاها الشاي! وراحت الأم ونادت اسمهان اللي قلبها صار يرجف وريقها نشف وشوي وتبكي!وسماح وابتسام يهدونها ويقولون مافي شي يستاهل تخافين توكلي على الله وروحي.. أما اسماء كالعادة تحب تناقر في جميع الأوقات فقالت:ياحليلك قطعتي قلبي!!!ماكأنك ذيك المطفوقة اللي كنت بتطيرين على الزواج!! اسمهان بقهر:حسابك عندي خلني أرجع بس!!! وبالفعل توجهت إلى المجلس ولحقوها بنات ابتسام(سارة وهيفاء التوأم راعيات الفشايل!!!)ووقفوا عند الباب يطالعون المعرس! ودخلت اسمهان تتمايل الكعب طويــــــــــــــل وصينية الشاي تتراقص مابين ايديها وحطتها على الطاولة وعدت على خير كل شي سليم مافي شي طاح!! بس عين العريس طاحت عليها ووقف من غير شعور يمد يده لها يصافحها! ورفضت اسمهان تصافحه!قال أبوها:سلمي يابنت! ردت اسمهان بكل براءة:مصافحة الرجل الأجنبي حرام! وبغى عبدالرحمن يضحك بس مسك نفسه وجلس..وجلست هي بالكنبة اللي بجنبه... قال لها:ماشاء الله تبارك الله..قد ماوصفت لي الوالدة جمالك ماتخيلتك بهالحلا!!!!!(جريء صح؟؟؟؟؟) عاد أبو اسمهان سمع هالكلام وبغت تطلع عيونه وقام يتنحنح!!!فانتبه عبدالرحمن انه حبكها شوي وقال لاسمهان:كيف حالك؟ ردت اسمهان بارتباك:وإنت بخير..!!!!!! عبدالرحمن:بأي صف تدرسين؟؟ اسمهان بارتباك:أدرس بالمدرسة!!! حس عبدالرحمن انها مرتبكة وقاعدة تخبص بالحكي فقال:طيب لاتخرجتي بإذن الله اش طموحاتك؟؟؟ اسمهان:أحب القراءة وتصفح النت!!!! وبغى عبدالرحمن يضحك لكن أبوها يبي يلطف الجو وقال:اسمهان هذا طبعها خجولة وتستحي!! إلا دخلت سارة الصغيرة بنت ابتسام وقالت:لا خالتي اسمهان قليلة أدب ماتستحي تحب تقعد مع الرجال!!!!! تفشل أبواسمهان وقال:عيب يابنت روحي لأمك وش هالكلام؟ سارة:إلا دايما أشوفها قاعدة معاك ومع خالي محمد!! أبواسمهان قام يضحك وقال:مافيها شي يابنتي خالك أخوها وأنا أبوها!! إلا تنفس عبدالرحمن الهواء لأن مخه راح بعيد شوي!! وهيفاء توأم سارة قالت:ياعريس خالة اسمهان اشترت لبس جديد عشان انت تشوفه وترضى تتزوجها!!! قامت اسمهان سحبت البنت ومن غيظها قرصت البنت بظهرها من غير ماأحد يلاحظ بس البنت فضحتها وقالت:آآآآآآآآآآه ليش عورتيني ياشريرة ماأحبك فصخي سلسلة أمي ياحرامية!!! ساعتها ابواسمهان اشتد غيظه!!وناظرباسمهان وعينه تتطاير شرر وقال:قومي يابنت وادخلي داخل!! وقامت اسمهان تبي تلحق البنتين الصغار قبل مايروحون لأمهم عشان تلطشهم بس خانتها رجولها ونشب الكعب بطرف السجادة المفروشة على السيراميك وطاحت طيحة تكشفت فيها من جميع الجهات لدرجة إنها قالت بقلبها:أشوى اني نتفت سيقاني!!!!!!!! التكملة فيما بعد!!!!!!! تكملة##الجزء الحادي والعشرين## طبعاً بعد مااسمهان طاحت الطيحة التاريخية هذي قدام المعرس...هو ماصدق وبقق عيونه يخاف لايفوته شي!! أبوها انحرج جداً وصاح فيها تقوم وعبدالرحمن العريس طقته النخوة والشهامة وقام قال إيش بيساعدها بس أبوها قال بعصبية :خلها!! ووقفت اسمهان مرة ثانية لكن خيوط السجادة مازالت ملتفة على الكعبة فصارت اسمهان كأنها راكعة وتتأرجح بالهواء مو عارفة تتحرك وأبوها يناظر هالمسخرة وصاح فيها بأعلى صوته وكأنه يزأر:يابنت الكلـ؟! ادخلي داخل وخلي نعالك!!!! ومن الخرعة تركت فردة من الصندل لأنها ناشبة بالسجاد وراحت تركض لداخل والحق ينقال كأن منظرها مثل زرافة عرجاء لأنه الكعب جداًطويل والرجل الثانية حافية فصارت مشيتها مو متوازنة تطلع وتنزل وعبدالرحمن متابع والضحك مشقق بطنه من الداخل ومن فلاحته نسى يعطيها طقم الشوفة الذهب اللي كان جايبه لها!!!!!! طبعاً من المتعارف عليه بمجتمعنا انه عند بعض القبائل عِرف معين إنه العريس إذا أعجبته العروسة عطاها الهدية اللي جايبها وإن ماأعجبته مايعطيها وبكذا يفهمون الناس إن العريس ماناسبته العروس!!!!! بس عبدالرحمن أعجبته اسمهان بقوة لكن من كثر الفشايل نسى يعطيها الطقم وهي خارجة من الباب.. ودخلت اسمهان الصالة وخواتها وزوجة أخوها ينتظرونها بشوق...وإلا هي داخلة عليهم بفردة فريدة فردة من الصندل لابستها والثانية خلتها بالمجلس بناءً على طلب أبوها المنحرج! وعيونها محشية دموع وخشمها أحمر وتمشي وهي تعرج كأنها خالتي قماشة لأنه ماعاد فيه توازن بفقدان الكعب الثاني وزعلانة وتسب وتلعن!! طالعت اسماء فيها باستغراب وقالت:هو اش اللي صار داخل بالضبط؟؟ نفسي أفهم!! سماح:صندلي وينه؟؟ووين الفردة الثانية؟أخاف تجاوزتي حدودك وخذاه أبوك وسطرك فيه قدام المعرس!!! ابتسام:خلاص لاتحرجونها!واضح من شكلها ودموعها إنه مافي نصيب!! انفجرت اسمهان وقالت:انتي بالذات ياابتساموه نفسي أمسك بناتك وأرميهم من الشباك على الغثاثة اللي سووها!!وينهم بس؟قسماً لا أفش غلي فيهم!! ابتسام:بسم الله عليهم..جزاء المعروف سبع كفوف؟من الصباح وأنا أنتف ذراعك وسيقانك اللي تقولون فرع من غابات الأمازون!! ولا شعرك اللي قعدت ساعتين أفرد فيه بالاستشوار وتاليتها تبين تطقين بناتي؟؟ اسماء:الله أكبر يالفشلة!ولاعطاك طقم ولااسورة ولا شي؟؟يعني واضحة مثل الشمس ياإنه بخيل! يا ماعجبتيه ومافيه نصيب!! الصراحة محد بيتحسف إلا أمي المسكينة اللي 3 ساعات قاعدة تفتر معك بالسوق!!وتاليتها مامليتي عين المعرس!! وشوي وجات أمهم وشافت اسمهان تتبكبك وقالت:خير يايمة؟؟ ارتحتي له؟ولا ماعجبك؟؟ اسمهان:تطمنوا كلكم!أعجبته وقال إني أحلى من وصف أمه!!!بس بنات ابتسام النذلات فشلوني!! وفكتها منـــــــــاحة!! وحكت لهم كل السالفة وقعدوا يضحكون عليها ودقايق إلا والعريس اتصل بأمه تطلع واستأذنوا وراحوا.. ودخل أبواسمهان الصالة حيث كان الجميع مجتمعين ومعاه كيس شيك وعطاه أم اسمهان اللي فتحته ولقت فيه طقم ذهب أبيض ومفصص وياخذ العقل!! وقامت أم اسمهان تغطرف والكل يغطرف معاها...والأب يطالع باسمهان بنظرات حادة...ثم قال: أمووووت وأعرف...طيحتك قدامنا كانت عفوية ولا متعمدة؟؟؟؟ وقام الكل يضحكون عليها.... اسمهان:بالله هذا سؤال يبه؟؟في أحد يخطط يفشل نفسه؟ الأب:لا ومسوية فيها فاهمة! الرجال يصافحها وهي رافضة تقول له مصافحة الرجل الأجنبي حرام!! الأم:وهي صادقة يازين الثقل!! الأب: لا ومضيعة..ولد الناس يسألها سؤال وهي تعطيه أجوبة ثانية... واكتمل الناقص ببناتك ياابتسام ملقوفات كأنهم أبوهم!!!! قامت ابتسام تقلب عيونها ماعجبها الكلام!! الأب:أهم شي إن الولد خرج مبسوط وعطاني الطقم وهو يتعذر إنه ماعطاه اسمهان بيدها..وقال بإذن الله بيننا لقاء ثاني نتفق فيه على التفاصيل..بس أنا قلت له لاتستعجل لين أشوف رآي البنت... اسماء:أي رآي؟؟أكيد بتوافق غصب عنها!شافها من راسها لكرياسها ولسة تبي تشاورها؟؟ وتوجهت أنظار الأم والأب لاسمهان اللي قالت بخجل: موافــــــــــــــــــــــــــ ــــــــــــــقة!!!!! +++ طبعاً في الجانب الآخر دار حوار بين عبدالرحمن وأمه بالسيارة.. أم عبدالرحمن:هااه بشِّر ياعريس؟؟نقول مبروك؟؟ عبدالرحمن:أكيييييييييد!ماتوقعت إن ذوقك حلو لهالدرجة يمة!! أم عبدالرحمن:الحمدلله يعني أعجبتك...بس علمني وش صار بالشوفة... عبدالرحمن: الحقيقة يايمة أهلها طلعوا بقمة الكرم معي! أم عبدالرحمن:وشلون؟ عبدالرحمن وهو يضحك:يعني كنت أحلم أشوف وجهها بس..لكن ماقصروا معي عطوني فوق ماأتمنى خلوني أشوفها من فوق وتحت ومن داخل وخارج!!! أم عبدالرحمن:حسبي الله على ابليسك وش هاالهرج؟؟؟ عبدالرحمن:يايمة شفتها مو بمزاجها مسكينة طاحت طيحة موب صاحية ولو شفتي أبوها كيف خزها بعيونه! أم عبدالرحمن:رُبَّ ضارةٍ نافعة!!يعني طلعت انت الوحيد المستفيد من هالطيحة.. وقاموا الاثنين يضحكون... عبدالرحمن:حسيت يمة وأنا أناظرها اني شايف سندريلا أم عبدالرحمن:يحق لك البنت مزيونة حيل! عبدالرحمن:لااااا قصدت يوم راحت وخلت فردة من نعالها!!حسيت إن ودي آخذها وأحطها برجولها!!! أم عبدالرحمن: مالت عليك يالخفيف!!! باقي ماعرفت خيرها من شرها وبتحط نفسك عند نعالها؟؟؟ قام عبدالرحمن يضحك ويقهقه وقال:يايمة دشت قلبي هالبنية عفويــــــــــة لأبعد درجة وبريــــــــئة مرة!! يازينها زيناه!!! ام عبدالرحمن:زين ناظر قدامك وإنت تسوق لاتسوي بنا حادث!!!!!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزء الثاني والعشرون** لما رجع عبدالرحمن وأمه للبيت اتصلت خالته جوهرة تتطمن على الأوضاع.......وقالولها كل شي تمام.. أما في بيت اسمهان كانوا امها واخواتها وزوجة أخوها مجتمعين ومستلمينها تعليقات...لين ماقالت :عن إذنكم بأطلع أنام.. طبعاً الليلة اللي قبلها كانت مرهقة ومن بدري وهي صاحية تتزبرق وتتضبط!! وحست إنها بحاجة إلى خلوة تسترجع فيها أحداث الشوفة المضحكة المبكية!!!! فتحت علبة الطقم الذهب وجلست تناظرها بتأمل وهي مبتسمة وتقول بنفسها:تسلم لي ياعبدو شو مِزْوِقْ!!! وراح خيالها يذكرها بتفاصيل هالليلة شكل العريس وكلامه وجلسته وأسلوبه وكل شي فيه!! جاها شعور إنه عبدالرحمن كان بمواصفات أكبر بكثير من أحلامها!! وحمدت ربها،،، والنعاس جرها جر على السرير لأنه مثل ماتعرفون الطيحة ماكانت هينة!! وجسمها كان متكسر!! وطبعاً رجع محمد أخو اسمهان ومعاه أزواج أخواته من برة ودخل عند الحريم يتطمن على الأخبار,,, وقالت أمه:الحمدلله, عجبها المعرس وأعجبته... محمد:طيب وينها أبارك لها؟ الأم:طلعت تنام.. محمد:مايخالف أشوفها بكرة..بغداء الجمعة! وفي الجانب المقابل...كان عبدالرحمن بغرفة نومه يستعد للنوم بعد ماتعشى مع أمه ولمح ريحة غيرة بسواليفها عن اسمهان!!!!!!(إيه ده؟؟مالسه بدري ياأم عبدالرحمن؟؟!!هههه) وانسدح على سريره وراح يسترجع الأحداث..شكل العروس وطولها وأناقتها وجمالها وشعرها وخجلها وعفويتها وسذاجتها البريئة!! كل شي فيها حلو وقال بقلبهتؤبريني قد شو مهضومة!!)...ونام اليوم الثاني من يوم صحت اسمهان قبل صلاة الجمعة وهي حاسة جسمها متكسر من آثار الطيحة!!!وصارت تنادي بأعلى صوتها:كاتيا..كاتيا... الخدامة كاتيا:يس مِس! وات دو يو وونت؟؟؟ اسمهان(وهي بقمة التعب):يرحم والديك مســــــــــــــــــاج! وراحت كاتيا تمسج واسمهان تتأوه وتتوعد بنات ابتسام بالعقاب!! وبعد صلاة الجمعة اجتمعت كل العائلة للغداء الرجال بالمجلس والحريم بالصالة.....ودخل محمد مخصوص لاسمهان عشان يبارك.. ولكن دخل يغطرف!!!ويقول:مبــــــــــــــ ــروك! ناظر فيه ولده سعيد باستغراب وقال:بابا اشفيك تقول لولوليييييه؟إنت بتتزوج؟؟؟؟؟؟؟؟؟؟ نطت سماح وقالت:الله لايقدِّر! انطم ياولد! قال محمد وقصده يستفز زوجته سماح:قولوا آمين ان شاء الله أنا واسمهان بليلة وحدة!! سماح:اللي يقول آمين بأقص لسانه!! قالت اسماء:وش هالكلام يامحمد؟أنا زوجي مستحيل يطاوعه لسانه يفتح سيرة الزواج قدامي!!! محمد:بس دايماً يطاوعه لسانه لكن من وراك!!! وطبعا اسمهان تمشي وهي تعرج وماسكة ظهرها وتتكلم بضعف من الألم اللي فيها!! قال محمد:لاإله إلا الله...واشفيها العروس حامل؟!!! وقاموا يضحكون!! قالت اسمهان:إيه حاملة بقلبي القهر والغيظ على الجنيات الصغيرات هذول فشلوني وطيحوني..جيبوهم عندي بس ودي أزنطهم!!! ابتسام:اعقبي يالحقودة!بزران مايقصدون! وقالت وحدة من التوأم(سارة):ياخالة شكلك يضحك لما طحتي كأنك تتزلجين على الجليد!! هيفاء:لا شكلها زي توم لما طاح وهو يلاحق جيري!! وضحكوا العائلة على أحداث أمس واسمهان تشمق في البنات الصغار.... وبدأوا يتغدون ويسولفون.....وكل شوي والتيليفون يرن آثاريهم الشلة يبون يتطمنون على الأخبار!! واسمهان وصت البيت كله :ماأبي أكلم أحد قولوا هاجرت! ياشين طفاقتهم بكرة بنتقابل ونتكلم عن كل شي! ومر يوم الجمعة.......وأقبل يوم السبت وفكرت اسمهان تلبس اجزاء من الطقم الإسورة والخاتم!!لأن باقي الطقم ثقيل شوي وماينفع ينلبس بمدرسة وراحت ومعنوياتها عالية! وبالفعل بس وصلت المدرسة اجتمعوا عليها الشلة..يغطرفون ويغنون: يامباركين عرس الاثنين ليلة ربيعن وقمرة!! ودخلت رانية كعادتها جو وصارت تدور وتنشد:لاإله إلا الله...لاإله إلا الله..وتلحنها وترقص وتطق أصابع!!! والساحة كلها تتفرج!! قامت نجلاء قرصتها وقالت:بس.. طاح حظك فشلتينا!! جاك الزار كالعادة؟؟؟ رانية:هذي الغالية سوسو إن مافرحنا فيها بمين بنفرح؟؟بعبيــروه؟!!!!!!! مرام:تكفين سمهونة احكي لنا واش صار؟؟ قامت اسمهان بدت معهم بأول الشوفة ومن ضمن كلامها قالت:مرة عجبته لدرجة إنه قال إني أحلى من وصف أمه بكثيـــــــــــــــــــــــــر !! رانية:لا ياشيخة!!احلفي! هالكلام هو قاله؟ولا قلتيه من راسك؟؟؟؟ اسمهان:أقسم إنه هو اللي قاله.. رانية(وقصدها تستفز اسمهان):غريــــــــــــــبة مع إنك مو ذاك الزود!! أجل لو شافني أنا وش كان بيقول؟؟؟ اسمهان:بعد هذي مايبي لها حكي أكيد بيقول:ماشاء الله أول مرة أشوف بقرة تمشي على رجلين!!! باقي الشلة قاموا يضحكون عليهم.... رانية:زين ياسوسو...قسم لو منتي عروس ومقبلة على ملكة وزواج كان حِست وجهك حوس!وخليت عبدالرحمن يسحب كلامه!!! أفنان:ماعليك منها!!علمينا بس وش قال لك وش قلتي له؟؟؟ اسمهان:مع ارتباكي خبصت بالحكي!!يسألني كيف حالي جاوبته وإنت بخير!! مرام:ياحليلك العيد ماقرب لسه!! اسمهان:وسألني بأي صف؟جاوبته:أدرس بالمدرسة! رانية:كان قلتي له اسأل خالتك جوهرة!!! اسمهان:ولما سألني عن طموحاتي استعجلت بالرد وقلت القراءة وتصفح النت! نجلاء:عادي.ماكذبتي! تتقنين شي في الحياة غيرهم؟؟؟ ياماما هذا بيتزوج طالبة بثانوي يعني حدها مسن وشات..أي طموح وأي خرابيط؟؟؟ وراحت اسمهان بالسوالف وقالت لهم بالتفصيل عن طيحتها وتفشيل بنات ابتسام لها! فراحت رانية تضحك وقالت:يامال الفقر! درتي بالسوق 3 ساعات وتاليتها السلسلة والجزمة سلف..؟؟؟؟ ويوم إنك موب راعية كعوب وشهو له لبستيه ..مستجدة وعاشقة الفشلة؟؟؟؟؟؟؟؟ اسمهان:لا وانتي الصادقة الطيور على اشكالها تقع!!أقلد وحدة من صاحباتي دبية شوي وراحت تستلف كعب أمها تحضر به عرس وتقلبت قدام الآوادم من الدرج وونست أهل العرس كله بعرض السيرك اللي سوته!!! قاموا الشلة يضحكون لأنهم عارفين انها تقصد رانية! رانية (بتكشيرة):خلنا من هالسوالف كلها.أهم شي الولد حليو يستاهل التضحية بشلتنا ومقابل وجهه24 ساعة؟؟ ولا مثل خالته شايفن نفسه؟؟؟ اسمهان:يؤبر قلبي شو ماأحلاه هو وخالته!! ++الجزء الثالث والعشرون++ وبدأت الطوابير وانتهت وكلن راح فصله...وطول الحصة واسمهان سرحانة ورايحة في خبر كان!!! ولما جاء وقت الفسحة اجتمعوا الشلة كالعادة في الكافتيريا وقاعدين ياكلون إلا اسمهان عايشة بعالم ثاني! نجلاء:سوسو مدي يدك وقولي بسم الله.. اسمهان:مالي نفس ..شبعانة. نجلاء:ليش؟اش فطرتي؟ اسمهان: ولاشي! مرام:أجل ليش ماتاكلين؟؟تحافظين على رشاقتك؟؟ عاد رانية الدبدوبة تلقفت وقالت:إكلي إكلي يمة..انتي وراك عرس لاتروحين للرجَّال وانتي نحيفة ويقول أهلها مجوعينها!!! اسمهان:مالي نفس..كلوا انتوا.. أفنان:يالمخبل منتو عارفين اشفيها؟الأخت عاشقة ومفارقة!!! رانية:ليش كفى الله الشر؟اسمهانوه تتابعين أفلام عربي؟؟..صدق انهم مجانين كل ماجابوا وحدة تحب جابوا إن شهيتها مسدودة عن الأكل!! ليش حامل؟؟؟ اسمهان:مالي نفس وخلاص..الأكل بالغصب يعني؟!! أفنان:فعلاً أنا استغرب من حكايات الأفلام العاشق دايماً يجيبونه ماياكل!ونفسه مسدودة..مع ان خبري انه الواحد لاحب أحد تنفتح نفسه على الحياة!!! رانية:اش فهمهم ها المخبل؟؟ والا اش علاقة الحُب بالبطن؟؟أذبح نفسي من الجوع عشان أعشق لي واحد؟عساني ماعشقت!! الله لايحرمنا من نعمة الأكل والشرب!! نجلاء:لاافراط ولاتفريط...لو تطاوعين نفسك دايما يارانية أفندي وتملين بطنك..أول من بيشتكي منك هالأرض اللي شايلتك!! وبهااللحظة مرت عبير العدو اللدود للشلة وكانت ناوية تستفزهم وقامت تكلم صاحباتها هالة ونادية بصوت عالي وتقول:فيـــــــــــــه ناس مخفة..يقولون إنهم بيتزوجون قريب!!ليتهم يولون ويفكونا من شرهم!! ردت اسمهان بغيظ:وفيـه ناس آثار الكف اللي عطيتهم إياه يوم الأربعاء مازال بوجوههم وشكلهم يبون غيره!!! عبير:لاااااا وروحهم معلقة باالشيون!!يتركون وحدة مثلي كل الحلا فيها ويجرون جري على مصاحب البقر!! رانية:انقلعي من قدامنا هالساعة لأطلع عافيتي عليك! عبير باستهزاء:يمه! خرعتوني!شلة عرابجة ومسويين فيها فتوة! أفنان:ماتستحين تتباهين بنفسك؟؟وانتي زارعة عشة براسك؟؟يلا درب يسد مايرد! مرام(وكعادتها هادئة نوعاًما):الخصران يقطع المصران!اخصروها وش نبي منها؟!! عبير:ماني رايحة..وأنا حرة أوقف بالمكان اللي يعجبني! عبالكم الكف اللي أخذته بيمر بالساهل؟؟!لايمكن أنا عبير وبس والباقي خس!! رانية:لا ومسوية لنفسك دعايات بعد!!طيب خذي هذي.. أنا رانية الخقاق وبأصكك بـــــ طراق!! عبير:ياشين اللقافة والطفاقة!!واي واي ثقيلة دم وعقل ووزن!! وصاحبتكم سوسو وش فيها منخشة؟!أحد مخرعها!! نجلاء:إيه مخترعة!!شافت وجه ابليس وانخشت! عاد رانية مسكت عبير من ذراعها ودفتها باستهزاء وقالت:يلا يمه روحي لقطي رزقك هناك...الساحة وسخة يبي لها كنيس!! عبير:وشهو؟؟أنا عاملة نظافة؟؟ رانية:لا السموحة! انتي القمامة بكبرها!!ضفي وجهك ترى ماحد طايق يناظر هالوجه! عبير:قاعدة لكم وعلى قلوبكم وش رايكم؟؟؟ اسمهان:ناوية الشر يعني؟؟؟؟؟؟؟ عبير:إيه ناوية الشر ياكبيرة السحرة!! اسمهان تناديهم:بنـــــــــات.. البنات:نعم! اسمهان:عليها!!!! اجتمعوا كلهم على عبير وماخلوا فيها عرق ينبض!! نتفوها تنتيف!! رانية:وخروا عنها كلكم! نجلاء:ليش؟؟؟ رانية:مشتهية أخرج طاقتي وأقعد فوقها!! اسمهان:لا وشتقولين؟؟الله يرحم والديك..أنا كان قصدي نأدبها مو نسوي لها عاهة مستديمة!!! نجلاء:ابعدي يالخبلة..انتي لوتحطين قدمك على صدرها سويتي لها تجويف بالقفص الصدري!! طبعاً البنت كانت طايحة بالأرض من الخرعة وصاحباتها من بداية الهواشة راحوا ركض لأبلة جوهرة يخبرونها حيث إن المشرفة الاجتماعية دايما غايبة ولاتحل ولاتربط كان الجميع يستعين بأبلة جوهرة لشخصيتها القوية!! ووقفت عبير وكان كل من بالكافتيريا ساكت ويراقب الموقف ووقفت وشوشتها منفوشة وأزارير المريول اللي مسويتها فوق قال كشخة يعني مفككة وحزامها مفكوك ومريولها مغبر من الأرض وحالتها هَم!! وفوق ذا كله تهدد وتتوعد:أنا أوريكم بكرة من هي عبير ياشلة الغجر ياقمامة الشوارع!!! إلا وأبلة جوهرة مقبلة..وبس شافتها عبير رمت نفسها بالأرض وسوت نفسها دايخة!!! صارت رانية تدفها برجلها وتقول:قومي لابارك الله فيك!هالحين جوهرة بتلبسنا تهمة بسبتك!! وياليتك تسوين فلس! أنا لو متهاوشة مع عبطة الغبية كان أبرك!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
((تكملة الجزء الثالث والعشرون)) وصلت أبلة جوهرة لموقع الحدث بالكافتيريا وسوت عبير نفسها مغمى عليها....وطالعت أبلة جوهرة بشلة الصاعقة بعين ضيقة وقالت: كالعادة! ماعندي شغلة بالمدرسة إلا إنتوا!!! تفضلوا اسبقوني على غرفتي..وانتم يانادية وهالة خذوا عبير وودوها تستريح بغرفتي خل نشوف وش النهاية معاكم! وبدأت أبلة جوهرة بالتحقيقات مع الشهود اللي بالكافتيريا والجميع اتفقوا إنه عبير هي اللي استفزت البنات وبدأت بالغلط...وفوق هذا كله تمثل إنها مغمى عليها!!!(وطبعاً الشلة كان لهم شعبية كبيرة بالثانوي عشان كذا أغلب المواقف يطلعون منها مثل الشعرة من العجين!!!؟؟) طبعا بنفس الوقت كانوا البنات كلهم مجتمعين بغرفة أبلة جوهرة ينتظرونها تجي ودار بينهم الحوار التالي: عبير كانت متمددة على الكنبة ومسوية نفسها دايخة!! نجلاء:قومي لابارك الله في البكش اللي تسوينه تقولون بريعصي مبخوخ بـــ فليت!! مرام:ياست عبير..ترى أبلة جوهرة ماهي غبية لذيك الدرجة عشان تصدق حركات الأفلام اللي قاعدة تسوينها! عبير:خليها تشوف بعينها حسدكم وغيرتكم مني كيف خلتكم تسوون فيني!! اسمهان:بالله ماتستحين وانتي تقولينها؟أي حسد وأي غيرة؟؟نغار من مين؟ولا نحسدك على إيش..طاح حظك!! عبير:إسألوا أعماركم! رانية:أقول ياشين الغنج على الحمير العرج!مو لايق..مو لايق عليك الدلع أبد والتمايع...لعنبوابليسك هذا صوت؟؟ تقولون دجاجة مختنقة؟؟؟؟ أفنان:لاتتعبون أنفسكم الحكي معاها ضايع! إلا أبلة جوهرة داخلة الغرفة عليهم وقامت عبير وسوت نفسها مغمى عليها ...أما أبلة جوهرةجلست على مكتبها وقالت:خير؟؟ياوجوه الخير! يحلالكم دايماً تطلعون لنا بشغلات جديدة!!لاحيا ولامستحى!تحسبوني فاضية لكم ولأفلامكم؟؟عندنا موجهات..المفروض بعد اللي سويتوه أحولكم على المديرة وأفتك!لكن للأسف المديرة عندها ضيوف من مكتب التوجيه ومو ناقصة بلاويكم!! رانية:والله هي اللي بدت..وتستاهل ماجاها!! أبلة جوهرة:انتي بالذات تنطمين ولاكلمة!!ماشاء الله لك سوابق مُشرفة بالهواش والطق!! ودي بس تطلعين برة المدرسة وتقرأين اش مكتوب على اللوحة هل هي المدرسة الثانوية للبنات؟؟او للأولاد؟؟ رانية:أكيد مكتوب للبنات! أبلة جوهرة:الحمدلله..ومادام عارفة ياروح أمك ليش كل يوم مخترعة لنا أحداث سينمائية جديدة؟؟ انتي مافي يوم يمر عليك عادي؟؟؟كل يوم مسوية لنا فيديو كليب؟؟ رانية(تنكت!!):والله ماشاء الله عليك.. ثقافتك فضائية ستالايتية ياأبلة جوهرة!!! أبلة جوهرة:لااااا وتنكتين بعد ياالنسرة؟؟ زين اوقفي لي على هالجدار ولاأسمع لك حِس!! والتفتت أبلة جوهرة لعبير وقالت:انتي يابنت !!قومي فزي وخلك من الهبال اللي انتي فيه!! وعبير أبد عايشة الدور ومرمية على الكنبة ونادية وهالة ساكتين كالعادة ..ولاكلمة.. تنابلة السلطان!!!! أبلة جوهرة:شمروا كمها يابنات..عندي إبرة ولازم أغزها بيدها! مفيدة جداً للدوخات اللي مثل هاذي!! إلا عبير نطت من الخرعة وقالت:لا ماأبي إبرة!!أنا زينة! أبلة جوهرة:عجيـــــــــــــب!! أشوفك فزيتي مثل العفريت!يعني مافيك إلا العافية؟؟؟ والتفتت أبلة جوهرة لاسمهان وقالت:هااااه ياعسل ماأبي أسمع السالفة إلا منك انتي! وش صار بالضبط؟؟ استحت اسمهان ورخت راسها! رانية:أي عسل؟؟هي اللي قالت لنا:يابنات هجووم!! اسمهان:كذابة!!ماقلت هجوم! قلت:يابنات..عليها!! أبلة جوهرة:ماشاء الله عليكم!كالعادة كل وحدة تكذِّب الثانية!!نِعم الصحبة! شوفوا أنا عرفت كل شي من البنات اللي بالكافتيريا وماعندي استعداد أصدِّع راسي بسوالفكم!عشان كذا أنا أقترح عليكم مادام فيكم طاقة للمناقر كل ساعة..استغلوها بشي مفيد أحسن!! نجلاء:شلون مافهمنا؟؟ أبلة جوهرة:من اليوم ورايح..راح أقسمكم وأعطيكم مسئوليات وخل نشوف انتم قدها ولا لا؟؟ أفنان:وإن ماوافقنا؟؟ جوهرة:وإن ماوافقتوا..فاسمحولي أقول إنكم جبتوه لأنفسكم لأن العقاب راح يكون 3 أنواع_كتابة تعهد مع نقصان بعلامات السيرة والسلوك+ تهزيء خاص لكم بالطابور+استدعاء لأولياء أموركم!! رانية:تكفين أبوس إيدك بلاش أولياء الأمور!! أفنان:يوووه أنا أبوي ماعنده تفاهم!!بغيت أروح فيها وأنا مظلومة أيام سالفة جرس الانذار!!!! أبلة جوهرة:إذن تقبلون بعرضي؟؟ البنات من غير تفكير وبصوت واحد:موافقـــــــــــين!! عبير:إذا بالمسئولية اللي بتعطيني إياها شي يُخل ببريستيجي..فاسمحي لي أقول لك مو موافقة!!! أبلة جوهرة:عاد انتي بالذات ياأم بريستيج أول وحدة بتتعاقبين!!لأن الخطأ راكبك من راسك لرجولك!!استفزاز+كذب+تمثيل..وش بتسوين أكثر بعد؟!! رانية انتي بتشتغلين بايعة بالمقصف!! نجلاء وأفنان انتم بنات نظام!مرام انتي تساعدين أمينة المكتبة بأوقات الفراغ..... أما انتي يااسمهان فــــ لك شغلة عندي خاصة!! وان شاء الله تعجبك!! تتوقعون اش راح تكون؟؟؟؟؟؟؟؟ |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزء الرابع والعشرون** طبعاً أبلة جوهرة طلبت من الكل الخروج من الغرفة ماعدا عبير واسمهان.. وقالت لعبير:مهمتك ياعبير إنك تساعدين أم سالم الفرَّاشة لمدة أسبوع في نقل بضاعة المقصف من عند باب الحارس للمقصف و عدها!!! عبير:هذا اللي كان ناقص!أنا أساعد الفراشَّة؟؟ أبلة جوهرة:واشفيها الفرَّاشة؟ماهي بشر؟؟ وبعدين كرماً مني طلبت منك هالشغلة لمدة أسبوع واحد بس! بس بغيت أوريك كثر إيش الغرورتارس قلبك! وبالرغم من ذلك مافيك طب!! عبير:طبعاً لايمكن أوافق لاأسبوع ولايوم!تختارين لي أخس شغلة وهم تعطينهم شغلات زينة؟؟؟ واسمهانوه وش بتخلينها؟مساعدة المديرة؟؟؟ أبلة جوهرة:حبيبتي شغلي عقلك!أنا مو قاعدة أوزع وظايف!! خلاص فكينا ماأبي منك إلا شي واحد! تعتذرين لاسمهان!! عبير:إييييييييش؟ شغلي مع الفراشة أهون من إني أعتذر لهاذي!!! أبلة جوهرة:ياساتر يارب..تفضلي روحي لفصلك ومن بكرة أشوفك مع أم سالم! طلعت عبير وبقيت اسمهان وجوهرة..وسارت جوهرة تتأمل اسمهان بشغف واسمهان منحرجة مرة!!! جوهرة:خسارتك يااسمهان مع هالشلة! اسمهان:لاااا حرام تقولين عنهم كذا!والله لو تعرفينهم زين بتحبينهم! جوهرة:ومين قال لك إني ماأحبهم؟! أنا لو ماأحبكم ماكان تغاضيت عن تصرفات كثيرة تسوونها! صح إنكم تغلطون دايما..بس اللي يصبرني عليكم إنكم أحسن من بنات كثير غيركم..سمعتهم سيئة وأخلاقهم منحطة!لكن انتوا تصرفاتكم مجرد تصرفات طايشة مافيها نضج! اسمهان:الحمدلله....بس أنا اش مطلوب مني؟؟ أبلة جوهرة وهي تناظر بالأرض:الحقيقة انتي أدرى بأبلة منيرة المشرفة الاجتماعية.غيابها كثيربسبب ظروف عائلية وأنا ماسكة شغلها وشغلي كمراقبة بالاضافة لشغلات بالادارة وانتي بصفتك بصف أدبي حصص الفراغ عندك كثيرة+ وقت الفسحة فياليت تجين تساعديني!!وعلى فكرة هذي مو رغبتي لحالي!! هذي رغبة ناس عزيزين عليك!! اسمهان بخجل:مين تقصدين؟؟ جوهرة: انتي ذكية وتفهمين!مايحتاج أَوَضِح!ومن بكرة بأنتظرك!! اسمهان بفرح:من عيوني!!! راحت اسمهان الفصل وكانت الحصة بدأت من وقت...بعد الحصة تجمعوا حولها الشلة وقالوا:هاه؟بشري اش صار معك؟؟ اسمهان:أبشركم صرت مساعدة لأبلة جوهرة وقت الفراغ!! رانية رفعت يدها وقالت:أنا أحتج!!هذه ترقية موب عقاب!!بس على قولة المثل:يابخت مين كان المدير خاله!! اسمهان:هاااه؟بدينا بالحسد؟؟ رانية:أجل أنا تخليني بياعة؟؟لو قايلت لي ساعدي الفراشة أبرك!! اسمهان:مو هالشغلة خلتها لعبير! الشلة بصوت واحد:هههههههههه أفنان:أحسن قدرها!! بس والله كاسرة خاطري ام سالم شلون بتتحمل عبير؟؟؟ مرام:تصدقون لو تأملنا وضعنا كان لاحظنا إنه أبلة جوهرة كل اللي تبي توصل له إنها تبعدنا عن بعض أطول فترة ممكنة..صح؟؟؟؟ نجلاء:يحق لها تشتري راحة بالها! رانية:حريمتها!! من اليوم ورايح بأبدأ أخطط مقالب لين ماأهججها من المدرسة!! نجلاء:قصدك هي اللي بتهججك من المدرسة! وعاد حليني إن كان فيه مدرسة رضت فيك وانتي ملفك كله تعهدات!! إلا إن كان بالرشوة! اسمهان:ياويلك يارانية!تسوين شي يضرني حرام عليك لاتخربين علي! رانية:الحمدلله والشكر!لاقية لك صيده!إنتي وذا الوجه؟؟إن طار عبدالرحمن..بيجيك ألف غيره!وش عليه طايرة؟؟؟؟؟ اسمهان:لا..كذا بأقلب الموجة..وامسح بك المدرسة!لاتنسين إني سرت مقربة من أبلة جوهرة! رانية:مالت عليكم الثنتين!! وبهاللحظة دخلت معلمة التاريخ تعلن عن حصة جديدة.......ومرت الحصص إلى ان انتهى الدوام وكانت أم عبدالرحمن اتصلت على أم اسمهان وبعد السؤال عن الأحوال قالت:شلون عروستنا؟ أم اسمهان:الحمدلله..بأتم حال. أم عبدالرحمن:وكيف انطباعها بعد ماشافت العريس؟؟ أم اسمهان:نفس انطباعه يوم شافها!! أم عبدالرحمن:من ناحية انطباعه فهو طاير فيها حيل وهذا اللي خلاني أتصل وأشوف وش صار معكم...لأنه الصراحة حنا مستعجلين على الملكة ولدنا وده يزورها ويكلمها اليوم قبل بكرة..بس ننتظر تحديدكم ليوم الملكة. أم اسمهان:الحقيقة لسة ماتناقشنا أنا وأبوها بهالموضوع! أم عبدالرحمن:تكفون عجلوا!لأن بنتي أحلام مع زوجها بأمريكا ولازم نعطيها خبر من بدري ترتب نفسها وتجي..وأولادي الثانيين موظفين بمناطق ثانية يبي لهم وقت عشان يطلبون اجازات! أم اسمهان:حتى ِحنا لنا أقارب كثير خارج جدة ولازم نعطيهم خبر قبلها بوقت...بس أوعدك إني أكلم أبوها اليوم ونشوف كيف الوضع.. أم عبدالرحمن:لاتبطون علينا الله يعافيكم.. ام اسمهان:ان شاء الله... بعد ماقفلت أم اسمهان السماعة قالت لبنتها ابتسام السالفة...وكان الأب لسه مارجع من العمل وشوي واسمهان راجعة من المدرسة وبادي عليها التعب سلمت على أمها وابتسام وجوا حولها (هيفاء وسارة)بنات أختها ابتسام وصاروا يصرخون نبغى حلاوة نبغى حلاوة!! اسمهان:بالله فارقوني! ماجبت لكم شي!خل أبوكم يشتري لكم! ابتسام:على وين رايحة.. اسمهان وهي طالعة الدرج:على وين يعني؟على غرفتي تعبانة وودي أنام. ابتسام:تغدي معانا على الأقل! اسمهان:مالي نفس! ابتسام:طيب اجلسي معي..وأنا اللي من يوم جيتكم قاعدة أتمنى أجلس معك..لكن أبد كل يوم ترجعين من المدرسة تنامين بالنهار وتذاكرين بالليل..ترى أنا مسافرة الجمعة!!! أم اسمهان:يظهر إنها ماودها تسمع آخر الأخبار! اسمهان:وش أخباره؟؟؟ أم اسمهان:أم عبدالرحمن اتصلت فيني! اسمهان بلهفة:وش قالت؟؟ ابتسام:أشوف دبت فيك العافية! الأم تضحك ههههههه... اسمهان:هااااه يمة! علميني وش قالت؟؟؟ الأم:تقول متى بتحددون موعد الملكة؟ اسمهان:وانتي اش قلتي لها؟؟ الأم:قلت لها نشاور أبوك ونشوف وش يقول..ولو إنه أكبر ظني إن أبوك بيخلي الملكة مع الزواج السنة الجاية مرة وحدة لماتتخرجين من ثالث ثانوي!!! اسمهان بانفعال:لاااا والله!!! على كيفه يأجل الزواج أنا صاحبة الشان وأنا اللي أقرر!!! الأم:قطيعة بهااللسان! مين قال إنك صاحبة الشان؟أبوك وحده هو اللي له الكلمة الأولى والأخيرة بالموضوع..انتي موب دافعة من جيبك شي!!!! ابتسام:يمة من طفاقتك! كل هذي خرعة على الزواج؟؟؟واش بتلاقين فيه ياحظي؟؟خلك عزوبية أحلى لك!!!!!! اسمهان:وشفيكم علي؟أنا أبي أعبر عن رأيي بصراحة...ماأبي ملكة وعقبها بكم يوم زواج مثل ماسويتوا مع أسماء وابتسام!أبي فترة ملكة طويلة!! الأم:أدري فيك خفيفة..وودك بالمكالمات والزيارات!! ابتسام:ولاتنسين الهدايا!! بس معاها حق يمة إحنا كان أبوي مشدد علينا حبتين بس يمكن على اسمهان الوضع يختلف! ليش إنها آخر العنقود! اسمهان:يمة تكفين..كلمي أبوي اليوم عن الملكة خل نشوف وش يقول!! الأم:اطلعي نامي اطلعي! بنات آخر زمن! يتشرطون بكل شي الوحدة مدري وش عليه طايرة..على بالهم العرس دق وطبول وبس!! ........ولما جاء أبو اسمهان فتحت الأم معاه الموضوع لكنه كان معند شوي إنه الملكة تصير بدري وبالفعل قال:خلها السنة الجاية بعد ثالث ثانوي!! أم اسمهان: وليش نأخرها؟؟ أبو اسمهان:إلا ليش نقدمها؟؟ودك بالفكة من بنتك؟ ماورانا طرادة!!! خل البنت تاخذ شهادتها وعقبها يصير خير!! أم اسمهان:يعني هذا آخر ماعندك؟؟أكلم أم المعرس وأقول لها؟؟ أبو اسمهان:إيه!! وبالفعل راحت أم اسمهان وكلمت أم عبدالرحمن اللي قالت:وليش ياأم اسمهان تأخرون الملكة بعد سنة وشهور؟ خير البر عاجله يابنت الحلال! أم اسمهان:تدرين البنت صغيرة وماإحنا مستعجلين عليها خلها تآخذ شهادة التخرج من الثانوي بالأول!! أم عبدالرحمن:وولدنا كبير..ومل من الانتظار..ونفسه يستقر اليوم قبل بكرة..وإن كان على الدراسة ترى ماإحنا حارمينها منها..تدرس على كيفها حتى لو فكرت بالجامعة ماحد بيقول لها لا!! أم اسمهان:والله مدري اش أقول لك..بس هذي رغبة أبوها!! أم عبدالرحمن:أبوها خليه علينا! عبدالرحمن وده يجيكم هو وأعمامه عشان يتكلمون بالتفاصيل هالأسبوع!!!!! أم اسمهان:الله يحييهم...إذن خل عبدالرحمن يتصل بأبونا ويتفق معاه على الموعد! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزء الخامس والعشرون** طبعاً اسمهان بعد الحوار اللي دار بينها وبين أمها وابتسام طلعت غرفتها عشان تنام..ولكن هيهات يجي النوم عقب ماشمت ريحة تأخير للملكة والزواج لين السنة الجاية!!!! قلبها تعلق حيل بولد الناس!!وصارت تبني آمال وأحلام وأشواق//على فكرة ترى هذي مو أسماء بنات!هههه و...اتصل عبدالرحمن على أبوها وعبر عن رغبته بزيارتهم مع أعمامه والأب مالقى منهم مفر فقال:الله يحييكم!! واتجه بعدها لأم اسمهان وقال:ترى الجماعة اتصلوا فيني وودهم يزورونا وأنا قلت تفضلوا عندنا الأربعاء وشكلنا بنخليها عزيمة عشاء! أم اسمهان:طيب..ولو طلبوا تكون الملكة في الاجازة الجاية بتوافق؟؟ أبواسمهان:وليش هاالسربعة؟؟ كل تأخيرة فيها خيرة!! أم اسمهان:ومادامك مبيت النية..إنك تأخر الملكة أجل على أي أساس عجلت الشوفة؟؟؟؟وإنت تدري إنه الولد بعد مايشوفها بيتعلق فيها؟؟؟وتبيه يصبر هالمدة كلها؟؟ لايمكن!!! والبنت بعد أنا جاسة نبضها وشكلها مستعجلة هي الأخرى!!! أبو اسمهان:ماشاء الله!قيس وليلى على غفلة!!أنا مدري اش اللي عماني على عيوني وخلاني أوافق عليه بسرعة!!البنت بعدها صغيرة..ابتسام وأسماء قبلها زوجناهم يوم كملوا دراستهم..والمفروض إن بنيتنا اللي هي آخر العنقود نكون أحرص عليها ومانزوجها إلا لاضمنا شهادتها بيدها!!!على الأقل الثانوي!! أم اسمهان:ياولد الحلال إنت لاتعقد المسائل!أنا أشوف إننا نملك بأقرب فرصة والزواج نخليه بعد سنة تكون البنت تخرجت من الثانوي..ويادار مادخلك شر!! أبواسمهان:أخاف رجله كل يوم توطوط بيتنا بعد مايملك على البنت!!وأنا ماأحب هالسوالف!! أم اسمهان:ماعليك..مع الوقت بيعرف طبعنا وبتكون زياراته محدودة..هذا شي مقدور عليه..إنت بس خلك في المهم وخلنا نعرف كيف نرتب أمورنا..لنا أكثر من خمس سنين مافرحنا!!تتذكرأيام زواج محمد واسماء وابتسام؟؟على كثر ماتعبنا وحِنا نجهزللبنات ونأثث لمحمد..إلا كان لها طعم خاص!! أبواسمهان:صادقة ياأم محمد..إذن على بركة الله لااستقبلتهم يوم الأربعاء...بأشوف وش بيقولون وبعدها أسايرهم وأقول لهم شلون نتمم المسائل. وفرحت أم اسمهان يوم لان راس الأب شوي وراحت تبشر ابتسام..وشوي ونزلت اسمهان وكان الوقت عصربعد ماالنوم جافى عيونها!!! شافتها ابتسام وقالت:غريبة؟؟ليش مانمتي لهاالحزة؟؟؟؟ اسمهان:فكرت بكلامك..وقلت مايسيرتُمر الأيام وأنا ماجلست معك!!!! أم اسمهان:اللهُ أكبر!!صدقناك! إلا جاية تتطمنين عن آخر الأخبار يا السوسة!!! ااسمهان:ووين المشكلة؟؟لاعيب! ولاحرام! من حقي أتطمن على مستقبلي!! ابتسام حبت تقلق ابتسام وقالت:أجل بأقول لك بكل صراحة ترى أبوي ماراقت له فكرة الملكة الحين وعصب وصمم يلغي هالخطبة من الأساس!! اسمهان:لا..لا..لاتقولين..وقامت دموعها تقطر!! وبعصبية قالت:وشفيكم علي ماودكم أفرح حالي حال البنات؟؟انسان وجاء خطبني وعجبكم..أجل ايش تنتظرون؟؟ أم اسمهان:استغفر الله..هالكلام اللي تقولينه أتمنى تجيك جرأة وتقولينه قدام أبوك لو مرة!!وش قلة الحيا فيك؟؟وميتة على الزواج ليش؟انتي بعدك صغيرة!والعادة الوحدة تتحمس لاكانت راعية بيت شاطرة وطباخة وتجمل..لكن انتي مانتكل عليك تقطعين سلطة!ولو دخلتي المطبخ ماتدخلين إلا عشان تسوين حلى ومرة تصيب وعشر تخيب!! اسمهان:انتم عندكم الحياة الزوجية شغل و طبخ ونفخ وبس!! ابتسام:طيب نورينا بخبرتك وعلمينا وشهي نظرتك لمفهوم الحياة الزوجية..يادكتورة؟!!! اسمهان:الحياة الزوجية..حب وتفاؤل وتضحية ومودة وعواطف وعطاء... ابتسام:وكم دبدوب وشموع معطرة وورد أحمر؟؟مو كذا؟؟هذا اللي انتوا فالحين فيه..من بره الله الله ومن جوه يعلم الله!! اسمهان:وش المشكلة لاكانت الوحدة رومانسية وشاعرية... ابتسام:لأنه الرومانسية اللي كلها شكليات خارجية ماتوكل خبز ياماما!!!المفروض الوحدة تزين داخلها أول..وتحرص تكون شاطرة بكل شي بشغلها ونظافتها وطبخها وواجباتها الاجتماعية مو بس أناقتها!! اسمهان:الصراحة ومن غير زعل..كلامك بأسمعه من إذن وأطلعه من الثانية!لأني مااعتبرك انتي واسماء نموذج مثالي أقتدي به!!! أم اسمهان:والله طالت وتشمخت!!بعدك مافقستي من البيضة..ولسانك ياطوله!!أجل لاتزوجتي بتشوفين نفسك علينا ولاتحترمينا!! أجل اسمعي ماراح أقول لك أي شي دار بيني وبين أبوك عن موضوع خطبتك..يوم الأربعاء الجاي تعرفين كل شي بنفسك!!! بعد الحوار اللي دار بين اسمهان وأمها وأختها ابتسام...راحت الأم للمطبخ..ونطت اسمهان بحلق ابتسام وسألت بفضول:هو إيش اللي بيسير يوم الأربعاء بالضبط؟؟؟؟ ابتسام:ماني قايلة!! اسمهان:ياشيخة قولي تكفين!لايكون بيسوون ملكتي وأنا آخر من يعلم؟!!ترى أبوي دقة قديمة وتطلع عليه طلعات أحياناً!!!!!!!! ابتسام:أنا تسمعين كلامي من إذن وتطلعينه من الثانية؟؟؟أنا واسماء ماتعتبرينا نماذج تقتدين فيها؟؟أجل موتي بحسرتك وماني قايلة لك شي! اسمهان:مع السلامة!!الخبر اللي اليوم بفلوس..بكرة بيصير ببلاش!!! .......ومرت أحداث اليوم مامن جديد.. وبعده الأسبوع كله كان ثقيل وكئيب بعد ماتفرقت شلة الأنس وصار كلن مسئول عن شغله.. جاء يوم الأربعاء...ورجعت اسمهان من مدرستها للبيت ولقت أختها ابتسام بالمطبخ تسوي صواني حلى..والشغالة كاتيا تنظف مجلس الرجال..والأم تجهز الغداء.. اسمهان:وش السالفة ياجماعة؟أحد معزوم عندنا للغداء؟؟؟؟ الأم:لا...عندنا ضيوف على العشاء.. اسمهان:مين؟؟؟؟ الأم:خطيبك وأعمامه! اسمهان:يووووه ليش؟؟لاتقولين بيعقد علي الليلة؟ والله ماأوقع بالدفتر إلا بيوم الملكة!!! الأم:الله يخلف عليك بس!زين من أبوك تحنن علينا ورضى يقابلهم..وانتي تقولين بيعقد عليك عقد؟؟.....السالفة كل أبوها لمناقشة التفاصيل بس!! اسمهان:وأمه موب جاية؟؟ الأم:ماعزمناها..لأنها قالت لنا ان عبدالرحمن وأعمامه جايين بس..فالسالفة رِجال بس. ........وطلعت اسمهان تطق النومة لين المغرب ولما صحت وتشطفت وتلبست ونزلت بعد المغرب للصالة تحت لقت سماح وأسماء حضروا وابتسام وأمها قاعدين معاهم والبزران يسرحون ويمرحون حولهم,,, سلمت على الجميع....وقالت سماح: الله الله ياعروس..قربنا نفرح ونلتم بمناسبة سعيدة!! اسمهان:وانتي اش دراك؟؟ سماح:أجل ضيوف اليوم على بالك ليش جايين؟؟ اسمهان:مازلت أقول اش دراك؟؟ سماح:محمد أخوك قال لي.. ودقائق ووصلوا الرِجال واستقبلهم محمد وأبوه وأزواج أخواته..... والحريم قاموا ركض على شباك الصالة يبون يشوفون المعرس!!! وصارت سماح مزاحمة اسمهان على الشباك ويتضاربون ويدفون بعض قالت اسمهان بغيظ: إنتي اش لك يالملقوفة تبين تشوفين خطيبي؟؟؟ سماح:ودي أشوف مين أحلى هو ولا أخوي تركي؟ اسمهان:حتى لو كان تركي أزين تحسبيني بأرفض عبدالرحمن وأوافق عليه؟؟؟؟؟هذا المستحيل بعينه!!! سماح:استغنيتي ياالنسرة؟؟؟ ماعِفتيه إلا يوم جاك غيره!!بس ماعليه بأدور وحدة من صديقاتك وأخطبها له! اسماء:وش تبين فيهم؟؟تراهم نفس العَيِنَة اللي قِدامك!!!! وقام الكل يضحك عليهم.......ودخلوا من سالفة في سالفة.. وقالت أسماء:بمناسبة وجود أختي ابتسام..أبي ألحق عليها قبل ماتسافر وأعزمكم عندي بكرة(الخميس)! سماح:لا ياحلوة مو على كيفك!أنا ومحمد خططنا قبل لانجيكم إننا نخلي عزيمتها عندنا بكرة! أسماء:أنا سبقتك بالدعوة.. إذن أنا أحق بالزيارة! الأم:لا يمة أنا أشوف نجتمع عند سماح أفضل..بيتها أكبر وعندها شغالة تساعدها ومحمد ولدنا مانستحي منه ولنا مدة مادخلنا بيتهم! لكن انتي حامل وماعندك شغالة وماودنا نتعبك.. نجيك بمرة ثانية.. وبعد الأخذ والعطا وافق الجميع إنه جَمْعَة الخميس تكون ببيت محمد وسماح.. وفي الطرف الثاني كان يدور حوار ساخن بين أب اسمهان والعريس وأعمامه الثلاث اللي اتفقوا في النهاية إنه الملكة تكون في العطلة الجاية اللي بتكون بعد 3 أسابيع!! وحطوا دفعة من المهر اللي كان عبارة عن 50 ألف ريال..وهم حطوا 25 ألف والباقي قالوا نكمله لكم يوم الملكة وعقد القران.....وبدأوا يسألون الأب إن كان عنده أي شروط بتنكتب بالعقد..لكن الأب حس بحيرة لأنه ماسبق تناقش مع أم اسمهان بالموضوع!!فاستأذنهم لحظات وجاء لصالة الحريم يسأل اسمهان وأمها عن رغبتهم بأي شروط!! قالت اسمهان بزعل:يعني ضحكتوا علي؟وجبتوا مملك اليوم؟؟ماني موافقة!! أبو اسمهان:أي مملك؟وأي هم؟؟لسه بدري!قولي واش هي شروطك وخلصينا! أم اسمهان:أهم شي يكون لها بيت شرعي مستقل. أبواسمهان:ياسلام!!قمتوا تغيرون كلامكم ؟من البداية الولد قال لكم إنه عايش مع أمه! أم اسمهان:ندري..بس اللي نقصده ببيت مستقل يعني إنها ماتشاركها بنفس الدور..تكون مستقله عنها..... الأب:وغيره... ام اسمهان: لو حبت تكمل دراستها مايمنعها! اسمهان (بسذاجة):يمه وشهوله الدراسة مادام عندي زوج يصرف علي؟؟؟ الأب(بعصبية):وحِنا ياقليلة الحيا موب قاعدين نصرف عليك؟؟؟؟؟ اسمهان(بارتباك):إنتوا الخير والبركة..قصدت ماله داعي شرط الدراسة! الأب:آهااااا! هذا اللي كنت خايف منه! أول ماتتزوجين بتضربين عن الدراسة؟ ولكن بأقول لهم الملكة هالحين والزواج لاتحلمون يتم إلا بعد ماتتخرج من الثانوي! ام اسمهان:ونعم الراي..وماعندنا شروط اضافية. ورجع الأب للمجلس وحدثهم برغبته ووافقوا بعد تردد....... أما اسمهان قعدت تقطر عيونها وتقول: ليش تخلون الفترة مابين الملكة والزواج سنة وشهور؟؟؟ مسكتها سماح وقالت:يالهبلة! أحسن لك!ترى أروع فترة في الخطبة هي فترة مابعد الملكة!زيارات ومكالمات ووناسة!!!! أنا وأخوك محمد الفترة اللي كانت بين ملكتنا وزواجنا 7شهور بس..وتمنيت لو إنها سنين! أسماء:مادام الملكة بتكون في الاجازة الجاية(اجازة الربيع) إذن مابقى شي كلها كم أسبوع وتبدأ العطلة..أنا من رأيي نبدأالتجهيزات من الحين!! الأم:وياليت ياابتسام تمددين قعدتك عندنا لين الاجازة.....وتساعدينا..... ابتسام:ياليت بيدي..بس ماأظن زوجي دوامه بيبدأ هذا السبت.. اسماء:وش تبين فيه؟خله يولي! يرجع هو لبيته وإنت اقعدي معنا! ابتسام:لا صعبة..ومين يقوم بأموره وطلباته لازم أسافر معه وانتوا بأجيكم من أول الاجازة. اسماء:والله ماندري مين اللي لازق بالثاني؟انتي ولا هو!! سماح:شوفوا ياجماعة..قاعة المِلكة خلوها علي أنا ومحمد...بندور لين نلقى أحلى قاعة تليق بالمناسبة لاتشيلون هم. اسماء:والكوافيرة احجزوها من هالحين يمه! أخاف ماتلقون حجز بعدين لأنه المشاغل بالعطلة موسم وبتكون زحمة. الأم:مو لما نحدد موعد الملكة بالأول؟! خلاص ياسماح كلنا نثق بذوقك لالقيتي قاعة مناسبة بعدها بيسهل علينا كل شي.. ابتسام:فعلاً إذا انحجزت القاعة بعدها كل شي بيكون هين.. سماح:أنا أقترح تكون القاعة بفندق..أوجه وأجمل وأكشخ وأريح....وكل شي موجود (الكوشة+الدي جي +العشاء+العصيرات+و....الخ)يعني مايحتاج نجيب شي من برة......إلا ضيافة الطاولات... اسماء:أما ضيافة الطاولات خلوها علي..أعرف محلات ممتازة.. اسمهان:والمطربة مين بتكون ياترى؟؟؟؟ الأم:الله لايجعلنا من قوم الطرب وأهله!!بنجيب فرقة تطق بدفوف بس!الالات موسيقية ممنوع! اسمهان:مو مشكلة! المهم يكون طقهم طق عالي على مستوى..يحييون الملكة!! اسماء:لا من ناحية يحييون الملكة انتي لو تعزمين ربيعاتك لحالهم بس ..بيسوون لنا دجة ماصارت ولااستوت!! واسأليهم عن الطقاقات أتوقع لهم خبرة فيهم منقطعة النظير! ابتسام:ههه.ليش تقولين كذا ياأسماء؟انتي تعرفين صديقات اسمهان؟؟ اسماء:وهل يخفى القمر؟؟ شلة مُهرجات متنقلة!!أنواع التحشيش والضحك والخبال!!! اسمهان:اقضبي لسانك رجاءً..صديقاتي ماأحب أحد يقول عنهم شي! لو انهم عصبيات ونكديات كان عجبوك!! اسماء: ياشيخة طيري!!هالشلة قابلتهم بكذا مناسبة وعندنا بالبيت ونظرتي لهم ماتتغير طول الوقت فلَّة وتهريج!مدري متى بيعقلون! ام اسمهان:خلونا من كل هالكلام..أهم شي ملابسنا..نسويها تفصيل ولا نشتري جاهز أحسن؟؟ ابتسام:يبي لكم من هالحين تبدأون تفصلون لإننا مقبلين على موسم أكيد الخياطات مضغوطات..ياإنهم مايقبلون يخيطون لكم..ياإنهم يقبلون ويفشلونكم مايسلمون لكم اللبس على الموعد!!!!! اسماء:أنا عن نفسي بأشتري جلابية جاهزة وألبسها..يعني من زين هالملكة؟؟ولا من زين هالعروس؟؟ وتغمز بعينها وتأشر على اسمهان!! اسمهان:أي جلابية ياأم جلابية؟؟؟نقص بعد تحطين على راسك شيلة وتلبسين رشرش!!!! أنا بأعزم كل صديقاتي..وأبيكم كلكم تكونون من أكشخ مايمكن! اسماء:حبيبتي أنا حامل...وكرشتي هالكبر!وش تبيني ألبس فستان ساتان؟؟ولا استريتش؟؟ سماح:ياحليلك يااسماء...فساتين الحوامل أكثر من الهم على القلب..طبي وتخيري... وازداد النقاش بينهم عن مختلف المواضيع المتعلقة بالملكة...وقطع حديثهم صوت الأب وهو يقول:جهزوا العشاء بسرعة! وبعد ماحطوا العشا وتعشوا الضيوف وتعشوا أهل البيت...راحوا الضيوف.... وكمل الجميع سهرتهم....... محمد:مبررررررروك يااسمهان...والله وقربنا نفتك منك.مثل ماافتكينا من اسماء!! اسمهان:لاتستعجل..باقي على الفكة مني أكثر من سنة!! أما اسماء ولاكأننا افتكينا منها..كل يوم والثاني وهي مسنترة عندنا!!! اسماء:وقاعدة على قلوبكم لين ماتفطسون!!وش رايكم؟؟ وأزيدك من الشعر بيت ياحمود..بكرة كلنا معزومين على العشاء ببيتك! وش بتعشينا؟؟نبي عشوة راهية!!! محمد:الله يحييكم جميع......أنا قد عزمت أبوي وأزواجكم..وهالحين بأعزمكم انتوا وأقول حياكم الله عندنا بكرة....... وتنقلوا من سالفة لسالفة..... محمد:فاتك منظر العريس ياسمهونة يوم قال له أبوك الزواج عقب ماتتخرج البنت من الثانوي!!مسكين!رحمته!حسيته بيطب ساكت من ثقل الصدمة ههههه!مدري وش عليه مستعجل؟؟؟بلاه ماجرب يقعد معك ساعة والا كان جاه جميع أنواع الأمراض المزمنة والمستعصية!!ههههههه اسمهان(وهي تناظر بتشمت لاسماء):ياشيخ لاتفاول ..هذا زوج أختك اسماء له 5 سنين معها ومازال يمشي على رجوله!!!!!!! وانفلت الجميع يضحك...... اسماء:ماشاء الله..صايرة كورة بملعبكم انتوا الاثنين كل واحد يرميني بجهة!!مايخالف!الله يسلط عليك سماح يامحمد! محمد:مايحتاج تدعين علي..سماح مسلطة علي خلقة ههههه!!! سماح:ياليت أقدر!! اسماء:ويبلاك يااسمهان بأم زوج تنشب لك بحياتك نشبة ماهي بصاحية!!!!! اسمهان:أبوس ايديك بلاها هالدعوة!!! واستمرت السهرة ضحك بضحك واسترجاع للذكريات إلا أن راح كلن لبيته.... &الجزء السادس والعشرون& جاء اليوم التالي وكان يوم الخميس ومثل ماشفتوا بالجزء الماضي انهم معزومين بهاليوم عند سماح ومحمد..... وفي الظهر اتصلت سماح على أم زوجها(أم محمد) ودار بينهم كلام وهذا جزء منه.. سماح:حبيت أعطيكم خبر ياأم محمد ترى عزمت الوالدة وأختي هند عندي ووحدة من جماعة أمي وساكنة قريب مني ودايماً توصيني وتقول بالله لاجت أمك عندك ياسماح كلميني!!! عاد مو تتأخرون تعالوا بعد المغرب...... أم محمد(اللي هي ام اسمهان):ان شاء الله يابنتي ولاتكلفين على نفسك.... سماح:مافي أي كلفة وحِنا أهل...بانتظاركم.. وبدأ الاستعداد للطلعة من العصر كلن لاهي بعمره اللي يسشور شعره واللي يلبس واللي يتحمم وعلى صلاة المغرب كانوا الكل جاهزين..صلوا وانطلقوا لبيت ولدهم محمد..... ودخلوا على سماح,, وأسماء كانت وراهم على طول واستقبلتهم سماح بحفاوة كعادتها...الرِجال استقبلهم محمد بمجلس الرجال...والنسوان استقبلتهم سماح وكانوا أهلها لسه ماحضروا.. فدخل محمد يسلم عليهم ويقعد شوي معاهم وقعدت ابتسام تتأمل بالبيت و الأثاث وقالت: ماشاء الله تبارك الله كل ماغبت عن بيتكم مدة وجيت.. ألقاه أحلى من قبل..لمساتك مبدعة في الديكور ياسماح... أسماء (بمزح): هذي سوات اللي معاه قرش ومحيره!!!!!! محمد:عاد شنسوي؟؟كل مااجتمع بيدي قروش احترت بين اثنين ياأتزوج حرمة جديدة!!!يا أغير بالديكور!!وبكل مرة أختار الأسهل وهو التأثيث..عاد سماح وانربطت فيها ومابيدي حيلة!! والمثل يقول خلك يالمقرود على قردك لا يجيك اللي أقرد منه!!!!!!!!ههههه الجميع:ههههههههههههه سماح:حريمتك تجرب غيري!!لاأكون حافرة قبرك بإيدي!! وبعدين ياأسماء ماشاء الله حتى انتي بيتك على انه كلاسيك وديكوراته هادية جداً بس ماشاء الله باين إن الأثاث فخم وغالي... اسماء:الغالي قيمته منه وفيه.... ودق جرس الباب..وقال محمد: أستأذنكم هذول أكيد أهل سماح..بأروح أفتح للرجال... وشوي ودخلت أم سماح وأخت سماح(هند) وكانت بعمر أسماء وصديقتها سابقاً من خلالها تعرفت أسماء على زوجة أخوها محمد وخطبوها له.. وبعد السلام والسؤال عن الأحوال صارت أم سماح تناظر اسمهان وقالت:مبروك خطبة بنتك اسمهان ياأم محمد الله يوفقها ويتمم لها على خير ام اسمهان:الله يبارك فيك..... أم سماح:ومتى ان شاء الله الملكة؟؟؟؟؟ ام اسمهان:بالإجازة الجاية بس لسه ماحددنا الموعد...ولاتحدد بإذن الله نبيكم أول الحاضرين. أم سماح:أكيد أكيد.... وكانت أم سماح تطالع باسمهان وهي بداخلها متحسفة وتقول:حسافة هالجمال يضيع من بين يدينا ياليتها من نصيب ولدي تركي!!! وشوي ودق الجرس..وكانت سماح توزع العصير على الحاضرين... قالت أم سماح:سماح يمه أحد بيجيك غيرنا؟؟؟ سماح:ايه يمه نسيت أقول لك..هذي أم سعد اللي من جماعتك من زمان توصيني كل ماشافتني بمكان اني أناديها لاجيتي عندي..وأنساها واليوم تذكرتها وكلمتها..... أم سماح:ياحليلها صار لي مدة ماشفتها.. وراحت سماح تفتح وتستقبل الضيوف.... وشوي إلا الضيوف دخلوا الغرفة على الحضور وكانت الصدمة!!!!! الأم(أم سعد) جاية مع بنتها!!تتوقعون مين بنتها؟ بنتها هي......... عبيـــــــــــــــــــــــــــ ــــــــــــــــــــــــــــــ ــر عدوة شلة الصاعــــــــــقة!!!!!!!!!!!!! !!!!!! اسمهان:عبيروه؟؟؟؟؟؟؟؟؟؟ عبير (بصوت منخفض):اسمهان؟؟؟؟؟قطيعة وش جابك؟ اسمهان:أنا في بيت أخوي ياحبيبتي!! عبير:لو دريت ماطبيته!! وجلس الجميع وبعد تبادل السلام والأحوال قالت أم سماح:ماشاء الله ياأم سعد...كبرت بنتك وصارت عروس..بأي صف تدرس؟؟؟؟؟ أم سعد:بثاني ثانوي... أم اسمهان:ماشاء الله يعني كبر بنتي اسمهان.. اسمهان:أساساً حِنا بمدرسة وحدة وفصل واحد بعد!! أم سعد:ماشاء الله يعني ربع..شفتي شلون ياعبير؟؟قلت لك اطلعي معي وانتي مابتندمين وصدق ظني!هذا انتي لقيتي صديقتك! وطالعوا عبير واسمهان ببعض وكل وحدة طقت الثانية تشميقة معتبرة!!!!! أم سعد:عندي ولدين بس وعبير هي بنتي الوحيدة عشان كذا ماخذة الدلال كله بالبيت وهي الوحيدة اللي ماينرد لها طلب!! أم سماح:الله يحفظها لكم.... وصاروا الحريم الثلاث الكباربالنسبة لمن بالمجلس وهم (ام سماح+ام اسمهان+ام عبير) قاعدين بطرف المجلس يسولفون مع بعض..والقسم الثاني يضم سماح وأختها هند وباقي العائلة..عائلة اسمهان.. ناظرت اسمهان بعبير وقالت:إلا اش أخبار أم سالم الفراشة؟؟؟؟ اسماء:وش علاقتها بأم سالم الفراشة تقرب لها؟ اسمهان:لا وانتي الصادقة ترقت هالأسبوع لرتبة مساعدة فرَّاشة!!!! ابتسام(باستغراب):وشفيها الفرَّاشة موب ادمية؟؟ اسماء:ليش؟؟عبير انتي موب طالبة؟؟؟ اسمهان:إلا طالبة المشاكل لو من عين قطو!!! عبير(بإشمئزاز):أفففف الريحة هنا تخنق أنا بأطلع برة!! واتجهت للمطبخ وكانت سماح قاعدة تجهز أكل وراحت عبيرللمطبخ يعني إنها تساعدها كل ماطلعت سماح من الغرفة طلعت عبير معاها لأنها مو طايقة القعدة مع اسمهان.... التفتوا اسماء وابتسام لاسمهان وقالوا بهمس:البنت هذي باين إنها مو حابتك وانتي بعد موب حابتها اش السالفة؟؟؟؟ اسمهان:وهذي مين يحبها حبتها القرادة!!! اسماء:حتى أنا سبحان الله ماارتحت لها من يوم شفتها..متصنعة وحركاتها ودلعها كله تمثيل بتمثيل! طالعت عبير باسمهان وقالت (بصوت منخفض): تصدقين يااسمهان تكسرين خاطري لاشفتك مع أبلة جوهرة!!كأنك تنافقينها بس عشان تفوزين بعريس الغفلة!! اسمهان (بغيظ شديد):والله ماحد يكسر الخاطر كثرك..وانتي شايلة كراتين العصيرات للمقصف!! بحلقت عبير عيونها بحقد وقامت من المجلس...المهم استمرت السهرة بتوتر بين البنتين لين ماجاء وقت العشا وتعشى الجميع وعقب العشا الشاي وبعدها بدأوا الناس يرجعون بيوتهم.. وبالنهاية شكر الجميع لمحمد وسماح حسن ضيافتهم.... وعائلة اسمهان هم آخر من خرج من السهرة وهم يلبسون العبي قالت سماح:بكرة الجمعة بإذن الله بنتقابل عندكم على الغداء كالعادة...ومن بعد المغرب بنستأذنكم ونبدأ رحلة البحث عن قاعة مناسبة للملكة....لازم نستعجل الأيام تجري! أم اسمهان:صدقتي يابنتي ..الله يقويكم.. ........وثاني يوم وكان يوم الجمعة اجتمع الكل على الغداء.....وكانت ابتسام ناوية على السفر بعد العصر هي وزوجها.... وتغدوا وتبادلوا الأحاديث المختلفة.....وفجأة رن التليفون وراحت هيفاء الصغيرة بنت ابتسام وردت على السماعة:آلو رانية:آلو...وش اسمك ياحلوة؟؟ هيفاء:اسمي هفوووو! رانية:وش يعني هفوو؟؟هاف ولا شلون؟؟ هيفاء(ببراءة):لاااا ياغبية هفو يعني هيفاء!!!طيب انتي اش اسمك؟؟؟؟ رانية:اسمي رنو! هيفاء:اش يعني رنو؟ رانية:يعني رانية...هاه حلو اسمي؟ هيفاء:لا شين..زي صوتك!! رانية:اجري يابنت ونادي خالتك اسمهان لأكون مصفقتك هالساعة!! وقامت هيفاء تنادي اسمهان بصوت عالي:خاااالة سمهونة تعالي كلمي..في وحدة غبية بتدخل يدينها من السماعة وتصفقني!!! اسمهان:مادام السالفة فيها تصفيق وطق أجل أكيد هذي رانية!!!هاتي السماعة ياهيفاء,,,,,, اسمهان:آلو..مرحبتين.. رانية:هلا ومليون مرحبا باللي ينقال انها بمدرستنا ولانشوفها!!مسوية نفسك البودي جارد حق جوهرة! اسمهان:صح النوم ياحلوة!تو ماتذكرتي تتصلين؟؟ وينك غاطة أربعاء وخميس؟؟؟ رانية:مو الله يسلمك الدنيا مشاغل!! اسمهان:لا ياشيخة! مشاغل ولا صالونات؟!!هههه رانية:هههه مو حلوة!!لا صدق أكلمك يوم الربوع وأنا بعرس ويوم الخميس وأنا بعرس ثاني..بس إش أعراس يااسمهان شي خطيــــــــــر!كل واحد أخقق من الثاني!! اسمهان:جاك يامهنى ماتتمنى!وطبعاً أكيد دبكتي ورقصتي من أول العرس لآخره؟!!! رانية:أفا عليك! ماأكون رانية لو ماأسويها!تصدقين أحس بهاليومين اني نقصت 3 كيلو من زود مانفضت وهزيت!!إلا يابنت طول ماأنا بالأعراس وأنا أسرق لك من هالأفكار عشان ملكتك!منتي ناوية تملكين قريب؟؟ اسمهان:إلا أبشرك بالعطلة الجاية بس ماحددنا اليوم لسه..والزواج بعد التخرج.. رانية:إيه هذي الأخبار السنعة..يعني بتلزقين بوجيهنا سنة كاملة!والله وقربت ملكتك وقربنا نستانس! بعون الله بأجمِّل عليك بملكتك وأخلي جِدة كلها تحكي عن هالملكة!! اسمهان:هو من ناحية انك بتخلين جِدة تحكي بتخلينها تحكي بس مو عن جمال الملكة..إلا عن الأكشن اللي بتسوينه فيها..الله يسترمنك بس!! رانية:هاه..وانتي اش آخر أخبارك؟وين رحتي وين جيتي؟ اسمهان:الأربعاء كان عندنا عشاء للعريس وأعمامه والخميس كنا معزومين ببيت أخوي محمد....وماراح تصدقين مين شفت!!! رانية:مين شفتي؟؟؟؟؟ اسمهان: وحدة كريـــــــــــهة مرة!! رانية: لو على الكريهات ياماأكثرهم بهالديرة!! بس مين تقصدين؟!! اسمهان:وحدة معانا بالمدرسة وانتي ماتواطنينها أبد!! رانية: مصختيها عاد اخلصي.....هذا لغز صعب! لعنبوبليسك نص الناس ماأواطنهم..يمكن شلة الصاعقة هي الوحيدة اللي حبيتها! وانتبهي لنفسك من يوم ماانخطبتي وانتي صايرة بنص عقل ولاانتي عاجبتني ترى حبك عندي صارعلى شفا حفرة !!!!!! اسمهان:هههههههه..صدقتك!!حبك لي هو اللي خلاك ماتصبرين لين بكرة لاتقابلنا بالمدرسة وتتصلين وتاخذين أخباري اليوم! عموماً قابلت عبير أمس! رانية:عبيروووووه ماغيرها؟؟؟؟؟؟؟؟؟؟ اسمهان: بشحمها ولحمها!! رانية: وش جابها ببيت أخوك؟؟ أخاف تقرب له؟هههههه اسمهان:طلعت من جيران زوجة أخوي وعزمت الأم وجت هي مع أمها...... وانطلقت اسمهان تحكي لرانية كل ماصار ...ودخلوا بسوالف إلى نهاية المكالمة...... وطبعاً بعد المغرب استأذن محمد وزوجته سماح وسافرت ابتسام, واسمهان راحت تذاكر,وأسماء جالسة تسولف مع أمها....... محمد:يمه إحنا رايحين هالحين ندور على قاعة للملكة اش رايك ترافقينا؟؟ أم اسمهان: الله يعطيكم العافية..ماني رايحة معاكم اليوم بأجلس مع اسماء...وبهالموضوع أنا معتمدة عليكم وواثقة من ذوقكم... وراح محمد وسماح يدورون على فنادق.... في الجانب الآخر كان(عبدالرحمن) زهقان لأبعد درجة..إلى أن رن جواله وطلع صديقه العزوبي (ناصر)على السماعة وعرض عليه يروحون يشربون كوفي بإحدى الفنادق.. وماصدق عبدالرحمن إنه بيطلع من البيت يغير جو وراح بسرعة يلبي الدعوة!!!! وبالفعل تقابل عبدالرحمن وصديقه ناصربصالة فندق وطلبوا من المقهى كوفي وأخذتهم السوالف بشتى مجالات الحياة....وجلس عبدالرحمن يتأمل المناظر اللي حوله وطاحت عينه على اثنين يمشون حرمة ورجِّال وقال:يازينهم شكلهم معاريس جدد! ناصر:وش دراك؟؟ عبدالرحمن:باينة مثل الشمس مايبي لها حكي..ماشيين بخجل وماسكين يدين بعض ومازالوا محافظين على رشاقتهم!!!بلاك ماتدري عن الرِّجال بمجتمعنا! ناصر:علمني يافطين! عبدالرحمن:الرجال وهو عريس يجي متحمس وطاير بعروسته ووده يفر العالم كله فيها وخايف عليها وماسكها بكل رقة من يدها حتى باب السيارة يفتح لها إياه! بس تعال شوفهم بعد سنتين يمشون جنب بعض بس الفاصل بينهم بالمسافة شبرين! وبعد 5سنين تلاقيه ماشي وزوجته وراه بــ3 أمتار تحاول تلحقه!!أما بعد 10 سنين تلاقيه يمشي بالمول وزوجته بعده بــــــ10 أمتار والبزارين ضايعين بالنص ويصيحون:استنى يابابا!!! ناصر:ههههههههههه..خذوا الحكمة من أفواه السفهاء.. عبدالرحمن:ترى من جدي أكلمك..ليش تضحك؟هذا الواقع المُعاش بأيامنا هذي واللي ألاحظه واسمعه..عساني ماأصير مثلهم بس!! ورجع عبدالرحمن يتأمل منظر العريسين اللي قعدواببهو الفندق على الكنب يتبادلون أحاديث تفيض رومانسية وقال:والله أغبطهم.ياليتني مثلهم! ناصر:وش عليه تغبطهم؟؟ منت بصاحي!أقول يازين العزوبية زيناه!ماأبدلها بالزواج لو عطوني كنوز الأرض!!!!!!! عبدالرحمن:أنا عكسك تماماً!والله إني أعد الأيام عد عشان أدخل القفص الذهبي.. ناصر:أي قفص ذهبي ياابن الحلال؟ هالقفص اللي تقول عنه اللي واقفين بخارجه يتمنون يدخلونه واللي بداخله يصيحون وودهم يطلعون منه!!!!! عبدالرحمن: ماعندك سالفة!ناظر بحال أصحابنا المتزوجين وناظر بحالنا!الحياة اللي حِنا عايشينها تسميها حياة؟؟؟..الزواج استقرار وحب وأخذ وعطاء! ناصر: اشفيها حياتنا؟الحمدلله أنا راضي بحالي استقراروعندي بيت أهلي أستقر فيه يعني ماني بــــ طاير!!حب أحب أهلي وأصحابي موب لازم أدور على حرمة غريبة عشان أحبها!أخذ وعطاء طبيعي تقول كذا لأن الحرمة ماترتاح لين ماتقول هات هات وتاخذ كل مابجيبك وبالآخر بتعطيك من النكد لين ماتقول انت: بس!!!!!! عبدالرحمن: كلامك مايهز فيني شعره! أنا خطبت وبأتزوج...وبأظل أدعي لك عسى ربي يهديك إنت بعد وتتزوج مثلي! وبنفس الوقت هذا ومن قبيل الصدفة كانت سماح ومحمد يفترون بنفس الفندق ويشوفون القاعات وأسعارها وانتبه عبدالرحمن لهم وطقه الحماس وراح يسلم!! وهو مِقبل من بعيد انتبه له محمد وقال لسماح هذا عبدالرحمن خطيب أختي اسمهان خلِك بعيدة شوي بأسلم عليه...وبالفعل ابتعدت سماح وصارت تراقبه وتدقق بملامحه وقالت بنفسها:ماشاء الله تبارك الله..الله يهنيك يااسمهان..والله تركي أخوي مايجي بنص وسامته وأناقته!!!!! ودار بين عبدالرحمن ومحمد حوار وكل واحد سأل الثاني عن سبب جيته للفندق... وبعد ماتقابلوا محمد وعبدالرحمن بالفندق وعرف كل واحد منهم سبب وجود الثاني بنفس المكان رجع عبدالرحمن لزميله ناصر..... عبدالرحمن:تصدق؟؟شكلي مو أنا بس اللي مستعجل!حتى أهل العروسة! توي كنت عندهم الأربعاء نتفق على التفاصيل وآثاريهم مجتهدين ماشاء الله اليوم جايين يدورون قاعة!!!! ناصر:يافرحتك ياحبيبي يافرحتك! الله يهني سعيد بسعيدة! وكملوا الاثنين جلستهم.....إلى وقت .وبعد كذا كل واحد رجع بيته.... أما سماح ومحمد عجبتهم كذا قاعة بس الأسعار نار....وهم يدورون على شي سعره معقول..ورجعوا بيتهم وقرروا يستكملون رحلة البحث بيوم ثاني.... راحت اسمهان السبت للمدرسة وتهافتوا الشلة يباركون بقرب موعد الملكة! اسمهان:ماشاء الله وانتوا اش دراكم؟مافي خبر يتخبى بهالديرة؟؟؟؟؟؟ نجلاء: لاكان عندك سر..لاتعطينه لرانية!! اسمهان:أوهوووو..طيب ياحبايب أبشركم الملكة بعطلة الربيع الجاية...وكلكم معزومين..بس الموعد معلق إلى حين حجز قاعة!! أفنان:ياسلااااااام..أخيراً بنجتمع خارج المدرسة!صار لنا زمان والله..... مرام:يالله هانت كلها كم أسبوع ويقرب الموعد... رانية:تراني أقول لك من الحين يااسمهانوه!أنا كل زواج أحضره أسنتر على المنصة..وناس يعجبهم وناس مايعجبهم!وينزلوني غصب!بملكتك من هالحين بأكتب منصة الرقص باسمي! نجلاء:خذي راحتك.. وحِنا معك !بس الفشيلة لو اسمهان راحت وعزمت معلمات الثانوية بنروح وطي!!! اسمهان:لو بأعزم..أعزم ثنتين ثلاث..لكن مايندرى عن أبلة جوهرة...أخاف تقش الإدارة وتناديهم كلهم!! أفنان:ياليت يااسمهان يكون الطق اسلامي..تدرين بأهلي لو السالفة فيها موسيقى مستحيل يحضرون! اسمهان:ماعليكم..بيكون طق طيران بس! مافيه الالات وهذه المهمة بأوكلها لرانية بماإنها خبيرة في عالم الطقاقات..دوري لنا الله يسلمك وحدة تهز القاعة هز!! رانية:أفا عليك! من عيوني..لو تبين أغني لك ..أغني لك ومن غير فلوس بعد اش رايك؟!!!!!! اسمهان:إلا أنا بأعطيك فلوس بشرط تحلفين إنك مابتغنين بملكتي وتخربينها!! حرام عليك أنا مو كل يوم بأكون عروس!!!!!! الجميع:هههههههههههه ......ومرت أحداث اليوم بسرعة....واسمهان بحصص الفراغ تساعد أبلة جوهرة بمكتبها وأوراقها والملفات! ومامن جديد...أبلة جوهرة تعاملها رسمي! ........ومر السبت والأحد والاثنين وكانت أسماء بالسوق واتصلت على أمها وقالت:يمه بأمر عليكم بعدالمغرب أتقهوى معاكم ..لأني هالحين بالسوق.. الأم:الله يحييك..... وبعدها بنص ساعة اتصل محمد وقال لأمه: إحنا جايين بالطريق.... الأم:الله يحييكم اسماء بعد جايتنا.. وبالفعل اجتمعوا عند بيت أبوهم بعد المغرب...وجلس محمد بالحوش مع أبوه ودخلت سماح داخل.. سماح:جينا لكم اليوم وعندنا أخبار جديدة! الأم:هاتوا ماعندكم... سماح:الخبر الأول..قابلنا عبدالرحمن يوم الجمعة! اسمهان(بلهفة):احلفي!! وين؟؟؟؟ سماح:بالفندق...قاعد مع صديقه.. اسمهان:كاشخ؟؟؟؟ سماح:لاااا شكله يفشل ثوبه وصخ!!وشعره نافش كأنه طالع من مقبرة!تصدقين ريحته شميتها من بُعد!!!! اسمهان:أعوذ بالله! تتكلمين بــــ جد؟!!! سماح:لاااا بــــــــــعم!!ههههههه لاطبعاً الصراحة اسمحي لي أهنيك اختيارك موفق!ذوق وأناقة وترتيب ووسامة...بقى بس نعرف عشرته معك شلون بتكون! الأم:الله يهنيهم ويوفقهم مع بعضهم يارب.. سماح:الخبر الثاني ..لقينا اليوم قاعتين مناسبة كل وحدة أحلى من الثانية بعد رحلة بحث استمرت لأربع أيام..ولمدة ساعات أشوى إن عيالي قطيتهم ببيت هلي ولا كان طلعوا عيوني!!!وننتظر منكم ترافقونا بالوقت اللي تفضون فيه وتشوفونها! اسمهان:الحمدلله.ماتوقعت نهائيا انكم بتلاقون بهالسرعة سماح:لأننا سألنا قبل ماندور...فوفرنا على نفسنا عناء البحث المتواصل...وعلى فكرة عندي خبر ثالث! الأم:خير يابنتي؟لاتكونين حامل؟؟؟ سماح:لااااا ويه..ماأبي الحمل ولاطاريه..ماصدقت عيالي يكبرون شوي وأرتاح....السالفة ومافيها خطبنا لأخوي تركي!!!! الأم:ماشاء الله..متى ومين هي بنته؟؟؟؟ سماح:يوم رحت أودي عيالي اليوم لبيت أهلي فاجأتني أمي بإنها خطبت خلاص!وكلمت أهل العروس عشان نحدد موعد نقابلهم واحتمال هالأربعاء ماأجيكم لأني رايحة معاها عندهم... الأم: حِنا نعرفهم يابنتي؟؟؟؟؟؟ سماح:توكم شايفينهم عندي الخميس اللي طاف!أم سعد اللي من جماعة أمي.... الأم:الله يوفقهم..... اسمهان:ايششششششششششششش؟ ولالقيتي إلا عبيروه تخطبينها لأخوك ياسماح؟؟؟؟؟ سماح:ليش اشفيها عبيروه؟؟؟ اسمهان:إلا قولي وشهو اللي مافيها؟؟ غنجاء ودلوعة ومتصنعة! سماح:مو هذا اللي عجبنا فيها ..أخوي يموت بالدلع! اسمهان:لا لا طحتي من عيني ياسماح هالبنت ماتنفع أبد دوروا غيرها!! سماح:أقول..بدينا نغير ولا اش السالفة؟؟؟؟؟مو هذا تركي اللي بعتيه عشان تاخذين عبدالرحمن أفندي؟!!! اسمهان:الله ياخذك انتي وأخوك!!مين قال اني غيرانة؟؟أنا كارهة عبيروه هالشيفة!انتي لو قايلت لي تبون تخطبون له كان دليتكم على ملكات جمال بمدرستنا! سماح:وليش شيفة عاد؟؟الصراحة ماتتخير عنك! طولها قريب من طولك..وعمرها نفس عمرك..وشعرها ناعم مثلك بس أقصر بشوي..والجمال ماشاء الله عليها وبالعكس تتميز عنك بدلعها!! اسمهان:طيب ياسماح!!بكرة تقولين اسمهان قالت!هذي كريهة وماحد يحبها بالمدرسة ولسانها طويل!! سماح:بعض ماعندكم ياحلوة!! اسمهان:لاااا من الحين واقفة بصفها؟؟؟؟ سماح:طبيعي !مو بتصير زوجة أخوي؟؟؟ اسمهان:قولي آمين جعلها ماتوافق على تركي!!! الأم(بزعل):بس عاد! فضوها سيرة!بتتهاوشون قدامي!وانتي ياست اسمهان لاحيا ولاحشيمة لزوجة أخوك اللي متعبه روحها عشانك وتفتر من قاعة لقاعة؟؟وحاطة عيالها كل يوم والثاني ببيت أهلها؟؟؟؟؟؟؟ سماح:قولي لها ياخالتي ...قولي لها!!وانتي ياأسماء اش رايك فيها يوم شفتيها ببيتي؟؟ اسماء:الصراحة..مليغة!!ودمها ثقيل !مدري شلون عجبتكم!بس مايخالف الطيور على أشكالها تقع!!! سماح:مقبولة منك ياأسوم!!بس تصدقون تعلقت بهالبنت أكثر بعد كلامكم! اسماء:ياشيخة الله يوفقهم..وش علينا منهم؟تركي أخوك براسه لفة على قولة محمد..فأكيد هاللي اسمها عبير بتكون مناسبة!هههههه سماح:إخس!! والله ماهقيتها منكم!وأنا اللي أقول بتفزعون لي بزواجه ان شاء الله!!! اسماء:أي فزعة؟؟وأي خرعة؟؟انتي تاركة زواج أخوك وواقفة تساعدينا بملكة إختنا؟؟روحي له يمه وقومي بواجبك!! سماح:تمزحون انتم؟؟ولا أشد شعري من القهر؟؟ اسماء:هههههههه..عمري انتي أمزح معك..لو ماساعدتينا بملكة سويسة الهبلة هذي أجل من بيساعدنا...خبرك أنا حامل ويالله اشيل نفسي..وابتسام بعيدة..وأمي رجيلاتها مو ذاك الزود..كل مامشت لها شوي,,وقفت تشحن!! الجميع:هههههههههههه ودخل محمد والأب..وتبادلوا شوية أخبار وراح كلن لحال سبيله..... |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
الجزء السابع والعشرون مرت الأيام وبالفعل لما جاء يوم الأربعاء راحت سماح مع أمها وأختها هند وأخوها تركي يخطبون عبير...أبوسماح متوفي من مدة..وأما محمد زوج سماح أخذ نفسه وراح لأهله يتقهوى معاهم ولقى أمه واسمهان بالبيت والأب كان معزوم فاستغل الفرصة وقال:ليش يايمه ماأخذك انتي واسمهان تشوفون القاعات؟؟ الأم:على بركة الله.... اسمهان:ياليت ياحمود...اليوم أربعاء وكل العالم داجين برة إلا إحنا حابسين نفسنا بالبيت.. الأم:لا ياشيخة واللي يسمعك يقول لو ورانا خرجة كنتي بتصحين!!أنا انبح صوتي عشان أصحيك تقعدين معاي..وانتي من يوم ماجيتي من المدرسة وانتي حاطة النومة!!! محمد:مايخالف يمه..خلها تتدلع هالسنة..بكرة بس تتزوج عبدالرحمن بيعطيها على قفاتها!!! اسمهان:وليش يابعدي؟؟النوم حرام؟؟ محمد:لا موب حرام بس بحدود..انتي نص عمرك ضيعتيه وانتي نايمة..على بالك لاتزوجتي الرجَّال بتشتغلين له الأميرة النائمة!!! اسمهان:الزبدة؟ألبس عباتي؟ولاأروح أنام أحسن؟ الأم:روحي البسي عباتك وجيبي عباتي معك.. ......وراحوا الثلاثة يشوفون القاعات وكانت وحدة محجوزة والثانية لا وأعجبتهم..لكنهم اختاروا الأكشخ بالطاولات واللي ماتحتاج اضافات كثيرة....ودفعوا العربون وحددوا اليوم اللي بتسير فيه الملكة..أخيراً..واتصلوا على الأب وشاوروه بموعد الملكة وعطاهم الضوء الأخضر. وهم بالسيارة قال محمد:هاه ياعروس؟؟أهم شي رايك!عسى أعجبتك القاعة؟؟ اسمهان:عجبتني ونص!الصراحة طلعت أحلى من توقعاتي...تسلمون يامحمد.. الأم:بس عيب قاعات الفنادق إنه غرفة العروس غالباً ماتكون بنفس الصالة مثل القصور!لازم نطلع من القاعة ونستخدم المصعد عشان نطلع لغرفتها! محمد:ولعلمك يمه الغرفة اللي شفناها ماهي خاصة للعروس...هذي نفس غرف نزلاء الفندق يوم المناسبة يخصصون وحدة للعروس! الأم:الله يعين ..يعني لازم كل مااحتجنا شي من أغراضنا لبسنا عبينا وطلعنا بالاستقبال ثم للمصعد ثم فوق لغرفة العروس.. اسمهان:يمه أنا مابأحتاج طلعتكم ونزلتكم إلا وقت حضور المصورة!! الأم:ومين قال لك ياروح أمك..إنك بتتصورين؟ بناخذ معانا كاميرة الفيديو ونصورك...ونعمة!! اسمهان:مالي شغل أبي مصورة!ومو أي مصورة! وحدة شاطرة في إخراج الصور! الأم:ويايمه اش بتستفيدين منها الصور؟علميني؟ اسمهان:ذكرى!!!! الأم:أي ذكرى؟؟ليش انتي عقب الزواج ومع مرور الوقت بتنسين انك تزوجتي؟وبتحتاجين لصور تذكرك إنك متزوجة؟؟؟؟؟؟؟ اسمهان:ياربي! يايمه كل البنات يتصورون..وحلو بمرور الوقت والعمر الواحد يتذكر كيف كان شكله قبل.. الأم:أنا مو معك...تصوير الفيديو كافي..وإحنا كل يوم والثاني صايرين نسمع قصص تخوف!! اللي نط على بيتهم حرامي وسرق أشياء ومن ضمنها الصور!واللي سافرت وصار لهم حادث بالطريق والصور معاهم وضاعت بوسط الحادث مالقوها وياعالم مين أخذها!! واللي وصلت صورها بأي طريقة ليد أحد مايخاف الله ونشرها بكل مكان!! وش لنا بهالمصايب بس؟!! محمد:خليها على راحتها يمه..ولو حصل شي هي المسئولة الوحيدة!!بس انتي قولي لي هل انتي راضية كل الرضا عن القاعة؟؟ ولا انجبرتي عليها يوم حطيتك بين خيارين؟؟ترى إحنا لسه فيها أقدر أرد العربون وندور غيرها!!!!!!!! الأم:لا.. الله يرضى عليك..تهبل بس عيبها الوحيد غرفة العروس إنها بدور ثاني..أما من ناحية المواصفات الثانية ولاأروع!يكفي إنه اسمها بفندق+كل شي موجود فيها+الكوشة والدي جي ومفارش الطاولات فخمة+البوفيه والتورتة من عندهم وهذا أفضل شي..مالنا خلق بكثر التفرفر بالمحلات...أما ضيافة الطاولات تكفلت أسماء بحجزها...وباقي الأشياء مقدور عليها... محمد:بتجيبون طقاقة؟؟؟ الأم:أكيد...بس اسمهان وعدوها صاحباتها يدورون لها وبيردون لها بكرة.... وقعدوا يدردشون بالطريق وعرض عليهم محمد يمشيهم على البحر شوي وعقبها يروحون لمطعم يتعشون....ووافقوا وبالفعل تعشوا بمطعم..وانبسطوا..إلا اتصلت سماح على محمد وقالت له انهم رجعوا من أول من بيت عبير على بيت أهلها وتبيه يجي ياخذها هي وأولادها... ومر محمد على بيت أهل سماح وكان على طريقهم ومعاه أمه وأخته اسمهان...وبالسيارة بعد السلام والسؤال عن الأحوال... سألت أم اسمهان:هاه ياسماح؟بشري كيف تمت أموركم؟؟ سماح:على خير حال ولله الحمد.... اسمهان(بفضول):وافقوا عليكم أهل عبير؟!!! سماح:وليش مايوافقون؟بيلقون أحد بمواصفات تركي؟!بس طبعاً ماعطونا الرد من أول مرة بيفكرون على راحتهم ويردون لنا..... اسمهان:والعروس اش أخبارها؟مرحبة بالموضوع.؟؟؟؟؟ سماح:إلا بتتشقق من الوناسة..مو عارفة شلون تخفي فرحتها!!! اسمهان بينها وبين نفسها قالت:يحق لها!مو مصدقة إن أحد طالع بوجهها!!بس مايخالف ياعبير الحسودة!أنا لما علمتها بخطبتي تقولي هذي بيعة وشلون أهلك يرمونك بهالسن لواحد كبير!!!!!!وهالحين أشوفها ميتة على الزواج وتركي ماهو صغير!!مالت عليها بقوة!! ووصل محمد أمه وأخته لبيتهم.. وراح هو وسماح لبيتهم ينامون..... وكان الأب توه راجع من العزيمة وسأل اسمهان وأمها:بشروا؟كيف القاعة؟؟ الأم:ماشاء الله حلوة.. الأب:وقاعة الرجال شفتوها؟؟ الأم:ايه كبيرة وزينة..ماينقصها شي.. الأب:ذكروني بكرة أتصل على المعرس وأعطيه خبر بموعد الملكة..وانتي اتصلي بأهلك وعلميهم الأم:بإذن الله..... وكلن راح ينام...... ومرت الخميس والجمعة على خير وطبعاً اسمهان ماقدرت تصبر اتصلت بزميلاتها يوم الخميس وعلمتهم بموعد ملكتها والقاعة!! ولما راحت المدرسة يوم السبت قابلت أبلة جوهرة بالسيب ونادتها وقالت:مبروك يااسمهان وياليت تنادين شلتك وتلحقوني على غرفتي! وراحت اسمهان تنادي شلتها وقالوا:خير واش تبي فينا؟؟؟ اسمهان:علمي علمكم! وراحوا لأبلة جوهرة..وقالت لهم:طبعاً أكيد مستغربين ليش إني جمعتكم؟؟ رانية:خير؟لايكون أحد مشتكي علينا بس؟؟تراه يخسي بوسط وجهه..أنا من ذاك اليوم وأنا ماشية جنب الجدار لالمست أحد ولاكلمت أحد!!!!! أبلة جوهرة:لا ..تطمنوا..محد اشتكى..بس حبيت أشكركم على قيامكم بمهامكم على أفضل وجه..وأنا أعتبرها مدة طويلة انه يمر عليكم اسبوعين من غير ماتسوون فيها مشاكل!!ومابقى إلا اسبوعين وتبدأ العطلة وبمناسبة ملكة اسمهان بأعفيكم من النظام أو الشغل بالمكتبة او البيع بالمقصف وارجعوا مثل ماكنتوا مع بعضكم!فرصة تقعدون مع صاحباتكم قبل ماتملك!! رانية:غريـــــــــبة!شكلي بأغير رأيي فيك ياأبلة جوهرة!ماكأنك تحسنتي معانا شوي؟؟ أبلة جوهرة:ارجعوا فصلكم بسرعة لأغير أنا رأيي فيكم!!!!!!!! ورجعوا فصلهم وهم مبسوطين.... مرام:الحمدلله..أخيراً بأفتك من شغل المكتبة!الشغل فيها مثل العلة على القلب طول الوقت وأنا أرتب الكتب بحسب تصنيف ديوي العشري وياويل أغلط تخليني أمينة المكتبة أعيد كل شي من أول وجديد!!! نجلاء:حتى أنا بأفتك من النظام...بالذات من بنات ثالث ثانوي اللي كل ماكلمت وحدة منهم تسفهني ليش إني أصغر منهم!!!!! أفنان:وأنا بعد بأفتك من التعليقات السخيفة اللي كنت أسمعها من البنات..الصراحة عريفة بالنظام شغلة ماتناسبنا!! رانية:يعني اللي يسمعكم يقول أنا كنت راضية أشتغل بياعة بالمقصف!لا ومن غير راتب مالت عليهم!!!!!!! نجلاء:ليه؟ومن متى يعطون البنات اللي يبيعون بالمقصف راتب؟؟انتي طالبة ولا موظفة!!! مرام:يابكاشة يارانية!!كنتي مبسوطة بسالفة البيع كل مامريت جنبك لقيتك تاكلين مما هب ودب!وياعالِم كنتي تدفعين الحساب ولا لا؟!!!!!!!! الشلة:ههههههههههه اسمهان:الحمدلله أنا ماكنت متضايقة من شغلي مع أبلة جوهرة حتى أفرح بالفكة!! رانية:طبعاً.. وش عليك؟ معززتك ومرززتك..وحاطتك حسبة وحدة من الاداريات!!ياالله عساه عريس الغفلة بس يطلع رجَال ويسوى!! باقي أيام الأسبوع اجتهدت اسمهان في النزلة للسوق لتبدأ رحلة البحث عن فستان مناسب للملكة...وأمها بدأت تتصل على الأهل والأقارب عشان تعزمهم...واللف والدوران بالأسواق للبحث عن فساتين.....بالاضافة لحجز بعض أشياء التقديم اللي يندار فيها على المعازيم والتفاسير اللي بعد العشاء والتوزيعات اللي بمثابة هدايا للزوار كتخليد لذكرى مناسبتهم....يعني كانت أيام حافلة....وأسماء اجتهدت وراحت تحجزالمعجنات والحلويات الخاصة بالطاولات.... وكانت اسمهان ترجع كل مرة من السوق بخيبة أمل لأنها مالقت فستان مناسب! بس صاحباتها يبثون الأمل دايما في نفسها من خلال ارشادها لمحلات معينة وبوتيكات خاصة بملابس الأفراح...وترجع تروح لتستكمل رحلة البحث من جديد!!ومر الأسبوع على خير وبدأ الأسبوع الثاني والأخير اللي عقبه الاجازة...وكانت اسمهان تلاحظ على صاحباتها انهم يكونون يتكلمون بموضوع بس أول ماتجي تكلمهم يسكتون وكأنهم مايبغونها تسمع!!! وبدأ الشك يدخل نفسها!! لكن كانت فرحتها كبيرة يوم راحت السبت للسوق ولقت فستان ناعم وردي وأنيق واشترته من غير تردد.. وراحت الأحد للمدرسة تبشر صاحباتها وقعدوا يلفون ويدورون ودهم يعرفون لون فستانها لكنها رفضت!! وقالت:خليه مفاجأة.... طبعاً شلة الصاعقة طول المدة الماضية كانوا قاعدين يجهزون مفاجأة لاسمهان بملكتها وهي ماتدري!! بس ظل لون الفستان شغلهم الشاغل وودهم يعرفون فكرت رانية وفكرت لين ماطلعت بنتيجة!! طبعاً ابتسام جات مرة ثانية لأهلها استعداداً للملكة بعد غيابها عنهم اسبوعين وكل يوم كانت تنزل السوق مع أمها واسمهان يكملون النواقص....... واتصلت رانية على بيت اسمهان بعد ماتأكدت انها مو بالبيت!عشان ترضي اللقافة الملحة اللي بداخلها وردت عليها هيفاء بنت ابتسام...لأن كل اللي بالبيت راحوا السوق أما هيفاء وسارة بنات ابتسام قاعدين مع كاتيا الشغالة.... رن التيليفون....وردت هيفاء:آلو! رانية:آلو!شلونك ياحلوة؟؟ هيفاء:طيبة..... رانية:اش اسمك ياشطورة؟؟ هيفاء:أنا هفو! رانية:هلا وغلا..انتي صديقتي السابقة اللي رديتي علي قبل تذكريني؟؟؟؟؟ هيفاء:لا ماأتذكرك!مين انتي؟؟؟؟ رانية:أنا رنو! هيفاء:ااااااااه انتي الهبلة صاحبة خالة سمهونة اللي كنتي بتصفقيني على السماعة!!! رانية: استغفر الله!ايه أنا! المهم ياحلوة كنت أبغى أسألك فستان خالة سمهونة اللي بتلبسه بالملكة اش لونه؟؟؟ هيفاء:وااااااو فستان خالة مرررررة حلو كأنها سندريلا! رانية:زين اش لونه؟ هيفاء:لونه وردي؟؟ رانية:وردي فاتح ولا فوشي؟؟؟ هيفاء(بكل براءة):انتي تشوفين سبيستون؟؟؟ رانية:اش علي بسبيستون ؟خلصيني يابنت ولاتطلعين من الموضوع!! هيفاء:أول قولي لي انتي تشوفين سبيستون؟؟ رانية:لاحول ولاقوة إلا بالله...ايه أشوفها ليش؟؟؟ هيفاء:لون فستان خالة سمهونة نفس لون شرشف صلاة فلة اللي بسبيستون!! رانية:يخلي لي اياك ياعسل ولاتقولين لأحد اني اتصلت زين؟؟؟؟ هيفاء:طيب! وقفلت رانية السماعة وراحت ركض على أختها الصغيرة روان اللي بالروضة وقالت:روانوه؟حطي قناة سبيستون! روان:طيب...وحطت على القناة..وقالت:ليه؟تبغين تتفرجين معايا على الكرتون؟؟؟ رانية:مابقى إلا هي يختي!!تابعي القناة ولاجات دعاية شرشف الصلاة حق فلة ناديني! روان:شرشف فلة اللي زي حقي؟؟ رانية:ليش انتي عندك مثله؟؟؟ روان:ايوه شوفيه في دولابي... وراحت رانية ركض تشوف لونه..وفرحت ومن ثاني يوم بالمدرسة راحت لصاحباتها وقالت لهم بلون الفستان! وقالت:اش رايكم تعطوني فلوس واشتري لكم فساتين ناعمة ونطقم كلنا نفس لون فستان اسمهان؟!! نجلاء:فكرتك روعة..بس كيف بنلقى فساتين وردية جاهزة بكل هالسهولة ويكون سعرها مناسب؟!!! رانية:خلوها علي! اللي لاحظته بكل المناسبات اللي حضرتها انه البنات اللي بسننا يلبسون فساتين ناعمة وقصيرة شوي ولافيها زبرقة..وماراح تكون مكلفة وبأشتريها من أحلى ماركة..بس حطوا حيلكم بالميك آب والتسريحة! مرام:والله فكرة!اش رايكم تجون كلكم مشغل أختي ونتفق على مكياج وتسريحة وحدة؟؟؟؟؟؟ أفنان:وااااااو حماس أفكاركم تهبل!والله يعين أقنع أمي خبركم تدرون أهلي مشددينها حبتين!! مرام:لو حبكوها وماخلوك تجين للمشغل..لك علي لأكلم لك أختي ترسل لك كوافيرة على البيت!اش رايك؟؟؟ أفنان:الله يسعدك ياشيخة.. رانية:أما أنا بأتصل على الطقاقة اللي حجزتها اسمهان ودليتها أنا عليها عشان أتفق معاها على اللي بنسويه! البنات:واااااااو حماس متى بيجي ذاك اليوم!!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
&الجزء الثامن والعشرون&& طبعاً مرت أحداث الأسبوع الأخير من الدراسة اللي بعده عطلة الربيع وشلة الصاعقة مشغولين بتحضير ترتيباتهم واسمهان ياغافلين لكم الله!!! وكان آخر يوم بالدراسة وهو الأربعاء...وملكة اسمهان بتكون الأربعاء اللي بعده....المهم وقفوا الشلة يودعون بعض .. أفنان:سمهونة بأقول لك شي..بس أمانة ماتزعلين! اسمهان:خير ان شاء الله؟! أفنان:الصراحة أهلي منعوني من حضور ملكتك وقالوا ماعندنا بنات يحضرون أعراس!!! اسمهان:لا ياشيخة؟؟قولي غير هالكلام!أشوف ماشاء الله كل المناسبات السابقة اللي اجتمعنا فيها كنتي أول الحاضرين! أفنان:أدري..بس هالمرة حكم القاضي وأبوي مدري اشفيه رافض! اسمهان:ماعليك..بأخلي أمي تتصل تعزم أمك رسمي.. أفنان:لاتتعبين نفسك هي رافضة أكثر منه..وبعدين اجازة الربيع قصيرة وأقاربنا كلهم مجتمعين وأمي ماعندها استعداد تضيع يوم عشان تحضر فيه مناسبة!!!!!!!!بس مايهمك أعوضك بالزواج!! وقامت اسمهان تناظر أفنان بخيبة أمل لأنها ماتوقعت عدم حضورها!! نجلاء:أنا بعد يااسمهان المعذرة منك بس صدقيني مو بيدي!!أبوي مصمم نستغل الاجازة بما إنها قصيرة ونسافرمن بكرة للمدينة!!! اسمهان:حرام عليكم!اش قاعدين تقولون؟؟؟؟؟تكفون عشان خاطري اضغطوا على نفسكم شوي!!!!! أفنان:هذي قرارات عُليا!يعني ماباليد حيلة سامحينا! اسمهان (بعصبية):وانتم يالباقيين؟من منكم بعد وده يعتذر؟؟قولوا لاتستحون!!ناوية تعتذرين انتي بعد يامرام؟؟ مرام:لا أنا جاية ان شاء الله بس مثل ماانتي عارفة ملكتك بتكون يوم أربعاء..وأختي عندها ضغط بالمشغل ومحتاجة أحد يساعدها بالاستقبال والحسابات ولازم أكون معاها..يعني حتى لو جيتك راح أضطر أتأخرمرة..ويا ألحق على زفتك يا ماألحق!!أنا وحظي!! رانية:لاتخزيني بعيونك اسمهانوه!!أنا جاية.. بس يتوقف هذا على اللي بيرضى يجيبني!!لأنه الأسبوع اللي بتسير فيه ملكتك كله مناسبات عند أقاربنا..أخاف يقولون أهلي خلاص كفاية مو كل يوم وانتي بعرس!!!! اسمهان:الله يبشركم بالخير!بس ماهقيتها منكم!جاملت كل وحدة فيكم بمناسباتها..وتوقعت انكم بس تسمعون بملكتي بتفزون تساعدوني وتكونون حولي بس للأسف طلعتوا أي كلام!!!!!! نجلاء:ياشيخة لاتهتمين..مثل ماقالت أفنان نعوضك بالزواج!!!!! اسمهان:أي زواج؟؟ أنا أبيكم بملكتي..الملكة فرحتنا حِنا أهل العروس ومناسبتنا اللي نستانس فيها براحتنا من أول الليل لآخره....لكن الزواج من اختصاص أهل العريس يعني احنا بنجي فيه ضيوف ولابأنزف إلا آخر الليل يعني مابتستفيدون من حضوركم بزواجي شي!!!!!!!يلا الله يعين والله يعوضني بحضور بنات خوالي وأعمامي!!! وحسوا الشلة بضيقة اسمهان وواجهوها بالصمت وودعوها...وبدأت الاجازة..وبدأ أبو اسمهان بعزيمة أهله وأقاربه للملكة.... ويوم الخميس كانوا ابتسام واسماء واسمهان وأمهم جالسين ورن التليفون وردت الأم وكانت المتصلة عمتهم شريفة (أخت أبوهم)..وبعد السلام والسؤال عن الحال.. شريفة:صحيح ياأم محمد إن ملكة اسمهان الأربعاء الجاي؟؟ الأم:ايه صحيح..وننتظركم ان شاء الله.. شريفة:ومين بتاخذ؟؟؟؟ الأم:ولد فلان الفلاني(وقالت لها الاسم) شريفة:وعساهم بس ناس زينين؟؟ الأم: أكيد!!يعني حِنا بنقط بنتنا بحلق ناس مايسوون؟!!!!!!!!! شريفة:لأني ماتوقعتها منكم هالحركة بصراحة!شلون تنخطب اسمهان وأخوي مايشاورني؟؟؟؟؟؟ الأم:ولامؤاخذة يعني!بس يشاورك ليش؟؟ شريفة:لأن كان نفسي في اسمهان لولدي فيصل!تروحون انتوا تعطونها للغريب؟؟؟؟ الأم:والله ياحبيبتي..ماعمرك لمحتي لنا من شرق أو غرب انك تبينها لولدك..حتى ننتظركم!! ولا حصل انك تقدمتي رسمي..لكن ولد الناس هذا جانا ودخل البيت من بابه وطلب البنت رسمي!! شريفة:الله يعوض علينا بس!مع اني دارية انها لو تلف الكون كله مابتلقى مثل ولدي فيصل أخلاق وذوق ونسب ووظيفة!! الأم:انتي متصلة تباركين لنا وتعرضين فزعتك معنا بالملكة؟؟ولا لك قصد ثاني وأنا مافهمتك؟؟؟ شريفة(من ورا قلبها):مبروك...وسلمي على الجميع..مع السلامة!! الأم:مع السلامة.... وصكت السماعة .......وقالت:استغفر الله!! ابتسام:مين هذي يمه؟؟ الأم:عمتكم شريفة! اسماء:يوووه قطيعة!!واش تبي؟؟ الأم:ماتجوز عن طبايعها!نفس الحركة اللي سوتها أيام خطبتك يااسماء رجعت تعيدها..لايمكن تتصل تقول مبروك من قلب صافي!!لازم تعاتب وتقول كالعادة كنت أبيها لولدي فلان وليش تعطونها الغريب؟!! وهي أصلاً ماقد خطبت لعيالها من عندنا!!!!!!!!مدري اش القصد تبيني أكتب بناتي باسمها ولا اش سالفتها؟؟؟ اسماء:هالحين من زين عيالها ولا من طيب عودهم؟؟!!!!صايعين ضايعين!!وكل يوم بديرة ولاشهادات زي الناس ولامرجلة!وفوق هذا كله دايرة تمدحهم من بيت لبيت وتلمع صورتهم!كأن الناس اللي حولها ماعندهم عقول ومايدرون عن سوالف عيالها!اللهم لاشماتة بس!!!! اسمهان:إلا الحمدلله انها ماخطبتني رسمي لأحد من أولادها!!أتوقع أبوي ماكان يردهم لو خطبوني! الأم:ليش يمه؟؟على بالك أبوك مايبي مصلحتك؟؟صحيح انها أخته..بس الحق حق عيالها الله يعافيهم ولايبتلينا أخلاقهم طايحة بالأرض..وسمعتهم مو ذاك الزود..وأتوقع لو بتخطب لهم من العيلة محد بيوافق!!! .......وبعدها بكم يوم بدأوا الأهل والأقارب يهلون ويزورون أهل العروس اللي مستأجر منهم برة واللي عنده بيت..واللي جالس عند أقاربه اللي بنفس الديرة وكان عند اسمهان خالة اسمها(نوال) وكانت ماشاء الله عليها انسانة ملتزمة وماترضى بالغلط وبناتها محبوبات عند اسمهان.. زارت أهل اسمهان قبل الملكة بكم يوم وكانوا اخوات اسمهان وأمها وسماح زوجة محمد قاعدين..وكانت تقدم لهم نصايح.. الخالة(نوال):اسمهان حبيبتي..مبروك خطوبتك يابنتي وعسى الله يجمع بينكم في خير..ويجعلكم دوم برضا وسرور...قولي آمين اسمهان:آمين.. الخالة(نوال):شوفي يابنتي..أول يوم بتجتمعين فيه مع خطيبك وتقعدين معاه هو يوم الملكة..وعشان تكون بدايتك معاه مباركة من أولها فابعدي قدر استطاعتك عن كل معصية يابنتي..... اسمهان:ان شاء الله..... خالتهم نوال:لاتكون ليلتكم طرب وموسيقى.. الأم:لا لا تشيلين هم يانوال حِنا حريصين على هالشي واشترطنا على الطقاقة تجيب دفوف بس وحتى كلمات العشق والغرام تحوِرها لمعاني زينة! خالتهم نوال:بارك الله فيكم...وان رحتي يابنتي للكوافير لاتخلين الساعات تمر عليك بغير فايدة خذي معاك كتيب صغير واقرأي فيه عشان تستفيدين..أو استغلي الوقت بذكر الله والتسبيح والاستغفار والتهليل والتكبير بتلاقين الوقت مر فيك بسرعة من غير ماتحسين واستغلتيه بشي مفيد وانكتب لك أجر عظيم وماأدراك بفضل الذاكرين والذاكرات.... اسماء:جزاك الله خير ياخالتي..نصايحك درر. نوال:ويابنتي ابعدي عن الحرام بكل أمورك لاتضحك عليك احدى هالكوافيرات وتقول لك نوصل لك شعرأو رموش!أو نحشي لك شعرك بحشوات تخلي راسك مثل سنام الجمل!!ترى هالصنف من النساء نسأل الله السلامة لايدخلون الجنة ولايجدون ريحها!!!!!!! اسمهان:ان شاء الله.... نوال:والنمص بعدي عنه الله يرضى عليك..كِلِش ولالعنة الله اللي تحل عليك بسبب كم شعرة تشيلينها!! اسمهان:ان شاء الله. نوال:والوشم..وكشف جسمك قدامهم لأي سبب تجنبيه يابنتي.. اسمهان:ان شاء الله.. نوال:ولا أوصيك يابنتي الحياء مطلوب قدام العريس حتى لو تصنع!! اسماء:في هذي ماأضمن لك اسمهان!! وقاموا بنات الخالة نوال واخوات اسمهان.. وسماح يضحكون..... نوال:لا ان شاء الله إنها قدها وقدود...وخلك ناعمة ورقيقة في كلامك وتصرفاتك يابنتي..لأنك بهالمرحلة تكونين تحت المجهر وانتي ماتدرين!!من بدايتك معه بيحكم عليك على طول كيف بتكونين بعدين فخلي بدايتك زينة! اسمهان:ان شاء الله.. نوال:ولاتكونين قدامه كتاب مفتوح مفضوح!! فيه كلام كثير يابنتي لازم تكونين حريصة انه مايطلع قدام خطيبك!! ابتسام:وضحي ياخالة مافهمنا عليك.. الخالة نوال:يعني بعض أسرار العائلة..أو الصديقات أو حتى أسرار عن نفسك..في أشياء من الأسلم إنه مايدري عنها شي.. اسمهان:ان شاء الله.. الخالة نوال:وكوني حريصة بكلامك وحذرة في انتقاء ألفاظك وتنميقها.. اسماء:ياخالة أختي ثقافتها انجليزية! اسمهانوه خالتي تقصدلازم تسوين كونترول على لسانك وانتي تكلمين المعرس!!تكفين..حِنا ماصدقنا متى تجي اللحظة اللي بنفتك فيها منك!!انتي لو تكلمينه مثل ماتكلمينا فأنا ضامنة انك راجعة لنا وورقتك بإيدك!! الجميع:هههههههههههههه الخالة نوال:فاولي خير الله يصلحك ياأسماء..!سمهونة قلبها أبيض من يومها..أهم شي يابنتي انك تحاولين تكونين بأحسن صورة قدام ولد الناس ومايقدر يمسك عليك زلة..خليه بداخله لاشافك يقول ونعم التربية! اسمهان:ان شاء الله..... سماح:اللي تعد منكم كم مرة قالت اسمهان ان شاء الله ؟؟بأهديها عريس من عندي!!! بنات الخالة نوال:5 لا لا 6..أنا أنا سبقتك!!! أم اسمهان:حليلكم بنات هالزمن كيف مشفوحات على الزواج!!!!! وقام الكل يضحك...... سماح:لاتصدقوني ترى أمزح..!!! اسمهان:خلصت نصايحك ياخالة؟؟؟تراني بحاجتها!لأنها مو مثل نصايح بعض ناس كلها تشمت وتشفي!!!!وتناظر بطرف عينها لأسماء!!!!!! الخالة نوال:والله الحديث يطول يابنتي بس هذا اللي براسي هالحين وقلته... ........وعدت هالزيارة على خير وبعد كم يوم كانت الملكة!!!!!! الجزء الثامن والعشرون بقي يوم على الملكة وبدأت استعدادات اسمهان اللي بدأت أصلاً من أول الأسبوع في تنظيف البشرة وتنعيم الوجه والنتف وحمامات الزيت والحمامات المغربية والوصفات والخلطات والماسكات!!يعني اجتهاد مو طبيعي!وليلة الملكة كانت جالسة مع أخواتها يراجعون آخر الترتيبات بالذات إنه أم اسمهان وأخواتها استغلوا هالأسبوع في اكمال كل شي وزيارة القاعة للاطمئنان على سير الأوضاع.. ابتسام:في شي فاتنا نسأل عنه!! هو العريس بينزف مع اسمهان؟؟؟؟ الأم:لايابنتي..ماله داعي أبد نخلي الرجال يدخل على النسوان! ابتسام:لافي ملكتي ولافي ملكة اسماء طلعوا عرساننا..قلت أسأل يمكن بملكة اسمهان بتخالفون الوضع!!طيب ليش ماينزف عند النسوان؟؟؟ اسماء:لأن اسمهان ماينفع تنزف عند الرجال!!!! ابتسام:لاااا اجابة مقنعة الصراحة!!!!! اسماء:وسؤال غبي بصراحة أكثر!!!!!!! اسمهان:بس ياتوم وجيري!أساساً أنا ماأبيه يطلع انتوا نسيتوا انه نص بنات الثانوية جايين+بنات العيلة وصاحباتي الثانيات بعد؟!يعني الأفضل مايطلع أخاف تسرقه مني عيون العذارى!!!!!! اسماء:ياربي على الجمال اللي مقطع بعضه!!أجل لاتنسين يختي لفي عريس الغفلة ودخليه بظرف وحطيه تحت إبطك لاأحد يشوفه!!!!!! وكالعادة مرت الجلسة بهواش ونقار وطنازة لين ماانفض المجلس برجعة اسماء لبيتها وذهاب الجميع للنوم متمنين لاسمهان نومة سعيدة!!! ولكن هيهات يجي النوم لعيون سمهونة اللي كل تفكيرها صار يدور حول زميلاتها اللي اعتذروا عن الحضور!مما حطم نفسيتها! يوم مهم مثل هذا كانت تتمنى حضور الجميع فيه عشان يشاركونها فرحتها..ولكن ظلت كلماتهم ترن بإذنها(العوض في زواجك ان شاء الله!)إلى أن غلبها النعاس ونامت..... أما اليوم الثاني اللي هو يوم الملكة كان يوم متوترمن أوله..تجهيزللفطور..والأغراض ..لأن الكل كان همهم ياكلون لقمتين على السريع ويروحون للكوافيرة من الظهر! وكان الاتفاق انه اسمهان وأمها واخواتها وسماح يروحون للكوافير يتضبطون وبعدين يرجعون بيتهم يلبسون ويجهزون اغراض القاعة..واسمهان تبقى في الصالون ولما تنتهي يمرون ياخذونها ويتجهون للقاعة وتلبس فستانها هناك بغرفتها بالفندق!! وبالفعل راحت الصالون والكل تزبرق وتهندم ورجع البيت وبقت اسمهان تتضبط وجلست معاها سماح وكانت هذه تسريحتها!!! وأخذوها من الصالون ووصلوا لغرفة الفندق بعد المغرب....ونزلوا يرتبون ضيافة الطاولات ويشرفون على العاملات والدي جي وكل شي من إلى......وبعد العشا بدأوا الضيوف يتوافدون أخوال وخالات العروس وأعمامها وعماتها وبنات العائلة والجيران والأصحاب وبنات المدرسة..الأب ومحمد وأعمام العروسة يستقبلون المعازيم بقاعة الرجال..والأم واخوات اسمهان وخالاتها وسماح يستقبلون الحضور بقاعة النساء..وكانت ليلة حافلة وحلوة من أولها! طبعاً عبير وأمها وأقارب لها حضروا الملكة بدعوة من أم سماح لأنها من جماعة أم عبير.. وفجأة دخلوا أربع بنات قمة في الحلا تسريحات حلوة وماكياج راقي وفساتين ناعمة جداً وكل وحدة أهلها حضروا معاها...أكيد عرفتوهم؟!! صح!!هم شلة الصاعقة!!!! وهذا لبسهم وطبعاً اسمهان ماتدري لأنها صدقتهم يوم اعتذروا عن الحضور! جلسوا شلة الصاعقة على طاولة وحدة..أما أهاليهم توزعوا بالقاعة..ودار الحوار التالي: أفنان:قطيعة!!شوفوا مين قاعد هناك!! التفتوا للجهة اللي أشرت لهم عليها..... مرام:يوووه هذي عبير!!بس مين عزمها؟؟ نجلاء:لاتكون اسمهان حسنت العلاقة معاها وعزمتها؟؟؟!!!!! رانية:لا..لا مو معقول..بس هالأشكال يجون حتى لو ماحد عزمهم!!يعني يقطون روحهم غصب!! أفنان:الله يعدي هالليلة على خير..يظهر انها ورانا ورانا!!!! وشوي وجت أم العريس وخالته جوهرة وكانوا قمة في الذوق والأناقة اش تسريحات واش مكياج ومعاهم أحلام أخت عبدالرحمن اللي وصلت من أمريكا قبل كم يوم وعمات عبدالرحمن وبناتهم وبعض أقاربهم..يعني القاعة كانت متروسة حضورواستقبلوهم الجميع بالغطاريف والمغطرفة اللي جالسة عند الباب ماقصرت صكت أذاني الحضور بصوت الغطاريف..!! وشوي قالت أفنان:ماتصدقون اش كثر أنا مشتاقة أشوف اسمهان!اش رايكم نطلع غرفتها ونفاجأها ونسلم عليها؟!! نجلاء:لايالهبلة..المفاجأة بيكون لها طعم ألذ لما تكون بالصالة وقدام المعازيم! وقاموا الشلة يتلفتون حولهم ويقولون تعليقاتهم السلبية والايجابية في كل ماشاهدت عيونهم !!ومن ضمن الكلام: مرام:ماتلاحظون شي غريب؟؟؟عبير لبسها مرة حشمة!!مغطيها من رقبتها لرجولها لافتحات ولاشي؟؟ أفنان:ماشاء الله مبين على أهلها ناس ملتزمين مثل أهلي!بلاكم ماشفتوا أمي كيف بغت تذبحني على هالفستان اللي أنا لابسته على ذوقكم!!!! نجلاء:أي ملتزمين واللي يرحم والديك؟؟ شوفي أمها على كبر عمرها لكنها لابسة فستان مشخلع ومهوى من كل جهة!! رانية:السالفة ومافيها الرفالة الزايدة!تلاقون ايديها ورجليها معششة غابات من الشعر ومافيها تنتف الأخت!! مرام:كان شالته بالموس على الأقل!! رانية:يمه هذي دلوعة ماتقدر! لو جرحت نفسها بيغمى عليها وتقول يااااااااي دم!! ههههههههههههههه وطلعوا الشلة يرقصون شوي......وسلموا على الطقاقة اللي سبق اتفقوا معاها بالتليفون على اللي بيسوونه وراحت رانية تدفع لها بيزات!!! طبعاً بهذا الوقت كله اللي كانت اسمهان قاعدته بغرفتها كانت المصورة معاها تصورها... وشوي طلعت أمها لها وقالت لها:اسمهان عريسك ينتظرك تحت بنزفك معاه لين مدخل القاعة بس عشان تتصورون بالسينما المباشرة!وعقبها يرجع لقاعة الرجال..وانتي تدخلين وتبدأ زفتك عند الحريم..وبعدماتنتهي جلستك بقاعة الحريم تقعدون بغرفة ويلبسك الشبكة وتصوركم المصورة مع بعض!!!! اسمهان:ان شاء الله...وبدأ قلبها يدق..وإيديها ترجف..وريقها ينشف!!وساعدوها أخواتها بالنزول للقاعة..وكان لها مدخل كبير وبعدين تدخل من بوابة على الحريم.. دخلت هي من المدخل ولقت عبدالرحمن بانتظارها!بس شافها شهق وقال:ياأرض احفظي ماعليكِ!!! أم اسمهان:إحم إحم..شلونك ياولدي؟؟ عبدالرحمن:هلا هلا أم محمد المعذرة ماانتبهت لوجودك!!!! أم اسمهان:اللي مآخذ عقلك يتهنابه!!! ورجع عبدالرحمن اللي كان كأنه متخدرمن منظر اسمهان ومسك يدها وقال:ماشاء الله تبارك الله..كأني بحلم..يحسدك حتى القمر من زود حسنك!!!!!! أم اسمهان قامت تكلم اخواتها اللي متغطيين بصوت هامس وقالت:لااااااا هالولد شكله منتهي!أقول ياعريسنا ترانا ناديناك عشان تتصور بالسينما انت وياها وتقطعون التورتة وعقبها الله يحفظك ارجع لقاعة الرجال لين نناديك تقعد معها .. عبدالرحمن:فهمت فهمت.. ووقف جنبها وحط ايده بيدها والنسوان داخل القاعة يتابعون على الشاشة..... قامت عبير تكلم بنت خالها اللي قاعدة جنبها واسمها مروة... عبير:مالت عليها ماتستاهله!!والله انه كشخة ووسيم!!! مروة:والله حتى هي تهبل ومزيونة حيل! عبير:كسر يكسرها ماتوقعتها بتطلع بكل هالحلا..تصدقين قعدت أدعي ان مكياجها يخرب وشعرها يعتفس!!بس مصيبة!طلعت من تحت إيد كوافيرة شاطرة..ماتقولين إلا أميرة من أميرات القصص الخيالية!!!! وقطع عبدالرحمن واسمهان التورتة وأكلوا قطعتين سوى..ووقفوا يتصورون فوتوغرافي وبعدها راح هو...ووقفت اسمهان قدام باب قاعة النساء وراحوا العاملات الفليبينيات وخلوها تركب بعربية ذهبية مثل عربية سندريلا وفتحوا باب القاعة وانتشر دخان وفقاعات ومن بينها خرجت العربية اللي راكبتها اسمهان وصوت الخيول يملأ القاعة والمؤثرات الصوتية..ووصلت العربية إلى مشارف المسيرة الطويلة ووقفت وجاءوا أولاد محمد أخوها سعيد ووليد وهم لابسين ثيابهم وأشمغتهم ومشالحهم والسيوف مغروسة بأغمادها في أحزمة لابسينها وفتحوا لها باب العربية ونزلت...وطلعت على المسيرة...وبدأت الغطاريف وصوت الطقاقة:ألف الصلاة والسلام عليك ياحبيب الله محمد..ولللللللللللويه(غطاريف!! !!)ومشت اسمهان كم خطوة وجابوا لها عاملتين فليبينيات صندوق كبير بعجلات يسحبونه قدامها وصفقت اسمهان بيدها وطلع دخان من حول الصندوق وانفتح وطلعوا منه بنات أختها ابتسام سارة وهيفاء ولابسين جلابيات كويتية وهامات على شعورهم وقلايد طويلة اكسسوار يشبه الذهب وكفوف وبيدهم مسكة الورد حقت اسمهان وقدموها لها وسحبوا العاملات الصندوق ووقف سعيد ووليد قدام خالتهم وقدامهم البنتين وطقت لهم الطقاقة طق خليجي ورقصوا بالسيوف لمدة ثواني وبعدها بدأت الزفة وصارت اسمهان والأطفال يمشون ببطء بموال: ياالله يارحمـــــان ياذا الجلالِ ياحي ياقــــيوم يـــاذا الكمالِ ياجامع الأحباب حيٍ مع حي شرقن ثم غربن ثم جنوب وشمالي شمالـــــــــــي شمالـــــــــــــــــي ياموفقٍ أحبــــاب بليلة سعيدة يامحققٍ حلمن توده الليـــالي يامزين وجه اسمهانٍ ببسمة ياواهبٍ لها كل الحلا والجمالِ الليلة زانت ياعروس بحضورك ياللي وصوفك صدق فاقت خيالي خيــــــــــــــالي خيــــــــــــــالي وفجأة سكتت الطقاقة!!لأن رانية غمزت لها وطلعت رانية على المنصة ووقفت قدام اسمهان وبيدها الميكرفون وقالت تزف بالسوري: آآآويها وعروستنا حلوة وجزابة آآآويها وقد شو طيوبة وحبابِة آآآويها والليلة كتب اكتـــــــابك آآآويها والله يحميك لشبابــــك للللللللللللللللللللللللللوش واسمهان من هول المفاجأة دمعت عينها وحطت يدها على فمها قامت رانية حضنتها!! وكانت أبلة جوهرة تراقب المنظر وقالت: ياحبهم للبكش بنات الثانوي ماكأني عطيتهم فرصة أسبوعين يهذرون مع بعض من الصبح للظهر!وهالحين مسووين أنفسهم أول مرة يشوفون بعض!!!!!!!!!!!!! وطلعت نجلاء على المسيرة من الجهة الثانية وقالت بالسوري: آآآويها وحصوة بعين الحسود آآآويها وبزكر الله يالساني جود آآآويها وخديها منـــي وصاية آآآويها خليكي خلوئة ومرباية لللللللللللللللللللللللللللللل وش وتفاجأت اسمهان أكثر لأنها ماتوقعت حضورهم وفرحت مرة..... وطلعت مرام وبالسوري قالت: آآآويها واسمهان قمر بالليل عم بيلالي آآآويها والقمر قال راح أؤم وتعي بدالي آآآويها وعقبال كل الصبايا بعدها وعقبالي آآآويها يامين بيرخص لك كل نفيس وغالي لللللللللللللللللللللللللللللل للللللللللللللوش وطلعت أفنان وقالت: آآآويها وربي يديم فرحك وأنسك آآآويها وعئبال مانبارك لك بعرسك آآآويها ولاتاكلي إلا على ضرسك آآآويها ولاتنسي تحصني نفسك! لللللللللللللللللللللللللللللل للللللللللوش وغمزوا للطقاقة وغنت لهم أغنية سورية بالدفوف بس ورقصوا رقصة الدبكة واسمهان وسطهم وقاموا الحضور يصفرون لهم..وبس وقفوا الدبكة...قالت الطقاقة الأغنية التراثية المعروفة: لاإله إلا الله ولا إله إلا الله واسمهــــــــان ماشاء الله ورقصوا البنات خليجي رقصة وحدة لحد ماوصلوا للكوشة...وجلست اسمهان..وسحبت رانية المايك من الطقاقة وقالت: الله يمسيكم بالخير هديتنا لعروستنا بهالليلة هي أبيات من تأليفي وغنائنا جميعاً وان شاء الله تنال رضاكم!!!!!!!!! وبدأت الطقاقة بالطق ورانية تقول: لاتلوم عين اشتكـــــــــت من حسن نورٍ شع منك وجهرها ولاتلوم نفسٍ لاسهـــــــت عن قول ماشاءالله من جمال ٍبهرها نجلاء: كل الغلا يازين صوبك دعاني أكتب قصيدي فيك بأحلى معاني الشلة: يحفظك ربك لناسٍ حيل تغليك مثل الأميرة وعسى ربي يخليك وعادوا وزادوا في الأبيات وبعدها طقت لهم الطقاقة طق يونس وقاموا يرقصون باندماج عجيب والطقاقة تقول:عاشوا عاشوا لابسات الوردي..فوق فوق فوق..ورا..ورا..ورا.إنزل إنزل إنزل إطلع إطلع إطلع....وعاد رانية من الاندماج بغى يطقها الزار..ههههههههه وأم اسمهان تراقب من بعيد وتقول:الله يسعدهم ونسونا.. أما اسماء رفعت حواجبها ومحد عاجبها وطلعت للكوشة وقالت لاسمهان بهمس:بالله تضفين شلة القرنبع اللي مرتزين على المنصة وحاجزينها على حسابهم..ترانا موب ناقصين عاهات!! حِنا جايين نستانس؟؟ولا نصير شماتة قدام ربعنا وأهلنا؟؟؟؟؟؟؟ اسمهان(وبصوت منخفض وهي مبتسمة):خليهم على راحتهم والله محد محلي الملكة إلا هم!!! وانبسطوا الحضور على شلة اسمهان اللي سووا جو غير عادي برقصهم ودجتهم وطقهم للطيران وكانت رقصاتهم أحياناً فيها شي من الكوميديا بالذات رانية خلت اللي مايرقص يرقص,,وطلعوا قريبات اسمهان البنات وكلن يسألها:هذيل ربعك؟؟يهبلون وناسة!! واللي يقول:يابختك فيهم....الخ.... وماقصروا قوموا اسمهان ترقص معاهم أكثر من مرة وونسوها وطلعوا كل أحبابها يسلمون عليها على الكوشة..وبعد شوي أخذوا أهل المعرس اسمهان لغرفتها فوق عشان تجلس مع المعرس ويلبسها الشبكة اللي أساساً خلال الملكة سووا زفة خاصة للشبكة وكانت عبارة عن دولاب كبير قزاز ومشرع بزينة فخمة وفيه الشبكة+شوية ذهب+دٍبل+ساعات +عطورات+تحف+لبان+بخور وغيره وراحت اسمهان لعريسها وقاموا الشلة يلبسون عبيهم وودهم ينطلقون وراها بس اسماء مسكتهم عند الباب وقالت:خير ان شاء الله!على وين العزم؟ رانية:بنروح نشارك اسمهان فرحتها بالشبكة... اسماء:أنا وأنا إختها مارحت معها!!بالله ارجعوا وتفضلوا على قاعة العشاء!! ورجعوا الشلة مكسورين الخاطر واتجهوا لصالة العشا مع الناس..وهم يغرفون أكل بصحونهم من البوفيه مرت عبير وقريبتها مروة من جنبهم وقالت عبير بصوت عالي:أعرفك يامروة هذي شلة الطقاقات المتحدة!أصوات ولاأنشز..ويغنون بلا مقابل مادي لأنه يستحيل في أحد أثول بيدفع لهم قرش على هالخمام!!!!!!!!! رانية:الصراحة مادرينا عن موهبتك المدفونة والا كان جبناك تغنين معنا!! عبير:يكون لكم الشرف! نجلاء:أي شرف؟ياأم شرف؟تقولون عنز مخنوقة؟!!!!!!! عبير:من زينكم وانتم ذكرتوني ببنات جدي أيام الفقر كانوا يشترون طاقة قماش ويفصلونها ويلبسون منها سوى!كأنها ملابسكم هاذي!! رانية:من حلاتك وانتي لافة خيمة من راسك لرجولك ماينشاف اصبعك حتى وقال كاشخة!!!اقضبي لسانك وفارقي قبل ماأحوس وجهك بذا الكيك!!! أفنان:لايارنونة حرام تخربين كشختك عليها!! قامت عبير وشمقت فيهم بذيك النظرة وعطتهم مقفاها وراحت... مرام:بلا يبلاها ملاحقتنا بكل مكان... وجلسوا الشلة على الطاولة يتعشون وعبيروه ماخلتهم بحالهم كل شوي وهي قاطة عليهم كلمة..وتحملوها بس يوم قاموا يغسلون أياديهم لقوها بالحمام تعدل مكياجها! أفنان:خلص العرس يامال العمى!! عبير:واش لك يالملقوفة ؟أحب أظل حلوة لآخر لحظة!! نجلاء:بالله اسكتوا لاأحد يكلمها! عبير:ليش؟فيني جرب ياروح أمك؟؟؟ رانية:إلا فيك من الغثاثة أطنان!حطي لسانك بحلقك واطلعي... عبير:ماني بطالعة مو بحمامكم!! رانية:اسمعي يابنت ..من الأول وحِنا مستحملين تعليقاتك السخيفة وقت العشاء وعادينك مريضة عقلياً..حدك عاد لاأمسكك مع شوشتك وأغط راسك بحوض المغسلة!!!! عبير:عرابجة!! وش يجي منكم غير كذا..وخرجت من الحمام!!!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
