|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
جزء اليوم لاحظوا الشلة انه رانية بدت ماتاكل معاهم وتجيب لنفسها أكل خاص وتاكله!بس طنشوا الموضوع!!!!! ونهاية الأسبوع كانت شوفة مرام وراحت اسمهان وأحلام وأم عبدالرحمن وكانوا قد نزلوا السوق واشتروا طقم ذهب أبيض راقي..عشان العريس يعطيه العروس عقب الشوفة.. إلا هالمرام كاشخة ولابسة تنورة وبلوزة جديدة وكانت الزيارة مختصرة جداً.. ناداها أبوها تدخل المجلس عشان يشوفها العريس..ومد يده يصافحها ومدت يدها بكل لهفة إلا ورقة السعر خرجت من كمها!!!! كتم عبدالرحيم الضحكة أما مرام خجلت جداً!! أشَّر لها أبوها تقعد وقعدت... سألها عبدالرحيم:ماشاء الله بأي مرحلة انتي؟؟ مرام(بداخلها تقول:ياشين التغيشم!كأنه مايدري!):بثالث ثانوي.. عبدالرحيم:سمعت إنك تشتغلين؟! مرام:مرَّات أساعد أختي المتزوجة بمشغلها... عبدالرحيم:وناوية تدخلين الجامعة..عقب الثانوي؟؟ مرام:لو سمحت لي بأدخل!! عبدالرحيم مات من الضحك!!!هههههه وأبومرام فنجَل عيونه فيها عشان تخرج وطلعت من المجلس وهي طالعة ناداها عبدالرحيم وعطاها الكيس اللي فيه علبة الطقم.. وراحت فكت ورقة السعر وهي تقول بنفسها:وافشيلتاه!شاف ورقة السعر يعني عرف إن البلوزة جديدة! الحين بيقول هذي من فرحتها بحضوري راحت تشتري لي لبس خاص!!! ودخلت عند الحريم... أم عبدالرحمن:هاه؟بشري ياعروس؟إن شاء الله ارتحتي للعريس؟؟ مرام(بضحكة خجل):الحمدلله... همست اسمهان في إذنها:عسى ماصار لك موقف محرج مثل ماصار بشوفتي؟؟؟ مرام:لا الحمدلله..أنامو مثلك أنا حاسبة خطواتي صح ولايمكن أفشل نفسي!! وبعد الأخذ والعطا بين العريس وأبومرام اتفقوا انه الملكة تكون بعد التخرج..يعني بعد حوالي 5شهور!! وبعد كذا رجعوا الجميع للبيت..وحكى عبدالرحيم لأمه موقفه مع العروس والبلوزة ودخولها الجامعة بإذنه!!! عبدالرحيم:هههه ياحليلها يمه شكلها مطيعة أسألها عن رغبتها في دخول الجامعة تقول إذا سمحت لي بأدخل!!البنت ضامنة إني بآخذها... وقامت أحلام ووصلت الكلام لاسمهان.. اسمهان:يوووه شوفوا الخفيفة وقال ايش؟أنا مو مثلك أنا حاسبة خطواتي صح!!!!! ============= يوم السبت في المدرسة وبوقت الفسحة قامت رانية تنكت مع الشلة وتحكي لهم موقف صار لها وهي ترقص في عطلة نهاية الأسبوع بملكة بنت جيرانهم وهي مندمجة بالسالفة وترقص عشان تمثل لهم الموقف!! إلا مروا من جنبها صاحبات عبير هالة ونادية وقالت:بشويش بشويش على الأرض!ترانا نحب المدرسة مانبيها تنهار! رانية:عشتوا!!باقي لكم لسان عقب ماصاحبتكم الساحرة طسَّت؟؟؟ هالة:أقول الله يقطع الثقة اللي تخلي الفيل يدبك بخفة الفراشة!!هههههه جت رانية تهجم عليهم...مسكتها اسمهان من يدها وغمزت لها تقعد!! نجلاء:خلاص صفحاتنا الماضية نبي نقفلها!خلي اللي يسب يسب واللي يشمت يشمت يكفي إننا نحب بعض ولايمكن نفترق وش علينا منهم؟؟ أفنان:ايه والله..أحس إننا لازم نكبر..بصراحة اسم شلة الصاعقة مفشلني حيل..مالي نفس انه أحد ينادينا فيه!!! اسمهان:ايه والله..ياإني تفشلت من دحومي لما قرأ الكرت اللي كنتوا حاطينه على هديتي بيوم زواجي..بعد التهنئة موقعين بإسم(شلة الصاعقة!!) مرام:ايه صادقة تخيلي ياسمهونة يعرفون رجالنا إننا كنا أفراد في عصابة الصاعقة؟؟قمة الفشلة!! اسمهان:والله الفشلة في اللي يلبس بلوزة وبطاقة السعر عليها!!ههههه مرام:قليعة تقلعك...وانتي اش دراك؟لايكون حكى لزوجك؟؟ اسمهان:لا حكى لأخته وحكت لي!! مرام(وهي متفشلة):ترى أنا متعمدة أسوي هذي الحركة عشان يعرف إني ألبس ماركات غالية!! اسمهان:لااااا ياشيخة؟كان علقتي محفظتك في جنبك بعد عشان يشوف بالمرة وش كثر متروسة فلوس!!! ...... لاحظوا الشلة إن رانية ماتاكل!! نجلاء:رنو موب عوايدك يعني أخاف مفلسة؟وين الأكل؟ كنتي قبل ماتخلين أخضر ولايابس إلا وتشرينه..اشفيك اليوم متقشفة؟؟؟ اسمهان:رنو؟لايكون تسوين ريجيم من ورانا؟؟تكفين خليني أبدأ معك! رانية:ايه أسوي حمية خاصة.. اسمهان:تكفين خليني أبدأ معك..تصدقين من يوم تزوجت زدت خمسة كيلو ونص وأكثر ملابسي ضلقت علي وودي أنحف شوي!! رانية:خلاص من بكرة ابدي معي.. أفنان:تسوين رياضة؟ رانية:لا..الصراحة مالي خلق عليها لكن أمشي يومياً.. اسمهان:فكرة حلوة!اش رايك يومياً نمشي بساحة المدرسة في الصباح!! رانية:أوكيه..من بكرة نبدأ.. مرام:الله يعيننا على ريحة عرقكم من أول النهار!! الشلة:ههههههههههههه ======== وبنفس اليوم في العصر جاء ناصر لتركي في بيته يودعه! تركي:على وين العزم ان شاء الله؟ ناصر:أبد أخذت اجازة من العمل لمدة أسبوع وبأروح الشرقية أزور أخواني وبعد بكرة معزوم على ملكة ولدأخوي بالدمام! سمعته أم تركي:والخطبة ياولدي؟ ناصر:لارجعت يصير خير..العروس موب طايرة في أسبوع!! أم تركي:بالتوفيق ان شاء الله.. اتفقت اسمهان مع رانية على حمية خاصة+مشي في الساحة يومياً مع نسمات الصباح الصافية..وشاديين حيلهم أما الفطور متبادل بينهم مرات اسمهان من الصبح بدري تقطع سلطة خضار بالبطاطس المسلوق وتجيبها أو تبولة أوفتوش!! والشلة يراقبون من بعيد ويعلقون.. ومرة كانت اسمهان شادة حيلها بالمشي ورانية بعد مشي بإخلاص!! مرام:ياواد إنت يامخلص!الأرض اشتكت! نجلاء:على هونك سوسو حبيبتي لايجيك شد عضلي!عاد دحوم موب هنا عشان يسعفك ومافي أندونيسية تمرخك!!هههههه(تذكرها بسالفة العمرة التاريخية!) أفنان:مو مشكلة لاصار لها شي فيه أبلة جوهرة! رانية:موتوا حرة يالعواذل ودكم تحبطونا عشان نبطل لكن حريمتكم ياأنا طاقني الشوق أنحف12 كيلو! اسمهان:حرام عليك إنت صدق وزنك زايد..بس موب لدرجة انك تنحفين12 كيلو!!وش بتصيرين؟؟ رانية:أقول خلك ساكتة أهل مكة أدرى بشعابها!! =========== وفي الشرقية ناصر مبسوط كل يوم معزوم من بيت في بيت عند اخوانه وطلعات ودخلات هو وأولاد اخوانه اللي أغلبهم شباب من سنه وأصغر..ونهاية الأسبوع قرروا يطلعون للبر يطعسون بالدبابات!! وركب ناصر الدباب وطعس من فوق وتقلب بدبابه لين تحت! ونقلوه على المستشفى!! بنهاية الأسبوع راحت اسمهان لأهلها وكانوا الجميع مجتمعين ببيت أهلها..ماعدا ابتسام لأنها سافرت من قبل المدارس... وعاد اسمهان طايرة ببنت أسماء(لينة) بس تشيل وتحط فيها وتصورها بجوالها.. أسماء:خذيها معاكِ البيت فكيني من حَنَتها وبكاها! اسمهان:ياليت ياأسومة ياليت! سماح:ياحليلك ياسمهونة..اش لك بوجع الراس خليك كذا عروس ومرتاحة.. اسمهان:حرام عليكم إلا يازين الصغار يهبلون وابتساماتهم وضحكاتهم كلها براءة ياليتني حامل!صدقوني بأصير أسعد انسانة بالدنيا! أسماء:هو كذا..ابن آدم طماع الشي اللي مو عنده يحلى بعينه..ولاصار عنده زهد فيه!! اسمهان:مو صدق كلامك أبد!!كنت أتمنى فترة الخطوبة اني أصير مع عبدالرحمن ببيت ولما تحقق مناي وتزوجت تعلقت فيه أكثر! سماح:لاتذكروني..ياأنا صارت نفسيتي مع الوحم زفت.الود ودي أمسك محمد وأحذف به من الشباك ماأطيق مزحه وسواليفه!! أسماء:عاد محمد اش حليله دمه خفيف ويسوي جو!هو صدق مزحه غثيث كثير من الأحيان بس على الأقل أحسن من أحمدوه زوجي!هذاك اللي علة صحيح! الأم:استحوا على وجيهكم يابنات!صار لي 32 سنة مع أبو محمد وعمري ماقلت عنه بغيابه كلمة تضره!وانتم ماتتحمدون ربكم على النعمة وتنطمون..كل وحدة تسب زوجها من جهة! أسماء:يوووه أمي تقصدك ياسماح!تدرين حمود دلوعتها وماترضى فيه! الأم:إلا أقصدك انتي يالقَشْرة!دايماً لسانك متبري منك! اسمهان:الله يحفظ لي دحومتي..وعساه ينقطع لساني قبل أقول عنه كلمة شينة!! أسماء:بعدك عروس يالهبلة!خل نشوفك عقب 5سنين واش بتقولين! ============ وفي المستشفى كان ناصر متنوم وجسمه كله رضوض وكدمات وعنده شُعر في أصابع القدم ومجبسينها! واثنين من أولاد أخوه متنومين معاه يساعدونه على القومة والقعدة... =================== وأقبل يوم السبت وناصر مارجع من السفر.. تركي:تصدقين يمه؟ناصر هذا بياع!من يوم سافر مارفع علي سماعة يطمني فيها عن أخباره!! أم تركي:الغايب حجته معه..وانت لو فيك خير كان اتصلت وسألت عنه وباركت لولد أخوه الملكة اللي صارت..بدل ماتلومه ماحد يدري عن ظروف الناس! تركي:إلا من شاف أهله..نسي خِله!!(على وزن من شاف أحبابه نسي أصحابه!!!) واتصل تركي بناصركذا مرة وبعدين رد عليه.. ناصر(بصوت ضعيف):هلا تركي.. تركي:هلا فيك يابعدي..وشفيك نايم؟؟ ناصر:لاتعبان حيــــــــــل ومتكسر تركي:واش منه تعبان؟؟ ناصر:صار لي حادث... تركي:هييييه بايخة!العب غيرها.. ناصر:يمين ماأكذب عليك. تركي:انت بعدك بالشرقية؟؟ ناصر:ايه.. تركي:ومتى راجع؟؟ ناصر:يمكن عقب أسبوع أو أسبوعين.. تركي:أقول ماأحلاك في البكش!يوم جيت تودعني قلت لي كلها أسبوع وأرجع!هالحين قمت تمططها؟؟ ناصر:مو بكيفي غصب عني..الحادث كسرني تكسير! تركي:إنت من جدك؟ولا تستهبل؟ ناصر:ياخي مافيني أكذب وأنا تعبان!خذ ولد أخوي ياسر وكلمه!! وبالفعل كلم تركي ولد أخوناصر وعرف بحادث الدباب.. وبعد يومين راح تركي الشرقية بعد ماأخذ اجازة من العمل وبالمستشفى راح وشاف ناصر ممدد على السرير والغرز منتشرة في بعض أماكن من جسمه!! تركي:أفااااا يا العلم! آثاريك رايح فيها؟؟ ناصر:ولو تدري عني؟طلبتك ماتردني! تركي:صار...وش تبي؟فلوس؟ ناصر:لا..محتاج كليتك!مافي أحد راضي يتبرع بكليته لي تركي:ليش وش دخل كليتك بالموضوع؟ ناصر:ثارت علي كليتي وشالوها..ولابد يحطون لي بدالها تركي:لاحول ولاقوة الا بالله..ضيقت صدري! ناصر(بصوت تعبان):هاه؟تسلفني كلية؟ولا أنا هنت عليك مثل ماهنت على غيرك؟؟ تركي:ياخي مدري اش أقول لك؟انت تدري وراي زواج ان شاء الله..شلون بأتزوج بكلية وحدة؟؟ ناصر:لاتكون أناني ياتركي..العروس تبي قلبك ورجولتك ماتبي كلية لتصريف الفضلات!! استأذن تركي من ناصر وراح يركض على الدكتور.. تركي:دكتور ناصر نزيل غرفة608 اشفيه بالضبط؟؟؟ الدكتور:أبداً حتة حادسة زغيرة على الموتوسيكل حصلتله وراح واقع من فوء لتحت..وجسمه تخدش من كل مكان..مع شُعر في أصبع رجله الشِمال!! تركي:طيب مسألة نقل الكلى..طمنني عنها؟ الدكتور:كِلى ايه يابني؟انتا بتخرف بتئول ايه؟؟ تركي:هو قال انكم شلتوا له كلية ويحتاج لزراعة كلية ثانية.. الدكتور:بص يابني..ناصر ده نصاب كبير!هو حيتبلى علينا ولاايه؟؟لاخدنا كِلْوِتُه ولاخدنا كِرْشته!دا احنا خيطناه ووضبناه وبئى عال العال بس بيتدلع حبتين! تركي:هين يانويصر..تكذب وانت على فراش المرض؟ =====ورجع له تركي الغرفة... تركي:ياحليلك يانويصر..الدكتور يقول لازم تكتب وصيتك الليلة! ناصر:بسم الله علي لاتفاولون علي بالموت! تركي:مو انت ماقصرت وفاولت على نفسك بفشل كلوي! لكن خذ...وقام تركي وهبد ناصر في السرير وطقه على أم رأسه وناصر يصرخ!! وأولاد أخوه يضحكون,,,, ياسر:خليه تكفى ياتركي..تعودنا على خرابيطه وماندري كيف بنودعه ويتركنا يسافر لـجدة! تركي:مانبيه..خلوه عندكم لين مايتوب من مقالبه وصرقعته...! ============== في الجانب الآخر استمروا رانية واسمهان على الحمية.وعبدالرحمن مبسوط على النتايج اللي بدت تبان على اسمهان! عبدالرحمن:ايه كذا ياسمهونة بدى يرجع جسمك لطبيعته وبأفتك من كلمتك اللي صرت أسمعها كل يوم والثاني ملابسي ضاقت علي وجهازي ماتهنيت فيه!ودني السوق ودني المول..اشتري ياعبدالرحمن..وادفع ياعبدالرحمن! اسمهان:لو ماشجعتني رانية كان ضعت! جزء جديد.... بعد فترة بدأت اختبارات الترم الأول واسمهان وقفت ريجيم وقالت لرانية: رنو أنا وصلت للوزن اللي أبيه وماعاد راح أكمل معاك!! رانية:أنا لسه مشواري طويل وراح أكمل لحالي.. وشدت اسمهان حيلها بالامتحانات هي وصاحباتها...لين ماطلعت النتايج وكانت حلوة.. ========== بدأت الاجازة... عبدالرحمن:بهذه المناسبة الحلوة يامدام اسمهان لازم نجتمع بالعائلة ونطلع طلعة حلوة مع بعض! اسمهان:هيييييه..بس وين؟؟ عبدالرحمن:المكان اللي يعجبك... اسمهان:بخاطري أحجز صالة بفندق وأسوي حفلة نجاح كبيرة!! عبدالرحمن:على هونك..ياحلوة..أنا قلت نطلع طلعة عائلية مو نسوي خساير!وبعدين انتي لسه ماتخرجتي باقي الترم الثاني وشهوله التكاليف؟ إحنا مقبلين على زواج عبدالمجيد وعبدالرحيم وأبي أمسك فلوسي عشان أتساعد معاهم! اسمهان:وش لي في أخوانك؟ودي أنبسط واستانس! عبدالرحمن:أولاً:عيب تقولين وش لي في اخوانك!انتي صرتي وحدة من العائلة وهم بمقام اخوانك.. ثانياً:انتي تقولين وش لي بأخوانك وأنا ماسويت مثلك بالعكس فكرت في طلعة عائلية وقصدت أهلك وأهلي!وبعدين لما أقول لك إحنا مقبلين على زواج اخواني فإنتي المستفيدة من توفير فلوسنا!أكيد بتطلبين فستان وملحقاته وكوافير وخلافه+هدايا للعرايس..يكون على الأقل في مبلغ لك على جنب!! اسمهان:يوووووه سامحني مدري شلون أرمي كلام من غير ماأفكر! عبدالرحمن:أنا في خاطري نحجز شاليه كبير بمسبح للحريم وواحد ثاني للرجال ونعزم أهلك كلهم وأهلي وننبسط لمدة يوم.. اسمهان:واااااااي فكرة تهبل!بس تكفى لاتنسى خالتي نوال وزوجها وبناتها تراهم يونسونا دايم بمسابقاتهم ومحاضراتهم! عبدالرحمن:أنا بأحجز وبأعزم أبوك وأقول له جيب كل من يعز عليك.. ========= بالنسبة لتركي اتصل عليه أبوأفنان قبل الامتحانات وأعطاه الموافقة على الخطبة وحدد الملكة قبل الزواج بيومين عقب التخرج من الثانوي يعني عقب شهور!!! تركي:وليش ياعم بين الملكة والزواج يومين؟متى يمدي البنت تجهز نفسها؟ أبوأفنان:هي وحدة من اثنين أنا أعطيها فلوس وتجهز بها نفسها ومتى ماجبت انت المهر ترجع لي فلوسي..أو انك تعطيها المهر قبل الزواج بشهر عشان تجهز نفسها.. تركي:زين ومتى النظرة الشرعية؟ أبوأفنان:لايا الحبيب..مااتفقنا على كذا! تركي:تقصد إنك بتزوجني بنتك من غير ماأشوفها..؟؟؟ أبوأفنان:ووين المشكلة؟كل بنات العائلة تزوجوا بنفس الطريقة! تركي:بس إنت ياعمي راعي دين وتعرف كلام الرسول صلى الله عليه وسلم في هذا الموضوع وأكيد مو خافية عنك قصة الصحابي اللي خطب امرأة ونصحه الرسول يشوفها لأنه كما قال(إن في أعين الأنصار شيئاً) أبوأفنان:معلوم ياولدي هالكلام ومو خافي علي..بس عاداتنا في عائلتنا ان العروس ماتشوف العريس الا بيوم الملكة أو الزواج.. تركي:بس مو معقول كذا..إنت لاتحسبني يوم بأشوفها ..بأشوفها عشان أقيس جمالها!بالعكس أنا واثق من ذوق أهلي..بس عشان أشوف مدى الارتياح لها!!! أبوأفنان:والله إن كنت ملَزِّم بأخليك تشوفها على غفلة!! تركي:شلون يعني؟مافهمت؟ أبوأفنان:يعني تكون جالسةبالحوش مثلاً وتجي انت وتشوفها من بعيد من غير ماتحس!! تركي:ياسلام..يعني أسمح لنفسي أشوفها وهي لا؟؟من حقها تشوفني هي بعد وتقول رايها!أنا لو باغي شوفتها عشان أعرف شكلها بس!كان طلبت منكم صورة وشفتها..بس أنا طلبت النظرة الشرعية اللي هي من ديننا عشان نعرف في بيننا وفاق ولا لا؟ إلا دق باب المجلس وكانت أم أفنان تبي أبوأفنان ياخذ الشاي.. أم أفنان:خير ان شاء الله؟ليش أصواتكم عالية؟ أبوأفنان:العريس الله يهديه مُصِر يشوف البنت! أم أفنان:ووين المشكلة؟ أبوأفنان:انتي تعرفين تقاليد العائلة عندنا كيف! أم أفنان:الدين المفروض يكون حكمه أقوى علينا من العادات!وابن الناس ماقال شي غلط..وبعدين ماراح نكون إحنا أحسن من اخواني خريجين الدراسات والعلوم الشرعية لما خلوا أختي مشاعل تشوف خطيبها عبدالمجيد!! أبوأفنان:يعني قولتك أخليه يشوفها؟ أم أفنان:ايه توكل على الله..وابن الناس موب قاعد يلعب معانا حتى نخاف منه إنت تعرفه من قبل وهو عنده رغبة جادة في الخطبة..إذن وين المشكلة؟ أبوأفنان:إذن نادي بنتك بسرعة وبلا زبرقة وبلا كلام فاضي من عند الباب توقف ثواني وتمشي!! أم أفنان:تم.. راحت الأم وبلغت أفنان وزعلت أفنان:يمه اش هذي الشوفة؟ حرام عليكم..كل البنات يكون عندهم خبر قبلها بمدة..وأنا تبون المسألة تتم كذا؟ أم أفنان:يابنتي زين من أبوك تنازل ورضى..روحي الله يرضى عليك بدلي هدومك واطلعي.. وراحت أفنان تلبس ودمعتها على خدها وبعد مالبست وقفت قدام باب المجلس والحيا شاقها نصين!بمظهر أقل من عادي!لامة شعرها ببكلة ولابسة لبس بسيط جداً وعيونها بالأرض..انذهل تركي لأن الأب ماعطاه فكرة انه وافق على الشوفة!! تركي:ماشاء الله تبارك الله..شلونك؟ جاوبت أفنان بدمعة!وظلت ساكتة تركي:الله يوفقك بامتحاناتك ان شاء الله خجلت أفنان وعطتهم ظهرها ودخلت عند أمها... طالع تركي بالأب:انت متأكد ان بنتك موافقة علي؟؟؟؟ الأب:هههه ايه بس بنتي خجولة أول مرة تطلع قدام شخص غريب وش تبيها تسوي يعني غير البكاء من الخجل؟؟ تركي:إذن على بركة الله..ونعم الأخلاق فيها.. أبوأفنان:اسمع ياتركي ياولدي حِنا نشري الرِجال ومانبيع بناتنا لذلك أنا ماأشرط عليك بأي شي..المهر اللي تدفعه إحنا راضيين فيه..وإن حصل منك قصور فأنا رقبتي سدادة لبنتي ومابأقصر عليها بشي..وترى الملكة بتكون بسيطة وعائليةوفي البيت ..راس مالها ذبيحتين.. تركي:جزاكم الله خير... واتفقوا انه كل شي يسير نهاية السنة يعني بعد شهور.. تركي وهو بالسيارة قال بنفسه:سبحان الله..على قد ماكانوا أهل عبير متكلفين ومسرفين..على قد ماهذول الناس بسيطين ومتواضعين! بعد ماعزم عبدالرحمن أمه واخوانه وأخته أحلام وزوجها بالإضافة إلى أخوات اسمهان وأزواجهم وأمها وأبوها وأخوها محمد..وخالتها نوال وبناتها وأولادها وزوجها.... استعد الجميع للذهاب للشاليه من بعد المغرب..وعلى مااكتمل عدد الضيوف كانت صلاة العشا انتهت ...كان المكان رائع عبارة عن فيلا دورين بواجهة زجاجية بالأسفل تطل على حديقة صغيرة فيها مسبح..وعن يمين شاليه النساء كان شاليه الرجال.. كان موقع شاليه النساء بالنص بين شاليهين عن يمينهم شاليه الرجال وعن يسارهم شاليه لـ ناس.. وبدأت الجلسة بشرب القهوة وصواني الحلى والضحك والفرفشة والسواليف. الخالة نوال:يالله ياحريم ويابنات نتثقف شوي من كتاب الله اللي مازلنا نجهل فيه الكثير من المعاني.. سؤالي الأول:وردت كلمة النجدين في القرآن..مامعناها؟؟ أسماء:طريق الخير والشر.. نوال:سؤالي الثاني(ماهي الؤتفكات؟) أم اسمهان:مدائن قوم لوط.. نوال:ماهو العهن؟؟ أم عبدالرحمن:الصوف المصبوغ.. نوال:من هو الأكمه؟ هيفاء(بنتها):الشخص المولود أعمى.. نوال:ومن هم الأيامى؟ سماح:من لاأزواج لهم من الرجال والنساء.. نوال:ماهما المكاء والتصدية؟ وبعد تحاور وتشاور جات الاجابة:التصفير والتصفيق..مثل ماكانوا كفار قريش يفعلون حول الكعبة كانت عبادتهم تصفيق وتصفير !! وفجأة والحريم قاعدين يسولفون حول المسبح بالحوش الا الشاليه اللي جنبهم ارتفع فيه صوت استيريو بأغاني غربية وبدأت شلة شباب وبنات يرقصون في البلكونة أمام الملأ بشكل فاضح!! أم اسمهان:الله لايسامحكم..ادخلوا يابنات... نوال:قال الرسول(كل أمتي معافى إلا المجاهرون)اللهم لاتؤاخذنا بما فعل السفهاء منَّا... أسماء:الله يصيبكم ياكلاب!!! نوال:لايابنتي وش هالكلام؟الله يعافيهم ولايبتلينا..ماتت قلوبهم حسبي الله ونعم الوكيل.. أم عبدالرحمن:بالله مايخافون هالبحر اللي حولهم يهيج وينطبق عليهم؟؟ وقاموا الحريم يلمون أغراضهم ويدخلون داخل الشاليه.. انتبهوا لهم الشباب اللي قاعدين يتفرجون عليهم من البلكونة!! قال واحد:على فين ياهووه؟؟تعالوا شاركونا!!!!!! الثاني:تعالوا حتتبسطوا مرة! لكن الحريم ماردوا دخلوا الشاليه وقفلوا الستارة على الواجهة الزجاجية وبدأت أصوات الاستنكار تتعالى من الضيوف.. نوال:استغفر الله العظيم كنت أتمنى أعيش وأموت وأنا ماشفت هالمنظر المخزي! أم اسمهان:وين هيئة الأمر عنهم بس؟ ابتسام:مساكين هيئة الأمر..موب كل مكان مسموح لهم يدخلونه.. وبدأوا الحريم يغيرون الموضوع لكن أصوات الاستيريو والضحكات الماجنةبدأت تتعالى من الشباب بطريقة مستفزة!! وصل الصوت من قوته لاستراحة الرجال أحمد زوج أسماء:معقول هالصوت جاي من شاليه الحريم؟؟ أبواسمهان:أعوذ بالله...مستحيل .. بناتنا ونسواننا يخافون الله..يمكن من سيارات واقفة برة.. ولما صار الصوت يخرق الآذان اتصل عبدالرحمن على اسمهان يستفسر.. اسمهان:هذول الأنذال اللي بالشاليه اللي جنبنا يرقصون ويضحكون وقالوا لنا كلام سيء لدرجة اننا حرمنا نفسنا من جلسة المسبح ودخلنا... عبدالرحمن:زين ماسويتوا..بأشوف أنا اش السالفة.. وقال عبدالرحمن للرِجال:أنا بأروح للشاليه اللي جنب النساء هذا الصوت المزعج جاي من هناك.. زوج الخالة نوال:تكفى ياولدي..قول لهم مايصير هاللي يسوونه هنا في عوائل محترمة.. وبالفعل راح عبدالرحمن لحاله وطق باب الشاليه.. فتحت له الباب بنت لابسة بنطلون برمودا وبلوزة شفافة وشعرها أشقر وباين من هيئتها انها مو عربية.. عبدالرحمن:لو سمحتي نادي لي أحد من الشباب اللي داخل.. البنت(بلهجة عربية ركيكة):اش تبقي هبيبي؟ تعالي معايا نسهر شوية..ومسكت يده..!!! دفها عبدالرحمن بأقوى ماعنده وقال:ابعدي يامنحطة! سمعهوه الشباب بالداخل وجوا ركض.. الأول:مين سمح لك تمد يدك على صاحبتي؟؟ عبدالرحمن:بالله ماتستحي على وجهك وانت تقول هالكلام؟ الثاني:انت اش تبغى بالضبط؟ عبدالرحمن:إحنا عوائل محترمة شلون تتعدون على محارمنا بالنظر والأفعال الفاضحة؟؟ الأول:مرحبا والله بعوائل محترمة!سلم لي على المحترمين.. البنت:هادا وحش دربني أون ماي فيس! عبدالرحمن:أنا دفيتك بس..ولو ضربتك على وجهك يحق لي!! الشباب:الحقوا ياشباب هذا النذل يضرب تينا!! واجتمعوا الشباب على عبدالرحمن وضربوه ورفسوه ضرب شديد لدرجة انه تألم من بطنه ألم شديد وماقدر يقاومهم ورموه خارج الشاليه ورجعوا بكل بساطة يكملون حفلتهم!! قعدوا الرِجال ينتظرون عبدالرحمن يرجع لكنه مارجع لما استغربوا.. قال أبواسمهان:اشفيه عبدالرحمن تأخر؟عسى خير؟روحوا شوفوا شالسالفة؟؟ وراحوا محمد وعبدالرحيم يدورونه بشاليه الشباب..ولقيوه ممدد على الأرض والدم ينزف من فمه ووجه كله كدمات!! انصعق عبدالرحيم من منظره وقال:اشفيك اش اللي حصل لك؟ محمد:أكيد علق مع أصحاب هالشاليه..تعال نأدبهم! عبدالرحمن:لاتكفون لاتدخلون لهم هذول صيع مايخافون ربهم.. وبدأ عبدالرحمن يغيب عن وعيه ونقلوه من مكانه على المستشفى ومن ربكتهم مااتصلوا طمنوا الرِجال!! زوج ابتسام:هي اش السالفة بالضبط؟كل ماراح واحد منهم مارجع؟ أبواسمهان:أنا قلبي مو متطمن!حاس إنه فيه شي قاعد يصير!قوم معاي ياأبومجاهد نشوف اش السالفة! أبومجاهد(زوج نوال):يالله توكلنا على الله.. لما راحوا للشاليه..قال أبواسمهان:أكيد انهم داخل مادام مافي أحد منهم برة! ودقوا باب الشاليه.. فتح لهم واحد سكران!!وقال:يهلا ومرحبا تفضلوا معانا! أبواسمهان:احنا جايين نسأل عن عيالنا..وينهم؟؟ السكران:ههههه تلاقيهم في الشارع يفحطوا بالدراجات..روح يابويا ماعندنا عيال! وقفل الباب بوجهم... أبواسمهان:انت شايف اللي أنا شايفه ياأبومجاهد؟؟ أبومجاهد:شايف ياأبومحمد..ماأقول غير يارب عفوك أبواسمهان:تعال نكسر بابهم وندخل نوقفهم عند حدهم! أبومجاهد:أعوذ بالله ياشيخ..