لكل اللى بتستخدم البودرة المائية ادخلى حالا بشرتك فى خطر
 

انا عارفه انه رغي كتير بس ضروري اقروه
ومنقول للامانه
بس معلوماتي من ناس شغاله في اماكن تصنيعها
البودره المائيه روزيتا دي بيتضاف لها جبس
وبينحت في الوش مع الوقت
حذاااااااري منها بجددد

أضرار البودرة المائية على البشرة
____________________________

لاحظت أن كتير من البنات لسه بتستخدم البودرة المائية

لأنهم شايفين أو معتقدين أنها أسهل ونسبة التغطية عالية وثابتة طول اليوم،
طيب تعالوا نفكر شوية مع بعض...

معظم البنات بشرتهم دهنية يعني مسام واسعة..
طيب البودرة المائية عبارة عن ايه :

أولا : تركيب أي نوع من مستحضرات التجميل بيكون عبارة عن مجموعة أكاسيد
مضاف اليها بودرة التلك عشان تتماسك
بس طبعا المستحضرات الغالية و النظيفة و الماركات بتاعتها معروفة مكوناتها بتبقى من قلب الطبيعة اكتر من الصناعى و فى ماركات بجد مستحضراتها طبية اكتر من انها تجميلية يعنى فى مكوناتها بتساعد على مد بشرتك بالنضارة و الحيوية

البودرة المائية زي كده ما تعملي كيكة مكونة من بيض
وزبدة ..الخ وتمسكيها بالدقيق ..

البودرة المائية نفس الشئ
بودرة مياه = عجينة حضرتك يوميا بتحشي بها مسام وجهك الواسعة وتسيبيها في التراب
والشمس تتفاعل على وجهك وتيجي حضرتك آخر النهار تغسلي وشك بمياه وصابون
عارفة انتي عملتي ايه في وشك

سديتى المسام بعجينة ولما جيتي تشليها شلتي اللي على السطح فقط وسبتي الباقي يدخل جوه يعمل اللي هو عاوزه... هتسألي يعمل ايه يعني؟؟ ببساطة ابتداءا من البقع وانتهاءا بالحبوب والخروم بعدها دة غير جراثيم السفنجة كمان مهما أتغسلت

ثانيا

في الشتاء بللي وشك بشوية مياه وسيبيه ينشف لوحده .. ايه اللي هيحصل؟؟؟
هيقشف وينشف ويقشر

بالاضافة للقشف الوش بيحصل له عملية شد ويفضل مشدود طول النهار

وبعدين لما تيجي حضرتك تغسليه الجلد بيرجع لحالته الطبيعية تعالي كده امسكي
قطعة استك وافضلي شدي وارخي فيها .. هيحصل لها ايه؟؟؟
ترهل وبالنسبة للجلد تجاعيد

مع الوقت شد وجذب في البشرة النتيجة المحققة والمؤكدة هي ظهور التجاعيد
وللأسف بتظهر بدري للأسباب كتيرة ده واحد منها
و بتظهر الحبوب و الرؤوس السودا و مسام توسع اكتر و اكتر
وبعدين نرجع نشتكي وشي نشف .. وشي
بقع .. طلعلى حبوب .. بقى عندى بثور سودا .. وتجاعيد بدرى كمان

ماهى دى عاملة زي البنك تفرحى اوى بالقرض اللى حتاخديه لكن بتسددى قده مرتين تلاتة و فى اسوا الحالات 5 مرات نفس الحكاية بتجبوها علشان بتخفى و سهلة ورخيصة لكن بعديها بايام حتدفعوا فلوس دكاترة و ادوية و حالة نفسة و ثقة بالنفس تقل و حاجة تقرف

ارجوكم كفاية بودرة مائية .. ارحموا وشكم ده نعمة من عند ربنا

وبجد البودرة السايبة والاساس المضمون سهل التنظيف وبجد شكلة بيكون نورمال كدة وجميل وكفاية أنة ضررة أقل جدا جدا