دخلت اسمهان الغرفة وجاء عبدالرحمن أخذ كم صورة وأمه وخالته وجوهرة وأخته أحلام وأم اسمهان وأخواتها واقفين معاهم ولبسها الشبكة وباركوا لهم.. أحلام:ألف مبروك ياعروستنا الله يوفقكم ويحفظكم لبعض أبلة جوهرة قربت من اسمهان شوي وقرصتها بإذنها وقالت:مبروك وان شاء الله الجاي أحلى!الله يعينني المدارس عقب أسبوع!!!! عبدالرحمن:وش تقصدين ياخالة؟! جوهرة:هذي شفرة بيني وبين اسمهان وهي أدرى بقصدي!!!!! أم عبدالرحمن:مبروك ياأحلى عروس بالدنيا الله لايضرك ويحفظك لأهلك ولزوجك وعقبال مانشوفك ببيتك ان شاء الله.... أم اسمهان:جزاك الله خير... وخرج الجميع من الغرفة وتركوا المعاريس لحالهم!! (وشفيكم ابتسمتوا ياعضوات؟؟؟أدري هذا اللي تبونه من أول القصة!هههه) ساد الصمت واسمهان رايحة فيها من الخجل وتناظر الأرض!! وعبدالرحمن بياكلها بنظراته!! عبدالرحمن:شلونك؟ اسمهان:بخير عبدالرحمن:بنظل ساكتين على طول؟؟؟ اسمهان:اش أقول؟؟ عبدالرحمن:كلميني عن نفسك.. اسمهان:مايحتاج!كل شي تعرفه عني! عبدالرحمن:بس انتي ماتعرفين شي عني! اسمهان:طيب قول.. عبدالرحمن:بأسألك سؤال يمكن غيري سبقني وسألك اياه؟اش شعورك اليوم؟؟؟ اسمهان(بغرور):عادي مثل شعور أي مواطنة سعودية زفوها لعريس المستقبل!! عبدالرحمن:ههههه لااا تعرفين تعبرين! اسمهان:طيب اوصف لي انت شعورك! عبدالرحمن:أنا مثل اللي احبسوه 30 سنة بسرداب تحت الأرض من غير زاد ولانور ولاهواء وفجأة اطلقوا سراحه!!!!تتوقعين كثر ايش بتكون فرحته؟؟؟ اسمهان:ليه سجين سياسي؟! عبدالرحمن:هههههههه..عسل يااخواني عسل!إلا سجين العزوبية ياسمهونتي! تسمحي لي أناديك بسمهونتي؟؟ اسمهان(بخجل):أكيد! عبدالرحمن:الكل يدري وش كثر كنت مخنوق أيام العزوبية وأحلم بالاستقرار..والحمدلله تحقق حلمي! اسمهان(ببكش!):الصراحة أنا آخر أحلامي الزواج لسه قدامي أكمل الثانوي وبعده الجامعة ويمكن ماجستير بس اش أسوي ؟النصيب! عبدالرحمن:مغصوبة يعني؟!!!!!! اسمهان:لا بس حبيت أفرح أمي وأبوي!!! عبدالرحمن:أقول ياشين التغلي!!ماكأنك رحتي تشرين لبس جديد مخصوص لي يوم الشوفة عشان تلفتين انتباهي!!!!! اسمهان(بكل سذاجة)قالت:يوووووه مين قال لك؟؟؟ عبدالرحمن:ههههههههههه يعني صدقت البنت الصغيرة؟!أظنها بنت وحدة من خواتك!! اسمهان بنفسها حست بفشلة وقالت يابنت بلاها تمثيل!! وجلس عبدالرحمن يتأمل شكل اسمهان بصمت وقال:تصدقين؟كنت زمان أقول أروع عروس قد شفتها بحياتي أختي أحلام..بس انتي اليوم خليتيني أغير رأيي!!كل شي فيكي حلوومبهر.. اسمهان:شكراً هذا من ذوقك! عبدالرحمن:طيب وأنا اش رايك فيني؟؟؟ اسمهان:من أي ناحية؟؟ عبدالرحمن:بمظهري! اسمهان:ثوب وبشت وشماغ..مثلك مثل أبوي! عبدالرحمن:أفااااااا..يعني.... إلا قطع حديثهم صوت الباب وقامت اسمهان تفتح باب الجناح اللي جالسين فيه ولقت أخوها محمد وجايب لهم عشاء عروسين فاخر..وعاد اسمهان قام بطنها يقرقر بس مستحية تاكل ونظرات العريس مسلطة عليها!! وجلس محمد معاهم شوي يسولف.. محمد:هاه..ياعريسنا..اش رايك بالعروس؟؟؟ عبدالرحمن:بدر ليلة تمامه ماشاء الله تبارك الله! محمد(وقام يغلس على اسمهان بمزحه الثقيل!):لايغرك!ترى لو غسلت وجهها مابتعرفها!بلاك ماتدري عن هذول النسوان تروح الوحدة الصالون وتعطي الكوافيرة كل فلس بجيبها وتقول لاأوصيك كل علب البوية اللي عندك كبيها على وجهي!!والكوافيرات مايقصرون!تصدق؟قبل شوي قابلت زوجتي ماعرفتها!!! عبدالرحمن:هههههه..حرام عليك والله الحلو حلو ولو قام من النوم! اسمهان(بغيظ):مقبولة منك ياأبوسعيد!! محمد:وعاد الله يعينك ياعبدالرحمن على هالسمهونة !يوم الزواج بأعطيك فاتورة وانت ماخذ اسمهان مكتوب فيها البضاعة المباعة لاترد ولاتستبدل!! عبدالرحمن:هههههههه..ياشيخ اتقي الله والله انت ظالم هالقمر بكلامك! محمد:أي ظالم؟هذي ملسونة ياولد الناس..تراك كسبت فينا جميل يوم خذيتها! بلاويها بتنتقل من عندنا لك!وعليك بالعافية! اسمهان(بعصبية):جاي تبارك؟ولا تتشمت؟ محمد:لا جاي أستفزك عشان يشوفك عبدالرحمن وانتي مكشرة عن أنيابك!ويحرِّم بيوم من الأيام يزعلك!! واستأذن محمد من العرسان وتركهم يتعشون وخرج وشوي ودق الباب إلا هو أبواسمهان وأمها ومعاهم بنات ابتسام(سارة وهيفاء)... الأب:مبروك..مبروك..ماشاء الله وش هالزين كله؟؟الله يوفقك ويحفظك يابنتي.. الأم:عاد أبوك جاي مخصوص هو وبنات ابتسام عشان يتصورون معاك... اسمهان:هلا فيك... ووقفوا جنب بعض والأم تصورهم بكاميرا الفيديو..وجلسوا يسولفون.. وقال عبدالرحمن:يازينهم هالبنيات!انتوا اللي شفتكم بيوم الشوفة؟؟ سارة:إيوه إنت اللي شفناك اليوم اللي طاحت فيه خالة اسمهان..!! عبدالرحمن:ههههههه وناظرت فيه اسمهان بنظرات حاقدة خلته يسكت! هيفاء:شوفوا خالة اسمهان كيف تشمق..تحسب نفسها حلوة!!!!!!!!! أما الأب قام يتنحنح وقال:تعشوا ليه مخليين عشاكم؟ الأم:طيب خلنا نعطيهم فرصة يتعشون ونطلع إحنا.. وخرج الجميع من الغرفة وبقي العروسين..وكانت اسمهان ودها تنط بالصحون من الجوع!بس الحيا مانعها تحط لقمة بحلقها قدام خطيبها!! عبدالرحمن:يلا..مدي يدك وقولي بسم الله... اسمهان:لااااا..كل إنت أنا مالي نفس! عبدالرحمن:وليش مالك نفس؟..الأكل شكله لذيذ وريحته تشهي.. اسمهان:صحيح..بس أنا متعودة على الأكل الخفيف..وماأحب آكل بالليل.. عبدالرحمن:طيب لو أكلتك أنا بيدي مابتنفتح نفسك؟؟ اسمهان:لا...لأني فعلاً حاسة بشبع... عبدالرحمن:براحتك..بس الصراحة أنا ميت من الجوع وقام ياكل.. واسمهان تتابعه ولعابها يسيل بس تكابر!!وبنفسها تدعي إن الأكل مايخلص!! وقام عبدالرحمن يحكي له قصصه القديمة وطفولته ودراسته وحياته وهي تسمع والجوع ذابحها!ومر الوقت....وأخيراً دق الجوال..أجرى عبدالرحمن مكالمته وقفل السماعة وقال:هذي الوالدة..الوقت تأخر ولازم أوصلها هي وخالتي جوهرة البيت! اسمهان:وأحلام؟وينها؟ عبدالرحمن:أحلام سبقتهم على البيت مع زوجها وعيالها وراح عبدالرحمن دورة المياه اللي بنفس الجناح يغسل يدينه..وماصدقت اسمهان انه يروح وانقضَّت على الصحون تاكل بسرعة قبل مايرجع عبدالرحمن ويشوفها! لكن المفاجأة انه عبدالرحمن غسل يدينه ورجع بهدوء ومن غير ماتحس وقف وراها وظل يراقبها وأختنا في الله منهمكة تحشي فمها وتجهز اللقمة اللي وراها! عبدالرحمن(وبداخله ضحكة!):على هونك على هونك لاتشرقين يابنت الناس!!ماوراك َطرَّادة!! اسمهان بخرعة:بسم الله!انت من متى ورايا؟؟(وفمها مليان واللقمة تتطاير منه!!) عبدالرحمن:من اللحظة اللي أعلنتي فيها الهجوم على محتويات الصحون!!ههههه..كلي كلي بالعافية! وشوي واسمهان من خرعتها إلا شرقت بذيك اللقمة وصارت مختنقة وتكح وصار عبدالرحمن مو عارف اش يسوي وقام يخبطها بأقوى ماعنده على ظهرها!! ومحمد وأمه كانوا يطقون الباب وماسمعوهم العروسين اللي كانوا مشغولين بزحلقة اللقمة المحشورة بحلق اسمهان! محمد:يمه أنا قامت تراودني الشكوك! الأم:توكل على الله وافتح عليهم الباب! وماكذب محمد خبر وفتح الباب ولقى اسمهان واقفة ووراها عبدالرحمن اللي جالس يخبطها بقوته على ظهرها والبنت وجهها أحمر وعيونها تدمع!! محمد(بعصبية):هييييه إنت! وشفيك تضرب أختي؟؟مامداك تشوف خيرها من شرها ..وقمت تمد إيدك عليها؟؟؟؟ الأم:يمه بنتي وش سويت فيها؟؟؟ عبدالرحمن:البنت مختنقة حرام عليكم..قاعد أساعدها! إلا الأم مسكت البنت من وراها ولفت ايدها حول خصر اسمهان وضغطت عليها للأمام وتفلت اسمهان اللقمة ورجعت الحياة لوجهها!! عبدالرحمن:واااويلي ويلاه..آثاري حالتك صعبة لاصرتي جوعانة!!! الأم:بسم الله عليك يابنتي..ياشين طفاقتك دايم أوصيك كِلِش ولاالعجلة بس ماتسمعين! محمد:لاإله إلا الله..أحد قايل لك إن الأكل بينقرض من الأسواق؟!! عبدالرحمن:ياجماعة الخير قولوا لها الحمدلله على سلامتك..أزمة وعدَّت!! الأم:ياولدي ترانا طلعنا نقول لك إن أمك وخالتك بانتظارك في مدخل الفندق..وجينا نلم أغراض اسمهان عشان نسري! عبدالرحمن:يعني طردة؟؟؟ محمد:ياشيخ لاتستعجل بكرة بتزهق منا وبنزهق منك! ودخلت الأم الغرفة اللي بالجناح تجمع أغراض اسمهان وأغراضهم الثانية اللي جابوها معاهم وتعطيها محمد اللي كان قاعد ينزلها... واستغل العريس الموقف وقام يودعها بطريقته الخاصة!!!!!!!!!!!!!!!!!! ثم قال:اسمهان أبيك تعطيني رقم جوالك! اسمهان:بس أنا ماعندي جوال! عبدالرحمن:معقوووووله؟؟في بنت بهالزمن ماعندها جوال؟؟؟ اسمهان:إيه..أنا! عبدالرحمن:أجل شلون نتواصل؟؟ اسمهان:على تليفون البيت الثابت! عبدالرحمن:صعبة!كذا ماراح يكون في خصوصية وبتكلميني والعيلة كلها جنبك! اسمهان:اش أسوي أجل؟؟ عبدالرحمن:ولايهمك بأحلها بطريقتي..... ........وتوادعوا وراح عبدالرحمن وطلعوا اخوات اسمهان وساعدوها في تبديل فستانها ولم الأغراض ورجعوا بيتهم...... وأما عبدالرحمن طول ماهم في السيارة هو وأمه وخالته وهم يتبادلون أخبار الملكة.....واش صار ودار.. وكملوا السوالف بالبيت..ورجعت خالته جوهرة معاهم.. وأما اخوان عبدالرحمن خرجوا من الملكة بدري عقب عشا الرجال مباشرة وواحد سافرلأشغاله..والثاني رجع نام...... ودخل عبدالرحمن يبدل هدومه..... أبلة جوهرة:أما أهل العروس ماشاء الله ماقصروا كل شي فخم وراقي سووه بملكتهم..من جميع النواحي من القاعة للضيافة لكل الترتيبات... أحلام:أنا استانست مرة..والله زمان عن أعراس السعودية..كل شي بالملكة كان يهبل وخصوصاً العروس!ماتوقعت ذوقكم بيطلع حلو لهاالدرجة!! أم عبدالرحمن:الله يخليهم لبعض..العروس الله يحميها طلع لها طلعة بالفستان والتسريحة والمكياج.. جوهرة:فعلاً..ماتخيلتها أبداً بتكون بذا الحلا كله.. أم عبدالرحمن:أما أنا ياجماعة خقيت عند لابسات الوردي!!!اسمهان حلوة وقرايبها حلوين مثلها! جوهرة:ومين قال لك إن لابسات الوردي قرايبها؟؟هذول صاحباتها بالمدرسة! أم عبدالرحمن:ياحليلاتهم..شكلهم يحبونها مرة..مطقمات ملابسهم مثلها..وغنوا لها ورقصوا لها..ماقصروا أحلام:فعلاً سووا أجواء غير عادية بالقاعة حتى الطيران خذوها وطقوا فيها..ونسونا الصراحة... إلا عبدالرحمن جاء وقعد معاهم...... جوهرة:مبروك ياعريس..إلا اش أخبار العروس؟ عبدالرحمن:اسكتوا مادريتوا اش صار! بغت تفطس علي وتروح بغمضة عين! أم عبدالرحمن:ليش؟واش سويت فيها ياالمهبول؟ عبدالرحمن:أنا برررررررريء!ماسويت شي!بس يظهرإن الجوع ألح عليها إنها تسكته بأي وسيلة!وماقصرت شرقت شرقة قوية!!!!وأهلها دخلوا علي وحسبوني أطق بنتهم! أم عبدالرحمن:ياحليلك ماقد قابلتها إلا مرتين وبكل مرة تواجهك معها مواقف!هالحين شرقة وأمس طيحة هههه! أحلام:وش سالفة الطيحة هذي بعد؟علموني! وقعدوا يتكلمون طول الليل ويضحكون على المواقف وعلى مواقف ثانية حصلت لكل واحد منهم بالماضي... طبعاً يوم الملكة كان مُرهق للعروسة وأهلها اللي ماصدقوا يوصلون البيت ويحطون رووسهم وينامون.. وطبعاً أبواسمهان كان عازم كل الأقارب اللي حضروا ملكة اسمهان اليوم الثاني يعني أخوالها وأعمامها وزوجاتهم وعيالهم.....والجدات.. وثاني يوم صحيت اسمهان بعد الظهر..ونزلت تحت بالصالة وكانوا أهلها مجتمعين أمها وأبوها وأختها ابتسام... أبواسمهان:أهلاً وسهلاً بالأميرة النائمة! اسمهان:أدري مصختها بالنومة بس لاتلوموني من التعب اللي فيني.. أم اسمهان:من التعب اللي فيك؟والا من الطق اللي خذيتيه البارح؟؟؟؟ الجميع:هههههههههههههه اسمهان:ماشاء الله علمتيهم يمه؟!! ابتسام:و دي حاجة تستخبى يختي؟! البارح قلت سالفتك لزوجي وقعدنا طول الليل نضحك! اسمهان:ماشاء الله صرت سالفة الموسم! أبو اسمهان:مايخالف يابنتي!أهم شي صار عندك مناعة من الطق..احتياطاً لو طقك عقب العرس!! الجميع:ههههههههههه وقام الأب يجلس بالمجلس مع زوج ابتسام...الا التلفون يرن راحت اسمهان ترد وطلعت المتصلة رانية.. رانية:السلام عليكم.. اسمهان:وعليكم السلام..ياهلا رانية:لللللللوش(تغطرف على السماعة!) هلا وغلا بأحلى عروس شلونك يابنت؟؟ اسمهان:الحمدلله...تمام وقبل ماتقولين لي أي شي حابة أشكركم من كل قلبي انتي والشلة..الناس سابت العرس وصرتوا انتوا محور الحديث!ولسه اليوم عندنا عشا بالليل أكيد الكل بيسألني عنكم مثل أمس!!يعني ماتفكونها هالمقالب.. رانية:الحمدلله,,أهم شي إنك انبسطتي واستانستي. اسمهان:بس أموت وأعرف ليش لبستوا وردي؟وش دراكم إني بألبس هااللون؟؟ رانية:الحاسة السادسة! اسمهان:ماظنتي! قد ماقلَّبت السالفة براسي مو راضية تجي معي! رانية:وأنا بعد عندي سؤال حاشرني بحلقي من أمس وودي أسألك إياه!ياترى عبير ليش عزمتيها؟ اسمهان:أعوذبالله ومين قال إني عزمتها؟أخوي محمد عزمهم بصفتهم جيرانه ومن جماعة أم زوجته وقريباً الله لايقدِّر بتسير عروسة ولدهم تركي!!!!! رانية:وعععع..وزوجة أخوك مالقت غير عبيروه تخطبها حق أخوها؟ اسمهان:هذا نفس سؤالي لها..بس عاجبتهم..الناس أذواق! رانية:وتدرين بهالسالفة من زمان؟ اسمهان:تقريباً من كم أسبوع! رانية:غريبة ماعلمتينا؟ اسمهان:لأني دارية انكم بتتشمتون فيني..وتظنوني بأبدأ أغير نظرتي لها عقب ماتسير زوجة أخو زوجة أخوي! رانية:وش دعوى سمهونتي؟انتي مالك علاقة..وموب انتي اللي خطبتيها..الله ياهي رفعت ضغطنا أمس بسخافتها وتعليقاتها اللي مالها داعي...بس الله لايبلانا! اسمهان:ماعلينا من سوالفها..أهم شي انتم اش رايكم بليلة أمس من جميع النواحي؟ رانية:ماشاء الله تهبل ومن غير مجاملة من أحلى المناسبات اللي حضرتها حتى أمي استانست..ليلة مرتبة ومنظمة وراقية بكل شي..صراحة ماطلعنا منها إلا وحِنا راضيين وماودنا تنتهي..بس انتي هاتي أخبار المعرس واش صار معكم؟!!!! اسمهان جلست تحكي بالتفصيل وبصوت منخفض وش صار معاها ورانية بس تضحك... رانية:صدق إنك مفجوعة وموب وجه نعمة!أجل تحشين كرشك والرجال بعده ماطلع؟!هههههههه وافشيلتاه!والله لو إنك رحتي فيها كان نزل الخبر بالجرايد (عروس تختنق بلقمة في ليلة عقد قرانها بعد محاولات فشل في انقاذها)!!!ههههههههههه الله يقطع سوالفك يااسمهان! اسمهان:يلا عاد عن هرجك الماصخ على طاري الأكل بطني قام يصوصو!ترى بعدي ماذقت شي من عشا البارح!وعن إذنك بأروح آآكل.. رانية:روحي بالعافية..بس انتبهي تشرقين..ترى عبدالرحمن بن سوبرمان هالمرة موب جنبك!!!!هههه اسمهان:مع السلامة رانية:مع السلامة... **الجزء التاسع والعشرون** نستكمل الأحداث السابقة اللي كانت ثاني يوم الملكة توالت الاتصالات على اسمهان من الشلة بالأول رانية وعقبها نجلاء وبعدين مرام ويليها أفنان والكل كان مبهور بجمال الملكة ويثني على اسمهان وأهلها إلا أسماء..... نجلاء:تصدقين ياسوسو؟؟أهلك كلهم عسل بالذات أختك ابتسام وزوجة أخوك..أما أسماء عالم آخر من النكد والعصبية!!يمكن ليش إنها حامل! اسمهان:إلا وانتي الصادقة المثل يقول:زيح جبل..ولاتزيح طبع!!!!! نجلاء:فاتك ياسوسو نظرات أبلة جوهرة لنا يوم ملكتك وتعليقاتها..ياحليلها شكلها خفيفة دم بالواقع مو مثل شخصيتها الجدية بالمدرسة!!!!!!! اسمهان:ليش؟وش قالت لكم؟ نجلاء:قالت آثاريكم من زمان يبي لكم عرس تطلعون طاقتكم فيه؟!!!!!!!! بدال ماتطلعونها على غير سنع بالمدرسة!!!!!!! ومسكت رانية من إذنها وقالت:أخيراً صار شكلك أنثى؟؟عساه دايم! اسمهان:هههههههههه...حتى أنا مسكتني من إذني وقالت الله يعينني المدارس عقب أسبوع!!! نجلاء:الجاي أحلى إن شاء الله..مادام وحدة فينا انخطبت..فإن شاء الله تعقل وتنتقل العدوى بين البقية!!! اسمهان:وش دعوى؟الزين عندنا والشين حوالينا!على الأقل حِنا مانغلط على أحد إلا إذا غلط علينا..مو مثل شلة المنشار اللي كانت معانا العام وكل يوم والثاني مسويين فضايح وكل فضيحة وفضيحة أكبر من اللي قبلها!!! نجلاء:الحمدلله ربنا فكنا منهم وكل وحدة نقلت بمكان..بس كنت أموت وأعرف ليش مسميين نفسهم شلة المنشار؟؟أبائهم نجَّارين؟؟؟؟ اسمهان:هاهاها..لا مآخذين الحرف الأول من اسم كل وحدة فيهم..منشار م:مها,,,,,,,ن:ندى......ش:شهد,, ,,ا:أريام.....ر:رشا!!! نجلاء:الحمدلله على نعمة العقل!!! اسمهان:يعني من زين اسمنا هالحين؟ بدل مانختار لأنفسنا اسم رومانسي وهقتنا رانية بإسم الصاعقة اللي يفشل!!مابقي إلا نلبس ربطات سوداء ونعلق جماجم!!! نجلاء:هههه..ياحليلك ياسوسو..بغض النظر عن الاسم جمعتنا ذكريات حلوة مع بعض.. ويكفي إن اسمنا يهز!! ودخلوا الصديقتين من سالفة لسالفة ووصلوا لعبير.. نجلاء:أما عبير هذي عبيطة بشكل !فاتك يااسمهان يوم رحتي لخطيبك طلعت هي ترقص..والله لايوريك من رقص مابقى أحد بالقاعة إلا وتفقع من الضحك!تصنع ومياعة مو طبيعية..أما ذاك اليوم ماكانت هالبنت صاحية سوت شغلات غريبة!لكني قلت بنفسي يابختها شكلها جمعت حسنات كثر جبال!!!!! اسمهان:وانتي اش دراك؟؟؟ نجلاء:لإنه مابقى أحد ماتكلم فيها..أكيد أخذت حسناتهم وقطت عليهم سيئاتها!!!! وطال الهرج إلى أن جاها تلفون ثاني من أفنان ومرام.. ولما اقترب المغرب قامت اسمهان تتكشخ استعداداً لحضور أقاربها(أهل الأم وأهل الأب)لعزيمة العشاء والمباركة لاسمهان... و حضروا الضيوف عقب المغرب والكل كان مبسوط ويمدح العروس والملكة...والأسئلة انهالت على اسمهان من كل حدب وصوب.. ومن ضمن الحضور كانت هناك شريفة عمة اسمهان تتذكرونها؟؟اللي كانت تبي اسمهان لولدها فيصل!!!ومقهورة إنه محد شاورها وتبي تطلع أي عيب بعريس اسمهان وأهله! العمة شريفة:ماأحد كسر خاطري بالملكة إلا أهل المعرس يحزنون!!شكلهم ماعندهم أهل ولاعزوة!كلهم كم نفر بس! أم اسمهان:الملكة ملكتنا حِنا ياأهل العروس ومعازيمنا كثير وهم ضيوف فيها ومو معقول بيعزمون كل قرايبهم طبيعي إن عددهم محدود..وبالزواج بتشوفين الزحمة شلون بتكون!وماشاء الله هم كانوا 22 حرمة و18 رجِّال يعني نعمة..ماهم بذيك القلة اللي تقولين عنها! العمة شريفة:مدري مابلعت أم المعرس!حسيتها متكبرة!الله يعينك عليها يااسمهان! اسمهان:بالعكس جداً ذوق...وحالها بشانها! العمة شريفة:هذا لأنك ماجربتي خيرها من شرها يا الفطينة!! أسماء(بعصبية):يعني اللي بتاخذ واحد من أولادك هي اللي بتعيش في جنة؟!!!!!! فهم الجميع قصد اسماء وقاموا يضحكون..وانحرجت العمة وسكتت!!!! وقاموا بنات العائلة يتكلمون مع اسمهان ويسألونها عن العريس وعن صاحباتها ...و..و..الخ شوي إلا قام عبدالرحمن يتصل بجوال أبو اسمهان لكنه مارد عليه لأنه منشغل بضيوفه!! رجع عبدالرحمن واتصل على محمد...أخو اسمهان محمد:هلا.. عبدالرحمن:ياهلا فيك..معاك عبدالرحمن. محمد(بكل ترحيب):أهليــــــــن بأبو نسب!شلونك عقب أمس ياشيخ؟؟ماجاك كوابيس من منظر اسمهان المرعب؟!!! عبدالرحمن:استغفر ربك..أحلى نومة بحياتي نمتها البارح..وأنا مرتاح..وشلون عروستي؟؟؟ محمد:زينة...اللهم ظهرها يوجعها شوي! عبدالرحمن:سلامات؟؟ محمد: ماتنلام!!الضعيفة جاها طق موب طبيعي أمس! عبدالرحمن:هههههههه..الله يقطع ابليسك..وش تبيني أسوي؟كنت تبيني أخليها تروح من بين إيديني؟؟ محمد:عاد لو راحت من بين إيدينك كنت بتمتحنَّا وتنشب بحلوقنا وتقول:ردوا لي مهري وشبكتي..صح؟!!! عبدالرحمن:ههههه...الله يوسع صدرك يامحمد مافي سالفة تاخذها جد؟؟المهم العروس بالبيت؟؟ محمد:إيه..ليش؟؟ عبدالرحمن:بعد إذنكم ..أنا قريب من البيت وكنت بأمر ثواني أعطي اسمهان شي..!!بس أبوك مارد على اتصالي.. محمد:مو الله يسلمك عندنا عشاء عائلي الليلة..تفضل! عبدالرحمن:زاد الله فضلك..بس أنا مستعجل قلت أمر على السريع وأسلم على اسمهان وأعطيها غرض وأمشي.... محمد:ياحليلك..على طول من ثاني يوم رحت تجيب لها شي؟؟؟باقي قدامك سنة! يعني لاحق على الفَلَسْ!!!مابيجي الزواج إلا وإنت تشحت على أبواب المساجد!! عبدالرحمن:ههههه..أنا راضي مو خسارة في سمهونتي!المهم مابأطول عليك عطها خبر وخلها تقابلني بالحوش ماودي أدخل على أبوك وأحرجه قدام ضيوفه!!!! محمد:إذن تعال من الباب الخلفي ولاتدق جرس أنا بأنتظرك وأفتح لك الباب... عبدالرحمن:ان شاء الله..وهذا أنا قريب منكم... وراح محمد ينادي اسمهان وقال لها اطلعي لي بالحوش الخلفي..خرجت اسمهان لحديقة الحوش وكان عبدالرحمن قد وصل وجلس على كرسي بحديقة البيت بس اسمهان مو منتبهة ومحمد يبي يفاجأها وليته مافاجأها!!!!(كالعادة فشااااااااااايل!!!) شافت اسمهان محمد ووقفت قدامه وعبدالرحمن كان وراها قاعد على الكرسي تحت الشجرة وهي ماتدري!!! اسمهان:خير يامحمد؟وش بغيت؟ محمد:أبد..عبدالرحمن يبي يزورك الحين..قلت أشوف رايك؟نستقبله والا أزحلقه لك؟؟؟؟ اسمهان:تتكلم بجد؟؟؟؟؟ محمد:إيييييييه ماأمزح! قامت اسمهان تنط وتقول:هيييه هييييه دحومي بيجي عندي..ياحظي ومنهو قدي..(وتنط أختنا في الله موب دارية مين وراها)!!! ارتبك محمد من خبال أخته وقال:يعني بتستقبلينه؟؟ اسمهان:مايبي لها كلام أكيد إيه!فرصة مادامي كاشخة! لأني بكرة ودي أزيت شعري بعد ماخربته الكوافيرة أمس بالإسبريه!!!! ساعتها عبدالرحمن ماقدر يتمالك نفسه من الضحك وقال:ههههههههه..ياشيخة انتي حلوة بزيت أو بزبدة! اسمهان(بخرعة):عبدالرحمن؟؟؟؟؟؟ عبدالرحمن:بشحمي ولحمي!وجيت أسلم عليك وأتطمن على أخبارك... محمد:بأعطيكم فرصة تقعدون مع بعض لمدة 5 دقائق وعقبها سأضطرلتوديعك..لأن أبوي لو درى بيغسل شراعي!!!! عبدالرحمن:هههه..إبشر.. وراح محمد..وسلم عبدالرحمن على خطيبته..وقال لها: مو معقول مايكون بيننا تواصل طول هالمدة عشان كذا جيت أشوفك اليوم وجايب معي هدية تتذكريني فيها وأتمنى تعجبك! اسمهان:الله يعطيك العافية..بس ماله داعي أبداً هالكلفة تعبت نفسك! عبدالرحمن:خلاص!مادام ماتبينها هاتيها أعطيها أختي أحلام!!! اسمهان سحبت الكيس من عبدالرحمن بقوة وقالت:اشفيك انت الله يهديك؟على طول صدقتني!أبيها! عبدالرحمن:خلاص لاتفكينها إلا إن رحت...ومابأقدر أجلس معك أكثر من كذا عشان ماأسبب لك إحراج.. وودعها.....وظلت نظرتها تتبعه لين ماخرج من الباب..ودخلت اسمهان البيت وراحت تركض على غرفتها فوق..وفتحت الكيس..لقيت جوال والشريحة بداخله في علبة أنيقة جداً ومعاها كرت كبير فتحته لقيت فيه صورة حلوة لعبدالرحمن وبالصفحة المقابلة كاتب هالكلمات: إذا يهمِك أمري..اتصلي على هالرقم(0؟؟؟؟؟؟؟؟؟؟050) من فرحة اسمهان بالهدية مسكت الجوال واتصلت على طول..... عبدالرحمن:ياهلا وغلا..... اسمهان:ياهلا فيك....ومشكور حيـــــل على الهدية الحلوة.. عبدالرحمن:اتصلتي بسرعة غير متوقعة!!كل هذا شوق؟؟؟ انحرجت اسمهان وحست نفسها خفيــــــــفة وقامت ترقع الموضوع وقالت:لا...بس بغيت أجرب الجوال!!! عبدالرحمن:هههههه...فديت الثقيل اللي كان يطامر قبل شوي بالحوش..من فرحته بزيارتي!! اسمهان(وصل فيها الاحراج للقمة وماعرفت اش تقول):كيف الوالدة وأختك أحلام؟ عبدالرحمن:بخير..ماعليهم..انتي قولي لي اش رايك بصورتي؟؟؟؟؟ اسمهان(ببكش!):عادية...مش بطالة! عبدالرحمن:شفتك البارح ماحبيتي الثوب والبشت والشماغ...قلت خلك تشوفيني سبوربالبنطلون والتي شيرت!! اسمهان(تبي تثقل شوي):امممم...طيب..هل عندك كلام ثاني؟؟لأني مشغولة بالضيوف!!! عبدالرحمن:لا. . .ماأبي أعطلك عن ضيوفك.. في أمان الله... اسمهان:في أمان الله.... وقفلت اسمهان الخط ومسكت الجوال وحضنته بلهفة مو مصدقة انه صار عندها هاتف خاص فيها!!!! أما عبدالرحمن قعد يفكر بعد ماانتهت المكالمة!اشفيها هاالبنية ماتتجاوب معي بشكل كبير حيا ولا جفا؟؟؟؟؟مع انه الواقع يقول انها ببعض تصرفاتها خفيفة شوي!!بس يلا الثقل صنعة!!!! واسمهان من فرحتها راحت تتصل من جوالها على تلفون رانية الثابت؟.... رانية:مرحبا.... اسمهان:مراحب..رنون شلونك؟؟؟ رانية:طيبة..بس خير وش عندك؟؟قبل كم ساعة كنا نكلم بعض!هل استجد شي؟؟ اسمهان:إيه..باركي لي! رانية:مبررررروك بتتزوجين بكرة؟؟ اسمهان:يادمك!! أملك أمس وأتزوج بكرة؟لا ياعيوني الدنيا لسه بخير!! رانية:أجل أبارك على وشهو؟؟ اسمهان:صار عندي جوال!!!!!!! رانية:مسرع!!! مو كنتي أمس حافية ومنتفة وماعندك غير تلفون العيلة الثابت؟!من وين جاك جوال؟؟؟ اسمهان:مايبي لها سؤال ياذكية!خطيبي أهداني اياه اليوم! رانية:ماشاء الله ماعنده وقت!على طول زارك اليوم؟؟صدق إنه خفيف وطاح باللي أخف منه!! اسمهان:مالت عليك!بدل ماتباركين لي تتريقين علي..... رانية:مبروووووك...هاتي رقمك أخزنه بجوالي! وعاد رانية عندها جوال شاريه أبوها من السنة الماضية هدية لها!! وشوي وافتقدوا الكل اسمهان وقاموا ينادونها وراحت لهم.... رجعت اسمهان لضيوف العزيمة ولاقالت لأحد نهائياً بزيارة عبدالرحمن وهديته...ومحمد كذلك ماقال لأحد شيء..... وبعد ماراحوا الضيوف جلست أسماء وابتسام وأمهم وسماح يسولفون عن أحداث الملكة اللي صارت الليلة السابقة وكانت يوم الأربعاء... اسماء:أما صاحباتك يااسمهان مسخرة!!رفعوا ضغطي برجتهم..ماتقولين إلا المناسبة مناسبتهم! سماح:بالعكس أحلى شي بالملكة كان وجودهم فاجأونا بحركة الزفة والفرفشة اللي سووها طول الملكة....بس لي عتب عليك يااسمهان خليتي الغُرب يلبسون مثلك ويطقمون معك؟؟لو قلتي لنا أنا وابتسام وأسماء نطقم معك كان طلع أحلى!!! اسمهان:أنا ماقلت لأحد شيء الأمر كان مصادفة! أسماء:الله أكبر على البكش! سماح:إلا تعالي يااسمهان..أمس محمد قال لي سالفة قعدت أضحك منها طول الليل!بس محمد أخوك مزحه واجد ومرات ماأصدقه!صحيح إن العريس طقك أمس؟؟؟؟؟ههههههه ابتسام:إيه صحيح...تصدقون؟؟هههههه سماح:الله ياخذ ابليسه!وليش ياحافظ؟يتدرب عليك قبل العرس؟؟هههههههههه أسماء:علمتني أمي بالسالفة...إلا من زود الطفاقة بوجه الفقر هذي ماانتظرت تملأ بطنها إلا بوجوده وتستاهل خذت على راسها!! اسمهان:أقول تصبحون على خير..ماعندكم سالفة ياحبكم للتطمش والتمسخر..مافي سالفة بالملكة كلها إلا سالفة شرقتي؟؟! وطلعت اسمهان..مو من زود النوم إلا عشان تجرب الجوال الجديد..وأعطت عبدالرحمن رنة واتصل على طول..وقضوا الليل بسواليف وماحست اسمهان بالوقت وكانت اسماء وسماح قد رجعوا بيوتهم وابتسام راحت تنام والأب طالع غرفته ينام إلا طالع بغرفة اسمهان لقى الباب مصكوك والزجاج المعشق اللي عليه يوضح إنه في نور بالغرفة!واقترب من الباب وسمع صوت ضحك اسمهان..وفتح الباب عليها إلا أختنا في الله مبطوحة على السرير على بطنها وتلعب بشعرها الطويل وتسولف بالجوال وتضحك!!! صاح أبوها بصوت عالي:بنـــــــت!مين تكلمين؟ اسمهان من خرعتها قفلت الخط وقامت وقالت:أكلم خطيبي!! أبواسمهان:ومن وين لك جوال؟؟ اسمهان:عبدالرحمن أهداني إياه! أبواسمهان:متى؟؟ اسمهان:اليوم! أبواسمهان:ايشششششش؟!شلون اليوم وأنا وين كنت؟؟ اسمهان:إنت كنت مع ضيوفك بالمجلس وهو اتصل عليك بس إنت مارديت.. أبواسمهان:ويعني مارديت..يجي بيتي غصب عني؟؟؟؟وإش دراك انه بيجي؟وكيف؟ ووين؟تستغفلوني حضرتكم؟؟ اسمهان:صدقني يبه ماكنت أدري عن شيء..محمد هو اللي ناداني وقال لي إن عبدالرحمن اتصل فيه ويبيني دقايق بالحوش..سلم علي وعطاني الجوال وراح!! أبواسمهان(بعصبية):خوش تربية والله..بدل ماتقولين له..ماأقدر أسوي شي إلا بعلم أبوي؟وأخوك محمد هذا حسابه عندي بعدين! إلا أم اسمهان سمعت الهواش وكانت طالعة تنام وجت ركض لغرفة اسمهان.. الأم:خير؟؟وشفيكم تتهاوشون بنص الليل؟؟ أبو اسمهان:تعالي شوفي يامدام بنتك المصون تستقبل عريس الغفلة ببيتي ومن وراي وأنا آخر من يعلم!!! الأم:أعوذ بالله! مين قال؟؟ أبواسمهان:لاتقولين..إنك حتى انتي ماتدرين؟؟ الأم:إيه وربي ماأدري!متى وكيف؟ وبعدين جوال مين هذا اللي بيدك يابنت؟؟ أبواسمهان:كملت!يعني من ورا ظهورنا طبختيها انتي ومحمد؟؟مايخالف حسابه عندي بعدين هاالمحمد!وخطيبك لو اتصل فيك مرة ثانية قولي له أبوي زعلان عليك!!! وخرج الأب من الغرفة وهو زعلان. .....الأم:الله يهديك يابنتي..لازم تجيبين لنا الكلام؟ترى أبوك بكل كلفة وافق إن ملكتك تصير الحين..لأنه مايبي كثر الكلام والزيارات!! اسمهان(وهي تبكي):يمه.انتوا تحسسوني كأني قاعدة أكلم واحد من الشارع!ماكأن اللي أكلمه هذا زوجي شرعاً وبكرة بيضمني معه بيت واحد! الأم:بس الوحدة تثقل..ترى كثر الكلام يجيب وراه غلطات ومشاكل تخليه يمل منك بعد وقت..يازين الثقل اللي يخليه هو اللي يتمنى يسمع منك كلمة! وش عليه مستعجلين؟قدامكم سنة وأشهر! وخرجت الأم من الغرفة وهي متضايقة..لأنها دارية ان الأب بيرجع ويكمل معها الموشح!!!! واسمهان قعدت تذرف دموعها لين غلبها النعاس..وعبدالرحمن بما إنه سمع أبوها يوم صاح فيها حس إنه في شي...وفضل إنه مايتصل إلا باليوم الثاني.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
ثاني يوم بعد العزيمة كان يوم الجمعة وكالعادة الكل بيجتمع في بيت العائلة للغداء...محمد جاب زوجته وأولاده قبل صلاة الجمعة عشان يصلي مع أبوه بمسجد الحي..وابتسام قاعدة عند أهلها من أول...وأسماء بيجيبها زوجها بعد الصلاة ويروح يتغدى عند أهله.... واسمهان مازالت نايمة...ولكنها صحت على صوت الجوال وردت بصوت مبحوح واضح عليه آثار النوم: الو... عبدالرحمن:الو..السلام عليكم.. اسمهان:وعليكم السلام...وتتثاوب!!! عبدالرحمن:شلونك؟لاتقولين إنك لسه نايمه!! اسمهان:ايه لسه نايمه... عبدالرحمن:وليش نايمة لين هالوقت..ناسية إن اليوم جمعة وبعد شوي بتبدأ الخطبة؟؟؟؟؟ اسمهان(وهي تتقلب على السريروتتثاوب):وشفيك إنت؟؟ نسيت؟ أنا أنثى مو واجبة علي صلاة الجمعة!! عبدالرحمن:زين.قومي استعدي لصلاة الظهر على الأقل! اسمهان:غصب هو؟؟لاصرت ببيتك تحكم فيني! عبدالرحمن:آسفين..بس تراني أنصحك تصلين لوجه الله مو تحكم ولاشي!! المهم..اش سالفة أبوك أمس ؟؟سمعته صاح عليك وقفلتي بوجهي الخط!!صار شي؟؟؟ اسمهان:اسكت!ماشفته شلون معصب!أنا قلت شوي وبيشيل الجوال عني! عبدالرحمن:ليش؟تكلميني بالجوال أفضل مماتكلميني بتلفون البيت! اسمهان:لا...هو مازعل على الجوال كثر مازعل على جيتك من وراه..وإنك لازم تستأذن منه!ووصاني أقول لك إنه زعلان منك... عبدالرحمن:المعذرة..بس شفته مارد..قلت بنفسي محمد ينوب عنه..على العموم هو يصلي بأي مسجد؟؟؟؟ اسمهان:المسجد اللي ورا بيتنا..... عبدالرحمن:خلاص...ماله إلا طيبة الخاطر..مع السلامة اسمهان:مع السلامة.. عبدالرحمن:لحظة ..لحظة! اسمهان(والنوم كابس عليها):واش فيه بعد؟؟ عبدالرحمن:نسيت أقول لك شي! اسمهان:تفضل! عبدالرحمن:قومي صلي الظهر!!! اسمهان: روح صلي الجمعة!!! وقامت اسمهان بثقل وتشطفت وتوضت وتلبست وتزينت وعقبها صلت ونزلت للصالة ولقت اخواتها وزوجة أخوها مجتمعين يشربون قهوة ويسولفون.... اسمهان:السلام عليكم ورحمة الله وبركاته... الجميع:وعليكم السلام ورحمة الله وبركاته.... وسلمت عليهم كلهم.. اسماء:هلا بآخر من يصحى وأول من ينام! الأم:ومين قال إنها نامت أمس...إلا قضت الليل بسهر وسوالف!! ابتسام:وتسولف مع مين وحِنا كلنا هنا؟؟؟؟ الأم:مع اللي مآخذ عقلها.. ابتسام:بس التليفون كان تحت وبناتي يلعبون فيه! الأم:لااااا..مو حِنا الله يسلمك تطورنا وصار عندنا اختراع اسمه جوال!! سماح:ماشاء الله أخيراً شريتوا لها؟؟ الأم:ولايجي على بالنا..بس حبيب القلب جابه لها هدية! اسماء:عشتوا!!قبل أمس ملكت وجاب لها جوال على طول؟؟..من زين السوالف اللي بيسمعها من ست اسمهان لو وفر قريشاته وحطهم بجيبه أصرف له!!!!!!! اسمهان:يالطيف على الحسد!وانتي يمه ماتخشين عنهم شي؟؟ الأم:هذيل خواتك الكبار..موب غُرب! وطبعاً بهالوقت كان عبدالرحمن قد وصل للمسجد وقابل أبواسمهان وأخوها محمد بالخطبة وسلم عليهم..وعقب صلاة الجمعة..دار الحوار التالي: عبدالرحمن:سمعت إنك زعلت من سالفة أمس وهذي راسك أحبها!!وقبل راس الأب.. أبواسمهان:البيت له باب ياولدي وماعجبني اللي سويته!كان بإمكانك تستأذن مني! عبدالرحمن:بس أنا فعلاً اتصلت ومالقيت منك رد.. أبواسمهان:مالقيت رد؟اتصل وقت ثاني..ليش العجلة؟؟مافي شي يستاهل إنك تستعجل عشانه! يعني حِنا مانقدر نشتري لبنتنا جوال؟؟إلا نقدر ومن زمان!بس ماأشوف له أي داعي! عبدالرحمن:لاتكبرها ياعمي..هذي هدية بسيطة لخطيبتي..وأنا أشوف إنه من الأفضل أكلمها فيه تليفون البيت تحتاجونه أحياناً..وأوقات أبي أرسل لها مسج أوأتفق معها أوأشاورها بشي..فالجوال أفضل حل.. وبعدين أنا يوم شفتك مارديت كلمت محمد.. أبواسمهان:وش علي من محمد؟؟البيت بيتي أنا والكلمة كلمتي.. عبدالرحمن:أنا قلت محمد ولدك الوحيد وأكيد هو عزوتك ونائبك في كثير من الأمور..وماهقيت إنك بتزعل..عموماً أنا آسف وأوعدك مايتم شي مرة ثانية إلا برضاك وبعلمك أبواسمهان:جزاك الله خير..ومادامك وصلت لين مسجدنا فما بقي إلا خطوتين ونوصل البيت..تفضل معانا على الغداء... عبدالرحمن:كثر خيرك..بس اسمح لي أعتذرلأني مواعد الوالدة وأخواني أتغدى معهم.. لكن أبواسمهان أصر يعزمه على الغداء..ومالقي عبدالرحمن مفرمن الدعوة لأنه قال بنفسه فرصة أشوف سمهونتي!!! وبالفعل دخلوا الرِجال البيت(زوج ابتسام +محمد+الأب+عبدالرحمن) وراح محمد وقال لأمه:زودوا الصحون معانا ضيف!! الأم:مين؟؟واحد من الجيران؟؟ محمد:لا..عريس بنتك! الأم:ماشاء الله الظاهر كل يوم بتتقابلون؟؟الله يعيننا بس! والتفتت سماح لاسمهان وقالت:قومي تزبرقي له شوي!خليه يشوفك دايم كاشخة!! وقامت اسمهان وتضبطت..وقعدت تنتظر...وانتهوا الرجال من الغداء وشربوا الشاي وعبدالرحمن قاعد.. أبواسمهان خرج من المجلس ونادى محمد وقال:اشفيه ذا لابد؟؟وراه مايروح بيته؟؟ محمد:يبه..تبيه يجيك لين البيت ويطلع بلوشي؟؟والله مابيرتاح لين يشوف عروسته!! أبواسمهان:هذا اللي ناقص والله!مايكفيه أمس جاء وبقق عيونه فيها؟؟ محمد:يبه..لاتعقد المسائل..زوجتي سماح كانت ملكتنا خمس شهور قابلتها فيها أكثر من 10 مرات!! أبواسمهان:سماح غير يالحبيب..!أبوزوجتك متوفي من زمان والبيت كله نسوان وتركي لايحل ولايربط!!أما أنا راسي بعده يشم الهواء! محمد:يبه..أنا أقول يشوفها الحين..وبعدها خله يغيب عنها شهر!!! أبواسمهان:وزوج أختك ابتسام؟؟نطرده من المجلس عشان أختك تشوف عريسها؟؟؟ محمد:مابنطرد أحد!خله يسلم عليها من عند الباب ويروح!!! وراح أبواسمهان للمجلس وقال لعبدالرحمن: تعال أبيك! خرج عبدالرحمن معاه وقال:خير ان شاء الله؟؟؟ أبواسمهان(وهو معصب):ماتبي تودع عروستك قبل لاتمشي؟؟؟ انحرج عبدالرحمن وحس إنها طردة بطريقة غير مباشرة!! ونادوا اسمهان وسلمت عليه.... أبواسمهان:جزاك الله خير على قبول الدعوة..وفي أمان الله!!!!!!!!!!! عبدالرحمن:كثرالله خيركم...وفي أمان الله.. وودع اسمهان بنظرة ومشى وهو متفاجيء من عصبية أبواسمهان وأسلوبه!!! ولما رجع البيت اتصل فيها..وكانت متوقعة اتصاله!! بعد التحايا والسلام...سألته اسمهان:اش سر الزيارة؟؟ عبدالرحمن:رحت أعتذر له بالمسجد وأصلي معه ثم أرجع بيتي لكنه أصر يعزمني على الغداء قلت بنفسي فرصة أجي وأكحل عيوني بشوفك!!ماهقيت إنه شوفتي لك بتكون ثواني!!! اسمهان:ههههههه...تستاهل!! عبدالرحمن:الحقيقة الزيارة كانت باردة من غير جلستي معك..الشي الوحيد اللي راق لي فيها طباخ أمك الله يسلم يدينها عساك مثلها؟؟؟؟؟ اسمهان:لا ياعيوني!أنا مالي بالمطبخ! عبدالرحمن:ياحظ المطاعم!بيكسبون ذهب عقب زواجنا! اسمهان:وللمعلومية بعد ماأحب شغل البيت! عبدالرحمن:ماهي مشكلة خل مكتب الاستقدام اللي جنبنا يسترزق من ورانا ونجيب أحسن شغالة!!! اسمهان:وعلى فكرة أموت بالسفروالرحلات... عبدالرحمن:ابشري!الكورة الأرضية بأخليك تلفينها لين تدوخين... عاد انفرجت أسارير اسمهان وقامت تتشرط وتتدلع عليه..وانتهت المكالمة...ونزلت تكمل جلستها معاهم وسحبت سماح على جنب وحكت لها عن كلام عبدالرحمن.. سماح:هذا وجهي..إن نفذلك شي من اللي قاله!! اسمهان:وش قصدك؟كذاب؟ سماح:لامو كذاب!بس هم يجي خيالهم واسع شوي أيام الملكة!وعقب الزواج يجي الجد ويبان إن الصواريخ اللي كان يطلقها أيام الخطوبة مغشوشة!!! جلس الجميع يتبادلون الأحاديث وفي العصر دق جوال أم اسمهان وطلعت المتصلة نوال خالة اسمهان اللي قعدت توصيها الوصايا اللي قبل الملكة متذكرين؟!!المهم الخالة نوال كانت ساكنة بالمدينة بس بما إنه هذي هي عطلة الربيع جت جدة مخصوص عشان تحضر الملكة+إنها عندها شقة تمليك وتجيها بالاجازات..فاتصلت تعزمهم على طلعة استراحة حاجزتها هي وبعض الأقارب والعشا بيكون باربيكيو وشوي وحركات...ومن ضمن السواليف: نوال:ترى أبونا كلم أبوكم واخواني كلموه بعد وكلكم حاضرين ان شاء الله..خلي البنات ينبسطون مع بعضهم والعيال يسبحون بالمسبح..والرِجال ماشاء الله بيسوون فريقين رياضية ويتنافسون..المهم أنا بانتظاركم في الاستراحة عقب المغرب.. أم اسمهان:وليش لا؟؟إذا أبونا موافق بنجي كلنا بإذن الله.. وتكلموا شوي وانتهى الاتصال.. أم اسمهان:يابنات ترى هذي أختي نوال متصلة تعزمنا على العشاء في استراحة حاجزتها هي وخوالكم.....اش رايكم؟ ابتسام:والله وناسة..خل بناتي يغيرون جو ونوسع صدورنا مع بنات أخوالي..... اسمهان:واااااي فله!حلات الاجازة ان الواحد يستمتع فيها لحظة بلحظة..مو يقعد بالبيت! أسماء:إذا زوجي معزوم بأروح... أم اسمهان:مافاتها خالتك هالشي تقول زوجها وخوالك كلموا أبوك وزوجك ومحمد بعد..تخاوينا ياسماح؟؟؟ سماح:لاأنا اسمحولي اليوم هذا مابأقدر..لأني بأطلع العصر من عندكم وأروح لبيت أهلي واستعد للخرجة معاهم عقب المغرب..لأنه اليوم بإذن الله شوفة تركي!! اسمهان:على عبيروه ماغيرها؟؟؟؟ سماح(وهي تناظر بنص عين باسمهان):إيه على عبيروه ماغيرها! فيه مانع؟؟ اسمهان:لا..ماأقول غير الله يعين تركي ويبارك له يارب!!!!! وبالفعل شوي وأذن العصر..وراح محمد يصلي بالمسجد بعدين أخذ زوجته ووداها لأهلها....وأما ابتسام انطلقت للمطبخ تسوي صينية حلى تاخذها الاستراحة..ودخلت اسماء تساعدها وقالت:مو حلوة ندخل كلنا على الناس ومعانا صينية وحدة!أنا بأسوي صينية مالحة! قالت الأم:زين ماتسوين..أجل أنا بأسوي ترمس شاي وترمس قهوة..ياكاتيا طلعي علبة بلاستيك وعبي فيها تمر....وجهزي فناجيل للقهوة والشاي أما اسمهان كالعادة خذت نفسها وطلعت فوق تتمكيج وتتضبط وتسشور!!!!!!وتختار ملابس مناسبة للطلعة! إلا أمها نادتها:اسمهــــــــــــان... اسمهان:يانعـــــــــــــــم! الأم:اغلطي مرة بحياتك وإدخلي معنا المطبخ!يمكن ربي يرضى عليك وتتعلمين لك شي من هنا أو من هنا!! اسمهان:باقي بدري يمه!الزواج بعد سنة وخمسة أشهر و7ساعات..ومدري كم دقيقة لسه ماحسبتها!!!! الأم:قطيعة! ومين قال لك تعلمي الطبخ عشان الزواج...تعلميه لنا واكسبي فينا أجر!حِنا موب أهلك؟؟؟؟؟ اسماء:ياحليلك يمه!هذي تتعلم لنا؟؟؟هذي تتعلم فينا وانتي الصادقة!!!أقول ماعليكم منها وخلكم عايشين بصحتكم بدل ماتجاربها الفاشلة تجيب لكم القولون!!!!!!!! اسمهان:انطمي واللي يعافيك...خطيبي واعدني إنا ناكل بمطاعم طول العمر!!وش لي بالطبخ والنفخ بس؟؟هذا مو مكاني!! اسماء:هههههه...وانتي صدقتي يالغشيمة؟!عساه مايجي زواجك إلا والمطاعم قد انقرضت من على وجه الأرض وختموها البلدية بالشمع الأحمر!! اسمهان:إن حصل..بنجي نآكل من طباخك!! اسماء:لامرحباً فيكم!! إلا أقول يمه..اش رايكم بكرة تجتمعون كلكم عندي جمعة حريم بس نسهر ونستانس وأنادي خالتي نوال وبناتها بالمرة؟؟ الأم:خوش فكرة..بس إحنا كثير وانتي حامل بروحك بنتعبك يابنتي! اسماء:يايمه ماهي مشكلة ارسلوا كاتيا لي من الظهر..ولاجات سماح عقب المغرب تجيب شغالتها معاها..... الأم:ان شاء الله.... وبعد المغرب انطلقوا كلهم للاستراحة وكانت الجلسة ممتعة والأجواء صاخبة وزوجات خال اسمهان جايبين معاهم طيران يطقون ويقولون قصايد واسمهان مستانسة إنها سارقة الأضواء!!!والبنات مقسومات ناس ترقص وناس تسبح وناس تجري.. وبعدها الخالة نوال كانت مشترية هدايا رمزية وسوت لهم مسابقة دينية ثقافية..وعقبها سوت لهم محاضرة تخص البنات المراهقات وكان أسلوبها جذاب بحيث إنه كل بنات العائلة اجتمعوا يسمعونها بشوق... وبعدها جاء دور المسابقات الحركية:مسابقة الخاتم الضايع بوسط صحن الدقيق ولازم الوحدة تخرجه بفمها من دون استخدام اليد!واختاروا اسمهان لكنها رفضت وقالت:والله ماأخرب منظري عشان مسابقة...واختاروا بنت غيرها+لعبة حمل البيضة بواسطة ملعقة بالفم من دون استخدام اليدين وتوصيلها للجهة الثانية+ ربط عين المتسابقات وكل وحدة تأكل الثانية زبادي وعاد أنواع الضحك على اشكالهم المعدومة بالزبادي+الخ........الخ......ا لخ يعني كانت أجواء حلوة ومرحة...وبالذات بعد العشا اللذيذ اللي أكلوه اجتمعوا الأمهات والبنات وطلبت منهم الخالة نوال انه كل وحدة تحكي عن موقف طريف حصل لها... وحدة من زوجات أخوال اسمهان قالت:أتذكر زمااان لما كنت حامل ببنتي سامية رحت السوبرماركت أنا وزوجي وكنا نمشي جنب بعض..فجأة جتني دوخة وبغى يغمى علي فتمسكت بالشخص اللي مار جنبي على أساس إنه زوجي!!لكني فوجئت بالرجال يدفني بأقوى ماعنده ويصارخ(استغفر الله استغفرالله!!)ساعتها انتبه زوجي لي وكان وراي وبعدني عنه ومسكني!! الجميع:هههههههههه وحدة من بنات خال اسمهان قالت:أنا زمان أول ماتزوجت بغيت أفاجأ زوجي بحركة وأسوي نفسي رومانسية ورحت وتزينت وقلت خليني أتعبه شوي عشان يدور علي..ورجع من برة وصار ينادي وينادي يمكن ربع ساعة ولاأرد عليه رجع طلع فوق لغرفة النوم وبدل هدومه ووقف عند الدرج ورجع ينادي ويتلفت حسيت انه قلقان من عدم ردي قمت نقزت وراه وبأعلى صوت قلت:مفاجــــــــــــأة اش رايك فيني؟؟؟؟؟؟ وهو من خرعته من صوتي ياحرام مامسك نفسه وطاح من أول الدرجة لآخرها وأخذ رضوض بظهره!!ومو بس كذا ماقدر يروح المستشفى بروحه رحت معه ولما سأله الدكتور عن سبب الطيحة قال بمزح:أبداً المدام حبت تفاجئني وزلت رجلي من الدرجة.. ساعتها التفت لي الدكتور بغيظ وقال(بلهجة مصرية):يبئى احتفظي بمفاجئاتك ديه لنفسك يامدام!!دا الراجل كان حيروح منك بشربة ميه!!!!! الجميع:هههههههههه الخالة نوال:يازينك...أكيد تعلمتي من هالموقف إنك ماتمزحين معاه أبد؟!!!! بنت خالهم:إلا وانتي الصادقة تعلمت إني لابغيت أمزح معاه مايكون واقف على حافة الدرجه!!! الجميع:ههههههه ومن سالفة لسالفة انتهت الجلسة على خير واتفقوا يزورون اسماء ببيتها بكرة.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
##الجزء الواحد والثلاثون## رجع الجميع من الاستراحة وكل واحد راح ينام ببيته أما اسمهان كملت السهرة على الجوال مع خطيبها الوسيم!! وثاني يوم صحى الجميع ومشي اليوم طبيعي مامن جديد وبالليل استعدوا لزيارة اسماء ببيتها.. وكان بيت اسماء ذوق جداً ومرتب ومافيه زبرقة كثير..ديكورات هادية وناعمة وكلاسيك.. ابتسام:ماشاء الله تبارك الله ..اش هالتجديدات الحلوة بالبيت يااسماء؟؟عقبالنا يارب! اسماء:ولاتجديدات ولا شي..صار لها مدة..بس انتي من زمان مادخلتي بيتي... الأم:عقبالك ياابتسام..بس غريبة يابنتي على انه زوجك ظروفه زينة لكن بيتك أقل من متواضع؟؟ ابتسام:وهي أمه السوسة مخليتنا على راحتنا؟؟كل يوم والثاني تسوي محاضرات لعيالها..اقضبوا قروشكم واقضبوا قروشكم..واللي معه قرش زايد تنصحه على طول يروح يتزوج!!وبالذات زوجي!قال إيش؟حزنانة عليه يوم انه عنده بنتين بس ومافي أولاد!!!! اسماء:أم زوجك هذي جيبيها عندي أسبوع أروضها!!إن ماخليتها تطلع من بيتي وهي تقول:تبت إلى الله توبة نصوحة!!!!!! اسمهان:عاد في هذي أنا أشهد...هذا إن كان طلعت من بيتك ياأسماء تمشي على رجولها أخاف تخرج من عندك وهي تمشي على أربع!!!! الجميع:ههههههههههه الأم:مابشرتينا ياسماح؟ كيف تمت شوفتكم البارح؟؟ سماح:الحمدلله بأحسن حال العريس عجبته العروس وهي بعد عجبها...وبإذن الله بنبدأ بالتحاليل وعقبها تتحدد الملكة!!!!!!!! الأم:بالمبارك ان شاء الله..تركي شاب طيب ويستاهل... اسمهان(بقهر وصوت منخفض):لا والله مايستاهل يرمون وحدة كريهة مثل هاذي بحلقه!!! وشوي ودق الجرس وكانت الحاضرة خالتهم نوال وبناتها..وبدأت الجلسة تحلو..لأن خالتهم مافي مجلس تجلسه إلا وتحب تنثر فيه فوائد ونصايح مهمة بأسلوب بسيط ومحبب....... وبدأ كلامها عن أهمية اعطاء كل شخص حقه واحترامه بحسب سنه..وبالذات الكبار في السن لازم تكون لهم معاملة خاصة لأنهم حساسين ويحسون بأنهم من جيل مختلف عن هالجيل... ابتسام:كلامك هذا ياخالتي نوال ممكن ينطبق على كل الناس إلا على أم زوجي!!كل مازدناها إحسان زادتنا اساءة!!! الخالة نوال:وهذا يابنتي باب من أبواب الأجر وانفتح لك إنك تصبرين على أذاها..ولو إني أعتقد إنها مسكينة ماتقصد تآذي أحد بس تبي تكسب أولادها حولها ولكن بسبب الجهل ماتعرف تختار الطريقة المناسبة... ابتسام:بلاك ماتعرفينها..هذي حية من تحت تبن!! الخالة نوال:استغفرالله العظيم...يعني كل هالمحاضرة الطويلة العريضة اللي قلتها قبل شوي..هذا اللي طلعتي به؟؟؟؟لا يابنتي مايجوز تقولين عنها كذا.. ابتسام:ياخالة حتى بناتي هالصغار مايطيقونها من كثر ماهي شرية!!!!! الخالة نوال:أكبر غلطة تسوينها إنك تتكلمين عن جدتهم بسوء قدامهم..طبيعي بيكرهونها من كلامك عنها!! الأم:فضوها سيرة..الله عالم بأسرار البيوت... الخالة نوال:بأختم كلامي بحديث الرسول عليه الصلاة والسلام(ليس منا من لم يرحم صغيرنا ويوقر كبيرنا) ولاحظوا كلمة ليس منا!! يعني مو من أمة محمد!!!!! ابتسام:استغفرالله العظيم من كل ذنب عظيم... وبدأوا يدخلون بسواليف ثانية ..وعبدالرحمن بدأ يرسل مسج ورا الثانية لسمهونة وهي حيرانة ومو عارفة ترد عليه بشيء...وفجأة خطر في بالها تستعين ببنت خالتها نوال وكانت هالبنت اسمها سهام ومخطوبة من 7شهور..وأشرت لها اسمهان وطلعوا برة الغرفة.. سهام:خير يااسمهان؟وش بغيتي؟ اسمهان:عندك مسجات رومانسية حلوة؟؟ سهام:أووووهوووو...جوالي متروس!! اسمهان:سلفيني!!خطيبي بس يرسل لي أشعار ومو عارفة اش أرد!! سهام:ماأنصحك تاخذين أشعار جاهزة وترسلينها!!أروع شي إنك تكتبين مشاعرك بإحساسك انتي..وأخبرك زمان تكتبين شعر بطلتي؟؟؟؟ اسمهان:لا مابطلت..بس أخاف لو أرسلت له أشعاري يضحك علي..لأنها كلمات بسيطة على قدي!ماترتقي لمستوى شعر! سهام:توكلي على الله وارسليها وصدقيني بتعجبه!! اسمهان:والله شجعتيني..فكرة خليني أجرب!! وشوي وأرسل عبدالرحمن مسج يقول فيه: ليت التواصل يالغلا ينشرى بمـــــال لأسبق خطاوي الدهر وأركض أشوفك ثم أنــــثرحروفـي لك أمـــوال وآمــــال أكسب بها قلبك و بعد أقرأ حـــــروفك حاولت اسمهان تعصر مخها شوي وردت عليه: صوتك ترى يغْني عن جاه وعن مال يكفي اتصالك بي ولو صعب أشوفك مو بس وحدك تبني أحلام وآمال قامت حروفي... تبني حلم لحروفك عجب عبدالرحمن الرد وحس إن اسمهان كاتبته وقام يرسل مسج ثاني: الوقت يمضي وماعرفت له معنى إلا بوجودك يازين الطبع ياخلي متى بيتٍ تحت سقفه يجمِعْنا؟ وأصير كلك وكل ما لك يا كل كلي فكرت اسمهان وردت عليه: الحب دايم يعطي للحيـــاة معنى والطعم أحلى بوجودك إنت ياخلي وعسى الزمان الجاي بخير يجمعنا ياكل مالي إنت ويابعد كل كلي وقضت اسمهان الليل كله ببيت اسماء على هالحال ترسل وتستقبل وواقفة عند باب المطبخ! اسماء:وجع ان شاء الله ويقولون أختي يقولون!!لي ساعة رايحة جاية أحضر سفرة العشاء وانتي مكانك طايحة بجوالك تُضُغُط..الشغالات فيهم خير أحسن منك؟!!!! اسمهان:بالعدال علي اسم الله علينا!البنات ملا البيت خلهم يساعدونك! اسماء:هالحين ياللي ماتستحين تبيني أقوِم الضيوف وحضرتك قاعدة تلعبين بجوالك؟؟؟يمين لو ماتدخلين المطبخ تساعديني لاأكون ساحبة جوالك ومعطيته ولدي يلعب به!!!! اسمهان:زين..زين..الله يعين بأساعدك..بس إش أسوي؟؟؟ اسماء:خذي السلطة وملحيها واعصري عليها ليمون واغرفيها بالصحون.. اسمهان:الله!!!كل هذا بأسويه لحالي؟؟ اسماء:لا جيبي ثنتين يساعدونك!!لعنبوابليسك سلطة ماتعرفين تضبطينها وتغرفينها؟..كان الله في عونك ياعبدالرحمن ياولد أمك!! وقامت اسمهان تجهز السلطة بغيظ وتساعد أختها وتعشوا الجميع وعدت الزيارة على خير... ومرت أيام الاجازة واسمهان على نفس الحال متعلقة بجوالها تثرثر!وأبوها يراقب عن بعد وموعاجبه بس عزاه إن الدراسة بتجي عقب أسبوع واسمهان بتنسى شي اسمه جوال!!!!! وبعد كم يوم اتصلت رانية على اسمهان...وبعد السلام والسؤال عن الأحوال... رانية:هاه..ياعروس كيف أيامك؟؟ اسمهان:حلوة...كل يوم طلعة بمكان وتجمعات.. رانية:وأنا بعد مااستقريت يوم بالبيت!! اسمهان:وش عندك من أخبار جديدة؟؟ رانية:أبد..ماعندي سالفة..الأخبار عندك انتي ياحلوة..شلون عريسك؟؟ اسمهان:تمام التمام..مسجات ومكالمات! رانية:وشلون أخلاقه؟زينة؟؟ اسمهان:لو ماهي زينة ماكان قبلت فيه!! رانية:طيب وش رايك تعطيني رقمه ونلعب عليه؟نشوف هو راعي سوابق أو لا!!! اسمهان:الله لايسامحك!وش هالهرج؟؟أحد قال لك إني مجنونة وبأعطيك رقم خطيبي؟لاااا وتكلمينه بعد؟؟؟؟؟ رانية:بالهداوة!ومين قال لك إني بأكلمه؟أحد قال لك إني لعَّابة؟؟؟أنا بس بآخذ رقمه وأعطيه وحدة أعرفها بايعة عمرها تكلمه وتجس نبضه!!! اسمهان:هبلة انتي يابنت؟؟ولا شكلك كذا؟؟وبعدين طول عمرها شلتي أخلاقها عالية..مين وين تعرفتي على وحدة بايعة عمرها..هاه علميني!!! رانية:هذي طقاقة تعرفت عليها بعرس!!خلاص انسي الموضوع..وأنا آسفة لو ضايقتك! اسمهان:إلا ضايقتيني وكدرتي خاطري بسوالفك الماصخة!!!! وودعوا بعض وانتهت المكالمة...... وقام إبليس يلعب براس اسمهان وصارت تقول بنفسها:والله فكرة!!ليش ماأختبر عبدالرحمن؟؟أخاف لعَّاب وأنا مدري!!!!! وفكرت تاخذ جوال ثاني تكلم عبدالرحمن فيه بس مافي غير جوال محمد وجوال أبوها وجوال زوج أختها ابتسام!! أما الحريم ماتبي توهق نفسها معاهم وتطلب جوالاتهم ويقولون لها ليش؟؟؟؟ وراحت نادت هيفاء بنت ابتسام.. اسمهان:هفو حبيبتي..بأطلب منك طلب..روحي المجلس واسرقي جوال أبوكي وجيبيه لي بسرعة هيفاء:طيب.. وراحت هيفاء المجلس ركض تاخذ جوال أبوها بس أبوها قال:وين وين ياهيفاء وش تبين بجوالي؟؟؟؟ هيفاء:أنا ماأبيه!هذي خالتي اسمهان تبيه! أبوهيفاء:لا خالتك أكيد ماتبي جوالي..أكيد تبي جوال محمد خذيه وعطيها اياه!!! ومحمد وأبوه مو منتبهين قاعدين يسولفون مع بعض.... والبنت أخذت الجوال وعطته خالتها اسمهان ومن غباء اسمهان اتصلت بعبدالرحمن بسرعة وحطت السماعة على إذنها من غير ماتناظر الشاشة!!اللي كان مكتوب عليها عبدالرحمن بما إنه رقمه مخزن بجوال محمد!!!! عبدالرحمن كان متوقع انه المتصل محمد فرد وقال:ياهلا.. اسمهان(وهي مغيرة صوتها):ياهلا فيك! وشلونك يابعد حيي؟؟؟؟؟؟ عبدالرحمن استغرب وقال:عفواً مين المتصل؟؟ اسمهان:أفا عليك!أنا حبيبتك السابقة مسرع مانسيت!! عبدالرحمن:استعيذي من ابليس ياإختي وروحي اقرأي لك قرآن ولا اشغلي نفسك بعيد عني!!!! اسمهان:بس أنا أحبك من زمان وودي أسولف معك!!! عبدالرحمن:لو سمحتي انسي الرقم هذا ولا بتشوفين مني شي مايسرك!!! وقفل السماعة بوجهها!!!!!! وتطمنت اسمهان للوضع وردت الجوال مع هيفاء وبينها وبين نفسها كانت ناوية ماتقول لعبدالرحمن عن هالمقلب طول العمر!!!!!!!! بس عبدالرحمن اتصل على جوال اسمهان يسلم وصار يلف ويدور وقال لها:اسمهان زوجة أخوك محمد عندكم؟؟؟ واستغربت اسمهان من سؤاله!!!وقالت:إيه ليش هالسؤال اللي ماله داعي؟!!! عبدالرحمن:انتي دقيتي علي قبل شوي من جوال أخوك محمد؟؟ اسمهان:لا مادقيت..لو أبي أتصل كان اتصلت من جوالي وليش بأدق من جوال محمد؟؟؟؟ عبدالرحمن:خلاص انسي الموضوع! وأصرت اسمهان بعد إلحاح شديد إنها تعرف سر أسئلته لأنها فعلاً مااكتشفت السر!!!! عبدالرحمن:قبل ماأجاوبك..اش رايك في أخلاق زوجة أخوك محمد؟؟ اسمهان:سماح في قمة الذوق والأدب..بس اش علاقة هذا بذاك علمني؟!!!! عبدالرحمن:بصراحة الشيطان قام يلعب براسي!تصدقين زوجة أخوك اتصلت علي قبل شوي تغازلني!! اسمهان:من أي جوال؟؟ عبدالرحمن:من جوال أخوك محمد! اسمهان:كذاب..من جوال زوج ابتسام!! عبدالرحمن:لاياشيخة!!وانتي اش دراك؟؟ اسمهان:وااااي ياحسرتي..الصراحة أنا مالاحظت إنه جوال محمد..على بالي انه جوال زوج ابتسام وترى أنا اللي اتصلت...وزوجة محمد ماتدري عن أي شي بالموضوع!! عبدالرحمن:انتي من صدقك؟؟ اسمهان:إيه أقسم لك!! عبدالرحمن:وش بتستفيدين؟؟ اسمهان:أختبر أخلاقك! عبدالرحمن:انتي ماتستحين؟؟أنا ماعرفت الغزل وأنا عزوبي تبيني أغازل وأنا على ذمتي زوجة؟؟ اسمهان:خلاص لاتعصب كنت أمزح بس!! عبدالرحمن:انتي تدرين إن حركتك هذي مالها معنى وإني كنت ناوي ماأحكي لك عنها طول العمر؟؟بالله لو سكت وماحكيت لك مو كنت بأشك بزوجة محمد طول حياتي وأعتبرها انسانة ساقطة؟؟يشرفك هالشي يعني؟؟؟؟؟؟ اسمهان(والدموع ماليه عيونها):أنا آسفة! عبدالرحمن:وين أصرفه أسفك ذا؟؟ضيعتي وقتي بالعمل وأحرجتيني قدام الشباب..وعشان إيش؟؟تختبريني؟؟الحمدلله إني ناجح باختبارا وبدون!!!مع السلامة.. اسمهان(وهي تبكي):مع السلامة.. وقفلت السماعة وقالت بنفسها:حسبي الله عليك يارانية!!عساك ترقصين اليوم بعرس وتطيحين وتنكسر رجلك!!لا حرااااام صديقتي وماأرضاها فيك يجيك رضوض بس!!!!!!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
طبعاً بعد الموقف إياه من الآنسة اسمهان مر اليوم بــ طوله من غير اتصال ولاسؤال من عبدالرحمن مما كدَّر خاطر هالسمهونة!! بس على الفجر رن الجوال وكانت اسمهان توها غاطه بالنوم وردت من غير ماتناظر بشاشة الجوال بكل لهفة:آلو!! رانية:هلا سمهونة..ماشاء الله صاحية؟؟ اسمهان(بصدة نفس):هذاإنتي؟ خير؟ياوجه الخير!!! رانية:ماحبيتها منك هالنبرة..وشفيك؟؟قرفانة من صوتي؟؟؟؟؟؟؟ اسمهان:بالله هذا وقت تتصلين فيه؟؟؟؟؟ رانية:اش المشكلة؟؟أكيد مارديتي بهالسرعة إلا وانتي محسبتني عبدالرحمن!!أنا اتصلت هالحزة ليش اني توني رديت من عرس قلت أتصل أطيب خاطرك قبل ماأنام لأني حسيتك تضايقتي من اقتراحي بإختبار خطيبك!!! اسمهان:قبل ماتطيبين خاطري...جاوبيني رجلك ماتوجعك؟؟؟ رانية:وي..بسم الله علي..وش دخل رجلي بالموضوع؟؟ اسمهان:لأني صكيتك بدعوة ياالخايبة على اقتراحك الفاشل اللي بيخرب بيتي!!! رانية:وش سويتي يالخفيفة؟ لايكون نفذتي كلامي؟؟؟؟ اسمهان:طبعاً.. وراحت اسمهان تحكي بالتفصيل لرانية عن اللي صار... رانية:ياحليلك ويازين هبالك!يعني في انسان عاقل يتصل بأحد ومايناظر الشاشة؟؟على الأقل لو ناظرتي الشاشة وشفتي اسم خطيبك عليها كان فهمتي ان رقمه مخَّزن وقفلتي الخط!!المهم اش النتيجة اللي حسيتي فيها؟؟ اسمهان:الحمدلله ثبت لي انه موب راعي غزل وسوالف بطاليه! رانية:هبـــــــله!!وانتي من صدقك بيشوف رقم أخوك محمد على جواله ويقعد يغازل؟؟لو إنك داقة من جوال مايعرفه كان شفتي العلوم!!!! اسمهان:قفلي السماعة ياخرَّابة البيوت..وهذا وجهي إن سمعت لنصايحك مرة ثانية!!! وانتهت المكالمة وطار النوم من عيون اسمهان اللي ظلت تفكر :أتصل عليه؟أخاف مايرد! أراضيه؟؟بيحس إني خفيفة وموب قادرة على بعاده! أطنشه؟ أخاف حتى هو يطنش ولاعاد يرفع علي سماعة! زين اش أسوي؟؟ وأذن الفجر وقامت تصلي..بعدين قامت اسمهان ودخلت موقع عالم حواء وحطت استشارتها بمنتدى الحياة الأسرية وقالت للعضوات الموقف وردة فعل عبدالرحمن تجاهها!! وكانت ردود العضوات فيها العجب العجاب!!اللي تقول لها:خليه يصك راسه بالجدار..انتي ماغلطتي حبيتي تتطمنين على أخلاقه بس وهذا من حقك!! واللي تقول لها: طنشيه الرجال كذا مايشوفون عيوبهم ويبون الحرمة تركض وراهم!! واللي تقول:كرامتك أهم شي..لاتعتذرين له وخليه هو اللي يجي يراضيك!!! واللي تقول:الله يهديكم شكلكم بزران!! واللي تقول لها:نصيحتي لاتسمعين كلام أحد من العضوات ماعندهم سالفة!!!!!! قرأت اسمهان ردود العضوات وقالت:والله الحقيقة إنكم كلكم ماعندكم سالفة وآخر عضوة أولكم وسكرت جهازها ورجعت تحاول تنام..ونامت لين الظهر كالعادة... وصحت لقيت أمها وابتسام قاعدين يسولفون ويجهزون الغداء بالمطبخ وقعدت معاهم ومر اليوم وشربوا الشاي بعد الغداء..إلا جاء اتصال للأم من وحدة من حريم اخوانها وسولفت الأم شوي وبعدماقفلت الخط قالت الأم: هذي فاطمة زوجة خالكم عثمان تقول اش رايكم نتقابل في المول الفلاني مسووين اليوم مهرجان نسائي وبازار بيبدأ من بعد المغرب وفيه جوائز ومسابقات وندوة! ابتسام:أنا موافقة... اسمهان:ماعندي مانع.. وبالفعل كلمت الأم أختها نوال تقابلهم هناك وكلمت اسماء تجي معاهم لكن اسماء قالت: إذا بتمرون تاخذوني جيت!! الأم:طيب خل زوجك يجيبك..ليش إحنا نمُر؟؟ اسماء:لأني تهاوشت معاه وطلع من البيت وماعندي استعداد أتصل فيه وأقول طلعني!! الأم:لاحول ولاقوة إلا بالله..انتي ماتجوزين عن طباعك؟..كل يوم مسوية مشكلة ومهججة الرجال من بيته؟؟ اسماء:مو ببيته مالت عليه!هذا بيتي أنا ولايمكن أطلع منه كل مازعل خليه يولي ولا يفارق عند أهله!! الأم:الله يهديك يابنتي..تدرين ؟ماأبيك تجين معانا!!تزعلين زوجك وتشردينه من البيت ولك نفس تطلعين معانا بعد؟؟أقول انثبري ولاأبي أشوف وجهك!! وقفلت السماعة وقعدت اسماء زهقانة..ورجعت اتصلت بجارتها تجي تونسها!!!!! راحوا الجماعة المول بعد المغرب واسمهان متنكدة عبدالرحمن صار له أكثر من 24 ساعة مااتصل ولا عبَّرها!!وبالمول قابلت بنات خالتها وأخوالها.... وبعد ساعات كانوا الحريم مجتمعين بمكان البازار يتسوقون واسمهان مع بنات أخوالها يتنقلون من محل لمحل..ودق جوال اسمهان وردت:مرحبا.. عبدالرحمن:يامرحبا فيك...وش هالازعاج عندك؟؟انتي برة؟؟ اسمهان:إيه أنا بالمول الفلاني.. عبدالرحمن:مو معقول!!أجل قابلتوا أمي وخالتي وأحلام؟؟؟ اسمهان:لا والله مدري عنهم..أصلاً المكان مرة زحمة..أنا تركت البازار ونزلت تحت مع بنات أخوالي نتسوق من المحلات.. وقعد عبدالرحمن يسحب السواليف من اسمهان ولا جاب طاري عن مشكلة أمس وكأن شي ماصار!!وبعدها قفل السماعة وقت وشوي واتصل مرة ثانية وقال لها لفي يمين وقالت :ليش؟؟ عبدالرحمن:بتشوفين محل حلو!! لفت يمين لقت عبدالرحمن واقف! واستأذنت من البنات اللي معاها وقالت:أنا رايحة دورة المياه!!!!! صافحها وعطاها كيس وقال:لاتفرحين!موب جاي عشانك!أنا جاي آآخذ أهلي!!! اسمهان:وإنت بعد..لاتفرح!ماجيت عشانك بغيت دورة المياه! عبدالرحمن:هههه..زين ماودي أعطلك اتصلي فيني لارجعتي!مع السلامة. اسمهان:مع السلامة.. وراحت ركض على دورة المياه تفتح الكيس إلا لقيت بداخله صندوق وفتحته وكان بداخله مفتاح فقط ومعاه كرت مكتوب فيه: (آه بس لو أقدر أفتح قلبك وأشوف إش بداخله!!!!) قطبت اسمهان حواجبها وقالت بنفسها:آه ياوجه الفقر..هذا اللي طلع منك؟؟خليت كل بضايع المول عشان تجيب صندوق فاضي؟؟ومعاه كلام سخيف؟؟ رجعوا الجماعةمن المول واتصل عبدالرحمن على اسمهان وسألها عن رأيها في الهدية!!! اسمهان:المفروض ماتسألني عن رأيي بالهدية!في أحد بالدنيا يجيب لخطيبته صندوق فاضي مافيه إلا مفتاح وكرت مكتوب بخط اليد بعد؟؟ليته مطبوع من الكومبيوتر!!!!!!!! عبدالرحمن:أولاً.. الهدية بمعناها ثانياً.. ماكان في تخطيط مسبق للهدية..أنا تفاجئت إنك بالمول أصلاً... ثالثاً..أنا مو بخيل ولله الحمد وانتي شفتي بعيونك اش جبنالك بالملكة!! بس أوقات وأنا أكلمك بالتلفون أحس مدري وش اللي تبين توصلين له ومدري وش بقلبك وهذي السالفة كلها... اسمهان:عموماً مشكور..تصدق؟؟كل ماتذكرت إنه بقى كم يوم وتجي المدرسة يجيني اكتئاب!! عبدالرحمن:غريبة!مع إنه اللي أعرفه عنك إنك تلميذة متفوقة!! اسمهان:مو هذا عيب العطلات..نستسلم للكسل ويصير تفكيرنا كله وين بنروح أو مين بيجينا! عبدالرحمن:بالعكس حلات المدرسة إنها تعلم الانسان شلون ينظم وقته..وينشط ذهنه..ويستعيد لياقته..أما الاجازة تعتبر فاصل ترويحي..يعطي النفس دفعة معنوية لبذل مزيد من العطاء والجهد اسمهان(وهي مو فاهمة أغلب كلامه):صح..صح.. عبدالرحمن:طيب بما إنه المدارس جاية وبننحرم من شوفتك مدة من الزمن فأنا أنوي زيارتك بكرة وش قلتي؟؟؟ اسمهان:ياليت!بس تهقى أبوي مابيصعب الموضوع؟أو يعترض؟؟ عبدالرحمن:ماعليك..أنا بأكلمه.. ودارت بينهم أحاديث مختلفة إلى نهاية المكالمة.. وثاني يوم اتصل عبدالرحمن في الظهر على الأب وقال له نيته بزيارة اسمهان بما إن المدارس مقبلة والكل بينشغل...وبلهجة تطمينية للأب قال: عبدالرحمن:وترى ماني مطول عليكم بأجيكم مرور بس بين المغرب والعشاء! الأب:الله يحييك... بس في العصر جاء اتصال مفاجيء للأب عن وفاة واحد عزيز عليه من الجماعة وراح مع الناس عشان يقومون بالعزاء وخصوصاً إنه أقارب الميت كلهم من خارج البلد..وراح محمد معاه.... ولما جاء وقت صلاة المغرب تذكر أبواسمهان زيارة عبدالرحمن وقال لمحمد:اسمع يامحمد خطيب أختك جاي يزورنا روح البيت واعتذر له عن حضوري ولا يكون تغفل عنهم دقيقة!وأول مايقول العشاء الله أكبر تقضبه من إيده وتصلي معاه بالمسجد وإياني وأياك يرجع للبيت مرة ثانية!!!!!!!!!!!!! وبالفعل صلى محمد المغرب وراح للبيت وكان عبدالرحمن واصل قبله بشوي وفتحت له اسمهان الباب واستغرب وسألها عن أبوها وقالت له السالفة..وجلس عبدالرحمن يسولف مع اسمهان.. عبدالرحمن:تتذكرين يااسمهان يوم الشوفة لما سألتك وش طموحاتك بعد التخرج؟؟قلتي:تصفح النت؟!!! اسمهان(بغيظ):إيه أتذكر ..ليش؟؟ عبدالرحمن:من يوم ماملكنا وأنا ودي أسألك وأنسى..انتي تدخلين النت كمتصفحة أو كعضوة؟؟؟؟؟ اسمهان:الاثنين! عبدالرحمن:وياترى الاسم اللي تكتبين به اش هو؟إذا مافي مانع؟ اسمهان:أكتب بإسمي الحقيقي!!اسمهان!!!!!!!ماأحب الأسماء المستعارة!!!! عبدالرحمن:ماشاء الله..وليش ماتكتبين اسم أبوك بعد ولقب العائلة والصورة الرمزية حطي صورتك الحقيقية!!!! اسمهان:تتريق؟؟ عبدالرحمن:أنا مع إني رجل إلا إني أحب أحتفظ ببعض الخصوصية وماأكتب بإسمي الصريح..حتى أخواني وأصحابي يتابعون مقالاتي بشدة ولايدرون إن اللي يكتبها هو أنا!!! اسمهان:وياترى بأي اسم تكتب؟ عبدالرحمن:الحقيقة عمري بحياتي كلها ماصرحت لأحد بإسمي..بس انتي بتكونين أول وحدة بتعرف ..اسمي هو (ثَوْرَة قَلَمْ)!!!!!! اسمهان:وااااو اسم قوي!!!! عبدالرحمن:وماشاء الله اش طبيعة المقالات اللي تكتبينها؟؟؟ اسمهان(ببلاهة):اش يعني؟؟ عبدالرحمن:يعني هل مقالاتك لها طابع نقدي أو أدبي أو اجتماعي أو ايش بالضبط؟؟؟ اسمهان:لااااا أكتب عن أي شيء أحتاج أكتب عنه!!! عبدالرحمن:بمنتديات نسائية؟؟؟ اسمهان:إيه بمنتدى عالم حواء!!! عبدالرحمن:بقسم محدد؟! اسمهان:لا المنتدى منوع وفيه أقسام كثيرة..... عبدالرحمن:وياترى هل سبق إنك كتبتي مقال وأحدث حولك زوبعة؟ اسمهان:لا...ليش انت مقالاتك تسوي الكلمة اللي قلت عليها؟؟ عبدالرحمن:أوهههو ياما وياما..أذكر إني كتبت مقالات كثيرة جداً بس بعضها كان له ضجة غير معهودة على سبيل المثال مقال(التمحور حول اللامحور)..و(إعلامنا من التقوقع في شرنقة إلى الانصهار في البوتقة!!!)..و(حيثيات الغزو الفكري والدعوة إلى العولمة)!! اسمهان(بكل غباء)فتحت فمها وقالت:هالكلمات اللي انت تكتبها فاهم منها شي؟؟؟؟؟ عبدالرحمن:ههههههههه..معقول مافهمتيها؟؟يمكن عشان مااطلعتي على مقالاتي.. في هذي اللحظة دخل عليهم محمد وسلم وقال:أشوفكم تسولفون عن مقالات..اش السالفة؟؟ عبدالرحمن:إيه..الصراحة كنت قاعد أتعرف على توجهات خطيبتي في القراءة والكتابة... محمد:إيه عاد اسمهان مايحتاج عندها ثقافة عجيبة بمجلات التجميل وروايات أجاثا كريستي!! اسمهان:لما كنت صغيرة بس.. محمد:ماشاء الله..والحين كبرتي؟ عبدالرحمن:وإنت يامحمد..هل كنت عضو بيوم من الأيام؟؟ محمد:إيه..أخذت فترة أكتب عن أفكاري وارائي بس واجهت كثير من النقاد والحساد..فاعتزلت الفن وغيرت المود بالمرة..تفاجئت ان واحد من الربع راسل لي على الايميل دعوة لمشاركته بإدارة موقع جديد افتتحه..وكان الموقع بما إنه غير معروف ماعليه اقبال ففكرت فكرة خرافية إني أكتب بالموقع بإسم(الدكتور محمد)وحطيت نبذة تحت اسمي عن إني دكتور بتاع كله!!!!! وتعال شوف عدد النسوان المسجلات بالموقع لايعد ولايحصى!! والا استشاراتهم يارب لك الحمد عجباً عجاب لو ترى عيناكا!!!!!! اللي تقول يادكتور ظفر اصبع رجلي الصغير انكسر وش السوات؟وأنا عندي عرس؟؟؟؟؟؟؟ واللي تقول يادكتور زوجي شدني من شعري وصفق بي في الجدار وتنتف شعري..وش عندك خلطات تطول الشعر وتلمعه؟!!!!!! واللي تقول أنا جميلة جداً بشهادة الجميع وكل مكان أروحه يمدحون بشرتي وجمالي ويقولون اش تستعملين لدرجة صرت كل ماأطلع من البيت وأروح لناس أحس بخنقة!تهقى فيني عين؟؟؟؟ قلت لها:ارسلي صورتك وأنا أحكم! واللي تقول يادكتور ولدي هبَّل فيني ينام وقت مانصحى ويصحى وقت ماننام وياكل وقت مانشرب ويشرب وقت ماناكل واش أسوي فيه؟؟؟أبيه ينام وقت ماننام ويصحى وقت مانصحى وياكل ويشرب وقت ماناكل ونشرب!!! قلت لها:بسيطة ركبي له ريموت كونترول بظهره وبرمجيه على مزاجك!! وعبدالرحمن واسمهان فاقعين ضحك... اسمهان:ياحليلك ياحمود..ذكرتني بوحدة تكتب معانا بالمنتدى اسمها المستشارة خرافة الأزلي!!!!بس لاتصدق ياعبدالرحمن كل الكلام اللي يقوله محمد تراه يحب الكشنة والبهارات بأي سالفة!!!!! محمد:صدقوني من غير مبالغة النسوان يكتبون أكثر من كذا..أحياناً ألقى عضوه حاطة لي عشرين مشكلة مع زوجها وتقول يادكتور الحقني وحلها لي..وأروح للأقسام الثانية وألقاها كاتبة عشرات المواضيع عن السعادة الزوجية وكيفية الوصول إليها ومسوية نفسها دكتورة مبدعة على العضوات!!الصراحة عالم النسوان عالم عجيب مليان تناقضات وسخافات..والا اسمائهم كل ماالوحدة حاولت تملح اسمها زيادة يجيني احساس قوي إنها شينة بزيادة وتحاول تعوض النقص في تزيين اسمها!!! اسمهان:ههههه..أما في هذي معاك حق..معانا بنات في المدرسة يالطيف يارب على قولة المثل شين وقوي عين ويكتبون معانا بالمنتدى بأسماء مثل(قاهرة الناس بفتنتها!!_يذكرون الله لاشافوني_ضحية الجمال الأخاذ!!) (ياعضوات ترى والله جايبة هالأسماء من عقلي لاتكون وحدة منكم اسمها كذا وتذبحني)!!!!!!!! محمد:واللي ألقاها بصفتي مشرف على غالبية الأقسام حاطة مليون طبخة بقسم الطبخ وبالقسم الديني حاطة مشكلتها مع السمنة وتطلب من كل الأخوات بشهر رمضان يتعاطفون مع حالتها ويدعون لها تنحف!!!!! الحقيقة بعد اللي شفته من هبال النسوان اضطريت غير آسف إني أستقيل من إدارة المنتدى!!! عبدالرحمن:بصراحة أنا من الناس اللي ماأرحب بالكتابة في المنتديات المشتركة!!لأن النساء لهم اهتمامات والذكور لهم اهتمامات مختلفة..بس مافي مانع انه الانسان إذا وجد انه عنده شيء ممكن يفيد فيه الطرفين يكتبه سواء بمنتديات منفصلة أو مختلطة محمد:إنت تكتب بمنتديات؟؟ عبدالرحمن:كنت!! بس حالياً اتجهت لعالم التدوين..بعد ماكونت لنفسي قاعدة جماهيرية تتابع مقالاتي بـــــ نهم!! محمد:ماسبق وكتبت مقالات دينية؟ عبدالرحمن:طبعاً هذي لها النصيب الأكبر..تصدق فيه ناس بلغوا درجات كبيرة في مختلف أنواع الثقافة لكن في الجانب الديني تلاقي عندهم جهل كبير بأبسط أحكام الشريعة..كتبت بهالخصوص مقالات كثيرة منها(طريقك إلى الخشوع في السجود والركوع)..(التمسك بالسنن في زمن المحن)..(معاً لنتأسى بالمصطفى)..وغيرها.... ودار بينهم حديث مختلف بعد مادخلت أم اسمهان تسلم وجلست وأول ماأذن العشاء حاول عبدالرحمن يستأذن... وسبقه محمد يتوضأ.. أم اسمهان:تو الناس ياولدي..اشفيك مستعجل؟؟؟؟؟ عبدالرحمن:أنا مواعد أمي وأحلام آخذهم ونروح نزور خالتي جوهرة..عاد تدرون مسكينة بحكم ظروفها نادراً ماتطلع من البيت! أم اسمهان:أي ظروف ؟هالحين اجازة..بعدها المدارس ماجات حتى تشغلها! عبدالرحمن:لاأنا أقصد ظروف زوجها المسكين اللي مايفارق البيت!! اسمهان:الله يعينها..شكله بيتوتي عبدالرحمن:هو صحيح بيتوتي بس موب كيفه غصباً عنه!! اسمهان:غصباً عنه؟؟؟شلون يعني ؟مافهمت! عبدالرحمن:زوج خالتي جوهرة قصته قصة..بس بأختصرها لكم هو كان يشتغل بـشركة واكتشف تلاعب كبير جداً من موظفين يشتغلون بالتزوير والرشوة وأصحاب الشركة مايدرون وهددهم بالفضيحة ومسك عليهم أدلة..فحاولوا يتخلصون منه ودبروا له حادث سيارة..لكن ماانكتب له يموت!عاش..لكن بشلل نصفي وصار حبيس الكرسي المتحرك وكل اعتماده بحياته على خالتي جوهرة..حتى حقوقها الطبيعية كزوجة صار مايقدر يعطيها لها!!وهي اللي مضطرة تصرف على البيت بعد اعاقته اللي خلته رهين البيت والوحدة..ونفسيته صعبة جداً بعد العز والمنصب اللي كان فيه صار عبء على غيره وأبسط أموره اليومية مايقدر يعتمد فيها على نفسه!!!!!! أم اسمهان:لاحول ولاقوة إلا بالله الله يصبره على بلواه ويجبر قلبه ويكتب لخالتك الأجر على تعبها معاه... اسمهان:والمجرمين اللي سببوا له هالمصيبة وينهم؟؟؟ عبدالرحمن:مازلوا طلقاء وعايشين بالنصب والغش..لأنهم مسنودين ومحد يقدر عليهم..لكن ربك فوق كل ظالم... وودع عبدالرحمن الجميع وراح ..وخرج محمد للصلاة وبقت اسمهان متأثرة بالقصة وتفكر بنفسها:معقول أبلة جوهرة اللي ساحرة الكل بأناقتها وجاذبيتها وتفانيها واخلاصها بالعمل والابتسامة الحلوة اللي ماتفارقها وكل التفاؤل اللي فيها عايشة كنصف زوجة؟؟؟!!لاحقوق مادية ولامعنوية ولاأحد قايم بمسئوليات البيت غيرها..مع زوج يعتمد عليها حتى في قضاء حاجته؟!!لا ونفسيته جداً منهارة يعني أكيد عايشة بضغط نفسي وأجواء تخنق!!!لاحول ولاقوة الا بالله..سبحان الله كيف فيه ناس يبعثون فينا التفاؤل وهم يحملون من الهم جبال!!!! أما عبدالرحمن لما وصل البيت لقي أمه وأخته أحلام لسه ماتجهزوا للروحة قام عطاهم فرصة يلبسون لين مايدخل على النت شوي...وأول شي سواه اتجه لمنتدى عالم حواء وحاول يبحث عن موضوعات العضوة اسمهان لين ماتوصل أخيراً لموضوعاتها وكانت عناوينها كالتالي: مشكلتي مع خطيبي!المشكلة اياها!!!!! تصويت:أحلى وصفة لتبييض الركب والأكواع كيف تقهرين عدوتك وتفقعين مرارتها؟؟ أحلى ماركة ميك اب وقلوسات بالصور... إبطك أسود؟؟عندي الحل! بدأت العطله وحان وقت الفَلَه!! أفضل طريقة لنتف المنطقة الحساسة!!!! تعلمي معي المكياج الغجري! عطوني أفكار أبغى ملكتي أحلى ملكة! بنات جدة الحقوني!أبغى أكشخ في العيد بس مدري من أي محل! ذكرياتي المصرقعة مع شلة الصاعقة! أحلى لعبة عدي لرقم 5 واضربي العضوة اللي بعدك! الله يقلع ابليسكم يامتزوجات غثيتونا بمشاكلكم! صرخة استغاثة!أبغى ريجيم ينزل كيلوين بيوم!! اش رايكم بفستاني في عرس خالي فصلته بألف وخمسمية ريال بس؟!!! ورينا مشتريات العيد حقتك..أحلى من مشترواتي ولا لا؟!!! قرأ عبدالرحمن العناوين وقال:استغفرالله العظيم..صدق إني متزوج بزرة!بالله لو يقرأ أحد من المعجبين بكتاباتي مواضيع خطيبتي بيصدق إن اسمهان هي زوجة الكاتب الكبير (ثورة قلم)؟؟؟ |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
مرت الأيام واسمهان على حالها معلقة الجوال كأنه حلق بإذنها وأبوها ملاحظ ومطنش!! وبدأت المدرسة وبدأ الترم الثاني والتقوا الشلة أول يوم بالأحضان وبعد التحايا والسلام والسؤال عن الأحوال....دار الحوار.. اسمهان:ياالله..كيف مرت العطلة بسرعة البرق ماحسيت فيها! أفنان:يحق لك ياعروس!أيامك عامرة بالأحداث الحلوة! اسمهان:ههههه..يلا كل وحدة فيكم تقول شلون قضت عطلتها؟؟ نجلاء:عقب ملكتك يااسمهان بيومين سافرنا لأجدادي واستانسنا.. مرام:أما أنا انهلكت بالمشغل زباين رايحين وزباين جايين وأوقات تتأخر وحدة من الكوافيرات وأضطر أمسك شغلها بدالها بالصبغات أو السشوار أو لف الشعر..يعني كانت بالنسبة لي اجازة مرهقة!!!! رانية:أنا مثل ماتدرون كل يوم بعرس وكل عرس أحلى من الثاني..ليتكم معاي بس... نجلاء:تستعرضين رقصاتك؟؟ولاتدورين عرسان؟والله يارانية على كثر حرصك على حضور الأعراس!إلا اني أحس إنك آخر وحدة بتتزوجين فينا!!! أفنان:ماشاء الله عليك مدري كيف تنبسطين في الأعراس؟...أنا طول الاجازة ماطلعت إلا مرتين أمي اللي تطلع بس ولاتاخذنا و دايماً تقول البنت العاقلة مكانها المناسب بالبيت..ونصيبها يجيها لين حدها!!!! رانية:أي بيت؟ياأم نصيب؟؟أنا مدري شلون مايجيك اكتئاب وضغط وسكري من لبدتك في البيت؟أمك تسلي نفسها وتسوي لك دعايات محمسة تحببك في حبسة البيت!!! أفنان:بس عادي أنا تعودت على جلسة البيت فيها راحة وهدوء..أحسن من الطلعات والزيارات... رانية:كلن بــــ رشده يعيش!!! نجلاء:إلا عبير وش صار بسالفتها؟ اسمهان:لا حد يسألني!أنا أتعمد ماأسأل سماح إن قالت شي بكيفها سمعته..وإن ماقالت ماأتعب نفسي وأسأل.. لكن آخر شي عرفته انها معجبة العريس وينتظرون نتيجة التحاليل.. ودق الجرس وبدأ اليوم الأول لعب بلعب لأنه الدراسة عادة ماتبدأ من أول يوم طول الوقت كان الجميع يتبادلون أخبار الاجازة..واسمهان تحكي لهم عن مواقفها الكوميدية,,, واستمر الأسبوع الدراسي الأول واسمهان بس تكلم عبدالرحمن أغلب الوقت لدرجة انها تكلمه حتى في الصباح قبل ماتروح المدرسة!!! لما انتبه أبوها تركها لين يوم الثلاثاء وعصب مرة عليها وسحب الجوال منها وقال:شايفك طول الاجازة وانتي تثرثرين على الجوال ومخليك!بس توصل انه حتى أيام الدراسة يتصل فيك بأي وقت ويشغلك عن دراستك؟ هذا اللي ماأبيه لذا بآخذ جوالك عندي لين يتأدب خطيبك ويتعلم الأوقات المناسبة اللي يكلمك فيها!!!!!!!! ومر الثلاثاء والأربعاء والخميس والجمعة وعبدالرحمن قلقان على اسمهان كل مايتصل فيها يلقى جوالها مغلق!! في الجانب الآخر كانت سماح يوم الخميس ببيت أهلها مع أمها وأختها هند وخالتها وتركي جاهم ومعاه نتيجة التحاليل.. وقال: تصدقون إن عبير طلع فيها السكري؟!!!!!! وتفاجأوا كلهم..قالت أم تركي:الله يشفيها ياولدي هند:ياحرام ..يمكن مسكينة ماتدري ان السكري عندها!!! خالة تركي وكانت متزوجة واحد من أقارب عبير قالت:شلون ماتدري وأنا أتذكرها من يوم هي صغيرة تطق إبر؟!!!!!!! التفتوا كلهم لها وقال تركي:انتي من صدقك ياخالة؟؟؟؟؟ الخالة:ايه وليش بأكذب عليكم؟ أم تركي:الله يسامحهم وليش ماصارحونا؟حِنا من البداية قلنا لهم إن تركي عنده نقرس!وأوقات تهيج عليه رجوله! هند:أكيد يمه خافوا يصارحونا ونرفضهم! التفت تركي لسماح وقال:اش رايك ياسماح؟ماسمعت لك راي؟؟ سماح:الصراحة أنا أشوف المرض ابتلاء ومو بيد الواحد وماهي حلوة بحق الناس نرفضهم عشان بنتهم مسكينة مريضة سكري..هذا انت مريض نقرس ورضوا فيك!!!! هند:يعني اللي خلقها ماخلق غيرها؟؟بنات الحلال واجد..وبعدين مايخفى عليكم مضاعفات السكر..ممكن يؤثر على الانجاب والنظر والكلى ويجيب الغرغرينا والعياذ بالله لو مااهتم الانسان بجروحه!! سماح:لاتكبرون الموضوع عاد..البنت ماشاء الله رشيقة يعني واضح انها مهتمة بنفسها ومو بعيدة انها تتبع حمية معينة يعني تأثير المرض بيكون بسيط ومو ملحوظ عليها... تركي:الحقيقة أنا بعد تعلقت فيها من يوم الشوفة بس مقهور من أهلها وعدم صراحتهم معانا! أم تركي:ياولدي لاتسيء الظن..يمكن فكروا انه لو ماصار بيننا نصيب انه مو حلوة بحق بنتهم ينتشر عنها انها مريضة....أنا أقول توكل على الله وعساها من نصيبك.. تركي:بإذن الله والله يكتب اللي فيه الخير.. واليوم الثاني كان الجمعة غداء العائلة كتمت سماح الموضوع عن الكل...(أهل زوج محمد) وجاء السبت وعبدالرحمن قلقان على اسمهان اللي قافلة جوالها طول الوقت.. وفجأة وبوقت الفسحة جت أم سالم الفراشة ونادت اسمهان وقالت لها:أبلة جوهرة تبغاك بمكتبها!!! راحت اسمهان لأبلة جوهرة اللي قالت لها:شلون أهلك يااسمهان؟؟ اسمهان:بخير... جوهرة:خذي الجوال فيه اتصال ضروري لك! اسمهان(برعب):خير أهلي فيهم شي؟؟ جوهرة:ردي وانتي تعرفين!!! سحبت اسمهان الجوال وحطته على إذنها وهي بقمة الخوف وصاحت:آلو!! عبدالرحمن:صباح الخير سمهونتي!!! اسمهان:هذا إنت؟؟؟؟؟ عبدالرحمن:إيه..ليش ماودك تسمعين صوتي؟؟ صارت اسمهان تناظر أبلة جوهرة اللي فهمت قصدها وخرجت من المكتب!!! اسمهان:لا...ماقلت شي بس السالفة انه أبوي ماخذ جوالي..وحكت له السالفة... عبدالرحمن:معذور أبوك شكلنا مصخناها بالمكالمات المفروض يكون عندنا تنظيم للوقت ونتصل ببعض بأوقات مناسبة ومعقولة.. أنا أشوف إنك لازم تعتذرين من أبوك وتوعدينه إنك ماتكلميني يومياً!!! وبعد الأخذ والعطاء انتهت المكالمة... ودخلت أبله جوهرة المكتب وقالت:اسمهان انتي تدرين لو يدري أحد إني خليتك تكلمين خطيبك من جوالي أثناء الدوام الرسمي راح أتعرض للمسائلة والمشاكل؟؟؟؟؟ اسمهان:إيه..بس انتي اللي ناديتيني!!! أبلة جوهرة:خلاص انسي الموضوع ولاتعلمين أحد من ربعك..اتفقنا؟؟؟ اسمهان:اتفقنا! سافرت ابتسام ورجعت بيتها... و من كثر مااسمهان ميتة على مكالمات عبدالرحمن راحت لأمها بنفس اليوم اللي رجعت فيه من المدرسة وقالت:يمه تكفين...طلبتك لاترديني!! الأم:خير؟؟وش تبين؟؟ اسمهان:أبي جوالي! الأم:تبين الجوال؟؟ولا تبين تسمعين صوت اللي جاب لك الجوال؟؟؟ اسمهان:الصراحة...الاثنين!! الأم:يابنتي أبوك يبي مصلحتك..ماهي حلوة هالخفة بحقك...بكرة لاتزوجتوا وأخذتوا على بعض مع الوقت بيتجرأ عليك عبدالرحمن ويعيرك بخفة عقلك!! اسمهان:انتوا اشفيكم علي؟؟كأني قاعدة أطارد وراه طول الليل والنهار!ماكأنه هو اللي بيستخف عشان يسمع صوتي ويراسلني!!!! الأم:ولو يابنتي...بس بالرغم من هذا كله أوعدك أكلم أبوك في الموضوع..... وبالفعل بعد الغداء كلمت أمها الأب في الموضوع وبعد جدال ناداها وقال:اسمعي يااسمهان جوالك بيبقى عندي من السبت للثلاثاء وأعطيك اياه بس بعطلة نهاية الأسبوع!!وترجعين تعطيني اياه وتاخذينه بعطلة نهاية الأسبوع اللي بعده وهكذا..وتفهمين خطيبك هالحكي.عشان مايقعد يأذينا بمكالماته كل يوم!!!!! اسمهان:ان شاء الله يبه أوعدك!! الأب:خلاص..اليوم سبت يعني باقي 3 أيام ويجي الأربعاء...يومها تعالي خذي الجوال!!! اسمهان(بخيبة أمل):ان شاء الله... _________ في بيت عبدالرحمن كان عبدالمجيد يتحاور مع أمه عن رغبته بالزواج وخاصة انه نقل بشكل رسمي لجدة...وفرحت الأم وقالت:أبركها من ساعة..بأعطيك وحدة من الشقق اللي فوق..ويصير زواجك بنفس الليلة اللي بيتزوج فيها عبدالرحمن...! بس ينقصنا العروسة المناسبة..وبدأت رحلة البحث.. ونهاية الأسبوع رجع الجوال لاسمهان اللي كانت طايرة من الفرح بعد ماانحرمت من صوت العريس 3أيام وراحت تتصل عليه ولكنه مارد عليها!!حاولت مرة ومرتين وثلاث ولامن مجيب وكان الوقت بعد العشاء!! رجعت أرسلت رسالة عتب تقول فيها: هذي جزات اللي زف لك بشرى تبادله بـصــــــد وهــجر وحرمان؟ تحلم أرد ولو تتـــــصل إلى بكرة خلك تشوف وِشهي قيمةاسمهان ومردقايق ثم ربع ساعة واتصل عبدالرحمن ومن فرحتها نسيت رسالة العتب حقتها وردت بسرعة!! اسمهان:آلو..هلا!!!!!! عبدالرحمن:مو انتي اللي تقولين ماراح تردين لو أتصل إلى بكرة؟؟؟ اسمهان:ماأنلام..قهرتني بتطنيشك!ماتجيبك إلا المسجات!! عبدالرحمن:ولاتطنيش ولاشي أنا اليوم عندي دوام مسائي بدأ من بعد الظهر إلى الليل وقبل شوي كان عندنا اجتماع وممنوع دخول الجوالات..فحطيت جوالي على الصامت وحضرت الاجتماع وتوني طالع شيكت على الجوال ولقيتك زعلانة وقلت لازم أوضح لك الموضوع!! اسمهان:ومتى بتطلع من عملك؟؟ عبدالرحمن:بعد ساعتين.. اسمهان:خلاص إذن ماأعطلك..إذا فضيت كلمني... وانتهت المكالمة..ونزلت اسمهان للصالة..لقيت أمها مستعدة للخروج. اسمهان:على وين يمه؟؟؟ الأم:رايحة المستشفى ولدت بنت صاحبتي عواطف ورايحة أبارك..ودك تجين معي؟؟؟ اسمهان:لا...مالي نفس بأنثبر في البيت..بس بكرة لازم تطلعوني وتعوضوني عن قعدة اليوم!!!! الأم:ان شاء الله ..أي طلبات ثانية ياأميرة؟؟ اسمهان:لا شكراً..رافقتكم السلامة!!!!!! وخرجوا أبوها وأمها..وظلت هي بالبيت... شوي واتصلت أفنان...وبعد السلام والكلام...قالت أفنان:غريبة اليوم أربعاء وقاعدة بالبيت يااسمهان؟؟؟؟؟ اسمهان:واش الغريب؟؟تحسبيني رانية؟؟ أفنان:لا بس أخيراً لقيت أحد مثلي جالس بالبيت... اسمهان:صحيح...انتي ليه دايماً قاعدة بالبيت؟مع إن أهلك يطلعون؟ أفنان:وأختي من يجلس معاها؟؟ اسمهان:وليش ماتاخذونها معاكم؟ أفنان:كيف ناخذها يااسمهان أختي سندس معاقة!!!!!!!!!!! اسمهان:معقوووووووله..كل هالسنين وعمرك ماكلمتيني عنها؟ أفنان:تكسر خاطري دايماً لاجبت طاريها..ماأحب أتكلم عنها كثير.. اسمهان:وكم عمرها؟؟ أفنان:عمرها13 سنة!!!!!!!!! اسمهان:ياقلبي عليها واش مرضها بالضبط؟؟ أفنان:عندها ضمور في الدماغ ومشلولة كلياً..وكفيفة..وماعندها أي وسيلة تتواصل فيها معانا إلا اللمس!! اسمهان:طيب تتكلم؟؟ أفنان:لا..عندها ضمور كلي وتخلف كامل..بس أحس إنها تعرفني وتفرح فيني لاكلمتها وكنت قريب منها..لأنها معتمدة علي بكل شي حتى بتغيير غيارها الداخلي الله يكرمك!!! تبللت عيون اسمهان بالدموع وقالت:هي بالغة؟ومثلها مثلنا تتعرض للـ....؟ الشهرية؟؟؟؟ أفنان:ايه..وأنا المسئولة عن تنظيفها والتغيير لها... وانفجرت أفنان بالبكاء..لدرجة انه اسمهان ماعرفت كيف تسكتها.. أفنان:نفسي أعيش حالي حال البنات..بس من أتذكر أختي ومعاناتها ينكسر خاطري وأموت من الحزن وأقول الله يسخرني لخدمتها طول العمر... اسمهان والعبرة خانقتها:الله لايحرمكم من بعض..ويشفيها يارب أفنان:لهذا السبب أمي حالفة ماتزوجنا لأحد من الأقارب..لأنه أبوي يصير ولد عم أمي..وسبق إنه كان عندي أخ يعاني من نفس المرض لكنه توفى بعمر5سنوات.. وواحد من أولاد عمي يعاني من نفس المرض...إلى الان.. اسمهان:الدنيا هذه ابتلاء ياأفنان ومن شاف بلاوي الناس هانت عليه بلاويه الحمدلله ان ربي خلى ابتلائنا بأنفسنا..غيرنا ابتلاهم بالحروب والفقر والخوف والجوع..وثقي تماماً إن ربي بيجازيك على صبرك خير..وهذا توفيق من الله لإختك انه سخرلها أخت تحبها وترعاها... أفنان:الله يسعدك يااسمهان ماتصدقين اش كثر كلامك خفف عني بعد ماالهم ضَيَّقْ صدري..والحين عن إذنك صار وقت نومها ولازم تنام...مع السلامة اسمهان:مع السلامة.. وحطت اسمهان السماعة وراحت تبكي...وشافتها شغالتهم كاتيا وقالت:ليه مدام اسمهان انتي فيه يبكي؟؟مستر أبدورهمان(يعني عبدالرحمن)سوى مشكله؟؟؟؟؟؟ اسمهان:بعيد الشر عني ان شاء الله روحي اعصري لي جلاس أورينج يبرد على قلبي.. وراحت كاتيا وظلت اسمهان حزينة تفكر:ياترى اشفيها الدنيا كذا؟محد مرتاح؟كلن يشكي همه ويعاني من بلاوي..وأنا إن حصل لي موقف بسيط مع عبدالرحمن اسودت الدنيا بوجهي؟؟؟؟؟؟!!!!صدق اني سخيفة!!وعايشة بنعمة ومو حاسة!!! وقعدت تطقطق على النت وقرأت عن استشارات خرافة الأزلي ويوميات مها وفيصل وجدتي شعيبية وقالت بنفسها:ياحليلها العضوة رماح ردينية دايم توسع صدري بسواليفها وموضوعاتها!!!!!(هههه يقطع أبوالثقة!!!) إلا اتصل عبدالرحمن وكان عمله انتهى وقد رجع البيت...وبعد السلام..وشوية كلام لاحظ انه اسمهان مهمومة شوي وسألها عن السبب وحكت له عن سندس أخت أفنان..... عبدالرحمن:طبيعي يااسمهان إنك تلاقين من حولك أنواع الابتلاءات الله ذكرها في كتابه الكريم من قرون وقال(أحسب الناس أن يتركوا أن يقولو آمنا وهم لايفتنون)...دائما على قدر إيمان الشخص ربي يبتليه ويمحص قدرته على الصبر والتحمل..لكن بأقول لك خبر يمكن يفرفشك شوي!!! اسمهان:قول..قول عبدالرحمن:أخوي عبدالمجيد نوى يخطب...وبإذن الله بيكون زواجه بيوم زواجنا.. اسمهان:الله يسامحك..مافرحتني! عبدالرحمن:أعوذبالله ليش تقولين هالكلام؟ماودك أخوي يتزوج؟؟ اسمهان:لا..وإنت الصادق ماودي يكون زواجه بيوم زواجنا!!!! عبدالرحمن:يالطيف يارب وش هالحسد؟؟؟؟ اسمهان:ولا حسد ولا شي.. المفروض بيوم زواجي محد يخطف الأضواء غيري..وانت تبي تجيب عروس ثانية تنزف معي؟؟؟عشان تخرب طلعتي؟؟؟ عبدالرحمن:انتي وين والنضج وين؟صدق إني ماعندي عقل ولامنطق يوم إني خطبت بنية صغيرة!! اسمهان:ايشششش؟لك الشرف ياابن الثلاثين!بعد ماشاب ودوه الكُتَّاب!!!!!! عبدالرحمن:يابنت الحلال خذي الموضوع من منظور ثاني..انتي بتتزوجين وتلاقين لك جارة بنفس العمارة تونسينها وتونسك!لاتزوجتي ومعاك عروس ثانية ثقي إني بأحجز أفخم وأغلى قاعة لأن التكاليف راح تكون بيني وبين أخوي بالنص..مو مثل لو تزوجتي لحالك بتكون التكاليف كبيرة علي وأضطر آخذ قاعة عادية!!! اسمهان:آآآآآهاااا...يعني بخلك بيجي على قفاتي؟؟زواج منفرد بيكون خربوطي؟؟وزواج الشراكة بيكون خقاقي!! عبدالرحمن:وش هالألفاظ؟من وين تجيبينها؟خربوطي وخقاقي؟أتوب إليك يارب من فعايلها!!!! اسمهان:تدري؟ ماأبي أتزوج! عبدالرحمن:الله يهديك بس..أساساً عقد الزواج معاي وانتي بنظر الشرع زوجتي يعني لو أسحبك من شوشتك لبيتي محد يقدر يكلمني!لكن إحنا ناس نؤمن بضرورة الإشهار وإقامة عرس مرتب يشاركنا الكل فيه بالفرحة....ولاتحسبينه بيكون عادي بنحاول نظهر بعرسنا بأحسن صورة.. اسمهان:تسحبني من شوشتي؟ ليش أنا خروفة؟؟؟؟ عبدالرحمن:الله يصلحك بس!الحين تركتي الهرج كله؟ومسكتي علي هالكلمة؟؟وبعدين فيه حيوان في الدنيا اسمه خروفة؟؟؟؟؟؟؟ اسمهان:إيه..زوجة الخروف خروفة عبدالرحمن:والله أنا اللي صدق خروف يوم إني جيت أشاورك!!مع السلامة!!!!!!! اسمهان(وتبي تستفزه):ماااااااء مع السلامة!!!!!!!!!!!!! الجزء الثالث والثلاثون مرت الأيام بسرعة واسمهان وعبدالرحمن هذا حالهم...يتناقرون ويتصالحون..ويعوضها عبدالرحمن بزيارات وهدايا...وكان عبدالرحمن يفضل الهدايا اللي لها قيمة معنوية..بس اسمهانوه كانت عكسه كل ماكنت الهدية أغلى كل ماكانت أحلى!!!!(نظريات بنات) ومرة في إحدى زياراته لها عطاها كرت وقال لها:تفضلي... فتحته بشغف ولقته فاضي!!وقالت:اش هذا؟؟ قال عبدالرحمن:لو قلت لك ترجمي أحاسيسك بسطرين..في هذا الكرت الفاضي..ياترى اش راح يخط لي قلمك من كلمات؟!!! قالت اسمهان:جايب لي كرت فاضي يادحوم؟؟ليش؟؟؟ قلة حبر بهالديرة؟!!! عبدالرحمن:يابنت الحلال ودي أقرأ أفكارك..ودي أراقب أسلوبك..ودي أفهمك أكثر..صدقيني لي نظرة ماتتوقعينها !من خطك أقدر أقرأ نفسيتك!! اسمهان:أما صحيح إنك واحد فاضي!وليش ياقلبي تتعب نفسك وتقراني شايفني كتاب؟؟ببساطة اسألني عن نفسيتي وأنا أجاوبك!! وبعدين انت جاي تزور خطيبتك ولا تشتغل عليها طبيب نفسي؟؟ عبدالرحمن:يارحمة الله..بسرعة تثورين!! اسمهان:وش قصدك؟ ثورة؟؟ عبدالرحمن:وش ثورة هذي بعد؟؟ لايكون تقولي لي زوجة الثور؟؟ اسمهان:بالضبط!! عبدالرحمن:يعني ماصدقنا نخلص من سيرة الخرفان طلعتي لي بسيرة الثيران؟!!!زوجة الثور بقرة يامثقفة!!!!!!! اسمهان:تطمن أنا لاثورة ولابقرة إنت اللي ثورة! عبدالرحمن:اسمهان؟؟؟عيب عليك!!! اسمهان:إنت ماتقول إنك ثورة قلم؟!!! عبدالرحمن:هههههه..فهمت غلط راح مخي بعيد!هيا وريني ثورة قلمك وش بينتج عنها!! ومسكت اسمهان القلم وبكل سذاجة سألت:انت اش تبيني أكتب بالضبط؟؟؟ عبدالرحمن:اللي يخطر ببالك ياعمري حطيه الخيار مفتوح أمامك! وقامت اسمهان تكتب وقالت بشرط انت تكتب في الكرت كلماتك عشان أحتفظ فيه وأنا أكتب بورقة!!! عبدالرحمن:موافق! وبدأت تكتب وتغطي الورقة عن عبدالرحمن ماتبيه يشوفها لين ماتنتهي!!! وأخيراً ناولته الورقة وكان بينه وبين نفسه يتمنى يلقى عبارات مماثلة لــ تختلج في نفسي مشاعر كثيرة يصعب علي الافصاح عنها ويأبى القلم إلا أن يبوح بها!! أو..أنت فيضٌ من طهارة قد حكتها مقلتيك يعجز الطرف التغاضي عن جمالٍ ساحرٍ بل آسرٍ..كامناً في شفتيكِ!!!! لأنه العبارات السابقة كتبها لها في الكرت.. لكنه لقي هذه الكلمات: فرن كهرباء.....غسالة أتوماتيك....قدرضغط... مدخل لونه بيج...أبجورات راقية...دعاسات!!!! عبدالرحمن وهو مصدوم:اش هذا؟؟؟الحين لك ساعة تكتبين وبعدها هذا اللي طلع معك؟؟؟؟؟ اسمهان:انت قلت لي اكتبي اللي يخطر ببالك!! عبدالرحمن:مضبوط..قلت اكتبي اللي يخطر ببالك ماقلت لك وش تبين من البقالة؟!!!!!!!! اسمهان(بضجر):انت وش يعجبك بس علمني؟؟تبين أكتب لك التمنطق حول اللامنطق؟! ولا السعي الحثيث لكبح الغزو الفكري؟؟؟؟ عبدالرحمن(بفرح):ماشاء الله هذي عناوين لآخر مقالاتي! انتي تتابعينها؟؟؟؟ اسمهان:إيه,,وأبشرك مافهمت منها شي!!! عبدالرحمن:في هذي أنا مصدقك!أنتي لو فهمتي وحدة منها أحلق شنبي!!! إلا دخل أبواسمهان عليهم وجلس وكانت نظراته كافية توضح لعبدالرحمن انه غير مرغوب بوجوده فاضطرعبدالرحمن ينسحب بهدوء!!! وحط بيدها كيس وهو ساكت ومشى وكان فيه علبة لساعة ماركة وغالية!!نست عقبها الزعل كله!!!!! ومع الوقت لاحظ الأب انه اسمهان ماالتزمت ببنود المعاهدة اللي تنص على الاتصال بعريس الغفلة نهاية الأسبوع وبس!وعلى ضرورة تباعد أوقات الزيارات وتكون لضرورة بس كمشاورتها في شي معين!!!!!فأعلن الثورة فجأة وصاح:اسمعي يابنت يااسمهان اللي مثلك ماتنعطى وجه وانتي تماديتي مع ولد الناس هذا لذا أنا مافي قدامي غير حل واحد وغصب عنكم راح يصير.. مسكته أم اسمهان تهديه... وصارت اسمهان تصرخ بأعلى صوت:لاتقولها يبه لاتقولها..خذ جوالي وامنع الزيارات بس لاتفصلني من مدرستي!!!!وقامت تبكي الأب:وش هالكلام يالثولة؟؟مين قال اني بأفصلك من المدرسة..انتي لو تصيرين تحبين على أربع ماني مطلعك من المدرسة!!أهم شي الشهادة!القرار اللي اتخذته وبيصير سيف على رقابكم هو إن الزواج لازم يتم بأسرع وقت!يعني بإجازة الصيف ومابقى عليها إلا شهرين!!!!!وغير هالهرج ماعندي!!!!! اسمهان نشفت دموعها وقالت بداخلها:ينصر دينك يايبه!!!! هههههههههههه راحت اسمهان تركض على الجوال بسرعة واتصلت على عبدالرحمن.. وقالت بفجعة وطفاسة غير طبيعية!!:عبدالرحمن بارك لي بأتزوج قريب!!! عبدالرحمن:ايششش؟؟بتتزوجين مين؟؟ اسمهان:الله يقطع ابليسك بأتزوجك إنت اشفيك فقدت الذاكرة؟؟؟ عبدالرحمن:وانتي اشفيك طايرة؟؟ومين قال إننا بنتزوج قريب؟؟ اسمهان:أبوي قال إن الزواج بعد شهرين!! عبدالرحمن:ماشاء الله..أبوك يخطط والعريس آخر من يعلم!!لهاالدرجة انتي ذابلتن كبده وموب طايق قعدتك ببيته؟؟؟ اسمهان:إخس عليك يادحوم!!وأنا اللي قلت إنك بتطير من الفرحة!!! عبدالرحمن:إلا بأطير من القهر والتهريج اللي قاعد أسمعه!انتوا من صدقكم؟؟أنا لسه ماجهزت البيت ولااتخذت أي ترتيبات..على أساس إنه الزواج باقي عليه سنة كاملة وزيادة!! اسمهان:المفروض أنا اللي أقلق أكثر منك لأن وراي تجهيزات كثيرة...وبالرغم من هذا تحمست.. إلا عبدالرحمن جاله خط ثاني على جواله وقال لاسمهان:يلا عن إذنك هذا أبوك يتصل فيني! قفلت اسمهان الخط وندمت أشد الندم على طفاقتها وخفتها!!!!قالت بنفسها هالحين بينظر لي إني مرجوجة ومو مصدقة إني بأتزوجه!!ليتني تعقلت ومااتصلت!!!!! وكلم أبواسمهان عبدالرحمن مكالمة مختصرة مفادها إنه قابلني في بيت ولدي محمد وعطاه العنوان وتقابلوا هناك..(لأنه بيني وبينكم الأب مايبي عبدالرحمن يجي بيته ويضطر يخلي اسمهان تقابله!!!!!!!!) ولما تقابلوا الثلاثة الأب والأخ والخطيب حاول الأب يجبر عبدالرحمن على تقديم موعد الزواج لأنه مو راضي بالوضع اللي قاعد يسيرمن مكالمات وزيارات..أو يقبل بالحل الثاني وهو قطع المكالمات والزيارات بينه وبين اسمهان لمدة سنة كاملة ومايشوفها الا يوم العرس السنة القادمة!!! عبدالرحمن:أكذب عليك لو قلت لك إني أقدر أبعد عن خطيبتي لمدة سنة كاملة!!لكن عطنا فرصة 4شهور نرتب وضعنا فيها... الأب بكل عصبية قدامك شهرين ماغيرهم وهذا آخر كلام عندي! عبدالرحمن:بس انت بالطريقة هذي بتخرب على أخوي عبدالمجيد..لأنه مخطط يتزوج معاي بنفس الليلة وهو للحين ماخطب!!! الأب:يمديه يخطب في يومين لو يبي...وبنات الناس ماليين البيوت!!! وبعد شد وجذب وافق عبدالرحمن وقال لهم:بآخذ راي الوالدة وأخوي وعساهم يوافقون... ورجع عبدالرحمن لبيته وكلم أمه بهالموضوع وتفاجأ بحماسها للموضوع وفرحتها!! عبدالرحمن:غريبة منك يمه!أكثر شي كنت شايل همه إنك ماتوافقين! الأم:بالعكس هذي الساعة المباركة..العمر يجري وبعدنا مافرحنا فيك إنت وأخوك.. عبدالرحمن:بس عبدالمجيد لسه ماخطبتي له وتدرين وضعه صعب يمكن مو بسهولة بتلقين له عروس!!! الأم:مثل ماربي يسرها ولقينا لك عروس..بنلقى له ان شاء الله..أهم شي إنت ابدأ من هالحين بتأثيث شقتك.. وبعد ماانتهى الحوار خرج عبدالرحمن وخطر على بال أم عبدالرحمن وحدة من بنات معارفها فكرت تخطبها وبعد ماكلمت أهلها تفاجأت بإنه البنت محجوزة لواحد من أقاربها!!! وقعدت بينها وبين نفسها تتذكر آخر مناسبات حضرتها ومين قد لفت انتباهها من البنات!! ولقت إنه آخر مناسبة حضرتها كانت ملكة اسمهان وعبدالرحمن وانه محد أثار انتباهها إلا لابسات الوردي!! واتصلت بأختها جوهرة فوراً وبعد السلام قالت أم عبدالرحمن:جوهرة تتذكرين لابسات الوردي بملكة ولدي اللي تقولين انهم بمدرستكم؟؟؟ جوهرة:ايه..اشفيهم؟؟ أم عبدالرحمن:فيه وحدة منهم عاجبتني حيل بس نفسي أعرف اسمها واسم عيلتها... جوهرة:ياحليلك..تبيني أتذكر؟؟كلهم كانوا لابسين نفس اللبس وحاطين نفس الميك آب ومسويين نفس التسريحات..!!! أم عبدالرحمن:أدري..بس هالبنت اللي قعدت صورتها براسي كانت ثاني وحدة من البنات اللي طلعوا يزفون اسمهان بالسوري!! جوهرة:الصراحة ماأتذكر مين فيهم طلعت ثاني وحدة..لكن اش تبين فيها؟؟لايكون ودك تخطبينها لعبدالرحيم؟؟؟ أم عبدالرحمن:وليش فكرتي بعبدالرحيم اللي هو أصغرهم؟وماقلتي عبدالمجيد؟؟؟؟؟ جوهرة:يعني لاتآخذيني ياأختي..بس عبدالمجيد انتي أدرى بوضعه..ماأتوقع إنه أي وحدة بترضى فيه!!!!!!!!! أم عبدالرحمن:ليه؟؟مكسح؟ولا ينقصه إيد ولا رجل؟؟الحمدلله ولدي من خيرة الشباب وألف مين يتمناه!!!! جوهرة:الله يوفقه يارب..بس أنا قلت اللي عندي ومو متذكرتها!!!! واتصلت أم عبدالرحمن على أم اسمهان وكلمتها ثم طلبت اسمهان..وبعد السلام قالت:اسمهان حبيبتي بغيتك بسالفة! اسمهان:خير ياخالة؟تفضلي! أم عبدالرحمن:بما إنكم قدمتوا موعد العرس صار لازم إني أستعجل وأخطب لولدي عبدالمجيد بأسرع وقت!وبصراحة معجبتني وحدة من صاحباتك لابسات الوردي وموعارفة اسمها!!! اسمهان(بفرحة):أي وحدة منهم؟؟ أم عبدالرحمن:الصراحة كلهم كانوا متشابهات بس اللي أذكره زين إنها ثاني وحدة طلعت على المسيرة تزفك بالسوري!!! اسمهان:آآآآآآهآآآآآآ....تقصدين نجلاء! أم عبدالرحمن:ماشاء الله اسمها نجلاء؟؟الله يحفظها حلوة واسمها حلو مثلها..بس هي مين بنته؟واش يشتغل أبوها؟؟ وماقصرت اسمهان عطتها بعض التفاصيل ورقم أهل البنت... وبسرعة راحت اسمهان بصرقعتها المعهودة واتصلت بنجلاء وردت أختها وقالت اسمهان:عطيني نجلاء لو سمحتي!! نجلاء:أهلين... اسمهان:نجول نجول مبروك ياعمري أنا وانتي عن قريب بيجمعنا بيت واحد!!!!!! نجلاء:أخاف مضيعة يالحبيبة!ترى أنا نجلاء موب عبدالرحمن!!!!!!!! اسمهان:دارية يالخبلة بس السالفة ومافيها إنه أم خطيبي نوت تخطبك لأخوه!يعني بنصير سلايف ونسكن بعمارة وحدة وبعد شهرين بعد!!! نجلاء:الله يبشرك بالخير..بس انتي خيالك واسع حيل!!يعني حطيتي إنه أهلي بيرحبون وبيوافقون وبيزوجوني بعد شهرين؟؟؟؟؟؟؟ اسمهان:وليش هالتشاؤم؟؟أنا ماتوقعت إنه بيجي اليوم اللي يقبلون أهلي يزوجوني فيه وأنا بعدي ماتخرجت من الجامعة مثل خواتي!!! نجلاء:الله...ياليت يااسمهان يكون الواقع سهل مثل الكلام..بس عطيني معلومات عنه.. اسمهان:تصدقين إني ماقد جبت طاريه مع عبدالرحمن؟!!!!بس كل اللي أعرفه إنه راعي أخلاق ودين... |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
بيوم من الأيام تفاجأت اسمهان بأنه أمها تلقت دعوة لحضور ملكة عبير!! وكانت الداعية سماح وكان اليوم جمعة وقت اجتماع العائلة على الغداء..... اسمهان(وهي مو عاجبها الكلام!!):مبروك ياسماح! وياترى متى الملكة؟؟؟ سماح:الأسبوع الجاي يوم الخميس.. اسمهان:سبحان الله كانت تستهزيء فيني إني بأتزوج وهذي هي ماصدقت يجيها عريس ووافقت على طول!!! سماح:يحق لها...هو أخوي تركي في مثله بهالأيام؟؟؟؟عموماً ننتظر حضورك يوم الملكة!! اسمهان:ولايطرالي أحضر!! سماح:وليش؟؟ ياكافي! اسمهان:ماهو من حبي فيها!! سماح:يالطيف يارب..ماخبرتك بهالحقد؟!وبعدين هي اش مسوية لك..عشان تكرهينها لهذي الدرجة؟؟؟؟؟؟ سكتت اسمهان وماحبت تفتح مواضيع..لكن بداخلها سرحت بأحداث قديمة حصلت لها ولشلتها مع عبير من أيام المتوسط!!مثلاً خبَّت عبير سلسلتها الذهب بشنطة رانية واتهمت رانية بسرقتها!!وكانت تشق دفاتر البنات المتفوقات وتشخبط فيها..كنوع من الغيرة!!وطبعاً الفتنة عند المدرسات ونقل الكلام اللي يدور بالصف طبعها هذا غير الاتهامات اللي تحب ترميها على شلة اسمهان...يعني باختصار كانت عبير بنفسية معقدة حاقدة ماتحب تحس إنه في شخص أحسن منها!!!!! ودارت حوارات بين اسماء وسماح والأم واسمهان...ومحمد وأبوه كانوا قاعدين في ركن الصالة يتبادلون أحاديث خاصة!! سألت اسماء:هااه؟؟يامدام اسمهان..أخيراً بيتحقق مرادك..وتنفذين بجلدك لبيت عريسك؟؟؟ اسمهان:ايه..وأفتك منكم كلكم وأول وحدة انتي!! اسماء:إيه بس أحب أنبهك ياأم لسانين ترى حِنا لأنا أهلك نتحمل لسانك الطويل بس ولد الناس مابيرضيه الحال!!هذا إن ماردك لنا من أول شهر! اسمهان:عجيــــــــــــــــب!!أ شوفك لك فوق ست سنين مع زوجك ولسه مارجعتي لنا؟!!!! الأم:أقول اقصروا الشر..خلوا بينكم ذكرى حلوة تتذكرون فيها بعض لاابتعدتوا الأيام الجاية!! اسمهان:هههههه وانتم عاد الله يهديكم تحسبوني آخذ على كلام اسماء أدري انها تعشق تناقرني وأموت على مناقرتها!وأكثر وحدة بتوحشني سواليفها منكم اسماء!!!! سماح:طيب يااسمهان محمد يقول لي إن زواج أخو عبدالرحمن بيكون معاكم بنفس اليوم..صحيح؟؟؟؟؟ اسمهان:صحيح..والأروع إنه زوجته بإذن الله راح تكون وحدة من أعز صاحباتي!!! سماح:ماشاء الله...مين فيهم؟؟ اسمهان:نجلاء..دقت علي أم عبدالرحمن قبل كم يوم وقالت انها تبيها لولدها.. سماح:والله ماشاء الله عليها أم عبدالرحمن قاعدة تكافح العنوسة في شلتك!!عقبال بقية الشلة!!! اسمهان:لا من جد أحس إنها أحسنت الاختيار يوم اختارت نجلاء!!! سماح:فعلاً أنا لاحظت إنه أحلى وحدة بشلتك وأحسنهم شخصية وبشاشة نجلاء.. أما رانية صحيح فرفوشة وراعية فزعات لكن بعض حركاتها لك عليها!!!!! اسمهان:ههههه..قصدك عربجية حبتين؟!!صح؟ سماح:صح!!ومرام جذابة مرة بس واضح إنها اتيكيت ومو أي أحد يدخل مزاجها! اسمهان:والله ماشاء الله عليك ياسموحة اشتغلتي عليهم تحليل على بالك فوزية الدريع!!!! سماح:ههههه..الصراحة شكلهم وحركاتهم كانت ملفتة يوم الملكة..خلتني ماأشيل نظري عنهم لحظة!!وفيه وحدة منهم عجبتني بهداوتها ورقتها بس شكلها مو اجتماعية ومو متعودة على الأجواء الصاخبة!راعية الشال اللي على كتفها. اسمهان:أكيد تقصدين أفنان! سماح:تصدقين أمي اللي نبهتني لها وقالت لو عندي ولد ثاني كان خطبتها له؟! اسمهان:حتى لو عندكم ولد ثاني ماأعتقد أبداً إنها توافق تتزوج..بسبب خدمتها لأختها...وانطلقت اسمهان تحكي لهم عن قصة سندس أخت أفنان!! الأم:الله يشفي أختها يارب ويرفع عنها..ويعطيها الأجر على صبرها... اسماء:الحمدلله على كل نعمة...أكثر شي أفكر فيه طول حملي هذا الجنين عسى ربي يبارك لي فيه ويكون سليم لأنه الصراحة الأمراض كثرت بشكل مخيف وأغلبها مالها علاج!!! الأم:صدقتي..يابنتي..هذاك اليوم لما زرت بنت صاحبتي عواطف قالولي انه المولود عنده ثقب بالقلب واحتمال يسوون له عمليه!!الله يشفي جميع مرضى المسلمين... _______________ وطبعاً في الجانب المقابل أم عبدالرحمن كلمت أهل نجلاء بالتيليفون وبعدين راحت زارتهم لحالها..لأن أحلام سافرت..أما أبو نجلاء كان في رحلة عمل بصفته رجل أعمال لذا ماقابل عبدالمجيد... ووعدتها أم نجلاء إنه لما يجي أبونجلاء من السفر نكلمكم تجون ويتعرف أبوها على المعرس! ومرت الأيام وصارت ملكة عبير.. واسمهان رفضت تحضرأمها راحت بس..لمدة ساعة فقط ورجعت!!! واستغربت اسمهان!! وقالت:يمه..تو الناس وشفيك رجعتي؟؟؟؟ الأم:ضاق صدري يابنتي من اللي شفته!جايبين مطربة تغني وجماعة الترديد رِجال واقفين برة ورا الستارة والأدوات الموسيقية مالية المسرح لاوفوق هذا كله المطربة جايبة معاها وحدة لابسة بدلة رقص نصها عاري ياالله لاتبلانا وترقص رقص ماصخ!!غير الدي جي اللي يطنطن فوق رووسنا بالديسكو وقلة الحيا والناس يالطيف عليهم يارب لاحشمة ولاذوق ولاستر ويقولون الناس وشفيه المطر ماينزل بهالديرة؟!!!! اسمهان:طيب وكيف القاعة والتجهيزات؟؟؟ الأم:الله يرضى علينا يابنتي بملكتنا..على الأقل حِنا سوينا أشياء حلوة بس بعقل..لكن أهل عبير واضح إنهم تكلفوا تكلف غير طبيعي بكل شي!!وفوق هذا كله خرجْت من عندهم وأنا مو راضية صدق الرسول يوم قال من أرضى الناس في سخط الله سخط الله عليه وأسخط الناس عليه!! اسمهان:الله يبارك لها..وليتها تستاهل!!أنا ماأحبها ولاحبيت أمها من ذاك اليوم اللي قابلناها فيه عند سماح!! الأم:تصدقين يابنتي؟؟إن أم تركي تقول إنهم طلبوا مهرغالي مرة والأدهى منه إنهم طلبوا مؤخر كبييير؟!!!!والأم اشترطت لنفسها كسوة كبيرة!!هذا غير الأشياء اللي طلبوها في الملكة من شبكة وخلافه!تقول أم تركي انها كلفتهم كثير!مدري ليش حسيت إنهم ناس طماعين!مع إن ربي رازقهم وأبوهم ماشاء الله مركزه عالي!! اسمهان:يعني عبير مستمدة قوتها من مين؟؟إقلب القدر على فمها تطلع البنت لأمها!!!!! _____________ ومرت الأيام وعبدالرحمن مجتهد في التجهيزات وحجز القاعة وكانت كبيرة وغالية يعني كل الميزانية اللي كان بيصرفها على عرسه لحاله حطها في هالعرس المشترك وأخوه بيضيف قدها!!وبدأ بكل الترتيبات من عشاء للقاعتين وكل ماتخبرونه من استعدادات للزواج وتأثيث البيت وكان مشغول دايماً لدرجة انه اتصالاته مع اسمهان مختصرة جداً ومتباعدة!! وبقي شهر واسبوعين على الزواج وأبونجلاء مارجع من السفر!!!وأم عبدالرحمن بدأت تقلق لأنه عبدالرحمن عربن في كل شي بمبالغ كبيرة ويظهر انه سالفة عبدالمجيد بتطول!!!وكلمت أم العروسة وشرحت لها الظروف وإنه لازم يستعجلون بالرد عشان يلحق الولد يرتب أوضاعه وتلحق بنتهم تجهز نفسها لكن أم نجلاء وعدتها انه الأب راجع بعد يومين!!وبالفعل رجع الأب وقابل عبدالمجيد..... ومن يومها واسمهان تبي تعرف اش اللي صار لكن نجلاء تغيرت 180 درجة مع اسمهان!!!!! ولاتبي تكلمها لافي التلفون ولافي المدرسة!!! حست اسمهان إنه في شي مزعل نجلاء وحاولت تسألها لكن نجلاء مو راضية تتجاوب ومقلوبة على الآخر!!!! يوم ضاقت السبل باسمهان اتصلت على عبدالرحمن وسألته:انتوا رحتوا للجماعة خطبتوا لعبدالمجيد؟؟؟؟ عبدالرحمن:إيه خطبنا من أسبوع! اسمهان:وش قالوا لكم؟؟؟ عبدالرحمن:وعدونا يسألون عن العريس وبعدين يردون بس إلى الان ماردوا ولاعطونا خبر!!!!!!!!!! استغربت اسمهان من قصة نجلاء اللي زعلانة منها ومو راضية توضح السبب وقررت تواجهها!!!! قررت اسمهان مواجهة نجلاء خاصة انها حاولت تسأل الشلة عن سبب تغير نجلاء ومحد عطاها جواب شافي... وفي المدرسة وكانوا الشلة متجهين للكافتيريا..سحبت اسمهان صديقتها نجلاء ووقفت قدامها وجهاً لوجه... اسمهان:الحين اش سالفتك انتي؟أكلمك ماتردين!أتصل على البيت وأهلك يصرفوني!أنا اش مسوية لك بالضبط؟؟؟ نجلاء:ياشين الاستهبال!بكل بساطة انتي انسانة أنانية!!! اسمهان:أنا أنانية؟؟ليش؟وأنا اللي فرحانة إنك بتصيرين وحدة منا وفينا.. وأحبك أكثر منهم كلهم تقومين تتهميني بالأنانية؟؟؟؟؟ نجلاء:انتي لو تحبيني صحيح..كان حبيتي لي كل خير! مثل اللي تتمنينه لنفسك تتمنينه لغيرك!لكن للأسف غشيتيني يااسمهان!! رانية:انتوا اش سالفتكم ياحلوات؟مقلب جديد قاعدين تسوونه فينا؟؟تراه ماصخ وبايخ!! اسمهان:نجلاء حرام عليك تتركيني ضايعة كذا!لازم تصارحيني وشفيك؟؟ نجلاء:أسألك بالله العريس اللي أرسلتيه لنا عريس يناسبني؟؟؟؟ رانية:آآآه يالخاينة يااسمهانوه وأنا اللي عادتك صديقتي..آثاريك توزعين عرسان على البنات ومخليتني!!يلا صارحيني مين بعد من الشلة دزيتي لها عريس وخليتيني؟؟؟؟؟؟؟ اسمهان(وهي مو مهتمة لكلام رانية):وشفيه العريس؟أظن ماتقدرين تتكلمين بشي عن أخلاقه!!وبعدين اللي يسمع لهجتك يحس كأني دليتكم على عريس من الشارع!ماكأنه أخ لخطيبي وشريك حياتي!!! نجلاء:واللي يحب أحد ياست اسمهان ويتمنى له الخير يدله على عريس أصم وأخرس؟!!!! رانية:وشهو؟؟عريس أطرم؟الله لايجعل نصيبي على إيديك يااسمهانوه!!!! اسمهان(وهي متفاجئة):وش تقصدين؟وضحي لي؟؟؟ نجلاء:اش يبي لها من توضيح؟العريس اللي جانا كان أصم وأخرس ويتكلم بلغة الإشارة وبحسب ماعرفنا من خطيبك المصون إنه أخوه مخلوق بهذه العاهة!!أظن بتسوين نفسك ماتعرفين شي؟!!! اسمهان(وعيونها مليانة دموع):صدقيني يانجلاء أنا ماعندي أي فكرة عن الموضوع..أنا اللي انغشيت موب إنتي!!!غريبة عبدالرحمن وأمه ماوضحوا لي هالنقطة!يمين ماكان أدله على بابكم!! نجلاء:أم زوجك كل اللي قالته لنا من أول زيارة إن ولدها لسانه ثقيل وبس!لكن ماقالت إنه أخرس وأصم!وبعدين هي شايفتني انسانة طبيعية وبعدي صغيرة وشلون كانت تتوقع مني اني بأوافق بسهولة وأنا لسه قدامي بدل الفرصة ألف؟!!!!!!! اسمهان:حبيبتي نجلاء أنا متفاجئة فعلاً من الكلام اللي تقولينه وصدقيني ماراح أخلي هالسالفة تعدي على خير ولايكون بخاطرك هم!! نجلاء:ماعليك من زعلي..اللي زعلوا من جد أمي وأبوي..قالولي هذي صديقتك اللي تحبينها؟شوفي وش جابت لك!!! اعتذرت اسمهان ورقعت السالفة ولاتركت نجلاء إلا وهي راضية.. واتجهت فوراً لمكتب أبلة جوهرة ودخلت عليها... ناظرت فيها أبلة جوهرة وقالت:خير يااسمهان؟؟ اسمهان:عندي سؤال واحد وبأسألك إياه..وضروري تجاوبين! أبلة جوهرة:اجلسي بالأول,,وشهو سؤالك؟؟؟؟ اسمهان:عبدالمجيد..أصم وأخرس؟ أبلة جوهرة:إيه من يوم ما انولد .ليش تسألين؟خايفة يكون المرض وراثي؟؟؟ انفجرت اسمهان بالبكاء وقالت كل السالفة لأبلة جوهرة.. أبلة جوهرة:اسمهان حبيبتي انتي ماغلطتي بشي كل السالفة إنه أم عبدالرحمن اتصلت وأخذت رقم نجلاء منك..يعني انتي لارشحتي لها عروس ولاكان عندك علم بسالفة عبدالمجيد صح؟؟؟ اسمهان:صح! أبلة جوهرة:أجل ليش زعلانة؟؟ اسمهان:أنا زعلانة من عبدالرحمن وخالتي ليش مامهدوا للناس؟ ليش مافكروا أصلاً يخطبون لعبدالمجيد وحدة مثله؟؟؟؟ أبلة جوهرة:تدرين عاد إنه لي سنين أناقش أختي في الموضوع ومو راضية تقتنع؟!!لأنه حالة عبدالمجيد هي الحالة الوحيدة بالعائلة اللي تعاني من صمم وخرس يعني مثل الطفرة الجينية بالضبط!وأختي عندها اعتقاد شديد إنه إذا عبدالمجيد تزوج وحدة تحمل نفس عاهته راح ينتقل المرض لعيالهم الجايين ويصير وراثي!!غير انها تفكر انه لو حصل وجاهم عيال طبيعين من وين بيتعلمون النطق والتواصل مع المجتمع وأبوهم وأمهم خُرس؟؟ بصراحة مرات أحس في كلام أختي بعض الصواب وبالأخص انه عبدالمجيد من صغره وهو يدرس بمدارس الصم والبكم ويقدر يعتمد على نفسه بكل شي ووظيفته كويسة وراتبه زين يعني مافي شي قاصره إلا بنت الحلال اللي يكون عندها القدرة على الصبر وكسب أجره!!بس أنا معاك في إن أختي من البداية وقبل ماتحرج نفسها المفروض قالت للناس بالتليفون عن حالة ولدها وشافت مدى ترحيبهم!! اسمهان:حالته صعبة كسر خاطري..ولو مالقت له عروس ترضى فيه خلاص تتركه من غير زواج؟؟والا بترجع تستسلم وتزوجه انسانة مثله؟؟؟؟ أبلة جوهرة:مدري..بس أنا من زمان قايلة لها انه ولدها وضعه صعب..لكن عندها تفاؤل كبير بأنها تزوجه انسانة سليمة!الدنيا هذي كلها مصاعب ومحد مرتاح وأنا أول الناس!! حست اسمهان انه أبلة جوهرة متضايقة وودها تفضفض وصارت تسحبها بالكلام لكن أبلة جوهرة قالت:اسمهان الفسحة انتهت من دقايق ماوراك حصص؟؟ اسمهان:علينا أبلة هويدا مدرسة الإنجلش بس غايبة! أبلة جوهرة:يمكن عندك فكرة يااسمهان عن وضع زوجي؟!صح؟ اسمهان:يعني كلام على الطاير من عبدالرحمن!! أبلة جوهرة:وياترى هل قال لك عبدالرحمن إني ماعندي عيال؟؟ اسمهان:شلون؟؟أنا اللي أعرفه إنه عندك ثلاث!!! أبله جوهرة:هههه هذول مو عيالي عيال زوجي الله يحفظهم وأمهم الله يرحمها كانت صاحبتي بالجامعة ومتزوجة من زمان وأكبر مني بس تعرضت لسرطان وكنت أزورها بأيامها الأخيرة وعيالها كانوا يحبوني وكانت دايماً تكلم زوجها عني وانها تتمنى لو ماتت ان ربي يسخر لزوجها وحدة مثلي ترعى العيال..وبالفعل تفاجئت بعد وفاتها بمدة إنه أهل زوجها جايين يخطبوني ووافقت بعد تردد عشان العيال مساكين..لكن مالحقت أتهنى بعد زواجي بسنتين بس صار الحادث إياه لزوجي وانشل شلل نصفي وصرت مثل مايقولون نصف زوجة!!!مع زوج ماعنده أي احساس بنصف جسده وصار ماعنده قدرة نهائياً على الانجاب!!! وقامت اسمهان بقلبها الرهيف تبكي وقالت:وانتي سعيدة؟؟؟ أبلة جوهرة:يمكن بتستغربين لو قلت لك انه برغم المعاناة اللي أعيشها مع زوجي وعصبيته ونفسيته المنهارة بسبب وضعه الصعب وانعزاله عن المجتمع وحرماني من كل حقوقي الزوجية إلا إني أحس بسعادة كبيرة لما أتذكر أجر الانسان الصابر والمحتسب!!يمكن لو نقوم بالعبادات طول حياتنا ماقدرنا ندخل الجنة بأعمالنا..لكن بالصبر والاحتساب يمكن نقدر نقترب خطوات للجنة... بعد حديث مع ابلة جوهرة استأذنت اسمهان ورجعت لفصلها وهي تتعجب من الصبر هذا وتقول بنفسها:سبحان الله كل يوم يمر علي يعلمني إنه الحياة هذي مو عبث والانسان لازم يحيا وقدامه هدف والسعيد من اتعظ بغيره واستفاد حتى من أخطاء الناس!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