لايمكن أسمح لنفسي بدخول أماكن مشبوهة مثل هذي..الله يسترنا دنيا وآخرة..بس تعال نبلغ ادارة الشاليه عنهم.. بلغوا ادارة الشاليه اللي كانوا حريصين على عدم اثارة مشاكل! أبومجاهد:نقول لك عالم سكرانة ويرقصون ويغنون ومعاهم بنات تقول لي مانبي مشاكل؟!! الادارة:إحنا مو مسئولين عن تصرفات الزباين...مادام ماأزعجوا أحد...!!!! ثار أبواسمهان واتصل بولده محمد وخبره محمد بالسالفة!!! أبواسمهان:هذول ناس تعدوا بالضرب على زوج بنتي والحين هو بالمستشفى! الادارة:أكيد هو غلط عليهم وأخذوا حقهم منه! أبواسمهان:ماأقول غير حسبي الله عليكم...ونتقابل معاكم عند الشرطة!! الادارة:نصيحتنا لكم ماتتورطون معاهم بمشاكل هذول أولاد عوائل وتراهم مسنودين!!! أبومجاهد:إذا عيال العوائل يتصرفون كذا أجل اش يسوون عيال الشوارع؟؟ وخرج الاثنين من الادارة وهم بقمة غضبهم ورجعوا لباقي الرِجال وقال أبواسمهان:حياكم الله عندي جميعاً ببيتي نكمل السهرة والعشا هناك.. الرِجال:خير؟اش اللي صار؟ أبواسمهان:مشكلة بيننا وبين راعيين الشاليه والادارة ماتبي تتدخل! وماقالوا لأحد عن سالفة عبدالرحمن!!!! اتصل أبواسمهان على زوجته وقال:ياأم محمد اعزمي الضيوف كلهم على بيتنا هذا الشاليه مايناسب العوائل!! وبالفعل عزمت الجميع...واسمهان مو راضية تروح إلا مع عبدالرحمن!!لكن مايرد على جوالها أبد! استسلمت للأمر ورجعت مع أهلها لبيتهم والقهر ذابحها من تطنيش عبدالرحمن لاتصالاتها!! وأم عبدالرحمن رجعت مع عبدالمجيد لبيت أم اسمهان وهي بقمة الاحراج وتقول:ياجماعة حِنا اللي عزمناكم ماني قادرة أفهم ليش انقلبت العزيمة ببيتكم وأولادي عبدالرحمن وعبدالرحيم مايردون على اتصالاتي!!! طبعاً طول الجلسة ببيت أهل اسمهان والضيوف كلهم يسولفون ويضحكون ولكن اسمهان بعالم ثاني!! ماسكة جوالها وشغالة رسايل عتاب لعبدالرحمن!!!! بعد انتهاء السهرة وتناول الجميع للعشا..كلن سرى بيته.. وبقيت اسمهان واخواتها يسولفون اسمهان:أنا بأنجن من عبدالرحمن!كيف تاركني كذا من غير سؤال؟ الأم:حتى أنا مستغربة يابنتي إنه ماحضر على العشا! ابتسام:لايكون تهاوش هو وأبوي عشان شباب الشاليه؟؟ سماح:هالحين يجي محمد وكل شي يبان! ======وشوي دخل محمد عند أمه وخواته وزوجته بعد انصراف الضيوف.. وملامحه متغيرة ويتجنب نظرات اسمهان! اسمهان:محمد علمني..زوجي وين طس؟100 اتصال اتصلته ومالقيت رد!! ظل محمد ساكت..والكل يناظر فيه.. الأم:صحيح وينه؟لايكون متهاوش مع أبوك؟؟ اسمهان:إنت ليش تطالعني بنظرات غريبة؟؟محمد علمني اش اللي صاير؟؟ ومحمد سااااااااااكت.. سماح:أف منك يامحمد!ياشينك وإنت تلعب بأعصابنا!وين زوج اسمهان؟؟ محمد(بضيق):بالمستشفى! ارتحتوا؟ اسمهان(وهي مو مصدقة):اش يسوي بالمستشفى؟؟ محمد:متنــــــــــــــوم! اسمهان(بانهيار):ليــــــــــش؟ اش اللي جرى له؟ حكى لهم محمد اللي صار... اسمهان(وهي تبكي وتصرخ):وليش تخبون عني؟وكيف ماخليتوني أروح أشوفه؟ماراح أسامحكم! دخل أبوها عليهم وقال:خير يابنتي ليش تبكين؟ اسمهان:معقول يايبه كانت العزيمة عندك أهم من وقفتك مع زوجي؟ الأب:بدل ماتقولين جزاك الله خير يبه إنك قمت بالواجب وماحسست الضيوف بشي؟؟ اسمهان:زوجي أهم من الضيوف هاذيل كلهم..أنا لازم أروح أشوفه الحين!!!!!! الأب:انتي صاحية يابنتي؟زوجك تعبان ويمديه نايم الحين والساعة صارت2 بالليل وأخوه عبدالرحيم مرافق معه..كيف تبين تروحين؟؟ محمد:اجلسي مع البنات واسمري وبكرة نوديك له تزورينه.. اسمهان:ماني سامرة مع أحد خلوني بروحي!!!!!! وطلعت غرفتها اللي كانت تنام فيها قبل زواجها وجلست تتأمل فيها كل شي بالغرفة باقي على حاله..وكل ركن فيها يذكرها بذكرياتها مع عبدالرحمن أيام الخطوبة!!! في هذا المكان كانت تجلس تكلمه...وهنا كانت تحط هداياه وفي هذا المكان كانت تجلس وتؤلف أشعار له!! كل شي حولها يذكرها فيه والدموع تنهمر من عينها بغزارة! ======== وبالصالة رجعوا محمد وأبوه للمجلس عند أزواج ابتسام واسماء يكملون حديثهم... أسماء:ياحليلها هالسمهونة آثاريها تحب دحومتها من قلب؟؟ الأم:طبيعي..مو زوجها؟؟؟ أسماء:بس أنا أتذكر قبل 3سنوات لما طلع زوجي للبر مع اخوانه ولعبوا كورة..انكسرت رجله!ولما وصلني الخبر ماحزنت عليه!حزنت على نفسي! ابتسام:عجيب أمرك!زوجك انكسر.. تحزنين على نفسك ليش؟؟ أسماء:لأني أنا اللي بأتوهق في خدمته ياعمري! قعد 3 أسابيع وهو غاثني جيبي وهاتي شيلي وحطي!واشتغلت له نيرس وخدامة لين ماقام على رجوله وافتكيت من طلباته!!! سماح:ههههه دايماً انتي غير الناس!! الأم:ماحد طلع لي من بناتي في تقدير الزوج إلا ابتسام واسمهان! أسماء:تقديرك لأبوي يايمه ماجاء من كيفك!إلا من خوفك منه وعصبيته!!! الأم:يازينك وانتي منطمة وساكتة! ============= ثاني يوم كان الجمعة واسمهان مازار عينها النوم لحظة!! ونزلت قعدت بالصالة..لحالها والبيت كله نايم ماعدا كاتيا الشغالة قاعدة ترتب البيت واسمهان بس تبكي... كاتيا:مدام اسمهان دو يو هاف ابروبليم وذ يور هازبند؟؟ اسمهان:الله يرضى عليك خليني بحالي..مالي خلق أتكلم!! أم عبدالرحمن مادرت بسالفة ولدها إلا عقب مارجعت للبيت اتصل بها عبدالرحيم وخبَّرها وظلت ساهرة طول الليل تدعي له وتدعي على من ظلم ولدها!!! ======== جلست اسمهان بالصالة تبكي على زوجها ونزلت أمها وقالت:السلام عليكم.. اسمهان:وعليكم السلام.. الأم:خذاني النوم بعد سهرة أمس وماصحيت بدري..وأحس جسمي متكسر بعد ضيوف أمس والقومة والقعدة.. لكن اسمهان ماعلَّقت ظلت تبكي بصمت.. الأم:واضح إنك مانمتي..صح؟ اسمهان:ومن وين بيجيني النوم يايمه وزوجي طايح بالمستشفى ومايندرى عن حاله؟! الأم:ان شاء الله تشوفينه وتتطمنين عليه..أنا بأروح المطبخ أسوي فطور خفيف لي ولك وأكيد ابتسام وبناتها بيصحون الحين يفطرون معانا.. وراحت الأم للمطبخ..وشوي إلا الأب كان نازل من الدرج.. الأب:السلام عليكم ورحمة الله وبركاته.. اسمهان:وعليكم السلام..يبه وين رايح؟؟؟ الأب:رايح لخطبة الجمعة..ليش بغيتي شي؟؟ اسمهان:يبه ودي أروح لزوجي! الأب:بالله هذا وقت مناسب تزورينه فيه؟ان شاء الله العصر أروح أنا وانتي وأخوك!مع السلامة وخرج الأب مستعجل يبي يلحق الخطبة واسمهان تذرف دموعها وتقول بنفسها(من وين يجيني الصبر لين العصر؟؟) ولحظات إلا دق جوال اسمهان وسحبت جوالها بلهفة ترد على بالها عبدالرحمن!!بس طلع المتصل أم زوجها! اسمهان(بلهفة):هلا خالتي شلونك؟جاك خبر عن عبدالرحمن؟ أم عبدالرحمن:ليش؟ أهلك ماقالوا لك؟ اسمهان:اش يقولون لي؟ أم عبدالرحمن:انه متنوم بالمستشفى.. اسمهان:إلا قالوا بس مدري عن أخباره هو زين؟وشلون صايرة صحته؟ أم عبدالرحمن:ان شاء الله إنه مافيه إلا العافية..أنا اتصلت على عبدالرحيم وطمنني انه بخير..بس انتي ماودك تزورينه اليوم؟؟ اسمهان:وشلون ماودي؟إلا ودي بهاللحظة أشوفه!بس مين بيوديني ياحسرة؟أبوي يقول في العصر نروح!! أم عبدالرحمن:أنا بالنسبة لي بأروح الحين.. بيحطني عبدالمجيد عنده ويروح لصلاة الجمعة..تبين أَمُرْ عليك؟؟ اسمهان:ياليت ياخالتي ياليت.. أم عبدالرحمن:أجل تجهزي ودقايق وأكون عندك.. وبالفعل قامت اسمهان وتجهزت ودقايق ووصلت أم عبدالرحمن.. اسمهان:يمه هذي خالتي بتاخذني ونروح للمستشفى أزور زوجي..تغدوا انتوا بالعافية ولاتنتظروني.. الأم:روحي في حفظ الله وسلمي لي عليه.. وراحت اسمهان وبعد أقل من ساعة رجع أبوها وزوج ابتسام ومحمد من صلاة الجمعة.. دخل الأب الصالة وقال:وين اسمهان؟؟ الأم:راحت تزور زوجها.. الأب:ومين وداها؟ الأم:مرت عليها أم زوجها.. الأب:ماشاء الله وتروح من غير ماتستأذن مني؟ الأم:وشلون تستأذن منك وانت في الصلاة؟ماقصرت استأذنت مني أنا وراحت.. الأب:هالبنت شكلها تحبه أكثر مننا! الأم:ماتنلام.. طالعة لي!من يوم ماعرفتك نسيت أهلي كلهم!!!! الأب:ههههههه ورجع للمجلس مع الرِّجال! وحضرت اسماء للغداء عند أهلها وزوجها راح لإخوانه يتغدى معاهم. ========= نرجع لاسمهان اللي ركبت السيارة وقالت بصوت منخفض:السلام عليكم ورحمة الله وبركاته.. وردت أم زوجها السلام.. أم عبدالرحمن:شلونك يابنتي؟وشلون أهلك؟ اسمهان من الحيا تأشر لخالتها إنه ماودها تتكلم قدام عبدالمجيد! أم عبدالرحمن:لا..ماعليك يابنتي..خذي راحتك..عبدالمجيد فديت روحه مايسمع أبد!! وتطمنت اسمهان وخذتها السوالف مع أم زوجها إلى أن وصلوا للمستشفى.. ولما نزلوا صار عبدالمجيد يخاطب أمه بلغة الإشارة إنه بيمر عليها عقب صلاة الجمعة.. لما دخلوا غرفة عبدالرحمن لقيوه قاعد فوق السرير ويصلي الظهر..قامت أمه توضت وصلت هي بعد ..أما اسمهان اللي كانت معذورة عن الصلاة ظلت جالسة على كرسي وتتأمل وجه زوجها بحزن اللي كان وجهه فيه بقع زرقاء ووحدة من عيونه وارمة وفمه بعد والكدمات والرضوض واضحة على ايدينه ورقبته.. وبعد ماانتهى من الصلاة التفت لليمين وقال(بصوت واضح فيه التعب):هلا اسمهان شلونك؟ اسمهان:بخير ياقلبي.. أم عبدالرحمن:أشوف مالاحظت إلا وجود اسمهان بس!خير؟؟ عينك الثانية خرشوها لك؟؟؟؟ عبدالرحمن:هههه هلا يمه هلا.. وسلمت عليه أمه..وبدأوا يسألونه بالتفصيل عن اللي صار وحكى لهم.. الأم:أعوذ بالله..معقول ببلادنا قاعد يصير شي مثل هذا؟؟ عبدالرحمن:يايمه ابليس موجود بكل ديرة..ومايفرق بين عربي وعجمي!! اسمهان:الله ينتقم منهم..هالمجاهرين... أم عبدالرحمن:طيب مااشتكيتهم للشرطة؟؟ عبدالرحمن:من غير ماأشتكي الدكتور أساساً لما شاف حالتي أمس قال لعبدالرحيم انه ضروري المستشفى تتخذ اجراء وتبلغ الشرطة عشان ينعرف سبب الحادث..وبالفعل ماقصروا أخذوا أقوالي ومدري وش سووا! وكملوا سوالفهم وكانت أم عبدالرحمن جايبة غدا معاها في حافظات وجهزت هي واسمهان الغدا وقعدوا الثلاثة يتغدون.. وشوي وجاء عبدالرحيم..ومن ورا الستارة سلم على الجميع وقال:عندي لك أخبار زينة ياعبدالرحمن جاني اتصال قبل شوي من الشرطة..بلغوني فيه إنهم داهموا موقع الشاليه فجر اليوم ولقيوا الشباب بحالة سُكر وأوضاع ماتسر وقبضوا عليهم! وسألوني إن كان ودك تتنازل عن حقك أو لا؟ أم عبدالرحمن:ايش اللي يتنازل؟الا هذول حقهم ينرمون بالسجون سنة على الأقل!زين ماكانوا شايلين معاهم سكاكين والا كان ذبحوا أخوك!! عبدالرحيم:تصدقون انه بعضهم مسنود ومن عوائل معروفة بس الشرطة يقولون انها مو أول قضية يمسكونهم فيها عشان كذا هالمرة لابستهم القضية لابستهم! عبدالرحمن:الحمدلله.. أم عبدالرحمن:أسألك يارب في هذا اليوم الفضيل إنك تنتقم منهم أو تهديهم وتردهم لأهاليهم تايبين عبدالرحمن:جزاك الله خير يمه.. عبدالرحيم:يمه أنا وعبدالمجيد بنروح مطعم قريب من هنا نتغدى فيه..لو احتجتينا اتصلي.. أم عبدالرحمن:ان شاء الله.. واستمر الوقت بالسوالف.. أم عبدالرحمن:شوف ياعبدالرحمن هذي الشنطة فيها غيارات وهدوم لك وكل شي تحتاجه بأخليها لك في الدولاب.. اسمهان:أنا في خاطري أرافق مع عبدالرحمن اليوم ياخالتي.. أم عبدالرحمن:ليش يابنتي؟عبدالرحيم مابيقصر! عبدالرحمن:اسمهان صادقة يمه..وترى عبدالرحيم عنده بكرة عمل في النهار..خليه اليوم يرجع البيت يرتاح.. أم عبدالرحمن:مثل ماتبين..بس مالك هنا أغراض.. اسمهان:ماعليك ..أهلي جايين يزورون عبدالرحمن في العصر بأقول لهم يجيبون لي أغراضي.. وشوي وراحت أم عبدالرحمن بيتها وبقيت اسمهان مع عبدالرحمن.. قام عبدالرحمن يتأملها وهي تناظر بالأرض... عبدالرحمن:صارحيني! قلقتي علي؟؟ اسمهان:إلا حقدت عليك بصراحة!دقيت عليك مية مرة ومارديت وأرسلت لك مية رسالة وماعبرتني ومادريت بسالفتك إلا آخر الليل ماحد علمني من وقتها.. عبدالرحمن:مو عبدالرحيم أخذ جوالي وحطه على الصامت عشان مايزعجني أحد..بس سمهونتي تخيلي لو إني مت!! اسمهان(بانفعال):أعوذ بالله بعيدالشر عنك!عساها بقلب اللي يكرهونك! عبدالرحمن:ههههه ليش؟لهاالدرجة أنا غالي؟؟؟ اسمهان:مايحتاج تسأل إنت عارف! ومضى الوقت بسوالف واسترجاع ذكريات ماضية.. اسمهان:تدري يادحوم طيحتك هذي بإيش تذكرني؟؟ عبدالرحمن:لا..بإيش؟؟ اسمهان:بروحتنا للعمرة,,لما ضربك المكيف وتعب ظهرك وصرت تصلي وانت قاعد...هههههه عبدالرحمن:هههه وأنا كل ماتذكرت منظرك وانتي مادة راجلك للأندونيسية تمرخها قدام خليقة الله في المسعى ينتابني ضحك وأقول هالبنت مو صاحية! اسمهان:هههه ولا ضياعي التاريخي ذاك اليوم يوم رحت الحرم لحالي..وخليتك بالفندق! عبدالرحمن:ليش انتي ضعتي؟؟مو تقولين كنتي في السوق تتسوقين؟؟ اسمهان:هاه؟؟ ============ وفي العصر بدأت الزيارات تتوالى على عبدالرحمن..كل الضيوف اللي كان عازمهم الليلة السابقة جوا زاروه وجت أم اسمهان تزوره بعد وبعدين رجعت للبيت ولما الغرفة صارت مليانة ضيوف خرجت اسمهان وجاء في بالها تروح لحضانة المواليد! ومن خلف الشباك الزجاجي ظلت اسمهان تراقب المواليد بأجسامهم الصغيرة وهي مبتسمة وعيونها غرقانة دموع.. انتبهت لها الممرضة وخرجت تسألها:مدام..اش اسم بيبي إنتَ؟ اسمهان(بحزن):أنا ماعندي بيبي بس حبيت أتفرج عليهم.. الممرضة:مئليش مدام ممنوء وقوف هنا!!!! وتركتهم اسمهان بحسرة.. وخطر في بالها تتسلى بزيارة المرضى لين مايروحون الرِجال من عند عبدالرحمن وراحت اشترت مجموعة ورود كل وردة مغلفة لحالها.. وراحت لقسم الأطفال..دقت باب غرفة من الغرف..وكانت المريضة طفلة صغيرة عمرها6سنوات وأمها مرافقة معاها.. سمحت الأم لها بالدخول.. اسمهان:أنا جاية أزور المرضى وأدعي لهم بالشفاء.. أم الطفلة:جزاك الله خير..تفضلي البنت الصغيرة غطت وجهها بشرشف وقالت:ماما هاتي قبعتي!! ناولتها أمها القبعة ولبستها البنت على راسها وبعدين كشفت الشرشف عن وجهها! اسمهان:اش اسمك ياقمورة؟ الطفلة:دانية.. اسمهان:وكم عمرك ياترى؟ الطفلة:ستة سنين. اسمهان:ماشاء الله..قد بنات إختي اسمهان تخاطب الأم:سلامتها..اشفيها؟؟ أم الطفلة:بعيدالشر عنا وعنك عندها المرض الخبيث(السرطان) وحالياً تتعالج بالكيماوي.. وخفضت الأم صوتها وكملت كلامها:ماتشوفينها يوم شافتك غطت وجهها بشرشف ولبست قبعة؟؟ماتبي أحد يشوفها من دون شعر!شعرها طاح كله مع العلاج!! وفي غرفة الطفلة(دانية)مريضة السرطان.. ظلت اسمهان تراقب حركات الطفلة البريئة وهي تلعب بعروستها وتضحك.. واسمهان حزينة..فدعت للبنت بالشفاء واستأذنت من الأم انها تطلع.. ولما جت خارجة.. الطفلة دانية:ياأبلة..ياأبلة..ممكن تاخذي شوكولاتة عشان خاطري؟؟ ابتسمت اسمهان وقالت:ممكن ياقمر.. الطفلة دانية:عروستي تقول انك مرة حلوة ممكن تبوسيها؟؟ اسمهان:أكيد ممكن.. وباست البنت وعروستها وقالت للأم:الله يحفظ لك بنتك.. وغطت اسمهان وجهها وخرجت من الغرفة تبكي!! وبعد ماكفكفت دموعها..فكرت تدخل غرفة ثانية يمكن تلاقي شي يشرح صدرها.. دقت الباب وجاوبها صوت منهك:تفضل! دخلت اسمهان وتفاجئت بصوت طفل يأن من الألم وأمه جالسة جنبه على كرسي وآثار السهر والاجهاد واضحة عليها.. اسمهان:مرحبا..أنا زائرة وجاية أزور مريضكم وأدعي له بالشفاء.. أم الولد:جزاك الله خير..تفضلي.. جلست اسمهان وصبت لها الحرمة قهوة وارتشفتها اسمهان بهدوء وسألت:سلامته ولدك..من ايش يشتكي؟؟ أم الولد:له ثلاثة أيام من يوم سوى عملية الاستئصال بس شوفة عينك مازال يأن ويتألم.. اسمهان:عملية استئصال الزايدة؟؟ أم الولد:لا...عملية بتر الساق واستئصال الأجزاء المتعفنة!!!!! شرقت اسمهان بالقهوة وصارت تكح.. اسمهان:ليش؟اش صار معاه بالضبط؟ أم الولد:والله يابنت الحلال إحنا عائلة عندهم تاريخ وراثي لمرض السكر..بس دلالي الزايد لولدي خلى المشكلة تزيد خصوصاً انه أول طفل أجيبه عقب 9سنوات من عدم الانجاب!! اسمهان:سبحان الله!9سنوات ماأنجبتي؟؟ أم الولد:مو هذي هي المشكلة..المشكلة كانت في دلالي الزايد له..كل شي يبيه أجيبه له وكان يبالغ في أكل الوجبات السريعة والحلويات لين مااكتشفنا انه يعاني من ارتفاع في السكر وبدأنا نسوي له حمية ونعطيه إبر يومياً..لكن هذا طفل ومو سهل السيطرة عليه..إن قدرت أضبطه في البيت ماقدرت عليه وهو بالمدرسة وغايب عني ومدري اش ياكل ظل السكري في ارتفاع والولد كل يوم والثاني تجرح ساقه من لعب الكورة وخبرك بمريض السكر ماتتخثر جروحه بسرعة ويظل ينزف ولاتلوث الجرح يتعرض لغرغرينا وتعفن وهذا اللي صار لدرجة انه الحل الوحيد كان بتر نصف الساق.. وقامت الأم وكشفت اللحاف عن الولد وقالت:شوفي.. غطت اسمهان عينها من الخرعة كان الولد بنصف ساق والعملية مغطاة بضمادات وشاش... حست اسمهان بـ غصة وخرجت من عند الأم وهي تدعي لولدها بالشفاء ======== بعد بحر الدموع اللي سكبته اسمهان قررت انها تنظر للحياة بتفاؤل وتروح قسم الولادة وتزور أي حرمة والدة وتستمتع بشوفة المواليد.. وبالفعل وصلت لغرفة وطقت الباب.. المرافقة اللي مع أختها الوالدة:نعم؟ دخلت اسمهان وبكل أدب قالت:تسمحولي أدخل؟أنا زايرة وجاية أبارك.. الحرمة الوالدة:ياهلا فيك تفضلي.. أما المرافقة اللي تصير أخت الحرمة الوالدة صارت تطالع بنظرات شكك لاسمهان!!! اسمهان:مبروك..ماشاء الله اش جبتي؟ وكانت الوالدة ماسكة ولدها وهوبحضنها:وقالت جبت ولد.. اسمهان:واش سميتوه؟؟ الوالدة:لؤي.. المرافقة:وانتي متعودة دايماً تزورين المرضى؟؟ اسمهان:لا هذي أول مرة.. وبدأت المرافقة تسأل اسمهان أسئلة ماتريح!وحست اسمهان انها بمكان غير مناسب واستأذنت تطلع.. وهي خارجة من الغرفة الكبيرة كان في سيب بنفس الغرفة بنهايته الحمام دخلت اسمهان تغسل يدها اللي تدبقت بالتمر وتطلع.. فظنوها الحرمتين انها خرجت خلاص.. المرافقة:والله هالأشكال مايريحون أبد! الوالدة:حرام عليك دخلت باركت وخرجت ماسبب لنا أي أذى.. المرافقة:لأنه من حظك يالشاطرة إني مرافقة معاك!تخيلي لو ماني فيه كان سرقت ولدك وهربت!كنتي بتقدرين تلحقينها وتجرين وراها؟؟؟ الوالدة:يمه منك خوفتيني..صحيح الدنيا مافيها أمان! سمعت اسمهان حوارهم كامل وطلعت من الحمام وناظرت فيهم نظرة لها معنى وخرجت من غير ماتتكلم بكلمة!من القهر والصدمة!!! الوالدة:يافشلة!اثاريها سمعتنا!! المرافقة:ومن وين طلعت هذي؟على بالي خرجت خلاص!! =========== ضاق صدر اسمهان وفكرت ترجع لعبدالرحمن..واتصلت به ولقيت ان ضيوفه كلهم راحوا..ودخلت عنده وحكت له عن كل شي صار لها ماعدا حكاية الحرمتين!!! لما رجعت اسمهان للغرفة ودخلت عند عبدالرحمن وبعد التحية والسلام.. سألها عبدالرحمن:ماشاء الله وين كنتي هالوقت كله؟؟ حكت له اسمهان عن كل شي.. وقالت:ماتتخيل ياعبدالرحمن شوفة المرضى ومعاناتهم على سرير المرض قدر إيش صعبة!آثاريني بغفلة كبيرة!أنا لوقعدت يوم بالبيت وحسيت بزهق...صار عندي احساس بإنها نهاية العالم! عبدالرحمن:طبعاً إحنا بغفلة عيادة المرضى واجبة في الدين الاسلامي لأنه لها فوائد كثييييرة تفيد المريض في إنه يحس بالفرحة في اهتمام من حوله فيه +ادخال السرور والبهجة على قلبه+التخفيف من معاناته وتفيد الشخص الزائر بإنها تذكره بنعمة الصحة اللي ربي أنعمها عليه فيجتهد انه يشكر الله ويحمده عليها..وترقق قلب الواحد على اخوانه المسلمين ويتذكرهم بدعاءه.. قامت اسمهان تبكي!! عبدالرحمن:سمهونتي؟عسى ماشر؟تأثرتي بكلامي؟؟ وماردت اسمهان استمرت تبكي.. عبدالرحمن:وبعدين يعني؟إنتي جاية المستشفى تونسيني وتنسيني أوجاعي..ولاتضيقين خاطري بدموعك؟؟؟ اسمهان:لا ..انت مادريت اش صار لي مع الحرمة الوالدة يوم رحت أزورها!! عبدالرحمن:ماشاء الله انتي وصلتي لقسم النساء والولادة؟؟على بالي رحتي لقسم الأطفال بس! وقامت اسمهان تحكي له عن كلام الحرمتين عنها وعن شكهم في نيتها لزيارتهم... عبدالرحمن:شوفي يازوجتي العزيزة طالما إنك قمتي بواجبك وسويتي اللي عليك فلايهمك أحد!خل اللي يتكلم يتكلم والرسول اش قال؟؟؟قالإنما الأعمال بالنيات وإنما لكل امريءٍ مانوى) والله عالم بنيات خلقه..وبيني وبينك الجماعة ماينلامون ترى كثير من الجرايم صارت تتم ورى مسمى فعل الخير!!!! اسمهان:شلون يعني؟ عبدالرحمن:يعني فعلاً حصل انه صارت جرايم اختطاف مواليد بالمستشفيات عن طريق زيارة امرأة مجهولة لغرفة وحدة من الوالدات وهي مستترة ورا فعل الخير وأداء الواجب!وبعد لحظات تخطف الطفل وتطلع ولايبان لها أثر!وغير كذا من حقهم الناس يشكون لأنه زماننا هذا صار زمان عجيب وفعل الخير صار شبه نادر عند البعض!يعني مين يجي في باله بهالوقت انه يروح لمرضى مايعرفهم عشان يواسيهم ويخفف عنهم؟!!بس ماأقول غير الله يجزاك خير إنك فكرتي بغيرك ودعيتي لهم بالشفاء.. وفجأة دق باب الغرفة.. عبدالرحمن:تفضل... وقامت اسمهان تغطي وجهها وراحت ورى الستارة.. وكانت الزائرة الخالة جوهرة ومعاها زوجها.. سلمت على عبدالرحمن وتحمدت له على السلامة وسولفت معاه شوي بعدين انتقلت للطرف الثاني من الغرفة وجلست تدردش شوي مع اسمهان.. وكانت زيارتها مختصرة وخرجت هي وزوجها.. وثواني إلا جاء لعبدالرحمن اتصال من تركي اللي وصلته الأخبار عن طريق أخته سماح.. بعد انهاء المكالمة قال عبدالرحمن:الله يعينك يااسمهان راح تنطردين من الغرفة مرة ثانية! اسمهان:ليش؟؟ عبدالرحمن:تركي وناصر بيجون يزوروني الحين.. اسمهان:ماني طالعة لو تنهبل!زهقت..تدري ؟بأحبس نفسي بالحمام!!! عبدالرحمن:ياسلام..وافرضي أحد منهم احتاج الحمام؟وش السوات؟ اسمهان:زين الله يعين..بأطلع أتجول لين ماينتهون واتصل فيني علمني لاطلعوا!! خرجت اسمهان وصارت تفتر بالمستشفى مو عارفة وين تروح! وفكرت لو تجلس تحت بقسم انتظار النساء تتسمع بكلامهم! دخلت قسم الانتظار ولقيت الغرفة مزحومة وسمعت وحدة تقول للثانية:انتي موعدك عند دكتورة مها؟؟ الثانية:لا عند دكتورة فايزة.. الأولى:سلامات..اش فيك؟ الثانية:مدري عندي الام شديدة بصدري و الدكتورة سبق و سوت لي فحوصات واليوم بأستلم النتيجة..احتمال يكون عندي ورم!! الأولى: قولي خير ياشيخة..ان شاء الله مافيك الا العافية..وحدة من زميلاتي كان يجيها الام بصدرها وطلعت السالفة انه عندها خُرَّاج وعملية موضعية بسيطة وشالوه لها! قامت اسمهان من جنبهم وقعدت جنب غيرهم..لقيت حرمتين يسولفون.. الأولى:تعبت تعبت من المستشفيات والدكاترة كل يوم وأنا عندهم مابقى شي ماسويته ومابقى قرش إلا وصرفته كله عشان أحمل بس ماانكتب لي نصيب... الثانية:طيب مافكرتي تسوين طفل أنابيب؟ الأولى:سويتها مرتين وفشلت! الثانية:مالك الا الصبر والله يكون بعونك.. الأولى:كل ماصبرت..لقيت أم زوجي لي بالمرصاد!تصدقين ودها تخطب لزوجي؟؟بس هو مو راضي!! الثانية:يووه الله يكفيك شرها! تضايقت اسمهان من السواليف..وكانت بتقوم بس الحرمة اللي قاعدة جنبها من الجهة الثانية قالت لها:انتي موعدك عند أي دكتورة؟؟ ماعرفت اسمهان بإيش ترد وقالت:اااا عند دكتورة فايزة!! الحرمة:ليش ياساتر؟انتي وشفيك بالضبط؟؟ اسمهان:لو كنت أدري كان علمتك!بس اليوم بتطلع نتيجة الفحوصات!