ازياء - فساتين سهرة و مكياج و طبخ - عشان عيب ولا عشان حرام ؟؟ تفرق كتير

السلام عليكم ورحمه الله وبركاته,,

كنتي عند ناس وابنك الصغير معاكي وهو طفل مش فاهم حاجة ..

لقا قدامه نقول مثلا لعبة صغيرة عجبته ..

ف راح اخدها كدا وانتي مخدتيش بالك و روحتي البيت شفتيها ..

هتقوليله ايه ؟؟

عيب كدا .. !! الناس تقول علينا ايه دلوقتي ؟؟

اختك الصغيرة كبرت ماشاء الله وبقت في الاعدادي او الثانوي ولسة منتظمتش عالصلاة ..

تقومي انتي قايلالها ..

عيب عليكي .. !! في واحدة في سنك لسة مبتصليش ؟؟

كنتي مع صاحبتك في مطعم شيك و ابنها وقع حاجة على هدومه ..
لقيتيها بترعقله بصوت عالي ..
تقوليلها ايه ؟؟
لا عيب الناس بتتفرج علينا ..!!

كلمة عيب كلمة دارجة أوي على لساننا ..

ليها اوقات تستخدميها اه ..

زي اخر مثال ..

فعلا في حاجات من الاتيكيت وكدا عيب اننا منعملهاش ..

بس في مواقف مبنفعش يستخدم فيها مصطلح ' عيب ' .. !

أو غلط نستخدمه ..

عشان عيب ولا عشان حرام .. ؟؟ .. تفرق كتير .. :)

لما ابنك الصغير ياخد حاجة متقوليلوش عيب ..

قوليله حرام ..

فهميه ان اللي بيعمله غلط وان ربنا شايفه ..

اختك لو مبتصليش قوليلها حرام دي الصلاة عماد الدين ..

لو بنتك كبرت و مش راضية تتحجب ..

متقوليلهاش عيب الناس هتتكلم عليكي .. وتخليها ترد عليكي وتقلك ما اللي يتكلم يتكلم انا مالي بيهم ..

قوليلها الحجاب فرض ..

احنا للأسف عندنا عادات وتقاليد في المجتمع بنقدسها .. !!

أيوا بنقدسها ..

أكتر ما بنقدس تعاليم ديننا .. ؟؟

اه أكتر ..

تلاقي مثلا راجل في مجتمعنا مبيصليش .. بس ميسمحش لمراته تنزل الشارع من غير حجاب ..

أصلها عيبة في حقه .. !!

و هو ده حال مجتمعنا ..

مجتمع اتعود انه يخاف من الناس ونظرتهم .. ويعملهم الف حساب ..

مجتمع اتربى عـ العيب مش عـ الحرام ..

باختصآآر يا حبآآيبي ♥

لو استخدمتي مصطلح حرام .. معناه اننا نستشعر مراقبة الله عز وجل لينا ..

بس مصطلح عيب .. معناه ان كل همنا يكون مراقبة ونظرة الناس لينا .. !!