طبعاً اسمهان اتصلت بعبدالرحمن وعاتبته على اللي صار.... عبدالرحمن:لاتسيئين الظن فيني يااسمهان أقسم لك قسم إني ماتعمدت بيوم من الأيام أخفي عنك حقيقة عبدالمجيد بدليل إني من الأساس ماقد جبت لك طاري أخواني لاعبدالمجيد ولاعبدالرحيم حتى!! اسمهان:ياعالم كمان عبدالرحيم اش عنده!!! عبدالرحمن:لاحول ولاقوة إلا بالله.. اتقي الله وتخيلي لو إن محمد أخوك عنده نفس المشكلة ماكنتي بتتمنين له الخيروإنه ياخذ أحلى عروس؟؟؟ اسمهان:بس أمك ماكان المفروض تسكت كان لازم تخبر الناس!! عبدالرحمن:يكون بعلمك أمي قالت لأم البنت من أول زيارة لكن الأم خبت الموضوع عن بنتها!عشان لاتكسر خاطرها وقالت لارجع أبونجلاء نكلمه بالموضوع والبنت مادرت إلا من أبوها عن وضع أخوي!!!وإحنا أصرينا نقابل الأب قلنا يمكن لاشاف عبدالمجيد وشخصيته يُعجب فيه!لكن كان واضح إنه مو عاجبه الموضوع!!! اسمهان:أنا آسفة..يظهر إنه نجلاء هي اللي ماتدري عن شي..على العموم العروس رافضة ومابقى على العرس إلا شهر وأيام وانتوا مادبرتوا له عروس..يعني مين بيقط معاك بالزواج وانت حطيت اللي وراك وقدامك فيه ومحد بيرجع لك فلوسك؟؟؟؟؟؟ عبدالرحمن:مو هذي هي الوهقة!ربطت نفسي بعبدالمجيد وهذا هو مسكين ماله نصيب!!! __________ مرت الأيام واسمهان يومياً بالسوق من السبت للجمعة تجهز للزواج تجي من المدرسة تتغدى وتنام لين آذان العصر وبعدين تصحى تصلي وتلبس عباتها وركض على السوق ترجع صلاة المغرب وعقب الصلاة تذاكر لين بعد العشاء وماتجي الساعة 11 الليل إلا وهي مرهقة وتبي تنام!!!!! وكانت كل مالقت شي مناسب لخطيبها اشترته وغلفته وأخذته المدرسة!!!بتقولون ليش؟ عشان تحط الهدية بمكتب أبلة جوهرة اللي تاخذها معاها وبعدين يمر عبدالرحمن بعد العمل وياخذ هديته من بيت خالته!!شفتوا شلون التعقيدات؟؟لأن أبواسمهان لما أمر بتقديم العرس اشترط عدم الزيارات إلى يوم الزواج!!!!! وكان عبدالرحمن مايقصر أحياناً يشتري الهدية ويعطيها لخالته في بيتها وتاخذها ثاني يوم للمدرسة وتسلمها للعروس!!!!!! وبيوم من الأيام راقبت اسمهان الوضع ودخلت مكتب أبلة جوهرة وكان فاضي وحطت الهدية على المكتب وراحت تتسحب تبي تطلع من غير ماينتبه لها أحد!!لكن أبلة جوهرة مسكتها من كتفها وقالت:ماشاء الله عليك ياقمر..يظهر إنه مكتبي صار متعدد الاستخدامات!قولي لنفسك ولعريسك المحترم إنه هذا مكتب مراقبة الثانوي مو عش الغرام!!!!!عاد أشوفكم مرة مآخذين وجه..بسكم عاد!كلها كم أسبوع والزواج جاي! اسمهان:اش أسوي؟ و كل ممنوع مرغوب!! ________ في الجانب الآخر كانت زيارات تركي لعبير مستمرة وأبوها مشغول على طول ولاله دور بالبيت لأنه أم عبير شخصيتها جداً قوية.. وكانت قبل كل زيارة تمسك بنتها وتقول:الله..الله بالدلع ياعبير..أبيه ينسى الكون كله ومايفكر إلا فيك!!ومايجي يوم العرس إلا وهو طايح عندك! عبير:خلاص يمه حفظتها هالأسطوانة!!! أم عبير:يالهبلة أنا لمصلحتك أقول هالحكي!أخاف إن درى عن سالفتك بكرة..يقطك بالشارع!!!! عبير:تركي طيب يايمه..يكفي إنه لما درى إنه عندي مرض السكري ماغير رأيه فيني!!! أم عبير:ماهو كل مرة تسلم الجرة ياروح أمك!لو درى عن سالفتك الثانية إحنا اللي بنروح فيها!!! ___________ ومرت الأيام وبقي على الزواج شهر بالتمام وعلى انتهاء الدراسة اسبوعين!!اتصلت اسمهان على عبدالرحمن.... وبعد المقدمات الروتينية.. اسمهان:دحومي عندي طلب وودي أطلبك إياه؟؟ عبدالرحمن:آمري وتدللي..وأنا لك رهن الإشارة! اسمهان:من بكرة بيبدأ أول يوم من الشهر اللي بنتزوج عقبه..وبيوافق بعد أول يوم في الامتحانات اللي بتستمر أسبوعين..صح؟؟؟ عبدالرحمن:صح! اسمهان:خلاص..اسمحي لي أقول لك ومن غير أسف لاعاد تتصل فيني وهذا الرقم أبيك تنساه!! عبدالرحمن:ليش؟ماذا اقترفت وماذا جنيت؟أخبريني ياأميرتي!هل بدر مني مايضر؟؟ اسمهان:كلا..تربت يداك!ولكن الامتحانات تحاصرني من كل اتجاه..ثم إني أريد أن أبث الشوق في نفسك للقائي..لكي تشتاق لصوتي أشد اشتياق!!! عبدالرحمن:وهل تتوقعين انني سأحتمل ذلك؟؟ اسمهان:ولما لا؟إذا كنت أنا سأحتمل! عبدالرحمن:ولكن كما تعلمين ياسمهونتي إنني في خِضَم التجهيزللزفاف وأجد نفسي كثيراً في وسط المعمعة!برأيك لو احتجت لاستشارتك في أمر ما فما هو السبيل إلى ذلك؟؟؟ اسمهان:هُناك اختراعٌ اسمه الهاتف الجوال وبه خدمة تُسمى خدمة الرسائل..ابعث إلي بواحدة وأنا سأجيبك بلمح البصر! عبدالرحمن:هههههههه..لافض فوك أخية!!ماشاء الله عليك قاعد أجرجرك بالحكي وأقول يمكن تغلط الحين ولا بعد شوي لكن طلعتي شطورة!!اللي يسمعك مايقول إنك تسمين زوجة الثور ثورة وزوجة الخروف خروفة!!!!ههههه هيا جاوبيني عن هذي..زوج الحية(يعني الأفعى) اش اسمه؟ اسمهان وبكل نباهة قالت:حي!! عبدالرحمن:أقول صكي السماعة يالحبيبة!وراك بكرة امتحان وشكلك بديتي تخرفين!!! ________ راحت اسمهان المدرسة وصار موقف غريب وهي طالعة من قاعة الامتحان بعد ماسلمت ورقتها كانت عبير قد خرجت قبلها وواضح عليها آثار السهر والمذاكرة وماأكلت شي فكان السكر منخفض عندها مرة لدرجة انها كانت دايخة وتمشي وتتمسك بالجدران...واسمهان تتابعها بنظراتها وفجأة عبير رجولها ماشالتها وصار لها اغماءة وراحت اسمهان تركض وشالتها ونادت الفرَاشة تساعدها وودوها لمكتب أبلة جوهرة.. وسدحوها على الكنبة! صاحت أبلة جوهرة في اسمهان:اسمهان بسرعة افتحي السحَّاب الخلفي لمريول عبير وفكي حمالة الصدر حقتها أخاف البنت مختنقة او مكتومة وأنا بأروح بسرعة أنادي المشرفة الصحية!! وخرجت أبلة جوهرة تركض واسمهان فكت سحَّاب عبير وحمالتها وصاحت من هول المنظر وانصعقت من اللي شافته!!!!! كان ظهر عبير محروق بالكامل من الأعلى للأسفل بشكل بشع!!!!خافت اسمهان وقامت تبكي..وشوي ودخلت أبلة جوهرة ومعاها المشرفة الصحية...اللي حطت السماعة على صدر عبير.. طالعت أبلة جوهرة باسمهان وشافتها تبكي وقالت لها:اسمهان..اذكري الله...ان شاء الله عبير مافيها إلا العافية..تلاقينها مع الاختبارات نسيت تفطر!!! صاحت المشرفة الصحية وكان اسمها سلوى وهي مصرية:يالهوي!بصوا البنت دي محروئة خالص!!دا حتى جزء من السِدر(الصدر)عندها دايب خالص وحاطة حشوة في الحمالة!ياخرابي دا ظهرها محروء بشكل بشع جِداً!! أبلة جوهرة:يعني الحروق هذي جديدة؟؟؟ سلوى:لأ دي باين عليها إنها أديمة أوي!! أبلة جوهرة:إذن هذا مو شغلنا قيسي ضغط البنت وسكرها! وبالفعل بعد أخذ الضغط وقياس السكر بواسطة الجهاز اكتشفوا انه عندها هبوط وجابوا لها شوكولا وعصير..وحاولوا يفوقونها وأكلت وتحسنت شوي وقامت..وصارت تطالع بوجوههم كلهم وحست انه سحابها مفتوح وقامت تعدل نفسها .. أبلة جوهرة:اشلونك ياعبير؟ان شاء الله أحسن؟ عبير بعصبية:أنا مافيني إلا العافية.. وخرجت من الغرفة من غير ماتشكر أحد!!! ومسكت أبلة جوهرة اسمهان وقالت:من ستر مسلماً في الدنيا ستره الله في الآخرة يااسمهان..مفهوم؟؟؟؟ اسمهان:مفهوم.....وخرجت اسمهان تكفكف دمعها من هول المنظر ولقيت عبير تنتظرها بره عبير:انتي اللي فتحتي لي السحَّاب؟؟ اسمهان:إيه.. عبير:شوفي يااسمهانوه لو فتحتي فمك بكلمة لأحد..صدقيني لأخلي الشكل اللي بجسمي يصير نفسه على وجهك!!!!! وراحت عبير واسمهان تقول بنفسها:سبحان الله من هالبنت لايمكن تترك فرصة لأحد يتعاطف معاها أو يغير من نظرته لها!!! وظلت اسمهان قلقانة وتفكر معقول تركي وأهله يدرون بالتشويه الفظيع اللي فيها!!!ياترى كيف لازم أتصرف؟!!!! __________وبنفس اليوم في الليل اجتمع عبدالرحمن مع صديقه ناصر ومع تركي!!!بتقولون شلون؟لأن ناصر صاحب عبدالرحمن يصير ولد عم تركي وكانت علاقة عبدالرحمن بتركي أيام الجامعة..وبعد كذا صارت على خفيف في المناسبات والاجتماعات..... وقام عبدالرحمن يبارك لتركي على خطوبته ويسأله:متى الزواج؟؟ تركي:الود ودي الليلة! عبدالرحمن:وايش تنتظر توكل على الله! تركي:كل مافتحت الموضوع مع خطيبتي وأمها ألاحظهم يماطلون!!إلا انت متى زواجك؟؟ عبدالرحمن:بعد شهر بالضبط! تركي:ياحظك ياشيخ! عبدالرحمن:أي حظ ياحسرة؟؟وأنا ورطان لشوشتي..كنت معتمد أتزوج بنفس اليوم مع أخوي ويشيل نص التكاليف عني لكنه مالقى عروس..وأنا حطيت كل اللي معاي في الزواج ماتوقعت انه الدنيا غلا بهالشكل... وبعد أخذ وعطا اقترح تركي على عبدالرحمن انه يشاركه بالزواج ويتزوج معه بنفس الليلة!!!! عبدالرحمن:ياشيخ أحب راسك أنا..تكون كسبت فيني أجر لو سويتها!! تركي:بس هالقرار متوقف على أم خطيبتي لأنها حرمة موب هينة!! شوف بأحاول أزورهم بكرة وأفاتحهم بالموضوع وأرد لك!!! وياعيني كل هالسوالف واسمهان مو دارية عن الطبخة!!!! ظلت اسمهان تصارع نفسها تسكت أو تتكلم عن اللي شافته من عبير!وكلمات أبلة جوهرة ترن في إذنها(من ستر مسلماً في الدنيا ستره الله في الآخرة)..لكن استقرت أخيراً إنها تكلم سماح زوجة أخوها بالموضوع وتبريء ذمتها!لأنها حست إنها مخنوقة وتركي شاب طيب ويستاهل.. اتصلت اسمهان بسماح وماكان في أحد بالبيت أمها وأبوها راحوا مشوار...وبعد السلام والسؤال عن الأحوال... سماح:غريبة ياسمهونة هادة مذاكرتك ومتصلة!مليتي؟؟ولاتبين تسأليني عن محلات معينة أو أسواق؟؟؟؟ اسمهان:سماح أنا أبي أكلمك في موضوع مهم ولازم تعرفينه! سماح:بخصوص؟؟ اسمهان:بخصوص عبير! سماح حست إنه لهجة اسمهان ماتطمن فقالت بأسلوب جاف شوي:خير ان شاء الله؟وشفيها عبير؟؟؟؟ اسمهان:اليوم كانت خارجة من القاعة وداخت علينا بسبب انخفاض السكر...و قاطعتها سماح بجفاف :خلاص..خلاص لاتكملين أنا عارفة الباقي!! اسمهان:يعني تدرون إن عبيرمو طبيعية و... سماح وهي تقاطع:إيه ندري وراضيين! ولو سمحتي لاتقولين مو طبيعية!هذا ابتلاء ومالها دخل فيه!الله يشفيها وبعدين انتي ليه شاغلتك عبير؟؟؟دعي الخلق للخالق..واهتمي بمذاكرتك أصرف لك!!!وهالكلام لايطلع لمخلوق!! اسمهان:أنا آسفة إني اتصلت..لكن ودي أقول لكم انتم ناس غريبين!!! سماح:قصدك أصيلين!! مع السلامة.. اسمهان:مع السلامة.. صكت اسمهان السماعة وتبللت عيونها بالدموع وصارت تسأل نفسها:فعلاً أهل سماح ناس غريبين عبير مافيها أي ميزات تخلي الواحد يتمسك فيها وبالرغم من ذلك عاجبتهم؟!طيب تركي شلون راح يتحمل منظرها؟واش اللي مخليهم يتمسكون فيها وهم يدرون إن أمها قوية؟ لكن بنفس الوقت حست اسمهان براحة إنها أبرت ذمتها وقالت الصراحة وهم بكيفهم!! وطبعاً السالفة ومافيها إنه سماح بسبب مقاطعتها لاسمهان في الكلام ماسمعت الموضوع للنهاية!كانت سماح تظن انه اسمهان متصلة عشان تقول لها عن مرض عبير بالسكر لكن اسمهان كانت متصلة عشان تتكلم عن الحروق الفظيعة!!! وبناءً على ذلك محد عنده علم بالمسألة هذي إلا اسمهان!!!!!! ___________ وكملت اسمهان مذاكرتها وتعشت وراحت تنام وأخذت نظرة على الجوال وكان المتصل عبدالرحمن اللي كان يبي يقول لها عن العرض اللي عرضه عليه تركي بالمشاركة في الزواج! لكن اسمهان رمت الجوال بعصبية وقالت بنفسها:أف..توي مكلمتك أمس ياعبدالرحمن ومنبهة عليك إنك ماتكلمني ولاتسمع صوتي إلا يوم العرس!!وبالرغم من ذلك ضرب بكلامي عرض الجدار ويتصل!!طيييييييب يمين ماأرد!وقفلت جوالها ونامت! وراح تركي ثاني يوم بعد المغرب لبيت عبيرمن غير موعد وفتحت أمها الباب وسأل عن أبو عبير وقالت أمها:كالعادة مسافر!!! تركي :وعبير وينها ياخالتي؟؟؟ أم عبير:عبير عندها امتحانات وقاعدة تذاكر..خير؟؟ تركي:أنا كنت جاي أكلمكم بموضوع..وحكى تركي لهم عن فكرته بمشاركة عبدالرحمن في العرس! أم عبير:بس إنت تدري إني ماأبي بنتي تتزوج الحين! تركي:وش المانع ياخالة؟..بيتي وموجود..وانتم ساكنين بنفس البلد وقريبين منها يعني بنتكم ماراح تبعد عن عيونكم..والدراسة أنا حريص إنها تكملها وبأدعمها بكل اللي تبيه! أم عبير:وماقال لك صاحبك بأي قصر بيسوي الزواج؟؟ تركي:إلا..بقاعة ليلتي.. أم عبير يوم سمعت اسم القاعة استخفت وقالت:ليلتي ماغيرها؟؟ تركي:إيه هي ماغيرها..اللي كبار الشخصيات بس يسوون أعراسهم فيها!!! أم عبير:بس هذي تكاليفها غالية عليك مرة!! تركي:مو هذي هي ميزة الشراكة بالزواج..كل الدراهم اللي معي وكنت مخطط أحطها بعرسي اللي بيكون مستواه متوسط..بآخذها وأحطها مع صاحبي وهو يدفع قدهم ونسوي ليلة ولا ألف ليلة وليلة!!!! أم عبير:ومنهو صاحبك هذا حِنا نعرفه؟؟ تركي:إيه..اللي ماخذ أخت زوج سماح إختي! أم عبير:إيه نعرفهم حضرنا ملكتهم وحضروا ملكتنا شكلهم ناس راهيين ومابيرضون لبنتهم بأي مستوى!تدري؟؟؟على بركة الله! تركي:طيب وأبوعبير متى بأقابله؟وأناقشه بالموضوع؟ترى مابقى على العرس إلا28 يوم بس!!!!!! أم عبير:أبوعبير خله علي أنا ولاتحمل هم..لايمكن يرفض لي طلب..بس انت ابدأ في تجهيز بيتك وترتيبات العرس!! وأنهى تركي حواره مع أم زوجته وخرج... ودخلت عبير على أمها وقالت:وش يبي تركي يمه؟؟؟ ام عبير:جاء يحدد موعد العرس..وبإذن الله بيكون بعد 28 يوم!!!!!!!!!! عبير:شلـــــــــــــــون؟؟انتي وش تقولين؟؟مو على أساس إنه السنة الجاية؟؟مو انتي اللي كنتي توصيني ليل نهار إني أعلِّق تركي فيني وماتجي السنة الجاية إلا وهو يبي يتزوجني بأي طريقة وعقبها حتى لو درى بمشكلتي بيتغاضى عنها؟؟؟ أم عبير:وانتي يالهبلة تدرين وين بيسوي العرس؟؟بيسويه في أفخم قاعة بالبلد!اللي لو يفحط طول عمره ماقدر يجيب قيمتها!لكن الزواج هذا بيشارك فيه صاحبه وبتخف عليه التكاليف..هذا الزواج لازم يتم الحين وبأخلي كل أهلي اللي كانوا يقولون عبير محد بياخذها يشوفون عبير وين بتتزوج!!واش بيندفع لها! عبير:يمه حرام عليك ماقدامنا وقت!الامتحانات باقي عليها أسبوعين متى يمديني أجهز نفسي؟ أم عبير:السوق ماهو بطاير!والدراهم وزاهبة!والسواق تحت يدي!انتي بس خلك في مذاكرتك وأنا عهدٍ علي لاأجيب لك جهازالكل يحكي ويتحاكى فيه!!! عبير:بس يمه أنا مو راضية أستوعب شلون الأمور انقلبت بهالسرعة!طيب أنا إش أسوي لو درى تركي بــ علتي؟؟ أم عبير:واللي يسمعك ياروح أمك ..يقول إننا لو أجلنا الزواج سنة ثانية بنلقى حل!!مو الحال هو هو درى الحين ولابعدين مايختلف الوضع!! الشطارة بيدك انتي شلون تكسبينه وبعدها صدقيني لاألقى لك حل من تحت الأرض! عبير:ومين بيشاركه بالعرس؟واحد من أقاربه؟؟ أم عبير:لا عبدالرحمن اللي مآخذ اسمهان.. عبير:وشهـــــــــو؟؟وانتم على كيفكم تخططون؟والله لو مايبقى غيرها بين الخلايق ماأتزوج معاها بليلة وحدة!!!!! أم عبير:وليش يابعدي؟؟جربانة البنت؟ولا جاية من الشارع؟؟هذولا ناس لهم مكانتهم وسمعتهم مين بس مايتشرف انه يكون معاهم بليلة وحدة؟؟ خلك من أفكارك التافهة..والزواج بيتم يعني بيتم رضيتي ولا انرضيتي!!!!! وخرجت الأم من الغرفة..وعرفت عبير إنه بعد كلمة أمها مافي كلمة ثانية!! واستسلمت! ________ طبعاً تركي من فرحته اتصل بعبدالرحمن وبشره بالخبر ثم راح لأمه وقال لها السالفة..ورحبت بالموضوع... واتصل بسماح وقال لها وفرحت وقالت:يافرحة محمد ياتركي!!بأوفر عليه قيمة فستانين!وأفصل فستان واحد! تركي:يبه سووا اللي تبونه أنا الدنيا موب شايلتني من الفرحة أخيراً بيصير لي بيت وأستقر!!! سماح:آآآآآه ياتركي لو تدري وش كثر مشتهية أشوف وجه اسمهان لاوصلها الخبر!! تركي:ليش بتفرح واجد؟؟؟ سماح:بتفرح؟؟؟!صحيح إنك مسكين! إلا بتطق من القهر!! تركي:ياحليلها...أخاف لسه تبيني!!! سماح:لا تطمن..إلا بتستخف على عبدالرحمن بس المسألة ومافيها غيرة نسوان!!!!! واتصل عبدالرحمن وكلم أبواسمهان وبدأ يناقشه في مسألة الكروت والمدعوين واسمهان لسه ماتدري عن شي وقافلة جوالها وحاطة حيلها بالامتحانات!! الجزء السادس والثلاثون ثالث يوم بالامتحانات اتصلت سماح تسولف مع أم محمد...وبعد السؤال عن الأحوال... سماح:طبعاً أكيد وصلتكم الأخبار إنه ليلتنا بتصير وحدة ان شاء الله وفرحنا واحد...؟؟؟ أم محمد:ايه وصلتنا وأبركها من ساعة يابنتي..اسمهان آخر وحدة بتتزوج عندي وتركي آخر واحد من عندكم وودنا نفرح فيهم...وأنا أكثر شي أسعدني إنه هالشراكة فيها توفير على العريسين واختصار للتكاليف شوي..قولي آمين عسى الله يوفقهم كلهم.. سماح:آمين يارب..طيب شلون عروستكم مع الامتحانات؟؟؟ أم محمد:رابطة راسها وشادة حيلها وحاطة حرتها بهاالكتب..الله يكتب لها النجاح بأعلى درجات يارب...كاسرة خاطري حتى الأكل ماتذوقه مع هالامتحانات!! سماح:لاتشيلين همها..عقب الزواج بتجيك منتفخة كأنها برميل من زود الراحة النفسية!!! أم محمد:طيب شلون بتسوون يابنتي؟ بدأتوا تجهزون شقة تركي؟؟ سماح:إيه الحمدلله...هند وأمي مو مقصرين ماشاء الله حاطين حيلهم معاه بالسوق..أما أنا كنت اليوم رايحة أستلم فستاني اللي كنت مفصلته لزواج اسمهان وقلت أمر بالمرة أكمل النواقص من اكسسوار وجزمة وخلافه..فحبيت أقول لك بالمرة تجين معاي وإذا لك أغراض ناقصة تاخذينها.... أم محمد:الله يرضى عليك..كلمتيني بالوقت المناسب لي كم يوم أكلم أبومحمد على السوق لكنه مشغول..واسمهان لاهية بمذاكرتها وكل ماكلمت أحد يزورني يتعذر بالامتحانات!!زين متى تمروني؟؟ سماح:بعد ربع ساعة.. وتجهزت الأم ومروا محمد وسماح وأخذوها معاهم للسوق وعجبها بعض الأغراض لاسمهان واشترتهم وساعدتها سماح بذوقها في بعض الأغراض واشترى محمد عشاء ونزلوا البيت يتعشون سوى... وقامت أم محمد تنادي بنتها اسمهان تتعشى معاهم وتتفرج على الأغراض... سلمت اسمهان على الجميع والارهاق واضح عليها.... محمد:وشفيك سمهونة؟؟تعبانة؟ أم محمد:إلا ذابحة عمرها بالمذاكرة..تقولون بتتخرج ذي السنة؟؟ اسمهان:طبعاً لازم أذبح عمري مذاكرة!طول حياتي وأنا متفوقة..تبوني هالحين أكحلها ويفضحني أبوي ويقول المعرس سرق عقلك؟؟؟ سماح:يلا هانت..إلا وش تعليقك على الشراكة بيوم الزواج؟ اسمهان:ياحليلك شكل الأخبار عندك بايتة!!مو نجلاء الله يسلمك رفضت عبدالمجيد!وقرر إنه يدور غيرها على راحته..وعلى كذا زواجي بيكون لحالي.... سماح:وشفيكم ياجماعة الخير؟؟محد علمها بالسالفة؟؟؟؟ أم محمد:لاماعلمتها وأنا مادريت إلا أمس! محمد:أقول ياحلوة مو أخبار سماح اللي بايتة إنتي اللي أخبارك مخمجة وفايحة ريحتها!!ترى تركي بيتزوج معاكم بنفس الليلة؟؟ اسمهان بانفعال:يعني عبير بتتزوج معي؟؟ سماح:لا..بيخليها في البيت ويتزوج لحاله!!طبعاً معاك ياقمر!ليش عندك مانع؟؟؟؟؟؟ اسمهان:ومين قال لكم إني موافقة؟؟خلصت القاعات يوم تجي تزاحمني بزواجي؟؟؟ محمد:بسم الله الرحمن الرحيم..ليه؟ماهي مخلوقة وحالها حالك وودها تفرح؟؟ اسمهان:جعلها ماتتهنى ولاتتوفق!! سماح:بسِك عاد!!وانتي كل ماجاء طاريها يركبك ستين عفريت!!اذكري الله! اسمهان:أنا قلت اللي عندي والعرس عرسي..ومحد مشاركني فيه..وإذا أصريتوا بأبطل أم محمد:وش هالراس اليابس يابنتي؟ بدل ماتقولين هذا عين العقل..وجا من يخفف التكاليف عن خطيبي.. وفرحتنا بتصير وحدة حِنا وأهل سماح تقولين كلام يفشل؟؟؟؟؟؟ اسمهان وهي تقطر عيونها:مالي شغل أنا رافضة يعني رافضة!! محمد:إلا غريبة عبدالرحمن مابلغك بهالكلام بنفسه؟؟؟؟؟؟ اسمهان:لأني قافلة جوالي من بداية الامتحانات! وطلعت اسمهان وفتحت جوالها ووصلتها رسايل واتصالات من عبدالرحمن يخبرها فيها عن الموضوع!! ولما رجع أبو اسمهان من برة لقيهم مجتمعين ويتناقشون واسمهان زعلانة وتبكي ورافضة الشراكة!! صاح عليها أبوها كم صيحة أخذت عقلها وانطمت!!!! وسماح تقول:أنا متأكدة إنه عبير مو مثلك...أكيد استانست بالخبر وفرحت!!!!!!!! راحت اسمهان تنام ودمعتها على خدها لأنه خلاص حكم القاضي!!!!!!!ههههه ________________ وثاني يوم بالمدرسة كان الزعل واضح عليها!وبعد الامتحان..تقابلوا الشلة.... أفنان:سوسو واشفيك حبيبتي؟؟لايكون ماحليتي زين بالامتحان؟؟ مرام: لا..أنا ملاحظة عليها إنها من يوم ماجت الصبح وهي زعلانة!!! قامت اسمهان وحكت لهم عن السالفة! رانية:أفا ياالعلم!!!هذي عين وصابتك يابنت الناس!!أو إنك نحيسة نحاسة مابعدها!!لو إنك يانجلاء موافقة على أخو عبدالرحمن ماكنتي بتكسبين أجرها وتفكينها من أم شرين هذي؟؟؟؟ نجلاء:اسكتي يارانية..أصلاً خطيبك من الأساس المفروض ماخلى واحد غريب يشاركه!!! اسمهان:الصداقة بينهم قوية!وش تبيني أسوي؟ رانية:الله يعين..يعني أنا كنت بأموت من الفرح إني بأحضر زواجك وأرقص فيه..وآثاري الزواج بيكون مع عبير؟!!!وععععع يعني كأني قاعدة أرقص لها هي مالت عليها!!!! نجلاء:وعاد الله يكون بعونك..بتبدأ حركاتها النص كم وبيبدأ التنافس يوم الزواج وكأنكم بحلبة سباق...هذا إن مالقيتها مرتزة عند نفس كوافيرتك!!!!! مرام:وشفيكم على البنت؟كذا تشحنونها أكثر!خلاص مدام الأمر انحكم فيه وماصار لها منه مناص إذن ماله داعي النقاش!!!!! أفنان:ياجماعة انتم مكبرين السالفة مرة!وشفيها لاتزوجت معاها عروس ثانية؟؟انتي بتنزفين قبلها يااسمهان صحيح؟؟؟ اسمهان:صحيح.. أفنان:وطول العرس بتكونين في غرفتك تتصورين..ووقت الزفة بتنزفين وتقعدين لك شوي على المنصة وبعدين بياخذك العريس وتروحون صح؟؟ اسمهان:صح! أفنان:يعني فيه احتمال كبير إنكم ماتتقابلون أساساً وأكيد طبعاً مابتجلسون مع بعض..فليش الزعل والحركات اللي مالها داعي؟ صفوا النيات والله يبارك!! رانية:أفنانوه؟قولي آمين! أفنان:آمين رانية:عساك تتزوجين بزواج جماعي من اللي يسوونها الجمعيات الخيرية ويكون معاك 777 عروس بليلة وحدة!!!!!! مرت الأيام واسمهان زعلانة من خطيبها وموراضية ترد على مكالماته وقافلة جوالها لدرجة إنه اضطر يتصل على محمد يتوسط له عندها!!!! ويوم الجمعة اجتمع محمد واسماء على الغداء في بيت أبوهم كالعادة..واسمهان كانت ترتب الأطباق على طاولة الطعام ومحمد جالس على واحد من الكراسي وقام يغني: يابنت السلطان ياحلوةيااسمهان حني على عبدالرحمن دا مسكين غلبان اسمهان:ليش أحن عليه؟؟أنا وش سويت له؟ محمد:قافلة جوالك وماتردين عليه! اسمهان:بعذري...عندي امتحانات! محمد:الله أكبر..أمس الخميس وقبله الأربعاء وطلعتي ورحتي أسواق يعني ماقلتي عندي امتحانات!!!!!!!! اسمهان:إنت وش تبي بالضبط؟؟؟ محمد:ولد الناس يبي يستشيرك ببعض تجهيزات العرس!! اسمهان:يروح يستشير تركي أحسن له!!ماهو شريكه في العرس؟؟أكيد رأيه أهم!!!! محمد:آآآآهااا.السالفة فيها ريحة زعل؟؟ماعليه عشان خاطري اتصلي وشوفي وش يبي!! وراحت اسمهان وفتحت جوالها وعلى الحظ لقيت عبدالرحمن يتصل وردت عليه... عبدالرحمن:مرحبتين بسمهونتي..وش ذا يابنت الحلال مابغينا نسمع صوتك؟؟؟ اسمهان:خير؟؟وش تبي؟؟ عبدالرحمن:يالطيف يارب..هذا أسلوب تكلميني فيه وأنا لي أسبوع ماكلمتك؟؟؟؟ اسمهان:الزبدة لو سمحت! عبدالرحمن:سمهونتي هاللهجة ماحبيتها منك أبد! اسمهان:إنت بأي حق ياآدمي إنت تخلي زواج تركي معانا بنفس الليلة؟؟ عبدالرحمن:آآآهااا...إذا عُرِف السبب بطل العجب!ووين المشكلة مو كان عبدالمجيد اللي بيتزوج معانا وماعارضتي لذيك الدرجة هالحين اش اللي اختلف؟؟؟ اسمهان:اللي كان خاطبها عبدالمجيد يامحترم أعز صديقاتي يعني أنا وهي واحد..لكن هالسوسة اللي بياخذها تركي ماهي كفو أحد يفرح معاها بنفس الليلة!!! عبدالرحمن:لا يااسمهان أنا أعتبرك أعقل من كذا وهذا الكلام المفروض مايصدر من انسانة راشدة مثلك..هذا زواج.. يعني فرح..يعني انبساط وسعادة..موننكد على بعض ونملا قلوبنا أحقاد وأحساد..وبعدين لازم تكونين أنضج وأوعى من كذا سواليف المدرسة خلها بالمدرسة لاتنقلينها لحياتك وتزعلين نفسك...وماشاء الله تركي يقول إنه يوم فاتح أهل العروس رحبوا بالشراكة على طول!!اشمعنى انتي اللي مكبرة السالفة؟؟أنا أقول راجعي حساباتك!محد معترض على الموضوع إلا انتي وبس!!!!! اسمهان(بصوت متهدج):ياربي عليكم محد منكم فاهمني !!باقي تشوفون بعيونكم اش بتسوي عبير النسرة وأمها يوم الزواج عندي إحساس مايخيب!!!! حاول عبدالرحمن يهدي الوضع واستسلمت اسمهان لأنه الجميع مو بصفها!! _________ مرت الأيام وبدأت عبير تتغلى على تركي وتتشرط وتبالغ في شروطها وتحاول إنها تتميز بحركات في الزواج..هي من جهة وأمها من جهة!!! لدرجة إنه تركي تذمر من الوضع وراح يشكي لأمه وكانوا سماح وهند موجودين ببيت أمهم وقال:تصدقون؟؟قد ماحسبت تكاليف الزواج ماتوقعت إنها بتطلع بالغلا هذا!!!وفوق هذا كله خطيبتي وأمها مو راحميني من كثر طلباتهم كل يوم يطلعون لي بمشروع جديد!! هند:حسبي الله على أباليسهم!من يوم ماخطبت بنتهم وهم مستنزفينك في المهروالكسوة وأغراض الملكة غير الهدايا وطلبات العروس اللي ماتخلص وبعد يتشرطون بالزواج؟!!!وين أبوهم عنهم؟أنا أتوقع إنه بخيل ومقصر معاهم عشان كذا حاطين حرتهم فيك!!!! تركي:بالعكس.. أبوهم لايحل ولايربط وأغلب وقته مسافر لأشغاله ومو موجود..ومو مقصر عليهم بشي وانتم شفتم شلون تكلفوا بالملكة! سماح:طيب هم اش طلبوا منك شي زيادة؟؟ تركي:بعد مارحت مع عبدالرحمن وحجزنا كوشة مرتبة وسعرها معقول...قالت أم عبير لا..مانبيها روح احجز الكوشة اللي اخترناها من المحل الفلاني..ورحت وياليتني مارحت!!لقيت الكوشة اللي اختاروها ماتستاهل قيمتها بـ7آلاف وكلها كم قطعة قماش وكم كريستالة!!!! لاويبون مطربة غير اللي بيجيبها عبدالرحمن وسعرها غالي!أبي أفهم شلون نجيب طقاقتين بيوم واحد؟؟؟؟ أم تركي:ترى ماألومها بعض مرات ياوليدي.هذي وحيدتها ومريضة سكر وبتروح وتفارق أمها بعد الزواج وهي فرحتها الوحيدة وودها تحط كل اللي وراها وقدامها عشان تحس إنها حققت لها اللي تتمناه أي عروس...وانت شفت شلون كانت ملكتهم فأكيد مايبون مستوى الزواج يكون أقل!! هند:بس هم مو حاطين شي من جيوبهم يايمه!كله من قفا تركي حتى ملكتهم ماأستبعد إن نصها مسوينه من مهر عبير!!!! سماح:إن جيتوا للحق طالما هم سووا اللي يبونه بملكتهم فالمفروض إنهم مايتدخلون بطريقتنا في الزواج ويرضون باللي نسويه..لكن واضح ياتركي إنك ماتعرف تاخذ وتعطي معاهم!!! تركي:أقول ياحظ عبدالرحمن بس!تصدقون أهل خطيبته مااشترطوا عليه بكلمة غير انهم مايبون موسيقى بالزواج؟؟؟؟؟؟؟؟؟ أم تركي:الله يرضى عليهم..ملكتهم ماكان فيه أحسن منها إن شاء الله حتى الزواج يكون بنفس المستوى! سماح:إلا بيطلع الزواج أروع من مستوى الملكة يكفي فخامة القاعة يايمه..الصراحة عبدالرحمن وأمه عرفوا يختارون... هند:تركي الله يصلحك أحس إنك ماتعرف تتصرف!ياخي أي شي يطلبونه منك قول لهم حاضر ولاتنفذ لهم شي..بالعكس نفذ الشي اللي براسك وبس وحطهم قدام الأمر الواقع!!يعني اللي يسمعهم يقول حِنا ماعندنا ذوق!!!هذا زواج أخونا الوحيد وأكيد نبيه من أروع مايكون! ودار حوار طويل بينهم....... ___________ طبعاً عبير كانت حايسة بالاختبارات وكانت تلاحظ شغلة غريبة إنها مرات تسمع شغالتهم سيريس تكلم أمها بموضوع والأم ترد عليها بكلمات مثل:مو وقته ياسيريس! ان شاء الله الوضع بيكون أحسن ومابنضطر لهاالفكرة!!!! وأوقات تسمع أمها تقول لسيريس:خلها تتزوج بالأول وإذا انسدت كل الطرق بوجوهنا هذا اللي بنسويه!!!!!!!! وحاولت عبير تستفسر أكثر من مرة عن هالحوارات الغريبة لكن أمها كانت تصدها وتقول لها خلك بامتحاناتك!!! وانتهت الامتحانات يوم الثلاثاء وبدأت عبير تنزل السوق مع أمها يومياً من أول النهار لآخر الليل وكانت عبير تلاحظ إنه أمها تكثر بالأغراض والهدوم فقالت لها:يمه حرام نضيع هالفلوس في شوية ملابس وأنا راجعة لك من أول أسبوع!!! وقمصان النوم مالها داعي بالمرة أنا لايمكن ألبسها!!! أم عبير:فاولي خير يالهبلة!طول قعدتك مع زوجك بتعتمد على شطارتك وإن حصل ومابغاك فأنا عندي حل ثاني بأسويه بعدين وماأظن إنه يفشل بس مابأضطر له إلا لو تركي ماتقبلك!!! ورجعوا عبير وأمها البيت وقعدوا ينبشون في صور عبير القديمة لأنهم كانوا مخططين يسوون سينما تعرض جميع صور عبير من صغرها لكن المفاجأة إنه عبير لقيت صورة لخالها وأخذتها وشقتها وتفلت عليها!!!!! أم عبير:الله لايرحمك ياسلطان!!لاتقهرين نفسك يابنت جزاته وبياخذها من ربه!!!! عبير:أصلاً إنتي ليه محتفظة بصورته؟ماكفاك اللي سواه فيني؟عاجبك حالي يعني ؟وكل البنات لاقرب العرس يفرحون ويستانسون إلا أنا!!أداري فضيحتي بالكذب والغش؟؟؟وقامت تبكي...بمرارة أم عبير:ماعاش من بكاك..ورب البيت لاأخليك أحسن عروس ولاأشوف هالدموع على خدك..ولاأخلي كل اللي كانوا يقولون من أهلنا عبير محد ياخذها يندمون!!!!!وبعدين نسيتي إني مفهمة الكل إن عمليات التجميل اللي سويتيها زمان ناجحة وإن مافيك إلا العافية!!!! عبير:واش الفايدة يمه؟مصيره يجي يوم والكل يعرف هالكذبة!يعني أنا بأقعد طول عمري كاتمة نفسي بالملابس الطويلة والمقفلة؟!!!!!! أم عبير:ياشيخة اسكتي!الكل يحسبونك تحبين الحشمة وأكثر شي يمدحونه فيك ملابسك المحتشمة!!خذيها ميزة..مو تاخذينها عيب!!! وبدأت الأم وعبير يسترجعون ذكريات الحادث الأليم اللي صار قبل أكثر من 8سنوات..كان لعبير خال اسمه سلطان يصير أخو أمها وكان مدمن مخدرات ومروج وسكير عربيد مابقلبه خوف من الله أبداً!!!وكانواعبير وأهلها ساكنين بقرية بعيدة بحكم عمل أبوها وسفره الدائم وقاعدين ببيت جدتها أم أمها لأنها انسانة كبيرة بالسن ومشلولة وتحتاج من يرعاها وكان خالها كل يوم يجي البيت ويسرق فلوس من أمها وجدتها وأغراض من البيت ويبيعها عشان يقدر يشتري بضاعة مخدرات يبيع منها ويتعاطاها..ووقفت له أم عبير بالمرصاد كثير من المرات وبلغت عنه وحبسوه وحكموا عليه بالاعدام لأنه من المفسدين في الأرض ومعروف ببلادنا إنه مروج المخدرات حكمه الاعدام وحاول بالسجن قبل تنفيذ الحكم إنه يسوي بنفسه جروح خطيرة عشان يضطرون ينقلونه للمستشفى ولما وصل المستشفى هرب وراح للبيت عشان ينتقم من أم عبير لكن يوم راح البيت مالقاها لقي عبير قاعدة بحضن جدتها وتلعب معاها..فصار يصيح بأعلى صوته :وينها وينها النذلة اللي هدمت حياتي؟؟؟ أم سلطان:محد هدم حياتك إلا البلاوي اللي تتعاطاها عسى الله ياخذك وينتقم منك بكل مصيبة وفضيحة سويتها لنا!!روح وقلبي غضبان عليك إلى يوم الدين!!! سلطان:اتركي عبير يمه والله لأنتقم من أختي في بنتها وأخليها تنحرم منها مثل ماهي بتحرمني من الحياة!!!!! الجدة حضنت عبير بقوة عبير تصيح وتبكي وعمرها 9سنوات... أم سلطان:والله ماتاخذ عبير ولو على قص ارقبتي!!!! سلطان:مادام مابتفكينها فتحملوا اللي يجيكم!!وصب حولهم قاز وولع فيهم الثنتين وشرد!!!الجدة بما إنها مشلولة ظلت بفراشها واحترقت لين ماتت! لكن عبير حاولت تهرب ورفعت راسها وظل جسمها يحترق من نص الساق إلى الصدر! وواحد من أخوالها كان راجع من برة ولحق عليها ونقلها المستشفى! وظلت بغيبوبة لمدة من الوقت وظنوا الأطباء إنها ماراح تعيش!واستمرت منومة بالأشهر في المستشفى وعدة عمليات تجميل صارت لها لكن نظراً لأنها مريضة سكر كانت تتعرض بعد كل عملية لمضاعفات خطيرة خلت أهلها يصرفون نظر عن العمليات اللي مافادتها بالعكس كانت تضرها لأن الدكاترة يشقون جلد من الأجزاء السليمة ويرقعون الأجزاء المشوهة!!!وكانت النزيف اللي تتعرض له بعد كل عملية ماتلتئم جروحها عقبه بسهولة بسبب السكر!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
طبعاً بعد الحادثة الأليمة اللي تعرضت لها عبير وهي بعمر9سنوات ووفاة جدتها قبضت الشرطة على خالها الجاني وأودعته السجن وأخذ جزاته بالاعدام بتهمة الترويج للمخدرات والشروع في جريمة قتل..ولكن أخوال عبير الباقيين عشان ماينفضحون بين الجماعة فهموا الناس إنه سبب وفاة أمهم العجوز وحروق عبير بسبب حادثة حريق صارت بالبيت!!وعرضوا بيتهم الشعبي اللي بالقرية للبيع...وأبوعبير اضطرينقل عمله لمدينة جدة للبعد عن ذكريات الحادث ولوجود المستشفيات اللي تتابع علاج عبير..وسافروا للخارج عدة مرات ولكن عمليات التجميل ماكان لها أثر يذكر لأن الجلد كان ذايب ومشدود جداً والعمليات كانت تسبب تمزق!!! ولكن الأدهى والأمر إنه عبير لما صارت بسن البلوغ وصارت العمليات تتعبها جداً وتسوي لها مضاعفات توقفوا الأهل عن اجراء أي عمليات وكانت عبير محافظة على لبس أي لبس يغطي جسمها بالكامل بلايزطويلة وبناطيل أو تنانير أوفساتين بجاكيتات عشان مايظهر للناس شي!! وأم عبير كانت تخبي عن الناس كلهم إنه بنتها مشوهة عشان مايأثر على مستقبلها لدرجة إنه أبوها اللي عايش معاها بنفس البيت كان يظن إنه جسم بنته تحسن كثير عن زمان!!بل وصل من تدليس أم عبير وغشها إنها أقنعت أبو عبير بأنها صارحت أم تركي بحرق عبير وتقبلوا الوضع عشان كذا أبوعبير كان متطمن جداً لهذا الزواج وباستمرار مسافر لأشغاله..... وعبير هي البنت الكبيرة بعائلتها وعندها أخ اسمه سعد والثاني اسمه سامي أصغر منها... ________ يوم الأربعاء كان استلام النتايج وأصر محمد إنهم يحتفلون بنجاح اسمهان في مطعم مكسيكي!!وبالفعل راح محمد وسماح وأولادهم وأم اسمهان واسمهان ومروا على أسماء وأخذوها معاهم..واحتفلوا بنجاح اسمهان بعد ماتناولوا وجبة العشاء طلب محمد من المطعم تورتة كبيرة ولما جابوها الجرسونات الفليبنين على الطاولة قاموا يغنون للناجحة بلهجة انجليزية ومعاهم بالونات والأطفال داخلين جو ويصفقون.... وبعد ماراحوا الجرسونات كشفوا الحريم وجوههم لأنهم جالسين بجلسة عائلية فيها خصوصية وحاجز ساتر..... الجميع:مبروك سمهونة.. اسمهان (بفرح):الله يبارك فيكم كلكم... محمد:شوفي ياسوسو ترى هذي الحفلة سويتها لك بمناسبتين الأولى نجاحك والثانية توديع للعزوبية!كلها أسبوعين وتدخلين القفص الذهبي عاد انتي وشطارتك بتخلين القفص الذهبي يلق ويبرق طول العمر والا بتحولينه للقفص الأسود وتبلشين ولد الناس معك!!!! الأم:قول خير ياحمود..عساها يارب تتوفق بكل حياتها وعسى الله يسخر عبدالرحمن لها.. اسماء:وعساها دوم ترفع راسنا قدام أهل زوجها ولاتفشلنا برفالتها..يمه حرام ترى مابقى غير اسبوعين اشتغلي عليها زين فيها وخليها تطبخ وتعجن كل يوم من الليل للنهارعساها تطلع بنتيجة بس!! اسمهان:هذا اللي ناقص ياست اسماء!أدخل المطبخ وأسوي بنفسي عاهات وحروق قبل العرس!!الله يخلي رابحة وبديعة وأمل الجهيمي ومنال العالم!!!! اسماء:ومين هم هذول؟؟اللي بيرسلون لك غداك وعشاك عقب الزواج؟؟ الأم:أختك ماقصرت حطت حرتها بالمكتبة وشرت كتب طبخ كبيرة كلفتنا حول ال800 ريال عسى بس تطلع منها بنتيجة! وظلت العيلة تدردش بالمطعم لين مارجعوا لبيوتهم وهم مستانسين.. وعاد اسمهان ماقصرت بالروحات للصالون راحت لمشغل أخت صاحبتها مرام وصبغوا لها شعرها وسووا لها تنظيف بشرة وماسكات وحمامات زيت لشعرها..وبالبيت كانت تسوي لنفسها حمام مغربي وطايحة بعمرها تنتيف ..وكملت كل مقاضيها من السوق وقبل الزواج بأيام وصلت أختهم ابتسام وبدأوا الأقارب يجتمعون والكل يقدم الهدايا لاسمهان ويبارك.. وببيت عبير نفس الشي أقاربهم كانوا يجون يباركون وأما أهل أبوها ماكان بينها وبينهم ود بسبب علاقتهم المتوترة مع أمها لأنها انسانة قوية وماتقصر بزرع المشاكل بينهم!!!! أما تركي مسكين طلعت له أم عبير بمشروع واشترطت عليه إنه بنتها ماتسكن في الملحق اللي فوق بيت أمه وقالت :لازم تشوف لبنتي بيت مستقل ويكون كبير! وبعد شد وجذب وافق واستأجر شقة كبيرة وكان أجارها عالي وصاحب العمارة شخص راعي مشاكل وأصر انه تركي يدفع له أجار سنة مقدماً!!!!! وكان تركي متضايق جداً من الضغوطات المادية اللي عليه لدرجة انه اشتكى لأمه الحال.. تركي:تصدقين يمه إني بديت أتحسف على كل ريال صرفته بهالزواج؟!!كل اللي اجتهدت وجمعته بهالسنين راح بغمضة عين في تجهيزات العرس والبيت والأثاث...ومو بس كذا أنا اضطريت أمد يدي على ورث الوالد وأتصرف بجزء منه!!!! أم تركي:يفداك ياولدي يفداك...أساساً إحنا ليش كنا نجمع الفلوس؟؟مو عشان تفيدنا بوقت الشدايد؟؟؟ تركي:بس يمه اللي قاعدة عبير تسويه فيني هي وأمها اسراف زايد هم موب حاجته بس مدري ليش يبالغون بكل شي؟على بالهم أنا صاحب ملايين؟!!!!حتى شهر العسل قعدوا يتشرطون ويقولون لازم نسافر هنا وهناك!!من وين ياحسرة؟؟وأنا حطيت اللي وراي وقدامي بهالعرس!!!! أم تركي:سافروا بس داخل المملكة..ترى السفر للخارج بيكلفك واجد..الله يهديهم بس..البنت هذي محد مخربها إلا نصايح أمها بس عقب ماإنت تتزوجها عودها على طبعك.. ______ وفي الجانب الآخر كانت اسمهان رافضة ترد على عبدالرحمن صار كل مابغاها بسالفة يراسلها مسجات وتراسله فقط!!! اتصل ناصر صاحب عبدالرحمن وولد عم تركي وعزمهم بمناسبة قرب موعد زواجهم اللي بقى عليه 3أيام بس في مطعم وقبلوا الدعوة ونادى بعض الأصحاب.... ولما وصلوا المطعم جلسوا وبدأوا جميع المدعوين يتبادلون الأحاديث.... فهد:يلا ياناصر شد حيلك..كلنا فتحنا بيوت ودخلنا القفص الذهبي ماعدا إنت ليلك نهار ونهارك ليل..متى بتعقل وتسوي مثلنا؟!!!!! ناصر:أنا طير وأحب الحرية ماني مجنون مثلكم أحبس نفسي في قفص!!! مشاري:بالعكس على إنه الزواج فيه مسئوليات كثيرة بس تراه رائع بـحلوه ومره مو مثل منت فاهم! ناصر:ماأتخيل نفسي مربوط بالبيت وعندي فرقة بزران أركض وراهم بالأسواق!! عبدالرحمن:ماعليكم منه بكرة لاشافنا شلون مستانسين عقب الزواج بيغار ويقلدنا! تركي مال على عبدالرحمن وقال بإذنه:تصدق ياحظه ياليتني مكانه!!!! عبدالرحمن:وشفيك غيرت أقوالك ماكنت تعد الأيام عشان تتزوج؟؟؟ تركي:مدري!مرات أحس إني أسأت الاختيار! عبدالرحمن:تعوذ من إبليس...هذا قلق طبيعي بسبب قرب موعد الزواج..بكرة تنبسط وتنسى هواجسك!!!!! وتمت السهرة بين الأصحاب وكان عددهم خمس وبعد ماتعشوا راح كلن لحال سبيله وبقى تركي وناصر وعبدالرحمن.... عبدالرحمن:مشكور من القلب ياأبوالنصر على السهرة الحلوة هذي... تركي:هااه؟؟مو عقب مانتزوج تنسانا وتغط!! ناصر:انتم أصلاً مابتفضون لي وباقي أذكِّركم بيجيكم من يشغلكم!عشان كذا جمعتكم اليوم تودعون عزوبيتكم!!وعندي هدية حلوة لكم! تركي:هات ماعندك.... ناصر:فيه صالون كشخة أعرفه وفيه قسم خاص لتجهيز العرسان وبما إنكم أغلى أصحابي وماني ساخي فيكم ريال واحد أهديكم اياه يوم الزواج!قلت إذن خل هديتكم تكون عبارة عن تجهيز بالكامل على حسابي!!!! عبدالرحمن:جزاك الله خير..انت كريم وحِنا نستاهل.. تركي:طيب وش يشمل تجهيز العرسان؟؟ ناصر:حمام ساونا+تدليك+حلاقة شعر وتضبيط اللحية والشنب+تنظيف الوجه والمسامات+أقنعة منشطة للوجه... تركي:الله يرضى عليك..أجل وش رايك ياعبدالرحمن نبدأ من بكرة؟؟الزواج مابقى له إلا يومين! عبدالرحمن:على بركة الله..بس عطنا العنوان.. وتوادعوا الأصحاب... وثاني يوم من الظهر توجهوا العريسين للصالون ولقيوا استقبال حلو بعد ماعرف الرجال اللي بالاستقبال إنهم من طرف ناصر.... وطبعاً العريسين سووا كل العروض السابقة وماخلصوا إلا قرب المغرب!! وآخر شي بقي حلاقة الشعروتضبيط الشوارب واللحى اللي كانت عوارض... ومسك الحلاق الهندي شعر تركي وكان تركي حاط ماسك على وجهه وقطنتين على عيونه ومسترخي ومسَّلم راسه للحلاق... والحلاق الثاني قام يحلق شنب عبدالرحمن وحلقه من الجهتين ونقز عبدالرحمن من كرسيه وطالع بالمراية ولقي نص شنبه محلوق!!!!!!كأنه هتلر! ومسك الحلاق وكفخه.. عبدالرحمن:لابارك الله فيك من حلاق هذا وجه أقابل فيه الناس؟؟ تركي وكان مسترخي على الآخر والقناع الطيني على وجهه والقطن على عيونه قال:وشفيك ياعبدالرحمن تصارخ عسى ماشر؟ عبدالرحمن:حلق شنبي الله يخزيه!! وفجأة دقق عبدالرحمن النظر في تركي وصاح:تركي قوم وإنت منشكح وموب داري عن الخرايط اللي براسك! فز تركي وشال القطن من عيونه وناظر المراية ولقي الحلاق لاعب في حسبته ومسوي خط عريض بنص راسه وحالقه بالماكينة على الصفر!!! تركي:اش ذا يالمجنون؟مسوي لي طريق زراعي بنص راسي؟؟هات راسك يمين ماأخليك لين ماألعب راسك مثل مالعبت براسي.. وراح عبدالرحمن ينادي المسئول عن الصالون وكان شامي وجاء وقال:شو فيه مسيو عبدالرحمن؟خدماتنا مش عاجبتك؟ عبدالرحمن بانفعال:طالع بوجهي هالأثول شايل نص شنبي وش اسوي أنا الحين وعرسي عقب بكرة؟؟؟ قام الشامي يخاصم الحلاق الهندي قام الهندي وقال:أنا سويت كذا بناءً على طلبات مستر ناصر!! قال تركي:آهااا قولوا كذا من الصبح!سواها ناصر فينا ياعبدالرحمن! قام عبدالرحمن ويصيح في الموظفين ماني طالع من هنا إلا ان لقيتوا لي حل!! المسئول قال:بدك ماتواخزني يامسيو عبدالرحمن ماإلك حل إلا تحلق النص التاني من شنبك وبـ هيك تكون زبطت المسائل! عبدالرحمن:إييييييش؟أحلق شنبي؟؟؟ تركي:بيني وبينك ماقدامك إلا هالحل!والا ودك تروح العرس بنص شنب وتصير نكتة بين الرجاجيل؟؟؟ المسئول عن الصالون:وإنت يامسيو تركي بدك تحلق شعراتك كلياتها عالزيرو! تركي:طبعاً وأنا مجنون أترك راسي وكله حفريات ومخططات؟ عبدالرحمن:شوفوا ولافلس أحمر بتشوفونه مننا جزاتن لكم! المسئول:ولو مسيو عبدالرحمن...المسيو ناصر دافع كل إشي! عبدالرحمن:حسابه عندي هالناصر خلني أشوفه بس!! وحلق عبدالرحمن المسكين شنبه وانصدم من منظره النهائي وطالع بتركي وقال:اش رايك؟؟ تركي:ماشاءالله حالق الشنب ومخلي اللحية؟؟ عبدالرحمن:يمين انك صادق صار شكلي شيفة جهة فاضية وجهة مليانة من وجهي حتى اللحية بأحلقها وحسبي الله على من كان السبب! وأما تركي حلق شعره على الزيرو وقال لعبدالرحمن:هااه؟اش رايك؟ عبدالرحمن:ياخي تحمد ربك ماغير انت بتلبس شماغ لكن أنا شلون بأقابل الناس بهالوجه الأصمع؟؟ألبس برقع؟؟؟ وطلعوا من الصالون وهم متضايقين وتركي يتوعد في ناصر ويقول:وش رايك نطب عليه ونحلق حواجبه؟؟ عبدالرحمن:ياشيخ طنشه لاتفتح علينا سوالف!ناصر هذا واحد فاضي ومخه طاقق خليه..بكرة يكبر ويعقل..ولو إن مصيبتي أكبر من مصيبتك يافشلتي قدام الرجاجيل لالحية ولاشنب. إلا ناصر متصل ومسوي نفسه بريء ويسأل:هاه وشلون خدمات الصالون عجبتكم؟؟ عبدالرحمن:روعة حتى شنبي ولحيتي دللوها و شالوها مرة! ناصر:التجديد مطلوب نسيت إنك عريس؟! عبدالرحمن:لامانسيت بس علمني شلون بأقابل الأشناب ولحيتي وشنبي استقالوا من وجهي؟؟ ناصر:ياخي غيرِّ الجنسية!! ههههههههههههههههههههههههه وسحب تركي السماعة من عبدالرحمن وقال:وأنا يالخسيس..تبيني أقابل العروسة براس يلمع؟؟؟ ناصر:ياخي قول لها إنك راجع من الحج! كاااااااااااااااااااااااااك رجع عبدالرحمن البيت وأول مادخل البيت استقبلته أخته أحلام اللي كانت واصلة من السفر قبل يومين استعداداً للزفاف..بضحك على منظره وسمعتها أمها وجت تستطلع الوضع وأول ماشافته أمه قالت:طيَّح الله حظك على هالوجه!!وين الشنب واللحية؟؟ عبدالرحمن:جاهم ترحيل من البلدية!!! أحلام:ترى يبيعون بمحلات الألعاب نظارة ومشبوك فيها خشم وشنبات لو تلبسها بيطلع شكلك أحلى من كذا...ههههههه أم عبدالرحمن:لايكون هذي طلبات اسمهان؟؟صدق إن ماعندها عقل! عبدالرحمن:ماطلبت شي يايمه..هذي نهاية الصُحبة الصالحة!! وراح يحكي لهم عن قصته مع تركي في الصالون... أحلام:خير؟هي المقالب موضة دارجة هالأيام؟تتذكر يوم زواجي قبل كم سنة لما أصحاب زوجي أصروا يزفونه لين القاعة وركب معاهم السيارة وفروا به جدة كلها وأخروه عن العرس وزعل أبوي وأبوه؟؟؟؟؟ عبدالرحمن:طبعاً أذكر ويكون بعلمك صاحب هالمقلب كان ناصر بعد!! أم عبدالرحمن:ياليتكم مريتوا عليه ونتفتوا شُعرانه كلها!! __________ أما تركي راح لناصر البيت وسحبه من عند الباب وحلق له سكسوكته بالموس!! وبعدها رجع تركي البيت وقابلته أمه وسماح وأولادها وقال سعيد:ياخالي إنت راس البطيخة! سماح:الله يسامحك ياتركي على هالشكل! بحياتك كلها ماقد حلقت راسك حتى يوم جاك صيبان وأكل فروتك زمان رفضت تحلق راسك! تقوم تجي وتكحلها قبل الزواج بـ ليلة؟؟؟؟؟ أم تركي:مين ضحك عليك وقال لك كذا أحلى؟؟؟ تركي:يوووووه عاد لاتزيدون قهري وحكى لهم السالفة...واش سوى لناصر... سماح:وحلقت له سكسوكته بس؟ليتك حالق حواجبه أحسن!وعبدالرحمن ياحليله رحمته شلون بيقابل اسمهان؟؟ تركي:صراحة شكله صار فضيحة لو يتلثم أستر له! ________________ وتم توزيع كروت الدعوة وبدأت ساعة الصفر تقترب......وليلة العرس اسمهان كانت مع كل صلاة تدعي ربي يوفقها مع خطيبها.. أما عبير حارقة نفسها من التفكير والتوتر وتدعي على اسمهان إنها ماتتوفق!!!! جاء يوم الزواج اللي الكل منتظرينه وراحوا أهل اسمهان الصالون من الظهر وبدأوا بالتسريحات وبعدين الماكياج وانتهوا المغرب ورجعت اسماء البيت تلبس وتلبس ولدها وابتسام رجعت تتجهز وتجهز بناتها والأم راحت البيت وتركوا اسمهان في الصالون مع كاتيا الشغالة عشان تنتظرها وتساعدها لو احتاجت شي..الفستان كانت ناوية تلبسه في غرفتها بالقاعة.. تسريحة آسمهآن https://im12.gulfup.com/2012-08-07/1344289727131.jpg فستآنهآ: https://im12.gulfup.com/2012-08-07/1344289727732.jpg وفي صالون ثاني كانت عبير وأمها وخالاتها وبناتهم وزوجات أخوالها يتضبطون بعد ماانتهى الجميع راح كلن يستعد ببيته وبقيت مروة بنت خال عبير معاها بالصالون..وأمها تدخلت في كل شي بالتسريحة والماكياج وأصرت إنه ماكياج عبير يكون ثقيل جداً!!عشان تسير مميزة عن اسمهان!!!! تسريحة عبير https://im12.gulfup.com/2012-08-07/1344289727173.jpg فستان عبيييييييييييييييييييير https://im12.gulfup.com/2012-08-07/134428972744.jpg وكانت عبير متوترة جداً لدرجة إنه الكوافيرات بالصالون لاحظوا ذلك من عصبيتها الزايدة وفضاضتها في التعامل معاهم..ولما انتهت الكوافير أخيراً من ماكياج عبير قالت لها:أبَلِش بأساس الجسم ياعروس؟؟ عبير:إيه... وأول مابدأت الكوافير تحط الأساس على رقبة عبير ووصلت للجزء اللي أعلى الصدر دفتها عبير بقوة وحطت يدها على صدرها!!لأنها خافت لاتشوف الكوافيرة الحروق والعيب اللي بصدرها الكوافيرة:شو فيه مدام؟أنا غلِطت بإشي لاسمح الله؟؟ عبير:مالك شغل!! وطلعت من الغرفة واتصلت بأهلها يجون ياخذونها... _____________ طبعاً أول من وصل القصر أم عبدالرحمن وأخته أحلام وخالته جوهرة وبعدهم أم تركي وبناتها ووقفوا عند البوابة الداخلية للقاعة يستقبلون المعازيم والمغطرفات جنبهم يستقبلون الناس بالزغاريد والكل كان في قمة الذوق والشياكة.. وبدأت الوفود تتجمهر وتقبل وبعدها بوقت حضروا أهل اسمهان وطلعوا بنتهم لغرفتها فوق ولبسوها فستانها وبعدها بشوي جت المصورة تصورها ونزلوا هم تحت..... وبعدين جت أم عبير اللي منظرها صدم الجميع!!مسوية تسريحة مبالغ فيها ماتناسب سنها أبداً وفستان شبه فاضح لوحدة في عمرها ولاحول ولاقوة إلا بالله!وماكياج صارخ جداً..حتى أم تركي ماهضمت شكلها!!!! _وأخذت بنتها وطلعت فوق لغرفتها وماعجبتها الغرفة كثير لأنها أصغر من غرفة اسمهان!! وبدأ التوتر والقلق اللي سوته أم عبير طول الزواج يزيد..راحت لغرفة اسمهان وشافتها وبعدين نادت أم تركي وقالت:ليش تعطون بنتي الغرفة الأصغر؟؟ أم تركي:اذكري الله ياشيخة..مافي اختلاف كبير بحجم الغرفتين بعدين أهل اسمهان عندهم أطفال لو احتاج أحد منهم يرتاح أو شي يحطونه في الغرفة! ورجعت أم عبير لبنتها وكانت المصورة تصورها...عبير:يمه شلون شكل اسمهان؟؟؟؟؟ أم عبير:لاتهتمين..انتي أحلى منها بمية مرة مكياجها وتسريحتهاولبسها عادي مرة...بتتميزين الليلة عنها بكثير! تطمنت عبير يوم سمعت هالكلام! ونزلت أم عبير للقاعة وجمعت اخواتها وبناتهم وبنات أخوانها وخلتهم يجلسون على المنصة!!!!!!وحجزوا المنصة على حسابهم هم بس اللي يرقصون!! نادتها أم عبدالرحمن وقالت:ياحبيبتي مايصير تخلين ضيوفك يقعدون فوق!إحنا اللي اسمنا أمهات العرسان ماطَّلعنا قرايبنا فوق!والمنصة من حق الكل يطلعون ويشاركون ويرقصون عليها!! وكملت أم عبير رقصها مع أهلها وبعدين نزلت معاهم وجلسوا على طاولة.. ________ طبعاً مدخل القاعة كل وحدة من العرايس تفننت على طريقتها في تزيين الطاولة الخاصة فيها.. عبير كانت حاطة صورة كبيرة لها من صور الملكة ودفتر توقيعات الزوار مزين بالفصوص وشوية تحف وورد مرتبة كلها على مفرش فخم... أما اسمهان وأهلها كانوا ضد وضع صورة في مدخل القاعة لأنه غير مضمون اللي بيصير!!يعني مثلاً سهل جداً يجي أحد ويصوربجواله الصورة المعروضة!أو عاملين البوفيه من الرِجال ممكن وهم داخلين يجهزون العشا يشوفونها!! فكانت طاولة اسمهان كالتالي: عليها مفرش مطرز..وعروس كبيرة فستانها عبارة عن وردات وورق شجر كل ورقة شجر عبارة عن بطاقة يكتب فيها الزوار مباركتهم للعروسة+نافورة العود+شجرة ذهبية معلق عليها حبات شوكولا+تحف كريستال مليانة أحجار ملونة+سلة أنيقة فيها توزيعات دعوية أشرطة وكتيبات ومطويات مغلفة بشكل مبتكر..... _________ طبعاً اجتمعوا الحضور وبدأت القاعة تمتليء وكان عدد الحضور450 مدعوة! ومن بينهم شلة الصاعقة اللي حضروا مع أهاليهم لكن جلسوا بطاولة بروحهم..ونجلاء كانت من الناس اللي مترددين في الحضور بسبب رفض أهلها لأنه أم عبدالرحمن سبق وخطبتها!!لكن بعد ماأم اسمهان عزمتها رسمي وأم عبدالرحمن أيضاً وأصرت على حضورهم مالقيوا مفر من قبول الدعةوة!! _______ كان كل شي طبيعي ورائع ولكن أم عبير هي الوحيدة اللي مو مرتاحة وكل شوي مخترعة مشكلة وهالكة نفسها بالمقارنات!مثلاً:تبي بنتها تنزف أول!! تبي موسيقى ودي جي!!تبي تركي ينزف مع زوجته قدام النسوان!! بس ماكان أحد مطاوعها في طلباتها مما خلاها تشعلل طول الزواج!! كانوا سماح وهند جالسين عند البوابة يستقبلون باقي المعازيم وتفاجئوا بدخول مطربة ومعاها أورج وطبول و زير وداخلة من البوابة على القاعة مباشرة مسكتها سماح وقالت:خير ان شاء الله؟مين حضرتك؟؟ المطربة:أنا المطربة اللي حجزتوني لمناسبتكم!!!! سماح:حبيبتي اللي حجزناها شوفيها فوق المنصة تغني من أول الليل!! المطربة:اش قصدكم بالحركة دي؟تضحكوا عليا؟؟ هند:طيب مين اللي حجزك انتي وكيف؟ المطربة:وحدة اتصلت عليا وقالت إنها أم تركي وحددت لي موعد الفرح وأرسلت لي عربون مع سواقها!! هند:حبيبتي أمي ماعندها سواق من زمان!!!أكيد هذي السوسة أم العروس! المطربة:ايوه هي قالت لي غني تلاته أغاني بإسم عبير! سماح:حبيبتي هذي أم العروسة ضحكت عليك..وإحنا مالنا شغل حسابك معاها بعدين! المطربة:ياسلااام يعني ايه؟؟ضاع عليا اليوم ببلاش؟؟أنا كنسلت حجوزات كتير عشانكم وآخرتها ماتبغوني؟؟؟والله لآخود حقي من عيونكم!!! هند:حبيبتي حقك تاخذينه من أم العروس ورجاءً بلاش فضايح لاتخربين علينا ليلتنا ولا بننادي موظفات الأمن لك!!!! ولما شافت المطربة إنه المسألة فيها أمن وما أمن انسحبت وهي تشتم وتسب وراحت هند ونادت أم عبير وقالت لها عن السالفة وسألتها:كيف تحجزين مطربة وإحنا جايبين فرقة طقاقات بدفوف وطيران ومن غير الآت؟؟؟؟؟؟ أم عبير:اش قصدكم تتبلون علي؟أنا ماناديت أحد! لابدها أم اسمهان اللي سوت كذا!!!!!! طبعاً سماح وهند عرفوا إنها كذابة وتبي تتهم غيرها وبس..ولا أم اسمهان لاتبغى الطرب ولاعندها سواق!!!!!!!! ________________ وكانت عبير قاعدة تغلي في غرفتها ودها لو تشوف اسمهان وبالفعل راحت لغرفة اسمهان ودخلت ولقيت سماح جالسة معاها.... سماح:هلا عبير محتاجة شي؟؟؟ عبير(بـ دهاء):وحشتني سمهونة وجيت أسلم وأبارك... وسلمت على اسمهان وباركت.. واسمهان مستغربة الذوق اللي نزل فجأة!! سماح:طيب أنا أستأذن بأنزل أشوف المعازيم... قربت عبير بكل حقد من اسمهان وقالت بكل غيرة:مالقيتي أحسن من الكوافيرة اللي رحتي لها؟؟ اسمهان:لا مالقيت..والحمدلله شغلها أكثر من رائع والنتيجة أروع مما تصورت!!! عبير:شكلك على الطبيعة أحسن!ياترى إنتي وش بتسوين في الزفة؟؟؟ اسمهان:سوات أي عروس!! عبير:أقصد كيف بتزفين؟ اسمهان:لاجات زفتي بتعرفين!! عبير:ماألومك!الغيرة ذابحتك!! وطقت اسمهان بتشميقة وطلعت من الغرفة! اسمهان(بتعجب)وتحاكي روحها:والله مدري من اللي يغير من الثاني!!! ____________________ طبعاً شلة اسمهان جالسين يسولفون وكانوا مبسوطين بهالمناسبة الكشخة..وفجأة طالعت رانية في وحدة من المعازيم ترقص وقالت:شوفوا شوفوا راعية الأحمر! التفتوا الشلة وقالوا:شفناها!!! رانية:واي واي..خقيت على فستانها!ودي أشلحه من فوقها وألبسه!! مرام:وبيدخل فيك عاد ياالدبة؟!!! نجلاء:جداً عادي..بس رشاقتها محليته مرة... وشوي مرت أم عبير من جنبهم.. رانية:أعوذ بكلمات الله التامات من شر ماخلق! الشلة:ههههههههههه رانية:والله مصدقة نفسها هالعنز!على بالها صبوحة الشحرورة!! مرام:حرااااااام طاحت بيد كوافيرة لعَّابة!لو جات مشغلنا كان ضبطناها! نجلاء:إذا الأم كذا؟أجل الله يخلف على عبير وش سوت بنفسها! أفنان:وش رايكم نطلع نسلم على اسمهان؟؟ الشلة:يلا!!!! وطلعوا فاجئوا اسمهان بجيتهم وسلموا عليها.... اسمهان:غريييييبة وين التطقيم اليوم؟؟ أشوف كل وحدة لابسة على كيفها!! رانية:عاد حلاوة هي؟؟قصوا ظهري ذاك اليوم وأنا أفتر بالمولات أدور فساتين وردي!!! اسمهان:آآآهااا...يعني كان عندكم خبر مسبق بأني راح ألبس وردي وماقلتوا؟!!!!! نجلاء:حِنا مالنا شغل!هذي المحقق كونان اتصلت على بيتكم وسألت بنت أختك!!!! قامت اسمهان تناظر برانيةبنص عين وقالت:وليش مااتصلتي هالمرة بعد وسألتي وش بألبس؟؟؟ رانية:بعد هذي مايبي لها سؤال!العروس وش بتلبس يعني غير الأبيض؟؟وعاد ماأحلانا مطقمين معاك أبيض تقولون كفن!..حشا ماكأننا بنروح عرس إلا كأننا بننزف على المقبرة!! الجميع:ههههههههههه اسمهان:الله يستر هالمرة وشلون بتزفوني..المرة اللي راحت وسويتوا لي دبكة سورية هالمرة أخاف ترقصوني عراقي!!! أفنان:حِنا لو نطاوع رانية تخلينا نرقص دقني ومعلاية!!بس الحمدلله باقي في راسنا عقول! رانية:وهي أم عبير خلت أحد يرقص من أول العرس؟مسنترة في المنصة هي وقرايبها تقولون مطلعين عليها رخصة لولا أم زوجك نزلتهم بالذوق!!!! اسمهان:ماشاء الله بيسوون نفسهم نجوم الحفل بالغصب!تخيلوا عبير جات غرفتي قال إيش بتبارك؟وهي خارجة تقول لي ماألومك الغيرة ذابحتك!!!! رانية:يقطع أبو الثقة ياشيخة!!وأقص إيدي من هنا لو ماكانت مسوية لوحة تشكيلية على وجهها مثل أمها!ماأقول غير الحمدلله إنه ممنوع اصطحاب الأطفال والا كان حضروا فيلم رعب اليوم! الشلة:ههههههه... اسمهان:الناس أذواق!بس ماقلتوا اش رايكم فيني؟؟ رانية:بسم الله عليك تهبلين.. نجلاء:ماشاء الله تبارك الله حلوة دايماً ياقمر... مرام:مايحتاج نقول رأينا..أهم شي رأي العريس!! أفنان:حصِّني نفسك ياعسل.. العين حق... ودردشوا شوي مع اسمهان بعدين قدموا لها صندوق مغلف تغليفة كشخة وكان هدية بمناسبة زواجها والهدايا اللي بداخله قطة بينهم...وخرجوا من عندها... رانية:اش رايكم نمر على عبير نسلم عليها؟؟ أفنان:إن كان سلامكم عليها بغرض الشماتة والتريقة بس..فأنا أول وحدة بأعترض وماني رايحة معاكم! نجلاء:ياشيخة ندخل نبارك لها مادام وصلنا لها... مرام:بيني وبينكم مو حلوة نبارك لاسمهان ونطنشها!تعالوا نسلم عليها وننزل... ودخلوا كلهم على عبير..وتفاجئت وقالت:نعم؟؟ مرام:الله ينعم بحالك..جينا نسلم ونبارك.. ودخلوا وسلموا وهي مو متطمنة لهم تناظر فيهم باستغراب... قاموا استأذنوا وخرجوا من الغرفة وأم عبير دايرة بالصالة تسوي مقارنات ومشاكل ناظرت بالصالة ولقيت أغلب المعازيم من طرف أم اسمهان وصاحت بأم تركي:اشفيكم ماعطيتوني كروت كثيرة مثل أم اسمهان؟؟حبايبها معبيين القاعة وأنا كأني يتيمة!!!! أم تركي:نفس عدد الكروت اللي أخذتيهم..أخذتهم أم اسمهان..لكن فيه معارف كثير مشتركين بيني وبينها وأنا اللي عازمتهم وهي تعرفهم عشان كذا تلاقينها معاهم! وراحت أم عبير.. هند:أعوذ بالله هالحرمة كل دقيقة تسوي لنا قلق!أول راسلة مطربة وتبي تورطنا فيها..ورجعت تقول ليش غرفة بنتي أصغر..وبعدين حطت أقاربها فوق المنصة يجلسون ويرقصون هم بس!ومعترضة ان زفة اسمهان بتكون قبل!وتبي تركي يطلع!والحين تقول الكروت وماالكروت!اللي هذا أوله ينعاف تاليه! أم تركي:الله يرضى على أم اسمهان ياشيخة... _________ بعد شوي طلبت اسمهان من أمها انها تنادي أبوها ومحمد والعريس يطلعون يتصورون معاها... ودخلوا الغرفة وطاحت عين اسمهان على عبدالرحمن وانذهلت من منظره..وتصورت كم صورة جماعية مع أخوها وأبوها وزوجها...وبعدها خرجوا كلهم من الغرفة وبقي اسمهان وعبدالرحمن والمصورة واقفة بعيد تضبط أغراضها... عبدالرحمن(وهو يطالع باسمهان):ماشاء الله تبارك الله..سبحان من خلق وأبدع... واسمهان ساكتة ومتنحة!!! عبدالرحمن:سمهونتي اشفيك ماكلة فول؟؟؟ اسمهان:إلا ماكلة تراب وساكتة!وش هالشيفة؟لابارك الله في ابليس!مالقيت تكشخ وتتفنن إلا بيوم العرس؟؟؟؟؟ عبدالرحمن:ليه؟ثوبي وشماغي وبشتي من أغلى محلات شاريهم ولا هي معجبتك؟؟؟ اسمهان:أنا أقصد شنبك ولحيتك يافصيح! عبدالرحمن(وقصده يستفزها):التغيير مرغوب يوم العرس!! اسمهان:مضبوط!بس التغيير للأفضل مو للأقبح!طالع بنفسك حرام عليك..المسافة اللي بين خشمك وفمك ملعب كورة قدم!! عبدالرحمن:لاتزيديني غبن قالوها أعمامي قبلك بس مو ملعب كورة لأنهم مايشجعون أي فريق!!بس قالوا ساحة قتال!! اسمهان وهي تكلم المصورة:مدام دينا بليز العريس مايبي تصوير صوريني لحالي بس!!! عبدالرحمن:ليش؟مين قال؟أنا جاي مخصوص أتصور معاك!! اسمهان:معليش خلك بعيد..الصور هذي بيشوفونها أحبابي وأصحابي بعدين..موب ناقصة فشايل وضيف على كذا إني دافعة عليها مبلغ كبير فـحرام جداً إنك تخربها علي بوجهك الصافي هذا!!!! عبدالرحمن:صدقيني أنا زعلان أكثر منك بس هذا اللي صار نتيجة مقالب نويصر صاحبي!! اسمهان:مو هذا النذل اللي كنت دايماً تحكي لي عنه!وش تبي فيه وياكثر هزله ومقالبه؟!!! عبدالرحمن:نفس اللي تبينه من شلة الصاعقة على كثر هزلهم ومقالبهم!!!!!! ساعتها تفشلت اسمهان وانطمت وتصورت مع عريسها وهي ساكتة!!! طبعاً طلبت عبير.. تركي وأبوها وأخوانها يطلعون يتصورون معاها وقامت أمها بما إنه عندها حب ظهور تناقز بكل صورة..وتتصور وتستخف دمها بحركات بنوتية بحته!! حتى تركي نقد عليها وقال بنفسه:الله يرضى على أمي عقل وثقل!!!!!!! وخرجوا الجميع وبقت عبير مع تركي بس ماانتبهت لقرعته لأنه مغطيها بالشماغ زين..لكن بينها وبين نفسها قالت:شكله مخفف شعره من الجوانب!! عبير(بدلع متصنع):يعني ماقلت رايك بمظهري؟؟؟ تركي:مرة شكلك اختلف علي!مو كأنك كثرتي من هالألوان؟؟ عبير:اسمه ميك آب!والموضة هي اللي ماشية السنة هذي كذا!!!!! تركي(في داخله)قال:الله يسترلو شافت الموضة اللي براسي وش بتقول؟!!!!!! _____________ وبصالة العرس الشلة ماقصروا مشتعلين رقص وغطاريف لدرجة انهم طلعوا على المنصة وطلبوا بالمايكرفون أمهات المعاريس يطلعون..ولما طلعت أم عبدالرحمن وأم تركي على المنصة أخذتهم رانية من أياديهم ورقصتهم والبنات يغطرفون!!! ومسكوا أم اسمهان وأخواتها ورقصوهم كلهم..وقامت سماح وقالت لرانية:رانية تكفين سوي لنا جو مثل يوم ملكة اسمهان وغني لنا شوي... رانية:ابشري..بس ببلاش ..ولابفلوس؟؟ سماح:هونت! لاتغنين! ضحكت رانية ومسكت المايك والطقاقات يطقون وقالت: كل......؟؟؟......... كلهم لافرق الله شمـــــلهم عبدالرحمن وتركي خيَّالة عليهم....... رزةالــــــراية الخ....... والعالم ترقص وتهز وبغى يجي زلزال ولما نزلوا البنات من المنصة وجلسوا..أم عبير طقها القهر يوم ام اسمهان وأمهات العرسان رقصوا وهي محد عبرها قامت جمعت حريم أخوانها وطلعت معاهم على المنصة ترقص ودعست بكعبها على فستان وحدة وزلقت وانكشفت سيقانها وصارت بموقف لاتحسد عليه!!!! قامت رانية تتريق وتقول للشلة: آآه واويلاه يوم هــــــب الهوى طيَّر الفستان والشلحة سوى بانت السيقان والقلب انكوى!! الشلة:هههههه..اسكتي لو تسمعك ترتكب فيك جريمة!!!! _وشوي أعلنوا عن الزفة...وكانت زفة اسمهان... _______________ انطفت جميع الأنوار وتوجهت الاضاءة للبوابة وبدأ ينتشر الدخان وكان عاملات القاعة يدفون مجسم ذهبي لقلعة واشتغل بعض المؤثرات الصوتية الطبيعية وانفتح باب القلعة وخرجت اسمهان واشتغلت مرشات الفقاقيع والورد وطلعت على المسيرة وشريط الشعر يشتغل ووقفت عاملتين قدامها وحدة شايلة حمامتين والثانية شايلة قفص ذهبي ومدت اسمهان يدها للحمامة الأولى ودخلتها القفص الذهبي وبعدين الحمامة الثانية ودخلتها القفص وقفلت عليهم..وأخذت المفتاح ولبسته كعقد!!فتعالت صفقات الحضور وتصفير الشلة وبدأت القصيدة تتكلم عن اسمهان وعبدالرحمن...وقامت المنشدة تغني شيخة الزين..والأطفال كان لهم دور ولد محمد ماسك بنت ابتسام..والولد الثاني ماسك البنت الثانية من يدها وماشيين جنب اسمهان..وبيدهم بالونات على شكل قلب..تناولت اسمهان من باقتها مثل العصا الطويلة اللي طرفها حاد وفقعت البالونة الأولى وخرج منها بالونات صغيرة كثيرة على شكل قلوب ملونة تناثرت على الحضور..وهكذا لين مافقت الرابعة وامتلاء الممر بالقلوب ولما وصلت عند الكوشة كانوا اسماء وابتسام واقفين قدامها وأم عبدالرحمن وأمها واقفين وراهم وبيد أسماء مخدة أنيقة عليها تاج أخذته اسمهان ولبسته أمها وباست راسها..وابتسام معاها كمان مخدة حلوة عليها تاج أخذته اسمهان ولبسته أم عبدالرحمن وسلمت عليها وبدأت الطقاقة في الطقطقة...والكل يرقص.. ...بعدين أكمل الزواج بس الله أعلم اليوم أو بكرة!!! وهم بالطريق قال عبدالرحمن وهو يسوق:حسبي الله على هالغلطة!!! اسمهان:اشفيه؟؟؟؟؟؟ عبدالرحمن:بدال ماأمشي من الطريق المختصر رحت للطريق الأطول!!! اسمهان:يوووووه خسارة!! عبدالرحمن:ليش خسارة؟مستعجلة؟؟؟ اسمهان بارتباك:طالع قدامك وانت تسوق!!! _________________________ وجاء وقت زفة عبيربس قبلها انعرضت سينما فيها صور عبير في جميع مراحل عمرها لحد يوم الملكة...وكان يرافق السينما أغاني مختلفة لدرجة إنه بعض الحضور اللي تضايقوا من الوضع خرجوا لمدخل القاعة إلى ان انتهى العرض السينمائي.. وفجأة انطفت أنوار القاعة وسمع الحضور صوت أبواق وصوت ينادي:تعلن المراسم الملكية عن وصول الأميرة عبير إلى موقع الحفل مع تمنياتنا لها بقضاء وقت سعيد!! ودخلوا 4فليبنيات عبارة عن فرقة حجزتهم أم عبير للزفة وشايلين هودج مزين بالورد وعبير جالسة بداخله وقدامها ثنتين لابسين كلهم مثل ملابس علاء الدين البناطيل المنفوخة ومناديل شيفون على الوجه ورقصوا قدامها كأنهم جواري والعاملات شايلين عبير وماشيين على المسيرة وأغنية ألف ليلة وليلة تشتغل ولما قربت عبير من الكوشة نزلت من الهودج ووقفوا 4 من بنات الفرقة عن يمينها وشمالها وشايلين مراوح من الريش يهوون عليها وهي تمشي من تحتهم ولما وصلت للكوشة جوا البنتين الثانيات ومعاهم صندوق خشب محفور ومشغول وخارج من قلادات ومجوهرات من الأحجار الملونة مثل صناديق الكنز بالحكايات فتحت عبير الصندوق وخرجت منه قلادة ذهب ولبستها أم تركي وسط تصفيق الحضور!! الشلة:واو زفتها حلوة!! رانية:لو تتكلمون من هنا لين بكرة ماراح أتأثرأبد.. محد داخل مزاجي هالليلة إلا سمهونة عسى الله يحفظها!!! وامتلأت المنصة بأقارب عبير واشتغل الدي جي بأغاني..مما أثار غضب الحضور لأنه الوقت متأخر بالليل .. وقالت أم اسمهان:ياأم عبير الله يهديك هذي ساعات ينزل فيها الرحمن ويغفر للمستغفر ويستجيب للداعي وانتم تغضبون الله بالرقص على الأغاني؟؟؟؟؟ أم عبير:أشوف يوم زفيتي بنتك ماقلتي هالكلام؟؟والا حلال عليكم حرام علينا؟؟؟؟؟ ام اسمهان:الحمدلله ماشغلنا موسيقى..واتقينا الله قدر استطاعتنا... أم عبير ضربت بكلامها عرض الحايط وراحت ترقص مع أهلها... أما أم عبدالرحمن شافت الوقت تأخر ونادت أم تركي وقالت لها:الليل سرى والناس ماتعشوا والبوفيه جاهز وش رايك ندخلهم على العشا الحين؟؟؟؟ أم تركي:على بركة الله... وبدأوا ينادون الناس على العشا..وزعلت أم عبير وقالت:أنذال!!حركة مقصودة عشان يخربون على بنتي!!يزفون بنتهم بدري وتجي على راسنا إحنا!!! ودخلوا الناس قاعة العشا وكان عشا فاخر هذي صالة العشاء بقاعة ليلتي وأكلوا وشربوا وخرج الجميع على بيوتهم...إلا أم عبير راحت لأم تركي وقالت:اشفيه ولدك يلعب علينا؟؟ أم تركي:أعوذ بالله..شلون لعب عليكم؟؟ أم عبير:أنا شارطة عليه يكون البوفيه مأكولات بحرية وأسماك..ووينها ماجابها؟؟ أم تركي:انتي شايفة بعينك الحاضرات عددهم 450 حاضرة..والمأكولات البحرية غالية جداً مين وين بتكفيهم؟؟ راحت أم عبير..لبنتها اللي تركي ناداها عشان تروح معاه..ولما جاء ياخذ عروسته قعدت أمه تدعي له بالتوفيق..أما أم عبير لحقته وقربت من أذنه وقالت:ترى عبير عندها عذر شرعي!! وطبعاً عبير ماعندها عذر ولاشي..بس عشان مايكتشف تركي اللعبة بسرعة!!! ومسكت عبير على جنب وقالت:حاولي تقنعينه انه العذر الشرعي يطول عندك لين 9 او عشر أيام ولاتخلينه يمس منك شعرة!مفهوم؟؟؟ عبير:ابشري يمه! وراحت عبير مع عريسها وقلبها يرجف!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
وصل تركي للفندق ودخلوا غرفتهم وراح تركي للبلكونة يفتحها ويطل منها على المنظر... تركي:الله يجزاك خير ياعبدالرحمن..منظر المسبح والبحر البعيد يفتح النفس! عبير:وعبدالرحمن اش دخله بالموضوع؟؟ تركي:أنا وكلت له أمر حجز الفندق..وحجز لي وحجز لنفسه الغرفة اللي بجنبنا!! عبير:ليه؟ خلصت الفنادق؟هالاسمهان ورايا ورايا؟؟؟؟ تركي:ليش وشفيها اسمهان؟ عبير:إنت ماشفتها هي وأمها شلون كانوا غيرانين مني أنا وأمي وكانوا ناويين يخربون العرس علينا بس ربي ستر!!!!! تركي بينه وبين نفسه صار يقول:بس الكلام اللي وصلني من أهلي يقول غير كذا!!!!! وكانت مفاجأة الفندق عشاء عروسين فاخر..دخلت عبير للحمام وبدلت هدومها وخرجت وبدل تركي هدومه وجلس على طاولة العشاء وتفاجأ من ملابس عبير الثقيلة!!!!! وعبير تفاجأت من منظر راسه الأصلع فسبقته بالكلام وقالت:تركي وش هذا؟؟وين راح شعرك؟؟ تركي:ذهبَ مع الريح! عبير:أكلمك من جد! تركي:إذن بأعدلها وأقول ذهبَ بيد الحلاَّق! عبير:وليش تحلقه؟؟ تركي:ماحلقته بهواي كله من نصور النذل!!! عبير:لأ..معليش أنا ماأتحمل هذا المنظر خذ لك شي وحطه على راسك أزين لك!! قام تركي يستخف دمه وسحب طرحتها البيضاء حقت العرس من فوق الكنبة ولبسها وقعد يغطرف!!! ماتحملت عبير مزحه وقالت:سخيــــــــــف!! _____________ في الغرفة المجاورة كانوا عبدالرحمن واسمهان يتبادلون أحلى المواقف اللي مرت بهم في العرس وظل عبدالرحمن يحكي لها عن الاحراجات اللي واجهها مع أقاربه لما شافوه حليق الذقن والشنب! عبدالرحمن:اللي يقول لي منهم يادكتور مدحت!واللي يقول لي ياباش مهندس حمدي!والا أعمامي اللي يهاوشوني ويقولون وش هالشكل؟ماسويته في مراهقتك!! اسمهان:هههههه...يحق لهم شكلك صدمة! وظلوا ياكلون هُم بعد ويتسامرون واسمهان تحكي له عن بعض المواقف الطريفة اللي مرت بها مع صاحباتها والمعازيم..وكانت الفرحة غامرتها...... وانتهوا من عشاهم وقال عبدالرحمن:اسمهان قومي توضي خل نصلي ركعتين عسى ربي يجعل حياتنا خير وصلاح من أولها.. وراحت تتوضأ ولما جت مسك عبدالرحمن جبهتها وقال:اللهم إني أسألك خيرها وخير ماجبلت عليه وأعوذ بك من شرها وشر ماجبلت عليه... وصلوا الركعتين واتجهوا للنوم..... ________________ أما عبير كان التوتر ذابحها والتفكير مايفارقها... خايفة تنكشف!وتركي لاحظ إنها مو معاه ومو معطيته وجه.... حاول يلاطفها ويلاينها بس لقي منها كل الصد وتذكر كلام أمها لما قالت:عنها عذر شرعي! فخمن إنه هذا هو السبب فتركها على راحتها وغلبه النعاس ونام!! أما هي ظلت تصارع النوم خايفة جسمها ينكشف لاشعوريا وهي نايمة! صحوا العروسين عبدالرحمن واسمهان على صلاة الظهر بعد ليلة مرهقة... ولقي عبدالرحمن رسالة في جواله من أمه كاتبة فيها(إذا صحيت ياعريس اتصل فيني!)... اتصل على أمه وبعد السلام والسؤال عن الحال طلبت تكلم اسمهان وكلمتها وباركت لها وبعدين طلبت عبدالرحمن وقالت:اليوم ياولدي إحنا بانتظارك على العشاء إنت وعروستك.. عبدالرحمن:لسه بدري على الارتباطات يايمه!! أم عبدالرحمن:تطمن.. مابنربطكم إلا اليوم بس..فرصة إن أقاربنا يتعرفون على عروستك وأهلها عن قرب... عبدالرحمن:ماشاء الله عزمتوا أهل اسمهان بعد؟ أم عبدالرحمن:إيه عزمناهم..والود ودي أعزم أهل تركي بعد..بس الحقيقة أم عروسته اللهم ياكافي ..فرجعت هونت عن عزيمتهم!! عبدالرحمن:زين ماسويتي..أقاربنا لحالهم شعب ماشاء الله..بس شلون بيكفيهم البيت؟؟؟ أم عبدالرحمن:ماعليك عبدالمجيد وعبدالرحيم من الصبح يفترون واستأجروا زل بنحطه بالحوش الأمامي لعشاء الرِجال..وكراسي وطاولات في الحوش الخلفي عشان بوفيه الحريم....ومجالسنا وسيعة الحمدلله... عبدالرحمن:الله يعطيكم العافية..بس بتكلفون على نفسكم... أم عبدالرحمن:ولاكلفة ولاشي إنت ولدنا واسمهان بنتنا وكلكم عينين في راس..وإن حبيتوا تتأخرون في الحضور خذوا راحتكم.... وتكلم شوي عبدالرحمن معاها وانتهت المكالمة وقال لها بالسالفة..... اسمهان:أجل..الله يعينك بأطلب منك طلب! عبدالرحمن:تدللي.. اسمهان:لازم توديني الكوافيرة اليوم مادام السالفة فيها عزيمة رسمي وعالم و ناس!!! عبدالرحمن:الله يعين..ضاعت فلوسك ياصابر!!! وسحبت اسمهان جوالها وغيرت الوضع من صامت إلى عام وتفاجأت بعدد الاتصالات والرسايل...وكانت أغلبها من صديقاتها في المدرسة اللي ماحضر يبارك... واللي حضر يدز تعليقات محرجة واسمهان تقرأ ووجهها يحمر ويصفر !! واتصلوا أبوها وأمها يتطمنون على وضعها وطمنتهم....... وعقبها قال عبدالرحمن:اش رايك ننزل نتغدى بالمطعم؟؟الوقت ظهر وحِنا مافتحنا الريق. ووافقت اسمهان..ونزلوا المطعم.... ____________ في الغرفة الثانية كانت آثار الارهاق واضحة على وجه عبير اللي ماذاقت طعم النوم وكانت تتعامل مع تركي بعصبية نتيجة للسهر والارهاق وتركي صحى من الصبح وفطر وهي كانت رافضة تاكل..ولما جاء وقت الظهرخرج تركي يصلي وعبير بسرعة صلَّت قبل مايرجع ويكتشفها ويعرف إنه ماعندها عذر!!! ولما رجع قال:عبورتي؟اش نطلب غداء؟ عبير:أنا مليت من القعدة بالغرفة..خل ننزل ناكل تحت بالمطعم.. وبالفعل نزلوا المطعم وجلسوا على طاولة وانتبه تركي إنه عبدالرحمن جالس بنفس المطعم بالجهة المقابلة وقام.. عبير:وين رايح؟؟ تركي:بأروح أسلم على عبدالرحمن... عبير:وش عليك منه؟خليه بحاله! تركي:وانتي ليش قاهرة عمرك؟المفروض حتى انتي تقومين تسلمين على زوجته! عبير:هذا اللي ناقص بعد!!روح لحالك! وراح تركي يسلم على عبدالرحمن ويسأله عن الأخبار وقال له عبدالرحمن إنه معزوم على العشاء عند أهله... وفكر تركي لو ياخذ عبير ويروح هو لأهله بعد لكنها رفضت اقتراحه! ولاحظ تركي إنه عبير متوترة وماتتجاوب معاه وصار يحس بضيق من تصرفاتها غير المبررة,,وكل شوي تجي عينه على عبدالرحمن واسمهان اللي كانوا مبسوطين ويضحكون أغلب الوقت.... تركي بداخله:الله يهنيكم..ومحد ياخذ أكثر من نصيبه!! اتصلت أم عبير على بنتها تسألها عن الأحوال وطمنتها عبير بعدين قالت:أعطيني زوجك أكلمه! وكلمت تركي بس ماارتاحت لصوته!! وطلبت عبيروهزأتها!!وقالت:اشفيه تركي؟؟لايكون درى عن شي؟؟؟ صارت عبير منحرجة وتتكلم بالرموز:لا.. أمها:كلمتيه عن السفر للخارج؟؟ عبير:لسه! أمها:وش تنتظرين؟؟اشغليه بالخرجات والطلعات ولايكون لسانك طول الوقت بحلقك!تكلمي معه واضحكي وخليه يتعلق فيكِ..فاهمة؟؟؟؟ عبير:إيه فهمت! وقفلت الجوال وصار تركي يطالع فيها بنظرات غريبة! _________________ أما اسمهان راحت للكوافيرة من العصروتضبطت وانتهت بعد المغرب وأخذها عبدالرحمن ووداها لبيتها لأنه ملابس السهرة كانت في شقتهم مو في الفندق..... عبدالرحمن:ماشاء الله تبارك الله..كل يوم وانتي عروس! اسمهان:وكل عام وانت زوجي ان شاء الله!! عبدالرحمن:هههه..قولي ان شاء الله أخاف عقب سنتين آخذ الثانية!! اسمهان:تكون رقبتك بإيدي قبل ماتسويها!! وجلست تلبس ملابسها وذهبها وصلت صلاة العشاء وبعدين نزلت...... وكانوا المعازيم قد حضروا قبلها واستقبلتها أم عبدالرحمن وأبلة جوهرة وأحلام بالغطاريف وزفوها وجلسوها بكنبة منفردة بوسط المجلس.. وكانت السعادة غامرتها وبالأخص لما حضروا أهلها ودخلوا يسلمون..اسماء وابتسام وسماح وأمها...... وكان المجلس عامر بالحريم زوجات خال عبدالرحمن وعماته وزوجات أعمامه وبناتهم وغيرهم وأهل اسمهان وكان عدد الحضور يقارب ال35 . جلسوا أهلها جنبها وقاموا يسولفون معاها... سماح:ماشاء الله ياسمهونة عروسة بحق وحقيقي..... أسماء:ماشاء الله شكلك اليوم أروع من أمس.. ابتسام:الحلو حلو من يومه..بس يوم بعدت عنكم صرتوا تشوفونها حلوة!!!!!! أسماء:ههههههه..صح!خلك بعيد حبك يزيد!! وبدأوا يسألونها عن أحداث أمس واليوم.. أم عبدالرحمن بصوت عالي:الله يحييكم جميع على عزيمتنا الليلة وترى ماجمعنا إلا العرسان الله يحفظهم ويوفقهم..وعسانا مجتمعين على الفرح دوم..... الحضور:آمين...الله يجزاك خير.... أم عبدالرحمن:وحيا الله أم محمد(يعني أم اسمهان) وحيا الله كل هالوجوه الطيبة.. أم اسمهان:الله يحييك ويسلم غاليك... وبدأوا الحضور يشربون القهوة ودارت عليهم الصحون الفاخرة المعباة بأجود أنواع التمور والحلويات والشوكليت.. وبعد السواليف بدأوا الكبيرات في السن من الحضور يتنافسون في قول القصايد في العروس وأهلها والعريس وأهله والباقي مابين من يطق الدف ومابين من يرقص.. وكان فيه وحدة من الحضور تناظر باسمهان بفضول عجيب وكانت زوجة عم عبدالرحمن واسمها أم بدر..... أم بدر:آثاريك منتي بـ هينة ياأم عبدالرحمن!فتشتي عن بنات خلق الله بكل محل لين مااخترتي أجملهم..لو إني صايدتها قبلك كان خطبتها لولدي بدر!!!!! أم عبدالرحمن:الحمدلله هذا توفيق من الله.... أم بدر:تصدقين البارح طول العرس وأنا أقول يمكنها عادية والمكياج محليها..خبرك ماقد شفت عروس مو حلوة!!!بس اليوم يوم تمقلت فيها عن قرب بان لي جمالها والأحلى من ذا كله بشاشتها فديتها شوفي شلون الضحكة ماتفارق وجهها!!!!! أم عبدالرحمن:وأنا هذا اللي عجبني فيها طالعة لأمها الله يحميها... أم بدر:هي مالها أخت أصغر منها وبحلاتها؟؟ أم عبدالرحمن:لا.... انقبض صدر أم عبدالرحمن من كلام الحرمة وقامت تشوف أمور العشاء!! وبعد شوي نادت أم عبدالرحمن المعازيم للبوفيه في الحديقة الخلفية من الفيلا...وبدأوا الناس يغرفون الأكل بالصحون ويجلسون على الطاولات إلا اسمهان حست بتخمة وحرقان بمعدتها ورفضت تاكل!!! بدأت تحس نفسها مو تمام فاتصلت على عبدالرحمن وقالت له:عبدالرحمن تكفى..أبي أرجع الفندق!! وجاء عبدالرحمن وأخذها بسرعة وبعدها بشوي أهلها رجعوا بيتهم أما اسمهان راحت الفندق وهم بالسيارة.. قال عبدالرحمن:شكلك زهقتي مثلي!ماألومك أمس مناسبة واليوم مناسبة! لكن اسمهان كانت ماتبي تتكلم كل همها ترجع الفندق بأسرع وقت! وأول ماوصلوا للفندق راحت اسمهان تجري بسرعة على الأصانصير واستغرب عبدالرحمن وقام يلحقها وركب وراها وقال:وشفيك يابنت الحلال؟؟فشلتينا وراك تركضين بسرعة؟؟ اسمهان:مو قادرة ياعبدالرحمن أبي أوصل للغرفة بسرعة!! وأول مادخلت الغرفة راحت تجري على الحمام ودخلت واستفرغت....وخرجت من الحمام و رمت نفسها على الكنبة بكل تعب.. عبدالرحمن:اسمهان؟انتي تعبانة؟ اسمهان:مدري اشفيني..حسيت فجأة بخنقة ودوخة وحرقان بصدري وحسيت إن ودي أبكي قدام الناس!! عبدالرحمن(وهو يستهبل):لاتكونين حامل؟؟ اسمهان:يصير؟؟؟؟؟؟؟؟؟؟؟؟؟ عبدالرحمن:بسم الله الرحمن الرحيم أمس اللي تزوجنا وتقولين لي يصير؟؟قومي قومي وغيري هدومك... وقامت اسمهان تغير هدومها بس حست بدوخة وقامت تستفرغ في الحمام....... عبدالرحمن:اسمهان وضعك مايطمن!أخاف حايشك تسمم وانتي ماتدرين؟ اسمهان(بكل تعب):بس أنا ماأكلت شي نهائياً غير قطعة شوكليت وشربت فنجال قهوة.. عبدالرحمن:أنا ضروري أتصل بأمي وأسألها أخاف ماكلة شي في البوفيه ويكون متسمم لاسمح الله..... واتصل بأمه وحكى لها إنه اسمهان تعبانة وسألها عن الأكل إن كان فيه أحد من المعازيم تضرر؟ أم عبدالرحمن:هذا هم أهل أبوك كلهم عندي أكلوا وشبعوا ومحد اشتكى من شي!ليش طمنِّي اشفيها اسمهان؟؟؟ قال لها عبدالرحمن بالسالفة وحست أم عبدالرحمن إنه البنت صايبها عين من أم بدر!اللي بس كانت تسأل عنها... أم عبدالرحمن:بس..بس..كأني عرفت اشفيها زوجتك..شوي واتصل فيك!! في الجزء السابق لما قفلت أم عبدالرحمن السماعة نادت أختها جوهرة وبنتها أحلام وقالت لهم بسالفة تعب اسمهان المفاجيء وانها شاكة بأم بدر وإنها السبب بإصابة اسمهان بالعين... جوهرة:وإحنا اش ننتظر؟لازم نآخذ من وضوء الحرمة هذي!أنا سمعتها وهي تسألك عن اسمهان وماارتحت للهجتها أبد..... أم عبدالرحمن:وليش ناخذ من وضوئها؟الحرمة ضيفة ببيتي وبتزعل علي وأنا ماأبي مشاكل!أنا أقول ناخذ من أثرها يعني فناجيل القهوة والشاي اللي قاعدة تشرب فيها الحين ونغسلها بموية ونرسل الموية لعبدالرحمن!! جوهرة:أي فناجيل وأي خرابيط؟الحديث اللي ورد عن الرسول بالنص الصريح إنه إذا انعرف العاين يؤخذ من وضوءه ومايجوز له يرفض!أما أخذ الأثر فهي مسألة اجتهاد وتضبط مع ناس وتفشل مع غيرهم! أحلام:طيب انتوا متأكدين انه الأخذ من وضوء العاين بيفيد المريض؟؟ جوهرة:طبعاً ياحبيبتي..انتي مامر عليكِ حديث الصحابي سهل بن حنيف؟كان جلده أبيض وجالس يتوضأ وواحد من أصحابه اندهش من بياضه وقال إنه ماقد رأى جلد مخبأة بهذا البياض ووقع الصحابي مثل المشلول من وقتها ولما حكوا قصته للرسول سألهم إن كانوا يشكون بأحد؟فقالوا نعم عامر بن ربيعة وطلب الرسول وضوءه وصبوه من خلف سهل بن حنيف فقام وكأنه ماصار له أي شيء!!وبعدها الرسول نصح الصحابة بذكر الله والبركة اذا شافوا شي يعجبهم أحلام:ومنكم نستفيد...... أم عبدالرحمن:مازلت أقول ناخذ من أثرها أحسن!أنا مال بالمشاكل ووجع الراس! جوهرة:أي مشاكل يابنت الحلال؟الشخص العيان اللي مايذكر الله لاعجبه شي هو اللي يجيب المشاكل لنفسه ويستاهل مايجيه!وبعدين حطي نفسك مكان اسمهان..كنتي بترضين على نفسك المرض والعذاب مقابل إنك ماتحرجين مين عانك؟؟و لا كنتي بتسوين المستحيل عشان تتشافين بكل وسيلة؟؟ أم عبدالرحمن:لاحول ولاقوة إلا بالله...وش تبيني أسوي؟؟؟؟ جوهرة:لاتسوين ولا شي أنا اللي بأسوي!! وكان كل هالحوار داير بالمطبخ..توجهت أبلة جوهرة لدولاب وأخذت طاسة(زبدية) وملتها موية ودخلت مجلس الحريم!!!!!! أم عبدالرحمن ناظرت بأحلام وقالت:الله يستر من خالتك وش بتسوي!!!! ودخلت جوهرة على الحضور وبيدها الطاسة وقالت:ياجماعة الخير أنا أقول لو نختم المجلس هذا بذكر الله وقراءة جزء من القرآن يكون أفضل اش رايكم؟؟ الحضور:جزاك الله خير..أفضل شي تسوينه.. جوهرة:وانتوا أكيد تدرون انه الملايكة تتنزل في مجالس الذكر..عشان كذا لو نكون كلنا على طهارة بيكون أفضل..وأنا أول وحدة بتتوضأ فيكم. وأخذت الطاسة وتوضت قدامهم... وجوا يقومون للحمام يتوضون... بس جوهرة قالت:حلفت عليكم ماتقومون!انتم ضيوفنا ومخدومين محشومين...قومي ياأحلام جيبي لهم زبديات وموية!!!!!! ووزعت عليهم زبديات فيها موية وكل وحدة منهم قامت تتوضأ وكلهم كانوا كبار في السن عمات وزوجات أعمام عبدالرحمن... وقرأت جوهرة آيات من القرآن وسوت لهم محاضرة قصيرة عن أهمية ذكر الله في جميع الأحوال وضرورة الدعاء بالبركة على كل شي ينال اعجابنا.... وتوضأ الجميع وأخذت أم عبدالرحمن الزبديات كلها وفرغت الموية في جالون وقالت لجوهرة وهم واقفين بالمطبخ:بيض الله وجهك... واتصلت على عبدالرحمن...لكنه في هذي اللحظة كان بالمستشفى مع اسمهان ومارد عليها!! نرجع لعبدالرحمن اللي لما شاف تعب اسمهان يزيد وداها المستشفى وهم خارجين من الفندق قابلوا تركي وعبير راجعين من برة..واستغرب تركي من منظر عبدالرحمن اللي ماسك اسمهان من يدها وهي تمشي بصعوبة وماحب يحرجه بس لما وصل تركي لغرفته اتصل على عبدالرحمن وسأله... تركي:عسى ماشر ياعبدالرحمن؟ شفتك طالع بالأهل وشكلكم ماكان يطمن!! عبدالرحمن:إيه الحقيقة رجعنا من العزيمة وزوجتي تعبانة يظهر حالة تسمم!! تركي:سلامات..سلامات..قدامها العافية ان شاء الله وطمننا على أخباركم لارجعتوا... عبدالرحمن:ان شاء الله...في أمان الله.. قفل تركي السماعة وقال لعبير بسالفة اسمهان.. عبير:أقول ياشين السرج على البقر! تركي(بانفعال):انتي اشفيك على البنية؟من يوم يجي طاريها يركبك ابليس والعياذ بالله!! عبير:لأنك ماتعرفها مثلي!هذي وحدة حسودة حقودة ونفسها شينة وماتحب إلا نفسها! تركي:اتقي الله..تراهم ناس نعرفهم من زمان ومانعرف عنهم إلا كل خير..وبعدين كان واضح عليها التعب يوم شفت عبدالرحمن ماسكها وخارج!المفروض تدعين لها بالشفا.. عبير:ياشيخ روح زين!أقص إيدي إن طلع فيها شي..هذا كيد نسوان تلاقي أمها محرشتها!! تركي:تراك مرة مصختيها وماأسمح لك تقولين كلمة عنها!انتي تدرين انها كانت بتكون محلك بيوم من الأيام؟!!! عبير:شنهو؟وش تقصد؟ تركي:يعني بالعربي الفصيح ياست عبير كنت حاط عيني عليها من سنين بسبة مدح أهلي فيها ومنتظرها تتخرج من الثانوي..بس غيري سبقني لها!!!!! عبير:وأنا أقول وشفيك طاق معاه صحبة!آثاري باقي لك نفس فيها!ومو بعيدة إنها حاطة عينها عليك لهذه اللحظة!!!! تركي:احترمي نفسك! لاتخليني أغلط وأمد يدي عليك!!!!!! عبير:سويها لو رجَّال!!!! تركي(بعصبية):استغفرك يارب وأتوب إليك... وخرج من الغرفة وصفق الباب وراه... ومسكت عبير جوالها واتصلت بأمها وقالت:يمه الحقيني!ذاب الثلج وبان المرج! أم عبير:الله يسود وجهك!كشفك تركي؟؟؟ عبير:لا يمه لايروح مخك بعيد..آثاري زوجي المحترم كان حاط عينه على ست الحسن والجمال اسمهانوه قبل لايخطبني!! أم عبير:وانتي وش دراك؟ حكت عبير لأمها السالفة...... أم عبير:الله لايربحه قليل الحيا ويقولها قدامك؟!تلاقينه شافها بمكان وحن قلبه لها!اسمعي يابنت بس يرجع لك افتحي معاه موضوع السفر للخارج وقولي له سالفتك هذي بأكبرها وأقولها لأهلي خليه يخاف ويطيح قلبه..على باله انتي شوية؟؟مين تكون اسمهان هذي؟ عبير:بس خليه يرجع لأوريه مين تكون عبير! ==================== وصل عبدالرحمن المستشفى وجواله يرن بس مارد لأنه منشغل باسمهان وكانت المتصلة أمه اللي أخذها القلق! وبعد الكشف الروتيني في قسم الطواريء من قياس للضغط والحرارة وغيره.. طمنهم الدكتور وقال انه مافي شيء يدعو للقلق ومافي أعراض للتسمم . الدكتور:بئالكم قد ايه متجوزين؟ عبدالرحمن:هذا ثاني يوم... الدكتور:ياسيدي..بكرة تكبر وتنسى!دي حالة عادية اسمها دلع عرايس!! عبدالرحمن:فيه مرض في الدنيا اسمه دلع عرايس؟؟ الدكتور:آه وحاجة طبيعية كمان.. شوية ارتباك على خوف على حبتين قلق!ومش بعيدة إنك كنت جاف معاها ياأخي!!بالراحة عليها شوية! عبدالرحمن:بالعكس كانت طبيعية جداً وبعدين اضطربت حالتها..بعد مارجعنا من عزيمة عشاء. الدكتور:أكلتي ايه بالزبط يامدام؟؟ اسمهان:آخر أكل أكلته كان بالعصر..وفي الليل شربت فنجال قهوة وقطعة شوكليت بس!! الدكتور(يكلم عبدالرحمن بانفعال):ماشاء الله ياسي السيد!مجوع العروسة من تاني يوم جواز؟؟أمال بعد سنة حتعمل ايه؟ تنيمها في الشارع؟؟ عبدالرحمن:ياابن الحلال محد جوعها النعمة موجودة..هي اللي نفسها مسدودة شوي! الدكتور:ياساتر يارب..وايه اللي سادد نفسك يامدام؟يكنش السي سيد عامل لك فيها فُتُوَة؟! عبدالرحمن:ياخي إنت لاتدخِل عصك بشي مايخصك!شوف شغلك وخلصنا! الدكتور:ياأخي روح انت وشوف لها مطعم تاكل فيه فول وطعمية وكرشة وممبار تلم عضمها بدل منته جاي تفاول عليها بتسمم!! عبدالرحمن:ياخي اللي خلاك دكتور الله ينتقم منه! الدكتور:أعمل لك ايه بس انت قُلي؟!وحدة معدتها فاضية وواكله شوكلاطه وشاربة أهوة عربي فيها حبهان(هيل) متنيل بستين نيلة عامل ليها حرئان أعمل لها ايه؟؟يابني أنا بأوفر عليك الفلوس اللي عايز تصرفها عندنا! روح بيها مطعم ووكل مراتك! اسمهان:يادكتور أنا حاسة بخنقة وكتمة وضيق بصدري! الدكتور:بـ عزرك ياشبه!عريسك حيموتك من الجوع! بس إن كنت عايز..أنا ممكن أخليها تاخد شفطة هوا ترد فيها الروح! عبدالرحمن:ايش اللي شفطة هوا؟قاعدين بغرزة مصرقعين؟؟ الدكتور(وهو رافع يده للسماء):ربنا يسامحك يا آبا ماكنت عايز أبئى معاك في البلد!بس انت اللي جبرتني أخش كلية الطب!!يابني فتَّح مخك أنا بأئصد إنها تاخود أكسجين عشان تئدر تتنفس قلتوا ايه؟؟؟؟؟؟ عبدالرحمن(وهو مرتفع ضغطه):استعنَّا على الشقا بـ الله!!! وبالفعل أخذت اسمهان جلسة أكسجين وجوال عبدالرحمن يرن... وكانت المتصلة أمه.... عبدالرحمن:هلا يمه.. أم عبدالرحمن:هلا..وشفيك ياولدي ماترد علي من أول؟ أقلقتني وقمت أهوجس!وشلونها اسمهان هالحين؟؟؟ عبدالرحمن:هذا احنا في المستشفى..والدكتور يقول مافيها شي....بس مازالت تعبانة.. أم عبدالرحمن:خلك من المستشفى ومروني البيت دواها عندي بإذن الله... عبدالرحمن:يايمه البنت تعبانة وودها ترجع الفندق ترتاح ماله داعي نمر عليك... أم عبدالرحمن:ياخي لاتخليها تنزل انزل انت بس عندي.. بأعطيك شي وروح الفندق... =========== وبالفعل انتهت اسمهان من المستشفى وراحوا لبيت أم عبدالرحمن ونزل عبدالرحمن لحاله وكانوا الضيوف كلهم قد راحوا بيوتهم قامت أمه أعطته جالون الموية... وقال عبدالرحمن:يمه اش هذا؟؟؟ قامت أم عبدالرحمن تلف السالفة عشان لاتثير مشاكل وقالت:هذي موية مقروء عليها صب منها في كاس وخل زوجتك تشرب منها..وبعدين تعال من وراها وصب عليها الجالون دفعة وحدة! عبدالرحمن:تشرب الموية ومافيها شي...بس شلون أصبها فوقها وليش؟تبين بنت الناس تزعل؟بأعطيها اياها وأقول لها تغسلي فيها! أم عبدالرحمن:استحلفك تسوي اللي قلت لك عليه..انت ماتبي زوجتك تتعافى؟؟؟ عبدالرحمن:إلا يمه..رحلتنا بكرة في الليل على دبي وأنا خايف التعب يشغلنا عن السفر وتروح اجازتي على الفاضي! أم عبدالرحمن:إذن سوي اللي قلت لك عليه وبإذن الله بتشوف العافية... وشكر عبدالرحمن أمه وراح للسيارة وسألته اسمهان عن الجالون... وقال:هذي أمي جزاها الله خير أعطتني موية مقروء عليها عشان تشربينها... ولما وصلوا الفندق سوى اللي قالته أمه بالضبط وصاحت اسمهان بخوف يوم كب عليها الموية على غفلة!!! اسمهان:إنت ماتستحي!!شايفني تعبانة وقاعد تنكت؟؟؟ عبدالرحمن:هذي وصايا أمي وأنا قاعد أطبق! اسمهان:لاااا ياشيخ؟؟ليه ماتذبح لي قطوة عند رجولي بعد؟؟؟؟ عبدالرحمن:استغفري ربك..تبيني أشرك بالله؟؟ اسمهان:أجل اش معناته كلام أمك؟تحسبني قاعدة أتدلع والموية بتصحصحني؟؟ وحست اسمهان برغبة في الاستفراغ ودخلت الحمام واستفرغت وتشطفت وغيرت ملابسها وخرجت من الحمام... عبدالرحمن:هااه؟؟بشري شلونك الحين؟؟ اسمهان:تصدق؟نفسي أكل تفاحة! ناولها عبدالرحمن صحن الفواكه وأكلت تفاحة وراحت فرشت أسنانها..ورجعت قعدت على السرير وقالت:طلبتك! عبدالرحمن:جاك... اسمهان:لاتصحيني أبد..ودي أنام.. عبدالرحمن:نامي..نوم الهنا ان شاء الله.. وحطت راسها على المخدة ونامت بعمق ظل عبدالرحمن صاحي بعدها بساعة واتصلت أمه وسألته عن حالها...وقال لها انها نايمة... قالت أمه:نام إنت بعد ومين أصبح أفلح... وحط عبدالرحمن راسه ونام هو بعد بعمق.... |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
نجي لقصتنا أذن الفجر وصحى عبدالرحمن وقام يتوضأ وبدل ملابسه عشان يلحق الصلاة بمسجد الفندق وهو رايح صحَّى اسمهان للصلاة وراح. صلَّت اسمهان وحست بنشاط وفتحت الستاير وجلست قدام شباك البلكونة تتأمل روعة منظر البحر من بعيد وطيور النورس اللي تطير بنشاط.. وموية المسبح اللي تلمع من صفاها.. وبدلت هدوم النوم بهدوم حلوة جذابة وجلست تنتظر عبدالرحمن اللي جلس يقرأ قرآن ويدعي لاسمهان بالشفا.. وتفاجأ إنه تركي قاعد وراه...وسأله تركي عن أخبار اسمهان وطمنَّه عبدالرحمن وظلوا يتبادلون الكلام والسوالف.. وقال عبدالرحمن:إذا أمورنا طيبة الليلة بنسافر في الليل لدبي..تخاوينا انت وزوجتك؟؟ تركي:من وين ياحسرة؟أنا طفران وجيوبي تشتكي من فضاوتها!! عبدالرحمن:أسلفك! تركي:الله يعطيك العافية ويبارك لك بمالك كافي علي ديون لين هالحين..حتى ورث الوالد تصرفت فيه لعيون العروس!!واش استفدت؟؟ولا شي للأسف!!!! عبدالرحمن:نبرة صوتك تقول لي إنك مو مرتاح! تركي:انسى كلامي هذا..أنا صبور وأتحمل.. ودار بينهم حوار وماحسوا إلا ونور الصباح طالع عليهم فاستأذن عبدالرحمن وراح لاسمهان.. ولما دخل الغرفة لقي اسمهان بأحلى صورة والنور داخل للغرفة وهي جالسة بكل براءة تراقب منظر البحر... عبدالرحمن:صباح الخير لأحلى عروس.. اسمهان:صباح النور..وليش التأخير؟؟ عبدالرحمن:خذتنا السوالف أنا وتركي..المهم انتي شلونك وشلون صحتك؟؟ان شاء الله أحسن؟ اسمهان:ماراح تصدق لو قلت لك وش كثر أنا مرتاحة!!ومو بس كذا حاسة بجوع رهيييييب لو تجيب لي مندي دجاج صدقني لآكله كله بهاالصباح!!!! عبدالرحمن:اللهم لك الحمد والشكر..أجل ننزل للمطعم وش رايك؟؟ اسمهان(بكل حماس):يلا.... ولبست عباتها ونزلت للمطعم اللي على المسبح وكان هواء البحر منعش والجو صافي ومنظر ولاأروع.. واتصلت أم عبدالرحمن وتطمنت على الأخبار وانبسطت يوم درت عن حال اسمهان وطلبت تكلمها... أم عبدالرحمن:يابنتي يااسمهان بأوصيك وصية وخلك ذاكرتها طول حياتك..أذكار الصباح والمساء وأذكار مابعد الصلاة لاتفرطين فيها أبد واحفظيها مثل اسمك...واحفظي الله يحفظك..الانسان منَّا ضعيف ويحتاج للتحصين وبالذات لاجا طالع من البيت والعين حق يابنتي كم من ناس ماتوا والسبه العين وكم من ناس طايحين بالفراش بسبة العين..الله يشفيهم ولايبتلينا..الصحة كنز والله.... اسمهان:سبحان الله..كلامك مثل كلام أمي بالضبط!بس كثير أحيان أنسى..لدرجة انه أمي اشترت لي كتاب الأذكار قبل ماأتزوج وقالت لي حافظي عليه واقرأيه دايماً.. أم عبدالرحمن:جزاها الله كل خير..ولانسيتي عندك عبدالرحمن يذكرك. إلى نهاية المكالمة وجلس العروسين مثل طيور الحب يفطرون ويتبادلون أحلى الأحاديث... وبهالوقت كان تركي زهقان..عبير مثل العادة نايمة ماتصحى إلا الظهر وهو قاعد لحاله فخرج وجلس بالبلكونة وطاحت عينه على العروسين السعيدين وقال بنفسه:الله لايضركم..يارب عوضني واكتب لي اللي فيه الخير مع عبير!! طبعاً بنفس اليوم أهل اسمهان اتصلوا عليها وعلى عبدالرحمن وعزموهم على الغداء لأنهم ودهم يودعونها قبل ماتسافر بالليل... سلَّم عبدالرحمن الغرفة وأخذ اسمهان على البيت وبدلت هدومها وتضبطت ومرت على أم عبدالرحمن سلمت عليها وبعدين راحت هي وزوجها لأهلها... وكان الغداء عائلي..ابتسام وأسماء وسماح وأزواجهم كلهم مجتمعين...ودخلت اسمهان واستلموها تعليقات وحكت لهم كل الأحداث اللي صارت معاها والتعب المفاجيء اللي صار معاها وعن عبدالرحمن اللي فاجأها بـ كب المويه عليها بناءً على طلب أمه!!! اسمهان:بصراحة استغربت من أم عبدالرحمن يوم توصي ولدها يكب المويه علي!!مدري وش تقصد بهالحركة؟!!!! أم اسمهان:يعني كل اللي صار لك ولاعرفتي ليش سوى عبدالرحمن معاك كذا؟!!! اسمهان:الصراحة..لا! أم اسمهان:لأنه واضح إنه اللي كان فيك عين!وطريقة صب الماء على الشخص المعيون تكون بصب الماء من خلفه..بس واضح إنه المويه اللي أرسلتها أم عبدالرحمن كانت وضوء لوحدة طاقتك بعين!!!!! اسمهان:أعوذ بالله...وانتي اش عرفك يمه؟؟ أم اسمهان:لأنك شفتي العافية بعد مااستخدمتي المويه.. اسمهان:حسبي الله على من طقتني بعينها بغيت أموت من سبايبها! أم اسمهان:لا يابنتي لاتدعين على الحرمة..الله أعلم بالنيات..العين أحياناً تصدر من الشخص مو بقصد الحسد..بل بقصد الاعجاب مع نسيان لذكر الله وتخترق عينه جسم الشخص وتهلكه!!وهذا درس لك عشان تتعلمين من وصاياي دايماً أنصحك تحافظين على الأذكار والتحصينات لأنها بإرادة الله تحميك من كل شر...بس كعادتك مامن مجيب.. سماح:بس زين ماسوَّت أم زوجك يوم ماعلمتكم إنها شاكة بأحد معين..حتى مايسير مشاكل وزعل ابتسام:إلا ماقلتي لنا انتوا وين مسافرين بالضبط؟ اسمهان:بنروح دبي 5أيام ومنها لماليزيا لمدة أسبوع ولما نرجع بإذن الله ناويين ناخذ عمرة.. ودارت بينهم سواليف..وكالعادة جاء محمد وحاول يسوي أجواء مرحة ويعطي اسمهان نصيبها من التعليقات.. محمد:ماشاء الله على زوجك يااسمهان..الصراحة..شكله حمسني آخذ وحدة صغيرة وأستعيد نشاطي ماتعرفين لي وحدة من مدرستكم تليق بي؟!! سماح:أقول لايكثر هرجك!مِن أسمع سوالفك هذي يجيني غثيان وانفلونزا وكبد وبائي!!! أم اسمهان:أقول احمد ربك مابتلقى أحسن من سماح! واستمرت سوالفهم ونكتهم... =============== أما تركي كلَّم عبير وقال لها:خلاص جهزي أغراضك بنرجع بيتنا! عبير:ليه؟ تركي:أنا مليت من الفندق..وجيبي فاضي..وبعدين بيتنا واسع وأزين لنا من هالغرفة! عبير:وعبدالرحمن واسمهان وينهم؟؟ تركي:بيسافرون اليوم دبي.. عبير:ياسلام شوف الناس موب إنت! تركي:رجاءً ماأبغى مقارنات..عبدالرحمن ولد عز..وطاح بناس عفيفين نفس..لااستغلوه ولاسحبوا اللي وراه واللي قدامه!!! عبير:وش تقصد؟يعني حِنا اللي دنيئين نفس؟؟تراك مزودها معاي..زين مني رضيت فيك! ترى أبوي مو شوي والكل كان يطلب رضاه ولو انتظرت شوي كنت باخذ أحسن واحد بالديرة!!! وحاول تركي يراضيها ولكن مافي فايدة..رتبوا أغراضهم ورجعوا البيت وبالليل كانوا أهل تركي عازمينهم على العشا,, أما عبدالرحمن واسمهان توجهوا للمطار بالليل وداهم محمد..... لاحظوا أهل تركي إنه ولدهم مو مرتاح مع عبير وحاولوا يعلقون عليه لكنه مايتجاوب معاهم!!! أما عبير ماصدقت انه سماح وهند ياخذونها على جنب ويسألونها عن الأحوال فقامت تتشكى من تركي!!!! عبير:الصراحة مدري اشفيه تركي؟كل ماقلت له شي يقول دفعت كل اللي معي في الزواج! اللي يسمعه يقول محد دفع غيره!كل المعاريس لازم يدفعون ويخسرون!حتى السفر لبره مو راضي عليه..فيه بخل عجيب!! هند(بانفعال):إلا تركي ماينقال عنه بخيل!هذا أخوي وأعرفه زين حتى حِنا خواته المتزوجات على اننا مكتفين ومرتاحين مادياً لكنه مايقصر معانا بهداياه وأعطياته!! سماح:وترى هو المسئول عن مصاريف البيت ومصاريف أمي وعمره ماقصر معاها بشي..لكن المفروض تصبرين عليه شوي توه طالع من زواج وماوده يدخل بـ ديون... عبير:بس السفر للخارج شي ضروري ومهم بهالأيام.. هند(وكانت مو طايقة أسلوب عبير):حبيبتي اللي مايلقى الحب والتفاهم مع الطرف الثاني بديرته فمن المؤكد إنه مابيلقاه بره!!! عبير:مافهمت؟!!!!!!! هند:يعني السفر للخارج ماهو سنة ولافرض واجب علينا عشان نطبقه ونحرص عليه..أهم شي نكون سعيدين مع بعض بأي مكان طالما إننا نحرص على التفاهم والمودة.... ودارت سوالف بين سماح وهند وعبير...وماعجب عبير كلامهم وقالت بنفسها:يظهر إنه مو من السهل السيطرة عليهم!! __________ طبعاً تركي وعبير كانوا ببيتهم واليوم الخامس من الزواج كانت عبير تتروش وكان الوقت صلاة عصر..فسخ تركي بجامته ولبس ثوب وتوضأ واستعد للصلاة ودق الباب عليها وهي بالحمام وقال:عبير أنا رايح للمسجد..وبعد ماأرجع من الصلاة خليك جاهزة عشان نطلع نتمشى.. عبير:طيب... وبعد مانزل تركي من العمارة ووصل لسيارته بالمواقف عشان يروح للمسجد..لأنه المسجد مو مرة قريب يحتاج يروح له بالسيارة..تذكر انه نسي مفاتيح السيارة ورجع للبيت وفتح الشقة وجاء داخل لغرفة النوم عشان ياخذ مفاتيحه بنفس اللحظة هذي كانت عبير قد خرجت من الحمام وهي متطمنة انه تركي بره البيت ورمت منشفتها على السرير وبدأت تلبس!!! لما شافها تركي شهق من الصدمة!وصااااااح:عبـــــــــــ ــــير!! عبير من الخرعة رمت ملابسها من يدها والتفتت لتركي بجسمها كله ومن هول الموقف نسيت تستر نفسها وحست كأنها انشلت مكانها!!! صار تركي يتأملها بفزع ويقول:اش هذا؟اش اللي قاعد أشوفه؟فهميـــــــــــــــني؟؟؟ ؟؟؟؟؟؟؟ عبير:هذي حروق تعرضت لها وأنا صغيرة .. وعيونها مبللة بالدموع.. تركي:حسبي الله عليكم...أعوذ بالله من هذا المنظر أعوذ بالله..انتي جسمك مختفية معالمه جلدك ذايب على بعضه حتى جزء من صدرك متآكل..وفوق هذا كله تذلوني ليل ونهار انتي وأمك؟!!شلون رضيتي على نفسك تغشيني؟شلون؟ عبير:أنا...أنا... تركي:استري نفسك وتغطي...الله لايسامحكم كيف استغليتوا طيبي معكم؟يكفي انكم غشيتونا وماصارحتونا بمرض السكري وتحملنا.. لكن توصل الدرجة إنه أهلك يغشوني ويزوجوني مسخ؟طيب ليش ماصارحتيني أيام الخطوبة؟ عبير:خفت أصارحك وماتقبل فيني! تركي:وإن ماقبلت فيك بالطيب تخليني أتزوجك غصب؟؟؟؟صدقيني ماراح أسكت لكم على هالشيء..ولاأسامح أهلك ليوم الدين..غشوني ببنت لاصحة ولاأخلاق!! عبير:أبوي ماله شغل كان يظن انه عمليات التجميل جابت معاي نتيجة!! تركي:قلبي حاس إنه أمك هي ساس البلا..لابارك الله فيكم...وانتي شلون صرتي بهالشكل شلون؟؟ عبير كذبت وماتبي تصارحه بالحقيقة المرة وقالت:انفجرت فيني أنبوبة الغاز!! تركي:الله ينتقم لي منكم..كل السبب منك انتي!وأحمِّلك كل المسئولية..تكملين كذبة أمك علي؟؟ على طول لسانك وجرائتك ماقدرتي تصارحيني بحقيقتك؟؟؟طيب أنا اش سويت لك حتى تغشيني؟؟ مين يدري يمكن لو صارحتيني من البداية كان تعاطفت معك وحاولت ألقى لك حل! طبعاً مثل ماشفتوا قبل ..الموقف الصعب اللي حصل بين تركي وعبير...نكمل... تركي:معقوله ياعبير؟معقوله؟..لي فترة وأنا مخدوع فيك؟شلون حبيتك وصدقتك؟شلون؟؟ عبير:وأنا بعد حبيتك وماأبيك تزعل!!!! تركي:أي حب هذا اللي تتكلمين عنه؟اللي يحب أحد يغشه؟؟اللي يحب أحد يكذب عليه؟؟اللي يحب أحد يستغله معنوياً ومادياً؟؟؟للأسف خاب ظني فيك!! عبير وهي تبكي:أنا أقول تعال نصلي يمكن تهدأ نفسيتك شوي ونوصل لحل... تركي:خبري ماعليك صلاة!والا حتى هذي كذبتي فيها؟!!!!!ة عبير(بانفعال):ايه كذبت وماأنكر إني كذبت عليك كثير..بس ماهو ذنبي..أنا من حقي أعيش حالي حال غيري..مو ذنبي اني عايشة بعاهة وتشويه!! تركي:ومو ذنبي أنا ألقى من يضحك علي!مو ذنبي أتزوج وحدة ماهي بالمواصفات اللي أبيها!وموب بمجبور أنا أعيش مع وحدة كذابة وخاينة!إذا هذي بدايتك معي أجل وش بتسوين فيني الأيام الجاية؟؟اسمعي ياعبير..انتي مالك مكان ببيتي فاهــــــــــــــــــــــمة؟؟؟ ؟؟؟ عبير:مو من حقك تطردني!! تركي:نفسي عافتك وعافت خداعك..وماني مسئول عن اللي جرى لك..إذا الله ابتلاك كان المفروض تدعينه يوفقك..ويسخر لك ولد الحلال اللي يناسبك واللي تصارحينه بالحقيقة مو تخبين الموضوع وتفرضين نفسك على الغير!!موانتي الانسانة اللي أرضاها تكون شريكة حياتي!!انتي انسانة حسودة وحقودة وماتحبين الخير إلا لنفسك.الكم يوم هذي اللي قضيتها معك علمتني شلون قلبك أسود...وهالحين ماعندي كلمة أقولها لك إلا جهزي أغراضك لأنه مالك مكان ببيتي وكلها ساعة وراجع لك وألقاك بعباتك!انتي فاهمة؟؟؟؟؟؟؟؟؟؟ قامت عبير تلم أغراضها وتبكي لأنها ماتوقعت يكشفها بهذي السهولة من خامس يوم! أما تركي راح يصلي وخرج من المسجد على بيت أهل عبير..دق الجرس فتحت له سيريس الشغالة الباب وقال لها:وين أبو سعد؟؟ سيريس:مافي..مدام موجود بس! إلا أم عبير جاية وترحب:هلا هلا ياعريس وين عبير ماأشوفها معك ؟؟؟؟وحشتني! تركي:تطمني..بأجيبها لك وتقعد بوجهك طول العمر!!وين أبو سعد؟ أبيه بسرعة! أم عبير(وبدت تتوتر):سافر اليوم الفجر للخارج ومو راجع إلا عقب أسبوعين..خير؟؟وش تبي فيه؟؟ تركي:جاي أشتكيه على حفلة الغش اللي دبرتيها لي انتي وبنتك..جاي أقول له عن كل الذهب اللي خليتيني أجيبه لك انتي وبنتك بالمبالغ المهولة!!جاي أحكي له عن شروطك واستنزافاتك مقابل بنته المحروقة!!حسبي الله عليكم أم عبير:هيه انت احترم نفسك تراك ببيتي!ومو من حقك ترفع صوتك علي..وبنتي المحروقة اللي تتكلم عنها تراها تاج على راسك وعلى راس أهلك!عسى لسانك بالقطع قبل ماتجيب طاريها بكلمة!!!! تركي:صدق لاقالوا اقلب الجرة على فمها تطلع البنت لأمها!أنا الغلطان اللي طاح حظي بناس مثلكم ولاصحيت...لكن هي كلمة وبأقولها لك بنتك مالها مكان ببيتي!ومن بدأ حياته بغش يستاهل ينهيها بفضيحة!!!وورقة طلاقها بتوصلها عقب أيام!! وجاء طالع من البيت.. ولحقته أم عبير وقالت:لاتنسى ان المؤخر اللي كتبناه عليك مبلغ وموب هين.. عندك فرصة يومين تدبر المبلغ وتجيبه!! لكن تركي كان نازل بعصبية ورايح للسيارة,,بطريقه للبيت عشان ياخذ عبير ويوديها لأهلها..... اتصلت أم عبير على جوال بنتها وقالت:عبير اسمعي تركي جاي ياخذك..أهم شي تجيبين شنطة الذهب حقتك معاكي ..والأهم تجيبين هدوم كان تركي لابسها وريحته فيها!!!!! عبير وهي تبكي بمرارة:ليش يايمه وش تبين فيها؟؟ أم عبير:مالك شغل!سوي اللي أقول لك عليه..والا منتي بداخله البيت!! وقفلت الخط بوجه بنتها..وطاحت عين عبير على البيجاما اللي فسخها تركي قبل مايروح للصلاة وأخذتها بسرعة وحطتها بشنطتها!!! وشوي إلا وتركي جاء وقال:عفشك الباقي بيوصلك خلال يومين... وشال شنطتها ووداها للسيارة..وكان يسوق بعصبية وصمت..ووصله مسج على الجوال وكان من عبدالرحمن مكتوب فيه(لايفوتك ياتركي دبي فيها مهرجانات ولاأروع..والفنادق مسوية عروض خاصة للعرسان!!!) قال تركي بصوت مسموع:ياحليلك ياعبدالرحمن تحسب كل الناس مبسوطين مثلك!!! ساعتها حست عبير بالغيظ وقامت تبكي.. ووصلوا لبيت أهلها ونزَّل شنطتها وراح وخلاها من غير مايودعها!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