عن إذنك!! وطلعت اسمهان من الغرفة وهي متضايقة من السواليف اللي قاعدة تسمعها! وصارت تتمشى بالأسياب ولقيت لوحة معروض عليها صور الدكاترة اللي بالمستشفى وتخصصاتهم وطاح عينها على اسم الدكتورة فايزةولقيت هالعبارة مكتوبة: د.فايزة:تخصص علاج الأورام وسرطانات الثدي!! اسمهان:أعوذ بالله..ياشين الكذب يااسمهان!! ============ وفي غرفة عبدالرحمن دخل ناصر وتركي عليه..وناصر شايل باقة ورد وتركي شايل سبت شوكولا.. ناصر:ياهلا بالدحمي حبيب قلبي!ياهلا باللي انضرب واندبغ! عبدالرحمن:ههه خوش ترحيب يانصور.. تركي:السلام عليكم..شلونك ياعبدالرحمن...وسلم عليه.. ناصر:جبت لك الورد عشان تشمه وتقوم بالعافية يامال العافية!!وتركي مسوي نفسه كشخة جايب شوكليت بقيمة فاتورة الجوال!! تركي:وش عليك يالقعيطي؟دافع من جيبك شي؟؟ ناصر:لا من جد ودي أشوف هذا اللي اخترع سالفة الورد والشوكليت للمريض وأكفخه!بالله المريض لاطاح بفراشه واش يبي بالشوكليت؟؟المريض محتاج ياكل لحم ومرق يرم عظمه!!أنا أقول لو يخترعون سبتات فخمة ويحطون داخلها كبدة وكرش ويغلفونها نهديها للمرضى أفضل!!! تركي:أنا قاري من قبل انه فكرة اهداء المريض نباتات وورد نابعة من فايدة مهمة وهي انه النباتات تمتص ثاني أكسيد الكربون من الجو وتعطي الأكسجين وهذا سبب في تعقيم غرفة المريض وتنقية أجواء الغرفة .. عبدالرحمن:ومنكم نستفيد.. ناصر:فديتك أنا وفديت هالخرايط اللي صايرة بوجهك الله الله وش هالكشخة وش هالزين شي أحمر وشي أزرق وشي بنفسجي! بالله ياتركي تصورني أنا وياه بجوالي!! تركي:أقول يامثبت العقل والدين! انت ناسي نفسك يوم تقلبت بالدباب؟ياوجهك شلون كان صاير تقول مفحط به على اسفلت؟!!! عبدالرحمن:هههههههه..الله لايحرمني من سواليفكم الماصخة! لما رجعت اسمهان لغرفة عبدالرحمن في المستشفى كان مبسوط ويضحك..سألته عن السر قعد يحكي لها عن كل سواليف ناصر وعن مقالبه فيهم أيام العزوبية!! اسمهان:ههههههه تصدق ناصر هذا يذكرني بـ مين؟؟ عبدالرحمن:بــ مين؟ اسمهان:بصديقتي رانية!ياحبها للمزح والتريقة..بس الله يسعدها تونس الصدر.. وقامت اسمهان تاكل شوكليت..بشراهة!!!!!!! اسمهان:اش هذا كله يادحوم؟ شكلنا بنفتح محل شوكليت! عبدالرحمن:بالله انتبهي لنفسك!ماصدقنا وزنك ينقص!! واستمرت السواليف..لين ماجاء وقت النوم.. دخلت الممرضة وبما انه عبدالرحمن تعبان من الألم اللي بإيديه ومايقدر يرفعها..قامت الممرضة بتناوله الحبوب في فمه!!!!!!!!! وتجيكم اسمهان طايرة من بعيد! وتسحب الدواء من يد الممرضة وتقول:هيه يالحبيبة!تلقمين المريض الدوا بـ فمه هذاك في الفلبين ياحلوة!هنا ..إحنا موجودين والله لايحوج رجالنا لكم!!! وأخذت الحبوب وحطتها بـفم عبدالرحمن وشربته الدوا! ويوم خرجت الممرضة قال عبدالرحمن:كفو والله باسمهان بنت الرِجال!!!! اسمهان:وش عقبه يالفاغر؟كنت بتفتح فمك لولا إني لحقتك بآخر لحظة!!!!!! ============= مرت الأيام وخرج عبدالرحمن من المستشفى وسووا أهله عزيمة له وعزموا كل معارفهم وأقاربهم.. وقبل المدارس بيومين كان عبدالرحمن له مراجعة بالمستشفى واسمهان قاعدة بالبيت تكوي ملابس... اتصلت عليها سماح وبعد السلام والتحية.. سماح:سوسو؟انتي في البيت؟ اسمهان:ايه بالبيت.. سماح:أنا كنت بالمستشفى قبل شوي كان عندي موعد متابعة حمل وتوي طالعة من المستشفى فكرت لو أمر أسلم عليك أنا ومحمد..اش رايك؟؟ اسمهان:ياهلا فيكم..أنتظركم.. وبعد أقل من ساعة كانوا محمد وسماح عندها.. وبعد السواليف المعتادة والسؤال عن عبدالرحمن... اسمهان:هاه بشري هالحين صرتي بأي شهر؟ سماح:في بداية السابع.. اسمهان:وماعرفتي اش ببطنك؟؟ محمد:ماكان واضح .بس اليوم قالت لنا الدكتورة إنها بنية!!عاد اجتهدي وجهزي الهدية من هاالحين! اسمهان:من عيوني! محمد:لأني معزم أسميها اسمهان رضت سماح ولا انرضت!..البنت اسمهان يعني اسمهان!!!!! سماح:أفا عليك ياحمود..أساساً لو إنت ماتبي تسميها اسمهان كان أصريت أنا أسميها..وياليت لو تطلع بجمال اسمهان وحلاوتها وبرائتها! محمد:لا مادامك أمها أكيد بتطلع عليك!! سماح:بدينا في السماجة؟؟ سوسو ترى سر زيارتنا غير اننا نبي نشوفك كان ودي أسألك سؤال!! اسمهان:تفضلي.. سماح:صديقتك رانية مخطوبة.أو محجوزة لأحد؟؟ اسمهان:لا..ليش؟؟ سماح:الصراحة أمي ودها تخطبها لناصر ولد عمي! اسمهان:هههههههههههههه ههههههههههههه سماح:واشفيك؟قلت شي يضحك؟ اسمهان:لا بس الصراحة عرفتوا تختارون!وافق شنٌ طبقة!! عساها بس توافق! سماح:وش دعوى ماتوافق؟ناصر وإن كان راعي دجة ولجة بس تراه انسان طيب.. محمد:صادقة سماح..هو صدق منَّسِم شوي!لكنه رقيق مثل هب النسيم!! وبعد السوالف عطتهم اسمهان الرقم... اسمهان:بس ترى أنا ماراح ألمح لها بالموضوع ودي أشوف ردة فعلها بعد ماتخطبون!!انتوا متى ودكم تتقدمون؟؟ سماح:لسه.. بداية الدراسة نتصل على الأم..وإن رحبت فينا حددنا يوم ورحنا لهم! ============ وكلها يومين وجاء أول يوم بالترم الثاني... اجتمعوا الشلة بشوق يتبادلون أخبار الاجازة.. وكانوا(اسمهان+نجلاء+أفنان+مرام ) ورانية لسه ماجت... مرام:العادة رانية أول وحدة تداوم وينها اليوم ماجت؟؟ماحد فيكم اتصل عليها أمس؟ الشلة:لا... نجلاء:تلاقينها زادت بعد الريجيم أضعاف وزنها ومفتشلة نشوفها!! اسمهان:مع إنها كلمتني بالإجازة وقالت إنها مازالت مستمرة! أفنان:ياحليلها..يمديها تمزح معك! وشوي وهم واقفين بالسيب يتكلمون..كان فيه شلة واقفة يسولفون ومعاهم بنت جديدة ومعطيتهم قفاها..والشلة أول مرة يشوفونها.. أفنان:شايفين البنت اللي واقفة تضحك هناك؟؟ مرام:ايه قصة شعرها خقاااااااق! اسمهان:الصبغة كلاااااام! نجلاء:أقول يازين الرشاقة..حتى المريول طالع عليها أنيق..بس تهقون هذي أولى ثانوي؟؟ أفنان:لو إنها أول ثانوي ماكان قعدت تسولف مع الشلة اللي بـ صفنا!يمكن منقولة جديد من مدرسة ثانية! اسمهان:بس شكلها وهي تسولف كأنها تعرفهم من زمان.. وفجأة استدارت البنت وتقدمت بخطواتها تجاه الشلة وشعرها القصير الهفهاف الناعم مغطي نص وجهها!!! واستغربوا الشلة وصاروا يقولون:هذي وش تبي فينا؟؟؟ أفنان:شكلها اجتماعية يمكن ودها تكسب صداقات! وأول ماقربت منهم رفعت قصتها عن وجهها وقالت:هااااي شلة!! الشلة وهم فاتحين أفمامهم من الدهشة:راااااااااااانية؟؟؟؟؟؟؟ ؟؟؟ بعد ما الشلة فتحوا أفمامهم من الدهشة وقالوا بصوت واحد:راااااااااااااااااانية؟؟؟ ؟؟؟؟؟! رانية وهي ترفع قُصتها عن جبينها بدلع:عشتوا! ايه رانية..ماعرفتوني؟ أفنان:ماشاء الله تبارك الله شكلك اختلف 180 درجة! رانية:لـ للأسوأ ولا للأحسن؟ نجلاء:للأحسن طبعاً..مايبيلها سؤال..إش إش..وش هالزين كله؟وإحنا لنا ساعة نتغزل من بعيد على بالنا طالبة جديدة!!!! مرام:لا من جِد رنو ياقلبي شكلك صار وااااااو! اسمهان:يابنت لايكون شاركتي ببرنامج التغيير الجذري وإحنا ماندري؟الصراحة؟أغبطك على هالإصرار والتحدي!بس كم صار لك مسوية ريجيم؟؟ أفنان:وكم كيلو نزل وزنك؟ رانية:لي شهر ونص من قبل الامتحانات وواصلت المسيرة بالإجازة ومسكت نفسي..ولليوم صرت نازلة 14 كيلو.. نجلاء:بس لاإله إلا الله يارانية من شافك ظن إنه نزل منك شخص ثاني!!! الشلة:هههههههههههههه مرام:طيب اش شعورك بعد الرشاقة؟ رانية:الصراحة صرت أحس نفسي خفيفة مثل العصفور لدرجة إني يوم أمشي أحس إني من الخفة صرت أفقد التوازن ولاجيت بأرقص أحس الأرض ثابتة من تحتي ماتتفاعل معي مثل قبل!!!زمان كنت كل مارقصت أحس الأرض تفرح وتهتز تحتي!! اسمهان:إلا تبكي وتنتفض من ثقل ما شالت!!!هههههه مرام:صراحة أحسنتي في اختيار قصة الشعر من جد روووووعة! نجلاء:ياولد ياحركات ولابسة عدسات بعد!! اسمهان:والصبغة مرة حلوة ومناسبة كثير للون بشرتك.. مرام:حواجبك خطيييييييييييرة! رانية:ثانك يو! أفنان:بس ماهقيتها منك يارانية تنمصين حجاجك! رانية:حرام عليك..أنا مو نامصة حواجبي أنا مشقرتها...وبعدين راسمتها بالقلم.. اسمهان:بس ياحلوة حتى التشقير اللجنة الدائمة للإفتاء أصدرت فتوى تحرم حتى التشقير! نجلاء:والله احترنا..فتاوى تقول حلال وفتاوى تقول حرام.. أفنان:بس ياحلوات كثير من الشيوخ اللي أفتوا بالجواز تراجعوا عن فتواهم..لما تبين لهم الوضع.. اسمهان:فعلاً..الشيوخ اللي أجازوا التشقير في البداية توقعوا انه المسألة تغيير لون الحاجب فقط مثل صبغ الشعر!بس لما صاروا المستفتيات يوضحون للشيوخ انه النتيجة النهائية مشابهة للنمص تماماً بالإضافة للأضرار اللي يسويها التشقير للعين مع الوقت ..فتم تحريمه...لأن العلة في التحريم هي تغيير خلقة الله ومايخفى عليكم التغيير الرهيب اللي يضفيه التشقير للملامح! أفنان:وبيني وبينكم التشقير تدرج للوقوع في اللي أكبر منه!اليوم تشقرين وبكرة شعر الحاجب يقسى ويخشن ويصير شكله أكثر فتضطر الوحدة تخففه أو تقصه وتدخل في مسألة اللعن!! نجلاء:الصراحة..(دع مايريبك إلى مالا يريبك).. رانية:ومنكم نستفيد..بس ترى ماكنت أدري عن الكلام اللي تقولونه على بالي حلال مية بالمية!! مرام:لا بس حقيقي يارانية عيني عليك باردة ماشاء الله شكلك راااائع.. رانية:ياناس ماأقدر أنا على كذا!طايحين فيني تغزل من الصبح! واسمهان بينها وبين نفسها تقول:أما ناصر لو يشوفها بالشكل الجديد بيطيح عندها!!! ==================== وفي الظهر رجع تركي من العمل وبعده بشوي جاء ناصر يتغدى معاه.. دخلت أم تركي وقعدت معاهم(على فكرة أم تركي من القواعد من النساء اللاتي لايرجون نكاحاً..فمباح لها الظهور أمام ناصر من غير زينة)... أم تركي:أقول ياناصر؟ ناصر:سمي ياعمتي... أم تركي:أشوف الأيام قاعدة تضيع وإنت موب جايب طاري لموضوع الخطبة!خير؟؟اش السالفة؟؟لايكون هوَنْت؟؟؟ ناصر:لا ماهونت..وان شاء الله زواجي بيكون مع تركي بعد طوايفي بنفس الليلة! تركي:عز الله بأشيب وأنا قاعد أنتظرك يالخرَّاط!! ناصر:لا أنا جاد..بس الله يهديك ياعمة انتي ماسألتيني وشهي مواصفات زوجة المستقبل؟؟؟ أم تركي:اطربني..غَرِد! ناصر:أبيها بنتٍ عيطبول .. وغير إبشر ماتقول! ورعبوبةٍ خرعبة وخلوقةٍ مؤدبة!!! وشنباء عرْهرةَ..ماتحب مباهاة وفشخرة!!! وسلهبة هنَّانة موب خدبجة وَهْنانة! وشَمُوعٍ عروبٍ رصوف موب برمادة ضايعة الوصوف!!!! تركي:وإنت عاد من زينك يوم قاعد تتشرط؟!! ناصر:وليش ماأتشرط؟هذي وحدة بأعيش معاها مؤبد وبأدفع فيها دم قلبي إن ماكانت على الهوى فخلها تاكل هوا!! أم تركي:بس هذي اللي قلت مواصفاتها تراني أبشرك إنها باقي ماانخلق مثلها على وجه الأرض! وإن كان فيك خير اتقي ربك وصوم و صل وبتلقاها في الجنة تضحك مع الحور العين!!!! ناصر:اشفيكم قمتوا علي؟هذا وأنا اختصرت كثير من المواصفات!أجل تدرون؟مدام طلبي موب عندكم فـ يازين العزوبية زيناه! أم تركي:تراك لعَّاب يانويصر!وموب على كيفك تقول تم..وترجع بكلامك والبنت بأكلم أهلها هالأسبوع وأشوف وش بيقولون! تركي:ولايكثر هرجك..ترى الوالدة ذوقها حلو ومابتختار لك إلا اللي يرضيك!!! ناصر:الحمدلله إنه في شي اسمه نظرة شرعية!! =============== واليوم الثاني اتصلت أم تركي على أم رانية وقالت:سمعنا عنكم كثير وودنا نجي ونتعرف عليكم! من غير ماتجيب طاري الخطبة ورحبت بها أم رانية.. وراحت أم تركي هي وسماح يوم الثلاثاء.... وأم رانية طلبت من بنتها تجي تساعدها في تقديم الشاي والقهوة..عشان فيه ضيوف جايين ظنت رانية انهم صديقات أمها!! ولما وصلوا دخلت عليهم وسلمت وتفاجئت!!!!! وحست انه الموضوع فيه خطبة...وجلست.. أم تركي:إلا ياوخيتي..وينها بنتك رانية؟؟ سماح تأشر لأمها وأم تركي مو فاهمة!! أم رانية:ههههه هذي بنتي رانية.. أم تركي:لا ماهي بهذي أنا أقصد ذيك الدبة خفيفة الدم!! أم رانية:ههههه يابنت الحلال أنا ماعندي إلا ولدين وبنتين رانية الكبيرة وروان بصف أول ابتدائي وهي آخر العنقود...بس يمكن شكلها اختلف عليك يوم نحفت شوي!! قامت أم تركي فتحت الشنطة ولبست نظارتها ونادت رانية:تعالي فديتك.. جات رانية وهي تضحك.. وقامت أم تركي تتمقل في وجهها زين..وبعد دقايق قالت:إلا والله إنها هي !!!! سماح وأم رانية:هههههههه رانية:الحمدلله ياخالتي..يعني طلعنا براءة!! أم تركي:بس يابنتي تغيرتي..وش نَحَتِك كذا؟؟؟ رانية:عاد حركات بنات..حبيت أسوي نيولوك!! أم تركي:وش يطلع ذا؟؟ سماح:ههه يمه تقصد مظهر جديد أم تركي:والله إنك كذا صرتي مثل القمر..وش تبين يابنتي بكثر اللحم؟يازين الرشاقة والخفة.. وخرجت رانية من الغرفة تبي تجيب القهوة..وفتحت أم تركي موضوع الخطبة وعطت أم رانية نبذة عن ناصر.. وأثناء رجعة رانية للغرفة سمعت أطراف الحكي ووقفت تتسمع عند الباب..وانبسطت جداً!!!! وقالت بنفسها:اعقبي يااسمهانوه!آثاريني مادخلت مزاجك إلا عقب مانحفت؟!! لذي الدرجة كنت بعينك شينة؟؟ وبعد انتهاء الزيارة..قالت أم رانية:الصراحة بنتي لسه صغيرة وماأقدر أوعدكم بشي.. أم تركي:يابنت الحلال بناتنا صغار بعيوننا حتى وإن كبروا وحِنَّا لو نطاوع أنفسنا ماكان زوجناهم لليوم!! ============= ملحوظة: معاني الكلمات:عيطبول:المرأة طويلة العنق.. رعبوبة:البيضاء اللون الرطبة.. شنباء:رقيقة الأسنان في حسن واستواء.. خرعبة:حسنة القد لينة العصب.. خدبجة:السمينة الممتلئة الذراعين والساقين برمادة:سمينة ترتج من سمنتها.. وهنانة:التي بها فتور عندما تقوم من السمنة عرهرة:عظيمة الخلق مع جمال شموع:لعوب ضحوك هنانة:الضاحكة خفيفة الظل سهلبة:خفيفة اللحم.. |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
طبعاً رانية حست من كلام أمها مع أم تركي إنها مو موافقة على مبدأ الزواج وبغت رانية تنجلط!! وبعد ماراحت سماح وأمها قامت رانية تستهبل! رانية:يمه؟غريبة زارونا هالضيوف!وش يبون؟؟ أم رانية:جايين يخطبون! رانية(بـ تغابي):يخطبون مين؟؟! أم رانية:يخطبون أختك روان لولدهم!! رانية:يمه روان بصف أول ابتدائي! أم رانية:أقول كافي استهبال!يخطبونك ياالفهيمة! رانية:وانتي اش كان ردك؟؟ أم رانية:طبعاً ماني موافقة! رانية:ليش يمه؟؟ أم رانية:وتقولين ليش بعد؟؟صدق إن مافيك حيا!روحي نامي وراك مدرسة ياتلميذة المدارس..خلي الزواج لبنات الجامعات والخريجات! دخلت رانية غرفتها والألم يعتصر قلبها والدمع مدراراً وبينها وبين نفسها تقول:وش نحفتي له يارانية؟!!! لما جاء أبوها طلب العشا وجلس بالصالة وظنوا انه رانية نايمة فأخذت الأم راحتها بالسوالف وحكت له عن الناس وعن مواصفات العريس وعن عدم رغبتها بتزويج رانية!! ورانية فاتحة الباب وتسمع السوالف!! الأب:اللي أعرفه إنه كل أم تتمنى بنتها تتزوج اليوم قبل بكرة..أما انتي غريبة وشفيك معارضة!! أم رانية:البنت بعدها صغيرة ياولد الحلال وقدامها فرص كثيرة لين ماتتخرج! الأب:الشرع يقول إذا أتاكم من ترضون دينه وخلقه فزوجوه..وبنتك عقلها كبير..وانتي لين الحين عجزتي تفهمينها! أم رانية:شلون عجزت أفهمها؟ الأب:يعني مالاحظتي اهتمامها الشديد بحضور الأعراس والتصبغ والتزبرق؟؟إذا أمي اللي هي جدتها فهمتها وقالت بنتك زَوِجها ياسلطان..تحب تستعرض قدام النسوان وترقص!!انتي ماقدرتي تفهمين قصد بنتك؟!! أم رانية:بس رانية راعية وناسة وموب حقت زواج أبد!! الأب:وانتي اش دراك؟أحسن وحدة في بنات اخواني هي!فيها عِرف وواجب من صغرها!والكل يحبها وينبسط على سواليفها..طبخ وتعرف تطبخ..جمال وموب قاصرها شي..تربية والحمدلله بنتي أخلاقها عالية...وبعد كم شهر بتتخرج ونفرح فيها..وش اللي باقي؟؟؟ أم رانية:أقول لك الجماعة يبون يزوجون العريس مع ولدهم عقب 5شهور!وإنت تحسب انهم على كيفنا؟؟ الأب:شوفي..انتي مالك شغل بالسالفة كلها..أنا أدرى ببنتي! انتي لاشاورتيها ولاشي وتفتين من راسك وهذا شي مايجوز لك أنا أبي أقابل العريس بنفسي وبأعطي كلمة في الموضوع!وانتي إذا بتظلين تلفين وتدورين فاطلعي من الموضوع كله!! أم رانية:تصطفل إنت وبنتك! وجمع أبورانية معلومات عن اسم العريس ومقر عمله من أم رانية.. وصباح الأربعاء قرر يزور ناصر شخصياً في العمل من غير مايكشف هويته له!!!!!!!! وكان ناصر يشتغل بشركة مقاولات وتخليص معاملات وتراخيص البناء.. وراح أبورانية كـ عميل يبغى استشارة!....وسولف مع ناصر شخصياً وارتاح له ولخفة دمه وبساطته... ولما رجع البيت نادى رانية..وكانت توها راجعة من المدرسة ولافتحت فمها بكلمة عند اسمهان وباقي الشلة عن طاري الخطبة!!!!!!!! أبو رانية:رانية؟ رانية:سَمْ يبه... أبورانية:تقدم لك عريس..وبغيت أعرف رأيك؟!! رانية:الأهم رايك إنت يبه.. أبورانية:الصراحة أنا أشوف إنه انسان مناسب..وإنك بنت مؤهلة للزواج..إلا إن كان لك رأي ثاني؟!! رانية:لا مالي رأي ثاني!!كل صاحباتي بيتزوجون ماعدا أنا!وِقْفَت علي عاد؟؟؟؟ أبورانية:هاهاها..ياحليلك..يازي ن الصراحة يابنتي!! أمها وهي واقفة وراها:إلا ياشين الشفاحة!! أبورانية:خلاص اتصلي بالجماعة وقولي لهم أبوها مستعد يقابل ولدكم وخلهم يشوفون يوم يناسب العريس يجيني فيه! أم رانية(بغيظ):آمــر!!! اتصلت أم رانية على أم تركي وقالت لها إنه أبورانية مستعد يقابل العريس..وتم تحديد يوم في الأسبوع اللي بعده..وراح ناصر لبيت رانية وكان قاعد يفكر طول الطريق: ياترى شلون بيكون أبوالعروسة؟ شايبٍ أقشر؟ولا قطعة سكر؟!!! ولما وصل للبيت استقبله أبورانية و(مشاري)أخو رانية الكبير.. وانصدم ناصر يوم شاف أبورانية!! وقال:مو إنت اللي...؟؟؟ أبو رانية:إيه أنا اللي!!! وتم اللقاء وكان لقاء حلو وبسيط وانبسط ناصر يوم لقى عائلة رانية تشابهه!!الأب والأخ كلهم راعيين وناسة وسعة صدر وارتاح لهم وارتاحوا له... وكلمهم عن نفسه بالتفصيل.. وعن رغبته بالزواج بعد 5شهور تقريباً مع ولد عمه(تركي) .. وبآخر اللقاء.. أبورانية:شوف ياناصر..حضور أخوانك الكبار معك المرة الجاية مهم لي..وبعدها نتفق على النظرة الشرعية..وعلى الملكة والزواج..وأهم شرط لي إن بنتي تظل ساكنة بجدة!مو تجيني بيوم من الأيام وتقول أنا قدمت على نقل!!!!!! ناصر:لا لا ان شاء الله..ماأرضى بغير جدة بديل..وأنا انولدت وقضيت عمري فيها..وبيتي اللي أنا عايش فيه مِلكي يعني لايمكن أفرِّط فيه بكل سهولة!! واستأذن ومشى... وكانت رانية فرحانة لأبعد مدى!! أما أمها فماهي راضية عن الموضوع تمام الرضى!!! ================ أما اسمهان فكانت يوم الأربعاء من نفس هالأسبوع معزومة عند زوجة صاحب عبدالرحمن ولأول مرة بتروح لها.. لما راحت للحرمة(وكان اسمها عزة) وبعد مااستقبلتها وسولفوا مع بعض.. عزة:ماشاء الله عليك يااسمهان بعدك صغيرة؟؟بصراحة توقعت عمرك 26 أو27 ماتخيلت أبداً إنك طالبة بالثانوية العامة!!!على كذا الفرق بينك وبين زوجك13 سنة تقريباً؟؟؟؟؟ اسمهان:إيه تقريباً! عزة:الله يعينك!!أنا زوجي أكبر مني بأربع سنوات بس والاختلافات بيننا هاالكثر!أجل شلون انتي؟؟ اسمهان(ببراءة):لا الحمدلله..إحنا مرة متفاهمين.. عزة:ياحبيبتي لأنك بعدك عروس وماصار لك من تزوجتي إلا شهور!اصبري لين تكتمل سنة وتشوفين بعينك شلون بينقلب عليك!!! اسمهان:طالما إني طيبة معاه اش اللي بيخليه ينقلب علي؟ عزة:الرِجال كذا هذا طبعهم!كل ماشافوا الوحدة طيبة وساكتة لهم ركبوا على راسها واستخذلوها!لكن المفروض تكونين ذكية من البداية وماتخلينه يمَشِّي كلامه عليك!!ولا انتي على بالك أخذ وحدة صغيرة ليش؟؟مو عشان يبرمجها على كيفه؟؟ اسمهان(وكأنها بدأت تقتنع بكلام عزة!):هو فعلاً من وقت ماتزوجته وهو يحاول يغير فيني أشياء كثيرة بس ماخطر ببالي لحظة إنه يسوي كذا من باب الاستخذال وعشان يركب على راسي!!! عزة:بكرة تقولين عزة قالت!!الواحد منهم يحب يسوي نفسه الناصح المخلص ويتفلسف عليك بكلمتين جابها من كتب!!على باله مثقف!عشان يحسسك إنك انسانة سطحية فاشلة وهو الوحيد اللي يفهم!بس الذكية هي اللي ماتترك له مجال وتفرض رأيها عليه بالطيب أو بالغصيب... اسمهان:سبحان الله كأنك تتكلمين عننا!! عزة:هذا عشان تعرفين إن الرِجال كلهم نسخة من بعض!! اسمهان:طيب عطيني من نصايحك دامك متزوجة من 9سنين!ترى أنا مالي خبرة بـ شي! عزة:لازم يحس إنك موب هينة!وكل شي تعرفينه!مو كل ماحاول يجيب لك سالفة تسوين نفسك مو فاهمة!ولازم تحسسينه إنك مثل ظِله وتراقبينه من قريب وبعيد عشان مايظن إنك غافلة وهبلة وتاركتله الحبل على الغارب!!وماتتركين له أي مجال يآمر وينهى عليك بالعكس! انتي اللي افرضي رأيك وشخصيتك عليه!!ولاتكلمينه عن أخبارك الخاصة خليك عالم من الغموض بالنسبة له مايدري عن ظاهرك من باطنك!! اسمهان(بشغف):وتحسين هالأشياء نجحت معاك؟؟؟ عزة:طبعاً ياحبيبتي!هالحين مايقدر يحط عينه بعيني!ويحسب لي ألف حساب! وبعد مامر وقت واكتملت دروس التحريش !!وانتهت الزيارة.. وفي السيارة... عبدالرحمن:هاه؟شلون لقيتي زوجة يوسف؟؟ اسمهان:طيبة مرة!! عبدالرحمن:غريـــــــــبة!طول الوقت كنت حاط يدي على قلبي ومتأكد إنها مابتعجبك!بس اضطريت أجيبك عندها عشان يوسف نشب بحلقي إلا ألَّبي دعوته!! اسمهان:وإنت اش دراك إنها مابتعجبني؟؟ عبدالرحمن:من كلام زوجها عنها!تصدقين من يوم ماعرفت يوسف وهو كل يوم والثاني متهاوش معاها وموديها لبيت أهلها!!مابينهم وفاق!حرمة تموت بالنكد بشكل غير طبيعي!! اسمهان:وليه مايكون هو اللي منكد عليها؟؟ عبدالرحمن:لا بالعكس يوسف طيب وابن حلال! اسمهان:طبعاً انتوا الرجال ماتشوفون عيوبكم وتحامون لبعض!ودايماً الحرمة هي السبب! عبدالرحمن:وانتي اشفيك معصبة؟هو لو انه انسان مافيه خير..كان رماها من أول مشكلة ببيت أهلها وطلقها وافتك منها!لكن الشي الوحيد اللي مخليه يستحملها.. عياله المساكين.وش ذنبهم؟؟ اسمهان:احترت مين أصدِّق!فُضها سيرة!!! ============= اليوم الثاني راحت اسمهان زواج بنت عمها نوف.. ويوم الجمعة كالعادة اجتمعت مع أهلها في غداء عائلي.. وراحت سماح وحكت لها عن خطبة رانية.... اسمهان:ومتى رحتوا لبيت رانية؟؟ سماح:الأسبوع اللي فات يوم الثلاثاء..وهذا الإثنين ناصر راح لهم بـ روحه... اسمهان:اعقبي يارانية النذلة!ولافتحت فمها لي بـ سيرة!مع إنها مو متعودة تخبي عني شي! سماح:بس ياليت يتم الموضوع على خير..الصراحة انذهلت يوم شفتها تغيرت بشكل غير طبيعي بس صراحة صايرة تههههههههبل! حتى أمي فشلتنا ماعرفتها قامت لبست النظارة ونادتها وتمقلت فيها زين بعدين تأكدت إنها هي!! اسمهان:هههه..فعلاً كلنا تفاجئنا يوم شفناها..ماتوقعنا هالاصرار كله..خاصة اننا تعودنا عليها من سنين وهي بـ ذا الوزن... أسماء:لينة تبكي ياسوسو تعالي إعطيها جرعة حنان! اسمهان:واااااااي ياناس..فديت عمرها هااللينة.. وشالتها اسمهان وضمتها بقوة.. أم اسمهان:ذكرتيني بالذي مضى يااسمهان!حملت فيك بعد انقطاع دام سنين..ويوم ولدتك كأني بكرية وأول مرة يصير عندي عيال!