مساء الورد ..
احترت وايد وين أحط لكم ها الموضوع اللي خاطري اكتبه الحين وفي الآخر قلت لأن الموضوع يهم الحريم أكثر من الريايل بحطه في الأسرة السعيدة ..
خواتي .. الموضوع عبارة عن كيف تعدين حمام الورد لزوجج بأقل التكاليف وبأرقى الأساليب ..
طبعا الموضوع من تجربة شخصية ...
أولا جهزي مسرح العمليات .. اللي هو حمام الغرفة ..
طبعا هذا موب حمام غرفتي .. بس المطلوب صورة لمسرح العمليات ..
المطلوب أيضا إن الحمام يكون نظيف جدا ومغسول ومشطوف زين .. وفيه عدد من الفوط .. ولازم تكون الفوط نظيفة ومبخرة بالعود ومرشوش عليها معطر الفراش اللي من شركة أجمل .. لأنه أحسن ما يكون .. بس بخات لطيفة ...
هذا مدخني أنا اللي أسوي فيه العود + معطر الفراش اللي استعمله من أجمل (ان لوف)
بعدين اللوازم لإعداد الحمام بأقل التكاليف ..
يلزمج بتلات ورد مثل هذي
وببساطة ممكن تروحين لمحل ورد تتعاملين معاه .. وتطلبين من البايع كل الورد اللي تفتح وايد وخلاص ممكن يرميه البايع .. وتقولين له بآخذ الخمس وردات بعشر دراهم وصدقيني ممكن يعطيج ببلاش عن نفسي دايم آخذهم فوق البيعة مجانا لأني أطلب باقة وعقب آخذ الورد المتفتح اللي عادة ما يرمونه هم ..
يلزمك حوالي 15 إلى عشرين ورد متفتحة تقدرين (تفرفطين ) البتلات لوحدج بايدج في ماء البانيو بس اغسلي الورد بماي (اغمسيه في اناء فيه ماء) أحسن قبل لا تقطعينه في البانيو علشان تضمنين النظافة ..
طبعا خلي الماي دافء أقرب للحرارة شوي لأنه بتخف حرارته شوي لحد ما تخلصين من اقناع زوجج انه يروح يتسبح (يعني يستحم) ..
بعد الماي الدافء اللي فيه بتلات الورد تحتاجين لفوار البانيو المعطر .. أنا أستعمل نوع خاص لا تسألوني من وين لأنه من مكان بعييييييييييد بس فيه فوارات بانيو عند محلات بدي شوب ونوعياتها جدا حلوة ..
وغير فوارات البانيو تحتاجين محلول البابل أو الفقاعات بالعربي اللي يعطي رغاوي في البانيو وها المحلول موجود في بدي شوب بعد .. أنا استعملت هالنوعية (اللي بالكيس الأحمر) وهي رقايق صابون تعطي رغاوي .. لأني ما شريت محلول جديد فهذي تعطيني نفس النتيجة ..
طبعا بعد بتلات الورد والماي الدافئ جدا جدا (بس موب حار) تحطين الفوارة اللي في لحظات بتملا البانيو باللون والعطر النفاذ وتحطين محلول البابل (الفقاعات) وتحركين شوي علشان يرغي ..!
تكونين مجهزة مدخن العود وتتركين ريحة العود تفوح في الحمام والغرفة .. وترشين الحمام والغرفة بعد بمعطر الفراش .. (اللي بالصورة الأولى )
ترجعين الحمام علشان نقطة مهمة ..
اللي هي الشموع ...
شوفي حبيبتي .. بعد الريحة السنعة اللي يسويها فوار البانيو وبعد الورد اللي مغطي الماي في البانيو وريحة العود تبقى مسألة الشموع المعطرة موب ضرورية جدا لسبب ان ريحة الشموع ما راح تبين أساسا ..
علشان جذيه نصيحتي انج تجيبين شموع جيدة حتى لو موب معطرة .. بس ما تكون رخيصة وأي كلام لأنها بتسوي دخان بيضايج وبيخرب الجزء الشاعري في الحمام .. هاتي شموع جيدة حتى لو بدون ريحة ..
تحتاجين من 3 إلى 5 شمعات على حسب حجم الحمام .. تذكري انتي تبين الشموع بس علشان تكون فيه اضاءة خافتة موب علشان تولعين بالحمام ..!!
بعد هذا كله بيجهز الحمام الحلو .. ها الحمام بيكمل بشيء حلو هو انج تتحايلين على زوجج علشان يدخل بدون لا يدري ان فيه ورد وسوالف في الحمام .. وتحطين له على مراية الحمام نوتة صغيرة مكتوب عليها ( أغسلك بالورد يا روحي) ..
وطبعا شاركيه بالحمام لأن ها الشيء بيعطيكم هدوء رهيب ..
وللعازيات .. أنصحكم بحمام الورد .. لأنه يغسل الضيق بشكل ما تتخيلونه ..
وأتمنى يعجبكم حمام الورد ..
حمام ورد