أم عبير:هلا يالخفيفة ماصار لك 5 أيام من تزوجتي..وعلى طول سلمتيه نفسك بالساهل؟!! عبير:يمه أنا ماسلمته نفسي ولاشي..هو اللي شافني بعد ماطلعت من الحمام.. أم عبير:حسبي الله عليك..خربتي كل شي.. عبير(بغضب):يمه خلك واقعية!لين متى بنكذب عليه؟شي مثل هذا لايمكن يتخبى!الشمس مايغطيها غربال!! وانفجرت عبير تبكي...... أم عبير:احنا لازم نسوي شي قبل مايفضحنا هالتركي بكل محل.. عبير:يمه تصرفي بأي طريقة أنا ماأتحمل بعاده عني لحظة وحدة... أم عبير:جبتي ملابس لتركي؟؟ عبير:ايه.. وفتحت شنطتها وطلعت بيجامة تركي وناولتها أمها... عبير:يمه انتي اش تبين بملابسه؟ أم عبير:حبيبتي لازم نسوي له شي يحببه فيك ويربطه جنبك!انتي مو تقولين ماتتحملين بعاده؟؟خلاص بعد اللي بنسويه بيلزق جنبك على طول!!!!! وقامت أم عبير تنادي سيريس..ولما جت سيريس قالت أم عبير:خذي ملابس تركي وحطيهم بكيس واعطيها زوجك يوديها بسرعة ذحين حسب الاتفاق!!! وطبعاً سواق أم عبير كان هو زوج الشغالة سيريس واسمه محفوظ.. وأخذت سيريس الملابس وراحت لمحفوظ عشان يوديها لواحد ساحر ساكن في الأحياء الشعبية المتهالكة المشبوهة..البعيدة عن عيون القانون!! عبير(بدهشة):يمه..انتي بتسوين سحر لتركي؟؟؟ أم عبير:ليش؟عندك حل ثاني؟؟ عبير:لا...بس هالشي مابيضره؟؟ أم عبير:لا مايضره تطمني!إحنا بنسوي له سحر عطف مو صرف!! عبير:وش يعني؟ مافهمت؟؟ أم عبير:يعني السحر هذا بسيط بس يحببه فيك ويحن عليك ويعطف عليك..لكن الصرف هو اللي بيصرفه عن محبة أهله وناسه ويتغير عليهم وحِنا مابنسويه.... عبير(بغيظ):يمه سوي اللي تسوينه..أهم شي يرجع لي بأسرع وقت..ماأبي الناس يتشمتون ويقولون اسمهان توفقت وعبير لا!! وكان السواق خارج من البيت وصارت أم عبير تصيح عليه من الشباك: بسرعة يامحفوظ بسرعة قبل مايتصرف تركي..... وخرج السواق وركب السيارة وصار يسوق بأقوى ماعنده......لين ماقطع مسافة من الطريق وهو سايق بسرعة وقاطع الاشارة وكان فيه ولد صغير عمره مايتجاوز الست سنوات وراجع من البقالة مع أبوه ويمشي صدمه السواق وجاء شارد انتبهوا السيارات انه السواق شارد قاموا سدوا عليه الطريق فرجع بسيارته للخلف واندعس هالطفل مرة ثانية وتوفى على طول..قاموا الناس تجمهروا حول السيارة وجاء أبو الولد وفتح باب السيارة وخَرَّج السواق وجلس يضرب السواق وهو في قمة الانهيار من منظر ولده اللي مات قدام عينه ... وبلغوا الناس عن الحادث وجاء الاسعاف..ومسكت الشرطة السواق وحققوا معاه واكتشفوا انه اقامته منتهية من شهرين وماتجددت!! فصارت المسئولية كاملة على أبوعبير لأنه هو الكفيل..وراحوا الشرطة للبيت وسووا استدعاء لأبوعبير..لكن أم عبير قالت لهم انه مسافر ومابيرجع إلا بعد مدة..وطلبوا الشرطة رقم جواله وعطتهم أم عبيررقم جواله الأساسي اللي يستخدمه بالسعودية بس!!وانصرفوا الشرطة... وكان من عادة أبوعبير لما يسافرللخارج ماياخذ جواله الأساسي ويقفله..ويستخدم جوال برقم ثاني مايعرفه إلا ناس معينين... طبعاً الشغالة لما عرفت باللي صار لزوجها محفوظ انهبلت وصارت تصيح على أم عبير وتلومها ليش انها ماعطت الشرطة رقم أبوعبير الثاني؟!!! أم عبير:انتي مجنونة؟تبين أبوعبير يرجع بسرعة ويشوف المصيبة اللي بنته فيها؟؟كل ماتأخر أفضل له ولنا!! الشغالة:أنا في خوف يمكن شرطة فيه يقتل مهفوز! أم عبير:وش هالهبل اللي انتي فيه؟بيطلبون منه كفالة وأبوعبير بيدفعها!بس المصيبة لو أهل الولد طلبوا دية كبيرة!! عبير:ليش؟؟أبوي مبسوط مادياً وأكيد بيدفعها! الشغالة سيريس:بس مهفوز مافي اقامة دهين!هادا مشكلة كبير.. وقامت تبكي... أم عبير(بكل قسوة):روحي لابارك الله فيك..كأني ناقصة أحد ينكد علي!المصيبة لو زوجك فتح فمه وقال للشرطة سبب سرعته والسحر وماالسحر!ليتني ماطاوعتك ياوجه البلا!! عبير(بعصبية):هالحين وش بنسوي في سالفتي مع تركي؟؟ أم عبير:حريقة تحرقك انتي وتركي!يمديه قد قال لأهله عن كل شي!وملابسه وراحت بالسيارة!والساحر ومحد يعرفه إلا محفوظ!يعني مابيدنا شي إلا ان كان حصل معجزة!! ودخلت أم عبير غرفتها وقفلت الباب... وقعدت عبير تبكي من القهر.. ========================= وفي دبي كانت الأوضاع مختلفة اسمهان وعبدالرحمن يتنقلون من مهرجان لمهرجان حتى الحديقة المائية راحتها اسمهان وقالت:ياليتني أقدر ألعب في كل هالألعاب!! عبدالرحمن:شلون بتلعبين بالله؟؟ماتشوفين هالأجانب لابسين ملابس البحر ويطامرون ويتسبحون في الموية!!الحمدلله انا مسلمين وديننا أمرنا بالستر.. وخرجوا وصاروا رايحين جايين بين المولات والمطاعم والقرية التراثية حتى مدينة مدهش راحت اسمهان ورسمت رسومات على وجهها!!واشترت بالونات وايس كريم! وشافت مدهش وبغت تطير وتحلف الا تتصور جنبه!!ووافق عبدالرحمن بعد مافشلته وخلاها تتصور وقال:حشا..ماشي مع بنتي أنا مو مع زوجتي!!! طبعاً تركي بعد كل ماجرى له مع عبير وأمها حس نفسه ضايع وماخبر أهله بشي ولاراح لهم رجع بيته وحاول يسترخي بس ماقدر!كل ركن بالبيت يذكره بعبير!وبكلامها وتصرفاتها..ففكر انه يركب سيارته ويروح أي مكان يحاول ينسى فيه اللي صار..وصار يقول بنفسه لو أروح أجلس مع أصحابي بيقولون توك عريس وهديت العروس وجيت!!! صار راكب سيارته ويفتر من مكان لمكان لين ماأذن العشا..ودخل صلى بمسجد..وجلس بعد الصلاة يقرأ قرآن..بعدين فكر لو يستفتي الشيخ في حكاية المؤخر! وبالفعل أخذ الامام على جانب من المسجد وحكى قصته للشيخ.. الشيخ:يعني انت تبي تعرف هل يحق لك اسقاط المؤخر؟؟ تركي:ايه ياشيخ..ماتصدق قد ايش هالموضوع معذبني..المؤخر كبير جداً وأنا جيبي فاضي! الشيخ:إذا كان كلامك صحيح في انهم غشوك بمرض بنتهم ثم التشويه اللي فيها والمبالغ والعطايا اللي أخذوها منك من يوم خطبت بنتهم إلى الان..فما يحق لهم يطالبونك بأي شي..ومن حقك تطلقها وماتعطيها المؤخر..لأنك انسان تعرضت للخداع..وهم استغلوك وماحاولوا يوضحون لك عيوبها.. تركي:الله يبشرك بالخير.. ورجع بيته وهو متطمن وقرر انه ينتظر رجوع أبوعبير من السفر ثم يطلق بنته..... ============ أما أم عبير انقلبت على شغالتها اللي جلست منكَدة طول اليوم على زوجها المحبوس ومضربة عن الشغل في البيت! أم عبير:أنا موب ناقصتك ياسيريس قومي سوي شغلك أحسن لك.. سيريس:انتي لازم كلم أبوأبير عشان يجي بسرئة من سفر! أم عبير:وش رايك لو قلت لك اني موب مكلمته..وأعلى مافـ خيلك اركبيه!! سيريس:هرام مهفوز يقئد في سجن هرام..لازم يخرج! أم عبير:يستاهل ماجاه!حِنا قلنا له يودي الملابس للساحر..مو يدعس الولد بطريقه!!..وشوفي لو أدري انه فتح فمه بكلمة للشرطة عن سالفة السحر..بأطردك من بيتي شر طردة مفهوم؟!! سيريس:انتي مافي خوف من الله! أم عبير:لاعاد!!انتي اللي تخافين ربك ياصديقة السحرة..كلمة ثانية وأقص لسانك بإيدي!! عبير:يمه وش السوات بموضوعي؟ أم عبير:انتي باقي تتسائلين؟ماخلاص الفاس وقع بالراس..وسالفتك صارت على كل لسان!!! عبير:صدقيني لو انتشر الموضوع ماعاد بأطب المدرسة!! أم عبير:بالله لاتزيدين همي..خل يرجع أبوك ونشوف وش بنسوي بهالورطة.... ========== قعدت الشغالة طول الليل وهي تفكر بطريقة تورط فيها أم عبير لأنها بدت تنقلب عليها وماتبي تكلم أبوعبير يطلع زوجها من السجن..وفي الصباح خرجت سيريس من البيت وعبير وأمها نايمين ماحسوا بها وركبت ليموزين وراحت لبيت تركي لأنها كانت حافظته أيام ماكانت تروح وترتب عفش عبير.....وقررت تقول له عن نية أم عبير بإنها تسحره!! ودقت الجرس كذا مرة وفتح تركي الباب لها وهو لابس بيجاما ويتثاوب.. تركي:نعم..وش جايبك من الصبح؟تبين عفش عبير أنا بأجيبه لكم كله بعد كم يوم! سيريس:لا.. مستر فيه موضوع ضروري إنت يئرف! تركي:خير؟ سيريس:أم عبير كانت تبغى... إلا صاحب العمارة (وكان شخص أقشر ويحب المشاكل) طالع من الدرجة ولما شاف تركي واقف قدام الباب ببجامته ويتكلم مع الشغالة بصوت منخفض أخذته الوساوس وصار يناظر بتركي بنظرات شينة!! قام تركي وحس ان صاحب العمارة شاك فيه فقال تركي للشغالة:خزني رقمي عندك وكلميني بعدين ..ولاتجين هنا!! وراحت الشغالة... صاحب العمارة:ماشاء الله أمس عروستك نازلة بشنطتها من العمارة واليوم جايب لنفسك شغالة بدالها تسليك!!!! تركي:عيب عليك الكلام اللي تقوله هذا قذف بشرفي.. صاحب العمارة:أجل وشهو المنظر اللي شفته قدامي؟؟ تركي:أي منظر؟؟ صاحب العمارة:لابس بجامتك وواقف مع هالآسيوية والله أعلم هي خارجة من عندك ولا كانت داخلة وأنا خربت عليكم!!! تركي:عاد احترم نفسك زين..الكل يدري عن أخلاقي..وانت قاعد تطول لسانك علي وأنا ساكت لك! صاحب العمارة:هي كلمة ومابأثنيها خذ عفشك وبره عمارتي أنا ماأتشرف بأمثالك يسكنون عندي!! تركي:أساساً أنا طالع طالع بس موب قبل ماترد لي قيمة ايجار سنة اللي دفعته لك مقدماً! صاحب العمارة:منت شايف منه قرش!ترقم الشغالة قدامي ياللي ماتستحي وبعد تبيني أرد فلوسك؟؟اطلع والا أفضحك عند الشرطة!! تركي:ماعاش من يفضحني أنا رايح للشرطة برجليني أشتكيك عندهم! صاحب العمارة:درب يسد مايرد! وراح تركي وبدل هدومه وتوجه للشرطة وحكى لهم عن موضوعه مع صاحب العمارة اللي قذفه بشرفه ورفض يرد له فلوسه... الشرطي:وهالشغالة وش علاقتك فيها؟؟ تركي:تشتغل عند أرحامي! الشرطي:وش تبي منك؟ تركي:الصراحة علمي علمك..مامداني أكلمها كلمتين الا وصاحب العمارة طالع ويناظرني بطريقة مو زينة فخليتها تروح... واستدعوا الشرطة صاحب العمارة وحققوا معاه.. صاحب العمارة:اسأله ليش أعطى رقمه للشغالة؟؟ الشرطي:وليش عطيتها رقمك؟ تركي:عشان تكلمني في الموضوع اللي جات عشانه بدل ماتجي مرة ثانية وتوقف قدام شقتي! الشرطي:وليش ماتكلم انت أرحامك بدل ماتكلم الشغالة؟؟ تركي:بيننا مشاكل! صاحب العمارة:ترى ياحضرة الضابط ماصار له من يوم تزوج 6 أيام وزوجته شفتها بشنطتها أمس طالعة من العمارة..يمكنها درت عن سوالفه البطالية و هجت!! الشرطي:الحقيقة السالفة كلها موب داخلة مزاجي..أنا راح أستدعي الشغالة ونشوف إن كانت فعلاً شغالة أرحامك ونعرف علاقتك فيها بالضبط!!!!! عطاهم تركي العنوان وأرسلوا شرطي يطلبها وكانت الشغالة خايفة.. بس أم عبير قالت:يمكن زوجك المقرود يبي يشوفك..وبلغيه يمسك لسانه عن السالفة اياها والا بتروحون انتم الاثنين بـ عثايرها!! لما راحت سيريس للشرطة دخلت للضابط وأخذ معلومات عنها وعن المكان اللي تشتغل فيه..وبعدها سألها:تعرفين هالشخص؟؟ وأشر لها على تركي... سيريس:ايوه..هادا جوز مدام أبير اللي أنا أشتغل أند أمها.. الشرطي:ليش رحتي لبيته اليوم؟ سكتت سيريس مو عارفة اش تقول بس لما شد عليها الضابط اعترفت بالقصة كاملة والحادث اللي سواه زوجها عشان يودي ملابس تركي.. تفاجأ تركي وانصدم ولاتكلم بكلمة! والشرطي اتصل على القسم الثاني وتأكد من الحادث وسألهم عن السيارة وقالوا انهم متحفظين عليها وطلب منهم يفتشونها ويجيبون الملابس اللي فيها ولما جابوا الملابس وعرضوها على تركي... تركي:هذي ملابسي فعلاً اللي كنت لابسها قبل ماأروح للمسجد أمس!! الشرطي:يعني كلام الشغالة صحيح زوجتك أخذتها عشان تسحرك فيها! ولما استكمل الشرطي حواره مع الشغالة اكتشف انها من العمالة الوافدة اللي يدخلون للمملكة عن طريق الحج أو العمرة وبعدين يهربون لجدة وهم مايمتلكون اقامة ويشتغلون بالبيوت..وبعض العوائل تتستر عليهم ولايبلغون عنهم!!(ومعلوم للكل الجرايم والمصايب اللي تجي من ورا البعض منهم!!!) فحجزوها الشرطة وصار على أبوعبير بدل القضية قضيتين..أرسلوا الشرطة لشغل عبير شرطي يحقق مع الموظفين وياخذ رقم أبوعبير بالخارج لين ماوصلوا لرقمه واستدعوه عشان يحل القضايا اللي عليه!! .الشرطة استدعت عبير وأمها عشان يتأكدون من الموضوع واتهمهم الضابط بتهمة التستر على أشخاص ماعندهم اقامة+تواطؤهم مع الشغالة والسواق في جريمة السحر!! أم عبير:شغالتنا انسانة حاقدة..عشان كذا تبي تورطنا معاها!احنا ماندري عن أي شي؟؟؟ ومسك الضابط ملابس تركي وعرضها على عبير وأمها وقال:وهالملابس اشلون طلعت من بيت تركي لبيتكم ثم سيارتكم؟؟؟؟؟ سكتت أم عبير وماعرفت اش تقول!! وضغط الشرطي على عبير واعترفت انه أمها اللي طلبتها منها... الضابط موجه كلامه لأم عبير:أنا مقدر انه زوجك شخصية كبيرة في البلد وله سمعته وماراح أتخذ بحقكم أي خطوة إلا إذا شفته..وإذا وافق زوج بنتكم إنه يُسقط حقه!! تركي تنازل عن كل شيء وقال:ماأقول غير الله يوريني فيهم..وهو أقدر إنه ياخذلي حقي منهم! ======== اليوم الثاني وصل أبوعبير من السفر وراح مباشرة للشرطة وعرف بالقصة كاملة.. ودرى عن:اتهامه بايواء أشخاص من غير اقامة! وعن سالفة حادث السواق! وعن سجن الشغالة! وعن التحقيق مع زوجته وبنته بتهمة التواطؤ على السحر! وعن سالفة تركي بالتفصيل ونيته بتطليق عبير! وعن الدية الضخمة اللي طالبينها أهل الولد المتوفى! وبحكم واسطات أبوعبير تم اتخاذ حل وسط في حل القضايا... ولقي أبوعبير انه أمامه التزامات مادية تجاه كفالة السواق والغرامات اللي لازم يدفعها والدية وتعويض تركي بمبلغ محترم!! ورجع للبيت وهو مشحون جداً وأول مادخل كانت أم عبيرتشرب الشاي في الصالة..وعبير تتفرج على التلفزيون! دخل ومن غير سلام وسحب عبير من ملابسها وكانت لابسة فستان طويل بحبال وفوقه جاكيت وفسخ لها الجاكيت وانكشف ظهرها وانرعب أبوها من الحروق اللي فيها!!! وصاح:تغشوني ياأنذال؟؟تغشوني وأنا معاكم بنفس البيت؟؟هذي هي العمليات اللي نجحت؟؟أنا تفضحوني بين خلق الله؟؟ ليش؟وش سويت لكم؟صرفت عليكم دم قلبي!تعبت وشقيت وسافرت عشان مين؟؟موب عشانكم؟ وتاليتها تحطون راسي بالتراب وتحقق معاكم الشرطة بقضية سحر؟؟؟؟؟؟ لاخوف من الله؟لا أمانة؟لاإخلاص؟هي هذي محافظتك على البيت بغيابي ياأم عبير؟؟ وولد الناس اللي يقولون طلبتيه ذهب لك ولبنتك ودفع كل ماوراه وقدامه عشان بنتك تكافئونه بعدها بالسحر؟؟؟؟؟؟ بتظلين طول عمرك جوعانة ياأم عبير أنا اللي لقطتك من حياة الفقر اللي كنتي عايشتها مع أهلك بقرية وبيت شعبي وعزيتك ورزيتك وخليت لك قيمة ولكن للأسف ماصنتي هالشي من يوم ماخذيتك وانتي تحاولين تفرقين بيني وبين أخواني وأنا أتحمل...لكن توصل انك تنقلين غشك وكذبك لبنتك وتخلينها نسخة منك؟؟هذا اللي لايمكن أرضاه!!! يكون بعلمك كل قطعة ذهب جابها ولد الناس لك ولبنتك بأردها له..وقام أبوعبير وغصب زوجته تعطيه بطاقة الصرَّاف حقتها لأنه كان عندها مبلغ راهي بالبنك عقاباً لها ودفعه لأهل الولد اللي توفى... والذهب اللي كان عندها من أول من هدايا أبوعبير لها سحبه منها وعطاه لتركي كتعويض عن المهر اللي دفعه لعبير وهو مغشوش فيها ورد له كل الذهب اللي شراه لعبير وأمها... وصاحب العمارة اعتذر لتركي عن القذف بشرفه وسمعته ورد له ايجار سنة كاملة... وبدأ تركي ترجع له أنفاسه عقب ماعوض جزء من الخساير الكبيرة... ولما انتهى أبوعبير من المشاكل والقضايا وتطلقت عبير أخيراً..قرر أبوعبير انه يطلق زوجته لأنها خانته بكل شي وغشته ونزلت راسه بين الناس!وخلاها تروح لبيت أخوانها بالرياض!وعبير رفضت تجلس عند أبوها وأصرت تروح مع أمها...وراحت! أما اخوانها سعد وسامي جلسوا مع أبوهم بنفس البيت...والشغالة والسواق قررت الشرطة ترحلهم لبلادهم..... طبعاً في الطرف الآخر من القصة أثناء الأحداث اللي صارت لتركي كان العروسين اسمهان وعبدالرحمن مبسوطين بالفعاليات الرائعة في دبي الله يحفظ أهلها..وبعد أسبوع من جلوسهم فيها قرروا يروحون لماليزيا وكانت اجازة رائعة بمعنى الكلمة الجُزُر والفنادق والمنتجعات والطبيعة شي يفوق الوصف! اسمهان:واااااي وناسةنفسي أعيش هنا على طول ماودي أرجع!! عبدالرحمن:صحيح ان الأجواء حلوة بس بصراحة ياشين الغربة حنيت للأهل وتراب الوطن!! اسمهان:أي تراب؟بكرة بتشبع من تراب وغبار ديرتك وتقول ياليتني مارجعت!!! عبدالرحمن:صدق إنك بياعة! من يوم ماسافرنا ماشفتك اتصلتي بأهلك إلا مرتين!! اسمهان:أحسن!خلهم يشتاقون لي شوي!!قعدت بوجيههم 17 سنة تحسبهم ماملوا مني؟!!! وشوي شافت اسمهان أطفال في منتزه بماليزيا يلعبون كورة وراحت تركض وراهم وتلعب بالكورة معاهم..طالع فيها عبدالرحمن وقال بنفسه:ماتنلام ياعبدالرحمن إنت اللي صممت تتزوج وحدة صغيرة!!! ============= في الجانب الآخر أهل تركي لما دروا بكل الأحداث اللي صارت انصدموا صدمة كبيرة...وتركي نقل كل أثاثه الجديد من شقته الأولى إلى ملحق أهله اللي بالدور العلوي.... أم تركي:حسبي الله عليهم!مين كان يتوقع إنه كل هذا بيطلع منهم؟!!! سماح:مع إن اللي يشوف البنت يحس فيها لمحة براءة!غريبة طلعت تطاوع أمها بكل شي! هند:تبون الصدق؟؟أنا لاعجبتني الأم ولاالبنت من يوم ماشفتهم!حسيتهم مو مريحين أبد... أم تركي:من حظك ياولدي إنه ربي أنقذك من فعايلهم قبل ماتتوهق!بس معقول أم عبير وهي وحدة من جماعتنا وماقد سمعنا عنها شي شين..تطلع من أهل السحر؟؟؟يالطيف يارب! هند:الحقد ومايسوي يايمه!والا في أم بالدنيا ترضى تقط بنتها بحلق ولد الناس غصب؟!!صحيح ماعندها كرامة!! سماح:أنا أكثر وحدة مصدومة فيكم!ياما تكلمت عنها اسمهان وانتقدتها قدامي وكنت أعتقد انها غيرانة منها!لكن للأسف نظرة اسمهان لعبير طلعت بمحلها!! هند:وأنا أقول ليش كل المرات اللي شفناها فيها كانت تغطي جسمها كله!آثاريها ماتبي تنكشف! أم تركي:وأمها مسكتني يوم الزواج وقالت لي ان بنتها عندها عذر شرعي آثاريها ماتبيك تدخل عليها وتكشفها!!حسبي الله ونعم الوكيل فيهم! تركي:خلاص لاعاد تذكروني بسيرتهم..اللي فات مات... سماح:اسمع ياتركي أهم شي بالموضوع إنك ماتخلي هالتجربة الفاشلة تأثر عليك!إنت أقوى من كذا وأكيد ربي بيعوضك خير.. أم تركي:أنا أقول مادام زوجتك طلقتها و الملحق فوق جاهز ..ودراهم ورجعت لك من أبوعبير وصاحب العمارة والذهب لو نبيعه بيجيب لك مبلغ كبير أجل ليه ماتتوكل على بركة الله ونخطب لك غيرها! تركي:مرة ثانية يمه؟؟مستحيل!تبون بعد اللي ذقته أفكر بالزواج مرة ثانية؟؟؟؟؟ هند:وإنت اللي يسمعك يقول كل وحدة بتتزوجها بيطلع فيها عيب!هالمرة بنحسن الاختيار ومابنخطب لك أي وحدة!! تركي(بانفعال):أصلاً لو أفكر أتزوج مرة ثانية أول شرط بأشرطه على أهل العروس يطلعونها لي يوم الشوفة بـ شلحة عشان أتأكد إن مافيها عيوب!! الجميع:هههههههههههههههه الله يقطع سوالفك ياتركي.. ================== أما عبدالمجيد فأحواله ماكانت عاجبة أمه خاصةً انه اللي رفضوه كثير بسبب اصابته بالصمم والخرَس! وأحلام سافرت بعد زواج عبدالرحمن بأيام ورجعت لأمريكا.. وبعد انقضاء أسبوعين من سفر اسمهان وعبدالرحمن رجعوا لأرض الوطن سالمين... وراحوا لبيتهم وطلعت اسمهان تتروش وتبدل هدومها بعدين تنزل تسلم على أم عبدالرحمن... أما عبدالرحمن انطلق لأمه ولقيها قاعدة بروحها تقرأ كتاب... وفاجئها بحضوره.. أم عبدالرحمن:عبدالرحمن؟؟هلا هلا يمه..الحمدلله على سلامتك.. عبدالرحمن:الله يسلمك..انتي شلونك؟؟وليش قاعدة بروحك؟؟ أم عبدالرحمن:أنا بخير..وقاعدة بروحي لأن عبدالمجيد بدوامه وعبدالرحيم سافرلشغله وأحلام رجعت مع زوجها لأمريكا..انت شلونك وشلون اسمهان؟؟ عبدالرحمن:بأتم حال ولله الحمد..واسمهان طلعت تبدل هدومها ونازلة بعد شوي.. وجلس عبدالرحمن يتكلم مع أمه عن الرحلة الممتعة اللي قضاها بره ويفرجها على صور الرحلة والطبيعة الخلاَّبة.. ونزلت اسمهان وسلمت على أم زوجها وتبادلوا السوالف المختلفة.. عبدالرحمن:يمه إحنا نفكر بكرة نروح لمكة نعتمر ونجلس 3 أيام فيها..وش رايك ترافقينا؟؟ أم عبدالرحمن:رافقتكم السلامة ان شاء الله..أنا رجولي من يوم الزواج وهي تاعبتني وماأقدر أروح معاكم..بس انتم اش معجلكم؟؟ارتاحوا يومين بعد هالرحلة اللي سويتوها وبعدين روحوا مكة! عبدالرحمن:سبحان الله!يعني يوم سافرنا للخارج نتمشى ونفرفش كان فينا حيل!ويوم بنجي للعبادة وزيارة الحرم..تقولين اش معجلكم؟ ارتاحوا؟!!!! أم عبدالرحمن:ماقصدت ياولدي!بس القصد ان اجازتك طويلة وباقي قدامك وقت ليش متعجل تروح مكة الحين؟ عبدالرحمن:أي طويلة يايمه؟أنا أخذت أسبوع قبل العرس وقضيت أسبوعين في السفر ومابقالي الا هالأسبوع ويبدأ الشغل.. أم عبدالرحمن:بترجع لدوامك؟ياحليلك يااسمهان انتي اجازتك طويلة باقي شهرين يمكن لين ماتفتح المدارس!! اسمهان(وهي تنكت):مايهم ياخالتي بآخذك ونقضي شهر بماليزيا والشهر الثاني نقضيه بأمريكا عند أحلام!!هههههه أم عبدالرحمن:هههههه..الا على طاري أحلام عندي لكم خبر ان شاء الله يفرحكم.. عبدالرحمن:وشهو ياترى؟ أم عبدالرحمن:انتهت رسالة زوجها مال الماجستير اللي كان يحضرها وباقي له شهر ويرجع..وبيجون يسكنون بجدة!! عبدالرحمن:أبركها من ساعة.. ياشين الغربة والله..وبالذات في أمريكا كل ماكنا نسمع بأحداث تصير للجاليات كنا نحط أيادينا على قلوبنا ونكلم أحلام نتطمن عليها! أم عبدالرحمن:والله يجزاها خير ماسافرت من هنا إلا وهي مصممة تاخذ تقارير زوج خالتك جوهرة وتعرضها على بروفيسور متخصص يشوف حالته..ومامر 10 أيام من أخذتها إلا وهي متصلة فيني البارح تبشرني إن الدكتور قال لها فيه نسبة أمل إن زوج خالتك يتحسن بنسبة 60%!!! وخالتك وزوجها طايرين من الفرحة وبإذن الله بيسافرون خلال هالأسبوع.. عبدالرحمن:ماشاء الله تبارك الله كل هالأحداث صارت بغيابنا؟الله يوفقهم ويشفي زوج خالتي.. اسمهان:ياحليلها أبلة جوهرة تستاهل كل خير,, أم عبدالرحمن:أبلة جوهرة هناك بالمدرسة!في البيت اسمها خالة جوهرة!ههههه اسمهان وعبدالرحمن:ههههههه! طبعاً بعد مااسمهان وعبدالرحمن تغدوا عند أم عبدالرحمن...طلعوا شقتهم يرتاحون..إلا أهل اسمهان اتصلوا فيها ولما عرفوا انها رجعت بالسلامة عزموها هي وزوجها على العشا... وفي الليل قامت اسمهان تتكشخ وتتضبط وراحت لأهلها واستقبلوها بالترحيب.. أم اسمهان:أسفرت وأنورت واستهلت وأمطرت..ياهلا بالقاطعة اللي مارفعت علينا السماعة بالأسبوعين إلا مرتين!!! أسماء:توفر على العريس الفواتير يمه! اسمهان:إلا امتحن غلاتي عندكم وأشوف اش كثر مشتاقين لي.. وجلسوا... ابتسام:ماشاء الله كل اللي غبتيه أسبوعين بس دبدبتي!شكلك أقل شي زايدة كيلوين ثلاث! أسماء:وافشيلتاه!!يعني يوم كنتي ببيت أبوك يالسمهونة كنتي محافظة على رشاقتك! وبس رحتي عند زوجك قمتي تلغين من كل شي هالحين الرجَّال وش بيقول عنك؟ماشافت خير؟؟ اسمهان:تصدقون عاد إني فعلاً لاحظت زيادة وزني بالملابس!بس اش أسوي كل ماشفت محل آيس كريم هفني الشوق ورحت وشريت!! ابتسام:يعني استانستوا بهاالسفرة؟؟ اسمهان:بالحيــــــــــــل.. تصدقون ماكان ودي أرجع مهرجانات وفعاليات تجنن..ولا الطبيعة بماليزيا شي ولافي الأحلام!جُزُر خيالية وخضار يشرح القلب.. أم اسمهان:ماشاء الله.. الله يهنيكم..صدق إن الدنيا حظوظ..انتم مبسوطين ومرتاحين وتركي الله يخلف عليه ويعوضه خير!! اسمهان(بفضول):ليش اشفيه تركي؟عبدالرحمن اتصل فيه كذا مرة بس إنه مايرد عليه مدري اش سالفته؟!!! قاموا أهل اسمهان وحكوا لها كل قصة عبير مع تركي... وتأثرت اسمهان...وقالت:اش هذا أنا مو مصدقة اللي قاعدة أسمعه!كل هالبلاوي صارت بأسبوعين بس؟؟ أسماء:الصراحة ماندري من اللي لازم ينلام بهالقصة!نلوم الأهل يوم ماأحسنوا الاختيار؟..ولا نلوم تركي يوم انه عطاهم وجه من البداية لين مانهبوه؟ولا نلوم هالأم اللي ماتعرف تربي نفسها وتربي بنتها؟ولا نلوم البنت اللي ماتعرف مصلحتها؟الحمدلله اللي فكه منهم بس!! اسمهان:عشان تصدقوني !أنا من بداية هالخطبة وأنا مو مرتاحة..وقلتها من البداية عبير ماتستحق تركي..بس مدري اش كان مطيح سماح وأهلها عندهم أخاف مسحورين هم بعد؟؟ ابتسام:برَّد قلبي أبوعبير فيهم أخذ كل اللي وراهم وقدامهم وخرجوا من البيت بشناط الهدوم بس وراحوا لخوالهم بالرياض!قليعة! اسمهان:الله يبشرك بالخير!يعني عبير مابتدرس معانا ثالث ثانوي!فكه منها!!! أم اسمهان:يابناتي حِنا مانتكلم بهالقصة عشان نتشمت بالناس!استغفروا الله بس..أنا موب كاسر خاطري إلا تركي اللي انغش فيهم وحتى أم تركي كانت تحكي لي القصة وهي تبكي مو مصدقة ان ولدها ماطاله السحر!سبحان الله كيف بهاالدنيا ناس ممكن ننغش بظاهرهم..وباطنهم يخبي المصايب... اسمهان:بس أنا في شغلة موب داخلة مزاجي!أنا قد شفت جسم عبير المحروق واتصلت أقول لسماح وهي صدتني وقالت انهم عارفين وراضيين!!معقول هم كانوا يدرون ومخبيين على تركي؟؟في هالحالة هم اللي غشوا ولدهم بصراحة!! قاموا الجميع يقولون لاسمهان مافهمناك..وحكت لهم اسمهان قصة عبير أيام الاختبارات...الخ أسماء:فعلاً شي غريب ومحير!! ودق الجرس.. قالت أم اسمهان:هذيل أكيد محمد وسماح الله يرضى عليكم لاأحد يفتح الموضوع قدام سماح أكيد بتتضايق..إن فتحت هي الموضوع من نفسها بكيفها.. بس انتوا لاتسبقونها بالسؤال!!! ودخل محمد يسلم على عبدالرحمن وبعدين جاء يسلم على اسمهان... محمد:هلا وغلا بسمهونتنا هلا وغلا والله..واشفيك يابنت انفقعتي انتي وعريسك؟!السعودية مافيها أكل يعني؟؟تقولون سافروا عشان يحشون كروشهم ورجعوا؟؟؟ سماح:هذي الراحة النفسية وماأدراك وش هي الراحة النفسية!!! محمد:عاد من الضغوط اللي كانت تشوفها عندنا!!طول الوقت نوم... وأكل ومرعى وقلة صنعه!! سماح:بسم الله عليك واضح انك مبسوطة..كيف السفر حلو؟؟ اسمهان:يهبل! محمد:تصدقون؟قعدت أحلف على سماح ليل ونهار نسافر ونستانس وهي مصرة ماتقضي الاجازة إلا بخرخير!!!وجه فقر وش تقولون بس؟ ابتسام:وخرخير هذي وين موقعها بالخارطة؟؟ محمد: مدري بس ان كان عرفتي علميني الجميع:ههههههههههه سماح:الله أكبر ياالبكش مكة جنب إذني وماأروح لها إلا بالسنة مرة اسمهان:على طاري مكة أنا رايحة أعتمر بكرة وبنجلس هناك 3 أيام تخاووني؟؟؟ أسماء:عاد عروس وتقول خاووني؟هذي كثري منها!!!! أم اسمهان:تروحون وترجعون بالسلامة يابنتي..وعسى الله يتقبل منكم ان شاء الله.. ودخل أبواسمهان وسلم على بنته وقعد ينكت معاها ويضحك.. اسمهان(وبكل سذاجة):وشفيك يبه صرت تحبني مرة؟؟عشاني طلعت من البيت؟ ابتسام:أول كنتي لابده على قلبه !وهالحين صرتي ضيفة!يعني وضعك اختلف!! أبواسمهان:هههه..وش هالهرج يابنت..إن كنت أحبك صاع فالحين أحبك صاعين!!إنتي آخر العنقود ومايثمن قيمتك إلا من فقدك!!بس شلون عريسك معك ان شاء الله مبسوطة؟؟؟ اسمهان:تصدقون إن العيشة معاه أحسن من عيشتي معاكم بمية مرة؟؟؟؟؟ أسماء:أتمنى إنك ماتتراجعين عن كلامك عقب خمس سنين!!!! أبواسمهان:ههههه..منتي صاحية ياذي البنت!مثل القطاوى تاكلين وتنكرين!! رجع محمد وأبوه للجلوس بمجلس الرجال مع أزواج البنات(اسمهان وأسماء وابتسام).... وكملوا الحريم سوالفهم.... اسمهان:اش هذا ياأسماء؟ تصدقين كنت متوقعة يوم أرجع من السفر ألقاك ولدتي؟! اسماء:الود ودي أولد اليوم قبل بكرة من التعب اللي فيني..بس لسه قدامي كم أسبوع! في هذي الأثناء دق جوال سماح وردت:هلا تركي.. تركي:هلا فيك..وينك صار لي ساعة واقف قدام بابكم أدق الجرس وماتفتحون؟؟ سماح:أنا معزومة للعشاء عند أهل زوجي..بغيت شي ضروري؟؟ تركي:أبد كنت زهقان مرة قلت أجي أزورك وأدردش معك..وكنت شاري لأولادك ألعاب بغيتهم يستانسون عليها! سماح:ماأنحرم منك ياأخوي..تعال بكرة.. تركي:لا تعالي انتي خل نتقابل عند الوالدة.. سماح:على خير ان شاء الله.. تركي:في أمان الله.. وصكت الجوال... قامت اسمهان تطالع بسماح.. سماح:هذا تركي فديته كان زهقان ومر علي ومالقاني! اسمهان(باستهبال):ليش؟وين زوجته؟مامداه يزهق!! سماح:ليش؟مادريتي إنه طلقها؟ اسمهان(بحركة تمثيلية طقت يدها على صدرها)وقالت:أعوذ بالله!مامداهم يتهنون ببعض!اش اللي صار بس؟ سماح:من يوم ماسافرتوا صارت أحداث كثيرة.. وحكت سماح السالفة كاملة لاسمهان أما ابتسام وأسماء كانوا مع أمهم بالمطبخ يسوون السلطات.. اسمهان:أنا بصراحة مو فاهمتكم شلون متفاجئين من التشويه اللي بعبير مع إني اتصلت مخصوص عشان أنبهك وانتي قلتي لي انكم عارفين وراضيين؟؟ سماح:متى اتصلتي؟ وظلت اسمهان تذكرها بالسالفة لين ماقالت سماح:ايه تذكرت بس قسماً إني ماكنت أدري انك تقصدين الحرق كنت أحسبك متصلة تكلميني عن مرضها بالسكري وقلت لك اننا عارفين!!! ياشين العجلة اللي فيني ليتني سمعتك للنهاية كان اللي صار ماصار!!!! اسمهان:لاتتندمين على مافات..هذا نصيبه معاها وبعدين الحمدلله انه لحق نفسه وماطاح بمكيدتهم..وبكرة ان شاء الله ربي يعوضه باللي أحسن منها!! سماح:ليته بس يوافق يتزوج..كان أخطب له اليوم قبل بكرة..بس مو راضي..... المهم مرت الليلة على خير وكانت كلها ضحك ووناسة...وبعدها رجعت اسمهان لبيتها وحكت لعبدالرحمن عن كل اللي صار.... عبدالرحمن:يالطيف يارب..وش اللي قاعد أسمعه؟كل هذا يصير لتركي وأنا موب داري؟؟وأنا أقول اشفيه كل مااتصلت فيه مايرد علي!!!!! اسمهان:كنت أقول لك دايماً عبير ماهي زينة وماأحبها وتتضايق مني!شوف تاليتها وش سوت مع ولد الناس؟!!!!!! عبدالرحمن:تصدقين اني كنت ملاحظ عليه واحنا بالفندق انه مو مرتاح؟كسر خاطري حيل..بكرة لازم أكلمه وأقابله بمكان.. وناموا العروسين.... وثاني يوم كانت الخالة جوهرة رايحة للمطار ومرت على أم عبدالرحمن وودعتها هي واسمهان وعبدالرحمن... واتصل عبدالرحمن على تركي وعزمه بمطعم وجلسوا يتبادلون السوالف...وحكى تركي قصته بالمختصر لعبدالرحمن... عبدالرحمن:وياترى اش استفدت من هذه التجربة؟ تركي:استفدت اني ماأثق بمخلوق حتى بنفسي!! عبدالرحمن:لا ماعجبني منك هالتشاؤم!إنت انسان مؤمن وحظك أحسن من غيرك..غيرك السحر أهلكه ودمر حياته..لكن انت برحمة..وبالعكس التجارب الفاشلة تعطينا دَفعة معنوية قوية لتطوير ذاتنا وخوض التجربة مرة ثانية بروح معنوية عالية وفيها نوع من المغامرة والحماس مع طموح للوصول للأفضل...وبحسب مافهمت من كلامك إنه أم زوجتك كانت السبب بكل شي يعني الذنب الواقع عليها أبسط من الذنب الواقع على أمها..والتربية الفاشلة اللي ماخلت هذي البنت تتقبل نفسها بالأول هي السبب اللي خلاها تخاف وتكذب على المجتمع لأنها تتوقع انه مابيتقبلها.. تركي:لاتحاول تأثر علي ياعبدالرحمن حتى لو اني تغاضيت عن عيوبها وضغطت على نفسي وتقبلتها تتوقع انه أمها بتتركنا في حالنا؟؟؟مستحيل!بعدين الحياة اللي تبدأ بكذب وغش ونصب من وين ينكتب لها النجاح والسعادة؟؟ عبدالرحمن:أنا كل اللي أبي أوصله لك..إنك لازم تكون أقوى..صحيح انك تعرضت للخيانة بس صدقني فيه ناس كثير من حولنا تجرعوا مرارة الخيانة بصور ثانية الله يجيرك منها بس هذا مامنعهم انهم يواصلون حياتهم بكل اصرار وتفاؤل...وأنا عندي ثقة بإنك بتكون أقوى من كل الظروف وتحاول تعيد التجربة بس بنظرة أعمق.ويمر عليك بكرة وانت تتذكر هذي الأحداث مثل سحابة غايمة و مرت!! وبإذن الله ربي مابيخيب لك رجا.... تركي:الله يسعدك ياعبدالرحمن..ماتتوقع وش كثر كلامك ريحني..وأنا من يوم ماصار اللي صار ماأسمع إلا دعاوي أهلي على أهل زوجتي..بس ماحسيت إنه في أحد حاول فعلاً انه يسهل الموضوع بعيني مثلك! ودار بينهم حوار انتهى باستئذان عبدالرحمن من تركي لأنه قبل المغرب ناوي يروح للعمرة مع اسمهان..... تركي:الله يوفقكم ويتقبل أعمالكم وعباداتكم..تدري لو عندك أخت؟كنت بأخطبها منك من غير تردد!! عبدالرحمن:هههه..بنات الحلال واجد بس إنت توكل على الله وإعزم أمرك... وتوادعوا الصديقين...ورجع عبدالرحمن لبيته.... ============= راحوا اسمهان وعبدالرحمن للعمرة وهم بالطواف اسمهان طقها الحماس وضاعت من عبدالرحمن وسط الزحمة وقعدت تبكي مثل البزران!!لين ماقابلت شرطي حول الكعبة وقالت:وديني لزوجي الله يخليك!! الشرطي:ومنهو زوجك؟؟ اسمهان:زوجي عبدالرحمن.. الشرطي:ماشاء الله لهاالدرجة هو مشهور؟؟أقصد كيف شكله؟وش لابس؟؟ اسمهان(وهي معصبة):يعني شلون بيكون شكله؟رجَّال وبشنبات!!وش بيلبس؟؟واحد معتمر وش تتوقع منه بيلبس؟عباة؟؟لابس ملابس الاحرام؟؟ الشرطي:لاحول ولاقوة إلا بالله ووين ضيعتيه؟؟ اسمهان:حول الكعبة وحِنا نطوف! الشرطي:ياأختي هذي الكعبة وزوجك مداه جالس يطوف..أنا أقول بدل ماتضيعين وقتك وانتي واقفة كملي طوافك ولاانتهيتي بتلاقينه واقف ينتظرك ان شاء الله! اسمهان(وهي تبكي):تهقى؟؟ الشرطي:استغفر الله!!أروح أكمل شغلي أحسن! وكملت اسمهان طوافها وهي تدعي ان عبدالرحمن يرجع لها!!! وبعد ماانتهت من الطواف لقيت عبدالرحمن واقف عند صحن الكعبة ينتظرها ويوم لقاها صاحت فيه:وينك إنت؟ليش ضعت مني؟؟ عبدالرحمن:آسف ياماما!!الحين من اللي ضيع الثاني؟؟أنا مو وصيتك تمسكين يدي؟! اسمهان:وش أسوي ؟الحرمة الدبة اللي وراي دفتني على شلة هنود صكوا راسي بريحتهم!ماعدت أدري من وين أروح ولاوين أجي!! عبدالرحمن:استغفرك يارب..امشي بس نروح نسعى ولاتسبين في خلق الله وحِنا ببيته! وراحت اسمهان تسعى وكل مامشت شوي وقفت تشرب موية وتجلس دقايق ثم تقوم تكمل!! عبدالرحمن:اشفيك الله يهديك؟بطريقتك هذي ماراح نكمل عمرتنا إلا بكرة!! اسمهان:رجولي توجعني مافيني حيل أمشي! عبدالرحمن:معليش..تحملي هالثلاث أشواط وبعدها نرجع الفندق وارتاحي مثل ماتبين!! بس أختنا في الله مامداها تكمل شوط إلا وتصيح بذاك الصوت!! عبدالرحمن:الله يصلحك فشلتينا اسكتي!وشفيك؟؟ اسمهان(وهي تتألم):آآآآآي يارجلي!ساقي فيها شد عضلي مو قادرة موقادرة أمشي ردني الفندق!!! عبدالرحمن:ماشاء الله عليك!على بالك المسألة لعبة قدامنا شوطين لسه وماانتهينا!شلون نرجع الفندق؟؟ اسمهان:مو مشكلة..بكرة نرجع ونكمل الشوطين اللي بقت!!!!! عبدالرحمن:استغفر الله..أشك إنك قد اعتمرتي بحياتك!!! اسمهان:حرام عليك ياما اعتمرت مع أهلي بس إني كنت أحط توقيت بين الطواف والسعي..وبعد كل شوط أجلس شوي وأشرب قهوة وموية وبعدين أكمل!!!! عبدالرحمن:زين اقعدي هنا ولاتتحركين وأنا بآخذ شوط وأرجع لك يمكن تتحسن رجلك شوي وتقومين تكملين عمرتك! وكان منظر اسمهان يضحك قاعدة على الجلسات اللي في المسعى ومادة ساقها ولافة عليه العباية! وجلست جنبها وحدة أندونيسية جاية تعتمر وقامت تدردش معاها وسألتها عن رِجلها وقالت اسمهان:مرة تإلمني ومو قادرة أمشي عليها! الأندونيسية:مدام أنا في سوي مساج ممتاز..تبقى انتي مساج؟! اسمهان:ايه أبقى!أقصد أبغى! ومدت اسمهان ساقها وجلست الاندونيسية عند رجولها ودخلت يدينها من تحت العبات وقامت تمسج اسمهان واسمهان تتألم وتسوي حركات بيدها من الألم..الا عبدالرحمن انتبه للمنظر وهو يسعى وصار يتلفت حوله من الفشلة!!!! وجاء عند اسمهان وبعصبية قال:وش هالمسخرة؟ تخلين الحرمة تدلكك قدام الناس لاحيا ولامستحى؟؟؟ والتفت للأندونيسية وقال:يلا حجة قومي..وشكراً مانبي مساج! الأندونيسية:هات فلوس أول!!! عبدالرحمن:بعد؟؟؟!!السالفة مو لوجه الله!!وكم تبين؟؟ الأندونيسية:واهد رِجل 50 ريال!اتنين رِجِل 100 ريال!! عبدالرحمن:لا ياشيخة! ماعندك تخفيضات؟احنا بوسط الحرم! الأندونيسية:مافي تخفيض!التسئيرة هنا وبره كله سوى سوى!! اسمهان:هيا عاد لاتغشينا!ماسويتي لي إلا رجل وحدة..خذي خمسين وتوكلي!! وعطاها عبدالرحمن حسابها وقال:هاه؟شلون ساقك بعد المساج؟؟ اسمهان:الله ياخذها هالحرمة زادت رجلي على مابها من وجع وسدت خشومي بريحة الفيكس! عبدالرحمن:يعني الخمسين راحت بلاش؟!!الله يعوض عليك ياعبدالرحمن!اسمعي مالك إلا تكملين الشوطين على كرسي متحرك! اسمهان:ياسلاااام؟والناس اش يقولون علي؟جدتك؟؟ عبدالرحمن:تكفين ياشيخة؟؟ الناس ماعندهم سالفة بالحرم إلا اسمهان!!!وليش ماخفتي على بريستيجك يخرب وانتي مادة السيقان تدهنهم هالأندونيسية!!! وركبت اسمهان على الكرسي المتحرك ودفها عبدالرحمن..لين ماانتهوا.. وعقبها سألها:هاه؟بشري؟شلونك الحين؟؟؟ اسمهان:ياااااي وناسة تخيلت نفسي راكبة بالملاهي!! عبدالرحمن:استغفرك وأتوب إليك يارب..أنا أشهد إن هاالعمرة يبي لها إعادة!!!!! وطبعاً بعد هالعمرة التاريخية راحوا عبدالرحمن واسمهان يقصون شعورهم..وقصت اسمهان أطراف شعرها... عبدالرحمن:اسمعي بأوديك الفندق وبأروح للحلاق أحلق شعري.. اسمهان:ياويلك تخلي راسك أصمع!وجهك من غير لحية وشنب ويالله تقبلته!تبيني أتحمل راسك من غير شعر؟!!هذا اللي ناقص! عبدالرحمن:وأحد قايل لك اني بأحلقه على الصفر؟! ووصلها الفندق وراح يحلق راسه.. ودخلت الفندق وكان فخم جداً ودخلت لدورة المياه واستحمت..بس رجلها آلمتها بزيادة وانشدت عضلاتها أكثر من أول وصارت ماسكة رجلها وتبكي!! لما رجع عبدالرحمن لقيها متمددة على الكنبة والدموع أربع أربع!! عبدالرحمن:خير ان شاء الله؟؟أحد من أهلك صاير له شي؟؟ اسمهان:لا... عبدالرحمن:متضايقة؟ودك نرجع؟ اسمهان:لا.. عبدالرحمن:أجل اشفيك؟علميني؟ اسمهان(وهي تبكي):ساقي توجعني!!!!! عبدالرحمن:خرعتيني!سلامات ماتشوفين شر ان شاء الله!أخاف فيكس الأندونيسية ذاك فيه بلا وزاد الطين بله!!! ودخل عبدالرحمن يتحمم... ولما خرج مازالت اسمهان قاعدة على حالها تدمع! عبدالرحمن:ماجعتي؟؟أنا عن نفسي ميت من الجوع! اسمهان(تبكي)!!! عبدالرحمن:لااااااا شكلنا مابنتعشى اليوم!تبيني أوديك المستشفى؟؟ اسمهان:إيه ..وقامت تهز راسها..! عبدالرحمن:أمرنا لله.. ولبس ثوبه ونزَّل اسمهان معاه وفقعت مرارته لين ماخرجت من الفندق تمشي خطوه خطوه!!! ركبوا السيارة وقعدوا يفترون بسيارتهم لين لقوا مستشفى وأول مادخلوا المستشفى كانت الأجواء باردة جداً من التكييف المركزي!! ودخلت اسمهان على الدكتورة وبعد مافحصتها عطتها إبرة مسكنة ووصفت لهادواء ومرهم للعضلات ومشد تلبسه على الساق.. لما رجعوا الفندق..بدت بوادر المرض تظهر على عبدالرحمن بما إنه استحم وخرج مباشرة للمستشفى اللي مكيفها بارد!! يعطس وظهره يألمه! طلبوا عشاء من الفندق وتعشوا وناموا من التعب.. وبوسط الليل صحي عبدالرحمن يشتكي من ظهره!وقامت اسمهان تشوفه وانشدت ساقها!! وصاروا الاثنين على قولة القايل ماأخس من زيد إلا عبيد!! وعلى صلاة الفجر..صحي عبدالرحمن وقال:ماني قادر أروح أصلي بالحرم تعبان ظهري حيل شلون بأركع وأسجد؟! اسمهان(على نياتها قالت):صلي وانت نايم! عبدالرحمن:بالله لاتفتين!ثقافتك الدينية خرطي!ويبي لك اعادة تأهيل!!بأحاول أصلي وأنا جالس! وقامت تصلي ماقدرت فـ صلت مع عبدالرحمن وهي جالسه!! بعد ماانتهوا من الصلاة التفت عبدالرحمن لها وقال:تخيلي لو عشنا لـ سن الشيخوخة وصار هذا حالنا؟! اسمهان:تكلم عن نفسك ياحبيبي إنت شيخوخ!!أنا بأظل بشيبوبتي لآخر يوم بعمري!!! عبدالرحمن:واش شيخوخ هذي بعد؟؟؟أخت شيبوب؟؟ اسمهان:لا يافصيح!شيخوخ يعني شايب كبير..وشيبوبة يعني بأظل شابة على طول!! عبدالرحمن:لاحول ولاقوة الابالله!أما انتي عليك ثقافة يغار منها العدو ياشيخة !أنا من يوم ماقريت موضوعاتك عن الأباط والأكواع والركب السوداء وأنا غاسل إيدي منك!!!! اسمهان:الثقافة خليناها لك ياأبو تقوقع وتمحور وبوتقة!قال ثورة قلم قال!! عبدالرحمن:فديت الزعل واللي يزعلون!تراني أحب ألعب بأعصابك شوي!وعاجبتني مثل ماإنتي..ماأتمنى يجي يوم وتتثقفين فيه!!خلك على طبيعتك أحلى!!! اسمهان:طيب يادحوم!بكرة أتخرج من الثانوي وأحط الشهادة بعينك!! عبدالرحمن:ههههه لو العلم بالشهادات كان أنا أحسن الناس!مافي دورة ولادبلوم بالبلد إلا وأخذته... وجلسوا العريسين يتمازحون ويتضاحكون لين ماجاء موعد الفطور اتصل عبدالرحمن على المطعم وطلب منهم الفطور وقالوا له:عفواً بأي غرفة حضرتك؟؟ عبدالرحمن:بغرفة المكسحين!! فطروا العرسان وطقوها نومة لين الظهر.... صحت اسمهان وحست نفسها بخير..بس عبدالرحمن مازال ظهره ثاير عليه! وقامت اسمهان تقلب بالكتيب الخاص بالفندق ولقيت انه النادي الصحي الملحق بالفندق يوفر جلسات مساج وتدليك.. اسمهان:أنا أقترح عليك تروح للنادي الصحي الخاص بالفندق ترى مع التدليك أتوقع إنك بتتحسن عبدالرحمن:مافيني حيل أتحرك. وشلون تبيني أطلع من الغرفة على نقَّالة؟؟؟ اسمهان:طيب نروح الحرم نصلي الظهر؟ عبدالرحمن:ياليت بس شلون؟مو قادر أقوم؟ اسمهان:عادي الدنيا سلف و دين أمس دفيتني على الكرسي المتحرك واليوم أنا بأدفك عليه!! عبدالرحمن:للأسف شكلي بأصلي في الفندق! اسمهان:ياسلام!الحرم جنب إذني و ساحته أشوفها من هنا وإنت تبيني أصلي في الفندق!! عبدالرحمن: وانتي يوم شفتي بنفسك عافية قمتي تتكبرين علي؟؟طيب والحل؟ ماتشوفيني شلون مو قادر أركع ولاأسجد وظهري متصلب؟ اسمهان:الحل إني أروح لحالي وأصلي بالحرم! عبدالرحمن:الله يقويك!بس بتعرفين تتصرفين لحالك؟؟ اسمهان:وليش لا؟أنا قدها وقدود! وراحت اسمهان تتجهز وتتوضأ وأخذت مفتاح الغرفة وخرجت! ودخلت للحرم لين وقفت في ساحة الكعبة وصلَّت..وبعد ماانتهت قامت تمشي شوي وطلعت ونزلت ونزلت وطلعت تدور الباب اللي دخلت منه!ووصلت للمسعى وقامت تحوس تدور باب! وكل ماشافت مجموعة حريم مشت وراهم لعل وعسى يكونون طالعين من الحرم وتلحقهم!لكن ناس كانوا متوجهين للمسعى يكملون عمرتهم وناس رايحين فوق للسطح!وناس رايحين لدورات المياه! رجعت جلست في المكان اللي صلَّت فيه قدام الكعبة وقعدت تبكي!(ماودها تتصل بعبدالرحمن وتتفشل!+انه متكسر وطايح مابيقدر يجيها!!) وسمعتها أخت ملتزمة وهي تبكي وتنتفض من الخوف.. الأخت الملتزمة:جديدة عهد بـ توبة؟ ناظرتها اسمهان ولاردت عليها! الأخت الملتزمة:من نعم الرحمن عليك أن كتب لك عمر جديد تُكَفِرِين به عن ذنوبك الماضية! اسمهان:بس أنا ماأذنبت! الأخت الملتزمة:هذا حال الانسان يذنب الذنب ويغالط نفسه وهذا من تلبيس ابليس!مادمتي في بيت الله فاستغلي هذي الفرصة وتوبي إليه فلربما قبل توبتك! اسمهان(وهي تبكي):أتوب من إيش خليني بحالي! الأخت الملتزمة:أسمع في صوتك نبرة الندم ومادام رجعتي لله بالندم على مافات فبإذن الله مايخيب لك ظن..ولكن الزمي الاستغفار والدعاء.. اسمهان:حرام عليك أنا مضيعة الباب!! الأخت الملتزمة:باب التوبة مفتوح مالم تغرغري! اسمهان(وهي مو فاهمة):أوعدك ماأغرغر!بس باب التوبة من أي صوب؟! الأخت الملتزمة:انضمي لمجموعتنا وانتي راح تفهمين كل ماأشكل عليك..وبإذن الله بتلاقين في كلامنا جواب لكل سؤال يجي ببالك رعاكِ الله.... وقامت اسمهان معاها وراحت تمشي وخرجوا من عند الكعبة ودخلوا بالداخل ولقيت اسمهان مجموعة حريم جالسين ويقرأون قرآن.. مسكت الأخت الملتزمة اسمهان من يدها وقالت للأخوات الثانيات تعرفهم بها:هذي تائبة جديدة إدعوا لها بالثبات!! الأخوات:نسأل الله أن يثبتك على طريق الحق .. وجلست الأخت الملتزمة وفتحت كتاب وقالت:الدرس الخامس! اسمهان:حسبي الله..أقول لك مضيعة الباب تجين تعطيني درس؟أنا صدق هبلة!بس مو لدرجة إنك تشرحين لي درس عن موقع الباب!تدرين؟بأروح أكتشف الموقع بنفسي!!قبل لايخانقني زوجي ويقول ليش تأخرتي!!! الأخت الملتزمة قامت تضحك لأنها توها تستوعب الموضوع!!!! الأخوات:خير ان شاء الله؟؟ الأخت الملتزمة:انسوا الموضوع شكلي أنا اللي مضيعة!! ========== خرجت اسمهان أخيراً للساحة الخارجية وتعبت من الحر والشمس!الفنادق متشابهة وماعرفت لأي فندق تروح قامت تدور وكان فيه عجوز جالسة وحاطة قهوتها وتشرب ولاحظت إن اسمهان ضايعة..فنادتها..وقالت لها:اجلسي معي.. ومن التعب جلست! صبت لها قهوة وقدمت لها تمر وقعدت تاكل... قالت العجوز وكانت ملقوفة شوي:شكلك مضيعة أهلك يابنية! اسمهان:لا أنا ماجيت مع هلي! العجوز:أجل من جيتي معه؟ اسمهان:مع زوجي! العجوز:وينه زوجك؟ضيعتيه؟ اسمهان:لا ماجاء معي!منسدح بالفندق! العجوز:مالت عليه من رجال يرسل زوجته تصلي وهو يتقلب تحت المكيفات!! اسمهان:اش أسوي فيه؟تعبان ومايقدر يقوم! العجوز:ياوجه الله!!مشلول؟؟ اسمهان:لاااا يوووه بسم الله على زوجي!بس تعبان شوي! العجوز:ووين بزرانك؟ اسمهان:ماخلفت بعد! العجوز:وماأعرس عليك بعد؟؟ اسمهان:يووووه الله لايقَدِّر!! العجوز:وش يبي فيك؟عصلة مصلة وماتجيبين عيال؟!!! اسمهان:خذي قهوتك ماأبيها..إلا أنا وش اللي أبيه فيك عشان أقعد معاك؟!!!! وطبعاً عبدالرحمن يبي يتصل فيها ومو قادر الجوال بعيد وظهره يآلمه بشدة.. قامت اسمهان تمشي عند الفنادق اللي مطلة على الحرم ودخلت في واحد منها واكتشفت انه مجمع تجاري وفيه أسواق وانشكحت من الفرحة وقالت بنفسها:واااااااو كشخة يااسمهان أول مرة في حياتك بتروحين السوق لحالك من غير مايغثك أحد! وصارت تتمشى ومحفظتها عامرة وش عليها؟وشافت محل أطفال ودخلت وجابت هدايا للمولود الجاي اللي ببطن أسماء وهدايا لبنات وعيال أخواتها وأخوها... ومرت من جنب محل يبيع بخور وعودة واشترت لأبوها صندوق فيه تولات عودة وبخور ومسبحة ولأمها صندوق فيه بخور ومستكة ومبخرة ومصحف.. واشترت لسماح وابتسام عطورات وماكياج من محل ثاني.. وهي مارة من جنب محل جلابيات قالت لنفسها:ليش ماآخذ لأم عبدالرحمن وحدة؟؟ بس رجعت قالت لنفسها:أم عبدالرحمن مودرن شوي..يمكن مابتلبسها!!خل آخذ لها شوية أغراض للمطبخ!! واشترت لعبدالرحمن أشرطة محاضرات من محل التسجيلات.. ويوم بغت تطلع من المول ماقدرت من كثر الأكياس وثقلها!! شافها حمَّال آسيوي وعرض خدماته وعطته الأكياس كلها وشالها وقال لها:فين روح ماما؟؟ اسمهان:فندق..... الحمَّال:آه يئني فوق! وراح للأصانصير..واسمهان تقول بنفسها(آثاري هذا المول تابع للفندق وأنا مدري)!!! وهي طالعة بالأصانصير أذن العصر! ووصلت لغرفتها بالسلامة.. وخلت الحمَّال يحط الأغراض كلها وقال ايش بتعطيه أجرة فتحت محفظتها مالقيت إلا 100 ريال خذتها بكل بساطة وعطتها اياه!!! وعبدالرحمن يراقبها من فوق السرير!! عبدالرحمن:مية ريال ياالظالمة لواحد شال لك الأغراض من فوق لتحت؟؟أجل لو راكبة معاه ليموزين لجدة كم بتدفعين؟؟ اسمهان:ياشين البخل شيناه!مامعاي غيرهم وش تبيني أعطيه؟بومبة؟؟ عبدالرحمن:وبالله توك جاية؟؟لك أكثر من ثلاث ساعات طالعة!كان رقدتي في الحرم أحسن!!ولا كان عدتي عمرة أمس أبرك!! اسمهان:عادي ليش معصب رحت وسعت صدري شوي ورجعت!! عبدالرحمن:أقص إيدي إن كنتي مابكيتي لين قلتي بس!وأكيد ضعتي وجمعتي عليك شرطة الحرم؟!! اسمهان:لااا مو لهاالدرجة جمعت حولي سواليف أحكي لك عنها بعدين!وترى بطني عصافيره تصوصو واش رايك نروح المطعم؟ عبدالرحمن:وشلون ياحسرة؟ اسمهان:وناسة!إذن بأروح المطعم لحالي!! عبدالرحمن:أشوفك أخذتيها لعبة تبين تروحين وتردين على كيفك؟؟أقول اجلسي مكانك ولا قومي صلي العصر أحسن!! في مدينة الرياض كانت عبير وأمها في بيت خالهم الكبير اللي عنده 3 أولاد متزوجين و4 بنات في البيت ..ثنتين بالجامعة ووحدة بسن عبير والصغيرة بالمتوسط..صحيح عبير كانت متأثرة وزعلانة من كل الأحداث السيئة اللي واجهتها بس بنفس الوقت لقيت ونس مع بنات خالها.. وبيوم دار هالحوار بين عبير وأمها... عبير:يمه أنا أحس إني مبسوطة ببيت خالي بس ماتحسين إن جلستنا عندهم مخليتنا مثل العالة على صدورهم؟؟؟ أم عبير:أكيد حِنا عالة وعلة على قلوبهم..بس كل هذا من أبوك حسبي الله عليه سحب اللي ورانا وقدامنا!لاذهب ولافلوس! عبير:ماعليك يمه..هذا لأنه زعلان مرة..كلها وقت ويهدى ويصير يصرف علينا..هذا أبوي وأعرفه كريم وقلبه طيب! أم عبير:ياليت يكون كلامك صحيح أخاف يتزوج وحدة وتلهف اللي وراه وقدامه!! ====================== وجاء يوم السبت وراح عبدالرحمن لأول يوم بالدوام وكان شفت العمل مسائي بهذاك الأسبوع يبدأ من الظهر لين الساعة 11 بالليل... قامت اسمهان تنظف المطبخ وكانت أول مرة تطبخ فيها من يوم ماتزوجت والغداء كان عبارة عنبطاطس مجمد وقلته اسمهان بالزيت! نجت دجاج بالبقسماط وقلته اسمهان بالزيت! وكاتشاب طبعاً ماطبخته بس تعبت حالها شوي وحطته بصحن!!+صحن فواكه طبعاً مو هي اللي طابختهم بس غسلتهم وحطتهم بالصحن!!) وقبل مايروح عبدالرحمن الشغل وهم لسه يتغدون قالت اسمهان:اش رايك في طبخي؟عاد إنت اليوم محد قدك اسمهان طابخة لك بيدينها!!! عبدالرحمن:كل هالمقدمة على صحنين مقالي جاهزة؟؟أجل لو طابخة مفطَّح بتذلينا؟؟ اسمهان:لا ياحبيبي...بس الكل يدري إن اسمهان مو حقت مطابخ!! عبدالرحمن:الله يعين!عموماً تسلم الأيادي!ولو إني أول مرة أشوف أحد يتغدى نجت وبطاطس!بس مع اسمهان كل شي جايز!!! ...وقام يتشطف ويتجهز للعمل...واسمهان ترفع السفرة وتنظف المطبخ...... عبدالرحمن وهو رايح قال:ترى بأرجع الساعة 11 يعني عندك وقت طويل تقدرين تستغلينه وتكملين كل أشغالك..والعشا خليه ساندويتشات خفيفة!لأني بأروح العمل أتغدى مع الشباب!! اسمهان:ليش؟توك متغدي! عبدالرحمن:ههههه ليش الله يصلحك!تسمين هذا غداء؟؟هذا اسمه نقنقة مجبور!! وراح عمله..وقعدت اسمهان تفكر اش تسوي بغيابه..راحت تقلب في قنوات التلفزيون ومالقت شي يستاهل المتابعة! اتجهت للنت ولقيت مرام قاعدة على الماسنجر وتبادلوا السواليف المختلفة وقالت لها مرام:اتفقنا كلنا نزورك هذا الاثنين! ورحبت اسمهان بالفكرة ورجعت لمنتداها المفضل اللي تكتب فيه وغيرت قسمها وقالت لنفسها:ليش ماأدخل قسم الحياة الزوجية؟!! ويوم دخلت وتقلبت بين المواضيع خرجت وهي تقول بنفسها:توووووووووووووووبة!!إن زدت طبيت بهالقسم!! وش هالغثا اللي في النسوان؟مايكفي زوج الوحدة منهم كريه وغثيث معاها بالبيت...بعد تجي بالمنتديات وتسوي له دعايات؟!!!!!!!!! وفكرت لو تكتب موضوع تخاطب فيه عقلية النسوان اللي يحبون يكتبون عن يومياتهم اللي تبط الكبد مع أزواجهم!!وليتها ماكتبت!صلخوها النسوان بألسنتهم!!! طبعاً هالسمهونة تبي تسوي فيها ناصحة ومثقفة واستعانت ببعض الألفاظ اللي يستخدمها عبدالرحمن وكتبت الموضوع التالي بعنوان: (الشاردات إلى المنتديات!) الموضوع:إلى كل عضوة تمحورت حياتها حول نفسها وزوجها!ثم تقوقعت على نفسها لتنفجر لنا بعد دهر وتعلن لنا خروجها من البوتقة إلى عالم المنتديات لـ تفش غلها فينا! تكتبين لنا عن زوجك لماذا؟؟لـ تعلين قلوبنا به مثل ماعل قلبك؟؟ أم لـ تخربين علينا أجواءنا الرومانسية مع أزواجنا؟؟ أم لأنك لاتمتلكين موضوع مفيد فاتجهتي إلى زوجك لتجعليه قضية الموسم؟؟ أم هي محاولة لتقليد الأخريات اللواتي يشتمون المجتمع ويسبونه كله ماعدا أنفسهم!فهم جميلات بشهادة الجميع! وقائمات بجميع حقوقهن الزوجية! ولايقصرون حتى مع أهالي أزواجهن! وبالرغم من ذلك تلاقي الصد والنفور من زوجها! عزيزتي( إذا أردتي الشردة من الواقع إلى الخيال فاشردي إلى أبعد بقعة في الخريطة!!فيومياتك الكئيبة مكانها ليس بالمنتديات!بالعربي إحنا عالم ندخل النت للفرفشة والوناسة وتحصيل الفايدة مو لضيقة الصدر وفقع المرارة!!) الحقيقة قطعتم قلبي بقصصكن أيتها العضوات مع تمنياتي في القريب العاجل أنا أرى منتديات ذكورية جديدة تمتلأ بشكاوي الأزواج من زوجاتهم!!!! وانتهت اسمهان من موضوعها وراحت أعزكم الله إلى دورة المياه..ودقايق ورجعت ولقيت عدد مشاهدات الموضوع 34 والردود 7!! اخترعت وقالت:صدق إنكم فاضيات!! وقرأت الرد الأول للعضوة(تطور بـ تهور):أي تمحور وتقوقع وبوتقة؟؟انتي حلي التشابك اللي عندك بعدين انصحينا!! الرد الثاني للعضوة(مصرقعة بس هادية):مين سمح لك أساساً تقرأين موضوعاتنا؟؟إذا مو عاجبك اطلعي برة المنتدى! الرد الثالث للعضوة(الدلع كله):مدام إنك تقدسين الرجال..ورى ماتفارقينا وتفتحين منتدى ذكوري وتحطين نفسك الزعيمة عليهم؟؟خل نشوف وش بتسطرون من ابداعات!!!!!!! الرد الرابع للعضوة(هبنقة ببندقة!!):إيه كلنا جميلات!انتي وش حارق رُزك؟؟ومانقصر مع أزواجنا بشي الله ياخذهم حتى أهالي أزواجنا اللي مايساوون بصلة حاطينهم على راسنا وخادمينهم بعيوننا الله يقلعهم يحق لنا نفضفض لبعض الوحدة فينا قمة في الرقة وقمة في الذوق والنعومة لكن زوجها مغمض عيونه عنها عسى عيونه البط!!!! قالت اسمهان بنفسها:وأنا أشهد إن فيك ذوق ونعومة ورقة تهز الصخر!!!!!!!!يكفي إن اسمك شاعري حيل!!! الرد الخامس للعضوة(رداة الحظ من حظي):أقص إيدي لو ماانتي رجَّال!!!ياعضوات تراها رجَّال متخفي بإسم حرمة!يامشرفات الغوا عضويتها! الرد السادس للعضوة(قاهرتهم برواقتي):ياأختي قاهرة نفسك ليه؟؟بكرة حتتجوزي وتعرفي الكلام اللي بنقولو اش معناتو!! الرد السابع للعضوة(دبدوبة النحيلة):وينك بس؟لو أشوفك لأبرك فوقك لين ماأقطع عنك الهواء!ياعدوة المرأة ونصيرة الرجل..مالك إلا القاز!!!!!!!! طبعاً اسمهان صار راسها يغلي من اللي قاعدة تقراه..وارتفع ضغطها وقالت:والله لو ماانتم غثيثات وكريهات ماكان أزواجكم يعاملونكم كذا!!إلا بالعكس رحمت أزواجكم الضعايف شلون متحملينكم!!يمين لو إني رجَّال كان صحت فيكم بعالي الصوت(كلــــــــــــكم طــــالق!) |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
وقعدت اسمهان على هالحال من رد في رد وهي ترد على العضوات وهم يردون عليها لين ماوصل عدد الردود 51 رد ودخلت عضوة وقالت:شو قلة الأدب هاي؟ وينن أزواجكن عنكن؟سوء الخضار مابيصير فيه هيك حكي!! وجات العضوة اللي بعدها وقالت:أنا رأيي من رأي الأخت اللي فوق موضوع خسيس وردود أخس الحمدلله والشكر..بالله فضوها سيرة وكل وحدة منكم ترجع تتضارب مع زوجها أبرك!!! ردت اسمهان:تكفين لاتحشينهم على أزواجهم هذيل مهابيل ويسوونها!!بيروحون يتطاققون عشان يرجعون لنا بعد كم ساعة بمواضيع جديدة عن هوشاتهم!! دخلت مشرفة من مشرفات الموقع على الموضوع وقالت:نظراً لكثرة الردود الخارجة عن حدود الذوق سيتم حذف الموضوع!! زعلت اسمهان وقالت بنفسها:سبحان الله كلمة الحق صايرة تزَعِل هاالأيام!!!! قفلت النت وجلست تلعب بالألعاب اللي مخزنتها على اللاب توب...إلا وتليفون البيت يرن.. اسمهان:آلو...مرحبا. شخص غريب:مرحبتين! اسمهان:مين تبي؟؟ الشخص:أبيك انتي! اسمهان:آها أكيد انت حمود؟صح؟ الشخص:فديت الذكاء!شلون عرفتيني؟؟ اسمهان:أنا اسمهان والأجر على الله !ماتطوفني ألاعيبك مهما غيرت من صوتك!! الشخص:وياترى اش قاعدة تسوين؟؟ اسمهان:أبد كنت قاعدة على النت بس زهقت!وعبدالرحمن اليوم مداوم!! الشخص:وش رايك أمر عليك وتطلعين معي؟؟ اسمهان(وهي على نياتها):واااي وناسة تكون كسبت فيني أجر يامحمد!! الشخص:زين عطيني العنوان!! اسمهان:هاااااه؟؟؟ الشخص:أقول عطيني العنوان يابعد عمري ماودك نطلع ونتونس مع بعض؟!! عاد اسمهان ذيك الساع استوعبت إنه واحد مغزلجي ومتصل يلعب!! وقفلت السماعة بوجهه..وجلست ندمانة على تسرعها في الرد عليه وقلبها يخبط ويرقع!! وصار التليفون يرن ويرن وكل شوي يرن.... فجأة دق جوال اسمهان وراحت ترد إلا طلعت رانية.. اسمهان:هلا رانية.. رانية:هلا سوسو..أقول وش رايك تكسبين فيني أجر وتوفرين علي وتعطيني رقم الثابت أفضل؟؟؟ عطتها اسمهان رقم التليفون الثابت..وأول ماصكت اسمهان الجوال إلا والتليفون يرن... راحت اسمهان تركض على بالها رانية إلا طلع الشخص المغازل! الشخص:هااه يااسمهان؟عبدالرحمن رجع ولا لا؟ اسمهان:الله يصيبك ياشيخ قفل السماعة والا بيصير لك شي مايسرك!!! الشخص:يمه خرعتيني وأنا بعدي صغير!!!!خلاص ولايهمك ياحلوة بأقفل الخط بس أبيك تجاوبيني عن سؤال صغير ووعد أنسى رقمك طول العمر!! اسمهان:خير؟ الشخص:انتي باقي تغنين مع أخوك فريد الأطرش ولا اعتزلتي؟ لأني من زمان مو سامع لكم شي جديد!! كاااااااااااااااااااااااك وجنبه أصوات شباب يضحكون!! قفلت اسمهان الخط وقعدت تبكي! إلا رانية داقة على جوالها..ردت اسمهان... رانية:وشفيك يالهبلة تقولين لي اتصلي وتشغلين الخط؟؟ اسمهان(قامت تبكي):رنو الحقيني!!!! رانية:خير؟عبدالرحمن كفَّخك؟؟ اسمهان:لاااااااا رانية:طيب وش صاير؟لاتقولين طلَّقك؟حرام عليك مابقى دخلنا بيتك وشفناه!وتطلقتي بسرعة؟؟ اسمهان:وجع بعينك ان شاء الله!هذا كلام تقولينه؟لا تكفخت ولاتطلقت!بس فيه واحد نشبة بلاني باتصالاته على التليفون وأنا خايفة حيل!!!! رانية:وش منه خايفة؟بينط عليك من السماعة؟؟ اسمهان:لااااا..بس قلت له إن اسمي اسمهان وزوجي عبدالرحمن!! رانية:طاح حظك ياالثولة طاح حظك!!وليش تعلمينه؟ اسمهان:أنا قلت له من غير قصد!على بالي إنه أخوي محمد! رانية:وأخوك محمد مايعرف اسمك واسم زوجك يوم تروحين وتعلمينه؟ وش هالثوارة والبقارة اللي انتي فيها يبيلك شوية حشيش وعلف وترعين فيها!!!! اسمهان:لاتزيدين ناري الله يخليك! رانية:أقول انثبري جنب التليفون وبأحاول اتصل فيك لين مايمسك الخط..رقمي وتعرفينه ردي عليه..وإن دق هالمطفوق إياني وإياك تردين عليه..فاهمة؟؟ اسمهان:فاهمة! واتصلت رانية وردت عليها اسمهان ودخلوا في سوالف من هنا وهناك..وبعدها...... رانية:خلاص اتفقنا نجيك كلنا يوم الاثنين..مو تقولين دوام زوجك مسائي؟؟؟؟ اسمهان:إلا..الله يحييكم رانية:بس ترى نجلاء أهلها وافقوا بعد جهد جهيد إنها تجي تزورك! على قولتهم انه موقفها حساس شوي بما انه أم عبدالرحمن خطبتها لولدها قبل!! اسمهان:غريبة وافقوا؟؟ رانية:لأنها ياحلوة أقنعتهم انك ساكنة ببيت لحالك بعيد عن أم زوجك يعني مابتقابلها!!ولارجعت تصارحهم بالموضوع!!بس انتي بيجيك أحد غيرنا؟؟ اسمهان:لا طبعاً مستحيل أنادي أحد!نبي نقعد ونتونس وننبسط لحالنا وبس! رانية:أشوى!!أنا قلت عسى ماتخبصينها وتسوينها جَمْعَة حريم وبزارين!!عاد أنا ياكرهي في سواليف النسوان كلها حمل وولادة وسب في الأزواج وأهاليهم!تقولين قاعدين في حراج!!! اسمهان:لا أعوذ بالله...هالطقة ماشفتها إلا بمنتديات النسوان!الله يكفينا شرهم على أرض الواقع!! ======= المهم انتهت المكالمة واستلموا باقي الشلة اسمهان كل شوي وحدة متصلة...آخر وحدة أفنان..وبعد المقدمات الروتينية من سلام وأخبار...الخ أفنان:تصدقين يااسمهان؟بعد محاولات مستميتة أمي وافقت لي أزورك؟؟؟ اسمهان:ليش عاد؟عبدالمجيد خطبك انتي الثانية وأنا ماأدري؟؟؟ أفنان:لااااا بس خبرك بأمي مستحيل تخليني أروح مكان إلا بمرافقتها..وأنا بصراحة قلت لها ان هالجمعة جمعة بنات وبس وأهل اسمهان مو جايين فلا تجين معاي ياأمي بس مارضت!!وبعد المحاولات وافقت بس بشرط إنه خالتي مشاعل تجي معاي!!! اسمهان:مين خالتك مشاعل؟؟ تقصدين اللي قعدت معانا على نفس الطاولةيوم زواج خالك اللي طاحت فيه رانية؟؟؟؟ أفنان:بالضبط....ماشاء الله عليك ياسوسو مانسيتي؟؟ اسمهان:وشلون أنساها؟إلا يازينها ويازين جلستها وكلامها.الله يحييكم كلكم وأنا بانتظاركم.. ============= وبعد ماانتهت اسمهان من مكالماتها الطويلة جاء عبدالرحمن من العمل وهو مرهق وسلم على اسمهان.... عبدالرحمن:اش سويتي على العشا؟؟ اسمهان:يووووووووووه نسيت! عبدالرحمن:ماشاء الله بدايات مبشرة بالخير فعلاً!!خلني أغير هدومي! دخل عبدالرحمن الغرفة يبدل وتفاجأ من منظر الغرفة!! عبدالرحمن:اسمهان..اللحاف ماتتطبق من يوم مارحت؟؟؟ اسمهان:نسيته!كنت مشغولة! عبدالرحمن:لي 8 ساعات بره البيت مامداك تسوين عشا ولاتطبقين لحاف؟زين اتصلتي على أمي سلمتي عليها؟؟ اسمهان:لا...ماجاء في بالي!! عبدالرحمن:أحلفِك..وش سويتي بهالثمانية ساعات؟؟؟ قعدت اسمهان تحكي له عن سالفة المنتدى والموضوع اللي كتبته وردود العضوات.. عبدالرحمن:لهذي الدرجة موضوعك سوى ضجة؟؟أخاف كاتبة موضوع سياسي؟!!! اسمهان:لا ياشيخ..موضوع عن الحياة الزوجية..بس مدري اشفيهم النسوان استخفوا!قلبوا الموضوع حلبة مصارعة!ومباراة ملاكمة!لين ماحذفته المشرفة وريحتني!! عبدالرحمن:الحمدلله إني ماقريته أخاف إنه من طقة مواضيعك السابقة!!! جاء اليوم الثاني وقامت اسمهان تطبخ ينقال بتسوي كبسة! وطلع الدجاج نص استواء والرز لاصق بقاع القدر ولاطعم ولازغم!! وشامز شمازة! اسمهان(قبل ماتذوق الأكل): هاه؟وش رايك اليوم بالطبخة؟ عبدالرحمن:الحقيقة يابنت الناس ماعرفت قيمة أمي الا بعد ماأخذتك!!هههه وبعدين أول مرة بحياتي أشوف أحد يقدم الرز بالقدر حقه!!!الناس تغرف الرز بصحن كبير مو تجيب القدر على السفرة!!! اسمهان:وش أشوي الرز لاصق بقاع القدر؟قلت أجيبه وانت كد و كِل! عبدالرحمن:تدرين ان أخطر شي على صحة الانسان هو أكل اللحوم وهي نص استواء؟؟لأنها تصيب الواحد بعدة أمراض أهمها فيروس القطط!! اسمهان:وش دخل كلامك بأكلنا؟وبعدين فيروس القطط يجي من أكل القطط والحمدلله حِنا ماناكل قطط!! عبدالرحمن:ياعيني على الثقافة ياعيني!!حبيبتي بالله لاجيتي تقعدين على النت بغيابي بدل ماتكتبين موضوعات تشحنين فيها النسوان ويتلسنون عليك!أنا أقترح إنك تبحثين عن معلومات تفيدك بحياتك العامة وتثري ثقافتك! وقام عبدالرحمن يغسل يديه.. اسمهان:مسرع!لسه ماأكلت غداك..وشفيك قمت؟؟ عبدالرحمن(وهو يجامل): من حلاته..خفت أستسلم وأخلصه عليك!! قامت اسمهان تذوق طباخها وبغت تستفرغ من طعم الحرق اللي فيه والشمازة!! بدَّل عبدالرحمن هدومه وراح العمل.. واتصلت أمها تتطمن عليها...وبعدها اتصلت أم عبدالرحمن وقالت لها:أنا بأروح اليوم عند أم حامد جارتنا اللي بالشارع المقابل تجين معاي؟؟ اسمهان:لا ياخالتي عندي شغل بالبيت... وقامت ترتب البيت وتغسل الملابس وبالغلط كانت لابسة اسمهان على شعرها منديل أحمر وطاح بالغسالة وهي تحط ثياب عبدالرحمن!!وعلى أساس بتشيله ورن التليفون وراحت تركض تبي ترد و نست المنديل بالغسالة!!! إلا هي أختها أسماء وقعدت اسمهان معاها ساعة... ويوم راحت تخرج الغسيل إلا وهو في خبر كان بمبي ضارب في أحمر!! دخلت المنتدى ولقيت عضوة حاطة صور لملابسها وتاخذ رأي العضوات فيها!!والملابس كانت مو حلوة...والعضوات كاتبين واااو تهبل! واللي تقول ذوقك روعة!واللي تقول تقطعينها بالعافية! واللي تقول مرة نايس!! احترَّت اسمهان وقالت بنفسها:وعععععععع اشبه الذوق اختَّل عند الناس؟؟ وألحَت اللقافة عليها ترد وكتبت: ياأختي قولي لي من وين تشترين ملابسك وأقول لك مين انتي؟؟ حبيبتي حتى أبوعشرة تطور وصار اسمه توب تِن ويجيب صيدات!بس انتي ليش مغمضة؟؟والحلوات اللي يقولون يهبل ونايس..ليش تضحكون على بنت الناس؟؟تبونها تصير مسخرة!حبيبتي إذا انتي متزوجة قطيهم بالزبالة!وإذا بعدك بنية بعد قطيهم بالزبالة لأن نصيبك بيوقف لو أحد شافهم عليك!!!! ودخلت صاحبة الموضوع وردت:انتي وشفيك؟موب صاحية؟ كل هذا غيرة؟؟قولي بسم الله ماشاء الله!كله حسد تبين تعرفين من وين شريتهم؟بس حريمتك موب قايلة لك!!! قالت اسمهان:قليعة في ذول النسوان وش هالثقة؟من وين يجيبونها؟يازين مجتمع البنات وأقسامهم بالمنتديات كلها خفة دم وفرفشة مو صراعات دموية!!أما الحريم شوية وتطلع لي الوحدة من الشاشة بساطور!! ======== قعدت تفتش في أغراض عبدالرحمن ولقت دفتر كله أشعار وجلست تتسلى وتقراه... أخذت كلمات القصيدة وكتبتها على الكومبيوتر وقامت تسوي لها خلفيات وحركات بخبرتها المتواضعة بالفوتوشوب....... وكانت كلماتها: استفاق الكون من صرخة فؤادي بعد ماالكتمان فيه أضرم فتايل ماقوى عالبوح يهتــف أو ينادي صارت الأسرار هم وشغل شاغل الهوى فاضح لو انه يكون بادي وإن بقى بالقلب يفعل به فعايل ....الخ(انقطع الالهام ماعرفت أكملها!! المهم مر اليوم كئيب رتيب...لين ماجاء عبدالرحمن من العمل ودخل سلَّم على زوجته المصونة وشاف البيت مرتب وانبسط وشاف الغسيل منشور بغرفة الغسيل بالمطبخ وبغى ينجلط!!! عبدالرحمن:اسمهان اشفيها ثيابي حمراء؟؟لايكون غسلتيها مع قمصان نومك؟؟ اسمهان:لا البندانة اللي على راسي طاحت بالغلط مع ثيابك!! عبدالرحمن:حرااام عليك هالثياب كلها جديدة مفصلهم قبل العرس ومكلفتني الشيء الفلاني!راحت كذا بغمضة عين؟!! اسمهان:ياخي لو تلبسهم مع شماغ أحمر بتطلع بمنتهى الذوق وتصير أحسن من العضوة الهبلة اللي ناشرة ملابسها عالنت تقول خروق سيارات!!! عبدالرحمن:آآآآه من النت ليتك بس تتعلمين من العضوات بعض السناعة!! صحيت اسمهان يوم الاثنين قبل صلاة الظهر واتصلت على جوال أختها ابتسام... ابتسام:هلا سمهونة هلا..الله الله عالاجتهاد!أشوفك صاحية بدري مو العادة!!!! اسمهان:اسمعي يابسومة اليوم بيزوروني صاحباتي وطالبتك طلب! ابتسام:من عيوني..أكيد تبيني أجيك وأساعدك عشان الضيوف!صح؟؟ اسمهان:لا..مو صح!بغيتك تسوين لي صينيتين حلى من ايدينك الحلوة وترسلينها لي مع زوجك! ابتسام:يعني..أنا وأمي مو معزومين؟؟ اسمهان:للأسف الشديد لا!ودي أقعد مع صاحباتي بـروحنا!! ابتسام:مين قدك؟شايفتنا مطعم وفاتحين طلبات توصيل؟عجيب أمرك!! اسمهان:عاد لاترديني...تكفين طلبتك!أنا لو أدري إن أسماء ماهي ملسونة وبتسمعني كلام يبط الكبد كان اتصلت عليها ووصيتها هي بعد تفزع لي بصوانيها!! ابتسام:لا حرام عليك كله ولاأسماء!لاتتعبينها ماعندها شغالة وهي على وشك ولادةمو فاضيتلك أبد! اسمهان:طيب أعتمد عليك في الحلى؟ ابتسام:اعتمدي!وبأسوي لك أحلى كيكة توفي وصينية حلا طبقات الشوكليت ..حلو؟؟ اسمهان:حلو ياحلو..وأنا عندي تمر وشوكولاتات ومعمول وغيره تكفي وزيادة.. إلى نهاية المكالمة.... واتصلت اسمهان على سماح وبعد السلام... اسمهان:تكفين سموحَة.. صاحباتي بيزوروني اليوم وبغيت كم صنف مالح من ايدينك الحلوة؟وش قلتي؟ سماح:غالية والطلب رخيص..بس زين إنك كلمتيني من بدري لأني رايحة لأختي هند اليوم عندها جمعة حريم.. اسمهان:خلاص ومتى بترسلين لي الأصناف؟؟ سماح:خليها مع طلعتي من البيت مرة وحدة..بعد المغرب! اسمهان:وهو كذلك... وشوي واتصل عبدالرحمن... عبدالرحمن:صباح الظهر ياسمهونتي!غريبة صاحية بهاالحزة؟؟ اسمهان:مو قلت لك من أمس إن صاحباتي جايين؟؟ عبدالرحمن:طيب تبيني أجيب معاي شي تقدمينه لضيوفك؟؟ اسمهان:لا الله يعطيك العافية مايحتاج...ابتسام وسماح مابيقصرون... عبدالرحمن:ماشاء الله..أهلك بعد جايين؟؟ اسمهان:لاياشيخ..ماعزمتهم أصلاً بس دقيت على ابتسام وسماح يسوون لي أصناف ويرسلونها!!!!! عبدالرحمن:الله يصلحك يااسمهان بالله هذا كلام؟؟ليش بيتنا فاضي مافيه أكل يوم تروحين تشحذين من أهلك؟؟ولا شايفتنا عاجزين نجيب شي لضيوفنا؟؟ اسمهان(بدلع):يوووه دحومي!لاتكبرها عاد وهي صغيرة!المسألة فزعة لي!أول مرة بأستقبل ضيوف وماودي أخبص بالمطبخ!! عبدالرحمن:بس ماهي حلوة منك تطلبينهم أطباق ولاتنادينهم لبيتك؟الله يهديك بس!على العموم وش طابخة على الغداء ان شاء الله؟؟ اسمهان:ياسلاااااام أقول لك بيجيني ضيوف..تقول لي وش بتطبخين على الغداء؟؟ عبدالرحمن:وش دخَّل هذي بذيك؟الضيوف بيجونك بالليل صح؟ اسمهان:ايه..بس أنا ماأبي أقربع المطبخ بأروح ذحين وأرتب البيت وأغسل الحمامات وأضبط الغرف كلها..تدري أول مرة بيدخلون بيتي لازم أفرجهم عليه وهو قمة في الترتيب! عبدالرحمن:ماشاء الله ياليتني ضيف!! اسمهان:وش تقصد؟؟ عبدالرحمن:لا ولاشي!! بأرجع عقب صلاة الظهر ومعاي غداء من بره!مع السلامة.. وبدأت اسمهان تطبق الغسيل المنشور من أمس وترتب وتنظف وبعد الصلاة بـ وقت جاء عبدالرحمن ومعاه الغداء وشوي أغراض.. فتحت اسمهان الأكياس لقيت عبدالرحمن شاري صحن كبير ورق عنب+صحن كبير بقلاوة.. اسمهان:ليش جايب ورق عنب وبقلاوة دحومتي؟؟ عبدالرحمن:عشان تقدمينهم لضيوفك مع باقي الأكل.. اسمهان:شكرااااا.. وحطت الغداء وكان عبارة عن مشاوي على الفحم +رز وسلطة..بعد الغداء..استعد عبدالرحمن للروحة إلى العمل... وودعته اسمهان وهي طايرة من الفرح لأنها بتستقبل صاحباتها بعد عدة ساعات!! نزل عبدالرحمن يسلم على أمه وقال لها:اش رايك يمه تطلعين لاسمهان اليوم؟بيجيها ضيوف! أم عبدالرحمن:الله يرضى عليك ياولدي كأنك داري عن زهقي ومللي من قعدة البيت!خلاص بأطلع لها بعد المغرب ان شاء الله. وبالفعل استكملت سمهونة شغلها وفي العصر أخذت دش..وبدأت تجهز أغراض القهوة والشاي من مكسرات وشوكولاتات وخلافه.... وقبل المغرب بدأت تتزبرق وتتحومر وتتصوفر!(لغير الناطقات بالعربيةيعني تحط أحمر وأصفر وكل ألوان الطيف!!)وتضبط الشعر... وأذن المغرب وراحت تصلي إلا ودق الجرس وكانت كاتيا شغالة أهل اسمهان على الباب ومعاها صواني الحلا أخذتها اسمهان وشكرتها وراحت الشغالة... وكانت الأصناف اللي سوتها ابتسام(سينابون+خلية النحل+حلى طبقات الشوكليت+كيكة التوفي) قالت اسمهان بقلبها :الله يسعدك يابسومتي على تعبك... ودق الجرس مرة ثانية..قالت اسمهان بنفسها:حسبي الله عليكم من ضيوف باقي مابخرت البيت!!لايكون هذي رانية المطفوقة؟!!!!!! ويوم فتحت الباب تفاجئت بشوفة أم عبدالرحمن!!! اسمهان(بدهشة):خـــــــالتي؟؟؟ أم عبدالرحمن:ايه..ممكن أدخل ولا وقفتي بتطول عند الباب؟؟ اسمهان:حياك حياك..تفضلي! أم عبدالرحمن:الصراحة بتكسبون فيني أجر اليوم الزهق كان ماخذني..لولا إن عبدالرحمن جاء بالوقت المناسب وعزمني وقال انه عندك ضيوف!! اسمهان بداخلها قالت:أما هالعبدالرحمن يبيله زنط!!هلي وهم هلي ماعزمتهم عشان أستفرد بضيوفي!تقوم تنادي لي أمك؟؟عَز الله خربت!! وراحت اسمهان تبخر بيتها..وشوي ودق الجرس..إلا طلعت رانية جاية بطيرانها!! فتحت لها اسمهان وقامت رانية تحضنها بقوة... وتقول:واحشتني حيـــــــــل ياالسوسة! اسمهان:مايوحشك غالي ياقلبي. فسخت رانية عباتها ومشطت شعرها قدام مراية المدخل..وجايبة معاها تورتة كبييرة بالفانيلا والفراولة.... ومسكت الطيران وقامت تطق وتغني: ونحمد الله يوم لقانا تم و انزاح عن قلبي وقلبك الهم اسمهان:اسكتي يالهبلة اسكتي..أم زوجي داخل.. رانية:وش جابها؟تبيني أشق الطار فوق راسك؟ وتكذبين علي وتقولين مابأنادي أحد إحنا وبس! أخاف منادية جوهرة بعد؟؟ اسمهان:ارخي صوتك..ماناديت أحد حتى أنا تفاجئت بجيتها بس كله من عبدالرحمن هو اللي عزمها!! دخلت رانية تسلم على أم عبدالرحمن..وجلست معاها.. وجلست اسمهان وتكلموا شوي وعرَّفت اسمهان أم زوجها بصاحبتها رانية...وشوي ودق الباب إلا هي أفنان وخالتها مشاعل(وجايبة أفنان معاها هدية عبارة عن مصحف كبير وحامل خشب محفور) وسلموا على اسمهان ودخلوا المجلس عند رانية وأم عبدالرحمن... وثواني وجات مرام ومعاها باقة ورد كبيرة وبعد ماحطت عباتها ومشطت شعرها دخلت وسلمت على الحضور ووراها على طول جات نجلاء ومعاها سلة فيها تحف وشمعدانات ومغلفة بطريقة أنيقة..ودخلت المجلس...دارت عليهم اسمهان بالعصير.. وبدأت أم عبدالرحمن تتعرف على الضيوف وقالت:مانسيتكم انتم لابسات الوردي صح؟؟ الشلة:صح!! واستغربت أم عبدالرحمن إن مشاعل خالة أفنان هي الوحيدة الكبيرة بينهم وكان عمرها 26 سنة! فقالت لأفنان ومشاعل:ماشاء الله إنتم خوات؟؟ أفنان:لا..هذي خالتي أخت أمي.. أم عبدالرحمن:انتي متخرجة يابنتي؟؟ مشاعل:ايه من 4سنوات تقريباً.. أم عبدالرحمن:موظفة؟ مشاعل:ايه أشتغل بمعهد الأمل. أم عبدالرحمن:تقصدين معهد الأمل الخاص بالصم والبكم؟؟ مشاعل:ايه تعرفينه؟؟ أم عبدالرحمن:ايه ولدي وهو صغير كان يدرس فيه... مشاعل:الله يشفيه يارب...اصابته وراثية؟؟ أم عبدالرحمن:لا ياحبيبتي..مافي أحد بعيلتنا كلها أصم وأخرس غيره..بس بعيد عن السامعين أول ماولدته تعرض لالتهاب بالأذن الوسطى وسوى له مضاعفات مع الوقت لين مافقد حاسة السمع بالتدريج..وبالتالي ماصار عنده قدرة على النطق لأنه مايسمع.. مشاعل:طيب كم عمره هالحين؟ أم عبدالرحمن:28 سنة.. مشاعل:وشلون تتواصلون معاه؟ أم عبدالرحمن:من يوم هو صغير دخلناه معهد الصم والبكم وكنا نرسل أخوانه معاه عشان يتعلمون لغة الاشارة..ولما كانوا يرجعون البيت يعلموني اللي تعلموه وصرت أفهم عليه..وهو ماشاء الله عليه ذكي يقرأ كلام الشفاه..وتعابير الوجه... مشاعل:طيب وهل تحسين اعاقته السمعية سبب في تعطيل فرص اندماجه بالمجتمع؟؟ أم عبدالرحمن:لا بالعكس..بسم الله عليه من يوم وهو صغير وهو اجتماعي ويحب الأطفال ويوم كبر توظف بمركز خاص بالاعاقات السمعية ومشاكل النطق وعنده صداقات كثيرة أغلب الوقت وهو بره.. مشاعل:ماشاء الله أنا لاحظت عندنا بالمركز إنه أغلب الأشخاص اللي يكون عندهم اعاقة يكون بنفس الوقت عندهم جانب ابداعي وموهبة بمختلف المجالات وهذا شيء رائع يخليهم يثبتون وجودهم بالمجتمع... أم عبدالرحمن:صادقة يابنتي..هو يعشق الرسم كثير لو أطاوعه ماسلم منه جدار في البيت!خليته بس يرسم على جدار غرفته..وعلى جدار واحد من مجلس الرجال.. اسمهان:بالله ياخالتي الرسمة اللي على جدار مجلس الرجال رسم يده؟؟؟رووووعة ماشاء الله عليه فناااااان!! مشاعل:طيب ياخالة هل تفهمين كل اللي يبيه بلغة الاشارة؟؟ أم عبدالرحمن:الصراحة لما يكون معصب وعنده كلام كثير أحس اني ماأفهم عليه كثير..عشان كذا من يوم وهو صغير وأنا حاطة بالصالة سبورة فلوماستر على حامل كل ماعجزت أفهم منه شي أقول له اكتب اللي بداخلك ويكتب لي مسيكين.. اسمهان:تصدقين ياخالة انتبهت لهاالسبورة واستغربت وجودها وبعدين عبدالرحمن قال لي:انه عبدالمجيد يكتب عليها أحياناً اللي يبيه من أمي... مشاعل:اعذريني ياخالة على كثر أسئلتي بس حالياً أنا مشغولة بتحضير بحث عن فئة الصم والبكم وأول مرة تمر علي حالة بعمر ولدك لأن أغلب الحالات اللي عندنا بالمعهد دون سن العشرين.. أم عبدالرحمن:لايابنتي ماضايقتيني ولاشي..إلا خليتيني أفضفض..عن صدري..يكسر خاطري لاشفته..كل اللي بعمره تزوجوا إلا هو مالقى من ترضى به! مشاعل:ان شاء الله يلقى بنت الحلال اللي تناسبه..كثير مر علي حالات مثله وتزوجوا وعاشوا حياتهم..أنا زميلتي طبيعية ومتزوجة واحد أخرس وعايشة أحسن حياة.. في هذه اللحظة تضايقت نجلاء من الكلام وقامت!!! وشوي ودق الجرس وكانت سماح على الباب..سلمت وجايبة معاها سلة الرحلات ومعبيتها فطاير ومعجنات وفتوش وكفتة بطاطس! شكرتها اسمهان من القلب... سماح:أفا يالعلم!كل همك بالسلة وبس؟مابتقولين لي تفضلي؟؟ اسمهان:الله يحييك..مادام أم عبدالرحمن عندنا فالدعوة صايرة بحري!!تفضلي.. دخلت سماح وهي مستغربة من هبال اسمهان!!! وكانت نجلاء واقفة بالمطبخ قالت نجلاء:اش رايك يااسمهان مادام الأكل عندك كثير مرة ليه ماتسوينه على هيئة بوفيه واللي يبي شي يغرف؟؟ اسمهان:والله فكرة بس شلون؟ نجلاء:طاولة السفرة اللي برة نشيل التحف اللي عليها ونرتب عليها كل الصحون الحالي والمالح ونحط القهوة والشاي على جنب وكل وحدة تاخذ اللي تبيه! وبالفعل اشتغلوا الثنتين يرتبون ويجهزون السفرة... وجهزوا نجلاء واسمهان السفرة ونادوا الجماعة وجلسوا ياكلون وأم عبدالرحمن وسماح يتبادلون السواليف.. أم عبدالرحمن:مرة زعلت على اللي صار لتركي ياسماح شلونه هو الحين؟؟ سماح:ماشي حاله.. أم عبدالرحمن:الله يعوض عليه..اللي صار له مو شي بسيط سماح:ماعليك الرِجال ينسون جروحهم بسرعة مو مثلنا حِناالحريم!! وساد الصمت على طاولة السفرة وصارت رانية تناظر اسمهان وتغمز!(يعني اش السالفة!!) دق جوال سماح إلا طلع محمد يستعجلها تنزل عشان يوديها لبيت أختها هند وكانت سماح جالسة من الأول بعبايتها..واستأذنت الضيوف وراحت..... أم عبدالرحمن:ماشاء الله بملكة اسمهان كانت تسريحاتكم ومكياجكم مرة حلوة وين تضبطتوا؟ مرام:بصالون أختي ماجدة... أم عبدالرحمن:ماشاء الله عندها صالون؟طيب اش اسمه؟ووين موقعه؟؟ مرام:اسمه..؟..(ماأبغى أقول اسمه أخاف تفشلوني وتروح ألف وحدة منكم وتقول أنا من طرف رماح ردينية ويصلحونكم على حسابي!!)وموقعه بحي الخالدية... أم عبدالرحمن:خلاص أنا وجوهرة بنتقاول معاكم بدل مانروح لمشاغل يأخرونا ويصبغون وجوهنا أشكال وألوان!! مرام:المشغل وصاحباته تحت أمرك خالتي... أم عبدالرحمن:يسلم لي ذوقك يالغالية..وهالحين استأذنكم ودي أرجع لبيتي..أكمل أموري.. اسمهان:لسه بدري ياخالتي!! أم عبدالرحمن:بدري من عمرك حبيبتي..والله يعطيك العافية ويكثر خيركم ان شاء الله..ماشاء الله عليك فنانة وسفرتك حلوة ماعليها قصور!تسلم أياديك.. اسمهان(بخجل):الله يسلمك ياخالتي!. وقامت أم عبدالرحمن بتطلع وطيبتها اسمهان بتولة عود حاطتها على المدخل.. أم عبدالرحمن:طاب طيبك..وعاش حبيبك!! وخرجت من البيت...وصكت الباب وراها... إلا رانية قامت تطق على الطاولة وتغني:شيلوها شيلة..والليلة ليلة! نجلاء(وهي تتريق وتقلد صوت أم عبدالرحمن):ماشاء الله عليك فنانة وسفرتك حلوة ماعليها قصور!تسلم الأيادي! قامت مرام ترد عليها(وهي تقلد اسمهان):الله يسلمك ياخالتي! مشاعل والشلة:هههههههه نجلاء:يقطع أبو البكش ياشيخة!ماكأني ساعدتك في ترتيب السفرة وشفت سماح داخلة بأكلها وباقي الصحون يا مغلفه بنايلون يا مغلفة بقصدير..يعني من عند أهلك أكيد!!! أفنان:أفاااااا..معونات خارجية؟!يامال الفلس!! اسمهان:بسكم عاد..أهم شي إن الأكل لذيذ واستانستوا عليه! رانية:من ناحية لذيذ..فهو لذيذ...ماتشوفيني منطمة وساكتة؟ من كثر مامليت فمي! بس بصراحة ياحظك بأم عبدالرحمن!حرمة كشخة وذوق اللي يشوفها مايقول كبيرة!حسرة على عجايزنا الوحدة قَشْرة من برة ومن جوه!!!!! اسمهان:ترى خالتي موب كبيرة عمرها مايتجاوز ال46 سنة..بس تزوجت وهي صغيرة.. مرام:بسرررررررعة جيبي صور الزواج! وراحت اسمهان تجيبها وتفرجوا عليها...وبس شافوا عبدالرحمن من غير شنب ولحية فقعوها ضحك! الشلة وهم متجمعين على الألبوم:كااااااااااااااااااااا اااااااك.. نجلاء:تضحكين علينا وتقولين متزوجة سعودي؟؟أقول طلَّع الجنسية ولا بعد؟؟؟ههههه رانية:ماشاء الله وجهه يبرق!مايندرى مين اسمهان من عبدالرحمن!!!!هههههه مشاعل:حرام عليكم أكيد شايف نفسه كشخة!حطمتوا اسمهان!! مرام:اسمهان صديقتي وأعرفها زين..لابدها حلفت عليه يخرب شكله عشان لاتصيده عين!!هههه اسمهان:بلا يبلاكم !هذا صديقه لعب عليه واتفق مع الحلاق يحوسه!! رانية:والله فلَّة زوجك..طلع حتى هو عنده أصحاب راعيين مقالب؟!عسى مو مسميين نفسهم شلة الصاعقة بعد؟!!ههههه نجلاء:لحظة ياجماعة مالاحظتوا كلام أم عبدالرحمن مع سماح؟؟ الشلة:ايه لاحظنا! رانية:ايه صحيح يااسمهان اش السالفة؟؟ماأسمع إلا كلمة الله يعوض عليه!!!لايكون عبير ماتت؟؟ اسمهان:لا الشر بره وبعيد..بس تطلقت!! شهقوا الشلة بصوت جماعي!! اسمهان:بسم الله عليكم!يعني اللي يشوفكم..يقول مساكين ماوصلتكم الأخبار!! الشلة:فعلاً ماوصلتنا ولاندري!! قامت اسمهان تحكي لهم بالتفصيل سالفة الحرق والسحر والسلب والنهب واستغلال تركي! أفنان:يالطيف يارب..ياويلهم من الله وش ذنبه ولد الناس يلعبون عليه؟؟ مشاعل:أشك إني قاعدة أسمع رواية لفجر السعيد!!! رانية:هي صدق إن البنت ذي متشربة الخباثة لدرجة الثمالة!بس ماتوقعتها تطورت لهالدرجة الإبليسية!!! اسمهان:وشفيك تتكلمين مثل العضوات اللي يبون يسوون نفسهم مثقفات بالغصب؟!! نجلاء:ضيقتي صدري بسيرتها!خلاص لاتجيبون طاريها..أهم شي افتكينا منها ومابنشوفها السنة الجاية!! مرام:حكينا ياسمهونة عن شهر العسل ورحلتك لدبي وماليزيا!! وقامت اسمهان تحكي لهم عن كل شي ومواقفها الطريفة حتى بـ مكة! الشلة:ههههههههههه رانية:الله يقطع ابليسك ياسوسو تدلكين رجيلاتك بوسط الحرم؟صدق ماتستحين؟!! نجلاء:أقول زين طاح حظك بأندونيسية تمسج..مو ايرانية كان دهنت سيقانك بـ تفالها!! وطاحوا بسمهونة تريقة ومزح... وقالت مرام:ها ياعسل بتفرجينا على بيتك ولا نسوي هجوم ورحلة استكشافية؟؟ اسمهان:لاتفضلوا أنا مخططة أفرجكم... دخلوا مكتب عبدالرحمن..وقامت رانية تفتش بالكتب وقالت:شوف وجه العنز وإحلب لبن!!طالعوا أسماء الكتب بس ترفع الضغط وتلوع الكبد!! ثورة في اكتشافات نووية! ارهاصات تاريخية..مع وقفة مشرفة! تاريخ الأدب من زبدة الحقب! فتش عن الشخصية المغناطيسية النظام على الطريقة الأفلاطونية اسمهان:فعلاً توجهات عبدالرحمن في القراءة والكتابة جايبت لي الضغط! نجلاء:رجَّال وبيتجاوز الثلاثين..وش تبينه يكتب عن آخر صيحات الفساتين والمكياج؟ولا عن خلطات التبييض والتفتيح؟؟ ودخلوا غرفة النوم وراحت رانية الملقوفة تركض على دولاب اسمهان وفتحته..وقالت:إلى الباحثات عن الكشخة!طبوا وتخيروا!! نجلاء:ياواد يااسمهان ياحركات!اش هالترتيب والتنظيم كله؟؟ رانية:بنات تعالوا نشم ريحة ملابسها أخاف معلقتهم ومو غاسلتهم!! اسمهان:ياشين اللقافة ياناس!وخري أشوف! فتحت رانية دولاب عبدالرحمن ولقيت الثياب الحمراء اللي خربتهم اسمهان معلقة!! رانية:ياويلي ويلاه الرَجَّال انهبل!حلق شواربه ولحيته وصار يلبس أحمر!! الشلة:هههههههههههههه المهم كان انطباع الجميع عن البيت والأثاث زين..طبعاً كل شي كان كشخة وذوق.. بعد ماانتهوا الشلة من جولتهم في بيت اسمهان دعوا لها بالبركة وعجبهم الأثاث والتنسيق.. مشاعل:بيتك مرتب وحلو يااسمهان ماشاء الله ..الله يهنيك فيه.. رانية:يسمونه القفص الذهبي مدري ليش!مع انه مافيه شيٍ يبرق!! مرام:ويقولون عش الزوجية وماني شايفة بيض!!واسمهان ماتطير! نجلاء:ههههه..أقول تعالوا نرفع الأكل من طاولة السفرة... رانية:شمروا أكمامكم يابنيات وخربوا كشختكم شوي وخل نساعد اسمهان بغسل الصحون وتنظيف المطبخ! اسمهان:والله ماتمسكون شي!خالتي واعدتني ترسل شغالتها ترَّفع معاي... وثواني ودق الجرس إلا هي شغالة أم عبدالرحمن ودخلت المطبخ وبدأت التنظيف.. اجتمعوا الشلة بالصالة وقامت رانية توزع الطيران وعددها 3 دفوف عطت واحد لاسمهان وواحد لمرام والثالث قالت رانية لمشاعل:مشاعل تعرفين تطقين؟ مشاعل:أفا عليك..أعرف أطق وأكفخ بعد!! رانية:يالله طقوا..حانَ وقت الفلَّة ياأظرف شِلة!!! وقاموا يطقون وسحبت رانية نجلاء وقامت ترقص معاها وحطت رانية شيلة على راسها وقامت تغطرف وترقص وماخلت رقصة مارقصتها!جمعت كل ثقافات الشعوب برقصها رقص عراقي على عماني على سامري على فرعوني!!على سامبا وفلامينجو!!حتى باليه نطنطت لهم شوي وقامت ترقص باليه على طق الدفوف!!!!ههههه وسط ضحكات الشلة!! التفتت مشاعل خالة أفنان وقالت لأفنان:أما شلتك هذي يافنون شي ماحصل!!! وسحبوا أفنان ترقص معاهم ورجعوا سحبوا اسمهان ودبكوا ورقصوا ورانية عاد تخبرونها كل مادبكت برجلها على الأرض سوت زلزال بالعمارة!! وأم عبدالرحمن قاعدة بصالتها تحت تتابع برنامج وكل شوي تطالع للسقف وتقول:ياساتر يارب وش هاالرفيس؟؟؟ وشغالة أم عبدالرحمن واقفة بالمطبخ تشتغل وتتابعهم من بعيد وتقول بنفسها:مدام اسمهان وهادا ديوف واجد مجنون!!!!!!!!! ولبسوا رانية ونجلاء على رووسهم طِرَح وقاموا يسوون نفسهم عجايز ومسكوا اسمهان بيديها وقامت رانية تقول:لاأوصيك يابنتي يااسمهان لاصفقك زوجك على خد عطيه خدك الثاني!! نجلاء:ايه فديتك ولا ضربك زوجك بـ يد اضربيه بإيدك الثانية! رانية:وأن مد لسانه عليك شبر..مدي لسانك شبرين!! نجلاء:وإن قال لك يمين قولي يسار وإن قال لك فوق قولي تحت! رانية:وخلك نشمية وشاطرة إن قمتي لاتقعدين وإن قعدتي لاتقومين!! أفنان:ياحليلكم ياعجايز الجن!بتخربون بيت البنت! اسمهان:هههه..كأني عاد بأسمع شي من كلام هالمهابيل الله يخلي أمي وخالتي نوال نصايحهم من ذهب... وقضوا الزيارة بتنكيت ووناسة..وشوي وراحت أفنان وخالتها..وبعدهم راحت نجلاء..وبعدها راحت رانية..وآخر وحدة خرجت كانت مرام ونازلة من الدرج وماغطت وجهها لسه وسواقها وشغالتها ينتظرون برة بهالوقت كان عبدالرحيم أخو عبدالرحمن توه واصل من السفر ومسوي مفاجأة لأمه وماخبرها..ويوم شاف السيارة اللي فيها سواق وشغالة ظن إن أمه عندها ضيوف فقام يلف بالحوش بانتظار يخرجون الضيوف من عند أمه..وهو واقف كانت مرام نازلة من الدرج وماهي منتبهة له أما هو تسمرت عينه عليها وفجأة جات عينها بعينه فارتبكت البنت وغطت وجهها وراحت للبوابة بسرعة وركبت سيارتها!!!أما هو من الاحراج لف وجهه بسرعة وراح يدق الباب الرئيسي وفتحت له أمه... أم عبدالرحمن:هلا عبدالرحيم..ياحيا الله من جانا!!ادخل ادخل..وقامت تسلم عليه.. أم عبدالرحمن:وش هالمفاجأة الحلوة؟لاخبرتني بحضورك ولاشي! عبدالرحيم:ماصدقت انهم عطوني اجازة قلت إلا أجي وأقضيها معاكم..وجايب لك أخبار حلوة معي!! أم عبدالرحمن:بشرني..هات!! عبدالرحيم:أخيراً وافقوا بالعمل على طلب النقل اللي صار لي سنين مقدم عليه..وبينقلوني من محطة أرامكو اللي بأبقيق..هنا عندكم بجدة!! أم عبدالرحمن:صحيح؟؟؟؟الله يسعد أيامك ويبشرك بالخير ياولدي قول آمين!! وقامت أم عبدالرحمن تدمع عيونها عبدالرحيم:وش فيك يمه؟ظنيت هالخبر بيسعدك مو يخليك تبكين! أم عبدالرحمن:أبكي من فرحي!ماتتخيل ياولدي كم صار لي أدعي إنكم تتجمعون حولي وماتفارقوني أبد..وهذا أخوك عبدالمجيد صار له مدة من يوم نقل جدة وصار ساكن معي..وأختك أحلام كلها شهر بالكثير وبتسكن مع زوجها بجدة!وعبدالرحمن الله يحفظه هو الوحيد اللي ماابتعد عني منكم الحمدلله على كل نعمة..عسانا مجتمعين على الخير دايماً.. عبدالرحيم:يمه بغيت أسألك سؤال؟ أم عبدالرحمن:اسأل! عبدالرحيم:شفت سيارة واقفة بره فيها سواق وشغالة..منهي سيارته؟؟ أم عبدالرحمن:أكيد سيارة وحدة من ضيوف اسمهان زوجة أخوك.. عبدالرحيم:أهلها كانوا عندها؟؟ أم عبدالرحمن:لا..هذول صاحباتها بالمدرسة..يازينهم ويازين جلستهم كلامهم يونس..كنت عندهم فوق بس حسيت انهم يبون ياخذون راحتهم بالسوالف فاستأذنت ونزلت... عبدالرحيم:طيب يمه ماتدرين سيارة مين فيهم هذي اللي كانت بره؟؟ أم عبدالرحمن:لا مدري..بس انت وشفيك تسألني من أول؟عسى ماشر؟؟ عبدالرحيم:بصراحة؟انتي تعرفيني ماأحب ألِف وأدور..أنا ظنيت الضيوف عندك وبيطلعون استحيت ورحت للحوش الخلفي بانتظار يخرجون من عندك وبعدين أدخل أنا!بس تفاجئت إن فيه وحدة نازلة من فوق في الدرج وناظرتها من غير قصد..وكانت حلوة يمه..حلوة مرة!!!! أم عبدالرحمن:يوووووه الله يلعن ابليس!عسى شافتك وانت تناظرها؟الحين وش يقولون عنَّا الناس؟عيال أم عبدالرحمن عيونهم زايغة؟؟؟ عبدالرحيم:يمه الله يهديك لاتفهميني غلط أنا ناظرت بدافع الفضول لأني أسمع صوت بالدرج بس عيوني تسمرت عليها والنظرة الأولى لي..وبعدين غضيت بصري!بس يمين ماقصدت آآذي بنت الناس وأتمقل فيها!!والصراحة هي حياوية أول ماشافتني غطت وجهها وراحت تركض بسرعة للباب أم عبدالرحمن:الله يغفر لك ان شاء الله... عبدالرحيم:يمه ماتدرين ان كانت متزوجة أو مخطوبة؟؟ أم عبدالرحمن:أقول؟أشوفك كثرت أسئلة حول بنت الناس؟لايكون معجبتك؟؟ عبدالرحيم:حيــــــــــــــــل يمه!أقول لك حلوة حلوة وحشيمة!!!! قالت أم عبدالرحمن بنفسها:فشيلة لاتكون نجلاء وينصدم إنا مابنقدر نخطبها له لأننا سبق وخطبناها لعبدالمجيد!!!! قامت أم عبدالرحمن واتصلت على اسمهان وبعد السلام:اسمهان حبيبتي الشغالة انتهت؟ ولا لسه؟ اسمهان:ايه خلاص انتهت بس واقفة تكنس مجلس الحريم..تبينها الحين خالتي؟؟ أم عبدالرحمن:لا بس أول ماتنتهي خليها تنزل لأن عبدالرحيم توه واصل من السفر وأبيها تجهز لنا العشا..ماشاء الله ضيوفك راحوا؟؟ اسمهان:ايه راحوا من أول..آخر وحدة خرجت من عندي قبل شوي كانت مرام..تأخر عليها السواق..بس أشوى ماجاء عبدالرحمن وهي موجودة كان انحرجت مسكينة.. أم عبدالرحمن:ياحليلهم صاحباتك انتي أول وحدة تزوجتي فيهم وأشوفهم فرحانين فيك.. بس مافيه وحدة منهم زواجها قريب؟؟ اسمهان:لاااا..ولاوحدة مخطوبة منهم أصلاً!!! أم عبدالرحمن:يلا الله يكتب لهم اللي فيه الخير.. =========== قامت اسمهان وعبت صحنين كبيرة من كل الأشكال والأصناف الحالية والمالحة اللي عندها وعطتهم الشغالة تنزلهم لأم عبدالرحمن على العشا..وراحت الشغالة وقامت اسمهان تغير هدومها وتستعد لحضور عبدالرحمن من العمل..ورتبت الأكل على طاولة السفرة وحطت معاه كاستين عصير وجابت الشمعدانات الجديدة اللي أهدتها اياها نجلاء وولعت الشموع اللي فيها وجابت باقة الورد اللي جابتها مرام وحطتها بعد على طاولة السفرة وطفت الأنوار وجلست على ضوء الشموع تنتظر عبدالرحمن.. وآثاري عبدالرحمن يوم جاء شاف سيارة عبدالرحيم واقفة عندالباب وفرح ودخل على أمه وسلم على أخوه وعبدالمجيد وكانوا جالسين يتعشون وقعد يتعشى معاهم..! وبعد وقت درى من أمه ان ضيوف اسمهان راحوا!!!!واستأذن وطلع لزوجته اللي زهقت من الانتظار وحطت راسها على الطاولة و غفت!!!! وفتح الباب ولقي الدنيا مظلمة!ومافي نور إلا نور الشموع واسمهان رايحة فيها وحاطة راسها على الطاولة ونايمة!!!! وراح عبدالرحمن يتسحب لغرفة النوم وغير هدومه وجاء سحب كرسي وجلس قدام اسمهان..وهي مو حاسة فيه! وقام يغني: سمهونتي خبريني سمهونتي خبريني بـ...................... وفزت اسمهان من الخرعة وقالت:بسم الله!!!!! وطاح الشمعدان وولعت الشمعة بمفرش الطاولة وقام عبدالرحمن يركض يبي يطفي النار اللي شبت واسمهان تصرخ!! وطفى النار وولع اللمبة وقام يهَّديها!! اسمهان:حسبي الله على ابليسك!ليش ماطقيت الباب قبل لاتدخل؟ومتى مداك تغير هدومك؟ عبدالرحمن:وش أسوي لك؟قلت أبي أفاجئك بحضوري لقيتك حاطة راسك على الطاولة وتشخرين!! اسمهان:زين إقعد نتعشى! عبدالرحمن:لا..الحمدلله تعشيت تحت مع أمي وأخواني! اسمهان:ياشينك! وأنا اللي ماحطيت بفمي لقمة مع الضيوف قلت أنتظرك وناكل سوى!! عبدالرحمن:مايخالف..تعشي انتي بالعافية..أنا ظنيت ان ضيوفك لسه عندك!! وقامت اسمهان توريه هداياهم اللي جابوها,,, عبدالرحمن:جزاهم الله خير ماقصروا..مو هم نفسهم اللي جابوا لك الصندوق الوردي الكبييير اللي معبى هدايا بيوم عرسنا؟؟ اسمهان:ايه..هُم.. عبدالرحمن:ماكان له داعي يكلفون على أنفسهم اليوم بعد ويجيبون شي ثاني..الله يعوض عليهم ان شاء الله.. وشوي قال عبدالرحمن:يووووه تذكرت!! ونزل للسيارة وجايب معاه باقة ورد كبيرة وكيس! استغربت اسمهان وقالت:وش هذا؟ عبدالرحمن:اليوم الزملاء في القسم احتفلوا فيني احتفال صغير بمناسبة الزواج وجابوا جاتوه وعصيرات وباقة الورد هذي.. اسمهان:حلوة ألوان الورد مرة... وأخذتها وحطتها على الطاولة.. وقام عبدالرحمن ناولها الكيس وقال:هذي هدية بسيطة مني ان شاء الله تعجبك! فتحت اسمهان الكيس وطلعت منه علبة كبيرة مربعة وفتحتها لقيت بداخلها دفتر كبير سماوي وصفحاته فيها رسومات ورد شفافة!! وقالت:اش هذا دحومي؟؟جايب لي أوتوجراف؟؟ عبدالرحمن:هو صحيح شكله أوتوجراف..بس أنا جايبه لك تستخدمينه استخدام ثاني!! اسمهان:شلون يعني؟ عبدالرحمن:الصراحة قلت بنفسي بدل مايمر عليك اليوم بغيابي وتقضينه على النت في هواشات ومناقر مع العضوات وماتثمنون كلامكم ولاتحسون إنكم محاسبين على كل كلمة تلفظونها..أجيب لك هالدفتر وتخلينه مُذكرة للفوائد! اسمهان:أكذب عليك لو قلت لك إني فاهمة شي!! عبدالرحمن:يعني كل يوم من باب اثراء حصيلتك اللغوية والمعرفية قبل ماأروح العمل بآخذ هالدفتر وأكتب لك فيه كلمات وانتي عليك تدورين معانيها في النت وتسجلينها بخطك في الدفتر! اسمهان:وليش عاد فرة الراس هذي؟ بأطبعهم لك بورق وأعطيك اياهم!! عبدالرحمن:ياحياتي أنا عارف معانيهم ومو محتاج لهم!أنا متعمد أطلب منك تكتبينها بخط يدك بهذي المذكرة عشان تثبت المعلومة بذهنك وتسير هذي المذكرة مرجع لك بعدين وبتلاقين إنك بفترة بسيطة اكتسبتي عدد كبير من المعلومات بطريقة سهلة بالإضافة إلى إنها وسيلة مفيدة لشَغل وقت الفراغ وتثقيف نفسك دينياً ودينيوياً!!!! اسمهان:بس إنت كأنك تحسسني إني ماأعرف شي! عبدالرحمن:مو بس انتي اللي ماتعرفين كل البشر مهما تعلموا يظل هناك فيه أشياء مايعرفونها..الله قالها بكتابه(وماأوتيتم من العلم إلا قليلا)..والشافعي اللي كان من علماء المسلمين وفقهائهم قال: كلما ازددت علماً...ازددت علماً بجهلي!! وراحوا العروسين غرفة نومهم يتسامرون إلى أن غلبهم النعاس! ============= نجي لسماح اللي لما خرجت من بيت اسمهان راحت لبيت أختها هند وكان عند هند عدد كبير من الضيوف وأمها(أم تركي)...وبعد ماراحوا ضيوف هند بقي عندها سماح وأم تركي بس..فقاموا يسولفون.... أم تركي:شلون اسمهان ياسماح يوم شفتيها؟عساها مبسوطة؟؟ سماح:ايه ماشاء الله..مبسوطة.. هند:ومين كان عندها؟أهلها؟ سماح:لا ..أم زوجها وصاحباتها..بس تتذكرين يمه البنت اللي كانت لابسة وردي بملكة اسمهان وحاطة شال على كتفها؟ أم تركي:لا نسيت!وشفيها؟؟ سماح:يمه لاتقولين نسيتيها..انتي بنفسك قلتي لي:لو عندي ولد ثاني غير تركي كان خطبتها له!صح؟؟؟؟ أم تركي:ايه ايه ذكرتها.. هند:أكيد ياسماح تقصدين انك تبين نخطبها لتركي صح؟؟ سماح:ايه والله ياليت.. عجبني هدوئها..مافيها جراءة عبير..وأهلها حسب ماأعرف من اسمهان انهم ناس ملتزمين يعني بيخافون الله في تركي موب مثل أم عبير الله يصلحها.. هند:ياليت تركي يوافق كان أخطبها له الليلة!! أم تركي:أنا أقول العجلة مالها داعي!مشكلته مع عبير ماصار لها شهر..خليه يرتاح شوي وعقبها يصير خير! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