حبيتك وتعلقت فيك مرة وكنت كل يوم أضمك شوق بمثل ماضميتي لينة توِك..... اسمهان:يارب يرزقني بطفل يملى حياتي كلها فرح.. أسماء وسماح والأم:آميييين.. =============== راحت اسمهان السبت للمدرسة وبقرارة نفسها فكرت إنها ماتكلم رانية عن موضوع الخطبة لين مارانية تبدأ الأول!!! لكن رانية ماجابت خبر أحد! ومر الأسبوع بروتين غريب ولامن جديد... ونهاية الأسبوع راح ناصر مع اخوانه الكبار اللي حضروا من الشرقية لبيت أبورانية وتقدموا رسمي وتم تحديد يوم النظرة الشرعية الأسبوع اللي بعده..وعلى أساس ماراح يصير في النظرة ينبني عليه تحديد ملكة أو لا... =============== أما عبدالرحمن عرضت عليه قبل فترة إحدى الجرايد السعودية اللي تصدر بشكل يومي إنه يكتب بزاوية مخصصة فيها بعد ماشاهدوا الاقبال الكبير على مقالاته بالمدونة اللي في النت...ووافق وصار منهمك على طول بإعداد موضوعات ومقالات متنوعة يومياً.. وبيوم من الأيام...صاحت اسمهان:يوووووه عبدالرحمن!الصراحة هذي ماصارت عِيشة!كل يوم وانت تقضي ساعات بغرفة المكتب تخترع مقالات وأنا قاعدة بروحي أحاكي الجدران! عبدالرحمن:زين انزلي لأمي تونسي معاها شوي!! اسمهان:أنا متزوجتك إنت موب أمك!! عبدالرحمن:وش هاللهجة الله يهديك؟؟زين روحي اتصلي بأهلك بصديقاتك أو اقعدي على النت! اسمهان:ياسلااااااام!أقول لك مليت! عبدالرحمن:أجل اش تبين؟؟ اسمهان:أبي أطلع من البيت! عبدالرحمن:وين تبين تروحين؟؟ اسمهان:أي مكان..السوبر ماركت مثلاً..ناقصتني مقاضي للمطبخ! عبدالرحمن:خلاص..بإذن الله نص ساعة ونطلع..ارتحتي؟؟ وفرحت اسمهان وتجهزت وغيرت ملابسها ولبست عباتها وجلست تنتظر..وبعد ساعة دخلت عليه المكتب وعيونها تناقز شرار!! اسمهان(تصرخ):النص ساعة..صارت ســـــــــــاعة ياعبدالرحمن!وإنت باقي لازق بالكرسي؟؟؟؟؟ عبدالرحمن:ياالله..مر الوقت ماحسيت فيه.. وقام يلبس ..وطلعوا الاثنين وراحوا للسوبرماركت..وهم يتجولون ومعاهم عربيتهم ويشترون أغراض أقبلت عليهم بنت عشرينية ولابسة عباية مزركشة وطاقة بوجهها كيلو ميك أب!!وكاشفة وجهها وجزء من شعرها!! وقالت:إنت الأخ عبدالرحمن الفلاني؟؟؟ عبدالرحمن:إيه نعم! البنت:أنا من أشد المعجبين بكتاباتك الاجتماعية الدينية اللي في جريدة...!!.... عبدالرحمن:شكراً جزاك الله خير.. ورمت اسمهان من يدها الشوكولاتة اللي كانت تبي تحطها بالعربية وجت منطلقة على البنت ووقفت قدام البنت وقالت:نعم؟خير؟ البنت(باستغراب):أبداً كنت أتكلم عن اعجابي الشديد بمقالات كاتبنا الأخ عبدالرحمن! اسمهان:نعم يختي؟؟أقول روحي يالحلوة غطي وجهك واستري نفسك وبعدين تعالي تفلسفي! البنت:وي..ياأخ عبدالرحمن؟هادي زوجتك؟؟ عبدالرحمن(وهو منحرج):ايه نعم! البنت:والله ياحبيبتي المفروض تكوني متوقعة انو كاتب بحجم زوجك لازم يكون له معجبات كَتير! اسمهان:سألتك باللي خلقك؟انتي تفهمين كلمة من اللي تقرأينه؟والا المسألة عندك رزة وجه وبس؟يلا يلا عطينا مقفاك ودرب يسد مايرد!! وعبدالرحمن من الاحراج ماعرف اش يقول فقال للبنت:المعذرة ياأخت عن إذنك... وقامت البنت وعطت اسمهان تشميقة معتبرة ومشت وهي تقول لنفسها(معقولة المُسقَف الوسيم دا متجوز الغجرية دي؟؟؟) عبدالرحمن:وش هااللي سويتيه ذا؟فشلتينا قدام الناس؟؟ اسمهان:لا ياشيخ؟؟ناقص تحب إيدها بعد وتعتذر لها!! عبدالرحمن:مهما كان البنت ماغلطت جات تعبر عن مشاعرها! اسمهان:لا والله!وعادي عندك؟؟أجل حتى أنا بأروح للهندي اللي واقف يرص الكراتين هناك وأعبر له عن مشاعري واعجابي بإخلاصه في عمله!!!!!!! عبدالرحمن:أنا ماقصدت ان اللي سوته صحيح!بس هي من وجهة نظرها تشوفه شي عادي..كان طنشتيها ومر الموضوع بسلام! اسمهان:أقول الشرهة علي يوم طاوعتك تكتب مقالاتك بالجريدة!لو براسك عقل ماتحط صورتك فوق المقال!واش استفدنا من صورتك غير تجميع هالأشكال حولنا؟؟أتحداها فاهمة شي من مقالاتك..تلاقيها مايعجبها شي في مقالك الا صورتك اللي فرحان فيها ورازها فوق!!! عبدالرحمن:استغفر الله.. اسمهان:استغفر الله منك ومن فعايلك ..ومقاضي ماني شارية وبأرجع للسيارة! وراحت اسمهان تمشي بأسرع ماعندها خارج السوبر ماركت وعبدالرحمن يناديها ولاترد!! وقعدت تنتظره بالسيارة..وآثاريه ماجاء بسرعة قعد يحاسب عن الأغراض اللي بالعربية! ويوم زهقت اسمهان قامت تدندن بصوت عالي بالسيارة وتغني لأنها متطمنة انه ماحد سامعها وصارت تغني وتقول مَوَّال: ليش يادحومي ليش؟ ماصنت الملح والعيش تلتمـــــس عذر لــ صَبية ودي أنخش عينها تنخيش وآثاري الشباك الخلفي الجانبي اللي وراها مفتوح شوي!!وصوتها طالع برة!! وكان فيه شاب ماشي من جنب السيارة ودخل راسه من الشباك وصاح في اسمهان:إن أنكر الأصواتِ لـَصوت الحمير!!!هههههه وقامت اسمهان من الخرعة تبكي وشوي وجاء عبدالرحمن ولقيها تبكي بصوتها!! عبدالرحمن:لاحول ولاقوة إلا بالله..انتي باقي زعلانة؟؟؟ اسمهان(وهي تنوح):لاااا..بس اكتشفت إن صوتي ماهوب حلو!!!! مرت الأيام وجاء اليوم اللي رانية بتشوف فيه ناصر لأول مرة.. وراحت البنت وتأنتكت..وتضبطت وكان ناصر قاعد بالمجلس مع أبو رانية وأخوانها(مشاري)بالجامعة و(مشعل)بالمتوسط.. دخلت رانية بعد وقت من زيارة ناصر بالشاي.. رانية(بكل ثقة):السلام عليكم.. الجميع:وعليكم السلام.. وسرقت نظرة سريعةوناظرت بناصر و رخت عيونها بالأرض...وهي مبتسمة.. وناصر فاتح فمه من الذهول!!ويقول بنفسه(طول عمرك ياناصر منحوس!معقول هالمزيونة بتصير زوجتك؟؟أخاف غلطانين!!) مشاري(يستهبل):أقول رانية لفي يمين ثم لفي يسار..خلي العريس يناظر زين أخاف يحسبنا غاشينه ولا شي!!! الجميع:هههههههه طالعت رانية بمشاري ورفعت حاجبها!! وطال الصمت وناصر يطالع بتعجب أبورانية:إحم إحم!!ودك تسألها شي؟ ناصر(وهو مرتبك):ايه..شلونك؟؟ رانية(وهي مبتسمة):زينة.. ناصر:تدرسين؟؟ رانية:ايه بثالث ثانوي.. ناصر:خلاص! مشاري:علامك؟انتهى الاستجواب؟ ناصر يهمس لمشاري:ايه انتهى..قلبي يعورني! مشاري:انطلقي إلى المكان اللي أقبلتي منه يارنو! وخرجت وقاموا يضحكون... تذكر ناصر الإسورة الذهب اللي جابها بعلبة وقال لمشاري:نسيت أعطيها هديتها!! مشاري:رنو يارنو..تعالي خذي مكافأة من العريس!! أبورانية:الله يقطع ابليسك قوم إنت ودها لأختك! دخلت رانية لأمها وهي زعلانة.. أم رانية:خير ان شاء الله؟؟ رانية:ولدك الدب مشمش!ينكت علي هو ووجهه!هذي مو شوفة ذي مسخرة!مافي احترام ولاتقدير قدام الرجال الغريب!كأني جاية للعرض بس! أم رانية:أهم شي..ارتحتي له؟؟ رانية:ايه..حليو بس شكله مَخَفَة شوي!! أم رانية:مثل أبوك ولا أزود؟!! رانية:ههههههه..حرام عليك يمه..أبوي خفيف دم..بس هالعريس شكله مسيكين وعلى نياته.. أم رانية:يلا..الله يهني سعيد بسعيدة.. وجاء مشاري وناولها الهدية.. رانية:يمه اش رايك؟حلوة الإسوَرة؟ أم رانية:حلوة مابها شي!! رانية:يمه اشفيك تكلميني بجفاء؟ كأنك مو فرحانة؟!! أم رانية:ماعليك مني..أهم شي أبوك يفرح!! وقبل مايروح ناصر اتفق مع الأب على موعد الملكة انه بعد شهر.. ورجع ناصر بيت تركي وفتحت له أم تركي ودخل..وسأل عن تركي أم تركي:أرسلته يجيب لي أغراض من البقالة..شوي ويرجع..بس إنت بشرني..اش اللي صار معك؟؟ ناصر:العروسة تهبل ياعمتي وذوقك لايعلى عليه..بس ماأبيها! أم تركي:وليش عاد؟؟ ناصر:عندي طموح بوحدة أجمل! أم تركي:ومن حلاتك عاد يوم تبي وحدة أجمل؟؟إنت طالع بعصاقيلك وتحمد الله على ماابتلاك!!والله إن رانية تخب عليك! ناصر:وانتي ليش زعلانة؟بنتك هي ولا بنت الناس؟؟ أم تركي:زعلانة ليش إنك لعَّاب!وماعندك نية تتزوج بس قاعد تضيع وقتنا على الفاضي..روح باللي مايحفظك!! إلا تركي راجع من برة ومعاه الأغراض..حطها بالمطبخ وقامت الشغالة ترتبهم ورجع المجلس وسلم على ناصر..ولاحظ إن أمه متضايقة.. تركي:يمه؟عسى ماشر؟ليش زعلانة؟؟ أم تركي:اسأل المقرود اللي جنبك؟؟ تركي:خير يانويصر؟ليش مزعل الوالدة؟؟ ناصر:مدري عن أمك..جيت أبشرها إن العروس معجبتني والملكة بعد شهر و هبَّت فيني وهاوشتني!! تركي:صحيح؟؟مبروك مبروك.. أخيراً نويت تعقل وتركد وتنثبر ببيتك ويصير لك زوجة؟؟؟صدق إننا في عصر العجايب!! أم تركي:أنا يالكذاب هاوشتك على تبشيرك لي؟؟مو إنت كذبت علي قبل شوي وقلت إنك تبي وحدة أحلى؟؟ ناصر:استغفري ربك ياعمة ماحصل!!! أم تركي:تبيني أقوم عليك هالحين وأخنقك بشيلتي يالخراط؟!! تركي:يمه لاتقهرين نفسك عليه..تراه من كثر مايكذب ينسى!ومابين كل كذبة وكذبة يألف عشر كذبات ثانية!! أم تركي:أقول أنا بأروح أرتب الأغراض بالمطبخ وإنت تهنى بـ رفاقة مسيلمة الكذاب!!! تركي:هاه يامسيلمة!يووه أقصد يانصور..مادام الملكة بعد شهر فالمفروض نبدأ من هالحين ناخذ الأمر جد ونحجز قصر ونرتب أوضاعنا.. ناصر:أنا حاط عيني على استراحة الزنبقة اللي بالحي اللي ورانا تنفع للمناسبات.. والعشا نجيب هندي يطبخ لنا قدر مندي بحوش الاستراحة!! اش رايك؟؟ تركي:ايـــــــــــش؟؟صدق إنك ثور!هالحين زواجي الأول سويته بقاعة ليلتي وتكلفت فيه!وتبيني الحين أقط معك عشان أتزوج باستراحة؟صدق إنك وجه فقر! ناصر:ياشيخ يازين التوفير..وش لك بالتبذير والسرف!افرض بكرة بنت الناس طلعت رفلة وماتسوى..تبيني أقعد أتحسر على كل قرش دفعته فيها؟؟؟؟ تركي:يــــــــــــــــــــــــ ـــمه!! أم تركي:ياااااااااانعم.. تركي:جيبي شيلتك وتعالي!!!ناصر:لاااااااااا أمزح صدقوني أمزح! مرت أيام وبدأ أسبوع دراسي جديد في نهايته كانت ملكة مشاعل خالة أفنان على عبدالمجيد أخو عبدالرحمن... ومشاعل مجتهدة تداوم يومياً في المعهد.. ويوم الاثنين قالت لها زميلتها(شروق) الموظفة معاها بنفس المعهد...معهد الصم والبكم.. شروق:مشاعل؟انتي مو هذا الخميس بتملكين؟؟ مشاعل:ايه هذا الخميس.. شروق:طيب ليش ماتاخذين لك اجازة هاليومين؟؟ مشاعل:وش حقه الاجازة؟أنا بأملك بس ..مو أتزوج! شروق:غريبة انتي!العروس أقل شي يبي لها يومين تستعد فيها وترتاح.. مشاعل:صدقيني..أنا قمة ارتياحي وانبساطي أحس فيها لما أكون بين طالبات هالمعهد.ماأتصور اني بآخذ اجازة الثلاثاء والأربعاء وعقبها خميس وجمعة وبعدين أشوفهم!! شروق:ماشاء الله عليك..أما أنا أعد الأيام عد عشان تقبل علي الاجازة..مشاعل؟؟ مشاعل:هلا.. شروق:بأسألك سؤال غثيث شوي..ممكن؟؟ مشاعل:عادي ياقلبي..اسألي.. أنا تعودت على غثاثتك!! شروق:انتي لما وافقتي على هالمعرس..وافقتي عشان أهله أغنياء ومن عائلة معروفة؟؟ ولا عشان تقدم بك العمر وكل زميلاتك تزوجوا الا انتي؟؟ولا شفقانة عليه؟؟ مشاعل:ولا سبب من الأسباب اللي ذكرتيها!!وافقت عليه لأني ارتحت له..ومانظرت له مثل ماغيري من الناس ينظر له!إن كان أصم وأخرس فهذا شي مو بيده ولايقلل من شانه ومن حقه ياخذ فرصته ويعيش مثله مثل غيره.. شروق:بس انتي مافكرتي يامشاعل شلون بكرة بتتعاملين معاه؟يعني مثلاً..أبسط مثال:فترة الخطوبة اللي تعتبر من أحلى الفترات..وشلون بتتواصلين معاه وهو مايقدر يسمعك أو يكلمك بالتلفون؟؟ مشاعل:صدقيني الدنيا ماقامت وقعدت عشان التليفون..ولاقد فكرت في اللي تقولينه.. شروق:طيب حياتكم اليومية بعدين شلون بيكون تعاملك معاه؟ مشاعل:انتي ليش مستصعبة الموضوع وهو ماله علاقة فيك وأنا اللي أعتبر صاحبة الشان مافكرت في أي صعوبة؟!!بعدين أنا لي سنين وأنا أشتغل وأتعامل مع الصم والبكم لين ماكسرت كل الحواجز اللي بيني وبينهم..عشان كذا ماأتخيل انه حياتي معاه بتكون صعبة مثل ماانتي متخيلة!! شروق:مبروك ياقمر..والله يهنيكم ببعض ويوفقكم.. ================= وبنهاية الأسبوع يوم الأربعاء خرجت مشاعل بدري من المعهد وبدأت استعداداتها للملكة.. يوم الخميس كانت ملكتها ملكة بسيطة في استراحة مناسبات وحضرت اسمهان وأم عبدالرحمن اللي كانوا لهم مدة ينزلون الأسواق عشان يجيبون عربية الملكة وملحقاتها من ذهب وبخور وعطورات وتحف وشمعدانات وتغليف في محل خاص وتزيين وتشريع.. ماحضر من الشلة إلا أفنان واسمهان ورانية..أما مرام ونجلاء لا!!! نجلاء باعتبار انه عبدالمجيد خطبها من قبل فشافت انه حضورها ماله داعي أبد!! ومرام لأنه أهل عريسها موجودين وهم أهل عريس مشاعل..فما وافقوا أهلها انها تروح! وحضرت جوهرة خالة العريس وأم اسمهان فقط..وعمات العريس وأهل أبوه وبعض الأقارب واستانس الجميع.. وقامت اسمهان قعدت على طاولة مع رانية وأفنان... ولما رجعت لطاولة أهل العريس وأمها..همست في إذنها أم عبدالرحمن:مين هذيك البنت اللي لابسة فستان موف وجالسة معاكِ؟؟ اسمهان:ههههه..أكيد ماعرفتيها! أم عبدالرحمن:لا ماعرفتها بس كأني مشبهة عليها!! اسمهان:هذيك رانية ياخالتي.. أم عبدالرحمن:مو معقول!!سبحان من يغير ولا يتغير!! ورجعت اسمهان للطاولة وجلست مع رانية.. اسمهان:مبروك ياعروسة..ولو اني كنت أتمنى تبشريني بنفسك!! رانية:مايحتاج أقول لك والعريس جاي من طرفك!! اسمهان:جاي من طرفي؟؟وأنا اش لي علاقة بالموضوع؟؟أساساً عمري مارشحتك لأحد!أنا شخصياً تفاجئت لما قالت لي سماح إنهم يبونك لولد عمهم..ناصر..!! رانية(بانفعال):وليش عيوني عمرك مارشحتيني لأحد؟؟ناقصة إذن ولا عين؟؟ ولا اجتهادك حاطته بأفراد الشلة تكافحين العنوسة فيهم وتاركة أعز وحدة عندك منهم ماتعطينها وجه؟! اسمهان:هههههه وش هالهرج ياحقودة..الحمدلله باقي بدررررري عليهم من العنوسة!وصدقيني ماقد تدخلت في خطبة وحدة منهم.. أهالي العرسان كانوا يختارون ويطلبون مني الرقم فقط! رانية:وأنا ماحد فكر فيني إلا عقب مانحفت!!آثاريني كنت أفَشِّل؟؟ اسمهان:لا ياحلوة..تدرين انهم كانوا حاطين عينهم عليك من يوم شافوك في المستشفى بولادة أسماء؟؟وكنتي دبدوبة!بس خدمتك النحافة إنها حلتِّك بعيونهم زيادة!الا اش رايك في العريس؟؟ رانية:لا ملكت علمتك!! اسمهان:ومتى الملكة ان شاء الله عقب شهر؟؟ رانية:راح من الشهر أسبوع وباقي ثلاث..والله يعين.. اسمهان:ماشاء الله محد قدي كل الفترة الجاية مناسبات!انتي ملكتك عقب 3أسابيع ومرام عقب شهر وأيام..وبعطلة الصيف زواج مشاعل ومرام بليلة وحدة..وبعدهم بأسبوعين ملكة أفنان وعقب ملكتها بكم يوم بيكون زواجها معاك بنفس الليلة!!! رانية:ياحليلها نجلاء..زواجها بعد سنتين!! اسمهان:بس ماتصدقين وش كثرفرحتي!زواجكم راح يقربنا من بعض..وخصوصاً انه مافي أحد مننا بيروح بلد ثاني ويبتعد.. وشوي كانت الزفة وبعدها طلعوا أهل العريس يسلمون على مشاعل.. وتوجهوا بعد السوالف لصالة العشا.. أما مشاعل دخلت على عبدالمجيد ومع انها كانت انسانة عادية جداً في جمالها وملامحها بس انجذب لها عبدالمجيد بشكل شديد ولمس فيها الذوق والعقل والرزانة.. ولما طلع الجميع من الغرفة وصاروا لحالهم..أعطاها عبدالمجيد لوحة صغيرة بحجم برواز راسمها بالألوان الزيتية وكاتب فيها أبيات شعر..سألته مشاعل بلغة الاشارة:انت راسمها؟؟ عبدالمجيد رد بلغة الاشارة:ايه وكاتب الأبيات! مشاعل:ماشاء الله ترسم وتكتب شعر؟؟ عبدالمجيد(بتواضع)وبحركات الاشارة:شوي!! وظل يحكي لها عن نفسه بلغة الاشارة وهو فرحان وهي تتابعه بصمت وتتأمل فيه وبمعنوياته المرتفعة ونفسيته الشفافة البريئة وتتذكر كل أطفال الاعاقات المختلفة اللي واجهتهم بحياتها وكيف دايماً كانت تردد بينها وبين نفسها(سبحان الله..جنتهم بصدورهم)!! دايماً بريئين وسعيدين..وينشرون البهجة للي حولهم.. وحست مشاعل انه ارتباطها بعبدالمجيد أول خطوة صح تتخذها بحياتها وحست انها مو ندمانة على قرارها أبداً على رغم اعتراض كثير من أقاربها على هالزواج الغير متكافيء!!! وأولهم أمها اللي دمعتها مافارقت خدها طول الملكة!! في الرياض كانت عبير جالسة بالبيت ودق الجرس وراحت تفتح الباب..وكان الحاضر أبوها.. سلمت عليه وحضنته بشوق.. عبير:الحمدلله على السلامة يبه.. الأب:الله يسلمك يابنتي... دخل المجلس..وسألها:وين أخوانك؟؟ عبير:راحوا السوبرماركت مع أمي يجيبون أغراض.. الأب:مين وداهم؟؟ عبير:سواق خالي.. الأب:طيب ليش مارحتي معاهم؟ عبير:عندي اختبار انجليزي بكرة .. الأب:الله يوفقك يابنتي.. شدي حيلك..نبيك تجيبين نسبة عالية عشان تدخلين قسم زين بالجامعة.. وبدأ يسولف معاها بمواضيع مختلفة..... الأب:اسمعي يابنتي مابقى على اجازة الصيف كثير..وأنا فكرت بما إني مسافر للعمل بمصر ولبنان اني آخذك انتي واخوانك تقضون معي الاجازة! عبير(بفرح):صدق يبه؟عسى الله لايحرمنا منك.. الأب:أتا داري زين اني دايم مقصر معاكم ومشغول على طول عشان كذا فكرت أضرب عصفورين بحجر منها أسافر أكمل أشغالي ومنها تتسلون بإجازتكم.. عبير:يبه؟أنا عندي موضوع أفكر فيه من مدة ونفسي أكلمك فيه! الأب:خير ياعبير؟قولي.. عبير:يبه مادام ودك تاخذنا لـ لبنان فليش ماأحاول أعيد تجربة عملية التجميل؟؟ الأب:ياليت إنك تحاولين لكن أدري طول ماأمك وراك مابتستمرين كالعادة!! عبير:لا أنا هالمرة معزمة إذا انت وافقت.. الأب:ماعندي أي مانع..أنا ودي أشوفك اليوم قبل بكرة سليمة ومتعافية مثل أي بنت..وبالإجازة نعرض تقاريرك السابقة على أحسن طبيب تجميل بلبنان.. عبير:بس يبه أنا عندي طلب ثاني! الأب:آمري.. عبير:إن أمي ترافقني! الأب:هذا المستحيل بعينه!تبين أحد يرافق معاك بالمستشفى فأنا أقترح تاخذين معاك وحدة من بنات أعمامك أو عمتك(منيرة) هذي هي أرملة وماعندها عيال ولاأحد يربطها وأنا متأكد إنها ماراح ترفض وتتمنى تخدمنا بعيونها.. عبير(بلهجة خاضعة):مثل ماتبي يبه! ================== ومرت الأيام تلو الأيام..وكانوا جوهرة واسمهان وأحلام مجتمعين ببيت أم عبدالرحمن وبعد السواليف .. جوهرة:ودي أبشركم بخبر..بس عطوني هدية البشارة بالأول! أم عبدالرحمن:صار! بس وشهو الخبر؟؟؟ جوهرة:زوجي لقي عمل.. الجميع:مبرررررررررروك جوهرة:والخبر الثاني إني...... حـــــــــــــــــــــــــــــ ــــــامل!!!!! قامت أم عبدالرحمن وحضنت أختها جوهرة والدموع مالية عيونها وقالت:مبروك يالغالية..مِن صبر ظَفَر.. أما اسمهان غصب عنها تلاشت ابتسامتها وصارت حزينة على تأخرها بالحمل!! وباركت أحلام لخالتها وقالت:الحمدلله ياخالتي اللي فرجها عليك وعلى زوجك.. جوهرة:الحمدلله..عقبال مانفرح بعيال عبدالرحمن واسمهان! أم عبدالرحمن:آمين يارب.. وبعد ماانتهت الزيارة رجعت اسمهان لبيتها وكان التليفون يرن وراحت ترد..وكانت المتصلة(عزة)زوجة صاحب عبدالرحمن.. بعد السلام والمقدمات المعهودة.. عزة:وش قاعدة تسوين؟عساك مشغولة؟ اسمهان:لا توي راجعة من عند أهل زوجي.. عزة:يعني مشغولة ولا فاضية؟ اسمهان:الصراحة نص ونص!عندي الحين كوي متجمع له كم يوم وودي أكويه قبل لايجي عبدالرحمن.. عزة(بخباثة):خلي شغالتك تكويه! اسمهان:بس أنا ماعندي شغالة! عزة:أفا هذا وعبدالرحمن مقتدر مالياً بخلان عليك؟؟ اسمهان:لا مو بخلان..بس أنا عمري ماطلبته.. عزة:وليه ياحبيبتي ماتطلبين؟انتي ناسية انك بنت عِز؟يعني الشغل مو للي مثلك!وغير كذا انتي وراك تخرج ولازم تجيبين نسبة عالية فالمفروض يكون عندك شغالة! اسمهان:مرات لما يكون عندي شغل أطلب شغالة خالتي وماتقصر تطلعها لي تساعدني! عزة:حبيبتي اسأليني أنا عن أهل الزوج!لأنك عروس بتجاملك ..بس بكرة بتهاوشك وتقول وش هالرفالة اشتغلي بنفسك!ولا يمكن يوصلك كلام ينقال ورا ظهرك إنه ماينظف بيتك إلا بشغالتها!! اسمهان:هههه لا ماأتصور خالتي تحبني..و طيبة! عزة:والله انتي اللي طيبة!هذا لأنك لحالك..بس بكرة يتزوجون عيالها تسيرين قديمة بنظرها ولاعاد تواطنك وتفرق بينك وبينهم! اسمهان:لاتخوفيني! عزة:شوفي..إذا زوجك فعلاً يحبك ويبي مصلحتك فلازم تخلينه يجيب لك شغالة!!إلا إن كان قاصد يخليك تشتغلين بالبيت عشان تضيعين دراستك؟!!لأن الرجال أعرفهم يحبون المره الضعيفة اللي مابيدها شهادة!وبتفيدك الشغالة إنك تقضين مع زوجك أطول وقت ممكن! وهكذا استمرت عزة توسوس لاسمهان وهي منصتة باهتمام.. طبعاً بعد ماانتهت مكالمة اسمهان مع عزة بـ شوي..رجع عبدالرحمن.. دخل البيت وسلم.. ولقي اسمهان جالسة ومتضايقة.. عبدالرحمن:كيف كانت جلستكم اليوم مع خالتي؟؟ اسمهان:ماشي الحال.. عبدالرحمن:حسافة ليتني لحقت عليها زمان عن أخبارها.. اسمهان:مافي جديد غير ان زوجها توظف..وهي.........حامل!!!! عبدالرحمن(بفرحة):لااااا مو معقول!وش هالأخبار الحلوة..الله يسعدهم ويوفقهم ان شاء الله..بإذن الله بكرة بأمر عليها أبارك لها بنفسي.. اسمهان:عبدالرحمن من غير مقدمات أنا أبي شغالة!! عبدالرحمن:ليش؟؟ اسمهان:من غير ليش!ماشاء الله ظروفك المادية ممتازة ومو قاصرك شي! عبدالرحمن:وعشان مو قاصرني شي لازم اخترع لي شي أضيع فلوسي عليه؟؟؟؟ اسمهان:الشغالة مو خسارة فيني! عبدالرحمن:مو لما نكون محتاجين لها بالأساس؟!وبعدين شغالة أمي تحت أمرك بأي وقت.. اسمهان:شغالة أمك..يعني شغالتها هي مو شغالتي أنا ..وماهي مكلفة تشتغل ببيتين! عبدالرحمن:أنا أبي أسألك:هل حصل وتعبتك بشغل البيت؟أو ضغطت عليك؟ أنا حتى أغلب الأحيان أجيب لك غدا من برة عشان لاتتعبين نفسك وتطبخين! وثيابي أغسلهم وأكويهم برة!!وبعدين من كثر ضيوفنا إحنا يوم نجيب لأنفسنا شغالة؟؟ وحتى مجالسنا دايم مقفولة..مانستخدم من البيت إلا الصالة والمطبخ وغرفة النوم وحمام واحد بس..وشغلها مقدور عليه.إذن وين المشكلة؟؟؟ اسمهان:أنا وراي دراسة وماني فاضية لشغل البيت! عبدالرحمن:طيب انتي من الترم الأول وانتي وراك دراسة وتدرسين وتشتغلين بالبيت..اش اللي تغير؟ اسمهان:خلاص عاد لاتناقشني! عبدالرحمن:مو يااسمهان ياعزيزتي الانسان المفروض مايبحث إلا عن الشيء اللي يكون محتاجه فعلاً بحياته..مثل ماأنا كنت محتاج لوجودك بحياتي وظليت أبحث عن ضالتي إلى أن وجدتها!! اسمهان:جينا للفلسفة والكلام اللي مايوكل خبز!أبـــــــــــــــــي شغــــــــــــــــــــــــــــ ـــــــالة!! عبدالرحمن:ترى بتجيك تكتم على أنفاسك لاتقدرين تلبسين براحتك ولاتقدرين تقعدين معي براحتك قدامها..وكل ماجينا طالعين مكان نتمشى لازم نوديها لأمي..وهذا إن كانت أمي موجودة..مو بعيدة يكون عندها خرجة وماخذة شغالتها معها!! اسمهان:ياحبك في تكبير المواضيع!! عبدالرحمن:شوفي أنا ممكن أنفذ طلبك..بس ماني جايب شغالة عن طريق مكتب استقدام لأنه مافي حاجة لها أصلاً..ولاعندنا أطفال أوالبيت يحتاج تنظيف باستمرار..بس ممكن أجيب لك شغالة من هنا وتشتغل بالساعة وبعدها تقضب الباب!! اسمهان:ماعندي مانع! ================ ثاني يوم لما راح عبدالرحمن للعمل حكى لصاحبه عن رغبته بتوظيف شغالة عنده... وقال له صاحبه:أنا جايب شغالة أريترية..تشتغل عندي بالساعة لأن زوجتي حامل..فتتساعد معاها لكن ماتبات عندنا..بس ممكن أخلي زوجتي تكلمها وتدور لك عن وحدة من جماعتها تشتغل عندك! عبدالرحمن:ايه تكفى اهتم لي بالموضوع.. وبالفعل كلها يومين وجات شغالة جديدة لبيت اسمهان وإسمها(حليمة).. قالت اسمهان:وااااااي حسبتها أندونيسية! عبدالرحمن:وخير يعني لاطلعت من جنسية ثانية؟كلهم مخاليق الله.. وأخذتها اسمهان وقامت تعلمها بمكان الأشياء وكيف تشتغل ومتى تجي ومتى تروح.. واتصلت اسمهان بـ عزة تبشرها!! اسمهان:أبشرك ياعزة جبت شغالة!!! عزة:بهذي السرعة؟؟؟ اسمهان:ايه..