ازياء - فساتين سهرة و مكياج و طبخ

باباغنوج على طريقتى الخاصه كيلو باذنجان رومى + 2 بصله متوسطه + 2قرن فلفل رومى + قرن فلفل شطه + 5فص توم بقشره او معلقه توم مهروس + ملح + كمون + ملعقة صغيره كسبره ناشفه + طحينه + خل + عصير 2 ليمونه الطريقه نغسل الباذنجان بقشره ونحط صاجه على النار ونحط الباذنجان للشوى او نشويه فى صينيه مفروشه فويل فى الفرن ونغسل الفلفل ونسيبه صحيح و البصل نسيبه بقشره والتوم بقشره ونحط كل الحاجات دى تتشوى مع بعض فى الفرن بس خلى بالك الفلفل مبيخدش وقت وتقلبيه باستمرار عل الجنب التانى لانه بيتشوى بسرعه والتوم والبصل محتاجين تقليب باستمرار والى يتشوى خرجيه على طول البصل تعرفيه لما قشرته تميل للون الاسود وتدخلى شوكه او عود خله تلاقيه طرى تخرجيه والباذنجان هينزل ميه وقشرته هتنفصل عنه وشيلى حته من القشره واختبرى السوا ...... اول مايستوى خرجيه وقشريه و هو سخن علشان لوبرد من غير تقشير هيلزق فى بعضه وبعدين بالشوكه اهرسى الباذنجان وقشرى التوم واهرسيه بالشوكه والبصل قشريه وقطعيه بالسكينه على القطاعه فرم صغن صغن وضيفيه للباذنج والتوم والفلفل قشريه القشره وهو مشوى بتطع بسهوله واهرسيه بالشوكه مع الحاجات الى فات وقلبى كله مع بعضه وأخلطيهم كويس مع بعض وهاتى سلطانيه غويطه وحطى فيها 3 الى 4 معلقه كبيره طحينه وحطى عليها الملح والكمون ورشة فلفل اسود ونص معلقه كسبره ناشفه وناعمه وضيفى الخل والليمون وقلبى هتلاقيها تقلت جداْ ضيفى 1/2 كوب ماء وقلبى علشان نخفها شويه تبقى فى قوام المهلبه وطبعاْ ظبطى الملح وبعدين ضيفى الخضار المشوى والمهروس عليها وقلبى كويس جدا ولو محتاجه ليمون او معلقه خل حطى واظبى الطعم ولو بتحبيها سبايسى حطى قرن الشطه المشوى او معلقة شطه ناشفه وعند التقديم افرمى ورق كسبره خضرا ورشيه عليها من فوق ودى طريقتى فى البابا غنوج جربوها وادعولى وبالهنا و الشفا