 |
  |
|
|
|
02-14-2015, 10:53 PM
|
#1 |
|
:: كاتبة نشيطة :: |
http://forums.fatakat.com/thread5568942
أهلاً بكم ياقمرات.... قبل ما أبدأ مش مسامحة أي واحدة مش هاتقيم ولا هتحط رد ولو بسيط لأني تعبت جامد جداً في الموضوع ده موضوعي النهاردة عن العناية الصحيحة ببشرة الوجه لأنها بتختلف عن بقية أجزاء الجسم وطبعاً الموضوع مهم بالنسبة لنا ك بنات بالذات لأن وجهك هو عنوانك لما تيجي تكلمي أي حد بيبص في وجهك ولأنه بيفرق في نفسية البنات جداً طبعاً هاأقسم الموضوع لنقاط زي ماعودتكم عشان اللي مهتم بقراءة نقطة معينة فقط أنواع البشرة كيفية معرفة نوع بشرتك طرق للعناية بكل نوع بشرة أطعمة مفيدة للبشرة نصائح بسيطة مفيدة للبشرة خلطات منزلية لمقشرات بشرة خلطات منزلية لماسكات للبشرة أولاً: أنواع البشرة: للبشرة أربع انواع وهي البشرة العادية / الدهنية / الجافة / المركبة وعلى فكرة مش شرط إننا عشان عايشين في دولة صيفها حار يبقى مافيش في مصر ناس بشرتها جافة.....لأ في ومنهم صديقة شخصية لي.......دي بس معلومة كده على الماشي 1- البشرة العادية Normal : أصحاب البشرة العادية من المحظوظين بصراحة لأن النوع ده من البشرة بيكون متوازن مافيهوش زيوت كتير ولا جفاف كتير...نادراً مابيطلع فيه حبوب او روؤس سوداء إلا في حالة الأهمال الشديد.......كمان المسام بتكون باحجام غاية في الصغر ومش باينة فالبشرة بتكون ناعمة وصافية. 2- البشرة الجافة Dry : والنوع ده من البشرة مش بيقدر يحتفظ بالترطيب وبالتالي البشرة بتكون عرضة للظهور المبكر للتجاعيد والخطوط الرفيعة وبرده لعدم وجود زيوت في البشرة فده بيخليها رقيقة وهشة وبتتأثر بالعوامل الخارجية أكتر من الأنواع الثانية زي الأشعة الفوق بنفسجية والتلوث ودي صورة توضيحية للنوع ده من البشرة عن قرب موضوع شامل عن العناية ببشرة الوجه 3- البشرة الدهنية Oily: وده أكتر نوع بيعذب......البشرة بتنتج كمية زيوت كتير وبالتالي بتكون عرضة لكل عيب ممكن...حبوب بتطلع.روؤس سوداء بتطلع إذا تكاسلنا يوم واحد بس عن التنظيف....مسامات واسعة بسبب تراكم الدهون فيها....شوائب في البشرة بسبب اثار الحبوب بعد ماتتعالج موجود..والتخلص من الخلايا الميتة بيكون بمعدل أبطأ من بقية الأنواع وأحياناً البشرة تبان بتلمع ودي صورة توضيحية لها موضوع شامل عن العناية ببشرة الوجه 4- البشرة المركبة Combination: النوع ده من البشرة بيبقى مختلط مابين مناطق دهنية في ال T-zone الجبهة والأنف والذقن بينما الخدود وحول العين منطقة جافة..مشكلة النوع ده من البشرة أنه العناية به صعبة شوية لأن المنتجات للعناية بالنوع ده في منها انواع كتير أما بتجفف المناطق الجافة بزيادة او مش بتنظف المناطق الدهنية كويس فلازم التأني في أختيار المنتجات للبشرة دي.وطبعاً مشكلة البشرة دي بتكون في صورة حبوب في الجبهة وروؤس سودء في منطقة الأنف وده طبعاً في حالة أهمال التنظيف....ودي صورة توضيحية للنوع ده من البشرة موضوع شامل عن العناية ببشرة الوجه ثانياً: كيفية معرفة نوع بشرتك: في طريقة الرد على الأسئلة ودي من رأيي طريقة غير دقيقة جربتها وكل مرة بتطلع لي نوع بشرة مختلف الطريقة الصح هي كاالأتي: 1- هانغسل وجهنا بعد العودة من مشوار في الخارج بغسول لطيف ونجفف البشرة بالراحة بعد كده هانقعد ساعة كاملة بدون مانلمس الوجه بالأيد.تمام..ومش بنقعد في غرفة مكيفة ولا قصاد فرن او بوتجاز...