الحمدلله انه وافق! عزة:أكيد جبتي من شغالات بقايا العمرة هذول؟؟ اسمهان:هي تقول إن لها 20 سنة بالسعودية وأهلها كلهم ساكنين هنا بـ جدة.. عزة:وليه مااستقدمتي أحسن؟ اسمهان:ياشيخة زين منه رضى..ومسألة الاستقدام تطوِل! وبعد ماانتهت السوالف قفلت اسمهان السماعة وهي فرحانة بالشغالة الجديدة! ============ ومرت الأيام ولاحظت أم عبدالرحمن انه فيه شغالة تتردد يومياً على بيت عبدالرحمن.. وسألت عبدالرحمن وكان قاعد يتقهوى معاها:عبدالرحمن؟انت جبت شغالة؟؟؟؟ عبدالرحمن:ايه..جبت.. أم عبدالرحمن:ليه؟بشِر..اسمهان حامل؟؟؟ عبدالرحمن:لا مو حامل..بس مو قادرة توفق بين الدراسة والبيت! أم عبدالرحمن:صدقني لو إنها تطلب شغالتي يومياً ماكنت بأرفض..وغير كذا هذول اللي ماعندهم اقامة يخوفون ياولدي..بكرة لو تسوي لكم مصيبة من وين تقدرون تحصلونها وتجيبونها؟؟! عبدالرحمن:الله يكفينا شرهم..بس باين عليها طيبة بحسب كلام اسمهان.. مرت الأيام واسمهان مشغولة بدراستها وشاع خبر خطبة رانية بين الشلة وتلقت التهاني.. نجلاء:ماشاء الله زواج اسمهان كان فاتحة خير علينا..انفرطت السلسلة بعدها وكل يوم ووحدة مخطوبة مننا... مرام:طبعاً إحنا مميزات وجميلات عشان كذا حظنا فوق!! أفنان:لا ياقلبي لامميزات ولاشي!يعني بنات خلق الله اللي تارسين البيوت وماجاء نصيبهم كلهم قبيحات ومافيهم ميزات؟؟ الا ظلمتيهم بكلامك..المسألة مسألة حظ ونصيب..وماحد ياخذ الا اللي مقسوم له.. مرام:ماقصدت أظلم أحد..بس إحنا فعلاً مميزات وماينقصنا شي!! رانية: وبالله في ايش مميزات ولاينقصنا شي؟علمينا ياملكة جمال الشرق الأوسط!! مرام:وانتم ليش محقرين أعماركم؟أنا عن نفسي أحس إنه فيني جاذبية!مو غرور..بس فعلاً أحس اني انسانة غير عادية!!! الشلة:ههههههههه رانية:أقول ياشين السرج على البقر!! مرام:أنا بقرة؟؟نسيتي وش كنتي انتي من قبل؟؟أشوى إنك لحقتي على نفسك وصرتي أنثى أخيراً!! رانية:أفا..مصدقة نفسها كوافيرة الهوانم!! اسمهان:بسكم عاد!بتقلبونها مصارعة؟؟عاد أبلة جوهرة فرحانة هذي السنة..تقول إنها أحسن سنة مرت عليها من 3سنين!! نجلاء:ليش؟ اسمهان:لأنها افتكت من مشاكلنا!تقول الحمدلله إن عُقَدكم انفكت بعد ماانخطبتوا..جعلكم بالعرسان اللي يأدبونكم ويمشونكم على الصراط!!! =============== وكانت حليمة شغالة اسمهان مجتهدة بشغل البيت تجي يومياً من العصر وتروح بعد العشاء.. لكن عبدالرحمن صار مايرتاح بقعدته في الصالة أثناء وجود الشغالة وصار أغلب وقته يجلسه بالمكتب وتروح له اسمهان.. وبيوم سوت له اسمهان شاي وكيك..ودخلت عنده المكتب وهو قاعد على الكومبيوتر.. اسمهان:بالله فكني من مقالاتك وخل نجلس ندردش أحسن! عبدالرحمن:طيب اش رايك نختار لعبة من ألعاب الكومبيوتر ونلعب سوى ونشوف مين فينا يفوز؟؟ اسمهان:هيا.. واختاروا لعبة الذاكرة اللي تعرض مجموعة كبيرة من الصور ثم تخفيها واللي يحاول يجمع أكبر كمية صور هو الفايز...وألعاب كثيرة ثانية.. إلا الشغالة دقت الباب.. خرجت اسمهان لها وقالت:نعم ياحليمة؟وش تبين؟ حليمة:التيليفون يرن يامدام.. راحت اسمهان ترد وطلعت المتصلة عزة!!! وبعد التحية والسلام.. عزة:لايكون تذاكرين؟؟ اسمهان(على نياتها):لا جالسة مع زوجي نلعب على الكومبيوتر!! عزة:ياحليله..شكل زوجك من جد مصدق إنك بزرة!!هههههه قال نلعب قال!! اسمهان:واش علاقة بزرة بالموضوع؟حلو ان الواحد يرفه عن نفسه بالألعاب.. عزة:وهو الترفيه يكون بشوية ألعاب على الكومبيوتر؟..اطلعوا تمشوا...اخرجوا!! اسمهان:لا من هذي الناحية زوجي مو مقصر..وماأتوقع فيه أحد يخرج مثلنا..حتى بوسط الأسبوع أيام الدراسة صرت أطلع معاه لو ماكان عنده شفت مسائي! عزة:ووين تروحون؟ اسمهان:البحر..مولات..مطاعم... فنادق.. زيارات..مناسبات..يعني مانخلي على قلبنا شي! عزة:ياحظك!ليتني مثلك!لكن زوجي رابطني بالبزورة!وخرجاتي صايرة قليلة! اسمهان:يمكن لو كان عندي أطفال ماكنت أفكر أطلع كثير من البيت..الجلسة معاهم تونِس! عزة:انتي لين الحين ماحملتي؟؟ اسمهان:لا.. عزة:غريبة!!مع انه صار لك 9شهور متزوجة صح؟؟ اسمهان:تقريباً.. عزة:وزوجك مااستغرب؟؟ اسمهان:بالعكس مو مهتم إلا بدراستي..يقول بعد التخرج نفكر بالموضوع.. عزة:يعني تاخذين موانع؟ اسمهان:ولا قد أخذت شي..ومرة رحت المستشفى مع زوجة أخوي لأنها حامل وفحصتني الدكتورة وقالت كل شي طبيعي.. عزة:وزوجك عمره حلَّل؟؟ اسمهان:لا ماقد حلَّل.. عزة:ولا بيحلل ياشاطرة..لأنه يخاف يطلع فيه بلا وماتتحملينه!لكن انتي انتظري لك كم شهر ولو ماحصل حمل خليه يحلل غصب عليه!أكيد البلا منه! اسمهان:فاولي خير..ان شاء الله مايكون فيني وفيه إلا العافية.. عزة:طيب جربي تقولين له يروح يكشف على نفسه وشوفي اش بيكون رده؟؟ وبعد مااستمرت المكالمة وانتهت. قالت عزة لنفسها:قطيعة!شلون مستانسة بحياتها بالطول والعرض!وأنا مسجونة في ذا القفص..مع زوج كل يوم يقول لي تراني صابر عليك عشان لاينحرمون عيالك منك!!!! ========= أما اسمهان راحت لزوجها وفاجئته بسؤال:عبدالرحمن؟ليش ماتكشف على نفسك عند دكتور؟ عبدالرحمن:بسم الله علي.. شايفتني مريض؟؟ اسمهان:يمكن!إنت مو ملاحظ اني إلى الان ماحملت؟؟ عبدالرحمن:ردينا على نفس الموضوع؟انتي ماتملين؟ يابنت الحلال فكري حالياً بدراستك وبعدها يصير خير!وبعدين مين كنتي تكلمين؟؟ اسمهان:صديقتي!! |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
راحت اسمهان السوق يوم الأربعاء تشتري خامات التوزيعات اللي بتسويها لرانية.. وبعد ماانتهت راحت للمستشفى تزور بنت عمها اللي مسوية عملية الزايدة وقابلت بعض أقارب أبوها اللي لهم مدة ماشافوها.. زوجة عمها:هاه؟بشري!إن شاء الله في الكرشة شي؟؟ اسمهان:لا مافي.. زوجة عمها: غريببببة!!مها وابتهال تزوجوا بعدك والحين كلهم حوامل! اسمهان:لأنه مقدَّر لهم يحملون..و ماحد ياخِذ أكثر من نصيبه. وحاولت اسمهان تغير الموضوع وجابت لهم طاري الشغالة اللي سرقت ذهبها والشغالة الثانية اللي سرقت جوال ولاب توب زوجة صاحب زوجها... بنت عمها:الحمدلله إن ذهبك رجع لك..والحرمة اللي انسرق جوالها وكومبيوترها زين اللي عدَّت على كذا غيرها انسرقوا عياله!! وحدة من زوجات أعمام اسمهان:أما هذول الشغالات صرنا نسمع عنهم قصص تشيب الراس..تصدقون إن بعضهم يسرقون الأطفال من يوم هم صغار ويضمونهم لعصابات ويعلمونهم الشحاتة والسرقة!!ومو بس كذا ياخذون الطفل ويشوهونه يا يفقعون عينه يايقطعون ايده أو رجله عشان يشحت ويستدر عطف الناس ويعطونه فلوس!! الزوار:أعوذ بالله.. وحدة من الزوار:غير انهم يحبون الانتقام ويرتكبون جرايم القتل البشعة... وحدة ثانية من بنات عم اسمهان:هذا غير السحر اللي يسوونه الله يكفينا شرهم ..تصدقون صاحبتي لها سنين تعاني من السحر والسِبَة شغالتها..سحرتها بعد مارجعت لبلدها..حقودات حيل أعوذ بالله منهم.. وحدة من الزوار:وأما عن الدعارة والتحرش بالأطفال فحدِّث ولاحرج!! بنت عم اسمهان:لا والمشكلة الوحدة فيهم تجي من بلدها بسجادتها وشرشف صلاتها ينقال وش ذا الالتزام!وتشوفين أفعالها بعدين وتتعجبين! زوجة عم اسمهان:أتوقع والله أعلم إنهم يؤدون الصلاة كعادة مو عبادة!! وحدة من الزوار:إلا عشان هم قاعدين بغربة يستحلون الحرام ولايهمهم!!! بنت عمة اسمهان:أنا الصراحة أشوف إنه المفروض ماحد يستقدمهم إلا اللي محتاج لهم ضروري وعنده ظروف خاصة!لأنه الدارج هاليومين للأسف إنه بعض الناس يجيبونها كمظهر اجتماعي وكماليات! وحدة من الزوار:واللي شغل بيتها كثير ومافيها نشاط تشتغل اش تسوي؟؟؟؟ بنت عمة اسمهان:تسوي مثل ماقال الرسول(صلى الله عليه وسلم)لبنته فاطمة..قبل ماتأوي الوحدة لفراشها تسبح الله ثلاث وثلاثين مرة وتحمد الله ثلاث وثلاثين مرة وتكبر ثلاث وثلاثين مرة خير لها من خادم..وكثير من اللي جربوها قالوا نصحى اليوم الثاني وإحنا نحس بنشاط!!!!!!!! وحدة من الزوار:بس الظليمة شينة..أنا أمي عندها شغالة لها 9سنوات تشتغل وقمة في الإخلاص..وشغالتي لها أربع سنين عندي كل ماجت بتسافر قعدت تبكي علينا كأننا أهلها!!! وحدة من أقارب اسمهان:الخير والشر بكل مكان و فيه منهم الصالح والطالح.. واستمرت السواليف إلى ان انتهت الزيارة.. ثاني يوم راحت اسمهان لنجلاء وبدأوا في تغليف الأشرطة والمطويات اللي أخذتها اسمهان من أفنان في المدرسة.. وكان بـ كل توزيعة كاسيت و3 مطويات..وحدة عن منكرات الأفراح+وحدة عن حق الزوج والزوجة+وحدة فيها 50 حديث تخص النساء.. غلفوا نجلاء واسمهان التوزيعات بقماش سدو وعلقوا مع كل توزيعة مسبحة وميدالية فيها(مبخرة ودلةو جرة) ومن برة علقوا كرت على شكل مهفة(مروحة خصف) ومكتوب عليها.. هديتي إليكم.. رانيـــــــــــــــة وبالأخير حطوا كل التوزيعات في سلة خصف لبسوها قماش سدو وعلى طرف السلة عروسة سووا لها لبس شعبي ولبسوها شيلة على راسها.. ============= يوم الجمعة راحت اسمهان لأهلها على الغداء كالعادة.. وكانت سماح ثقلانة في حركتها! اسمهان:ماشاء الله صرتي بأي شهر الحين؟؟ سماح:دخلت التاسع!!والله يعين على ملكة ناصر باقي عليها أسبوعين ومدري كيف بأحضر بهالشكل!! أم اسمهان:الله يعينك..أمس كلمتني ابتسام وحتى هي تعبانة وعلى نهاية السابع..وأم زوجها عندها وبناتها بالمدرسة وشغل البيت هالكها..قاعدة تعد الأيام عد عشان تبدأ الاجازة وتجينا! أسماء:يلا هانت..كلها أسبوعين وتبدأ الاجازة.. اسمهان:استعديتوا لملكة ناصر ياسماح؟؟ سماح:ايه كل يوم وهو يتشرط على أمي!!بس ماعلي منه قلت لأمي خذي هند معاك ماني بخلق أسواق..وماقصروا شروا العربية والشبكة وجميع مستلزماتها.. أقبلت الاجازة وبدأت استعدادات رانية للملكة وفي بالها خيالات وأفكار عن عريس الهنا!! وبيوم الملكة كانت التجهيزات واضحة من مدخل القاعة ..خيمة منصوبة وبداخلها أشياء تراثية..وريحة البخور فايحة وحرمة لابسة ثوب بدوي وبرقع وقاعدة تسوي قهوة على منجل الفحم(المشب) وكل زائرة تدخل تناولها هالحرمة فنجال قهوة! وكانوا قريبات رانية كثيرين جداً وواقفين بانتظار الترحيب بالزوار بالغطاريف..وجدَّاتها جالسين وكل عجايز العيلة.. وصلت اسمهان وأم زوجها وجوهرة وأحلام للقاعة وبعدهم نجلاء ومرام دخلوا القاعة بوقت واحد.. طالعت نجلاء بالخيمة المنصوبة بمدخل القاعة وقالت:وش هذا؟ مضَارب بني عبس؟؟؟ مرام:أقول لو شفتي رانية وهي بالصالون عندنا تقولين بدوية صدق؟؟متحنية ,وناقشة اليدين والرجلين والمكياج البدوي(الغجري) اللي الكحل مركز حول العين وراسمين لها بـدقنها رسومات تقولين مترقمة!! نجلاء:حلو التغيير!! ودخلوا القاعة وكانت الكوشة بديكورات تراثية... والحلو بالموضوع إنه كل طاقم الضيافة كان لابس لبس موحد خليجي... والطاولات كان فوق كل طاولة صحن كبير فوقه نخلة معلَّق فيها تمر سكري وحول النخلة 3 أبيار كل بير(بئر) بداخله شي مختلف واحد فيه _شوكولا-الثاني بيتيفور-الثالث معمول!!!! وديكور القاعة وتزيين المسيرة كان كله من التراث.. حضروا أهل اسمهان وأهل تركي..تركتهم اسمهان وراحت مع صاحباتها يسلمون على رانية في غرفتها.. كانوا مجموعة من بنات أعمام وأخوال رانية عندها بالغرفة... سلموا الشلة على صاحبتهم..وتفاجئوا بمنظرها!! نقش الحنةوكانت رانية..لابسة ثوب تراثي..وهامة على راسها واكسسوارات شعبية بأحجار ملونة.. اسمهان:الله الله ياحركات..شكلك تراثي من جِد! بنت عم رانية:رانية دايماً كذا!خالِف تُعْرَف!!! بنت خال رانية:أكثر ناس مبسوطين بهاالأجواء العجنجز اللي برة!!قاعدين يتذكرون الماضي! رانية:يلا..خلهم يرضون عني مرة بالعمر!وهم كل مناسبة ناشبين في حلقي خصام وهواش ومعَايرْ!! وكانت رانية..لابسة ثوب تراثي..وهامة على راسها واكسسوارات شعبية بأحجار ملونة.. نجلاء(تهمس بإذن رانية):ترانا مشاركينك بالزفة!!لا تخرعين لاطلعنا قبلك على الممر! رانية:هههه كنت متوقعة..بس بالله لاتفشلوني وتسوون شي ماله علاقة بـ زفتي!! أفنان:ياترى اش شعورك الحين؟ رانية:لاتسألوني..تصدقون يابنات قلبي يخبط يرقع!! مرام:وياترى اش هي توقعاتك عن العريس؟؟ رانية:أتخيله مثقف و جاد و رزة!! الله يعينه على صرقعتي!! عاد اسمهان تضحك بداخلها وتقول:آه لو درت عن نويصر اش بتقول!!!!! وخرج الجميع من الغرفة وهم يباركون لرانية ويتمنون لها ليلة سعيدة وموفقة.. وقعدت رانية تتصور..وطلبت من أمها تكلم أبوها والعريس يجون يتصورون معاها.. اتصلت أمها بأبوها وجاء وجاب ناصر معاه...اللي جاء كاشخ ببشت!! دخل الأب وناصر الغرفة على رانية الي كانت مثل القمر ومن الخجل حاطة عيونها بالأرض! ناصر:وين عروستي ياجماعة؟؟ أبو رانية(ويأشر على بنته):هذي عروستك! ناصر:لا ياشيخ!جايبين لي عجوز من الجنادرية وتقولون عروستك؟!! كتمت رانية غيظها وسكتت! أما أمها وأبوها ظلوا يضحكون! وقفوا تصوروا بصمت وخرجوا الأم والأب والمصورةمن الغرفة.. التفت ناصر لرانية وقال:مبروك ياعروس! رانية:الله يبارك فيك. ناصر:مبروك عليك ناصر أحلى شاب بالديرة..!! رانية:ههههههه..حلوة ثقتك بنفسك!! قام ناصر يتأمل بوجه رانية بصمت ومن الخجل رانية ذابت!! وشوي قام يرَقِص حواجبه!وبعدين يهز خشمه ورانية مستغربة وقام يحرك فمه يمين وشمال! اخترعت رانية وقالت:اشفيك؟مهبول؟؟؟ ناصر:ههههههه..لا بس بغيت أختبرك وأشوف هل انتي بكامل قواك العقلية؟؟ رانية:لا تطمن..إلى هذي اللحظة أنا بخير! ناصر:عندي سؤال يبي يسدح نفسه غصب؟!! رانية:تفضل.. ناصر:وش قصدك بهاللبس اللي لابسته؟انقرضت الملابس من الديرة؟ولا بتقودين مظاهرة شعبية لحقوق الجدَّات؟! رانية(بغيظ):لا وإنت الصادق ناوية أذكرك بأمك الله يرحمها!! ناصر:لا لاتذكريني الله يرحمها! رانية:إلا أمك الله يرحمها وش كان اسمها؟ ناصر:قل أعوذ برب الفلق!!وانتي ليش تسألين عن اسم أمي؟خُبري ماحد يسأل عن اسم الأم إلا الدجالين والسحرة قبل لايستعينون بالجن!!! رانية(بنفسها):أنا أشهد إن هالرجال موب صاحي! دق باب الغرفة عليهم ودخلوا أخوان رانية مشاري ومشعل.. مشاري:ماحد ناداني أتصور وأسلم عليك ياعروس..قلت أجي بنفسي.. رانية:لما ألبس الفستان الثاني تصور معاي مرة وحدة..هالحين المصورة خرجت شوي مشاري:هي باقي فيها فستان ثاني وثالث؟؟ايش؟ناوية تستعرضين دولاب ملابسك قدام الحضور؟؟وش عليك بنت بطرة وفشخرة على خرطي!!إلا وشلون العروس معك ياناصر؟؟ ناصر:إختك هذي عجيــــــــــــبة!ماشاء الله الله يحفظها!! مشاري:تراني جيت أعلمك بكلمة السر حقتها!لاشفتها معصلجة معاك شوي..فما عليك إلا تشيل الطار(الدف) وتطق عليه ياهي بتقوم تطامر قدامك تقول ساكنها قبيلة جنانوَه!!!! ناصر(بصوت عالي):يانااااااس هاتوا لي طار! رانية:أقول ؟تراني من أول الليل وأنا أتهزأ!قم ضف وجهك واطلع إنت وأخوك..يلا! خرجوا مشاري ومشعل..وجلست رانية على كرسي وقام ناصر يناظر فيها وهي رافعة حاجبها وكأنه موب عاجبها!! ناصر:حسبي الله عليهم! رانية:مين هم؟؟ ناصر:الناس اللي اضحكوا علي! رانية:شلون ضحكوا عليك؟؟ ناصر:قالوا لي البنت لما تجلس مع خطيبها بأول مرة عيونها توصل الأرض من الحيا!بس الحقيقة انتي لسانك هو اللي واصل للأرض!!! رانية:استغفر الله.. إلا أم رانية دخلت وقالت:عفواً ياعريس..الحين صار وقت الزفة الأولى..تقدر ترجع براحتك الحين لقاعة الرجال..وإحنا بنزف رانية عند الحريم.. واستأذن ناصر وراح للرِجال.. أما رانية طلعت من باب يودي لمدخل القاعة..ووقفت ووقفوا وراها فرقة للطق الشعبي وهم لابسين ملابس شعبية...وبنتين من بنات خالها ومعاهم مرشات الورد وبنتين من بنات عمها ومعاهم مباخر.. وبدأت الفرقة بالغطاريف ثم بعالي الصوت:ألف الصلاة والسلام عليك ياحبيب الله محمد!!للللللوش ورانية تمشي ببطء إلى ان وصلت لدرجة المسيرة الطويلة وطلعت وكانوا صاحباتها(اسمهان-مرام-نجلاء-أفنان)واقفين ينتظرونها ولابسين الجلابيات الشيفون المطرزة فوق فساتينهم وعلى روسسهم قلايد ذهبية شعبية.. ولما بدأ الطق قاموا يرقصون قدامها ويمشون وهي تمشي وراهم..وبنص المسيرة وقفوا وقاموا يرقصون رقص اماراتي بشعورهم..ثم بالعصي ويطقون رقابهم.. قامت رانية تهمس لهم من تحت أضراسها:يانذلات عبروني!! انتبهت لها اسمهان وقالت:اش تبين؟؟ رانية:فيني رقصة..ودي أرقص خذوني معاكم!! مسكتها نجلاء من يد واسمهان من يد ورقصت معاهم على خفيف... ولما بدأوا يقتربون من الكوشة بدأ الطق يسير سريع وراحوا الشلة قبل رانية ووقفوا حول الكرسي اللي بتجلس عليه.. وجلست أخيراً على الكرسي... قربت منها اسمهان وسألتها:هاه؟بشري؟اش رايك بالعريس؟؟ رانية:بالله هذا تسمينه عريس؟؟هذا يلبسونه طربوش ويوظفونه بالسيرك أبرك!!! اسمهان:ههههههههه..ليش؟ رانية:ماخذ الدنيا سبهللة..زيادة عن اللزوم!بس دواه عندي! اسمهان:إيه..وأنا أشهد.. رانية:حتى اسم أمه ماقال لي عليه..من زود خفة الدم! اسمهان:اسمها (شَمَّه)! رانية:طيب ياولد شمَّه!الزواج موعدنا! جلسوا الطقاقات وقاموا يطقون..وصاروا البنات يرقصون الشلة على بنات أقارب رانية وقامت رانية معاهم!!!! وطلعت جدتها (أم أبوها)تركض على المنصة وراحت قرصتها في ركبتها وقالت:انثبري يابنت..يازين الركادة!! انحرجت رانية وقالت للي حولها:يقولون اخواننا المصريين(اللي تقرص العروسة في ركبتها تحصلها في جمعتها)يظهر إن جدتي ودها تتزوج!!! البنات:ههههههههههههههههه الجدة:أقول قليعة تقلعك ياأم لسانين الله يرحم جدك ماأرضى به بديل!بس إني خايفة أهل عريسك يشوفون خبالك ويهونُون منك!!! ونزلت اسمهان ومعاها غرشات وتولات عوده تطيب بها الحاضرات..وأفنان تدور بينهم بالتوزيعات الدعوية ومرت اسمهان بطاولة عليها 4حريم وطيَّبتهم بالعودة فقالت وحدة منهم لاسمهان:طاب طيبِك..وعاش حبيبك! اسمهان:من فمك لباب السماء يارب! وتركتهم ومشت.. قامت الحرمة تقول للنسوان اللي معاها:أما بنات هالوقت جريئات وقليلات حيا!الوحدة منهم تسمع سيرة حبيب أو خطيب تلاقونها بتطير من الشفاحة!!! سمعتها اسمهان ورجعت للطاولة وضربت بيدها طرف الطاولة وقالت:للمعلومية..تراني متزوجة!!! انحرجت الحرمة وقالت:يووه السموحة منك على بالي بعدك بنية!ماشاء الله شكلك صغيرة!!! وراحت اسمهان واللي على الطاولة يضحكون.... وهي ماشية لاحظت انه فيه حرمة تناظرها من أول الملكة بنظرات نافذة ودقيقة..صارت اسمهان كل ماتمر من جنبها تقرأ على نفسها المعوذات!!! مرت دقايق ورجعت رانية لغرفتها استعداداً للزفة الثانية..... ولبست هذا الفستان...وكانت تسريحتها من البداية تسريحة بسيطة..لما لبست الفستان أضافت اكسسوار أحمر على شعرها..مناسب للفستان وكانت الزفة الثانية على شريط بدايته فيه قصيدة ومؤثرات صوتية بشرية...وبعدين أغنية على الدفوف فقط.. والمسكة ورد أحمرطبيعي ومعاه كريستالات..وكانت رانية ماشية لوحدها.. لما وصلت للمنصة..طلعوا سماح وأهلها وزوجات أخوان ناصر وبناتهم يسلمون عليها..والعربية كانت على المنصة..تصورت رانية جنبها! باركوا لها الجميع... ورقصوا لها وبعد مرور وقت وهي على المنصة أعلنت أمها حلول وقت العشاء...أما رانية رجعت لخطيبها بالغرفة اللي قام لبسها الشبكة! ويوم شافها قال:ايه ياشيخة هذا شكل عروس.. مو الثوب اللي لابسته قبل كأنك جاية من متحف التراث!! قالت رانية(بداخلها):صدق ان الثيران..مايعجبهم إلا اللون الأحمر!!! وكانوا سماح وهند واقفين بنفس الغرفة ومتغطيات وبنات أخوان ناصر واقفين مع عمهم ويساعدونه في تلبيس العروسة للشبكة ويطقون له على الدفوف.وأم تركي معاهم وفرحانة لفرحة ناصر.. أم تركي:مبروك ياولدي الله يهنيكم ويوفقكم دايم قولوا آمين.. رانية وناصر:آمين.. ناصر:عقبال تركي ان شاء الله... ومرت الليلة بفرحة..وفي صالة العشا كانت الحرمة اللي مضايقة اسمهان بنظراتها كل شوي تقترب منها وهي قاعدة تغرف أكل من البوفيه!حاولت اسمهان تبتعد عنها وتقعد مع أم عبدالرحمن وجوهرةعلى نفس الطاولة!لكن الحرمة فاجئتها بأنها لحقتها والتفتت لأم عبدالرحمن وقالت:هالمزيونة بنتك؟؟ أم عبدالرحمن:لا..بس تقدرين تقولين حسبة بنتي! الحرمة:ترى أنا ماأحب اللف والدوران عندي ولد وقاعدة أدور له عروس..ومالقيت أحسن من بنتكم..اش رايكم؟؟ أم عبدالرحمن وهي تضحك:شاوري العروس..وإن وافقت عليك بالعافية!!! الحرمة:اش رايك ياعروس؟؟ اسمهان:مدري..بأشاور زوجي وأرد لك!! أحلام وجوهرة وأم عبدالرحمن:هههههههه الحرمة:ايـــــــــــــــــــــ ـــــــش؟انتي متزوجة؟؟قولي والله! أم عبدالرحمن:ايه لها عشرة شهور متزوجة..وترى هي زوجة ولدي.. الحرمة:ههههه آسفة حسبتها خالية..مادريت انها مشغولة..عن إذنكم.. أحلام:هههه مين قدك ياسمهونة؟جاك عريس! وبعد العشا قاموا بنات العائلة يباشرون على الحضور بالتفاسير وكانت عبارة عن صناديق تراثية صغيرة وبداخلها(لبان ومستكة وهيل وقرنفل وحلاوة نعناع) -------------- في نهاية الملكة..لما ركبت اسمهان السيارة... عبدالرحمن:كيف كانت الملكة؟؟ اسمهان:تهبببببل! عبدالرحمن:وش آخر الأخبار؟؟ اسمهان:أبد ...جاني عريس! عبدالرحمن:بأسوي نفسي ماسمعت شي!!!!!!!! ثاني يوم من ملكة رانية اتصلت عزة على اسمهان!!!! بعد التحية والسلام.. عزة:إلا متى ملكة صاحبتك اللي كنتي مشغولة فيها؟؟ اسمهان:كانت أمس.. عزة:أفا عليك يالظالمة!وليش ماعلمتيني؟؟ اسمهان:وليش أعلمك؟؟ عزة:عشان أحضر!!خاطري أشوف صاحباتك اللي تحبين تتكلمين عنهم !هم مثل الوصف أو لا!!! اسمهان:لو إنها ملكة أحد من أقاربي كان عزمتك..لكن تدرين هي ملكة صديقتي يعني مالي علاقة.. عزة:يالطيف يارب!يعني أنا بأزيد الزحمة في القصر؟!! اسمهان:معليش..ان شاء الله تجين بزواجها... عزة:وش رايك تزوريني بكرة؟؟ اسمهان:ياليت أقدر..بس تدرين الاجازة كلها كم يوم بس. يالله تكفيني أقضيها مع أهلي وزوجي. عزة:وزوجك هذا ماشبعتي فيه لسه؟؟ اسمهان:اش أسوي ظلمته معاي أيام المدرسة..طول الوقت حاطة حيلي بالدراسة وأنام بدري..هالحين فرصة أعوضه شوي.. عزة:وبكرة يمل منك..ولايسأل فيك احسبي له كم شهر بس!! اسمهان:الله لايقدِّر!! عزة:وشغالتك ليش ماتخلين كل الشغل عليها..وانتي اقعدي مع زوجك! اسمهان:شغالتي هجت ياعزة..بغتني أزيد راتبها وماعطيتها وجه..وشردت وسرقت ذهبي! عزة:كل ذهبك؟؟ اسمهان:ايه بس الحمدلله لقيناه..آثاريها رمته وهربت من الخرعة.. عزة:ماعليك منها..جيبي غيرها! حست اسمهان انه عزة تتجاوز حدودها أحياناً.. فقالت اسمهان:إنتي أولى بالشغالة مني!عندك 3 أطفال ماشاء الله.. إلا عبدالرحمن دخل البيت.. اسمهان:يلا..ما أطول عليك زوجي جاء...مع السلامة.. عزة:مع السلامة.. وقفلت عزة السماعة وقالت لنفسها:والله ونبت لك ريش يااسمهان وصرتي تردين! في بيت أهل تركي كان تركي قاعد مع أخواته هند وسماح وأمهم تركي:تصدقون؟؟أهل خطيبتي يوم إنهم متواضعين ومايبون يكلفون علي بشي كبروا بعيني! هند:أعظم النساء بركة أيسرهن مؤونة.. سماح:جزاهم الله خير..هذا زواج مو بيعة عشان يسوون اللي سوته أم عبير!!! أم تركي:بالله لاتجيبين طاريهم.. ينقبض قلبي لاتذكرت سالفة السِحر.. تركي:ماعلينا..بس من جد أحس إن أهل أفنان يستاهلون مِين يكرمهم ويقدرهم على تواضعهم..عشان كذا ناوي أخلي ليلة زواجنا أحسن ليلة.. سماح:إلا اش أخبار ناصر بعد ليلة أمس؟؟ تركي:ناصر بيستخف!وِده يطير من الفرحة.. هند:يلا الحمدلله..ان شاء الله يعقل بعد الزواج من الخفة اللي فيه!! تركي:لا لا نويصر مابيعقل!بو طبيع مايجوز عن طبعه!! ------------------------ مرت الاجازة واسمهان كل يوم تزور أهلها..وتجتمع مع أسماء وابتسام..وبيوم اجتمعت معاهم سماح وكان شكلها تعبان ومرهق وتحس بالآم.. أم اسمهان:اشفيك ياسماح؟شكلك مرة تعبانة..لايكون ولادة؟؟ سماح:لا باقي على ولادتي أسبوع... أم اسمهان:بس شكلك مايطمن! سماح:لأني أسهر كل يوم.. وتعشوا كلهم مع بعض وهم ساريين.. مسكت أم اسمهان ولدها محمد وقالت:اسمع ترى زوجتك شكلها مايطمن نصيحة وديها المستشفى قبل ماتروح البيت.. محمد:يايمه سرى الليل..بأوديها بكرة.. أم اسمهان:اسمع مني منت خسران..خل عيالك وشغالتكم عندي وروحوا المستشفى وطمنونا.. وبالفعل راحوا سماح ومحمد للمستشفى.. وبعد ف***ا لاحظوا انه نبض الجنين ضعيف..وسماح تحتاج لولادة عاجلة..أعطوها طلق صناعي ومافي فايدة الجنين مرتفع ونبضه يضعف فاضطروا انهم يقررون لها ولادة قيصرية!!! اتصل محمد وخبَّر أمه.. أم اسمهان:قلت لك شكلها موب عاجبني!آثاريها تعبانة المسكينة توكل على الله وسوي لها العملية لايسير بالجنين شي..وعيالك لاتشيل همهم بأحطهم بعيوني..هذا هم نايمين.. محمد:ادعي لها يمه.. أم اسمهان:يارب احفظها ويسر ولادتها واحفظ ذريتها.. محمد:أتصل بأمها؟؟ أم اسمهان:لاياولدي..بتقلقها بهالليل..لاخرجت من غرفة العمليات يصير خير.. وبعد وقت من الانتظار ولدت سماح بنوتة حلوة..سماها محمد(اسمهان)...... |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