صحيت اسمهان ثاني يوم من النوم على آذان الظهر ومالقت عبدالرحمن جنبها وفتشت عنه ولقيته قاعد بغرفة المكتب ومقابل اللاب توب طالعت بالشاشة وقرأت عنوان الموضوع اللي جالس يكتب فيه وكان بعنوان(تاريخنا الإسلامي والتأرجح بين الضعف والقوة!!) عبدالرحمن:بسم الله الرحمن الرحيم!!لا إحم ولادستور؟؟ اسمهان:قاعدة أطالع وش كاتب!بالله اش دَخَّل المراجيح بالتاريخ الإسلامي؟ عبدالرحمن:أقول يازين المطبخ!روحي اطبخي لنا غداء لذيذ من يدينك الحلوة! خرجت اسمهان من المكتب وهي تفكر بنفسها:متعب نفسه عبدالرحمن مدري هل هو يفهم اللي يكتبه والا يكتب اللي يفهمه؟ وطبخت اسمهان ايدام خضار+رز أبيض..ومعاها سلطة.. وقعدوا يتغدون..صار عبدالرحمن يطالع باستغراب في الإيدام.. اسمهان:خير؟أول مرة تشوف ايدام؟؟ عبدالرحمن:الصراحة خليتيني بـ حيرة!هذا ايدام ولا مرق لحم؟؟ اسمهان:لا إيدام! عبدالرحمن:ايه.. بس ياقلبي أنا شايف ماي مخلوط معاه صلصة والخضار قاعدة تسبح!! اسمهان:ياخي ماتعرف تمدح؟ عبدالرحمن:و ربي لو قدامي شي يستاهل المدح كان مدحته!يعني أقدر أقول لك السلطة طعمها حلو! اسمهان(باستهزاء):ههههههه وانتهوا من غداهم وراح عبدالرحمن يتجهز للعمل واسمهان تنظف المطبخ... عبدالرحمن:إذا شفتي نفسك زهقانة من البيت انزلي عند أمي تقهوي معاها.. اسمهان:ان شاء الله..بس تصدق إني مليت من القعدة بالبيت؟؟ عبدالرحمن:مايخالف..مدام بكرة الأربعاء بآخذك معاي وأنا رايح للعمل وأوديك عند أهلك وأنا راجع أمر آخذك... اسمهان(بحماس):خوش فكرة! وبعد ماراح عبدالرحمن للعمل دخلت اسمهان تنظف غرفة النوم ولقيت الدفتر السماوي على التسريحة ومكتوب بأول صفحة.. زوجتي العزيزة...مامعنى المصطلحات الآتية:الإحصار-الترجيع-الإضطباع-العج والثج؟؟؟ قالت اسمهان:يمه!وش هالكلمات الغريبة أول مرة تمر علي!أخاف أبحث عنها بالنت وتطلع لي مواقع للجن وأروح فيها!!! وبعد ماانتهت من شغل البيت قعدت على النت وبحثت عن معاني هالكلمات وكانت الإجابة: الإحصار:هو عدم التمكن من أداء أو إتمام مناسك الحج أو العمرة بسبب مرض ونحوه... الترجيع:أن يقول المرء الشهادتين سراً في نفسه ثم يقولها جهراً.. الاضطباع:هو طريقة لبس المحرم للرداء...بأن يلبسه تحت منكبه الأيمن ويلقيه على عاتقه الأيسر ويبقي كتفه الأيمن مكشوف.. العج:هو رفع الصوت بالتلبية باعتدال.. الثج:هو إسالة دماء الهدي(الذبح) ======= وعن طريق البحث في معاني الكلمات السابقة اكتشفت اسمهان انها قابلت كلمات كثيرة أول مرة تعرف معانيها.. بعد المغرب اتصلت أم اسمهان عليها وبعد السلام.. الأم:انتي ببيتك يااسمهان؟؟ اسمهان:ايه يمه.. الأم:وش قاعدة تسوين؟؟ اسمهان:أبد ..رتبت البيت..وقرأت مواضيع بالنت وهالحين دخلت المطبخ أسوي شاي وأجلس أشربه على رواق! الأم:طيب اش رايك لو نمر أنا وابتسام عليك؟..من العصر وحِنا بالسوق..وتونا خلصنا وشفنا نفسنا قريبين منك قلنا نمر عليك شوي! اسمهان:ياهلا ويامرحبا..تعالوا أنتظركم! الأم:خلاص ربع ساعة ونكون عندك.. وقامت اسمهان تبخر البيت وتسوي القهوة وتجهز الأكل والحلى اللي بقى من أمس... وغيرت ملابسها..وشوي ودق الجرس عليها... رحبت بأمها وابتسام وبناتها الصغار اللي من يوم مادخلوا قاموا يستكشفون البيت ويعيثون في الدنيا فساداً... واسمهان قاعدة مع أختها وأمها وقلبها على بيتها اللي قاعد ينعفس! وبعدالسواليف..قالت ابتسام:ماباركتي لي ياسوسو؟؟ اسمهان:مبروك..بس على إيش؟بتشترون بيت تمليك؟؟ ابتسام:لا..أنا حامل! اسمهان:مبررررررررروك... ابتسام:ادعولي بس أجيب ولد وأفتك من لسان أم زوجي!! أم اسمهان:يابنتي البنت والولد صاروا مثل بعض بهاالزمن أهم شي الصحة والعافية..والله يامحبة ولدي محمد ماتتخير عن محبتي لكم.. وشوي وسمعوا صوت تكسير!قامت اسمهان تركض ولقيت بنات ابتسام دخلوا غرفتها وكسروا لها لمبة الأبجورة اللي على الكومادينة!!! مسكتهم فرصت أذانيهم وطلعتهم من الغرفة!! ورجعت لابتسام وأمها تصب لهم القهوة إلا بنات ابتسام سحبوا كل الشوكولاتة اللي بالسَبَت وأكلوها!وناولت اسمهان أختها ابتسام فنجال القهوة اللي صبته بس بنات ابتسام كانوا يدورون بالغرفة فكبوا الفنجال على المفرش وتوسخ!وطاح الفنجال وانكسر... خاصمتهم اسمهان.. هيفاء:مالك شغل!نبغى نلعب! سارة:أنا أقول لبابا إنك قرصتي إذني قبل شوية!! اسمهان:وتبين تخلفين ياابتسام! اللي عنده عيال من هالشاكلة المفروض يسوي عملية ربط!!! ابتسام وأمها:ههههههه ابتسام:حرام عليك ياالظالمة والله هالعصفورتين هم نور البيت!! ودارت شوية سواليف وجاء زوج ابتسام وأخذهم ورجعوا البيت وقعدت اسمهان ترفع البيت من جديد...عقب بنات ابتسام مارموا الخداديات على الأرض ونزلوا التحف من أماكنها..وحالة!! قالت اسمهان بنفسها:مرة ثانية بأعلق لوحة على الباب مكتوب فيها(ممنوع اصطحاب الأطفال!) ومرت عدة ساعات وجاء عبدالرحمن من العمل وظل يتناقش مع اسمهان بمعاني المصطلحات اللي جمعتها... ===== اليوم الثاني وعبدالرحمن رايح للعمل في الظهر أخذ اسمهان معاه ووداها لأهلها وكانوا ينتظرونها تتغدى معاهم..أما عبدالرحمن تغدى في العمل.. وفي العصر جات أسماء واستمرت الجلسة بالسواليف إلى الساعة 11 بالليل وحكت لهم اسمهان يومياتها وعن فشلها في الطبخ.. الأم:وعلى ايش خليتينا نخسر ونشتري لك كتب بذيك الحسبة؟؟ ابتسام:صادقة أمي..لو تطبقين الوصفات بحذافيرها تنجح الطبخة معك.. أسماء:تستاهلين بقوووووووة!!ياما ترجيتك تدخلين المطبخ وتتعلمين لك شي مفيد وترفضين..البلا لو بكرة فكر زوجك يعزم أمه وأخوانه عندك كيف بتكون سواتك؟؟ اسمهان:تصدقون مافكرت فيها؟؟ ابتسام:وترى الرجَّال بيجاملك بأول شهرين وممكن يجيب من مطاعم بس عقبها بيمل وبيعطيك من النقد والخصام على راسك..بصراحة الواحد يحق له هو ماتزوج عشان يقعد ياكل من مطاعم ياعالم شلون نظافة أكلهم!!! أسماء:زيدي على كذا إنه أكل المطاعم مو بلذة أكل البيت أبداً..ببيتك تقدرين تتفننين بأحلى وصفات حلى وموالح..مو مثل الأكلات الجاهزة الخيارات محدودة وماهي بذاك الزود... الخ........ وبعد نهاية عمل عبدالرحمن أخذ اسمهان للبيت.. وقبل ماينامون قال عبدالرحمن: اش رايك بكرة الخميس نعزم أبوك وأخوك محمد وأزواج أخواتك وأهلي وأهلك عندنا..إلى الآن أبوك مادخل بيتنا! اسمهان:فكرة حلوة..بس أنا نفسي أطلع أتمشى.!!! عبدالرحمن:ملحوقة الخرجة ان شاء الله..نطلع الجمعة..وبكرة خلينا نسوي عزيمة بالمرة يفرح عبدالرحيم بمناسبة نقل عمله لجدة...اتفقنا؟؟ اسمهان:اتفقنا... جاء يوم الخميس واسمهان من أول اليوم وهي تفتح كتب الطبخ وتحوس بين الوصفات عشان تسوي حلى مع القهوة!! جاء عبدالرحمن وقال:كلمت الجميع وعزمتهم وبإذن الله بيجون بعد المغرب..وعلى فكرة أمي عرضت علي ترسل الشغالة لك عشان تساعدك في الشغل.. اسمهان:إيه تكفى أنا بحاجتها..حتى أمي كلمتني وقالت لو تبين كاتيا؟ نرسلها لك...بس انحرجت وقلت لها:شكراً الله يعطيك العافية.... عبدالرحمن:أهم شي عندنا بن وهيل وتمر ولوازم الشاي من سكر ونعناع وغيره؟؟ اسمهان:إيه..بس الورطة واش أطبخ على العشاء؟ماشاء الله أهلي وأهلك قبيلة!!! عبدالرحمن:ايش..ايش؟؟ماسمعت!انت ي من صدقك بتطبخين لهم العشا؟؟...حبيبتي هذول أهلنا وعزوتنا حرام نخليهم فيران تجارب لطباخك!!!أنا هالحين رايح أحجز كوزي فاخر في أحسن مطبخ ذبايح.. اسمهان:أشوى!الله يطمن قلبك!كنت شايلة هم من الليل..وماعرفت أنام زين!!إذن بأسوي كم صنف حلى مع القهوة وأقدم معاها سبتات الشوكولاته اللي عندنا...والتمر.. خرج عبدالرحمن..وجات (سيري) شغالة أم عبدالرحمن تساعد اسمهان..وكانت واقفة تغسل مواعين بالمطبخ وتنظف..وكانت الشغالة تراقب اسمهان وهي تسوي حلى وتخبص خبيص!! سيري:مدام اسمهان أنا يئرِف يسوي هلى كويس مرة!! اسمهان:صحيح؟مثل إيش؟ سيري:ماما أم أبدورهمان لما في إيجي ديوف أنا أسوي كله هلى..أنا يئرف سوي(تشيزكيك-هلى كيري-هلى كورن فليكس-قوالب بسكوت بالتوفي-بسبوسة-كنافة)..... اسمهان:الله أكبر عليك!كل هذا تعرفين تسوينه ومخليتني أحوس من أول؟!!!زين افتحي دولاب المعلبات وسوي الحلى اللي تبينه ومقاديره متوفرة.. وبدأت الشغالة تسوي أكلات ودق تليفون اسمهان وراحت ترد..إلا طلعت المتصلة ابتسام... ابتسام:هلا سمهونة..شلونك؟ اسمهان:ماشي الحال... ابتسام:طبعاً من غير ماأسألك..أكيد حايسة؟؟ اسمهان:نوعاً ما... ابتسام:طيب بغيت أقول لك..اش تحتاجين مساعدة؟؟تبين أسوي لك حلى؟؟ اسمهان:لاتسلمين..دبرت نفسي ابتسام:زين..جهزتي السلطات؟؟ اسمهان:يووووه تصدقين ماخطر في بالي؟!! ابتسام:زين إني ذكرتك!بس انتي سوي على قد الخضار الموجودة عندك وأنا بأسوي نوعين سلطة وأجيبهم معاي..وعلى فكرة أسماء كلمتني بتجيب معاها ترمس قهوة وسماح بعد بتجيب..انتي سوي واحد بس... اسمهان:الله يسعدكم..تسلمون.. وبعد ماانتهت المكالمة راحت اسمهان بالخضار المتوفرة عندها سوت 3 أنواع سلطة.. ================ في بيت أبوعبير كان الأخوين سعد(بأول ثانوي) وسامي(بثاني متوسط) جالسين وهم بقمة الزهق والملل..ينتظرون أبوهم.. ولما رجع من عمله... سعد:أبوي نبي نتكلم معاك.. أبوسعد:تفضلوا اش عندكم؟؟ سعد:الصراحة يبه..إحنا مو مرتاحين لهذي الحياة في البيت! أبوسعد:و ليش؟؟ سعد:يبه كل يوم نتغدى ونتعشى من مطاعم وملابسنا نغسلهم ونكويهم برة..وانت طول اليوم برة البيت أو مسافر..ومافي أحد يراعي أمورنا!!! أبوسعد:والمطلوب؟؟ سامي:إنت أدرى يبه!!! أبوسعد:مو أمكم لو فيها خير كان صانت بيتها وحافظت عليه وماوصلتنا لهاالمواصيل!!! سامي:يبه اللي صار صار..إحنا نفكر باليوم... سعد:يبه..احنا قررنا إننا نروح الرياض ونعيش مع أمي وعبير!!! أبوسعد:ايـــــــش؟؟انتم ماتستحون؟أمكم وأختكم قاعدين ببيت خالكم عثمان..وخالكم عثمان عنده فرقة بنات!ناقصينه انتوا؟؟ سعد:يبه..إنت ربي فاتحها عليك وتقدر تجيب لنا أحسن بيت في الرياض! أبوسعد قام يطالع بـ سامي وقال:وإنت؟اش رايك بكلام أخوك؟ سامي:يبه..أنا رايي من رايه!إنت سفرياتك كثيرة ومافي أحد يداري أمورنا ويراعيها..ومومتفرغ لنا مثل أمي..يكفي إنها من يوم ماطلقتها ماوديتنا نزورها ولامرة!!!! أبوسعد:خلاص أفكر بالموضوع والله يعين!! ودخل أبوسعد ينام لكن الموضوع ظل شاغل باله..وقرر إنه يحزم الأمر ويكلم عثمان الأخ الأكبر لأم عبير! وبالفعل اتصل عليه وسلم... أبوسعد:الحقيقة ياعثمان أنا بغيتك بموضوع.. عثمان:تفضل ياأبوسعد.. أبوسعد:عمارتك اللي انت ساكن فيها..هل متوفر فيها شقة فاضية؟ عثمان:حالياً لا..بس عقب أسبوعين فيه شقة بيطلعون المستأجرين منها..بس إنت ليش تسأل؟؟ أبوسعد:الحقيقة أنا مقدر ان وضع أختك وبنتي عبير عندك بالبيت صعب! عثمان:أفا عليك وش هالكلام..أم عبير أختي ومن لحمي ودمي وعبير مثل بناتي بالضبط! أبوسعد:بس أنا محتاج الشقة عشان أولادي بعد يبون يعيشون مع أمهم..ومو معقول بأخليهم يشاركونكم بنفس البيت!وأجار الشقة بتاخذه مني مثلي مثل أي مستأجر يجيك!! وبعد أخذ وعطا وافق الخال عثمان على هالاقتراح ووعد أبوسعد إنه إذا طلعوا المستأجرين يكلمه عشان يجي يستأجر ويجيب الأثاث وراح الخال عثمان وفاتح أخته أم عبيربفكرة أبوسعد.. أم عبير:وسعد وسامي اش اللي يجيبهم يعيشون بالرياض؟؟أكيد هالخبيث سواها وراح خطب ووده يطردهم عشان يخلى له الجو!!! عثمان:اتقي الله ياشيخة..هالفكرة أصلاً مو فكرته!الأولاد هم اللي أصروا يجون هنا وبالذات إن أبوسعد سفراته كثيرة والأولاد لاتنسين انهم مراهقين ويبي لهم من يهتم بأمورهم!!! أم عبير:وهالأنذال توهم يعرفون قيمتي؟؟وأنا من يوم تطلقت وجيت الرياض ماواحد منهم رفع علي سماعة!!خلهم ينطقون ببيت أبوهم!أنا ماأبيهم!!! عثمان:لاحول ولاقوة إلابالله..الظفر عمره مايطلع من اللحم!وهذا بدل ماتفرحين إن شملكم بـيلتم مع عيالك؟؟ عبير:يمه...هذي فكرة زينة..وبيسير لنا بيت بروحنا وأبوي بيتكفل بكل شي من ايجار وأثاث واش تبين أحسن من كذا؟؟ أم عبير بداخلها صارت تفكر وتقول:شلون مافكرت فيها هذي؟فرصة أرجع كل قرش سحبه مني!!!! ========= بدأت عزيمة اسمهان بحضور الضيوف أخواتها+سماح+أم زوجها+أم تركي وهند والرجال أبوها وأخوها وأزواج أخواتها وأخوان زوجها وتركي... وأهلها كانوا جايين ومحملين بالهدايا لبيتها... ولما دخلوا بنات ابتسام مسكتهم اسمهان على جنب وأعطتهم كاتيا وقالت:هذول الثنتين تربطينهم جنبك ولو خربوا لي شي بالبيت انتي اللي بتتسطرين بدالهم!!! كاتيا:ههههه..أوكيه مدام.. أما سماح جات هي وهند من غير عيالهم لأنهم خلوهم بالبيت نايمين ومعاهم الشغالة... اسمهان:ليه ماجبتي أولادك ياسماح؟؟بنات ابتسام هنا خل يكمل الطقم مرة وحدة!!! سماح:لاياحبيبتي!أنا أدري إن العرايس يتضايقون دايماً من الأطفال الصغار!! وكانت الجلسة حلوة والكل يسولف وشافوا أهل اسمهان أنواع الحلى مزينة الصحون واستغربوا!! أما أم عبدالرحمن عرفت انه شغل خادمتها سيري!! أسماء وهي تهمس لاسمهان بوسط المجلس:بِس بِس! اسمهان:خير؟؟ أسماء(بصوت منخفض):هالحلى شغل مين؟؟ اسمهان:شغل إيدي طبعاً! أسماء:الله أكبر!والله لو تفحطين ماسويتي مثله!! اسمهان:عبدالرحمن سوَّاه!! أسماء:ياشيخة؟؟الرِجال حطيهم عند الشوي..وش فهمهم بالحلى؟ اسمهان:يختي شغالة خالتي سوت الحلى..ارتحتي؟؟ أسماء:آه يالخايبة!تعزمين خالتك أول مرة على أكل شغالتها؟؟ اسمهان:أوووف!!! وقامت تباشر على الضيوف.. وقبل العشاء راحت تعبي صحون الفاكهة وتغرف السلطات..وتجهز السُفر.. وانحطت تباسي الكوزي الفاخرة على السفرة وهي مزينة باللحم والمكرونة والمكسرات والبيض المسلوق والخضار..بالإضافة للسمبوسة..وصحون ايدام بامية وايدام رجلة من المطعم...والسلطات والفاكهة وقوارير موية الصحة والمشروبات الغازية... أم تركي:الله يعطيك العافية يابنتي..ماشاء الله بنات هالزمن مرتاحين بعزايمهم..مو مثلنا قبل كان أبوتركي يذبح الذبيحة في البيت ويصلخها ويعطيني اياها أطبخها!! أم عبدالرحمن:لاالحمدلله ماقد طبخت ذبايح بس أبوعبدالرحمن الله يرحمه زمان كان يطبخها بنفسه ومع الوقت صرنا مانجيبها إلا من برة..بيني وبينكم ألذ وأريح..الواحد وده يقابل ضيوفه لازاروه..مو يقضي ليله بالمطبخ! أم تركي:صدقتي ياوخيتي..أصلاً الناس اختلفوا وظروف الحياة ماهي بمثل أول..الناس تدور على الشي السريع والراحة..أنا لو يصير ببيتي عزيمة هالحين ماعرفت أتصرف من دون بناتي!ولاكأني ذيك اللي كنت أحط وأشيل من قبل!! أم اسمهان:ومين سمعك!بعد كل زواج أو ملكة لأحد من عيالي رجولي تظل تآلمني أسبوع..الصحة صايرة يارب لك الحمد..يالله حسن الختام بس! أم عبدالرحمن:صراحة مافي أزين من القعدة بشمس الصباح وشمس العصر...تنعش القلب وتشد العظم..والهوا الرباني أحسن من هواء المكيفات اللي يدخِل علينا غبار.. أم اسمهان:ماشاء الله تبارك الله ياأم عبدالرحمن إنتي أحسن مني ومن أم تركي!أنا حاطة حيلي بالأكل عشان كذا منتفخة!وأم تركي حارمة نفسها لين ماصارت مثل العود! أم تركي:أنا هذي طبيعتي أكلي قليل وجسمي ضعيف..ماتشوفين عيالي كلهم طلعوا لي.. وقاموا يتناقشون عن الأجسام والأكلات ولما انتهوا من الأكل وقاموا يرفعون السفرة جت سماح تساعد اسمهان في رفع تبسي الرز بس صاحت فيها هند:سمـــاح!لاتشيلين شي ثقيل حرام عليك!خلي الشغالات يشيلون! سماح:يوووه نسيت! اسمهان:خير؟اش السالفة؟ سماح:أنـــــــا...عقبال عندك حامل بشهرين.. اسمهان:مبروووك..اش سالفتك انتي وابتسام تتنافسون؟؟ سماح:لا تنافس ولاشي..السالفة جت كذا من غير تخطيط!وبيني وبين ابتسام أسابيع بس أناسابقتها.. اسمهان:يالله ان شاء الله ربي يرزقكم بنية حلوة مثلي!! سماح:هههه لو تدرين ياسمهونة عن أخوك محمد..أول ماعرف إني حامل قال ان كانت بنت بأسميها اسمهان!وإن ولد بأسميه عبدالرحمن!!! اسمهان:فدييييييته هالحمود كله ذوق.. ورجعت اسمهان خلت شغالة أهلها وشغالة أم عبدالرحمن يرتبون المطبخ وجلست مع ضيوفها!! وناداها عبدالرحمن.... اسمهان:نعم؟ عبدالرحمن:وين الشاي الله يهديك؟صار لنا ربع ساعة من يوم قمنا من فوق العشا!! اسمهان:ماسويت!!بس اش تبون؟شاي أخضر ولا أحمر؟؟ عبدالرحمن:الله يصلحك يااسمهان المفروض مويةالشاي تكون على النار من قبل العشا وعلى نار هادية ومواعين الشاي زاهبة بالصينية!!هيا بسرعة عجلي علينا! ودخلت تسوي الشاي للرجال والحريم ونست تحط سكر! وصب عبدالرحمن الشاي لضيوفه ويوم جاء يشرب لقي الشاي مُر! ودق على اسمهان وطلب سكرية! ومرت العزيمة على خير الأمهات الثلاث يسولفون سوى وهند وأسماء سوى واسمهان وسماح وابتسام سوى!! أما في مجلس الرجال كان الحوار يدور عن أشياء مختلفة منها... أبواسمهان:ياولدي ياتركي الشباب هالحين صاروا يتأخرون عن الزواج بسبب الظروف الاقتصادية والمعيشية الصعبة..بس انت ماشاء الله عليك مو قاصرك شي..ليش قاعد تِضيعْ الأيام؟؟خل أمك تفرح بعيالك على الأقل!! تركي:كل مافكرت بالموضوع تراجعت عنه..ان شاء الله الأيام الجاية بتتيسر! عبدالرحمن:مدري ليه عندي احساس إنه لاجانا بنت وكبرت بنلاقيك جاي تخطب!أخاف صدق يجي ذاك اليوم وإنت ماتزوجت! محمد:خله يصف جنب ناصر ولد عمه!مضرب عن الزواج ويبيله ضرب على أفكاره المتشائمة عن الحياة الزوجية!! الجميع:ههههههه محمد:إلا صدق وش أخباره ناصر ياتركي؟؟سوى جريمته بأشكالكم ولازدنا شفناه!! تركي:إلا جاء زواجنا بس كان متلثم! محمد:ليييييييش؟ تركي:لأني حلقت شنبه وسكسوكته!! الجميع:هههههههه =========== وخرجوا كل الضيوف وهم يدعون لاسمهان وعبدالرحمن بالبركة.. اسمهان:ها اش رايك في العزيمة يادحومتي؟؟ عبدالرحمن:حلوة..بس الشاي اللي جبتيه ماعرفنا الأخضر فيهم من الأحمر!كلهم نفس اللون!! كانت أم تركي حزينة على أم ناصر وتتذكرها وتتذكر أيامها بس الشغالة كانت متأثرة أكثر لأنها خدمت أم ناصر قرابة الـ8 سنوات والبكاء ذابحها..وفجأة تذكرت الشغالة إنه أم ناصر قبل مايغمى عليها في البيت وصتها تبلغ ناصر إن جرى لها شي..إنه يفتح الدرج المقفول اللي بغرفتها.. أم تركي:وأي دُرج مقفول كانت تقصد؟؟؟ الشغالة:أنا مافي معلوم.. أم تركي:ان شاء الله أبلغ ناصر.. وبالسيارة في طريق العودة للبيت كان تركي وناصر جالسين والحزن لاجم ألسنتهم... ناصر:توي اكتشفت وش كثر أنا أناني وقلبي قاسي؟؟ تركي:ليش هالكلام اللي ماله داعي؟؟ ناصر:لأني مقهور من نفسي كانت أمي تلح علي من يوم ماتخرجت من الجامعة إني أتزوج وأجيب معاي زوجتي تونسها وودها تفرح بعيالي..وبالرغم من أمانيها كنت أفتخر بعزوبيتي وأتطنز بأصحابي اللي يبون يتزوجون وأشوف إنه ماعندهم سالفة..ضارب بكلام أمي عرض الحايط!!! تركي:لاتندم على شي فات..الإنسان تتغير أفكاره مع الوقت.. ورجعوا تركي وناصر من المستشفى في الليل بعد يوم حافل بالأحداث وبعد ماانتهوا من بعض الاجراءات... أم تركي:عظَّم الله أجرك ياناصر.. ناصر:جزاك الله خير.. أم تركي:متى الصلاة عليها والدفن؟ ناصر:بإذن الله بعد صلاة الفجر.. قامت أم تركي حكت له عن موضوع الشغالة والدُرج المقفول.. ناصر:إذن لازم أرجع البيت الحين وأشوف وش سالفة الدُرج! تركي:أقول إقعد تعش معنا.. ونام والصباح رباح.. ناصر:تعشوا انتم بالعافية..أنا مالي نفس..تصبحون على خير.. وخرج من بيتهم وراح لبيته... ودخل غرفة أمه وحس بـ غصة والدموع ترقرقت بعينه وقام يتأمل جدران الغرفة وأثاثها..الغرفة بكل تفاصيلها تذَكره فيها.. وجلس على السرير ودفن وجهه بين كفوفه وقام يبكي... وتذكر كلمات تركي له وهو بالمستشفى يهزه ويقول له:وحِد الله ياناصر..البكاء مابيردها لك..كل ماتذكرتها ادعي لها.. وقال ناصر:الله يغفر لك ويجعل مسكنك الجنَّة... وقام يفتح الأدراج وكانت كلها مفتوحة ماعدا دُرج واحد حاول تركي يفتحه وماقدر..دَوَر مفاتيح ومالقى واضطر يستخدم آلة حادة وانفتح معاه الدُرج..ولقى بداخله صندوق قديم..فتحه وانبهر من الذهب اللي بداخله!! ذهب أمه القدييييم..(الأساور العريضة اللي يسمونها كاسات ولها مصك+رشرش+حزام+6بناجر+قلايد)وتذ كر نفسه زمان يوم كان يقول لها:يايمه وش هالـ تَنَك اللي صاكتن عليه؟؟هاتيه أبيعه وأشري لك أرض؟!!! وكانت ترد عليه وتقول:يانويصر هالذهب مخليته لأيامن سودا مقبلة!!! وغرقت عيونه بالدموع وهو يقول بنفسه:الله يرحمك يايمه..كنتي حاسبة حساب يوم بيجي وأصير فيه بروحي! ============ ثاني يوم بعد الانتهاء من الدفن والصلاة على الميتة وبعد ماشاع الخبر كان الاتفاق بين تركي وناصر إن عزاء الرِجال يكون قدام مسجد الحي اللي فيه بيت ناصر والحريم ببيت أم تركي... وبعد صلاة العصر بدأت وفود المعزين تقبل ومنهم الجيران والأهل والأقارب وأخوان ناصر والجماعة وزملاؤه بالعمل.... وراحت اسمهان وأهلها وأم عبدالرحمن يعزون...ودار كلام كثير بينهم وبين أم تركي...من ضمنه: أم تركي:والله محد كاسرن خاطري بعد ناصر..إلا الشغالة..تبكي عليها بكاء موب طبيعي.. أم اسمهان:ياحليلها صاينة العِشرة..تستهونين بـ 8سنوات مرت عليها وهي ساكنة معاها..يمكن أهلها ماتعلقت فيهم كثر ماتعلقت بأم ناصر.. أم تركي:صادقة ياوخيتي..وأم ناصر الله يرحمها ماكانت تقصر معاها أبد عادتها مثل بنتها..تكرمها وتعاملها أحسن معاملة... هند:مسكينة أكثر شي تفكر فيه الحين والسؤال اللي تسألنا اياه طول الوقت!أنا وين أروح؟؟لأنها تدري إننا كلنا عندنا شغالات ومانحتاجها.. ابتسام:ليش؟هي مالها أهل؟؟ أم تركي:لا..هي يتيمة..وتعودت على الحياة ببلادنا..ببلدها عايشة بقرية فقيرة جداً وجماعتها حتى هم كل واحد بديرة يشتغل ويسترزق.. أسماء:ياليت ياخالتي لو تكلمون ناصر يتنازل لي عنها وينقل كفالتها لنا والله لآخذها وأخليها تشتغل عندي.. أم اسمهان:ايه والله إنها فكرة وهذا انتم شايفين اسماء على وشك ولادة وتحتاج شغالة مخلصة مثل هذي تقوم فيها... أم تركي:ياليت تكونون كسبتوا فيها أجر..بإذن الله أكلم ناصر وأرد لكم خبر... =========== مرت الأيام وانتقلت الشغالة لبيت أسماء...وبعد أيام ولدت أسماء وجابت بنوتة حلوة... ملحوظة:لمعرفة كيفية الصلاة على الميت..يرجى الاطلاع على هذا الرابط للاستفادة: https://www.el3b.com/islam/islamic_school/FIQH/f3-1.html فديييييييتكم من أولكم لآخركم على الاطمئنان والسؤال..وهذا من طيب أصلكم.. ========= بتقولون شلون ولدت أسماء؟؟ السالفة ومافيها إنها حست ببوادر ولادة وراحت المستشفى ومعاها ولدها والشغالة وبعدالفحص تبين انه الرحم مفتوح بمقدار بسيط ونصحتها الدكتورة تمشي وبعدين ترجع لها.. وبالسيارة دار الحوار التالي: أسماء:أقول أحمد اش رايك توديني لبيت أهلي؟نحط الولد والشغالة وبالمرة أمشي في حوش أهلي..بدل ماأرجع للشقة وماألقى مكان أمشي فيه... أحمد:فكرة!وأنا بأروح أكمل أشغالي..ولو حسيتي بشي اتصلي فيني.. ونزلت أسماء بيت أهلها ولقيت أمها وأختها ابتسام يشربون قهوة العصرية..وحكت لهم قصتها... الأم:ماني تاركتك تمشين بس!إلا بأسوي لك قرفة وزنجبيل اشربيهم وقومي امشي!! ابتسام:ولاتنسين العسل الأصلي يمه.. خليها تاكل منه..أبي أفرح بولادتها قبل ماأرجع بيتي! أسماء:ليش؟بتسافرين؟؟ ابتسام:أبشرك..عجوزنا أم زوجي الود ودها تذبحني!مقهورة من جلستي كل هالمدة ببيت أهلي تبيني أرجع عشان تجي عندنا وترابط على قلوبنا!!قال إيش؟ليه ماحضرتي زواج أختك ورجعتي بيتك بسرعة؟؟لك شهر ونص عند أهلك!!الله أكبر عليها كيف تعد الأيام علي عد!! أسماء:موب على كيفها!اقعدي هنا لين ماأطلع من الأربعين!! الأم:يعني لازم من التحريش؟ الحرمة ومشتاقة لولدها وحفيداتها ليش زعلانين انتوا؟؟ ابتسام:أي مشتاقة يايمه؟لو مشتاقة كان قالت له تعال!لكن اتصلت فيني وهزأتني على بالها جارية أنا عندها!!وبعدين اشفيك واقفة بصفها؟؟أخاف يمه متمللة من وجودي عندكم؟؟ الأم:لااا حرام عليك..إلا عوضتيني عن غياب اسمهان عننا..والله مدري وش بأسوي لاسافرتي وتركتيني.. أسماء:لاتشيلين هم يايمه أنا ناوية أقعد فترة الأربعين كلها عندك!!. الأم:الله يحييك... ابتسام:وتقعدين بعيدة عن زوجك كل هالمدة؟؟ أسماء:وخير ياطير؟؟بيموت من الجوع؟والا بيطق من الزهق؟؟خليه يفتك مني وأفتك منه شوي!وبعدين بيت أهلي مفتوح وقت مايحب يزورني ماحد بـ يرده!! الأم:ههههه..خلها تجدد شهر العسل.. ابتسام:عاد يازينها بترجع له عروس وبيدها نونو يصيح فوق راسه ليل ونهار!!وكل شوي تعلق النونو بصدرها ترضعه!! أسماء:الله يخلي الشغالة لي..ماشاء الله عليها حليله مع ولدي..الصراحة جت بالوقت المناسب... وطلعوا الجميع للحوش يمشون وأسماء مجتهدة تاكل تمر بالعسل وتشرب قرفة بالزنجبيل وتمشي بسرعة... وأمها تضحك وتقول لابتسام:ياحليلها مستعجلة على الولادة!! أسماء:مو من زين الولادة حتى أستعجل عليها..إلا من زود الزهق والتعب اللي فيني من الحمل ودي أفك هالبقشة وأصير خفيفة مثل أول!!! ======== بعد المغرب والعائلة جالسة بالصالة بدأت أسماء تحس بالآلآم الطلق!!وأبوها ملاحظ إنها متغيرة شوي... الأب:أسماء؟عسى ماشر؟ أسماء:لا مغص بسيط ويروح! ابتسام:إلا هالنعايم اللي سففتيها يظهر إنها جابت نتيجة ! وأول ماقال العشاء الله أكبر... إلا موية الراس طقت!!وقامت أسماء تصيح:يمه شكلي بأولد عندكم بالبيت!! الأم:لا لا تكفين...خل أبوك ياخذك على طريقه وبأروح معك.. أسماء:لابأتصل على أحمد زوجي ياخذني.. الأم:يمكنه بآخر الدنيا هالحين ولين مايجيك تكونين ولدتي بمحلك!!أقول خلك من الدلع وأنا وأبوك بناخذك معانا... وبالفعل خلت ولدها وشغالتها عند ابتسام وراحت مع أمها وأبوها وحالتها صعبة وصلت للمستشفى وهي مو قادرة تمشي موية الراس بدت تتصفى!!! وعلى طول قعدت على الكرسي المتحرك ومن باب الطواريء ودوها لغرفة الولادة رأساً لما خبرتهم بأمر خروج الموية وكانت ولادتها متيسرة في خلال ربع ساعة تم كل شي!!! لأنها راحت على اللحظات الأخيرة... وأمها معاها تدعي لها وأبوها واقف بره وقلقان.. وشوي وطلعت أمها من الغرفة وبشرت أبوها إن أسماء جابت بنوتة... وسجد أبوها سجدة شكر من فرحته بسلامتها وسهولة ولادتها وقال:هالحين لازم نتصل على زوجها ونبشره بولادتها.. واتصل الأب.... الأب:السلام عليكم..شلونك ياأحمد؟؟ أحمد:الحمدلله بخير.. الأب:مبروك مبروك.. أحمد:وش عليه؟؟مالسه بدري؟ الأب:بدري من عمرك ياولدي.. زوجتك ولدت قبل شوي... أحمد:ههههه..ياحليلك ياعمي قاعد تنكت؟؟؟ الأب:وهذا وقت نكت؟إنت ووجهك؟ أسماء ولدت..ودك تشوفها تعال!ومع السلامة! طاااخ قفل الخط بوجه زوج اسماء الأم:وشفيك عليه؟يحق له الرجال مو مصدق!قبل كم ساعة ومرته عندنا وهي بعافية..مين يصدق إنها خلال كم ساعة ولدت؟؟ الأب:أنا ماودي هالحين إلا أشوف الصغيرة.. إلا والممرضة خارجة فيها وحاطتها بحضَّانة..وقام الأب يطالعها بفرحة.. أما أسماء بعد الخياطة حست بإرهاق ونامت شوي وظلت تحت الملاحظة وبعدين نقلوها لغرفة خاصة... ودقايق إلا زوجها واصل ومتصل على أبوها يسأله عنها..وقال أبوها:اطلع إحنا بغرفة 225 قسم الولادة... ويوم طلع سلم عليها وهو مو مصدق!! أحمد:الله يهديكم..كان دقيتوا علي أوديها المستشفى بنفسي! الأب:إلا رحمة إنَّا مادقينا عليك..والا كان مداها ولدت بالبيت! أحمد:يمين إنك صادق..أنا كنت بمنطقة بعيدة حيل..بس ماتوقعت إن هالأحداث مرت بسرعة..طيب وش جبتي؟؟ أسماء:جبت بنوتة..يعني توقعات الدكتورة بمحلها... أحمد:الحمدلله خير وبركة..ومبروك سلامتك ومبروك سلامة البنية..خليني أروح أشوفها بالحضانة... واتصلت الأم وقامت تبشر الجميع واقترحت عليهم ماحد يزور أسماء الا بكرة لأن الدنيا ليل وأسماء مرهقة....وظلت أمها مرافقة معاها.... اليوم الثاني زاروها أهلها من قبل العصر... سماح ومحمد واسمهان وابتسام.. اسمهان مسكت البنت وحضنتها وقالت:اش سميتوها ياأسومة؟؟ أسماء:لسه ماسميناها.. ابتسام:ياشينكم..اش تنتظرون؟ أسماء:أنا حاسة إنه في طبخة تنطبخ من وراي..من يوم ماأخوانه عزموه عندهم اليوم على الغدا!! الأم:ياشين سوء الظن يابنتي!عزموه لأنهم دروا إنه عزوبي وانتي والد.. أسماء:أدري..بس مو بعيدة إنهم بيسوون له غسيل مخ ويقنعونه يسميها على اسم أمهم الله يرحمها بماإنه أخوهم الكبير!!! سماح:ليش؟أمهم الله يرحمها وش كان اسمها؟؟ أسماء:فايقة!! محمد:عاد بتسير فايقة بنت المتضايقة!! الجميع:ههههههههه أسماء:ياويلكم من ربي..أنا ترى موب عصبية..بس الحمل كان مسوي فيني البطيط!! اسمهان:إلا انتي قَشْره من يومك! ابتسام:سميها اسمهان ياأسماء.. أسماء:هذا اللي ناقص؟!!(وتغمز بعينها) محمد:لا ماأسمح لك..هذا اسم بنتي اللي جاية ان شاء الله.. ودخل أبو اسمهان وكانت الجلسة كلها سوالف وضحك... وبعد ماجلسوا العائلة يتبادلون الأحاديث المختلفة مع أسماء.. جاء زوج أسماء(أحمد) ودق باب الغرفة فانتقلوا الجميع للجهة الثانية من الغرفة وهي جهة مخصصة للزوار..أما الجزء الآخر من الغرفة كان فيه سرير المريضة.. وجلس يتناقش معاها عن اختيار اسم للمولودة وانه هذا صار ثاني يوم لها ولسه ماصار لها اسم.. أسماء:اش رايك بــ وسن؟؟ أحمد:واش معناه؟ أسماء:بداية النعاس!! أحمد:ماشاء الله..تبين بنتنا تقعد نايمة24 ساعة..أحد يسمي بنته نعسانة؟؟!!! أسماء:طيب بلاش..وش رايك نسميها رواسن ؟أشوفه لايق مع اسم أخوها أنس! أحمد:طيب اش معناه؟ أسماء:له عدة معاني منهاالحبل المرتخي! أحمد:أنا بنتي أسميها الحبل المرتخي؟ليش عشان تطلع بنت مفتلتة؟وشفيك ياأسماء ماتسمعين لقالوا كل انسان له من اسمه نصيب؟؟ أسماء:خلاص بأحِط لساني بحلقي وأنطم!!وإنت سمي على كيفك! أحمد:الصراحة أنا خاطري أسمي أفنان معناه الغصون ومذكور بعد في القرآن ويبدأ بحرف الألف مثل أنس... أسماء:ولو إنه مو داخل مزاجي كثير.. بس يلا أحسن من غيره... وخرج أحمد من الغرفة ورجعوا أهلها قعدوا معاها(أمها وسماح وابتسام واسمهان) أسماء:أبشركم يقول يبي يسمي البنت أفنان! اسمهان:ونعم الاختيار!لو تطلع حلوة بعد وخلوقة مثل صاحبتي أفنان يكون ياحظك فيها.. وقامت اسمهان وأرسلت رسالة لرانية بخبر ولادة أسماء وتسميتها لبنتها بإسم أفنان.. وطبعاً رانية أرسلت البشارة بسرعة البرق لباقي الشلة..ز وبدأوا يتصلون على اسمهان ويكلمون أسماء يباركون لها.. اتصلت أفنان تبارك لاسمهان..وبعد السلام والسؤال عن الأحوال.. أفنان:مبروك على ولادة أسماء.. اسمهان:الله يبارك فيك.. أفنان:صحيح إنها سمَّت بنتها أفنان؟ اسمهان:ايه يالغالية صحيح وأنا أيدتها في الاختيار وياليتها تطلع مثلك... أفنان:هذا من ذوقك ياسوسو..ومادام الموضوع كذا إذن وجبت زيارتها.. اسمهان:صدق؟؟بتجين تزورينها بالمستشفى؟؟ أفنان:ايه إذا مايضايقكم بأجي أنا وأمي نبارك لها .. اسمهان:ليش يضايقنا؟إلا هذي الساعة المباركة..الله يحييكم.. ودق باب الغرفة وكانوا الحاضرين أم تركي وهند بنتها أخت سماح وشوي وبدأوا أهل زوج أسماء يجون يباركون..وناس تروح وناس تجي... وبعد ساعة حضرت أفنان وأمها ودخلوا بهداياهم معاهم..وسلموا على الحاضرين.. أم أفنان:مبروك المولودة..والله يجعلها من البارَّات الحافظات لكتاب الله... أسماء:اللهم آمين.. أم اسمهان:جزاك الله خير.. ودار حديث بين جميع الحضور أما هند وأم تركي جلسوا يناظرون طول الوقت بأفنان ويتهامسون!! أم تركي:ماشاء الله تبارك الله..البنت وهي على طبيعتها ومن غير أي مكياج وياحلاتها أجل شلون لاتزبرقت.. هند:طالعي يمه بهدوئها وثقلها ماهي أحسن من عبير المغرورة؟! أم تركي:شوفي عباتها وعباة أمها حشمة وستر ماشاء الله.. أما أفنان واسمهان جلسوا يتكلمون مع بعضهم وياخذون الأخبار والعلوم.. ولما قاموا أفنان وأمها بيروحون قالت أم أفنان:ياجميع الحاضرات الله يجزاكم الخير اللي تحب تفيد وتستفيد وتكسب أجر تزورني ببيتي كل يوم اثنين ما بين صلاة المغرب والعشاء..كل مرة أسوي محاضرة أو أستضيف بعض الداعيات وتلقي محاضرة...ولي ولكم الأجر ان شاء الله..وعنوان بيتي تلاقونه عند اسمهان.. الجميع:الله يكتب لكم الأجر وجزاكم الله خير... ولما خرجت قالت سماح بهمس لأمها وأختها:واشفيكم تناظرون البنت كذا؟أكلتوها بعيونكم!! أم تركي:ماشاء الله عليها..مناسبة لأخوك مرة..بس هو يرضى؟؟ سماح:ماعليك منه مصيره بيرضى! وشوي إلا دق الباب وقامت ابتسام تفتح إلا دخلت وحدة مليانة ومغطية وجهها وجايبة هدية كبيييرة وبس وطتها في الأرض كشفت وجهها... اسمهان(وهي متفاجئة):رانية الدبة؟؟؟؟ وحضنوا بعض..وقام الجميع يسلمون.. جلست رانية.... رانية:عاد أنا قلت هذي الغالية أخت الغالية ولدت ضروري أجي أبارك وأهني بنفسي.. أسماء:جزاك الله خير..مشكورة حبيبتي.. أم اسمهان:وشلونها أمك يارانية؟ رانية:مبسوطة ماعليها..هذا أنا صحيت البارح مالقيتها اتصلت فيها لقيتها سافرت هي وأبوي مكة يحضرون زواج ولد خالي!وبغى يجيني سكتة ليش إنهم ماخذوني معاهم..بس الله ستر!! الجميع:هههههه اسمهان:بلاكم ماتدرون الأخت رانية مافي عرس بالديرة ينعتق منها توَّجِبْ القاصي والداني!! سماح:ياحليلك والله إنك سويتي أجواء مو طبيعية بملكة اسمهان..الله يهنيك بـسعة صدرك رانية:آمين..يازين الوناسة والفرفشة ومشاركة الناس أفراحهم..وش نبي بالغثا وضيقة الصدر..خلي القلب شباب على طول.. وقامت رانية تهذر على الحاضرين وتحكي لهم عن مواقفها والكل ميتين ضحك عليها وعلى خفة دمها.. اسمهان:يازينك يارنو..مدري ليه ماأتخيلك بتصيرين عجوز! رانية:إن كنت بأصير عجوز مثل عجايزنا الملَّقفْ..فعساني أموت الليلة!! أم اسمهان:يوه اسم الله عليك.. رانية:لأنك ماتدرين ياخالتي عندنا نماذج للعجايز بجماعتنا يخرعون الجِن!!كل ماكبرت الوحدة بعمرها طال لسانها وزادت لقافتها وتدخلاتها ويعشقون النكد مثل عيونهم!!الوحدة منهم ناقصها عصا تقعد عليها وتطير بها مثل الساحرات!!! أسماء:ههههه..حرام عليك من يوم دخلتي وأنا أضحك وكل ماضحكت تنشد خياطتي.. رانية:بالعكس هذا وأنا قاعدة أعطيكم جرعات مخففة مراعاة لكبار السن اللي معانا!! قامت أم تركي تضحك وقالت:قولي آمين يابنتي! رانية:ماني بقايلة لين أسمع وش بتدعين!أخاف بتدعين علي؟!! أم تركي:هههه وش دعوى وانتي وسعتي صدري الله يسعدك..عسى الله يحفظك لأهلك ويرزقك كل ماتتمنين.. رانية:آمين.. اسمهان:بالله ادعي لها ياخالتي ربي يرزقها عريس..ترى هي ماتناقز في الأعراس من شوي!! رانية:وادعو لاسمهان ربي يرزقها بطفل وتصير أم وتعقل شوي وتفكنا من التهيبل والاستهبال... ومرت الجلسة بنكت وضحكات..إلى أن استأذنت رانية تمشي... ابتسام:باقي بدري اجلسي ونستينا والله... ر انية:خلني أرجع بيتي قبل ماتنفتق خياطة أختك!!! ============== ولما رجعت أم تركي وبناتها للبيت قاموا يسولفون عن ماحدث ودار بالمستشفى... أم تركي:تصدقون يابنات؟أنا عزمت أمري أخطب أفنان لتركي..أحسهم لايقين على بعض حيل..وعساه يوافق ومايردني.. سماح:يارب ياكريم... هند:ورانية يايمه؟؟ أم تركي:اشفيها رانية؟تقصدين نخطبها لتركي؟؟لا لا ماتصلح له! تركي ثقيل شوي ورانية راعية ضحك وتهريج ماتناسبه أبد!!!! هند:ايه هي ماتصلح لتركي أبد..بس يايمه تناسب ناصر مرررة! سماح:ايه والله شلون غابت هذي عن بالي؟؟فعلاً لايقين على بعض..ناصر من يومه راعي مقالب ودجة..طبعه مثل رانية..بس تهقون أهلها بيوافقون؟؟ أم تركي:ان شاء الله يوافقون..بس قولوا ناصر أساساً بيرضى يتزوج؟ ========= اليوم التالي من زيارة أسماء خرجت لبيت أهلها وراحت اسمهان تزورها... اسمهان:اش أخبار فنونة؟؟ أسماء:أي فنونة الله يهديك؟خلاص غيرنا اسمها! اسمهان:وش سميتوها؟ أسماء:لينة.. اسمهان:الله يقلع ابليسك..بعد ماقلت لأفنان انك مسمية بنتك عليها وجات مسكينة وأهدت فيها تغيرين اسمها..كأننا تعمدنا هالحركة عشان نشحت من الناس هدية!!! اسماء:ياحليلك أساساً ماسميناها أفنان على صاحبتك! وهي صاحبتك مابتجي تبارك إلا لادرت ان المولود بإسمها؟؟ =========== مرت الأيام واسمهان كل يوم ببيت أهلها مقابلة أخواتها والنونو وأم عبدالرحمن قد راحت معاها وباركت... لما قربت المدارس تفتح كان قد مر على زواج اسمهان تقريباً 3شهور.. اشتاقت شوق كبير إنها تحمل!! وبيوم وهي ببيت أهلها وكانت قاعدة مهمومة وحزينة... أم اسمهان:اشفيك ياسمهونة متضايقة؟موب عوايدك يعني! أسماء:يمكن متهاوشة مع دحوم يمه! اسمهان:لا متهاوشة ولاشي إلا مبسوطين الحمدلله..ومو مكدر خاطري إلا شي واحد! أم اسمهان:خير يابنتي؟ اسمهان:يمه صار لي 3شهور مِن تزوجت ولسه ماحملت!! أم اسمهان:بسم الله الرحمن الرحيم..تو الناس..وش عليه مستعجلة؟؟ أسماء:لايكون غرتي مني ومن ابتسام وسماح؟؟ اسمهان:ماني غيرانة بس اشتقت يكون عندي طفل يشغل وقتي! أم اسمهان:ماعليك بتجيك الدراسة وتشغل وقتك..وبعدين حِنا مانبيك تحملين هالحين وراك تخرج من صف ثالث ثانوي..الحمل بعد الشهادة ان شاء الله.. أسماء:ياحليلك ياسمهونة صدق إنه ماعندك صبر..نسيتي إني ماحملت إلا عقب زواجي بثلاث سنوات ونص؟!!وبغوا ياكلوني الناس بألسنتهم وأولهم خوات زوجي وسلايفي كل مرة يدقوني بالكلام!!بس أنا قوية أسمع من إذن وأطلع من الثانية!! أم اسمهان:أي قوية؟نسيتي ياأسوم يوم كنتي كل ماجيتيني تقطرين عيونك دموع وتقولين يمه ساعديني..لين ماوديتك عند أم جابر الممرخة ومرخت ظهرك وقالت عندك مشكلة مويات بالرحم وعطتك أعشاب وقعدت تمرخك فترة..لين ماحملتي؟؟؟؟ اسمهان:يمه تكفين وينها أم جابر؟دليني عليها! أم اسمهان:أقول اركدي!باقي بدري عليك..لايكون زوجك وأمه ودهم تحملين؟؟ اسمهان:لا حرام ماجابوا خبر بس أنا أحس عبدالرحمن كبير..تصدقين بعض زملاه اللي بعمره هالسنة سجلوا عيالهم بالصف الأول؟؟ أم اسمهان:طبيعي..هو تزوج متأخر...وإذا هو كبير فإنتي بعدك صغيرة... اسمهان:إلا اش أخبار ابتسام؟ من يوم ماسافرت ماسمعنا لها حس أسماء:سجلت بناتها التوأم بالمدرسة! اسمهان:ياااااااااه عقبال ماأجيب عيال أنا بعد وأسجلهم بالمدرسة! اسماء:انتي تخرجي من المدرسة أول يالفالحة..بزرة وتبي تجيب بزران!الحمدلله والشكر! بقي أيام قليلة على بداية الدراسة واسمهان مستغلة الاجازة بالطول والعرض... ضحك ووناسة وجري بالحوش مع عبدالرحمن وشَوِي وزيارات وروحات وجيات... واستعدادها للسنة الدراسية الجديدة كان غير!فصلت مراييل كشخة وشنطة ولوازم مدرسية من أحسن الأنواع!!وجزم غالية! عبدالرحمن:سمهونتي انتي رايحة تدرسين ولا تستعرضين؟؟ اسمهان:حبيبي هذي السنة غير!أنا صرت بنظر الكِل مدام!يعني لازم يبان علي أثر النعمة!!! عبدالرحمن:ههه..وش هالفلسفة؟يعني ببيت أهلك كان باين عليك أثر الجوع؟؟؟ اسمهان:لا طبعاً بس أنا بعدي عروس فالمفروض آثار الكشخة تكون واضحة علي!! عبدالرحمن:ولله في خلقه شئون! ============ وأول يوم بالدراسة راحت السمهونة والكل جاء يسلم ويبارك وتفاجئت اسمهان إنه أبلة جوهرة كانت موجودة... اسمهان:هلا أبلة جوهرة..الحمدلله على السلامة.. جوهرة:الله يسلمك..كيف حالكم كلكم؟؟ اسمهان:تمام..بس متى رجعتوا من السفر؟ مادرينا؟؟ جوهرة:لنا يومين بس..وبإذن الله ودي أزورك نهاية الأسبوع أبارك لك في بيتك.. اسمهان:الله يحييك... ============ وشلة الصاعقة فرحانين باسمهان نجلاء:تصدقين ياسوسو؟كنت حاطة يدي على قلبي!لاتتزوجين وتحملين بسرعة وتتركين الدراسة! مرام:فاولي خير ياشيخة..ان شاء الله مايبعدها عننا شي! أفنان:صعب الأحلام تتحقق!أحياناً أحلم أحلام اليقظة وأتخيل يابنات إننا ساكنين بعمارة وحدة! اسمهان:ههههه هذي من المعجزات السبع!! رانية:ولامعجزة ولا شي!أنا بس أتخرج من الثانوي بأسير سيدة أعمال وأشتري عمارة وأسكنكم كلكم فيها معاي!! نجلاء:واش أفلام الكرتون هذي يارانية؟؟قال سيدة أعمال!!سيدة أعمال بمرتبة طَقَّاقة!!! مرام:هههه يازينك يارنو.. ماتتحلمين إنك تطيرين بعد؟؟ رانية:إلا أتحلم إني أطير بطيارتي الخاصة..وكل شوي تنزل بي في بلد أتسوق وأرجع..وأنزل مرة ثانية ببلد ثاني وأتغدى وهكذا!!!!! أفنان:لاتضحكون علي أنا مرات أتحلم إني ساكنة بكوخ وأقطف الفواكه من الأشجار وآكل!! رانية:أقول ياشين أحلام الفقارى!ماتتحلمين بعد إنك ترعين غنم مع بيتر وتزحلقين من فوق الجبال مع هايدي؟ الجميع:هههههههههه اسمهان:ياااي ذكرتوني بالطفولة..كنت أتحلم يكون عندي قصر مصنوع من الآيس كريم والحلويات وأتزوج أمير يهديني عصا سحرية!! رانية:يعني ماابتعد حلمك عن الواقع كثير!!هذا انتي تزوجتي الأمير عبدالرحمن وعساه يهديك عصا حقيقية تهفك على قفاتك إن مافلحتي بشغلك!!! اسمهان:حرام عليك!مايستجري يمد إيده علي!! نجلاء:أما أنا أحلم أكون أخصائية نفسية.. رانية:عشان تتعقدين من بلاوي الناس وينبت لك قرون؟أقول انثبري وتزوجي ماجد وقري في بيتك!! اسمهان:أفاااا مخطوبة يانجول ولاتعلمينا؟؟؟ نجلاء:لسه كلام ماصار شي..خطبني ماجد ولد خالتي..بس لسه الزواج يمكن بعد سنتين!! الجميع:مبرررررروك.. مرام:أما أنا نفسي أتزوج وأفتح صالون خاص فيني!ويكونون زبايني من نخبة المجتمع!! رانية:وأنا أول زبونة من هالنخبة بتجي صالونك! مرام:زين إنك قلتي لي!كاشو بطلت أفتح صالون!! الجميع:ههههههههه اسمهان:من غير زعل يارنو مرات أتخيل إنك بتتزوجين شايب علة!!ينشب لك بحلقك ويربطك في البيت غصب عنك!ومو بس كذا يمكن بعد تشتغلين له ممرضة!! رانية:مالت عليك وعلى أحلامك وعلى نفسك الخايسة اللي تتمنى الزين لنفسها والشين لغيرها!!أنا حلمي إني أتزوج واحد فلاَّوي راعي فرفشة ودردشة ونعنشة..يغديني ضحك ويعشيني وناسة!!! نجلاء:و نسيتي تقولين يمشيك في قصور الأفراح وكل يوم يرميك بعرس لين ماالجنانوة اللي براسك يهمدون!! الشلة:هههههههههههه وكملوا سوالفهم عن الأحلام والآمال وضحك بضحك.. ================= ومرت أيام الأسبوع بسرعة وكان عبدالمجيد تتأثر نفسيته لما يشوف اسمهان رايحة مع عبدالرحمن للمدرسة وحاطين أياديهم بأيادي بعض ويسولفون ويضحكون,,ويفتح لها باب السيارة ويتمنى اللحظة اللي تجي وزوجته بيده يمازحها وتمازحه!!! وبيوم من الأيام بعد ماراح لعمله دخلت أمه غرفته هي وشغالتها ينظفونها... ولقت أم عبدالرحمن على مكتب عبدالمجيد ظرف وفيه ورقة... فتحتها ولقيت بداخلها هذي السطور بخط عبدالمجيد: إلى مجلتي الرائعة(...؟...) أحببت أن أنقل إليكم أحاسيسي عبر سطور متوجة بالدموع..أنا شخص مصاب بإعاقة سمعية منعتني من النطق ولاحول لي فيها ولاقوة!حيث إني أتيت لهذه الدنيا كشخصٍ طبيعي ولكن علةً ألمت بجهازي السمعي ففقدت إثرها السمع وبالتالي القدرة على النطق... ماذنبي أنا؟عندما ينظرون إلي الناس بأني شخص مختلف!!! ماذنبي أنا؟إذا اتجهت للخطبة وأواجَه بالرفض دائماً؟ ماذنبي أنا؟ وأنا أمتلك كل مقومات الإنسان الطبيعي ولدي قدرة على التواصل مع من حولي بلغة الإشارة وقراءة الشفاه والكتابة وبالرغم من ذلك أجد من يعتبرني شخص ناقص؟؟ أنا شخص مبتلى..ولكن من الذي سيقدرني؟إلى متى سيظل المجتمع يرفضني كزوجٍ صالح له حق الحياة مع انسانة طبيعية؟؟ أخط لكم سطوري والعبرات تترقرق بمقلتي باحثةً عمن يمسحها!! المخلص:ضحية الصمت!! قامت أم عبدالرحمن تبكي بصوتها وجلست على الكرسي من انهيارها!!ومسكتها الشغالة تهَدِيها ولكنها صارت تقول:الله يرزقك ياولدي باللي تتمناه وأزود..الله يعجل بنصيبك ويسخر لك من يحبك ويخاف الله فيك... وهي تبكي بمرارة.... ================ وبنفس اليوم جاء المغرب وقعد عبدالرحيم الولد الأصغر يتقهوى مع أمه... وقال:يمه..بغيت أفاتحك بموضوع! أم عبدالرحمن:هات ماعندك.. عبدالرحيم:يمه..أنا صرت أفكر جدياً بالزواج.. أم عبدالرحمن:أجِل هذا الموضوع شوي الله يخليك!! عبدالرحيم:ليش يمه؟عمري صار 26 سنة..وعندي كل مايأهلني للزواج والحمدلله.... أم عبدالرحمن:أنا بإذن الله ناوية أزوجك إنت وعبدالمجيد بليلة وحدة عبدالرحيم:ومنهي هذي اللي بترضى فيه؟؟ أم عبدالرحمن:اتفل من فمك!هذا كلام تقوله عن أخوك ياللي ماتستحي؟؟؟ عبدالرحيم:بالهداوة يمه واشفيك معصبة؟أنا قصدت إنه ياما خطب والناس يردونه بسبب الصمم والخرس اللي فيه..أجل شلون بتلقين له عروس بكل سهولة؟؟ أم عبدالرحمن:الله يسخِّر له إن شاء الله مثل ماسخَّر لغيره.. ======== ونهاية الأسبوع جات جوهرة تزور اسمهان ببيتها وزوجها هو اللي جابها وتفاجأ عبدالرحمن واخوانه بأن زوج خالتهم جوهرة رجع يمشي على عكازين بدل الكرسي المتحرك ونفسيته متحسنة!!! واجتمعت أحلام وأم عبدالرحمن وجوهرة ببيت اسمهان... وكانت أحلام استقرت بـجدة مع زوجها وأطفالها.. أحلام:ماشاء الله يااسمهان..أحس الدنيا اضحكت لي فجأة طول عمري وأنا عايشة وحيدة بين أولاد وأتمنى يكون لي أخت..وأخيراً ربي رزقني بإخت مثلك..صدق المثل اللي يقول(رُب أخٍ لك..لم تلده أمك) اسمهان:تسلمين يالغالية على كلامك الحلو..عساني أكون عند حسن ظنك بس... جوهرة:ماشاء الله يااسمهان إن كان هاالحلى انتي مسويته فأنا أشهد إنك شاطرة بالمطبخ! اسمهان:هي تجارب..مرات تصيب ومرات تخيب!ومازلت أتعلم! أحلام:هههه ذكرتيني بنفسي..كنت البنت الوحيدة والدلوعة بين أخواني وخذاني زوجي عقب الزواج وعلى أمريكا طيران..لاتعلمت ولاغيره..ومخالطتي للأمريكيات زادتني خيبة..كل أكلهم مجمدات ومثلجات يقلونها بالزيت أو يحطونها بالميكرويف أو يشرونها من مطاعم التوصيل..وزوجي صبووور..بس النت ماخلى الوحدة تغفل عن شي..كنت أقعد ليل ونهار أتعلم وأبهر جاراتي الأجنبيات لدرجة إنهم قالولي ليش ماتفتحين مطعم؟؟؟ جوهرة:ايه الخواجات هذولي كل شي جديد يبهرهم.. أم عبدالرحمن:وكيف كانت رحلتكم لأمريكا ياجوهرة؟؟ جوهرة:الحمدلله من أفضل مايكون سووا لزوجي كم عملية جراحية وبعد النقاهة بدأ مرحلة العلاج الطبيعي وتحسن كثير..ماتخيلت إنه بيرجع يوقف على رجليه.. اسمهان:ماشاء الله يوقف على رجليه؟؟ جوهرة:بمساعدة العكازات طبعاً..بس على الأقل ارتاحت نفسيته وصار يسوق السيارة ويدخل دورة المياه بنفسه..وصرت أحسن بكثير من أول ممكن أطلع براحتي مو مثل قبل مربوطة فيه. وقضوا الجميع سهرة ممتعة... دخلت أم عبدالرحمن المطبخ مع اسمهان وهي تجهز العشا.. وقالت لها:اسمهان ودي أفاتحك بموضوع بس طلبتك خليه بيني وبينك! اسمهان(باندهاش):خير ياخالتي؟ أم عبدالرحمن:ودي أخطب لعبدالمجيد وأبيك تساعديني! اسمهان:من عيوني لو قدرت مابأقصر.. أم عبدالرحمن:صديقتك مشاعل! اسمهان:تقصدين خالة أفنان؟؟ أم عبدالرحمن:ايه..تهقين ترفض؟؟ اسمهان:لا هذي بالذات ماأتوقع ترفض أبد!!! أم عبدالرحمن:وانتي اش دراك؟ اسمهان:لأنه أفنان حكت لي قبل مدة إنه تقدم لخالتها مشاعل رجَّال أعمى وكانت بتوافق عليه بس أخوانها(أخوال أفنان)رفضوه!! أم عبدالرحمن:الله يبشرك بالخير..بس كلامك مايطمن مثل مارفضوا الأعمى بيرفضون ولدي! اسمهان:ماأظن ياخالتي ..أنا متفائلة بالموضوع ولاتنسين بعد إنها تشتغل سنين بمعهد الأمل وتتقن لغة الصم والبكم.يعني مابتواجه أي مشاكل... المهم انتي لاتقلقين أنا بأتصل بكرة عليها وأجس نبضها لو لقيت بوادر موافقة بأعطيك خبر.. أم عبدالرحمن:الله يوفقك يابنتي ويجعل الخير دربك..بس لاتقولين لها إن العريس ولدي بس لمحي لها انه لو تقدم لها عريس بنفس مواصفات ولدي واش بيكون ردها اسمهان:ان شاء الله ابشري.. في الرياض كان أبوعبير عند وعده واستأجر لعبيروأخوانها وأمها شقة في عمارة خالها...وأمورهم ماشية...وبدأت الدراسة ... أم عبير:المفروض تكلمين أبوك يرسل لك مبلغ ونسجلك بمدرسة خاصة...!!! عبير:وليش المدرسة الخاصة يايمه؟بأدخل المدرسة الحكومي اللي قريبة من البيت مع بنات خالي.. أم عبير:طول عمرك وجه فقر!إنتي بنت أبوسعد يعني مو شوية!لازم نكون أحسن من قرايبنا ونكشخ! عبير:يايمه أي كشخة وأي كلام؟الوضع اللي إحنا فيه مايسمح لنا نشوف نفسنا على أحد!! أم عبير:وش قصدك يابنت؟؟ عبير:يعني أنا مطلقة وانتي مطلقة والكل عارف السبب!!وزين انه باقي لنا وجه نقابل أحد! أم عبير:استحي على وجهك ولاعد أسمع منك هالكلام!ماكأن اللي إحنا فيه كله من تحت راسك!!! عبير:وأنا اللي قلت لك ياأمي اضحكي على ولد الناس واسحبي فلوسه وكثري طلباتك؟؟كل اللي إحنا فيه منك انتي! انتي اللي حسستيني من يوم وأنا صغيرة إني انسانة مشوهة ولازم أخبي حروقي عن الناس وإن الناس لو شافوا حقيقتي بيكرهوني وينفرون مني!!لين ماصار قلبي أسود!أحقد على كل انسانة أحسن مني!! أم عبير:انتي فعلاً حقودة..من يوم إن هذا كلامك..بعد كل اللي سويته عشانك تقابلين فعايلي بالنكران؟؟شبيهة أبوك ماتنلامين!ناكر فضلي وجاحد!! عبير:يايمه لاتغالطين نفسك..انتي اش سويتي عشاني؟كل اللي كنتي تسوينه عشان نفسك!بالعكس انتي فضحتينا بين الناس وجماعتك ووصلت الفضيحة للشرطة ورميتينا بدرب السحر لولا إن الله ستر ولطف!!! مدت أم عبير يدها ولطشت عبير كف على وجهها... بكت عبير بمرارة وخرجت من الغرفة!! ============== طبعاً مرت الأيام واسمهان لاهية بدراستها وبيوم طلبت من أفنان في المدرسة رقم جوال خالتها مشاعل.... أفنان:اش تبين فيها؟؟ اسمهان:أبداً..أعرف وحدة تبي تستفسر عن معهد الأمل..وفكرت أتصل بخالتك أسألها شوية أسئلة!!(وطبعاً اسمهان كان تخطيطها تجس نبض مشاعل من غير علم أفنان!عشان إن ماكان فيه نصيب ماتتأثر علاقتهم ببعض!!) وأعطتها أفنان الرقم... اتصلت اسمهان بعد المغرب بمشاعل... مشاعل:هلا.. اسمهان:هلا مشاعل أنا اسمهان. مشاعل:مين اسمهان؟صاحبة أفنان؟؟ اسمهان:ايه مضبوط.. مشاعل:ياهلا ويامرحبا شلونك ياقمر؟؟ اسمهان:تمام وأنشد عن أحوالك.. مشاعل:أنا بخير وماعندي جديد من المعهد للبيت ومن البيت للمعهد..وقاعدة أفكر حالياً أحضر رسالة ماجستير.. اسمهان:مبروك..مبروك مقدماً..وعن ايش بتكون رسالتك ياترى؟؟ مشاعل:من صميم تخصصي أكيد!عن نظرة المجتمع لذوي الاحتياجات الخاصة!! فرحت اسمهان وقالت بداخلها(الحمدلله اختصرت مشاعل علي نص الطريق!!!) اسمهان:وياترى تشوفين مجتمعنا واقف بصف الشخص المعاق؟؟ مشاعل:أولاً أرفض اطلاق اسم معاق على الشخص المبتلى.. ثانياً:مجتمعنا مازال بحاجة إلى اعادة نظر في تعامله مع ذوي الاحتياجات الخاصة في توظيفهم وتزويجهم واعتبارههم أشخاص لهم دور وموب عالة وعبء على المجتمع... اسمهان:وتعتقدين لو تقدم لك شخص منهم بيكون سهل عليك توافقين؟؟؟؟ مشاعل:وليش لا؟أنا شخصياً تقدم لي قبل مدة شخص أعمى وكنت موافقة بس اخواني رفضوا..بس مو عشانه فاقد نعمة البصر! لأنه كان متزوج وعنده عيال!!وقالوا لسه في فرص قدامك ويجيك أحسن منه.... اسمهان:طيب لو فرضاً خطبك شخص أصم وأخرس هل بتوافقين عليه؟؟ مشاعل:طبعاً..ذنبه يعني انه يعاني من علة بالسمع؟؟بالعكس ماتصدقين قدر ايش حبي لكل الحالات اللي أدرسها بالمعهد..سبحان الله فيهم براءة وطيب أخلاق أحسن منَّا إحنا الطبيعين...وربي مايحرم الانسان من شي إلا ويعوضه باللي أحسن منه....المهم أحس إني طولت بكلامي عليك..اش سر اتصالك ياترى؟؟؟؟؟؟ اسمهان:هاه؟؟ لا بس كنت بأسألك عن موقع المركز ورقم هاتفهم وحدة أعرفها تبيه.... مشاعل:الرقم....؟....الموقع.... .؟.. وأنهت اسمهان المكالمة..واتصلت بأم عبدالرحمن وقالت:مساء الخير خالتي..وش رايك تطلعين تتقهوين معي؟؟ أم عبدالرحمن:مساء النور..انزلي انتي يابنتي أنا قهوتي زاهبة وودي أقعد بالحوش أشربها الجو حلو اليوم..والأولاد مو موجودين.. اسمهان:خلاص بأنزل لك..أنا زهقانة وعبدالرحمن مداوم موب راجع إلا 11 بالليل.. نزلت اسمهان وتبادلت بعض السواليف هي وأم زوجها وحكت لها عن مكالمتها مع مشاعل.. أم عبدالرحمن:الله يبشرك بالخير قولي آمين..كنت حاطة يدي على قلبي..عبدالرحيم بعد وده يتزوج وماودي أدور له عروس وأخلي عبدالمجيد..ان شاء الله أهلها يطلعون متفاهمين مثلها ويرضون اسمهان:ان شاء الله..انتي توكلي على الله وعساه تطلع من نصيبه أم عبدالرحمن(بخجل):أقول يابنتي؟ اسمهان:تفضلي ياخالتي.. أم عبدالرحمن:فيه وحدة تعرفينها وودي أخطبها لعبدالرحيم.. اسمهان:مين؟لاتقولين رانية؟ترى بتجيب أجله من أول أسبوع!هذا أنا قلت لك!!! أم عبدالرحمن:لا وش رانية؟أنا عيالي مثلي يحبون المرة الهادية الرزينة..ورانية الله يحفظها لأهلها! اللي أقصدها زميلتك مرام!! اسمهان:ايــــــــش؟مــــــرام؟ ؟؟ أم عبدالرحمن:ايه اشفيها؟لايكون البنت فيها شي؟؟ اسمهان:لا بالعكس..بس مرام أحس ذوقها صعب شوي!! أم عبدالرحمن:ياسلام!وأنا اشفيه ولدي عاد؟ حسب ونسب ومتوظف بأحسن وظيفة وراتبه زين وأخلاقه الكل يشهد له فيها..وعمره مناسب لعمرها..والبيت جاهز بس يبي له تأثيث..... اسمهان:ماشاء الله عليه أنا ماقلت شي..بس ماودي تتقدمين ياخالتي لهم ويردونك..أخاف مرام تقعد تتشرط ولا شي!! أم عبدالرحمن:انتي ماعليك..هاتي رقمهم وأنا بأتصل على أمها وأكلمها وأشوف بيرحبون فينا ولا لا؟؟ وأعطت اسمهان رقم أهل مرام لأم عبدالرحمن ورقم أهل مشاعل .. ======== ولما جاء عبدالرحمن من العمل خبرته اسمهان بالسالفة ونزل لأمه..وبعد ماسلم عليها بدأ يعاتبها عبدالرحمن:يايمه..واشفيك تخطبين من صاحبات اسمهان؟قلة بنات بهالديرة؟؟ أم عبدالرحمن:لقيت غيرهم وقلت لا؟؟ عبدالرحمن:اللي بيفتش بيلقى! أم عبدالرحمن:وهذا أنا فتشت ولقيت..واللي نعرفه أحسن من اللي مانعرفه!يكفي اني لقيت بنت موافقة مبدئياً على علة عبدالمجيد..فإشهو المانع عندك؟؟ عبدالرحمن:يمه انتي تتذكرين الناس اللي خطبنا لعبدالمجيد عندهم وبنتهم صاحبة اسمهان رفضهم يسبب توتر بالعلاقات..وأخاف بكرة تطلع وحدة من البنات فيها عيوب وتحطين السبب على زوجتي!!!!! أم عبدالرحمن:تطمن ياحبيبي..زوجتك بأحطها على راسي ومالها علاقة أكثر من إنها وسيط..هالبنات أنا اللي اخترتهم بنفسي ماحد جبرني عليهم..ان صار نصيب فخير وبركة وإن ماحصل فالله كريم يعوضنا باللي أحسن منهم...وبعدين لاتكون أناني! عبدالرحمن:حرام عليك..أنا أناني؟ أم عبدالرحمن:طبعاً تصرفك يقول كذا..تطمنت على مستقبلك وهالحين قاعد تتدخل بمستقبل اخوانك؟؟ عبدالرحمن:آسف حقك علي!بس كنت أبي أوضح لك نقطة وغلبتيني في الرد.!!! ================= مرت الأيام ورجعت اسماء لبيتها بعد انتهاء الأربعين وأم عبدالرحمن تعرفت بأهل مشاعل ولما شافت منهم بوادر موافقة جابت أولادها وأعمامهم يتقدمون رسمي,, وخطبت مرام وراحت لهم هي وبنتها أحلام واسمهان ووافقوا مبدئياً بشرط انه مايصير شي إلا عقب التخرج من الثانوي!!!! ============== وبالمدرسة.... مرام:هلا بسلفتي سمهونة.. آثاريك حاطة عينك علي وتبيني أصير سلفتك؟؟ اسمهان:لا لاتفرحين مرة!ترى خالتي هي اللي اختارتك.. مرام:طلبتك لاترديني! اسمهان:جاك! مرام:ودي أشوف صورته! اسمهان:صدق إنك خفيفة!النظرة الشرعية عقب أسبوعين مافيك صبر؟!!! مرام:الفضول ذابحني حيل! اسمهان:خلاص بكرة بأسرق لك وحدة من مكتب عبدالرحمن وأجيبها لك..بس بشرط؟!! مرام:اشرطي مثل ماتبين.. اسمهان:أنا معزومة نهاية الأسبوع على زواج بنت عمة عبدالرحمن وأبي أجي مشغلكم بس تضبطوني بلاش!!! مرام:إخس يالمصالح!ابشري تم! بس عقب ماأتزوج أخو زوجك بأطلع الفلوس من قفاتك!!!! ======= اليوم الثاني جابت اسمهان الصورة للمدرسة..وورتها مرام.. مرام(وهي متفاجئة):واااااي هذا أعرفه!!!!!!! اسمهان:أفا ياللعينة!طلعتي تعرفين شباب؟؟ مرام:واخزيااااه!وش هالهرج..؟ أقصد شايفته من قبل! اسمهان:وين؟علميني؟ مرام:يوم جيتك ببيتك زمان..بس كنت أحسبه أخو زوجك الأبكم ماهقيت إنه عبدالرحيم!! اسمهان:وهو شافك؟؟ مرام:كان مبقق عيونه وشافني من راسي لرجولي!أشوى إني لابسة عباتي وجهي بس اللي كان مو مغطى! اسمهان:آهااااا آثاري المسألة مخطط لها!عجبتيه يوم شافك عشان كذا خطبك!!أجل ماله داعي الشوفة من الأساس!أنا رافضتها! مرام:وانتي اش دخلك يالنسرة؟هو تمقل فيني ذاك اليوم هالحين دوري أتمقل فيه!!وبعدين الغرض مو بس نشوف بعض!إلا عشان نختبر مدى الارتياح اللي بيننا ونشوف فيه نصيب ولا لا! اسمهان:طيب ياخالتي!هالحين فهمت ليش اتصلت فيني عقب مارحتي ذاك اليوم!آثاري عشان تبي تعرف مين هي اللي عجبت ولدها..!! مرام:عاد تكفين لايدرون باقي الشلة عن سالفة الخطبة خليها بيني وبينك.. اسمهان:وليش عاد؟هذا هم يدرون بخطبة عبدالمجيد لمشاعل وماصار شي إلا فرحوا لها.. مرام:الصراحة...أخاف من العين!! اسمهان:ماااااالت عليك بقوة!هذا أنا تزوجت عبدالرحمن عين السيح وماحد طقني بعين إلا فرحتوا معاي وماقصرتوا..بيجون هالحين يعينونك انتي؟؟أقول اذكري الله والله يعينني عليك شكلك بتكونين سلفة غثيثة على قلبي!!! حسبي الله عليك ياعبدالرحيم ماتعرف تختار!!!! اتصلت سماح على أمها وبلغتها بمجريات الأحداث في بيت أم عبدالرحمن وانها خطبت لأولادها الاثنين أم تركي:حسرة على تركي وناصر اللي ذبحهم السهر لأنصاص الليالي والنوم والكسل طول النهار!!كل يوم وتركي يزور ناصر ويسهر عنده أو ناصر يجينا ويسهر عند تركي..وان طلعوا راحوا دواماتهم..وغير كذا مافي.. سماح:يايمه الحق عليك تاركتهم براحتهم.. أم تركي:وش تبيني أسوي يابنتي؟أتوطى في بطونهم؟خلاص هم رجال بشنبات وأدرى بمصلحتهم! سماح:إلا مثل البزران الصغار اللي تعلمينهم على الحمام لازم كل شوي تذكرينه بموعد الحمام والا سووا لك البحر طحين!! أم تركي:ههههه..صادقة يابنتي بأكلمهم لعل وعسى أحد يسمع.. =====وشوي وحضروا ناصر وتركي من العمل يتغدون.. دخلت عليهم أم ناصر المجلس وهي متلثمة...وسلمت.. أم تركي:هلا بمعازيب العيلة! تركي:هاه؟أشم بكلامك ريحة موب زينة أم تركي:ايه..قولوا آمين.. تركي وناصر:آمين أم تركي:الله يقطع العزوبية من كل بيت! ناصر:وش دعوى ياأم تركي؟أشوف كأنك متملله مني! أم تركي:إلا متملله منكم ثنيناتكم! تركي:أفاااا ليش يالغالية؟؟ أم تركي:لأني لو غالية كان أرضيتوني مرة بالعمر!اللي مثلكم عياله يلعبون بحضنه وانتم الواحد قاعد يضيع عمره قدامه وهو فاغر فمه!!! تركي:يايمه انصدت نفسي عن الزواج أم تركي:وانت الزواج اللي تزوجته تسميه زواج؟؟كلها 5 أيام بين أربع جدران ورديت البنت لأهلها!!أنا أكلمك عن اليوم لابد تتزوج البنت اللي تصونك وتحبك.. تركي:موب كل مرة تسلم الجرة! أم تركي:مو صحيح كلامك إلا إن كنت نحيس!! وإنت يانصور أمك قبل لاتموت وصتني عليك وقالت:اللي تتمنينه وتحبينه لتركي حبيه لولدي ناصر..وهذا أنا أتمنى لك كل خير وإنك تصير رجال ينشد فيك الظهر وتفتح لك بيت..طالعوا بعبدالرحمن وأخوانه نعم التربية والله تزوج عبدالرحمن والاثنين الباقيين في الطريق!! تركي وناصر:صـــــــــــــدق؟؟؟ أم تركي:ايه صدق..على بالكم ماحد صاحي بهالديرة الا انتوا؟تخسون! وخرجت من الغرفة تحضِّر الغداء.. تركي:ياحليلها أمي مافي شي شاغلها بهالدنيا إلا هالسيرة!!! ناصر:صحيح إن قلوبنا قاسية وما نحس! أمي لآخر لحظة بحياتها كانت تتمنى لو اني تزوجت..وكانت وصيتها اني أتزوج وهذا أنا بمكاني لاتقدمت خطوة ولاشي!!ياليت أمي عايشة وأرضيها.. تركي:أشوف كأن كلام أمي أثر عليك؟؟ ناصر:والله الوحدة ذابحتني بالبيت كل يوم وأنا عايش لحالي لو أموت ماحد درى عني كأني يتيم لاأهل ولاجيران وتلومني لابديت أفكر بجد بالزواج؟؟ دخلت أم تركي وحطت الغدا.. ناصر:ياعمة لو بغيت أخطب..ألاقي عندك عروس؟؟ أم تركي:عرايسكم موجودات انتوا بس قولوا توكلنا على الله... ناصر:توكلت على الله.... أم تركي:ماودك ياتركي تتنازل انت بعد وتتزوج مع ولد عمك بليلة وحدة؟؟ تركي:يايمه انتي... قاطعته أمه وقالت:عاد لاتكون أثول وتتغلى!حِنا يوم نبيك تتزوج فترى إنت اللي بتفرح أكثر منَّا تلاقي زوجة تآنسك وتلاطفك وتخاف عليك وتجيب منها عيال لا مِت بكرة يظلون يدعون لك وتكسب من وراهم أجر! دمعت عيون ناصر..وتذكر أمه.. أم تركي تكلم تركي: قطيعة تقطعك !ورى قلبك مو رهيف مثل ولد عمك؟؟ تركي:أنا بأتوكل على الله وأخطب بنت الناس اللي كلمتوني عنها!ولكن إن طلع فيها عيب فلا تلومون إلا نفسكم توقعوا إني بأسوي أي شيء!!! سماح:تفاءل بالخير..الله يسامحك إشفيك صرت معقد من تجربة وحدة؟؟ هند:وبعدين أنا متأكدة إنك لو تشوفها بتعجبك مرة..أخلاقها وهدوئها أحلى شي فيها.. تركي:مدري أحس الحماس مقتول فيني! أم تركي:ناصر اللي هو ناصر..تغير رايه وصار وده يخطب اليوم قبل بكرة..وإنت باقي راسك يابس مدري اش تنتظر!! تركي:زين من هي بنته؟؟وكم عمرها؟ أم تركي:عمرها 18 سنة وتدرس بالثانوية العامة وأزيدك من الشعر بيت صاحبة اسمهان..وهي بنت فلان بن فلان الفلاني!! تركي:ايــــــــــــــش؟؟أبوها يشتغل بوزارة الحج والأوقاف؟؟ أم تركي:ايه صحيح..وإنت اش دراك؟؟ تركي:يمه..هذا الرَّجال اللي حجيت معاه قبل سنتين! سماح:يامحاسن الصدف!هذا إنتوا طلعتوا تعرفون بعض..يعني متسهلة المسائل ان شاء الله... تركي:الصراحة كان نعم الرجال كان كل يوم بالمخيم يسوي لنا محاضرة..وقبل لانفترق عطاني كرته عشان كذا مازلت ذاكر اسمه وشغله...سبحان الله من يصدق إنه بيجي يوم وأخطب فيه بنته؟! هند:يعني نتوكل على الله ثم نكلم الجماعة ونتفق معاهم على موعد؟؟ تركي:على بركة الله.... أم تركي:أجل خلاص بأكلمهم..وإن عطونا موعد قريب رحنا لهم أول بعدين نكلم أهل البنت اللي بنخطبها لناصر.. تركي:إلا هي وش اسمها؟؟ سماح وهند:أفنـــــــــــــان تركي:ياســــــــــــلام!! =============== وبالفعل تم الاتصال على أهل أفنان ورحبوا بأم تركي....وراحوا يتقدمون رسمي وراح تركي واستقبله أبو أفنان بالأحضان بعد ماتذكره مباشرة... عند الحريم أم تركي كانت صريحة من البداية وحكت لأم أفنان قصة تركي مع عبير.. أم أفنان:لاحول ولاقوة إلا بالله يارب..بعض الناس صارت ذممهم واسعة..بس توصل الدرجة للسحر؟هذا اللي مو معقول بناس مسلمين..الله يهديهم ويغفر لهم والحمدلله اللي نجى ولدك من كيدهم.. أم تركي:الحمدلله.. أم أفنان:أما انتم والنعم فيكم يكفي انكم مناسبين أم اسمهان الله يحفظها ناس راعيين دين وأخلاق ومحبوبين من الناس ماشاء الله... سماح:جزاك الله خير... أم أفنان:مدري إن كان عندكم فكرة عن بنتي سندس؟ سماح:ايه سبق وكلمتنا اسمهان عنها الله يشفيها ويعافيها.. أم أفنان:تدرون السبب في أمراض ضمور الدماغ راجع في معظم الأحيان بعد ارادة الله لزواج الأقارب..عشان كذا أنا ضد إني أزوج أفنان لأحد من القرايب..وربي يكتب لها اللي فيه الخير. واستمروا سماح وهند وأم أفنان وأم تركي في سواليفهم المختلفة وأفنان جالسة بصمت تصب القهوة والشاي.. ======= وفي مجلس الرِجال كان تركي وأبوأفنان واخوانها جالسين.. يسولفون في مختلف الكلام..ومن ضمنه... أبوأفنان:والله والنعم فيك ياتركي..عاشرتك 6أيام بالحج وكنت فيها نعم الرجل..لكن ودي أقول لك إن الزواج قسمة ونصيب إحنا بنشاور البنت ونخليها تستخير وعقبها يصير خير ان شاء الله... تركي:وأنا لو أدور الدنيا وأدور عن عائلة فاضلة وشخص مثلك بأخلاقك وسماحتك فما ظنتي بألقى!! أبوأفنان:هههه وش دعوى ياتركي؟لو تدور بتلقى اللي أحسن مني..أنا ماني أحسن الناس أبد... تركي:والله هذا من تواضعك بس ====وتمت الزيارة والوعود بالتفكير ثم الرد في أقرب فرصة.. ================= وراحت أفنان ثاني يوم المدرسة وهي بتطير من الفرحة!! وبشرت الكل بخطبتها البارح... الكل:مبرررررررروك مرام:أجل جاء دوري أصارحكم!ترى عن قريب ان شاء الله بأصير سلفة اسمهان!! الكل:لاااااااااااااا م معقول... اسمهان:إلا صحيح..مشاعل لعبدالمجيد ومرام لعبدالرحيم.. وأفنان لتركي ان شاء الله.... نجلاء:وشوفتك صارت يامرام؟؟ مرام:لا بإذن الله نهاية هالأسبوع..ادعوا لي!! أفنان:عاد اسمهان بتسوي فيها حركات وتجي تزوركم على إنها زوجة الكبير!! اسمهان:طبعاً زوجة الكبير دايماً أحسن من زوجة الصغير في كل عيلة!!! الشلة:هههههههههه أما رانية انسحبت من الشلة وراحت للحمام وعيونها مبتلة دموع! وقامت تتساءل بينها وبين نفسها:ياترى بإيش قصرت مع اسمهان؟فكَرَت بمستقبل كل الشلة إلا أنا!!!معقولة تشوفني شينة لهذي الدرجة؟؟ولا يعني عشان وزني زايد شوي؟؟ وقررت رانية إنها تبدأ بنظام حمية قاسي!!(بيني وبينكم البنت ودها تلحق على عمرها!!!!) ============== ورجعت اسمهان من المدرسة للبيت وكانت كالعادة لما يكون دوام عبدالرحمن صباحي لازم تروح يومياً لأختها اسماء وتزورها لمدة نص ساعة إلى ساعة مخصوص عشان تشيل النونو الصغيرة لينا!! كان عندها تعلق غير طبيعي بهذي البنت وبدأت تتعلق بكل طفل تشوفه!لأنها من وجهة نظرها متأخرة بالحمل!! ومرة من المرات.... اسمهان:عبدالرحمن بأسألك سؤال وأبيك تجاوبني بصراحة؟؟ عبدالرحمن:تفضلي... اسمهان:وش أكثر شي يعجبك فيني؟؟ عبدالرحمن: يعجبني فيك إنت الدلع حنون وفيك رقــــة طبع وأحلى شي يمـــيزك طبيعي ومنته مصطنع! اسمهان(بحزن):أنا أكلمك بجد ياعبدالرحمن..ماقلت لك اكتب فيني قصيدة.. عبدالرحمن:ياحياتي أوقات الشعر يكون أبلغ من الكلام..عموماً تعجبيني بكل شي فيك من راسك لرجولك!والطباع حتى الشين منها أحبه لأنه منك انتي!! اسمهان:يعني انت مو متضايق إني أنقص من غيري؟؟ عبدالرحمن:وشهو؟أنقص من غيرك؟ ماعاش من يقول هالحكي!ليش ياعيوني تقولين إنك ناقصة؟أنا زوجتي أحب إنها تكون انسانة عندها ثقة بنفسها وقدراتها وماتصدق هالحكي عن نفسها أبد!!!!!!! اسمهان_(بصوت باكي):بس أنا إلا الآن ماحملت!اللي بسنك عندهم أطفال بالمدارس بس انت محروم لسه وش ذنبك؟؟ عبدالرحمن:ردينا على نفس الموضوع ياسمهونة؟يابنت الحلال أنا اللي غلطان إني ماتزوجت بدري وجبت عيال!انتي ليش زعلانة؟وبعدين إحنا ماصار لنا إلا 6 شهور متزوجين.تبين على طول يصير عندنا عيال؟؟وين صارت هذي؟؟ اسمهان:طيب اش تبيني أسوي أنا مليت مليت! عبدالرحمن:ليش مليتي وانتي أساساً ماعندك وقت تمِلين فيه؟كل يوم أجيبك من المدرسة الساعة 2 الظهر وأروح دوامي الساعة 3 الظهر وماأجي البيت إلا الساعة11 بالليل وألقاك بسابع نومة!!!ويومك كله ضايع بين النوم أو شغل البيت أو المذاكرة أو التليفونات والنت! اسمهان:بس أنا أحس إن عندي مشكلة وماني مثل غيري!كل اللي أعرفهم تزوجوا بنفس الفترة اللي أنا تزوجت فيها حملوا إلا أنا!! عبدالرحمن:اسمهان كل شي مقدَّر ومكتوب وبيصير في وقته..بس انتي لاتشغلين بالك وفكري بدراستك وبس..وعقب التخرج من الثانوي يحلها حلاَّل! =============== وكانت رانية قاعدة مع أمها بالبيت رانية:يمه..أنا لازم أسوي موعد عند أخصائية تغذية!! أم رانية:ليش؟خير؟ رانية:يمه وزني زايد ولازم أشوف لي حل! أم رانية:مبررررررروك..بس صح النوم!لي سنين وأنا أتحايل عليك وأقول لك استحي على وجهك مرة وارحمي نفسك من الأكل وماكنتي تسمعين!هالحين اش اللي استجد؟؟؟ رانية:اعتبريها صحوة ضمير! آسفة يآحلوآت هذآ اللي قدرت عليـه اليوم بكرة بعد العشآء إن شآء الله نكمـل.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
رائعة جدااا
يعطيك العافية على المجهود الاكثر من ائع |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
جزء اليوم لاحظوا الشلة انه رانية بدت ماتاكل معاهم وتجيب لنفسها أكل خاص وتاكله!بس طنشوا الموضوع!!!!! ونهاية الأسبوع كانت شوفة مرام وراحت اسمهان وأحلام وأم عبدالرحمن وكانوا قد نزلوا السوق واشتروا طقم ذهب أبيض راقي..عشان العريس يعطيه العروس عقب الشوفة.. إلا هالمرام كاشخة ولابسة تنورة وبلوزة جديدة وكانت الزيارة مختصرة جداً.. ناداها أبوها تدخل المجلس عشان يشوفها العريس..ومد يده يصافحها ومدت يدها بكل لهفة إلا ورقة السعر خرجت من كمها!!!! كتم عبدالرحيم الضحكة أما مرام خجلت جداً!! أشَّر لها أبوها تقعد وقعدت... سألها عبدالرحيم:ماشاء الله بأي مرحلة انتي؟؟ مرام(بداخلها تقول:ياشين التغيشم!كأنه مايدري!):بثالث ثانوي.. عبدالرحيم:سمعت إنك تشتغلين؟! مرام:مرَّات أساعد أختي المتزوجة بمشغلها... عبدالرحيم:وناوية تدخلين الجامعة..عقب الثانوي؟؟ مرام:لو سمحت لي بأدخل!! عبدالرحيم مات من الضحك!!!هههههه وأبومرام فنجَل عيونه فيها عشان تخرج وطلعت من المجلس وهي طالعة ناداها عبدالرحيم وعطاها الكيس اللي فيه علبة الطقم.. وراحت فكت ورقة السعر وهي تقول بنفسها:وافشيلتاه!شاف ورقة السعر يعني عرف إن البلوزة جديدة! الحين بيقول هذي من فرحتها بحضوري راحت تشتري لي لبس خاص!!! ودخلت عند الحريم... أم عبدالرحمن:هاه؟بشري ياعروس؟إن شاء الله ارتحتي للعريس؟؟ مرام(بضحكة خجل):الحمدلله... همست اسمهان في إذنها:عسى ماصار لك موقف محرج مثل ماصار بشوفتي؟؟؟ مرام:لا الحمدلله..أنامو مثلك أنا حاسبة خطواتي صح ولايمكن أفشل نفسي!! وبعد الأخذ والعطا بين العريس وأبومرام اتفقوا انه الملكة تكون بعد التخرج..يعني بعد حوالي 5شهور!! وبعد كذا رجعوا الجميع للبيت..وحكى عبدالرحيم لأمه موقفه مع العروس والبلوزة ودخولها الجامعة بإذنه!!! عبدالرحيم:هههه ياحليلها يمه شكلها مطيعة أسألها عن رغبتها في دخول الجامعة تقول إذا سمحت لي بأدخل!!البنت ضامنة إني بآخذها... وقامت أحلام ووصلت الكلام لاسمهان.. اسمهان:يوووه شوفوا الخفيفة وقال ايش؟أنا مو مثلك أنا حاسبة خطواتي صح!!!!! ============= يوم السبت في المدرسة وبوقت الفسحة قامت رانية تنكت مع الشلة وتحكي لهم موقف صار لها وهي ترقص في عطلة نهاية الأسبوع بملكة بنت جيرانهم وهي مندمجة بالسالفة وترقص عشان تمثل لهم الموقف!! إلا مروا من جنبها صاحبات عبير هالة ونادية وقالت:بشويش بشويش على الأرض!ترانا نحب المدرسة مانبيها تنهار! رانية:عشتوا!!باقي لكم لسان عقب ماصاحبتكم الساحرة طسَّت؟؟؟ هالة:أقول الله يقطع الثقة اللي تخلي الفيل يدبك بخفة الفراشة!!هههههه جت رانية تهجم عليهم...مسكتها اسمهان من يدها وغمزت لها تقعد!! نجلاء:خلاص صفحاتنا الماضية نبي نقفلها!خلي اللي يسب يسب واللي يشمت يشمت يكفي إننا نحب بعض ولايمكن نفترق وش علينا منهم؟؟ أفنان:ايه والله..أحس إننا لازم نكبر..بصراحة اسم شلة الصاعقة مفشلني حيل..مالي نفس انه أحد ينادينا فيه!!! اسمهان:ايه والله..ياإني تفشلت من دحومي لما قرأ الكرت اللي كنتوا حاطينه على هديتي بيوم زواجي..بعد التهنئة موقعين بإسم(شلة الصاعقة!!) مرام:ايه صادقة تخيلي ياسمهونة يعرفون رجالنا إننا كنا أفراد في عصابة الصاعقة؟؟قمة الفشلة!! اسمهان:والله الفشلة في اللي يلبس بلوزة وبطاقة السعر عليها!!ههههه مرام:قليعة تقلعك...وانتي اش دراك؟لايكون حكى لزوجك؟؟ اسمهان:لا حكى لأخته وحكت لي!! مرام(وهي متفشلة):ترى أنا متعمدة أسوي هذي الحركة عشان يعرف إني ألبس ماركات غالية!! اسمهان:لااااا ياشيخة؟كان علقتي محفظتك في جنبك بعد عشان يشوف بالمرة وش كثر متروسة فلوس!!! ...... لاحظوا الشلة إن رانية ماتاكل!! نجلاء:رنو موب عوايدك يعني أخاف مفلسة؟وين الأكل؟ كنتي قبل ماتخلين أخضر ولايابس إلا وتشرينه..اشفيك اليوم متقشفة؟؟؟ اسمهان:رنو؟لايكون تسوين ريجيم من ورانا؟؟تكفين خليني أبدأ معك! رانية:ايه أسوي حمية خاصة.. اسمهان:تكفين خليني أبدأ معك..تصدقين من يوم تزوجت زدت خمسة كيلو ونص وأكثر ملابسي ضلقت علي وودي أنحف شوي!! رانية:خلاص من بكرة ابدي معي.. أفنان:تسوين رياضة؟ رانية:لا..الصراحة مالي خلق عليها لكن أمشي يومياً.. اسمهان:فكرة حلوة!اش رايك يومياً نمشي بساحة المدرسة في الصباح!! رانية:أوكيه..من بكرة نبدأ.. مرام:الله يعيننا على ريحة عرقكم من أول النهار!! الشلة:ههههههههههههه ======== وبنفس اليوم في العصر جاء ناصر لتركي في بيته يودعه! تركي:على وين العزم ان شاء الله؟ ناصر:أبد أخذت اجازة من العمل لمدة أسبوع وبأروح الشرقية أزور أخواني وبعد بكرة معزوم على ملكة ولدأخوي بالدمام! سمعته أم تركي:والخطبة ياولدي؟ ناصر:لارجعت يصير خير..العروس موب طايرة في أسبوع!! أم تركي:بالتوفيق ان شاء الله.. اتفقت اسمهان مع رانية على حمية خاصة+مشي في الساحة يومياً مع نسمات الصباح الصافية..وشاديين حيلهم أما الفطور متبادل بينهم مرات اسمهان من الصبح بدري تقطع سلطة خضار بالبطاطس المسلوق وتجيبها أو تبولة أوفتوش!! والشلة يراقبون من بعيد ويعلقون.. ومرة كانت اسمهان شادة حيلها بالمشي ورانية بعد مشي بإخلاص!! مرام:ياواد إنت يامخلص!الأرض اشتكت! نجلاء:على هونك سوسو حبيبتي لايجيك شد عضلي!عاد دحوم موب هنا عشان يسعفك ومافي أندونيسية تمرخك!!هههههه(تذكرها بسالفة العمرة التاريخية!) أفنان:مو مشكلة لاصار لها شي فيه أبلة جوهرة! رانية:موتوا حرة يالعواذل ودكم تحبطونا عشان نبطل لكن حريمتكم ياأنا طاقني الشوق أنحف12 كيلو! اسمهان:حرام عليك إنت صدق وزنك زايد..بس موب لدرجة انك تنحفين12 كيلو!!وش بتصيرين؟؟ رانية:أقول خلك ساكتة أهل مكة أدرى بشعابها!! =========== وفي الشرقية ناصر مبسوط كل يوم معزوم من بيت في بيت عند اخوانه وطلعات ودخلات هو وأولاد اخوانه اللي أغلبهم شباب من سنه وأصغر..ونهاية الأسبوع قرروا يطلعون للبر يطعسون بالدبابات!! وركب ناصر الدباب وطعس من فوق وتقلب بدبابه لين تحت! ونقلوه على المستشفى!! بنهاية الأسبوع راحت اسمهان لأهلها وكانوا الجميع مجتمعين ببيت أهلها..ماعدا ابتسام لأنها سافرت من قبل المدارس... وعاد اسمهان طايرة ببنت أسماء(لينة) بس تشيل وتحط فيها وتصورها بجوالها.. أسماء:خذيها معاكِ البيت فكيني من حَنَتها وبكاها! اسمهان:ياليت ياأسومة ياليت! سماح:ياحليلك ياسمهونة..اش لك بوجع الراس خليك كذا عروس ومرتاحة.. اسمهان:حرام عليكم إلا يازين الصغار يهبلون وابتساماتهم وضحكاتهم كلها براءة ياليتني حامل!صدقوني بأصير أسعد انسانة بالدنيا! أسماء:هو كذا..ابن آدم طماع الشي اللي مو عنده يحلى بعينه..ولاصار عنده زهد فيه!! اسمهان:مو صدق كلامك أبد!!كنت أتمنى فترة الخطوبة اني أصير مع عبدالرحمن ببيت ولما تحقق مناي وتزوجت تعلقت فيه أكثر! سماح:لاتذكروني..ياأنا صارت نفسيتي مع الوحم زفت.الود ودي أمسك محمد وأحذف به من الشباك ماأطيق مزحه وسواليفه!! أسماء:عاد محمد اش حليله دمه خفيف ويسوي جو!هو صدق مزحه غثيث كثير من الأحيان بس على الأقل أحسن من أحمدوه زوجي!هذاك اللي علة صحيح! الأم:استحوا على وجيهكم يابنات!صار لي 32 سنة مع أبو محمد وعمري ماقلت عنه بغيابه كلمة تضره!وانتم ماتتحمدون ربكم على النعمة وتنطمون..كل وحدة تسب زوجها من جهة! أسماء:يوووه أمي تقصدك ياسماح!تدرين حمود دلوعتها وماترضى فيه! الأم:إلا أقصدك انتي يالقَشْرة!دايماً لسانك متبري منك! اسمهان:الله يحفظ لي دحومتي..وعساه ينقطع لساني قبل أقول عنه كلمة شينة!! أسماء:بعدك عروس يالهبلة!خل نشوفك عقب 5سنين واش بتقولين! ============ وفي المستشفى كان ناصر متنوم وجسمه كله رضوض وكدمات وعنده شُعر في أصابع القدم ومجبسينها! واثنين من أولاد أخوه متنومين معاه يساعدونه على القومة والقعدة... =================== وأقبل يوم السبت وناصر مارجع من السفر.. تركي:تصدقين يمه؟ناصر هذا بياع!من يوم سافر مارفع علي سماعة يطمني فيها عن أخباره!! أم تركي:الغايب حجته معه..وانت لو فيك خير كان اتصلت وسألت عنه وباركت لولد أخوه الملكة اللي صارت..بدل ماتلومه ماحد يدري عن ظروف الناس! تركي:إلا من شاف أهله..نسي خِله!!(على وزن من شاف أحبابه نسي أصحابه!!!) واتصل تركي بناصركذا مرة وبعدين رد عليه.. ناصر(بصوت ضعيف):هلا تركي.. تركي:هلا فيك يابعدي..وشفيك نايم؟؟ ناصر:لاتعبان حيــــــــــل ومتكسر تركي:واش منه تعبان؟؟ ناصر:صار لي حادث... تركي:هييييه بايخة!العب غيرها.. ناصر:يمين ماأكذب عليك. تركي:انت بعدك بالشرقية؟؟ ناصر:ايه.. تركي:ومتى راجع؟؟ ناصر:يمكن عقب أسبوع أو أسبوعين.. تركي:أقول ماأحلاك في البكش!يوم جيت تودعني قلت لي كلها أسبوع وأرجع!هالحين قمت تمططها؟؟ ناصر:مو بكيفي غصب عني..الحادث كسرني تكسير! تركي:إنت من جدك؟ولا تستهبل؟ ناصر:ياخي مافيني أكذب وأنا تعبان!خذ ولد أخوي ياسر وكلمه!! وبالفعل كلم تركي ولد أخوناصر وعرف بحادث الدباب.. وبعد يومين راح تركي الشرقية بعد ماأخذ اجازة من العمل وبالمستشفى راح وشاف ناصر ممدد على السرير والغرز منتشرة في بعض أماكن من جسمه!! تركي:أفااااا يا العلم! آثاريك رايح فيها؟؟ ناصر:ولو تدري عني؟طلبتك ماتردني! تركي:صار...وش تبي؟فلوس؟ ناصر:لا..محتاج كليتك!مافي أحد راضي يتبرع بكليته لي تركي:ليش وش دخل كليتك بالموضوع؟ ناصر:ثارت علي كليتي وشالوها..ولابد يحطون لي بدالها تركي:لاحول ولاقوة الا بالله..ضيقت صدري! ناصر(بصوت تعبان):هاه؟تسلفني كلية؟ولا أنا هنت عليك مثل ماهنت على غيرك؟؟ تركي:ياخي مدري اش أقول لك؟انت تدري وراي زواج ان شاء الله..شلون بأتزوج بكلية وحدة؟؟ ناصر:لاتكون أناني ياتركي..العروس تبي قلبك ورجولتك ماتبي كلية لتصريف الفضلات!! استأذن تركي من ناصر وراح يركض على الدكتور.. تركي:دكتور ناصر نزيل غرفة608 اشفيه بالضبط؟؟؟ الدكتور:أبداً حتة حادسة زغيرة على الموتوسيكل حصلتله وراح واقع من فوء لتحت..وجسمه تخدش من كل مكان..مع شُعر في أصبع رجله الشِمال!! تركي:طيب مسألة نقل الكلى..طمنني عنها؟ الدكتور:كِلى ايه يابني؟انتا بتخرف بتئول ايه؟؟ تركي:هو قال انكم شلتوا له كلية ويحتاج لزراعة كلية ثانية.. الدكتور:بص يابني..ناصر ده نصاب كبير!هو حيتبلى علينا ولاايه؟؟لاخدنا كِلْوِتُه ولاخدنا كِرْشته!دا احنا خيطناه ووضبناه وبئى عال العال بس بيتدلع حبتين! تركي:هين يانويصر..تكذب وانت على فراش المرض؟ =====ورجع له تركي الغرفة... تركي:ياحليلك يانويصر..الدكتور يقول لازم تكتب وصيتك الليلة! ناصر:بسم الله علي لاتفاولون علي بالموت! تركي:مو انت ماقصرت وفاولت على نفسك بفشل كلوي! لكن خذ...وقام تركي وهبد ناصر في السرير وطقه على أم رأسه وناصر يصرخ!! وأولاد أخوه يضحكون,,,, ياسر:خليه تكفى ياتركي..تعودنا على خرابيطه وماندري كيف بنودعه ويتركنا يسافر لـجدة! تركي:مانبيه..خلوه عندكم لين مايتوب من مقالبه وصرقعته...! ============== في الجانب الآخر استمروا رانية واسمهان على الحمية.وعبدالرحمن مبسوط على النتايج اللي بدت تبان على اسمهان! عبدالرحمن:ايه كذا ياسمهونة بدى يرجع جسمك لطبيعته وبأفتك من كلمتك اللي صرت أسمعها كل يوم والثاني ملابسي ضاقت علي وجهازي ماتهنيت فيه!ودني السوق ودني المول..اشتري ياعبدالرحمن..وادفع ياعبدالرحمن! اسمهان:لو ماشجعتني رانية كان ضعت! جزء جديد.... بعد فترة بدأت اختبارات الترم الأول واسمهان وقفت ريجيم وقالت لرانية: رنو أنا وصلت للوزن اللي أبيه وماعاد راح أكمل معاك!! رانية:أنا لسه مشواري طويل وراح أكمل لحالي.. وشدت اسمهان حيلها بالامتحانات هي وصاحباتها...لين ماطلعت النتايج وكانت حلوة.. ========== بدأت الاجازة... عبدالرحمن:بهذه المناسبة الحلوة يامدام اسمهان لازم نجتمع بالعائلة ونطلع طلعة حلوة مع بعض! اسمهان:هيييييه..بس وين؟؟ عبدالرحمن:المكان اللي يعجبك... اسمهان:بخاطري أحجز صالة بفندق وأسوي حفلة نجاح كبيرة!! عبدالرحمن:على هونك..ياحلوة..أنا قلت نطلع طلعة عائلية مو نسوي خساير!وبعدين انتي لسه ماتخرجتي باقي الترم الثاني وشهوله التكاليف؟ إحنا مقبلين على زواج عبدالمجيد وعبدالرحيم وأبي أمسك فلوسي عشان أتساعد معاهم! اسمهان:وش لي في أخوانك؟ودي أنبسط واستانس! عبدالرحمن:أولاً:عيب تقولين وش لي في اخوانك!انتي صرتي وحدة من العائلة وهم بمقام اخوانك.. ثانياً:انتي تقولين وش لي بأخوانك وأنا ماسويت مثلك بالعكس فكرت في طلعة عائلية وقصدت أهلك وأهلي!وبعدين لما أقول لك إحنا مقبلين على زواج اخواني فإنتي المستفيدة من توفير فلوسنا!أكيد بتطلبين فستان وملحقاته وكوافير وخلافه+هدايا للعرايس..يكون على الأقل في مبلغ لك على جنب!! اسمهان:يوووووه سامحني مدري شلون أرمي كلام من غير ماأفكر! عبدالرحمن:أنا في خاطري نحجز شاليه كبير بمسبح للحريم وواحد ثاني للرجال ونعزم أهلك كلهم وأهلي وننبسط لمدة يوم.. اسمهان:واااااااي فكرة تهبل!بس تكفى لاتنسى خالتي نوال وزوجها وبناتها تراهم يونسونا دايم بمسابقاتهم ومحاضراتهم! عبدالرحمن:أنا بأحجز وبأعزم أبوك وأقول له جيب كل من يعز عليك.. ========= بالنسبة لتركي اتصل عليه أبوأفنان قبل الامتحانات وأعطاه الموافقة على الخطبة وحدد الملكة قبل الزواج بيومين عقب التخرج من الثانوي يعني عقب شهور!!! تركي:وليش ياعم بين الملكة والزواج يومين؟متى يمدي البنت تجهز نفسها؟ أبوأفنان:هي وحدة من اثنين أنا أعطيها فلوس وتجهز بها نفسها ومتى ماجبت انت المهر ترجع لي فلوسي..أو انك تعطيها المهر قبل الزواج بشهر عشان تجهز نفسها.. تركي:زين ومتى النظرة الشرعية؟ أبوأفنان:لايا الحبيب..مااتفقنا على كذا! تركي:تقصد إنك بتزوجني بنتك من غير ماأشوفها..؟؟؟ أبوأفنان:ووين المشكلة؟كل بنات العائلة تزوجوا بنفس الطريقة! تركي:بس إنت ياعمي راعي دين وتعرف كلام الرسول صلى الله عليه وسلم في هذا الموضوع وأكيد مو خافية عنك قصة الصحابي اللي خطب امرأة ونصحه الرسول يشوفها لأنه كما قال(إن في أعين الأنصار شيئاً) أبوأفنان:معلوم ياولدي هالكلام ومو خافي علي..بس عاداتنا في عائلتنا ان العروس ماتشوف العريس الا بيوم الملكة أو الزواج.. تركي:بس مو معقول كذا..إنت لاتحسبني يوم بأشوفها ..بأشوفها عشان أقيس جمالها!بالعكس أنا واثق من ذوق أهلي..بس عشان أشوف مدى الارتياح لها!!! أبوأفنان:والله إن كنت ملَزِّم بأخليك تشوفها على غفلة!! تركي:شلون يعني؟مافهمت؟ أبوأفنان:يعني تكون جالسةبالحوش مثلاً وتجي انت وتشوفها من بعيد من غير ماتحس!! تركي:ياسلام..يعني أسمح لنفسي أشوفها وهي لا؟؟من حقها تشوفني هي بعد وتقول رايها!أنا لو باغي شوفتها عشان أعرف شكلها بس!كان طلبت منكم صورة وشفتها..بس أنا طلبت النظرة الشرعية اللي هي من ديننا عشان نعرف في بيننا وفاق ولا لا؟ إلا دق باب المجلس وكانت أم أفنان تبي أبوأفنان ياخذ الشاي.. أم أفنان:خير ان شاء الله؟ليش أصواتكم عالية؟ أبوأفنان:العريس الله يهديه مُصِر يشوف البنت! أم أفنان:ووين المشكلة؟ أبوأفنان:انتي تعرفين تقاليد العائلة عندنا كيف! أم أفنان:الدين المفروض يكون حكمه أقوى علينا من العادات!وابن الناس ماقال شي غلط..وبعدين ماراح نكون إحنا أحسن من اخواني خريجين الدراسات والعلوم الشرعية لما خلوا أختي مشاعل تشوف خطيبها عبدالمجيد!! أبوأفنان:يعني قولتك أخليه يشوفها؟ أم أفنان:ايه توكل على الله..وابن الناس موب قاعد يلعب معانا حتى نخاف منه إنت تعرفه من قبل وهو عنده رغبة جادة في الخطبة..إذن وين المشكلة؟ أبوأفنان:إذن نادي بنتك بسرعة وبلا زبرقة وبلا كلام فاضي من عند الباب توقف ثواني وتمشي!! أم أفنان:تم.. راحت الأم وبلغت أفنان وزعلت أفنان:يمه اش هذي الشوفة؟ حرام عليكم..كل البنات يكون عندهم خبر قبلها بمدة..وأنا تبون المسألة تتم كذا؟ أم أفنان:يابنتي زين من أبوك تنازل ورضى..روحي الله يرضى عليك بدلي هدومك واطلعي.. وراحت أفنان تلبس ودمعتها على خدها وبعد مالبست وقفت قدام باب المجلس والحيا شاقها نصين!بمظهر أقل من عادي!لامة شعرها ببكلة ولابسة لبس بسيط جداً وعيونها بالأرض..انذهل تركي لأن الأب ماعطاه فكرة انه وافق على الشوفة!! تركي:ماشاء الله تبارك الله..شلونك؟ جاوبت أفنان بدمعة!وظلت ساكتة تركي:الله يوفقك بامتحاناتك ان شاء الله خجلت أفنان وعطتهم ظهرها ودخلت عند أمها... طالع تركي بالأب:انت متأكد ان بنتك موافقة علي؟؟؟؟ الأب:هههه ايه بس بنتي خجولة أول مرة تطلع قدام شخص غريب وش تبيها تسوي يعني غير البكاء من الخجل؟؟ تركي:إذن على بركة الله..ونعم الأخلاق فيها.. أبوأفنان:اسمع ياتركي ياولدي حِنا نشري الرِجال ومانبيع بناتنا لذلك أنا ماأشرط عليك بأي شي..المهر اللي تدفعه إحنا راضيين فيه..وإن حصل منك قصور فأنا رقبتي سدادة لبنتي ومابأقصر عليها بشي..وترى الملكة بتكون بسيطة وعائليةوفي البيت ..راس مالها ذبيحتين.. تركي:جزاكم الله خير... واتفقوا انه كل شي يسير نهاية السنة يعني بعد شهور.. تركي وهو بالسيارة قال بنفسه:سبحان الله..على قد ماكانوا أهل عبير متكلفين ومسرفين..على قد ماهذول الناس بسيطين ومتواضعين! بعد ماعزم عبدالرحمن أمه واخوانه وأخته أحلام وزوجها بالإضافة إلى أخوات اسمهان وأزواجهم وأمها وأبوها وأخوها محمد..وخالتها نوال وبناتها وأولادها وزوجها.... استعد الجميع للذهاب للشاليه من بعد المغرب..وعلى مااكتمل عدد الضيوف كانت صلاة العشا انتهت ...كان المكان رائع عبارة عن فيلا دورين بواجهة زجاجية بالأسفل تطل على حديقة صغيرة فيها مسبح..وعن يمين شاليه النساء كان شاليه الرجال.. كان موقع شاليه النساء بالنص بين شاليهين عن يمينهم شاليه الرجال وعن يسارهم شاليه لـ ناس.. وبدأت الجلسة بشرب القهوة وصواني الحلى والضحك والفرفشة والسواليف. الخالة نوال:يالله ياحريم ويابنات نتثقف شوي من كتاب الله اللي مازلنا نجهل فيه الكثير من المعاني.. سؤالي الأول:وردت كلمة النجدين في القرآن..مامعناها؟؟ أسماء:طريق الخير والشر.. نوال:سؤالي الثاني(ماهي الؤتفكات؟) أم اسمهان:مدائن قوم لوط.. نوال:ماهو العهن؟؟ أم عبدالرحمن:الصوف المصبوغ.. نوال:من هو الأكمه؟ هيفاء(بنتها):الشخص المولود أعمى.. نوال:ومن هم الأيامى؟ سماح:من لاأزواج لهم من الرجال والنساء.. نوال:ماهما المكاء والتصدية؟ وبعد تحاور وتشاور جات الاجابة:التصفير والتصفيق..مثل ماكانوا كفار قريش يفعلون حول الكعبة كانت عبادتهم تصفيق وتصفير !! وفجأة والحريم قاعدين يسولفون حول المسبح بالحوش الا الشاليه اللي جنبهم ارتفع فيه صوت استيريو بأغاني غربية وبدأت شلة شباب وبنات يرقصون في البلكونة أمام الملأ بشكل فاضح!! أم اسمهان:الله لايسامحكم..ادخلوا يابنات... نوال:قال الرسول(كل أمتي معافى إلا المجاهرون)اللهم لاتؤاخذنا بما فعل السفهاء منَّا... أسماء:الله يصيبكم ياكلاب!!! نوال:لايابنتي وش هالكلام؟الله يعافيهم ولايبتلينا..ماتت قلوبهم حسبي الله ونعم الوكيل.. أم عبدالرحمن:بالله مايخافون هالبحر اللي حولهم يهيج وينطبق عليهم؟؟ وقاموا الحريم يلمون أغراضهم ويدخلون داخل الشاليه.. انتبهوا لهم الشباب اللي قاعدين يتفرجون عليهم من البلكونة!! قال واحد:على فين ياهووه؟؟تعالوا شاركونا!!!!!! الثاني:تعالوا حتتبسطوا مرة! لكن الحريم ماردوا دخلوا الشاليه وقفلوا الستارة على الواجهة الزجاجية وبدأت أصوات الاستنكار تتعالى من الضيوف.. نوال:استغفر الله العظيم كنت أتمنى أعيش وأموت وأنا ماشفت هالمنظر المخزي! أم اسمهان:وين هيئة الأمر عنهم بس؟ ابتسام:مساكين هيئة الأمر..موب كل مكان مسموح لهم يدخلونه.. وبدأوا الحريم يغيرون الموضوع لكن أصوات الاستيريو والضحكات الماجنةبدأت تتعالى من الشباب بطريقة مستفزة!! وصل الصوت من قوته لاستراحة الرجال أحمد زوج أسماء:معقول هالصوت جاي من شاليه الحريم؟؟ أبواسمهان:أعوذ بالله...مستحيل .. بناتنا ونسواننا يخافون الله..يمكن من سيارات واقفة برة.. ولما صار الصوت يخرق الآذان اتصل عبدالرحمن على اسمهان يستفسر.. اسمهان:هذول الأنذال اللي بالشاليه اللي جنبنا يرقصون ويضحكون وقالوا لنا كلام سيء لدرجة اننا حرمنا نفسنا من جلسة المسبح ودخلنا... عبدالرحمن:زين ماسويتوا..بأشوف أنا اش السالفة.. وقال عبدالرحمن للرِجال:أنا بأروح للشاليه اللي جنب النساء هذا الصوت المزعج جاي من هناك.. زوج الخالة نوال:تكفى ياولدي..قول لهم مايصير هاللي يسوونه هنا في عوائل محترمة.. وبالفعل راح عبدالرحمن لحاله وطق باب الشاليه.. فتحت له الباب بنت لابسة بنطلون برمودا وبلوزة شفافة وشعرها أشقر وباين من هيئتها انها مو عربية.. عبدالرحمن:لو سمحتي نادي لي أحد من الشباب اللي داخل.. البنت(بلهجة عربية ركيكة):اش تبقي هبيبي؟ تعالي معايا نسهر شوية..ومسكت يده..!!! دفها عبدالرحمن بأقوى ماعنده وقال:ابعدي يامنحطة! سمعهوه الشباب بالداخل وجوا ركض.. الأول:مين سمح لك تمد يدك على صاحبتي؟؟ عبدالرحمن:بالله ماتستحي على وجهك وانت تقول هالكلام؟ الثاني:انت اش تبغى بالضبط؟ عبدالرحمن:إحنا عوائل محترمة شلون تتعدون على محارمنا بالنظر والأفعال الفاضحة؟؟ الأول:مرحبا والله بعوائل محترمة!سلم لي على المحترمين.. البنت:هادا وحش دربني أون ماي فيس! عبدالرحمن:أنا دفيتك بس..ولو ضربتك على وجهك يحق لي!! الشباب:الحقوا ياشباب هذا النذل يضرب تينا!! واجتمعوا الشباب على عبدالرحمن وضربوه ورفسوه ضرب شديد لدرجة انه تألم من بطنه ألم شديد وماقدر يقاومهم ورموه خارج الشاليه ورجعوا بكل بساطة يكملون حفلتهم!! قعدوا الرِجال ينتظرون عبدالرحمن يرجع لكنه مارجع لما استغربوا.. قال أبواسمهان:اشفيه عبدالرحمن تأخر؟عسى خير؟روحوا شوفوا شالسالفة؟؟ وراحوا محمد وعبدالرحيم يدورونه بشاليه الشباب..ولقيوه ممدد على الأرض والدم ينزف من فمه ووجه كله كدمات!! انصعق عبدالرحيم من منظره وقال:اشفيك اش اللي حصل لك؟ محمد:أكيد علق مع أصحاب هالشاليه..تعال نأدبهم! عبدالرحمن:لاتكفون لاتدخلون لهم هذول صيع مايخافون ربهم.. وبدأ عبدالرحمن يغيب عن وعيه ونقلوه من مكانه على المستشفى ومن ربكتهم مااتصلوا طمنوا الرِجال!! زوج ابتسام:هي اش السالفة بالضبط؟كل ماراح واحد منهم مارجع؟ أبواسمهان:أنا قلبي مو متطمن!حاس إنه فيه شي قاعد يصير!قوم معاي ياأبومجاهد نشوف اش السالفة! أبومجاهد(زوج نوال):يالله توكلنا على الله.. لما راحوا للشاليه..قال أبواسمهان:أكيد انهم داخل مادام مافي أحد منهم برة! ودقوا باب الشاليه.. فتح لهم واحد سكران!!وقال:يهلا ومرحبا تفضلوا معانا! أبواسمهان:احنا جايين نسأل عن عيالنا..وينهم؟؟ السكران:ههههه تلاقيهم في الشارع يفحطوا بالدراجات..روح يابويا ماعندنا عيال! وقفل الباب بوجهم... أبواسمهان:انت شايف اللي أنا شايفه ياأبومجاهد؟؟ أبومجاهد:شايف ياأبومحمد..ماأقول غير يارب عفوك أبواسمهان:تعال نكسر بابهم وندخل نوقفهم عند حدهم! أبومجاهد:أعوذ بالله ياشيخ..لايمكن أسمح لنفسي بدخول أماكن مشبوهة مثل هذي..الله يسترنا دنيا وآخرة..بس تعال نبلغ ادارة الشاليه عنهم.. بلغوا ادارة الشاليه اللي كانوا حريصين على عدم اثارة مشاكل! أبومجاهد:نقول لك عالم سكرانة ويرقصون ويغنون ومعاهم بنات تقول لي مانبي مشاكل؟!! الادارة:إحنا مو مسئولين عن تصرفات الزباين...مادام ماأزعجوا أحد...!!!! ثار أبواسمهان واتصل بولده محمد وخبره محمد بالسالفة!!! أبواسمهان:هذول ناس تعدوا بالضرب على زوج بنتي والحين هو بالمستشفى! الادارة:أكيد هو غلط عليهم وأخذوا حقهم منه! أبواسمهان:ماأقول غير حسبي الله عليكم...ونتقابل معاكم عند الشرطة!! الادارة:نصيحتنا لكم ماتتورطون معاهم بمشاكل هذول أولاد عوائل وتراهم مسنودين!!! أبومجاهد:إذا عيال العوائل يتصرفون كذا أجل اش يسوون عيال الشوارع؟؟ وخرج الاثنين من الادارة وهم بقمة غضبهم ورجعوا لباقي الرِجال وقال أبواسمهان:حياكم الله عندي جميعاً ببيتي نكمل السهرة والعشا هناك.. الرِجال:خير؟اش اللي صار؟ أبواسمهان:مشكلة بيننا وبين راعيين الشاليه والادارة ماتبي تتدخل! وماقالوا لأحد عن سالفة عبدالرحمن!!!! اتصل أبواسمهان على زوجته وقال:ياأم محمد اعزمي الضيوف كلهم على بيتنا هذا الشاليه مايناسب العوائل!! وبالفعل عزمت الجميع...واسمهان مو راضية تروح إلا مع عبدالرحمن!!لكن مايرد على جوالها أبد! استسلمت للأمر ورجعت مع أهلها لبيتهم والقهر ذابحها من تطنيش عبدالرحمن لاتصالاتها!! وأم عبدالرحمن رجعت مع عبدالمجيد لبيت أم اسمهان وهي بقمة الاحراج وتقول:ياجماعة حِنا اللي عزمناكم ماني قادرة أفهم ليش انقلبت العزيمة ببيتكم وأولادي عبدالرحمن وعبدالرحيم مايردون على اتصالاتي!!! طبعاً طول الجلسة ببيت أهل اسمهان والضيوف كلهم يسولفون ويضحكون ولكن اسمهان بعالم ثاني!! ماسكة جوالها وشغالة رسايل عتاب لعبدالرحمن!!!! بعد انتهاء السهرة وتناول الجميع للعشا..كلن سرى بيته.. وبقيت اسمهان واخواتها يسولفون اسمهان:أنا بأنجن من عبدالرحمن!كيف تاركني كذا من غير سؤال؟ الأم:حتى أنا مستغربة يابنتي إنه ماحضر على العشا! ابتسام:لايكون تهاوش هو وأبوي عشان شباب الشاليه؟؟ سماح:هالحين يجي محمد وكل شي يبان! ======وشوي دخل محمد عند أمه وخواته وزوجته بعد انصراف الضيوف.. وملامحه متغيرة ويتجنب نظرات اسمهان! اسمهان:محمد علمني..زوجي وين طس؟100 اتصال اتصلته ومالقيت رد!! ظل محمد ساكت..والكل يناظر فيه.. الأم:صحيح وينه؟لايكون متهاوش مع أبوك؟؟ اسمهان:إنت ليش تطالعني بنظرات غريبة؟؟محمد علمني اش اللي صاير؟؟ ومحمد سااااااااااكت.. سماح:أف منك يامحمد!ياشينك وإنت تلعب بأعصابنا!وين زوج اسمهان؟؟ محمد(بضيق):بالمستشفى! ارتحتوا؟ اسمهان(وهي مو مصدقة):اش يسوي بالمستشفى؟؟ محمد:متنــــــــــــــوم! اسمهان(بانهيار):ليــــــــــش؟ اش اللي جرى له؟ حكى لهم محمد اللي صار... اسمهان(وهي تبكي وتصرخ):وليش تخبون عني؟وكيف ماخليتوني أروح أشوفه؟ماراح أسامحكم! دخل أبوها عليهم وقال:خير يابنتي ليش تبكين؟ اسمهان:معقول يايبه كانت العزيمة عندك أهم من وقفتك مع زوجي؟ الأب:بدل ماتقولين جزاك الله خير يبه إنك قمت بالواجب وماحسست الضيوف بشي؟؟ اسمهان:زوجي أهم من الضيوف هاذيل كلهم..أنا لازم أروح أشوفه الحين!!!!!! الأب:انتي صاحية يابنتي؟زوجك تعبان ويمديه نايم الحين والساعة صارت2 بالليل وأخوه عبدالرحيم مرافق معه..كيف تبين تروحين؟؟ محمد:اجلسي مع البنات واسمري وبكرة نوديك له تزورينه.. اسمهان:ماني سامرة مع أحد خلوني بروحي!!!!!! وطلعت غرفتها اللي كانت تنام فيها قبل زواجها وجلست تتأمل فيها كل شي بالغرفة باقي على حاله..وكل ركن فيها يذكرها بذكرياتها مع عبدالرحمن أيام الخطوبة!!! في هذا المكان كانت تجلس تكلمه...وهنا كانت تحط هداياه وفي هذا المكان كانت تجلس وتؤلف أشعار له!! كل شي حولها يذكرها فيه والدموع تنهمر من عينها بغزارة! ======== وبالصالة رجعوا محمد وأبوه للمجلس عند أزواج ابتسام واسماء يكملون حديثهم... أسماء:ياحليلها هالسمهونة آثاريها تحب دحومتها من قلب؟؟ الأم:طبيعي..مو زوجها؟؟؟ أسماء:بس أنا أتذكر قبل 3سنوات لما طلع زوجي للبر مع اخوانه ولعبوا كورة..انكسرت رجله!ولما وصلني الخبر ماحزنت عليه!حزنت على نفسي! ابتسام:عجيب أمرك!زوجك انكسر.. تحزنين على نفسك ليش؟؟ أسماء:لأني أنا اللي بأتوهق في خدمته ياعمري! قعد 3 أسابيع وهو غاثني جيبي وهاتي شيلي وحطي!واشتغلت له نيرس وخدامة لين ماقام على رجوله وافتكيت من طلباته!!! سماح:ههههه دايماً انتي غير الناس!! الأم:ماحد طلع لي من بناتي في تقدير الزوج إلا ابتسام واسمهان! أسماء:تقديرك لأبوي يايمه ماجاء من كيفك!إلا من خوفك منه وعصبيته!!! الأم:يازينك وانتي منطمة وساكتة! ============= ثاني يوم كان الجمعة واسمهان مازار عينها النوم لحظة!! ونزلت قعدت بالصالة..لحالها والبيت كله نايم ماعدا كاتيا الشغالة قاعدة ترتب البيت واسمهان بس تبكي... كاتيا:مدام اسمهان دو يو هاف ابروبليم وذ يور هازبند؟؟ اسمهان:الله يرضى عليك خليني بحالي..مالي خلق أتكلم!! أم عبدالرحمن مادرت بسالفة ولدها إلا عقب مارجعت للبيت اتصل بها عبدالرحيم وخبَّرها وظلت ساهرة طول الليل تدعي له وتدعي على من ظلم ولدها!!! ======== جلست اسمهان بالصالة تبكي على زوجها ونزلت أمها وقالت:السلام عليكم.. اسمهان:وعليكم السلام.. الأم:خذاني النوم بعد سهرة أمس وماصحيت بدري..وأحس جسمي متكسر بعد ضيوف أمس والقومة والقعدة.. لكن اسمهان ماعلَّقت ظلت تبكي بصمت.. الأم:واضح إنك مانمتي..صح؟ اسمهان:ومن وين بيجيني النوم يايمه وزوجي طايح بالمستشفى ومايندرى عن حاله؟! الأم:ان شاء الله تشوفينه وتتطمنين عليه..أنا بأروح المطبخ أسوي فطور خفيف لي ولك وأكيد ابتسام وبناتها بيصحون الحين يفطرون معانا.. وراحت الأم للمطبخ..وشوي إلا الأب كان نازل من الدرج.. الأب:السلام عليكم ورحمة الله وبركاته.. اسمهان:وعليكم السلام..يبه وين رايح؟؟؟ الأب:رايح لخطبة الجمعة..ليش بغيتي شي؟؟ اسمهان:يبه ودي أروح لزوجي! الأب:بالله هذا وقت مناسب تزورينه فيه؟ان شاء الله العصر أروح أنا وانتي وأخوك!مع السلامة وخرج الأب مستعجل يبي يلحق الخطبة واسمهان تذرف دموعها وتقول بنفسها(من وين يجيني الصبر لين العصر؟؟) ولحظات إلا دق جوال اسمهان وسحبت جوالها بلهفة ترد على بالها عبدالرحمن!!بس طلع المتصل أم زوجها! اسمهان(بلهفة):هلا خالتي شلونك؟جاك خبر عن عبدالرحمن؟ أم عبدالرحمن:ليش؟ أهلك ماقالوا لك؟ اسمهان:اش يقولون لي؟ أم عبدالرحمن:انه متنوم بالمستشفى.. اسمهان:إلا قالوا بس مدري عن أخباره هو زين؟وشلون صايرة صحته؟ أم عبدالرحمن:ان شاء الله إنه مافيه إلا العافية..أنا اتصلت على عبدالرحيم وطمنني انه بخير..بس انتي ماودك تزورينه اليوم؟؟ اسمهان:وشلون ماودي؟إلا ودي بهاللحظة أشوفه!بس مين بيوديني ياحسرة؟أبوي يقول في العصر نروح!! أم عبدالرحمن:أنا بالنسبة لي بأروح الحين.. بيحطني عبدالمجيد عنده ويروح لصلاة الجمعة..تبين أَمُرْ عليك؟؟ اسمهان:ياليت ياخالتي ياليت.. أم عبدالرحمن:أجل تجهزي ودقايق وأكون عندك.. وبالفعل قامت اسمهان وتجهزت ودقايق ووصلت أم عبدالرحمن.. اسمهان:يمه هذي خالتي بتاخذني ونروح للمستشفى أزور زوجي..تغدوا انتوا بالعافية ولاتنتظروني.. الأم:روحي في حفظ الله وسلمي لي عليه.. وراحت اسمهان وبعد أقل من ساعة رجع أبوها وزوج ابتسام ومحمد من صلاة الجمعة.. دخل الأب الصالة وقال:وين اسمهان؟؟ الأم:راحت تزور زوجها.. الأب:ومين وداها؟ الأم:مرت عليها أم زوجها.. الأب:ماشاء الله وتروح من غير ماتستأذن مني؟ الأم:وشلون تستأذن منك وانت في الصلاة؟ماقصرت استأذنت مني أنا وراحت.. الأب:هالبنت شكلها تحبه أكثر مننا! الأم:ماتنلام.. طالعة لي!من يوم ماعرفتك نسيت أهلي كلهم!!!! الأب:ههههههه ورجع للمجلس مع الرِّجال! وحضرت اسماء للغداء عند أهلها وزوجها راح لإخوانه يتغدى معاهم. ========= نرجع لاسمهان اللي ركبت السيارة وقالت بصوت منخفض:السلام عليكم ورحمة الله وبركاته.. وردت أم زوجها السلام.. أم عبدالرحمن:شلونك يابنتي؟وشلون أهلك؟ اسمهان من الحيا تأشر لخالتها إنه ماودها تتكلم قدام عبدالمجيد! أم عبدالرحمن:لا..ماعليك يابنتي..خذي راحتك..عبدالمجيد فديت روحه مايسمع أبد!! وتطمنت اسمهان وخذتها السوالف مع أم زوجها إلى أن وصلوا للمستشفى.. ولما نزلوا صار عبدالمجيد يخاطب أمه بلغة الإشارة إنه بيمر عليها عقب صلاة الجمعة.. لما دخلوا غرفة عبدالرحمن لقيوه قاعد فوق السرير ويصلي الظهر..قامت أمه توضت وصلت هي بعد ..أما اسمهان اللي كانت معذورة عن الصلاة ظلت جالسة على كرسي وتتأمل وجه زوجها بحزن اللي كان وجهه فيه بقع زرقاء ووحدة من عيونه وارمة وفمه بعد والكدمات والرضوض واضحة على ايدينه ورقبته.. وبعد ماانتهى من الصلاة التفت لليمين وقال(بصوت واضح فيه التعب):هلا اسمهان شلونك؟ اسمهان:بخير ياقلبي.. أم عبدالرحمن:أشوف مالاحظت إلا وجود اسمهان بس!خير؟؟ عينك الثانية خرشوها لك؟؟؟؟ عبدالرحمن:هههه هلا يمه هلا.. وسلمت عليه أمه..وبدأوا يسألونه بالتفصيل عن اللي صار وحكى لهم.. الأم:أعوذ بالله..معقول ببلادنا قاعد يصير شي مثل هذا؟؟ عبدالرحمن:يايمه ابليس موجود بكل ديرة..ومايفرق بين عربي وعجمي!! اسمهان:الله ينتقم منهم..هالمجاهرين... أم عبدالرحمن:طيب مااشتكيتهم للشرطة؟؟ عبدالرحمن:من غير ماأشتكي الدكتور أساساً لما شاف حالتي أمس قال لعبدالرحيم انه ضروري المستشفى تتخذ اجراء وتبلغ الشرطة عشان ينعرف سبب الحادث..وبالفعل ماقصروا أخذوا أقوالي ومدري وش سووا! وكملوا سوالفهم وكانت أم عبدالرحمن جايبة غدا معاها في حافظات وجهزت هي واسمهان الغدا وقعدوا الثلاثة يتغدون.. وشوي وجاء عبدالرحيم..ومن ورا الستارة سلم على الجميع وقال:عندي لك أخبار زينة ياعبدالرحمن جاني اتصال قبل شوي من الشرطة..بلغوني فيه إنهم داهموا موقع الشاليه فجر اليوم ولقيوا الشباب بحالة سُكر وأوضاع ماتسر وقبضوا عليهم! وسألوني إن كان ودك تتنازل عن حقك أو لا؟ أم عبدالرحمن:ايش اللي يتنازل؟الا هذول حقهم ينرمون بالسجون سنة على الأقل!زين ماكانوا شايلين معاهم سكاكين والا كان ذبحوا أخوك!! عبدالرحيم:تصدقون انه بعضهم مسنود ومن عوائل معروفة بس الشرطة يقولون انها مو أول قضية يمسكونهم فيها عشان كذا هالمرة لابستهم القضية لابستهم! عبدالرحمن:الحمدلله.. أم عبدالرحمن:أسألك يارب في هذا اليوم الفضيل إنك تنتقم منهم أو تهديهم وتردهم لأهاليهم تايبين عبدالرحمن:جزاك الله خير يمه.. عبدالرحيم:يمه أنا وعبدالمجيد بنروح مطعم قريب من هنا نتغدى فيه..لو احتجتينا اتصلي.. أم عبدالرحمن:ان شاء الله.. واستمر الوقت بالسوالف.. أم عبدالرحمن:شوف ياعبدالرحمن هذي الشنطة فيها غيارات وهدوم لك وكل شي تحتاجه بأخليها لك في الدولاب.. اسمهان:أنا في خاطري أرافق مع عبدالرحمن اليوم ياخالتي.. أم عبدالرحمن:ليش يابنتي؟عبدالرحيم مابيقصر! عبدالرحمن:اسمهان صادقة يمه..وترى عبدالرحيم عنده بكرة عمل في النهار..خليه اليوم يرجع البيت يرتاح.. أم عبدالرحمن:مثل ماتبين..بس مالك هنا أغراض.. اسمهان:ماعليك ..أهلي جايين يزورون عبدالرحمن في العصر بأقول لهم يجيبون لي أغراضي.. وشوي وراحت أم عبدالرحمن بيتها وبقيت اسمهان مع عبدالرحمن.. قام عبدالرحمن يتأملها وهي تناظر بالأرض... عبدالرحمن:صارحيني! قلقتي علي؟؟ اسمهان:إلا حقدت عليك بصراحة!دقيت عليك مية مرة ومارديت وأرسلت لك مية رسالة وماعبرتني ومادريت بسالفتك إلا آخر الليل ماحد علمني من وقتها.. عبدالرحمن:مو عبدالرحيم أخذ جوالي وحطه على الصامت عشان مايزعجني أحد..بس سمهونتي تخيلي لو إني مت!! اسمهان(بانفعال):أعوذ بالله بعيدالشر عنك!عساها بقلب اللي يكرهونك! عبدالرحمن:ههههه ليش؟لهاالدرجة أنا غالي؟؟؟ اسمهان:مايحتاج تسأل إنت عارف! ومضى الوقت بسوالف واسترجاع ذكريات ماضية.. اسمهان:تدري يادحوم طيحتك هذي بإيش تذكرني؟؟ عبدالرحمن:لا..بإيش؟؟ اسمهان:بروحتنا للعمرة,,لما ضربك المكيف وتعب ظهرك وصرت تصلي وانت قاعد...هههههه عبدالرحمن:هههه وأنا كل ماتذكرت منظرك وانتي مادة راجلك للأندونيسية تمرخها قدام خليقة الله في المسعى ينتابني ضحك وأقول هالبنت مو صاحية! اسمهان:هههه ولا ضياعي التاريخي ذاك اليوم يوم رحت الحرم لحالي..وخليتك بالفندق! عبدالرحمن:ليش انتي ضعتي؟؟مو تقولين كنتي في السوق تتسوقين؟؟ اسمهان:هاه؟؟ ============ وفي العصر بدأت الزيارات تتوالى على عبدالرحمن..كل الضيوف اللي كان عازمهم الليلة السابقة جوا زاروه وجت أم اسمهان تزوره بعد وبعدين رجعت للبيت ولما الغرفة صارت مليانة ضيوف خرجت اسمهان وجاء في بالها تروح لحضانة المواليد! ومن خلف الشباك الزجاجي ظلت اسمهان تراقب المواليد بأجسامهم الصغيرة وهي مبتسمة وعيونها غرقانة دموع.. انتبهت لها الممرضة وخرجت تسألها:مدام..اش اسم بيبي إنتَ؟ اسمهان(بحزن):أنا ماعندي بيبي بس حبيت أتفرج عليهم.. الممرضة:مئليش مدام ممنوء وقوف هنا!!!! وتركتهم اسمهان بحسرة.. وخطر في بالها تتسلى بزيارة المرضى لين مايروحون الرِجال من عند عبدالرحمن وراحت اشترت مجموعة ورود كل وردة مغلفة لحالها.. وراحت لقسم الأطفال..دقت باب غرفة من الغرف..وكانت المريضة طفلة صغيرة عمرها6سنوات وأمها مرافقة معاها.. سمحت الأم لها بالدخول.. اسمهان:أنا جاية أزور المرضى وأدعي لهم بالشفاء.. أم الطفلة:جزاك الله خير..تفضلي البنت الصغيرة غطت وجهها بشرشف وقالت:ماما هاتي قبعتي!! ناولتها أمها القبعة ولبستها البنت على راسها وبعدين كشفت الشرشف عن وجهها! اسمهان:اش اسمك ياقمورة؟ الطفلة:دانية.. اسمهان:وكم عمرك ياترى؟ الطفلة:ستة سنين. اسمهان:ماشاء الله..قد بنات إختي اسمهان تخاطب الأم:سلامتها..اشفيها؟؟ أم الطفلة:بعيدالشر عنا وعنك عندها المرض الخبيث(السرطان) وحالياً تتعالج بالكيماوي.. وخفضت الأم صوتها وكملت كلامها:ماتشوفينها يوم شافتك غطت وجهها بشرشف ولبست قبعة؟؟ماتبي أحد يشوفها من دون شعر!شعرها طاح كله مع العلاج!! وفي غرفة الطفلة(دانية)مريضة السرطان.. ظلت اسمهان تراقب حركات الطفلة البريئة وهي تلعب بعروستها وتضحك.. واسمهان حزينة..فدعت للبنت بالشفاء واستأذنت من الأم انها تطلع.. ولما جت خارجة.. الطفلة دانية:ياأبلة..ياأبلة..ممكن تاخذي شوكولاتة عشان خاطري؟؟ ابتسمت اسمهان وقالت:ممكن ياقمر.. الطفلة دانية:عروستي تقول انك مرة حلوة ممكن تبوسيها؟؟ اسمهان:أكيد ممكن.. وباست البنت وعروستها وقالت للأم:الله يحفظ لك بنتك.. وغطت اسمهان وجهها وخرجت من الغرفة تبكي!! وبعد ماكفكفت دموعها..فكرت تدخل غرفة ثانية يمكن تلاقي شي يشرح صدرها.. دقت الباب وجاوبها صوت منهك:تفضل! دخلت اسمهان وتفاجئت بصوت طفل يأن من الألم وأمه جالسة جنبه على كرسي وآثار السهر والاجهاد واضحة عليها.. اسمهان:مرحبا..أنا زائرة وجاية أزور مريضكم وأدعي له بالشفاء.. أم الولد:جزاك الله خير..تفضلي.. جلست اسمهان وصبت لها الحرمة قهوة وارتشفتها اسمهان بهدوء وسألت:سلامته ولدك..من ايش يشتكي؟؟ أم الولد:له ثلاثة أيام من يوم سوى عملية الاستئصال بس شوفة عينك مازال يأن ويتألم.. اسمهان:عملية استئصال الزايدة؟؟ أم الولد:لا...عملية بتر الساق واستئصال الأجزاء المتعفنة!!!!! شرقت اسمهان بالقهوة وصارت تكح.. اسمهان:ليش؟اش صار معاه بالضبط؟ أم الولد:والله يابنت الحلال إحنا عائلة عندهم تاريخ وراثي لمرض السكر..بس دلالي الزايد لولدي خلى المشكلة تزيد خصوصاً انه أول طفل أجيبه عقب 9سنوات من عدم الانجاب!! اسمهان:سبحان الله!9سنوات ماأنجبتي؟؟ أم الولد:مو هذي هي المشكلة..المشكلة كانت في دلالي الزايد له..كل شي يبيه أجيبه له وكان يبالغ في أكل الوجبات السريعة والحلويات لين مااكتشفنا انه يعاني من ارتفاع في السكر وبدأنا نسوي له حمية ونعطيه إبر يومياً..لكن هذا طفل ومو سهل السيطرة عليه..إن قدرت أضبطه في البيت ماقدرت عليه وهو بالمدرسة وغايب عني ومدري اش ياكل ظل السكري في ارتفاع والولد كل يوم والثاني تجرح ساقه من لعب الكورة وخبرك بمريض السكر ماتتخثر جروحه بسرعة ويظل ينزف ولاتلوث الجرح يتعرض لغرغرينا وتعفن وهذا اللي صار لدرجة انه الحل الوحيد كان بتر نصف الساق.. وقامت الأم وكشفت اللحاف عن الولد وقالت:شوفي.. غطت اسمهان عينها من الخرعة كان الولد بنصف ساق والعملية مغطاة بضمادات وشاش... حست اسمهان بـ غصة وخرجت من عند الأم وهي تدعي لولدها بالشفاء ======== بعد بحر الدموع اللي سكبته اسمهان قررت انها تنظر للحياة بتفاؤل وتروح قسم الولادة وتزور أي حرمة والدة وتستمتع بشوفة المواليد.. وبالفعل وصلت لغرفة وطقت الباب.. المرافقة اللي مع أختها الوالدة:نعم؟ دخلت اسمهان وبكل أدب قالت:تسمحولي أدخل؟أنا زايرة وجاية أبارك.. الحرمة الوالدة:ياهلا فيك تفضلي.. أما المرافقة اللي تصير أخت الحرمة الوالدة صارت تطالع بنظرات شكك لاسمهان!!! اسمهان:مبروك..ماشاء الله اش جبتي؟ وكانت الوالدة ماسكة ولدها وهوبحضنها:وقالت جبت ولد.. اسمهان:واش سميتوه؟؟ الوالدة:لؤي.. المرافقة:وانتي متعودة دايماً تزورين المرضى؟؟ اسمهان:لا هذي أول مرة.. وبدأت المرافقة تسأل اسمهان أسئلة ماتريح!وحست اسمهان انها بمكان غير مناسب واستأذنت تطلع.. وهي خارجة من الغرفة الكبيرة كان في سيب بنفس الغرفة بنهايته الحمام دخلت اسمهان تغسل يدها اللي تدبقت بالتمر وتطلع.. فظنوها الحرمتين انها خرجت خلاص.. المرافقة:والله هالأشكال مايريحون أبد! الوالدة:حرام عليك دخلت باركت وخرجت ماسبب لنا أي أذى.. المرافقة:لأنه من حظك يالشاطرة إني مرافقة معاك!تخيلي لو ماني فيه كان سرقت ولدك وهربت!كنتي بتقدرين تلحقينها وتجرين وراها؟؟؟ الوالدة:يمه منك خوفتيني..صحيح الدنيا مافيها أمان! سمعت اسمهان حوارهم كامل وطلعت من الحمام وناظرت فيهم نظرة لها معنى وخرجت من غير ماتتكلم بكلمة!من القهر والصدمة!!! الوالدة:يافشلة!اثاريها سمعتنا!! المرافقة:ومن وين طلعت هذي؟على بالي خرجت خلاص!! =========== ضاق صدر اسمهان وفكرت ترجع لعبدالرحمن..واتصلت به ولقيت ان ضيوفه كلهم راحوا..ودخلت عنده وحكت له عن كل شي صار لها ماعدا حكاية الحرمتين!!! لما رجعت اسمهان للغرفة ودخلت عند عبدالرحمن وبعد التحية والسلام.. سألها عبدالرحمن:ماشاء الله وين كنتي هالوقت كله؟؟ حكت له اسمهان عن كل شي.. وقالت:ماتتخيل ياعبدالرحمن شوفة المرضى ومعاناتهم على سرير المرض قدر إيش صعبة!آثاريني بغفلة كبيرة!أنا لوقعدت يوم بالبيت وحسيت بزهق...صار عندي احساس بإنها نهاية العالم! عبدالرحمن:طبعاً إحنا بغفلة عيادة المرضى واجبة في الدين الاسلامي لأنه لها فوائد كثييييرة تفيد المريض في إنه يحس بالفرحة في اهتمام من حوله فيه +ادخال السرور والبهجة على قلبه+التخفيف من معاناته وتفيد الشخص الزائر بإنها تذكره بنعمة الصحة اللي ربي أنعمها عليه فيجتهد انه يشكر الله ويحمده عليها..وترقق قلب الواحد على اخوانه المسلمين ويتذكرهم بدعاءه.. قامت اسمهان تبكي!! عبدالرحمن:سمهونتي؟عسى ماشر؟تأثرتي بكلامي؟؟ وماردت اسمهان استمرت تبكي.. عبدالرحمن:وبعدين يعني؟إنتي جاية المستشفى تونسيني وتنسيني أوجاعي..ولاتضيقين خاطري بدموعك؟؟؟ اسمهان:لا ..انت مادريت اش صار لي مع الحرمة الوالدة يوم رحت أزورها!! عبدالرحمن:ماشاء الله انتي وصلتي لقسم النساء والولادة؟؟على بالي رحتي لقسم الأطفال بس! وقامت اسمهان تحكي له عن كلام الحرمتين عنها وعن شكهم في نيتها لزيارتهم... عبدالرحمن:شوفي يازوجتي العزيزة طالما إنك قمتي بواجبك وسويتي اللي عليك فلايهمك أحد!خل اللي يتكلم يتكلم والرسول اش قال؟؟؟قالإنما الأعمال بالنيات وإنما لكل امريءٍ مانوى) والله عالم بنيات خلقه..وبيني وبينك الجماعة ماينلامون ترى كثير من الجرايم صارت تتم ورى مسمى فعل الخير!!!! اسمهان:شلون يعني؟ عبدالرحمن:يعني فعلاً حصل انه صارت جرايم اختطاف مواليد بالمستشفيات عن طريق زيارة امرأة مجهولة لغرفة وحدة من الوالدات وهي مستترة ورا فعل الخير وأداء الواجب!وبعد لحظات تخطف الطفل وتطلع ولايبان لها أثر!وغير كذا من حقهم الناس يشكون لأنه زماننا هذا صار زمان عجيب وفعل الخير صار شبه نادر عند البعض!يعني مين يجي في باله بهالوقت انه يروح لمرضى مايعرفهم عشان يواسيهم ويخفف عنهم؟!!بس ماأقول غير الله يجزاك خير إنك فكرتي بغيرك ودعيتي لهم بالشفاء.. وفجأة دق باب الغرفة.. عبدالرحمن:تفضل... وقامت اسمهان تغطي وجهها وراحت ورى الستارة.. وكانت الزائرة الخالة جوهرة ومعاها زوجها.. سلمت على عبدالرحمن وتحمدت له على السلامة وسولفت معاه شوي بعدين انتقلت للطرف الثاني من الغرفة وجلست تدردش شوي مع اسمهان.. وكانت زيارتها مختصرة وخرجت هي وزوجها.. وثواني إلا جاء لعبدالرحمن اتصال من تركي اللي وصلته الأخبار عن طريق أخته سماح.. بعد انهاء المكالمة قال عبدالرحمن:الله يعينك يااسمهان راح تنطردين من الغرفة مرة ثانية! اسمهان:ليش؟؟ عبدالرحمن:تركي وناصر بيجون يزوروني الحين.. اسمهان:ماني طالعة لو تنهبل!زهقت..تدري ؟بأحبس نفسي بالحمام!!! عبدالرحمن:ياسلام..وافرضي أحد منهم احتاج الحمام؟وش السوات؟ اسمهان:زين الله يعين..بأطلع أتجول لين ماينتهون واتصل فيني علمني لاطلعوا!! خرجت اسمهان وصارت تفتر بالمستشفى مو عارفة وين تروح! وفكرت لو تجلس تحت بقسم انتظار النساء تتسمع بكلامهم! دخلت قسم الانتظار ولقيت الغرفة مزحومة وسمعت وحدة تقول للثانية:انتي موعدك عند دكتورة مها؟؟ الثانية:لا عند دكتورة فايزة.. الأولى:سلامات..اش فيك؟ الثانية:مدري عندي الام شديدة بصدري و الدكتورة سبق و سوت لي فحوصات واليوم بأستلم النتيجة..احتمال يكون عندي ورم!! الأولى: قولي خير ياشيخة..ان شاء الله مافيك الا العافية..وحدة من زميلاتي كان يجيها الام بصدرها وطلعت السالفة انه عندها خُرَّاج وعملية موضعية بسيطة وشالوه لها! قامت اسمهان من جنبهم وقعدت جنب غيرهم..لقيت حرمتين يسولفون.. الأولى:تعبت تعبت من المستشفيات والدكاترة كل يوم وأنا عندهم مابقى شي ماسويته ومابقى قرش إلا وصرفته كله عشان أحمل بس ماانكتب لي نصيب... الثانية:طيب مافكرتي تسوين طفل أنابيب؟ الأولى:سويتها مرتين وفشلت! الثانية:مالك الا الصبر والله يكون بعونك.. الأولى:كل ماصبرت..لقيت أم زوجي لي بالمرصاد!تصدقين ودها تخطب لزوجي؟؟بس هو مو راضي!! الثانية:يووه الله يكفيك شرها! تضايقت اسمهان من السواليف..وكانت بتقوم بس الحرمة اللي قاعدة جنبها من الجهة الثانية قالت لها:انتي موعدك عند أي دكتورة؟؟ ماعرفت اسمهان بإيش ترد وقالت:اااا عند دكتورة فايزة!! الحرمة:ليش ياساتر؟انتي وشفيك بالضبط؟؟ اسمهان:لو كنت أدري كان علمتك!بس اليوم بتطلع نتيجة الفحوصات!عن إذنك!! وطلعت اسمهان من الغرفة وهي متضايقة من السواليف اللي قاعدة تسمعها! وصارت تتمشى بالأسياب ولقيت لوحة معروض عليها صور الدكاترة اللي بالمستشفى وتخصصاتهم وطاح عينها على اسم الدكتورة فايزةولقيت هالعبارة مكتوبة: د.فايزة:تخصص علاج الأورام وسرطانات الثدي!! اسمهان:أعوذ بالله..ياشين الكذب يااسمهان!! ============ وفي غرفة عبدالرحمن دخل ناصر وتركي عليه..وناصر شايل باقة ورد وتركي شايل سبت شوكولا.. ناصر:ياهلا بالدحمي حبيب قلبي!ياهلا باللي انضرب واندبغ! عبدالرحمن:ههه خوش ترحيب يانصور.. تركي:السلام عليكم..شلونك ياعبدالرحمن...وسلم عليه.. ناصر:جبت لك الورد عشان تشمه وتقوم بالعافية يامال العافية!!وتركي مسوي نفسه كشخة جايب شوكليت بقيمة فاتورة الجوال!! تركي:وش عليك يالقعيطي؟دافع من جيبك شي؟؟ ناصر:لا من جد ودي أشوف هذا اللي اخترع سالفة الورد والشوكليت للمريض وأكفخه!بالله المريض لاطاح بفراشه واش يبي بالشوكليت؟؟المريض محتاج ياكل لحم ومرق يرم عظمه!!أنا أقول لو يخترعون سبتات فخمة ويحطون داخلها كبدة وكرش ويغلفونها نهديها للمرضى أفضل!!! تركي:أنا قاري من قبل انه فكرة اهداء المريض نباتات وورد نابعة من فايدة مهمة وهي انه النباتات تمتص ثاني أكسيد الكربون من الجو وتعطي الأكسجين وهذا سبب في تعقيم غرفة المريض وتنقية أجواء الغرفة .. عبدالرحمن:ومنكم نستفيد.. ناصر:فديتك أنا وفديت هالخرايط اللي صايرة بوجهك الله الله وش هالكشخة وش هالزين شي أحمر وشي أزرق وشي بنفسجي! بالله ياتركي تصورني أنا وياه بجوالي!! تركي:أقول يامثبت العقل والدين! انت ناسي نفسك يوم تقلبت بالدباب؟ياوجهك شلون كان صاير تقول مفحط به على اسفلت؟!!! عبدالرحمن:هههههههه..الله لايحرمني من سواليفكم الماصخة! لما رجعت اسمهان لغرفة عبدالرحمن في المستشفى كان مبسوط ويضحك..سألته عن السر قعد يحكي لها عن كل سواليف ناصر وعن مقالبه فيهم أيام العزوبية!! اسمهان:ههههههه تصدق ناصر هذا يذكرني بـ مين؟؟ عبدالرحمن:بــ مين؟ اسمهان:بصديقتي رانية!ياحبها للمزح والتريقة..بس الله يسعدها تونس الصدر.. وقامت اسمهان تاكل شوكليت..بشراهة!!!!!!! اسمهان:اش هذا كله يادحوم؟ شكلنا بنفتح محل شوكليت! عبدالرحمن:بالله انتبهي لنفسك!ماصدقنا وزنك ينقص!! واستمرت السواليف..لين ماجاء وقت النوم.. دخلت الممرضة وبما انه عبدالرحمن تعبان من الألم اللي بإيديه ومايقدر يرفعها..قامت الممرضة بتناوله الحبوب في فمه!!!!!!!!! وتجيكم اسمهان طايرة من بعيد! وتسحب الدواء من يد الممرضة وتقول:هيه يالحبيبة!تلقمين المريض الدوا بـ فمه هذاك في الفلبين ياحلوة!هنا ..إحنا موجودين والله لايحوج رجالنا لكم!!! وأخذت الحبوب وحطتها بـفم عبدالرحمن وشربته الدوا! ويوم خرجت الممرضة قال عبدالرحمن:كفو والله باسمهان بنت الرِجال!!!! اسمهان:وش عقبه يالفاغر؟كنت بتفتح فمك لولا إني لحقتك بآخر لحظة!!!!!! ============= مرت الأيام وخرج عبدالرحمن من المستشفى وسووا أهله عزيمة له وعزموا كل معارفهم وأقاربهم.. وقبل المدارس بيومين كان عبدالرحمن له مراجعة بالمستشفى واسمهان قاعدة بالبيت تكوي ملابس... اتصلت عليها سماح وبعد السلام والتحية.. سماح:سوسو؟انتي في البيت؟ اسمهان:ايه بالبيت.. سماح:أنا كنت بالمستشفى قبل شوي كان عندي موعد متابعة حمل وتوي طالعة من المستشفى فكرت لو أمر أسلم عليك أنا ومحمد..اش رايك؟؟ اسمهان:ياهلا فيكم..أنتظركم.. وبعد أقل من ساعة كانوا محمد وسماح عندها.. وبعد السواليف المعتادة والسؤال عن عبدالرحمن... اسمهان:هاه بشري هالحين صرتي بأي شهر؟ سماح:في بداية السابع.. اسمهان:وماعرفتي اش ببطنك؟؟ محمد:ماكان واضح .بس اليوم قالت لنا الدكتورة إنها بنية!!عاد اجتهدي وجهزي الهدية من هاالحين! اسمهان:من عيوني! محمد:لأني معزم أسميها اسمهان رضت سماح ولا انرضت!..البنت اسمهان يعني اسمهان!!!!! سماح:أفا عليك ياحمود..أساساً لو إنت ماتبي تسميها اسمهان كان أصريت أنا أسميها..وياليت لو تطلع بجمال اسمهان وحلاوتها وبرائتها! محمد:لا مادامك أمها أكيد بتطلع عليك!! سماح:بدينا في السماجة؟؟ سوسو ترى سر زيارتنا غير اننا نبي نشوفك كان ودي أسألك سؤال!! اسمهان:تفضلي.. سماح:صديقتك رانية مخطوبة.أو محجوزة لأحد؟؟ اسمهان:لا..ليش؟؟ سماح:الصراحة أمي ودها تخطبها لناصر ولد عمي! اسمهان:هههههههههههههه ههههههههههههه سماح:واشفيك؟قلت شي يضحك؟ اسمهان:لا بس الصراحة عرفتوا تختارون!وافق شنٌ طبقة!! عساها بس توافق! سماح:وش دعوى ماتوافق؟ناصر وإن كان راعي دجة ولجة بس تراه انسان طيب.. محمد:صادقة سماح..هو صدق منَّسِم شوي!لكنه رقيق مثل هب النسيم!! وبعد السوالف عطتهم اسمهان الرقم... اسمهان:بس ترى أنا ماراح ألمح لها بالموضوع ودي أشوف ردة فعلها بعد ماتخطبون!!انتوا متى ودكم تتقدمون؟؟ سماح:لسه.. بداية الدراسة نتصل على الأم..وإن رحبت فينا حددنا يوم ورحنا لهم! ============ وكلها يومين وجاء أول يوم بالترم الثاني... اجتمعوا الشلة بشوق يتبادلون أخبار الاجازة.. وكانوا(اسمهان+نجلاء+أفنان+مرام ) ورانية لسه ماجت... مرام:العادة رانية أول وحدة تداوم وينها اليوم ماجت؟؟ماحد فيكم اتصل عليها أمس؟ الشلة:لا... نجلاء:تلاقينها زادت بعد الريجيم أضعاف وزنها ومفتشلة نشوفها!! اسمهان:مع إنها كلمتني بالإجازة وقالت إنها مازالت مستمرة! أفنان:ياحليلها..يمديها تمزح معك! وشوي وهم واقفين بالسيب يتكلمون..كان فيه شلة واقفة يسولفون ومعاهم بنت جديدة ومعطيتهم قفاها..والشلة أول مرة يشوفونها.. أفنان:شايفين البنت اللي واقفة تضحك هناك؟؟ مرام:ايه قصة شعرها خقاااااااق! اسمهان:الصبغة كلاااااام! نجلاء:أقول يازين الرشاقة..حتى المريول طالع عليها أنيق..بس تهقون هذي أولى ثانوي؟؟ أفنان:لو إنها أول ثانوي ماكان قعدت تسولف مع الشلة اللي بـ صفنا!يمكن منقولة جديد من مدرسة ثانية! اسمهان:بس شكلها وهي تسولف كأنها تعرفهم من زمان.. وفجأة استدارت البنت وتقدمت بخطواتها تجاه الشلة وشعرها القصير الهفهاف الناعم مغطي نص وجهها!!! واستغربوا الشلة وصاروا يقولون:هذي وش تبي فينا؟؟؟ أفنان:شكلها اجتماعية يمكن ودها تكسب صداقات! وأول ماقربت منهم رفعت قصتها عن وجهها وقالت:هااااي شلة!! الشلة وهم فاتحين أفمامهم من الدهشة:راااااااااااانية؟؟؟؟؟؟؟ ؟؟؟ بعد ما الشلة فتحوا أفمامهم من الدهشة وقالوا بصوت واحد:راااااااااااااااااانية؟؟؟ ؟؟؟؟؟! رانية وهي ترفع قُصتها عن جبينها بدلع:عشتوا! ايه رانية..ماعرفتوني؟ أفنان:ماشاء الله تبارك الله شكلك اختلف 180 درجة! رانية:لـ للأسوأ ولا للأحسن؟ نجلاء:للأحسن طبعاً..مايبيلها سؤال..إش إش..وش هالزين كله؟وإحنا لنا ساعة نتغزل من بعيد على بالنا طالبة جديدة!!!! مرام:لا من جِد رنو ياقلبي شكلك صار وااااااو! اسمهان:يابنت لايكون شاركتي ببرنامج التغيير الجذري وإحنا ماندري؟الصراحة؟أغبطك على هالإصرار والتحدي!بس كم صار لك مسوية ريجيم؟؟ أفنان:وكم كيلو نزل وزنك؟ رانية:لي شهر ونص من قبل الامتحانات وواصلت المسيرة بالإجازة ومسكت نفسي..ولليوم صرت نازلة 14 كيلو.. نجلاء:بس لاإله إلا الله يارانية من شافك ظن إنه نزل منك شخص ثاني!!! الشلة:هههههههههههههه مرام:طيب اش شعورك بعد الرشاقة؟ رانية:الصراحة صرت أحس نفسي خفيفة مثل العصفور لدرجة إني يوم أمشي أحس إني من الخفة صرت أفقد التوازن ولاجيت بأرقص أحس الأرض ثابتة من تحتي ماتتفاعل معي مثل قبل!!!زمان كنت كل مارقصت أحس الأرض تفرح وتهتز تحتي!! اسمهان:إلا تبكي وتنتفض من ثقل ما شالت!!!هههههه مرام:صراحة أحسنتي في اختيار قصة الشعر من جد روووووعة! نجلاء:ياولد ياحركات ولابسة عدسات بعد!! اسمهان:والصبغة مرة حلوة ومناسبة كثير للون بشرتك.. مرام:حواجبك خطيييييييييييرة! رانية:ثانك يو! أفنان:بس ماهقيتها منك يارانية تنمصين حجاجك! رانية:حرام عليك..أنا مو نامصة حواجبي أنا مشقرتها...وبعدين راسمتها بالقلم.. اسمهان:بس ياحلوة حتى التشقير اللجنة الدائمة للإفتاء أصدرت فتوى تحرم حتى التشقير! نجلاء:والله احترنا..فتاوى تقول حلال وفتاوى تقول حرام.. أفنان:بس ياحلوات كثير من الشيوخ اللي أفتوا بالجواز تراجعوا عن فتواهم..لما تبين لهم الوضع.. اسمهان:فعلاً..الشيوخ اللي أجازوا التشقير في البداية توقعوا انه المسألة تغيير لون الحاجب فقط مثل صبغ الشعر!بس لما صاروا المستفتيات يوضحون للشيوخ انه النتيجة النهائية مشابهة للنمص تماماً بالإضافة للأضرار اللي يسويها التشقير للعين مع الوقت ..فتم تحريمه...لأن العلة في التحريم هي تغيير خلقة الله ومايخفى عليكم التغيير الرهيب اللي يضفيه التشقير للملامح! أفنان:وبيني وبينكم التشقير تدرج للوقوع في اللي أكبر منه!اليوم تشقرين وبكرة شعر الحاجب يقسى ويخشن ويصير شكله أكثر فتضطر الوحدة تخففه أو تقصه وتدخل في مسألة اللعن!! نجلاء:الصراحة..(دع مايريبك إلى مالا يريبك).. رانية:ومنكم نستفيد..بس ترى ماكنت أدري عن الكلام اللي تقولونه على بالي حلال مية بالمية!! مرام:لا بس حقيقي يارانية عيني عليك باردة ماشاء الله شكلك راااائع.. رانية:ياناس ماأقدر أنا على كذا!طايحين فيني تغزل من الصبح! واسمهان بينها وبين نفسها تقول:أما ناصر لو يشوفها بالشكل الجديد بيطيح عندها!!! ==================== وفي الظهر رجع تركي من العمل وبعده بشوي جاء ناصر يتغدى معاه.. دخلت أم تركي وقعدت معاهم(على فكرة أم تركي من القواعد من النساء اللاتي لايرجون نكاحاً..فمباح لها الظهور أمام ناصر من غير زينة)... أم تركي:أقول ياناصر؟ ناصر:سمي ياعمتي... أم تركي:أشوف الأيام قاعدة تضيع وإنت موب جايب طاري لموضوع الخطبة!خير؟؟اش السالفة؟؟لايكون هوَنْت؟؟؟ ناصر:لا ماهونت..وان شاء الله زواجي بيكون مع تركي بعد طوايفي بنفس الليلة! تركي:عز الله بأشيب وأنا قاعد أنتظرك يالخرَّاط!! ناصر:لا أنا جاد..بس الله يهديك ياعمة انتي ماسألتيني وشهي مواصفات زوجة المستقبل؟؟؟ أم تركي:اطربني..غَرِد! ناصر:أبيها بنتٍ عيطبول .. وغير إبشر ماتقول! ورعبوبةٍ خرعبة وخلوقةٍ مؤدبة!!! وشنباء عرْهرةَ..ماتحب مباهاة وفشخرة!!! وسلهبة هنَّانة موب خدبجة وَهْنانة! وشَمُوعٍ عروبٍ رصوف موب برمادة ضايعة الوصوف!!!! تركي:وإنت عاد من زينك يوم قاعد تتشرط؟!! ناصر:وليش ماأتشرط؟هذي وحدة بأعيش معاها مؤبد وبأدفع فيها دم قلبي إن ماكانت على الهوى فخلها تاكل هوا!! أم تركي:بس هذي اللي قلت مواصفاتها تراني أبشرك إنها باقي ماانخلق مثلها على وجه الأرض! وإن كان فيك خير اتقي ربك وصوم و صل وبتلقاها في الجنة تضحك مع الحور العين!!!! ناصر:اشفيكم قمتوا علي؟هذا وأنا اختصرت كثير من المواصفات!أجل تدرون؟مدام طلبي موب عندكم فـ يازين العزوبية زيناه! أم تركي:تراك لعَّاب يانويصر!وموب على كيفك تقول تم..وترجع بكلامك والبنت بأكلم أهلها هالأسبوع وأشوف وش بيقولون! تركي:ولايكثر هرجك..ترى الوالدة ذوقها حلو ومابتختار لك إلا اللي يرضيك!!! ناصر:الحمدلله إنه في شي اسمه نظرة شرعية!! =============== واليوم الثاني اتصلت أم تركي على أم رانية وقالت:سمعنا عنكم كثير وودنا نجي ونتعرف عليكم! من غير ماتجيب طاري الخطبة ورحبت بها أم رانية.. وراحت أم تركي هي وسماح يوم الثلاثاء.... وأم رانية طلبت من بنتها تجي تساعدها في تقديم الشاي والقهوة..عشان فيه ضيوف جايين ظنت رانية انهم صديقات أمها!! ولما وصلوا دخلت عليهم وسلمت وتفاجئت!!!!! وحست انه الموضوع فيه خطبة...وجلست.. أم تركي:إلا ياوخيتي..وينها بنتك رانية؟؟ سماح تأشر لأمها وأم تركي مو فاهمة!! أم رانية:ههههه هذي بنتي رانية.. أم تركي:لا ماهي بهذي أنا أقصد ذيك الدبة خفيفة الدم!! أم رانية:ههههه يابنت الحلال أنا ماعندي إلا ولدين وبنتين رانية الكبيرة وروان بصف أول ابتدائي وهي آخر العنقود...بس يمكن شكلها اختلف عليك يوم نحفت شوي!! قامت أم تركي فتحت الشنطة ولبست نظارتها ونادت رانية:تعالي فديتك.. جات رانية وهي تضحك.. وقامت أم تركي تتمقل في وجهها زين..وبعد دقايق قالت:إلا والله إنها هي !!!! سماح وأم رانية:هههههههه رانية:الحمدلله ياخالتي..يعني طلعنا براءة!! أم تركي:بس يابنتي تغيرتي..وش نَحَتِك كذا؟؟؟ رانية:عاد حركات بنات..حبيت أسوي نيولوك!! أم تركي:وش يطلع ذا؟؟ سماح:ههه يمه تقصد مظهر جديد أم تركي:والله إنك كذا صرتي مثل القمر..وش تبين يابنتي بكثر اللحم؟يازين الرشاقة والخفة.. وخرجت رانية من الغرفة تبي تجيب القهوة..وفتحت أم تركي موضوع الخطبة وعطت أم رانية نبذة عن ناصر.. وأثناء رجعة رانية للغرفة سمعت أطراف الحكي ووقفت تتسمع عند الباب..وانبسطت جداً!!!! وقالت بنفسها:اعقبي يااسمهانوه!آثاريني مادخلت مزاجك إلا عقب مانحفت؟!! لذي الدرجة كنت بعينك شينة؟؟ وبعد انتهاء الزيارة..قالت أم رانية:الصراحة بنتي لسه صغيرة وماأقدر أوعدكم بشي.. أم تركي:يابنت الحلال بناتنا صغار بعيوننا حتى وإن كبروا وحِنَّا لو نطاوع أنفسنا ماكان زوجناهم لليوم!! ============= ملحوظة: معاني الكلمات:عيطبول:المرأة طويلة العنق.. رعبوبة:البيضاء اللون الرطبة.. شنباء:رقيقة الأسنان في حسن واستواء.. خرعبة:حسنة القد لينة العصب.. خدبجة:السمينة الممتلئة الذراعين والساقين برمادة:سمينة ترتج من سمنتها.. وهنانة:التي بها فتور عندما تقوم من السمنة عرهرة:عظيمة الخلق مع جمال شموع:لعوب ضحوك هنانة:الضاحكة خفيفة الظل سهلبة:خفيفة اللحم.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