بنقعد في درجة عادية 2- هنجيب قطعة ورق زبدة وممكن منديل عادي بس ورق الزبدة أفضل وبيبان فيه اي حاجة ونحطه مرة على الجبهة ومرة على الأنف وبعدين الخدود وبعدين الذقن ونشوف ملاحظتنا - إذا شوفنا نقط زيوت من كل جزء يبقى البشرة دهنية - إذا شفنا نقط زيوت من منطقة الT zone فقط يبقى البشرة مركبة - إذا شفنا مافيش زيت خالص او بالكتير نقطة زيت واحدة يبقى بشرة عادية - إذا شفنا جلد ميت بيطلع في المنديل ومافيش زيت خالص يبقى بشرة جافة ثالثاً: طرق العناية بكل نوع بشرة: في ملحوظة لازم نكون عارفينها أن العناية بالبشرة بتتضمن بالكتير 5 خطوات بس مش كل نوع بشرة بيحتاجها يعني كل نوع بشرة عاوزة خطوات معينة وهاأشرحها حالاً. اولاً: المنظف Cleanser موضوع شامل عن العناية ببشرة الوجه ودي أهم خطوة ولازمة لكل انواع البشرة . لكن لازم نختار الغسول صح وهو أسعاره بتختلف من 12 جنيه لحد منتجات بتتعدى ال100 جنيه في نوعين من الغسول موجود في السوق....الأنواع التجارية والأنواع الطبية وكمان الغسول في منه أنواع بجانب انها بتنظف بتقوم بمهمة تانية ففي انواع للتنظيف فقط وفي انواع للتنظيف والتقشير وانواع للتنظيف والتفتيح وأنواع للتنظيف ومحاربة التجاعيد وأنواع للتنظيف وعلاج الحبوب المهم احنا عاوزين من الغسول أيه عشان نقرر ثاني نقطة أي شركة بتنتج أنواع مختلفة كل نوع بشرة وأحنا بنختار على حسب نوع بشرتنا وعلى حسب المكونات ومافيش منتج هنلاقي فيه كل المكونات المفيدة البشرة العادية: هتلاقي منتجات تنظيف كتير جداً ومافيش قلق من نوع بشرتها ويفضل تكون في صورة كريمية النصيحة انها تختار منظفات محتوية على مضادات أكسدة زي ( فيتامين E -C -A - بيتاكاروتين - سيلينيوم selenium- لوتين ولايكوبين lutein and lycopene كمان تحتوي على الأحماض الهيدروكسية زي حمض اللاكتيك والماليك والستريك والجيلوكليك malic acid, lactic acid, citric acid and glycolic acid. البشرة الدهنية: الغسول يكون خالي من الزيوت ويفضل في صورة جيل وبرده الغسول يكون محتوي على مضادات أكسدة وأحماض هيدروكسية بس كمان في اضافات تانية عشان القضاء على الدهون الزيادة والحبوب إن وجدت - حمض السالسليك Salicylic Acid وده من الأحماض الهيدروكسية برده بيفتح المسام ويقضي على الدهون داخلها. - بيروكسيد البنزويل benzoyl peroxide بيقضي على البكتريا المسببة للحبوب - زيت شجرة الشاي Tea Tree Oil وده مطهر بيقضي على البكتريا المسببة لحبوب الشباب وبيقلل الزيوت من البشرة - حمض الهالورينك Hyaluronic Acid بيحافظ على الزيوت الطبيعية للبشرة وبيقضي على الزيوت الزائدة البشرة الجافة: ودي الأفضل نختار غسول في صورة سائل أو رغوي محتوي على أحماض هيدروكسية وكمان زبدة كاكاو او زبدة الشيا أو لبن او زيت زيتون او زيت جوجوبا أوجلسرين وفيتامين E البشرة المركبة: لازم نحرص أن الغسول يكون خالي من السلفات وبرده الحاجة اللي فيها صبار وخيار مفيدة وبرده بتفيد إذا كانت البشرة حساسة ثانياً: القابض :Toner موضوع شامل عن العناية ببشرة الوجه التونر ده عبارة عن قابض للمسام يستخدم بعد الغسول بانك توزعيه بقطنة على الوجه وظيفته أغلاق المسام بعد تنظيفها لفترة معينة بحيث لا تتجمع فيها الدهون وأيضاً تقليل مظهر المسامات الواسعة الخطوة دي مهمة للبشرة الدهنية والمختلطة فقط ومش لازمة لأنواع البشرة الثانية في بعض أنواع