بعد ماولدت سماح اتصل محمد وبشَّر أمه وكان وقت متأخر من الليل وبقي مدة قصيرة على صلاة الفجر... أم اسمهان:مبررررروك الله يبشرك بالخير..وكيف صحة سماح والنونو الصغيرة؟؟؟ محمد:كلهم بخير... أم اسمهان:خلك مع زوجتك الحين ورافق معاها وبإذن الله من الظهر بأجيكم... محمد:وأهلها كيف أبلغهم؟ أم اسمهان:وقت صلاة الفجر أكيد بيقومون للصلاة..اتصل بتركي بشره وأكيد هو بيقول لأمه...بس لاتقلقهم ياولدي وتقول الولادة قيصرية..خلهم يعرفون بعدين.. ونفَّذ محمد كلام أمه واتصل بتركي وخبره بولادة سماح.. ونقل الخبر لأمه اللي من قبل صلاة الظهر وهي في المستشفى عند بنتها.. أما اسمهان لما وصلها الخبر طارت من الفرحة..وقالت لزوجها.. عبدالرحمن:مادام سموا بنتهم على اسمك فلابد نشتري لهم هدية محرزة.. اسمهان:أنا في خاطري أهدي المولودة بروش ذهب بإسمها(اسمهان)ويكون مفصص بعد! وفي العصر راحت اسمهان سوق الذهب اللي وعدوها يفصلون لها البروش وينتهي بعد يومين.. فقالت لعبدالرحمن:مو مشكلة أعطيها الهديةبعد ماتطلع من المستشفى..الحين بأشري لها سبت شوكولاتة كبير.. ولما وصلت المستشفى لقيت أهلها كلهم موجودين وأم سماح وأختها هند وبعض أقارب سماح.. وكانت سماح تحكي لهم عن ولادتها وكل وحدة من الزائرات تحكي تجاربها في الولادة.. أم تركي:أقول يازين ولادتنا أيام زمان..لاخياطة ولاتعب..والوحدة من ثاني يوم تقوم ببيتها!!! أم اسمهان:لا حرام عليك..هذا لأنك ماجربتي ولادة المستشفيات ياأم تركي..أما أنا ولدت عيالي كلهم بالمستشفى..راحة وخدمة واهتمام وإن كانت المستشفيات زمان مو مثل الحين!!وبالذات لاكانت حكومي تلاقين أنواع الاهمال من الممرضات!!لكن أفضل من البيت بكل الأحوال.. وحدة من أقارب سماح:المثل يقول(هِين قرشك ولاتهين نفسك) ماعليه الواحد يخسر مبالغ في المستشفيات الخاصة بس على الأقل يلقى رعاية واهتمام من أحسن مايكون.. سماح:فعلاً..حتى التورتة يقدمونها هدية لك بعد الولادة..وممرضة خاصة بالمساج والتدليك تمر على الغرف عشان تخدم المرضى!! هند:ذكرتوني بولادتي الأخيرة بولدي مرت علي وحدة وقالت: أنا كوافيرة تبغي أي خدمة؟؟ قلت لها:بالله أنا فاضية أتكوفر وأسشور وأتمكر وأنا طايحة بالفراش؟؟ردت علي:واشفيها يامدام كوني جميلة في كل حالاتك!!قلت لها:ودك يصْفقُوني الناس بعين؟؟ الزوار:ههههههههه أسماء:فعلاً أنا استغربت مرة من وحدة من سلايفي رحت أزورها بولادتها وكانت ولادتها قيصرية وتعبانة وعانت فيها..بس تفاجئت يوم رحت لها بالمستشفى إنه شعرها مقصوص وملفلف ومضبط والماكياج كامل تقولون رايحة مناسبة؟؟والأظافر مبرودة وممكرة!وفوق هذا كله غصب تتكلم من التعب!طيب وش اللي حادها على الزبرقة؟مدري! سماح:صح غريبة..يعني الزوار مابيجونك إلا وهم متوقعين إنك تعبانة وحالتك ماتسمح لك..مافي مانع انه الوحدة تكون نظيفة وترتب شعرها وتسشوره بس عاد مو لدرجة مكياج كامل ولف شعر!! وحدة من أقارب سماح:هذي هينة..أنا اللي استغربه هالمبالغات والسرف اللي قاعدين نشوفه هاليومين!بدل ماالوحدة تشكر ربها على انه وهبها الصحة والعافية ورزقها طفل وتبادر بالصدقة.......نلقاها تدفع مبالغ خيالية في تزيين غرفتها بالمستشفى وفي الضيافة اللي تقدمها للزوار..تصدقون بعضهم يوصون على شوكولاتات من بلاد الخارج عشان يقدمونها للضيوف لا وتغليفها مكلف جداً!!!! اسمهان:ذكرتوني بوحدة من زوجات أصحاب زوجي رحت أزورها قبل مدة بالمستشفى لقيت الباب مزين والغرفة كلها مدادات وسجادات غالية واللحاف وسرير المولود وعلبة المناديل والدرام طقم!والبالونات مالية الغرفة وجنب الحرمة شجرة كبيرة معلَّق فيها علب مغلفة مثل تغليفات علب الملكة وبداخلها تحفة وحلويات..وبيتيفورات مالحة وحالية مغلفة بنفس ألوان الغرفة..هذا غير الزينات اللي معلقة ونازلة من السقف..وباقات الورد..كلها يومين والوحدة بتطلع اش له هالمخاسير؟الله يبارك لها بس من كلامها فهمت إنها كلفتها مبلغ كبير أم اسمهان:سبحان الله..ناس موب قادرة توفر لقمة يومها..وناس كل همهم التفاخر والفشخرة على غيرهم ومحيرتهم الفلوس اللي عندهم وين يودونها! هند:أعرف حريم أزواجهم على قد الحال ورواتبهم ضعيفة..بس لا حبَّت الوحدة منهم تتفشخر تفشخرت!بالديون أو بتفليس زوجها!أهم شي تطلع قدام الناس بمظهر ثاني!!! واستمرت السوالف إلى وقت صلاة المغرب وبدأوا زوار سماح يروحون وبقي أهلها وأهل زوجها.. دق جوال اسمهان وكانت المتصلة عزة! اسمهان:ياهلا. عزة:انتي وينك؟لي ساعة أتصل على تيلفون البيت وماتردين! اسمهان:أنا مو في البيت.. عزة:أجل..وينك فيه؟ اسمهان:بالمستشفى.. عزة:سلامات.. اسمهان:الله يسلمك..مافيني شي بس زوجة أخوي ولدت. عزة:مبروك..وش جابت؟ اسمهان:بنت.. عزة:وش سمتها؟ اسمهان:سمَّتها اسمهان.. عزة:اشمعنى؟؟ اسمهان:عاجبها الاسم.. عزة:غريبة زوجة أخوك عاجبها اسمك؟ مع انه قديم!!! اسمهان:الناس أذواق!وبعدين هي مافكرت في حلات الاسم كثر مافكرت بمعزتي عندها! عزة:لو بالمعزة كان سمَّت على أمِك أولى! اسمهان:اسم أمي قديم! عزة:ليش وش اسمها؟ اسمهان:نبيلة.. عزة:تصدقين اسم نبيلة أحلى من اسم اسمهان؟؟ صارت أسماء تطالع باسمهان بغيظ وصاحت:بـــــــــــــــــــس!! سمعت عزة الصوت وقالت:ماني مطولة عليك بس عطيني اسم المستشفى ورقم الغرفة..خاطري أزور زوجة أخوك وأبارك.. أعطتها اسمهان المعلومات وقفلت الخط... أسماء:أففففففف وش هاذي المحقق كونان؟؟؟؟؟ اسمهان:وش دراك إنها قاعدة تحقق؟؟ ابتسام:ياحليلك كلنا درينا!!! مانشوفك إلا تجاوبين وباين على المتصلة إنها مجتهدة بطرح الأسئلة! أسماء:البلا إن اسمهان معطيتها وجه!! أم اسمهان:أكيد هذي عزة!صح؟ اسمهان:ايه هي..بس وش دراك يمه؟ أم اسمهان:لأن هذي ثالث مرة أشوفها تتصل وتسألك مية سؤال!مرتين كنتي فيها عندنا وهذي المرة الثالثة.. اسمهان:عاد مسكينة تتونس على سواليفي..زوجها مايخليها تروح مكان وبينهم مشاكل.. سماح:هو زوجها صاحب عبدالرحمن؟؟ اسمهان:إيه.. سماح:وزوجك اش يقول عنه؟؟ اسمهان:زوجي يمدح فيه وموصله للسماء..بس زوجته تسب فيه ليل ونهار ومنزلته للقاع!! أم اسمهان:ووحدة مثل هذي..ينرجي من وراها خير؟؟ يابنتي بنات الأصول ماياكلون لحم أزواجهم عند الناس..المفروض الوحدة لاشافت من زوجها خير ذكرته وإن شافت عيب سترته.. أسماء:والله العالم عن أسرار البيوت..يمكن زوجها مامنعها من الناس إلا عشان يتقي شرها!! اسمهان:تصدقون؟مرات يلعب الشيطان براسي من ناحيتها!أحس إنها حسودة أو غيورة..ماني قادرة أحدد..ومرات ألتمس لها العذر..وحيدة ومخنوقة..وعبدالرحمن يقول زوجها صابر عليها عشان خايف عياله يتشتتون!! سماح:والله إنك غريبة ياسمهونة!يعني ماصار لها مدة قصيرة من يوم تعرفت عليك..وقامت تعلمك بأسرارها وتسحب أسرارك وانتي باقي تشاورين نفسك..وتتأملين من وراها خير!!نصيحتي لاتوثقين علاقتك فيها.. هند:هذي طباعها مشابهة لصاحبتك السابقة سحر..صح ياسماح؟ سماح:تكفين لاتذكريني ماصدقت أنسى!!أنا ببداية زواجي تعرفت على جارة لي وتصاحبنا مثل الأخوات وكان اسمها سحر..لكن اكتشفت مع الوقت إنها تنقل أسراري للغير وتحاول تقلب الجيران علي!تبيني أكون صاحبتها وحدها بس!واستغلتني كل يوم تطلبني أصناف حالية ومالحة وأنا على نياتي أتفنن وأرسل لها وآثاريها تقدمها لأهل زوجها على أساس إنها هي مسويتها!!وكل مكان أو مطعم أحكي لها إني رحت له..ألقاها من ثاني يوم راحت له..وكل ماشريت شي ألقاها تسابق وتروح تشري مثله!الصراحة انغثيت من غيرتها وكانت تشككني في الناس اللي حولي وتتضايق لما تشوفني مبسوطة مع محمد وتحاول تشيشني عليه..صراحة كل ذكرياتي معاها شينة..لما زادت حركاتها حطيت لها حد..وظلينا كل وحدة بحالها لين مانقلت من شقتها اللي قدامي وافتكيت منها!! اسمهان:حرام عليكم..عزة مو شينة لهاالدرجة..تخيلوا تبي تجي عشان تبارك لك ياسماح؟؟ سماح:الله يعطيها العافية..يمكن لاشفناها نقدر نحكم! أسماء:أقول هي اسمهان هذا طبعها!دايماً مندفعة في علاقاتها..والا شلة الصاعقة هذيك يتسمون شلة بالله عليكم ؟؟من زينهم؟مدري اش عاجبها فيهم؟؟ هند:عاد مانسمح لك تسبينهم ياأسومة!!رانية خطيبة ولد عمي..وأفنان خطيبة أخونا تركي! الجميع:ههههههههههه ================== في منزل عزة... كان يوسف جالس على الأرض ويلعب مع أولاده بألعابهم ويضحك معاهم..وعزة جالسة على الكنبة. عزة:يوسف أبيك توديني المستشفى بعد شوي.. يوسف:ليش؟خير؟؟ عزة:زوجة عبدالرحمن..مرة أخوها ولدت وأبي أروح أبارك لها! يوسف:لاااا؟من متى هالنخوة؟ إذا أختي علياء لها شهرين ونص من يوم ماولدت ولدها ورفضتي ترفعين عليها سماعة حتى!!ذحين بيجي فيك خير وتباركين للغُرب؟؟ عزة:بالله فكني من سيرة أهلك..لازم يعني أقدم لهم يمين الولاء والطاعة؟؟! يوسف:أهلي المفروض تحبين رووسهم لأنهم زوجوك واحد صابر عليك وساكت وليتك فوق هذا كله تحمدين ربك وتشكرينه إلا تتمننين علي بقعدتك عندي..اللهم لااعتراض.. عزة:الحين ليش تطلع من الموضوع؟ يوسف:خلينا في ساعة رحمان..أساساً من متى لك علاقة بزوجة عبدالرحمن وانتي ماقابلتيها إلا مرتين؟عشان يكون لك علاقة بزوجة أخوها؟ عزة:تصاحبت معاها اش المشكلة؟وانت شايف بعينك..ماعاد لي صديقة ولارفيقة! يوسف:إنتي اللي جبتيه لنفسك فرقتي بين كل الناس بلسانك وتدخلاتك..حتى زوجات أخواني ماسلموا من شَرِّك..والحين ناوية على زوجة عبدالرحمن؟؟اقعدي ببيتك أستر لك!! عزة:يعني ملزِّم؟؟ يوسف:ايه..باركي لهم بالتلفون وبس! عزة:دايماً نذل وتحب نفسك!!!! ================== أما رانية فكل يوم يتصل فيها ناصر ويطيح فيها نكت وتعليقات..مرات تضحك ومرات تزعل لأنه أحياناً يمصخها!!!!! في إحدى المكالمات: رانية:وش أحلى خبر سمعته بحياتك؟؟ ناصر:إنه في قرار يناقش السماح للمرأة بقيادة السيارة!!!!!!!! رانية:وليش هالخبر حلو بالنسبة لك مع إنك مو مستفيد منه شي؟ ناصر:عشان تزيد نسبة الحوادث ونفتك من عدد النسوان بمجتمعنا صار عددهم 3 أضعافنا!! رانية:الله لايعطي عدوك عافية!هذا كلام تقوله؟؟ ناصر:وش أسوي؟ من بعد مافتحوا لهم مجالات للعمل صاروا ينافسونا بالوظايف..تلاقين الشاب اللي وده يفتح بيت مو لاقي وظيفة لأن الحريم سبقوه عليها!! رانية:يالطيف يارب!حسودي اللهُ أكبر عليك!! ناصر:ههههههههه ترى إذا بتصدقين كل كلمة أقولها بينشحن صدرك علي!! رانية:احترت في طبعك الصراحة مزحك كذب وجدِك كذب..الله يشفيك.. ناصر:ولايبتليك!!! ============== اتصلت عزة على اسمهان وقالت:اسمهان لاتنتظريني اليوم انشغلت فجأة!!بس بكرة أقابلك بالمستشفى! اسمهان:الله يحييك...... = |
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
أصرَّت أم سماح تبات معاها في المستشفى...وهند رجعت بيتها وبقي أهل اسمهان بالغرفة.. وجاء محمد ومعاه بنوتته الصغيرة جايبها من الحضانة والممرضة تدف السرير.. محمد:سمهونة الصغيرة جات تسلم عليكم!! قامت اسمهان تجري عليها بشوق وشالتها وضمتها وعيونها غرقانة دموع!! أسماء:أفا ياسمهونة!عَزَّ الله طاح سوق بنتي لينة!!! الجميع:ههههه محمد:لو فيك خير كان سميتي بنتك اسمهان بدل لينة!! اسمهان:ياعمري عليها تجنن..الله يحفظها لكم ويبارك فيها.. محمد:مين تشبه؟؟ أم اسمهان:البنت بسبعة وجوه ياولدي!باقي يتغير شكلها ويختلف هالحين مو باين الشبه.. محمد:عندي احساس كبير إنها بتطلع قمر مثل أبوها!! أم سماح:ليش يالمزيون؟بنتي سماح شينة يعني؟؟ ابتسام:إلا سموحة عسل مصفى بس ماعليك من حمود وسوالفه.. اسمهان:يمه..ماتشبهني وأنا صغيرة؟؟ أم اسمهان:ههههه وانتي على بالك يوم إن اسمها مثل اسمك بتطلع شبهك؟؟ أم سماح:لو تطلع أخلاقها بأخلاقك يااسمهان فهذي نعمة.. اسمهان:تسلمين خالتي.. أسماء:حرام عليك يااسمهان شفطتي البنت هاتيها نسلم عليها. وظلت سمهونة النونو تنتقل من يد ليد وكل من يشيلها يدعي لها بالبركة..إلى أن وصلت أخيراً لـ يد أم سماح... شالتها أم سماح وقالت:من إيد لإيد تكبر وتزيد!خذي بنيتك رضعيها ياسماح... أم اسمهان:عاد إحنا بنستأذن.. مرة طولنا عليك ياسماح.. سماح:بالعكس مرة ونستوني بزيارتكم وسوالفكم.. أم اسمهان:بكرة بإذن الله نشوفك إلا دق جوال اسمهان وكان عبدالرحمن هو المتصل وقال لها:ترى أنا برة اطلعي لي.. محمد:أنا بأوصلكم يايمه لاتتصلين بأبوي.. أم اسمهان:بس ياولدي ودي أبوك يجي ياخذنا عشان يشوف بنتك أكيد بيطير فيها.. محمد:خبرك عتيق!ومين قال لك ماشافها؟كنت أنا وياه بالحضانة في العصر وتفرج عليها لين ماشبع منها.. وخرج الجميع من الغرفة وتقابلت العائلة برة مع عبدالرحمن! محمد:ياهلا بالنسيب! عبدالرحمن:مبروك مبروك ماجاك..الله ينبتها نبات حسن ويبارك لكم فيها.. ووقفوا محمد وعبدالرحمن وأم اسمهان يسولفون شوي.. وقامت أسماء تناظر وقالت لابتسام(بهمس):ياحليله هالدحوم..أثاري شكله صغير مو على عمره!!! ابتسام:أقول غضي بصرك..لاتجيك اسمهان وتزنطك!!! أسماء:ياحبيبتي لو تطلعون وتنزلون مثل أحمد زوجي ماتلاقون ابتسام:ههههه وش ذا؟أغنية جديدة ألفتيها فيه؟غريبة مو العادة تمدحينه.. أسماء:حبيبتي أنا أمدحه في قفاه بس!أما في وجهه لا!تبينه يغتر؟؟ واستأذن عبدالرحمن هو واسمهان وراحوا لسيارتهم.. عبدالرحمن:كيف النونو الصغيرة؟شفتيها؟ اسمهان:إيه تهبل بسم الله عليها. عبدالرحمن:وزوجة أخوك ان شاء الله بخير؟؟ اسمهان:لا الحمدلله زينة..بس بما إنها مسوية عملية قيصرية بتظل بالمستشفى 4أيام.. عبدالرحمن:إلا نسيت أسألك!تدرين انه ملكة أخوي عبدالرحيم على صاحبتك بعد 3أسابيع؟؟؟ اسمهان:ايه أدري من زمان قايلة لي مرام.. عبدالرحمن:مرت الأيام بسرعة..وبعد بكرة المدارس جاية..اش رايك بكرة تروحين مع أمي وأحلام للسوق وتشترون أغراض الملكة؟أفضل لك قبل ماتنشغلين بالمدرسة..وغير كذا انتي أدرى بذوق صاحبتك.. اسمهان:ماعندي مانع بس أخاف أمك تشوفها لقافة مني! عبدالرحمن:لا لقافة ولاشي..هي اللي وصتني أقول لك..وترى بتجيكم بكرة المستشفى تبارك لزوجة أخوك... اسمهان:على خير.. ============= ثاني يوم اتصلت رانية في الظهر على اسمهان تبارك بولادة سماح رانية:مبروك ماجاء لأخوك ياسوسو اسمهان:الله يبارك فيك..بس انتي اش دراك؟؟ رانية:عاد مايبي لها سؤال ياشاطرة!نسيتي إن سماح بنت عم خطيبي؟وناصر هو اللي علمني؟ اسمهان:ههههه صح نسيت.. رانية:صحيح سموها اسمهان؟؟ اسمهان:صحيح.. رانية:تصدقين؟دايماً أقول بنفسي لو جاني بنت بأسميها اسمهان بس ترى مو من زين اسمك!بس لأني أحبك يابنية!!! اسمهان:وأنا بعد أموت فيك وبـ رجتك بس مايطرى علي أسمي بنتي رانية!!أخاف تطلع مشفوحة مثلك!!!هههههههه رانية:تسلم لي رومانسيتك وشاعريتك!!!!! اسمهان:ههههههه بعض ماعندكم ياعسل!! رانية:تراني كالعادة أول ماعرفت الخبر اشتغلت وكالة أنباء وعلمت الشلة أكيد بيتصلون يباركون..وكنت أتمنى أروح المستشفى أبارك لها بنفسي بس عاد عادات مجتمعنا عجيبة!رفضت أمي وقالت:اثقلي يامال الخفة!تروحين للمستشفى تنطين على أهل خطيبك ليش؟؟باركي بالتليفون وبس!! اسمهان:مجملة ومشكورة ياقلبي مايحتاج تتعبين نفسك.. واستمروا بسوالفهم ولما انتهت المكالمة صكت اسمهان السماعة ودق التليفون ويوم ردت طلعت المتصلة مرام.. وبعد التحايا والسلام والمباركة لاسمهان بولادة زوجة أخوها.. اسمهان:لو مااتصلتي فيني يامرام كنت أنا بأتصل فيك..إلا علميني وش لون فستان ملكتك؟؟ مرام:وليش السؤال؟؟ اسمهان(باستغراب):عشان نعرف بأي لون نزين ونشرع لك الصندوق وأغراض الملكة.. مرام:أوووه فهمتك غلط!على بالي لقافة بس! لون الفستان تقريباً موف.. اسمهان:طيب أي طلبات ودك فيها علميني لأني بأنزل السوق مع خالتي وأحلام ونختار الأغراض ومانبي نجيب شي مايعجبك..عاد مين قدك؟؟نشاورك ونطلب رضاك! مرام:العطورات اللي أبيها(؟؟؟؟؟!!!!)(قائمة طويلة!!!!) والذهب اللي تجيبونه ياليت يكون كله ذهب أبيض ماأطيق الأصفر أحسه شعبي!وتنسيق العربية أبيه يكون ناعم مو مدندش مثل عربية رانية!!!والساعات تكون من ماركات معروفة!واش بعد يامرام؟؟؟ آه افتكرت..كل التحف والأشياء اللي راح تضيفونها ياليت يكون لونها فضي!تدرين الفضي مع الموف يطلع شي!!وبعد لو تحطون مثل الدرع ومكتوب عليه اسمي واسم العريس ويكون فخم ومزين بالورد.. اسمهان:ماتبين شاي وطماط وبصل بعد؟؟ الله يقطع إبليسك كل هذي شروط؟؟!!! مرام:و ليه ماأتشرط؟ أنا مرام مو شوية!! اسمهان:أكيد ياسمو الأميرة بنجيب اللي تبينه بس عساه يثمر فيك وتستاهلينه!!ههههههه مرام:أشوف الغيرة بدت؟! اسمهان:حرام عليك..أنا زوجة الكبير يعني العقل والتدبير!وانتي زوجة الصغير اللي تحسد وبس تغير!! مرام:هههههههه بايــــــــــــــــخة!وأهم شي ياسوسو لاأشوف أحد من الشلة يجي يوم ملكتي ويتضبط بمشغلنا..ودي أقول لهم بس ماأتجرأ أخاف يزعلون!قولي لهم انتي! اسمهان:هههه ياحليلك..وعلى بالك مافي مشغل بالديرة إلا مشغلكم؟!أصلاً أسعاركم ناااار! مرام:بس كوافيراتنا شغلهم واااااو تقدرين تنكرين؟؟؟؟ اسمهان:لا..المهم جوالي يرن ومضطرة أقول لك مع السلامة.. وكان المتصل عبدالرحمن...بعد المقدمات المعهودة.. عبدالرحمن:اسمهان تجهزي بأمر آخذك انتي وأمي ونتغدى بمطعم وبعد صلاة العصر نمر على أحلام تطلع معانا ونروح السوق..وعقب المغرب أوديكم المستشفى تزورون زوجة أخوك.. اسمهان:إبشر,,,بأتجهز طيرااااان!! إلا دق تليفون البيت..وكانت المتصلة نجلاء...وبعد السوالف والقرقرة..انتهت المكالمة واتصلت أفنان...ومن ضمن المكالمة: أفنان:تصدقين ياسوسو؟مرات ضميري يأنبني إني وافقت على خطبتي من تركي!!! اسمهان:ليش؟حرام عليك..تركي ولد حلال ومن معدن طيب..انتي لسه ماتزوجتيه حتى تحكمين!! أفنان:لا مو قصدي إنه تركي فيه شي..أنا أقصد أختي سندس اللي تخبرينها..مو هاين علي أتركها واعتمادها بالكامل علي..أحس إنها أنانية مني!!! اسمهان:وش هالكلام ياأفنان؟بتكونين أحن عليها من بطن جابها؟وبعدين مسئوليتها كانت على أمك من يوم ماولدتها انتي ماتوليتي مسئوليتها إلا يوم كبرتي صح؟؟؟ أفنان:صح.. اسمهان:خلاص..الأنانية إنك تتركين نفسك وتفكرين بغيرك وهو ماعليه خلاف..أكيد أمك ماراح تقصر معاها..وبعدين اش اللي خلى هالموضوع يطرى على بالك الحين وانتي مخطوبة من مدة؟؟ أفنان:لأن أمي وأبوي بدأوا يفكرون هاليومين انه يستقدمون لها ممرضة فليبينية..ولما توصل بعد شهرين أنا أدربها على طريقة الاهتمام بسندس..تدرين..أمي صعب عليها توفق بين الاهتمام بسندس والعمل بمعهد تخريج الداعيات بوقت واحد..أضيفي انها ناشطة بالعمل الدعوي وإقامة المحاضرات وماعندها وقت..وسندس يبي لها تفرغ كامل.. عمى وخرس وشلل وضمور كامل! اسمهان:وين المشكلة؟كل شي وله حل!والممرضة بتكون أفضل منك لأنها مدربة على حالات مثل هذي..لو كل شخص بالدنيا عنده معاق بالبيت واعتزل العالم وتفرغ لخدمته بس !كان مالقينا حولنا أحد ينتج ويعطي..بالعكس أحيي أمك على محاولتها التعايش بشكل طبيعي وهي عندها بنت معاقة..لأنه أختك ولدت بهالمرض معاها يعني لازم انكم تتأقلمون مع الوضع..مو تحسون انه أي قرار جديد بيخرب عليكم الدنيا!!! أفنان:مدري ياسوسو أحس إنك أكثر وحدة أرتاح لكلامها..بس بنفس الوقت حاسة أفكاري مشوشة ومو عارفة كيف أتصرف! اسمهان:إلا أنا اللي أحس نفسي مشوشة!وراي طلعة وباقي ماتزهبت ومو عارفة كيف أتصرف لو جاء زوجي وشافني ماسكة السماعة..مع السلاااااااااااااامة!! وقفلت السماعة..إلا عبدالرحمن داخل!! واسمهان باقي لابسة ملابس البيت!! عبدالرحمن(بسخرية):ابشر..بأتجهز طيران!ياشيخة انتي لو رايحة سباحة كان مداك وصلتي!ليش مالبستي لين الحين؟؟؟ اسمهان:خذتني المكالمات..دقيقة وأجيك! ودخلت تتشطف وتبدل هدومها.. عبدالرحمن(وهو يكلم نفسه):الدقيقة في قاموس اسمهان تساوي ساعة والساعة فيها ستين دقيقة والدقيقة فيها ستين ثانية..يوووه أجل بنتأخر!! اسمهــــــــــــــــــــــــــ ـــــــــــان اخلـــــــــــــــــــــــــــ ـــــصي!!! استعدت اسمهان وراحت للمطعم مع زوجها وأم زوجها..... وبالمطعم كل واحد منهم أخذ المنيو(قائمة الطعام) وبدأ يختار.. عبدالرحمن:اش تبين تتغدين يمه؟ أم عبدالرحمن:صراحةً..أنا أحب الأكلات الشامية والمقبلات مرة..بس مدري عنكم اش بتختارون.. عبدالرحمن:رأيي من رأيك نفسي بتشكيلة مشاوي بعد.. اسمهان:أنا نفسي أطلب أكل صيني!! عبدالرحمن:أفا ياسمونة...تفضلين أكل تشيانغ تشونغ هونغ بونغ على الأكل الشرقي؟؟ اسمهان:الناس أذواق.. أم عبدالرحمن:هم بنات هالوقت كذا!!يكرهون كل شي شرقي إلا الرقص الشرقي!!ههههه اسمهان وعبدالرحمن:هههههه اسمهان:بالعكس ياخالتي..عبدالرحمن رجل شرقي وأحبه بكل مواصفاته حتى شرقيته اللي يلبسها برجليه..ويازين الهواء الشرقي!! عبدالرحمن:صحيح..واسمهان كل أفكارها من الشرق وأنا من الغرب وبالرغم من ذلك نتوافق مع بعض!تطبخ لي أحياناً أصناف لالها جنسية ولاهوية ولاهي من الشرق ولاالغرب وإن أكلتها أشرق!