ازياء - فساتين سهرة و مكياج و طبخ - لا توفيكـ ي الخوي هالابيات

لا جتك زله من رفيق توده
رفيقك اللي ما تعدد مزاياه
رفيقك اللي تقصده وقت شده
وتنحل لامن شفت طلة محياه
بينك وبينه خوة مستجده
متجول في قلبك ادناه واقصاه
حبل الوصل بينك وبينه يمده
يمك يسوقه قلب وتشيله خطاه
نفسه يطمنها ولو فيه حده
لجل الرفيق يكب شي تمناه
ما يتركك في سهلة مجرهده
طيب وهذا طيب ساسه ومجناه
صقر ينومس بالقنص من يهده
وافي شبور وطيبات نواياه
احذر خطاه لغير نفسك تعده
واحذر يجي غيره ويجلس بمركاه
ادمح له الزله وحذرا تضده
ودور على عذر يعذره وتلقاه
لا تشيل نفسك والجبل لاتهده
واحذر تكون اللي نقل داه برداه
باب الجفا لا فك عجل بسده
وابليس لا ابلس بالقطاعه تحداه
اوصل رفيقك عاتبه في موده
وبين له اللي حس بك من خطاياه
واحذر مجالس راكبين الاشده
اشدة الغيبه رجال المحاباه
اهل النكد واهل الوجيه المصده
قوم على نقل السوالف مضراه
رجالهم دايم معشي ببده
عزاه ياللي غير الدرب عزاه
ما ينفعه طيب مسويه جده
لا صار خايب ما يسوي سواياه
والقاف الاول يا رفيقي نرده
رفيقك الطيب من الصعب تجفاه
لا جتك زله من رفيق توده
احذر تنكر له وبالشر تجزاه
.............................. .............................
الشاعر حمد المخلفي