التونر بتستكمل عملية التنظيف كمان وتفضل للبشرة شديدة الدهنية وأرخص أنواع التونر هو ماء الورد من عند أي عطار ب3 جنيه ويمكن أرخص ثالثا: المرطب: Moisturizers الخطوة دي هي خطوة وضع كريم وجه قبل النوم والخطوة دي مهمة جداً جداً لذوي البشرة الجافة وتتعمل على طول في الصيف وفي الشتاء بالنسبة لأصحاب البشرة المركبة فالخطوة دي بتكون في فصل الشتاء في المناطق الجافة فقط بالنسبة للبشرة العادية برده خطوة حلوة للحفاظ على البشرة في الشتاء بالنسبة بقى للبشرة الدهنية فالخطوة دي ممكن في الشتاء مع الحرص على أستخدام كريم للبشرة الدهنية ويكون مكتوب عليه بوضوح أنه للبشرة الدهنية ويفضل 3 مرات في الأسبوع كفاية مش يومياً لأن البشرة الدهنية بتفرز دهون زيادة ده في حالة الترطيب أما في حالة أستخدام كريم لمقاومة التجاعيد أو لعلاج الحبوب فبنتبع التعليمات اللي على العبوة ونحرص برده أن المكونات مناسبة لنوع بشرتنا رابعاً: المقشر أو الأسكرب Exfoliating موضوع شامل عن العناية ببشرة الوجه يعني أيه مقشر؟ يعني خطوة بتشيل الطبقة الخارجية الميتة من الجلد فبتخلي شكل البشرة صحي ومورد وبتقضي تدريجياً على الرؤوس السوداء ولكن..الناس اللي بتستخدم مراهم أو كريمات للعلاج على الوجه أو بتستخدم كريمات للتجاعيد ماينفعش تعمل خطوة التقشير وده لأن المراهم والكريمات دي بتقشر الطبقة من نفسها فالخطوة دي هتكون بدون لازمة وممكن تسبب ألتهاب أيضاً الخطوة دي ممنوعة لذوي البشرة الجافة لأن البشرة بتكون مشدودة وهشة وبتتخلص من الجلد الميت من نفسها بسرعة غير بقية أنواع البشرة فخطوة التقشير ممكن تسبب جروح للبشرة وتظهر أثارها بعد مدة على الوجه البشرة العادية ممكن تعمل الخطوة دي مرة شهرياً البشرة المركبة بتبقى مرة كل 10 أيام ونركز على الأماكن الدهنية اكتر البشرة الدهنية الخطوة دي مهمة مرة أسبوعياً عشان نختار الأسكرب او المقشر صح نحرص على : يكون رقيق جداً مش حاد أو مؤلم للبشرة لأن ده معناه أنه بيجرح الجلد مش بيشيل الطبقة الميتة فقط فنختار الرقيق المحتوي على حمض اللاكتيك مثلاً ونجيب من أي منتج كيس نجربه الأول وبصفة عامة المقشرات بتحتوي على كل مانتخيله ملح - سكر - صخور - بذور - فواكه - أصداف الصح أننا نختار الأرق وطبعاً طريقة أستخدامه اننا بنحطه على الوجه بعد الغسول وندلك بحركة دائرية وبالراحة لمدة من دقيقة لدقيقتين ونشطف خامساً: القناع MASK موضوع شامل عن العناية ببشرة الوجه الماسكات برده لها وظائف مختلفة في انواع لتنظيف البشرة من الدهون الزيادة وانواع للتفتيح وانواع لمقاومة التجاعيد وأنوع لتغذية البشرة الجافة بالزيوت الخطوة دي مرة في الأسبوع أو كل 10 أيام حلو قوي وممكن نخليها عندنا ونستخدمها وقت مانحتاجها بنحط الماسك على الوجه بعد الغسول ونوزعه في كل جزء ماعدا حول العين والشفاه ونسترخى كده حوالي 15 دقيقة أو على حسب التعليمات وبعد كده نشطف الوجه بماء فاتر يعني الملخص الغسول: مهم لجميع أنواع البشرة التونر: مهم للبشرة المركبة والدهنية المرطب: مهم للبشرة الجافة والعادية ومتوسط الأهمية للبشرة المركبة والدهنية المقشر: مهم للبشرة الدهنية والمركبة وممنوعة للبشرة الجافة إلا في المناسبات القناع: على حسب وظيفته واحتياج بشرتك له رابعاً: أطعمة مفيدة للبشرة: الحبوب الكاملة:Whole Grains مثال : خبز القمح الكامل ودي بقى فيها مضادات أكسدة وبتقلل من التهاب الجلد وتلفه ودهونها معدومة وكمان فيها البيوتين وفيتامينات ب والنوع ده من الأطعمة مهم لجميع انواع البشرة لبن الماعز Goat Milk لبن الماعز بالذات والألبان عامة طبعاً مغذية جداً وكمان ممكن تدخل في عمل المقشرات الطبيعية في المنزل والماسكات للبشرة خصوصاً البشرة الجافة او البشرة اللي بتعاني من حساسية ولبن الماعز فيه حمض الكابرليك والألبان عامة فيها حمض اللاكتيك طبعاً المكسرات Nuts خصوصاً اللوز..