ودوم هي مغربت بي ومشرقت بي!!! أم عبدالرحمن:الله يجعلها شمس مشرقة بحياتك.... وبدأوا يدردشون لين جاء وقت الغداء تغدوا وشبعوا وقاموا..ركبوا السيارة ومروا على أحلام صلوا العصر عندها وأخذوها وراحوا للسوق.. وقالت لهم اسمهان عن رغبات مرام وذوقها.. لقيوا الأشياء اللي ناسبتهم من عربية الملكة وملحقاتها واتفقوا مع المحل يشرعها لهم بألوان مناسبة بحسب لون فستان العروس.. أما الذهب قرروا يأجلونه ليوم ثاني وراحوا اشتروا هدايا لسماح.. وأذن المغرب اتجهوا لمسجد يصلون فيه.. وبعد ماانتهوا من الصلاة وهم جالسين جنب بعض..فجأة كان فيه حرمة واقفة يسار اسمهان وفجأة انصرعت وطاحت على الأرض وانقلبت عيونها وصارت ترفس اللي حولها وتشد على لسانها لين انجرح وخرج من فمها دم وترغي وتزبد!!! انفجعت اسمهان وصارت تصيح من الخرعة مسكتها أم عبدالرحمن وأحلام يهَدُّونها..أما الحرمة المصروعة اجتمعوا عليها الحريم اللي بالمسجد ومسكوها بقوة وصاروا يقرأون عليها...لين ماراحت نوبة الصرع اللي انتابتها وقامت وصارت تناظر بإحراج في اللي حولها... الحريم:سلامات سلامات..لاباس عليك... الحرمة:مافيني إلا العافية بس نسيت آخذ دواي.. لبست شيلتها ومسحت فمها وخرجت... أم عبدالرحمن:الله يشفيها زين ماطاحت برة قدام الرِجال... أحلام:بسم الله توقعتها ممسوسة اسمهان:أنا اللي اخترعت ورجولي موب شايلتني..انصرعت علي..وخبطت فيني... أم عبدالرحمن:يمكنها مثل عمة أبوك منيرة تتذكرينها ياأحلام؟ أحلام:ايه..الله يشفيها.. اسمهان:طيب ليش يصير الصرع؟ أم عبدالرحمن:حسب ماأعرف إنه الكهرباء تزيد بالمخ..والأكسجين ينقطع عن مراكز بالدماغ تخلي الانسان موب متوازن ويتشنج مثل ماشفتي..ومنيرة كانت لاانتظمت على الدواء تكون بأحسن حال بس أول ماتتأخر عن الموعد وتنساه تجيها نوبة الصرع... خرجوا من المسجد ولقيوا عبدالرحمن ينتظرهم... توجهوا للمستشفى..ودخلوا لسماح لقيوا الغرفة مليانة زوار أهل سماح وأهل اسمهان وبعض صاحبات سماح وجاراتها.. سلمت أحلام وأم عبدالرحمن وباركوا وشافوا انه الوضع يجبرهم يمشون لأنه الغرفة زحمة..أما اسمهان جلست... شوي الا انفتح باب الغرفة ودخلت عـــــــــــــــــــــــــــــ ــــــــزة!!!!! سلمت على الجميع..وكان الزوار كل شوي يقل عددهم.. اسمهان:أعرِّفكم ياجماعة..هذي عزة زوجها صاحب عبدالرحمن.. عزة:قولي هذي عزة صاحبتي!! سلمت على الجميع.. عزة:مين هذول يااسمهان عرفيني! قامت اسمهان تعرفها بهم وحدة وحدة.. عزة لــسماح:مبروك..ان شاء الله الجاي ولد!! سماح:عندي ولدين قبلها والحمدلله... عزة:على بالي أول طفلة... أسماء:وانتي كم عندك ماشاء الله؟ عزة:ثلاث ..بنت وولدين...عقبال اسمهان..!!! اسمهان:آمين... وقامت أم اسمهان تسولف وتقول حكايات.. عزة:باين عليك ياأم اسمهان اجتماعية وتحبين الناس ليتك تعطين اسمهان شوي...لو ماأرفع عليها سماعة وأتواصل معاها ماتسأل عني!!!!!!!!! أم اسمهان:اسمهان وراها دراستها يابنتي..حتى إحنا مانقابلها إلا نهاية الأسبوع... عزة:أنا لو علي ماأقعد دقيقة بالبيت..بس حكم القوي على الضعيف!!! أم تركي:الحرمة السنعة مكانها البيت..كثر الدوجة تضر ماتفيد!!! عزة:مو من كثر ماأدوج..أنا لافكرت أطلع أبي أطلع أؤدي واجب بس!مثل جيتي لكم الحين ماجابني زوجي لين ماعل قلبي!قال إيش ماله داعي!! ابتسام:ماكان له داعي تتعبين نفسك وتجين دام زوجك مو راضي عزة:موب على كيفه!!أنا لو أطاوعه بكل شي كان خربت الدنيا!شرهان علي مازرت أخته يوم ولدت ويبي يعاندني ومايجيبني لكم!! تفشلت اسمهان من صراحة عزة ومو عارفة شلون تتصرف!! أم اسمهان:ولش يابنتي مازرتي أخته؟؟؟ عزة:من زين أهله حتى أواصلهم؟ أنا أواصل اللي أحبهم بس!!!!! أم سماح:بس الواجب واجب تحبين أهل زوجك أو ماتحبينهم لزوم تقومين بواجبهم..ولك أجر عزة:أجر يجيني من طرفهم ماأبيه! أسماء:يالطيف يارب..ذابحين لك أحد؟؟؟ عزة:لا ياحبيبتي..بس مافيهم خير وكل شي ينتقدوني فيه..و... قاطعتها اسمهان وتبي تلطف الجو: عزة تفضلي شوكليت ..واشفيك ماتتقهوين؟؟ شربت عزة قهوة..وبدأت بتتكلم قامت اسمهان قاطعتها:تصدقين؟ آثاري عبدالرحمن يوم جاء ياخذني أمس قابل صاحبه سلمان وكان معاه زوجته..سأله عبدالرحمن:عسى ماشر قال ان زوجته حامل بالثامن.. عزة:وعسى في نيتك تزورينها لاولدت ؟؟ اسمهان:إن شاء الله..اش المانع؟ عزة:بعدين أحكي لك..حرمة ماوراها إلا المشاكل ودوخة الراس بعد دقايق خرجت عزة من الغرفة يوم زوجها ناداها.. ابتسام:استغفر الله..هم وانزاح!! أسماء:تعالي يامدام اسمهان..بالله هذي وحدة تتشرفين بالتواصل معها؟؟ اسمهان:يعني اللي يشوفكم يقول انتم ماتحشون وتتكلمون مثلها!!!!! أسماء:لا ماأنكر بس على الأقل نتكلم بيننا وبين بعض..مو عند الغُرب اللي مانعرفهم!!شكل هالحرمة نسرة ماتتعاشر!! سماح:تبين الصراحة ياسمهونة؟أنا مرة ماارتحت لها!! أم تركي:يابنتي الله يكملك بعقلك وش حادك على هالحرمة ماتنحب أبد!! أم اسمهان:صادقين يابنتي...شكلها الله يغفر لها مو عاقلة وتحب المشاكل وماعليك منها لاولدت زوجة صاحب زوجك روحي زوريها.. بدأت الدراسة..وكانوا الشلة مستانسين بلقاء رانية والكل يسألها عن خطيبها! رانية:وش السالفة؟كل أسئلتكم عن أخباري وأخبار العريس؟ايش؟ماحد انخطب غيري؟ نجلاء:تبين الصراحة؟ماأتخيل إنك دلوعة وتسوين حركات رومانسية! مرام:صادقة نجلاء ماأتخيل فيك أنوثة وخجل!! رانية:لا ياشيخة!!خلينا المياصة والتغنج والأنوثة لك يارمرمة يارِمَة! مرام:أنا رِمَة؟؟طيب ياروينة هيا ادفعي ..ادفعي قيمة التسريحة والمكياج وتنظيف البشرة وبرد الأظافر وحمام الزيت اللي سويتيه بمشغلنا أيام الملكة!! أفنان:أحلى يارنو..سويتي صيانة شاملة يوم الملكة!وأنا أقول اشبك تِلِقين مثل النجفة!!! اسمهان:ياشينكم يالبزران!بالله اهجدوا... رانية:حاضر ياطنط سوسو البسي نظارة وانتي تبقي ستيتة!! نجلاء:يازينك ياسمهونة مرات أحسِك أعقل وحدة فينا! رانية:وليش ياحظي؟عشانها متزوجة؟بكرة ألحقها وأوريكم الرزانة والثقل كيف شكله!!!!!!!! اسمهان:رزانة مع هالنويصر؟ ماظنتي!!! الشلة:ههههههههههههه =============== واستمرت اتصالات ناصر برانية يومياً... رانية:ياخي إنت قلق!! ناصر:اسلمي؟ماسمعت!! رانية(وقامت ترقعها):أقصد مسبب لي توتر..أعد الدقايق والثواني وأنا بانتظار اتصالك!!!!!! ناصر:لاتنتظرين..دقي يالبخيلة!!المغزلجيات عندهم كرم أكثر منك لاويتصلون ويطولون مكالماتهم بالساعات!!!!!!!!!!!!!!! رانية:ايــــــــــــــــــــــ ـــش؟انت تغازل ياقليل الحيا؟؟ ناصر:أعوذ بالله!مين قال؟؟هذا تعبير مجازي فقط لتقريب الصورة لذهنك!!! رانية:تكفى يالشاعر المخضرم!طيب عطنا قصيدة وأنا أحلم حلم أسمع منك قصيدة من يوم ماخطبتني... ناصر:زين خذي هذي... إنتي حلوة انتي جميلة وأحلى بنت من التراث وثوبك الشعبي فشيلة بس عليك ينطق حلا! رانية:اش هالفن لاقافية ولاوزن؟ ولامعنى ولامغزى!ياخي أتعبت الشعراء من بعدك!! ناصر:زين عطينا انتي من فنون البديع اللي تتقنينها!!! رانية(تستهبل): إنت خطيبي إنت زوجي إنت كحلي وإنت روجي إنت عطر غالي بشنطتي مالي غنات عنه بخرجتي ناصر:ههههههه وش هالخرابيط؟ انتي بعد قصيدتك ذي تروحين تفتحين بسطة عطور ومكياج في الخازكية!!!!!!!!!!!! رانية:معليش أيها الشاعر العظيم صعب أوصل مستواك!!! مر الأسبوع الدراسي على خير من غير جديد يذكر..وسماح طلعت من المستشفى على بيتها وأمها جلست معاها لرعايتها فترة الأربعين.. وأبلة جوهرة فرحانة بحملها اللي صار واضح للجميع! وقبل ماتبدأ الدراسة كانت ابتسام قد رجعت لبيتها ولكنها فوجئت ببوادر ولادة مبكرة في أول أسبوع دراسي!باقي على موعدها الفعلي للولادة 23يوم تقريباً..... وولدت هناك ولما زوجها خبَّر أهلها سافرت أمها لها....وأخذت معاها الشغالة كاتيا... وبيوم راحت أسماء تزور اسمهان.... اسمهان:ياحليل ابتسام ودي أشوف ولدها.. أسماء:الجوالات ماخلت شي يقدرون يصورونه لنا ويرسلون الصورة وسايط.. اسمهان:طيب متى بيطلع من الحضانة؟ أسماء:مدري..بس المعروف إنه أي طفل ينولد قبل أوانه..يظل فترة في الحضانة لين ماتتحسن أوضاعه... اسمهان:وليش ماتفكر تجينا مع أمي لارجعت؟ أسماء:نسيتي إنه بناتها بالمدرسة؟ اسمهان:ايه صح!على كذا ماراح نشوفها إلا بإجازة الصيف بعد3 شهور!طيب اشفيهم ماسموا الولد لين الحين؟؟؟ أسماء:أنا متأكدة من إنهم بيقعدون يحومون لين مايرضخون لرأي العجوز أم زوجها ويسمونه على الشيبة الله يرحمه! اسمهان:حرام عليك!تهقين ابتسام بتوافق تسمي ولدها معيقل؟ أسماء:مع العجايز كل شي جايز!!! ========================= وفي منزل ابتسام كانت أمها وأم زوجها قاعدين معاها... أم اسمهان:وش نويتوا تسمون ولدكم ياابتسام؟ أم زوج ابتسام:مايحتاج تسألينها بيسمونه معيقل ان شاء الله!!!!! أم اسمهان:بس ياأم عبدالعزيز ماتلاحظين ان الاسم قديم ومو دارج هالأيام ويعتبر غريب؟..والمفروض إن الأب والأم يجتهدون في تسمية ولدهم بإسم أحسن؟ أم زوج ابتسام:إحنا هذا طبعنا كل رجال لازم يسمي ولده على أبوه.. ابتسام:خالتي بأجيبها لك من الآخر!انتي ماحملتيه ولاولدتيه ولابتتعبين في تربيته!إذن أنا الوحيدة اللي من حقي أسميه!! أم زوج ابتسام:والله يابنت نبيلة صار لك لسان واستقويتي بـ أمك!الولد بنسميه معيقل يعني بنسميه معيقل..وغير كذا ماعندي!! أم اسمهان:اذكروا الله ياجماعة.. ودخل زوج ابتسام على الهوشة.... أم زوج ابتسام:تعال اسمع زوجتك واش تقول؟تقول مو من حقي أسمي الولد وأنا جدته!!! ابتسام:الله أكبر!أنا قلت لك هالكلام؟؟أنا قلت ماحد تعب وبيتعب فيه غيري لذلك أنا الوحيدة اللي المفروض أسميه.. زوج ابتسام :ماشاء الله عليك..فسَّر الماء بعد الجهدِ بالماء!!!!! أم زوج ابتسام:ولدك بتسميه معيقل غصب عن اللي يرضى واللي مايرضى!! زوج ابتسام:ولايهمك يمه..مايصير خاطرك إلا طيب.. ابتسام(بدهشة):نـــــــــــــــ ـعم؟؟؟ومين قال لك أنا راضية؟؟ أم اسمهان:خلاص استهدوا بالله ومايصير إلا كل خير.. ابتلت عيون ابتسام بالدموع وهي على فراشها.. وقامت العجوز لدورة المياه..وأم اسمهان جاها اتصال وقامت تكلم بالغرفة الثانية.... ابتسام:صدقني إني ماراح أنادي ولدي طول حياتي بإسم معيقل حتى لو كان مسجل على الورق... زوج ابتسام بهمس:يابنت الحلال أنا ماسميته معيقل ولاشي..بس شكلياً قدام أمي نقول لها كذا عشان ماتزعل! كم بقى لها بالعمر مسكينة؟ خل نرضيها!لكن أنا سميت الولد وسويت أوراقه خلاص!! ابتسام:من غير ماتشاورني؟؟؟؟؟؟ زوج ابتسام:الصراحة أنا طاح بيدي قبل مدة دفتر مذكراتك أيام الجامعة ولاحظت إنك توقعين بإسم(أم صهيب) فقلت بنفسي أكيد هالاسم داخل مزاجك..وسميت ولدنا صُهيب!! ابتسام:روح عسى الله يوفقك ولايحرمني منك!! ======================= مرت الأيام وبعد 3 أسابيع رجعت أم اسمهان لبيتها.... أما في المدرسة دار الحوار التالي... نجلاء:مبروك يامرام مقدماً مابقى على ملكتك إلا أسبوع بس.. أفنان:ياالله ماأسرع الأيام كيف تجري! رانية:الـــــــــلــــــــــه. .الوناسة مقبلة والأفراح بالطريق... اسمهان:ياترى واش اخترتي زَفَتِك؟علمينا عشان نعرف شلون نتساعد معاك ونشاركك. مرام:معليش ياجماعة!أكثر من حضوركم ماأبغى!يكفي التصفير والتصفيق منكم لاطلعت على المنصة!! رانية:ايش؟ايش؟تصفير وتصفيق؟تبينا نحضر عشان نصفق ونصفر؟شايفتنا كفار قريش؟؟ مرام:وش هالكلام؟وكفار قريش؟تستهبلين؟؟ أفنان:صدق..كفار قريش كانت عبادتهم في الجاهلية الطواف حول الكعبة والتصفيق والتصفير!!ماقد قرأتي في القرآن كلمة مكاء وتصدية؟؟؟؟؟؟؟ اسمهان:غريب طبعك يامرام!العادة الوحدة تبغى صديقاتها بيوم فرحتها يكونون حولها ويشاركونها..أنا شخصياً أروع ذكرى أتذكرها من ملكتي هي وجودكم حولي والأجواء الحلوة اللي سويتوها.. مرام:سوري..لاتفهموني غلط! ماودي بخبص الحركات أبي ملكتي تكون راقية..!!! رانية:ياشيخة حق من رقك مثل الرقاق وسوى بك خبيصة!! يعني قصدك إحنا بنخبص لك ملكتك؟ والا كنتي شايفة ملكاتنا مخبوصة؟؟باقي نشوف ملكتك الراقية شلون بتطلع!!عسى الكهرب ينطفي عليك وانتي داخلة بالزفة!!!!! الشلة:هههههههههه مرام:تدعين علي يالنذلة؟؟طبعاً يحق لك..انتي أكثر وحدة مجنونة أعراس..وودك جنانك كله تطلعينه لاحضرتي ملكتي..لكن حريمتك!! نجلاء:ياجماعة اشفيكم قلبتوا السالفة هوشة؟المسألة ومافيها إن مرام تبي تحتفظ ببريستيجها يوم الملكة!!مالي داعي نخربط عليها رانية:هي الخسرانة..أنا عن نفسي بأقعد لابدة بالكرسي وماني قايمة من مكاني!! اسمهان:خذيني جنبك..أنا زوجة الأخ الأكبر لخطيب مرام..وبأسوي فيها رزة وانثبر بعد.. أفنان:وأنا مالي في الرقص كثير بس أجامل بعض المرات.. نجلاء:وأنا بـ أنصاع لأوامر صديقتنا مرام.. مرام:شكراً..وهذا عشمي فيكم..عن إذنكم وراحت تتكلم مع بنات واقفين بعيد نادوها كانوا يستفسرون عن أسعار مشغل أختها.. رانية: بنات ..يوم ملكتها نبي نسوي دجة معتبرة وماعليكم منها!!مين منكم موافقة؟؟؟ اسمهان ونجلاء وأفنان:موافقين كلنا!!! بدأ الأسبوع التالي اللي بنهايته بتكون ملكة مرام....بس لاحظوا الشلة انه مرام غابت عن المدرسة يوم السبت وغابت يوم الأحد!! و بالفسحة.....يوم الأحد.. أفنان:انتم مو ملاحظين انه مرام غايبة لها يومين؟؟غريبة مو عادتها؟ نجلاء:أحد منكم اتصل فيها أمس؟؟؟ رانية واسمهان:لا... اسمهان:عسى المانع خير ان شاء الله.. نجلاء:فديت روحها..أخاف تعبانة؟هذا مو وقت تمرض فيه ملكتها هذا الخميس!!!!!! رانية:أقول دلع بنات!!!أكيد مافيها شي! اسمهان:الغايب عذره معاه..على طول قلتي دلع بنات؟اش دراك؟؟ رانية:مراموه أعرفها زين ياحبها للتمايع والتغنج!موبعيدة شعرة من راسها طاحت فتكدر خاطرها!!أو طرف ظفر اصبع يدها الصغير انكسر فزعلت عليه وغابت!! نجلاء:يقطع أبوالغيرة يارنون! رانية:وجع!ماني غيرانة..وخلني أشوف وحدة منكم تتصل عليها اليوم!يمين مايتصل بها أحد غيري! ============================== == وبعد ماانتهى دوام المدرسة..رجعوا الجميع لبيوتهم....إلا جوال رانية يرن! والمتصل ناصر!! رانية(باشمئزاز!):هلا..خير؟؟؟ ناصر:طبعاً خير..وأنا مايجي من وراي إلا الخير! رانية:هات ماعندك! ناصر:وشفيك تتكلمين من تحت أضراسك؟؟ رانية:توي راجعة من المدرسة ولابدلت هدومي ولاتشطفت ولاصليت الظهر وإنت متصل تعطلني!إلا تعال إنت ماعندك دوام؟؟؟؟؟؟؟؟؟ ناصر:إلا عندي وقاعد أسولف معاك من مكتبي وماحد حولي!! رانية:ياسلاااااااااام يعني أقدر أسبك براحتي؟؟ ناصر:لاتسبيني حِبيني!! رانية:شوف بالعربي الفصيح..إنني مشغولةٌ جداً ياابن شماء هلا ضففت وجهك عني إنني زهقانةٌ مرة ومبطوطةٌ كبدي!!!!!!!!! ناصر:ماعاش من يبط كبدك ياابنة موضي!ثكلتك أمك حبيت أسمع صوتك الرنان فاتصلت عليكِ هل ارتكبت جرم بحقك؟؟؟ رانية:عزيزي المتصل!اتصل في وقتٍ لاحق! ناصر:لحظة لحظة لاتقفلين!عندي لك خبر بمليون ريال! رانية:عجِل وقول.. ناصر:بينقلونا شرورة!!!!! رانية:هاااه؟؟من اللي بينقل معاك؟؟ ناصر:انتي طبعاً.. رانية:تخَسِي إلا إنتْ!!زين إنك علمتني قبل الزواج!عشان أتمسك ببيت أبوي! ناصر:وشفيها شرورة؟فيها الماء والخضرة وماينقصني إلا الوجه الحسن! قفلت رانية الخط!!!!! وبعد ماانتهت من أمورها نزلت للصالة تتغدى مع أهلها..وبعد الغداء فكرت تتصل بـ مرام..وبعدين تروح تنام.. اتصلت على بيت مرام و ردت أم مرام عليها.. رانية:السلام عليكم..شلونك خالتي؟؟ أم مرام:وعليكم السلام ورحمة الله..بخير..بس مين انتي؟؟ رانية:أنا رانية صاحبة مرام.. أم مرام:هلا هلا...وش أخبارك؟ رانية:تمام ونحمد الله..سلامتها مرام ليش غايبة؟تعبانة؟؟ أم مرام:لا..مافيها إلا العافية..الحين أناديها لك..مرمر ..مرمر حبيبتي تيليفون عشانك..صاحبتك على الخط.. مرام:ماااااااااااما قولي لها تنتظر لحظة! وبعد شوي..جت مرام ومسكت السماعة:آلو؟ رانية:هلا..ببنت ماما دلوعة البابا!وشفيك غايبة لك يومين؟وأمك تقول مافيك إلا العافية؟؟؟؟؟؟؟؟ مرام:يختي وشفيك علي؟نسيتي إني عروس؟؟؟ رانية:خخخخ ضحكتيني وأنا ماأبغى أضحك!تراك بتملكين بس مابتتزوجين وتروحين مع العريس!وش علاقة عروس بالغياب؟؟؟ مرام:عروس يعني لازم أتجهز..الخميس اللي راح سويت تنظيف بشرة..تبيني على طول أركض على المدرسة.عشان الشمس تعدم بشرتي؟ رانية:أقول ياشين الغُنْج على الحمير العُرْج! مرام:نعم؟؟؟؟ رانية:آسفة خانتني الكلمات!يعني بنشوفك بكرة؟؟ مرام:لا ياقلبي بتشوفوني يوم الخميس ان شاء الله بالقاعة.....!!ومثل ماوصيتكم خزعبلات وحركات بلدي ماأبغى في ملكتي!يازين الهدوء والكلاسيكية لما تكون بالمناسبات!! رانية:وش فهمك انتي؟؟إلا يازين الطنطنة والدندنة بالمناسبات!عموماً حبيت أتطمن عليك لايكون حاشك شي وتوقعاتي ماابتعدت كثير عن الواقع....... مرام:ليش اش هي توقعاتك؟؟ رانية:أنا قلت أكيد شعرك ولا ظفرك وآثاريك مابعدتي طلعت السالفة ببشرتك!! راحت رانية للمدرسة ثاني يوم واجتمعت بالشلة... نجلاء:هاه؟اش أخبار مرام؟ترانا نفذنا كلامك ومااتصلنا فيها بناءً على طلبك. رانية:مافيها شي..خايفة على بشرتها من الشمس ياحظي!!وتقول إنها عروس ولازم تستعد!ورسالتها لكم ماتبي خزعبلات وحركات!!بس على مين يامرام؟؟أوريكم فيها يوم الملكة!! أفنان:عاد إنتي من غير ماتسوين شي يارانية أي مناسبة تروحينها تقلبينها فوق تحت!فمابالكم يوم توعدتي مرام الله يستر بس!هههههههه اسمهان:الله يهديكم بس..اشفيكم هالسنة تركتوا المقالب والمشاكل في بنات الناس وقمتوا تتمشكلون مع بعض؟؟؟؟والوحدة منكم يالطيف من يوم تجي بالصباح ونفسها بـ راس خشمها!اللي عندها طاقة زايدة تروح تكنس الساحة أحسن لها!!!!!!! رانية:أكنس الساحة يااسمهانوه؟؟طبعاً كأنك واقفة بـ صف الست مرام؟مو بتسيرون سلايف؟بتبدأ حركات الأحزاب! اسمهان:أي أحزاب وأي خرابيط؟كلكم على العين والراس..وبعدين من يوم ماتعرفنا على مرام قبل سنين وإحنا داريين إنها مغرورة شوي ودلوعة..اش اللي اختلف يعني؟؟ رانية:اللي اختلف إني أكثر وحدة صار لي مواقف معاها..بس مو كل شي أحكي لكم عنه!! نجلاء:هذا لأنه لسانك طول الوقت بره عطيه فرصة وحدة بالعمر يرتاح شوي!!ماأقول غير الله يعين نويصر عليك!! اسمهان:ايه صحيح يارنو وش أخبار هالنويصر معاك؟؟؟ رانية:وااااي وااااي عليه فديته طايح فيني رومانسية وغزل بشكل ماحصل!! أفنان:الله يهني سعيد بسعيدة!! نجلاء:هههههههه نفسي أصدقك..بس مو قادرة!! رانية:بالله خذي أفنان وضفوا وجوهكم عني أبي أتكلم مع اسمهان شوي.. وراحوا نجلاء وأفنان... وقعدوا رانية واسمهان في طرف الساحة... اسمهان:خير يارنو؟تبين تتكلمين معاي بخصوص أي موضوع؟؟ رانية:بخصوص نصور هذا اللي فاقع لي مرارتي!! اسمهان:أمرك عجيب والله..مو هذا النصور اللي قبل شوي تقولين عنه طايح فيك تغزل ورومانسية؟؟ رانية:ياسوسو لاتدققين! من كلامي خذي و خَلِي!!وبعدين هذي حركات قدام البنات!! اسمهان:فضفضي وانفضي غبارك!أقصد أخبارك.. رانية:يختي هالآدمي كل يومه ينكت ويمزح.. اسمهان:ياعمري ينكت ولا ينكد عليك!شي أهون من شي.. رانية:بس ماينعرف صدقه من كِذبه!! اسمهان:إنت ذكية وتقدرين تميزين! رانية:وقال ايش؟بينقلني معاه شرورة!ديرةٍ صمعاء نائية!! اسمهان:الله يعينك..بس مِن حب يتحمل!!! رانية:أي حب وأي قرنبع؟أنا معاه بكل شي لكن يخرجني من جدة وسط أهلي وناسي..مستحيل!!! اسمهان:يعني اش تبين بالضبط؟؟ رانية:أنا يوم جاء يخطبني كان شرط أبوي عليه إنه نسكن بجدة ومانطلع منها وهالحين أشوفه يبينا نسكن بأخس مكان..بالله جدة موب أحسن من شرورة بمليون مرة؟!!!فياليت تكلمين عبدالرحمن يقنعه يتنازل عن النقل..تدرين أصحاب ويمونون على بعض! اسمهان:ياسلام؟وانتي ليش ماتقولين هالكلام لناصر مباشرة؟ رانية:مالي نفس أتصل فيه ولاأكلمه..دايماً يستهبل علي ويسوي فيني مقالب!! اسمهان:زين خلي أبوك يكلمه! رانية:إلا أبوي!! لو يدري إن السالفة فيها نقل.. ممكن يفركش هالخطوبة!! اسمهان:وإن كان ناصر ملزِّم على النقل..واش بتسوين؟؟؟ رانية:بأسوي مثل أبطال المسلسلات وأخلع الدبلة وأرميها بوجهه وأقول:مش عايزة أشوف وِشك خالص!إنتَ طالق! اسمهان:صحيح إن أهل العقول في راحة!!!!!!!!! وكلمت اسمهان زوجها بموضوع ناصر.. عبدالرحمن:أفا يالعلم!غريبة مابلغني؟عاد هو مايخِش عني سالفة؟ اسمهان:عاد رانية مسكينة تقول لو أصر على النقل ممكن تفسخ خطوبتها! عبدالرحمن:مدري أحس الموضوع مو بداخل مزاجي!هنا بيته تمليك ووظيفته ممتازة والعمل متمسكين فيه والشركة اللي يشتغل فيها لها فروع بالرياض والشرقية..يعني لو بغى ينقل فالشرقية راح تكون الحل المثالي لأن اخوانه وأقاربه هناك...فاإيش اللي بيرميه على شرورة؟؟؟ واتصل عبدالرحمن وسأله عن صحة الخبر!! عبدالرحمن:ياحبيبي وش هالأخبار اللي سمعناها عنك؟؟ ناصر:ياساتر استر!وش سمعت؟؟ عبدالرحمن:إنك بتنقل شرورة! ناصر:هههههه أي شرورة؟أنا ممكن أفكر أنقل كينيا ..الصومال.. بس شرورة ماقد خطرت على بالي!! عبدالرحمن:عاد هذا العِلم اللي وصلنا! ناصر:حِسادي كثير..بس لايهمك!! وبعد شوية دردشة قفل عبدالرحمن السماعة وقال لاسمهان:مثل ماتوقعت..صديقتك هذي ماعندها سالفة لابينقلون ولاشي...يمكن ناصر يمزح عليها وهي صدَّاقة حبتين! اسمهان:أشوى!!ماني متخيلة إنه بيجي يوم وأفارقها.... ================== أقبل يوم الخميس وجاء اليوم المنشود ومرام في قمة توترها!! وبدأ الناس يتوافدون على القاعة..وكانت هذي الليلة بحريــــــــة! يعني كل الديكورات مستوحاة من قاع البحر.. مدخل القاعة كان فيه طاولة عليها شموع بأشكال أصداف وقواقع..ومحارة كبيرة تنفتح وبداخلها دفتر يسجلون فيه الزوار مباركتهم وأحواض زجاجية مليانة حبات لؤلؤ وأصداف حقيقة.. كاسات شفافة معباة برمال ملونة وبراويز صغيرة فيها صور لمرام وهي صغيرة وتلعب عند شاطيء البحر... وفوق الطاولة نازل من السقف شبكة عليها قواقع وأسماك...كان الديكور حلو بمعنى الكلمة.. على طاولات الزوار بداخل القاعة كانت المزهريات اللي تزين الطاولات على شكل صدفة فضية وبداخلها ورد.. وترمس شاي وترمس قهوة والشي الغريب انهم حاطين بعد ترمس للموية الحارة وصحون زجاجية فيها سكر وأكياس كوفي وأكياس شاي أخضر!!!!وبالنسبة لسبتات الضيافة كان فيها تمر+شوكولاتة بشكل أصداف وقواقع+سينابون+بيتيفورات ومعجنات.. الكوشة:https://im14.gulfup.com/2012-08-10/1344547543821.jpg وبعد وقت من بداية المناسبة أقبلت اسمهان مع أم عبدالرحمن وبنتها أحلام والخالة جوهرة وأقارب لهم وزوجات أعمام وعمات عبدالرحمن وبناتهم وكان عددهم تقريباً كلهم22... واستقبلوهم بالغطاريف والبخور أهل مرام وأقاربها.... وبدأوا أفراد الشلة يكتملون... وآخر وحدة حضرت منهم رانية..