طبعاً رانية حست من كلام أمها مع أم تركي إنها مو موافقة على مبدأ الزواج وبغت رانية تنجلط!! وبعد ماراحت سماح وأمها قامت رانية تستهبل! رانية:يمه؟غريبة زارونا هالضيوف!وش يبون؟؟ أم رانية:جايين يخطبون! رانية(بـ تغابي):يخطبون مين؟؟! أم رانية:يخطبون أختك روان لولدهم!! رانية:يمه روان بصف أول ابتدائي! أم رانية:أقول كافي استهبال!يخطبونك ياالفهيمة! رانية:وانتي اش كان ردك؟؟ أم رانية:طبعاً ماني موافقة! رانية:ليش يمه؟؟ أم رانية:وتقولين ليش بعد؟؟صدق إن مافيك حيا!روحي نامي وراك مدرسة ياتلميذة المدارس..خلي الزواج لبنات الجامعات والخريجات! دخلت رانية غرفتها والألم يعتصر قلبها والدمع مدراراً وبينها وبين نفسها تقول:وش نحفتي له يارانية؟!!! لما جاء أبوها طلب العشا وجلس بالصالة وظنوا انه رانية نايمة فأخذت الأم راحتها بالسوالف وحكت له عن الناس وعن مواصفات العريس وعن عدم رغبتها بتزويج رانية!! ورانية فاتحة الباب وتسمع السوالف!! الأب:اللي أعرفه إنه كل أم تتمنى بنتها تتزوج اليوم قبل بكرة..أما انتي غريبة وشفيك معارضة!! أم رانية:البنت بعدها صغيرة ياولد الحلال وقدامها فرص كثيرة لين ماتتخرج! الأب:الشرع يقول إذا أتاكم من ترضون دينه وخلقه فزوجوه..وبنتك عقلها كبير..وانتي لين الحين عجزتي تفهمينها! أم رانية:شلون عجزت أفهمها؟ الأب:يعني مالاحظتي اهتمامها الشديد بحضور الأعراس والتصبغ والتزبرق؟؟إذا أمي اللي هي جدتها فهمتها وقالت بنتك زَوِجها ياسلطان..تحب تستعرض قدام النسوان وترقص!!انتي ماقدرتي تفهمين قصد بنتك؟!! أم رانية:بس رانية راعية وناسة وموب حقت زواج أبد!! الأب:وانتي اش دراك؟أحسن وحدة في بنات اخواني هي!فيها عِرف وواجب من صغرها!والكل يحبها وينبسط على سواليفها..طبخ وتعرف تطبخ..جمال وموب قاصرها شي..تربية والحمدلله بنتي أخلاقها عالية...وبعد كم شهر بتتخرج ونفرح فيها..وش اللي باقي؟؟؟ أم رانية:أقول لك الجماعة يبون يزوجون العريس مع ولدهم عقب 5شهور!وإنت تحسب انهم على كيفنا؟؟ الأب:شوفي..انتي مالك شغل بالسالفة كلها..أنا أدرى ببنتي! انتي لاشاورتيها ولاشي وتفتين من راسك وهذا شي مايجوز لك أنا أبي أقابل العريس بنفسي وبأعطي كلمة في الموضوع!وانتي إذا بتظلين تلفين وتدورين فاطلعي من الموضوع كله!! أم رانية:تصطفل إنت وبنتك! وجمع أبورانية معلومات عن اسم العريس ومقر عمله من أم رانية.. وصباح الأربعاء قرر يزور ناصر شخصياً في العمل من غير مايكشف هويته له!!!!!!!! وكان ناصر يشتغل بشركة مقاولات وتخليص معاملات وتراخيص البناء.. وراح أبورانية كـ عميل يبغى استشارة!....وسولف مع ناصر شخصياً وارتاح له ولخفة دمه وبساطته... ولما رجع البيت نادى رانية..وكانت توها راجعة من المدرسة ولافتحت فمها بكلمة عند اسمهان وباقي الشلة عن طاري الخطبة!!!!!!!! أبو رانية:رانية؟ رانية:سَمْ يبه... أبورانية:تقدم لك عريس..وبغيت أعرف رأيك؟!! رانية:الأهم رايك إنت يبه.. أبورانية:الصراحة أنا أشوف إنه انسان مناسب..وإنك بنت مؤهلة للزواج..إلا إن كان لك رأي ثاني؟!! رانية:لا مالي رأي ثاني!!كل صاحباتي بيتزوجون ماعدا أنا!وِقْفَت علي عاد؟؟؟؟ أبورانية:هاهاها..ياحليلك..يازي ن الصراحة يابنتي!! أمها وهي واقفة وراها:إلا ياشين الشفاحة!! أبورانية:خلاص اتصلي بالجماعة وقولي لهم أبوها مستعد يقابل ولدكم وخلهم يشوفون يوم يناسب العريس يجيني فيه! أم رانية(بغيظ):آمــر!!! اتصلت أم رانية على أم تركي وقالت لها إنه أبورانية مستعد يقابل العريس..وتم تحديد يوم في الأسبوع اللي بعده..وراح ناصر لبيت رانية وكان قاعد يفكر طول الطريق: ياترى شلون بيكون أبوالعروسة؟ شايبٍ أقشر؟ولا قطعة سكر؟!!! ولما وصل للبيت استقبله أبورانية و(مشاري)أخو رانية الكبير.. وانصدم ناصر يوم شاف أبورانية!! وقال:مو إنت اللي...؟؟؟ أبو رانية:إيه أنا اللي!!! وتم اللقاء وكان لقاء حلو وبسيط وانبسط ناصر يوم لقى عائلة رانية تشابهه!!الأب والأخ كلهم راعيين وناسة وسعة صدر وارتاح لهم وارتاحوا له... وكلمهم عن نفسه بالتفصيل.. وعن رغبته بالزواج بعد 5شهور تقريباً مع ولد عمه(تركي) .. وبآخر اللقاء.. أبورانية:شوف ياناصر..حضور أخوانك الكبار معك المرة الجاية مهم لي..وبعدها نتفق على النظرة الشرعية..وعلى الملكة والزواج..وأهم شرط لي إن بنتي تظل ساكنة بجدة!مو تجيني بيوم من الأيام وتقول أنا قدمت على نقل!!!!!! ناصر:لا لا ان شاء الله..ماأرضى بغير جدة بديل..وأنا انولدت وقضيت عمري فيها..وبيتي اللي أنا عايش فيه مِلكي يعني لايمكن أفرِّط فيه بكل سهولة!! واستأذن ومشى... وكانت رانية فرحانة لأبعد مدى!! أما أمها فماهي راضية عن الموضوع تمام الرضى!!! ================ أما اسمهان فكانت يوم الأربعاء من نفس هالأسبوع معزومة عند زوجة صاحب عبدالرحمن ولأول مرة بتروح لها.. لما راحت للحرمة(وكان اسمها عزة) وبعد مااستقبلتها وسولفوا مع بعض.. عزة:ماشاء الله عليك يااسمهان بعدك صغيرة؟؟بصراحة توقعت عمرك 26 أو27 ماتخيلت أبداً إنك طالبة بالثانوية العامة!!!على كذا الفرق بينك وبين زوجك13 سنة تقريباً؟؟؟؟؟ اسمهان:إيه تقريباً! عزة:الله يعينك!!أنا زوجي أكبر مني بأربع سنوات بس والاختلافات بيننا هاالكثر!أجل شلون انتي؟؟ اسمهان(ببراءة):لا الحمدلله..إحنا مرة متفاهمين.. عزة:ياحبيبتي لأنك بعدك عروس وماصار لك من تزوجتي إلا شهور!اصبري لين تكتمل سنة وتشوفين بعينك شلون بينقلب عليك!!! اسمهان:طالما إني طيبة معاه اش اللي بيخليه ينقلب علي؟ عزة:الرِجال كذا هذا طبعهم!كل ماشافوا الوحدة طيبة وساكتة لهم ركبوا على راسها واستخذلوها!لكن المفروض تكونين ذكية من البداية وماتخلينه يمَشِّي كلامه عليك!!ولا انتي على بالك أخذ وحدة صغيرة ليش؟؟مو عشان يبرمجها على كيفه؟؟ اسمهان(وكأنها بدأت تقتنع بكلام عزة!):هو فعلاً من وقت ماتزوجته وهو يحاول يغير فيني أشياء كثيرة بس ماخطر ببالي لحظة إنه يسوي كذا من باب الاستخذال وعشان يركب على راسي!!! عزة:بكرة تقولين عزة قالت!!الواحد منهم يحب يسوي نفسه الناصح المخلص ويتفلسف عليك بكلمتين جابها من كتب!!على باله مثقف!عشان يحسسك إنك انسانة سطحية فاشلة وهو الوحيد اللي يفهم!بس الذكية هي اللي ماتترك له مجال وتفرض رأيها عليه بالطيب أو بالغصيب... اسمهان:سبحان الله كأنك تتكلمين عننا!! عزة:هذا عشان تعرفين إن الرِجال كلهم نسخة من بعض!! اسمهان:طيب عطيني من نصايحك دامك متزوجة من 9سنين!ترى أنا مالي خبرة بـ شي! عزة:لازم يحس إنك موب هينة!وكل شي تعرفينه!مو كل ماحاول يجيب لك سالفة تسوين نفسك مو فاهمة!ولازم تحسسينه إنك مثل ظِله وتراقبينه من قريب وبعيد عشان مايظن إنك غافلة وهبلة وتاركتله الحبل على الغارب!!وماتتركين له أي مجال يآمر وينهى عليك بالعكس! انتي اللي افرضي رأيك وشخصيتك عليه!!ولاتكلمينه عن أخبارك الخاصة خليك عالم من الغموض بالنسبة له مايدري عن ظاهرك من باطنك!! اسمهان(بشغف):وتحسين هالأشياء نجحت معاك؟؟؟ عزة:طبعاً ياحبيبتي!هالحين مايقدر يحط عينه بعيني!ويحسب لي ألف حساب! وبعد مامر وقت واكتملت دروس التحريش !!وانتهت الزيارة.. وفي السيارة... عبدالرحمن:هاه؟شلون لقيتي زوجة يوسف؟؟ اسمهان:طيبة مرة!! عبدالرحمن:غريـــــــــبة!طول الوقت كنت حاط يدي على قلبي ومتأكد إنها مابتعجبك!بس اضطريت أجيبك عندها عشان يوسف نشب بحلقي إلا ألَّبي دعوته!! اسمهان:وإنت اش دراك إنها مابتعجبني؟؟ عبدالرحمن:من كلام زوجها عنها!تصدقين من يوم ماعرفت يوسف وهو كل يوم والثاني متهاوش معاها وموديها لبيت أهلها!!مابينهم وفاق!حرمة تموت بالنكد بشكل غير طبيعي!! اسمهان:وليه مايكون هو اللي منكد عليها؟؟ عبدالرحمن:لا بالعكس يوسف طيب وابن حلال! اسمهان:طبعاً انتوا الرجال ماتشوفون عيوبكم وتحامون لبعض!ودايماً الحرمة هي السبب! عبدالرحمن:وانتي اشفيك معصبة؟هو لو انه انسان مافيه خير..كان رماها من أول مشكلة ببيت أهلها وطلقها وافتك منها!لكن الشي الوحيد اللي مخليه يستحملها.. عياله المساكين.وش ذنبهم؟؟ اسمهان:احترت مين أصدِّق!فُضها سيرة!!! ============= اليوم الثاني راحت اسمهان زواج بنت عمها نوف.. ويوم الجمعة كالعادة اجتمعت مع أهلها في غداء عائلي.. وراحت سماح وحكت لها عن خطبة رانية.... اسمهان:ومتى رحتوا لبيت رانية؟؟ سماح:الأسبوع اللي فات يوم الثلاثاء..وهذا الإثنين ناصر راح لهم بـ روحه... اسمهان:اعقبي يارانية النذلة!ولافتحت فمها لي بـ سيرة!مع إنها مو متعودة تخبي عني شي! سماح:بس ياليت يتم الموضوع على خير..الصراحة انذهلت يوم شفتها تغيرت بشكل غير طبيعي بس صراحة صايرة تههههههههبل! حتى أمي فشلتنا ماعرفتها قامت لبست النظارة ونادتها وتمقلت فيها زين بعدين تأكدت إنها هي!! اسمهان:هههه..فعلاً كلنا تفاجئنا يوم شفناها..ماتوقعنا هالاصرار كله..خاصة اننا تعودنا عليها من سنين وهي بـ ذا الوزن... أسماء:لينة تبكي ياسوسو تعالي إعطيها جرعة حنان! اسمهان:واااااااي ياناس..فديت عمرها هااللينة.. وشالتها اسمهان وضمتها بقوة.. أم اسمهان:ذكرتيني بالذي مضى يااسمهان!حملت فيك بعد انقطاع دام سنين..ويوم ولدتك كأني بكرية وأول مرة يصير عندي عيال!حبيتك وتعلقت فيك مرة وكنت كل يوم أضمك شوق بمثل ماضميتي لينة توِك..... اسمهان:يارب يرزقني بطفل يملى حياتي كلها فرح.. أسماء وسماح والأم:آميييين.. =============== راحت اسمهان السبت للمدرسة وبقرارة نفسها فكرت إنها ماتكلم رانية عن موضوع الخطبة لين مارانية تبدأ الأول!!! لكن رانية ماجابت خبر أحد! ومر الأسبوع بروتين غريب ولامن جديد... ونهاية الأسبوع راح ناصر مع اخوانه الكبار اللي حضروا من الشرقية لبيت أبورانية وتقدموا رسمي وتم تحديد يوم النظرة الشرعية الأسبوع اللي بعده..وعلى أساس ماراح يصير في النظرة ينبني عليه تحديد ملكة أو لا... =============== أما عبدالرحمن عرضت عليه قبل فترة إحدى الجرايد السعودية اللي تصدر بشكل يومي إنه يكتب بزاوية مخصصة فيها بعد ماشاهدوا الاقبال الكبير على مقالاته بالمدونة اللي في النت...ووافق وصار منهمك على طول بإعداد موضوعات ومقالات متنوعة يومياً.. وبيوم من الأيام...صاحت اسمهان:يوووووه عبدالرحمن!الصراحة هذي ماصارت عِيشة!كل يوم وانت تقضي ساعات بغرفة المكتب تخترع مقالات وأنا قاعدة بروحي أحاكي الجدران! عبدالرحمن:زين انزلي لأمي تونسي معاها شوي!! اسمهان:أنا متزوجتك إنت موب أمك!! عبدالرحمن:وش هاللهجة الله يهديك؟؟زين روحي اتصلي بأهلك بصديقاتك أو اقعدي على النت! اسمهان:ياسلااااااام!أقول لك مليت! عبدالرحمن:أجل اش تبين؟؟ اسمهان:أبي أطلع من البيت! عبدالرحمن:وين تبين تروحين؟؟ اسمهان:أي مكان..السوبر ماركت مثلاً..ناقصتني مقاضي للمطبخ! عبدالرحمن:خلاص..بإذن الله نص ساعة ونطلع..ارتحتي؟؟ وفرحت اسمهان وتجهزت وغيرت ملابسها ولبست عباتها وجلست تنتظر..وبعد ساعة دخلت عليه المكتب وعيونها تناقز شرار!! اسمهان(تصرخ):النص ساعة..صارت ســـــــــــاعة ياعبدالرحمن!وإنت باقي لازق بالكرسي؟؟؟؟؟ عبدالرحمن:ياالله..مر الوقت ماحسيت فيه.. وقام يلبس ..وطلعوا الاثنين وراحوا للسوبرماركت..وهم يتجولون ومعاهم عربيتهم ويشترون أغراض أقبلت عليهم بنت عشرينية ولابسة عباية مزركشة وطاقة بوجهها كيلو ميك أب!!وكاشفة وجهها وجزء من شعرها!! وقالت:إنت الأخ عبدالرحمن الفلاني؟؟؟ عبدالرحمن:إيه نعم! البنت:أنا من أشد المعجبين بكتاباتك الاجتماعية الدينية اللي في جريدة...!!.... عبدالرحمن:شكراً جزاك الله خير.. ورمت اسمهان من يدها الشوكولاتة اللي كانت تبي تحطها بالعربية وجت منطلقة على البنت ووقفت قدام البنت وقالت:نعم؟خير؟ البنت(باستغراب):أبداً كنت أتكلم عن اعجابي الشديد بمقالات كاتبنا الأخ عبدالرحمن! اسمهان:نعم يختي؟؟أقول روحي يالحلوة غطي وجهك واستري نفسك وبعدين تعالي تفلسفي! البنت:وي..ياأخ عبدالرحمن؟هادي زوجتك؟؟ عبدالرحمن(وهو منحرج):ايه نعم! البنت:والله ياحبيبتي المفروض تكوني متوقعة انو كاتب بحجم زوجك لازم يكون له معجبات كَتير! اسمهان:سألتك باللي خلقك؟انتي تفهمين كلمة من اللي تقرأينه؟والا المسألة عندك رزة وجه وبس؟يلا يلا عطينا مقفاك ودرب يسد مايرد!! وعبدالرحمن من الاحراج ماعرف اش يقول فقال للبنت:المعذرة ياأخت عن إذنك... وقامت البنت وعطت اسمهان تشميقة معتبرة ومشت وهي تقول لنفسها(معقولة المُسقَف الوسيم دا متجوز الغجرية دي؟؟؟) عبدالرحمن:وش هااللي سويتيه ذا؟فشلتينا قدام الناس؟؟ اسمهان:لا ياشيخ؟؟ناقص تحب إيدها بعد وتعتذر لها!! عبدالرحمن:مهما كان البنت ماغلطت جات تعبر عن مشاعرها! اسمهان:لا والله!وعادي عندك؟؟أجل حتى أنا بأروح للهندي اللي واقف يرص الكراتين هناك وأعبر له عن مشاعري واعجابي بإخلاصه في عمله!!!!!!! عبدالرحمن:أنا ماقصدت ان اللي سوته صحيح!بس هي من وجهة نظرها تشوفه شي عادي..كان طنشتيها ومر الموضوع بسلام! اسمهان:أقول الشرهة علي يوم طاوعتك تكتب مقالاتك بالجريدة!لو براسك عقل ماتحط صورتك فوق المقال!واش استفدنا من صورتك غير تجميع هالأشكال حولنا؟؟أتحداها فاهمة شي من مقالاتك..تلاقيها مايعجبها شي في مقالك الا صورتك اللي فرحان فيها ورازها فوق!!! عبدالرحمن:استغفر الله.. اسمهان:استغفر الله منك ومن فعايلك ..ومقاضي ماني شارية وبأرجع للسيارة! وراحت اسمهان تمشي بأسرع ماعندها خارج السوبر ماركت وعبدالرحمن يناديها ولاترد!! وقعدت تنتظره بالسيارة..وآثاريه ماجاء بسرعة قعد يحاسب عن الأغراض اللي بالعربية! ويوم زهقت اسمهان قامت تدندن بصوت عالي بالسيارة وتغني لأنها متطمنة انه ماحد سامعها وصارت تغني وتقول مَوَّال: ليش يادحومي ليش؟ ماصنت الملح والعيش تلتمـــــس عذر لــ صَبية ودي أنخش عينها تنخيش وآثاري الشباك الخلفي الجانبي اللي وراها مفتوح شوي!!وصوتها طالع برة!! وكان فيه شاب ماشي من جنب السيارة ودخل راسه من الشباك وصاح في اسمهان:إن أنكر الأصواتِ لـَصوت الحمير!!!هههههه وقامت اسمهان من الخرعة تبكي وشوي وجاء عبدالرحمن ولقيها تبكي بصوتها!! عبدالرحمن:لاحول ولاقوة إلا بالله..انتي باقي زعلانة؟؟؟ اسمهان(وهي تنوح):لاااا..بس اكتشفت إن صوتي ماهوب حلو!!!! مرت الأيام وجاء اليوم اللي رانية بتشوف فيه ناصر لأول مرة.. وراحت البنت وتأنتكت..وتضبطت وكان ناصر قاعد بالمجلس مع أبو رانية وأخوانها(مشاري)بالجامعة و(مشعل)بالمتوسط.. دخلت رانية بعد وقت من زيارة ناصر بالشاي.. رانية(بكل ثقة):السلام عليكم.. الجميع:وعليكم السلام.. وسرقت نظرة سريعةوناظرت بناصر و رخت عيونها بالأرض...وهي مبتسمة.. وناصر فاتح فمه من الذهول!!ويقول بنفسه(طول عمرك ياناصر منحوس!معقول هالمزيونة بتصير زوجتك؟؟أخاف غلطانين!!) مشاري(يستهبل):أقول رانية لفي يمين ثم لفي يسار..خلي العريس يناظر زين أخاف يحسبنا غاشينه ولا شي!!! الجميع:هههههههه طالعت رانية بمشاري ورفعت حاجبها!! وطال الصمت وناصر يطالع بتعجب أبورانية:إحم إحم!!ودك تسألها شي؟ ناصر(وهو مرتبك):ايه..شلونك؟؟ رانية(وهي مبتسمة):زينة.. ناصر:تدرسين؟؟ رانية:ايه بثالث ثانوي.. ناصر:خلاص! مشاري:علامك؟انتهى الاستجواب؟ ناصر يهمس لمشاري:ايه انتهى..قلبي يعورني! مشاري:انطلقي إلى المكان اللي أقبلتي منه يارنو! وخرجت وقاموا يضحكون... تذكر ناصر الإسورة الذهب اللي جابها بعلبة وقال لمشاري:نسيت أعطيها هديتها!! مشاري:رنو يارنو..تعالي خذي مكافأة من العريس!! أبورانية:الله يقطع ابليسك قوم إنت ودها لأختك! دخلت رانية لأمها وهي زعلانة.. أم رانية:خير ان شاء الله؟؟ رانية:ولدك الدب مشمش!ينكت علي هو ووجهه!هذي مو شوفة ذي مسخرة!مافي احترام ولاتقدير قدام الرجال الغريب!كأني جاية للعرض بس! أم رانية:أهم شي..ارتحتي له؟؟ رانية:ايه..حليو بس شكله مَخَفَة شوي!! أم رانية:مثل أبوك ولا أزود؟!! رانية:ههههههه..حرام عليك يمه..أبوي خفيف دم..بس هالعريس شكله مسيكين وعلى نياته.. أم رانية:يلا..الله يهني سعيد بسعيدة.. وجاء مشاري وناولها الهدية.. رانية:يمه اش رايك؟حلوة الإسوَرة؟ أم رانية:حلوة مابها شي!! رانية:يمه اشفيك تكلميني بجفاء؟ كأنك مو فرحانة؟!! أم رانية:ماعليك مني..أهم شي أبوك يفرح!! وقبل مايروح ناصر اتفق مع الأب على موعد الملكة انه بعد شهر.. ورجع ناصر بيت تركي وفتحت له أم تركي ودخل..وسأل عن تركي أم تركي:أرسلته يجيب لي أغراض من البقالة..شوي ويرجع..بس إنت بشرني..اش اللي صار معك؟؟ ناصر:العروسة تهبل ياعمتي وذوقك لايعلى عليه..بس ماأبيها! أم تركي:وليش عاد؟؟ ناصر:عندي طموح بوحدة أجمل! أم تركي:ومن حلاتك عاد يوم تبي وحدة أجمل؟؟إنت طالع بعصاقيلك وتحمد الله على ماابتلاك!!والله إن رانية تخب عليك! ناصر:وانتي ليش زعلانة؟بنتك هي ولا بنت الناس؟؟ أم تركي:زعلانة ليش إنك لعَّاب!وماعندك نية تتزوج بس قاعد تضيع وقتنا على الفاضي..روح باللي مايحفظك!! إلا تركي راجع من برة ومعاه الأغراض..حطها بالمطبخ وقامت الشغالة ترتبهم ورجع المجلس وسلم على ناصر..ولاحظ إن أمه متضايقة.. تركي:يمه؟عسى ماشر؟ليش زعلانة؟؟ أم تركي:اسأل المقرود اللي جنبك؟؟ تركي:خير يانويصر؟ليش مزعل الوالدة؟؟ ناصر:مدري عن أمك..جيت أبشرها إن العروس معجبتني والملكة بعد شهر و هبَّت فيني وهاوشتني!! تركي:صحيح؟؟مبروك مبروك.. أخيراً نويت تعقل وتركد وتنثبر ببيتك ويصير لك زوجة؟؟؟صدق إننا في عصر العجايب!! أم تركي:أنا يالكذاب هاوشتك على تبشيرك لي؟؟مو إنت كذبت علي قبل شوي وقلت إنك تبي وحدة أحلى؟؟ ناصر:استغفري ربك ياعمة ماحصل!!! أم تركي:تبيني أقوم عليك هالحين وأخنقك بشيلتي يالخراط؟!! تركي:يمه لاتقهرين نفسك عليه..تراه من كثر مايكذب ينسى!ومابين كل كذبة وكذبة يألف عشر كذبات ثانية!! أم تركي:أقول أنا بأروح أرتب الأغراض بالمطبخ وإنت تهنى بـ رفاقة مسيلمة الكذاب!!! تركي:هاه يامسيلمة!يووه أقصد يانصور..مادام الملكة بعد شهر فالمفروض نبدأ من هالحين ناخذ الأمر جد ونحجز قصر ونرتب أوضاعنا.. ناصر:أنا حاط عيني على استراحة الزنبقة اللي بالحي اللي ورانا تنفع للمناسبات.. والعشا نجيب هندي يطبخ لنا قدر مندي بحوش الاستراحة!! اش رايك؟؟ تركي:ايـــــــــــش؟؟صدق إنك ثور!هالحين زواجي الأول سويته بقاعة ليلتي وتكلفت فيه!وتبيني الحين أقط معك عشان أتزوج باستراحة؟صدق إنك وجه فقر! ناصر:ياشيخ يازين التوفير..وش لك بالتبذير والسرف!افرض بكرة بنت الناس طلعت رفلة وماتسوى..تبيني أقعد أتحسر على كل قرش دفعته فيها؟؟؟؟ تركي:يــــــــــــــــــــــــ ـــمه!! أم تركي:ياااااااااانعم.. تركي:جيبي شيلتك وتعالي!!!ناصر:لاااااااااا أمزح صدقوني أمزح! مرت أيام وبدأ أسبوع دراسي جديد في نهايته كانت ملكة مشاعل خالة أفنان على عبدالمجيد أخو عبدالرحمن... ومشاعل مجتهدة تداوم يومياً في المعهد.. ويوم الاثنين قالت لها زميلتها(شروق) الموظفة معاها بنفس المعهد...معهد الصم والبكم.. شروق:مشاعل؟انتي مو هذا الخميس بتملكين؟؟ مشاعل:ايه هذا الخميس.. شروق:طيب ليش ماتاخذين لك اجازة هاليومين؟؟ مشاعل:وش حقه الاجازة؟أنا بأملك بس ..مو أتزوج! شروق:غريبة انتي!العروس أقل شي يبي لها يومين تستعد فيها وترتاح.. مشاعل:صدقيني..أنا قمة ارتياحي وانبساطي أحس فيها لما أكون بين طالبات هالمعهد.ماأتصور اني بآخذ اجازة الثلاثاء والأربعاء وعقبها خميس وجمعة وبعدين أشوفهم!! شروق:ماشاء الله عليك..أما أنا أعد الأيام عد عشان تقبل علي الاجازة..مشاعل؟؟ مشاعل:هلا.. شروق:بأسألك سؤال غثيث شوي..ممكن؟؟ مشاعل:عادي ياقلبي..اسألي.. أنا تعودت على غثاثتك!! شروق:انتي لما وافقتي على هالمعرس..وافقتي عشان أهله أغنياء ومن عائلة معروفة؟؟ ولا عشان تقدم بك العمر وكل زميلاتك تزوجوا الا انتي؟؟ولا شفقانة عليه؟؟ مشاعل:ولا سبب من الأسباب اللي ذكرتيها!!وافقت عليه لأني ارتحت له..ومانظرت له مثل ماغيري من الناس ينظر له!إن كان أصم وأخرس فهذا شي مو بيده ولايقلل من شانه ومن حقه ياخذ فرصته ويعيش مثله مثل غيره.. شروق:بس انتي مافكرتي يامشاعل شلون بكرة بتتعاملين معاه؟يعني مثلاً..أبسط مثال:فترة الخطوبة اللي تعتبر من أحلى الفترات..وشلون بتتواصلين معاه وهو مايقدر يسمعك أو يكلمك بالتلفون؟؟ مشاعل:صدقيني الدنيا ماقامت وقعدت عشان التليفون..ولاقد فكرت في اللي تقولينه.. شروق:طيب حياتكم اليومية بعدين شلون بيكون تعاملك معاه؟ مشاعل:انتي ليش مستصعبة الموضوع وهو ماله علاقة فيك وأنا اللي أعتبر صاحبة الشان مافكرت في أي صعوبة؟!!بعدين أنا لي سنين وأنا أشتغل وأتعامل مع الصم والبكم لين ماكسرت كل الحواجز اللي بيني وبينهم..عشان كذا ماأتخيل انه حياتي معاه بتكون صعبة مثل ماانتي متخيلة!! شروق:مبروك ياقمر..والله يهنيكم ببعض ويوفقكم.. ================= وبنهاية الأسبوع يوم الأربعاء خرجت مشاعل بدري من المعهد وبدأت استعداداتها للملكة.. يوم الخميس كانت ملكتها ملكة بسيطة في استراحة مناسبات وحضرت اسمهان وأم عبدالرحمن اللي كانوا لهم مدة ينزلون الأسواق عشان يجيبون عربية الملكة وملحقاتها من ذهب وبخور وعطورات وتحف وشمعدانات وتغليف في محل خاص وتزيين وتشريع.. ماحضر من الشلة إلا أفنان واسمهان ورانية..أما مرام ونجلاء لا!!! نجلاء باعتبار انه عبدالمجيد خطبها من قبل فشافت انه حضورها ماله داعي أبد!! ومرام لأنه أهل عريسها موجودين وهم أهل عريس مشاعل..فما وافقوا أهلها انها تروح! وحضرت جوهرة خالة العريس وأم اسمهان فقط..وعمات العريس وأهل أبوه وبعض الأقارب واستانس الجميع.. وقامت اسمهان قعدت على طاولة مع رانية وأفنان... ولما رجعت لطاولة أهل العريس وأمها..همست في إذنها أم عبدالرحمن:مين هذيك البنت اللي لابسة فستان موف وجالسة معاكِ؟؟ اسمهان:ههههه..أكيد ماعرفتيها! أم عبدالرحمن:لا ماعرفتها بس كأني مشبهة عليها!! اسمهان:هذيك رانية ياخالتي.. أم عبدالرحمن:مو معقول!!سبحان من يغير ولا يتغير!! ورجعت اسمهان للطاولة وجلست مع رانية.. اسمهان:مبروك ياعروسة..ولو اني كنت أتمنى تبشريني بنفسك!! رانية:مايحتاج أقول لك والعريس جاي من طرفك!! اسمهان:جاي من طرفي؟؟وأنا اش لي علاقة بالموضوع؟؟أساساً عمري مارشحتك لأحد!أنا شخصياً تفاجئت لما قالت لي سماح إنهم يبونك لولد عمهم..ناصر..!! رانية(بانفعال):وليش عيوني عمرك مارشحتيني لأحد؟؟ناقصة إذن ولا عين؟؟ ولا اجتهادك حاطته بأفراد الشلة تكافحين العنوسة فيهم وتاركة أعز وحدة عندك منهم ماتعطينها وجه؟! اسمهان:هههههه وش هالهرج ياحقودة..الحمدلله باقي بدررررري عليهم من العنوسة!وصدقيني ماقد تدخلت في خطبة وحدة منهم.. أهالي العرسان كانوا يختارون ويطلبون مني الرقم فقط! رانية:وأنا ماحد فكر فيني إلا عقب مانحفت!!آثاريني كنت أفَشِّل؟؟ اسمهان:لا ياحلوة..تدرين انهم كانوا حاطين عينهم عليك من يوم شافوك في المستشفى بولادة أسماء؟؟وكنتي دبدوبة!بس خدمتك النحافة إنها حلتِّك بعيونهم زيادة!الا اش رايك في العريس؟؟ رانية:لا ملكت علمتك!! اسمهان:ومتى الملكة ان شاء الله عقب شهر؟؟ رانية:راح من الشهر أسبوع وباقي ثلاث..والله يعين.. اسمهان:ماشاء الله محد قدي كل الفترة الجاية مناسبات!انتي ملكتك عقب 3أسابيع ومرام عقب شهر وأيام..وبعطلة الصيف زواج مشاعل ومرام بليلة وحدة..وبعدهم بأسبوعين ملكة أفنان وعقب ملكتها بكم يوم بيكون زواجها معاك بنفس الليلة!!! رانية:ياحليلها نجلاء..زواجها بعد سنتين!! اسمهان:بس ماتصدقين وش كثرفرحتي!زواجكم راح يقربنا من بعض..وخصوصاً انه مافي أحد مننا بيروح بلد ثاني ويبتعد.. وشوي كانت الزفة وبعدها طلعوا أهل العريس يسلمون على مشاعل.. وتوجهوا بعد السوالف لصالة العشا.. أما مشاعل دخلت على عبدالمجيد ومع انها كانت انسانة عادية جداً في جمالها وملامحها بس انجذب لها عبدالمجيد بشكل شديد ولمس فيها الذوق والعقل والرزانة.. ولما طلع الجميع من الغرفة وصاروا لحالهم..أعطاها عبدالمجيد لوحة صغيرة بحجم برواز راسمها بالألوان الزيتية وكاتب فيها أبيات شعر..سألته مشاعل بلغة الاشارة:انت راسمها؟؟ عبدالمجيد رد بلغة الاشارة:ايه وكاتب الأبيات! مشاعل:ماشاء الله ترسم وتكتب شعر؟؟ عبدالمجيد(بتواضع)وبحركات الاشارة:شوي!! وظل يحكي لها عن نفسه بلغة الاشارة وهو فرحان وهي تتابعه بصمت وتتأمل فيه وبمعنوياته المرتفعة ونفسيته الشفافة البريئة وتتذكر كل أطفال الاعاقات المختلفة اللي واجهتهم بحياتها وكيف دايماً كانت تردد بينها وبين نفسها(سبحان الله..جنتهم بصدورهم)!! دايماً بريئين وسعيدين..وينشرون البهجة للي حولهم.. وحست مشاعل انه ارتباطها بعبدالمجيد أول خطوة صح تتخذها بحياتها وحست انها مو ندمانة على قرارها أبداً على رغم اعتراض كثير من أقاربها على هالزواج الغير متكافيء!!! وأولهم أمها اللي دمعتها مافارقت خدها طول الملكة!! في الرياض كانت عبير جالسة بالبيت ودق الجرس وراحت تفتح الباب..وكان الحاضر أبوها.. سلمت عليه وحضنته بشوق.. عبير:الحمدلله على السلامة يبه.. الأب:الله يسلمك يابنتي... دخل المجلس..وسألها:وين أخوانك؟؟ عبير:راحوا السوبرماركت مع أمي يجيبون أغراض.. الأب:مين وداهم؟؟ عبير:سواق خالي.. الأب:طيب ليش مارحتي معاهم؟ عبير:عندي اختبار انجليزي بكرة .. الأب:الله يوفقك يابنتي.. شدي حيلك..نبيك تجيبين نسبة عالية عشان تدخلين قسم زين بالجامعة.. وبدأ يسولف معاها بمواضيع مختلفة..... الأب:اسمعي يابنتي مابقى على اجازة الصيف كثير..وأنا فكرت بما إني مسافر للعمل بمصر ولبنان اني آخذك انتي واخوانك تقضون معي الاجازة! عبير(بفرح):صدق يبه؟عسى الله لايحرمنا منك.. الأب:أتا داري زين اني دايم مقصر معاكم ومشغول على طول عشان كذا فكرت أضرب عصفورين بحجر منها أسافر أكمل أشغالي ومنها تتسلون بإجازتكم.. عبير:يبه؟أنا عندي موضوع أفكر فيه من مدة ونفسي أكلمك فيه! الأب:خير ياعبير؟قولي.. عبير:يبه مادام ودك تاخذنا لـ لبنان فليش ماأحاول أعيد تجربة عملية التجميل؟؟ الأب:ياليت إنك تحاولين لكن أدري طول ماأمك وراك مابتستمرين كالعادة!! عبير:لا أنا هالمرة معزمة إذا انت وافقت.. الأب:ماعندي أي مانع..أنا ودي أشوفك اليوم قبل بكرة سليمة ومتعافية مثل أي بنت..وبالإجازة نعرض تقاريرك السابقة على أحسن طبيب تجميل بلبنان.. عبير:بس يبه أنا عندي طلب ثاني! الأب:آمري.. عبير:إن أمي ترافقني! الأب:هذا المستحيل بعينه!تبين أحد يرافق معاك بالمستشفى فأنا أقترح تاخذين معاك وحدة من بنات أعمامك أو عمتك(منيرة) هذي هي أرملة وماعندها عيال ولاأحد يربطها وأنا متأكد إنها ماراح ترفض وتتمنى تخدمنا بعيونها.. عبير(بلهجة خاضعة):مثل ماتبي يبه! ================== ومرت الأيام تلو الأيام..وكانوا جوهرة واسمهان وأحلام مجتمعين ببيت أم عبدالرحمن وبعد السواليف .. جوهرة:ودي أبشركم بخبر..بس عطوني هدية البشارة بالأول! أم عبدالرحمن:صار! بس وشهو الخبر؟؟؟ جوهرة:زوجي لقي عمل.. الجميع:مبرررررررررروك جوهرة:والخبر الثاني إني...... حـــــــــــــــــــــــــــــ ــــــامل!!!!! قامت أم عبدالرحمن وحضنت أختها جوهرة والدموع مالية عيونها وقالت:مبروك يالغالية..مِن صبر ظَفَر.. أما اسمهان غصب عنها تلاشت ابتسامتها وصارت حزينة على تأخرها بالحمل!! وباركت أحلام لخالتها وقالت:الحمدلله ياخالتي اللي فرجها عليك وعلى زوجك.. جوهرة:الحمدلله..عقبال مانفرح بعيال عبدالرحمن واسمهان! أم عبدالرحمن:آمين يارب.. وبعد ماانتهت الزيارة رجعت اسمهان لبيتها وكان التليفون يرن وراحت ترد..وكانت المتصلة(عزة)زوجة صاحب عبدالرحمن.. بعد السلام والمقدمات المعهودة.. عزة:وش قاعدة تسوين؟عساك مشغولة؟ اسمهان:لا توي راجعة من عند أهل زوجي.. عزة:يعني مشغولة ولا فاضية؟ اسمهان:الصراحة نص ونص!عندي الحين كوي متجمع له كم يوم وودي أكويه قبل لايجي عبدالرحمن.. عزة(بخباثة):خلي شغالتك تكويه! اسمهان:بس أنا ماعندي شغالة! عزة:أفا هذا وعبدالرحمن مقتدر مالياً بخلان عليك؟؟ اسمهان:لا مو بخلان..بس أنا عمري ماطلبته.. عزة:وليه ياحبيبتي ماتطلبين؟انتي ناسية انك بنت عِز؟يعني الشغل مو للي مثلك!وغير كذا انتي وراك تخرج ولازم تجيبين نسبة عالية فالمفروض يكون عندك شغالة! اسمهان:مرات لما يكون عندي شغل أطلب شغالة خالتي وماتقصر تطلعها لي تساعدني! عزة:حبيبتي اسأليني أنا عن أهل الزوج!لأنك عروس بتجاملك ..بس بكرة بتهاوشك وتقول وش هالرفالة اشتغلي بنفسك!ولا يمكن يوصلك كلام ينقال ورا ظهرك إنه ماينظف بيتك إلا بشغالتها!! اسمهان:هههه لا ماأتصور خالتي تحبني..و طيبة! عزة:والله انتي اللي طيبة!هذا لأنك لحالك..بس بكرة يتزوجون عيالها تسيرين قديمة بنظرها ولاعاد تواطنك وتفرق بينك وبينهم! اسمهان:لاتخوفيني! عزة:شوفي..إذا زوجك فعلاً يحبك ويبي مصلحتك فلازم تخلينه يجيب لك شغالة!!إلا إن كان قاصد يخليك تشتغلين بالبيت عشان تضيعين دراستك؟!!لأن الرجال أعرفهم يحبون المره الضعيفة اللي مابيدها شهادة!وبتفيدك الشغالة إنك تقضين مع زوجك أطول وقت ممكن! وهكذا استمرت عزة توسوس لاسمهان وهي منصتة باهتمام.. طبعاً بعد ماانتهت مكالمة اسمهان مع عزة بـ شوي..رجع عبدالرحمن.. دخل البيت وسلم.. ولقي اسمهان جالسة ومتضايقة.. عبدالرحمن:كيف كانت جلستكم اليوم مع خالتي؟؟ اسمهان:ماشي الحال.. عبدالرحمن:حسافة ليتني لحقت عليها زمان عن أخبارها.. اسمهان:مافي جديد غير ان زوجها توظف..وهي.........حامل!!!! عبدالرحمن(بفرحة):لااااا مو معقول!وش هالأخبار الحلوة..الله يسعدهم ويوفقهم ان شاء الله..بإذن الله بكرة بأمر عليها أبارك لها بنفسي.. اسمهان:عبدالرحمن من غير مقدمات أنا أبي شغالة!! عبدالرحمن:ليش؟؟ اسمهان:من غير ليش!ماشاء الله ظروفك المادية ممتازة ومو قاصرك شي! عبدالرحمن:وعشان مو قاصرني شي لازم اخترع لي شي أضيع فلوسي عليه؟؟؟؟ اسمهان:الشغالة مو خسارة فيني! عبدالرحمن:مو لما نكون محتاجين لها بالأساس؟!وبعدين شغالة أمي تحت أمرك بأي وقت.. اسمهان:شغالة أمك..يعني شغالتها هي مو شغالتي أنا ..وماهي مكلفة تشتغل ببيتين! عبدالرحمن:أنا أبي أسألك:هل حصل وتعبتك بشغل البيت؟أو ضغطت عليك؟ أنا حتى أغلب الأحيان أجيب لك غدا من برة عشان لاتتعبين نفسك وتطبخين! وثيابي أغسلهم وأكويهم برة!!وبعدين من كثر ضيوفنا إحنا يوم نجيب لأنفسنا شغالة؟؟ وحتى مجالسنا دايم مقفولة..مانستخدم من البيت إلا الصالة والمطبخ وغرفة النوم وحمام واحد بس..وشغلها مقدور عليه.إذن وين المشكلة؟؟؟ اسمهان:أنا وراي دراسة وماني فاضية لشغل البيت! عبدالرحمن:طيب انتي من الترم الأول وانتي وراك دراسة وتدرسين وتشتغلين بالبيت..اش اللي تغير؟ اسمهان:خلاص عاد لاتناقشني! عبدالرحمن:مو يااسمهان ياعزيزتي الانسان المفروض مايبحث إلا عن الشيء اللي يكون محتاجه فعلاً بحياته..مثل ماأنا كنت محتاج لوجودك بحياتي وظليت أبحث عن ضالتي إلى أن وجدتها!! اسمهان:جينا للفلسفة والكلام اللي مايوكل خبز!أبـــــــــــــــــي شغــــــــــــــــــــــــــــ ـــــــالة!! عبدالرحمن:ترى بتجيك تكتم على أنفاسك لاتقدرين تلبسين براحتك ولاتقدرين تقعدين معي براحتك قدامها..وكل ماجينا طالعين مكان نتمشى لازم نوديها لأمي..وهذا إن كانت أمي موجودة..مو بعيدة يكون عندها خرجة وماخذة شغالتها معها!! اسمهان:ياحبك في تكبير المواضيع!! عبدالرحمن:شوفي أنا ممكن أنفذ طلبك..بس ماني جايب شغالة عن طريق مكتب استقدام لأنه مافي حاجة لها أصلاً..ولاعندنا أطفال أوالبيت يحتاج تنظيف باستمرار..بس ممكن أجيب لك شغالة من هنا وتشتغل بالساعة وبعدها تقضب الباب!! اسمهان:ماعندي مانع! ================ ثاني يوم لما راح عبدالرحمن للعمل حكى لصاحبه عن رغبته بتوظيف شغالة عنده... وقال له صاحبه:أنا جايب شغالة أريترية..تشتغل عندي بالساعة لأن زوجتي حامل..فتتساعد معاها لكن ماتبات عندنا..بس ممكن أخلي زوجتي تكلمها وتدور لك عن وحدة من جماعتها تشتغل عندك! عبدالرحمن:ايه تكفى اهتم لي بالموضوع.. وبالفعل كلها يومين وجات شغالة جديدة لبيت اسمهان وإسمها(حليمة).. قالت اسمهان:وااااااي حسبتها أندونيسية! عبدالرحمن:وخير يعني لاطلعت من جنسية ثانية؟كلهم مخاليق الله.. وأخذتها اسمهان وقامت تعلمها بمكان الأشياء وكيف تشتغل ومتى تجي ومتى تروح.. واتصلت اسمهان بـ عزة تبشرها!! اسمهان:أبشرك ياعزة جبت شغالة!!! عزة:بهذي السرعة؟؟؟ اسمهان:ايه..الحمدلله انه وافق! عزة:أكيد جبتي من شغالات بقايا العمرة هذول؟؟ اسمهان:هي تقول إن لها 20 سنة بالسعودية وأهلها كلهم ساكنين هنا بـ جدة.. عزة:وليه مااستقدمتي أحسن؟ اسمهان:ياشيخة زين منه رضى..ومسألة الاستقدام تطوِل! وبعد ماانتهت السوالف قفلت اسمهان السماعة وهي فرحانة بالشغالة الجديدة! ============ ومرت الأيام ولاحظت أم عبدالرحمن انه فيه شغالة تتردد يومياً على بيت عبدالرحمن.. وسألت عبدالرحمن وكان قاعد يتقهوى معاها:عبدالرحمن؟انت جبت شغالة؟؟؟؟ عبدالرحمن:ايه..جبت.. أم عبدالرحمن:ليه؟بشِر..اسمهان حامل؟؟؟ عبدالرحمن:لا مو حامل..بس مو قادرة توفق بين الدراسة والبيت! أم عبدالرحمن:صدقني لو إنها تطلب شغالتي يومياً ماكنت بأرفض..وغير كذا هذول اللي ماعندهم اقامة يخوفون ياولدي..بكرة لو تسوي لكم مصيبة من وين تقدرون تحصلونها وتجيبونها؟؟! عبدالرحمن:الله يكفينا شرهم..بس باين عليها طيبة بحسب كلام اسمهان.. مرت الأيام واسمهان مشغولة بدراستها وشاع خبر خطبة رانية بين الشلة وتلقت التهاني.. نجلاء:ماشاء الله زواج اسمهان كان فاتحة خير علينا..انفرطت السلسلة بعدها وكل يوم ووحدة مخطوبة مننا... مرام:طبعاً إحنا مميزات وجميلات عشان كذا حظنا فوق!! أفنان:لا ياقلبي لامميزات ولاشي!يعني بنات خلق الله اللي تارسين البيوت وماجاء نصيبهم كلهم قبيحات ومافيهم ميزات؟؟ الا ظلمتيهم بكلامك..المسألة مسألة حظ ونصيب..وماحد ياخذ الا اللي مقسوم له.. مرام:ماقصدت أظلم أحد..بس إحنا فعلاً مميزات وماينقصنا شي!! رانية: وبالله في ايش مميزات ولاينقصنا شي؟علمينا ياملكة جمال الشرق الأوسط!! مرام:وانتم ليش محقرين أعماركم؟أنا عن نفسي أحس إنه فيني جاذبية!مو غرور..بس فعلاً أحس اني انسانة غير عادية!!! الشلة:ههههههههه رانية:أقول ياشين السرج على البقر!! مرام:أنا بقرة؟؟نسيتي وش كنتي انتي من قبل؟؟أشوى إنك لحقتي على نفسك وصرتي أنثى أخيراً!! رانية:أفا..مصدقة نفسها كوافيرة الهوانم!! اسمهان:بسكم عاد!بتقلبونها مصارعة؟؟عاد أبلة جوهرة فرحانة هذي السنة..تقول إنها أحسن سنة مرت عليها من 3سنين!! نجلاء:ليش؟ اسمهان:لأنها افتكت من مشاكلنا!تقول الحمدلله إن عُقَدكم انفكت بعد ماانخطبتوا..جعلكم بالعرسان اللي يأدبونكم ويمشونكم على الصراط!!! =============== وكانت حليمة شغالة اسمهان مجتهدة بشغل البيت تجي يومياً من العصر وتروح بعد العشاء.. لكن عبدالرحمن صار مايرتاح بقعدته في الصالة أثناء وجود الشغالة وصار أغلب وقته يجلسه بالمكتب وتروح له اسمهان.. وبيوم سوت له اسمهان شاي وكيك..ودخلت عنده المكتب وهو قاعد على الكومبيوتر.. اسمهان:بالله فكني من مقالاتك وخل نجلس ندردش أحسن! عبدالرحمن:طيب اش رايك نختار لعبة من ألعاب الكومبيوتر ونلعب سوى ونشوف مين فينا يفوز؟؟ اسمهان:هيا.. واختاروا لعبة الذاكرة اللي تعرض مجموعة كبيرة من الصور ثم تخفيها واللي يحاول يجمع أكبر كمية صور هو الفايز...وألعاب كثيرة ثانية.. إلا الشغالة دقت الباب.. خرجت اسمهان لها وقالت:نعم ياحليمة؟وش تبين؟ حليمة:التيليفون يرن يامدام.. راحت اسمهان ترد وطلعت المتصلة عزة!!! وبعد التحية والسلام.. عزة:لايكون تذاكرين؟؟ اسمهان(على نياتها):لا جالسة مع زوجي نلعب على الكومبيوتر!! عزة:ياحليله..شكل زوجك من جد مصدق إنك بزرة!!هههههه قال نلعب قال!! اسمهان:واش علاقة بزرة بالموضوع؟حلو ان الواحد يرفه عن نفسه بالألعاب.. عزة:وهو الترفيه يكون بشوية ألعاب على الكومبيوتر؟..اطلعوا تمشوا...اخرجوا!! اسمهان:لا من هذي الناحية زوجي مو مقصر..وماأتوقع فيه أحد يخرج مثلنا..حتى بوسط الأسبوع أيام الدراسة صرت أطلع معاه لو ماكان عنده شفت مسائي! عزة:ووين تروحون؟ اسمهان:البحر..مولات..مطاعم... فنادق.. زيارات..مناسبات..يعني مانخلي على قلبنا شي! عزة:ياحظك!ليتني مثلك!لكن زوجي رابطني بالبزورة!وخرجاتي صايرة قليلة! اسمهان:يمكن لو كان عندي أطفال ماكنت أفكر أطلع كثير من البيت..الجلسة معاهم تونِس! عزة:انتي لين الحين ماحملتي؟؟ اسمهان:لا.. عزة:غريبة!!مع انه صار لك 9شهور متزوجة صح؟؟ اسمهان:تقريباً.. عزة:وزوجك مااستغرب؟؟ اسمهان:بالعكس مو مهتم إلا بدراستي..يقول بعد التخرج نفكر بالموضوع.. عزة:يعني تاخذين موانع؟ اسمهان:ولا قد أخذت شي..ومرة رحت المستشفى مع زوجة أخوي لأنها حامل وفحصتني الدكتورة وقالت كل شي طبيعي.. عزة:وزوجك عمره حلَّل؟؟ اسمهان:لا ماقد حلَّل.. عزة:ولا بيحلل ياشاطرة..لأنه يخاف يطلع فيه بلا وماتتحملينه!لكن انتي انتظري لك كم شهر ولو ماحصل حمل خليه يحلل غصب عليه!أكيد البلا منه! اسمهان:فاولي خير..ان شاء الله مايكون فيني وفيه إلا العافية.. عزة:طيب جربي تقولين له يروح يكشف على نفسه وشوفي اش بيكون رده؟؟ وبعد مااستمرت المكالمة وانتهت. قالت عزة لنفسها:قطيعة!شلون مستانسة بحياتها بالطول والعرض!وأنا مسجونة في ذا القفص..مع زوج كل يوم يقول لي تراني صابر عليك عشان لاينحرمون عيالك منك!!!! ========= أما اسمهان راحت لزوجها وفاجئته بسؤال:عبدالرحمن؟ليش ماتكشف على نفسك عند دكتور؟ عبدالرحمن:بسم الله علي.. شايفتني مريض؟؟ اسمهان:يمكن!إنت مو ملاحظ اني إلى الان ماحملت؟؟ عبدالرحمن:ردينا على نفس الموضوع؟انتي ماتملين؟ يابنت الحلال فكري حالياً بدراستك وبعدها يصير خير!وبعدين مين كنتي تكلمين؟؟ اسمهان:صديقتي!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
راحت اسمهان السوق يوم الأربعاء تشتري خامات التوزيعات اللي بتسويها لرانية.. وبعد ماانتهت راحت للمستشفى تزور بنت عمها اللي مسوية عملية الزايدة وقابلت بعض أقارب أبوها اللي لهم مدة ماشافوها.. زوجة عمها:هاه؟بشري!إن شاء الله في الكرشة شي؟؟ اسمهان:لا مافي.. زوجة عمها: غريببببة!!مها وابتهال تزوجوا بعدك والحين كلهم حوامل! اسمهان:لأنه مقدَّر لهم يحملون..و ماحد ياخِذ أكثر من نصيبه. وحاولت اسمهان تغير الموضوع وجابت لهم طاري الشغالة اللي سرقت ذهبها والشغالة الثانية اللي سرقت جوال ولاب توب زوجة صاحب زوجها... بنت عمها:الحمدلله إن ذهبك رجع لك..والحرمة اللي انسرق جوالها وكومبيوترها زين اللي عدَّت على كذا غيرها انسرقوا عياله!! وحدة من زوجات أعمام اسمهان:أما هذول الشغالات صرنا نسمع عنهم قصص تشيب الراس..تصدقون إن بعضهم يسرقون الأطفال من يوم هم صغار ويضمونهم لعصابات ويعلمونهم الشحاتة والسرقة!!ومو بس كذا ياخذون الطفل ويشوهونه يا يفقعون عينه يايقطعون ايده أو رجله عشان يشحت ويستدر عطف الناس ويعطونه فلوس!! الزوار:أعوذ بالله.. وحدة من الزوار:غير انهم يحبون الانتقام ويرتكبون جرايم القتل البشعة... وحدة ثانية من بنات عم اسمهان:هذا غير السحر اللي يسوونه الله يكفينا شرهم ..تصدقون صاحبتي لها سنين تعاني من السحر والسِبَة شغالتها..سحرتها بعد مارجعت لبلدها..حقودات حيل أعوذ بالله منهم.. وحدة من الزوار:وأما عن الدعارة والتحرش بالأطفال فحدِّث ولاحرج!! بنت عم اسمهان:لا والمشكلة الوحدة فيهم تجي من بلدها بسجادتها وشرشف صلاتها ينقال وش ذا الالتزام!وتشوفين أفعالها بعدين وتتعجبين! زوجة عم اسمهان:أتوقع والله أعلم إنهم يؤدون الصلاة كعادة مو عبادة!! وحدة من الزوار:إلا عشان هم قاعدين بغربة يستحلون الحرام ولايهمهم!!! بنت عمة اسمهان:أنا الصراحة أشوف إنه المفروض ماحد يستقدمهم إلا اللي محتاج لهم ضروري وعنده ظروف خاصة!لأنه الدارج هاليومين للأسف إنه بعض الناس يجيبونها كمظهر اجتماعي وكماليات! وحدة من الزوار:واللي شغل بيتها كثير ومافيها نشاط تشتغل اش تسوي؟؟؟؟ بنت عمة اسمهان:تسوي مثل ماقال الرسول(صلى الله عليه وسلم)لبنته فاطمة..قبل ماتأوي الوحدة لفراشها تسبح الله ثلاث وثلاثين مرة وتحمد الله ثلاث وثلاثين مرة وتكبر ثلاث وثلاثين مرة خير لها من خادم..وكثير من اللي جربوها قالوا نصحى اليوم الثاني وإحنا نحس بنشاط!!!!!!!! وحدة من الزوار:بس الظليمة شينة..أنا أمي عندها شغالة لها 9سنوات تشتغل وقمة في الإخلاص..وشغالتي لها أربع سنين عندي كل ماجت بتسافر قعدت تبكي علينا كأننا أهلها!!! وحدة من أقارب اسمهان:الخير والشر بكل مكان و فيه منهم الصالح والطالح.. واستمرت السواليف إلى ان انتهت الزيارة.. ثاني يوم راحت اسمهان لنجلاء وبدأوا في تغليف الأشرطة والمطويات اللي أخذتها اسمهان من أفنان في المدرسة.. وكان بـ كل توزيعة كاسيت و3 مطويات..وحدة عن منكرات الأفراح+وحدة عن حق الزوج والزوجة+وحدة فيها 50 حديث تخص النساء.. غلفوا نجلاء واسمهان التوزيعات بقماش سدو وعلقوا مع كل توزيعة مسبحة وميدالية فيها(مبخرة ودلةو جرة) ومن برة علقوا كرت على شكل مهفة(مروحة خصف) ومكتوب عليها.. هديتي إليكم.. رانيـــــــــــــــة وبالأخير حطوا كل التوزيعات في سلة خصف لبسوها قماش سدو وعلى طرف السلة عروسة سووا لها لبس شعبي ولبسوها شيلة على راسها.. ============= يوم الجمعة راحت اسمهان لأهلها على الغداء كالعادة.. وكانت سماح ثقلانة في حركتها! اسمهان:ماشاء الله صرتي بأي شهر الحين؟؟ سماح:دخلت التاسع!!والله يعين على ملكة ناصر باقي عليها أسبوعين ومدري كيف بأحضر بهالشكل!! أم اسمهان:الله يعينك..أمس كلمتني ابتسام وحتى هي تعبانة وعلى نهاية السابع..وأم زوجها عندها وبناتها بالمدرسة وشغل البيت هالكها..قاعدة تعد الأيام عد عشان تبدأ الاجازة وتجينا! أسماء:يلا هانت..كلها أسبوعين وتبدأ الاجازة.. اسمهان:استعديتوا لملكة ناصر ياسماح؟؟ سماح:ايه كل يوم وهو يتشرط على أمي!!بس ماعلي منه قلت لأمي خذي هند معاك ماني بخلق أسواق..وماقصروا شروا العربية والشبكة وجميع مستلزماتها.. أقبلت الاجازة وبدأت استعدادات رانية للملكة وفي بالها خيالات وأفكار عن عريس الهنا!! وبيوم الملكة كانت التجهيزات واضحة من مدخل القاعة ..خيمة منصوبة وبداخلها أشياء تراثية..وريحة البخور فايحة وحرمة لابسة ثوب بدوي وبرقع وقاعدة تسوي قهوة على منجل الفحم(المشب) وكل زائرة تدخل تناولها هالحرمة فنجال قهوة! وكانوا قريبات رانية كثيرين جداً وواقفين بانتظار الترحيب بالزوار بالغطاريف..وجدَّاتها جالسين وكل عجايز العيلة.. وصلت اسمهان وأم زوجها وجوهرة وأحلام للقاعة وبعدهم نجلاء ومرام دخلوا القاعة بوقت واحد.. طالعت نجلاء بالخيمة المنصوبة بمدخل القاعة وقالت:وش هذا؟ مضَارب بني عبس؟؟؟ مرام:أقول لو شفتي رانية وهي بالصالون عندنا تقولين بدوية صدق؟؟متحنية ,وناقشة اليدين والرجلين والمكياج البدوي(الغجري) اللي الكحل مركز حول العين وراسمين لها بـدقنها رسومات تقولين مترقمة!! نجلاء:حلو التغيير!! ودخلوا القاعة وكانت الكوشة بديكورات تراثية... والحلو بالموضوع إنه كل طاقم الضيافة كان لابس لبس موحد خليجي... والطاولات كان فوق كل طاولة صحن كبير فوقه نخلة معلَّق فيها تمر سكري وحول النخلة 3 أبيار كل بير(بئر) بداخله شي مختلف واحد فيه _شوكولا-الثاني بيتيفور-الثالث معمول!!!! وديكور القاعة وتزيين المسيرة كان كله من التراث.. حضروا أهل اسمهان وأهل تركي..تركتهم اسمهان وراحت مع صاحباتها يسلمون على رانية في غرفتها.. كانوا مجموعة من بنات أعمام وأخوال رانية عندها بالغرفة... سلموا الشلة على صاحبتهم..وتفاجئوا بمنظرها!! نقش الحنةوكانت رانية..لابسة ثوب تراثي..وهامة على راسها واكسسوارات شعبية بأحجار ملونة.. اسمهان:الله الله ياحركات..شكلك تراثي من جِد! بنت عم رانية:رانية دايماً كذا!خالِف تُعْرَف!!! بنت خال رانية:أكثر ناس مبسوطين بهاالأجواء العجنجز اللي برة!!قاعدين يتذكرون الماضي! رانية:يلا..خلهم يرضون عني مرة بالعمر!وهم كل مناسبة ناشبين في حلقي خصام وهواش ومعَايرْ!! وكانت رانية..لابسة ثوب تراثي..وهامة على راسها واكسسوارات شعبية بأحجار ملونة.. نجلاء(تهمس بإذن رانية):ترانا مشاركينك بالزفة!!لا تخرعين لاطلعنا قبلك على الممر! رانية:هههه كنت متوقعة..بس بالله لاتفشلوني وتسوون شي ماله علاقة بـ زفتي!! أفنان:ياترى اش شعورك الحين؟ رانية:لاتسألوني..تصدقون يابنات قلبي يخبط يرقع!! مرام:وياترى اش هي توقعاتك عن العريس؟؟ رانية:أتخيله مثقف و جاد و رزة!! الله يعينه على صرقعتي!! عاد اسمهان تضحك بداخلها وتقول:آه لو درت عن نويصر اش بتقول!!!!! وخرج الجميع من الغرفة وهم يباركون لرانية ويتمنون لها ليلة سعيدة وموفقة.. وقعدت رانية تتصور..وطلبت من أمها تكلم أبوها والعريس يجون يتصورون معاها.. اتصلت أمها بأبوها وجاء وجاب ناصر معاه...اللي جاء كاشخ ببشت!! دخل الأب وناصر الغرفة على رانية الي كانت مثل القمر ومن الخجل حاطة عيونها بالأرض! ناصر:وين عروستي ياجماعة؟؟ أبو رانية(ويأشر على بنته):هذي عروستك! ناصر:لا ياشيخ!جايبين لي عجوز من الجنادرية وتقولون عروستك؟!! كتمت رانية غيظها وسكتت! أما أمها وأبوها ظلوا يضحكون! وقفوا تصوروا بصمت وخرجوا الأم والأب والمصورةمن الغرفة.. التفت ناصر لرانية وقال:مبروك ياعروس! رانية:الله يبارك فيك. ناصر:مبروك عليك ناصر أحلى شاب بالديرة..!! رانية:ههههههه..حلوة ثقتك بنفسك!! قام ناصر يتأمل بوجه رانية بصمت ومن الخجل رانية ذابت!! وشوي قام يرَقِص حواجبه!وبعدين يهز خشمه ورانية مستغربة وقام يحرك فمه يمين وشمال! اخترعت رانية وقالت:اشفيك؟مهبول؟؟؟ ناصر:ههههههه..لا بس بغيت أختبرك وأشوف هل انتي بكامل قواك العقلية؟؟ رانية:لا تطمن..إلى هذي اللحظة أنا بخير! ناصر:عندي سؤال يبي يسدح نفسه غصب؟!! رانية:تفضل.. ناصر:وش قصدك بهاللبس اللي لابسته؟انقرضت الملابس من الديرة؟ولا بتقودين مظاهرة شعبية لحقوق الجدَّات؟! رانية(بغيظ):لا وإنت الصادق ناوية أذكرك بأمك الله يرحمها!! ناصر:لا لاتذكريني الله يرحمها! رانية:إلا أمك الله يرحمها وش كان اسمها؟ ناصر:قل أعوذ برب الفلق!!وانتي ليش تسألين عن اسم أمي؟خُبري ماحد يسأل عن اسم الأم إلا الدجالين والسحرة قبل لايستعينون بالجن!!! رانية(بنفسها):أنا أشهد إن هالرجال موب صاحي! دق باب الغرفة عليهم ودخلوا أخوان رانية مشاري ومشعل.. مشاري:ماحد ناداني أتصور وأسلم عليك ياعروس..قلت أجي بنفسي.. رانية:لما ألبس الفستان الثاني تصور معاي مرة وحدة..هالحين المصورة خرجت شوي مشاري:هي باقي فيها فستان ثاني وثالث؟؟ايش؟ناوية تستعرضين دولاب ملابسك قدام الحضور؟؟وش عليك بنت بطرة وفشخرة على خرطي!!إلا وشلون العروس معك ياناصر؟؟ ناصر:إختك هذي عجيــــــــــــبة!ماشاء الله الله يحفظها!! مشاري:تراني جيت أعلمك بكلمة السر حقتها!لاشفتها معصلجة معاك شوي..فما عليك إلا تشيل الطار(الدف) وتطق عليه ياهي بتقوم تطامر قدامك تقول ساكنها قبيلة جنانوَه!!!! ناصر(بصوت عالي):يانااااااس هاتوا لي طار! رانية:أقول ؟تراني من أول الليل وأنا أتهزأ!قم ضف وجهك واطلع إنت وأخوك..يلا! خرجوا مشاري ومشعل..وجلست رانية على كرسي وقام ناصر يناظر فيها وهي رافعة حاجبها وكأنه موب عاجبها!! ناصر:حسبي الله عليهم! رانية:مين هم؟؟ ناصر:الناس اللي اضحكوا علي! رانية:شلون ضحكوا عليك؟؟ ناصر:قالوا لي البنت لما تجلس مع خطيبها بأول مرة عيونها توصل الأرض من الحيا!بس الحقيقة انتي لسانك هو اللي واصل للأرض!!! رانية:استغفر الله.. إلا أم رانية دخلت وقالت:عفواً ياعريس..الحين صار وقت الزفة الأولى..تقدر ترجع براحتك الحين لقاعة الرجال..وإحنا بنزف رانية عند الحريم.. واستأذن ناصر وراح للرِجال.. أما رانية طلعت من باب يودي لمدخل القاعة..ووقفت ووقفوا وراها فرقة للطق الشعبي وهم لابسين ملابس شعبية...وبنتين من بنات خالها ومعاهم مرشات الورد وبنتين من بنات عمها ومعاهم مباخر.. وبدأت الفرقة بالغطاريف ثم بعالي الصوت:ألف الصلاة والسلام عليك ياحبيب الله محمد!!للللللوش ورانية تمشي ببطء إلى ان وصلت لدرجة المسيرة الطويلة وطلعت وكانوا صاحباتها(اسمهان-مرام-نجلاء-أفنان)واقفين ينتظرونها ولابسين الجلابيات الشيفون المطرزة فوق فساتينهم وعلى روسسهم قلايد ذهبية شعبية.. ولما بدأ الطق قاموا يرقصون قدامها ويمشون وهي تمشي وراهم..وبنص المسيرة وقفوا وقاموا يرقصون رقص اماراتي بشعورهم..ثم بالعصي ويطقون رقابهم.. قامت رانية تهمس لهم من تحت أضراسها:يانذلات عبروني!! انتبهت لها اسمهان وقالت:اش تبين؟؟ رانية:فيني رقصة..ودي أرقص خذوني معاكم!! مسكتها نجلاء من يد واسمهان من يد ورقصت معاهم على خفيف... ولما بدأوا يقتربون من الكوشة بدأ الطق يسير سريع وراحوا الشلة قبل رانية ووقفوا حول الكرسي اللي بتجلس عليه.. وجلست أخيراً على الكرسي... قربت منها اسمهان وسألتها:هاه؟بشري؟اش رايك بالعريس؟؟ رانية:بالله هذا تسمينه عريس؟؟هذا يلبسونه طربوش ويوظفونه بالسيرك أبرك!!! اسمهان:ههههههههه..ليش؟ رانية:ماخذ الدنيا سبهللة..زيادة عن اللزوم!بس دواه عندي! اسمهان:إيه..وأنا أشهد.. رانية:حتى اسم أمه ماقال لي عليه..من زود خفة الدم! اسمهان:اسمها (شَمَّه)! رانية:طيب ياولد شمَّه!الزواج موعدنا! جلسوا الطقاقات وقاموا يطقون..وصاروا البنات يرقصون الشلة على بنات أقارب رانية وقامت رانية معاهم!!!! وطلعت جدتها (أم أبوها)تركض على المنصة وراحت قرصتها في ركبتها وقالت:انثبري يابنت..يازين الركادة!! انحرجت رانية وقالت للي حولها:يقولون اخواننا المصريين(اللي تقرص العروسة في ركبتها تحصلها في جمعتها)يظهر إن جدتي ودها تتزوج!!! البنات:ههههههههههههههههه الجدة:أقول قليعة تقلعك ياأم لسانين الله يرحم جدك ماأرضى به بديل!بس إني خايفة أهل عريسك يشوفون خبالك ويهونُون منك!!! ونزلت اسمهان ومعاها غرشات وتولات عوده تطيب بها الحاضرات..وأفنان تدور بينهم بالتوزيعات الدعوية ومرت اسمهان بطاولة عليها 4حريم وطيَّبتهم بالعودة فقالت وحدة منهم لاسمهان:طاب طيبِك..وعاش حبيبك! اسمهان:من فمك لباب السماء يارب! وتركتهم ومشت.. قامت الحرمة تقول للنسوان اللي معاها:أما بنات هالوقت جريئات وقليلات حيا!الوحدة منهم تسمع سيرة حبيب أو خطيب تلاقونها بتطير من الشفاحة!!! سمعتها اسمهان ورجعت للطاولة وضربت بيدها طرف الطاولة وقالت:للمعلومية..تراني متزوجة!!! انحرجت الحرمة وقالت:يووه السموحة منك على بالي بعدك بنية!ماشاء الله شكلك صغيرة!!! وراحت اسمهان واللي على الطاولة يضحكون.... وهي ماشية لاحظت انه فيه حرمة تناظرها من أول الملكة بنظرات نافذة ودقيقة..صارت اسمهان كل ماتمر من جنبها تقرأ على نفسها المعوذات!!! مرت دقايق ورجعت رانية لغرفتها استعداداً للزفة الثانية..... ولبست هذا الفستان...وكانت تسريحتها من البداية تسريحة بسيطة..لما لبست الفستان أضافت اكسسوار أحمر على شعرها..مناسب للفستان وكانت الزفة الثانية على شريط بدايته فيه قصيدة ومؤثرات صوتية بشرية...وبعدين أغنية على الدفوف فقط.. والمسكة ورد أحمرطبيعي ومعاه كريستالات..وكانت رانية ماشية لوحدها.. لما وصلت للمنصة..طلعوا سماح وأهلها وزوجات أخوان ناصر وبناتهم يسلمون عليها..والعربية كانت على المنصة..تصورت رانية جنبها! باركوا لها الجميع... ورقصوا لها وبعد مرور وقت وهي على المنصة أعلنت أمها حلول وقت العشاء...أما رانية رجعت لخطيبها بالغرفة اللي قام لبسها الشبكة! ويوم شافها قال:ايه ياشيخة هذا شكل عروس.. مو الثوب اللي لابسته قبل كأنك جاية من متحف التراث!! قالت رانية(بداخلها):صدق ان الثيران..مايعجبهم إلا اللون الأحمر!!! وكانوا سماح وهند واقفين بنفس الغرفة ومتغطيات وبنات أخوان ناصر واقفين مع عمهم ويساعدونه في تلبيس العروسة للشبكة ويطقون له على الدفوف.وأم تركي معاهم وفرحانة لفرحة ناصر.. أم تركي:مبروك ياولدي الله يهنيكم ويوفقكم دايم قولوا آمين.. رانية وناصر:آمين.. ناصر:عقبال تركي ان شاء الله... ومرت الليلة بفرحة..وفي صالة العشا كانت الحرمة اللي مضايقة اسمهان بنظراتها كل شوي تقترب منها وهي قاعدة تغرف أكل من البوفيه!حاولت اسمهان تبتعد عنها وتقعد مع أم عبدالرحمن وجوهرةعلى نفس الطاولة!لكن الحرمة فاجئتها بأنها لحقتها والتفتت لأم عبدالرحمن وقالت:هالمزيونة بنتك؟؟ أم عبدالرحمن:لا..بس تقدرين تقولين حسبة بنتي! الحرمة:ترى أنا ماأحب اللف والدوران عندي ولد وقاعدة أدور له عروس..ومالقيت أحسن من بنتكم..اش رايكم؟؟ أم عبدالرحمن وهي تضحك:شاوري العروس..وإن وافقت عليك بالعافية!!! الحرمة:اش رايك ياعروس؟؟ اسمهان:مدري..بأشاور زوجي وأرد لك!! أحلام وجوهرة وأم عبدالرحمن:هههههههه الحرمة:ايـــــــــــــــــــــ ـــــــش؟انتي متزوجة؟؟قولي والله! أم عبدالرحمن:ايه لها عشرة شهور متزوجة..وترى هي زوجة ولدي.. الحرمة:ههههه آسفة حسبتها خالية..مادريت انها مشغولة..عن إذنكم.. أحلام:هههه مين قدك ياسمهونة؟جاك عريس! وبعد العشا قاموا بنات العائلة يباشرون على الحضور بالتفاسير وكانت عبارة عن صناديق تراثية صغيرة وبداخلها(لبان ومستكة وهيل وقرنفل وحلاوة نعناع) -------------- في نهاية الملكة..لما ركبت اسمهان السيارة... عبدالرحمن:كيف كانت الملكة؟؟ اسمهان:تهبببببل! عبدالرحمن:وش آخر الأخبار؟؟ اسمهان:أبد ...جاني عريس! عبدالرحمن:بأسوي نفسي ماسمعت شي!!!!!!!! ثاني يوم من ملكة رانية اتصلت عزة على اسمهان!!!! بعد التحية والسلام.. عزة:إلا متى ملكة صاحبتك اللي كنتي مشغولة فيها؟؟ اسمهان:كانت أمس.. عزة:أفا عليك يالظالمة!وليش ماعلمتيني؟؟ اسمهان:وليش أعلمك؟؟ عزة:عشان أحضر!!خاطري أشوف صاحباتك اللي تحبين تتكلمين عنهم !هم مثل الوصف أو لا!!! اسمهان:لو إنها ملكة أحد من أقاربي كان عزمتك..لكن تدرين هي ملكة صديقتي يعني مالي علاقة.. عزة:يالطيف يارب!يعني أنا بأزيد الزحمة في القصر؟!! اسمهان:معليش..ان شاء الله تجين بزواجها... عزة:وش رايك تزوريني بكرة؟؟ اسمهان:ياليت أقدر..بس تدرين الاجازة كلها كم يوم بس. يالله تكفيني أقضيها مع أهلي وزوجي. عزة:وزوجك هذا ماشبعتي فيه لسه؟؟ اسمهان:اش أسوي ظلمته معاي أيام المدرسة..طول الوقت حاطة حيلي بالدراسة وأنام بدري..هالحين فرصة أعوضه شوي.. عزة:وبكرة يمل منك..ولايسأل فيك احسبي له كم شهر بس!! اسمهان:الله لايقدِّر!! عزة:وشغالتك ليش ماتخلين كل الشغل عليها..وانتي اقعدي مع زوجك! اسمهان:شغالتي هجت ياعزة..بغتني أزيد راتبها وماعطيتها وجه..وشردت وسرقت ذهبي! عزة:كل ذهبك؟؟ اسمهان:ايه بس الحمدلله لقيناه..آثاريها رمته وهربت من الخرعة.. عزة:ماعليك منها..جيبي غيرها! حست اسمهان انه عزة تتجاوز حدودها أحياناً.. فقالت اسمهان:إنتي أولى بالشغالة مني!عندك 3 أطفال ماشاء الله.. إلا عبدالرحمن دخل البيت.. اسمهان:يلا..ما أطول عليك زوجي جاء...مع السلامة.. عزة:مع السلامة.. وقفلت عزة السماعة وقالت لنفسها:والله ونبت لك ريش يااسمهان وصرتي تردين! في بيت أهل تركي كان تركي قاعد مع أخواته هند وسماح وأمهم تركي:تصدقون؟؟أهل خطيبتي يوم إنهم متواضعين ومايبون يكلفون علي بشي كبروا بعيني! هند:أعظم النساء بركة أيسرهن مؤونة.. سماح:جزاهم الله خير..هذا زواج مو بيعة عشان يسوون اللي سوته أم عبير!!! أم تركي:بالله لاتجيبين طاريهم.. ينقبض قلبي لاتذكرت سالفة السِحر.. تركي:ماعلينا..بس من جد أحس إن أهل أفنان يستاهلون مِين يكرمهم ويقدرهم على تواضعهم..عشان كذا ناوي أخلي ليلة زواجنا أحسن ليلة.. سماح:إلا اش أخبار ناصر بعد ليلة أمس؟؟ تركي:ناصر بيستخف!وِده يطير من الفرحة.. هند:يلا الحمدلله..ان شاء الله يعقل بعد الزواج من الخفة اللي فيه!! تركي:لا لا نويصر مابيعقل!بو طبيع مايجوز عن طبعه!! ------------------------ مرت الاجازة واسمهان كل يوم تزور أهلها..وتجتمع مع أسماء وابتسام..وبيوم اجتمعت معاهم سماح وكان شكلها تعبان ومرهق وتحس بالآم.. أم اسمهان:اشفيك ياسماح؟شكلك مرة تعبانة..لايكون ولادة؟؟ سماح:لا باقي على ولادتي أسبوع... أم اسمهان:بس شكلك مايطمن! سماح:لأني أسهر كل يوم.. وتعشوا كلهم مع بعض وهم ساريين.. مسكت أم اسمهان ولدها محمد وقالت:اسمع ترى زوجتك شكلها مايطمن نصيحة وديها المستشفى قبل ماتروح البيت.. محمد:يايمه سرى الليل..بأوديها بكرة.. أم اسمهان:اسمع مني منت خسران..خل عيالك وشغالتكم عندي وروحوا المستشفى وطمنونا.. وبالفعل راحوا سماح ومحمد للمستشفى.. وبعد ف***ا لاحظوا انه نبض الجنين ضعيف..وسماح تحتاج لولادة عاجلة..أعطوها طلق صناعي ومافي فايدة الجنين مرتفع ونبضه يضعف فاضطروا انهم يقررون لها ولادة قيصرية!!! اتصل محمد وخبَّر أمه.. أم اسمهان:قلت لك شكلها موب عاجبني!آثاريها تعبانة المسكينة توكل على الله وسوي لها العملية لايسير بالجنين شي..وعيالك لاتشيل همهم بأحطهم بعيوني..هذا هم نايمين.. محمد:ادعي لها يمه.. أم اسمهان:يارب احفظها ويسر ولادتها واحفظ ذريتها.. محمد:أتصل بأمها؟؟ أم اسمهان:لاياولدي..بتقلقها بهالليل..لاخرجت من غرفة العمليات يصير خير.. وبعد وقت من الانتظار ولدت سماح بنوتة حلوة..سماها محمد(اسمهان)...... |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
بعد ماولدت سماح اتصل محمد وبشَّر أمه وكان وقت متأخر من الليل وبقي مدة قصيرة على صلاة الفجر... أم اسمهان:مبررررروك الله يبشرك بالخير..وكيف صحة سماح والنونو الصغيرة؟؟؟ محمد:كلهم بخير... أم اسمهان:خلك مع زوجتك الحين ورافق معاها وبإذن الله من الظهر بأجيكم... محمد:وأهلها كيف أبلغهم؟ أم اسمهان:وقت صلاة الفجر أكيد بيقومون للصلاة..اتصل بتركي بشره وأكيد هو بيقول لأمه...بس لاتقلقهم ياولدي وتقول الولادة قيصرية..خلهم يعرفون بعدين.. ونفَّذ محمد كلام أمه واتصل بتركي وخبره بولادة سماح.. ونقل الخبر لأمه اللي من قبل صلاة الظهر وهي في المستشفى عند بنتها.. أما اسمهان لما وصلها الخبر طارت من الفرحة..وقالت لزوجها.. عبدالرحمن:مادام سموا بنتهم على اسمك فلابد نشتري لهم هدية محرزة.. اسمهان:أنا في خاطري أهدي المولودة بروش ذهب بإسمها(اسمهان)ويكون مفصص بعد! وفي العصر راحت اسمهان سوق الذهب اللي وعدوها يفصلون لها البروش وينتهي بعد يومين.. فقالت لعبدالرحمن:مو مشكلة أعطيها الهديةبعد ماتطلع من المستشفى..الحين بأشري لها سبت شوكولاتة كبير.. ولما وصلت المستشفى لقيت أهلها كلهم موجودين وأم سماح وأختها هند وبعض أقارب سماح.. وكانت سماح تحكي لهم عن ولادتها وكل وحدة من الزائرات تحكي تجاربها في الولادة.. أم تركي:أقول يازين ولادتنا أيام زمان..لاخياطة ولاتعب..والوحدة من ثاني يوم تقوم ببيتها!!! أم اسمهان:لا حرام عليك..هذا لأنك ماجربتي ولادة المستشفيات ياأم تركي..أما أنا ولدت عيالي كلهم بالمستشفى..راحة وخدمة واهتمام وإن كانت المستشفيات زمان مو مثل الحين!!وبالذات لاكانت حكومي تلاقين أنواع الاهمال من الممرضات!!لكن أفضل من البيت بكل الأحوال.. وحدة من أقارب سماح:المثل يقول(هِين قرشك ولاتهين نفسك) ماعليه الواحد يخسر مبالغ في المستشفيات الخاصة بس على الأقل يلقى رعاية واهتمام من أحسن مايكون.. سماح:فعلاً..حتى التورتة يقدمونها هدية لك بعد الولادة..وممرضة خاصة بالمساج والتدليك تمر على الغرف عشان تخدم المرضى!! هند:ذكرتوني بولادتي الأخيرة بولدي مرت علي وحدة وقالت: أنا كوافيرة تبغي أي خدمة؟؟ قلت لها:بالله أنا فاضية أتكوفر وأسشور وأتمكر وأنا طايحة بالفراش؟؟ردت علي:واشفيها يامدام كوني جميلة في كل حالاتك!!قلت لها:ودك يصْفقُوني الناس بعين؟؟ الزوار:ههههههههه أسماء:فعلاً أنا استغربت مرة من وحدة من سلايفي رحت أزورها بولادتها وكانت ولادتها قيصرية وتعبانة وعانت فيها..بس تفاجئت يوم رحت لها بالمستشفى إنه شعرها مقصوص وملفلف ومضبط والماكياج كامل تقولون رايحة مناسبة؟؟والأظافر مبرودة وممكرة!وفوق هذا كله غصب تتكلم من التعب!طيب وش اللي حادها على الزبرقة؟مدري! سماح:صح غريبة..يعني الزوار مابيجونك إلا وهم متوقعين إنك تعبانة وحالتك ماتسمح لك..مافي مانع انه الوحدة تكون نظيفة وترتب شعرها وتسشوره بس عاد مو لدرجة مكياج كامل ولف شعر!! وحدة من أقارب سماح:هذي هينة..أنا اللي استغربه هالمبالغات والسرف اللي قاعدين نشوفه هاليومين!بدل ماالوحدة تشكر ربها على انه وهبها الصحة والعافية ورزقها طفل وتبادر بالصدقة.......نلقاها تدفع مبالغ خيالية في تزيين غرفتها بالمستشفى وفي الضيافة اللي تقدمها للزوار..تصدقون بعضهم يوصون على شوكولاتات من بلاد الخارج عشان يقدمونها للضيوف لا وتغليفها مكلف جداً!!!! اسمهان:ذكرتوني بوحدة من زوجات أصحاب زوجي رحت أزورها قبل مدة بالمستشفى لقيت الباب مزين والغرفة كلها مدادات وسجادات غالية واللحاف وسرير المولود وعلبة المناديل والدرام طقم!والبالونات مالية الغرفة وجنب الحرمة شجرة كبيرة معلَّق فيها علب مغلفة مثل تغليفات علب الملكة وبداخلها تحفة وحلويات..وبيتيفورات مالحة وحالية مغلفة بنفس ألوان الغرفة..هذا غير الزينات اللي معلقة ونازلة من السقف..وباقات الورد..كلها يومين والوحدة بتطلع اش له هالمخاسير؟الله يبارك لها بس من كلامها فهمت إنها كلفتها مبلغ كبير أم اسمهان:سبحان الله..ناس موب قادرة توفر لقمة يومها..وناس كل همهم التفاخر والفشخرة على غيرهم ومحيرتهم الفلوس اللي عندهم وين يودونها! هند:أعرف حريم أزواجهم على قد الحال ورواتبهم ضعيفة..بس لا حبَّت الوحدة منهم تتفشخر تفشخرت!بالديون أو بتفليس زوجها!أهم شي تطلع قدام الناس بمظهر ثاني!!! واستمرت السوالف إلى وقت صلاة المغرب وبدأوا زوار سماح يروحون وبقي أهلها وأهل زوجها.. دق جوال اسمهان وكانت المتصلة عزة! اسمهان:ياهلا. عزة:انتي وينك؟لي ساعة أتصل على تيلفون البيت وماتردين! اسمهان:أنا مو في البيت.. عزة:أجل..وينك فيه؟ اسمهان:بالمستشفى.. عزة:سلامات.. اسمهان:الله يسلمك..مافيني شي بس زوجة أخوي ولدت. عزة:مبروك..وش جابت؟ اسمهان:بنت.. عزة:وش سمتها؟ اسمهان:سمَّتها اسمهان.. عزة:اشمعنى؟؟ اسمهان:عاجبها الاسم.. عزة:غريبة زوجة أخوك عاجبها اسمك؟ مع انه قديم!!! اسمهان:الناس أذواق!وبعدين هي مافكرت في حلات الاسم كثر مافكرت بمعزتي عندها! عزة:لو بالمعزة كان سمَّت على أمِك أولى! اسمهان:اسم أمي قديم! عزة:ليش وش اسمها؟ اسمهان:نبيلة.. عزة:تصدقين اسم نبيلة أحلى من اسم اسمهان؟؟ صارت أسماء تطالع باسمهان بغيظ وصاحت:بـــــــــــــــــــس!! سمعت عزة الصوت وقالت:ماني مطولة عليك بس عطيني اسم المستشفى ورقم الغرفة..خاطري أزور زوجة أخوك وأبارك.. أعطتها اسمهان المعلومات وقفلت الخط... أسماء:أففففففف وش هاذي المحقق كونان؟؟؟؟؟ اسمهان:وش دراك إنها قاعدة تحقق؟؟ ابتسام:ياحليلك كلنا درينا!!! مانشوفك إلا تجاوبين وباين على المتصلة إنها مجتهدة بطرح الأسئلة! أسماء:البلا إن اسمهان معطيتها وجه!! أم اسمهان:أكيد هذي عزة!صح؟ اسمهان:ايه هي..بس وش دراك يمه؟ أم اسمهان:لأن هذي ثالث مرة أشوفها تتصل وتسألك مية سؤال!مرتين كنتي فيها عندنا وهذي المرة الثالثة.. اسمهان:عاد مسكينة تتونس على سواليفي..زوجها مايخليها تروح مكان وبينهم مشاكل.. سماح:هو زوجها صاحب عبدالرحمن؟؟ اسمهان:إيه.. سماح:وزوجك اش يقول عنه؟؟ اسمهان:زوجي يمدح فيه وموصله للسماء..بس زوجته تسب فيه ليل ونهار ومنزلته للقاع!! أم اسمهان:ووحدة مثل هذي..ينرجي من وراها خير؟؟ يابنتي بنات الأصول ماياكلون لحم أزواجهم عند الناس..المفروض الوحدة لاشافت من زوجها خير ذكرته وإن شافت عيب سترته.. أسماء:والله العالم عن أسرار البيوت..يمكن زوجها مامنعها من الناس إلا عشان يتقي شرها!! اسمهان:تصدقون؟مرات يلعب الشيطان براسي من ناحيتها!أحس إنها حسودة أو غيورة..ماني قادرة أحدد..ومرات ألتمس لها العذر..وحيدة ومخنوقة..وعبدالرحمن يقول زوجها صابر عليها عشان خايف عياله يتشتتون!! سماح:والله إنك غريبة ياسمهونة!يعني ماصار لها مدة قصيرة من يوم تعرفت عليك..وقامت تعلمك بأسرارها وتسحب أسرارك وانتي باقي تشاورين نفسك..وتتأملين من وراها خير!!نصيحتي لاتوثقين علاقتك فيها.. هند:هذي طباعها مشابهة لصاحبتك السابقة سحر..صح ياسماح؟ سماح:تكفين لاتذكريني ماصدقت أنسى!!أنا ببداية زواجي تعرفت على جارة لي وتصاحبنا مثل الأخوات وكان اسمها سحر..لكن اكتشفت مع الوقت إنها تنقل أسراري للغير وتحاول تقلب الجيران علي!تبيني أكون صاحبتها وحدها بس!واستغلتني كل يوم تطلبني أصناف حالية ومالحة وأنا على نياتي أتفنن وأرسل لها وآثاريها تقدمها لأهل زوجها على أساس إنها هي مسويتها!!وكل مكان أو مطعم أحكي لها إني رحت له..ألقاها من ثاني يوم راحت له..وكل ماشريت شي ألقاها تسابق وتروح تشري مثله!الصراحة انغثيت من غيرتها وكانت تشككني في الناس اللي حولي وتتضايق لما تشوفني مبسوطة مع محمد وتحاول تشيشني عليه..صراحة كل ذكرياتي معاها شينة..لما زادت حركاتها حطيت لها حد..وظلينا كل وحدة بحالها لين مانقلت من شقتها اللي قدامي وافتكيت منها!! اسمهان:حرام عليكم..عزة مو شينة لهاالدرجة..تخيلوا تبي تجي عشان تبارك لك ياسماح؟؟ سماح:الله يعطيها العافية..يمكن لاشفناها نقدر نحكم! أسماء:أقول هي اسمهان هذا طبعها!دايماً مندفعة في علاقاتها..والا شلة الصاعقة هذيك يتسمون شلة بالله عليكم ؟؟من زينهم؟مدري اش عاجبها فيهم؟؟ هند:عاد مانسمح لك تسبينهم ياأسومة!!رانية خطيبة ولد عمي..وأفنان خطيبة أخونا تركي! الجميع:ههههههههههه ================== في منزل عزة... كان يوسف جالس على الأرض ويلعب مع أولاده بألعابهم ويضحك معاهم..وعزة جالسة على الكنبة. عزة:يوسف أبيك توديني المستشفى بعد شوي.. يوسف:ليش؟خير؟؟ عزة:زوجة عبدالرحمن..مرة أخوها ولدت وأبي أروح أبارك لها! يوسف:لاااا؟من متى هالنخوة؟ إذا أختي علياء لها شهرين ونص من يوم ماولدت ولدها ورفضتي ترفعين عليها سماعة حتى!!ذحين بيجي فيك خير وتباركين للغُرب؟؟ عزة:بالله فكني من سيرة أهلك..لازم يعني أقدم لهم يمين الولاء والطاعة؟؟! يوسف:أهلي المفروض تحبين رووسهم لأنهم زوجوك واحد صابر عليك وساكت وليتك فوق هذا كله تحمدين ربك وتشكرينه إلا تتمننين علي بقعدتك عندي..اللهم لااعتراض.. عزة:الحين ليش تطلع من الموضوع؟ يوسف:خلينا في ساعة رحمان..أساساً من متى لك علاقة بزوجة عبدالرحمن وانتي ماقابلتيها إلا مرتين؟عشان يكون لك علاقة بزوجة أخوها؟ عزة:تصاحبت معاها اش المشكلة؟وانت شايف بعينك..ماعاد لي صديقة ولارفيقة! يوسف:إنتي اللي جبتيه لنفسك فرقتي بين كل الناس بلسانك وتدخلاتك..حتى زوجات أخواني ماسلموا من شَرِّك..والحين ناوية على زوجة عبدالرحمن؟؟اقعدي ببيتك أستر لك!! عزة:يعني ملزِّم؟؟ يوسف:ايه..باركي لهم بالتلفون وبس! عزة:دايماً نذل وتحب نفسك!!!! ================== أما رانية فكل يوم يتصل فيها ناصر ويطيح فيها نكت وتعليقات..مرات تضحك ومرات تزعل لأنه أحياناً يمصخها!!!!! في إحدى المكالمات: رانية:وش أحلى خبر سمعته بحياتك؟؟ ناصر:إنه في قرار يناقش السماح للمرأة بقيادة السيارة!!!!!!!! رانية:وليش هالخبر حلو بالنسبة لك مع إنك مو مستفيد منه شي؟ ناصر:عشان تزيد نسبة الحوادث ونفتك من عدد النسوان بمجتمعنا صار عددهم 3 أضعافنا!! رانية:الله لايعطي عدوك عافية!هذا كلام تقوله؟؟ ناصر:وش أسوي؟ من بعد مافتحوا لهم مجالات للعمل صاروا ينافسونا بالوظايف..تلاقين الشاب اللي وده يفتح بيت مو لاقي وظيفة لأن الحريم سبقوه عليها!! رانية:يالطيف يارب!حسودي اللهُ أكبر عليك!! ناصر:ههههههههه ترى إذا بتصدقين كل كلمة أقولها بينشحن صدرك علي!! رانية:احترت في طبعك الصراحة مزحك كذب وجدِك كذب..الله يشفيك.. ناصر:ولايبتليك!!! ============== اتصلت عزة على اسمهان وقالت:اسمهان لاتنتظريني اليوم انشغلت فجأة!!بس بكرة أقابلك بالمستشفى! اسمهان:الله يحييك...... = |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
أصرَّت أم سماح تبات معاها في المستشفى...وهند رجعت بيتها وبقي أهل اسمهان بالغرفة.. وجاء محمد ومعاه بنوتته الصغيرة جايبها من الحضانة والممرضة تدف السرير.. محمد:سمهونة الصغيرة جات تسلم عليكم!! قامت اسمهان تجري عليها بشوق وشالتها وضمتها وعيونها غرقانة دموع!! أسماء:أفا ياسمهونة!عَزَّ الله طاح سوق بنتي لينة!!! الجميع:ههههه محمد:لو فيك خير كان سميتي بنتك اسمهان بدل لينة!! اسمهان:ياعمري عليها تجنن..الله يحفظها لكم ويبارك فيها.. محمد:مين تشبه؟؟ أم اسمهان:البنت بسبعة وجوه ياولدي!باقي يتغير شكلها ويختلف هالحين مو باين الشبه.. محمد:عندي احساس كبير إنها بتطلع قمر مثل أبوها!! أم سماح:ليش يالمزيون؟بنتي سماح شينة يعني؟؟ ابتسام:إلا سموحة عسل مصفى بس ماعليك من حمود وسوالفه.. اسمهان:يمه..ماتشبهني وأنا صغيرة؟؟ أم اسمهان:ههههه وانتي على بالك يوم إن اسمها مثل اسمك بتطلع شبهك؟؟ أم سماح:لو تطلع أخلاقها بأخلاقك يااسمهان فهذي نعمة.. اسمهان:تسلمين خالتي.. أسماء:حرام عليك يااسمهان شفطتي البنت هاتيها نسلم عليها. وظلت سمهونة النونو تنتقل من يد ليد وكل من يشيلها يدعي لها بالبركة..إلى أن وصلت أخيراً لـ يد أم سماح... شالتها أم سماح وقالت:من إيد لإيد تكبر وتزيد!خذي بنيتك رضعيها ياسماح... أم اسمهان:عاد إحنا بنستأذن.. مرة طولنا عليك ياسماح.. سماح:بالعكس مرة ونستوني بزيارتكم وسوالفكم.. أم اسمهان:بكرة بإذن الله نشوفك إلا دق جوال اسمهان وكان عبدالرحمن هو المتصل وقال لها:ترى أنا برة اطلعي لي.. محمد:أنا بأوصلكم يايمه لاتتصلين بأبوي.. أم اسمهان:بس ياولدي ودي أبوك يجي ياخذنا عشان يشوف بنتك أكيد بيطير فيها.. محمد:خبرك عتيق!ومين قال لك ماشافها؟كنت أنا وياه بالحضانة في العصر وتفرج عليها لين ماشبع منها.. وخرج الجميع من الغرفة وتقابلت العائلة برة مع عبدالرحمن! محمد:ياهلا بالنسيب! عبدالرحمن:مبروك مبروك ماجاك..الله ينبتها نبات حسن ويبارك لكم فيها.. ووقفوا محمد وعبدالرحمن وأم اسمهان يسولفون شوي.. وقامت أسماء تناظر وقالت لابتسام(بهمس):ياحليله هالدحوم..أثاري شكله صغير مو على عمره!!! ابتسام:أقول غضي بصرك..لاتجيك اسمهان وتزنطك!!! أسماء:ياحبيبتي لو تطلعون وتنزلون مثل أحمد زوجي ماتلاقون ابتسام:ههههه وش ذا؟أغنية جديدة ألفتيها فيه؟غريبة مو العادة تمدحينه.. أسماء:حبيبتي أنا أمدحه في قفاه بس!أما في وجهه لا!تبينه يغتر؟؟ واستأذن عبدالرحمن هو واسمهان وراحوا لسيارتهم.. عبدالرحمن:كيف النونو الصغيرة؟شفتيها؟ اسمهان:إيه تهبل بسم الله عليها. عبدالرحمن:وزوجة أخوك ان شاء الله بخير؟؟ اسمهان:لا الحمدلله زينة..بس بما إنها مسوية عملية قيصرية بتظل بالمستشفى 4أيام.. عبدالرحمن:إلا نسيت أسألك!تدرين انه ملكة أخوي عبدالرحيم على صاحبتك بعد 3أسابيع؟؟؟ اسمهان:ايه أدري من زمان قايلة لي مرام.. عبدالرحمن:مرت الأيام بسرعة..وبعد بكرة المدارس جاية..اش رايك بكرة تروحين مع أمي وأحلام للسوق وتشترون أغراض الملكة؟أفضل لك قبل ماتنشغلين بالمدرسة..وغير كذا انتي أدرى بذوق صاحبتك.. اسمهان:ماعندي مانع بس أخاف أمك تشوفها لقافة مني! عبدالرحمن:لا لقافة ولاشي..هي اللي وصتني أقول لك..وترى بتجيكم بكرة المستشفى تبارك لزوجة أخوك... اسمهان:على خير.. ============= ثاني يوم اتصلت رانية في الظهر على اسمهان تبارك بولادة سماح رانية:مبروك ماجاء لأخوك ياسوسو اسمهان:الله يبارك فيك..بس انتي اش دراك؟؟ رانية:عاد مايبي لها سؤال ياشاطرة!نسيتي إن سماح بنت عم خطيبي؟وناصر هو اللي علمني؟ اسمهان:ههههه صح نسيت.. رانية:صحيح سموها اسمهان؟؟ اسمهان:صحيح.. رانية:تصدقين؟دايماً أقول بنفسي لو جاني بنت بأسميها اسمهان بس ترى مو من زين اسمك!بس لأني أحبك يابنية!!! اسمهان:وأنا بعد أموت فيك وبـ رجتك بس مايطرى علي أسمي بنتي رانية!!أخاف تطلع مشفوحة مثلك!!!هههههههه رانية:تسلم لي رومانسيتك وشاعريتك!!!!! اسمهان:ههههههه بعض ماعندكم ياعسل!! رانية:تراني كالعادة أول ماعرفت الخبر اشتغلت وكالة أنباء وعلمت الشلة أكيد بيتصلون يباركون..وكنت أتمنى أروح المستشفى أبارك لها بنفسي بس عاد عادات مجتمعنا عجيبة!رفضت أمي وقالت:اثقلي يامال الخفة!تروحين للمستشفى تنطين على أهل خطيبك ليش؟؟باركي بالتليفون وبس!! اسمهان:مجملة ومشكورة ياقلبي مايحتاج تتعبين نفسك.. واستمروا بسوالفهم ولما انتهت المكالمة صكت اسمهان السماعة ودق التليفون ويوم ردت طلعت المتصلة مرام.. وبعد التحايا والسلام والمباركة لاسمهان بولادة زوجة أخوها.. اسمهان:لو مااتصلتي فيني يامرام كنت أنا بأتصل فيك..إلا علميني وش لون فستان ملكتك؟؟ مرام:وليش السؤال؟؟ اسمهان(باستغراب):عشان نعرف بأي لون نزين ونشرع لك الصندوق وأغراض الملكة.. مرام:أوووه فهمتك غلط!على بالي لقافة بس! لون الفستان تقريباً موف.. اسمهان:طيب أي طلبات ودك فيها علميني لأني بأنزل السوق مع خالتي وأحلام ونختار الأغراض ومانبي نجيب شي مايعجبك..عاد مين قدك؟؟نشاورك ونطلب رضاك! مرام:العطورات اللي أبيها(؟؟؟؟؟!!!!)(قائمة طويلة!!!!) والذهب اللي تجيبونه ياليت يكون كله ذهب أبيض ماأطيق الأصفر أحسه شعبي!وتنسيق العربية أبيه يكون ناعم مو مدندش مثل عربية رانية!!!والساعات تكون من ماركات معروفة!واش بعد يامرام؟؟؟ آه افتكرت..كل التحف والأشياء اللي راح تضيفونها ياليت يكون لونها فضي!تدرين الفضي مع الموف يطلع شي!!وبعد لو تحطون مثل الدرع ومكتوب عليه اسمي واسم العريس ويكون فخم ومزين بالورد.. اسمهان:ماتبين شاي وطماط وبصل بعد؟؟ الله يقطع إبليسك كل هذي شروط؟؟!!! مرام:و ليه ماأتشرط؟ أنا مرام مو شوية!! اسمهان:أكيد ياسمو الأميرة بنجيب اللي تبينه بس عساه يثمر فيك وتستاهلينه!!ههههههه مرام:أشوف الغيرة بدت؟! اسمهان:حرام عليك..أنا زوجة الكبير يعني العقل والتدبير!وانتي زوجة الصغير اللي تحسد وبس تغير!! مرام:هههههههه بايــــــــــــــــخة!وأهم شي ياسوسو لاأشوف أحد من الشلة يجي يوم ملكتي ويتضبط بمشغلنا..ودي أقول لهم بس ماأتجرأ أخاف يزعلون!قولي لهم انتي! اسمهان:هههه ياحليلك..وعلى بالك مافي مشغل بالديرة إلا مشغلكم؟!أصلاً أسعاركم ناااار! مرام:بس كوافيراتنا شغلهم واااااو تقدرين تنكرين؟؟؟؟ اسمهان:لا..المهم جوالي يرن ومضطرة أقول لك مع السلامة.. وكان المتصل عبدالرحمن...بعد المقدمات المعهودة.. عبدالرحمن:اسمهان تجهزي بأمر آخذك انتي وأمي ونتغدى بمطعم وبعد صلاة العصر نمر على أحلام تطلع معانا ونروح السوق..وعقب المغرب أوديكم المستشفى تزورون زوجة أخوك.. اسمهان:إبشر,,,بأتجهز طيرااااان!! إلا دق تليفون البيت..وكانت المتصلة نجلاء...وبعد السوالف والقرقرة..انتهت المكالمة واتصلت أفنان...ومن ضمن المكالمة: أفنان:تصدقين ياسوسو؟مرات ضميري يأنبني إني وافقت على خطبتي من تركي!!! اسمهان:ليش؟حرام عليك..تركي ولد حلال ومن معدن طيب..انتي لسه ماتزوجتيه حتى تحكمين!! أفنان:لا مو قصدي إنه تركي فيه شي..أنا أقصد أختي سندس اللي تخبرينها..مو هاين علي أتركها واعتمادها بالكامل علي..أحس إنها أنانية مني!!! اسمهان:وش هالكلام ياأفنان؟بتكونين أحن عليها من بطن جابها؟وبعدين مسئوليتها كانت على أمك من يوم ماولدتها انتي ماتوليتي مسئوليتها إلا يوم كبرتي صح؟؟؟ أفنان:صح.. اسمهان:خلاص..الأنانية إنك تتركين نفسك وتفكرين بغيرك وهو ماعليه خلاف..أكيد أمك ماراح تقصر معاها..وبعدين اش اللي خلى هالموضوع يطرى على بالك الحين وانتي مخطوبة من مدة؟؟ أفنان:لأن أمي وأبوي بدأوا يفكرون هاليومين انه يستقدمون لها ممرضة فليبينية..ولما توصل بعد شهرين أنا أدربها على طريقة الاهتمام بسندس..تدرين..أمي صعب عليها توفق بين الاهتمام بسندس والعمل بمعهد تخريج الداعيات بوقت واحد..أضيفي انها ناشطة بالعمل الدعوي وإقامة المحاضرات وماعندها وقت..وسندس يبي لها تفرغ كامل.. عمى وخرس وشلل وضمور كامل! اسمهان:وين المشكلة؟كل شي وله حل!والممرضة بتكون أفضل منك لأنها مدربة على حالات مثل هذي..لو كل شخص بالدنيا عنده معاق بالبيت واعتزل العالم وتفرغ لخدمته بس !كان مالقينا حولنا أحد ينتج ويعطي..بالعكس أحيي أمك على محاولتها التعايش بشكل طبيعي وهي عندها بنت معاقة..لأنه أختك ولدت بهالمرض معاها يعني لازم انكم تتأقلمون مع الوضع..مو تحسون انه أي قرار جديد بيخرب عليكم الدنيا!!! أفنان:مدري ياسوسو أحس إنك أكثر وحدة أرتاح لكلامها..بس بنفس الوقت حاسة أفكاري مشوشة ومو عارفة كيف أتصرف! اسمهان:إلا أنا اللي أحس نفسي مشوشة!وراي طلعة وباقي ماتزهبت ومو عارفة كيف أتصرف لو جاء زوجي وشافني ماسكة السماعة..مع السلاااااااااااااامة!! وقفلت السماعة..إلا عبدالرحمن داخل!! واسمهان باقي لابسة ملابس البيت!! عبدالرحمن(بسخرية):ابشر..بأتجهز طيران!ياشيخة انتي لو رايحة سباحة كان مداك وصلتي!ليش مالبستي لين الحين؟؟؟ اسمهان:خذتني المكالمات..دقيقة وأجيك! ودخلت تتشطف وتبدل هدومها.. عبدالرحمن(وهو يكلم نفسه):الدقيقة في قاموس اسمهان تساوي ساعة والساعة فيها ستين دقيقة والدقيقة فيها ستين ثانية..يوووه أجل بنتأخر!! اسمهــــــــــــــــــــــــــ ـــــــــــان اخلـــــــــــــــــــــــــــ ـــــصي!!! استعدت اسمهان وراحت للمطعم مع زوجها وأم زوجها..... وبالمطعم كل واحد منهم أخذ المنيو(قائمة الطعام) وبدأ يختار.. عبدالرحمن:اش تبين تتغدين يمه؟ أم عبدالرحمن:صراحةً..أنا أحب الأكلات الشامية والمقبلات مرة..بس مدري عنكم اش بتختارون.. عبدالرحمن:رأيي من رأيك نفسي بتشكيلة مشاوي بعد.. اسمهان:أنا نفسي أطلب أكل صيني!! عبدالرحمن:أفا ياسمونة...تفضلين أكل تشيانغ تشونغ هونغ بونغ على الأكل الشرقي؟؟ اسمهان:الناس أذواق.. أم عبدالرحمن:هم بنات هالوقت كذا!!يكرهون كل شي شرقي إلا الرقص الشرقي!!ههههه اسمهان وعبدالرحمن:هههههه اسمهان:بالعكس ياخالتي..عبدالرحمن رجل شرقي وأحبه بكل مواصفاته حتى شرقيته اللي يلبسها برجليه..ويازين الهواء الشرقي!! عبدالرحمن:صحيح..واسمهان كل أفكارها من الشرق وأنا من الغرب وبالرغم من ذلك نتوافق مع بعض!تطبخ لي أحياناً أصناف لالها جنسية ولاهوية ولاهي من الشرق ولاالغرب وإن أكلتها أشرق!ودوم هي مغربت بي ومشرقت بي!!! أم عبدالرحمن:الله يجعلها شمس مشرقة بحياتك.... وبدأوا يدردشون لين جاء وقت الغداء تغدوا وشبعوا وقاموا..ركبوا السيارة ومروا على أحلام صلوا العصر عندها وأخذوها وراحوا للسوق.. وقالت لهم اسمهان عن رغبات مرام وذوقها.. لقيوا الأشياء اللي ناسبتهم من عربية الملكة وملحقاتها واتفقوا مع المحل يشرعها لهم بألوان مناسبة بحسب لون فستان العروس.. أما الذهب قرروا يأجلونه ليوم ثاني وراحوا اشتروا هدايا لسماح.. وأذن المغرب اتجهوا لمسجد يصلون فيه.. وبعد ماانتهوا من الصلاة وهم جالسين جنب بعض..فجأة كان فيه حرمة واقفة يسار اسمهان وفجأة انصرعت وطاحت على الأرض وانقلبت عيونها وصارت ترفس اللي حولها وتشد على لسانها لين انجرح وخرج من فمها دم وترغي وتزبد!!! انفجعت اسمهان وصارت تصيح من الخرعة مسكتها أم عبدالرحمن وأحلام يهَدُّونها..أما الحرمة المصروعة اجتمعوا عليها الحريم اللي بالمسجد ومسكوها بقوة وصاروا يقرأون عليها...لين ماراحت نوبة الصرع اللي انتابتها وقامت وصارت تناظر بإحراج في اللي حولها... الحريم:سلامات سلامات..لاباس عليك... الحرمة:مافيني إلا العافية بس نسيت آخذ دواي.. لبست شيلتها ومسحت فمها وخرجت... أم عبدالرحمن:الله يشفيها زين ماطاحت برة قدام الرِجال... أحلام:بسم الله توقعتها ممسوسة اسمهان:أنا اللي اخترعت ورجولي موب شايلتني..انصرعت علي..وخبطت فيني... أم عبدالرحمن:يمكنها مثل عمة أبوك منيرة تتذكرينها ياأحلام؟ أحلام:ايه..الله يشفيها.. اسمهان:طيب ليش يصير الصرع؟ أم عبدالرحمن:حسب ماأعرف إنه الكهرباء تزيد بالمخ..والأكسجين ينقطع عن مراكز بالدماغ تخلي الانسان موب متوازن ويتشنج مثل ماشفتي..ومنيرة كانت لاانتظمت على الدواء تكون بأحسن حال بس أول ماتتأخر عن الموعد وتنساه تجيها نوبة الصرع... خرجوا من المسجد ولقيوا عبدالرحمن ينتظرهم... توجهوا للمستشفى..ودخلوا لسماح لقيوا الغرفة مليانة زوار أهل سماح وأهل اسمهان وبعض صاحبات سماح وجاراتها.. سلمت أحلام وأم عبدالرحمن وباركوا وشافوا انه الوضع يجبرهم يمشون لأنه الغرفة زحمة..أما اسمهان جلست... شوي الا انفتح باب الغرفة ودخلت عـــــــــــــــــــــــــــــ ــــــــزة!!!!! سلمت على الجميع..وكان الزوار كل شوي يقل عددهم.. اسمهان:أعرِّفكم ياجماعة..هذي عزة زوجها صاحب عبدالرحمن.. عزة:قولي هذي عزة صاحبتي!! سلمت على الجميع.. عزة:مين هذول يااسمهان عرفيني! قامت اسمهان تعرفها بهم وحدة وحدة.. عزة لــسماح:مبروك..ان شاء الله الجاي ولد!! سماح:عندي ولدين قبلها والحمدلله... عزة:على بالي أول طفلة... أسماء:وانتي كم عندك ماشاء الله؟ عزة:ثلاث ..بنت وولدين...عقبال اسمهان..!!! اسمهان:آمين... وقامت أم اسمهان تسولف وتقول حكايات.. عزة:باين عليك ياأم اسمهان اجتماعية وتحبين الناس ليتك تعطين اسمهان شوي...لو ماأرفع عليها سماعة وأتواصل معاها ماتسأل عني!!!!!!!!! أم اسمهان:اسمهان وراها دراستها يابنتي..حتى إحنا مانقابلها إلا نهاية الأسبوع... عزة:أنا لو علي ماأقعد دقيقة بالبيت..بس حكم القوي على الضعيف!!! أم تركي:الحرمة السنعة مكانها البيت..كثر الدوجة تضر ماتفيد!!! عزة:مو من كثر ماأدوج..أنا لافكرت أطلع أبي أطلع أؤدي واجب بس!مثل جيتي لكم الحين ماجابني زوجي لين ماعل قلبي!قال إيش ماله داعي!! ابتسام:ماكان له داعي تتعبين نفسك وتجين دام زوجك مو راضي عزة:موب على كيفه!!أنا لو أطاوعه بكل شي كان خربت الدنيا!شرهان علي مازرت أخته يوم ولدت ويبي يعاندني ومايجيبني لكم!! تفشلت اسمهان من صراحة عزة ومو عارفة شلون تتصرف!! أم اسمهان:ولش يابنتي مازرتي أخته؟؟؟ عزة:من زين أهله حتى أواصلهم؟ أنا أواصل اللي أحبهم بس!!!!! أم سماح:بس الواجب واجب تحبين أهل زوجك أو ماتحبينهم لزوم تقومين بواجبهم..ولك أجر عزة:أجر يجيني من طرفهم ماأبيه! أسماء:يالطيف يارب..ذابحين لك أحد؟؟؟ عزة:لا ياحبيبتي..بس مافيهم خير وكل شي ينتقدوني فيه..و... قاطعتها اسمهان وتبي تلطف الجو: عزة تفضلي شوكليت ..واشفيك ماتتقهوين؟؟ شربت عزة قهوة..وبدأت بتتكلم قامت اسمهان قاطعتها:تصدقين؟ آثاري عبدالرحمن يوم جاء ياخذني أمس قابل صاحبه سلمان وكان معاه زوجته..سأله عبدالرحمن:عسى ماشر قال ان زوجته حامل بالثامن.. عزة:وعسى في نيتك تزورينها لاولدت ؟؟ اسمهان:إن شاء الله..اش المانع؟ عزة:بعدين أحكي لك..حرمة ماوراها إلا المشاكل ودوخة الراس بعد دقايق خرجت عزة من الغرفة يوم زوجها ناداها.. ابتسام:استغفر الله..هم وانزاح!! أسماء:تعالي يامدام اسمهان..بالله هذي وحدة تتشرفين بالتواصل معها؟؟ اسمهان:يعني اللي يشوفكم يقول انتم ماتحشون وتتكلمون مثلها!!!!! أسماء:لا ماأنكر بس على الأقل نتكلم بيننا وبين بعض..مو عند الغُرب اللي مانعرفهم!!شكل هالحرمة نسرة ماتتعاشر!! سماح:تبين الصراحة ياسمهونة؟أنا مرة ماارتحت لها!! أم تركي:يابنتي الله يكملك بعقلك وش حادك على هالحرمة ماتنحب أبد!! أم اسمهان:صادقين يابنتي...شكلها الله يغفر لها مو عاقلة وتحب المشاكل وماعليك منها لاولدت زوجة صاحب زوجك روحي زوريها.. بدأت الدراسة..وكانوا الشلة مستانسين بلقاء رانية والكل يسألها عن خطيبها! رانية:وش السالفة؟كل أسئلتكم عن أخباري وأخبار العريس؟ايش؟ماحد انخطب غيري؟ نجلاء:تبين الصراحة؟ماأتخيل إنك دلوعة وتسوين حركات رومانسية! مرام:صادقة نجلاء ماأتخيل فيك أنوثة وخجل!! رانية:لا ياشيخة!!خلينا المياصة والتغنج والأنوثة لك يارمرمة يارِمَة! مرام:أنا رِمَة؟؟طيب ياروينة هيا ادفعي ..ادفعي قيمة التسريحة والمكياج وتنظيف البشرة وبرد الأظافر وحمام الزيت اللي سويتيه بمشغلنا أيام الملكة!! أفنان:أحلى يارنو..سويتي صيانة شاملة يوم الملكة!وأنا أقول اشبك تِلِقين مثل النجفة!!! اسمهان:ياشينكم يالبزران!بالله اهجدوا... رانية:حاضر ياطنط سوسو البسي نظارة وانتي تبقي ستيتة!! نجلاء:يازينك ياسمهونة مرات أحسِك أعقل وحدة فينا! رانية:وليش ياحظي؟عشانها متزوجة؟بكرة ألحقها وأوريكم الرزانة والثقل كيف شكله!!!!!!!! اسمهان:رزانة مع هالنويصر؟ ماظنتي!!! الشلة:ههههههههههههه =============== واستمرت اتصالات ناصر برانية يومياً... رانية:ياخي إنت قلق!! ناصر:اسلمي؟ماسمعت!! رانية(وقامت ترقعها):أقصد مسبب لي توتر..أعد الدقايق والثواني وأنا بانتظار اتصالك!!!!!! ناصر:لاتنتظرين..دقي يالبخيلة!!المغزلجيات عندهم كرم أكثر منك لاويتصلون ويطولون مكالماتهم بالساعات!!!!!!!!!!!!!!! رانية:ايــــــــــــــــــــــ ـــش؟انت تغازل ياقليل الحيا؟؟ ناصر:أعوذ بالله!مين قال؟؟هذا تعبير مجازي فقط لتقريب الصورة لذهنك!!! رانية:تكفى يالشاعر المخضرم!طيب عطنا قصيدة وأنا أحلم حلم أسمع منك قصيدة من يوم ماخطبتني... ناصر:زين خذي هذي... إنتي حلوة انتي جميلة وأحلى بنت من التراث وثوبك الشعبي فشيلة بس عليك ينطق حلا! رانية:اش هالفن لاقافية ولاوزن؟ ولامعنى ولامغزى!ياخي أتعبت الشعراء من بعدك!! ناصر:زين عطينا انتي من فنون البديع اللي تتقنينها!!! رانية(تستهبل): إنت خطيبي إنت زوجي إنت كحلي وإنت روجي إنت عطر غالي بشنطتي مالي غنات عنه بخرجتي ناصر:ههههههه وش هالخرابيط؟ انتي بعد قصيدتك ذي تروحين تفتحين بسطة عطور ومكياج في الخازكية!!!!!!!!!!!! رانية:معليش أيها الشاعر العظيم صعب أوصل مستواك!!! مر الأسبوع الدراسي على خير من غير جديد يذكر..وسماح طلعت من المستشفى على بيتها وأمها جلست معاها لرعايتها فترة الأربعين.. وأبلة جوهرة فرحانة بحملها اللي صار واضح للجميع! وقبل ماتبدأ الدراسة كانت ابتسام قد رجعت لبيتها ولكنها فوجئت ببوادر ولادة مبكرة في أول أسبوع دراسي!باقي على موعدها الفعلي للولادة 23يوم تقريباً..... وولدت هناك ولما زوجها خبَّر أهلها سافرت أمها لها....وأخذت معاها الشغالة كاتيا... وبيوم راحت أسماء تزور اسمهان.... اسمهان:ياحليل ابتسام ودي أشوف ولدها.. أسماء:الجوالات ماخلت شي يقدرون يصورونه لنا ويرسلون الصورة وسايط.. اسمهان:طيب متى بيطلع من الحضانة؟ أسماء:مدري..بس المعروف إنه أي طفل ينولد قبل أوانه..يظل فترة في الحضانة لين ماتتحسن أوضاعه... اسمهان:وليش ماتفكر تجينا مع أمي لارجعت؟ أسماء:نسيتي إنه بناتها بالمدرسة؟ اسمهان:ايه صح!على كذا ماراح نشوفها إلا بإجازة الصيف بعد3 شهور!طيب اشفيهم ماسموا الولد لين الحين؟؟؟ أسماء:أنا متأكدة من إنهم بيقعدون يحومون لين مايرضخون لرأي العجوز أم زوجها ويسمونه على الشيبة الله يرحمه! اسمهان:حرام عليك!تهقين ابتسام بتوافق تسمي ولدها معيقل؟ أسماء:مع العجايز كل شي جايز!!! ========================= وفي منزل ابتسام كانت أمها وأم زوجها قاعدين معاها... أم اسمهان:وش نويتوا تسمون ولدكم ياابتسام؟ أم زوج ابتسام:مايحتاج تسألينها بيسمونه معيقل ان شاء الله!!!!! أم اسمهان:بس ياأم عبدالعزيز ماتلاحظين ان الاسم قديم ومو دارج هالأيام ويعتبر غريب؟..والمفروض إن الأب والأم يجتهدون في تسمية ولدهم بإسم أحسن؟ أم زوج ابتسام:إحنا هذا طبعنا كل رجال لازم يسمي ولده على أبوه.. ابتسام:خالتي بأجيبها لك من الآخر!انتي ماحملتيه ولاولدتيه ولابتتعبين في تربيته!إذن أنا الوحيدة اللي من حقي أسميه!! أم زوج ابتسام:والله يابنت نبيلة صار لك لسان واستقويتي بـ أمك!الولد بنسميه معيقل يعني بنسميه معيقل..وغير كذا ماعندي!! أم اسمهان:اذكروا الله ياجماعة.. ودخل زوج ابتسام على الهوشة.... أم زوج ابتسام:تعال اسمع زوجتك واش تقول؟تقول مو من حقي أسمي الولد وأنا جدته!!! ابتسام:الله أكبر!أنا قلت لك هالكلام؟؟أنا قلت ماحد تعب وبيتعب فيه غيري لذلك أنا الوحيدة اللي المفروض أسميه.. زوج ابتسام :ماشاء الله عليك..فسَّر الماء بعد الجهدِ بالماء!!!!! أم زوج ابتسام:ولدك بتسميه معيقل غصب عن اللي يرضى واللي مايرضى!! زوج ابتسام:ولايهمك يمه..مايصير خاطرك إلا طيب.. ابتسام(بدهشة):نـــــــــــــــ ـعم؟؟؟ومين قال لك أنا راضية؟؟ أم اسمهان:خلاص استهدوا بالله ومايصير إلا كل خير.. ابتلت عيون ابتسام بالدموع وهي على فراشها.. وقامت العجوز لدورة المياه..وأم اسمهان جاها اتصال وقامت تكلم بالغرفة الثانية.... ابتسام:صدقني إني ماراح أنادي ولدي طول حياتي بإسم معيقل حتى لو كان مسجل على الورق... زوج ابتسام بهمس:يابنت الحلال أنا ماسميته معيقل ولاشي..بس شكلياً قدام أمي نقول لها كذا عشان ماتزعل! كم بقى لها بالعمر مسكينة؟ خل نرضيها!لكن أنا سميت الولد وسويت أوراقه خلاص!! ابتسام:من غير ماتشاورني؟؟؟؟؟؟ زوج ابتسام:الصراحة أنا طاح بيدي قبل مدة دفتر مذكراتك أيام الجامعة ولاحظت إنك توقعين بإسم(أم صهيب) فقلت بنفسي أكيد هالاسم داخل مزاجك..وسميت ولدنا صُهيب!! ابتسام:روح عسى الله يوفقك ولايحرمني منك!! ======================= مرت الأيام وبعد 3 أسابيع رجعت أم اسمهان لبيتها.... أما في المدرسة دار الحوار التالي... نجلاء:مبروك يامرام مقدماً مابقى على ملكتك إلا أسبوع بس.. أفنان:ياالله ماأسرع الأيام كيف تجري! رانية:الـــــــــلــــــــــه. .الوناسة مقبلة والأفراح بالطريق... اسمهان:ياترى واش اخترتي زَفَتِك؟علمينا عشان نعرف شلون نتساعد معاك ونشاركك. مرام:معليش ياجماعة!أكثر من حضوركم ماأبغى!يكفي التصفير والتصفيق منكم لاطلعت على المنصة!! رانية:ايش؟ايش؟تصفير وتصفيق؟تبينا نحضر عشان نصفق ونصفر؟شايفتنا كفار قريش؟؟ مرام:وش هالكلام؟وكفار قريش؟تستهبلين؟؟ أفنان:صدق..كفار قريش كانت عبادتهم في الجاهلية الطواف حول الكعبة والتصفيق والتصفير!!ماقد قرأتي في القرآن كلمة مكاء وتصدية؟؟؟؟؟؟؟ اسمهان:غريب طبعك يامرام!العادة الوحدة تبغى صديقاتها بيوم فرحتها يكونون حولها ويشاركونها..أنا شخصياً أروع ذكرى أتذكرها من ملكتي هي وجودكم حولي والأجواء الحلوة اللي سويتوها.. مرام:سوري..لاتفهموني غلط! ماودي بخبص الحركات أبي ملكتي تكون راقية..!!! رانية:ياشيخة حق من رقك مثل الرقاق وسوى بك خبيصة!! يعني قصدك إحنا بنخبص لك ملكتك؟ والا كنتي شايفة ملكاتنا مخبوصة؟؟باقي نشوف ملكتك الراقية شلون بتطلع!!عسى الكهرب ينطفي عليك وانتي داخلة بالزفة!!!!! الشلة:هههههههههه مرام:تدعين علي يالنذلة؟؟طبعاً يحق لك..انتي أكثر وحدة مجنونة أعراس..وودك جنانك كله تطلعينه لاحضرتي ملكتي..لكن حريمتك!! نجلاء:ياجماعة اشفيكم قلبتوا السالفة هوشة؟المسألة ومافيها إن مرام تبي تحتفظ ببريستيجها يوم الملكة!!مالي داعي نخربط عليها رانية:هي الخسرانة..أنا عن نفسي بأقعد لابدة بالكرسي وماني قايمة من مكاني!! اسمهان:خذيني جنبك..أنا زوجة الأخ الأكبر لخطيب مرام..وبأسوي فيها رزة وانثبر بعد.. أفنان:وأنا مالي في الرقص كثير بس أجامل بعض المرات.. نجلاء:وأنا بـ أنصاع لأوامر صديقتنا مرام.. مرام:شكراً..وهذا عشمي فيكم..عن إذنكم وراحت تتكلم مع بنات واقفين بعيد نادوها كانوا يستفسرون عن أسعار مشغل أختها.. رانية: بنات ..يوم ملكتها نبي نسوي دجة معتبرة وماعليكم منها!!مين منكم موافقة؟؟؟ اسمهان ونجلاء وأفنان:موافقين كلنا!!! بدأ الأسبوع التالي اللي بنهايته بتكون ملكة مرام....بس لاحظوا الشلة انه مرام غابت عن المدرسة يوم السبت وغابت يوم الأحد!! و بالفسحة.....يوم الأحد.. أفنان:انتم مو ملاحظين انه مرام غايبة لها يومين؟؟غريبة مو عادتها؟ نجلاء:أحد منكم اتصل فيها أمس؟؟؟ رانية واسمهان:لا... اسمهان:عسى المانع خير ان شاء الله.. نجلاء:فديت روحها..أخاف تعبانة؟هذا مو وقت تمرض فيه ملكتها هذا الخميس!!!!!! رانية:أقول دلع بنات!!!أكيد مافيها شي! اسمهان:الغايب عذره معاه..على طول قلتي دلع بنات؟اش دراك؟؟ رانية:مراموه أعرفها زين ياحبها للتمايع والتغنج!موبعيدة شعرة من راسها طاحت فتكدر خاطرها!!أو طرف ظفر اصبع يدها الصغير انكسر فزعلت عليه وغابت!! نجلاء:يقطع أبوالغيرة يارنون! رانية:وجع!ماني غيرانة..وخلني أشوف وحدة منكم تتصل عليها اليوم!يمين مايتصل بها أحد غيري! ============================== == وبعد ماانتهى دوام المدرسة..رجعوا الجميع لبيوتهم....إلا جوال رانية يرن! والمتصل ناصر!! رانية(باشمئزاز!):هلا..خير؟؟؟ ناصر:طبعاً خير..وأنا مايجي من وراي إلا الخير! رانية:هات ماعندك! ناصر:وشفيك تتكلمين من تحت أضراسك؟؟ رانية:توي راجعة من المدرسة ولابدلت هدومي ولاتشطفت ولاصليت الظهر وإنت متصل تعطلني!إلا تعال إنت ماعندك دوام؟؟؟؟؟؟؟؟؟ ناصر:إلا عندي وقاعد أسولف معاك من مكتبي وماحد حولي!! رانية:ياسلاااااااااام يعني أقدر أسبك براحتي؟؟ ناصر:لاتسبيني حِبيني!! رانية:شوف بالعربي الفصيح..إنني مشغولةٌ جداً ياابن شماء هلا ضففت وجهك عني إنني زهقانةٌ مرة ومبطوطةٌ كبدي!!!!!!!!! ناصر:ماعاش من يبط كبدك ياابنة موضي!ثكلتك أمك حبيت أسمع صوتك الرنان فاتصلت عليكِ هل ارتكبت جرم بحقك؟؟؟ رانية:عزيزي المتصل!اتصل في وقتٍ لاحق! ناصر:لحظة لحظة لاتقفلين!عندي لك خبر بمليون ريال! رانية:عجِل وقول.. ناصر:بينقلونا شرورة!!!!! رانية:هاااه؟؟من اللي بينقل معاك؟؟ ناصر:انتي طبعاً.. رانية:تخَسِي إلا إنتْ!!زين إنك علمتني قبل الزواج!عشان أتمسك ببيت أبوي! ناصر:وشفيها شرورة؟فيها الماء والخضرة وماينقصني إلا الوجه الحسن! قفلت رانية الخط!!!!! وبعد ماانتهت من أمورها نزلت للصالة تتغدى مع أهلها..وبعد الغداء فكرت تتصل بـ مرام..وبعدين تروح تنام.. اتصلت على بيت مرام و ردت أم مرام عليها.. رانية:السلام عليكم..شلونك خالتي؟؟ أم مرام:وعليكم السلام ورحمة الله..بخير..بس مين انتي؟؟ رانية:أنا رانية صاحبة مرام.. أم مرام:هلا هلا...وش أخبارك؟ رانية:تمام ونحمد الله..سلامتها مرام ليش غايبة؟تعبانة؟؟ أم مرام:لا..مافيها إلا العافية..الحين أناديها لك..مرمر ..مرمر حبيبتي تيليفون عشانك..صاحبتك على الخط.. مرام:ماااااااااااما قولي لها تنتظر لحظة! وبعد شوي..جت مرام ومسكت السماعة:آلو؟ رانية:هلا..ببنت ماما دلوعة البابا!وشفيك غايبة لك يومين؟وأمك تقول مافيك إلا العافية؟؟؟؟؟؟؟؟ مرام:يختي وشفيك علي؟نسيتي إني عروس؟؟؟ رانية:خخخخ ضحكتيني وأنا ماأبغى أضحك!تراك بتملكين بس مابتتزوجين وتروحين مع العريس!وش علاقة عروس بالغياب؟؟؟ مرام:عروس يعني لازم أتجهز..الخميس اللي راح سويت تنظيف بشرة..تبيني على طول أركض على المدرسة.عشان الشمس تعدم بشرتي؟ رانية:أقول ياشين الغُنْج على الحمير العُرْج! مرام:نعم؟؟؟؟ رانية:آسفة خانتني الكلمات!يعني بنشوفك بكرة؟؟ مرام:لا ياقلبي بتشوفوني يوم الخميس ان شاء الله بالقاعة.....!!ومثل ماوصيتكم خزعبلات وحركات بلدي ماأبغى في ملكتي!يازين الهدوء والكلاسيكية لما تكون بالمناسبات!! رانية:وش فهمك انتي؟؟إلا يازين الطنطنة والدندنة بالمناسبات!عموماً حبيت أتطمن عليك لايكون حاشك شي وتوقعاتي ماابتعدت كثير عن الواقع....... مرام:ليش اش هي توقعاتك؟؟ رانية:أنا قلت أكيد شعرك ولا ظفرك وآثاريك مابعدتي طلعت السالفة ببشرتك!! راحت رانية للمدرسة ثاني يوم واجتمعت بالشلة... نجلاء:هاه؟اش أخبار مرام؟ترانا نفذنا كلامك ومااتصلنا فيها بناءً على طلبك. رانية:مافيها شي..خايفة على بشرتها من الشمس ياحظي!!وتقول إنها عروس ولازم تستعد!ورسالتها لكم ماتبي خزعبلات وحركات!!بس على مين يامرام؟؟أوريكم فيها يوم الملكة!! أفنان:عاد إنتي من غير ماتسوين شي يارانية أي مناسبة تروحينها تقلبينها فوق تحت!فمابالكم يوم توعدتي مرام الله يستر بس!هههههههه اسمهان:الله يهديكم بس..اشفيكم هالسنة تركتوا المقالب والمشاكل في بنات الناس وقمتوا تتمشكلون مع بعض؟؟؟؟والوحدة منكم يالطيف من يوم تجي بالصباح ونفسها بـ راس خشمها!اللي عندها طاقة زايدة تروح تكنس الساحة أحسن لها!!!!!!! رانية:أكنس الساحة يااسمهانوه؟؟طبعاً كأنك واقفة بـ صف الست مرام؟مو بتسيرون سلايف؟بتبدأ حركات الأحزاب! اسمهان:أي أحزاب وأي خرابيط؟كلكم على العين والراس..وبعدين من يوم ماتعرفنا على مرام قبل سنين وإحنا داريين إنها مغرورة شوي ودلوعة..اش اللي اختلف يعني؟؟ رانية:اللي اختلف إني أكثر وحدة صار لي مواقف معاها..بس مو كل شي أحكي لكم عنه!! نجلاء:هذا لأنه لسانك طول الوقت بره عطيه فرصة وحدة بالعمر يرتاح شوي!!ماأقول غير الله يعين نويصر عليك!! اسمهان:ايه صحيح يارنو وش أخبار هالنويصر معاك؟؟؟ رانية:وااااي وااااي عليه فديته طايح فيني رومانسية وغزل بشكل ماحصل!! أفنان:الله يهني سعيد بسعيدة!! نجلاء:هههههههه نفسي أصدقك..بس مو قادرة!! رانية:بالله خذي أفنان وضفوا وجوهكم عني أبي أتكلم مع اسمهان شوي.. وراحوا نجلاء وأفنان... وقعدوا رانية واسمهان في طرف الساحة... اسمهان:خير يارنو؟تبين تتكلمين معاي بخصوص أي موضوع؟؟ رانية:بخصوص نصور هذا اللي فاقع لي مرارتي!! اسمهان:أمرك عجيب والله..مو هذا النصور اللي قبل شوي تقولين عنه طايح فيك تغزل ورومانسية؟؟ رانية:ياسوسو لاتدققين! من كلامي خذي و خَلِي!!وبعدين هذي حركات قدام البنات!! اسمهان:فضفضي وانفضي غبارك!أقصد أخبارك.. رانية:يختي هالآدمي كل يومه ينكت ويمزح.. اسمهان:ياعمري ينكت ولا ينكد عليك!شي أهون من شي.. رانية:بس ماينعرف صدقه من كِذبه!! اسمهان:إنت ذكية وتقدرين تميزين! رانية:وقال ايش؟بينقلني معاه شرورة!ديرةٍ صمعاء نائية!! اسمهان:الله يعينك..بس مِن حب يتحمل!!! رانية:أي حب وأي قرنبع؟أنا معاه بكل شي لكن يخرجني من جدة وسط أهلي وناسي..مستحيل!!! اسمهان:يعني اش تبين بالضبط؟؟ رانية:أنا يوم جاء يخطبني كان شرط أبوي عليه إنه نسكن بجدة ومانطلع منها وهالحين أشوفه يبينا نسكن بأخس مكان..بالله جدة موب أحسن من شرورة بمليون مرة؟!!!فياليت تكلمين عبدالرحمن يقنعه يتنازل عن النقل..تدرين أصحاب ويمونون على بعض! اسمهان:ياسلام؟وانتي ليش ماتقولين هالكلام لناصر مباشرة؟ رانية:مالي نفس أتصل فيه ولاأكلمه..دايماً يستهبل علي ويسوي فيني مقالب!! اسمهان:زين خلي أبوك يكلمه! رانية:إلا أبوي!! لو يدري إن السالفة فيها نقل.. ممكن يفركش هالخطوبة!! اسمهان:وإن كان ناصر ملزِّم على النقل..واش بتسوين؟؟؟ رانية:بأسوي مثل أبطال المسلسلات وأخلع الدبلة وأرميها بوجهه وأقول:مش عايزة أشوف وِشك خالص!إنتَ طالق! اسمهان:صحيح إن أهل العقول في راحة!!!!!!!!! وكلمت اسمهان زوجها بموضوع ناصر.. عبدالرحمن:أفا يالعلم!غريبة مابلغني؟عاد هو مايخِش عني سالفة؟ اسمهان:عاد رانية مسكينة تقول لو أصر على النقل ممكن تفسخ خطوبتها! عبدالرحمن:مدري أحس الموضوع مو بداخل مزاجي!هنا بيته تمليك ووظيفته ممتازة والعمل متمسكين فيه والشركة اللي يشتغل فيها لها فروع بالرياض والشرقية..يعني لو بغى ينقل فالشرقية راح تكون الحل المثالي لأن اخوانه وأقاربه هناك...فاإيش اللي بيرميه على شرورة؟؟؟ واتصل عبدالرحمن وسأله عن صحة الخبر!! عبدالرحمن:ياحبيبي وش هالأخبار اللي سمعناها عنك؟؟ ناصر:ياساتر استر!وش سمعت؟؟ عبدالرحمن:إنك بتنقل شرورة! ناصر:هههههه أي شرورة؟أنا ممكن أفكر أنقل كينيا ..الصومال.. بس شرورة ماقد خطرت على بالي!! عبدالرحمن:عاد هذا العِلم اللي وصلنا! ناصر:حِسادي كثير..بس لايهمك!! وبعد شوية دردشة قفل عبدالرحمن السماعة وقال لاسمهان:مثل ماتوقعت..صديقتك هذي ماعندها سالفة لابينقلون ولاشي...يمكن ناصر يمزح عليها وهي صدَّاقة حبتين! اسمهان:أشوى!!ماني متخيلة إنه بيجي يوم وأفارقها.... ================== أقبل يوم الخميس وجاء اليوم المنشود ومرام في قمة توترها!! وبدأ الناس يتوافدون على القاعة..وكانت هذي الليلة بحريــــــــة! يعني كل الديكورات مستوحاة من قاع البحر.. مدخل القاعة كان فيه طاولة عليها شموع بأشكال أصداف وقواقع..ومحارة كبيرة تنفتح وبداخلها دفتر يسجلون فيه الزوار مباركتهم وأحواض زجاجية مليانة حبات لؤلؤ وأصداف حقيقة.. كاسات شفافة معباة برمال ملونة وبراويز صغيرة فيها صور لمرام وهي صغيرة وتلعب عند شاطيء البحر... وفوق الطاولة نازل من السقف شبكة عليها قواقع وأسماك...كان الديكور حلو بمعنى الكلمة.. على طاولات الزوار بداخل القاعة كانت المزهريات اللي تزين الطاولات على شكل صدفة فضية وبداخلها ورد.. وترمس شاي وترمس قهوة والشي الغريب انهم حاطين بعد ترمس للموية الحارة وصحون زجاجية فيها سكر وأكياس كوفي وأكياس شاي أخضر!!!!وبالنسبة لسبتات الضيافة كان فيها تمر+شوكولاتة بشكل أصداف وقواقع+سينابون+بيتيفورات ومعجنات.. الكوشة:https://im14.gulfup.com/2012-08-10/1344547543821.jpg وبعد وقت من بداية المناسبة أقبلت اسمهان مع أم عبدالرحمن وبنتها أحلام والخالة جوهرة وأقارب لهم وزوجات أعمام وعمات عبدالرحمن وبناتهم وكان عددهم تقريباً كلهم22... واستقبلوهم بالغطاريف والبخور أهل مرام وأقاربها.... وبدأوا أفراد الشلة يكتملون... وآخر وحدة حضرت منهم رانية..بالفستان الأحمر اللي لبسته يوم ملكتها! https://im20.gulfup.com/2012-08-10/1344547613811.jpg وبعد ماسلمت على أفنان واسمهان ونجلاء اللي كانوا قاعدين على طاولة وحدة... رانية:واشفيكم تناظروني كذا؟؟ مستغربين ليش اني لابسة فستان ملكتي؟؟ببساطة لأني اليوم أبغى تحضيرة!!!!!!!! الشلة:ايييييييييييييييش؟؟ رانية:واشفيكم اخترعتوا؟تحضيرة يعني زفة خاصة لي بما إني عروس جديدة!! نجلاء:بس ياحبيبتي..انتي ماتزوجتي لسه..السالفة ملكة بس..والمتعارف عليه ان الوحدة تتحضر لما تكون عروس..وغير كذا انتي مو من جماعة مرام..يعني ماله داعي.. رانية:أقول..الليلة خاربة يعني خاربة وش لقفكم انتوا؟الست مرام مو قالت ماأبغى منكم إلا حضوركم وبس!!تعتقدون ليش؟؟مو كأنها مستعرة مننا؟لا ياحبيبات قلبي حِنا صديقاتها وأنا أرفض إنه وجودنا يكون مهمش!لازم نشاركها من غير مانخرب عليها!!! أفنان:يعني بتنزفين قبلها؟؟ رانية:لاياعيوني أبي أنزَّف قدامها عشان تشوفني زين!!وأرتز جنبها في الكوشة!!! اسمهان:بس أنا من رأيي تعطين أهلها خبر عشان مايزعلون!! رانية:بأقول لهم بس مو الحين..هالحين بأروح للطقاقة وأقول لها اش الزفة اللي أبيها تزفني عليها.... ورجعت رانية وقاموا يدردشون ويسولفون سوى ويتذكرون المواقف الحلوة اللي حصلت بينهم زمان... نجلاء:اش رايكم الحين نروح لمرام نسلم عليها؟؟ الشلة:موافقين... ولما وصلوا لباب غرفتها كانت أختها الكبيرة ماجدة(صاحبة المشغل) خارجة من عندها... رانية:ممكن ندخل نسلم على مرام؟؟ ماجدة:سامحوني ياجماعة بس مرام من الأول أعطتني تعليمات بأني ماأخلي أحد يدخل عليها!!! نجلاء:بس إحنا أعز صاحباتها أكيد بتفرح لوجودنا.. ماجدة:هي بالذات وصتني إني ماأخلي أحد من صاحباتها يدخل عندها..تقول لكم بتقابلكم على المنصة ان شاء الله! وراحت ماجدة..... رانية:شايفين ياحلوات؟صاحبتكم المخلصة مدري اشفيها منقلبة علينا؟بالله هذا كلام؟الود ودي لو قالت لنا بوجوهنا من قبل لاتحضرون ملكتي كان أبرك!!!! أفنان:يمكن تبغى تفاجئنا بمظهرها على المنصة وماتخرب طلتها!! رانية:لا الصراحة مرة أقنعتيني!! نجلاء:من جد حركة غريبة من مرام ومالها معنى! اسمهان:خلوها على راحتها..وليش نبان قدامها ملاقيف وملاهيف على شوفتها؟...خلوا الأمور تمشي مثل ماهي تحب..حِنا جينا نستانس مو نضيق صدورنا.. ورجعوا الشلة وماحد له نفس يشارك أهل مرام بالرقص والانبساط!!! ظلوا قاعدين يسولفون..إلى أن اقترب موعد الزفة..فتحت رانية كيس معاها وبداخله سلتين وبداخلهم ورد وقامت تركض باتجاه المدخل وأخذت شوية رمل ملون من الطاولة اللي مزينة بالمدخل وشوية حبات لؤلؤ وحطتهم بوحدة من السلات..ورجعت قعدت بكرسيها!!! كانت طاولة الشلة ملاصقة شوي للمسيرة الطويلة اللي بتمشي عليها العروس.. وفجأة خفتت الاضاءة واشتغل شريط فيه أصوات طيور النورس وأمواج البحر..وبعدين أصوات صيادين يقولون:هيلا هيلا وكأنهم يرمون شباك الصيد بالبحر..وصوت رجل يغني موال فيه قصيدة بأسماء العروسين...مرافقة له صوت الأمواج والطيور.. وبعدها أغنية أغلى الآليء..وبدأ يطلع دخان كثيف على الأرض خارج من محارة كبيرة على بداية المسيرة وتفاجأ الحضور بخروج مرام عليهم من وسط المحارة وهي لابسة فستان مشابه لعروس البحر!ضيق من فوق ووسيع من تحت الركبة بشكل مشابه لذيل السمكة ولونه موف على ليلكي وتسريحتها مرصعة باللؤلؤ...والاكسسوار الفخم اللي لابسته كله لؤلؤ بلؤلؤ... https://im12.gulfup.com/2012-08-10/1344547748151.jpg رانية:ماشاء الله يامراموه خارجة علينا من محارة؟؟زين ماطلعت لنا من بطن حوت!! الشلة:ههههههههه وقفت رانية جنب المسيرة ومعاها سلة ورد مليانة حبات لؤلؤ ورمل وصارت تغطرف وترمي مابداخل السلة على مرام!!!اللي كانت تمشي على المسيرة بدلع وببطء شديد!!!!! واسمهان(بهمس):رانية الهبلة؟لاتفشلينا تعالي انثبري!! نجلاء:ههههه خليها تفش غلها شوي! أفنان:رانية تعالي اجلسي ياويلك من مرام! رانية:يمه خرعتيني!!واش بتسوي لي هالمرام يعني؟؟بتصيدني بـ سنارة؟ ولابترميني للسمك ياكلني؟!!! وظلت مرام تمشي الهوينة لين ماوصلت للكوشة وجلست..وبعدها بشوي خرجوا الشلة لمدخل القاعة ومع أفنان واسمهان سلات الورد اللي جايبتهم رانية..ووقفت نجلاء بالأول ووراها رانية وورا رانية اسمهان وأفنان.. وقامت الطقاقة تطق الزفة اللي رانية طلبتها ودخلت نجلاء على الحضور وقالت بعالي الصوت:ألف الصلاة والسلام عليك ياحبيب الله محمد لللللللللللللوش!!!!!! وصارت رانية ماشية ووراها اسمهان وأفنان يرشون عليها ورد... ومرام متفاجئة من المنظر..نادت مرام أمها وقالت(بزعل):يمه ليش خليتوها تنزف؟؟ أم مرام:عيب يابنتي نقول لها لا!حتى هي عروس وتبي تفرح.. مرام:فرحتها سوتها بيوم ملكتها خلاص لازم تجي وتنشب لي هنا بعد؟!!أف! صاروا الناس يتسائلون:من هي هذي؟ حتى أم رانية صارت تضحك وهي بمكانها ماهي دارية اش السالفة!!!! وجلست رانية أخيراً بالكرسي اللي جنب مرام وقالت:مبروك ياعروس! مرام:والله مدري مين فينا اللي عروس؟ قاموا أفنان واسمهان ونجلاء يسلمون على مرام... مرام:أنا يارنو..ترمين علي تراب ولؤلؤ؟؟ رانية:بعد انتي لابسة لي عروس بحر واش تبين أرمي عليك؟سمك وصدف؟ قعدت مرام متضايقة ......والشلة يرقصون قدامها..وسحبوها ترقص معاهم لكنها رفضت.. وطلعوا أهل عبدالرحمن وأقاربه يسلمون عليها وهي تسلم...ولما شافت مرام أم عبدالرحمن قامت تبوس راسها ويدها..وتكلمها بشوق! رانية(بهمس)لاسمهان:يقطع أبوالنفاق ياشيخة!!أتحداها قد حبَّت راس ويد أمها وأبوها!!!! وقفت مرام جنب العربية المكلفة وتصورت كم صورة... وجابوا عاملات القصر تورتة ضخمة فيها أدوار كثيرة قطعتها مرام... وأخذت نجلاء قطعة من الكيكة و حشتها في فم مرام!زعلت مرام وقالت:مصاخة!! وأما نجلاء ورانية قاموا يستهبلون على الكوشة ويرقصون رقص فانتازي وماله أي علاقة بالطق ويسوون حركات صبيانية لأبعد درجة..لدرجة انه أم رانية أرسلت روان الصغيرة لأختها رانية وطلعت روان وسحبت رانية من ملابسها وقالت:ماما تقول لك ياقليلة الأدب انزلي!!!! رانية:أقول تعالي!!!! وسحبت رانية أختها روان وشالتها ورقصت بها على المنصة وروان تضحك..وفي الأخير رمتها على مرام!! نزلَّت مرام البنت الصغيرة من حضنها وقالت:وش هالمسخرة؟؟؟يمه!!! وأقبلت أم مرام:نعم؟؟ مرام:خلاص أبي أدخل داخل وخلي أهل العريس يكلمونه عشان يلبسني الطقم!!! وبالفعل نقلوا العاملات العربية لغرفة العروس وجاء عريسها وجلس معاها وأمه وأخته وخالته وعماته معاه بالغرفة وأم مرام..وسط مباركات الجميع.. خرجوا الجميع..وبقي عبدالرحيم مع مرام... ظل يتأملها وهي ساكتة ماتنطق!! عبدالرحيم:أول كلمة ودي أقولها لك(ماشاء الله تبارك الله)أحلى مماتخيلتك بكثير..... ومرام ساكتة... عبدالرحيم:تتذكرين أول مرة شفتك فيها؟؟ مرام:ايه وأنا نازلة من الدرج!! عبدالرحيم:أي درج؟؟أنا قصدت بيوم الشوفة!!!! مرام:ايه أتذكر.. عبدالرحيم:من يومها وصورتك ماغابت عن بالي!! واستمرت سوالف عبدالرحيم ومرام ومن ضمنها... عبدالرحيم:مرام اش هي طموحاتك المستقبلية بعد ماتتخرجين من الثانوي؟؟ مرام:الصراحة.. حلمي إني أفتح صالون تجميل مثل أختي ماجدة! عبدالرحيم:فكرة حلوة لكن الشغل بالصالونات مايريحني!! مرام:ليش؟؟ عبدالرحيم:يعني يندرج فيه منكرات كثيرة في باب الزينة..وغير انه الصالونات يرتادها ناس من مختلف البيئات ومنهم السيء ومنهم الزين... مرام:هذا إنت قلتها.. السيء والزين يعني مو كل الناس سيئين!وبعدين إحنا حدود تعاملنا معاهم مايتجاوز تقديم الخدمات لهم..واش لنا بأخلاقهم؟؟؟ عبدالرحيم:أنا شخصياً تقلقني هالشغلة لأنه بعض من الصالونات المعروفة يصير فيها مخالفات ولها سمعة مشبوهة من اللي يصير فيها..بنات البلد فيهم الخير لكن العمالة الوافدة اللي تشتغل بهالصالونات ممكن يتساهلون ويخونون الأمانة مقابل حفنة مال! مرام:العيب في إدارة الصالونات نفسها يسلمونها لناس مو كُفء.لكن بالنسبة لمشغل أختي أنا وإياها ندير المشغل..حتى الشئون المالية عمرنا ماسلمناها لأحد.. وهكذا استمرت سواليف العريسين عن مختلف المواضيع الحب والطموح والتعامل وغيرها.. وطبعاً المعازيم عقب ماراحت مرام لعريسها راحوا للعشا وكان العشا راهي وفيه قسم كامل من البوفيه فيه أكلات وسلطات بحرية! غرفوا البنات أطباق وجلسوا على وحدة من الطاولات بصالة العشاء. اسمهان:الصراحة يارانية أحس إننا زودناها بحركاتنا مع مرام وخصوصاً انتي.. أفنان:شكلها بتقاطعنا كلنا وتحلمون تعطينا وجه بعد اليوم!! نجلاء:أحس من نظراتها إنها حقدت علينا!! رانية:واشفيكم قمتوا علي؟؟من حر مافيني سويت اللي سويته..لاتنسون إني أول وحدة فيكم تعرفت على مرام من سنين وكانت صداقتنا قوية!!بس مرام تغيرت في الفترة الأخيرة نسيتي يااسمهان يوم انخطبت لأخو زوجك خبت عننا كلنا الخبر بـ حجة إنها خايفة من العين؟؟؟ اش تسمون هذا بالله؟عدم ثقة؟كأنها مجبورة علينا ومتصاحبة معانا شكلياً وبنفس الوقت مو متطمنة لنا!!الصراحة إذا بتستمر على كذا ماتلزمنا!!وهذا انتوا شفتوا بعيونكم بنات الفصل الثاني قاعدين يرقصون لها ومبسوطة الأخت وتشجعهم..أجل اشفيها علينا؟؟؟؟؟؟؟ نجلاء:صادقة بكل حرف..بس أما نترك صاحبتنا بعد هالسنوات فهذا اللي لايمكن يصير!!! أفنان:لاياخذك سوء الظن يارانية!هي لو مو حابتنا كان تركتنا من زمان..لاتنسين انه عندها صاحبات كثير في المدرسة كان بإمكانها بأي وقت تتركنا وتروح معاهم لو حنا فعلاً مو عاجبينها! اسمهان:أفنان معاها حق.. وحركات مرام ماأتوقع إنها أكثر من مجرد دلع.. وانتهوا الجميع من عشاهم وبدأوا بالانصراف...ماعدا رانية!!جلست تفكر بكلامهم.. وجت أمها وقعدت جنبها.. أم رانية:حسبي الله على ابليسك..ياللي مفشلتني بكل عِرس!!أنا قلت بتنخطبين وبتربطين حميرك!لكن هذا انتي ماتغيرتي نفس الهبال.. اللهم اليوم كأنك ضاعفتي الجرعة شوي!!قومي البسي عباتك أبوك ينتظرنا برة! رانية:يمه تكفين..دقايق وراجعة لك!! وراحت رانية تركض وأمها تناديها.. أم رانية:استغفر الله..مدري من عليه طالعة هالبنت؟؟ وراحت رانية تركض ووقفت بعباتها قدام غرفة مرام..وغطت وجهها..وكانت ماجدة مارة نادتها رانية وقالت:ماجدة؟تكفين نادي لي مرام ضروري! ماجدة:خير ان شاء الله؟ عندها عريسها الحين!! رانية:معليش..مابأعطلها كلها ثواني بس!! طقت ماجدة الباب وأقبلت مرام تفتح الباب.. ماجدة(بهمس):فيه وحدة تبيك برة! خرجت مرام تتلفت وهجمت عليها رانية وحضنتها بقوة!!!! مرام:بسم الله!!مين انتي؟؟ رانية:أنا رشاشة الرمل واللولو!! مرام:رانيـــــــــــــــة؟؟؟؟؟ وشفيك مغطية وجهك؟؟ رانية:لأني بأنقلع بيتي وأفكك مني!! مرام:لا وش دعوى تقولين هالكلام؟صح إنك كريهة وتفهمين وصاياي لكم بالعكس!لكن مايخالف مبلوعة منك ومتفولة من غيرك!!! رانية:يعني منتي زعلانة؟؟؟ مرام:لا وش حقه أزعل بيوم فرحتي؟؟وبعدين لايمكن تكونين رانية لو ماتسوين آكشن بكل اجتماع!! وغمزت مرام لرانية بعينها وقالت:بس عاد لاتكثرين من هالحركات..وإلا بأحرمك من حضور عرسي!!! مسكتها رانية بقوة للمرة الثانية وحضنتها وقالت:أحبــــــــــــــــــــك يابنت!!! وودعتها..ورجعت مرام لغرفتها.. عبدالرحيم:ايش؟لايكون تضايقوا أهلك من جلستي معاك كل هالوقت؟؟؟ مرام:لا أبد..بس هذي صديقتي خطيبة ناصر صاحب أخوك..كانت تسلم علي قبل لاتروح.. عبدالرحيم:تقصدين ناصر المرجوج؟ مرام:هههه ليش هو مرجوج؟؟ عبدالرحيم:يعني الله يصلحه راعي مقالب وفرفشة وماتفرقين بين جِده وهزله!! مرام:أهااااا..صدق من قال:الطيور على أشكالها تقع!!!! واليوم التالي للملكة(يوم الجمعة).. اجتمعت اسمهان وأحلام وجوهرة للغداء في بيت أم عبدالرحمن....وكانت أغلب السواليف عن أحداث الليلة السابقة(ملكة مرام).. أم عبدالرحمن:ماشاء الله تبارك الله..عروسة عبدالرحيم قمر..أحلى عروس شفتها!!! اسمهان:وش دعوى خالتي؟وأنا وين رِحت؟؟ أم عبدالرحمن:هههههه إنتي الخير والبركة..بس كل وحدة لها جمالها الخاص فيها.. جوهرة:قديمك نديمك ولو الجديد أغناك ياأم عبدالرحمن.. أحلام:على إنه ملكة مرام مميزة..بس الصراحة أحس إني انبسطت أكثر في ملكة اسمهان.. جوهرة: حتى أنا ..ماشاء الله..اسمهان أصلاً شخصيتها أقرب لي لأنها بشوشة..بس مرام فيها شوفة حال شوي..!!!أتذكرها لما كانت بصف أول ثانوي كانت شغالتها تنزل معاها المدرسة وتشيل لها الشنطة لين الفصل!وتفسخ مرام عبايتها وتعطيها الشغالة..والشغالة تطبقها وتحطها بالدِرج وبعدين تروح!!وقد ماكلمتها مافاد لين مااتصلت يوم على أمها وقلت لها ماله داعي هالرفاهية الزايدة..بنتك كبيرة وتقدر تعتمد على نفسها..وأكيد تتذكرين هالسالفة يااسمهان... اسمهان:هههه ايه أتذكر..بس والله مرام حبوبة لكن دلوعة شوي لأنها مثلي آخر العنقود..وبالنسبة للملكة حتى أهلي يقولون ملكتي كانت أونس!بس باعتقادي انه السبب يرجع إلى إن شلتنا كانوا مشاركيني المناسبة بـ طولها..لكن ملكة مرام كانت هادية شوي لأنها ماتحبذ الأجواء الصاخبة كثير.. أم عبدالرحمن:كلها مناسباتكم حلوة..أهم شي ان العريس انبسط ومابغى يطلع من عند العروس لين آذيناه باتصالاتنا.. أحلام:كلهم أخواني مايصدق الواحد فيهم يشوف له حرمة إلا ويطيح عندها!!!صح يااسمهان؟تتذكرين أيام خطوبتك؟؟؟؟؟ اسمهان:شلون ماأتذكر؟؟أحلى أيام حياتي كانت..وتمنيت لو كانت أطول.. أحلام:ياحليله عبدالمجيد كل ماقابلته ألقى الجوال بإيده وهو يضغط فيه..وقبل شوي طقتني اللقافة وسحبت جواله وفتحته لقيته متروس مسجات مرسولة لمشاعل...ومشاعل بعد مو مقصرة ترد على رسايله...الله يهنيهم ببعض.. أم عبدالرحمن:وش تبينه يسوي يابنتي؟؟لايسمع ولاينطق!ولايقدر يتصل فيها..ماعنده وسيلة يواصلها فيها إلا الرسايل أو الزيارات!مع انه قلل الزيارات في الفترة الأخيرة لأنه صار يتضايق!! جوهرة:ليش يتضايق؟؟أهل مشاعل مايبونه يزورها؟؟ أم عبدالرحمن:مو هذي المشكلة..لكنه يتضايق من نظرات أم مشاعل!!يقول أحياناً وأنا قاعد أتكلم مع مشاعل بلغة الاشارة ألقى أمها تبكي!!ومو داري هي تبكي من الشفقة عليه ولا على حال بنتها اللي بتاخذ إنسان أصم وأخرس!!!! أحلام:ياحليله يمه..يكسر خاطري.. جوهرة:ياعزيزتي بكرة لما تشوف كيف بنتها مبسوطة معاه ومستانسة بتنسى هالحزن.. عبدالمجيد مسيكين وحاله بشانه لايضر أحد ولايغلط على أحد.. أم عبدالرحمن:صادقة ياجوهرة..قلبه كبـــــير ومايحب يكدرخاطري..كل مالقى نفسه فاضي راح يرسم على جدران شقته.. جوهرة:ووينها السبورة اللي يكتب لك عليها كلامه دايماً؟ ماأشوفها؟؟؟ أم عبدالرحمن:شوفيها جنب المكتبة! سحبتها أحلام ولقيت عبدالمجيد كاتب عليها بقلم الفلوماستر: يمه غرفة النوم أبي لونها بيج كريمي.. وأثاث بيتي أبيه يختلف عن أثاث عبدالرحيم..ولاتنزلون السوق وماتعلموني!! أم عبدالرحمن:ياحليلك ياولدي داري إننا نسوي خيانة ونروح السوق وإنت نايم!!! جوهرة:انتم حددتم موعد الزواج خلاص؟؟ أحلام:ايه ياخالتي..بداية اجازة الصيف بإذن الله يعني عقب ثلاثة شهور تقريباً..بس اخواني متحمسين ..من الحين وهم يفترون بالأسواق يدورون أثاث!!! أم عبدالرحمن:ايه وأنا أؤيدهم ودي نفتك من تأثيث الشقق بأسرع وقت عشان نتفرغ لحجز القاعة ومستلزمات العرس اللي تخصنا واللي تخص يوم الزواج.. جوهرة:عاد أنا ماحد قدي بأشتري فستان حمل مناسب للسهرات وألبسه!!يعني بأريح راسي!! أحلام:الله يعين..أما أنا وأمي يبي لنا ننزل نختار أقمشة وموديلات بعدين نختار مشغل الخياطة المناسب اللي نفصل فيه.. اسمهان:أما أنا اتفقت مع سماح نروح لخيَّاطة ممتازة نعرفها..أنا أفصل فستان لزواجنا وسماح لزواج تركي وناصر.. واستمرت السواليف عند الحريم وبمجلس الرِجال اللي كان فيه عبدالرحمن وأخوانه وزوج خالتهم جوهرة وزوج أحلام..إلى موعد الغداء.. تغدوا الجميع وبعدها استأذنت اسمهان... اسمهان:كثر الله خيركم خالتي..بس أنا بأستأذنكم لأني رايحة لأهلي.تدرون اليوم يوم اجتماع العائلة.. أم عبدالرحمن:بالتوفيق يابنتي..ولاتنسين تبلغينهم سلامي..... اسمهان:ان شاء الله..مع السلامة.. الجميع:مع السلامة... وفي بيت أهل اسمهان..استقبلوها بالترحاب.. كانت سماح موجودة وصار لها فترة من خروجها من الأربعين... شافت اسمهان..سمهونة الصغيرة بنت أخوها محمد وشالتها بلهفة وقالت:هلا حبوبتي الحلوة..يازينك ويازين خدودك يانااااااااس قمر!! سماح:والله البنات خفيفات ظل!مونستنا بالبيت بشكل كبير..ماأتذكر إنه أخوانها كانوا ببشاشتها! أسماء:في هذي معاك حق!!أنا لاحظت إنه ولدي أنس فيه براءة بثقالة دم!!بس لينة غير شكل!!تتبسم وتضحك أغلب الوقت.. أم اسمهان:البنت والولد واحد..أي ثقالة دم وأي خفة؟؟انتم عندي مثل محمد ماقد لاحظت بينكم فرق إلا في النطق!!محمد كان لسانه ثقيل شوي وماتكلم بدري..بس انتم البنات ماشاء الله عليكم تعلمتوا الكلام بسرعة!!! أسماء:طبيعي!لأنه البنات دايماً أذكى من الأولاد..عندهم استعداد أسرع للتعلم... أم اسمهان:إلا ياحبيبتي لأن محمد كان هو الولد البِكر وماقبله أحد ومايخالط أحد ماتعلم النطق لكن انتم جيتم بعد بعض وتعلمتوا من بعض!!!! سماح:إلا اش أخبار مرام يااسمهان؟كلمتيها اليوم؟؟؟ اسمهان:لا ماكلمتها..لكن اللي عرفته ان العريس مبسوط.. أسماء:أما أنا ماقعد براسي من أحداث الملكة أمس إلا صورة رانية صاحبتك!! أما هي مطفوقة بـشكل؟؟؟؟ سماح:ههههه حرام عليك..بس تنحب منها! اسمهان:تعودنا عليها كذا...ماأتخيل إنه بيجي يوم وتعقل! سماح:إلا اغسلي إيدك إنها تعقل!!نسيتوا انها بتاخذ ناصر؟؟؟عاد ناصر من يوم كِنا نلعب معاه وإحنا صغار وهو مهبول وعليه حركات شقاوة! ====================== اتصلت رانية على اسمهان وحكت لها مادار بينها وبين مرام بالليلة السابقة.. اسمهان:أشوى مازعلت من أحد..قلت لك قلبها طيب..ماصدقتيني!!بس بشري اش أخبار خطيبك؟ رانية:لاتجيبين لي طاريه له كم يوم يتصل و يدز مسجات وأنا ماأعبره!!أبيه يهَوِن عن موضوع النقل لـ شرورة!! اسمهان:ومين قال لك انه بينقل أصلاً؟؟تراه يمزح معاك!!!! رانية:إلا يكذب علي وانتي الصادقة!!هييييين..أنا أوريك يانصور!!! ======================= راحت رانية تتصل بناصر.. ناصر(ببرود):مرحبا.. رانية:مرحبتين..شلونك؟؟ ناصر:الحمدلله..مين معاي؟؟ رانية:ماعرفتني؟؟يحق لك!من كثر اللي يتصلون فيك!!!!!!!! ناصر(بنذالة):أووووه رانية!المعذرة نسيت صوتك لأن لي مدة ماسمعته!! رانية:لااااااا؟؟ والرقم مسحته بعد؟؟ ناصر:وش هالكلام؟أنا أنسى نفسي ولاأنساك ياقمر!! انشكحت رانية وقالت:زمان عن شوفتك..ماودك تسَير علينا؟؟ ناصر:إلا بعد شوي..اش رايك؟؟ رانية(بينها وبين نفسها تقول:أعوذ بالله صدق إنه خفة!!ماصدق أحد يعطيه وجه!!!! ناصر:اشفيك ساكتة؟؟أبي أزورك اليوم عقب المغرب لأنه يوم اجازة..بوسط الأسبوع أكيد منتي فاضية إلا لدروسك.. رانية:الله يحييك... وبعد ماانتهت المكالمة راحت رانية للمطبخ وسوت حالة استنفار وقامت تجتهد في اعداد الأصناف المختلفة لاستقبال العريس!!!! أم رانية:عجيب أمرك!!لو قايلة لك سوي لأخوانك هالأكلات..كان ما فزيتي!! رانية:ايه أكيد مابأسوي لهم..عيالك مشافيح!لو أنسدح لهم بوسط الصحن ياكلوني!!! دخل مشاري الأخ الأكبر لرانية وكان دبدوب!!!وقال:الله الله..وش هالعز كله؟؟بيجيكم ضيوف؟؟ أم رانية:ايه..خطيب أختك بيجي اليوم.. مشاري:كل هالأكل لأبو عصاقيل؟؟ رانية:الله يخلي لي عصاقيله!!واش تبيه يصير؟؟مثلك ياالمنفقع؟؟كل مطاعم الديرة حافظينك قلباً وقالباً!!!! أم رانية:قولي ماشاء الله..بتصكين أخوك بـ عين! رانية:أحسن..عساه ينحف شوي!! وشوي ودخل مشعل أخو رانية الثاني وهو يخبط بطنه ويقول:ياسلاااام وش هالروايح الحلوة؟؟ رانية:قطيعة تقطعكم!!واشفيها حاسة الشم قوية عندكم اليوم؟!!!!!!!!!!!! وبعد سويعات حضر ناصر وبيده كيس!! وفرحت رانية!!خطيبها جاي بـ هدية!!! قعدت معاه وكانوا أبوها وأخوانها برة لسه مارجعوا! أعطاها ناصر هديتها..وتناولتها وهي فرحانة وفتحت الكيس ولقيت بداخله بقرة جالسة مصنوعة من القطن وحاضنة بين يديها علبة اسطوانية!!!!!! شالتها رانية وعلى وجهها علامات الخيبة!! رانية:بقرة ياناصر؟؟بقرة؟؟ ناصر:واش أسوي في راعي المحل الملقوف؟؟كنت شاري قرد وقعد يقنعني انه هدية غير مناسبة لعروس!!!لين غيرت رأيي وشريت البقرة!! رانية:الناس تجيب دب أو قطوة على الأقل بس بقرة؟؟؟ هذي ماصارت ولااستوت!شايفني أشبهها؟؟؟ ناصر:إلا تعالي وعلميني الدب اشفيه من جمال؟ منتفخ وشكله مهبول!!!والقطوة مشهور عنها إنها ناكرة للجميل؟؟لكن البقرة..يازينها زيناه!رمز للعطاء..جبن على زبدة على حليب على لبن على لحم!!تقدرين تستغنين عن منتجات البقر؟؟أتحداك! رانية:لا..شاعري حيل إنت!!وفاهم كل كلمة تنطقها...وعندك وعي رهيب لرموز الحيوانات!! ناصر:أجل ايش؟؟خطيبك بياع حَمَام مخضرم!! رانية:إلا أقدر أحلف إنك بياع أرانب بعد!!! وقامت رانية تفتح العلبة الأسطوانية اللي حاضنتها البقرة!!! وكل مافتحت علبة لقيت بداخلها علبة ثانية!وهكذا لين مااجتمع بيدها ست علب بمختلف الأحجام!!! رانية:أقول..راح ليلي مع البقرة النشبة ذي!لاأخذنا منها جبن ولالحم!!! ناصر:بس اش رايك في الهدية؟؟ رانية:بصراحة هدية من الخيال وتعبر عن شخصية صاحبها!! ناصر:أنا الود ودي أهديك جمل!بس وش أسوي؟العين بصيرة واليد قصيرة!!! رانية:واللسان طويل والعقل قليل!!!سألتك بـ ربك؟هذي هدية تقابلني فيها بعد غيبة؟؟؟غايب عني أسبوعين وجيت لي ببقرة..أجل لو غايب شهر كنت بتجيب لي فيل؟؟؟؟ ناصر:هههههههه صدَّاقة انتي يارانية!بغيت أمتحن صبرك بس!لكنك طلعتي فاشلة!!عموماً خذي هديتك!! وطلَّع من جيبه علبة فيها خاتم مفصص!!وعطاها رانية! رانية:وااااااي يهبل!معقول إنت شاريه؟أخاف سارقه من أحد!!! ناصر:لاتفرحين كثير تراه فالصو!! رانية:فـــــــــــالصو؟؟كل رخيص مخيس!! ناصر:عاد كانت حرمة تكرونية قاطعة الاشارة وتبيع اكسسوارات أبوفقسة..قلت بنفسي حرام ياولد ماتخليها تكسب..وعجبني هالخاتم وشريته منها!! رانية:ياخي إنت ماعندك ذوق ولااحساس؟بالأول بقرة والحين خاتم مضروب لو تجي عليه قطرة موية صار لونه مثل لون مسمار بايت تحت الشمس؟؟؟؟؟؟؟ ناصر:الله يرحمك يايمه..كلامها كان كله حِكَم!! رانية:ليش؟وش كانت تقول؟؟ ناصر:خِذ لك فرس تركبها ولاتاخذ لك حمارة تركبك(يعني تتسلط عليك بـ قوتها)!! وخذ لك من تفيد وتنفع وإن كانت تشبه الضفدع! ولاتاخذ مِن لاتشبع ولاتقنع وإن كانت نجمةٍ تسطع!!!!!!(عاد هذي من عقلي...أدري بتقولون لاتعيدينها.هههههههههه!!) رانية(بغيظ وقهر)قالت بنفسها:ياشيخ ليتها خذتك معاها!!!!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
جاء أبو رانية وأخوانها من برة ودخلوا المجلس عند ناصر فانسحبت رانية وراحت المطبخ تجيب القهوة للرِجال..وبيدها كيس الهدية! أم رانية:ايش هالكيس اللي بإيدك؟عريسك جايب لك هدية؟؟ رانية:لاتسأليني يايمه!من زينها؟؟ أم رانية:تحمدي ربك..بنت عمتك سميرة خطيبها عمره مادخل عليها بـ كيس طماط حتى!!!هاتي هاتي أشوف! رانية:وش تشوفين؟جايب لي ابقرة ولد الأجاويد!!ومعاها 6علب فاضية مدري وش القصد يبيني أحلبها له وأملى له العلب!! أم رانية:هههههههه..الله يقطع ابليسه فيه من صرقعة أبوك..تتذكرين يوم سافرت الشغالة وحلف أبوك مايستقدم غيرها قمت أشكي له من جفاف يديني وسوادها من الغسيل والتنظيف وأنا قاصدة ألمح له اني أحتاج شغالة..فحسيت خاطره مكسور..وخرج من البيت وأنا فرحانة وأمني النفس بأنه راح يقدم على شغالة لكنه فاجأني بهدية جايبها معه يوم فتحت الكيس لقيت كرتون قفازات من الصيدلية!!!!! رانية:زين لايفوتك الخاتم اللي جايبه! أم رانية:ياسلام..حلو..ذهب عيار24.... رانية:حتى انتي انغشيتي مثلي يمه؟؟؟تراه شاريه من تكرونية بالشارع!! أم رانية:والله انتي اللي صدق تكرونية!!هذا ذهب..واسألي مجرب ولاتسألين طبيب..حتى شوفي الختم اللي عليه..هالختم مايجي إلا في الذهب.. رانية:مستحيل!هو لو قايل لي انه خاتم ألماس كان شكيت بالموضوع وانه كذاب!لكن بيروح يخسِر نفسه خاتم ذهب وآخرتها يكذب ويقول فالصو؟؟مو معقول!اش بيستفيد! أم رانية:صدقيني انه ذهب وقيمته ماتقِل عن 270 ريال... رانية:ماأصدق!! وقاموا رانية وأمها وشالوا القهوة والحلى وباقي الأغراض وحطوها بالمجلس.. ويوم طاحت عين ناصر على أم رانية قام يرحب.. ناصر:هلا هلا خالتي موضي.. أسفرت وأنورت واستهلت وأمطرت مثل مايقولون..وش هالزين كله؟من شافك قال إن رانية أمك!! أم رانية:ههههه تسلم يالغالي.. رانية(بداخل نفسها):حسبي الله عليك يانويصر!حطيتني أكبر من أمي؟!!!!!! وجلسوا العائلة يدردشون..وبعد شوي قامت أم رانية ودخلت داخل.. أما رانية قعدت تتابع المسرحية اللي قدامها!!أبوها ينكت ومشاري يقط نكتة ويرد عليهم ناصر بنكتة ثانية ويشاركهم مشعل!! زهقت وقامت بتطلع من المجلس! ناداها أبوها:رانية؟وين رايحة يابوك؟؟ مشاري:بوك؟ولا كرافت؟؟؟؟ الجميع:ههههههه رانية(بغيظ):رايحة أدرِس!! أبو رانية:بس يابنتي اليوم اجازة ومافي مدارس بالليل!!!!ههههههه رانية:ايه ..بس السيرك القومي أشوفه مفتوح..لاانتهى التهريج علموني!!!! مشاري:ياحبك ياذي البنت للنكد! ناصر:لا بالعكس رانية بشوشة وتحب الفرفشة..بس يظهر ماتعجبها سوالف الرجال!! مشعل:أجل خل نقلب القعدة سوالف حريم!يمكن تروق لها!! حط مشاري يده على فمه وقال(وهو يقلد سواليف النسوان) :أقول ماشفتوا ياحلوات فستاني بعرس خلود؟أحمر فسفوري ضارب ببنفسجي..وحطيت معاه ذاك المكياج الأخضر اللي ألهب بشرتي وماعرفت أرقص!!!! مشعل:فديت قلبك ياأم عباس!إنتي حلوة إن رقصتي وإن رقدتي! رانية:هيييييييه..أبوشنبات انت وياه ماتستحون على وجيهكم؟؟هذي سوالف تنقال بالله؟؟ماتحشمون اللحية البيضاء اللي قاعدة وياكم؟ أبورانية:الله يسامحك يابنتي!أنا لحيتي بيضاء؟ ناصر:لاياعمي..قلبك هو اللي أبيض!! ورجعوا الجماعة يكملون الجلسة بسواليف عن المواقف الساخرة المضحكة اللي مرت فيهم قبل ويضحكون!!أما رانية قاعدة في مكانها بتململ!!! ويوم انتهت زيارة ناصر لهم ودعهم جميعاً وراحت رانية توصله للباب الخارجي.. ناصر:رنونتي الحلوة؟وشفيك زعلانة؟كأن الجلسة ماجازت لك؟؟ رانية:ايه ماجازت لي الصراحة!أحب الضحك والوناسة..بس لازاد الشي عن حده انقلب لضده!!! ناصر:ياحبيبتي تحمليها هالفترة..النكد جاي لك قدام بس انتي لاتستعجلين!! رانية:ايـــــــــش؟يعني ياتطخه يا تكسر مخه؟ماعندك حل وسط؟ ناصر:بعدك ماتعرفيني..أنا أتمسكن لين أتمكن!!!هههههههه مع السلامة.. رانية:مع السلامة.. وثاني يوم بالمدرسة لبست رانية خاتمها تبي تكشخ به قدام صديقاتها!!وهي بداخلها متيقنة انه فالصو!!! وكانوا الشلة مجتمعين ويسولفون بمواضيع مختلفة..وفجأة طاحت عين اسمهان عليه وقالت:رانية؟آثاري أذواقنا متشابهة؟؟نفس خاتمك هذا شريت مثله لأختي أسماء يوم ولدت.. رانية:وبكم شريتيه؟ اسمهان:شريته ب300 ريال.. فرحت رانية انه ماطلع فالصو مثل ماضحك عليها ناصر!!وقالت:هذا هدية من خطيبي...!! ================ مرت الأيام دون جديد يذكر والشلة مجتهدين بمذاكرتهم حتى رانية اللي كان مستواها متوسط بالدراسة اجتهدت مرة وارتفع المستوى!! نجلاء:غريبة!!من متى كل هالاجتهاد؟أخبرك ماتهلكين نفسك في الدراسة مثلنا!!! رانية:اش أسوي؟أخاف أجيب نسبة مو زينة ويقعد ناصر يعايرني! ============== أما عزة فكانت مجتهدة باتصالاتها على اسمهان..واسمهان تحاول تسحب نفسها منها..لكن عزة لاتكل ولاتمل..تعاود الكَرَّة مرة بعد مرة!! وولدت زوجة سلمان صاحب أزواجهم وفكرت اسمهان تروح لها تزورها...وكان اسمها ليلى.. ولما كانت اسمهان عند ليلى بالبيت وكانت ليلى والدة لها أسبوعين...وجايبة ولد.. ليلى:هالحين كم صار لك من تزوجتي يااسمهان؟؟ اسمهان:تقريباً كملت سنة.. ليلى:ومافي شي بالطريق؟؟ اسمهان:لا لسه! ليلى:بيني وبينك أفضل لك..شدي حيلك بالدراسة وتخرجي..الأطفال ياخذون وقت الواحد..وصعب على الوحدة توفق بينهم وبين دراستها وكانت ليلى جالسة بسريرها تتكلم مع اسمهان.. قعدت اسمهان تراقب حركات الطفل وهو بسريره يتمغط وحنَّت عليه وفكرت تشيله..وانثنت ناحيته وحطت يدها تحته تبي تشيله.. ليلى:لحظة يااسمهان!....آنتي آنتي تعالي شيلي رَيَّان!! وفعلاً أقبلت الشغالة آنتي وشالت النونو الصغير ودخلت داخل واسمهان متفاجئة من حركة ليلى! جلست اسمهان بصمت والعبرة خانقتها وليلى تسولف ومندمجة بالسوالف..لكن اسمهان بس تفكر ليش ليلى خلت الشغالة تسحب الولد من اسمهان وتاخذه!! لاحظت ليلى انه اسمهان مخنوقة وودها تبكي ومو مركزة معاها وقالت:اسمهان؟عسى ماشر؟لايكون متهاوشة مع زوجك؟ ووقتها انفجرت دموع اسمهان وصاحت في ليلى:ليلى؟انتي تشكين فيني اني حسودة وعيَّانة؟ ليلى:لا أبد والعياذ بالله!ليش تسأليني هالسؤال؟ اسمهان:أجل وش معناها حركتك يوم جيت أشيله خليتي الشغالة تاخذه مني؟؟على بالك يوم إن ماعندي أطفال بأحسد غيري؟حرام عليك أنا أحب الأطفال ليلى:ههههههه أما صحيح ماعندك سالفة..آثاريك ظنانة سوء؟؟ترى ماانتبهت لولدي انه مستفرغ الحليب من فمه على ملابسه إلا يوم جيتي تشيلينه..وانحرجت منك لاتشمين ريحته وتشوفينه بهالمنظر وقمت أنادي الشغالة تشيله!!بس هذي كل السالفة! قامت اسمهان تمسح دموعها وتبتسم يوم اتضح لها الأمر.. ليلى:آنتي...آنتي.. أقبلت الشغالة وهي شايلة الولد ليلى:خلاص؟غيرتي ملابسه؟ آنتي:ايوه مدام.. ليلى:زين..حطيه بحضن مدام اسمهان..وعهدٍ علي يااسمهان ماأشيله من فوقك لين ما تمِلِين منه!!بس لاتاخذك الظنون فيني!! وبعد السواليف المختلفة.. اسمهان:أحد بيجيك غيري؟؟ ليلى:ايه ثنتين من صديقاتي..بس مدري اشفيهم تأخروا! اسمهان:عزة زوجة يوسف وحدة منهم؟؟؟ ليلى:لاياشيخة..الله يستر علينا وعليها من زمان قطعنا العلاقات ببعض!!ليش؟انتي تتواصلين معاها؟؟ اسمهان:يمكن تقابلنا 3مرات بس !لكن بيننا مكالمات.. ليلى:شوفي يااسمهان خذيها نصيحة من أخت أكبر منك..أنا ماأحب أذِم الناس وأتكلم فيهم بس خلك حذرة زين من عزة..ترى صاحباتي هذيل اللي بيجون بعد شوي صارت بيني وبينهم مشاكل والسِبة عزة!!لكن الحمدلله رجعنا لبعض!حتى زوجي صارت بيننا مواقف وكانت عزة تنقل كلام عند زوجها لدرجة اني في مرحلة من المراحل بغيت أتطلق بسببها!!لكن الله ستر.. اسمهان:أعوذ بالله..وأنا اللي أحِن عليها بسبب المشاكل اللي هي فيها.. ليلى:صدقيني هي لو تكف لسانها وآذاها عن الناس تعيش بسلام..لكن ماأقول غير الله يهديها ويغفر لها.. وأقبلوا صاحبات ليلى وكانوا قمة بالذوق والأخلاق.. ويشتغلون اداريات بمدرسة تحفيظ وقاموا يقنعون ليلى واسمهان يسجلن بمدرسة التحفيظ بالعصر اسمهان:ياليت..لكن الصراحة أنا أدرس وماعندي وقت!! ليلى:أما أنا بإذن واحد أحد بس أطلع من الأربعين..بأسجل على طول.. نادية(وحدة من صاحبات ليلى):لو مانجاهد أنفسنا كان ماحفظنا شي!!لكن يااسمهان حتى لو ماسجلتي بالتحفيظ احفظي كل يوم آيتين من القرآن مافي أسهل من كذا وعشان يكون حفظك صحيح بالتجويد والترتيل اسمعي كاسيت للقراء الثقات اللي أشرطتهم متوفرة حتى على النت الضيفة الثانية(نعيمة):أنا عشان تثبت الآيات في ذهني اشتريت مسجل صغير بسماعات وصرت أحط السماعات بإذني وأنا أشتغل بالمطبخ..لين ماصارت أغلب آيات القرآن مألوفة عندي وتيسر علي حفظها.. وبدأوا يتكلمون عن أفكار لتنسهيل حفظ القرآن وعن اجتماعهم مع بعضهم باستمرار وتسميعهم للآيات مع بعض وتحمست اسمهان.. لما انتهت الزيارة وركبت اسمهان السيارة مع زوجها بدأت تفكر انه عزة فعلاً انسانة مو مريحة كانت ظالمة ليلى ومشوهه سمعتها عند اسمهان..وانه ليلى انسانة عاقلة وتحب الخير....قطع عبدالرحمن حبل أفكار اسمهان وقال:سمهونة؟اشفيك ساكتة؟؟ اسمهان:أبداً.. عبدالرحمن:اش أخبار الزيارة؟ استانستي؟؟ اسمهان:جداً...زوجة سلمان وصاحباتها مثل العسل..تونست معاهم.. عبدالرحمن:الحمدلله.. اسمهان:عبدالرحمن ؟؟ودي أطرح عليك موضوع وتشجعني عليه! عبدالرحمن:تفضلي.. اسمهان:اش رايك نتنافس أنا وإنت يومياً على حفظ آيتين من القرآن؟؟ونسمِّع لبعض؟وخلال شهر واحد نكون حفظنا 60 آية..يعني بمعدل مجموعة سور من جزء عمَّ!! عبدالرحمن:جزاك الله خير ..هذا الكلام الحلو اللي أحب أسمعه..خلاص واش رايك نبدأ التنفيذ بكرة؟؟ اسمهان:ان شاء الله.. بيوم من الأيام اجتمعوا هند وسماح عند أمهم(أم تركي)....... هند:الله يسعد تركي ريحنا مرة في تأثيث شقته..كل أثاثه لسه جديد من أيام زواجه بعبير..اللهم إننا أضفنا بعض الأشياء.. أم تركي:لأنه يابنتي مااستخدم الأثاث من أيام الطلاق جاب العفش كله وغطاه وحطه فوق بالملحق... سماح:ماعليكم من تركي ..رجَّال ويسبِّع نفسه...عليكم من نويصر هذا إلا مايدري عن راسه من رجليه..بالله يمه مابقى على الزواج غير أقل من شهر!وماسمعت انه غير شي ببيته!!! هند:تركي يقول انه ضرب البيت بوية(دهان أو صبغة) جديدة..وغير دورات المياه... أم تركي:واشترى غرفة نوم بعد.. سماح:بس؟؟هذا اللي قدر عليه؟ يمه بيتهم صاير شعبي وقديم ويفشل! كل البيوت اللي حولهم ترممت وتغيرت من الداخل والخارج إلا بيتهم باقي على حاله..اشفيه ناصر نايم ومو مهتم؟على الأقل يغير العفش اللي صار له أكثر من 12 سنة!!!!!! هند:ولاتنسين انه كله جلسات عربي(مساند ومتاكي)..والمطبخ حالته تجيب المرض!! أم تركي:وش تبوني أسوي له؟كل ماقلت له ياولدي غيِر بدِل قال:ماأقدر هالعفش من ريحة المرحومة(بإذن الله)!!!! سماح:وهو مايقدر يتذكر أمه الله يرحمها إلا بريحة العفش؟اللي أكل عليه الزمن وشرب؟؟خل يتذكرها بدعوة صالحة أو صدقة أبرك له.. هند:وبعدين يايمه لاتنسين إن رانية خطيبته بنت رابية على العز والدلال..أكيد أهلها بينصدمون لاشافوا البيت..نسيتوا اننا بنستقبلهم فيه لاحضروا يرتبون أغراض بنتهم؟؟؟ سماح:تدرين يمه؟مالي غير تركي هو اللي يقنعه!!وأنا مستعدة أنزل السوق وأختار له أثاث.. هند:وأنا راتبي توي استلمته ماعندي أي مانع أدعم ناصر مادياً إذا هو رافض يدفع!! سماح:مايحق له يرفض يدفع!وظيفته زينة وراتبه أزين..والبيت هذا مِلك له مو أجار..ووارث من أبوه أرض لو يبيعها تجيب له ذهب! ولاتنسون ان بيته دورين منفصلة يعني بإمكانه يأجر واحد من الأدوار!أجل وش حقه هالشح اللي عايش فيه؟؟أخاف إنه بخيل يمه؟؟ أم تركي:لا بالعكس لابخيل ولاشي..إلا قروشه ضايعة هنا وهناك ومايعرف يرتب نفسه.. هند:أجل نكلم تركي يقنعه يغير أثاث البيت وإحنا مابنقصر معاه بشي.. وفعلاً اتصلت سماح بتركي وقالت له يقنع ناصر بتغيير الأثاث وهم بيساعدونه في الاختيار وهو عليه يدفع... وتقابل تركي وناصر بأحد المطاعم وقاموا يسولفون عن ترتيبات يوم الزواج والعشا ونواقص القصر... تركي:شوف أي نواقص خاصة بيوم الزواج والقاعة أنا بأتكفل بها وإنت حط جهدك هاليومين بتأثيث بيتك.. ناصر:ليش؟اشفيه بيتي؟يهبل وشاري فيه غرفة نوم جديدة!! تركي:وإنت دايم قنوع؟لايمكن تتحسن شوي للأفضل؟؟أثاث بيتكم قد عفا عليه الزمن.. وماأتصور فيه بنت بهالزمن ممكن ترضى بهالمستوى!!حتى خواتي معترضات عليه!!!!!! ناصر:وش علي من خواتك؟بيجون يسكنون معنا؟؟ تركي:لا..بس لاتنسى إنه ماعندك خوات يفزعون لك ويوقفون بجنبك..وخواتي ماراح يقصرون معك لو تبي..إنت بس توكل على الله.... ناصر:لاتكبرون السالفة!خطيبتي ميتة علي..لو أسكِّنها بـ جحر ضب بترضى!!بس انتم ارتاحوا.. تركي:أصلاً بيتكم أول شي لازم يتغير فيه الريحة!!! ناصر:وش تقصد؟؟ تركي:ياخي البيارات اللي حولكم مخلية البيت مرتع للحشرات والفيران..أسألك باللي خلقك؟إنتي رشيت البيت قريب؟؟ ناصر:لا..في خاطري أرشه قبل الزواج بيومين!!! تركي:لاياشيخ؟؟بعد ماأهل عروستك يجون يرتبون عفشها؟؟ اسمعني زين من بكرة الصبح لازم أنا وإنت نجيب فريق رش ينفضون لك البيت! ناصر:تم!! =============== ثاني يوم جاء فريق الرش وشالوا كل العفش من مكانه..وتفاجأ تركي من قذارة البيت اللي عايش فيه ناصر!!خاصة وإنه أول مرة يدخل لين داخل... العادة إنه يقعد معاه بمجلس الرجال!!!! كان البيت كله موكيت وقدييييم جداً والبقع عليه من كل مكان.. والجلسات العربي مهترأة من كثر الاستخدام وطول العمر!!! ناصر:اش رايك ببيتي؟مو حرام أغير هالأثاث اللي لو تلف الدنيا كلها مابتلقى مثله!!! تركي:طبعاً لايمكن ألقى مثله إلا بمتحف فتح الرياض وتأسيس المملكة!!وش ذا القرف وش ذا المكان اللي لايمت للحضارة بصلة؟ماتستحي على وجهك إنت يوم تخلي أرحامك يشوفون هالمكان؟؟؟؟ ناصر:يعني هذا رأيك؟؟ تركي:لاااا؟ إنت باقي تشاوِر وتحاور؟؟ماتشوف العثة شلون ماكلة حشوة المساند؟؟وبعدين اش هالوساخة اللي تارسة البيت؟ ناصر:تدري فيني أنا عزوبي ومالي بالتنظيف وشغلات النسوان!! تركي:ياخي جيب لك واحد من هالهنود أو الأفغان اللي عايشين حولك يساعدك بتنظيف البيت!!! ================= وبنفس اليوم أخذ تركي أمه وخواته ووداهم يشوفون بيت ناصر وفتح لهم ناصر الباب وقعد بالمجلس.... سماح:وعععععع..من صدقه هذا يخلي بنت الناس تعيش بهالخرابة؟ هند:لو نحط كم قطعة أثاث هنا ونعلق براويز..ويقلب الأرض سيراميك..يطلع البيت مقبول!! أم تركي:المطبخ هو المصيبة الكبيرة بهالبيت!!أم ناصر الله يرحمها كانت سنين مشلولة لاتقوم ولاتتحرك واعتمادها على الشغالة..والشغالة شغلها مو ذاك الزود...الدواليب شاربة موية ومتفقعة!! وراح تركي وقال لناصر:خواتي يشوفون من اللازم يتغير مطبخك! ناصر:ياخي مابقى شي على العرس..وإنتم تفكرون بتفصيل مطبخ؟؟متى بيخلص؟؟ رجع تركي لخواته وقال لهم كلام ناصر..... سماح:ياخي فيه اختراع اسمه مطابخ جاهزة مثل اللي بإيكيا..نجيبه بيوم واحد ونركبه مابياخذ وقت! المهم رسموا أخوات تركي تصور لكل النواقص اللي بالبيت وحطوا ميزانية معقولة وبدأوا بالتسوق.. ============== ببيت اسمهان كان الجو يسوده فتور..عبدالرحمن مشغول أغلب الوقت! اسمهان:دحوم؟إنت مو ملاحظ إنه في شي غير طبيعي؟؟ عبدالرحمن:لا..خير وشهو هالشي؟ اسمهان:صار لك مدة يا مقابل المدونة على النت..يا فوق الأوراق تكتب بهالمقالات..يا تتابع رسايل القراء... يالاهي بشغلك وسمهونتك مالها فيك نصيب!!! عبدالرحمن:أدري إني مقصر..بس هذي مشاغل الدنيا وش أسوي؟ اسمهان:ومعقول مشاغل الدنيا هذي بتكون أهم من زوجتك؟؟ عبدالرحمن:أكيد مافي شي أهم منك عندي..س غصب عني لازم هالمشاغل تاخذ مني جهد ووقت! اسمهان:بس هذا مو حال!إنت داري كلها اسبوعين وبتجي الاختبارات النهائية..يعني بأنشغل بالمذاكرة طول الوقت!وعقبها يكون زواج أخوانك وارتباطات عائلية..على الأقل خل نغتنم الفرصة الحين ونجلس مع بعض! عبدالرحمن:طيب..وين تبينا نروح بهالليل؟الساعة صايرة وحدة بعد منتصف الليل..!!! اسمهان:أنا ماقلت نطلع..قلت نقعد مع بعض.. وبعد هنيهات من التفكير.. عبدالرحمن:زين..اش رايك نطلع الحوش نتسابق؟؟ اسمهان(بسعادة):ايه ياليت!! عبدالرحمن:خلني أتصل بأمي أول..أخاف أحد من اخواني برة بالحوش.. اتصل عبدالرحمن بأمه.. أم عبدالرحمن:هلا ياولدي..غريبة متصل هالحزة فيه شي؟؟؟ عبدالرحمن:لا..إنتي بعدك صاحية؟ أم عبدالرحمن:لا كنت نايمة بس صحيت أصلي الوتر..وبأرجع أنام.. عبدالرحمن:ووينهم أخواني؟؟ أم عبدالرحمن:نايمين هم بعد..لأننا بكرة من الصباح بننزل السوق ونكمل لوازم مطابخهم..ومواعينهم عبدالرحمن:بغيت أنزل الحوش أنا واسمهان نشم هوا شوي..قلت أتأكد إن كان فيه أحد.. أم عبدالرحمن:يالله مساء خير؟؟انزلوا ماحد حولكم..... ونزلوا الزوجين..وقاموا يتسابقون بالركض..وكان عبدالرحمن يتعمد إنه يتأخر بالجري عشان تفوز اسمهان وتحس بلذة الفوز!!!! وكانت أم عبدالرحمن تسمع أصواتهم وضحكهم بآخر الليل..وقامت تطالعهم من ورا الشباك وتقول:يامثبت العقل والدين!!ثبِت عليهم عقولهم!!!!!! بعد ماحسوا بالتعب جلسوا على مرجيحة على شكل أريكة وقاموا يسترجعون ذكريات الماضي والخطوبة..ويضحكون.. اقترح عبدالرحمن على اسمهان انهم يلعبون ألغاز!! اسمهان:بس بشرط !اللي مايعرف الاجابة ياخذ دورة حول الحوش بالدراجة! عبدالرحمن:تعرفين تسوقين الدراجة زين؟؟ اسمهان:طبعاً..!! سألها عبدالرحمن:كان العرب يقولون(تركنا الديار بلاتع صلاقع)اش يعني؟؟ اسمهان:أقول؟بأركب الدراجة!ماعرفت!! عبدالرحمن:يعني خالية من أهلها! وقامت اسمهان تاخذ لفة بالدراجة وعبدالرحمن يطاردها!! ورجعوا جلسوا على المرجيحة.. اسمهان:جاوبني؟وشهو الطير اللي إن أخذت عينه نام؟؟؟ عبدالرحمن:نعام! اسمهان:شاطر..عرفتها..طيب خذ هاللغز اللي بعده.. أخرس مايتكلم وبليد مايفهم وبين الناس بالعدل يحكم؟؟؟؟ عبدالرحمن:الميزان... اسمهان:يوووه شكله ماحد بيسوق الدراجة هالليل غيري!!زين حل هاللغز(له جلد بس مو حيوان، وله ورق بس ماهو نبات، وله لسان لكنه مو إنسان؟؟؟اشهو؟؟ عبدالرحمن:الكتاب! اسمهان:صح..أف منك..كل شي تعرفه؟؟ عبدالرحمن:طيب اش أسوي فيك أسئلتك قديمة أعرفها من يوم أنا بزر! زين اسمعي لغزي:خبريني عن شي أوسع مافيه فمه..وابنه في بيته يلكمه وإن صاح مالقي من يرحمه؟؟ اسمهان:مستحيل أعرفه!قول إنت عبدالرحمن:الهاوند..اللي تستخدمونه بالمطبخ!! اسمهان:ماكنت بأعرف الاجابة لو بعد مليون سنة!!يلا بأقوم أنفذ العقاب وأدور بالدراجة! وراحت اسمهان تاخذ لفة بالدراجة حول الحوش الكبير..وقعد عبدالرحمن على المرجيحة... ينتظرها...لكنها مارجعت!!! وطال انتظاره واسمهان لاحس ولاخبر!! وراح يدوِر عليها بالحوش اللي أنواره مطفية..لقاها متخبية ورا جدار وتبكي!! تعتقدون ليش؟؟؟؟؟؟ 0000 0000000 000000000 000000000000 شافها عبدالرحمن وقال(بزعل):اش تسوين هنا؟؟؟ أشرت له اسمهان بيدها عشان يسكت وأشرت بإصبعها لجهة سياراتهم الواقفة بالكراج.. التفت عبدالرحمن ولقي واحد واقف بوسط الظلام ومعاه كشاف وفاتح باب السيارة ويفتش بداخلها!! راح عبدالرحمن يركض له وسحبه وضربه بأقوى ماعنده على وجهه..وصاح الرجال!! عرفه عبدالرحمن من صوته وسلَّط الكشاف على وجهه..تتوقعون مين طلع؟؟؟ ___ ----- ------- أخوه عبدالمجيد!!!! عبدالرحمن:عبدالمجيد؟؟سامحني.. اش قاعد تسوي بوسط الظلام؟؟ وقام عبدالمجيد يأشر له انه نسي جواله قبل لاينام بالسيارة وقاعد يدور عليه!!! خلى عبدالرحمن أنوار الحوش مطفية مثل ماهي وقال لاسمهان:قومي خل نطلع بيتنا! اسمهان(وهي تبكي):مو قادرة أقوم!!! عبدالرحمن:يابنت الحلال هذا مو حرامي..طلع اخوي عبدالمجيد..ورجع للبيت خلاص.. اسمهان:أقول لك مو قادرة أقوم..طحت من فوق الدراجة قبل شوي!! عبدالرحمن:لاحول ولاقوة إلا بالله وشالها وطلعوا بيتهم فوق.. ولما دخلوا البيت في النور كانت قَدم اسمهان وارمة وتنزف دم!! ساعدها عبدالرحمن وقام يجفف الدم ويعقم قدمها وهي تبكي مو قادرة تحركها.. عبدالرحمن:المشكلة وين أروح فيك بهالليل؟؟اسمعي خل ننام ولاطلع الصبح نروح المستشفى ونشوف اش سالفة قدمك؟؟ اسمهان:ايه..أنا النوم كابس علي بعد التعب والركض وودي أرتاح وبعدين نروح المسشفى. عبدالرحمن:زين.. مادام كان فينا حيل نركض ونلعب فالأولى إننا نصلي ركعتين في هالليل.. اسمهان:مو قادرة أوقف على رجلي.. عبدالرحمن:بس أتوقع إنك تقدرين تقرأين القرآن..صح؟؟؟ اسمهان:صح! ناولها عبدالرحمن كتاب تفسير القرآن وقعدت تراجع الآيات اللي حفظتهم قبل.. وأما عبدالرحمن قعد يصلي وعقب الصلاة قام يدعي دعوات كثرة منها..اللهم ارزقنا بالذرية الصالحة سمعته اسمهان وانطلقت الدموع من عينها مثل الشلال!! شافها عبدالرحمن وتوقع انه السبب من ألم رجلها... عبدالرحمن:مايخالف تحملي الكم ساعة الجايين وبالصبح نروح للمستشفى.. وشالها وحطها بالسرير ونام جنبها وفي الصباح صلوا الفجر وانتظروا الشروق وراحوا للمستشفى اللي اكتشفوا وجود كسر بسيط بالقدم وجبسوا قدم اسمهان وعطوها عكازات تساعدها على الوقوف!!!!!!! وهم راجعين للبيت كانت أم عبدالرحمن قاعدة تفطر مع عبدالمجيد وعبدالرحيم استعداداً للروحة للسوق عقب الفطور وكانت الساعة 10 الصبح.. انتبهت أم عبدالرحمن لوجود كدمة بوجه عبدالمجيد وسألته عن السبب! شرح لها عبدالمجيد الوضع وإنه عبدالرحمن ضربه في الليل!! أم عبدالرحمن مافهمت الموضوع زين وتوقعت انه سبب ضرب عبدالرحمن لعبدالمجيد هو إنه شاف اسمهان..وضربه عبدالرحمن من باب الغيرة!!!!!!!! واتصلت على عبدالرحمن وكان راجع من المستشفى فقال لاسمهان:أمي تبيني اش رايك تدخلين عندها تحت بدل ماتطلعين فوق وقدمك تعبانة..؟ وافقت اسمهان,,وطقوا الباب وفتحت أم عبدالرحمن ووجهها مقلوب من الزعل!!! ويوم شافت اسمهان قالت:خير اشفيها؟؟؟؟؟ عبدالرحمن:طاحت أمس بالليل وانكسر قدمها!! أم عبدالرحمن:طبعاً!!!هذي آخرة اللعب بأنصاص الليالي!تقدر تفسر لي..بأي حق تمد يدك على أخوك؟ شرح لها عبدالرحمن الوضع بإنه اعتقده حرامي وطب عليهم يسرق شي من السيارة!! سألت أم عبدالرحمن ولدها عبدالمجيد:ليش مافتحت أنوار الحوش بدل ماتستخدم الكشاف؟؟؟ عبدالمجيد(بلغة الاشارة):لأني حسيت بوجود وحركة اسمهان وعبدالرحمن بالحوش وماحبيت يتضايقون من وجودي ويحسبوني أتلصص عليهم!! أم عبدالرحمن:بالله لابغيتوا تلعبون اختاروا وقت مناسب..أو العبوا بالمكعبات أحسن!!!!!وبعدين السطح عندكم فوق ليش ماتلعبون فيه؟؟؟؟ عبدالرحيم:ههههههههههههه وأنا اللي أحسبك رزة يادحوم!آثاريك تلعب مثل البزران؟؟هههههه علمني بالله اش تلعبون؟؟؟ عبدالرحمن:لايكثر هرجك!نشوفك ان شاء الله عقب الزواج!!إن ماعلقت زوجتك على ظهرك وقمت تجري بها فوق السطوح!!!!ماأكون عبدالرحمن!!!! عبدالرحيم (وهو فاطس من الضحك):هههههههههههه أخاف هذا اللي سويته البارح عشان كذا انكسرت رجل زوجتك!!!! اتصلت أسماء على اسمهان يوم الخميس يوم السقوط التاريخي لسمهونة بالحوش!!!في الظهر أسماء:السلام عليكم ورحمة الله وبركاته.. اسمهان:وعليكم السلام!! أسماء:ياعالم ياهووه إذا حييتم بتحية فحيوا بأحسن منها أو ردوها! اسمهان:مافيني حيل!! أسماء:ياساتر يارب!ليش؟ لفيتي البيت ونفضتيه شبر شبر؟؟ اسمهان:إلا لفيت الحوش وتكسرت شبر شبر!! أسماء:مجتهدة والله..خل شغالة أم عبدالرحمن تغسله..ليش تغسلينه انتي؟؟؟ اسمهان:ماغسلته ولايطراني..إلا انغسل شراعي بذا الحوش!! أسماء:المهم..ماعندي وقت أضيعه..بالمختصر المفيد كلمت أهلي تجتمعون عندي اليوم..فتفضلي معاهم عقب المغرب نسهر ونستانس ونتعشى مع بعض... اسمهان:أنا أنزار ماأزور!! أسماء:ليش؟نفاس؟ولا بـ حِداد؟؟ اسمهان:فال الله ولافالك يالظالمة!أي حداد؟ الله يحفظ لي دحومتي..بس قدمي منكسرة ومو قادرة أمشي عليها..تعالوني انتوا.. أسماء:سلامات سلامات..ياعسى الكسر بـرِجل العدو ان شاء الله..بس شلون انكسرت؟أخاف تنطين فوق السرير مثل العادة؟؟ اسمهان:لا ماأنط..هذاك زمان أول ياأسوم!هالحين عقلت! أسماء:هههه عقلتي؟؟أشك في ذلك يابنية!زين علميني شلون انكسرت رجلك؟؟ اسمهان(بلهجة حزينة وهي تطالع بقدمها):كنت ألعب بالسيكل قبل الفجر بالحوش..وصدمت بالسيكل في الجدار وطِحت... أسماء:هههههههه وتقولين عقلتي يامال الخيبة؟زين اقعدي ببيتك لاتجين معذورة..أهلي يكفون!أخاف تجين عندي وتركبين بـمشاية لينة بعد!!!عاد انتي مايندرى عنك!!!هههههه وقفلت اسمهان السماعة بعد نهاية المكالمة..إلا التليفون يرن.. اسمهان:آلو ياهلا.. أم عبدالرحمن:هلا فيك يابنتي..هاه؟بشري شلونها رِجلك الحين؟؟؟ اسمهان:مرة تآلمني مو قادرة أوقف عليها.. أم عبدالرحمن:طبيعي..هذا كسر يابنتي موب حاجة هينة..عموماً أنا قلت أكيد مابتقدرين تطبخين وأرسلت لك غدا مع الشغالة افتحي لها الباب... اسمهان:ان شاء الله.. أم عبدالرحمن:ايه وبعد بغيت أقول لك..اليوم الأولاد يبون يسوون العشاء شوي دجاج وشيش طاووق بالحوش فكلمت جوهرة وأحلام وأم منصور جارتنا يجون يسمرون ويتعشون معانا..انزلي لنا عقب المغرب.. اسمهان:هذي ثاني دعوة تجيني اليوم ياخالتي..أسماء أختي تبي تجمعني أنا وسماح وأمي عندها بس اعتذرت عشان رِجلي.. أم عبدالرحمن:والله فكرة!اش رايك أنا أنادي أمك وأختك وزوجة أخوك يتعشون معانا الليلة؟؟ اسمهان:ياليت!بس مانبي نكلف عليك خالتي.. أم عبدالرحمن:ولا كلفة ولاشي..أم منصور الغريبة بتجينا وتسمر معانا..فما بالك بأهلك؟كلنا أهل ومابيننا رسميات..بأروح الحين أتصل بأمك.. وشوي إلا والشغالة مقبلة بالغداء..فتحت لها اسمهان الباب.. وأما عبدالرحمن كالعادة قاعد بالمكتب يسطر إحدى المقالات.. تغدوا مع بعض,, وشوي وعائلة اسمهان كلهم دروا عن رِجل اسمهان المكسورة وقاموا يتصلون...وقالت لها أمها قبلنا دعوة خالتك للعشا..عشان نتطمن عليك بالمرة..وبطلنا من الروحة لأسماء وبتجي معانا.. ============ في بيت مرام..كانت استعدادتها للزواج على قدم وساق ماتصدق بإجازة نهاية الأسبوع تجي عشان تنزل السوق وتجهز نفسها.. ماجدة:كنت متوقعة تحضيراتك ليوم الزواج بتكون أقوى من كذا..وخاصةً إنه في عروس ثانية معاك بنفس الليلة..لكن أشوفك متطمنة والموضوع عادي عندك!!! مرام:طبعاً!هذي العروس لو إنها وحدة ثانية غير مشاعل كان شلت هم!لكن مشاعل جداً عادية ومالها بالحركات ولاالتقليعات!!في جميع الأحوال بأكون أنا المميزة!!! ================== أما أفنان وصلت ممرضة فليبينية خاصة لأختها سندس وكانت مُدربة بشكل ممتاز للتعامل مع مثل هالحالات..وارتاحت أفنان لوضع أختها يوم شافت الممرضة ممتازة! وبدأت تفكر بشكل جدي بنفسها وتستعد قبل الامتحانات..بتجهيز لوازم الملكة والعرس.. ============== أما نجلاء كانت هايمة بكل قصة تسمعها عن ولد خالتها(ماجد)..اللي يشتغل بمجال الطيران..وكان ساكن بالرياض..وكانت تعد الأيام عد خاصة انه وعدهم يتقدم رسمي ويشوفها بعد 3 شهور من اجازة الصيف.... =============== أما رانية كل مالقت نفسها فاضية راحت تشتري لنفسها أغراض من السوق.. وكل مااتصل ناصر على جوالها قالت له:أنا بالسوق! وبمرة من المرات,,,, ناصر:وش سالفتك؟كل مااتصلت عليك قلتي أنا بالسوق؟؟ رانية:طبيعي يالحبيب..وراي زواج لابد من التجهيزات... ناصر:وش تجهزين له؟السوق وجنبنا موب طاير..وأنا قابلك مثل ماإنتي.. رانية:عيوني..أنا عروس .. عرروووووس!!تفهم اش يعني؟؟يعني لازم أكون متجددة وكاشخة.. ناصر:مساكين حِنا الرِجال!!يشقى الواحد سنين عشان يجمع المهر ...ويعطيكم اياه تصرفونه بلحظة!!وعلى ايش؟على شوية همول وأصباغ تلطخها الوحدة على خشتها..على بالها بتتحول من حصيصة لـ جويل!!!! رانية:مو حرام ولاعيب..كل بنية من حقها تاخذ المهر تضيعه بيوم ،تضيعه بشهر ،تقطه بالبحر!!هي حرة!طالما خرجت القروش من جيبك..فعلى الدنيا السلام!! ناصر:آآآآه..ياحسرة قليبك ياناصر! حمدت ربي ماعندي خوات..وطلعوا لي خوات تركي من تحت الأرض..كل يوم يشترون ويخلوني أدفع!! رانية:وخوات تركي اش دخلك فيهم تصرف عليهم؟؟ماعندهم أزواج؟؟؟؟؟ ناصر:هم اللي قاعدين يأثثون بيتنا..وأعطيهم فلوس عشان يكملون التأثيث.. رانية:ياعسى ربي يجزاهم خير..في أسوأ الأحوال بيكون ذوقهم أفضل من ذوقك!! ناصر:أفا يارنون!!مايعجبك ذوق خطيبك؟؟؟ رانية:خطيبي؟؟خطيبي اللي بيفتح لي زريبة حيوانات بالبيت؟؟مرة أهديتني بقرة قطن!ومرة أهديتني عصفورين بقفص أبلشونا بأكلهم وشربهم وأصواتهم ووسخوا لنا البيت!ومرة مهديني سلحفاة!!ومرة قطعة قماش عليها رسومات طيور النورس!!!خيييير؟؟ تشتغل طبيب بيطري إنت؟؟؟ ناصر:إنتي لو جيتي البيت بتشوفين مخلوقات ثانية من نوع آخر!!!!!!! رانية:لا لا تكفى أنا أتحسس من الحيوانات..لايكون البيت بعد متروس طيور؟ ناصر:لا فيه بساس وقطاوى!! رانية:وعععع ليش؟؟ ناصر:عشان تاكل الفيران اللي بالمطبخ!!!!! التقت اسمهان بأهلها يوم الخميس في بيت أم عبدالرحمن على عزيمة العشاء وكانت شوي تفننوا فيه الرِجال بالحوش..... وقاموا يسألون اسمهان عن طيحتها وراحت تحكي لهم... أم اسمهان:زين اللي مرت على كذا يابنتي..والمفروض إنك ماتركبين دراجة..افرضي إنك حامل..كان رحتي فيها!! أم عبدالرحمن:ماألومها..أنا ألوم اللي مشجعها ومآخذها بنص الليل بوسط الظلام!!الناس نايمة أو ساهرة تتعبد ربها وهذول يدورون عن الوناسة واللعب!! أحلام:أنا كسر خاطري عبدالمجيد..أخذ علقة وهو مظلوم!! جوهرة:وحتى اسمهان انقلبت الوناسة نكد!! أسماء(تهمس بإذن اسمهان):الله يقطع إبليسك فعايلك تفشل!!حتى الرَجَّال هبلتي فيه؟؟ سماح(بصوت منخفض):ههههههه ماشاء الله مابقى أحد مادرى عنكم ياسمهونة!إذا بليتم فاستتروا.. اسمهان(بانفعال):واشفيكم سويتوا من الحبة قبة؟ أنا وزوجي نحب نلعب مع بعض دايماً..هالمرة حبينا نسوي تغيير فطلعنا الحوش.. أم عبد الرحمن:بس مرة ثانية اختاروا وقت مناسب يابنتي... اسمهان:اش أسوي لولدك اللي مشغول طول اليوم؟؟ومايفضى لي إلا بهالوقت؟؟ أم اسمهان صارت تغمز لبنتها عشان تسكت!! أم عبدالرحمن:معليش يابنتي..بس حتى انتي مشغولة عنه باقي الأيام بدروسك ومدرستك!!كلها 3 أسابيع وبتجلسين مقابلته 3شهور بالاجازة لين ماتملون من بعض!!! أسماء(تهمس بإذن اسمهان):تحمدي ربك على أم زوجك الذوق هذي!هالكلام لو قالته أختك ابتسام لأم زوجها كان حذفتها بالنعال!!!!! ودارت الجلسة عن سوالف ثانية مختلفة وكانت جلسة لطيفة.. أم عبدالرحمن:سماح؟انتم زواج أخوك وولد عمك بيكون نهاية الشهر اللي بيتزوجون فيه أولادي صح؟؟؟ سماح:كان هذا اللي بيصير...لكن تفاجئنا انه ولد أخو ناصر اللي تملك بالشرقية قبل فترة بيتزوج بنفس اليوم!!وعلى كذا الكل بيحضر زواجه وماحد بيحضر زواج ناصر من اخوانه وقرايبه..فأجلنا موعد الزواج وصار بالأسبوع اللي بعده!! أم عبدالرحمن:الله يتمم لكم على خير..ومايحتاج أعزمكم انتي وأهلك على زواج أولادي العرس عرسكم...والله يحييكم... سماح:الله يحفظكم..ويوفقهم يارب.. واستمرت السهرة والعشا,,وكل واحد رجع بيته =================== ثاني يوم وكان الجمعة..اتصلت اسمهان برانية..وبعد ماثرثروا شوي.. اسمهان:آثاري زواجكم تأجل؟ولاعلمتيني يارنونة؟ رانية:احلفي؟وش هالخراط؟؟ اسمهان:ماهو خراط!هذا الخبر اللي وصلني أمس من سماح.. رانية:وليش يأجلونه؟أحد مات؟ اسمهان:لا فاولي خير..بس زواج ولد أخو ناصر بيكون بنفس اليوم وعلى كذا ماحد بيحضر من اخوان ناصر اللي بنفس الوقت يصيرون أولاد عم تركي..وماشاء الله عددهم كبير هم وأولادهم يعني غيابهم يأثر.. رانية:غريبة ماعلمني نصور!وش هالنذالة اللي فيه؟وموعدي عند الكوافيرة؟قد حجزت من أول!والمصورة؟وملابسي اللي بتصغر علي؟كل يوم وأنا أشوف الأكل وودي أحشيه ببطني ومو قادرة..ماسكة عمري عشان لايزيد وزني وأتوهق بالملابس اللي شاريتهم..لو تشوفين وش كثرها تحسبيني بأفتح بها محل!! اسمهان:الله أكبر..كل هالأشياء فكرتي فيها؟؟ترى الزواج تأجل أسبوع واحد بس! رانية:أشوى!الحمد لله..على بالي أسبوع ويوم!! =================== ويوم السبت راحت اسمهان المدرسة بالعكازات! وتفاجئوا الشلة ..وكل وحدة قامت تسألها عن السبب.. رانية:اشفيك؟سلامات؟ اسمهان:هذي طيحة من يوم الأربعاء.. رانية:وأمس يوم كلمتيني ماجبتي لي طاري! نجلاء:طيحة؟؟لايكون عبدالرحمن دفِك من الدرج؟ أفنان:أو كنتي تتزلجين على بلاط المطبخ وصار اللي صار برِجلك؟؟؟ مرام:لاتتعبون نفسكم بالتخمينات..كانت تلعب هي وزوجها بالحوش وطاحت من فوق السيكل!ههههه اسمهان:وانتي اش درَّاك؟؟ مرام:رحومتي قال لي يوم الخميس..وفطست ضحك!!وش هالرجة اللي فيكم تطلعون بأنصاص الليالي مثل الحرامية عشان تلعبون؟اثقلوا شوي كبرتوا على هالكلام!!! رانية(ترد على مرام):تكفين ياالرزة!!زوجها وهي حرة فيه.. تغسله أو تكويه!أو تلعب معاه بالليل أو النهار..كيفها إنتي وش حارق رزك؟؟؟ اسمهان:أنا أدري؟؟كل من درى بالسالفة قام يتشمت من صوب!خلوها قضية الموسم وهي ماتسوى!خل رجلي تنكسر أنا راضية!أهم شي إني تونست مع زوجي!!! أفنان:جزاه الله خير إنه يلعب معاك ويونسك..نادراً ماأسمع عن رِجال يحب يلاعب زوجته مع إنها سنة عن المصطفى.. نجلاء:شلون سنة؟أول مرة أسمع!! أفنان:ارجعي لسيرة الرسول وانتي تعرفين..الرسول صلى الله عليه وسلم كان يسابق السيدة عائشة..ويخليها تتفرج معاه على الأنصار وهم يلعبون بالحرابة..وله قصص كثيرة في ملاطفته لزوجاته وادخاله للسرور على قلوبهم..هذا وهو مشغول بأمور الأمة والرسالة مرام:أنا من الحين..شفت وحدة من التاجرات عارضة ألعاب زوجية في المنتدى وطلبت منها طلبية..عشان عقب الزواج ألعب مع رحومتي! رانية:عاد أنا نويصر..أتوقع إني مايحتاج أطلب منه يلعب معي..لأن كل حياته لعب بلعب وسبهللة! نجلاء:هههههه ليش؟؟ وقامت رانية تسرد لهم بعض المواقف الطريفة اللي صارت لها مع ناصر وهم يسمعون بحماس ويضحكون!!! أفنان:ياحليله..خفيف ظِل بقوة..بس ياحظك ماشاء الله..يكون فرفوش ولايكون نكدي وعصبي! نجلاء:اللي مثل خطيبك يارانية يظل قلبه شباب ومايشيب لأنه مآخذ الدنيا ببساطة ومايشيل هم شي... اسمهان:صراحة لما يحكي لي عبدالرحمن عن بعض مواقفهم بالعزوبية يحوشني ضحك مو طبيعي.. مرام:وشفيكم حاسدينها عليه؟؟بصراحة ماأقول غير الله يعينك يارانية..شكله مرجوج حيل!بالله هذي سواليف رجال محترم؟؟أنا رحومتي عسى الله لايخليني منه خفيف دم بس بطريقة عقلانية مو كذا!!!! رانية:رحومتك عقلاني..لأنه باقي ماجرب عِشرتك! لو درى بـ دلعك ومصاختك بينغث قلبه ويوريك السنع!! مرام:أشوف كأنك غيرانة؟؟ رانية:وأنا أشوف كأنك ملسونة شوي؟؟ نجلاء:وأنا أشوف لو تسكتون انتوا الثنتين يكون أحسن!!! =========== وكان ناصر كل يوم يتصل برانية ولايجيب لها طاري عن تأجيل موعد الزواج!وهي بعد محترة تبي الخبر يجي منه هو ولكن ماخبرها..لين يوم من الأيام دزت له مسج تقول فيه: (سمعت إنه موعد زواجنا تأجل!لو هالخبر صحيح بلغني..لأنه عندي نية أحْضُرْ!!!!) اتصل ناصر:كاااااااااااااااااااك..تص دقين كنت بأعزمك على عرسنا بس كرت الدعوة باقي ماانطبع؟؟؟!!!ههههههههههه رانية:ضحكتني وأنا ماأبغى أضحك!!!بالله هذا شي يشرفك؟أسمع الأخبار من الناس وخطيبي مايبلغني؟؟ ناصر:نسيت يالغلا نسيت ومانويــــــــت ولاقويت وإن حكيت أو شكيــــت غصب ألقى نفسي بكيت إنتــــــــي نامبـــــر ون وغيرك نمبر ايت!!! رانية:أقول حق من رشك إنت وفيرانك بـ فليت! ناصر:لايالغلا..مانسيت أقول لك ولاشي بس كنت مخطط أزورك قبل لاتبدأ الامتحانات وأجيب لك هدية راهية وأعلمك بخبر تأجيل الزواج!وبعدين وش عليه انتي مستعجلة؟باقي على الزواج شهر و3 أسابيع!!! ====================== وبالفعل زار ناصر رانية قبل الاختبارات..ورانية تتسائل بينها وبين نفسها ياترى وش بتكون هديته؟؟؟ الله يستر منك ياهالناصر!!!ماأستبعد يجيب لي حمار مع علف وحشيش!!!! لكن ناصر حضر ومعاه سله كبيرة مغلفة بطريقة أنيقة!! رانية:لا لا ماأصدق أكيد إنت موب ناصر!وش هالكشخة كلها؟؟أخاف أفتحها وألقى حشرات أو حيوانات!! ناصر:ههههههههه لا افتحيها الدرب أمان.. فتحتها رانية ولقيت علبة بداخلها طقم(عطر+شاور جِل+لوشن)حلوة وغالية.... رانية: واي تهبل!!مو معقول لاتكون مدتها منتهية بس؟؟!!! ناصر:أفا يارنون!الصراحة إنك محقرتني بزيادة!أنا هداياي السابقة لك مختلفة لأني أبي أيام خطوبتنا تعيش بذاكرتك بمواقفها الغير مألوفة!! رانية(بخجل):ومين قال إني بأنساها؟؟أظل أتذكرها على طول... ناصر(وهو يناظرها بنظرات ذات مغزى!!):أول مرة أشوف القمر بخدودٍ لونها وردي!! وذابت من الخجل إلا وأخوها مشاري داخل عليهم المجلس!! انحرج ناصر وقام غير لهجته وقال:ياخي شيل أختك هالنشبة من قدامي !!من تشوفني تأذيني بلسانها!!! قامت رانية تطالعه باستغراب!!! مشاري:أجل وش تقول عننا وإحنا عايشين معاها 24 ساعة باليوم؟؟تزوجها ولك الجنة ان شاء الله!!! رانية(بداخلها):صدق إنك يانويصر مطفوق!ولايمكن تكمل جميلك!!!!!!! ================== ومرت أسابيع الاختبارات سريعة كلها قلق ومذاكرة وضغط وكل وحدة من الشلة مجتهدة وتبي تجيب نسبة عالية عشان تنقبل في الكلية أو الجامعة.. وبعد ماانتهت الاختبارات وظهرت النتايج كانت كالتالي: اسمهان=96% نجلاء=94% مرام=93ونص% أفنان=90% رانية=88% في الرياض كانت عبير فرحانة بنتيجة تخرجها من الثانوي بنسبة 93%... واتصلت تبشر أبوها بالنجاح..... أبوعبير:مبروك..مبروك..عقبال التخرج من الجامعة يابنتي... عبير:ان شاء الله... أبوعبير:ترى أنا حجزت لكم إنتي واخوانك تذاكر من الرياض إلى جدة بعد 3 أيام..وتقعدون معاي بجدة كم يوم تسلمون على أعمامكم وناخذ عمتك منيرة ومن جدة للبنان..وبعد مدة نروح من لبنان لمصر...بس انتم مستعدين ولا بعدكم؟؟ عبير:أكيد مستعدين ونعد الأيام عد.. أبوعبير:على بركة الله...وبانتظاركم ان شاء الله. أنهت عبير مكالمتها..ولقيت أمها واقفة وراها.. أم عبير:منهو هذا اللي تقولين له مستعدين ونعد الأيام عد؟؟؟؟؟ عبير:أبوي.. أم عبير:حدد لك موعد السفر؟؟ عبير:ايه..بعد 3 أيام بأسافر له أنا واخواني جدة..ونقعد كم يوم وعقبها نروح لبنان.. أم عبير:وليش تقعدون بـ جدة كم يوم؟؟ليه ماتروحون لبنان على طول؟؟؟؟ عبير:أبوي يبينا نجلس بجدة كم يوم عشان نسلم على أعمامنا وبعدين ناخذ عمتي منيرة معانا.. أم عبير:ياسلام!!عشان يستفردون فيكم ويغسلون أمخاخكم!! عبير:واشفيها لااستفردوا فينا؟ وش بيسوون لنا يعني؟؟هذول أهل أبوي وعِزوتنا.. أم عبير:وانتي اش دراك عنهم يالسوسة؟؟هذول أنذال ومايتمنون لنا الخير!! عبير:الأنذال اللي ساكنين حولنا بس مايسألون عننا!! أم عبير:تقصدين أهلي ياقليلة الحيا؟؟ عبير:السموحة منك يمه..بس انتي شايفة بعينك! ماحد يتشمت فينا كثرهم ومن يوم ماطبينا الرياض ماحد عرض خدماته علينا إلا خالي عثمان اللي ساكن فوق ويحبون يتفشخرون علينا بقروشهم..لكن أهل أبوي مايمر أسبوعين إلا ويتصلون فينا ويسألون عننا... أم عبير:مهما سويت لك ياذي البنت بتظلين جاحدة ومافيك خير...وبعدين أهلي مو مكلفين يسألون عنك انتي واخوانك.. عبير:يمه خلك صريحة مع نفسك مرة!أهلك مايتواصلون معانا زين مو لأننا فينا شي!!بس من طريقتك في التعامل معاهم والمشاكل اللي تسوينها مع زوجات أخوالي..حتى خالاتي وهم خواتك صاروا مايستحملون بعض تصرفاتك! أم عبير:والله يابنت أبوسعد!طالت وتشمخت وصار لك لسان تردين فيه علي!!هذا وانتي ببيتي تقولين هالحكي..أجل وشلون لارحتي لبيوت أعمامك؟أكيد بيقلبونك علي انتي واخوانك!!مالت عليكم كلكم مافيكم خير لأمكم!!فكرتوا تاخذون عمتكم الكريهة تتمشى وياكم وخليتوا أمكم اللي تعبت في تربيتكم!! عبير:يمه انتي ليش كذا؟نسيتي انك مطلقة؟وأبوي صار غريب عنك؟شلون تبينه ياخذك معانا بالسفر؟نسيتي كل المشاكل اللي جرت له بحياته من وراك؟؟المفروض يمه تقدرين عمتي منيرة اللي موافقة ترافقني وتوقف بجنبي عقب العملية وطلعت عبير من الغرفة وهي متضايقة.. أم عبير:حسبي الله عليك وعلى أهل أبوك ياعبير..عساكم ماتتوفقون بهاالسفرية!!!!!!!!!!! ============= أما أم عبدالرحمن كانت تجهز ببيوت أولادها وترتب فيها استعداداً لاستقبال أهل العرايس اللي بيجون يرتبون أغراض بناتهم قبل الزواج.. وقبل الزواج بيومين حضروا أهل مرام(ماجدة أختها الكبيرة+زوجات أخوانها الاثنين+أمها+خالتها وبنت خالتها)بجهاز مرام واستقبلتهم أم عبدالرحمن ببيتها في الأول..وكانت مواعدة أهل مشاعل يحضرون بعد بنفس اليوم عشان يرتبون أغراض بنتهم بـ شقتها..وحضر(أم مشاعل+أختها أم أفنان+2 من خوات مشاعل+2 من زوجات أخوانها).. واستقبلوهم(أم عبدالرحمن+اسمهان+أحلام+جوهرة) وبعد ماشربوا القهوة..طلعوا أهل مرام لشقة بنتهم يرتبون عفشها..وأهل مشاعل لشقة بنتهم يرتبون بعد........ أم عبدالرحمن:بعد ماتنتهون ان شاء الله..انزلوا عندي أنتظركم على العشاء... الجميع:ان شاء الله..الله يكثر خيركم.. وكل وحدة من العرايس أهلها رتبوا عفشها على طريقتهم الخاصة...ومرت الساعات وبعد ماانتهوا الجميع نزلوا وتعشوا عند أم عبدالرحمن..... أم مرام:تفضلوا معانا نفرجكم على جهاز بنتنا.. وطلعوا الجميع وكان أغلب الأشياء مشرَّعة بتشريعات فخمة بالتل والساتان والورد والفصوص.. وجايبين معاهم كماليات لبيت بنتهم من أطقم للمطبخ وتُحف وأبجورات ومفارش..وواضح من ملابس مرام إنها بنت جريئة في اختيارها للموديلات والألوان.. أما مشاعل كان ذوقها هادي وناعم وبسيط وملابسها كلها محتشمة ومرتبة وشارية من كل شي بلا افراط ولاتفريط..مع بعض اللمسات للبيت فانحرجت أم مشاعل وقالت:الحقيقة ماندري إن طبعكم تتفرجون على عفش العروس قبل ماتجي هي وتشوفه...عشان كذا رتبنا غرفتها وصكيناها بالمفاتيح.. عقب زواجها هي تفرجكم على أغراضها بنفسها!! أم عبدالرحمن:كل ناس ولهم طريقتهم ياأم مشاعل وحِنا ماندقق بهاالأشياء أهم شي انه العرايس يكونون راضيين ومستعدين... ============================== == رجعوا أهل مرام للبيت... مرام(بانفعال):وينكم؟؟مابغيتوا ترجعون؟؟ أم مرام:أهل العريس مِسكونا على العشاء واضطرينا نتأخر... مرام:رتبتوا الأغراض مثل ماوصيتكم؟؟؟ ماجدة:ايه..تطمني يامدام مرام..حتى السرير سوينا عليه حركة قلب بالعقد اللولو وملينا داخله ورد وحبات كريستال ملونة...والغرفة بعد ماحطينا لمساتنا وديكوراتنا فيها انقلبت 180 درجة!!! مرام:وكيف أثاث البيت؟؟ زوجة أخوها:رووووووعة..أهل خطيبك شكلهم مرة ذوق.. مرام:وش أحلى؟بيتي ولا بيت مشاعل؟ولا ماشفتوا بيتها؟؟ أم مرام:الا شفناه..بس كلن وله ذوقه..بيتك حلو ماجدة:بس يمه متفننين في بيت مشاعل بالرسم على الجدران مدري ليه ماسووا نفس هالحركات ببيت مرام؟؟؟ مرام:هذا لأنه اللي رسم على الجدران ولدهم الأخرس..فطبيعي انه بيزين شقته وش عليه منَّا؟! ========= في بيت مشاعل..استقبلتهم مشاعل بالترحاب.. مشاعل:جزاكم الله خير جميعاً ..عساكم ماتعبتوا وانتم ترتبون أغراضي؟؟؟؟ أم أفنان:الله يرضى عليك ماتعبتينا ولاشي..جهازك كان عقلاني وعدد أغراضك معقول..ماحد تعب صحيح إلا أهل العروس الثانية حتى شغالاتهم جايبينهم معهم يساعدونهم.. مشاعل:الله يبارك لي ولها في هالزواج وييسر أمورنا... ================== رجعت اسمهان لبيتها بعد ماراحوا الضيوف وقابلت زوجها..... اسمهان:تصدِق؟؟بعد ماشفت بيوت أخوانك صرت أحس بيتي قديـــــــــــــــــم!!!! عبدالرحمن:بدينا؟؟بحركات النسوان والغيرة؟؟ اسمهان:لا حرام.ماأغير..بس فعلاً أحس كل شي ببيتنا صار قديم.. عبدالرحمن:بس للعلم ماراح أغير شي..تو الأثاث له سنة وكم شهر بس!! اسمهان:لاماأبيك تغير شي..بس اش رايك نبدل بين أثاث الغرف؟؟يعني اللي بمجلس الرجال ننقله لمجلس الحريم واللي بمجلس الحريم ننقله لمجلس الرجال..ونغير أماكن الطاولات والمرايات والزرع.. عبدالرحمن:بكرة يحلها حلاَّل..تبين نبدِّل أماكن الأثاث نبدل بس أهم شي نفوسنا تظل مثل ماهي وماتتبدل!!تصبحين على خير .. وعطاها ظهره ونام.. أما اسمهان ظلت جالسة على السرير تفكر بكلام عبدالرحمن..وقالت بنفسها:معاك حق ياعبدالرحمن كأني ابتديت أغار من بعض أشياء وأتمنى ترجع أيامي مثل قبل!!!!!!!!ا في ليلة الزفاف بدأت استعدادات العرسان(عبدالمجيد وعبدالرحيم) بالذهاب إلى صالون الرِجال..وترتيب أمورهم... ولما رجعوا للبيت...بعدهم بدقايق وصل عبدالرحمن ودخل عليهم..وسلَّم.. عبدالرحمن:سيارة مين هذي..اللي واقفة برة؟؟ عبدالرحيم:سيارتي!! عبدالرحمن:مين وين جايبها؟؟ عبدالرحيم:استأجرتها مخصوص ليوم الزواج.. عبدالرحمن:ليش؟؟سيارتك أكشخ منها بمية مرة!! عبدالرحيم:مو يالحبيب أنا ناوي أوديها بعد شوي لمحل تزيين السيارات..وقلت بنفسي بدل ماآخذ سيارتي وأزينها وتنعدم..خل أستأجر سيارة وأزينها..أفضل.. عبدالرحمن:وإنت ياعبدالمجيد؟؟ جاوبه عبدالمجيد بلغة الاشارة:لا..أنا راضي بسيارتي وبأروح معاه أزينها.. وراحوا يزينون سياراتهم وبعد ساعات كانت جاهزة بأبهى حُلة!! 000000000000 أما العرايس فكلكم أدرى بالتوتر وكثرة التفكير... في بيت مشاعل... أم مشاعل مافارقت عينها الدموع!! مشاعل:يمه الله يهديك..أنا حية مامت! ليش هالحزن كله؟؟هذا بدال ماتفرحين لفرحتي؟؟؟ أم مشاعل:والله يابنتي..أنا خايفة لاتندمين عقب هالزواج على نصيبك!!على بالك الحياة مع واحد أصم وأخرس..سهلة؟؟؟؟؟؟؟؟؟ مشاعل:يمه لاتكبرين الموضوع..غيري تزوجت انسان مُقعد ومشلول عن كل حركة وعاشت أسعد حياة..الخرس والصمم يهون كثير عن الاعاقات الثانية..وعبدالمجيد انسان خلوق وطيب..وعندي احساس كبير بأننا راح نتوفق مع بعض... أم مشاعل:يارب تتوفقين يامشاعل ويكون هالانسان نعمة لك مو نقمة عليك!! مشاعل:زين..كفكفي دموعك ووريني ضحكتك..وأنا متأكدة لو أبوي عايش كان بيفرح لي ويأيدني في اختياري..... -------------------- في بيت مرام... مرام:ماجدة؟؟أبي سُهير تحط لي بكرة ماكياج لبناني والتسريحة غادة تسويها لي ماأبي سوسن!! ماجدة:لاإله إلا الله...هذي المرة الخامسة اللي تعيدين فيها هالكلام!!خلاص فهمت..صدقيني فهمت! مرام:ويمه..تكفون حريم أخواني وبنات خالاتي أبيهم يروحون قبلنا للقاعة عشان يرتبون للزفة ويتدربون عليها!!!! أم مرام:يابنتي وشفيك؟موب صاحية؟؟زفتك بتكون بآخر الليل..يعني بيقعدون يتدربون عليها 4 ساعات؟؟؟؟ مرام:ياربي..مرة خايفة تكون زفة مشاعل أحسن من زفتي!!لاتنسون إنها بتنزف قبلي بحكم إن زوجها هو الأكبر...!! ماجدة:وإذا طلعت زفتها أحسن؟؟بينقص منك إيد ولارِجل؟؟مرام بتظل مرام طلعت ولا نزلت!!!! مرام:وش أسوي ؟قلقانة!انتم تعرفون الناس وشلون يحبون المقارنات..هذي أحلى..وذيك أكشخ..وهذي أطول..وذيك أكبر!!ودي أحشي إذني بقطن وماأسمع أي كلمة!!! أم مرام:تطمني,,,ماحد بيتكلم ويقول رأيه في وجهك!الكل بيحكي من وراك!ماغير روحي نامي وارتاحي.. ---------------- أما أم عبدالرحمن كانت قاعدة ليلة الزواج مع عيالها توصيهم الوصايا العشر.. عبدالمجيد يقرأ لغة الشفايف ويفهم كلامها .. أما عبدالرحيم يسمع النصايح ويتطنز!!!!! ومن ضِمن كلامها....... أم عبدالرحمن:الله الله بالصلاة..ابدأوا حياتكم بطاعة وصلوا ركعتين لله في أول ليلة تجمعكم ببعض ولاتنسون إن الأنثى تحب اللي يلاطفها ويهدي خوفها بهاالليلة! عبدالرحيم:وش منه تخاف يمه؟؟هي بتقعد مع عفريت؟؟ أم عبدالرحمن:تخاف من الشخص الغريب اللي لأول مرة يختلي فيها يافطين!تخاف من أسلوبه وتعامله معاها!!لاأوصيكم بالملاينة والكلام الزين اللي يشرح القلب! عبدالرحيم:ماعليك يمه ..لاتشيلين هم من هالناحية أنا صرت حافظ دواوين الشعر كلها وبأسمِّعها لعروستي بكرة. وعلى شوية غمزات وهمسات..البنت بتذوب كأنها سكر في شاي مغلي!!! أم عبدالرحمن:أدري بكم ياعيال هالزمن..تعرفون الكُفت!! رِجال أول كانوا مغمضين وحريمهم مغمضات أكثر منهم!!المهم ماودي أسمع عنكم إلا كل خير..ماأبي أحد يجي بيوم من الأيام ويقول لي ماعرفتي تربين عيالك ياأم عبدالرحمن..وعيالك يغلطون على بناتنا!! عبدالمجيد(بلغة الإشارة):أنا بقلبي كلام كثير بأعبر به لعروستي...وكتبت لها أبيات جديدة أكيد بتعجبها أم عبدالرحمن:الله يهنيك ويرزقك على قد نيتك..وخلكم مثاليين بالتعامل..والعصبية ارموها وراكم..بالتفاهم والكلمة الطيبة تنحل أعقد الأمور.. عبدالرحيم:وياترى كل هالوصايا قلتيها لعبدالرحمن قبل زواجه؟؟؟؟ أم عبدالرحمن:الله يرضى على عبدالرحمن ياولدي..عاقل وفاهم ومايحتاج وصية..الخوف منك إنت وش بتطلع!! عبدالرحيم:لاتخافين يمه أنا رهيب وبأعجبك!بأخلي زوجتي تمشي على البيض وماتكسره!كلِش ولا الدلع الزايد الماصخ!! أم عبدالرحمن:الله يعطينا خيرك! عبدالمجيد(بلغة الاشارة):يمه إدعي لي أتوفق مع زوجتي وأكون عند حسن ظنها.. دمعت عين أم عبدالرحمن غصب عنها وقالت:إنت طيب وتستحق كل طيب ياعسى الله لايحرمك السعادة والهنا بعمرك كله ويجعل مشاعل تسعدك وتكون فرحة لقلبك.. عبدالرحيم:وأنا؟؟كل الدعاوي الزينة من نصيب وِرعك ذا؟؟وأنا؟ولد البطة السوداء؟؟؟ أم عبدالرحمن:لاسوداء ولا بيضاء..الله يوفقك ان شاء الله.. ==================== وفي ساعة متأخرة من الليل راح الجميع ينامون..أما اسمهان كانت الفرحة غامرتها وهي تقول لنفسها:أخيراً يااسمهان بيصير عندك سلايف يونسونك ويآنسون وحدتك؟؟؟ ................ (مسكينة يااسمهان ماتدرين وش مخبى لك؟؟؟؟؟؟؟؟؟!!!!!!!!!!!) جاء اليوم المنشود يوم الزفاف وبدأوا الجميع في استعداداتهم...راحوا(أم عبدالرحمن+اسمهان+الخالة جوهرة+أحلام) لصالون التجميل من بدري عشان يخلصون بدري ويروحون يشرفون على ترتيبات القصر... والعرايس كل وحدة بـ حالة.. ولما أقبل وقت مابعد المغرب راحت أم عبدالرحمن وبنتها وأختها واسمهان للقصر وبدأوا يشرفون على ضيافة الطاولات والتقديم والمباشرات و الخ.... وكانوا أحلام واسمهان نجوم الحفل على قول سماح..يستقبلون الزوار ويرحبون بالحضور... وبنات العائلة (بنات أخوال وأعمام عبدالرحمن يشاركون بالرقص).. وأما المعازيم فتختلف النيات في الحضور! اللي يحضر عشان العرس مستواه راقي بينما لو كان الزواج بمكان متواضع نلاقي عدد الزوار تقلص!! وناس تحضر عشان الطقاقة الفلانية بتحيي هالليلة على حد تعبيرهم!!! واللي تحضر تتصيد الصبايا لأولادها!! والي تحضر للبحث عن آخر مااستجد في الساحة من موديلات وتسريحات وميك آب!! واللي تحضر بحثاً عن سواليف جديدة تعبي بها المجالس في الأيام المُقبلة!! واللي تحضر تلبية للدعوة! واللي تحضر و نيتها كسب الأجر والثواب بالأمر بالمعروف أو النهي عن منكر.. واللي تحضر عشان تتونس بالهز والرقص!! والي تحضر عشان تقابل ناس ماشافتهم من زمان!! المهم مالكم بالطويلة... حضرت أفنان بما إنه العروس مشاعل تصير خالتها..ونجلاء ..اللي الكل كانوا متوقعين عدم حضورها بسبب إنه عبدالمجيد خطبها من قبل ورفضته!! لكن أم عبدالرحمن في الأيام السابقة للعرس اتصلت على أم نجلاء ووجهت لها دعوة خاصة وأصرَّت على حضورها..بناءً على طلب اسمهان اللي كانت تبغى كل شلتها يكونون حولها في هذا اليوم السعيد... ورانية اللي من يوم مادخلت القاعة وهي مفرفشة..وجلست مع أفنان واسمهان ونجلاء على نفس الطاولة .. رانية:هاه..بشروا؟؟نقدر نسلم على مراموه بغرفتها؟ ولا بتسوي فينا نفس حركتها بيوم الملكة؟؟؟؟ اسمهان:مدري!بأروح أسأل أختها ماجدة..حتى أنا لهذي اللحظة ماشفتها وبالفعل لما سألوا ماجدة قالت لهم:تفضلوا ماعندها مانع تشوفكم! ودخلوا كلهم وسلموا عليها وباركوا لها مرام:ماقلتوا؟اش رايكم فيني؟ الشلة:قـــــــــــمر! مرام:يعني أحلى من مشاعل؟؟ أفنان:وش عليك بـ خالتي؟؟ رانية:مشاعل مافي مثلها تهبل وتخبل وتجنن!!وماكياجها وتسريحتها شي خطيييييير!!!!!!! التفتوا الشلة لرانية باستغراب!! وكملوا دردشتهم مع مرام وطلعوا من الغرفة.. أفنان:الله أكبر عليك يارانية الخرَّاطة!وش دراك إن خالتي مشاعل تهبل وتخبل وهي أساساً ماوصلت للقاعة لين الحين؟؟؟؟؟؟؟؟ رانية:مدري عن مشاعل ولاشي...بس بغيت أغيظ مراموه المغرورة!!!! نجلاء:هههه أف من سواد قلبك يارنو!مرام تسأل عشان تتطمن بس! أفنان:بس الصراحة أنا استغربت من سؤالها!وش بيصير يعني لو طلعت خالتي مشاعل أحلى؟؟عادي كل انسان وله جماله الخاص فيه.. اسمهان:ماعليكم من مرام..يعني ماتعرفونها؟؟هي تحب تهتم بالشكليات والمظهر... وراحوا الشلة يشاركون بالرقص.. أما اسمهان راحت وقعدت مع أهلها على نفس الطاولة.. أم اسمهان:تحصنتي يابنتي؟ترى العين حق! أسماء(تبي تغيظ اسمهان):أقول القرد بـ عين أمه غزال!!! ابتسام:أي قرد؟ياويلك من الله ياأسوم.. سمهونة اليوم ملكة الحفل مو بس نجمة..بـ حلاتها وبشاشتها.. سماح:عاد مين قدك اليوم ياسوسو؟..مسوية فيها زوجة الولد الكبيرومتحملة مسئولية! اسمهان:تصدقون؟حلو هالاحساس! أسماء:بالنسبة لي مو حلو..بما إن زوجي هو أكبر أخوانه تلاقون كل عزيمة أو مناسبة يحطوني فيها العيلة بوجه المدفع!! اسمهان:بالعكس أنا كنت مستمتعة في النزول للأسواق مع خالتي واختيار بعض الأغراض في ملكة العرايس.. أو ترتيبات الزواج حسيت إنه رأيي وذوقي مهم عند خالتي... أم اسمهان:الله يهنيك يابنتي ولايغير عليك.. وظلت اسمهان تسولف شوي مع أهلها وبعدين استأذنت منهم عشان ترحب بالضيوف الجايين وكانوا مجموعة ومن ضمنهم أهل سماح.. اللي نادوا أفنان بما إنها خطيبة تركي ورانية بما إنها خطيبة ناصر وخلوهم يجلسون معاهم بنفس الطاولة.. واسمهان ونجلاء يراقبونهم من بعيد.. اسمهان:ههههه يازينها رانية لاكانت خجلانة..يصير شكلها تحفة! نجلاء:أقول مايليق عليها النعومة والتصنع تعودنا على عربجتها وعفاشتها! اسمهان:ههههه ياحبي لها..أساساً أكثر شي عجب أهل تركي فيها حركاتها وخفة دمها..والأحلى من كذا إن خطيبها من نفس العيِّنة!! نجلاء:صدَق من قال (الطيور على أشكالها تقع)!! وبعد شوي بدأ الاستعداد لزفة مشاعل.. بدأ الاستعداد لزفة مشاعل... فاستأذنوا رانية وأفنان من أهل سماح ورجعوا على طاولة نجلاء واسمهان... أفنان:تتذكرين يارنو لما دعيتي علي وقلتي عساك تتزوجين بزواج جماعي من اللي تسويها الجمعيات الخيرية ويكون معاك 777 عروس بليلة وحدة؟؟؟؟ رانية:ايه أتذكر..بس أنا ليش قلت لك هالكلام؟؟ أفنان:هالكلام قلتيه لي يوم كنت مؤيدة زواج اسمهان وعبير بنفس الليلة..وانتي رافضة مبدأ الشراكة في العرس.. رانية:ايييييه تذكرت!!ومين يصدق انه الدنيا بتدور ويصير زواجي وزواجك بنفس الليلة؟!!صدقيني لو كانت وحدة ثانية من الشلة بتتزوج معاي بليلتي ماكنت بأوافق لكن انتي غير!! أفنان:وليش أنا غير؟! رانية:يعني... ضعيِّفة ومكسورة جناح...وماعندك حركات نص كم مثل باقي أفراد الشلة المحترمين!! أفنان:حرام عليك..يعني سمهونة من هالنوعية؟؟ رانية:لا ماقصدتها..بس كنت بأرفض زواجي معاها بنفس الليلة لأنها بتصك علي بـ حلاتها!!! أفنان:مالت عليك..يعني أنا بعينك شينة؟؟؟ رانية:ماعليك انتي وش تكونين بعيني..أهم شي وش بتكونين بـ عين تركي!!! أما اسمهان ونجلاء كانوا يتكلمون مع بعضهم بصوت منخفض.. اسمهان:وش أخبار عريسك؟؟ نجلاء:في نهاية الاجازة الصيفية بياخذ اجازته ويجي يخطبني رسمي.. اسمهان:ان شاء الله نفرح فيك مثل باقي الشلة يانجلاء.. نجلاء:آمين.. ========= بدأت زفة مشاعل بمشهد تمثيلي مثلوه بنتين من بنات أخوانها.. وحدة لابسة لبس يدل على إنها أم كبيرة في السن..والثانية تؤدي دور البنت..وواقفين قدام بعض.. الأم:مبروك يابنتي..بارك الله لكما وعليكما وجمع بينكما في خير.. البنت:الله يبارك فيك ياأمي.. الأم:من حقي عليك يابنتي إني أنصحك وأقدم لك وصايا قبل عرسك مثل ماكانوا يسوون أمهاتنا البنت:تفضلي ياأمي..كلي سمع الأم:الزواج شراكة بين اثنين.. ويومن زين ويومن شين والحب يجمع فيه بين قلبين والمودة والرحمة وقرة العين وزوجك ترى هو جنتك ونارك تعلمي المسئولية واتخاذ قرارك وبالحكمة والتفاهم زيني دارك وكل مايدور بينكم خليه سر من أســــــــــــــــــــــــــرا رك ووصيتي لك اتقي الله بليلك وبنــــــــــــــــــــــهارك البنت:وصاياك هذي بأحطها حلق بإذني وعهدن علي لأعلمها كل بنت مقبلة على الزواج.. وحضنوا الأم والبنت بعضهم وأخذوا سلتين ونزلت الأم من يمين المنصة بين الحضور وتوزع عليهم من سلتها كتيبات دعوية وأشرطة عن(حقوق الزوج والزوجة)والبنت نزلت من يسار المنصة ووزعت على الحضور نفس التوزيعات.. وتسلطت الأضواء على بوابة القاعة..ودخلت وحدة معاها مايكرفون وتنشد بصوت ندي ..موال ..وطلعت على المنصة وسارت تمشي وخلفها 6 أطفال لابسين على ظهورهم فراشات وبيد كل وحدة وردة كبيرة ويرقصون رقص متناسق والحرمة اللي تنشد كانت صاحبة مشاعل بالمعهد تنشد قدامهم وتمشي على المسيرة والأطفال يمشون وراها..ومن خلفهم كانت مشاعل تمشي... والابتسامة مرسومة على شفايفها وأمها تراقبها من بعيد ودموعها على خدها! ووراء مشاعل صاحباتها بالمعهد شايلين الطيران ويطقون عليها ويغطرفون..وبنات من أقاربها بيدهم مباخر ومرشات كادي يمشون وراها.. وصاروا كلهم يمشون بترتيب لين وصلوا للكوشة..وكانت مشاعل مبتسمة والفرحة غامرتها بمشاركة الجميع لها...وبعد ماانتهى ****د صاحبة مشاعل..مسكت الطقاقة المايكرفون وقالت:هالأغنية اللي راح أغنيها لكم من كلمات العريس عبدالمجيد ويهديها اهداء خاص لعروسته مشاعل!! وتعالت القاعة بأصوات الهِتاف واللي يصفر واللي يغطرف..واللي تقول:شوفوا الرِجال بس!مو أزواجنا اللي الواحد يستخسر يقول كلمة حلوة بيني وبينه وماحد يسمعها!!!!! وحدة من الحضور:يازينها هالعروس بشوشة وفرحانة ماكأنها بتاخذ واحد أطرم!! الثانية:يمكن ماحد خطبها قبله عشان كذا رِضت فيه!!! الأولى:ماأتوقع إنها ماانخطبت قبله!!هذي هي حلوة وموب ناقصها شي!!! وقامت الطقاقة تغني على طق الطيران(بدون موسيقى)كلمات عبدالمجيد لمشاعل.. من عقب ليلة لقانا القمر ضوى سمانا والطير غرد وغنى والأهل فرحوا معانا ..يامشاعل.. غادةٍ بين العذارى حِسنك الطاغي أمر وخلى كل الغِيد غيارى غار منك حتى القمر لك غلا ماينوصف وأوعدك ثم أعترف قربك أحلى حلم لي بالعمر الخالة جوهرة:ياحليله عبدالمجيد يكتب شعر بعد؟؟ أم عبدالرحمن:خليه يكتب ويشعِر..أهم شي يعبر عن مشاعره ومايكتم شي بقلبه..والله إن مشاعل تستاهل!! وانبسطت مشاعل من الأبيات المتواضعة بالمرة.... بعض بنات أقاربها..قالوا:معقول هالأبكم عنده مشاعر أحسن من الطبيعين؟؟؟؟؟ وحدة ثانية:المشاعر بالقلب موب باللسان!! وحدة ثالثة:الصاحيين مايسوونها!! وحدة رابعة:أصلاً حركة مالها داعي فيها لفت أنظار!!وش قصده يعني؟أنا أحب زوجتي؟؟؟؟؟ وحدة خامسة:يمكن قصده يرد على الناس اللي دوم يتشمتون بمشاعل إنها رِضت فيه ويوريهم انه خذاها عن حُب!!! (عاد انتم أخبر بمجتمعات الأفراح!!أتوقع يتسجل فيها أعلى نسبة احصائية من فنون الغيبة والنميمة والحش والحسد!هههه الله لايبتلينا!!) وطلعوا الأهل والأقارب يسلمون على مشاعل ويباركون لها.. وطلعوا شلة الصاعقة ورقصوا قدامها وقوموها ترقص معاهم ووقفت بينهم وهي خجلانة.. تشاركهم بس.. وجلست على المنصة وقت معين ثم دخلت لعريسها اللي أخذها على طول بعد توديع أمه وأمها وراحوا الفندق.. وبدأ الاستعداد لزفة مرام .. بدأت مؤثرات صوتية في القاعة وانطفت أنوار القاعة..وبعد وقت انفتحت الاضاءات.. وكان على المنصة ديكور بالمخدات يشبه ديكوات القصص الأسطورية بألف ليلة وليلة وصندوق كبير مفتوح وخارج منه عقود كبيرة من الأحجار وصحن فاكهة كبير.. ووسادتين وحدة جالس عليها ولد أخو مرام وعمره مايتجاوز9سنوات ولابس لبس مثل ملابس السلاطين..والوسادة الكبيرة الثانية جالسة عليها بنت ماجدة أخت مرام ولابسة مثل لبس شهرزاد.. وفتحوا مسجل.. فيه حوار بين شهريار وشهرزاد والطفل والطفلة يحركون شفايفهم ويمثلون... شهريار: حدثيني كما عهدتك ياشهرزاد عن قصصٍ تسلب اللُب والفؤاد شهرزاد: بلغني أيها الملك شهريار قصة دارت في وضحِ النهار عن أميرة حسناء شابة جميلة وضــــــاءة جذابة قد خطب الجميع ودها وصدت عنهم في ردها إلى أن حـــلَّ ذات يوم وقد فارق عينـها النوم وسمعت صوت حادٍ يحدو بعذب القصيـــــــــد يشدو وكان أميراً يدعى عبدالرحيم جواد وشهـــم همامٌ كريـــم بهي الطلعة وضيءٌ وسيم ظل الطريق به في وسط الظلام إلى أن وقف أمام قصرالأميرة مرام فوقعت عيناه عليهاوهام حباًوغرام وعلى شاشة العرض السينمائي اللي وراهم كانت مرام مسجلة مقطع تمثيلي مثل الفيديو كليب ولابسة فستان أسطوري مثل فساتين الأميرات وتمشي في حديقة...وتمثل لوحدها ومؤثرات صوتية.... شهريار: وماذا بعد ياأميرتي؟ لاتتركيني في حيرتي شهرزاد: تقدم لوالدها وخطبها ووافقت بعد أن أعجبها ونادى المنادي: ودخل ولد صغير من أولاد أخوانها ولابس لبس عربي قديم وبيده مثل الدف وعصا وصار يضرب عليها ويمشي على المسيرة ويقول: هلموا هلموا...وياعرب التموا زفاف الأميرة مرام قد حل على الأمير عبـــــدالرحيم بصحبة الأحبـــــاء والأهل في يومٍ مهيـــــب عظيم وكان خلفه مجموعة أطفال لابسين لبس عربي أسطوري..وبدأ دق الدفوف وصاروا البنات اللي ورا الولد هذا يرقصون كأنهم جواري.. وتسلطت الاضاءة على البوابة ودخلت مرام..وصارت تمشي بهدوء وهي في قمة التوتر والارتباك والعصبية خصوصاً انه وصلها انه زفة مشاعل كانت حلوة!!! وحدة من الحضور:ياحظ أم عبدالرحمن بـ حريم عيالها كل وحدة أحلى من الثانية! ردت عليها وحدة:ماعليك من الجمال أهم شي أخلاقهم.. الثالثة:العروس اللي قبلها كانت بشوشة ومبتسمة..أما هذي كأنها شايفة نفسها شوي!! ووصلت للكوشة وجلست وانتهت الزفة وتوجهوا الأهل والأحباب للكوشة يسلمون على مرام ...والطقاقة تطق لها والناس يشاركونها الفرحة..وقاموا الشلة عندها يرقِّصونها معاهم.. وبعد مرور وقت نادوا الناس لصالة العشاء..وراحت مرام لزوجها عبدالرحيم اللي كان طاير عقله من الفرحة فيها..وودع أهله وأخذ عروسته في السيارة وانطلق باتجاه الفندق.. وظل يسولف مع مرام... عبدالرحيم:أخيراً بيجمعنا مكان واحد بروحنا؟؟ مرام(بخجل):ليش لا؟؟مافي شي مستحيل!! وفي هذا الوقت المتأخر من الليل كان فيه شلة شباب راكبين سيارة وكانوا سهرانين على البحر وراجعين لبيوتهم.. الشاب اللي يسوق السيارة منهم انتبه لسيارة عبدالرحيم اللي كانت مزينة بالورد والزجاج مغطى ببخاخ ومعجون ومو باين منه إلا أجزاء بسيطة وقال:الحقوا ياشباب!!لايفوتكم!هذي سيارة معاريس..وش رايكم نغلس عليهم..؟ رد صاحبه اللي بالمقعدة الخلفية:ايه تكفى..خل نتونس عليهم شوي!! الزميل الثالث:ودي تخرعهم لين تطيح قلوبهم برجولهم! الشباب:هههههههههههه وصاروا يلاحقون مرام وعبدالرحيم بالسيارة والشوارع شبه فاضيه لأن الوقت كان متأخر بالليل. وصار عبدالرحيم يسرع بأقوى ماعنده بالسيارة! ومرام تصيح فيه:عبدالرحيـــــــــم على هونك! عبدالرحيم:اشفيك انتي؟ ماتشوفين شلة الحوَنْش اللي ورانا شلون يبون يآذونا؟ صارت مرام تبكي وخايفة مرة..والشباب كل اللي براسهم يخربون على المعاريس فرحتهم ثم يرجعون بيوتهم!!! حاولوا يسدون على عبدالرحيم الطريق لين ماهرب بسيارته لشارع فرعي وصدم بمقدمة السيارة في الرصيف!!! أما الشباب اللي كانوا ميتين من الضحك داخل السيارة اخترعوا!! قال واحد منهم:الشردة الشردة ياعيال..المعاريس صار لهم حادث..خل نهرب بسرعة قبل لايصيدنا أحد ونتوهق!!!!!! الزميل الرابع:لايكون ماتوا؟؟ الثاني:وش تنتظر يالأثول سوق السيارة واهرب فينا لأبعد مكان قبل لايكتشفنا أحد!!! وبالفعل شردوا الشباب بسيارتهم بسرعة شديدة ولاحظوا دوريات المرور انهم يسوقون بسرعة جنونية وقبضوا عليهم وقطوهم بالتوقيف!!!وخاصة انهم تطاولوا على شرطة الرور بألفاظ بذيئة! أما العروسين عبدالرحيم ومرام كانت حالتهم بالسيارة صعبة..لما السيارة ارتطمت بقوة بالرصيف..عبدالرحيم ضرب كتفه بشباك السيارة اللي جنبه بس ماتأذى لأنه رابط حزام الأمان وصابته رضة خفيفة وداخ شوي..لكن مرام ضربت بجبهتها في شباك السيارة وانجرحت وأغمى عليها!!لمدة من الوقت! صار عبدالرحيم يحاول يصحيها لكنها ماترد عليه!! وصابه الرعب ودعس بالسيارة وصار يدور بالشوارع بأسرع ماعنده ومسكوه دورية المرور وخلوه ينزل من السيارة غصب عنه وصار يصيح فيهم وحكى لهم الموقف بسرعة وهو منهار!! الشرطي الأول يكلم زميله:لايكون انه يقصد شلة الشباب اللي مسكناهم قبل شوي؟؟؟ الشرطي الثاني:تعرف كم عددهم؟؟ عدالرحيم:أظنهم أربعة وكانوا راكبين كامري أسود! الشرطي الأول:بس!هم نفس الشباب اللي قبضنا عليهم قبل شوي..ودك تقدم فيهم شكوى؟؟ عبدالرحيم وهو بقمة عصبيته:انتم مافي قلوبكم رحمة؟؟؟زوجتي بين الحياة والموت بالسيارة وانتوا تسولفون معي؟؟لازم أنقلها المستشفى حالاً! الشرطي الثاني:كان الله بعونك..زين لِف يسار بسيارتك بتلقى مستوصف ود زوجتك له... وبالفعل راح عبدالرحيم بسرعة للمستوصف ونزل من السيارة وشال مرام ودخل المستوصف..وكان موظفين الريسبشن والممرضات مستغربين المنظر!!عروس بفستانها وتسريحتها وبكامل زينتها والعباية فوقها ومغمى عليها والعريس لابس البشت وشايلها!!كان منظر لايحسدون عليه وكان فيه ممرضتين فليبينيتين يتكلمون بلهجتهم: الترجمة الأولى:هذا العريس شكله مجرم..ماأعطى العروس فرصة وعلى طول نكَّد عليها؟؟ الثانية:حتى ملابسها ماغيرتها هو اش سوَّى بالضبط؟؟؟؟؟تعالي نشوف! ودخَّلوا مرام الطواريء وف***ا الطبيب وبدأت تسترد وعيها وكانت سليمة إلا جرح بجبهتها ينزف وكدمة حوله من قوة الخبطة..أعطوها ابرة وخيطوا لها الجرح..وهي تتألم الطبيب:ضروري أعمِل ليكو تحويل على مستشفى عشان المدام تتنوم وتعمل فحوصات شاملة وأشعة مقطعية للدماغ..يمكن الصدمة أثرت عليها ولا حاجة!! لكن مرام رفضت بشدة وأصرَت تروح للفندق! أخذها عبدالرحيم على جنب حاول يقنعها بالتنويم بأي مستشفى.. مرام:إنت اشفيك؟معقول عروس بيوم زواجها تنام بالمستشفى بدل الفندق؟؟ عبدالرحيم:وشفيها؟أهم شي نتطمن على صحتك مرام:أنا بخير..بس عندي صداع خفيف..حبتين بنادول وأصير بأحسن حال! ولما شافها عبدالرحيم معنِدة خلى الدكتور يكتب لها مسكنات ومعقم للجرح اللي بجبهتها وطلعوا من المستوصف.. وهم بالسيارة.. عبدالرحيم:أنا أشوف ماله داعي نروح للفندق..اش رايك نروح لبيتنا أحسن؟؟؟ مرام:ليش؟ عبدالرحيم:هناك أمي بتهتم فيك وبصحتك وشغالتها مابتقصر..أخاف يغمى عليك أو يصير فيك شي عقب هالخبطة الجامدة..والفندق ملحوق عليه.نروح له بأي وقت مرام:براحتك..سوي اللي تبيه.. ========== قام عبدالرحيم واتصل بأمه... عبدالرحيم:السلام عليكم..يمه؟رجعتوا البيت؟؟ أم عبدالرحمن:ايه صار لنا نص ساعة تقريباً..ليش؟؟؟؟؟؟ عبدالرحيم:زين يمه جهزوا شقتي..وشيكوا عليها أنا ومرام تونا طالعين من المستوصف وجايين في الطريق! أم عبدالرحمن:اييييييييييش؟؟يوووه ياحسرتي!وش سويت ببنت الناس؟؟هذا وأنا أوصيك بالملاينة والفعال السنعة؟؟ عبدالرحيم:يمه أنا ماسويت فيها شي..هذول شلة الشباب لابارك الله فيهم!!! أم عبدالرحمن:أعوذ بالله..أحــــــلام الحقي علي بكاس ماي...تقول شلة شباب؟؟؟اش سووا بالبنت فهمني..وااا ويل حالي ويلاه,,,ياحسرة قلبك ياأم عبدالرحمن!!! عبدالرحيم:يمه لايروح فكرك بعيد!هذيل شباب طاردونا بالسيارة لين سوينا حادث وشردوا ومسكوهم المرور!! أم عبدالرحمن:حادث؟؟؟ لا لا هذي عين وصابتكم تعالوا بسرعة أنا بانتظاركم.. وقامت أم عبدالرحمن تهل دموعها.. أحلام واسمهان:اش اللي صار؟؟؟؟ شرحت لهم أم عبدالرحمن الموضوع بسرعة وقالت:خذوا من الأكل اللي جبناه من بوفيه الزواج ورتبوه بصحون خل نطلعه لشقة عبدالرحيم يمديهم مساكين ماذاقوا لقمة..وخلو الشغالة تعصر لهم كاستين برتقال وحطوها بالصحن..وأنا بأطلع أشوف الشقة وأولع الأنوار وأبخرها.. طبعاً عبدالرحمن من يوم وصل للبيت طلع شقته ودخل يرتاح بعد يوم مرهق في هالزواج..ومايدري عن شي...... أما اسمهان وأحلام جهزوا الأكل والعصير وودوه فوق وكانت أم عبدالرحمن قد بخرت الشقة..وجلسوا بانتظار العرسان.. لما وصل عبدالرحيم شقته حط المفاتيح بالباب من غير مايدق جرس..على باله ان الشقة فاضية ولما انتبهت اسمهان انه بيفتح الباب شردت تتخبى عشان لايشوفها عبدالرحيم بما انه غير محرم لها ولايجوز لها تكشف عليه..وكانت أقرب غرفة للصالة غرفة النوم..دخلتها اسمهان وتخبت فيها.. قامت أم عبدالرحمن ترحب بالعروسين وحضنت مرام وقالت:سلامات يابنتي...لاباس عليك مرام(بدلع):شوي شوي علي ياخالتي..عظامي توجعني!! عبدالرحيم:حاولت أقنعها تتنوم بالمستشفى لكن رفضت الله يهديها.. مرام:عن إذنكم..أنا بأدخل أغير هدومي.. ودخلت غرفة النوم وطاحت عينها على اسمهان مرام:اسمهان؟؟؟؟؟؟؟؟ اسمهان:الحمدلله على سلامتكم...اش اللي صار عليكم؟؟؟ مرام:لاتطلعين برة الموضوع!وش اللي جابك بغرفتي؟؟ اسمهان:أبد..شفت عبدالرحيم وهو يفتح باب الشقة وجيت انحاش وغرفتك كانت أقرب غرفة فدخلت فيها! مرام:يعني ماكنتي تفتشين بأغراضي؟؟ اسمهان:ليش أعوذ بالله؟أنا وش أبي بأغراضك؟ولو أبي أفتشها كان فتشتها اليومين اللي راحوا..يعني ليش بأفتشهم اليوم؟؟؟ مرام:حصل خير..عموماً أنا تعبانة وودي أبدِّل هدومي وارتاح! اسمهان:تصبحين على خير..بس شوفي لي الطريق أبي أرجع لبيتي... راحت مرام وقالت لعبدالرحيم يدخل غرفة ثانية لين ماتخرج اسمهان. ورجعت اسمهان لبيتها ولقيت عبدالرحمن منسدح على السرير مانام وكان ينتظرها.. عبدالرحمن:وينك؟؟ليش كل هالتأخير؟ماشبعتوا من السوالف؟؟؟ راحت اسمهان تحكي له بالتفصيل كل اللي صار وحتى موقفها مع مرام واستغرابها من فضاضة أسلوبها!! عبدالرحمن:كل هالبلاوي صارت وأنا مدري؟؟وبعدين لاتاخذين على خاطرك من مرام هذي مهما كان صديقة عمرك!ويحق لها تتضايق من وجود أحد بغرفتها..انتي الله يهديك مالقيتي إلا غرفتهم تتخبين فيها؟؟ اسمهان:وين كنت بأروح يعني؟هذي أقرب غرفة كانت قدامي... عبدالرحمن:أنا لازم أتطمن على أخوي الحين.. وطلع عبدالرحمن فوق ودق الجرس على أخوه عبدالرحيم لكنه مافتح له الباب...وراح عبدالرحمن ونزل تحت لبيت أمه..وكانت أحلام قاعدة تلبس عباتها لأن زوجها ينتظرها برة.. عبدالرحمن:يمه؟طلعت لعبدالرحيم أتطمن عليه بس مافتح لي الباب.. أم عبدالرحمن:لاتنسى ياولدي انهم تعبانين..وصلاة الفجر مابقى عليها شي..بكرة بأناديهم على الغداء وشوف أخوك وتطمن عليه.. ==== |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