دي بقى غنية بفيتامين E مكافح الشيخوخة والتجعد ومجدد البشرة وكمان غنية بالأحماض الدهنية وأوميجا 3 المهم للبشرة الدهنية والمركبة تناول كميات قليلة من وقت للثاني حتى لاتزيد دهون البشرة زبدة الشيا Shea Butter ودي بقى مرطب حلو جداً خصوصاً لذوي البشرة الجافة بس هي ثقيلة ولاتصلح للبشرة الدهنية أو المركبة الخضروات الحمراء والملونة والخضراء Red and Green Vegetables زي الجزر والبطاطا والفلفل الملون والسبانخ....الخضروات دي غنية بالبيتا كاروتين واللي جسمنا بيحولها لفيتامين A وده فيتامين مضاد للسموم وتلف البشرة ومقاوم لظهور التجاعيد والخطوط بالبشرة وبيمنح البشرة مظهر صافي ومضيء وبيساعدها على أصلاح نفسها دقيق الشوفان Oatmeal يعتبر بلسم طبيعي للبشرة الجافة والملتهبة والحساسة فقط وبيبقى حلو ك ماسك للبشرة مع مكونات تانية لأن فيه الدهون التي تعمل على تليين الجلد السكريات التي تتشبث ببشرتك وتقضي على القشور والقشف السابونين مضاد فطريات ومضادة للجراثيم البوليفينول التي هي مضادات الالتهاب ومضادات الأكسدة البروتينات التي تساعد على تقوية الجلد النشويات وبيتا جلوكان التي تحتفظ بالمياه في الجلد الفواكه الحمضية Citrus Fruits طبعاً عشان فيتامين C الرائع للبشرة بيساعد الجسم على انتاج الكولاجين / بيقاوم وبيأخر ظهور التجاعيد / مضاد للأكسدة / بيحارب الأجسام الحرة اللي بتسبب تلف البشرة / بيحارب ترهل البشرة وطبعاً ده لازم نتناول يومياً اي حاجة محتوية على هذا الفيتامين طبعاً الأطعمة المحتوية عليه زي البرتقال / الليمون/ اليوسفي / الطماطم/ الفلفل الملون / الكرز / الجريب فروت....الخ البيض Eggs صفار البيض هي مصدر مهم للفيتامين A، الذي يساعد جلدك على إصلاح نفسه صفار البيض أيضا مصدرا للبيوتن، فيتامين ب المركب، الذي يعتبر ضروريا لصحة الجلد والأظافر يحتوي صفار البيض أيضا على الليسيثين، الذي هو مرطب ينعم الجلد يتكون بياض البيضة، من 40 من البروتينات المختلفة والمياه. بياض البيض يوضع كاماسك للوجه وهو معروف بانه بيشد الجلد المترهل جامد لفترة مؤقتة الأطعمة البحرية Seafood فيها أوميجا 3 ودي ذكرنا فائدتها وكمان فيها زنك وده حلو جداً لمحاربة حب الشباب الناتج عن خلل الهرمونات العسل الأبيض Honey أهم حاجة مايكونش مغشوش........ممكن يوضع على الوجه ك ماسك او أخد معلقة صباحاً هو مفيد جداً للبشرة الجافة لأنه مرطب قوي بيجذب الترطيب وكمان بيحجزه داخل البشرة وأيضاً مضاد للبكتريا لأنه بيعمل بيئة مؤقتة غير صالحة لها لما بيتحط كا قناع هاأكمل بقية الموضوع في المشاركة اللخامساً: نصائح بسيطة مفيدة للبشرة 1- تناول 2 لتر يومياً على الأقل من الماء مهم جداً للحفاظ على شباب ونعومة البشرة لأن الخلايا بتتكون في الأساس من الماء 2- أستخدام صن بلوك قبل التعرض للشمس لأن الشمس ضررها على البشرة رهيب بدأً من تغير لون البشرة الى البقع الى