بالفستان الأحمر اللي لبسته يوم ملكتها! https://im20.gulfup.com/2012-08-10/1344547613811.jpg وبعد ماسلمت على أفنان واسمهان ونجلاء اللي كانوا قاعدين على طاولة وحدة... رانية:واشفيكم تناظروني كذا؟؟ مستغربين ليش اني لابسة فستان ملكتي؟؟ببساطة لأني اليوم أبغى تحضيرة!!!!!!!! الشلة:ايييييييييييييييش؟؟ رانية:واشفيكم اخترعتوا؟تحضيرة يعني زفة خاصة لي بما إني عروس جديدة!! نجلاء:بس ياحبيبتي..انتي ماتزوجتي لسه..السالفة ملكة بس..والمتعارف عليه ان الوحدة تتحضر لما تكون عروس..وغير كذا انتي مو من جماعة مرام..يعني ماله داعي.. رانية:أقول..الليلة خاربة يعني خاربة وش لقفكم انتوا؟الست مرام مو قالت ماأبغى منكم إلا حضوركم وبس!!تعتقدون ليش؟؟مو كأنها مستعرة مننا؟لا ياحبيبات قلبي حِنا صديقاتها وأنا أرفض إنه وجودنا يكون مهمش!لازم نشاركها من غير مانخرب عليها!!! أفنان:يعني بتنزفين قبلها؟؟ رانية:لاياعيوني أبي أنزَّف قدامها عشان تشوفني زين!!وأرتز جنبها في الكوشة!!! اسمهان:بس أنا من رأيي تعطين أهلها خبر عشان مايزعلون!! رانية:بأقول لهم بس مو الحين..هالحين بأروح للطقاقة وأقول لها اش الزفة اللي أبيها تزفني عليها.... ورجعت رانية وقاموا يدردشون ويسولفون سوى ويتذكرون المواقف الحلوة اللي حصلت بينهم زمان... نجلاء:اش رايكم الحين نروح لمرام نسلم عليها؟؟ الشلة:موافقين... ولما وصلوا لباب غرفتها كانت أختها الكبيرة ماجدة(صاحبة المشغل) خارجة من عندها... رانية:ممكن ندخل نسلم على مرام؟؟ ماجدة:سامحوني ياجماعة بس مرام من الأول أعطتني تعليمات بأني ماأخلي أحد يدخل عليها!!! نجلاء:بس إحنا أعز صاحباتها أكيد بتفرح لوجودنا.. ماجدة:هي بالذات وصتني إني ماأخلي أحد من صاحباتها يدخل عندها..تقول لكم بتقابلكم على المنصة ان شاء الله! وراحت ماجدة..... رانية:شايفين ياحلوات؟صاحبتكم المخلصة مدري اشفيها منقلبة علينا؟بالله هذا كلام؟الود ودي لو قالت لنا بوجوهنا من قبل لاتحضرون ملكتي كان أبرك!!!! أفنان:يمكن تبغى تفاجئنا بمظهرها على المنصة وماتخرب طلتها!! رانية:لا الصراحة مرة أقنعتيني!! نجلاء:من جد حركة غريبة من مرام ومالها معنى! اسمهان:خلوها على راحتها..وليش نبان قدامها ملاقيف وملاهيف على شوفتها؟...خلوا الأمور تمشي مثل ماهي تحب..حِنا جينا نستانس مو نضيق صدورنا.. ورجعوا الشلة وماحد له نفس يشارك أهل مرام بالرقص والانبساط!!! ظلوا قاعدين يسولفون..إلى أن اقترب موعد الزفة..فتحت رانية كيس معاها وبداخله سلتين وبداخلهم ورد وقامت تركض باتجاه المدخل وأخذت شوية رمل ملون من الطاولة اللي مزينة بالمدخل وشوية حبات لؤلؤ وحطتهم بوحدة من السلات..ورجعت قعدت بكرسيها!!! كانت طاولة الشلة ملاصقة شوي للمسيرة الطويلة اللي بتمشي عليها العروس.. وفجأة خفتت الاضاءة واشتغل شريط فيه أصوات طيور النورس وأمواج البحر..وبعدين أصوات صيادين يقولون:هيلا هيلا وكأنهم يرمون شباك الصيد بالبحر..وصوت رجل يغني موال فيه قصيدة بأسماء العروسين...مرافقة له صوت الأمواج والطيور.. وبعدها أغنية أغلى الآليء..وبدأ يطلع دخان كثيف على الأرض خارج من محارة كبيرة على بداية المسيرة وتفاجأ الحضور بخروج مرام عليهم من وسط المحارة وهي لابسة فستان مشابه لعروس البحر!ضيق من فوق ووسيع من تحت الركبة بشكل مشابه لذيل السمكة ولونه موف على ليلكي وتسريحتها مرصعة باللؤلؤ...والاكسسوار الفخم اللي لابسته كله لؤلؤ بلؤلؤ... https://im12.gulfup.com/2012-08-10/1344547748151.jpg رانية:ماشاء الله يامراموه خارجة علينا من محارة؟؟زين ماطلعت لنا من بطن حوت!! الشلة:ههههههههه وقفت رانية جنب المسيرة ومعاها سلة ورد مليانة حبات لؤلؤ ورمل وصارت تغطرف وترمي مابداخل السلة على مرام!!!اللي كانت تمشي على المسيرة بدلع وببطء شديد!!!!! واسمهان(بهمس):رانية الهبلة؟لاتفشلينا تعالي انثبري!! نجلاء:ههههه خليها تفش غلها شوي! أفنان:رانية تعالي اجلسي ياويلك من مرام! رانية:يمه خرعتيني!!واش بتسوي لي هالمرام يعني؟؟بتصيدني بـ سنارة؟ ولابترميني للسمك ياكلني؟!!! وظلت مرام تمشي الهوينة لين ماوصلت للكوشة وجلست..وبعدها بشوي خرجوا الشلة لمدخل القاعة ومع أفنان واسمهان سلات الورد اللي جايبتهم رانية..ووقفت نجلاء بالأول ووراها رانية وورا رانية اسمهان وأفنان.. وقامت الطقاقة تطق الزفة اللي رانية طلبتها ودخلت نجلاء على الحضور وقالت بعالي الصوت:ألف الصلاة والسلام عليك ياحبيب الله محمد لللللللللللللوش!!!!!! وصارت رانية ماشية ووراها اسمهان وأفنان يرشون عليها ورد... ومرام متفاجئة من المنظر..نادت مرام أمها وقالت(بزعل):يمه ليش خليتوها تنزف؟؟ أم مرام:عيب يابنتي نقول لها لا!حتى هي عروس وتبي تفرح.. مرام:فرحتها سوتها بيوم ملكتها خلاص لازم تجي وتنشب لي هنا بعد؟!!أف! صاروا الناس يتسائلون:من هي هذي؟ حتى أم رانية صارت تضحك وهي بمكانها ماهي دارية اش السالفة!!!! وجلست رانية أخيراً بالكرسي اللي جنب مرام وقالت:مبروك ياعروس! مرام:والله مدري مين فينا اللي عروس؟ قاموا أفنان واسمهان ونجلاء يسلمون على مرام... مرام:أنا يارنو..ترمين علي تراب ولؤلؤ؟؟ رانية:بعد انتي لابسة لي عروس بحر واش تبين أرمي عليك؟سمك وصدف؟ قعدت مرام متضايقة ......والشلة يرقصون قدامها..وسحبوها ترقص معاهم لكنها رفضت.. وطلعوا أهل عبدالرحمن وأقاربه يسلمون عليها وهي تسلم...ولما شافت مرام أم عبدالرحمن قامت تبوس راسها ويدها..وتكلمها بشوق! رانية(بهمس)لاسمهان:يقطع أبوالنفاق ياشيخة!!أتحداها قد حبَّت راس ويد أمها وأبوها!!!! وقفت مرام جنب العربية المكلفة وتصورت كم صورة... وجابوا عاملات القصر تورتة ضخمة فيها أدوار كثيرة قطعتها مرام... وأخذت نجلاء قطعة من الكيكة و حشتها في فم مرام!زعلت مرام وقالت:مصاخة!! وأما نجلاء ورانية قاموا يستهبلون على الكوشة ويرقصون رقص فانتازي وماله أي علاقة بالطق ويسوون حركات صبيانية لأبعد درجة..لدرجة انه أم رانية أرسلت روان الصغيرة لأختها رانية وطلعت روان وسحبت رانية من ملابسها وقالت:ماما تقول لك ياقليلة الأدب انزلي!!!! رانية:أقول تعالي!!!! وسحبت رانية أختها روان وشالتها ورقصت بها على المنصة وروان تضحك..وفي الأخير رمتها على مرام!! نزلَّت مرام البنت الصغيرة من حضنها وقالت:وش هالمسخرة؟؟؟يمه!!! وأقبلت أم مرام:نعم؟؟ مرام:خلاص أبي أدخل داخل وخلي أهل العريس يكلمونه عشان يلبسني الطقم!!! وبالفعل نقلوا العاملات العربية لغرفة العروس وجاء عريسها وجلس معاها وأمه وأخته وخالته وعماته معاه بالغرفة وأم مرام..وسط مباركات الجميع.. خرجوا الجميع..وبقي عبدالرحيم مع مرام... ظل يتأملها وهي ساكتة ماتنطق!! عبدالرحيم:أول كلمة ودي أقولها لك(ماشاء الله تبارك الله)أحلى مماتخيلتك بكثير..... ومرام ساكتة... عبدالرحيم:تتذكرين أول مرة شفتك فيها؟؟ مرام:ايه وأنا نازلة من الدرج!! عبدالرحيم:أي درج؟؟أنا قصدت بيوم الشوفة!!!! مرام:ايه أتذكر.. عبدالرحيم:من يومها وصورتك ماغابت عن بالي!! واستمرت سوالف عبدالرحيم ومرام ومن ضمنها... عبدالرحيم:مرام اش هي طموحاتك المستقبلية بعد ماتتخرجين من الثانوي؟؟ مرام:الصراحة.. حلمي إني أفتح صالون تجميل مثل أختي ماجدة! عبدالرحيم:فكرة حلوة لكن الشغل بالصالونات مايريحني!! مرام:ليش؟؟ عبدالرحيم:يعني يندرج فيه منكرات كثيرة في باب الزينة..وغير انه الصالونات يرتادها ناس من مختلف البيئات ومنهم السيء ومنهم الزين... مرام:هذا إنت قلتها.. السيء والزين يعني مو كل الناس سيئين!وبعدين إحنا حدود تعاملنا معاهم مايتجاوز تقديم الخدمات لهم..واش لنا بأخلاقهم؟؟؟ عبدالرحيم:أنا شخصياً تقلقني هالشغلة لأنه بعض من الصالونات المعروفة يصير فيها مخالفات ولها سمعة مشبوهة من اللي يصير فيها..بنات البلد فيهم الخير لكن العمالة الوافدة اللي تشتغل بهالصالونات ممكن يتساهلون ويخونون الأمانة مقابل حفنة مال! مرام:العيب في إدارة الصالونات نفسها يسلمونها لناس مو كُفء.لكن بالنسبة لمشغل أختي أنا وإياها ندير المشغل..حتى الشئون المالية عمرنا ماسلمناها لأحد.. وهكذا استمرت سواليف العريسين عن مختلف المواضيع الحب والطموح والتعامل وغيرها.. وطبعاً المعازيم عقب ماراحت مرام لعريسها راحوا للعشا وكان العشا راهي وفيه قسم كامل من البوفيه فيه أكلات وسلطات بحرية! غرفوا البنات أطباق وجلسوا على وحدة من الطاولات بصالة العشاء. اسمهان:الصراحة يارانية أحس إننا زودناها بحركاتنا مع مرام وخصوصاً انتي.. أفنان:شكلها بتقاطعنا كلنا وتحلمون تعطينا وجه بعد اليوم!! نجلاء:أحس من نظراتها إنها حقدت علينا!! رانية:واشفيكم قمتوا علي؟؟من حر مافيني سويت اللي سويته..لاتنسون إني أول وحدة فيكم تعرفت على مرام من سنين وكانت صداقتنا قوية!!بس مرام تغيرت في الفترة الأخيرة نسيتي يااسمهان يوم انخطبت لأخو زوجك خبت عننا كلنا الخبر بـ حجة إنها خايفة من العين؟؟؟ اش تسمون هذا بالله؟عدم ثقة؟كأنها مجبورة علينا ومتصاحبة معانا شكلياً وبنفس الوقت مو متطمنة لنا!!الصراحة إذا بتستمر على كذا ماتلزمنا!!وهذا انتوا شفتوا بعيونكم بنات الفصل الثاني قاعدين يرقصون لها ومبسوطة الأخت وتشجعهم..أجل اشفيها علينا؟؟؟؟؟؟؟ نجلاء:صادقة بكل حرف..بس أما نترك صاحبتنا بعد هالسنوات فهذا اللي لايمكن يصير!!! أفنان:لاياخذك سوء الظن يارانية!هي لو مو حابتنا كان تركتنا من زمان..لاتنسين انه عندها صاحبات كثير في المدرسة كان بإمكانها بأي وقت تتركنا وتروح معاهم لو حنا فعلاً مو عاجبينها! اسمهان:أفنان معاها حق.. وحركات مرام ماأتوقع إنها أكثر من مجرد دلع.. وانتهوا الجميع من عشاهم وبدأوا بالانصراف...ماعدا رانية!!جلست تفكر بكلامهم.. وجت أمها وقعدت جنبها.. أم رانية:حسبي الله على ابليسك..ياللي مفشلتني بكل عِرس!!أنا قلت بتنخطبين وبتربطين حميرك!لكن هذا انتي ماتغيرتي نفس الهبال.. اللهم اليوم كأنك ضاعفتي الجرعة شوي!!قومي البسي عباتك أبوك ينتظرنا برة! رانية:يمه تكفين..دقايق وراجعة لك!! وراحت رانية تركض وأمها تناديها.. أم رانية:استغفر الله..مدري من عليه طالعة هالبنت؟؟ وراحت رانية تركض ووقفت بعباتها قدام غرفة مرام..وغطت وجهها..وكانت ماجدة مارة نادتها رانية وقالت:ماجدة؟تكفين نادي لي مرام ضروري! ماجدة:خير ان شاء الله؟ عندها عريسها الحين!! رانية:معليش..مابأعطلها كلها ثواني بس!! طقت ماجدة الباب وأقبلت مرام تفتح الباب.. ماجدة(بهمس):فيه وحدة تبيك برة! خرجت مرام تتلفت وهجمت عليها رانية وحضنتها بقوة!!!! مرام:بسم الله!!مين انتي؟؟ رانية:أنا رشاشة الرمل واللولو!! مرام:رانيـــــــــــــــة؟؟؟؟؟ وشفيك مغطية وجهك؟؟ رانية:لأني بأنقلع بيتي وأفكك مني!! مرام:لا وش دعوى تقولين هالكلام؟صح إنك كريهة وتفهمين وصاياي لكم بالعكس!لكن مايخالف مبلوعة منك ومتفولة من غيرك!!! رانية:يعني منتي زعلانة؟؟؟ مرام:لا وش حقه أزعل بيوم فرحتي؟؟وبعدين لايمكن تكونين رانية لو ماتسوين آكشن بكل اجتماع!! وغمزت مرام لرانية بعينها وقالت:بس عاد لاتكثرين من هالحركات..وإلا بأحرمك من حضور عرسي!!! مسكتها رانية بقوة للمرة الثانية وحضنتها وقالت:أحبــــــــــــــــــــك يابنت!!! وودعتها..ورجعت مرام لغرفتها.. عبدالرحيم:ايش؟لايكون تضايقوا أهلك من جلستي معاك كل هالوقت؟؟؟ مرام:لا أبد..بس هذي صديقتي خطيبة ناصر صاحب أخوك..كانت تسلم علي قبل لاتروح.. عبدالرحيم:تقصدين ناصر المرجوج؟ مرام:هههه ليش هو مرجوج؟؟ عبدالرحيم:يعني الله يصلحه راعي مقالب وفرفشة وماتفرقين بين جِده وهزله!! مرام:أهااااا..صدق من قال:الطيور على أشكالها تقع!!!! واليوم التالي للملكة(يوم الجمعة).. اجتمعت اسمهان وأحلام وجوهرة للغداء في بيت أم عبدالرحمن....وكانت أغلب السواليف عن أحداث الليلة السابقة(ملكة مرام).. أم عبدالرحمن:ماشاء الله تبارك الله..عروسة عبدالرحيم قمر..أحلى عروس شفتها!!! اسمهان:وش دعوى خالتي؟وأنا وين رِحت؟؟ أم عبدالرحمن:هههههه إنتي الخير والبركة..بس كل وحدة لها جمالها الخاص فيها.. جوهرة:قديمك نديمك ولو الجديد أغناك ياأم عبدالرحمن.. أحلام:على إنه ملكة مرام مميزة..بس الصراحة أحس إني انبسطت أكثر في ملكة اسمهان.. جوهرة: حتى أنا ..ماشاء الله..اسمهان أصلاً شخصيتها أقرب لي لأنها بشوشة..بس مرام فيها شوفة حال شوي..!!!أتذكرها لما كانت بصف أول ثانوي كانت شغالتها تنزل معاها المدرسة وتشيل لها الشنطة لين الفصل!وتفسخ مرام عبايتها وتعطيها الشغالة..والشغالة تطبقها وتحطها بالدِرج وبعدين تروح!!وقد ماكلمتها مافاد لين مااتصلت يوم على أمها وقلت لها ماله داعي هالرفاهية الزايدة..بنتك كبيرة وتقدر تعتمد على نفسها..وأكيد تتذكرين هالسالفة يااسمهان... اسمهان:هههه ايه أتذكر..بس والله مرام حبوبة لكن دلوعة شوي لأنها مثلي آخر العنقود..وبالنسبة للملكة حتى أهلي يقولون ملكتي كانت أونس!بس باعتقادي انه السبب يرجع إلى إن شلتنا كانوا مشاركيني المناسبة بـ طولها..لكن ملكة مرام كانت هادية شوي لأنها ماتحبذ الأجواء الصاخبة كثير.. أم عبدالرحمن:كلها مناسباتكم حلوة..أهم شي ان العريس انبسط ومابغى يطلع من عند العروس لين آذيناه باتصالاتنا.. أحلام:كلهم أخواني مايصدق الواحد فيهم يشوف له حرمة إلا ويطيح عندها!!!صح يااسمهان؟تتذكرين أيام خطوبتك؟؟؟؟؟ اسمهان:شلون ماأتذكر؟؟أحلى أيام حياتي كانت..وتمنيت لو كانت أطول.. أحلام:ياحليله عبدالمجيد كل ماقابلته ألقى الجوال بإيده وهو يضغط فيه..وقبل شوي طقتني اللقافة وسحبت جواله وفتحته لقيته متروس مسجات مرسولة لمشاعل...ومشاعل بعد مو مقصرة ترد على رسايله...الله يهنيهم ببعض.. أم عبدالرحمن:وش تبينه يسوي يابنتي؟؟لايسمع ولاينطق!ولايقدر يتصل فيها..ماعنده وسيلة يواصلها فيها إلا الرسايل أو الزيارات!مع انه قلل الزيارات في الفترة الأخيرة لأنه صار يتضايق!! جوهرة:ليش يتضايق؟؟أهل مشاعل مايبونه يزورها؟؟ أم عبدالرحمن:مو هذي المشكلة..لكنه يتضايق من نظرات أم مشاعل!!يقول أحياناً وأنا قاعد أتكلم مع مشاعل بلغة الاشارة ألقى أمها تبكي!!ومو داري هي تبكي من الشفقة عليه ولا على حال بنتها اللي بتاخذ إنسان أصم وأخرس!!!! أحلام:ياحليله يمه..يكسر خاطري.. جوهرة:ياعزيزتي بكرة لما تشوف كيف بنتها مبسوطة معاه ومستانسة بتنسى هالحزن.. عبدالمجيد مسيكين وحاله بشانه لايضر أحد ولايغلط على أحد.. أم عبدالرحمن:صادقة ياجوهرة..قلبه كبـــــير ومايحب يكدرخاطري..كل مالقى نفسه فاضي راح يرسم على جدران شقته.. جوهرة:ووينها السبورة اللي يكتب لك عليها كلامه دايماً؟ ماأشوفها؟؟؟ أم عبدالرحمن:شوفيها جنب المكتبة! سحبتها أحلام ولقيت عبدالمجيد كاتب عليها بقلم الفلوماستر: يمه غرفة النوم أبي لونها بيج كريمي.. وأثاث بيتي أبيه يختلف عن أثاث عبدالرحيم..ولاتنزلون السوق وماتعلموني!! أم عبدالرحمن:ياحليلك ياولدي داري إننا نسوي خيانة ونروح السوق وإنت نايم!!! جوهرة:انتم حددتم موعد الزواج خلاص؟؟ أحلام:ايه ياخالتي..بداية اجازة الصيف بإذن الله يعني عقب ثلاثة شهور تقريباً..بس اخواني متحمسين ..من الحين وهم يفترون بالأسواق يدورون أثاث!!! أم عبدالرحمن:ايه وأنا أؤيدهم ودي نفتك من تأثيث الشقق بأسرع وقت عشان نتفرغ لحجز القاعة ومستلزمات العرس اللي تخصنا واللي تخص يوم الزواج.. جوهرة:عاد أنا ماحد قدي بأشتري فستان حمل مناسب للسهرات وألبسه!!يعني بأريح راسي!! أحلام:الله يعين..أما أنا وأمي يبي لنا ننزل نختار أقمشة وموديلات بعدين نختار مشغل الخياطة المناسب اللي نفصل فيه.. اسمهان:أما أنا اتفقت مع سماح نروح لخيَّاطة ممتازة نعرفها..أنا أفصل فستان لزواجنا وسماح لزواج تركي وناصر.. واستمرت السواليف عند الحريم وبمجلس الرِجال اللي كان فيه عبدالرحمن وأخوانه وزوج خالتهم جوهرة وزوج أحلام..إلى موعد الغداء.. تغدوا الجميع وبعدها استأذنت اسمهان... اسمهان:كثر الله خيركم خالتي..بس أنا بأستأذنكم لأني رايحة لأهلي.تدرون اليوم يوم اجتماع العائلة.. أم عبدالرحمن:بالتوفيق يابنتي..ولاتنسين تبلغينهم سلامي..... اسمهان:ان شاء الله..مع السلامة.. الجميع:مع السلامة... وفي بيت أهل اسمهان..استقبلوها بالترحاب.. كانت سماح موجودة وصار لها فترة من خروجها من الأربعين... شافت اسمهان..سمهونة الصغيرة بنت أخوها محمد وشالتها بلهفة وقالت:هلا حبوبتي الحلوة..يازينك ويازين خدودك يانااااااااس قمر!! سماح:والله البنات خفيفات ظل!مونستنا بالبيت بشكل كبير..ماأتذكر إنه أخوانها كانوا ببشاشتها! أسماء:في هذي معاك حق!!أنا لاحظت إنه ولدي أنس فيه براءة بثقالة دم!!بس لينة غير شكل!!تتبسم وتضحك أغلب الوقت.. أم اسمهان:البنت والولد واحد..أي ثقالة دم وأي خفة؟؟انتم عندي مثل محمد ماقد لاحظت بينكم فرق إلا في النطق!!محمد كان لسانه ثقيل شوي وماتكلم بدري..بس انتم البنات ماشاء الله عليكم تعلمتوا الكلام بسرعة!!! أسماء:طبيعي!لأنه البنات دايماً أذكى من الأولاد..عندهم استعداد أسرع للتعلم... أم اسمهان:إلا ياحبيبتي لأن محمد كان هو الولد البِكر وماقبله أحد ومايخالط أحد ماتعلم النطق لكن انتم جيتم بعد بعض وتعلمتوا من بعض!!!! سماح:إلا اش أخبار مرام يااسمهان؟كلمتيها اليوم؟؟؟ اسمهان:لا ماكلمتها..لكن اللي عرفته ان العريس مبسوط.. أسماء:أما أنا ماقعد براسي من أحداث الملكة أمس إلا صورة رانية صاحبتك!! أما هي مطفوقة بـشكل؟؟؟؟ سماح:ههههه حرام عليك..بس تنحب منها! اسمهان:تعودنا عليها كذا...ماأتخيل إنه بيجي يوم وتعقل! سماح:إلا اغسلي إيدك إنها تعقل!!نسيتوا انها بتاخذ ناصر؟؟؟عاد ناصر من يوم كِنا نلعب معاه وإحنا صغار وهو مهبول وعليه حركات شقاوة! ====================== اتصلت رانية على اسمهان وحكت لها مادار بينها وبين مرام بالليلة السابقة.. اسمهان:أشوى مازعلت من أحد..قلت لك قلبها طيب..ماصدقتيني!!بس بشري اش أخبار خطيبك؟ رانية:لاتجيبين لي طاريه له كم يوم يتصل و يدز مسجات وأنا ماأعبره!!أبيه يهَوِن عن موضوع النقل لـ شرورة!! اسمهان:ومين قال لك انه بينقل أصلاً؟؟تراه يمزح معاك!!!! رانية:إلا يكذب علي وانتي الصادقة!!هييييين..أنا أوريك يانصور!!! ======================= راحت رانية تتصل بناصر.. ناصر(ببرود):مرحبا.. رانية:مرحبتين..شلونك؟؟ ناصر:الحمدلله..مين معاي؟؟ رانية:ماعرفتني؟؟يحق لك!من كثر اللي يتصلون فيك!!!!!!!! ناصر(بنذالة):أووووه رانية!المعذرة نسيت صوتك لأن لي مدة ماسمعته!! رانية:لااااااا؟؟ والرقم مسحته بعد؟؟ ناصر:وش هالكلام؟أنا أنسى نفسي ولاأنساك ياقمر!! انشكحت رانية وقالت:زمان عن شوفتك..ماودك تسَير علينا؟؟ ناصر:إلا بعد شوي..اش رايك؟؟ رانية(بينها وبين نفسها تقول:أعوذ بالله صدق إنه خفة!!ماصدق أحد يعطيه وجه!!!! ناصر:اشفيك ساكتة؟؟أبي أزورك اليوم عقب المغرب لأنه يوم اجازة..بوسط الأسبوع أكيد منتي فاضية إلا لدروسك.. رانية:الله يحييك... وبعد ماانتهت المكالمة راحت رانية للمطبخ وسوت حالة استنفار وقامت تجتهد في اعداد الأصناف المختلفة لاستقبال العريس!!!! أم رانية:عجيب أمرك!!لو قايلة لك سوي لأخوانك هالأكلات..كان ما فزيتي!! رانية:ايه أكيد مابأسوي لهم..عيالك مشافيح!لو أنسدح لهم بوسط الصحن ياكلوني!!! دخل مشاري الأخ الأكبر لرانية وكان دبدوب!!!وقال:الله الله..وش هالعز كله؟؟بيجيكم ضيوف؟؟ أم رانية:ايه..خطيب أختك بيجي اليوم.. مشاري:كل هالأكل لأبو عصاقيل؟؟ رانية:الله يخلي لي عصاقيله!!واش تبيه يصير؟؟مثلك ياالمنفقع؟؟كل مطاعم الديرة حافظينك قلباً وقالباً!!!! أم رانية:قولي ماشاء الله..بتصكين أخوك بـ عين! رانية:أحسن..عساه ينحف شوي!! وشوي ودخل مشعل أخو رانية الثاني وهو يخبط بطنه ويقول:ياسلاااام وش هالروايح الحلوة؟؟ رانية:قطيعة تقطعكم!!واشفيها حاسة الشم قوية عندكم اليوم؟!!!!!!!!!!!! وبعد سويعات حضر ناصر وبيده كيس!! وفرحت رانية!!خطيبها جاي بـ هدية!!! قعدت معاه وكانوا أبوها وأخوانها برة لسه مارجعوا! أعطاها ناصر هديتها..وتناولتها وهي فرحانة وفتحت الكيس ولقيت بداخله بقرة جالسة مصنوعة من القطن وحاضنة بين يديها علبة اسطوانية!!!!!! شالتها رانية وعلى وجهها علامات الخيبة!! رانية:بقرة ياناصر؟؟بقرة؟؟ ناصر:واش أسوي في راعي المحل الملقوف؟؟كنت شاري قرد وقعد يقنعني انه هدية غير مناسبة لعروس!!!لين غيرت رأيي وشريت البقرة!! رانية:الناس تجيب دب أو قطوة على الأقل بس بقرة؟؟؟ هذي ماصارت ولااستوت!شايفني أشبهها؟؟؟ ناصر:إلا تعالي وعلميني الدب اشفيه من جمال؟ منتفخ وشكله مهبول!!!والقطوة مشهور عنها إنها ناكرة للجميل؟؟لكن البقرة..يازينها زيناه!رمز للعطاء..جبن على زبدة على حليب على لبن على لحم!!تقدرين تستغنين عن منتجات البقر؟؟أتحداك! رانية:لا..شاعري حيل إنت!!وفاهم كل كلمة تنطقها...وعندك وعي رهيب لرموز الحيوانات!! ناصر:أجل ايش؟؟خطيبك بياع حَمَام مخضرم!! رانية:إلا أقدر أحلف إنك بياع أرانب بعد!!! وقامت رانية تفتح العلبة الأسطوانية اللي حاضنتها البقرة!!! وكل مافتحت علبة لقيت بداخلها علبة ثانية!وهكذا لين مااجتمع بيدها ست علب بمختلف الأحجام!!! رانية:أقول..راح ليلي مع البقرة النشبة ذي!لاأخذنا منها جبن ولالحم!!! ناصر:بس اش رايك في الهدية؟؟ رانية:بصراحة هدية من الخيال وتعبر عن شخصية صاحبها!! ناصر:أنا الود ودي أهديك جمل!بس وش أسوي؟العين بصيرة واليد قصيرة!!! رانية:واللسان طويل والعقل قليل!!!سألتك بـ ربك؟هذي هدية تقابلني فيها بعد غيبة؟؟؟غايب عني أسبوعين وجيت لي ببقرة..أجل لو غايب شهر كنت بتجيب لي فيل؟؟؟؟ ناصر:هههههههه صدَّاقة انتي يارانية!بغيت أمتحن صبرك بس!لكنك طلعتي فاشلة!!عموماً خذي هديتك!! وطلَّع من جيبه علبة فيها خاتم مفصص!!وعطاها رانية! رانية:وااااااي يهبل!معقول إنت شاريه؟أخاف سارقه من أحد!!! ناصر:لاتفرحين كثير تراه فالصو!! رانية:فـــــــــــالصو؟؟كل رخيص مخيس!! ناصر:عاد كانت حرمة تكرونية قاطعة الاشارة وتبيع اكسسوارات أبوفقسة..قلت بنفسي حرام ياولد ماتخليها تكسب..وعجبني هالخاتم وشريته منها!! رانية:ياخي إنت ماعندك ذوق ولااحساس؟بالأول بقرة والحين خاتم مضروب لو تجي عليه قطرة موية صار لونه مثل لون مسمار بايت تحت الشمس؟؟؟؟؟؟؟ ناصر:الله يرحمك يايمه..كلامها كان كله حِكَم!! رانية:ليش؟وش كانت تقول؟؟ ناصر:خِذ لك فرس تركبها ولاتاخذ لك حمارة تركبك(يعني تتسلط عليك بـ قوتها)!! وخذ لك من تفيد وتنفع وإن كانت تشبه الضفدع! ولاتاخذ مِن لاتشبع ولاتقنع وإن كانت نجمةٍ تسطع!!!!!!(عاد هذي من عقلي...أدري بتقولون لاتعيدينها.هههههههههه!!) رانية(بغيظ وقهر)قالت بنفسها:ياشيخ ليتها خذتك معاها!!!!!! |
| الساعة الآن توقيت السعودية الرياض و الدمام و القصيم و جدة 07:50 PM. |
Powered by vBulletin® Copyright ©2000 - 2024,
vBulletin Optimisation provided by
vB Optimise (Pro) -
vBulletin Mods & Addons Copyright © 2024 DragonByte Technologies Ltd.