قررت أم عبدالرحمن انها تعزم أولادها وزوجاتهم ببيتها على الغداء..وأحلام وزوجها.....وأعطت خبر لعبدالرحيم من قبل ماتطلع من شقته.. اليوم الثاني...صحيت مرام على رنين الجوال قبل الظهر وكان عبدالرحيم بـدورة المياه.. مرام:آلو.. أم مرام:آلو..شلونك يامرمر؟وحشتيني ياحبيبتي...البيت من غيرك مايسوى! مرام:مايوحشك غالي يمه..حتى أنا ولهانة عليكم حيل... أم مرام:طمنيني عن أخبارك..كيفك عقب ليلة أمس؟؟؟ مرام:الله لايعيدها من ليلة!! أم مرام:أعوذ بالله..وش هالهرج يابنتي؟عسى العريس مأذيك؟؟ مرام:لا يمه..ماشفت منه إلا كل خير..بس صار لي حادث... أم مرام:حااااااادث؟؟يالطيف يارب!احكي لي بسرعة وش صار معك!! قامت مرام تحكي بالتفصيل أحداث الليلة السابقة.. أم مرام:كل هذا يجرى وإحنا ماندري؟؟وبعدين الله يهديك يابنتي ليش ماسمعتي كلام زوجك وتنومتي يوم واحد بالمستشفى؟؟على الأقل كنتي تسوين شوية فحوصات وأشعة وتتطمنين فيها على عمرك..أخاف يكون عندك ارتجاج من الصدمة وانتي موب دارية!!!! مرام:وش يقولون عني الناس يمه؟؟نحيسه؟؟من أول ليلة نامت بالمستشفى؟؟؟ أم مرام:وش عليك من الناس؟أهم شي صحتك..الناس مو نافعينك بـ شي المهم بعد كل هالأحداث اللي صارت أنا لازم أشوفك وأتطمن عليك بنفسي..كلها دقايق وأجيك أنا وأبوك نسلم عليك!! مرام:يمه خلوها وقت ثاني!!أم عبدالرحمن عازمتنا عندها على الغداء..ويبي لي كم ساعة أتجهز وأضبط نفسي!!!! أم مرام:خلاص بأشوف لي وقت ثاني اليوم أزورك فيه.. انتهت المكالمة وراحت أم مرام تحكي لأبو مرام عن اللي صار... أبومرام:ايش؟؟كل هذا صار لـ مرمر وماحد علمني؟؟؟هالحين الحين لازم نروح نتطمن على بنتنا!! أم مرام:هي ماتبينا نزورها الحين تقول خلوها بوقت ثاني! أبومرام:موب على كيفها..ضروري أشوفها الحين...لايكون صاير عليها شي ومخبية علينا!! وبالفعل راحوا أبوها وأمها وطبوا عليها فجأة!!استقبلهم عبدالرحيم..وبعد دقايق دخلت عليهم وسلمت.. أبومرام:خطاكم السوء..لاباس عليكم ان شاء الله.. عبدالرحيم:الشر مايجيك ياعمي.. أم مرام:وتقولين مافيك شي؟هذي جبهتك مغطاة بالشاش..ليش؟ مرام:لأنه في جرح خيطوه لي البارح.. أبومرام:يعني السالفة فيها غُرز وخياطة؟؟لا لا الحادث شكله ماكان هين!مالكم حق ياعبدالرحيم تسكتون ماتعلمونا.. عبدالرحيم:مابغينا نقلقكم ياعمي..الحمدلله هذا انت شايفنا نمشي ومافينا الا العافية.. أبومرام:لا لا أنا مايقنعني هالكلام..أنا أبي آخذ بنتي..وأوديها المستشفى تسوي أشعة..أخاف جاها شي خطير براسها وهي موب حاسة..انت ماتشوف شلون راسها وارِم؟؟؟؟ إلا دق الجرس..وراح عبدالرحيم يفتح..وكان الحاضر أخوه عبدالرحمن..استقبله عبدالرحيم بمجلس الرِجال وجاء لأبو مرام وقال له:ياعمي هذا أخوي الكبير جاء وقاعد بالمجلس ويبي يسلم عليك.. وقام أبومرام وراح لمجلس الرجال يسلم على عبدالرحمن ويسولف معاه.. واستفردت أم مرام ببنتها.. أم مرام:اسمعي يابنتي..هاليومين أهم شي تفكرين فيه صحتك..ارتاحي ببيتك وكلي زين..وبعدها سافري وتمشي مثل ماتبين.. مرام:يمه صدقيني أنا زينة..انتم مكبرين السالفة شوي.. وبمجلس الرجال كان عبدالرحمن جالس يعزِم أبومرام على الغداء..وأبومرام رافض وعبدالرحمن مُصِّر عليه..لين ماوافق بالنهاية.. راحوا لصلاة الظهر وعقب الصلاة..اجتمع الجميع ببيت أم عبدالرحمن.. حضرت مشاعل واسمهان وأحلام ومرام وأمها.. وبعد التحية والسلام.. أم عبدالرحمن:سلامات على مرام ماتشوف شر ان شاء الله.. أم مرام:الله يسلمك..هذي عين وصابتها! حسبي الله على كل من شافك ولا ذكر الله يامرمر!!!!! أم عبدالرحمن:ما يصيب الانسان الا اللي مكتوب له ياأم مرام.. أم مرام:صحيح..لكن عيون الناس ماترحم..من يشوفون وحدة حلوة يستكثرون عليها!!! أم عبدالرحمن:ليش؟انت ماحصنتي نفسك يامرام؟؟ مرام:إلا حصنت نفسي..مية مرة!!!! أم عبدالرحمن:خلاص إذن مافي مشكلة.. الإنسان يتوكل على الله وياخذ بالأسباب..من تحصين وخلافه..حتى لما البلاء يصيبه ينزل عليه مخفف..مين يدري؟يمكن اللي كان بيصير لكم حادث شنيع بس رحمة الله ثم تحصنكم بالأذكار خلت المصيبة عليكم أخف..وماتضررتوا منها!!!! أم مرام:بغيت أنجن يوم قالت لي مرام باللي صار..عتبي عليك ياأم عبدالرحمن!كان علمتينا أمس! أم عبدالرحمن:وش كنتوا بتسوون لها قبل الفجر يابنت الحلال؟؟اللي صار صار وهذا هي مافيها إلا الخير.. وقامت اسمهان تسولف مع مشاعل ومرام على جنب.. اسمهان:كيفك يامشاعل عقب ليلة أمس؟ان شاء الله مستانسة؟؟ مشاعل:الحمدلله..أمورنا تمام وأكيد استانست..أحلى ليلة بعمر البنت ليلة عرسها... اسمهان:الله يسعدكم يارب..طيب وانتي يامرام؟؟عاد مايحتاج أسألك..شفتك بعيني!هههههه مرام(باشمئزاز):اش تقصدين؟؟ماحد انبسط إلا انتوا؟؟عبدالرحيم يتمنى يرضيني بكل وسيلة في الدنيا..وراح يعوضني ونسافر وننبسط..بس هو خايف على صحتي هاليومين!!!!!! استغربت اسمهان من الحِدة في الرد وحطت لسانها بحلقها وانطمَّت!!!! مرت الأيام وحل عبدالرحيم مشكلة السيارة والشباب وتطمن على صحة مرام بعد اجراء بعض الفحوصات... وبعدها سافروا.. ومشاعل وعبدالمجيد بعد سافروا وبقيت اسمهان في بيتها وعبدالرحمن مداوم..وحست بملل فظيع.. وبيوم من الأيام نزلت اسمهان وكان الزهق قد بلغ منها مبلغ..وقعدت مع أم عبدالرحمن.. أم عبدالرحمن:اش رايك نطلع نشرب القهوة في الحوش؟؟ اسمهان:ماعندي مانع.. ولاحظت أم عبدالرحمن انه اسمهان متضايقة وسألتها عن السبب.. اسمهان:ياخالتي دوام عبدالرحمن مثل مانتي شايفة من الظهر لين الساعة 11 بالليل ومرات يتغير الشِفت..يعني محكوم علي بالجلسة في البيت 5 أيام بالأسبوع..ودي أطلع ودي أروح أي مكان!! أم عبدالرحمن:أجل وش أقول أنا يابنتي؟؟عيالي ومسافرين مع زوجاتهم بشهر العسل..وبكرة بس يرجعون ماحد منهم بيفضى لي كل واحد بيقابل زوجته ويتفرغ لها..وأقعد أنا بروحي.. اسمهان:أفا ياخالتي وإحنا وين رحنا؟؟ أم عبدالرحمن:مالها داعي المجاملات يااسمهان بكرة انتي ومرام تسجلون بالجامعة وتنشغلون..ومشاعل بتكون لاهية بدوامها وببيتها..وأنا يابنتي ماأحب أفرِض نفسي على أحد..وودي أزور رفيقاتي وأقاربي..ولي فترة وأنا أفكر بالموضوع..وان شاء الله أفاتح عبدالرحمن بأقرب فرصة انه يستقدم لي سواق!! اسمهان:ياسلاااام ياليت..على الأقل لما يكون عبدالرحمن مداوم وأنا بخاطري أزور أهلي يوديني السواق لهم..ولو اني حاسة انه عبدالرحمن لايمكن يخليني أركب مع السايق لحالي!! أم عبدالرحمن:ومين قال انك بتركبين لحالك؟؟أنا لو بأستقدم سايق ماراح أجيب إلا زوج شغالتي.. وهي بتكون معاه في السيارة لااحتجنا مشوار ..ماشاء الله عليها صار لها سنين عندي وأثق فيها وأكيد زوجها مابيتخير عنها..بلاك ماتدرين عن هالقصص اللي نسمعها هاليومين عن الخدم والسواقين..جارتنا لطيفة السنة اللي طافت سواقها وشغالتها عطتهم 3ألاف ريال يدفعونها لمحل الأثاث عشان قد اختارت كنب لصالونها وراحوا يجيبونه للبيت لكنهم أنذال خذوا الفلوس وانحاشوا ولالقيت لهم أثر ليومك هذا!!يمديهم يشتغلون الحين ببيوت الثانية..لا والسايق اقامته معه بعد!!!! اسمهان:ذكرتيني بشغالة عبير وسواقهم والبلاوي اللي كانوا بيسوونها بتركي..وشغالتي النذلة اللي بغت تهرب بـ ذهبي!!الله يغنينا عنهم بس.. واستمروا في سواليف مختلفة.. أم عبدالرحمن:فديت قلبه عبدالرحيم اليوم كلمني وأرسل لي صور على جوالي من نيوزلندة طبيعتهم تهبل..ويقول انهم بيرجعون قبل زواج تركي وناصر وده يحضر عرسهم هو ومرام.. اسمهان:وعبدالمجيد ماكلمك ياخالتي؟؟ أم عبدالرحمن:شلون بيكلمني؟مشاعل هي اللي اتصلت فيني وطمنتني على أخبارهم أما هو بس يدز لي مسجات الله يسعده يارب ويوفقه مع زوجته..باين عليها بنت حلال و تِنْحب.... =========لما رجع عبدالرحمن من العمل كانت اسمهان في البيت قبله محضرة له العشا وتنتظره... وبعد التحية والسلام وتبديله لهدومه قعد معاها على طاولة العشا..يتبادلون السواليف المختلفة... وحكت له اسمهان عن رغبة أمه باستقدام سواق.. عبدالرحمن:ياحليلها الوالدة..بدت تحس ان الكل لاهي عنها وماودها تثقل عليهم.. اسمهان:صحيح..ومو بس هي اللي تحس انه الكل لاهي عنها..في وحدة ثانية تحس ان زوجها لاهي عنها!!! عبدالرحمن:أكيد اسمها يبدأ بحرف الألف وينتهي بالنون..صح؟؟ اسمهان:ايه صح!!اشفيها لو خذيت لك يومين ورحنا فيها أي مكان شاليه مثلاً نغير جو!!! عبدالرحمن:لا واللي يرحم والديك إبعدينا عن سيرة الشاليهات..أنا حرمت أطبها!! اسمهان:زين نروح أي مكان..أو نسافر.. المهم نغير هالأجواء الكئيبة! عبدالرحمن:أي أجواء كئيبة؟ تونا قبل أسبوع كنا بعرس وطقطقة ومناسبة حلوة..وبعدين اش اللي جاب طاري السفر براسك؟؟غِرتي من العرايس؟؟ اسمهان:لا تطمن!أنا مو غيورة!أنا مليت من الروتين..ودي استانس وأطلع.. عبدالرحمن:يابنت الحلال لاتستعجلين..الخير جاي قِدام..أخواني مابيطولون في السفر..كلها اسبوعين بالكثير ويرجعون..وتستانسين مع زوجاتهم.. اسمهان:مالي شغل!بكرة من الظهر وإنت رايح عملك نزلني ببيت أهلي!! عبدالرحمن:صار..!مبسوطة؟!!! اسمهان:ايه! ============= اليوم الثاني راحت اسمهان لبيت أهلها من الظهر.. وبهذي المناسبة الحلوة قال أبوها:كلموا اسماء ومحمد وزوجته يجون يتغدون معانا.. وكانت ابتسام موجودة ببيت أهلها وقعدت اسمهان تلعب مع ولد ابتسام الصغير وهي مبسوطة فيه..ودق جوالها طلعت المتصلة رانية.. اسمهان:رنو اتصلي على تلفون أهلي الثابت تراني عندهم.. واتصلت رانية وبدأت الثرثرة.. رانية:الله أكبر يالقاطعة!من يوم صار عندك سلايف مارفعتي علي سماعة!!كل هذا حب في مرام؟؟ اسمهان:ياحليلك..خُبرك عتيق!مرام قد سافرت..أصلاً..وأنا ماحولي أحد..من الزهق جيت لأهلي من الظهر.. رانية:أما أنا قلبي يخبط يرقع..تصدقين توي أحس ان سالفة الزواج صدق موب لعبة؟؟ اسمهان:هههههه صح النوم ياعسل!! رانية:من جِد أحاكيك..بالأول ماخذتها تسلية ووناسة..بس هالحين خايفة من المستقبل ماني متخيلة شلون بأشيل مسئولية البيت لحالي..وخايفة تخيب توقعاتي بناصر ويطلع شخص ثاني..وخايفة الزواج يلهيني عن الدراسة..ومو عارفة شلون أفكِر!! اسمهان:بكرة تكبرين وتنسين..كنت مثلك.. لكن كل شي مع الأيام يهون..انتي بس تفائلي خير..وبعدين تعالي انتي اش قررتي تتخصصين؟؟ رانية:بإذن الله بأدخل كلية التربية قسم تاريخ.. اسمهان:مو معقول!!أنا بعد مخططة اني أسجل بكلية التربية بس بقسم اللغة العربية.. رانية:وليش عاد ياآنسة قواعد؟؟ادخلي معاي قسم التاريخ!! اسمهان:وش أسوي بعبدالرحمن؟هو اللي مصمم اني أدخل قسم العربي عشان أثري لغتي وقريحتي في الكتابة!! رانية:مايخالف..أهم شي إننا بكلية وحدة..وعلى فكرة نجلاء بتكون معانا.. اسمهان:واااااااي الله يبشرك بالخير..وأفنان قالت لي مشاعل إنها بتنتسب للجامعة وتشتغل معلمة برياض أطفال ودها تجمع بين الدراسة والوظيفة.. رانية:من زين رواتب الروضات عاد؟؟ اسمهان:هي مافكرت في الراتب..هي فكرت انها تاخذ شهادة الخبرة عشان لاتخرجت من الجامعة تلقى وظيفة بسهولة..ومثل ماتعرفين رياض الأطفال الأهلية توظف بشهادة الثانوي... رانية:ومرام؟؟ اسمهان:مرام تقول إنها راح تدخل الجامعة..ومرات تقول لا بأفكر بمشروع خاص!!والله يعلم.. رانية:أخاف بتحضر الماجستير قبل لاتدخل الجامعة!!مدري ليه مرام تحب تسوي غموض وماتصارحنا بسهولة عن أي شي بتسويه.. اسمهان:حبيبتي لاتنسين انه مرام فيها وسوسة شوي مع خوف من العين..مع قليل من الشك..لذلك أتحاشى أتدخل في أي تفاصيل خاصة فيها.. رانية:أقول اسمهان هذا جوالي يرن..أكيد انه ناصر!!سلمي على أهلك ومع السلامة.. اسمهان:مع السلامة... =============== قعدت اسمهان مع أهلها واجتمعوا أخوها واخواتها وظلت اسمهان تحكي لهم عن بعض مواقف أم عبدالرحمن.. أم اسمهان:الحقيقة يابنتي.أم عبدالرحمن هذي عملة نادرة..نادراً تلقين أم زوج متفاهمة وذوق مثلها..قبل كم يوم كنت عند أم غسَّان وقعدت تحكي لي عن مواقف أم أزواج بناتها الثنتين معاهم ..الله لايبتلينا ياهي مفترية فيهم افتراء...وتتدخل بأدق خصوصياتهم..وكل يوم وبنات أم غسان زعلانات وقاعدات ببيت أمهم.. ابتسام:كأنك تتكلمين عن أم زوجي يمه! أم اسمهان:الله يحلل أم زوجك عنها..أقول لك هذي تطق حريم عيالها طق!!أم غسان تحكي لي وتبكي..تقول كم مرة ترجع لها وحدة من بناتها بنص الليل وهي مضروبة من أم زوجها!!استغفر الله مدري اش هالعقلية؟؟ماقد طقيت بناتي أروح أطق بنات الناس؟؟أعوذ بالله.. سماح:وأنا أشهد ياخالتي انتي مافي مثلك..وأنا أحبك مثل أمي.. أسماء:أنا جارتي كاسرة خاطري حيل..تصدقون أم زوجها مانعتها تتوظف!!قال إيش؟تخاف يصير مع زوجة ولدها قروش وتستقوي على زوجها!!!إمحق من تفكير! أم اسمهان:بس المفروض الوحدة تداري الكبار في السن..وتتقي الله في معاملتهم..مين يدري؟يمكن الكلمة الطيبة تلين الحجر!وإن ماحصل فهذا ابتلاء والوحدة مالها إلا الصبر.. ابتسام:صدقتي يمه الوحدة مالها إلا الصبر..لين القبر!! بنهاية الأسبوع وكان يوم الأربعاء صحيت اسمهان تطبخ الغداء لعبدالرحمن قبل مايروح للعمل...لكنها حست بصداع ودوخة!! عبدالرحمن:مادام إنك تعبانة خلاص..لاتطبخين..سوي لنا ساندويتشات وحطي فواكه..نعمة من الله..وخذي لك حبة بنادول.. وبالفعل جهزت اسمهان الأكل وأكلوا وراح عبدالرحمن للعمل.. ومر اليوم من غير جديد يُذكر.. ثاني يوم كان الخميس صحي عبدالرحمن من بدري وخرج يكمل بعض أشغاله.. وقعدت اسمهان ترتب البيت بانتظاره لكنه اتصل فيها وقال:اسمهان تغدي انتي أنا معزوم للغداء برة.. لكن اسمهان تكاسلت تطبخ لنفسها وقعدت تشتغل بالبيت ورجعت لها الدوخة والصداع!!وتمددت على الكنبة بالصالة بانتظار عبدالرحمن... لما رجع دخل وسلَّم وقال:اشفيك سمهونة؟لسه ماشبعتي نوم؟والعصر اقترب؟ اسمهان:لا أنا مو نايمة..بس عندي صداع ودوخة.. عبدالرحمن:سلامات..اش سالفتك مع الصداع والدوخة؟خذيتي بنادول؟؟ اسمهان:لا ماخذيت..شلون أبلع بنادول على معدة فاضية؟!! عبدالرحمن:الله يهديك..ليش ماأكلتي شي لين الحين؟ اسمهان:ما جالي نفس آكل بغيابك!! عبدالرحمن:وافرضي اني غِبت اليوم كله!كنتي بتصومين يعني؟؟يلا قومي كلي لك لقمة وخلينا نطلع نتمشى.. وقامت اسمهان باتجاه المطبخ ولكن الدوخة رجعت لها وراحت للصالة وجلست.. عبدالرحمن:اشفيك؟ اسمهان:أقول لك دايخة.. عبدالرحمن:زين..البسي عباتك خل نشوف وش قصة الدوخة معك؟؟ قامت اسمهان وابتسمت وقالت:إنت تفكر باللي أفكر فيه؟ عبدالرحمن:تقصدين ان سِر الدوخة سببه الحمل؟؟ اسمهان:ايه..ممكن.. عبدالرحمن:ياليت يااسمهان ياليت..البيت كبير علينا ودي يكسر الصمت فيه صوت طِفل..يضحك ويبكي ويغاغي.. وفرحت اسمهان بكلامه وراحت بسرعة تلبس عباتها وتتجهز.. وركبوا السيارة والفرحة غامرتهم وكل الكلام يدور عن أحلامهم وآمالهم بالمولود الجديد... اسمهان:لو جاني بنت أحس إني بأصير أسعد انسانة بالعالم بأدلعها وأكشخها وأنفذ لها كل طلباتها!! عبدالرحمن:ياسلام...ولو كان ولد بتصيرين أتعس انسانة؟ اسمهان:لا بالعكس..الولد عِزوة..بس أحب البنات أكثر حتى لما أنزل السوق تلفت انتباهي ملابسهم وألوانها.. وظلوا يتكلمون عن الأطفال وهم بطريقهم إلى المستشفى لين ماوصلوا إلى سالفة الأسماء.. عبدالرحمن:أنا نفسي لو كان عندي ولد أسميه(فِراس)! اسمهان:إشمعنى؟ عبدالرحمن:فِراس هذا كان أعز أصحابي على قلبي..من يوم وحِنا صغار..وولد خالي بنفس الوقت..وكان الله يرحمه ويغفر له انسان مقصر حاله حال كثير من الشباب الله يهديهم..وبيوم من الأيام وهو قاعد على البحر مع مجموعة من الأقارب كان فيه مخيم قريب مستضيفين فيه واحد من مشايخنا المعروفين..كفعالية من فعاليات الصيف..وقرروا الرِجال اللي معه يدخلون يسمعون المحاضرة فدخل معاهم من باب المجاملة مو أكثر وكانت المحاضرة عن التذكير بالموت...لكنه خرج منها إنسان ثاني..تأثر حيل بالكلام اللي كان يسمعه لأول مرة بحياته!!وانقلبت حياته لهداية وصلاح..بدرجة ملحوظة.. والحقيقة الكل فرح بتوبته والتزامه وكان له تأثير على شباب العيلة بما إنه صاحبهم لين جاء يوم من الأيام وقرر فِراس فيه انه يروح مكة يآخذ عمرة وكلمني أرافقه وبالفعل كنت بأروح معاه لولا إن أبوي الله يرحمه كان تعبان بالمستشفى وقررت أرافقه وأتطمن على صحته واعتذرت لفِراس عن الروحه معه للعمرة... اسمهان:وبعدين؟؟ عبدالرحمن:وبعدين راح لحاله..وهو بمدخل مكة ولابس ملابس الإحرام..فاجئته سيارة من الخلف واصطدمت فيه اصطدام قوي لدرجة انه طار من السيارة وطاح على الطريق.ولين ماتم البلاغ عن الحادث ووصلوا الاسعاف يشيلونه كانت روحه قد فارقت جسده!!والغريب انهم لقيوا بأغراضه اللي حاطها بالحزام ورقة مكتوب فيها(بعد وفاتي..أعضائي هبة لمن يحتاجها)!!!!!!!!!! قامت اسمهان تبكي وعبدالرحمن دمعت عينه.. اسمهان:يعني كان حاس انه بيموت؟ عبدالرحمن:أهله يقولون قبل وفاته بأسبوع شاف رؤيا وفسرها مفسر له بإنه وفاته قريبة وإن شاء الله تكون خاتمة حسنة..وحاول يجتهد في عبادته أكثر وأكثر وعسى الله يرحم جميع موتى المسلمين ويحسن خاتمتنا. وصلوا للمستشفى..ودخلوا على دكتورة النساء والولادة بعد طول انتظار..وحكت لها اسمهان عن الدوخة والصداع اللي يتكرر معاها.. الدكتورة:هنعمل لك دلوقتي تحليل دم للحمل ولفقر الدم والسكر ونشوف النتيجة ايه.. عبدالرحمن:ومتى تطلع نتيجة التحليل يادكتورة؟ الدكتورة:بكرة ان شاء الله.. عبدالرحمن:مافينا صبر لبكرة..أرجوك حاولوا تخلصونه اليوم.. وبعد محاولات وافقت الدكتورة انها تكلم المختبر يستعجلون في النتيجة!! وبالفعل وعدتهم انه النتيجة راح تظهر خلال ساعات.. خرجوا من المستشفى والفرحة غامرتهم.. عبدالرحمن:بما إنك على لحم بطنك..فأنا عازمك على الغداء بأي مكان تختارينه.. اسمهان:بأختار مطعم(آبل بيز)!!مطعمي المفضل!!ههههه وراحوا وطلبوا أكل وخذتهم السوالف وطلبوا تحلية عقب الأكل وجلسوا يتكلمون عن خططهم المستقبلية..وانهم بيسوون الغرفة اللي قدامهم للأطفال ويضبطونها..ومن أي محلات يقضون أغراض المولود.. وبعد ساعات اتصل عبدالرحمن على المستشفى..وقالوا له نتيجة الحمل وفقر الدم طلعت بس تحليل السكر بكرة.. وأخذ اسمهان وطيران على المستشفى...دخلوا على الدكتورة.. الدكتورة:بصي يامدام اسمهان..ضروري تهتمي بالتغذية الصحية..وتبعدي عن الأكل اللي بيكسر الحديد..والشاي بأنواعه.. عبدالرحمن:زين يادكتورة ياليت تعطينا جدول تغذية نموذجي يناسب المرأة الحامل ومايضر الجنين. الدكتورة:ليه؟هو مين اللي آئال انها حامل؟؟ طالعوا اسمهان وعبدالرحمن ببعض والدهشة على وجوههم.. الدكتورة:كل المسألة انه المدام عندها أنيميا ونسبة الدم نازلة شوية وضروري جداً تهتم بالأغزية المفيدة اللي مابتكسرش الحديد..وضروري يامدام بعد كل حبة حديد تاخديها تشربي عصير بردقان طازة عشان يمتص الحديد في الدم بشكل مِسَالي,,وتبعدي عن الشاي والقهوة خالص وإزا فكرتي تشربيهم يبئى بعد ماتاخدي الحبة بساعتين اتفئنا؟!!!! حست اسمهان انه الصدمة ربطت لسانها.. الدكتورة:وآدي روشتة الحبوب اللي كتبتهالك اصرفيها من الصيدلية وبالشفا ان شاء الله.. خرجوا الاثنين والجمود على ملامحهم..وبس دخلت اسمهان السيارة انفجرت تبكي..وعبدالرحمن يحاول يهدِيها..لكن دون جدوى!!!! بعد مارجعت اسمهان استمرت في حزنها وحاول عبدالرحمن يهدي الوضع لكن اسمهان كانت شبه منهارة وماتبي تسمع شي!! ثاني يوم وكان الجمعة فكر عبدالرحمن يكلم صاحبه سلمان زوج ليلى..ويعرض عليه زيارتهم لعل وعسى إن اسمهان تهدأ نفسيتها وتنشغل بالضيوف.. عبدالرحمن:إذا منت مرتبط اليوم..فإش رايك تجيب الأهل ونسمر مع بعض؟؟ سلمان:الصراحة إحنا مخططين اليوم نطلع البحر في العصر..اش رايكم ترافقونا ننبسط ونتقهوى ونشرب الشاهي سوى؟؟ عبدالرحمن:ماودنا نضايقكم! سلمان:ولاتضايقونا ولاشي..إلا أبركها من ساعة حتى زوجتي لو تدري بطلعتكم معانا بتستانس مرة.. عبدالرحمن:خلاص..تم وقال لاسمهان لكنها مارحبت بالموضوع!! عبدالرحمن:يااسمهان مايصير يابنت الحلال هاللي قاعدة تسوينه بنفسك!ماصار لك إلا سنة وكم شهر وذبحتي عمرك كيف لو إن لك سنين ماحملتي..بتتسخطين على نصيبك؟؟؟ وبعد محاولات وافقت اسمهان تطلع البحر مع الناس.. وراحت تجهز ترمس شاي وتعبي مكسرات وغيرها..وخرجوا,, وقابلتها ليلى بالترحاب..وخذتهم السوالف.. لكن كان واضح على اسمهان علامات الحزن.. ليلى:مو عاجبتني يااسمهان..انتي زعلانة من شي؟؟ قامت اسمهان تبكي.. ليلى:فضفضي وأنا إختك فضفضي..وسرك في بير وقامت اسمهان تحكي لها عن أحلامها وآمالها عن الأطفال...وعن اللي صار البارح ليلى:بس؟؟هي هذي المشكلة؟؟خرعتيني!حسبت صاير عليك شي؟؟ اسمهان:وانتي شايفة تأخري بالحمل مو مشكلة؟ ليلى:حبيبتي..بعدك على أول الدرب..غيرك عاش سنوات وسنوات لين تحقق حلمه..وبعدين الاعتراض على القدر..ذنب..والصبر غنيمة..وصدقيني بدري عليك.إنتي اللي مستعجلة شوي..أهم شي راحتك النفسية وحياتك مع زوجك ..بطريقتك هذي راح تكرهينه فيك وتشغلين باله بهالموضوع زيادة..بالعكس اضحكي وستانسي وخلي الهم بعيد..ولاتشغلين نفسك بالتفكير..وكل شي مكتوب بيصير في وقته عمر الدموع ماتفيدك بشي ولاتحقق لك شي مفقود!! اسمهان: المشكلة..مو قادرة أنسى! ليلى:نصيحتي لك تقرأين كتاب (لاتحزن) للشيخ عايض القرني..صراحة كان مثل البلسم لي في كثير من الأمور اللي صابتني في حياتي..وبعدين ماعلمتيني.. هل مازلتي مستمرة بالحفظ مع عبدالرحمن؟؟ اسمهان:ايه..إلى الآن حفظنا جزء عمَّ ماعدا سورة وحدة..لما شفت فيني نشاط صرت أحفظ أكثر من آيتين باليوم.. ليلى:الله يسعدكم ان شاء الله..طالما تحاولون تبنون حياتكم على الخير فبإذن واحد أحد ربي يرضيكم..ويحقق أمانيكم.. اسمهان:آمين ليلى:اش رايك نقوم نمشي على البحر؟ اسمهان:يلا.. وقاموا يمشون لين وصلوا مكان ماحد يشوفهم فيه وقالت ليلى:اش رايك نتسابق؟ماأتوقع إنك بتغلبيني!!! اسمهان:لاياحبيبتي..أنا قدها وقدود!!! وقاموا يتسابقون ويضحكون..وقعدوا على الشاطيء وكل وحدة راحت تبني بيت من الطين وتزينه بالأصداف..وكان يوم ممتع بالنسبة لاسمهان وكلام ليلى خفَّف عنها كثير..بعد كذا صلَّى الجميع صلاة المغرب ثم ودعوا بعض.. اسمهان:تصدقين ياليلى؟استانست معاكِ اليوم بالمرة ياليت مثل هالطلعات تتكرر.. ليلى:ياليت..ليش لا؟بإذن الله كل فترة نتفق ونطلع سوى..أبوي عنده مزرعة حلوة ومرات نآخذ المفتاح منه أنا وسلمان ونروح مع ربعنا نتغدى ونستمتع بالأجواء.. إن رِحنا قريب أكيد أول ناس أفكر أناديهم انتوا.. اسمهان:ان شاء الله.. وراحت اسمهان للسيارة وقعدت تحكي لعبدالرحمن عن مشاعرها خلال هذي الطلعة.. عبدالرحمن:الحمدلله..يعني انبسطتي؟؟ اسمهان:أكيد.. عبدالرحمن:زين اش رايك نروح البيت وناخذ أمي ونروح لأحلام؟؟ اسمهان:خليني آخذ دش الأول ملابسي كلها طين وتراب. وبالفعل طلعت اسمهان تتحمم وعبدالرحمن مر على أمه وسلَّم عليها وقال:اش رايك نزور أحلام؟؟ أم عبدالرحمن:ياليت..أصلاً وانتوا برة حسيت نفسي زهقانة وكلمتها تجيني لكنها اعتذرت وقالت انه أم زوجها عندها..وتعالي انتي يمه..بس ماقدرت لأنه مافي أحد يوديني!! عبدالرحمن:زين..يعني اخترت توقيت مناسب.. أم عبدالرحمن:شوف ياولدي..أنا صرت بحاجة سايق..وزوج الشغالة مستعد يجي يشتغل عندنا.. عبدالرحمن:أفا يمه وحِنا وين رحنا؟؟ أم عبدالرحمن:انتم الخير والبركة..لكن الحق حق..مو معقول كل وقت والثاني وأنا بأعطلكم عن أشغالكم بسبب طلعاتي..مرات أبي أروح زيارات ومرات مناسبات ومرات أحتاج المستشفى أو السوبرماركت..وانتم يالله الواحد بنفسه وبيته.. عبدالرحمن:خير ان شاء الله..نشوف هالموضوع بوقت ثاني..هالحين استعدي عشان نطلع بعد شوي.. وبالفعل استعد الجميع وراحوا لأحلام اللي فرحت يوم شافتهم.... وفي مصر كانت مشاعل وعبدالمجيد مبسوطين بالأجواء هناك...وبيوم من الأيام راحوا لخان الخليلي واشتروا مجموعة هدايا يوزعونها لارجعوا.. وبواحد من المحلات لفت انتباه مشاعل صندوق مجوهرات صغير ومعاه مفتاح.وتذكرت انه أمها من زمان تبغى صندوق بمفاتيح ويكون مزخرف..فراحت واشترته ودفعت الفلوس من عندها..لأنها مابغت تكلِّف على عبدالمجيد وتضايقه.. انتبه لها عبدالمجيد وهي تحاسب الرجال وسألها(بلغة الاشارة):ايش اشتريتي؟؟ مشاعل(بلغة الاشارة):اشتريت هدية لأمي.. عبدالمجيد(بلغة الاشارة):وليش انتي اللي تدفعين؟خذي فلوسك وأنا اللي أدفع.. مشاعل(بلغة الاشارة):ماأبي أكلف عليك.. عبدالمجيد(بلغة الاشارة):مافيها كلفة.. والبياع بس يتابع حركاتهم..وشال عبدالمجيد الكيس وحاسب الرجال وجاء ماشي..فالتفت البياع(وكان كبير في السن) لمشاعل وقال لها:مُش حرام يابنتي..وحدة صُغيَرة زيك تضيَّع حياتها مع واحد لامؤاخزة مابيتكلمشي؟؟؟ مشاعل:الله يسامحك ياعم!!! وراحت ورا عبدالمجيد..وواصلوا تسوقهم..وكان المعرض والفعاليات الخاصة بالصم والبكم لها تأثير كبير على نفس مشاعل وعبدالمجيد..صارت مشاعل تتفرج على أعمال الصم والبكم الفنية ولوحاتهم وابداعاتهم..وتقول بلغة الاشارة لعبدالمجيد:لاحظ انه مستوى موهبتك في الرسم يتفوق عليهم وأنا متأكدة لو تعرض أعمالك راح تلاقي اقبال كبير.. عبدالمجيد(بلغة الاشارة):هذا لأنك زوجتي تبين ترفعين معنوياتي.. مشاعل:لا صدقني..إنت فنَّان بس مستقِل نفسك..موهبتك لازم يشوفونها الناس ويدعمونك.. ============== أما مرام فكانت مستمتعة بالأجواء الخيالية والطبيعة الخلابة بنيوزلندة..وبيوم من الأيام.. مرام:اش شعورك ياعبدالرحيم وإنت بهالأجواء؟؟ عبدالرحيم:أنا ندمان!!! مرام(بدلع):إخس عليك!هذا كلام تقوله لي؟؟ عبدالرحيم:بـ جد أنا ندمان على كل لحظة مرت بحياتي من دونك!! مرام:ههههههه حسبت!! وكانت مرام معلقة برقبتها كاميرا كل منظر يعجبها تصوره.. عبدالرحيم:بسِك عاد!كل ماشفتي شي صورتيه..تذكريني بالخواجات لاجوا بلدنا معاهم كاميرا وكل ماشافوا شي لقطوا له صورة!!مدري اش يعجبهم عندنا مع ان بلادهم أحلى؟!! مرام:كل إنسان تعجبه النعمة اللي بإيد غيره أكثر! بعد مرور أيام رجعوا مشاعل وعبدالمجيد من السفر..وكانوا الأهل في استقبالهم... وبعد التحية والسلام ... اسمهان:شلون كانت رحلتكم يامشاعل؟؟ مشاعل:مرة حلوة الحمدلله..في بلادنا العربية الواحد مايحس بغربة.. أم عبدالرحمن:وحشتونا مرة..الحمدلله على رجعتكم بالسلامة.. وبعد أخذ وعطا عن أخبار رحلتهم.. فتحت مشاعل شنطتها وقالت:كنتم على بالي كلكم مانسيتكم..وجبت لكم هدايا تذكارية من أسواق خان الخليلي..ان شاء الله تعجبكم.. ووزعت عليهم تحف.. أم عبدالرحمن:جزاك الله خير..تعبتوا أنفسكم يابنتي..ماله داعي هالكلفة... مشاعل: مابين الأهل كلفة ياخالتي..هذي أشياء رمزية بس..حتى انتي ياخالة جوهرة مانسيتك..جبت لك مفرش منسوج تستخدمينه لاولدتي.. جوهرة:مشكورة حبيبتي.. مشاعل:وهذي هديتك يااسمهان.. اسمهان:الله يعطيك العافية.. مشاعل:وهدية مرام بأخليها معاي لين ترجع بالسلامة..أحلام وينها؟؟ أم عبدالرحمن:أحلام مرتبطة اليوم بأهل زوجها كلهم طلعوا المخطط.. اسمهان:ماشاء الله رجعتوا بدري توقعتكم بتطولون.. مشاعل:لا مانقدر نطول..نسيتي؟بكرة ملكة أفنان بنت أختي.. اسمهان:أدري..بس توقعت إنكم بترجعون على الزواج..والملكة مابتهتمون لها.. مشاعل:عاد إلا أفنان..ياحبي لها هالبنت..طول عمرها وهي مسيكينة وحالها بشانها.. جوهرة:بس من يوم انضمت لشلة الصاعقة خربوها شوي!!! الجميع:هههههه اسمهان:يوه ياخالة جوهرة..مو خلاص حِنا تبرينا من هالاسم ومشينالك صح هالسنة! جوهرة:مو سواليف الخطبة والزواج عقلتكم كثير ليتكم مخطوبين من زمان!أما رانية ونجلاء كانوا موية من تحت تبن واسمهان تخطط من تحت لتحت وفي الظاهر البراءة تشع من عيونها!!تتذكرين ياحلوة؟؟ اسمهان:ههههه..أقسمت عليك ماتعلمين عبدالرحمن بشي..أنا معطيته فكرة إنه ماكان أحد في هدوئي وأدبي!! جوهرة:الله يرحم!ماأنساها نظراتك يوم أصيح فيكم.. ماحد يخاف منكم إلا انتي وأفنان!!أما رانية ونجلاء مستجلدات كل وحدة تطالعني بنص عين..ومرام هي الوحيدة اللي كانت أختها ماجدة بعد كل سالفة تتصل وتعاتبني ليش إني صحت أو عاقبت أختها المدللة!!! اسمهان:عجيييييييب!!عمرها ماقالت لنا! ========== وبالمجلس كان عبدالمجيد قاعد مع عبدالرحمن وأهداه طقم جلدي مكتبي..كهدية تذكارية من مصر.. ودخلت أم عبدالرحمن وجوهرة وسلموا على عبدالمجيد..وقعدوا معاه وقعد يحكي لهم عن رحلته لمصر..وعبدالرحمن وأمه يترجمون للخالة جوهرة كلامه اللي كان كله بلغة الاشارة.. =============== اليوم الثاني بدأت الاستعدادات لملكة أفنان..وكانت ملكة مختصرة بالبيت..الأعمام والأخوال..والشلة(اسمهان+نجلاء+ رانية)ومرام مسافرة ومخططة ترجع قبل الزواج اللي بما إنه تأجل أسبوع فراح يكون بعد عشرة أيام.. جابت أفنان كوافيرة تضبطها بالبيت..ودي جي اسلامي..وسوت كوشة بسيطة..بس كانت هالبساطة لها مذاق خاص..وكل الشلة كانوا قاعدين معاها من أول الملكة لين جاء عريسها وخرج الكل للعشا في الحوش وخلوها معاه.. والكل استانس ببساطة هالمناسبة..والضيافة عبارة عن سبتات فيها حلويات ومعجنات...والشلة تولوا المباشرة على المعازيم وهم قاعدين مع أفنان.. أفنان:حسافة..ودي لو كانت مرام معانا.. رانية:وش تبين فيها؟خلها بديرة البقر والخرفان تلحس زبدة وتاكل جبن!! نجلاء:أفنان صادقة..الشلة من غير مرام ناقصة اسمهان:مشاعل فيها البركة تسد هالنقص.. رانية:أنا أشهد ماحد يقدر يسد غياب مرام!!تقدرين يامشاعل تقلبين عيونك وتشمقين مثلها؟تقدرين تمطين شفايفك وتمشين مثل مرام؟ الشلة:ههههههههه نجلاء:بس هالحركات حلوة من مرام بس!يعني لو تقلدينها يارانية رحتي وطي!! رانية:أقول وخروا عني وخل الدلع بعيد بس!..يازين الوحدة تتصرف بطبيعتها..مدري وش تحس فيه الوحدة..وهي ترفع حواجبها وماحد عاجبها!! اسمهان:عاد أشوفك مصختيها!هذي سلفتنا ومانرضى فيها!صح يامشاعل؟؟ مشاعل:أكيد.. رانية:لي نظرة في الناس ماتخيب!وبكرة تقولون رانية قالت..!مرام اختلفت هالسنة مدري ليه؟!! نجلاء:بليز..غيروا الموضوع..ودعوا الخلق للخالق! وشارك الجميع أفنان في فرحتها..بالرقص والغطاريف..وكانت زفتها تقليدية...وبسيطة.. ولما جاء وقت العشاء... اسمهان:مشاعل؟وين سندس؟ودي أشوفها.. مشاعل:ماقد شفتيها قبل؟؟ اسمهان:لا.. مشاعل:زين..تعالي معاي.. ودخلوا الثنتين غرفة..وكانت سندس مسدوحة على سرير..وعمرها حول 14 سنة بنت طويلة القامة لكن مشلولة ومعاقة عقلياً وخرساء وعمياء....والممرضة الخاصة فيها جالسة على كرسي جنبها.. راحت اسمهان عندها وصارت تتأمل فيها بحزن..وقعدت على طرف السرير..حست سندس بشخص غريب جنبها وكانت تحرك أياديها بس بضعف..ومسكت وجه اسمهان وصارت تتلمسه.. مشاعل:هذي طريقتها الوحيدةعشان تميز الأشخاص الأغراب من أهلها.. قامت اسمهان صارت تبكي بانهيار!! مشاعل:ياحبيبتي يااسمهان..لو أدري إن قلبك رهيف هاللون ماجبتك هنا..!!قومي قومي معاي واغسلي وجهك.. اسمهان:ماأبي أحد يشوفني وأنا كذا..خليني أجلس شوي.. وصارت اسمهان تتأمل بسندس وتدعي لها.. ==== أما تركي لما شاف أفنان كان بــــــ عالم ثاني!! سماح:إحم إحم!ياعريس ماودك تلبِّس عروستك الشبكة؟؟ تركي:هاه؟؟ هند:شكله مو ناوي..عطوني عطوني الشبكة بآخذها ألبَسها لزوجي!! أم تركي:خذ ياولدي..وبالمبارك عليكم عسى التوفيق دربكم وممشاكم.. وبعد ماوقفوا جنبه وطقطقوا له شوي وسلمت عليه أم أفنان ودعت لهم بالبركة..انسحب الجميع وخلوا العرسان لحالهم.. وكانت أفنان خجلانة لأبعد مدى وحاطة عينها على الأرض.. طبعاً بعد ماأفنان كان الحيا ذابحها وتناظر الأرض..حاول تركي يخرجها من صمتها وبادرها بالكلام... تركي: عبير؟؟ ناظرت فيه أفنان باستغراب وقالت:اسمي أفنان لو سمحت!!! تركي:طيب وأنا اش قِلت؟ أفنان:قِلت لي عبير! انتبه تركي انه غلط وقال:السموحة منك..أنا آسف.. أفنان:وش عليه تتأسف؟أصلاً أنا عارفة إني مهما سويت ماراح أكون بجمال عبير!!!!!!! تركي:وش فايدة الجمال الخارجي..إن كان القلب أسود؟؟أنا مافكرت أتزوج للمرة الثانية..إلا عشان أنسى البلاوي اللي صارت لي من تحت راسها! وماتمالكت أفنان نفسها وقامت تقطر دموعها!! مسكها تركي بحنان ولف وجهها باتجاهه وقال:ومين قال إن عبير أحلى منك؟؟إنتي بعيني أجمل امرأة قلباً وقالباً وخجلك هو اللي مزينك وزايدك حلا!! صار وجه مرام بلون الطماط والبندورة والكاتشاب!! واتخذ الحوار مجرى آخر عن الآمال والأحلام والطموحات.. بعد ماانتهت رانية من العشا قامت تتلفت وتفتش عن اسمهان وتسألهم عنها.. كانت اسمهان بهالوقت مع مشاعل بغرفة سندس..وقامت تمسح دموعها وتعدل ماكياجها.. وطلعت من الغرفة باتجاه الحوش وشافتها رانية.. رانية:وين كنتي يابنت؟لي ساعة وأنا أدور عليك! لايكون إنك كنتي قاعدة مع المعاريس؟؟ اسمهان:لا ياشيخة؟وأنا شلون بأقعد معاهم؟لاتركي محرم لي ولاشي..أنا كنت مع مشاعل.. رانية:زين تكفين تكفين أبي أقِز هاللي اسمه تركي من بعيد!!!!ودي أشوف مشفوح مثل ولد عمه ولا لا؟؟؟؟؟؟؟ اسمهان:أف منك!استحي استحي يالخفيفة زواجك عقب عشر أيام.. رانية:هههههههه أمزح عليك..بس إن كانت شخصيته مثل نويصر فالله يخلف على أفنان!! اسمهان:لا لا تركي رزين..ونويصرك ذا ماله شبيه!! ==================== مرت الأيام واقترب الزواج(زواج رانية وأفنان)..وقبل الزواج بكم يوم وصلوا مرام وعبدالرحيم من السفر..بالنهار راحت مرام لشقتها رأساً..أما عبدالرحيم مر على أمه يسلم عليها.. ويوم فتحت له أمه الباب..قامت ترحب فيه.. أم عبدالرحمن:الله يسامحك ياولدي..ليش ماعلمتني إنكم جايين اليوم؟؟ عبدالرحيم:وليش أقلقك؟ أم عبدالرحمن:لاقلق ولاشي..على الأقل عشان نطبخ لكم لقمة حارة ونرتب بيتكم ونبخره..وبعدين وين هي عروستك؟؟ عبدالرحيم:طلعت فوق لبيتها تبي تاخذ دش وترتاح شوي..خبرك يمه السفر طويل ومتعب.. أم عبدالرحمن:أجل قدامكم ساعات لين الليل ترتاحون فيها..وأنا بأنادي خالتك جوهرة وأحلام واسمهان وأم مشاعل وأم مرام وأم اسمهان على العشاء عندنا..وعبدالرحمن يعزم الرجال.. عبدالرحيم:يمه وليه التكاليف هذي؟مالها داعي.. أم عبدالرحمن:أقول ياما أشينكم عيال هالوقت!ماتحبون الجَمعات واللمَّات..ياولدي جنة من غير ناس ماتنداس!يازين الفرح بوجود الأهل والأحباب وحتى حريمكم بينبسطون بشوفة أهاليهم.. وقام عبدالرحيم يسولف مع أمه وياخذ ويعطي.. وبعد السوالف... أم عبدالرحمن: وش جبتوا لنا معاكم من السفر؟ عبدالرحيم:يكفي إننا جبنا أنفسنا لكم و جينا!!! أم عبدالرحمن:ههههه أكيد ياولدي رَجْعتكم لنا بالسلامة أحلى هدية..بس ظنيت إننا ببالكم مثل عبدالمجيد وزوجته..ماقصروا تذكرونا وجابوا لنا هدايا!!! عبدالرحيم:أووووهووو !بدينا بالمقارنات ياأم عبدالرحمن؟؟على العموم حِنا مانسيناكم..مرام جابت لك خوش هدية! وبعدها تبادلوا بعض المواضيع وطلع عبدالرحيم لمرام وقال لها بالسالفة! مرام:يووووه يالفشيلة عاد أنا ماجبت لأحد منهم شي! عبدالرحيم:وكل هذيك المشتريات اللي خذيتيها وينها؟ مرام:هذيك شريتها لنفسي ولأهلي ياحبيبي..الصراحة أهلك ماخطروا ببالي... عبدالرحيم:لاااااا انتي كذا بتحرجينا..طلعي أي شي من مشترياتك واهديه لأمي على الأقل.. مرام:أمك بس!البقية مالي شغل فيهم.. ======== وبالليل تقابل الجميع على العشا وتحمدوا لمرام رجعتها بالسلامة...وكانوا باقي الضيوف لسه ماحضروا..مافي إلا اسمهان وأحلام ومشاعل ومرام.. اسمهان:وحشتينا يامرام ملكة أفنان ماكان ناقصها إلا وجودك.. مرام:اسكتي بس.. ماكان ودي أرجع!صراحة الأجواء خيالية هناك.. أحلام:يقول عبدالرحيم إنكم صورتوا المناظرالطبيعية اللي شفتوها..؟ مرام:ايه ذكرتيني!جبت معاي الألبوم عشان أوريكم اياه.. وفتحت مرام شنطتها وطلَّعت لهم ألبوم صغير فيه صور الرحلة.... لاحظت مشاعل انه كل الصور اللي مرام متصورة فيها كانت كاشفة وجهها ولابسة طرحة على راسها بس وبناطيل وبلايز !! اسمهان:مرام؟إنتي فسختي عباتك يوم رحتي هناك؟ولا بس في الصور؟؟ مرام:ايه فسختها..ليش؟انتم لاسافرتوا برة تتغطون؟؟ أحلام:الحمدلله عشت سنين بأمريكا وأنا محافظة على حجابي الشرعي الكامل..وماضرني شي.. مشاعل:أنا أول مرة أسافر لبرة يوم رحت لمصر..والحمدلله ماخلعت عباتي.. مرام:وليش؟إنتي عروس وتبين تنبسطين!! اسمهان:والانبساط مايجي إلا بخلع الحجاب؟ترى يامرمر الحجاب عبادة مو عادة!! مشاعل:وترى الله واحد..ويحاسبك ببلدك أو ببلد غيرك! مرام:وبالله من جدكم انتوا أروح لبلاد الغرب وأنا متغطية.. أحلام:واش فيها ياقلبي؟الحجاب ماعاد صار غريب عنهم..وغير كذا إذا ماتحبين تلفتين انتباههم للون الأسود كنتي تقدرين تلبسين أي لون ثاني.. مشاعل:من غير زعل يامرام..بالنسبة لي السفر اللي يخليني أفرط بشي من ديني..الله يغنيني عنه!!! كتمت مرام غيظها وسكتت ولما جوا أهلها..قعدت تفرِج أختها ماجدة على صورها.. ماجدة:واااو الصور تحفة.. مرام(بصوت هامس):تصدقين هالمهابيل ماعجبهم لبسي؟حشا تقولين كفرت؟؟ ماجدة:وش عليك منهم؟كل ناس لهم نظرة!ومادام زوجك راضي فماعليك من أحد!!!!!! مرام:ياحبيبتي..أنا دارية انه المسألة مو دين ولاشي..إلا الغيرة بتاكل قلوبهم..وخصوصاً انه زوجي مدلعني ومخليني على كيفي!!!!!!!!!! =========== ملحوظة للفائدة: رضا الله وطاعته مقدم على رضا وطاعة الزوج!! ولاطاعة لمخلوق في معصية الخالق..فكم من النساء تنمص وتوصل لارضاء زوجها!!ضاربة بـ رضا الرحمن عرض الحائط!!! اتصلت رانية على أفنان قبل الزواج بكم يوم.. وبعد التحية والسلام والسؤال عن الأحوال... رانية:بشري ياعروس؟خططتي للزفة شلون بتكون؟ أفنان:الصراحة؟.....لا!! رانية:يابرودك!!مابقي إلا كم يوم بس!! أفنان:عارفة..بس أحس إني ماتهمني هالشغلات كثير!أهم شي يمر يوم الزواج على خير.. رانية:أفا!!يعني ليش إنه هالزواج الثاني..مابتهتمين؟؟ أفنان:بسم الله علي!أي زواج ثاني؟؟هذا زواجي الأول! رانية:يالخبلة أقصد بالنسبة لتركي! أفنان:عاد لاتذكريني تكفين!يكفي إنه يغلط فيني ويناديني عبير!!! رانية:هههههههههه..عاد لاأوصيك..تكفين انفشي كعشتك مثل عبير بتطلعين تحفة!! وهو شلونه معك؟يكلمك؟؟ أفنان:كلمني مرتين على تلفون البيت لأنه ماعندي جوال! رانية:بيني وبينك أحسن لك!أنا ونصُور مااستفدنا من المكالمات غير عوار القلب والراس!كل دقيقة نتناقر ونتهاوش!!!! أفنان:يوه!مسرعكم..وش خليتوا للمستقبل؟! رانية:لا ياحبيبتي...ليش إني باقي في بيت أهلي قاعدة أفوت له كثير شغلات!!لكن لاصرت ببيته بأروضه على مزاجي الخاص!!المهم..تراني متصلة عشان أتفق معاك على حركة نسويها في الزفة!! أفنان:الله يستر من أفكارك!!هاتي ماعندك! وبدأت رانية تقول لأفنان فكرتها.. ===================== في بيت أم عبدالرحمن..كانت الأحداث روتينية.. مرام كل دقيقة والثانية وهي طالعة تتمشى مع عبدالرحيم.. واسمهان يامشغولة بأي شي في بيتها..ياتروح زيارات للبعض إذا فضي لها عبدالرحمن! أما مشاعل كانت كل مافكرت تطلع مكان تمر على أم عبدالرحمن تسلم عليها وتقعد معاها شوي.. أم عبدالرحمن:الله يعطيك العافية يابنتي ماتنسيني أبد..بس لاتحسبيني أنقِد عليكم لو مامريتوني..ترى أنا أحب أخلي كل واحد براحته في هالبيت أهم شي يكون الكل مبسوط وراضي.. مشاعل:والله من غلاتك ياخالتي أحب أزورك وأتطمن عليك..إنتي بمعزة أمي الله يحفظها.. وودعوا مشاعل وعبدالمجيد أم عبدالرحمن وخرجوا بمشوار... أم عبدالرحمن(بينها وبين نفسها):الحمدلله ..ربي عوض صبرك خير ياعبدالمجيد..وعطاك بنت الحلال اللي تستاهلك.. ================= والليلة السابقة للزواج كانت أم أفنان قاعدة مع بنتها.. أم أفنان:ليش ياأفنان قلقانة ومتوترة وماكأنك عروس؟في شي مضايقك؟؟ أفنان:يمه..مدري شلون بأفارقكم؟قلبي متعلق فيكم! وراحت تقطر عيونها دموع!!!!!! أم أفنان:ههههه ياحبيبتي هذي سنة الحياة..وبعدين انتي وين بتروحين عننا يعني؟؟بتسكنين في نفس الديرة..وترى هذي نعمة ماحصلها غيرك...كثير من البنات يتزوجون ويبعدون عن أهاليهم ويتغربون..وهذا هم عايشين ومبسوطين.. أفنان:بس يمه سندس تعلقت فيها حيل.. ماأتخيل شلون بأبعد عنها..دقيقة! أم أفنان:انتي لاتفكرين إلا بنفسك..أختك وعندها من يداريها وأنا بعد مابأقصر عليها..ولا يعني بتحبين بنتي أكثر مني؟؟؟وبعدين تركي وأهله ناس طيبين ومانسمع عنهم إلا كل خير..بإذن الله تتوفقين معاه.. أفنان:مدري...أحس أوقات إنه ماراح يحبني أو يهتم فيني..لأنه سبق له الزواج بغيري..وهالشي يقهرني! أم أفنان:وهو الزواج السابق له تسمينه زواج؟؟؟انتي أدرى بالقصة يابنتي..ماعاش مع بنت الناس إلا كم يوم وعافها..ولو كان قلبه معلق فيها ماكان طلقها..المهم انتي لاتشغلين بالك وتفكرين كثير.. وبعدين طول عمرك كنتي بنت عاقلة ومطيعة..وهذا اللي أتمنى تمشين عليه مع زوجك..ودايماً خلي لسانك حلو معاه...صدقيني الكلمة الطيبة تسحر وتملك القلوب..وخذيها مني نصيحة طاعة ربك ورضاه أهم شي بهالدنيا..ولاتفرطين بدينك عشان الدنيا..خليك بعين زوجك الانسانة الصالحة الطاهرة صدقيني بتكبرين في عينه..الرَجَّال حتى لو كان من أفسق الناس يهمه إن زوجته تكون انسانة تخاف الله.. واستمرت الوصايا والنصايح...لين ماغلب أفنان النوم ============= ببيت رانية...كانت رانية حاطة ماسك(قناع)كريمي على وجهها وقاعدة تمشي بالبيت... شافها أخوها مشاري وقال:بسم الله علينا!شوف وجه العنز وإحلب لبن!!!! رانية:من زينك ياالدب؟اش فهمك انت بهاالأشياء؟ مشاري:بكرة الفكة بكرة!!أنا أدري إنك بتعيشين بكرة حياة تتمنين معها لو ترجعين بيت أبوك وتصطبحين بوجهي!!! رانية:بلا يبلاك..فاول خير.. أم رانية:تعالي يارانية.. وأقبلت رانية:خير يمه.. أم رانية:صكي الباب ماأبي مشاري يسمع! رانية:يوووه..أكيد السالفة خطيرة؟!!!! أم رانية بارتباك:شوفي... أنا موب عارفة من وين أبدأ..بس مثل ماتعرفين يابنتي..بكرة بتكون أول ليلة لك مع عريسك.. رانية:وعساها ماتكون الأخيرة..اللي بعده اللي بعده! أم رانية:وفيه شي اسمه ليلة الدخلة...و...و رانية:يمه وفري على نفسك هالمعلومات..الله يخلي المنتديات الزوجية بالنت..علمت الواحد أحسن من المدارس!!إلا انتي لو مو فاهمة شي بهاالأمور لاتستحين ..اسأليني وأنا أجاوبك!!!!!!!! أم رانية:قطيعة تقطعك ياهالبنت!!مافي شي إلا وتعرفينه؟وأنا اللي حزنانة عليك وأقول قطوة مغمضة!!!!!ضفي ضفي وجهك عني هالساعة واطلعي برة!! فتحت رانية الباب وطلعت..ولقيت أخوها مشاري واقف عند الباب يتسمع!!! مشاري:حسبي الله على إبليسك!!ليه ماخليتي أمي تتكلم؟كان استفدنا لنا معلومتين على الطاير!!! رانية:قاعد تتصنت علينا؟؟؟هيا إنطم لاتسمع كلامك وتطَّير راسك من على رقبتك!!!! ======================= أقبل يوم عرس (رانية وأفنان)..وتجهز الجميع وازدحمت القاعة بالحضور..بأهل تركي وأقاربه وأهل ناصر كلهم أخوانه وعيالهم وعيال عيالهم وأصحاب تركي وناصر وزوجاتهم.. ووصلوا العروستين وأهاليهم...وكل وحدة منهم بغرفة وراحت رانية لغرفة أفنان تسلم عليها... رانية:مبروك يافنونة..طالعة قمر بسم الله عليك.. أفنان:الله يبارك فيك..حتى إنتي ماشاء الله تجننين.. رانية:بالله اش مشاعرك؟أنا ريقي بدأ ينشف من القلق! أفنان:وأنا قلبي ينبض بقوة حاسة بخوف مو طبيعي..ياربي مدري شلون بأقابل تركي وأنا بهالحالة في بيت أم عبدالرحمن...اقترح عبدالرحمن على أمه واسمهان يجون مع عبدالرحيم بسيارته لأنه بيروح بدري ويوقف مع تركي وناصر... أما مشاعل وعبدالمجيد راحوا قبل الجميع لأن مشاعل تبي توقف مع أختها أم أفنان.. وبالفعل استعدوا أم عبدالرحمن واسمهان للركوب مع عبدالرحيم ونزلت مرام من فوق وسلمت عليهم..وكانت لابسة عباتها عباية سوداء وفيها رسمة كبيــــــــــــــرة من الخلف على شكل طاووس أزرق ومطرزبالخيوط الملونة والفصوص البرَّاقة!!والطرحة نفس الشي... استغربت أم عبدالرحمن من هالتبرج الواضح وخاصة إن شروط الحجاب الشرعي ماتخفى على أحد!! وحبَّت توضح لمرام هالشي من غير ماتضايقها..وقالت:ماشاء الله يامرام عباتك هذي تحتاج لعباة ثانية فوقها!!! مرام:ليش؟أنا رايحة عرس..من الطبيعي تكون عباتي مزركشة!! أم عبدالرحمن:بس يابنتي العرس نلبس فيه فساتين عرس,,وبعدين نفسخ العباة بداخل القصر..يعني الناس ماعليهم من عباتك وماحد بيشوفك فيها..مابيشوفك فيها إلا الرجال اللي واقفين برة قدام القاعة! كتمت مرام غيظها وماردت..ووصلوا لباب السيارة وقامت مرام فتحت الباب الأمامي وجلست جنب زوجها..!!من غير ماتحترم الشخص الأكبر سناً اللي هي أم عبدالرحمن وتِعرض عليها هي الجلوس قدام! طبعاً اسمهان كانت حاضرة الموقف واستغربت من تصرفات مرام وسكتت! ركبت اسمهان وأم عبدالرحمن ورا,,, عبدالرحيم:شلونك يمه؟؟ أم عبدالرحمن:بخير الحمدلله.. عبدالرحيم:كيف الحال يازوجة أخوي؟ اسمهان:الحمدلله.. عبدالرحيم:يمه؟خالتي جوهرة معزومة على العرس؟ أم عبدالرحمن:ايه معزومة..حتى أختك أحلام..بس بيجون مع أزواجهم.. وقام عبدالرحيم ينكِت ويمزح في السيارة مع زوجته ولاكأنه في ناس راكبين معاهم!! وصلوا القصر ونزلوا راح عبدالرحيم لقاعة الرجال والحريم راحوا لقاعة النساء.. وقفوا اسمهان ومرام قدام المراية في المدخل يتضبطون....وأم عبدالرحمن دخلت قبلهم لداخل..وكانت مرام كاشخة ومتضبطة بصالون أختها تسريحة وماكياج.. مرام:هذي أم عبدالرحمن اللي تقولين طيبة يااسمهان؟شفتي شلون بغت تاكلني بعيونها يوم شافت عباتي؟؟؟ اسمهان:من غير زعل؟معاها حق!عباتك ملفتة للنظر مرة كأنها فستان سهرة..مدري شلون شريتيها! مرام:أشوف صفيتي ضدي؟زين لو شاطرة..روحي اشتري مثلها!!تراها مكلفتني الشي الفلاني!! اسمهان:بصراحة ماعندي جراءة أبداً ألبس مثلها وأنا أدري انه حرام!وبعدين لي عتب عليك..شلون تركبين قدام بسرعة من غير ماتعرضين على أم عبدالرحمن تركب هي الأول؟؟؟ مرام:ليييييييييه؟حتى في هذي بأشاورها؟أما أمركم عجيب! اسمهان:مافيها شي.. من باب الاحترام والتوقير للكبير إنك تعرضين عليه يركب قدام ولاتنسين انها أمه..مع إني أعرف خالتي كثير مرات ماترضى تركب قدام لاطلعنا أنا وهي مع عبدالرحمن.. مرام:الصراحة..المثاليات الزايدة مالها داعي..أنا أشوف أحق وحدة المفروض تركب جنب زوجها هي الزوجة!!أما الأم خلاص..شبعت في ولدها طول السنين الماضية!!! وتوجهوا مرام واسمهان لباب القاعة الداخلي وكانوا أهل تركي وناصر واقفين يستقبلون الزوار ويرحبون بالبخور والغطاريف... لما دخلت اسمهان القاعة كانوا أمها وأخواتها مجتمعين على طاولة..سلمت عليهم اسمهان وكانت معاها مرام..وانتبهت اسمهان إنه سمهونة الصغيرة بنت محمد وسماح في العربية جنبهم وشالتها بشوق وقامت تسلم عليها.. اسمهان:شوفي يامرام هذي بنت أخوي وسميَّتي... مرام:ماشاء الله تهبل..الله يرزقني ويرزقك بنات حلوات مثلها.. اسمهان:آمين يامرام آمين..ماتتصورين وش كثر أنا ملهوفة على طفل أضمه.. مرام:أما أنا أفكر أحمل بعد سنة.. وقعدوا مرام واسمهان على نفس طاولة أهلها يسولفون ويضحكون.. وآثاري نجلاء وصلت وماانتبهت لهم فراحت رأساً على غرفة رانية تبارك لها.. وكانت رانية واقفة قدام المصورة تتصور..وكل ماجات المصورة تلقط صورة .. صاحت فيها رانية:هيييه اصبري..أبي أسوي حركات على كيفي!!ايه صوريني كذا وأنا عيوني فوق!!لا لا صوريني وأنا أناظر تحت نظرات رومانسية!! المصورة:لاحول ولاقوة إلا بالله أصورك فوق ولا تحت؟! رانية:وإنتي اشفيك زعلانة؟هو زواجي ولا زواجك؟؟ المصورة:وهي عدستي ولا عدستك؟؟ رانية:والفلوس اللي بأدفعهم لك..فلوسي ولا فلوسك؟؟ ودخلت نجلاء..وهم يتهاوشون.. المصورة:كمان بالمرة منتي معقولة يامدام رانية لكي ساعة وإنتي كل شوية تقولي أبغى دا وماأبغى دا..أنا عارفة شغلي كويس ماأحتاج أحد يشرح لي... رانية:خلاص..مادام تعرفين شغلك..فأكيد بعد تعرفين مكان الباب..افتحيه واطلعي منه..!! وزعلت المصورة ولمت أغراضها وخرجت.. نجلاء:ليش كذا يارنون؟الحين شلون بتتصورين؟؟ رانية:ماعليك..بأسحب مصورة أفنان وأجيبها تصورني! نجلاء:أنا توي جاية من غرفة أفنان لاجابت مصورة ولايحزنون!!! رانية:إيه صح!!ياذي الفشلة!!لحظة لحظة نجول!! وفتحت رانية الباب وقامت تلحق ورا المصورة.. رانية:مدام دينا مدام دينا..صبر ياشيخة صبر...وين بتروحين؟ ترى تصويرك يهبل!! المصورة:شوفي إزا تبغيني أصورك فـ بليز من غير تدخلات..ماأحب أحد يلخبط شغلي رانية:خلاص ماأبي أتدخل..بس تكفين أبي أطلع حلوة وبيضاء وألِق مثل النجفة!! المصورة:لاتشيلي هم ياقلبي..الله يخلي لنا الفوتوشوب! ورجعوا للغرفة وقامت المصورة ترتب أغراضها من جديد..ورانية ونجلاء يسولفون.. وفجأة قامت نجلاء تحضن رانية ودموعها أربع أربع!! رانية:وشفيك؟وش بلاك؟تبكين بعرسي ياللي ماتستحين؟؟ نجلاء:ماني متخيلة كيف كلكم تزوجتوا وبنبعد عن بعض وبأصير وحيدة!! رانية:وجع!قولي ماشاء الله..لاتطقينا بعين..عاد نويصر على طريف.. ينتظر شي يصير عشان يقطني ورا ظهره!!!وبعدين وش الجديد؟مو انتي دارية من زمان إننا مخطوبات وبنتزوج؟ نجلاء:أدري..بس بجد راح ننحرم من أيام المدرسة وذكرياتنا الحلوة..دليني وين كنا نقدر نتقابل يومياً بمكان غير المدرسة؟؟ رانية:صدقتي..بس هذا حال الدنيا..لكن ماعليك بنتقابل بالكلية ان شاء الله.. ودخلوا بهاللحظة مرام واسمهان.. وقاموا يسلمون على بعض... وقامت رانية تحضنهم بقوة.. ويوم وصلت لمرام.. مرام:لا لا مكياجي بيخرب!! رانية:تكفين يالناعمة هذا أنا عروس ماخفت على مكياجي..تكفون نادوا أفنان خلونا نفرح بهاللحظات الحلوة.. راحت اسمهان تناديها من الغرفة المقابلة وجات هي ومشاعل.. وسلموا على بعض..وتبادلوا التعليقات على مناظرهم وأشكالهم... وبعدين نزلوا مرام واسمهان ومشاعل ونجلاء..وقعدوا على طاولة وحدة... وكانت الطقطقة تعم الأجواء.. والحريم يتنافسون على منصة الرقص..تقولون حَلَبة سباق!! ومرت أجواء العرس في كلام وسلام..وكل أقارب العروستين والعريسين مجتمعين.. ===== بقاعة الرِجال...كان تركي وعبدالرحمن واقفين يسولفون مع بعض.. تركي:تكفى ياعبدالرحمن اشغل ناصر شوي لين ماأنتهي من مهمتي!! عبدالرحمن:أي مهمة؟ تركي:جبت معاي بودرة يسمونها بودرة العفريت من محل ألعاب مقالب وودي أرش على ناصر شوي منها من غير مايلاحظ!! عبدالرحمن:وأنا اللي أقول عليك عاقل؟طلعت أمصخ منه؟ تركي:ومين قال لك إني أحب هالحركات؟ بس ناصر ولد عمي وأعرفه..وماأستبعد يوم بأطلع من هنا وأروح مع عروستي ألقاه مفسفس لي الكفرات!ولا مسوي لي حركات من إياها!لذا فالاحتياط واجب!عاد لاتصعبها علي! عبدالرحمن:معليش..أنا أقول ماانتم بصغار على هالحركات وآسف مابأساعدك.. تركي:الصراحة أنا ناوي على الشر ناوي.. وراح تركي نادى واحد من عيال اخوان ناصر واتفق معاه يلعبون على ناصر ويقنعونه ان ثيابه فيها شي!! وجاء هاالشاب وسحب ناصر على جنب..وقال:عمي ناصر عمي ناصر..فشلتنا يابن الحلال في شي يتحرك بداخل ثوبك وانت ماتدري!! ناصر:أعوذ بالله وشهو؟ تركي:إنت اخلع البشت وبيبان وشهو.. خلع ناصر البشت وقاموا ينفضون ثوبه وخلوه يفتح الياقة اللي حول الرقبة كأنهم يفتشون عن حشرة وتركي يرش من البودرة وناصر ولاهو حاس بشي..وتركي يرش بين جلد ناصر وفلينته الداخليه وناصر ولاهو داري عن اللي صاير..!!!!!! تركي:هيا احمد ربك طلعت من ملابسك زهيوي(صرصار) هالكبر!قاعد يتمشى ويصيف بين ثيابك! وعقب ثواني قام ناصر يتحكك ويهرش جسمه بطريقة تفشل لين اضطر يروح الحمام مخصوص ويهرش براحته مخافة نظرات الناس!! =============== وحانت لحظة الزفة.. دخلوا 3 أولاد صغار لابسين ثياب وأشمغة ودقلة ومعاهم سيوف..و3 بنات صغار لابسات ثياب خليجية وفاردات شعورهم...وقفوا الأولاد الثلاثة جنب بعض في طرف المسيرة ومقابلهم ال3 بنات وطقت لهم الطقاقة وقاموا البنات يرقصون بشعورهم والأولاد يؤدون العرضة السعودية بالسيوف.. وانطفأت الأضواء وتوجهت الإضاءة للسقف..وتوقف الطق والرقص وبدأ صوت مؤثرات بشرية حالمة ورياح..ونزل من السقف مرجيحة واقف عليها العروستين(أفنان ورانية)وهم يلوحون للمعازيم وسط الهتافات اللي تعالت...وبدأ مرش الورد والفقاعات من حولهم وأبيات شعر في شريط تنقال بأسماء العروستين... لين نزلوا الأرض وهم ماسكين أيادي بعض وماهم شايلين باقات ورد ولاشي..وبدأوا يمشون بهدوء على المنصة..وبدأ الطق والأطفال يرقصون.. شافتهم وحدة من المعازيم وقالت:يازينهم..بناتي الثنتين تزوجوا بليلة وحدة وتعالوا شوفوا الغيرة بينهم!بس هذول ماشاء الله مايقربون لبعض ورضوا ينزفون سوى!عالم عجيب!!!!!! طبعاً الزفة كانت مفاجئة للجميع لأنه ماحد توقع إن العروستين بينزفون مع بعضهم.. اسمهان:يارب يسعدهم يهبلون وهم يمشون مع بعض.. مشاعل:الله يسعدهم على هالفكرة فاتتنا يامرام ليتنا سويناها بزواجنا.. مرام:ولا فاتتنا ولاشي..أكيد هذي أفكار رانية!طول عمرها راعية خرابيط..بالله اش بتستفيد من هالحركة؟مابتكسب من الناس إلا المقارنات بينها وبين أفنان!!لا وبعد مسوية اختراع ومو شايلة بيدها شي.. التفتوا اسمهان ومشاعل وطالعوا في مرام باستغراب.. مرام:وشفيها الصراحة؟ صايرة تِزَّعل هاليومين؟؟ ورانية وأفنان يمشون بوسط المسيرة..قاموا العاملات بالقصر جابوا لهم تورتة كبيرة..قطعوها رانية وأفنان وأعطوا كل طفل قطعة بفمه ونزلوا الأطفال من المسيرة بالترتيب.. وحول التورتة فيه حلويات مغلفة قاموا العروستين ينثرونها على الحضور..وماقصروا بزورة الناس يلقطون الحلاوة تقولون عيد!!!! و****لت التورتة من قدامهم وكملوا المشي إلى أن وصلوا للكوشة..وتوافدوا عليهم الأهل والأحباب يسلمون ويباركون.. ومرت أحداث الزواج بشكل اعتيادي..ولما جاء موعد العشا..كل وحدة من العروستين ودعت أهلها وراحت لعريسها.. ركبت أفنان مع تركي..وراحوا للفندق.. أما رانية ركبت مع ناصر وأخذها في طريق غريب شوي!! رانية(بقلق):على وين بتاخذني؟ ناصر:بمكان بعيد ياحلوة أنا وإنتي بس والشيطان مو ثالثنا!!! رانية:لا بجد أسألك..اللي أعرفه إنه مافي فنادق حول هالمنطقة..لايكون بتوديني شقة مفروشة؟؟ترى أتقرف!! ناصر:وليش نروح لفندق ونضَيِق على أنفسنا والله موسعها علينا؟عندنا بيت يسرح فيه الخيل وانتي تقولين فندق؟؟ رانية:اييييييييش؟تبي توديني البيت من أول ليلة؟؟ ناصر:ايه..اش المشكلة؟غيرك ماعنده ربع بيت..وانتي متكبرة لاتروحين بيتك؟ رانية:مالي شغل..أبي أروح فندق! ومعاي شنطتي مجهزة فيها أغراض الفندق..والبيت وملحوق عليه وبنعيش فيه على طول لين مانمل منه. ناصر:خلاص أجل..مادام مصرة على روحة الفندق..بأوديك فندق وأنا بأرجع لبيتنا أنام فيه..!!!! رانية:يامصاختك..زين اليوم بأمشيها لك ونروح البيت بس بكرة لازم نروح لفندق فاهم؟؟ ناصر:كله منك ياحلوة..حرمتيني من المكالمات أسبوع قبل الزواج قال إيش عشان تظل على شوق.وآثاريك تخططين ولاتعلميني ياأم شوق!!! رانية:وش دراني عنك؟أحسِب إنك تفهم في الاتيكيت شوي وبتحجز لي في أي فندق.. ورجع لناصر الهرش من جديد وصار ماسك نفسه وهو يسوق وكل شوي يتهزز بالمقعدة يمين وشمال.. ورانية تفكر بنفسها وتقول:شكله هالرجال مو طبيعي!يا حشران وماسك نفسه..يا مختل عقلياً!! الله يعينك يارانية!!! ===== وبس دخلوا للحي اللي يسكنون فيه.. قالت رانية:هو هذا بيتنا؟؟ ناصر:ايه..بس ماعليك من شكله من برة..تراه حلو من الداخل.. رانية(بداخلها):الله يسامحك يايمه..ليش ماعلمتيني يوم جيتي ترتبين عفشي إني ساكنة بـ عِشة؟!!! ودخلت رانية تتفرج في البيت بدهشة وتدخل للغرف... ناصر:وشفيك تناظرين البيت كذا؟كأنك سايح أوروبي ببلد عربي؟؟ رانية:معقول هذا بيتنا؟؟ ناصر:ايه..ليش مو عاجبك؟قولي الصراحة اش رايك فيه؟؟ رانية:الصراحة الصراحة..خسارة هالأثاث الحلو في هالبيت القديم!! قام ناصر يتحكك ويحك رقبته وظهره..ورانية تراقبه..وناصر مو قادر يسيطر على نفسه.. رانية(تصرخ):وشفيك يامجنون؟ ناصر:مدري أحس إني مو طبيعي وجلدي يحكني.. رانية:إنت يا جربان!!يا مدمن وحدة من الثنتين!اعترف أحسن لك؟!!! ناصر:وش هالكلام يابنت الناس؟اتقي ربك.. رانية(وهي تبكي):وخر عني!لو لمست فيني شعرة بأسوي لك فضيحة وأجمع الناس عليك.. ودخلت غرفة وقفلت الباب على نفسها...وصارت مو عارفة كيف تتصرف.. خافت تتصل على أهلها وتسير مشكلة كبيرة..وأول من خطر على بالها اسمهان!! اتصلت فيها وهي تبكي..وكانت اسمهان قد رجعت بيتها وتوها تدخل وعباتها لسه فوقها وعبدالرحمن واقف جنبها.. اسمهان:رانية؟؟اشفيك حبيبتي؟ليش تبكين؟اش اللي حصل؟ رانية:الحقي علي يااسمهان ناصر النذل طلع مدمن!! اسمهان:ايش؟ناصر مدمن؟مو معقول.. رانية:أقول لك طايح قدامي تحكك وهرش وجسمه أحمر تقولين منقوع بشطة!!مدري مدري كيف أسوي انقذيني قربت أتجنن! اسمهان:لحظة لحظة..خل أقول لزوجي.. وقامت اسمهان تقول السالفة لعبدالرحمن اللي تشقق من الضحك!!!! حطت اسمهان يدها على السماعة وقالت:حرام عليك البنت منهارة وانت تضحك؟؟ عبدالرحمن:طمنيها طمنيها السالفة ومافيها إن تركي رش على ناصر بودرة عفريت! وقامت اسمهان وحكت لها السالفة.. رانية:انتم تستهبلون؟ولا من جدكم؟ اسمهان:يابنت الحلال أكيد لو خلع ملابسه بتلاحظين آثار البودرة عليها!! تطمنت رانية وبغت تتأكد..وفتحت الباب..وناصر منسدح بالصالة يتحكك.. رانية:قوم اخلع ملابسك!!!!! فتح ناصر فمه وقال:هاه؟؟ رانية:قِلت قوم اخلع ملابسك..إيش ماتفهم عربي؟؟ ناصر:لا فهمت..بس هل إنتي طبيعية؟؟؟؟؟ رانية:لاااا سلامات..عاد إنت اللي طبيعي وإنت كأنك صرصور مرشوش فليت!!قوم اخلع ملابسك خلني أتطمن!!!!!! ناصر(باستغراب شديد):على ايش تتطمنين؟أقسم بالله إني رجَّال من ظهر رجَّال!!!! رانية:أدري إنك رجال وشلون أخذتك أجل؟؟أبي أتأكد ملابسك فيها بودرة ولا لا؟؟؟ ناصر:صدق إنك ماتخافين الله!أي بودرة؟وأي خرابيط؟على بالك أنا مدمن؟ رانية:لا ياحبيبي..يقول المثل (من استخف بالناس استخفوا به)!ومن البلاوي اللي تسويها بتركي رد لك الصاع صاعين ورش عليك بودرة العفريت حقت التحكك والهرش!! قام ناصر يسترجع الأحداث..وقال:شوفوا النذل؟يمين ماأعديها له!!! رانية:عاد كفاية مقالب عاد..مدري وش هالموضة اللي مطلعينها الشباب هاليومين؟حتى عبدالرحمن زوج صديقتي يوم تزوج صاحبه اللي مايستحي سوى فيه مقلب وخلى الحلاق يحلق شنبه!!من جد صديق مايستحي الله لايوفقه!! عرف ناصر نفسه إنه راعي مقلب عبدالرحمن وقام يتنحنح ويقول:لاتدعين على عيال الناس! رانية:روح خذ لك دش تكفى!منظرك جاب لي العصبي وصار ودي أهرُش!!! ناصر:المشكلة البودرة كلها بظهري..شلون بأدعكه لحالي؟!!!! رانية(بسخرية):لاااااا قطعت قلبي ياعين أمك..من اللي كان يدعك ظهرك وإنت عزوبي؟ ناصر:ماحد..كنت أتحكك بالجدار لين ينظف!! زهقت رانية من كلامه ودخلت غرفتها تبدل هدومها!! وبعد دقايق وناصر يتحمم..اتصلت اسمهان على رانية.. اسمهان:رنون؟طمنيني اش صار معك؟ رانية:الحمدلله ماشية الأمور...الباشا طلع براءة! اسمهان:أشوى..ترى من لهفتي عليك دقيت..ولا عبدالرحمن مو موافقني على الاتصال يقول عيب الوقت متأخر..عموماً تصبحين على خير.. رانية:وإنتي من أهل الخير.. طلع ناصر من الحمام وهو منتعش.. وراح لرانية اللي قاعدة تنتظره بغرفة النوم.. ناصر:أنا ميت جوع ياترى إنتي مثلي؟؟ رانية:أنا من الظهر عند الكوافيرة وماذقت شي! ناصر:مدري اشفيه ياسر تأخر علي..وأنا موصيه يلحقني بالعشا.. رانية:بس الوقت متأخر مافي مطاعم مفتوحة هالحزة!! ناصر:لا أنا وصيته يلَقِط لنا من عشا البوفيه اللي عند النسوان..بس شكل القاعة باقي فيها نسوان وماعرف يتصرف!!! رانية:ناصر؟تبيني آكل من فضلة المعازيم؟ليش؟مافي عشا خاص بالعرسان؟ ناصر:ليش؟تحسبين نفسك قاعدة بفندق؟ وفي الفندق كانوا تركي وأفنان في قمة سعادتهم وتركي يحكي لها عن نفسه وذكرياته وهي تسمعه بشغف.. تركي: هاليومين أهلي بيسوون عزيمة لنا وبعد 3 أيام رحلتنا.. أفنان:رحلتنا على وين؟ تركي:خليها مفاجأة!! وقام تركي يسولف لها عن مقالب ناصر فيه...وذكر لها موقف البودرة.. أفنان:هههههه حرام عليك..شلون بيكون شكله قدام زوجته؟ تركي:خليه يقعد يتحكك قدامها كأنه شمبانزي لين يتوب!! ============ اليوم الثاني..أهل تركي وأهل ناصر حجزوا استراحة وعزموا فيها العرسان وبعض الأصدقاء على العشا.. وعزموا أهل عبدالرحمن..وكانوا كلهم مجتمعين ببيت أم عبدالرحمن على الغداء.. أم عبدالرحمن:روحوا انتم.. أنا وجوهرة متواعدين نزور بنت خالتي اليوم.. مشاعل:عاد أنا لازم أروح ودي أقابل أفنان وأشوف اش علومها وأكيد أهلي كلهم جايين.. اسمهان:وأنا بعد نفسي أقابل رانية وأشوف اش صار عليها عقب سالفة أمس...وأقابل أفنان.. مرام:أنا ماأبي أروح! خاطري أطلع أتمشى..إلا واشفيها رانية؟؟ قامت اسمهان حكت لهم عن اللي صار..وهم يضحكون... مشاعل:لا لا مو معقول..ماتوقعت إن تركي راعي حركات..الله يعين أفنان.. اسمهان:لاهو راعي حركات ولاشي..بس من زود ماجاه من ناصر..لين الحين عبدالرحمن قد حكالي أكثر من عشرين موقف من مواقفهم ومقالب ناصر فيه!! مرام:هههههه بيني وبينكم رانية تستاهل..هي هبلة وجاها اللي أهبل منها!!! اسمهان(بغيظ):مو كانت هبالتها تعجبك زمان وماتسمينها هبالة تسمينها خفة دم؟!! انحرجت مرام وسكتت.. ============= وبالليل تقابلوا العرايس مع اسمهان وقعدوا على جنب.. مشاعل:شلونك فنونة؟كيف ليلتك أمس؟؟ أفنان:حلوة الحمدلله.. رانية:اسألوني أنا عن ليلتي!!راحت أفنان تستانس مع زوجها وخلوني بحسرتي مع المهروش ناصر!! أفنان:هههههههههههه واي عليكم حكى لي تركي عن المقلب بس ياترى اش اللي صار معاكم؟ رانية:ماشيين بالسيارة في أمان الله..إلا وأخينا في الله يتقلب على المقعدة ويهتز كأنه يرقص وعاد أنا خمنت انه حشران!بس يوم وصلنا البيت لقيته مامسك نفسه ورمى عمره بوسط الصالة وقام يتلوى ويتحكك وصار جلده أحمر...وقتها انهبلت وقلت هذا يا خِرِيج شِهار بالطايف..يا خريج مستشفى الأمل!!! الجميع:ههههههههه رانية:لولا إني دقيت على اسمهان وطمنتني ..مدري اش كان بيصير فيني!! 0000000 وعاد بنات أخوان ناصرجلسوا مع رانية وتعرفوا عليها عن قرب وسمعوا سواليفها واستانسوا عليها.. وبعد السوالف والطقطقة اللي بالاستراحة كترحيب بالعرايس قاموا أهل العريسين ومسكوا رانية وأفنان من أياديهم ورقصوهم معاهم.. وبعدها جاء موعد العشا.. ومرت الليلة لى خير.... ========= ثاني يوم من الصباح صحت رانية وقالت:نصور وين وعدك لي؟؟ ناصر:هذا أنا وفيت بوعدي!وعدتك أتزوجِك وتزوجتك!! رانية:لاااا ياشيخ؟أنا قصدت الروحة للفندق! ناصر: وش تبين بالفندق؟ بيتنا ماشاء الله ماأحسنه وأكبره! رانية:ياخي نغير جو..وبعدين المطعم تحت طلبنا بالفندق مو مثل قعدة البيت نضطر نشتري أكل من برة ونستخدم المطبخ..الصراحة ماكأني عروس! ناصر:وأي فندق يعجبك ياست الحسن والدلال؟؟ رانية:أي فندق خمسة نجوم يؤدي الغرض! ناصر:ابشري! وعبوا أغراضهم وراحوا يدورون فندق مناسب يقضون فيه يومين.. ============ وبعد قضاء يومين بالفندق فكر ناصر يطلع.. ناصر:يالطيف يارب لو شفتي الفاتورة كان جاك سكتة!!الله أكبر عليهم كلها يومين اللي قعدناها هنا وطالبين مبلغ بذيك الحسبة!! رانية:طبيعي..هذا فندق فايف ستارز ماهو بيت شعبي بـ حارة قديمة!!! ناصر:لا لا مالنا قعدة هنا قومي رتبي أغراضك خل نمشي لبيتنا.. رانية:ماني طالعة لين توعدني بشي! ناصر:آمري.. رانية:نســــــــــافر للخارج!!!! ناصر:ليش؟بعثة ولا علاج؟؟ رانية:لاتستخف دمك عاد!سياحة..واستجمام! ناصر:سياحة واستجمام؟ولا تطيير حمام؟المثل يقول ياحلوة اللي معاه قرش ومحيَره يشتري حمام ويطيره!!! رانية:وشفيها لاسافرنا؟هذا هم عيال أم عبدالرحمن أقرب ناس تعرفهم سافروا بزوجاتهم في شهر العسل!! ناصر:وش يعني عيال أم عبدالرحمن؟اخواني هم وأنا مدري؟وبعدين لاتقارنيني فيهم هذول عيال عِز من يومهم يعني ماتهمهم الفلوس!! رانية:ياخي أنا ماطلبتك تحجزلي طيارة خاصة ولا تشتري لي يخت رحلات..كل اللي أبيه رحلة بسيطة على قدنا! ناصر:الحين أنا ودي أعرف منهو هالمصرقع اللي اخترع شي اسمه السفر للخارج عقب الزواج هَمْ أروح وأسطره على أفكاره السودا!!واشفيها بلدنا؟ يازينها...يعني ماتضبط الأمور إلا ببلاد الخمور؟!!! رانية:يابن الحلال لاتحبِكها!!في شي اسمه شهر العسل لازم لازم نسافر فيه وننبسط.. ناصر:لازم؟احلفي!هالحين بأعطيك مصحف واقرأيه من أوله لآخره إن لقيتي آيه تحث على وجوب قضاء شهر العسل بالخارج بأعطيك 10 آلاف بل لو لقيتي كلمة شهر العسل بالقرآن لك مني مليون ريال ياشيخة!! رانية(وهي تدمع):إنت ليش غير الناس؟؟ ناصر:وانتي ليش مثل النسوان الفارغات؟ بدل ماتقولين معك ياحبيبي أحس بالفرحة بأي مكان..وأهم شي إني أكون معاك!!ألقاك مصرة إن المحبة ما بتتم إلا بالسفر! رانية:وإن قعدنا بـ جدة واش بنسوي؟ ناصر:بنسوي مثل مايسوون الناس نتمشى وننبسط.. بعد أيام من الزواج استعد تركي وأفنان للسفر..ومرت أفنان تودع أم تركي.. تركي:دعواتك لنا يمه.. أم تركي:الله يردكم لنا سالمين غانمين.. وجلسوا شوية معاها وبعدين راحت أفنان لأهلها تودعهم.. شافها أبوها وهي قاعدة تسولف وتضحك مع أمها.. وقال:ماشاء الله ماشاء الله..عروستنا شكلها مبسوطة.. أفنان:ايه الحمدلله... وراح الأب يقعد مع تركي بالمجلس وأما أفنان قعدت مع أمها بالصالة. أم أفنان:عاد يابنتي مايحتاج أوصيك..الله الله بحجابك..ومواطن الشبهات ابعدوا عنها..خلوا سفركم هذا لأسباب دينية ودينيوية ماتأثر على دينكم.. أفنان:لاتشيلين هم يمه..تركي إنسان عاقل ويدري شلون يحافظ علي... دخلت أفنان لغرفة سندس وضمتها لصدرها..وقالت:ياليتك تعرفين تنطقين..كان سألتك وش تبين أجيب لك هدية! أم أفنان:هديتها إنك ترجعين سالمة وتزورينها وتتطمنين عليها مو تخلين الزواج يلهيك عننا.. وراحوا للمجلس وشاركوا الأب وتركي سوالفهم..ثم توادعوا ..الأم والأب:استودعناكم الله..ولاتنسون تتصلون فينا وتطمنونا عن علومكم.. تركي وأفنان:ان شاء الله.. وخرجوا..وقامت أم أفنان تدمع عيونها.. أبوأفنان:خير خير..وشفيك تدمعين؟ أم أفنان:هذي أول مرة بتبعد أفنان عن بيتنا!! أبوأفنان:ولا كانت أول مرة؟..وين المشكلة؟أبعدتي عن أهلك قبلها وماصار شي..صح؟يلا امسحي دموعك وخلنا ناكل لقمة.. ============ واتجه تركي وأفنان للمطار وركبوا الطيارة باتجاه* لبنـــــــــــــــان*!!!! ومرت الأيام وهم مبسوطين بالطبيعة هناك والمتاحف.وبيوم من الأيام راحوا لمطعم من المطاعم يتعشون فيه..وكانت المفاجأة!!! عبيروأبوها وعمتها واخوانها قاعدين بنفس المطعم!! ومر تركي من جنبهم من غير ماينتبه لهم وقعد على طاولة بعيدة عنهم شوي وعطاهم ظهره وأول من شافه عبير وكانت تاكل وحست بـ غصة في حلقها! سعد أخوها(بصوت عالي):يبه يبه..هذاك الرجال ماكأنه تركي؟!!! التفت أبوه..وقال:ماأشوف إلا قفاه..يمكن هذا واحد يشبه له..يعني هو وش بيجيبه لبنان؟ وكانت عبير في هذي الفترة اللي فاتت قد أجرت عملية بسيطة وكان اليوم التالي مقرر لها عملية تجميليةبالليل ألا وهي زراعة للصدر!!! دمعت عيونها..وتحسرت على وجود حرمة معه وخمنَّت من ضحكاته وطريقته في الكلام معاها إنها زوجته..بس كان نفسها تعرف من هذي اللي قدرت تفوز بقلب تركي وتتزوجه؟!وماعرفت لأن أفنان متحشمة ومغطية وجهها.. وظلت عبير تتساءل بداخلها:لو تدري وش كثر حبيتك ياتركي؟..مافرطت فيني!!! لو تدري اش السبب اللي خلاني أجي لبنان كان رِحمتني!! وظل الموضوع شاغل بالها لين رجعت الشقة اللي قاعدين فيها بلبنان..واتصلت على أمها اللي توقعت عبير إنه يكون عندها علم بزواج تركي بحكم إنه أم عبير من جماعة أم تركي.. وبعد السلام والكلام.. عبير:ماراح تصدقين يمه أنا مين شفت اليوم؟؟ أم عبير:مين؟نانسي العقرب؟ولا هيفاء العلَّة؟؟ عبير:ولاوحدة فيهم..الله يقطعهم كلهم!يمه...أنا شفت تركي!! أم عبير:مالت!!وش جابه لبنان؟ عبير:مدري..بس كان معاه وحدة شكلها زوجته.. أم عبير:ايه صحيح..أنا نسيت انه تزوج قريب ماصار له كم يوم..قالولي الجماعة.. عبير:ومين هي عروسته يمه؟؟من أقاربه؟؟ أم عبير:وانتي ليش مهتمة؟لايكون باقي تحبينه؟؟ عبير:لا..بس حاشني فضول أعرف وبعد سوالف أنهت عبير المكالمة.. وفكرت تتصل على صاحبتها السابقة (هالة) في جدة.. ولما ردت عليها.. هالة:هلا..عاش من سمع هالصوت..وينك من يوم نقلتي ماسمعنا لك حس ولاخبر؟؟ عبير:مايحتاج أقول لك..أكيد سامعة بأخباري؟ هالة:الصراحة إيه..مافي شي ينخش بهالديرة! عبير:أنا سمعت إنه طليقي تزوج..ماجاك خبر من هنا أو من هنا منهي زوجته؟؟ هالة:معقول ماتدرين؟هذي وحدة من شلة الصاعقة!! عبير:ايشششش؟لايكون اسمهان؟ هالة:بسم الله عليك..وشفيك؟اسمهان متزوجة!! عبير:مو مافي شي غريب بهالدنيا!قلت يمكن تكون تطلقت وتزوجت تركي !!!طيب لاتكون رانية الغثيثة؟؟ هالة:لا ..تطمني..هي أفنان..وأبشرك كل الشلة تزوجوا ماعدا نجلاء وحتى هي سمعت إنها بتلحقهم بعد سنة أو سنتين! عبير:يووووه ياليتني مااتصلت..قهرتيني بهالسوالف! هالة:سبحان الله ..تظلين انتي عبير ماتتغيرين!!أنا ونادية رجعنا هالسنة وتصادقنا معاهم ولاكأن بيننا شي..الصراحة هم طيبات حيل..وانتي ظالمتهم! قفلت عبير الخط بوجه هالة!!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
خلصت ولا بااقي؟! تحمست حدهـ رووعهـ
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
آسفة بنآت طولت عليكم بآلتكملـة..وعد مني آنزلهآ اليوم.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
من خامس يوم في الزواج قال ناصر:اطبخي لنا اليوم كبسة! رانية:خير؟ ماأقدر أطبخ! ناصر:ليش؟مع إني لما كنت أزوركم أيام الخطوبة كنتي تتفنين في الأكلات... رانية:لاحظ إني ماقلت ماأعرف أطبخ..بس قلت ماأقدر أطبخ!! ناصر:ليش؟على يدك نقش الحِنة؟؟ رانية:لا..بس أنا عروس! ناصر:وإن كنتي عروس..تحسبين نفسك باقي منتصة على الكوشة؟؟ رانية:أقول ياشين السماجة!أبي أتدلع شوي..مو لازم أطبخ هالفترة! ناصر:ويعني بتتدلعين على حساب بطوننا؟؟يابنت الحلال أكل البيت أرخص وأنظف!! رانية:هههه هالكلام قوله لأحد غيري..طول عمرك عزوبي وتاكل من برة..هالحين بيجي التوفير؟! ناصر:استعنا على الشقاء... بالله!! ---------- اليوم الثاني صحت رانية وطلعت الحوش وكان فيه برندة(جلسة تشبه البلكونة)..قدام المطبخ والجو حلو ففكرت انهم يفطرون فيها.. وجاها ناصر:الله الله اش هالحركات الحلوة؟بنفطر هنا؟ رانية:ايه.. ناصر:زين وين الفطور؟؟ رانية:أنا سويت الشاي بس!والفطور روح جيبه من برة! ناصر:حتى الفطور بنقعد نشتريه من برة؟أجل ليتنا ماصحينا!عشان نصحى الظهر نتغدى مرة وحدة!!! رانية:أعوذ بالله!وإنت ماتسمع بشي فيه طاري فلوس إلا ويجيك حساسية؟؟روح وجيب فطور واستح ترى أنا عروستك!! ناصر:ايه عروستي!تصدقين كنت ناسي وذكرتيني؟؟ وراح يبدل ملابسه ويشتري فطور..ورانية جوعانة وتمني النفس بما لذ وطاب!! وكلها ثلث ساعة وناصر مقبل والأكياس بإيده ورانية تنتظره بشوق في البرندة! ويوم فتحت الأكياس صابتها صدمة!!علبة بلاستيك فيها فول!!+تميس+مقلقل كلاوي وكرش+شوربة كوارع!!!!!! رانية:وعععععع وش هالريحة اللي تلوع الكبد؟؟ ناصر(وهو مبتسم):هذي شوربة كوارع تشربينها ترد فيك الروح!أحلى شوربة لأحلى عروس!! رانية:لا إحنا على هالفطور..ناقصنا صحن كشري ورز بلبن ونصوِر فيلم سينمائي مصري!!! ناصر:أقول تحمدي ربك على النعمة.. تصدقين قعدت واقف سرى عشان أقدر أشتري لك هالفطور؟ من كثر الزحمة عنده لاإله إلا الله!!! رانية:أوهووو آثاري اللي يحبون الكشخة مثلك كثير!!!! وقامت رانية... ناصر:على وين؟على وين؟ رانية:بأروح أدور لي شي أفطر عليه..يمكن ألقى علبة جبن..حبة زيتون..أي سم هاري بالثلاجة!!!! وأول مادخلت المطبخ وينفلت عليها ذاك الفار من صوب البلاعة!! رانية:وااااااااااااااااااااااا اااااااااااااااااي الحقونـــــــــي!!!!!!!!!!!آهآ هآآآآآآآآآ وراح ناصر يجري ويصيح:اشفيه اشفيه؟؟ ويدور بالمطبخ!! رانية:فار فار! ناصر:الحين كل هالصياح عشان فار؟أجل لو طاب عليك هندي وش بتسوين؟؟ رانية:أقول لك فار..وعععع شكله يقرف بلد..اذبحه تكفى اذبحه!! قام ناصر وشال الفار من ذيله والفار يفرفر بين يديه!!ويقول:بالله تخافين من هالمسكين؟؟هو أصلاً مخترع منك!! رانية:وعع الله يسامحك..شلون تمسكه بإيدك؟؟ ناصر:بآخذه وأرميه بالحوش خلي البساس تشبع! ورماه بالحوش وغسل يده ورجع يفطر!!!!! وقعدت رانية معاه بالبرندة... رانية:الله يلوع كبد إبليس..شوربة كوارع وريحة كرش ومنظر فار..وش هالمصايب بس؟؟؟ ناصر:أجل اش ودك تفطرين ياهيلاري كلينتون؟ رانية:أنا على بالي عندك سالفة..بتروح تجيب لي كلوب ساندويتش مع أورينج جوس وبان كيك أو سينبون أي شي..إلا فطورك ذا ماتوقعته!! ناصر:قولي الحمدلله على النعمة..بكرة هالفطور بأخليك تسوين مثله هنا بالبيت!!! رانية(بينها وبين نفسها):ياشين العجلة يارانية!وش شفحك تتعجلين على العرس؟!! ================ أما مرام يوم انتهى شهر العسل صارت كل يوم تداوم بمشغل أختها ماجدة...ومرت الأيام... وبيوم من الأيام اتصلت على اسمهان في العصر..وبعد السلام والأسئلة الروتينية.. اسمهان:ماشاء الله..غريبة اليوم قاعدة بالبيت؟مانتي رايحة الصالون؟؟ مرام:لا مو رايحة..بس بيجيني بنات تعرفت عليهم في الصالون..وأول مرة يزوروني..فحبيت تجين انتي بعد.. اسمهان:ماعندي مانع..كأنك تدرين إني مرة زهقانة وعبدالرحمن في العمل مابيرجع إلا بالليل.. مرام:خلاص أنتظرك بعد المغرب.. اسمهان:كلمتي مشاعل وخالتي يجون؟ مرام:لا..ليش أكلمهم؟خالتي وهالبنات اللي بيجون مو من سنها..ومشاعل أتوقع مابيعجبونها! اسمهان:زين..تحتاجين أي مساعدة؟ مرام:لا مشكورة تسلمين..عبدالرحيم ماقصر اشترالي حلى ومعجنات.. وبالفعل بعد المغرب استعدت اسمهان وراحت لمرام.. وبعد دقايق من وصولها حضروا صاحبات مرام وكانوا ثلاثة..وحدة متزوجة واثنين منهم بنات بالجامعة! مرام:أعرِّفكم..هذي اسمهان سلفتي.. وهذول يااسمهان زبايننا في الصالون..تعرفت عليهم قريب..ميساء ونهله و رنا.. اسمهان:ياهلا فيكم.. الضيوف: هلا..تشرفنا.. وبدأت السوالف..وحست اسمهان إن الجلسة معاهم تخنق! لاحشمة ولاحيا والكلام بعضه كان شبه فاضح بألفاظ منحطة من الغريب جداً إنها تصدر من بنات مثلهم!والضيفة المتزوجة ماهي أحسن منهم حالاً كان كلامها أجرأ وأوقح منهم وكل الجلسة ضحك ماصخ.. كان نفسها اسمهان تنسحب بس حست إنه الانسحاب المفاجيء بيضايق مرام فلجمت لسانها وسكتت!! نهلة:وي..اشبِك ساكتة؟ماعجبك كلامنا؟؟ ميساء:لاتكوني بس دقة قديمة؟ رنا:يمكن عشان ماأخدتي علينا لسه..صح؟؟ اسمهان:ايه..صح! وبعد لحظات كانت مرام بالمطبخ..واسمهان مع الضيوف وتفاجئت انه وحدة منهم فتحت شنطتها وطلعت منه بكَت سجاير وقامت تباشر عليهم!!!!!!!!!!! هنا اسمهان ماقدرت تستحمل الوضع!!وقالت:لو سمحتوا لاأحد يدخن هنا!! ميساء:ليه؟ممنوع التدخين؟هههههه رنا:فينها اللوحة ماني شايفاها؟؟ههههه نهلة:انتي عندك ربو؟؟ اسمهان:لا بس هذا البيت له احترامه! وخرجت من الغرفة بزعل! وراحت للمطبخ.. اسمهان:انتي دارية عن المسخرة اللي قاعدة تسير ببيتك؟ مرام(باستغراب):أي مسخرة؟ اسمهان:روحي شوفي بعينك!!! راحت مرام لقيت البنات يطفون سجايرهم! مرام:تقصدين انهم يدخنون؟؟ اسمهان:إيه.. مرام:براحتهم..إنتي اش عليك منهم؟؟ اسمهان:معقول يامرام هالكلام يطلع منك؟؟انتي شلون تسمحين لهم يسوون كذا ببيتك؟؟فيه حرمة صاحية في الدنيا تشرب البلا اللي اسمه سجاير وهي تدري انه حرام؟ لاومنظر الوحدة وهي ماسكة السيجارة جداً مقزز! تتشرفين تكونين مثلهم؟؟ مرام:لا طبعاً..بس لازم تعرفين إن طبايعهم غير طبايعنا! اسمهان:ومادام طبايعهم غير طبايعك اش اللي محببك فيهم؟؟وبعدين هل زوجك يرضاها ببيته انه حريم يدخنون بكل وقاحة؟؟ مرام:اسمهان رجاءً..احترمي ألفاظك!!وبعدين اش قصدك تهدديني إنك تنشرين هالكلام؟؟الشرهة علي اللي عزمتك أصلاً!!!!!!! ماتحملت اسمهان ودخلت على الضيوف وسحبت شنطتها وقالت:مع السلامة!!! الضيوف:مع السلامة.. ميساء:الله يعينك يامرام..سلفتك دي شكلها معقدة مرة! وكملت مرام الجلسة مع ضيوفها وهي متضايقة! بيوم من الأيام وأفنان مازالت بلبنان وبعدها مارجعت من السفر... كان الوقت صباح وأهل أفنان نايمين..وتفاجئوا بممرضة سندس تدق عليهم الباب دق عنيف!!! صحيت أم أفنان مفزوعة وقالت:خير..اشفيك ياماري؟ ماري:مدام ....سندس تئبان واجد!! وصحي أبوأفنان وراحوا يركضون على غرفة سندس اللي كان وجهها أزرق وتغرغر..أخذوها بسرعة وراحوا المستشفى..وبالمستشفى لفظت أنفاسها الأخيرة..على إثر انقباض رئوي حاد!!! وحاولت أم أفنان تتماسك وبس تردد:إنا لله وإنا إليه راجعون اللهم أجرني في مصيبتي واخلف لي خيراً منها وأبوأفنان بس يستغفر..وكانت حالتهم صعبة.. أبوأفنان:اسمعي..بنتك أفنان ماأبي يوصلها شي عن وفاة أختها..مفهوم؟؟إنتي أدرى بمحبتها لها وتعلقها فيها مانبي ننكد عليها الله يرضى عليك!! أم أفنان:ابشر..ابشر.. وبالفعل مر على وفاة سندس 10 أيام وأفنان ماتدري عن شي!!وكل مااتصلت على أهلها يطمنونها إن أوضاعهم بخير..حتى أم تركي يوم جات تعزيهم وصتها أم أفنان إنها ماتبلغ تركي بـ شي ولارجعوا مصيرهم يعرفون! وبما إنه أفنان ماعندها جوال ماكانت على اتصال بأي أحد غير أمها وأبوها ومن جوال تركي.. عرف الجميع بالوفاة وأقبل يعزي وأولهم مشاعل وأهل زوجها كلهم ورانية بعد...... وبعد مارجعت أفنان من السفر مروا يسلمون على أم تركي بالأول وبعدين يطلعون فوق لبيتهم.. وسلموا وشربوا القهوة...واستأذنت أفنان في الطلوع فوق لشقتها..أما تركي جلس مع أمه.. مسكته أمه وقالت:ياولدي.. فيه موضوع لازم تقول لزوجتك عليه..قبل لاتعرف به من الناس!! تركي:خير يمه؟لهجتك ماتطمن!! أم تركي:سندس إخت زوجتك..الله يرحمها ويغفر لها ان شاء الله.. تركي(بفزع):لااااا..مصيبة لو تدري أفنان..أغلب كلامها عن إختها دايماً... حتى بالسفر مانستها وجابت لها أغراض طبية تفيدها..شلون بأعلمها؟شلون؟ أم تركي:إنت زوجها وأدرى بها أنا قلبي مايطاوعني..ماودي أكسر خاطر البنية.. وطلع تركي لأفنان وهو مو داري شلون يعلمها..وتوكل على الله..وكلمها.. تركي:أفنان؟؟ أفنان:يـــــاهلا.. تركي:تعالي اجلسي جنبي شوي.. جلست أفنان.. تركي:ياترى مين اللي رضاه مقدم عندك على أي مخلوق؟؟ أفنان:ربي سبحانه.. تركي:ولو ربك أراد إنه ياخذ منك شي بتوافقين؟؟ أفنان:طبعاً شلون بأرفض؟هذا ربي وخالقي..إنت تقصد أتصدق بمالي؟؟؟ تركي:لا ..ربي وهبنا هِبات واستأمنَّا عليها ولو أراد يسترجعها مننا نرضى؟؟ أفنان:طبعاً نرضى..شلون مانرضى؟؟أرواحنا وهي أرواحنا هبة من الله ومتى أراد أخذها منَّا.. تركي:إذن احتسبي إختك سندس عند الله..وادعي لها بالرحمة...!! أفنان:لاااا لااا تقول!!!!!! وقامت تبكي بكاء مريـــــــــر حضنها تركي بحنان وقال:انت انسانة مؤمنة ومافي انسان تدوم له نعمة..ماأبي أسمع منك إلا كلمة إنا لله وإنا إليه راجعون اللهم أجرني في مصيبتي واخلف لي خيراً منها.. وظلت أفنان ترددها..وشربت كاس موية.. تركي:هالحين الواجب نروح لأهلك ونعزيهم.. وانطلقوا للعزاء وكان الكل مجتمعين...أهل وأقارب أفنان.. لما كانت أفنان بوسط العزاء.. انسحبت بهدوء ودخلت غرفة أختها المتوفاة سندس..وفتحت دولاب الملابس وظلَّت تتأمل ملابسها وأغراضها وتذرف دموعها.. وجات عينها على الكرسي المتحرك اللي كانت تستخدمه سندس وانهارت من البكاء..وظلَّت تتذكر أحلى أيامهم مع بعض..وراحت لسرير سندس وحطت راسها عليه وانخرطت في البكاء.. افتقدتها أمها وتوقعت وجودها بغرفة سندس..ودخلت عليها.. أم أفنان:أفنان؟؟اش تسوين هنا؟ رفعت أفنان راسهاوهي تبكي وقالت:ليش يمه تخبون علي وفاتها ليش؟؟ليش ماعلمتوني من وقتها؟؟ أم أفنان:ولو كنا علمناك يابنتي واش كان بإيدك تسوين؟تردين لها الحياة من جديد؟؟ أفنان:لا..بس على الأقل كان ودعتها بآخر لحظات من حياتها.. وقامت أفنان تنتحب ودموعها تهل بغزارة... أم أفنان:يابنتي عسى من جمعكم بالدنيا يجمعكم بالآخرة قولي آمين.. أفنان:آمين يايمه آمين.. ودخلت عليهم مشاعل في هذي اللحظة..وكانت أم أفنان دموعها على خدها انسحبت وراحت تغسل وجهها وتكمل مقابلة ضيوفها.. وبقيت مشاعل مع أفنان..ومسكت أياديها.. أفنان:ماني قادرة أصبر ياخالتي ماني قادرة أصبر!! ورجعت تبكي... مشاعل:مقدرة مشاعرك ياحبيبتي..بس هذا حال الدنيا معانا تاخذ وتعطي..وربي له حكمة بكل شي...ومافي أحد بيزيد عُمر أو ينقص..لكن إحنا ناس مؤمنين المفروض مانخلي المصايب تهزنا ونثبت..ولاتنسين إنما الصبر عند الصدمة الأولى.. ماكان عندي بالدنيا أغلى من أبوي الله يرحمه.. أفنان:ايه جدي الله يرحمه ماكان فيه أحد بطيبته.. مشاعل:بس كنت أستبدل حزني عليه بالدعاء له..وكل ماجاء ذكره ببالي أحاول أشغل نفسي بقراءة القرآن..أحس إنه يربط على قلبي كثير.. أفنان:الله يرحمك ياسندس ويجمعني فيك يالغالية.. ============ أما ناصر ورانية كانوا كل يوم وهم ناقر ونقير..كل شي يختلفون فيه! ومرت الأيام واتصلت اسمهان على رانية وبعد السلام.. اسمهان:وش ذا ماكأنك عروس؟ ليش حزينة؟متوفي لك أحد؟؟ رانية:فيني احباط..إحباط من العيار الثقيل..والهم يحط فيني ويشيل..ولانهاري نهار ولا ليلي ليل!!!! اسمهان:ياحركات!!رجع لك الالهام؟وشفيك يابنت حزينة موب عوايدك؟؟ رانية:نويصر ياسوسو نويصر..ودي أمسكه وأكفخه لين يحس على دمه شوي ويهتم فيني!!!! اسمهان:ههههه ياحليلك يارنو مامداكم على التكفخ!! رانية:وش أسوي؟من حر مافيني أقول لك كذا..هذا مدري وين كان عايش؟بارد برود يفقع المرارة تقولين عصير مثلج!ومستهتر ومآخذ الحياة ببساطة شديدة!وجده هزل وهزله هزل...مايندرى عن صدقه من كذبه..وكل شي أطلبه منه يشوفه دلع وتشرط!! اسمهان:طبيعي يارانية! رانية:وش اللي طبيعي؟أقول لك هذا مهبول..عليه عقلية يخلف الله بس!! اسمهان:يابنت الحلال..من غير اختلاف كيف توصلون لإتفاق؟؟ رانية:ايه غثيني بكلام من اللي يقطه عليك عبدالرحمن! اسمهان:لا أنا صادقة..ناصر انسان عاش يتيم ووحيد أمه.. وأخوانه من أبوه بعيدين عنه..وأمه الله يرحمها انسانة مقعدة..ومعتمدة على شغالتها بكل شي..وناصر ماله دور بالبيت..إلا يعالجها أو يقضي لها أكلها وشربها..لاعنده خوات حتى يعرف يتعامل مع الإناث ولاعنده أحد يعلمه وينصحه..وصدقيني مثل ماأسمع عنه من عبدالرحمن ماقد سمعت إلا كل خير..قلبه طيب بس انتي ماعرفتي له!!! رانية:ايه يختي..إقعدي عيرني مثل الآنسة نجلاء..تقول تستاهلين ماتعرفين تتنعمين له ولاتدلعينه!! اسمهان:وليش لا؟يمكنها صادقة!بصراحة الكلام الحلو يلين الحديد وهو حديد...وإنتي يارانية من غير زعل كلنا نعرف أسلوبك صريحة وعصبية وتحذفين الكلام حذف!!صاحبتنا وتمونين..بس ولد الناس جديد عليه هالأسلوب..مو بسهولة ممكن يتأقلم!!وحطي في بالك إنه عاش في ظروف وبيئة مختلفة عنك مرة..فمو معقول بيجي على مزاجك بين يوم وليلة!!! رانية:صحيح كلامك أنا ماأنكر..بس في أشياء بديهية المفروض يعرفها من حاله..مثلاً الفندق والسفر والطلعات الحلوة..كل مازهقت خذاني البر ولا البحر..ولاقلت له ودني مولات..يقول ليش؟ناقصك أغراض؟!!!!!!!!!!!! اسمهان:ههههههه العيب في العزوبية..ترى حسب مافهمت من عبدالرحمن انه ناصر كان مُضرب عن الزواج زمان..فتلقين من جهالته مايسأل أصحابه المتزوجين عن هالأشياء ولايثقف نفسه فيها..ولايبحث عن الأشياء اللي تحبها الأنثى..والصراحة هنا يجي دورك..باللسان الحلو والتغنج والدلال يطيح عندك ولد الحلال!!!! رانية:ومنكم نستفيد..بس ياويلك أجرب نصايحك وماتفيد!!يمين لأجيك أسطِرك بـ نعالي!! إلا وناصر واقف ورا رانية!! رانية(بارتباك):يلا سوسو أكلمك بعدين زوجي جاء.. وقفلت السماعة.. ناصر:ياحليلها..من هي هالضعيفة اللي بتسطرينها بنعالك؟؟ رانية:صاحبتي..ونمون على بعض! ناصر:الله لايجعل اليوم اللي بتمونين علي فيه يجي!!!! رانية:إلا إنت وين طسيت؟؟ ناصر:طلعت فوق أتطمن على الشقة.. رانية:ايه ذكرتني..لي كم يوم أبي أشوفها وأسألك عنها..هي شقة كبيرة كبر الدور اللي إحنا فيه؟؟؟ ناصر:لابيتنا أكبر..هي تقريباً ثلاث أرباع بيتنا والباقي سطوح.. رانية:أبي أشوفها.. ناصر:زين تعالي معاي.. وطلعوا سوى وكانت شقة كبيرة.. رانية:طيب إنت ليش تاركها فاضية؟ ناصر:وش تبيني أسوي فيها؟مخليها لأخواني لو جوا من الشرقية ويبونها يقعدون فيها.. رانية:هذا هم أخوانك مجتمعين بجدة من أيام زواجنا وماشفت أحد منهم جاء يقعد فيها..وبعدين هذي ورثك من أبوك يعني ماأتوقع أحد بيتجرأ يقول لك بأقعد فيها.. ناصر:وش القصد؟ رانية:قصدي..حرام تقعد فاضية..مابنستفيد منها إلا تجميع الغبار والحشرات..ومو بعيدة تنسكن بالجن!!! ناصر:بعدي مافهمتك؟؟ رانية:ليه ماتأجرها؟بيجيك منها دخل إضافي وإنت مرتاح... ناصر:لا لا الإيجار شغلانة ولابد أعرضها بمكتب عقار وبيأذوني الناس بالاتصالات والزيارات لأجل يشوفونها..ومايندرى شلون بيطلعون هالمستأجرين اللي بياخذونها بندخل في قضية مالها أول من تالي..خلينا مرتاحين أحسن! رانية:زين واش رايك ترتاح من هاللفة الطويلة العريضة وتترك تأجيرها علي؟؟ ناصر:ههههه ضحكتيني وأنا جوعان!!وش فهمك بالتأجير.؟وشلون ومتى؟؟؟ رانية:الله يخلي المنتديات بأكتب هذاك الإعلان المرتب..لا ومابأختار أي وحدة تسكن بأختار ناس على مزاجي!!! ناصر:خلاص..سويها وخل نشوف وش يطلع منك!! =========== أما اسمهان حاولت توضح لعبدالرحمن بطريقة معينة إنه ناصر عنده جهل بأمور الطلعات والروحات مع عروسته... عبدالرحمن:والمطلوب؟؟تبين أعطيه دروس خصوصية؟؟ اسمهان:أكيد لا..بس تكفى دحوم إقنعه بطريقة غير مباشرة إنه يطلعها اليوم أي مكان حلو..الصراحة صوتها ماكان عاجبني أبد!!تكفى تكفى! قام عبدالرحمن يقلِبها في راسه..وقال:عندي فكرة وان شاء الله تضبط!! واتصل على ناصر...وبعد السلام والسؤال عن الأحوال.. عبدالرحمن:تراني أول مافكرت فيك إنت..تصدق قبل أيام جاني هدية من الجريدة اللي أكتِب فيها دعوة شخصية لشخصين للعشاء بـ يخت في مرسى الأحلام بأبحر بالمطعم العايم..والمشكلة إنه لازم يكون اليوم وإلا بتروح علي..وأنا مشغول حيل اليوم..وقلت بدال ماتضيع بلاش..فكرت فيكم يالعرسان بتكون طلعة حلوة لكم...وش قلت؟ ناصر:والله يالحبيب..أنا عندي إجازة وفاضي..ومابأقدر أشوف عرض مغري مثل هذا وأخليه فما أقدر أقول لك غير تم.. عبدالرحمن:أجل توكل على الله وروح لهم بالليل ولاتنسى تقول لهم أنا حاجز جلسة بالمطعم العايم بإسم عبدالرحمن بن فلان!وترى الجلسة حلوة ومعاكم أشخاص ثانيين بنفس المطعم.. وبعد ماانتهت السوالف ثم المكالمة قال ناصر لرانية:اليوم يوم سعدك ياعروس...في الليل بنروح أنا وإنتي نتعشى بمكان مايخطر لك على بال!!! رانية:بالله لاتخرعني..مفاجآتك صارت تجيب لي مغص!!لايكون بتوديني المطعم الشعبي اللي جلساته بالأرض وتعشيني فيه جريش وحنيذ؟؟؟لا والتحلية مهلبية خايسة جدتي تعرف تسوي أحلى منها!!! ناصر:لا..صدقيني..هالمكان بيروق لك كثير.. =========== كانت حياة مشاعل مع عبدالمجيد مستقرة وهادية..وسبورة الفلوماستر تلعب فيها دور كبير!!حاطها عبدالمجيد بالصالة ويكتب لمشاعل كل مشاعره الدافية فيها وهي ترد عليه بالمثل! وكانوا يقضون بعض أوقاتهم في ألعاب الذكاء والمسابقات..وغالب ومغلوب.. وكانت أم عبدالرحمن فرحانة حيل بعبدالمجيد اللي كل ماكانت تقابله تلقى السعادة مرسومة على وجهه.. وبيوم من الأيام كان عبدالمجيد ومشاعل نازلين من فوق ورايحين يشترون أغراض ومر على أمه يسلمون عليها وكانوا اسمهان ومرام عندها يتقهوون...وبعد مارحوا عبدالمجيد وزوجته..رجعت أم عبدالرحمن لمرام واسمهان وقالت:الله يرضى على عبدالمجيد كل ماشفته حسيت براحة نفسية..الحق ينقال مشاعل هذي هدية جاتنا من السما... مرام:وش دعوى خالتي؟؟يعني أنا اللي قمامة خارجة من الأرض؟؟؟ أم عبدالرحمن:كلكم خير وبركة يابنتي..وانتي واسمهان عينين بـ راس.. كانت روحة رانية للمطعم العايم(يعني مطعم متحرك بوسط البحر) على ظهر سفينة...من الخرجات الجميلة اللي فاجئها ناصر فيها والأدهى من ذلك إنهم وهم قاعدين في المطعم على ظهر السفينة والهواء يرفرف حولهم والإضاءات وكل شي ينطق بالجمال.. رانية:واااااي المنظر يهبل والقعدة رومانسية حيل..فديت قلبك ياناصر ناصر(البكاش):وش هالزين والكلام الحلو؟؟عاد لو تدرين يارانية من متى وأنا أخطط لهاالقعدة ماتصدقين!!!!!طول الأسبوع وأنا شغَّال اتصالات أبحث عن مكان يليق فيك! رانية:تصدق؟ كان قلبي حاسس..إنك لايمكن تكون بالتبلد اللي أنا شايفتك فيه..وإنه بيجيك يوم وتتعدل وتصير مثل الأوادم!!والحمدلله تحقق مناي!عساها تكون فاتحة خير وكل يوم والثاني يزيد ذوقك حلا!! ناصر:عشان تعرفين إن نصور ماهو شوي.. دق جوال رانية وردت وكانت المتصلة اسمهان!!! اسمهان:هلا رنو!بشريني؟عساك مبسوطة في المرسى؟؟ رانية:بسم الله وإنتي اش دراك؟لايكون إنتوا بعد هنا؟؟؟ اسمهان:لا إحنا ببيتنا..بس عندي علم بطلعتكم من عبدالرحمن..بصراحة قطعتي قلبي اليوم وخليته يهديكم هالطلعة عساها تكون عند حسن ظنك؟!! رانية(بغيظ شديد من ناصر البكاش):آآآآآآه يعني السالفة كذا؟زين الله يعطيكم العافية وماله داعي هالتكاليف! وحاولت تنهي المكالمة.. والتفتت لناصر وقالت:أقول؟يازينها الطلعات المجانية..صح؟؟تخرج تتمشى وتتعشى على قفا غيرك من غير ماتخسر هللة..جميلة الحياة بصحبتك الصراحة!! ناصر(وهو يبلع ريقه):هذي اللي اتصلت زوجة عبدالرحمن؟؟ رانية:ايه عبدالرحمن صاحب التخطيط الله يحفظه!! ناصر:ياحبي له..ماينسى أحد!!هو كريم وحِنا نستاهل!! =========== ومرت الأيام تلو الأيام وانتهى شهر العسل عند رانية..واندمجوا مشاعل ومرام في حياتهم العامة. وكانت اسمهان مشغولة بزياراتها مابين بيت أهلها أو بيت أسماء أو سماح أو عند سلايفها أو أم زوجها وعبدالرحمن بما إنه صار كبير العائلة تولى الجمعات مرة طلعات شوي في البر أو المخطط أو عصريات عند البحر هو وأخوانه وزوجاتهم وأحلام وزوجها أو خالته جوهرة.. وبإحدى الطلعات.. أم عبدالرحمن:كم بقي على ولادتك ياجوهرة؟؟ جوهرة:يعني تقدرين تقولين بنهاية أول شهر من الدراسة.. ======= وبيوم من الأيام حست اسمهان بالملل وزوجها مداوم.. واتصلت بأم عبدالرحمن لكن الشغالة ردت عليها وقالت لها إن أم عبدالرحمن مو موجودة..ودقت على مشاعل وقالت لها مشاعل:أنا رايحة لأهلي..واتصلت بمرام كـ حل أخير وبعد السلام والكلام.. اسمهان:لاتصدين نفسي يامرمر وتقولين إنك طالعة بعد؟؟ مرام:لا أنا قاعدة بالبيت.. اسمهان:الله يبشرك بالخير..عاد أنا طقيت من الزهق ونفسي ألقى أحد فاضي يجي يتقهوى معي..وش رايك تجيني؟؟ مرام:لا..سوري أنا ماأقدر أزورك بس لو حبيتي إنتي تجين تعالي! اسمهان:لا تعالي إنتي أحسن..صار لك مدة مادخلتي بيتي.. مرام:قلت لك ماأقدر لأنه صاحبتي بتجيني اليوم..خلاص تعالي انتي. وفعلاً ماصدقت اسمهان أحد يعطيها وجه تجهزت وتزبرقت وراحت تزور مرام..بس لما دخلت انصدمت من ضيفة مرام! كانت بنت متعرفة عليها مرام في مشغل أختها أيضاً..بس هيئتها مسترجلة!!!!! قاصة شعرها قصة رجالية!!ولابسة بنطلون جينز ضيق جداً مع جاكيت أسود وبادي أبيض وساعة جلد سوداء عرييييضة!ووجهها خالي من أي مساحيق تجميل وماعليها أي اكسسوارات أو زينة تبين إنها أنثى!!!!والأدهى من ذلك إن حركاتها وطريقتها بالكلام مثل طريقة الرجال بالتمام!! انصدمت اسمهان من هالمنظر!! مرام:هذي زبونة تعرفت عليها في المشغل اسمها ندى فديت قلبها كل يوم تتصل فيني وتتطمن على أخباري.وتوثقت علاقتنا وهذي أول مرة تشرفني بزيارتها! اسمهان(بينها وبين نفسها):وليتها ماشرفتك بزيارتها! مرام:شوفي ياندى هذي سلفتي وصديقتي من أيام المتوسط.. ندى(تغمز وتتكلم بلهجة رجولية): اش اسم الحلوة؟؟؟ اسمهان(بتردد):اسمهان.. وقامت مرام للمطبخ تجيب القهوة ولوازمها.. ندى المسترجلة(تكلم مرام):وإنت راجع ياحلو..جيب لي في طريقك موية!!!! مرام:من عيوني.. ندى:تسلم لي عيونك ياقمر!!! اسمهان(بفضول):إنتي متزوجة؟؟ ندى:أسكتي ياشيخة..أعوذ بالله! اسمهان(باستغراب):ليش أعوذ بالله؟؟فيه أحسن من الزواج؟؟ ندى:ماأداني الرجال ولاأطيق ريحتهم!ميولي مو لهم أصلاً!!!!!! ودخلت مرام وحطت القهوة والحلى..وندى تطالعها بنظرات شينة!! حست اسمهان بقلبها بينط من صدرها وصارت تتساءل بينها وبين نفسها(ياترى معقول هالفئات موجودة بيننا؟؟ماقد شفناهم إلا بالمسلسلات والبرامج المنحطة! معقول هالبنت متصاحبة مع مرام وعندها نوايا خبيثة؟؟!!يارب عافيها ولاتبتلي مسلم) وكانت اسمهان نافرة من القعدة مع هالبنت..بس بنفس الوقت فكرت إنها تجلس معاهم لآخر لحظة لأنها ماودها إن هالبنت تستفرد بمرام!! وقامت ندى تتكلم عن نفسها وحياتها:أمي ولدتني أنا وبعدي أخوي ولما صرنا بالابتدائي.تركتنا وتطلقت..وأبوي على طول مشغول..جاب لنا مربية فليبينية علمتنا بلاوي ماكنا نعرفها!! وكانت ندى بتكمل سالفتها بس اسمهان قاطعتها لأن ودها تغير الموضوع:انتي مكملة دراستك؟ ندى:كنت بالثانوي..بس انفصلت كذا مرة..لين ماتركت المدرسة وقعدت بالبيت! مرام:وليش انفصلتي؟؟ ندى:ياشيخة.. البنات ماعندهم سالفة كل يوم مشتكيني للإدارة!مدري اشفيهم كل ماشافوا وحدة كوول قالوا عنها كلام مو زين!!! اسمهان(بينها وبين نفسها):وأنا أشهد إنهم صادقين! ولما جاء وقت الشاي قامت اسمهان تساعد مرام وتصب الشاي.. مسكت ندى شعر اسمهان الطويـــــل.. ندى:فديت القمر أبوشعر حرير!! سحبت اسمهان يد ندى بقوة و دَفتها!! وطالعت مرام في اسمهان باستغراب..!!!!! وبعد دقايق استأذنت ندى وراحت بيتها وودعت مرام ببوسة على خدها!!وقالت:بيننا التيليفون ان شاء الله.. مرام:ان شاء الله... وبس راحت..انفجرت اسمهان في مرام! اسمهان:أسألك بالله؟هل هذي انسانة تتشرفين بدخولها لبيتك؟؟ مرام:قصدك عشان طريقتها في اللبس؟؟حرااام حتى أختي ماجدة موب طايقتها!أنا مدري ليش ظالمينها؟؟ اسمهان:وهي المسألة في طريقتها باللبس بس؟؟انتي مالاحظتي نظراتها لك شلون صايرة؟؟ مرام:عاد زودتيها يااسمهان.. وسكت لك كثير!!انتي كل ماشفتي ضيوف زايريني حطيتي فيهم عذاريب؟!!!مدري غيرة هذي ولا اش يسمونها!!! اسمهان:أي غيرة وأي كلام؟ معقول عبدالرحيم هذاك اليوم شم ريحة الدخان وماعلَّق؟!! مرام:أساساً بعد ماراحوا الضيوف هذاك اليوم بخرت البيت زين وفتحت مراوح الشفط!! اسمهان:الحمدلله..وليش تصرفتي هذا التصرف؟لأنك خايفة لا زوجك يدري ويسويها لك قصة!لأنه مافي انسان محترم يرضى على نفسه أو زوجته تتصاحب مع ناس بهالمستوى!! مرام:اسمهان؟,,انتي صايرة ماتنطاقين أبد!!أنا اللي غلطانة إني أناديك لاجاني ضيوف..المفروض إني أشغِّل مخي وأحافظ على خصوصياتي! اسمهان:يامرام اصحي اصحي..أنا مدري اش اللي صاير لك..بعمرك ماكنتي كذا!! اش تبين فيهم هاللي تسمينهم صاحباتك؟؟ ألفاظهم بذيئة وكلامهم وسخ..وأفعالهم أردى!!وبالذات هاللي اسمها ندى احذري منها أشد الحذر..ولاتعطينها وجه..أنا من حبي فيك مارضيت أرجع بيتي وأخليكم بروحكم..هذي وحدة تصرفاتها شاذة ونظراتها مريبة..انتي شلون ماتلاحظين؟؟ مرام(بصوت عالي):لأن قلبي أبيض مو مثل قلبك!!انتي تحاولين تشكين بكل الناس على بالك ذكاء وفطانة!!لكن بكرة بتتأدبين يوم تلقين كل الناس ينفرون منك!!! ماقدرت اسمهان تنطق من القهر ولبست عباتها ورجعت بيتها..ودموعها على خدودها..وكان عبدالرحمن قد رجع قبلها من عمله الليلي وبدل هدومه وتمدد في الصالة ينتظرها!! ويوم دخلت شقتها وصفقت الباب قام عبدالرحمن وقال لها:وعليكم السلام؟؟؟؟ بس لما لاحظ دموعها ووجهها اللي صار أحمر..قال:اسمهان؟؟اشفيك؟ عسى ماشر؟؟ اسمهان(وهي تحاول تداري دموعها):مافيني شي.. وقف قدامها عبدالرحمن وقال:ماني تاركك لين تعلميني بسبب دموعك! اسمهان:أبد..وحدة كنت أعرفها توفَّت وبلغتني مرام وماقدرت أمسك دموعي!!!!!!!!!! عبدالرحمن:أكيد؟؟هذي هي كل السالفة؟؟ اسمهان:ايه.. ودخلت تغير ملابسها وهي معزمة ماتكلم عبدالرحمن عن مرام لأن مرام مهما كان صديقتها وماودها تسبب لها مشاكل.. ومن يوم خرجت اسمهان من عند مرام ومرام تفكر براسها وتتساءل(وش يضمن لي ان اسمهان ماتروح تنشر أسرار ضيوفي عند أهل زوجي وتكرههم فيني؟؟وش يضمن لي إنها ماتروح تفتح فمها عند زوجها ويجي يعلم عبدالرحيم؟؟ياويلي لو وصلت الأمور إن عبدالرحيم يمنعني من وظيفتي بإدارة المشغل!!! هين يااسمهان..تشوفين إن ماقلبتها عليك؟!!!!!! وراحت تخطط شلون تتغدى باسمهان قبل ماتتعشى بها!!! يوم رجع عبدالرحيم من برة.. راحت مرام تجري عنده بدلع.. مرام:عبدالرحيم؟؟ عبدالرحيم:عيوني أنا!! مرام:بغيت أحكي لك عن سالفة مكدرة خاطري..وإنت أحسن واحد يفهمني.. عبدالرحيم:قولي اللي تبينه.. مرام:اسمهان ياعبدالرحيم مدري اشفيها تغار مني..حتى ضيوفي لاحظوا هالشي كذا مرة..تصور ياعبدالرحيم إنها تتلفظ عليهم بألفاظ شينة وتحقرهم ماكأنهم ببيتي!!بل إنها تتهمهم في شرفهم لاطلعوا من عندي!!يرضيك هالشي؟؟يرضيك؟؟يعني معقول أنا مرام أتصاحب مع ناس مايشرفوني ويرفعون راسي؟؟؟ عبدالرحيم:غريبة!!هذا وإنتم صاحبات عُمر.. مرام:لا هي الله يهديها مقهورة مني ومن مشاعل يوم إننا عرايس ومدلعات عند أزواجنا..أما هي أخوك لاهي عنها أغلب الوقت..تصور ياعبدالرحيم وهي طالعة من عندي قامت تهددني وتقول والله لأقول لخالتي إنك تستقبلين نسوان ماهم زينات وفاسدات؟!!! وقامت مرام تمثل على عبدالرحيم دموع التماسيح وتتبكبك قدامه!! عبدالرحيم(بزعل):ماعاش من يخليك تذرفين دمعك يالغالية.. وزوجة عبدالرحمن هذي حسابها عندي!!! وطلع عبدالرحيم من البيت ونزل لبيت عبدالرحمن وطق الباب.. فتح له عبدالرحمن الباب وقال:هلا وغلا..تفضل تفضل.. ودخلوا مجلس الرجال وقعدوا.. عبدالرحمن:غريبة منك هالزيارة..بهالحزة.؟؟ وش وراك؟؟ عبدالرحيم(بلهجة حادة):ضِف زوجتك عننا ياعبدالرحمن..تراها تقذف الناس اللي يدخلون بيتي في أعراضهم وهذا شي مايشرفني!زوجتي بنت حسب ونسب ومو أي أحد ممكن تخليه يدخل بيتنا..بأي حق زوجتك تتسلط علينا بلسانها؟؟ عبدالرحمن:روِق روِق..ترى كل كلامك ماعندي فيه علم ولاأدري اش قصدك فيه؟؟ عبدالرحيم:زوجتك تهدد زوجتي إنها بتعلِّم أمي بالكذب إن ضيوفها ناس سمعتهم موب زينة وكل المسألة غيرة نسوان..ياخي خذ زوجتك وطلِعها من البيت ومشيها خلها تترك الحقد على نسواننا!!!!!!! عبدالرحمن(بانفعال):رجاءً ياعبدالرحيم..هذا مو أسلوب تسولف فيه مع أخوك الكبير..ومشاكل النسوان خلها بينهم...إحنا مالنا فيها خُص!!! ونزل عبدالرحيم وهو زعلان من بيت أخوه... وجاء لاسمهان اللي كانت قاعدة على السرير تفكر في أحداث اليوم اسمهان:تبون تشربون شي؟أسوي لكم عصير برتقال؟؟ عبدالرحمن:اسمهان؟أخوي طلع من بيتي زعلان!!ممكن تعلميني اش السالفة؟؟ اسمهان:وأنا اش اللي يعرفني بهالسالفة؟؟إنت اللي كنت قاعد معه! عبدالرحمن:انتي اش قلتي لزوجته بالضبط؟؟ اسمهان:بخصوص إيش؟؟ عبدالرحمن:أنا ماأحب اللف والدوران..زعلتي زوجته اليوم في إيش؟؟؟ اسمهان(بخوف):الصراحة ياعبدالرحمن أنا بغيت أستر عليها بس مادام هي تبي تفضح نفسها فراح أقول لك..ضيوفها ناس سمعتهم ماتشرِف!!! عبدالرحمن:وليه ماتشرِف ان شاء الله؟؟؟ اسمهان:تدخين وبذاءة لسان وشذوذ والعياذ بالله!!!!!! عبدالرحمن(وهو مو مصدق):الله أكبر يااسمهان كل هذا لاحظتيه من خلال كم زيارة؟؟وش هالكلام الفاضي؟ليش حِنا وين قاعدين؟إنتي يظهر تتابعين برامج وتتخيلينها بالواقع!!قومي اطلعي الحين فوق لزوجة عبدالرحيم واعتذري لها قومي!! اسمهان(بانفعال):أعتذر وأنا ماأخطيت؟؟ماني رايحة!!! عبدالرحمن:اخزي الشيطان واطلعي للبنت استسمحيها..هذا اللي ناقص؟أخسر أخواني بسببكم يالحريم؟!!! وبعد أخذ وعطا وكان عبدالرحمن واصل حده اضطرت اسمهان تطلع لمرام وتقول لها:أنا آسفة!!! وحست مرام بلذة الانتصار!! أما اسمهان رجعت لبيتها وهي مذلولة مخذولة وقلبها من القهر وده ينفطر نصين!! ======== أما رانية اجتهدت الأيام الماضية في البحث عن مستأجرين للشقة اللي فوقهم عن طريق نشر مواضيع بالمنتديات عن مواصفات الشقة...وانهالت عليها الرسائل لكن رانية أخذت معلومات عن كل عضوة وكانت تدور عن وحدة تكون عروس مثلها وسنها قريب منها!!!! لكن للأسف مالقيت بين الراغبات بالاستئجار وحدة عروس!!لكن لقيت وحدة أكبر منها بثلاث سنوات وعندها طفل واحد..ورحبت فيها وكلمتها وعطتها العنوان!! |
| الساعة الآن توقيت السعودية الرياض و الدمام و القصيم و جدة 09:42 PM. |
Powered by vBulletin® Copyright ©2000 - 2024,
vBulletin Optimisation provided by
vB Optimise (Pro) -
vBulletin Mods & Addons Copyright © 2024 DragonByte Technologies Ltd.