التجاعيد الى الخطوط الى تلف وشيخ البشرة بصورة مبكرة حتى لو لابسة نقاب الصن بلوك يكون فلويد في حالة البشرة الدهنية والمركبة ويكون كريمي في حالة البشرة العادية والجافة 3- الأصابة بالأنيميا أو سوء التغذية بتأثر على شكل البشرة ولونها وبتسبب كمان عدم توحد اللون لازم نحرص على العلاج والتغذية السليمة وممكن نعود انفسنا على تناول حبوب الخميرة ودي في الصيدليات وثمنها 6 جنيه مش غالية ناخد حبة أو أثنين يومياً قبل الأفطار إذا كنا مش عاوزين الوزن يزيد او بنحاول نخسس او بعد الأفطار في حالة الرغبة في زيادة الوزن 4- في حالة وجود حبوب أو التهابات في البشرة نلجأ لطبيب متخصص للعلاج مش ناخد الدواء بتاع اختنا الكبيرة أو صاحبتنا لأن كل حالة لها علاج مختلف وكل علاج له مادة فعالة مختلفة في التأثير والنسبة والنوع........الخ 5- عدم شراء أي منتج من النت مجهول المصدر لأن أي منتج حاصل على التصريح هنلاقيه في الصيدليات والهايبر ماركت عادي وبلاش نصدق الكلام بتاع النت عن المدح والشكر في منتج أنا لو نصابة معدومة الضمير ممكن أأجر 100 بنت تدخل باكونت تكتب قصائد شعر في الكريم الفلاني مادام هاكسب ملايين من وراه 6- أصحاب البشرة الدهنية لازم الأمتناع عن المياه الغازية والطعام المقلي لأن الزيوت والسكريات والدهون دي كلها بتأثر سلبياً على البشرة ونخلي الأولوية للأكل المسلوق والمشوي أخر جزء في الموضوع عن خلطات لماسكات ومقشرات منزلية نبدأ 1- مقشر عالي الترطيب للبشرة الدهنية المكونات: في الصورة موضوع شامل عن العناية ببشرة الوجه 1 معلقة عسل 1/2 معلقة بيكنج صودا 1/2 معلقة عصير ليمون ذرة سكر الطريقة: نمزج المكونات مع بعض في طبق كويس بأصابع نظيفة نضعها على الوجه وندلك بحركات دائرية لمدة دقيقتين ونشطف الوجه بالماء ماسك للحبوب والبثور المكونات في الصورة موضوع شامل عن العناية ببشرة الوجه 1 بياض بيضة صغيرة 1/2معلقة عسل نحل عصير نصف ليمونة الطريقة: تمزج المكونات جيداً حتى يصير لونها وقوامها يشبه الكريمة وعلى وجه نظيف توزع باستخدام قطنة وتترك على الوجه حوالي 15 دقيقة ثم تشطف بماء فاتر ماسك لمقاومة التجاعيد وتقليل مظهرها المكونات: في الصورة موضوع شامل عن العناية ببشرة الوجه 1 موزة صغيرة مهروسة جيداً 1 معلقة عصير برتقال 1 معلقة زبادي الطريقة: تمزج المكونات جيداً ثم توضع على وجه نظيف وتترك لمدة 15 دقيقة ثم تشطف بالماء ماسك للبشرة الجافة المكونات: كما في الصورة موضوع شامل عن العناية ببشرة الوجه 1 معلقة عسل نحل طبيعي 1 معلقة أفوكادو معجون 1 معلقة زيت جوز هند أصلي الطريقة: تمزج المكونات ثم توضع على الوجه لمدة 15 دقيقة ثم تشطف بالماء ماسك للبشرة الدهنية المكونات: 1/2 خيارة 1 معلقة عصير ليمون 1 معلقة نعناع طازج 1 بياض بيضة صغيرة الطريقة: يتم قطع الخيارة والنعناع ثم توضع المكونات كلها في الخلاط حتى التجانس ثم توضع في الثلاجة لمدة 10 دقائق ثم يوضع القناع على وجه نظيف ويترك لمدة 15 دقيقة يشطف بماء دافيء أولاً ثم ماء بارد ماسك للبشرة المركبة المكونات: 1 معلقة ماء ورد 1 معلقة جلسرين عصير نصف ليمونة الطريقة: تمزج المكونات ثم توضع على الوجه لمدة 10 دقائق وتشطف أتمنى الموضوع يكون أفادكم ومش مسامحة أي واحدة مش هاتقيم ولا هتحط رد ولو بسيط ودي هدية مني للي هاترد وتقيم الموضوع ي جاية   مواضيع ذات صلة |
شامل دسم عن العناية ببشرة الوجه