ازياء - فساتين سهرة و مكياج و طبخ

شوربة السى فود

المقادير للشوربة: (لشخصين)

• جمبرى أو حلقات كالامارى أو جندوفلى أو مزيج منهم كلهم… حسب بتحبوا إيه

• نص بصلاية صغيرة متقطعة صغير

• فصين توم مهروسين

• فصين حبهان- فصين مستكة- ورقة لاورا

• كرفس متقطع (حوالى معلقة كبيرة بعد التقطيع)

• نص كوباية لبن خالى الدسم عليها معلقة نشا صغيرة

• ملح

المقادير لأساس الشوربة:

• قشر الجمبرى

• فلفل رومى متقطع

• طماطماية متقطعة

• بصلاية متقطعة

• توم متقطع

• فلفل أسود- كمون

• شرايح ليمون

الطريقة:

• لأساس الشوربة: نحط كل المكونات مع بعض وعليهم مية بحيث تغطيهم بقيمة عقلة صباع زيادة ونسيبهم يغلوا على نار متوسطة حوالى ساعة… بعدين نصفيهم… كدة بقى عندنا أساس الشوربة..

• للشوربة نفسها بقى: الجمبرى أو الكالامارى نكون غسلينه كويس طبعا ومتبلينه بشوية ملح بسيط وتوم وليمون

• فى الحلة: نحط معلقة صغيرة زيت ذرة ونشوح البصلة لحد ماتبقى دهبى

• ننزل عليها بالتوم المهروس والجمبرى والحبهان والمستكة وورقة اللورا ونقلبهم مع بعض عشان الجمبرى ياخد من ريحة التوابل.. خلى بالكوا كل ده لازم يحصل بسرعة عشان أصلا الجمبرى مش بيغيب ع النار… فا مش عايزينه يستوى زيادة

• بعدين نضيف عليهم أساس الشوربة اللى عملناه ونظبط الملح والفلفل ونسيبهم خمس دقايق يغلوا مع بعض

• أضيف الكرفس وأسيبه ياخد غلوة

• أكون محضرة اللبن ومدوبة فيه معلقة النشا وأنزل بيهم ع الشوربة وأقلب (أنا مش عايزة الشوربة تتقل… وضيفة النشا هنا بس إنها تمنع إن اللبن يفصل ويتكتل فى الشوربة مش أكتر)

وعليها عصرة الليمون الجميلة وبألف هنا عليكوا